Qhov kev cia siab loj tshaj plaws rau cov ntseeg tus Tswv yog tos txais tau Nws qhov kev rov qab los thiab raug qaws mus rau lub nceeg vaj saum ntuj ceeb tsheej. Tam sim no tej kev puas ntsoog loj twb pib lawm, kev tos txais tus Tswv yog ib qho uas maj ceev tshaj plaws. Lub ntiaj teb ntawm sab kab lis kev cai ntseeg, saib raws li cov lus hauv phau Vajluskub tias, “Nej cov neeg Kalilais, vim li cas nej sawv ntsia mus rau saum ntuj? Tib tug Yexus no, uas tau raug muab coj tawm ntawm nej mus rau saum ntuj lawm, ces yuav rov los zoo tib yam nkaus li qhov uas nej pom Nws mus rau saum ntuj lawm” (Tubtxib Tes Haujlwm 1:11), ntseeg tias tom qab tus Tswv Yexus sawv hauv qhov tuag rov qab los Nws tau nce mus saum ntuj hauv lub cev sab ntsujplig saum ib tauv huab, ces Nws kuj yuav rov qab los hauv lub cev sab ntsujplig, los saum ib tauv huab thiab. Lawv txhua tus puav leej tos kom pom tus Tswv Yexus lub cev sab ntsujplig nqis saum ntuj los saum ib tauv huab los coj lawv mus rau lub nceeg vaj saum ntuj ceeb tsheej. Tiam sis lawv puas yuav ua tau tiav hauv qhov kev tos txais tus Tswv li no tiag? Vim li cas cov ntseeg thiaj li tsis saib raws li tus Tswv Yexus cov lus los ntseeg tus Tswv thiab tos txais tus Tswv es hos saib raws li cov tub txib saum ntuj cov lus ma? Thaum kawg leej twg yog tus Tswv, thiab leej twg yog Vajtswv? Thaum hais txog qhov teeb meem tseem ceeb ntawm kev tos txais tus Tswv rov qab los ntawd, peb tsim nyog ntseeg tus Tswv cov lus los sis cov tub txib saum ntuj cov lus? Cov lus uas kuv nyuam qhuav hais ntawd yeej pom meej tias yog cov tub txib saum ntuj hais. Lawv tsuas hais tias Tswv Yexus yuav rov qab los ib yam li Nws mus, tiam sis lawv tsis hais lwm yam lawm. Peb puas tuaj yeem paub tseeb los ntawm qhov no tias tus Tswv yuav rov qab los hauv ib lub cev sab ntsujplig? Tus Tswv Yexus hais tias: “Tab sis hnub ntawd thiab lub sij hawm ntawd mas tsis muaj tib neeg paub li, cov tub txib qaum ntuj uas nyob saum ntuj ceeb tsheej los yeej tsis paub, leej Tub los yeej tsis paub, tab sis tsuas yog leej Txiv thiaj paub xwb” (Malakau 13:32). Yog li cov tub txib saum ntuj yuav paub tau li cas tias tus Tswv yuav rov qab los li cas? Raws li qhov no, cov tub txib saum ntuj tej lus faj lem puas yuav raug? Tus Tswv Yexus yeej tsis tau hais tias Nws yuav rov qab los thiab tshwm sim rau tib neeg hauv ib lub cev sab ntsujplig. Qhov txawv, Nws hais tag hais dua tias Nws yuav los ua “Neeg Leej Tub” thiab “tus nraug vauv.” Piv txwv li: “Vim ib yam li xob laim tim sab hnub tuaj tuaj, thiab ci mus txog ntua rau sab hnub poob; yog li thaum Neeg Leej Tub los kuj yuav zoo ib yam nkaus li ntawd” (Mathai 24:27). “Vim zoo ib yam nkaus li xob laim, uas laim txias saum ib sab ntuj tuaj, ci ntsa paug mus rau ib sab ntuj; yog li Neeg Leej Tub yuav zoo tib yam nkaus li ntawd nyob rau hnub Nws rov los. Tab sis ua ntej tshaj Nws yuav tsum raug kev txom nyem ntau yam, thiab yuav raug cov neeg tiam no tsis lees txais” (Luka 17:24–25). “Thaum ib tag hmo muaj ib lub suab qw tias, Saib nawb, tus nraug vauv tuaj lawm lau; nej tawm tuaj ntsib nws” (Mathai 25:6). Saib raws li Tswv Yexus tej lus faj lem, peb tuaj yeem paub tseeb tias thaum tus Tswv rov qab los, Nws yuav los ua cev nqaij daim tawv ua Neeg Leej Tub, tshwm sim thiab nthuav tawm qhov tseeb los ua Nws tes hauj lwm, thiab ua tes hauj lwm txiav txim ntawm tiam kawg los cawm ib pab tib neeg thiab ua kom zoo tiav log ib pab neeg kov yeej. Nws yuav nthuav dav lub nceeg vaj txoj moo zoo mus rau txhua haiv neeg hauv ntiaj teb, kom Vajtswv lub nceeg vaj thiaj li tshwm sim muaj tiag nyob hauv ntiaj teb. Vajtswv tshwm sim nyob hauv cev nqaij daim tawv los ua Nws tes hauj lwm, kov yeej Ntxwgnyoog thiab tag nrho cov yeeb ncuab tej hwj chim, es tsim Nws lub nceeg vaj nyob hauv ntiaj teb. Qhov no nthuav tawm Vajtswv lub hwj chim loj thiab kev txawj ntse tag nrho, thiab qhov no thiaj li yog qhov uas Vajtswv tau lub yeeb koob lawm.

Tiam sis, tib neeg tsis to taub txog Vajtswv tes hauj lwm li. Lawv tsuas vam khom lawv tus kheej tej kev xav phem thiab kev xav hauv nruab siab, lawv txwv txoj kev uas tus Tswv Yexus rov qab los, xav tias Nws yuav los hauv ib lub cev sab ntsujplig. Lawv tsuas yog yuav lees txais Nws thaum lawv pom Nws lub cev sab ntsujplig los saum tauv huab xwb. Qhov no yog ib qho kev ua yuam kev uas loj tshaj plaws. Thaum tib neeg pom Nws lub cev sab ntsujplig los ntawd, lawv yuav xav tias lawv tos txais tau tus Tswv lawm, tiam sis qhov tseeb tiag, lawv yuav raug kev puas tsuaj lawm. Zoo ib yam li thaum Thauma pom tus Tswv lub cev sab ntsujplig tshwm sim rau nws lawm; tsuas yog thaum ntawd xwb nws thiaj li ntseeg thiab hais tias, “Kuv tus TSWV thiab kuv tus Vajtswv.” Tus Tswv Yexus tsis pom zoo rau nws, tiam sis Nws hais tias: “Vim koj tau pom Kuv lawm, koj thiaj li ntseeg: tau koob hmoov ces yog lawv cov uas tsis tau pom, thiab tiam sis twb ntseeg lawm” (Yauhas 20:29). Nyob rau tiam kawg, tus Tswv los ua cev nqaij daim tawv ua Neeg Leej Tub, nthuav tawm qhov tseeb los ua tes hauj lwm txiav txim. Yog koj tsis ntseeg los sis tsis lees txais qhov no, tiam sis tuav ruaj yuav tos kom txog thaum koj pom tus Tswv lub cev sab ntsujplig los saum tauv huab xwb koj mam li ntseeg, ces koj yuav plam lub cib fim uas raug Vajtswv cawm dim nyob rau tiam kawg lawm. Thaum tus Tswv lub cev sab ntsujplig los, qhov ntawd yuav yog lub sij hawm uas Vajtswv tes hauj lwm txiav txim twb xaus thiab thaum Nws muab nqi zog rau cov ua zoo thiab rau txim rau cov ua phem lawm. Qhov ntawd yuav ua tiav lo lus faj lem hauv phau Qhia Tshwm tias: “Saib nawb, Nws los nrog cov huab; thiab txhua lub qhov muag yuav pom Nws, thiab lawv kuj yog cov nkaug Nws los yeej pom tib si: thiab txhua haiv neeg hauv ntiaj teb yuav quaj tu siab vim yog Nws” (Qhia Tshwm 1:7). Txog thaum ntawd, nws yuav lig dhau lawm. Qhov ntawd yuav yog lub sij hawm uas tib neeg yuav quaj tom hniav qawv, ntaus lawv lub hauv siab nrog txoj kev tag kev cia siab. Cia peb nyeem ib nqe lus: “Tej zaum ntau tus tib neeg yuav tsis quav ntsej txog yam uas Kuv hais, tiam sis Kuv tseem xav qhia rau txhua tus uas hu ua cov neeg dawb huv uas raws Yexus qab hais tias, thaum nej ob lub qhov muag pom kiag Yexus nqis saum ntuj los rau saum ib tauv huab dawb lawm, qhov no yuav yog lub sij hawm uas Lub Hnub ntawm txoj kev ncaj ncees tab meeg tshwm los rau sawv daws pom. Tej zaum lub sij hawm ntawd yuav yog ib lub sij hawm uas koj zoo siab heev. Txawm li cas los xij, koj yuav tsum paub hais tias lub sij hawm thaum koj pom Yexus nqis saum ntuj los ntawd kuj yuav yog lub sij hawm uas koj mus rau hauv ntuj tawg mus raug rau txim thiab, yog lub sij hawm uas tshaj tawm hais tias Vajtswv txoj kev npaj tswj hwm twb xaus lawm, thiab yog thaum uas Vajtswv muab nqi zog rau cov neeg zoo hos rau txim rau cov neeg phem. Rau qhov Vajtswv txoj kev txiav txim yuav xaus ua ntej tib neeg pom tej cim, thaum uas tsuas muaj kev nthuav qhov tseeb tawm lawm xwb. Cov uas lees txais qhov tseeb thiab tsis nrhiav tej cim, thiab raug ntxuav dawb huv lawm, yuav raug coj los rau ntawm Vajtswv lub zwm txwv thiab nkag mus rau hauv Tus Tswv Tsim lub xub ntiag. Tsuas yog cov uas pheej ntseeg hais tias ‘Tus Yexus uas tsis caij ib tauv huab dawb ces yog tus khetos cuav’ xwb thiaj li yuav raug rau txim mus ib txhis, rau qhov lawv tsuas ntseeg tus Yexus uas ua tej cim xwb, tiam sis tsis lees paub tus Yexus uas muab txoj kev txiav txim hnyav nthuav tawm thiab muab txoj sia thiab txoj hau kev tseeb tso tawm. Yog li ntawd tsuas muaj tias Yexus mam saib xyuas lawv thaum Nws tab meeg rov qab los saum ib tauv huab dawb los xwb” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Thaum Lub Sij Hawm Koj Pom Yexus Lub Cev Sab Ntsujplig, Vajtswv Yuav Tsim Lub Ntuj thiab Lub Ntiaj Teb Tshiab Lawm). Los ntawm nqe lus no, peb pom tau tias txhua tus uas tsuas tos tus Tswv los saum tauv huab es tsis lees txais tus Tswv qhov kev tshwm sim thiab tes hauj lwm hauv cev nqaij daim tawv ntawd yuav raug puas tsuaj.