Thaum tej kev puas ntsoog loj los ze zuj zus, ntau tus ntseeg tos ntsoov kom tos txais tau tus Tswv es lawv thiaj li dim tej kev puas tsuaj thiab nkag mus rau hauv lub nceeg vaj saum ntuj ceeb tsheej. Tiam sis thaum hais txog qhov tos txais tus Tswv txoj kev rov qab los ntawd, cov tib neeg muaj ntau yam cwj pwm sib txawv. Ib txhia ua raws li tus Tswv tej lus qhia. Lawv ceev faj thiab thov Vajtswv, nquag nrhiav thiab tshawb xyuas, thiab mloog ntsoov tus nraug vauv lub suab. Tiam sis, lwm cov ces nyob hauv lawv tej tsev pe hawm, tsuas tos tus Tswv los saum tauv huab xwb. Lawv ua li no yog saib raws li qhov Tswv Yexus hais tias: “Tom qab kiag thaum muaj txoj kev txom nyem loj (kev puas ntsoog loj) ntawd ces lub hnub yuav tsaus, thiab lub hli yuav tsis ci ntsa lawm, thiab cov hnub qub yuav poob saum ntuj los, thiab lub ntuj yuav tshee co qig txoog: Thiab lawv qab ntawd yuav tshwm lub cim ntawm Neeg Leej Tub rau saum ntuj: thiab lawv qab ntawd txhua haiv neeg ntawm lub ntiaj teb no yuav quaj ntsuag, thiab lawv yuav pom Neeg Leej Tub hauv ib cov huab saum ntuj nrog lub hwj chim thiab yeeb koob loj los” (Mathai 24:29–30). Lawv xav tias, “Lo lus faj lem no yog tus Tswv Nws tus kheej hais kiag. Peb tos txais tus Tswv los ntawm qhov tos kom pom Nws los saum tauv huab. Puas muaj qhov twg tsis yog?”

Qhov tos txais tus Tswv saib raws li tej lus faj lem hauv phau Vajluskub ntawd mas yeej tsis muaj qhov tsis yog, tiam sis nyuaj hais qhov uas tos tus Tswv los saum tauv huab ntawd puas mus raws li Vajtswv txoj kev npaj siab tiag, vim Tswv Yexus cov lus faj lem tseem ceeb yog hais tias Nws qhov kev rov qab los yog ua Neeg Leej Tub, los yam zais ntshis. Piv txwv li, Tswv Yexus tau hais lus faj lem tias: “Vim ib yam li xob laim tim sab hnub tuaj tuaj, thiab ci mus txog ntua rau sab hnub poob; yog li thaum Neeg Leej Tub los kuj yuav zoo ib yam nkaus li ntawd” (Mathai 24:27). “Thaum Nau-a tiam zoo li cas, yog li qhov kev rov qab los ntawm Neeg Leej Tub los kuj yuav zoo tib yam nkaus li ntawd thiab” (Mathai 24:37). “Vim zoo ib yam nkaus li xob laim, uas laim txias saum ib sab ntuj tuaj, ci ntsa paug mus rau ib sab ntuj; yog li Neeg Leej Tub yuav zoo tib yam nkaus li ntawd nyob rau hnub Nws rov los. Tab sis ua ntej tshaj Nws yuav tsum raug kev txom nyem ntau yam, thiab yuav raug cov neeg tiam no tsis lees txais” (Luka 17:24–25). Tswv Yexus kuj tau hais lus faj lem tias: “Yog li ntawd nej kuj yuav tsum npaj kom txhij: vim Neeg Leej Tub yuav los rau teev uas nej xav tsis txog ntawd” (Mathai 24:44). “Thiab thaum ib tag hmo muaj ib lub suab qw tias, Saib nawb, tus nraug vauv tuaj lawm lau; nej tawm tuaj ntsib nws” (Mathai 25:6). Tej lus faj lem no puav leej hais tias “Neeg Leej Tub yuav los” los sis “qhov kev rov qab los ntawm Neeg Leej Tub.” Lo lus “Neeg Leej Tub” yog hais txog Tus uas yug los ntawm tib neeg. Hais ua lwm lo lus ces yog, Vajtswv yuav hnav lub cev nqaij daim tawv thiab los ua ib tug tib neeg zoo li sawv daws, los yam zais ntshis rau hauv tib neeg nruab nrab los hais lus thiab ua hauj lwm. Qhov no mas txawv tag nrho ntawm qhov uas tshwm sim los saum tauv huab rau sawv daws pom. Muaj ntau cov lus faj lem uas hais txog tus Tswv rov qab los ua Neeg Leej Tub, vim li cas lub ntiaj teb ntawm sab kab lis kev cai ntseeg ho tsom xaiv rau tej lus faj lem uas hais txog Nws los saum tauv huab xwb? Vim li cas lawv thiaj li tsis xaiv tej lus faj lem uas hais txog Neeg Leej Tub los, hais txog Neeg Leej Tub qhov kev los? Qhov no muaj ntau yam zais cia.

Ua ntej, peb yuav tsum to taub tias tus Tswv tej lus faj lem uas hais txog “Neeg Leej Tub yuav los” thiab “tus nraug vauv tuaj lawm,” thiab lo lus faj lem uas hais txog Nws los saum tauv huab ntawd muaj qhov txawv uas loj tshaj plaws nyob rau qhov twg. Peb yuav tsum pom meej tias lub sij hawm thiab tej xwm txheej ntawm ob hom lus faj lem no mas txawv tag nrho. Qhov xwm txheej ntawm Neeg Leej Tub los yog dab tsi? Tswv Yexus tau hais lus faj lem tias: “Thaum Nau-a tiam zoo li cas, yog li qhov kev rov qab los ntawm Neeg Leej Tub los kuj yuav zoo tib yam nkaus li ntawd thiab” (Mathai 24:37). Thaum Nau-a tiam, tib neeg noj, haus, sib yuav, thiab muab ntxhais rau luag yuav. Qhov xwm txheej ntawm Neeg Leej Tub los ntawd yeej pom meej tias tsis yog nyob hauv lub sij hawm muaj tej kev puas ntsoog loj, tiam sis yog nyob rau lub sij hawm uas tib neeg muaj lub neej li ib txwm ua ntej tej kev puas ntsoog loj los txog. Tiam sis, qhov los saum tauv huab mas yuav tshwm sim tom qab tej kev puas ntsoog loj lawm. Yog li ntawd, Tswv Yexus thiaj li pheej hais tias, “Nej yuav tsum ceev faj thiab npaj roj tos txais tus Tswv.” Qhov no txhais tau tias tos txais Neeg Leej Tub uas yug los ua neeg ua ntej tej kev puas ntsoog. Nws kuj tau hais lus faj lem txog tej qhov kawg uas sib txawv ntawm cov nkauj xwb ntse thiab cov nkauj xwb ruam. Cov uas tos txais Neeg Leej Tub uas yug los ua neeg ua ntej tej kev puas ntsoog yog cov nkauj xwb ntse. Cov nkauj xwb ntse no mus koom rooj mov ntawm lub nceeg vaj saum ntuj ceeb tsheej thiab tau ntsib tau pom kev txiav txim ntawm Khetos lub zwm txwv hauv ntej es raug ntxuav kom dawb huv. Lawv raug ua kom zoo tiav log dhau los ua cov kov yeej thiab nkag mus rau hauv Vajtswv lub nceeg vaj. Tiam sis cov neeg hauv sab kab lis kev cai ntseeg uas pheej tos tus Tswv los saum tauv huab mam li tos txais Nws yog cov nkauj xwb ruam. Qhov kawg ntawm cov uas tos kom pom tus Tswv los saum tauv huab yog dab tsi? Qhov ntawd qhov kawg ces yog “txhua haiv neeg hauv ntiaj teb yuav quaj tu siab vim yog Nws.” Qhov no qhia meej tias lawv plam lub cib fim tos txais Neeg Leej Tub uas yug los ua neeg thiab raug txiav txim, raug teem txim, thiab raug rau txim lawm. Zoo ib yam li Thauma, tus uas tsuas lees paub Tswv Yexus tias yog tus Tswv thiab Khetos thaum nws pom Tswv Yexus lub cev sab ntsujplig tshwm sim xwb. Vim li no, nws thiaj li raug tus Tswv teem txim lawm. Zoo ib yam li Tswv Yexus tau hais: “Vim koj tau pom Kuv lawm, koj thiaj li ntseeg: tau koob hmoov ces yog lawv cov uas tsis tau pom, thiab tiam sis twb ntseeg lawm” (Yauhas 20:29). Los ntawm qhov no, peb pom tau tias tej qhov kawg ntawm cov uas tos txais tus Tswv ua ntej tej kev puas ntsoog thiab cov uas tos txais Nws tom qab tej kev puas ntsoog yeej sib txawv tag nrho. Tus Tswv txoj kev npaj siab yog kom tib neeg tos txais Nws ua ntej tej kev puas ntsoog, thiab yeej tsis yog tom qab tej kev puas ntsoog loj xaus lawm mam li tos txais.

Tam sim no cia peb tham txog qhov tseem ceeb ntawm kev tos txais tus Tswv ua ntej tej kev puas ntsoog. Tus Tswv Yexus hais tias: “Kuv tseem muaj ntau yam hais rau nej, tab sis nej ris tsis taus tej ntawd tam sim no. Txawm li cas los xij, thaum Nws, tus Ntsujplig ntawm qhov tseeb, los, Nws yuav coj nej mus rau txhua qhov tseeb” (Yauhas 16:12–13). Phau Qhia Tshwm kuj hais lus faj lem tias: “Saib nawb, Kuv sawv ntawm qhov rooj, thiab khob: yog tias tus tib neeg twg hnov Kuv lub suab, thiab qhib qhov rooj, Kuv yuav los rau nws, thiab yuav nrog nws noj mov, thiab nws nrog Kuv” (Qhia Tshwm 3:20). “Rau tus uas kov yeej, Kuv yuav pub zaum nrog Kuv nyob rau ntawm Kuv lub zwm txwv, ib yam li Kuv tau kov yeej thiab, thiab tau zaum nrog Kuv Txiv nyob rau ntawm Nws lub zwm txwv” (Qhia Tshwm 3:21). Los ntawm tej lus faj lem no, peb pom tias ua ntej tej kev puas ntsoog, tus Tswv yuav ua ib theem hauj lwm: tes hauj lwm txiav txim pib ntawm Vajtswv lub tsev. Qhov no txhais tau tias ua ntej tej kev puas ntsoog, tus Tswv yuav nthuav tawm qhov tseeb thiab ua tes hauj lwm txiav txim los ntxuav kom dawb huv thiab cawm ib pab neeg thiab ua kom lawv dhau los ua cov kov yeej. Cov kov yeej uas phau Qhia Tshwm hais lus faj lem txog ntawd, yeej paub tseeb yam tsis ua xyem xyav li tias, lawv yog cov uas raug ua kom zoo tiav log ua ntej los sis thaum muaj tej kev puas ntsoog. Yav tas los peb txhua tus yeej tau hnov tias thaum tej kev puas ntsoog loj pib, ces lub qhov rooj ntawm kev cawm dim yuav kaw lawm. Ces yog, Vajtswv tes hauj lwm uas cawm tib neeg ntawd tiav tag nrho lawm. Yog li ntawd, yog peb tos tus Tswv nqis los saum tauv huab, uas yuav tshwm sim thaum tej kev puas ntsoog xaus lawm, Vajtswv puas tseem yuav ua tes hauj lwm cawm tib neeg lawm? Qhov ntawd yeej tsis ua lawm. Zoo ib yam li Vajtswv Tus Uas Muaj Hwj Chim Loj Kawg Nkaus cov lus hais tias: “Tej zaum ntau tus tib neeg yuav tsis quav ntsej txog yam uas Kuv hais, tiam sis Kuv tseem xav qhia rau txhua tus uas hu ua cov neeg dawb huv uas raws Yexus qab hais tias, thaum nej ob lub qhov muag pom kiag Yexus nqis saum ntuj los rau saum ib tauv huab dawb lawm, qhov no yuav yog lub sij hawm uas Lub Hnub ntawm txoj kev ncaj ncees tab meeg tshwm los rau sawv daws pom. Tej zaum lub sij hawm ntawd yuav yog ib lub sij hawm uas koj zoo siab heev. Txawm li cas los xij, koj yuav tsum paub hais tias lub sij hawm thaum koj pom Yexus nqis saum ntuj los ntawd kuj yuav yog lub sij hawm uas koj mus rau hauv ntuj tawg mus raug rau txim thiab, yog lub sij hawm uas tshaj tawm hais tias Vajtswv txoj kev npaj tswj hwm twb xaus lawm, thiab yog thaum uas Vajtswv muab nqi zog rau cov neeg zoo hos rau txim rau cov neeg phem. Rau qhov Vajtswv txoj kev txiav txim yuav xaus ua ntej tib neeg pom tej cim, thaum uas tsuas muaj kev nthuav qhov tseeb tawm lawm xwb. Cov uas lees txais qhov tseeb thiab tsis nrhiav tej cim, thiab raug ntxuav dawb huv lawm, yuav raug coj los rau ntawm Vajtswv lub zwm txwv thiab nkag mus rau hauv Tus Tswv Tsim lub xub ntiag. Tsuas yog cov uas pheej ntseeg hais tias ‘Tus Yexus uas tsis caij ib tauv huab dawb ces yog tus khetos cuav’ xwb thiaj li yuav raug rau txim mus ib txhis, rau qhov lawv tsuas ntseeg tus Yexus uas ua tej cim xwb, tiam sis tsis lees paub tus Yexus uas muab txoj kev txiav txim hnyav nthuav tawm thiab muab txoj sia thiab txoj hau kev tseeb tso tawm. Yog li ntawd tsuas muaj tias Yexus mam saib xyuas lawv thaum Nws tab meeg rov qab los saum ib tauv huab dawb los xwb” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Thaum Lub Sij Hawm Koj Pom Yexus Lub Cev Sab Ntsujplig, Vajtswv Yuav Tsim Lub Ntuj thiab Lub Ntiaj Teb Tshiab Lawm). Vajtswv Tus Uas Muaj Hwj Chim Loj Kawg Nkaus cov lus yeej hais meej tshaj plaws li. Peb hais tau yam paub tseeb tias cov uas tuav ruaj qhov tos txais tus Tswv thaum Nws los saum tauv huab tom qab tej kev puas ntsoog ntawd xwb yuav raug kev puas tsuaj, vim lawv yuav plam lub cib fim lees txais kev txiav txim, raug ntxuav kom dawb huv, thiab raug cawm dim lawm. Lawv yuav plam lub cib fim los lees txais tej qhov tseeb thiab tes hauj lwm txiav txim uas tus Vajntsujplig ntawm qhov tseeb nthuav tawm. Lawv yuav tsis muaj hnub tau pom Vajtswv lub ntsej muag li lawm.

Tam sim no tej kev puas tsuaj twb pib lawm. Vajtswv tes hauj lwm cawm tib neeg twb yuav xaus, thiab tom qab ntawd peb yuav nkag mus rau peb xyoos thiab ib nrab xyoo kawg ntawm tej kev puas ntsoog loj. Qhov ntawd yuav yog tej kev puas ntsoog loj uas yuav rhuav tshem tib neeg tag nrho. Yog tias tam sim no tseem tos txais tsis tau tus Tswv mas yog qhov uas phom sij heev; koj yuav plam koj txoj sia thaum twg los tau. Qhov uas tsis nrhiav thiab tshawb xyuas txoj hau kev tseeb thiab lees txais tag nrho tej qhov tseeb uas “Neeg Leej Tub” nthuav tawm ntawd mas yog qhov ruam tshaj plaws. Cov neeg no yeej yog cov nkauj xwb ruam thiab tsuas raug tus Tswv muab tso tseg thiab tshem tawm xwb. Peb hais tau tias kev tos txais tus Tswv tam sim no mas yog ib qho uas maj ceev heev. Seb koj puas tos txais tau tus Tswv ua ntej tej kev puas ntsoog loj uas rhuav tshem tib neeg thiab lees txais Vajtswv txoj kev txiav txim ntawm tiam kawg kom raug ntxuav dawb huv ntawd mas yuav txiav txim ncaj qha rau koj qhov kawg nyob hauv tej kev puas ntsoog loj tias: ciaj los sis tuag!