Yog ib tug thawj coj pawg ntseeg mas, koj tsis yog lam tau lam kawm kom paub siv qhov tseeb los daws teeb meem xwb, koj kuj yuav tsum tau kawm kom paub nrhiav thiab cob cov tib neeg muaj peev xwm thiab, uas yog cov uas koj yuav tsum txhob khib los sis txhob caij tsuj. Qhov xyaum ua li no mas thiaj li muaj txiaj ntsim rau pawg ntseeg tes hauj lwm. Yog koj cob qhia tau ob peb tug neeg nrhiav qhov tseeb los koom tes nrog koj thiab ua txhua tes hauj lwm tau zoo, thiab nyob rau thaum kawg, yog nej txhua tus muaj kev ntsib kev pom rau txoj kev hais lus ua tim khawv lawm, ces koj thiaj li yog ib tug thawj coj los sis ib tug neeg ua hauj lwm uas tsim nyog. Yog hais tias koj muaj peev xwm saib xyuas txhua yam mus raws li cov hauv paus ntsiab lus lawm, ces thiaj li yog koj mob siab rau koj txoj kev mob siab. Ib txhia tib neeg mas pheej ntshai tias tsam lwm tus zoo dua lawv los sis siab dua lawv, tias tsam lwm tus raug qhuas hos lawv ces raug saib tsis taus, ces qhov no thiaj li ua rau lawv tawm tsam thiab cais lwm tus. Qhov no tsis yog ib qho uas khib ntawm cov tib neeg muaj peev xwm lod? Qhov ntawd tsis yog twm xeeb thiab ntxim thuam lod? Tus moj yam no yog hom dab tsi? Nws yog kev siab phem! Cov uas tsuas xav txog lawv tus kheej tej kev ntshaw xwb, cov uas tsuas ua kom tau zoo raws li lawv tus kheej tej kev ntshaw uas twm xeeb xwb, es tsis xav txog lwm tus los sis tsis ua tib zoo xav txog tej kev ntshaw ntawm Vajtswv lub tsev li, es muaj ib tug moj yam phem, ces Vajtswv tsis muaj kev hlub rau lawv li. Yog koj yeej muaj peev xwm xav txog qhov ua tib zoo xav txog rau Vajtswv lub siab nyiam tiag tiag, ces koj yuav muaj peev xwm coj kom ncaj ncees rau lwm tus tib neeg. Yog koj qhuas ib tug neeg zoo thiab cia kom lawv muaj kev cob qhia thiab ua tau ib teg dej num tiav, es ntxiv ib tug neeg uas muaj peev xwm rau hauv Vajtswv lub tsev, ces qhov ntawd yuav tsis ua rau koj tes hauj lwm yooj yim dua lod? Ces koj yuav tsis qhia koj txoj kev mob siab rau hauv koj tes dej num lod? Qhov ntawd yog ib qho kev ua zoo rau ntawm Vajtswv xub ntiag; qhov ntawd yog lub siab zoo thiab kev paub uas cov uas ua dej num ua cov thawj coj ntawd yuav tsum muaj. Cov uas muaj peev xwm muab qhov tseeb coj los xyaum ua raws ntawd yeej tuaj yeem lees txais Vajtswv txoj kev tshawb xyuas rau hauv tej uas lawv ua ntawd. Thaum koj lees txais Vajtswv txoj kev tshawb xyuas lawm, ces koj lub siab yuav ncaj. Yog koj tsuas lam ua kom lwm tus pom xwb, thiab pheej xav kom tau txais lwm tus txoj kev qhuas thiab kev hwm xwb, thiab koj tsis lees txais Vajtswv txoj kev tshawb xyuas li, ces Vajtswv puas tseem nyob hauv koj lub siab mas? Cov tib neeg zoo li ntawd tsis muaj kev hwm Vajtswv li. Txhob ua tej yam rau koj tus kheej qhov txiaj ntsim tas li xwb thiab txhob xav txog koj tus kheej tej kev ntshaw tas li xwb; txhob xam txog tib neeg tej kev ntshaw, thiab txhob xav rau koj tus kheej txoj kev khav theeb, kev muaj suab npe, thiab lub meej mom xwb. Koj yuav tsum xub ua tib zoo xav txog tej kev ntshaw ntawm Vajtswv lub tsev, thiab muab tej ntawd ua yam uas yuav tau ua ua ntej tso. Koj yuav tsum ua tib zoo xav txog Vajtswv lub siab nyiam thiab pib xav los ntawm qhov ua tib zoo xav seb puas tau muaj kev tsis dawb huv nyob rau hauv qhov kev ua koj tes dej num los tsis muaj, seb koj puas tau mob siab ua, ua koj tej luag hauj lwm puas tiav, thiab puas tau muab txhua yam uas koj muaj, thiab seb koj puas tau xav txog koj tes dej num thiab pawg ntseeg tes hauj lwm kom kawg siab kawg ntsws los sis tsis tau. Koj yuav tsum ua tib zoo xav txog tej no. Yog tias koj nquag xav txog tej ntawd thiab muab tej ntawd los ua tib zoo xav lawm, ces yuav yooj yim rau koj ua koj tes dej num kom tau zoo. Yog koj muaj lub peev xwm tsis zoo, yog koj txoj kev ntsib kev pom ntiav, los sis yog koj ua rau hauv koj txoj dej num tsis tau zoo, ces tej zaum yuav muaj qee yam ua tsis raug los sis ua tsis tau zoo txaus rau hauv koj txoj dej num, thiab tej zaum koj yuav tsis tau tej txiaj ntsim zoo—tab sis koj tau ua li qhov koj ua tau zoo tshaj plaws lawm. Koj tsis txhob ua kom tau zoo raws li koj tus kheej tej kev ntshaw los sis tej kev nyiam uas twm xeeb xwb. Tab sis, koj yuav tsum ua tib zoo xav rau pawg ntseeg tes hauj lwm thiab tej kev ntshaw ntawm Vajtswv lub tsev tas li. Tab txawm koj ua tsis tau ib yam zoo nyob rau hauv koj tes dej num los xij, koj lub siab twb ncaj lawm; yog tias, tshaj qhov no, koj nrhiav tau qhov tseeb los daws tej teeb meem uas nyob rau hauv koj tes dej num, ces koj thiaj li yuav ua tau mus raws li tus qauv uas nyob rau hauv txoj kev ua koj tes dej num, thiab, nyob rau tib lub sij hawm ntawd, koj thiaj li yuav muaj peev xwm to taub qhov muaj tiag ntawm qhov tseeb. Qhov no yog txhais hais tias muaj lus tim khawv.

Ib txhia tib neeg ntseeg Vajtswv tab sis tsis caum raws qhov tseeb li. Lawv ib txwm ua neej raws lub cev nqaij daim ntawv, ntshaw tej uas muaj nuj nqis ntawm lub cev nqaij daim tawv, yeej tuav rawv rau lawv tus kheej tej kev ntshaw uas twm xeeb tas li xwb. Txawm tias lawv ntseeg Vajtswv los tau pes tsawg xyoo lawm los xij, lawv yeej yuav tsis muaj hnub to taub qhov muaj tiag ntawm qhov tseeb li. Qhov no yog lub cim ntawm qhov coj txoj kev txaj muag los rau Vajtswv. Koj hais tias, “Kuv twb tsis tau ua ib yam dab tsi los tawm tsam Vajtswv li. Ua li cas kuv ho coj tau txoj kev txaj muag los rau Nws?” Txhua qhov ntawm koj tej tswv yim thiab tej kev xav mas puav leej phem xwb. Tej kev npaj siab, tej hom phiaj, thiab tej kev txhawb siab ntsws uas txhawb yam koj ua, thiab qhov tshwm sim los ntawm yam koj ua ntawd los mas yeej ua rau Ntxwgnyoog txaus siab, ua rau koj yog qhov uas txaus luag rau nws, thiab tso cai rau nws tau txais qee yam rau ntawm koj. Koj tsis tau hais lus tim khawv li ib tug Ntseeg Vajtswv tsim nyog hais li. Koj yog Ntxwgnyoog tug. Koj coj kev txaj muag los rau Vajtswv lub npe rau hauv txhua yam thiab koj tsis muaj cov lus tim khawv tseeb. Vajtswv puas yuav nco ntsoov tej uas koj tau ua lawm? Thaum kawg, cov lus xaus uas Vajtswv hais txog txhua qhov ntawm koj tej kev ua, tus cwj pwm, thiab tej dej num uas koj tau ua lawm ntawd yog dab tsi? Puas yog qee yam tsis tas yuav tsum tau los ntawm qhov ntawd los, qee hom lus hais? Hauv phau Vajluskub, Tswv Yexus hais tias, “Coob leej yuav hais rau Kuv rau hnub ntawd tias, tus Tswv, tus Tswv, peb tsis tau tuav Koj lub npe tshaj tawm los, thiab tuav Koj lub npe ntiab dab tawm los, thiab tuav Koj lub npe ua ntau yam hauj lwm phim hwj los? Thiab thaum ntawd Kuv yuav hais meej rau lawv tias, Kuv yeej tsis paub nej li: cia li khiav ntawm Kuv mus, nej cov uas ua hauj lwm lim hiam” (Mathai 7:22–23). Vim li cas Tswv Yexus thiaj li hais li no? Vim li cas coob tus ntawm cov neeg uas qhuab qhia, ntiab cov dab phem tawm, thiab ua ntau yam txuj ci tseem ceeb hauv tus Tswv lub npe thiaj li rais los ua cov neeg phem lawm? Qhov ntawd twb yog vim hais tias lawv tsis lees txais qhov tseeb uas Tswv Yexus nthuav tawm, lawv tsis ua raws li Nws cov lus txib, thiab nyob hauv lawv lub siab lawv yeej tsis muaj qhov nyiam qhov tseeb li. Lawv ces tsuas xav muab tes hauj lwm uas lawv tau ua lawm, tej kev nyuaj uas lawv tau tiv lawm, thiab tej khoom fij uas lawv tau muab fij rau tus Tswv lawm ntawd pauv cov koob hmoov ntawm lub nceeg vaj saum ntuj ceeb tsheej xwb. Nyob rau qhov no, yog lawv siv los ua ib qho kev sib pauv lag luam nrog Vajtswv, thiab yog lawv sim siv Vajtswv thiab ntxias dag Vajtswv, yog li Tswv Yexus thiaj dhuav lawv, ntxub lawv, thiab muab lawv teem txim tias yog cov neeg ua phem. Niaj hnub no, tib neeg tab tom lees txais txoj kev txiav txim thiab kev rau txim ntawm Vajtswv cov lus, tab sis ib txhia tseem caum raws lub koob lub npe thiab lub meej mom, thiab pheej xav cais lawv tus kheej tawm, pheej xav ua cov thawj coj thiab cov neeg ua hauj lwm es kom thiaj li tau txais lub koob lub npe thiab lub meej mom. Txawm tias lawv sawv daws puav leej hais tias lawv ntseeg Vajtswv thiab raws Vajtswv qab, thiab lawv tshaj tawm thiab fij rau Vajtswv los xij, lawv ua lawv tej dej num kom tau txais lub koob meej, txiaj ntsim, thiab lub meej mom xwb, thiab lawv pheej muaj lawv tus kheej tej kev dag. Lawv mas tsis mloog lus los sis tsis mob siab rau Vajtswv li, lawv ua phem rau ub rau no yam tsis tig xav txog lawv tus kheej kiag li, ces yog li ntawd lawv thiaj li rais los ua cov neeg ua phem lawm. Vajtswv ntxub cov neeg ua phem no, thiab Vajtswv tsis cawm lawv. Tus qauv ntawm qhov ib tug neeg ua thiab tus cwj pwm uas tau txais kev txiav txim tias zoo los sis phem ntawd yog dab tsi? Qhov ntawd yog qhov seb lawv, hauv lawv tej kev xav, tej kev nthuav tawm, thiab tej kev ua, puas muaj lus tim khawv txog qhov muaj qhov tseeb coj los xyaum ua raws thiab txog qhov kev ua neej raws qhov muaj tiag ntawm qhov tseeb los sis tsis muaj xwb. Yog koj tsis muaj qhov muaj tiag no los sis ua neej raws li qhov no, ces yeej paub tseeb tias, koj yog ib tug ua phem. Vajtswv hais li cas txog cov uas ua phem? Rau Vajtswv mas, koj tej kev xav thiab tej kev ua sab nraud tsis ua tim khawv rau Nws li, los sis tej ntawd tsis ua rau Ntxwgnyoog txaj muag thiab tsis ua kom kov yeej Ntxwgnyoog li; tab sis, tej ntawd coj kev txaj muag los rau Nws xwb, thiab tej ntawd muaj tej cim ntawm qhov tsis muaj kev hwm uas koj coj los rau Nws. Koj tsis hais lus tim khawv rau Vajtswv, koj tsis muab koj tus kheej fij rau Vajtswv, los sis koj tsis ua koj tej luag hauj lwm thiab tej uas yuav tsum tau ua ntawd kom tiav rau Vajtswv li, tab sis, koj ua rau koj tus kheej qhov txiaj ntsim xwb. Qhov hais tias “rau koj tus kheej qhov txiaj ntsim” ntawd txhais li cas? Yog muab hais kom yog kiag ces, qhov ntawd txhais tias yog rau Ntxwgnyoog qhov txiaj ntsim xwb. Yog li ntawd, thaum kawg, Vajtswv yuav hais tias, “Cia li khiav ntawm Kuv mus, nej cov uas ua hauj lwm lim hiam.” Raws li qhov Vajtswv pom mas, koj tej kev ua ntawd yuav tsis muab saib li yog tej kev ua zoo li, yuav muab tej ntawd xam tias yog ua kev phem xwb. Tsis yog tias tej ntawd yuav tsis tau txais Vajtswv qhov kev pom zoo xwb—tej ntawd tseem yuav raug teem txim thiab. Ib tug tib neeg cia siab kom tau txais dab tsi los ntawm ib txoj kev ntseeg Vajtswv zoo li no los? Thaum kawg txoj kev ntseeg zoo li no yuav tsis muaj qab hau li lod?

Rau txhua tus uas ua ib teg dej num ntawd mas, txawm tias lawv txoj kev to taub txog qhov tseeb yuav tob los sis ntiav npaum li cas los xij, txoj hau kev uas yooj yim tshaj plaws los xyaum kom to taub qhov muaj tiag ntawm qhov tseeb mas yog xav txog tej kev ntshaw ntawm Vajtswv lub tsev hauv txhua yam, thiab tso yus tej kev ntshaw uas twm xeeb, tus kheej tej kev npaj siab, tej kev txhawb siab ntsws, kev khav theeb, thiab lub meej mom tseg. Muab tej kev ntshaw ntawm Vajtswv lub tsev tso ua ntej tshaj plaws—qhov no yog qhov tsawg kawg nkaus uas yus yuav tsum tau ua. Yog ib tug neeg uas ua ib teg dej num haj tseem ua tsis tau ntau li no thiab, ces yuav ua li cas hais tau tias lawv ua lawv tes dej num? Qhov ntawd tsis yog ua yus tes dej num. Koj yuav tsum xub xav txog tej kev ntshaw ntawm Vajtswv lub tsev ua ntej tso, ua tib zoo xav txog Vajtswv lub siab nyiam, thiab ua tib zoo xav txog pawg ntseeg tes hauj lwm. Muab tej no tso ua ntej thiab saib kom tseem ceeb tshaj plaws; tsuas yog tom qab ntawd nkaus xwb koj thiaj li tuaj yeem xav txog txoj kev ruaj ntawm koj lub meej mom los sis seb lwm tus ho saib koj zoo li cas. Nej tsis xav tias qhov no yuav ua tau yooj yim dua thaum nej muab nws faib ua ob kauj ruam thiab sib cog lus rau qee yam lod? Yog koj xyaum ua li no mus ib ntus, ces koj mam li paub tias qhov ua kom tau zoo raws Vajtswv ntawd yeej tsis yog ib yam nyuaj kiag li. Tshaj ntawd, koj yuav tsum muaj peev xwm ua kom tau koj lub luag hauj lwm kom tiav, ua koj yam uas yuav tau ua thiab tes dej num, thiab tso koj tej kev ntshaw uas twm xeeb, tej kev npaj siab, thiab tej kev txhawb siab ntsws tseg; koj tsim nyog muaj kev ua tib zoo xav rau Vajtswv lub siab nyiam, thiab muab tej kev ntshaw ntawm Vajtswv lub tsev, pawg ntseeg tes dej num, thiab tes dej num uas koj yuav tsum ua ntawd tso ua ntej tso. Ces tom qab paub qhov no mus ib ntus lawm, koj mam li paub tias qhov no yog ib txoj hau kev zoo los nplig koj tus kheej. Nws yog kev ua neej nyob ncaj ncees thiab siab dawb paug, thiab tsis yog ua ib tug neeg tsis muaj paus ntsis los sis tsis muaj ib qho zoo li; qhov ntawd yog ua neej nyob ncaj ncees thiab ntxim hwm dua li qhov ntxim ntxub, tsis muaj paus ntsis, thiab ib tug neeg uas tsis muaj qab hau dab tsi li. Koj mam li paub tias qhov no yog yam uas ib tug neeg tsim nyog ua thiab tus yam ntxwv uas lawv tsim nyog ua neej raws. Ib qho zuj zus, koj tej kev ntshaw uas ua kom koj tus kheej txaus siab ntawd thiaj li yuav muaj tsawg zuj zus mus. Kiag tam sim no, txawm tias nej twb ntseeg Vajtswv los tau ntev npaum li cas lawm los xij, nej txoj kev to taub, txoj kev nthuav tawm, thiab txoj kev paub txog tej lus qhia uas hais txog txoj kev nrhiav qhov tseeb, kev xyaum ua raws li qhov tseeb, thiab kev to taub qhov muaj tiag ntawm qhov tseeb ntawd mas tsis tob li, thiab nej tsis muaj kev paub txog los sis kev nthuav tawm txog tej ntawd, yog li nej thiaj li hais tsis tau lus tim khawv kom tseeb. Tam sim no kuv twb tau qhia rau nej txog qhov yooj yim no lawm: Pib los ntawm qhov kev xyaum ua li no, thiab thaum nej tau ua li no mus ib ntus lawm, ces tus yam ntxwv uas nyob hauv nej mam li pib hloov yam koj tsis paub txog li. Qhov ntawd yuav hloov los ntawm tus yam ntxwv uas tsis paub meej, uas yog tus uas nej tsis nyiam qhov ntseeg Vajtswv kiag li los sis dhuav qhov ntseeg Vajtswv ntawd dhau lawm, mus rau tus yam ntxwv uas nej xav tias qhov ntseeg Vajtswv thiab qhov ua ib tug neeg coj ncaj ntawd mas yog qhov zoo, thiab yog qhov uas nej nyiam ua ib tug neeg coj ncaj thiab xav tias muaj qab hau thiab muaj kev txhawb rau hauv txoj kev ua neej zoo li no. Koj yuav ruaj siab, kaj siab, thiab muaj kev xyiv fab nyob rau hauv koj lub siab. Koj tus yam ntxwv yuav zoo li ntawd ntag. Qhov ntawd yog qhov tau los ntawm txoj kev tso koj tus kheej tej kev npaj siab, tej kev nyiam, thiab tej kev ntshaw uas twm xeeb tseg los. Qhov ntawd yog qhov txiaj ntsim ntag. Qhov no yog ib feem ntawm qhov tib neeg koom tes thiab yog ib feem ntawm Vajntsujplig tes hauj lwm. Vajntsujplig yuav tsis ua hauj lwm yog tib neeg tsis koom tes. Txhua tus tib neeg yeej muaj tej yam ntxwv tsis zoo nyob rau hauv lawv, xws li kev tub nkeeg, kev qaug zog, kev tag kev cia siab, thiab kev ua ywj fab ywj fwj; los sis lawv muaj tej kev npaj siab uas phem; los sis lawv txoj kev khav txiv, tej kev ntshaw uas muaj lub siab twm xeeb, thiab txoj kev nyiam ua rau yus tus kheej ntawd ua rau lawv ntxhov siab tas li; los sis lawv xav hais tias lawv tsis muaj peev xwm, thiab lawv muaj qee tus yam ntxwv uas tub nkeeg. Qhov koj tau txais Vajntsujplig tes hauj lwm mas yuav nyuaj heev yog koj pheej muaj cov yam ntxwv no. Yog qhov koj tau txais Vajntsujplig tes hauj lwm ntawd mas nyuaj, ces tej uas ua rau koj kub siab ntawd yuav muaj tsawg, thiab tej uas ua rau koj tsis kub siab ntawd yuav tawm tuaj cuam tshuam koj. Tib neeg ib txwm ua raws li lawv tus kheej lub siab nyiam los tswj tej yam ntxwv uas tub nkeeg thiab tsis zoo ntawd, tiam sis txawm lawv yuav tswj tej yam ntxwv ntawd npaum li cas los xij, lawv yeej tso tsis tau tej yam ntxwv ntawd tseg li. Qhov tseem ceeb ces yog vim hais tias tib neeg tsis paub txog tej uas tub nkeeg thiab tsis zoo no; lawv tsis tuaj yeem pom tej ntawd lub ntsiab tseeb kom meej meej. Qhov no thiaj li ua rau lawv tso cev nqaij daim tawv thiab Ntxwgnyoog tseg nyuaj heev. Thiab, tib neeg pheej daig rau hauv tej yam ntxwv uas tub nkeeg, uas kho siab, thiab lwj liam no, thiab lawv tsis thov Vajtswv los sis tsis cia siab rau Vajtswv li, tiam sis lawv lam tau lam ua kom dhau tej ntawd xwb. Vim li ntawd, Vajntsujplig thiaj li tsis ua hauj lwm rau hauv lawv, ces yog li ntawd lawv thiaj li tsis muaj peev xwm to taub qhov tseeb, lawv tsis muaj ib txoj hau kev rau txhua yam uas lawv ua li, thiab lawv tsis tuaj yeem pom ib yam dab tsi kom meej meej li. Nyob rau hauv koj mas muaj ntau yam uas tub nkeeg thiab tsis zoo heev, thiab muaj tej ntawd puv npo hauv koj lub siab xwb, yog li ntawd koj thiaj li pheej tub nkeeg, kho siab, thiab koj ncaim ntawm Vajtswv mus deb lawm zuj zus, thiab qaug zog zuj zus lawm. Yog koj tsis tau txais Vajntsujplig txoj kev qhuab qhia thiab tes hauj lwm, ces koj yuav tsis muaj peev xwm khiav dim cov yam ntxwv no, thiab koj tus yam ntxwv uas tub nkeeg ntawd yuav tsis hloov, vim hais tias yog Vajntsujplig tsis ua hauj lwm rau hauv koj, ces koj yeej nrhiav tsis tau ib txoj hau kev li. Vim ob qho no, es thiaj li nyuaj heev rau koj tso koj tus yam ntxwv uas tub nkeeg tseg thiab to taub txog tus yam ntxwv li ib txwm muaj ntawd. Txawm tam sim no thaum nej ua nej tes dej num, es nej tiv kev txom nyem, rau siab ua hauj lwm, siv zog ua hauj lwm, thiab nej muaj peev xwm muab nej tsev neeg thiab txoj hauj lwm khwv noj khwv haus ntawd tso tseg, thiab tso txhua yam tseg los xij, tej yam ntxwv uas tub nkeeg nyob rau hauv nej ntawd yeej tseem tsis tau hloov pauv kiag li. Muaj ntau yam kev cuam tshuam muab nej khi tsis pub nej caum qhov tseeb thiab xyaum ua raws li qhov tseeb, xws li nej tej kev xav phem, tej kev xav hauv nruab siab, kev paub, tej tswv yim rau kev ua neej, tej kev ntshaw uas twm xeeb, thiab tej moj yam qias vuab tsuab. Muaj tej yam tsis zoo no puv npo hauv nej lub siab xwb. Txawm nej hluas los xij, nej tej kev xav mas nyuaj heev. Nej soj ntsuam thiab kawm Kuv txhua lo lus thiab txhua qhov kev nthuav tawm, ces tom qab ntawd xav txog tej ntawd yam tsis muaj hnub tso tseg li. Vim li cas thiaj li ua li no? Nej twb raws Vajtswv qab los tau ntau lub xyoo lawm, tiam sis Kuv tseem tsis tau pom nej nce qib los sis hloov ib qho li. Tib neeg lub siab mas raug txhua yam phem tswj kav tag nrho li lawm. Txhua tus yeej pom qhov no tseeb heev. Yog koj tsis muab tej no txiav tawm mus, yog koj tsis muaj peev xwm muab tej yam ntxwv uas tub nkeeg no tso tseg, ces koj yuav tsis muaj peev xwm hloov koj tus kheej kom zoo li ib tug me nyuam yaus thiab los rau ntawm Vajtswv lub xub ntiag yam kub siab lug, ntxim hlub, tsis muaj kev txhaum, yooj yim, tseeb, thiab dawb huv li. Thaum ntawd, qhov koj tau txais Vajntsujplig tes hauj lwm los sis qhov tseeb ntawd mas yuav nyuaj.

Kiag tam sim no, nej txhua tus puav leej muaj ob peb qho zoo uas tsim nyog qhuas nej lawm, xws li qhov txaus siab hlo raug txom nyem thiab kev ntseeg. Tej uas zoo no tau cawm nej txhua tus dim lawm. Yog nej tsis muaj tej uas zoo no—uas yog qhov nej txaus siab hlo raug kev txom nyem, thiab txoj kev ntseeg tseeb los muab nej tus kheej fij rau Vajtswv—ces nej yuav tsis muaj siab los ua nej tes dej num, thiab nej yuav tsis muaj peev xwm tuav khov kho los txog rau niaj hnub no. Ib txhia tib neeg ua lawv tes dej num tau ib ntus, tiam sis vim lawv tsis nyiam qhov tseeb thiab vim lawv tsis tau txais txiaj ntsim los ntawm qhov tseeb ntawd los, ces lawv thiaj li tig rov qab mus rau ntawm lub ntiaj teb mus ua hauj lwm, mus khwv nyiaj, thiab mus yuav txij nkawm lawm. Lawv xav hais tias qhov nkim sij hawm nyob rau ntawm no tsis pom ib qho txiaj ntsim dab tsi li mas nkim lawv lub neej hluas, lawv lub sij hawm uas zoo tshaj plaws, thiab lawv lub neej xwb. Cov tib neeg no raug muab nthuab tawm li cov tsis ntseeg. Tsuas yog cov uas ua siab dawb paug muab lawv tus kheej fij rau Vajtswvxwb thiaj li tuav tau lawv tes dej num thiab sawv tau khov kho. Kiag tam sim no, nej txhua tus yeej ua nej tej dej num puv sij hawm. Nej tsis raug tsev neeg, txoj kev sib yuav, los sis kev muaj txiag nplua nuj txwv los sis khi li. Nej twb tawm ntawm tej ntawd los lawm. Txawm li cas los xij, tej kev xav phem, tej kev xav hauv nruab siab, kev paub, thiab tej kev npaj siab ntawm nej tus kheej thiab tej kev ntshaw uas muaj puv nkaus nej lub taub hau ntawd yeej tseem nyob tsis ploj li. Yog li ntawd, thaum hais txog ib yam dab tsi uas cuam tshuam rau lub koob lub npe, lub meej mom, los sis ib lub cib fim uas yuav nrov ntawd—piv txwv li, thaum nej hnov hais tias Vajtswv lub tsev npaj los txhawb ntau hom tib neeg uas muaj kev txawj—mas nej txhua tus lub siab tos ntsoov xwb, nej txhua tus yeej ib txwm xav ua kom nej tus kheej muaj koob muaj npe thiab nrov. Nej txhua tus xav ua kom tau lub meej mom thiab lub koob lub npe. Nej txaj muag rau qhov no, tiam sis nej tsis zoo siab yog nej tsis ua li no. Nej thiaj li khib, ntxub, thiab tsis txaus siab thaum nej pom ib tug tib neeg twg nrov lawm, thiab xav hais tias qhov ntawd mas tsis ncaj ncees lawm tias: “Vim li cas kuv thiaj li nrov tsis tau? Vim li cas lwm tus tib neeg thiaj li pheej nrov tas li xwb? Vim li cas thiaj li tsis yog kuv zeeg li?” Thiab tom qab nej tsis txaus siab lawm, nej thiaj li sim muab qhov ntawd tswj, tab sis nej tswj tsis tau. Nej thov Vajtswv ces txawm zoo siab me ntsis mus ib ntus, tab sis thaum nej rov ntsib hom xwm txheej no dua, los nej yeej tseem kov tsis yeej qhov ntawd li thiab. Qhov no tsis yog ib qho qhia kom pom meej txog ib tug yeeb yam uas tsis paub tab txaus lod? Thaum tib neeg raug txhom vim tej yam ntxwv zoo li ntawd lawm, tsis tau mag Ntxwgnyoog rooj ntxiab lod? Tej no yog tej kauj hlau ntawm Ntxwgnyoog tus yeeb yam lwj liam uas khi tib neeg. Yog tib neeg muab tej moj yam qias vuab tsuab no tso pov tseg, ces thaum ntawd lawv yuav tsis muaj kev ywj pheej thiab ywj siab li lod? Xav txog qhov ntawd tias: Yog nej xav zam kom txhob raug txhom vim tej yam ntxwv uas ntshaw lub meej mom thiab txiaj ntsim ntawd—ces nej tus kheej khiam kom dim plaws ntawm tej yam ntxwv qias vuab tsuab, thiab tso nej tus kheej tawm ntawm tej kev nyuaj siab thiab txoj kev ua qhev rau lub koob lub npe, txiaj ntsim, thiab lub meej mom—nej yuav tsum to taub qhov tseeb twg? Qhov muaj tiag ntawm qhov tseeb twg uas nej yuav tsum muaj es nej thiaj li tau txais txoj kev ywj pheej thiab kev kaj siab? Ua ntej tshaj plaws, nej yuav tsum pom tias Ntxwgnyoog siv lub koob lub npe, txiaj ntsim, thiab lub meej mom los ua kom tib neeg qias vuab tsuab, los cuab ntxiab rau lawv, los quab yuam lawv, los txo lawv thiab los ua kom lawv poob mus rau hauv txoj kev txhaum. Tshaj qhov ntawd, tsuas yog lees txais qhov tseeb nkaus xwb mas tib neeg thiaj li muab tau lub koob lub npe, txiaj ntsim, thiab lub meej mom tso pov tseg thiab tso tseg. Qhov muab tej no tso tseg mas nyuaj heev rau txhua tus, tsis hais lawv hluas los sis laus, los sis cov ntseeg tshiab los sis cov twb ntseeg los tau ntev lawm li. Txawm ib txhia tib neeg nyob twj ywm, thiab zoo li lawv tsis hais lus ntau luaj twg los xij, tseeb tiag lawv haj yam muaj kev nyuaj nyob rau hauv lawv lub siab ntau dua li lwm tus muaj. Qhov muab lub koob lub npe, txiaj ntsim, thiab lub meej mom tso tseg ntawd mas nyuaj heev rau txhua tus; tsis muaj leej twg kov yeej txoj kev ntshaw tej ntawd li—tib neeg txoj kev xav hauv siab mas yeej zoo ib yam nxwb. Ntxwgnyoog tau siv lub koob lub npe thiab txiaj ntsim los ua rau tib neeg qias vuab tsuab lawm; txoj kab lis kev cai qub ntawd tau muab tej no cog rau hauv tib neeg los tau ntau txhiab xyoo lawm. Yog li ntawd, tib neeg tus yeeb yam qias vuab tsuab thiaj li nyiam caum lub koob lub npe, txiaj ntsim, thiab lub meej mom heev, tsuas yog hais tias txoj kev uas tib neeg caum thiab nthuav tawm ntawd sib txawv xwb. Muaj ib txhia mas tsis hais txog qhov ntawd li, thiab muab qhov ntawd zais rau hauv lawv lub siab, hos muaj ib txhia mas muab qhov ntawd nthuav tawm nyob rau hauv lawv cov lus. Muaj ib txhia mas yuav ua kom tau tej no yam tsis ua tib zoo xav kiag li, hos muaj ib txhia mas tsis ua kom tau tej no, tiam sis thaum tsis muaj neeg pom lawm mas, lawv yws, hais ub hais no, thiab tsoo ub tsoo no li. Txawm hais tias pom qhov ntawd txawv nyob rau hauv cov tib neeg uas txawv los xij, lawv tej yeeb yam yeej zoo ib yam nkaus xwb. Lawv txhua tus puav leej yog cov tib neeg qias vuab tsuab uas tawm tsam Vajtswv. Yog koj pheej mob siab rau lub koob lub npe, txiaj ntsim, thiab lub meej mom, yog koj saib tej no muaj nqis dhau lawm, yog tej no tswj kav koj lub siab, thiab yog koj tsis kam tso tej no tseg, ces koj yuav raug tej no tswj kav thiab khi. Koj yuav ua tej no qhev, thiab thaum kawg, tej no yuav rhuav tshem koj. Koj yuav tsum kawm kom paub muab tej no tso pov tseg thiab muab tso tseg, es qhuas lwm tus, thiab cia lawv nrov thiab. Txhob sib zog tsoo mus los sis maj nroos los siv lub cib fim ua kom nrov thiab kom zoo. Koj yuav tsum muaj peev xwm muab tej no tso tseg, tab sis koj kuj yuav tsum tsis txhob muab txoj kev ua koj tes dej num ntawd tuav tseg thiab. Ua ib tug neeg uas ua hauj lwm ntsiag to thiab tsis khav theeb rau lwm tus thaum koj mob siab hlo ua koj tes dej num. Koj yim tso koj txoj kev khav theeb thiab lub meej mom tseg, thiab koj yim tso koj tus kheej tej kev ntshaw tseg, ces koj yim yuav muaj kev thaj yeeb ntau npaum li ntawd, yim muaj txoj kev kaj siab rau hauv koj lub siab npaum li ntawd, thiab koj tus yam ntxwv yuav yim zoo npaum li ntawd. Koj yim sib zog tsoo mus thiab sib tw npaum li cas, ces koj tus yam ntxwv yim tsaus ntuj nti npaum li ntawd. Yog koj tsis ntseeg Kuv, ces sim thiaj li pom! Yog koj xav hloov hom yam ntxwv qias vuab tsuab no, es kom txhob raug tej no tswj kav, ces koj yuav tsum nrhiav qhov tseeb, thiab to taub lub ntsiab tseeb txog tej no kom meej meej, ces tom qab ntawd muab tej ntawd tso tseg thiab muab tej ntawd tso pov tseg mus. Tsis li ces, koj yim sib zog tsoo mus npaum li cas, koj lub siab yim muaj txoj kev tsaus ntuj nti npaum li ntawd, ces koj yim khib thiab ntxub npaum li ntawd, thiab koj txoj kev ntshaw kom tau tej no tsuas yuav loj hlob khov dua qub nkaus xwb. Koj txoj kev ntshaw kom tau tej ntawd yim loj hlob khov dua qub npaum li cas, koj yim yuav tsis muaj peev xwm ua kom tau tej ntawd npaum li ntawd, thiab thaum muaj qhov no tshwm sim tuaj lawm, ces koj txoj kev ntxub yuav muaj ntau ntxiv. Thaum koj txoj kev ntxub muaj ntau ntxiv lawm, koj yuav yim muaj txoj kev tsaus nti nyob rau hauv siab. Koj yim muaj kev tsaus ntuj nti nyob rau hauv siab, ces koj txoj kev ua koj tes dej num yim yuav phem npaum li ntawd, thiab txoj kev ua koj tes dej num yim phem, ces koj yim siv tsis tau rau Vajtswv lub tsev. Qhov no yog ib qho muaj feem xyuam sib txuas mus los, qhov kev phem uas kiv mus los. Yog koj yeej ua tsis tau koj tes dej num kom zoo li, ces koj yuav maj mam raug muab ntiab tawm mus.

Yuav kom Vajntsujplig ua hauj lwm nyob rau hauv ib tug tib neeg twg thiab hloov lawv tej yam ntxwv uas tub nkeeg ntawd mas, tus tib neeg ntawd yuav tsum kub siab lug koom tes thiab nrhiav, thaum lub sij hawm raug txom nyem, tiv kev txom nyem, tso txhua yam tseg, thiab tso txoj kev ntshaw ntawm lub cev tseg, hloov lawv txoj kev ib kauj ruam zuj zus. Yuav kom ua tau li no, thiab yuav kom lawv taug tau txoj kev yog mas siv sij hawm ntev heev—tiam sis Vajtswv tsuas siv ob peb xaws nkoos los muab tib neeg nthuav tawm xwb. Yog koj tsis ua koj tes dej num kom zoo, tiam sis pheej ua txhua yam los ua kom pom koj tus kheej txawv, thiab pheej ua txhua yam los sib tw kom tau lub meej mom, kom nrov thiab muaj hwj chim, ua txhawm rau koj lub koob lub npe thiab tej kev ntshaw xwb, ces thaum muaj tus yam ntxwv no lawm, koj tsis yog ib tug neeg ua Vajtswv tes dej num xwb lod? Koj yeej ua tau dej num yog koj xav ua, tiam sis koj yeej yuav raug muab nthuav tawm ua ntej ua koj tes dej num tiav. Thaum tib neeg raug muab nthuav tawm lawm, ces hnub uas lawv raug teem txim thiab raug muab ntiab tawm ntawd los txog lawm. Puas yuav muaj hnub hloov tau lawm? Nws tsis yooj yim; tej zaum Vajtswv twb txiav txim siab rau lawv lawm, es lawv thiaj li muaj teeb meem. Feem ntau tib neeg ua txhaum, nthuav tej moj yam qias vuab tsuab tawm, thiab ua ob peb qho yuam kev me me lawm, los sis lawv ua kom tau raws li lawv tej kev ntshaw uas twm xeeb, zais lawv tus kheej tej kev npaj siab thaum lawv hais lus thiab siv tej tswv yim dag, tiam sis tsuav lawv tsis tab kaum los sis cuam tshuam pawg ntseeg tes hauj lwm, los sis ua rau txhua yam ntxhov quav niab, los sis ua txhaum rau Vajtswv tus moj yam, los sis ua rau muaj qee yam kev phem heev tshwm tuaj xwb, ces lawv yeej tseem yuav muaj ib lub hwv tsam los lees txim hloov dua siab tshiab thiab. Tiam sis yog lawv ua qee qhov kev phem loj los sis ua rau muaj ib qho kev puas ntsoog loj no, lawv puas tseem txhiv tau lawv tus kheej lawm? Qhov ib tug tib neeg uas ntseeg Vajtswv thiab ua ib teg dej num es los txog rau theem no mas phom sij heev. Nws zoo li ib nkawm niam txiv uas ua neej nyob ua ke. Yog nkawv muaj kev cov nyom me ntsis, thiab qee zaus nkawv ib leeg hais tau qee yam uas ua rau lwm tus mob siab, mas tsuav nkawv ib leeg ua siab ntev rau ib leeg xwb ces nkawv yeej nyob tau ua ke txuas ntxiv mus. Txawm li cas los xij, tiam sis yog nkawv ib tug tau mus deev hluas lawm, nkawv ib tug tsis kam rov qab yuav tus mus deev hluas ntawd lawm, thiab yog tus uas mus deev hluas ntawd tsis kam rov qab los lawm, ces nkawv ob leeg nyob puas tau ua ke lawm? Qhov ua siab ntev rau tus mus deev hluas ntawd ntxiv yuav tsis muaj txiaj ntsim lawm, qhov ntawd yuav tsis muaj qab hau dab tsi. Ib txoj kev ua txij nkawm uas zoo li no mas tsis zoo lawm, yam uas nkawv ua tau ces yog sib nrauj lawm xwb. Yog ob tug tib neeg ntawd los txog rau theem no lawm, ces tab txawm yog nkawv tseem nyob tib lub tsev los xij, nkawv txoj kev ua txij nkawm tsuas yog lub npe lawm xwb. Txawm nkawv sib nrauj thiab tsis nrauj los yeej zoo li nkawv sib nrauj lawm. Yog koj ntseeg Vajtswv, ua koj tes dej num, es koj mus txog rau tib theem ntawd lawm—thaum koj plam lub cib fim uas los caum qhov tseeb thiab raug ua kom zoo tiav log lawm, ces koj lub siab tawv, thiab koj yeej tsis lees txim hloov dua siab tshiab los sis thim rov qab, thiab koj caum lub meej mom yam tawv ncauj heev txuas ntxiv, tsis lees txais qhov tseeb ib qho me me li, txawm Vajtswv twb muab ntau lub cib fim rau koj lawm los xij—ces tsis ntev xwb yuav muaj ib hnub uas koj raug muab nthuav tawm thiab muab ntiab tawm mus lawm. Feem ntau, ib qho teeb meem, los sis ib qho xwm txheej, los sis ib lo lus los sis ib tug cwj pwm yuav muab koj nthuav tawm tag nrho. Yog li ntawd, yog tib neeg tsis tau txais Vajntsujplig tes hauj lwm los sis tsis tau txais qhov tseeb, yog lawv pheej raug lawv tus moj yam qias vuab tsuab thiab phem khi thiab tswj kav, yog lawv ua neej raws li txhua hom kev ntshaw thiab kev npaj siab uas twm xeeb thiab tsis muaj peev xwm tawm ntawm tej ntawd los li, ces lawv muaj kev phom sij loj lawm. Tsis ntev xwb, lawv yuav dawm ntog thiab raug muab nthuav tawm. Tej zaum koj tseem tsis tau dawm ntog, tiam sis qhov ntawd tsis tau txhais hais tias koj yuav tsis dawm ntog tom qab ntawd. Tej zaum tam sim no koj tseem muaj peev xwm ua koj tes dej num, tej zaum koj tseem muaj qee lub siab los muab koj tus kheej fij rau Vajtswv thiab raug kev txom nyem, tej zaum koj muaj qee lub siab los caum qhov raug ua kom zoo tiav log ntawd, tiam sis qhov ntawd tsis yog qhov los hloov txoj kev to taub txog qhov tseeb, los sis txoj kev to taub txog qhov muaj tiag ntawm qhov tseeb, thiab qhov ntawd tsis tau txhais hais tias koj yuav tsis dawm ntog tom qab ntawd, los sis tias koj yuav muaj peev xwm sawv khov kho. Ib txhia tib neeg ntseeg Vajtswv los tau ntau xyoo lawm tiam sis tsis to taub qhov tseeb ib qho me me li. Lawv txoj kev pom txhua yam yeej tseem zoo ib yam li cov tsis ntseeg. Thaum lawv pom ib tug thawj coj cuav los sis ib tug tawm tsam Khetos raug muab nthuav tawm thiab muab ntiab tawm mus lawm mas lawv xav hais tias, “Kev ntseeg Vajtswv, kev raws Vajtswv qab, kev ua neej nyob rau ntawm Vajtswv lub xub ntiag mas zoo li mus ko taw saum cov dej khov uas nyias nyias! Zoo li ua neej nyob ntawm hniav riam xwb!” Thiab lwm tus hais tias, “Kev ua ib tug thawj coj thiab ib tug neeg ua hauj lwm thiab ua dej num rau Vajtswv ntawd mas phom sij heev. Tsuas zoo ib yam li tib neeg hais tias: ‘Qhov nyob ze ib tug vajntxwv ntawd mas phom sij npaum nkaus li nrog ib tug tsov txaij pw.’ Yog koj ua los sis hais ib yam dab tsi yuam kev, koj yuav ua txhaum rau Vajtswv tus moj yam, thiab koj yuav raug muab ntiab tawm mus thiab raug rau txim!” Tej lus no puas yog? “Mus ko taw saum cov dej khov uas nyias nyias” thiab “ua neej nyob ntawm hniav riam xwb”—tej lus no txhais li cas? Tej lus no txhais hais tias muaj kev phom sij loj, tias muaj kev phom sij loj nyob rau txhua lub sij hawm li, thiab tias qhov tsis xyuam xim ib qho me me xwb yuav ua rau tib neeg ntog ntag. “Qhov nyob ze ib tug vajntxwv ntawd mas phom sij npaum nkaus li nrog ib tug tsov txaij pw” yog ib qho uas cov tsis ntseeg nyiam hais. Qhov ntawd txhais hais tias qhov nyob ze ib tug vajntxwv phem mas phom sij heev. Yog ib tug tib neeg twg siv qhov hais li no los ua dej num rau Vajtswv no, qhov lawv ua yuam kev yog qhov twg? Qhov muab tus vajntxwv phem piv rau Vajtswv, piv rau tus Tswv tsim ib puas tsav yam—qhov no tsis yog tuam mom Vajtswv lod? Qhov ntawd yog ib qho teeb meem loj heev. Vajtswv yog ib tug Vajtswv uas ncaj ncees thiab dawb huv; qhov uas tib neeg yuav tsum raug rau txim vim txoj kev tawm tsam Vajtswv los sis txoj kev ua yeeb ncuab rau Nws ntawd yog raug tsa los ntawm Ntuj Ceeb Tsheej thiab raug lees paub los ntawm lub ntiaj teb. Ntxwgnyoog thiab cov dab tsis muaj qhov tseeb ib qho me me li; Ntxwgnyoog thiab cov dab mas qias neeg thiab phem heev, lawv tua cov tib neeg dawb huv, thiab noj cov tib neeg zoo. Lawv yuav ua li cas zoo tau li Vajtswv? Vim li cas tib neeg thiaj li muab qhov tseeb ntxeev thiab hais lus phem rau Vajtswv? Qhov no mas tuam mom Vajtswv loj heev! Thaum ib txhia tib neeg uas pheej tub nkeeg es tsis ua lub siab dawb paug ua lawv tej dej num raug qhuab qhia thiab raug qhuab ntuas lawm, mas lawv txhawj tsam lawv yuav raug muab ntiab tawm mus, ces lawv thiaj li pheej xav rau lawv tus kheej hais tias, “Txoj kev ntseeg Vajtswv mas yeej zoo ib yam li mus ko taw saum cov dej khov uas nyias nyias tiag tiag li! Kiag thaum koj ua ib yam dab tsi yuam kev lawm mas, koj yeej raug qhuab ntuas kiag xwb; kiag thaum koj raug muab hu ua ib tug thawj coj cuav los sis ib tug tawm tsam Khetos lawm, ces koj raug muab hloov thiab ntiab tawm mus kiag xwb. Nyob rau hauv Vajtswv lub tsev mas, tsis tsim nyog Vajtswv npau taws, thiab thaum tib neeg tau ua ob peb yam tsis zoo lawm, lawv raug ntiab tawm mus kiag los ntawm tib lo lus xwb. Yeej tsis muab ib lub hwv tsam rau lawv los lees txim hloov dua siab tshiab li.” Txhua yam yeej zoo li ntawd tiag tiag li lod? Vajtswv lub tsev yeej tsis muab ib lub hwv tsam rau tib neeg los lees txim hloov dua siab tshiab tiag tiag li lod? (Qhov ntawd tsis yog lawm.) Qhov muab cov tib neeg phem thiab cov tawm tsam Khetos ntiab tawm mus ntawd tsuas yog vim lawv tau ua kev phem ntau yam dhau lawm xwb, thiab twb raug qhuab qhia thiab qhuab ntuas lawm, tiam sis tab txawm rov qab ntuas dua los, lawv tsis hloov lawv txoj kev li. Cov tib neeg uas xav li no qhov teeb meem yog dab tsi? Lawv daws lawv tus kheej li ub li no kom zoo li muaj tseeb xwb. Lawv tsis caum qhov tseeb, thiab lawv tsis ua dej num kom zoo, thiab vim lawv ntshai tsam raug muab rho tawm thiab muab ntiab tawm mus, ces lawv thiaj li yws heev thiab nthuav lawv tej kev xav phem tawm. Pom tau tseeb tseeb hais tias, lawv muaj kev ua neej tsis zoo, thiab lawv pheej tsis quav ntsej thiab lam taus lam ua xwb, thiab tub nkeeg thiab ua lawv tes hauj lwm qeeb qeeb. Lawv ntshai tsam raug muab nthuav tawm thiab muab ntiab tawm mus, yog li ntawd lawv thiaj li muab liam rau pawg ntseeg thiab rau Vajtswv nkaus xwb. Tus yeeb yam no yog dab tsi? Tus yeeb yam no yog txiav txim rau Vajtswv, yws Nws, thiab tawm tsam Nws. Tej lus no yog tej kev nkag siab yuam kev loj tshaj plaws thiab yog tej lus hais uas ruam tshaj plaws li. Qhov muaj tseeb uas cov tib neeg no hais tau tej yam zoo li ntawd ua tau pov thawj qhia hais tias tab txawm ntseeg Vajtswv los tau ntau xyoo lawm los xij, lawv yeej tsis tau caum qhov tseeb kiag li. Tsuas yog qhov no xwb thiaj li ua rau lawv poob mus rau qib uas txiav txim rau Vajtswv, tawm tsam Nws, thiab tuam mom Nws. Qhov ntawd pom tau tseeb hais tias cov uas pheej tub nkeeg thiab tsis caum qhov tseeb ntawd mas nyob rau qhov phom sij tiag tiag li. Yog li ntawd, cov ntseeg Vajtswv yuav tsum xyaum ua li cas es thiaj li yuav ua tau rau lawv tus kheej muaj kev nyab xeeb thiab tso tau lawv tus kheej dim ntawm tej xwm txheej uas phom sij no? Qhov tseem ceeb ces yog los taug txoj kev caum qhov tseeb xwb. Yog ib tug tib neeg twg tuaj yeem to taub qee qhov tseeb, yog lawv zwm tau rau Vajtswv nyob rau ib qib uas pib lawm, ces lawv yuav nyab xeeb thiab khov heev. Cov uas tsis caum qhov tseeb, cov uas tsis muaj ib qho muaj tiag ntawm qhov tseeb, thiab cov uas pheej tub nkeeg ntawd mas, lawv nyob rau qhov phom sij uas yuav raug muab ntiab tawm tas mus li. Cov tib neeg uas dhuav qhov tseeb hauv lawv lub siab, cov uas pheej xav hais tias qhov los xyaum ua raws li qhov tseeb ntawd mas nyuaj los sis ruam dhau lawm, cov ntawd yog cov tib neeg uas nyob rau qhov phom sij tshaj plaws. Tsis ntev xwb, lawv yuav raug muab nthuav tawm thiab ntiab tawm mus.

Tsis hais seb ib tug tib neeg puas txawj dag los sis tsis muaj kev txhaum thiab coj ncaj heev li, tib neeg tej kev npaj siab, tej kev ntshaw, thiab tej kev tsis dawb huv ces yeej puav leej zoo ib yam nkaus tsis ntau los yeej tsawg. Yog nej txhua tus hloov tau nej txoj kev, muab tau tej yam ntxwv qias vuab tsuab no tso tseg, thiab, yam tsawg kawg, ua nej tes dej num kom zoo, ces nej yuav muaj qhov zoo nkaus li tib neeg. Yog nej ua raws li nej tus kheej tej kev npaj siab, tej kev muaj siab, thiab tej kev ntshaw xwb ces thaum ua nej tes dej num ntawd, nej yeej yuav ua tsis yog thiab ua yuam kev, thiab qhov nej yuav los daws tej teeb meem ntawd raws li tej hauv paus ntsiab lus, los sis los ua nej tes dej num kom zoo thiab ua raws li Vajtswv lub siab nyiam ntawd mas nyuaj heev. Qhov no yog vim tib neeg tsis quav ntsej dhau lawm thiab lam tau lam ua xwb, thiab muaj ntau qhov kev tsis dawb huv heev li. Yog nej xav ua nej tes dej num kom zoo, mas nej yuav tsum xub daws nej tus kheej tej kev npaj siab thiab tej kev ntshaw ua ntej tso. Ces tom qab ntawd, koj tus yam ntxwv sab hauv mam li maj mam hloov, koj lub siab mam li zoo tuaj, tej uas ua rau koj kub siab ntawd mam li muaj tuaj, koj tej kev tsis dawb huv mam li tsawg zuj zus mus, koj lub siab yuav dawb huv thiab kaj zuj zus tuaj, thiab koj tsuas xav ua koj tes dej num kom zoo kom Vajtswv txaus siab lawm xwb. Ua li ntawd, koj thiaj li yuav tsis raug tej kev xav thiab tej kev xam pom uas phem, los sis tej tswv yim rau kev ua neej ntawd tswj kav tau yam yooj yooj yim. Koj yuav cia li muaj kev ywj pheej thiab kev ywj siab, thiab txhua yam uas koj ua mas yuav yooj yim thiab xyiv fab heev li lawm xwb. Qhov ntawd tsuas zoo li thaum tib neeg taug kev xwb—yog lawv ris ntau lub nra, ces thaum taug kev ntawd yuav sab heev, thiab lawv yuav mus qeeb zuj zus, mus txog ntua rau thaum lawv ntog vim sab heev li lawm. Yog lawv thau cov nra ntawd tawm, ces thaum taug kev ntawd yooj yim dua, thiab lawv kuj yuav mloog zoo li ywj siab thiab ywj pheej thiab. Nej txhua tus yuav tsum sau ib phau ntawv los sis sau ib zaj lus tim khawv txog kis uas nej tau txais ntawm kev ywj siab thiab kev ywj pheej ntawd. Nej yuav tsum sau txog qhov nej nrhiav qhov tseeb thiab tso nej tej nra ntawd tseg li cas thaum muaj tej yam los raug rau nej, thiab nej tus kheej tej kev npaj siab thiab tej kev muaj siab uas nej muab tso tseg lawm ntawd yog yam twg, thiab nej tau txais hom kev qhuab qhia dab tsi, thiab nej muaj kev zoo siab dab tsi—sau txog tej yam ntxwv thiab txoj kev paub no. Qhov no yog tej lus tim khawv uas hais txog kev paub, thiab nws muaj txiaj ntsim loj heev rau nej thiab rau lwm tus tib neeg huv si. Ua li no, qhov koj paub ntawd thiaj li yuav ntsib yuav pom ntau nce tuaj, koj txoj kev to taub txog qhov tseeb thiaj li yuav zoo tuaj, thiab koj lub sij hawm uas muaj kev ywj pheej thiab kev ywj siab ntawd thiaj li yuav muaj ntau ntxiv. Koj yuav los ua ib tug neeg uas muaj kev ywj pheej, ib tug neeg zoo li Yauj. Vim li cas Yauj thiaj li muaj peev xwm hais cov lus uas nrov koob nrov npe yam yooj yim heev li no tias: “Yehauvas muab, thiab Yehauvas tau muab tshem mus lawm; thov kom Yehauvas lub npe raug qhuas” (Yauj 1:21)? Tib pliag xwb nws puas cia li hais tau cov lus ntawd yam yooj yim heev? Yeej tsis tau li. Cov lus ntawd yog lub ntsiab ntawm txhua hnub, txhua lub xyoo, thiab txhua caum xyoo uas tau ntsib tau pom. Cov lus ntawd siv sij hawm ua neej ntau caum xyoo mas mam li hais tau. Qhov tau txais qhov tseeb thiab hais tau lus tim khawv ntawd tsis yog ib qho yooj yim. Tib txoj kev uas yuav tau txiaj ntsim nyob rau hauv tib neeg txoj kev ntseeg Vajtswv ces yog los taug txoj kev caum qhov tseeb xwb. Tom qab muab txoj kev caum lub koob lub npe, txiaj ntsim, thiab lub meej mom tso tseg lawm, txhua yam yuav yooj yim rau koj dua. Qhov ntawd yuav yooj yim rau koj los pib taug txoj kev caum qhov tseeb. Thaum koj txoj kev paub nce mus txog rau theem uas koj to taub qhov tseeb thiab to taub txog qhov muaj tiag lawm, ces koj yuav tau txais qhov tseeb, thiab tau txais kev ywj pheej thiab kev ywj siab. Nyob rau theem ntawd, koj yuav xav hais tias koj tau txais ntau heev los ntawm txoj kev raws Khetos qab thiab kev caum qhov tseeb lawm. Yuav kom tau txais qhov tseeb mas, koj yuav tau muab koj txoj kev caum lub koob lub npe, txiaj ntsim, thiab lub meej mom, thiab tej kev cuam tshuam ntawm koj tsev neeg tej hauj lwm ntawd tso tseg. Koj yuav tau ua raws li Vajtswv hais thiab ua tes dej num ntawm ib tug neeg uas raug tsim tawm los kom tiav, mas koj thiaj li yuav maj mam to taub qhov tseeb, thiab pom tshab plaws ntau yam. Koj yuav tsis muaj qhov paub tsis meej los sis raug Ntxwgnyoog muab khi ntxiv lawm. Qhov tau txais qhov tseeb thiab txoj sia ntawd mas yog yam uas muaj nqis tshaj plaws; qhov tseeb yog qhov uas tsim nyog koj nyiam tshaj plaws. Thaum koj pom hais tias qhov tseeb yog yam uas muaj nqis tshaj plaws lawm, ces koj yuav paub hais tias lub koob lub npe, txiaj ntsim, lub meej mom, nyiaj txiag, thiab kev khav theeb khav txiv ntawd tsis muaj nqis li lawm, thiab paub tias tej no tau rhuav tshem koj tas li xwb. Yog li ntawd, koj yuav ntxub thiab tsis kam txais yuav tej no, thiab yuav muaj peev xwm muab tej no tso tseg. Qhov ntawd yog qhov muaj txiaj ntsim heev. Txawm li cas los xij, tseem muaj ib txhia tib neeg uas tsis muaj peev xwm muab tej kev txwv ntawm lub koob lub npe thiab lub meej mom ntawd tso tseg li. Lawv xav nyuaj heev thiab nrog lwm tus sib txeeb lub koob lub npe, txiaj ntsim, thiab lub meej mom tag hnub xwb. Lawv haj tseem kub siab sib cam txog ob peb yam ntawm txoj kev khav theeb khav txiv thiab. Lawv tsis nrhiav qhov tseeb, thiab lawv tsis xav txog Vajtswv lub siab nyiam li. Lawv saib lub koob lub npe, txiaj ntsim, thiab lub meej mom siab dua lwm yam huv si, vim li ntawd, lawv thiaj li ua li ub li no los tau ntau xyoo vim tej no xwb, tsis muaj qhov muaj tiag ntawm qhov tseeb ib qho me me li. Txawm lawv yuav ua tes dej num dab tsi los xij, lawv ua yam phem heev, thiab lawv plam lub sij hawm uas zoo tshaj plaws ntawm lawv lub neej lawm. Qhov no yog tus yam ntxwv uas txaus hlub tshaj plaws ntawm cov uas tsis caum qhov tseeb. Cov tib neeg no lam taus lam ntseeg Vajtswv yam tsis quav ntsej li no xwb. Kaum xyoo los sis nees nkaum xyoo twb dhau lus lawm los lawv yeej tseem tsis tau txais qhov tseeb los sis txoj sia li, thiab lawv yeej tseem tsis muaj peev xwm ua tim khawv rau Vajtswv li thiab. Thaum tej kev puas tsuaj los txog, lawv yuav ruam tag li, tsis paub tias hnub twg lawv yuav tuag rau txoj kev puas tsuaj ntawd li, thiab thaum ntawd mam li khuv xim ces lig dhau lawm. Vim li ntawd, tsis ntev, cov uas ntseeg Vajtswv tiam sis tsis caum qhov tseeb ntawd yeej yuav khuv xim ib hnub xwb xwb li. Tam sim no, muaj ntau tus tib neeg uas tseem caum lub koob lub npe, txiaj ntsim, thiab lub meej mom yam dig muag ntsuav, thiab thaum lawv raug qhuab qhia thiab raug qhuab ntuas mas lawv xav hais tias lawv poob ntsej muag loj heev. Lawv ua txhua yam li lawv ua tau los daws li ub li no thiab piav qhia txog lawv tus kheej kom zoo li muaj tseeb los tiv thaiv lawv txoj kev khav theeb khav txiv. Lawv tsis lees txais qhov tseeb los kho lawv tus kheej tus moj yam qias vuab tsuab, thiab lawv tseem saib lub koob lub npe, txiaj ntsim, thiab lub meej mom tseem ceeb dua lwm yam huv si thiab. Hom tib neeg no mas ua ib lub neej uas txaus hlub tiag tiag li! Lawv yog cov tib neeg uas ruam thiab tsis paub dab tsi tshaj plaws.

Kiag tam sim no yog lub cib fim uas zoo tshaj plaws rau nej los ua nej tes dej num, kom paub tias yuav muab nej tej moj yam qias vuab tsuab tso tseg li cas, yuav ua li cas thiaj li tau txais Vajtswv txoj kev coj qhia, yuav ua nej tes dej num yam kub siab lug li cas, yuav ua li cas thiaj li ua tau zoo raws li Vajtswv lub siab nyiam, yuav ua nej tej luag hauj lwm kom tiav thiab zam qhov tsis quav ntsej thiab lam tau lam ua nej tes dej num ntawd li cas, thiab yuav muab nej lub siab rau Vajtswv li cas, kom thiaj li paub thiab tau txais txoj kev paub txog Vajtswv cov lus thaum nej ua nej tes dej num, thiab kom pom Vajtswv tej kev ua. Yog ib lub cib fim uas zoo tshaj plaws! Muaj ib hnub, thaum nej hloov lawm, nej yuav tsis ua kom tau txoj kev khav txiv thiab lub meej mom lawm. Txhua yam uas kom nej ua ntawd, nej yuav tsis xav tias yam ntawd nyuaj heev lawm, thiab yam ntawd yuav yooj yim heev rau nej ua lawm. Qhov kom nej muab qhov tseeb coj los xyaum ua, kom ua raws li tej hauv paus ntsiab lus, thiab kom pom tshab plaws ntau yam ntawd yooj yim lawm. Nej yuav muaj peev xwm ua nej tes dej num li qub, thiab nej yuav tsis raug ib tug tib neeg twg, ib qho xwm txheej twg, los sis ib yam khoom twg txwv ntxiv lawm. Qhov no yog kev to taub txog qhov muaj tiag ntawm qhov tseeb tag nrho.

Lub Xya Hli Hnub Tim 16, Xyoo 2015