Kuv hlub txhua tus uas xav tau Kuv siab dawb paug. Yog hais tias nej tsom ntsoov kev hlub rau Kuv, ces Kuv yuav foom koob hmoov kom zoo kawg nkaus rau nej xwb xwb. Nej puas nkag siab Kuv tej kev xa ma? Hauv Kuv lub tsev, nws tsis muaj qhov sib txawv ntawm lub meej mom siab thiab lub meej mom qis. Txhua tus yog Kuv tus tub, thiab Kuv yog nej Leej Txiv, nej tus Vajtswv. Kuv yog tus siab tshaj plaws thiab tib tug xwb. Kuv tswj hwm lub qab ntuj khwb thiab tag nrho txhua yam!

Koj yuav tsum “ua hauj lwm rau Kuv yam txo hwj chim thiab nyob rau ntawm qhov tsaus ntuj nti” hauv Kuv lub tsev. Koog lus no yuav tsum yog koog lus taw qhia rau koj lub siab. Txhob ua cov nplooj saum tsob ntoo, tab sis yuav tsum ua cov cag ntoo thiab nthaw cag mus kom tob hauv lub neej. To taub qhov tseeb txog ib qho kev ntsib kev pom ntawm lub neej tiag, ua lub neej raws li Kuv cov lus, nrhiav Kuv kom ntau ntxiv hauv txhua qhov xwm txheej, thiab txav los kom ze Kuv thiab sib qhia nrog Kuv. Txhob quav ntsej rau lwm yam sab nraud, thiab txhob raug tswj los ntawm ib tus neeg twg, ib qho xwm txheej, los sis ib yam twg, tab sis tsuas sib qhia nrog cov neeg sab ntsujplig txog qhov Kuv yog xwb. Nkag siab Kuv tej kev xav, cia Kuv lub neej ntws los rau ntawm koj, thiab ua lub neej raws li Kuv cov lus thiab ua raws li Kuv tej kev cheem tsum.

Fij tag nrho koj lub zog rau tej xwm txheej uas Kuv tau txib koj; ua txhua yam koj ua tau kom txaus Kuv lub siab. Kuv yog koj lub hwj chim thiab Kuv yog koj txoj kev xyiv fab…. Kuv yog txhua yam rau koj. Tsuas caum Kuv qab xwb. Kuv paub tej kev ntshaw tiag ntawm koj lub siab thiab tias koj ua siab dawb paug muab koj tus kheej fij rau Kuv, tab sis koj yuav tsum paub tias yuav nthuav qhia kev ncaj ncees rau Kuv li cas hauv Kuv lub tsev thiab yuav raws Kuv qab mus txog qhov kawg li cas.

Pawg ntseeg yog Kuv lub siab thiab Kuv tab tom kub siab hlo nrawm nroos rau kev tsim ua Kuv pawg ntseeg. Koj yuav tsum muab koj tus kheej fij rau Kuv los ntawm kev muab koj tus kheej fij yam tsis muaj qhov tshwj tseg, thiab nthuav qhia txoj kev xav rau Kuv tej kev xav kom ua rau txaus Kuv lub siab nyiam.