Vajtswv Tej Lus Tseem Ceeb:

Txhua tus neeg uas muaj peev xwm ua raws li txoj kev kaj ntawm Vajntsujplig Dawb Huv niaj hnub no yog cov tau koob hmoov. Cov tib neeg tiam yav dhau los los kuj ua raws li Vajtswv cov hneev taw thiab, txawm li ntawd los lawv tsis tuaj yeem ua kom los txog rau niaj hnub nim no; qhov no yog txoj koob hmoov rau cov neeg thaum lub sij hawm kawg. Cov tib neeg uas tuaj yeem ua raws li tes hauj lwm ntawm Vajntsujplig Dawb Huv, thiab cov uas muaj peev xwm ua raws li Vajtswv cov hneev taw, xws li tias Vajtswv coj lawv mus qhov twg los lawv mus tib si—cov no yog cov neeg uas tau txais koob hmoov los ntawm Vajtswv. Cov tib neeg uas tsis ua raws li tes hauj lwm ntawm Vajntsujplig Dawb Huv tsis tau paub qhov tseeb txog txoj hauj lwm ntawm Vajtswv cov lus, thiab txawm hais tias lawv yuav ua dej num ntau npaum li cas, los sis lawv yuav raug tsim txom hnyav npaum li cas, los sis lawv khiav txoj dej num ntau npaum li cas los, tsis muaj ib yam dab tsi yog ua rau Vajtswv, thiab Nws yuav tsis qhuas lawv li. Hnub no, txhua tus uas ua raws li Vajtswv cov lus niaj hnub no yog cov yoog raws li Vajntsujplig Dawb Huv; cov tib neeg uas tsis paub txog Vajtswv cov lus niaj hnub no yog cov tsis yoog raws li Vajntsujplig Dawb Huv, thiab cov neeg zoo li no Vajtswv tsis qhuas. Tes dej num uas ncaim ntawm Vajntsujplig Dawb Huv cov lus hais lawm ces yog tes dej num ntawm sab nqaij tawv, thiab yog cov kev xav phem, thiab nws tsis muaj peev xwm ua tau raws li Vajtswv lub siab nyiam. Yog tias tib neeg ua neej nyob nrog rau cov kev xav phem ntawm kev lig kev cai ntseeg xwb, ces lawv tsis muaj peev xwm yuav ua tau ib yam dab tsi kom haum raws li Vajtswv lub siab nyiam li, thiab txawm hais tias lawv ua dej num rau Vajtswv los xij, lawv ua dej num raws li lawv txoj kev xav thiab cov kev xav phem, thiab tsis muaj peev xwm ua dej num tau raws li Vajtswv lub siab nyiam kiag li. Cov tib neeg uas tsis muaj peev xwm ua raws li tes hauj lwm ntawm Vajntsujplig Dawb Huv tsis nkag siab txog Vajtswv lub siab nyiam, thiab cov tib neeg uas tsis nkag siab txog Vajtswv lub siab nyiam tsis tuaj yeem ua dej num tau rau Vajtswv. Vajtswv xav tau tes dej num uas ua haum raws li Nws lub siab xwb; Nws tsis xav tau tes dej num uas yog ntawm cov kev xav phem thiab sab nqaij tawv. Yog tias tib neeg tsis muaj peev xwm ua raws li cov kauj ruam ntawm Vajntsujplig Dawb Huv txoj hauj lwm, ces lawv ua neej nyob nrog cov kev xav phem. Tes dej num ntawm cov tib neeg zoo li no cuam tshuam thiab thab plaub, thiab tes dej num zoo li no tsis mus raws li Vajtswv lub siab nyiam. Yog li cov tib neeg uas tsis muaj peev xwm ua raws li Vajtswv cov hneev taw tsis muaj peev xwm ua tau dej num rau Vajtswv; cov tib neeg uas tsis muaj peev xwm ua raws li Vajtswv cov hneev taw feem ntau yeej tawm tsam Vajtswv, thiab tsis muaj peev xwm ua tau haum nrog Vajtswv. “Qhov ua raws li Vajntsujplig Dawb Huv tes hauj lwm” txhais tau hais tias muaj kev nkag siab txog Vajtswv lub siab nyiam hnub no, muaj peev xwm ua raws li Vajtswv txoj kev cheem tsum kom ua niaj hnub no, muaj peev xwm mloog lus thiab ua raw li Vajtswv hais hnub no, thiab muaj kev paub meej raws li cov lus hais tshiab ntawm Vajtswv. Tsuas yog qhov no xwb thiaj li yog tus neeg uas ua tes hauj lwm ntawm Vajntsujplig Dawb Huv thiab yoog raws li Vajntsujplig Dawb Huv. Cov tib neeg zoo li no tsis yog tias tsuas muaj peev xwm tau txais Vajtswv lo lus qhuas thiab kev pom Vajtswv xwb, tiam sis kuj tuaj yeem paub txog Vajtswv tus yam ntxwv los ntawm Vajtswv txoj hauj lwm tshiab thiab, thiab tuaj yeem paub txog tib neeg cov kev xav phem thiab kev tsis mloog lus, thiab tib neeg tus yeeb yam thiab lub ntsiab tseem ceeb, los ntawm Nws txoj hauj lwm tshiab; deb tshaj ntawd ntxiv, lawv muaj peev xwm maj mam hloov pauv lawv tus yam ntxwv kom tiav rau lub sij hawm ua lawv tes dej num. Tsuas yog cov tib neeg zoo li no xwb thiaj li yog cov uas tau txais Vajtswv, thiab cov uas nrhiav tau txoj tseem kev tseeb tiag. Cov tib neeg uas raug tshem tawm los ntawm Vajntsujplig Dawb Huv tes hauj lwm lawm yog cov neeg uas tsis muaj peev xwm ua raws li Vajtswv txoj hauj lwm tshiab, thiab tawm tsam txoj hauj lwm tshiab ntawm Vajtswv. Tias cov tib neeg uas zoo li no tawm tsam Vajtswv vim hais tias Vajtswv tau ua tiav txoj hauj lwm tshiab lawm, thiab vim tias Vajtswv tus yam ntxwv tsis zoo ib yam li lawv cov kev xav phem—vim qhov ntawm no, lawv thiaj li tawm tsam Vajtswv thiab txiav txim rau Vajtswv, uas ua rau Vajtswv tsis nyiam kiag li thiab tsis lees txais yuav lawv. Muaj kev paub txog Vajtswv txoj hauj lwm tshiab tsis yog ib qho yooj yim, tiam sis yog tias tib neeg muaj lub siab xav ua raws li Vajtswv txoj hauj lwm thiab nrhiav Vajtswv txoj hauj lwm, ces lawv yuav muaj lub sij hawm pom Vajtswv, thiab yuav muaj lub sij hawm tau txais txoj kev pab coj tshiab ntawm Vajntsujplig Dawb Huv. Cov tib neeg uas txhob txwm tawm tsam Vajtswv txoj hauj lwm tsis tuaj yeem tau txais Vajntsujplig Dawb Huv txoj kev qhuab qhia los sis Vajtswv txoj kev pab. Yog li, txawm hais tias tib neeg yuav tau txais Vajtswv txoj hauj lwm thiab tsis tau los yog nyob ntawm Vajtswv txoj hmoov hlub xwb, nws nyob ntawm lawv txoj kev caum, thiab nws nyob ntawm lawv cov kev npaj siab xwb.

Txhua tus tib neeg uas muaj peev xwm mloog Vajntsujplig Dawb Huv cov lus hais niaj hnub no yog cov tau txais koob hmoov. Nws tsis tseem ceeb tias lawv txeev zoo li cas yav dhau los, los sis Vajntsujplig Dawb Huv txeev ua hauj lwm li cas rau lawv yav dhau los—cov neeg uas tau txais txoj hauj lwm tshiab ntawm Vajtswv yog cov tau txais koob hmoov ntau tshaj plaws, thiab cov neeg uas tsis tuaj yeem ua raws li txoj hauj lwm tshiab hnub no raug tshem tawm mus lawm. Vajtswv xav tau cov uas muaj peev xwm lees txais yuav txoj kev kaj tshiab, thiab Nws xav tau cov neeg uas lees txais yuav thiab paub txog Nws txoj hauj lwm tshiab. Vim li cas nws thiaj li hais tias koj yuav tsum yog tus nkauj xwb dawb huv? Ib tug nkauj xwb dawb huv muaj peev xwm nrhiav Vajntsujplig Dawb Huv tes hauj lwm thiab to taub txog tej yam tshiab, thiab ntau tshaj ntawd, muaj peev xwm muab cov kev xav phem qub tso tseg, thiab mloog Vajtswv txoj hauj lwm tshiab hnub no. Pab pawg neeg no, uas tau lees txais yuav txoj hauj lwm tshiab tshaj plaws ntawm hnub no, yog cov tau raug Vajtswv npaj tseg ua ntej lawv tiam lawm, thiab yog cov tib neeg uas tau txais koob hmoov ntau tshaj plaws. Nej hnov Vajtswv lub suab ncaj qha, thiab pom Vajtswv qhov kev tshwm sim, thiab yog li ntawd, thoob plaws lub ntuj thiab lub ntiaj teb, thiab thoob plaws txhua txhua tiam, tsis muaj leej twg tau txais koob hmoov ntau dua nej li, pab pawg neeg no li.

Xaiv tawm los ntawm “Paub Vajtswv Txoj Hauj Lwm Uas Tshiab Tshaj Plaws thiab Ua Raws Li Nws Cov Hneev Taw” nyob hauv Txoj Lus Tshwm Hauv Lub Cev Nqaij Daim Tawv

Kev qhuas tau los txog rau ntawm lub roob Xi-oo lawm thiab Vajtswv lub chaw nyob thiaj tau tshwm los. Lub npe dawb huv uas muaj yeeb koob, tau qhuas los ntawm txhua haiv neeg, mus thoob plaws qhov txhia chaws. Ab, Vajtswv Tus Uas Muaj Hwj Chim Loj Kawg Nkaus! Tus Thawj Coj ntawm lub qab ntuj khwb, Khetos ntawm tiam kawg—Nws yog Lub Hnub ci ntsa iab uas tawm saum Roob Xi-oo tuaj, uas muaj meej mom siab tshaj thiab loj tshaj plaws txhua yam hauv lub qab ntuj khwb …

Vajtswv Tus Uas Muaj Hwj Chim Loj Kawg Nkaus! Peb hu Koj rau txoj kev zoo siab; peb seev cev thiab hu nkauj. Koj yog peb Tus Cawm Dim tiag tiag, tus Vajntxwv zoo tshaj plaws ntawm lub qab ntuj khwb! Koj tau tsim ib pawg kov yeej thiab tau ua tiav hlo Vajtswv txoj kev npaj cawm tib neeg. Tag nrho txhua haiv neeg yuav nce mus rau pem lub roob no. Tag nrho txhua haiv neeg yuav txho caug rau ntawm lub zwm txwv xub ntiag! Koj yog tib tug thiab tus tseem Vajtswv nkaus xwb thiab Koj tsim nyog tau yeeb koob thiab hwm heev. Tag nrho lub yeeb koob, kev qhuas, thiab lub hwj chim yog lub zwm txwv li! Lub qhov dej cawm siav ntws tawm los ntawm lub zwm txwv los, ywg dej thiab pub mov rau Vajtswv cov neeg ntau txhiab leej noj. Lub neej txoj sia hloov pauv nrog txhua hnub; txoj kev kaj thiab kev nthuav tawm tshiab caum raws peb qab, muaj kev to taub tshiab xwm yeem tas li txog Vajtswv. Rau ntawm tej kev pom kev ntsib, peb los txog rau ntawm qhov paub txog Vajtswv tiav hlo lawm. Nws cov lus tau tshwm sim xwm yeem tas li, tau tshwm sim rau hauv cov neeg uas coj yog. Peb tau txais koob hmoov tiag tiag! Ntsib Vajtswv tim ntsej tim muag txhua hnub, sib txuas lus nrog Vajtswv txog txhua yam, thiab txhawb Vajtswv lub hwj chim kav txhua yam. Peb ua tib zoo xav txog Vajtswv txoj lus, peb lub siab nyob ntsiag to rau hauv Vajtswv, thiab yog li peb thiaj los rau ntawm Vajtswv xub ntiag, qhov uas peb tau txais Nws txoj kev kaj. Txhua txhua hnub, hauv peb lub neej, tej kev ua, cov lus, tej kev xav, thiab tej tswv yim, peb nyob rau hauv Vajtswv txoj lus, tuaj yeem faib cais tau txhua lub sij hawm. Vajtswv txoj lus coj kev zoo li txoj xov koob nkag tshab rab koob; xav tsis txog tias, txhua yam raug zais npog nyob sab hauv peb los rau txoj kev kaj, ib qho zuj zus. Kev sib qhia nrog Vajtswv yeej tsis ncua qeeb kiag li; peb tej kev xav thiab tej tswv yim raug npaj los ntawm Vajtswv lawm. Txhua lub sij hawm uas peb nyob rau ntawm Khetos lub rooj zaum xub ntiag qhov uas peb tab tom tau txais kev txiav txim. Txhua qho chaw nyob hauv peb lub cev tseem raug Ntxwgnyoog tswj. Hnub no, yuav ua kom tau Vajtswv lub hwj chim kav rov qab los, Nws lub tuam tsev yuav tsum tau yaug kom dawb huv. Yuav ua kom Vajtswv muaj txhua yam tiav hlo, peb yuav tsum mob siab muab txoj sia-thiab-txoj kev tuag los tsoo. Tsuas yog thaum peb tus kheej qub raug ntsia rau saum tus ntoo khaub lig xwb thiaj li tuaj yeem ciaj rov qab los muaj sia ntawm Khetos tus uas muaj hwm tsav siab tshaj plaws.

Tam sim no Vajntsujplig muab txoj dej num tso txhua ces kaum rau peb txhua tus los ua tsov rog rau peb txoj kev txeeb kom tau rov qab los! Yog li kiag thaum peb npaj txhij tsis kam lees txais peb tus kheej thiab txaus siab hlo los koom tes nrog Vajtswv lawm, Vajtswv yuav qhia kom peb paub qhov tseeb thiab ntxuav peb kom dawb huv tawm sab hauv tuaj txhua lub sij hawm, thiab txeeb qhov tshiab rov qab los ntawm qhov Ntxwgnyoog tau tswj lawm, kom peb thiaj li dhau los tiav hlo los ntawm Vajtswv sai li sai tau. Txhob nkim sij hawm—ua lub neej nyob txhua lub sij hawm rau hauv Vajtswv txoj lus. Ua kom raug tsim tsa nrog cov neeg dawb huv, ua kom raug coj nkag los rau hauv lub nceeg vaj, thiab nkag los rau hauv lub yeeb koob ua ke nrog Vajtswv.

los ntawm “Tshooj 1” ntawm Khetos Cov Lus Nyob rau Thaum Pib nyob hauv Txoj Lus Tshwm Hauv Lub Cev Nqaij Daim Tawv

Thaum koj tau ntsib tau pom txhua kauj ruam ntawm tus Vajtswv uas yug los ua neeg tes hauj lwm nyob rau Tiam Lub Nceeg Vaj lawm, koj yuav hnov zoo li qhov kev ntshaw uas koj muaj los tau ntau xyoo ntawd ces thaum kawg koj tau kiag lawm. Koj yuav hnov zoo li tsuas yog tam sim no xwb es koj thiaj li tau pom Vajtswv tim ntsej tim muag tiag tiag li; tsuas yog tam sim no xwb mas koj thiaj li tau ntsia Nws lub ntsej muag, hnov cov lus uas Nws hais kiag, txaus siab rau lub tswv yim ntawm Nws tes hauj lwm, thiab hnov tiag tiag hais tias Nws muaj tseeb thiab muaj hwj chim loj npaum li cas. Koj yuav hnov zoo li koj tau ntau yam uas cov neeg yav dhau los yeej tsis tau pom los sis tsis tau muaj dua li. Nyob rau lub sij hawm no, koj yuav paub meej meej hais tias kev ntseeg Vajtswv yog dab tsi tiag, thiab kev yoog raws Vajtswv txoj kev xav zoo li cas tiag. Tseeb tiag, yog koj tseem tuav rawv tej kev xav yav tag los, thiab tsis txais yuav los sis tsis lees qhov tseeb ntawm qhov kev yug los ua neeg zaum ob ntawm Vajtswv, ces koj yuav nyob plhws tes-qhuav, tsis tau dab tsi li, thiab thaum kawg koj yuav raug tshaj tawm hais tias muaj kev txhaum ntawm qhov tawm tsam Vajtswv. Cov uas muaj cuab kav ua raws qhov tseeb thiab zwm rau Vajtswv tes hauj lwm ces yuav raug lees nyob rau hauv lub npe ntawm tus Vajtswv uas yug los ua neeg zaum ob—Tus Uas Muaj Hwj Chim Loj Kawg Nkaus. Lawv yuav muaj cuab kav txais yuav Vajtswv tus kheej txoj kev coj kev qhia, tau qhov tseeb ntau tshaj thiab siab tshaj, nrog rau lub neej txoj sia tiag. Lawv yuav pom zaj yog toog uas cov tib neeg yav dhau los yeej tsis tau pom dua li: “Thiab kuv tig mus saib lub suab uas hais lus rau kuv. Thiab thaum tau tig kiag, kuv pom xya tus tswm ciab kub; Thiab nyob rau nruab nrab ntawm xya tus tswm ciab muaj ib tug zoo li Neeg Leej Tub, hnav ib ce ris tsho ti nkaus hauv ko taw, thiab sia ib txog siv kub rau ntawm ob lub nyom mis. Nws lub tob hau thiab cov plaub hau dawb paug cuag li cov xov plaub yaj, dawb npaum nkaus cov daus; Thiab Nws ob lub qhov muag liab ploog cuag nplaim taws; Thiab Nws ob txhais taw zoo li tooj dag ci nplas, cuag li raug hlawv hauv lub qhov cub; thiab Nws lub suab nrov cuag ntau tus dej ntws. Thiab Nws muaj nyob rau hauv Nws sab tes xis xya lub hnub qub: thiab nyob rau hauv Nws lub qhov ncauj muaj ib rab ntaj ob sab ntse: thiab Nws lub ntsej muag zoo li tus duab hnub ci uas muaj zog kawg nkaus” (Qhia Tshwm 1:12–16). Zaj yog toog no ces yog qhov lus qhia kom pom tag nrho Vajtswv tus moj yam, thiab qhov lus qhia kom pom tag nrho Nws tus moj yam kuj yog qhov lus qhia kom pom txog tag nrho Vajtswv tes hauj lwm nyob rau hauv Nws qhov kev yug los ua neeg tam sim no. Nyob rau hauv qhov kev ntws ceev cuag dej ntawm tej kev qhuab ntuas thiab kev txiav txim, neeg leej Tub qhia tawm kom pom txog Nws tus moj yam xeeb txawm los ntawm kev hais lus, cia tag nrho cov uas lees txais Nws qhov kev qhuab ntuas thiab kev txiav txim kom pom neeg leej Tub lub ntsej muag tiag tiag, uas yog kev qhia ncaj ncees kom pom txog lub ntsej muag ntawm neeg leej Tub uas Yauhas tau pom. (Tseeb tiag, tag nrho tej no mas cov uas tsis lees txais tes hauj lwm ntawm Vajtswv nyob rau Tiam Lub Nceeg Vaj yuav ntsia tsis pom li.) Vajtswv lub ntsej muag tiag tiag mas yuav siv tib neeg tej lus los muab piav tsis tau kom tag nrho, thiab yog li ntawd Vajtswv thiaj siv tej kev uas Nws qhia Nws tus moj yam xeeb txawm los qhia kom pom Nws lub ntsej muag tiag tiag rau tib neeg. Ces hais tau hais tias tag nrho cov uas tau txaus siab rau tus moj yam xeeb txawm ntawm neeg leej Tub ces tau pom lub ntsej muag tiag tiag ntawm neeg leej Tub lawm, vim Vajtswv loj dhau heev lawm thiab tsis muaj cuab kav yuav siv tau tib neeg cov lus los piav kom tau tag nrho. Thaum uas tib neeg tau ntsib tau pom ib kauj ruam zuj zus ntawm Vajtswv tes hauj lwm nyob rau Tiam Lub Nceeg Vaj lawm, ces lawv yuav paub lub ntsiab lus tseeb ntawm Yauhas cov lus thaum nws hais txog neeg leej Tub nyob rau ntawm cov ncej txawb teeb: “Nws lub tob hau thiab cov plaub hau dawb paug cuag li cov xov plaub yaj, dawb npaum nkaus cov daus; Thiab Nws ob lub qhov muag liab ploog cuag nplaim taws; Thiab Nws ob txhais taw zoo li tooj dag ci nplas, cuag li raug hlawv hauv lub qhov cub; thiab Nws lub suab nrov cuag ntau tus dej ntws. Thiab Nws muaj nyob rau hauv Nws sab tes xis xya lub hnub qub: thiab nyob rau hauv Nws lub qhov ncauj muaj ib rab ntaj ob sab ntse: thiab Nws lub ntsej muag zoo li tus duab hnub ci uas muaj zog kawg nkaus.” Nyob rau lub sij hawm ntawd, koj yuav paub tshaj txhua qhov kev tsis ntseeg hais tias lub cev nqaij daim tawv dog dig no uas tau hais ntau heev mas yeej yog tus Vajtswv uas yug los ua neeg zaum ob yam yuav tsis lees tsis tau li. Tshaj ntawd, koj yuav hnov tiag tiag hais tias koj tau txais koob hmoov npaum li cas, thiab hnov hais tias koj tus kheej yog tus uas muaj hmoo tshaj plaws. Koj tseem tsis kam txais qhov koob hmoov no thiab los?

Xaiv tawm los ntawm Zaj Lus Ua Ntej rau Txoj Lus Tshwm Hauv Lub Cev Nqaij Daim Tawv

Vajtswv tes hauj lwm mas yeej khiav mus rau tom ntej tas mus li xwb, thiab txawm hais tias lub hom phiaj ntawm Nws tes hauj lwm tsis hloov, los qhov txheej txheem uas Nws ua hauj lwm ntawd yeej hloov mus tag li, ces txhais tau hais tias cov uas ntseeg Vajtswv los yeej hloov mus tas li thiab. Vajtswv ua hauj lwm ntau npaum li cas, ces tib neeg qhov kev paub txog Vajtswv muaj ntxaws npaum li ntawd. Tej kev hloov uas zoo ib yam kuj muaj tshwm sim nyob rau hauv tib neeg tus yam ntxwv uas los ntawm Vajtswv tes hauj lwm los thiab. Txawm li cas los xij, vim yog Vajtswv tes hauj lwm mas hloov mus los tag li ces cov uas tsis paub Vajntsujplig tes hauj lwm thiab cov neeg ruam qauj uas tsis paub qhov tseeb dhau los ua cov tib neeg uas tawm tsam Vajtswv. Vajtswv tes hauj lwm yeej ib txwm tsis yoog raws tib neeg txoj kev xav, vim Nws tes hauj lwm mas yeej tshiab tas li xwb thiab tsis muaj qub li, thiab Nws yeej tsis rov mus ua tej qub hauj lwm li, tab sis tsuas nias qees mus lawm tom ntej nrog rau tes hauj lwm uas nws yeej tsis tau ua dua los nkaus xwb. Raws li qhov uas Vajtswv tsis rov qab ua Nws tes hauj lwm dua, thiab tib neeg mas yeej siv tes hauj lwm Nws ua yav tag los txiav txim rau Vajtswv tes hauj lwm tam sim no yam tsis muaj hloov hlo li, nws thiaj li ua ib qho nyuab heev li rau Vajtswv los ua tej qib duas ntawm nws tes hauj lwm nyob rau tiam tshiab. Tib neeg mas muaj ntau qhov nyuab dhau heev lawm! Nws txoj kev xav mas xav nkaus li cov laus thaum ub xwb! Tsis muaj leej twg paub Vajtswv tes hauj lwm, tab sis txhua tus mas kem ciam rau tas zog li. Thaum nws ncaim Vajtswv, ces tib neeg plam txoj sia, qhov tseeb, thiab Vajtswv tej koob hmoov, tab sis nws yeej tsis kam lees txais txoj sia los sis qhov tseeb li, haj yam tsis tas hais txog tej koob hmoov loj dua uas Vajtswv muab pub rau neeg ntiaj teb li. Txhua tus tib neeg yeej xav kom tau Vajtswv, tab sis tsis muaj peev xwm yuav ua siab ntev taus rau tej yam kev hloov hauv Vajtswv tes hauj lwm. Cov uas tsis kam txais yuav Vajtswv tes hauj lwm tshiab ntseeg hais tias Vajtswv tes hauj lwm mas hloov tsis tau li, hais tias nws yuav nyob twj ywm li qub mus tag ib txhis. Nyob rau hauv lawv qhov kev ntseeg, tag nrho qhov uas yuav siv los ua kom tau kev cawm dim mus ib txhis los ntawm Vajtswv ces yog ua raws li nws txoj cai, thiab yog hais tias lawv hloov siab lees txim thiab lees lawv tej kev txhaum, ces yeej zoo txaus rau Vajtswv siab xav lawm. Lawv xav hais tias Vajtswv ces tsuas ua tau tus Vajtswv hauv qab txoj cai thiab tus Vajtswv uas raug ntsia rau saum tus ntoo khaub lig rau tib neeg xwb; nws kuj yog lawv qhov kev xav thiab uas hais tias Vajtswv mas yuav tsum tsis txhob tshaj phau Vajluskub. Nws yog kiag tej kev xav li no ntag uas muab lawv xauv taw kiag khov kho rau txoj cai qub thiab muab lawv ntsia kiag rau tej cai tuag lawm xwb. Yeej tseem muaj coob tshaj thiab uas ntseeg hais tias txawm Vajtswv tes hauj lwm tshiab yuav yog dab tsi los xij, nws yuav tsum tau muaj pov thawj los ntawm cov lus zuag cev lus txog yav tom ntej, thiab nyob rau txhua txhua theem ntawm qhov hauj lwm ntawd, tag nrho cov uas caum Nws uas muaj ib lub siab “tiag” yuav tsum tau pom cov lus qhia tshwm; tsis li ntawd, ces qhov hauj lwm ntawd yeej tsis yog Vajtswv qhov hauj lwm li. Nws twb yeej yog ib qho tsis yooj yim rau tib neeg los paub Vajtswv lawm. Tseem yuav coj tib neeg lub siab ruam thiab nws tus yam ntxwv ntxeev siab ntawm kev saib tus kheej tseem ceeb thiab kev qhuas tus kheej ntawd los ntxiv thiab, ces nws thiaj li ua ib qho haj yam nyuab rau nws los txais yuav Vajtswv tes hauj lwm tshiab. Tib neeg tsis ua twb zoo tshawb xyuas rau Vajtswv tes hauj lwm tshiab kom meej, los sis tsis kam txo hwj chim lees nws, tsis li ntawd xwb hos, nws tseem muaj tus yam ntxwv muab hlob thaum uas nws tseem tos lus qhia tshwm thiab lus coj kev los ntawm Vajtswv. Qhov no tsis yog tus cwj pwm ntawm cov ntxeev siab thiab tawm tsam Vajtswv thiab los? Cov neeg zoo li ntawd es yuav ua cas thiaj tau txais Vajtswv qhov kev pom zoo mas?

Xaiv tawm los ntawm “Tus Tib Neeg Uas Twb Tau Kem Ciam Rau Vajtswv nyob rau hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?” nyob hauv Txoj Lus Tshwm Hauv Lub Cev Nqaij Daim Tawv

Nej qhov kev uas siab ncaj ces tsuas muaj nyob hauv lo lus nkaus xwb, nej qhov kev paub ces tsuas yog lub tswv yim thiab txoj kev xav nkaus xwb, nej lub zog ces tsuas lam ua kom tau txais tej koob hmoov ntawm ntuj ceeb tsheej nkaus xwb, thiab yog li ntawd nej txoj kev ntseeg yuav zoo li cas mas? Txawm yog niaj hnub no kiag, los nej yeej ua ntsej lag rau txhua txhua lo lus ntawm qhov tseeb. Nej tsis paub xyov Vajtswv yog dab tsi, nej tsis paub xyov Khetos yog dab tsi, nej tsis paub yuav hwm Yehauvas li cas, nej tsis paub yuav to taub tes hauj lwm ntawm Vajntsujplig li cas, thiab nej tsis paub yuav qhia qhov sib txawv ntawm tes hauj lwm ntawm Vajtswv Tus Kheej kiag thiab tej kev dag ntxias ntawm tib neeg tau li cas. Nej tsuas paub cem txhua lo lus ntawm qhov tseeb uas Vajtswv hais tawm uas tsis yoog raws li nej tus kheej txoj kev xav nkaus xwb. Nej txoj kev txo hwj chim nyob qhov twg? Nej txoj kev mloog lus nyob qhov twg? Nej txoj kev ua siab ncaj nyob qhov twg? Nej txoj kev tshawb nrhiav qhov tseeb nyob qhov twg? Nej txoj kev hwm Vajtswv nyob qhov twg? Kuv qhia rau nej, cov uas ntseeg Vajtswv vim tej txuj ci tseem ceeb xwb ces yeej yog pawg uas yuav raug rhuav tshem tiag tiag li. Cov uas tsis muaj cuab kav txais tej lus ntawm tus Yexus uas tau rov los rau lub cev nqaij daim tawv lawm ces yog caj ces ntawm dab teb, cov xeeb leej xeeb ntxwv ntawm tus thawj tub txib, pawg uas yuav raug muab coj mus rau kev puas ntsoog mus ib txhiab ib txhis. Tej zaum muaj coob leej ntau tus yuav tsis quav ntsej txog cov lus uas kuv hais, tab sis kuv tseem xav qhia rau txhua tus neeg uas hu ua neeg dawb huv uas raws Yexus qab hais tias, thaum koj pom Yexus caij tauv huab dawb nqis saum ntuj ceeb tsheej los kiag ntawm koj lub qhov muag, qhov no yuav yog kev tshwm sim rau zej tsoom tau pom txog Lub Hnub ntawm kev ncaj ncees. Tej zaum qhov ntawd yuav yog lub sij hawm uas koj muaj kev zoo siab heev, tab sis koj yuav tsum paub tias lub sij hawm koj pom Yexus nqis saum ntuj ceeb tsheej los kuj yog lub sij hawm uas koj mus rau hauv ntuj tawg mus raug txim. Ntawd yuav yog lub sij hawm kawg ntawm Vajtswv txoj kev npaj cawm tib neeg thiab nws yuav yog lub sij hawm uas Vajtswv muab nqi zog rau cov neeg zoo thiab rau txim rau cov neeg lim hiam. Rau qhov kev txiav txim ntawm Vajtswv yuav xaus ua ntej tib neeg pom cov cim qhia, thaum tsuas muaj kev nthuav tawm ntawm qhov tseeb nkaus xwb. Cov uas lees txais qhov tseeb thiab tsis nrhiav tej txuj ci tseem ceeb, thiab yog li ntawd tau raug ntxuav kom dawb huv lawm, yuav tau rov qab mus rau ntawm xub ntiag ntawm Vajtswv lub zwm txwv thiab nkag mus rau tus Tswv Tsim txhais tes puag. Tsuas yog cov uas tuav ruaj ruaj qhov kev ntseeg hais tias “Tus Yexus uas tsis caij ib tauv huab dawb ces yog ib tug Khetos cuav” thiaj li yuav raug muab cob rau kev rau txim rau mus tag ib txhiab ib txhis xwb, vim lawv tsuas ntseeg tus Yexus uas ua tej txuj ci tseem ceeb xwb, tab sis tsis muaj ib qho kev lees paub txog tus Yexus uas tshaj tawm txog txoj kev txiav txim hnyav thiab txoj tso txoj kev tseeb txoj sia li. Thiab yog li ntawd ces nws tsuas muaj tib qho hais tias Yexus saib xyuas lawv thaum Nws rov los yam qhib lug rau saum ib tauv huab dawb xwb. Lawv ces tawv ncauj dhau heev lawm, ntseeg lawv tus kheej loj dhau heev lawm, khav theeb dhau heev lawm. Cov neeg phem li ntawd yuav ua cas tau phaj tshab los ntawm Yexus mas?

Xaiv tawm los ntawm “Thaum Lub Sij Hawm Koj Pom Yexus Lub Cev Sab Ntsuj Plig, Vajtswv Yuav Tsim Lub Ntuj thiab Lub Ntiaj Teb Tshiab Lawm” nyob hauv Txoj Lus Tshwm Hauv Lub Cev Nqaij Daim Tawv