240. Tau ntau xyoo lawm, tib neeg txoj kev qub ntawm txoj kev ntseeg (hais txog Kev Ntseeg Vajtswv, ib txog ntawm peb txoj kev ntseeg loj nyob hauv ntiaj teb) ces tsuas yog nyeem Vajluskub; kev ncaim ntawm Vajluskub ces tsis yog kev ntseeg tus Tswv, kev ncaim ntawm Vajluskub ces yog kev tawm ntawm txoj kev ntseeg thiab kev txhaum ntawm txoj kev ntseeg, thiab txawm hais tias tib neeg yuav nyeem lwm phau ntawv, los lub hauv paus tseem ntsiab ntawm cov phau ntawv no yuav tsum yog kev piav txog phau Vajluskub. Qhov ntawd ces hais tau hais tias, yog koj ntseeg tus Tswv, ces koj yuav tsum nyeem Vajluskub, thiab nyob rau sab nraud ntawm phau Vajluskub ces koj yuav tsum tsis txhob pe hawm ib phau ntawv twg uas tsis cuam tshuam txog Vajluskub. Yog koj ua li, ces koj tab tom ntxeev siab rau Vajtswv. Txij kiag puag thaum muaj phau Vajluskub los, tib neeg txoj kev ntseeg tus Tswv ces yog txoj kev ntseeg phau Vajluskub. Tsis yog yuav hais tias tib neeg ntseeg tus Tswv, hos nws tseem yog qhov zoo dua uas hais tias lawv ntseeg phau Vajluskub; yog yuav hais tias lawv twb pib nyeem Vajluskub lawm, hos nws tseem yog qhov zoo dua hais tias lawv twb pib ntseeg Vajluskub lawm; thiab tsis yog yuav hais tias lawv tau rov qab los rau ntawm tus Tswv lub xub ntiag lawm, hos nws tseem yog qhov zoo dua hais tias tias lawv twb rov los rau ntawm Vajluskub lub xub ntiag lawm. Nyob rau txoj kev ua li no, tib neeg pe hawm phau Vajluskub cuag nkaus li nws yog Vajtswv, cuag li nws yog lawv roj ntsha, thiab plam nws ces cuag nkaus li plam lawv txoj sia. Tib neeg pom phau Vajluskub siab npaum nkaus li Vajtswv, thiab tseem muaj ib co uas pom nws siab tshaj Vajtswv lawm thiab. Yog tib neeg tsis muaj Vajntsujplig tes hauj lwm, yog tib neeg tsis hnov Vajtswv lawm, lawv yeej tseem ua neej tau mus ntxiv—tab sis thaum lawv xiam phau Vajluskub lawm, los sis xiam tej tshooj thiab tej nqe uas nrov npe heev, ces nws zoo li lawv xiam kiag lawv txoj sia lawm. Thiab yog li ntawd, thaum uas tib neeg ntseeg kiag tus Tswv lawm ces lawv pib nyeem phau Vajluskub, thiab nco kom tau phau Vajluskub rau hauv siab, thiab yog lawv yim nco ntau Vajluskub ntau npaum li cas, ces qho no ua tau pov thawj qhia hais tias lawv hlub tus Tswv thiab muaj kev ntseeg loj npaum li ntawd. Cov uas tau nyeem Vajluskub thiab piav tau rau lwm tus ces puav leej yog cov kwv tij thiab cov nkauj muam zoo tag nrho. Tag nrho npaum no lub xyoo, tib neeg txoj kev ntseeg thiab txoj kev ua siab ncaj rau Vajtswv ces yog ntsuas raws li qhov uas seb lawv to taub Vajluskub txog qhov twg. Tib neeg feem coob tsis to taub hais tias vim li cas lawv thiaj yuav tsum tau ntseeg Vajtswv, los sis yuav ntseeg Vajtswv li cas, thiab tsis ua dab tsi li tab sis tsuas nrhiav yam qi muag nti kom tau tej pov thawj los twv tej tshooj hauv Vajluskub xwb. Tib neeg yeej tsis nrhiav txoj xub kev ntawm Vajntsujplig tes hauj lwm li; tag mus li, lawv tsis ua dab tsi li tab sis tsuas rau siab ntso kawm thiab tshuaj xyuas Vajluskub xwb, thiab tsis muaj leej twg li uas yuav nrhiav tau Vajntsujplig tes hauj lwm tshiab zog nyob sab nraud ntawm phau Vajluskub li. Tsis muaj leej twg uas yuav tau ncaim ntawm phau Vajluskub, los sis yuav tau luag ua li ntawd li. Tib neeg tau kawm Vajluskub los tau npaum li no xyoo, lawv tau muab tau tej lub tshab txhais ntau yam, thiab tau ua hauj lwm ntau heev li; lawv kuj muaj ntau yam kev xav uas sib txawv txog Vajluskub thiab, uas lawv sib cam tsis paub kawg, ces thiaj li muaj ntau tshaj li ob txhiab pab ntseeg uas sib txawv uas muaj tshwm sim los txog niaj hnub no. Tag nrho lawv mas tsuas xav nrhiav tej qho kev piav tshwj xeeb, los sis ntau yam lus zais tob nyob rau hauv Vajluskub, lawv xav tshawb xyuas nws, nrhiav kom tau nws nyob rau sab tom qab ntawm Yehauvas tes hauj lwm nyob rau hauv Yixayee, los sis sab tom qab ntawm Yexus tes hauj lwm nyob rau hauv Yudias, los sis ntau qhov lus zais tob uas tsis muaj neeg paub li. Tib neeg txoj kev txav zemus rau Vajluskub yog ib qho kev ntshaw tshaj plaws thiab kev ntseeg, thiab tsis muaj leej twg yuav muaj cuab kav piav tau kom meej txog zaj dab neeg sab hauv los sis lub tseem ntsiab ntawm phau Vajluskub. Yog li ntawd, niaj hnub no tib neeg thiaj tseem muaj ib qho kev xav tsis thoob uas piav tsis tau rau leej twg li thaum uas hais txog Vajluskub, thiab lawv tseem haj yam vwm rau nws, thiab haj yam muaj kev ntseeg rau nws ntau ntxiv. Niaj hnub no, txhua tus xav nrhiav cov lus qhia txog yav tom ntej txog tes hauj lwm ntawm tiam kawg nyob rau hauv Vajluskub, lawv xav tshawb kom pom seb Vajtswv ua tes hauj lwm dab tsi nyob rau tiam kawg, thiab muaj tej cim dab tsi txog tiam kawg. Nyob rau txoj kev ua no, lawv txoj kev pe hawm phau Vajluskub mas muaj ceem kawg nkaus, thiab thaum haj yam ze rau tiam kawg lawm, ces lawv haj yam muaj kev ntseeg yam qi muag nti rau tej lus qhia txog yav tom ntej ntawm phau Vajluskub, yog thaum hais txog kiag tiam kawg. Nrog tej kev ntseeg yam qi muag nti nyob rau hauv phau Vajluskub zoo li ntawd, nrog txoj kev ntseeg phau Vajluskub li ntawd, ces lawv tsis muaj txoj kev ntshaw yuav nrhiav Vajntsujplig tes hauj lwm li. Nyob rau hauv tib neeg tej kev xav phem, lawv xav hais tias tsuas yog phau Vajluskub xwb mas thiaj li yuav coj tau Vajntsujplig tes hauj lwm los; tsuas yog nyob rau hauv Vajluskub nkaus xwb mas lawv thiaj li nrhiav tau Vajtswv tej hneev taw; tsuas yog nyob rau hauv Vajluskub nkaus xwb mas thiaj muaj tej lus zais tob ntawm Vajtswv tes hauj lwm zais rau hauv; tsuas yog phau Vajluskub nkaus xwb—tsis yog lwm phau ntawv los sis lwm tus neeg—mas thiaj li qhia tau kom meej txog txhua yam ntawm Vajtswv thiab tag nrho Nws tes hauj lwm xwb; phau Vajluskub muaj cuab kav coj tau tes hauj lwm ntawm ntuj ceeb tsheej los rau ntiaj teb; thiab phau Vajluskub muaj cuab kav pib tau thiab xaus tau tej tiam. Nrog rau tej kev xav phem no, tib neeg tsis muaj kev xav yuav nrhiav Vajntsujplig tes hauj lwm. Yog li ntawd, tsis hais phau Vajluskub yuav pab tau tib neeg npaum li cas yav tag los, nws tau rais los mus ua ib qho tav kev rau Vajtswv tes hauj lwm zaum kawg kiag no. Yog tsis muaj phau Vajluskub, los tib neeg yeej muaj cuab kav nrhiav tau Vajtswv tej hneev taw los ntawm lwm yam, tab sis niaj hnub no, Nws tej hneev taw rau muab kaw tseg los ntawm phau Vajluskub lawm, thiab yuav muab Nws tes hauj lwm zaum kawg kiag no ncua ntxiv mus kom ntev mas nyuaj tshaj li ob npaug kiag, thiab yog ib qho kev peem nce toj xwb. Qhov no ces tag nrho yog vim tej tshooj thiab tej nyuag lus hais uas nrov npe nyob rau hauv phau Vajluskub, nrog rau ntau yam lus qhia txog yav tom ntej uas muaj nyob rau hauv Vajluskub. Phau Vajluskub tau rais los ua ib tug mlom nyob rau hauv tib neeg lub siab lawm, nws tau rais los ua ib qho txhiaj txhais nyob rau hauv lawv lub hlwb lawm thiab ces lawv cia li tsis muaj peev xwm ntseeg hais tias Vajtswv yeej muaj peev xwm ua hauj lwm tau rau sab nraud ntawm phau Vajluskub, lawv tsis muaj peev xwm ntseeg hais tias tib neeg yeej nrhiav tau Vajtswv nyob sab nraud ntawm phau Vajluskub, lawv haj yam tsis muaj cuab kav ntseeg tau hais tias yuav ncaim tau ntawm phau Vajluskub mus pib dua ib qho tshiab. Qhov no ces yog qhov uas tib neeg yeej xav tsis tau li; lawv ntseeg tsis tau nws li, thiab lawv xav tsis txog nws hlo li. Phau Vajluskub tau rais los ua ib yam uas thaiv kev loj kawg nkaus rau tib neeg txoj kev lees txais Vajtswv tes hauj lwm tshiab, thiab ib qho nyuab rau Vajtswv txoj kev ua kom tes hauj lwm tshiab no nthuav dav tuaj.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (1)

241. Phau Vajluskub yog phom ntawv dab tsi? Phau Vajluskub Qub yog tes hauj lwm ntawm Vajtswv nyob rau thaum Tiam Muaj Kev Cai. Phau Vajluskub Qub ntawm phau Vajluskub ces teev muaj tag nrho tes hauj lwm ntawm Yehauvas nyob rau lub sij hawm thaum Tiam Muaj Kev Cai thiab Nws tes hauj lwm tsim txhua yam. Tag nrho nws ces teev muaj tes hauj lwm uas Yehauvas ua, thiab thaum kawg ces nws kuj xaus tej lus qhia txog Yehauvas tes hauj lwm nrog rau Malakhi Phau Ntawv. Phau Vajluskub Qub teev muaj ob qho hauj lwm uas Vajtswv ua: Ib qho ces yog tes hauj lwm tsim txhua yam, thiab ib qho ces yog kev tsim cov kev cai. Ob qho puav leej yog Yehauvas ua tag nrho. Tiam Muaj Kev Cai sawv cev rau tes hauj lwm hauv lub npe ntawm Vajtswv Yehauvas; nws yog tag nrho tes hauj lwm uas qhov tseem ceeb ces yog ua nyob hauv lub npe ntawm Yehauvas. Yog li ntawd, phau Vajluskub Qub teev tseg tes hauj lwm ntawm Yehauvas, thiab phau Vajluskub Tshiab teev tseg tes hauj lwm ntawm Yexus, tes hauj lwm uas qhov tseem ceeb ces yog ua nyob rau hauv lub npe ntawm Yexus. Qhov tseem ceeb ntawm Yexus lub npe thiab tes hauj lwm Nws ua ces feem ntau yog teev muaj nyob rau hauv phau Vajluskub Tshiab. Nyob rau hauv Vajluskub Qub Tiam Muaj Kev Cai, Yehauvas tsim tsa lub tuam tsev thiab lub thaj nyob rau hauv Yixayee, Nws coj cov neeg Yixayee lub neej nyob rau hauv ntiaj teb, ua pov thawj qhia hais tias lawv yog Nws cov neeg xaiv tseg, thawj pab neeg uas Nws xaiv nyob rau hauv ntiaj teb thiab cov uas ua raws Nws tus kheej lub siab, thawj pab neeg uas Nws tau coj kiag. Kaum ob pab neeg ntawm Yixayee yog Yehauvas thawj cov xaiv tseg, thiab yog li ntawd Nws thiaj li ua hauj rau ntawm lawv, los txog ntua rau thaum tes hauj lwm ntawm Yehauvas rau Tiam Muaj Kev Cai xaus kiag. Theem thib ob ntawm tes hauj lwm ces yog tes hauj lwm ntawm Tiam Hmoov Hlub ntawm phau Vajluskub Tshiab, thiab nws yog ua nyob rau hauv cov neeg Yudais, nyob rau hauv ib pab ntawm kaum ob pab neeg ntawm Yixayee. Tus ciaj ciam ntawm tes hauj lwm no mas me dua vim Yexus yog tus Vajtswv uas rais los muaj cev nqaij daim tawv. Yexus tsuas ua hauj lwm thoob plaws daim av ntawm Yudia xwb, thiab tsuas ua tes hauj lwm peb-thiab-ib-nrab xyoo xwb; yog li ntawd, tej uas raug teev tseg rau hauv Vajluskub Tshiab mas tseem nrug deb qhov uas yuav muaj tshaj tes hauj lwm uas teev tseg rau hauv Vajluskub Qub.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (1)

242. Tom qab uas Vajtswv ua tes hauj lwm ntawm Tiam Muaj Kev Cai tag lawm, ces phau Vajluskub Qub raug tsim tawm los, thiab nws yog thaum ntawd ces tib neeg mam pib nyeem Vajluskub. Tom qab Yexus los lawm, Nws ua tes hauj lwm ntawm Tiam Hmoov Hlub tag, thiab Nws cov thwj tim sau phau Vajluskub Tshiab. Yog li ntawd phau Qub thiab Tshiab ntawm phau Vajluskub thiaj li raug tsim tawm los, thiab los txog ntua niaj hnub no kiag, los tag nrho cov uas ntseeg Vajtswv yeej tau nyeem phau Vajluskub lawm. Phau Vajluskub yog ib phau ntawv keeb kwm. Muaj tseeb, nws kuj muaj cov lus hais qhia txog yav tom ntej ntawm cov xib fwb cev Vajtswv lus, thiab cov lus qhia txog yav tom ntej ntawd mas tsis yog keeb kwm ib qho li. Phau Vajluskub muaj ntau feem nyob rau hauv—nws tsis yog muaj cov lus qhia txog yav tom ntej xwb, los sis Yehauvas tes hauj lwm xwb, los sis tsis yog tsuas muaj Povlauj cov ntawv nkaus xwb. Koj yuav tsum paub hais tias phau Vajluskub muaj pes tswg feem nyob rau hauv; phau Vajluskub Qub muaj Chiv Keeb, Khiav Dim…, thiab kuj tseem muaj ntau phau ntawv ntawm tej lus qhia txog yav tom ntej uas cov xib fwb cev Vajtswv lus sau. Nyob rau thaum kawg, phau Vajluskub Qub xaus rau Malakhi Phau Ntawv. Nws teev txog tes hauj lwm ntawm Tiam Muaj Kev Cai, uas yog Yehauvas coj; txij kiag ntawm Chiv Keeb los txog rau Malakhi Phau Ntawv, ces nws yog ib co lus teev tseg uas ntxaws kawg nkaus rau tag nrho tes hauj lwm ntawm Tiam Muaj Kev Cai. Ces hais tau hais tias, phau Vajluskub Qub teev muaj tag nrho tej uas tau ntsib tau pom los ntawm cov neeg uas Yehauvas coj nyob rau hauv Tiam Muaj Kev Cai. Nyob rau thaum Tiam Muaj Kev Caim ntawm Vajluskub Qub, Yehauvas tau tsa ib co xib fwb cev Vajtswv lus coob heev los hais cov lus qhia txog yav tom ntej rau Nws, lawv muab tej lus qhia rau tej pab neeg thiab tej haiv neeg uas sib txawv, thiab xub hais qhia rau lawv txog tes hauj lwm uas Yehauvas yuav ua. Cov neeg uas raug tsa sawv los no ces sawv daws yeej tau txais tus Ntsujplig ntawm kev qhia txog tej uas yuav tshwm sim yav tom ntej los ntawm Yehauvas: Lawv muaj cuab kav pom tej yog toog uas los ntawm Yehauvas los, thiab hnov Nws lub suab, thiab yog li ntawd lawv thiaj li tau txais kev tshoov siab los ntawm Nws los thiab sau tej lus qhia txog yav tom ntej ntawd. Tes hauj lwm lawv ua ces yog qhov kev hais qhia kom pom txog Yehauvas lub suab, qhov kev qhia kom pom txog cov lus qhia txog yav tom ntej ntawm Yehauvas, thiab Yehauvas tes hauj lwm nyob rau lub sij hawm ntawd ces tsuas yog siv tus Ntsujplig los coj tib neeg xwb; Nws tsis rais los muaj cev nqaij daim tawv, thiab tib neeg tsis pom dab tsi ntawm Nws lub ntsej muag li. Yog li ntawd, Nws thiaj li tsa coob tus xib fwb cev Vajtswv lus los ua Nws tes hauj lawm, thiab muab cov lus qhia txog yav tom ntej rau lawv kom lawv muab qhia mus rau txhua pab neeg thiab txhua xeem neeg hauv Yixayee. Lawv tes hauj lwm ces yog hais tej lus qhia txog yav tom ntej, thiab muaj ib co ces sau Yehauvas tej lus qhia tseg rau lawv thiab coj mus qhia rau lwm tus. Yehauvas tsa cov neeg no sawv los hais tej lus qhia txog yav tom ntej, qhia ua ntej txog tes hauj lwm rau yav tom ntej los sis tes hauj lwm uas tseem yuav raug ua nyob rau lub sij hawm ntawd, ces kom tib neeg thiaj li pom Yehauvas tej txuj ci phim hwj thiab lub tswv yim. Cov ntawv txog tej lus qhia txog yav tom ntej mas txawv lwm cov ntawv nyob rau hauv Vajluskub; cov ntawd yog cov lus uas hais thiab sau los ntawm cov uas tau txais tus Ntsujplig ntawm kev cev lus qhia txog yav tom ntej—los ntawm cov uas tau tej yog toog los sis lub suab los ntawm Yehauvas los. Dhau ntawm cov ntawv ntawm cov lus qhia txog yav tom ntej lawm, tag nrho lwm yam nyob rau hauv Vajluskub Qub ces yog tej lus teev los ntawm cov neeg tom qab uas Yehauvas tau ua Nws tes hauj lwm tag lawm. Cov ntawv no yuav hloov tsis tau cov lus qhia txog yav tom ntej los ntawm cov xib fwb cev Vajtswv lus uas raug tsa los ntawm Yehauvas, ib yam nkaus li Chiv Keeb thiab Khiav Dim uas muab piv tsis tau rau phau Ntawv ntawm Yaxaya thiab phau Ntawv ntawm Daniyee. Cov lus qhia txog yav tom ntej ces twb tau hais ua ntej yuav ua tes hauj lwm lawm; lwm cov ntawv, nyob rau tib lub sij hawm ntawd, ces yog sau tom qab uas tes hauj lwm twb ua tiav lawm, uas yog qhov uas tib neeg muaj peev xwm ua tau. Cov xib fwb cev Vajtswv lus nyob rau lub sij hawm ntawd tau txais kev tshoov siab los ntawm Yehauvas thiab hais ib co lus qhia txog yav tom ntej, lawv hais lus ntau heev, thiab lawv qhia txog tej yam uas yuav tshwm sim yav tom ntej ntawm Tiam Hmoov Hlub, nrog rau kev rhuav lub ntiaj teb pov tseg nyob rau tiam kawg—tes hauj lwm uas Yehauvas npaj yuav ua. Cov ntawv seem ntawd ces tag nrho teev tes hauj lwm uas Yehauvas ua nyob rau Yixayee. Yog li ntawd, thaum nej nyeem phau Vajluskub, qhov tseem ceeb ces yog nej nyeem txog tej yam uas Yehauvas ua nyob rau hauv Yixayee xwb; phau Vajluskub Qub ces feem ntau yog teev txog Yehauvas tes hauj lwm coj Yixayee, Nws qhov kev siv Mauxe mus coj cov neeg Yixayee ntawm ntawm Iyiv mus, tus uas daws lawv dim ntawm Falau tej khawb xauv lawv, thiab coj lawv tawm mus rau tom tiaj moj sab qhua, tom qab uas lawv nkag mus rau Khana-as thiab txhua yam tom qab qhov no ces yog lawv lub neej nyob rau hauv Khana-as. Tag nrho tej uas dhau qhov no lawm ces yog tej lus teev txog Yehauvas tes hauj lwm thoob plaws Yixayee. Txhua yam teev tseg hauv Vajluskub Qub yog Yehauvas tes hauj lwm nyob rau hauv Yixayee, nws yog tes hauj lwm Yehauvas ua nyob rau daim av uas Nws tsim Adas thiab Evas nkawd. Txij kiag thaum Vajtswv pib coj cov tib neeg hauv ntiaj teb yam muaj qib muaj duas tom qab Nau-a, tag nrho tej uas teev tseg rau hauv phau Vajluskub Qub ces yog tes hauj lwm ntawm Yixayee. Thiab yog vim li cas ho tsis teev muaj ib qho hauj lwm twg uas dhau ntawm Yixayee mus li lawm? Vim yog daim av ntawm Yixayee yog noob neej qhov chaw yug. Nyob rau thaum cheev keeb, yeej tsis muaj ib lub teb chaws twg uas dhau ntawm Yixayee mus li lawm, thiab Yehauvas tsis tau ua hauj lwm nyob rau lwm qhov chaw li. Nyob rau txoj kev no, tej uas tau muab teev tseg ces nyob rau hauv phau Vajluskub Qub ntawm phau Vajluskub ces tsuas yog Vajtswv tes hauj lwm nyob rau hauv Yixayee rau lub sij hawm ntawd xwb. Cov lus hais los ntawm cov xib fwb cev Vajtswv lus, hais los ntawm Yaxaya, Daniyee, Yelemi, thiab Exekhee … lawv cov lus ces xub qhia ua ntej txog Nws lwm yam hauj lwm nyob rau hauv ntiaj teb, lawv xub qhia ua ntej txog tes hauj lwm ntawm Vajtswv Yehauvas Tus Kheej kiag. Tag nrho tej no ces yog los ntawm Vajtswv los, nws yog tes hauj lwm ntawm Vajntsujplig, thiab tshaj ntawm cov ntawv ntawm cov xib fwb cev Vajtswv lus no, txhua yam seem ces yog ib co lus teev txog tib neeg tej kev ntsib kev pom txog Yehauvas tes hauj lwm nyob rau lub sij hawm ntawd.

Tes hauj lwm tsim txhua yam mas tshwm sim ua ntej muaj noob neej lawm, tab sis phau Ntawv Chiv Keeb mas tsuas muaj tom qab uas twb muaj noob neej lawm xwb; nws yog ib phau ntawv uas Mauxe sau nyob rau thaum Tiam Muaj Kev Cai. Nws zoo li tej yam uas tshwm sim rau ntawm nej niaj hnub no: Tom qab tej ntawd tshwm sim lawm, nej muab tej ntawd sau cia coj mus qhia rau cov tib neeg yav tom ntej, thiab rau cov neeg yav tom ntej, tej uas koj tau muab teev tseg ces yog tej uas tshwm sim nyob rau lub sij hawm dhau los lawm—tej ntawd ces yeej tsis yog dab tsi tshaj tej keeb kwm li. Tej yam uas teev tseg nyob rau hauv Vajluskub Qub yog Yehauvas tes hauj lwm nyob rau Yixayee, thiab tej uas teev tseg nyob rau hauv Vajluskub Tshiab yog tes hauj lwm ntawm Yexus nyob rau Tiam Hmoov Hlub; lawv muab tes hauj lwm uas Vajtswv ua nyob rau ob tiam sib txawv ntawd teev ua ntaub ntawv tseg. Phau Vajluskub Qub teev ua ntaub ntawv tseg txog Vajtswv tes hauj lwm nyob rau Tiam Muaj Kev Cai, thiab yog li ntawd phau Vajluskub Qub yog ib phau ntawv keeb kwm, hos phau Vajluskub Tshiab ces yog qhov khoom ntawm tes hauj lwm ntawm Tiam Hmoov Hlub. Thaum tes hauj lwm tshiab pib lawm, ces phau Vajluskub Tshiab kuj rais mus ua ib yam uas dhau lub caij nyoog lawm thiab—thiab yog li ntawd, phau Vajluskub Tshiab ces kuj yog ib phau ntawv keeb kwm lawm thiab. Muaj tseeb, phau Vajluskub Tshiab mas tsis muaj kab muaj ke npaum li phau Vajluskub Qub, los sis nws tsis teev muaj ntau yam. Tag nrho ntawm cov lus ntau lo uas Yehauvas hais ces raug muab teev tseg nyob rau hauv Vajluskub Qub ntawm phau Vajluskub, hos tsuas yog ib txhia ntawm Yexus cov lus thiaj li raug muab teev muaj nyob rau hauv Plaub Txoj Moo Zoo xwb. Muaj tseeb, Yexus tau ua hauj lwm ntau heev, tab sis nws tsis raug muab teev tseg kom ntxaws ntxaws. Muaj tsawg yam dua uas teev tseg rau hauv phau Vajluskub Tshiab vim yog qhov uas seb Yexus tau ua tes hauj lwm ntau nplaum li cas; qhov hauj lwm uas Nws ua nyob rau lub sij hawm peb-thiab-ib-nrab xyoo nyob rau hauv ntiaj teb no thiab tes hauj lwm uas cov thwj tim ua ntawd tsawg tshaj tes hauj lwm ntawm Yehauvas. Thiab yog li ntawd, thiaj li muaj tej ntawv nyob rau hauv phau Vajluskub Tshiab tsawg dua phau Vajluskub Qub.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (1)

243. Cov ntawv ntawm txoj moo zoo ntawm phau Vajluskub Tshiab ces yog sau teev tseg nees nkaum rau peb caug xyoo tom qab uas Yexus twb raug ntsia rau saum tus ntoo khaub lig lawm. Ua ntej ntawd, cov neeg ntawm Yixayee tsuas nyeem phau Vajluskub Qub xwb. Qhov ntawd ces hais tias, thaum pib ntawm Tiam Hmoov Hlub ces tib neeg tsuas nyeem phau Vajluskub Qub xwb. Phau Vajluskub Tshiab tsuas tshwm sim nyob rau Tiam Hmoov Hlub xwb. Phau Vajluskub Tshiab tsis muaj nyob rau lub sij hawm uas Yexus ua tes hauj lwm; cov neeg tom qab uas Nws raug tsa ciaj sawv rov los lawm thiab nce mus rau saum ntuj ceeb tsheej lawm mam li teev Nws tes hauj lwm tseg. Tsuas yog tom qab ntawd xwb mas thiaj li muaj Plaub Txoj Moo Zoo, ntxiv rau qhov ntawd ces kuj muaj Povlauj thiab Petus nkawd cov ntawv, nrog rau phau Ntawv Qhia Tshwm. Ntev tshaj peb puas xyoo tom qab uas Yexus tau nce mus raum ntuj ceeb tsheej lawm, cov neeg tiam tom qab mam li muab cov ntaub ntawv no khaws coj los xaiv tso ua ke, thiab tsuas yog thaum ntawd xwb mas thiaj li muaj phau Vajluskub Tshiab ntawm phau Vajluskub. Tsuas yog tom qab uas tes hauj lwm raug ua tiav hlo lawm xwb mas thiaj li muaj phau Vajluskub Tshiab; nws yeej tsis muaj nyob ua ntej ntawd. Vajtswv tau ua tag nrho tes hauj lwm, thiab Povlauj thiab lwm tus tub txib tau sau ntawv ntau heev rau cov pawg ntseeg nyob rau ntau qhov chaw. Cov neeg tom qab lawv mam li muab lawv cov ntawv coj los sib sau ua ke, thiab mam muab qhov yog toog loj tshaj plaws uas Yauhas sau tseg nyob rau ntawm lub pov txwv Pamau, uas yog qhia txog yav tom ntej txog Vajtswv tes hauj lwm nyob rau tiam kawg ntawd coj los txuas rau tom kawg. Tib neeg muab qhov no coj los tso muaj qib muaj duas, uas yog txawv ntawm tej lus hais tawm niaj hnub no. Tej uas sau teev tseg niaj hnub no yog ua raws li tej kauj ruam ntawm Vajtswv tes hauj lwm; qhov uas tib neeg txuas ncauj txuas lus nrog niaj hnub no yog tes hauj lwm uas Vajtswv tus kheej ua kiag, thiab tej lus uas Nws hais tawm kiag. Koj—noob neej—tsis tas yuav cuam tshuam; cov lus, uas yog los ncaj qha ntawm tus Ntsujplig los, twb tau raug muab teeb tseg ib kauj ruam zuj zus lawm, thiab yeej txawv qhov kev teeb tsa ntawm tib neeg tej lus teev tseg. Tej uas lawv teev tseg, nws tuaj yeem hais tau hais tias, yog raws li lawv theem kev kawm thiab tib neeg lub peev xwm. Tej uas lawv teev tseg ces yog tib neeg tej kev ntsib kev pom xwb, thiab lawv nyias muaj nyias kev teev tseg thiab kev paub, thiab nyias teev nyias sib txawv. Yog li ntawd, yog koj pe hawm phau Vajluskub li Vajtswv ces koj tsis paub dab tsi kiag thiab ruam kawg nkaus! Vim li cas koj ho tsis nrhiav Vajtswv tes hauj lwm niaj hnub no? Tsuas yog Vajtswv tes hauj lwm thiaj cawm tau tib neeg xwb. Phau Vajluskub cawm tsis tau tib neeg, tib neeg txawm yuav nyeem nws ntau txhiab xyoo los yeej tseem yuav tsis muaj ib qho kev hloov me me nyob rau hauv lawv li, thiab yog koj pe hawm phau Vajluskub ces koj yuav tsis muaj hnub tau txais tes hauj lwm ntawm Vajntsujplig li.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (3)

244. Muaj coob tus neeg ntseeg hais tias kev to taub thiab muaj peev xwm txhais phau Vajluskub ces yog ib yam nkaus li nrhiav txoj hau kev tseeb—tab sis qhov tseeb, ces tej ntawd puas yuav yooj yim npaum li ntawd? Tsis muaj leej twg paub qhov muaj tseeb ntawm phau Vajluskub: qhov ntawd ces tsis yog dab tsi tshaj ib co lus teev tseg txoj keeb kwm ntawm Vajtswv tes hauj lwm, thiab ib co lus tim khawv rau thawj ob theem ntawm Vajtswv tes hauj lwm, thiab uas nws tsis muab ib qho kev to taub txog tej hom phiaj ntawm Vajtswv tes hauj lwm rau koj li. Txhua tus uas tau nyeem phau Vajluskub lawm ces yeej paub hais tias nws teev txog ob theem ntawm Vajtswv tes hauj lwm nyob rau Tiam Muaj Kev Cai thiab Tiam Hmoov Hlub. Phau Vajluskub Qub teev tseg txog qhov keeb kwm ntawm Yixayee thiab Yehauvas tes hauj lwm txij puag thaum ntuj tsim teb raug los txog ntua rau thaum kawg ntawm Tiam Muaj Kev Cai. Phau Vajluskub Tshiab teev tseg txog Yexus tes hauj lwm nyob rau hauv ntiaj teb, uas yog nyob rau hauv Plaub Txoj Moo Zoo, nrog rau tes hauj lwm ntawm Povlauj—tej no tseem tsis yog tej lus teev txog keeb kwm thiab lod? Muaj tej yam nyob rau yav tag coj los rau tam sim no ces yeej ua rau lawv yog keeb kwm lawm, thiab tsis hais lawv yuav muaj tseeb los muaj tiag npaum li cas li, lawv yeej tseem yog keeb kwm—thiab keeb kwm mas hais tsis tau txog qhov tam sim no, vim Vajtswv tsis tig saib rov qab rau hauv keeb kwm lawm! Thiab yog li ntawd, yog koj tsuas to taub phau Vajluskub xwb, thiab tsis to taub dab tsi txog tes hauj lwm uas Vajtswv npaj siab ua niaj hnub no, thiab yog koj ntseeg Vajtswv tab sis tsis nrhiav Vajntsujplig tes hauj lwm, ces koj tsis to taub hais tias kev nrhiav Vajtswv yog txhais tau li cas. Yog koj nyeem phau Vajluskub kom kawm tau qhov keeb kwm ntawm Yixayee, tshawb fawb txog qhov keeb kwm ntawm Vajtswv qhov kev tsim tag nrho lub ntuj thiab lub ntiaj teb, ces koj tsis ntseeg Vajtswv. Tab sis niaj hnub no, vim koj ntseeg Vajtswv, thiab caum nrhiav txoj sia, vim koj nrhiav kev paub Vajtswv, thiab tsis nrhiav tej niag ntaub ntawv uas tsis muaj sia thiab tej kev qhuab qhia los sis ib qho kev to taub txog keeb kwm xwb, ces koj yuav tsum nrhiav Vajtswv txoj kev xav ntawm niaj hnub no, thiab koj yuav tsum nrhiav txoj xub ke ntawm Vajntsujplig tes hauj lwm. Yog koj yog ib tug kws paub txog tej khoom qub ces koj nyeem phau Vajluskub los tau—tab sis koj tsis yog, koj yog ib tug ntawm cov ntseeg Vajtswv, thiab koj yuav tsum tau nrhiav Vajtswv txoj kev xav niaj hnub no.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (4)

245. Yog koj xav pom tes hauj lwm ntawm Tiam Muaj Kev Cai, thiab xav pom seb cov neeg Yixayee taug Yehauvas txoj kev li cas, ces koj yuav tsum nyeem phau Vajluskub Qub; yog koj xav to taub tes hauj lwm ntawm Tiam Hmoov Hlub, ces koj yuav tsum nyeem phau Vajluskub Tshiab. Tab sis koj ho yuav pom tes hauj lwm ntawm tiam kawg tau li cas? Koj yuav tsum lees txais txoj kev coj ntawm tus Vajtswv niaj hnub no, thiab to taub qhov tseeb txog tes hauj lwm niaj hnub no, vim qhov no yog tes hauj lwm tshiab, thiab tsis tau muaj leej twg teev nws tseg rau hauv Vajluskub li. Niaj hnub no, Vajtswv tau rais los muaj cev nqaij daim tawm lawm thiab tau xaiv lwm cov xaiv tseg nyob rau hauv Suav Teb lawm. Vajtswv ua hauj lwm nyob rau hauv cov neeg no, Nws ua txuas ntxiv mus rau Nws tes hauj lwm hauv ntiaj teb, thiab txuas ntxiv rau tes hauj lwm ntawm Tiam Hmoov Hlub. Tes hauj lwm niaj hnub no ces yog ib txoj kev uas tib neeg yeej tsis tau taug dua li, thiab ib txoj kev uas tsis muaj leej twg yuav tau pom dua li. Nws yog tes hauj lwm uas yeej tsis tau raug ua dua li—nws yog Vajtswv tes hauj lwm uas tshiab tshaj plaws nyob rau hauv ntiaj teb. Yog li ntawd, tes hauj lwm uas yeej tsis tau raug ua dua ces tsis yog keeb kwm, vim tam sim no yog tam sim no, thiab tseem tsis tau rais mus ua yav tag los. Tib neeg tsis paub hais tias Vajtswv twb tau ua tes hauj lwm loj dua, tshiab dua nyob rau hauv ntiaj teb, thiab nyob rau sab nraud ntawm Yixayee, hais tias nws twb tau mus dhau deb tshaj ntawm tus ciaj ciam ntawm Yixayee lawm, thiab tau dhau qhov uas tej xib fwb cev Vajtswv lus tej lus qhia txog yav tom ntej lawm, thiab tes hauj lwm tshiab dua uas dhau mus tshaj ntawm Yixayee mus lawm, thiab tes hauj lwm uas tib neeg tsis muaj peev xwm yuav xav tau los sis pom tau hauv nruab siab li. Vajluskub yuav ua cas ntim tau tej lus teev tseg uas qhia meej npaum li ntawd mas? Leej twg thiaj yuav teev tau txhua txhua qhov ntawm tes hauj lwm niaj hnub no, yam tsis muaj ib qho tu ncua li, ua ntej ntawd mas? Leej twg thiaj yuav teev tau tes hauj lwm uas loj tshaj, ntse tshaj uas tsis ua raws tej kab lig kev cai, nyob rau hauv phau ntawv qub qub tuaj pwm taws mas? Tes hauj lwm niaj hnub no tsis yog keeb kwm, thiab zoo li ntawd, ces yog koj xav taug txoj kev tshiab ntawm niaj hnub no, ces koj yuav tsum ncaim ntawm phau Vajluskub, koj yuav tsum mus kom dhau deb tshaj cov ntawv ntawm tej lus qhia txog yav tom ntej los sis keeb kwm nyob rau hauv phau Vajluskub. Tsuas yog thaum ntawd xwb mas koj thiaj li yuav muaj cuab kav taug tau txoj kev tshiab kom yog, thiab tsuas yog thaum ntawd xwb mas koj thiaj li yuav muaj cuab kav to taub qhov tseeb txog thaj chaw tshiab thiab tes hauj lwm tshiab. Koj yuav tsum to taub vim li cas, niaj hnub no, koj thiaj raug hais kom tsis txhob nyeem phau Vajluskub lawm, vim li cas ho muaj ib qho hauj lwm uas tsis nyob rau hauv Vajluskub, vim li cas Vajtswv ho tsis nrhiav txoj hau kev tshiab, muaj tej ntsiab lus ntau dua coj los xyaum ua nyob rau hauv Vajluskub, thiab vim li cas ho muaj qhov hauj lwm uas loj tshaj nyob rau sab nraud ntawm phau Vajluskub. Tag nrho tej no yog tej uas nej yuav tsum to taub. Koj yuav tsum paub qhov sib txawv ntawm tes hauj lwm qub thiab tshiab, thiab txawm yog koj tsis nyeem Vajluskub, los koj yuav tsum muaj cuab kav muab nws phais saib; tsis li ntawd, ces koj tseem yuav pe hawm phau Vajluskub, thiab nws yuav yog ib qho nyuab rau koj los to taub tes hauj lwm tshiab thiab muaj qhov kev hloov tshiab. Vim muaj ib txoj kev uas siab dua lawm, vim li cas tseem ho yuav kawm txog txoj kev ua qis dua thiab dua caij nyoog tag lawm? Vim twb muaj tej lus hais tawm uas tshiab dua lawm, thiab tej hauj lwm tshiab dua lawm, vim li cas tseem pheej ua neej nrog rau tej lus teev txog tej keeb kwm qub? Cov lus hais tawm tshiab muaj cuab kav yuav pab cuam tau rau koj, uas ua pov thawj qhia tau hais tias qhov no yog tes hauj lwm tshiab; tej ntaub ntawv teev tseg qub tsis muaj cuab kav yuav ua tau kom koj txaus siab hlo, ua kom tau tej yam uas koj xav tau tam sim no rau koj, ces ua tau pov thawj qhia hais tias lawv tsuas yog keeb kwm xwb, thiab tsis yog tes hauj lwm ntawm no thiab lus sij hawm no. Txoj kev siab tshaj plaws ces yog tes hauj lwm uas tshiab tshaj plaws, thiab nrog rau tes hauj lwm tshiab, ces tsis hais txoj kev ntawm yav tag los yuav siab npaum li cas li, nws yeej tsuas tseem yog keeb kwm uas tib neeg tig rov qab mus saib xwb, thiab tsis hais nws qhov nuj nqis yuav zoo li cas thaum muab piv rau li, nws yeej tsuas tseem yog txoj kev qub xwb. Txawm hais tias nws yuav raug muab sau teev tseg nyob rau hauv “phau ntawv dawb huv,” los txoj kev qub yeej tseem yog keeb kwm xwb; txawm hais tias tsis muaj lus teev tseg nyob rau hauv “phau ntawv dawb huv,” los txoj kev tshiab ces yog qhov ntawm no thiab tam sim no. Txoj kev no yuav cawm tau koj, thiab txoj kev no yuav hloov tau koj, vim qhov no yog tes hauj lwm ntawm Vajntsujplig.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (1)

246. Koj yuav tsum to taub phau Vajluskub—tes hauj lwm no yog qhov tseem ceeb tshaj plaws! Niaj hnub no, koj tsis tas nyeem phau Vajluskub li, vim nws tsis muaj dab tsi tshiab nyob rau hauv; nws tsuas yog tej qub tag nrho xwb. Phau Vajluskub yog ib phau ntawv keeb kwm, thiab yog koj tau noj thiab haus phau Vajluskub Qub nyob rau Tiam Hmoov Hlub lawm—yog koj xyaum ua raws yam uas yuav tsum tau ua nyob rau thaum lub sij hawm ntawm Vajluskub Qub nyob rau tiam Hmoov Hlub—Yexus yuav tsis lees txais koj, thiab cem koj; yog koj tau muab Vajluskub Qub coj los siv rau Yexus tes hauj lwm, ces koj yuav yog ib tug Falixai. Yog, niaj hnub no, koj muab Vajluskub Qub thiab Tshiab coj los tso ua ke los muab noj thiab haus, thiab xyaum ua raws, ces tus Vajtswv niaj hnub no yuav cem koj; koj yuav poob qab rau Vajntsujplig tes hauj lwm niaj hnub no! Yog koj noj thiab haus phau Vajluskub Qub thiab phau Vajluskub Tshiab, ces koj tsis yoog raws li Vajntsujplig! Nyob rau thaum lub sij hawm ntawm Yexus, Yexus coj cov neeg Yudais thiab tag nrho cov uas raws Nws raws li qhov uas Vajntsujplig ua hauj lwm nyob rau hauv Nws rau lub sij hawm ntawd. Nws tsis muab phau Vajluskub coj los ua qhov hauv paus keeb cag rau tej yam uas Nws ua, tab sis hais lus raws li Nws tes hauj lwm; Nws tsis quav ntsej txog qhov uas Vajluskub hais, los sis Nws tsis nrhiav hauv Vajluskub kom tau ib txoj kev los coj Nws cov ntseeg. Txij kiag thaum Nws pib ua tes dej num los mus, Nws tshaj tawm txoj kev ntawm kev hloov siab lees txim—ib lo lus uas yeej tsis tau muaj teev tseg rau hauv tej lus qhia txog yav tom ntej ntawm phau Vajluskub Qub li. Tsis yog hais tias Nws tsis ua raws li Vajluskub nkaus xwb, tab sis Nws kuj tseem coj ib txoj kev tshiab, thiab ua tes hauj lwm tshiab. Nws yeej tsis hais lus piv rau Vajluskub lub sij hawm Nws qhuab qhia li. Nyob rau thaum Tiam Muaj Kev Cai, yeej tsis tau muaj leej twg uas muaj peev xwm ua tau Nws tej txuj ci phim hwj txog kev kho tej neeg mob kom zoo thiab ntiab dab tawm li. Yog li ntawd, ib yam nkaus li thiab, Nws tes hauj lwm, Nws tej kev qhuab qhia, thiab txoj kev muaj cai thiab lub hwj chim ntawm Nws tej lus ces yeej mus deb tshaj txhua tus neeg nyob rau Tiam Muaj Kev Cai. Yexus tsuas yog ua Nws tes hauj lwm uas tshiab dua xwb, thiab txawm hais tias muaj neeg coob tus siv Vajluskub los cem Nws—thiab tseem siv phau Vajluskub Qub los muab Nws ntsia kiag rau saum tus ntoo khaub lig—los Nws tes hauj lwm yeej dhau phau Vajluskub Qub lawm; yog hais tias tsis zoo li no, vim li cas tib neeg ho muab Nws ntsia rau saum tus ntoo khaub lig? Tsis yog qhov uas tsis muaj ib yam dab tsi nyob hauv phau Vajluskub Qub uas hais txog Nws tej kev qhuab qhia, thiab Nws lub peev xwm kho cov neeg mob kom zoo thiab ntiab tau dab tawm lod? Nws tes hauj lwm ces yog ua los coj ib txoj kev tshiab, nws tsis yog txhob txwm npaj los sib tawm tsam nrog phau Vajluskub, los sis txhob txwm rhuav tshem phau Vajluskub Qub. Nws tsuas los ua Nws tes hauj lwm qhuab qhia, los coj tes hauj lwm tshiab los rau cov uas ntshaw txog thiab nrhiav Nws xwb. Nws tsis yog los piav txog Vajluskub Qub los sis los txhawb nqa nws tes hauj lwm. Nws tes hauj lwm tsis yog ua kom cia Tiam Muaj Kev Cai loj hlob ntxiv mus, vim Nws tes hauj lwm tsis tau ua twb zoo xav txog qhov uas seb nws puas muaj phau Vajluskub ua nws lub hauv paus keeb cag; Yexus tsuas los ua Nws tes hauj lwm uas Nws tsim nyog ua xwb. Yog li ntawd, Nws tsis piav txog tej lus qhia txog yav tom ntej ntawm phau Vajluskub Qub, los sis Nws tsis ua hauj lwm raws li tej lus ntawm Vajluskub Qub Tiam Muaj Kev Cai. Nws tsis quav ntsej txog tej uas Vajluskub Qub hais, Nws tsis txhawj txog qhov uas seb nws puas yuav pom zoo nrog Nws tes hauj lwm los tsis pom zoo, thiab tsis txhawj txog tej uas lwm tus yuav paub txog Nws tes hauj lawm los tsis paub li, los sis lawv yuav cem nws li cas li. Nws tsuas rau siab ntso ua tes hauj lwm uas Nws tsim nyog ua nkaus xwb, txawm hais tias coob tus neeg yuav siv tej lus qhia txog yav tom ntej ntawm cov xib fwb cev Vajtswv lus hauv Vajluskub Qub los cem Nws los xij. Rau tib neeg, ces nws zoo li Nws tes hauj lwm tsis muaj hauv paus hauv ntsis li, thiab muaj ntau yam uas tsis sib dhos nrog rau tej lus teev tseg hauv Vajluskub Qub. Qhov no tsis yog tib neeg qhov kev ua yuam kev lod? Ua puas tsim nyog muab kev qhuab qhia coj los siv rau Vajtswv tes hauj lwm? Thiab Vajtswv tseem yuav tau ua raws nraim li tej lus qhia ua ntej ntawm cov xib fwv cev Vajtswv lus thiab lod? Thaum kawg, qhov twg loj dua: Vajtswv los sis Vajluskub? Vajtswv tseem yuav tsum tau ua hauj lwm raws nraim li Vajluskub thiab lod? Puas yog hais tias Vajtswv yeej tsis muaj cai hla dhau Vajluskub li no mas? Vajtswv yeej ncaim tsis tau Vajluskub thiab ua lwm yam hauj lwm li lod? Vim li cas Yexus thiab Nws cov thwj tim ho tsis ua raws li tej kev cai Xanpatau li mas? Yog Nws tseem yuav tau xyaum ua raws li qhov kaj ntawm txoj cai Xanpatau thiab ua raws nraim li tej kev cai ntawm Vajluskub Qub, vim li cas Yexus ho tsis khaws tej kev cai Xanpatau tom qab Nws los lawm, tab sis ho ntxuav ko taw, qhwv tob hau, ntais ncuav, thiab hais cawv mas? Tsis yog tej no yeej tsis muaj nyob rau hauv tej kev cai hauv Vajluskub Qub li lod? Yog Yexus hwm phau Vajluskub Qub, vim li cas Nws ho tsis ua raws li tej kev qhuab qhia no mas? Koj yuav tsum paub qhov twg los ua ntej, Vajtswv los sis phau Vajluskub! Twb yog tus Tswv ntawm hnub Xanpatau lawm, ua Nws tseem tsis yog tus Tswv ntawm phau Vajluskub thiab lod?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (1)

247. Tag nrho cov neeg Yudai yeej nyeem Vajluskub Qub thiab paub txog Yaxaya cov lus zuag cev lus hais tias muaj ib tug me nyuam tub yuav los yug nyob rau hauv ib lub dab nyuj. Tom qab ntawd, lawv yeej paub tag tej lus zuag cev lus no tib si, vim li cas lawv tseem qho tsim txom Yexus? Tsis yog tim lawv tus moj yam ntxeev siab thiab tsis paub txog Vajntsujplig tes hauj lwm los? Lub sij hawm ntawd, cov Falixai ntseeg hais tias Yexus tes hauj lwm mas txawv qhov lawv paub txog tus me nyuam tub ntawm cov lus zuag cev lus ntawd, thiab cov neeg niaj hnub no tsis txais yuav Vajtswv vim tej hauj lwm ntawm tus Vajtswv uas yug los ua neeg ntawd zoo tsis thooj li qhov Vajluskub hais. Tsis yog tus moj yam ntawm lawv txoj kev ntxeev siab rau Vajtswv yeej zoo tib yam los? Koj txais yuav puas tau, yam tsis muaj lus nug hlo li, tag nrho tes hauj lwm ntawm tus Vajntsujplig? Yog hais tias nws yeej yog tes hauj lwm ntawm Vajntsujplig, ces yeej yog tus dej ntws uas yog lawm, thiab koj yuav tsum txais yuav nws yam tsis muaj ib qho uas yuav tsis ntseeg hlo li; you tsis txhob xaiv qee yam txais yuav nkaus xwb. Yog tias koj muaj ntau qhov kev thoob tsib tob mus rau Vajtswv thiab ua twb zoo ceev faj rau Nws, ces qhov no tsis yog qhov tsis hu rau lod? Koj tsis tas yuav mus nrhiav tej pov thawj tim khawv los ntawm Vajluskub li, yog hais tias nws yog tes hauj lwm ntawd Vajntsujplig, ces koj yuav tsum txais yuav xwb, vim koj ntseeg Vajtswv ces cawm Vajtswv, thiab koj yuav tsum tsis txhob tshawb xyuas Nws. Koj yuav tsum tsis txhob nrhiav pov thawj tim khawv ntawm Kuv ntxiv los mus ua pov thawj hais tias Kuv yog koj tus Vajtswv, tab sis yuav tsum muaj peev xwm los thoob tsib hais tias seb Kuv puas muaj txiaj ntsim rau koj—qhov no yog qhov uas tseem ceeb tshaj plaws. Txawm hais tias koj nrhiav tau tej pov thawj uas yeej cam tsis dhau kiag li nyob rau hauv Vajluskub, los nws yeej coj tsis tau koj los rau Kuv lub xub ntiag yam puv npo. Koj tsuas yog lam ua neej nyob rau sab hauv Vajlubkub tus laj kab xwb, thiab tsis yog hauv Kuv lub xub ntiag; phau Vajluskub pab tsis tau kom koj paub Kuv, los sis ua tsis tau kom koj txoj kev hlub rau Kuv ntawd muaj tob tshaj ntxiv. Txawm hais tias Vajluskub yeej cev lus hais tias ib tug me nyuam tub yuav los yug, tsis muaj leej twg yuav to taub txog hais tias qhov lus zuag cev lus ntawd hais txog leej twg tiag, vim tib neeg tsis paub Vajtswv tes hauj lwm, thiab qhov no yog qhov ua rau cov Falixai sawv tawm tsam Yexus. Ib txhia yeej paub hais tias Kuv tes hauj lwm yog ua qhov zoo rau tib neeg, tab sis lawv tseem ntseeg ntxiv mus hais tias Yexus thiab Kuv yog ob tug uas sib txawv, yeej tsis sib raug zoo ua ke li. Nyob rau lub sij hawm ntawd, Yexus muab ib cov zaj lus qhia rau Nws cov thwj tim nyob rau Tiam Hmoov Hlub hais txog kev xyaum ua, kev sib koom txoos ua ke, yuav hais li cas nyob rau hauv tej lus thov Vajtswv, yuav sib coj sib hwm li cas, thiab ntau yam ntxiv mus. Tes hauj lwm Nws ua mas yog hauj lwm ntawm Tiam Hmoov Hlub, thiab Nws tsuas tham nthuav dav txog qhov uas Nws cov thwj tim thiab lwm tus neeg uas ntseeg Nws yuav tsum xyaum ua xwb. Nws tsuas ua tes hauj lwm ntawm Tiam Hmoov Hlub xwb, thiab tsis yog ib qho hauj lwm nyob rau tiam kawg li. Thaum Yehauvas teeb cov kev cai hauv Vajluskub Qub nyob rau Tiam Muaj Kev Cai, vim li cas Nws ho tsis ua tes hauj lwm ntawm Tiam Hmoov Hlub rau thaum ntawd? Vim li cas Nws ho tsis qhia kom meej ua ntej txog tes hauj lwm ntawm Tiam Hmoov Hlub? Qhov no ho tseem yuav tsis pab kom tib neeg txais yuav nws thiab los? Nws tsuas cev lus hais tias ib tug me nyuam tub yuav los yug thiab los muaj hwj chim, tab sis Nws tsis ua tes hauj lwm ntawm Tiam Hmoov Hlub ua ntej. Vajtswv tes hauj lwm nyob rau ib tiam twg mas yeej muaj tus ciaj ciam uas pom tseeb heev; Nws tsuas ua tes hauj lwm ntawm tiam ntawd xwb thiab ib txwm tsis ua theem tom ntej ntawm tes hauj lwm ntawd ua ntej li. Tsuas yog ua li ntawd nkaus xwb mas Nws tes hauj lwm ntawm tej tiam ntawd thiaj li yuav muab coj tau los rau tom hauv ntej. Yexus tsuas hais txog phiaj xwm qhia ntawm tiam kawg xwb, hais txog qhov uas yuav ua siab ntev li cas thiab yuav ua li cas es thiaj yuav raug cawm dim, hais txog yuav hloov siab lees txim thiab lees txais kev txhaum li cas, thiab hais txog yuav kwv tus ntoo khaub lig thiab tiv kev txom nyem li cas; Nws yeej tsis hais txog qhov uas yuav ua li cas es tib neeg nyob rau tiam kawg thiaj yuav nkag tau los, los sis tsis hais txog qhov uas tib neeg yuav ua li cas es thiaj yuav ua tau haum Vajtswv lub siab nyiam. Thaum zoo li ntawd, nws tsis yog ib qho txaus luag uas yuav mus tshawb hauv Vajluskub txog Vajtswv tes hauj lwm ntawm tiam kawg thiab los? Koj ho yuav tau dab tsi los ntawm qhov uas lam tuav phau Vajluskub? Puas yog ib tug neeg tshab txhais Vajluskub los sis ib tug neeg qhia Vajtswv txoj lus, uas yuav muaj cuab kav pom tes hauj lwm hnub no ua ntej?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tus Tib Neeg Uas Twb Tau Kem Ciam Rau Vajtswv nyob rau hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?

248. Niaj hnub no, tib neeg ntseeg hais tias phau Vajluskub yog Vajtswv, thiab hais tias Vajtswv yog phau Vajluskub. Yog li ntawd, ib yam nkaus li thiab, lawv ntseeg hais tias tag nrho cov lus hauv phau Vajluskub thiaj yog tib co lus uas Vajtswv hais nkaus xwb, thiab hais tias tag nrho tej lus ntawd yog Vajtswv hais. Cov uas ntseeg Vajtswv tseem xav hais tias, txawm hais tias tag nrho rau-caum-rau phau ntawv hauv phau Vajluskub Qub thiab Tshiab ntawd yog tib neeg sau, los lawv puav leej yog tau txais kev tshoov siab los ntawm Vajtswv tib si, thiab ib co lus teev tseg ntawm tej lus hais tawm ntawm Vajntsujplig. Qhov no yog kev to taub yuam kev ntawm tib neeg, thiab nws tsis sib dhos raws li tej qhov tseeb lawm. Qhov tseeb, dhau ntawm cov ntawv txog cov lus qhia txog yav tom ntej lawm, feem ntau ntawm Vajluskub Qub ces yog tej lus teev txog keeb kwm. Ib txhia ntawm cov ntawv ntawm phau Vajluskub Tshiab los yog ntawm tib neeg tej kev ntsib kev pom los, thiab ib txhia yog los ntawm kev qhuab qhia ntawm Vajntsujplig los; Povlauj cov ntawv, muab piv txwv, tshwm los ntawm tes hauj lwm ntawm ib tug tib neeg, tag nrho lawv ces puav leej yog qhov tshwm sim los ntawm Vajntsujplig qhov kev qhuab qhia, thiab tej ntawd ces yog sau rau cov pawg ntseeg, thiab tej lus ntuas thiab lus txhawb siab rau cov kwv tij thiab cov nkauj muam ntawm cov pawg ntseeg. Cov ntawd tsis yog cov lus uas Vajntsujplig hais—Povlauj tsis muaj peev xwm yuav hais tau lus sawv cev Vajntsujplig, thiab nws kuj tsis yog ib tug xib fwb cev Vajtswv lus, nws haj yam tsis pom tej yog toog uas Yauhas pom thiab. Nws cov ntawv ces yog sau rau cov pawg ntseeg ntawm Efexau, Filadefia, Kalatia, thiab lwm cov pawg ntseeg. Thiab yog li ntawd, Povlauj cov ntawv ntawm phau Vajluskub Tshiab yog cov ntawv uas Povlauj sau rau cov pawg ntseeg, thiab tsis yog tej kev tshoov siab los ntawm Vajntsujplig, los sis cov ntawd tsis yog cov lus hais tawm ncaj qha los ntawm Vajntsujplig. Tej ntawd tsuas yog cov lus ntuas, lus nplig siab, thiab lus txhawb siab uas nws sau rau cov pawg ntseeg nyob rau lub sij hawm ntawm nws tes hauj lwm xwb. Yog li ntawd, ib yam nkaus li thiab, tej ntawd tsuas yog tej lus teev tseg txog Povlauj tes hauj lwm rau lub sij hawm ntawd xwb. Tej ntawd yog sau rau tag nrho cov uas yog kwv tij thiab nkauj muam hauv tus Tswv, es kom cov kwv tij thiab nkauj muam ntawm cov pawg ntseeg rau lub sij hawm ntawd ua raws li nws tej lus cob qhia thiab yoog raws txoj kev hloov siab lees txim ntawm tus Tswv Yexus. Yeej tsis muaj ib qho twg uas Povlauj yuav hais tias, kom lawv cov pawg ntseeg lub sij hawm ntawd los sis yav pem suab, tag nrho yuav tsum noj thiab haus tej uas nws sau, los sis nws tsis tau hais tias nws cov lus tag nrho yog los ntawm Vajtswv los. Raws li tej xwm txheej ntawm pawg ntseeg rau lub sij hawm ntawd, nws tsuas sib tham nrog cov kwv tij thiab nkauj muam, thiab ntuas lawv, thiab txhawb txoj kev ntseeg rau hauv lawv, thiab nws tsuas qhuab qhia los sis qhia kom cov neeg nco qab thiab ntuas lawv xwb. Nws cov lus yog los ntawm nws tus kheej lub nra los, thiab nws txhawb nqa cov neeg los ntawm tej lus no. Nws ua tes hauj lwm ntawm ib tug tub txib ntawm cov pawg ntseeg rau lub sij hawm ntawd, nws yog ib tug neeg ua hauj lwm uas raug Tswv Yexus siv, thiab yog li ntawd nws yuav tsum tau ua tes dej num rau cov pawg ntseeg, thiab yuav tsum lees ua tes hauj lwm ntawm cov pawg ntseeg, nws yuav tsum kawm txog tej yam ntxwv ntawm cov kwv tij thiab cov nkauj muam—thiab vim yog qhov no, nws thiaj li sau ntawv rau tag nrho cov kwv tij thiab cov nkauj muam hauv tus Tswv. Tag nrho tej nws hais uas txawj qhuab qhia thiab zoo rau tib neeg ces yeej yog tag nrho, tab sis nws tsis sawv cev cov lus hais tawm ntawm Vajntsujplig, thiab nws tsis muaj cuab kav yuav sawv cev tau Vajtswv. Nws yog ib qho kev to taub uas phem kawg nkaus, thiab ib qho kev thuam txoj kev ntseeg loj tshaj plaws, rau tib neeg los muab tej lus teev txog ib tug tib neeg tej kev paub kev pom thiab ib tug tib neeg tej ntawv coj los ua tej lus uas hais los ntawm Vajntsujplig rau cov pawg ntseeg! Qhov ntawd mas yeej muaj tseeb tiag thaum hais txog cov ntawv uas Povlauj sau rau cov pawg ntseeg, vim nws cov ntawv yog sau rau cov kwv tij thiab cov nkauj muaj raws li tej xwm txheej thiab tej yam tshwm sim ntawm ib pawg ntseeg twg rau lub sij hawm ntawd, thiab yog siv coj los ntuas cov kwv tij thiab nkauj muam nyob rau hauv tus Tswv, ces kom lawv thiaj li tau txais hmoov hlub ntawm Tswv Yexus. Nws cov ntawv yog yuav tsa kom cov kwv tij thiab cov nkauj muam nyob rau lub sij hawm ntawd sawv los. Nws kuj hais tau hais tias qhov no yog nws tus kheej lub nra, thiab kuj yog lub nra uas Vajntsujplig muab rau nws; tshaj txhua yam ces, nws yog ib tug tub txib uas coj cov pawg ntseeg rau lub sij hawm ntawd, tus uas sau cov ntawv rau cov pawg ntseeg thiab ntuas lawv—qhov ntawd yog nws tes dej num. Nws lub koob meej tsuas yog lub ntawm ib tug tub txib uas ua hauj lwm xwb, thiab nws tsuas yog ib tug tub txib uas raug xa los ntawm Vajtswv xwb; nws tsis yog ib tug xib fwb cev Vajtswv lus, los sis tsis yog ib tug kws qhia txog yav tom ntej. Rau nws, ces nws tus kheej tes hauj lwm thiab lub neej ntawm cov kwv tij thiab nkauj muam ces yog qhov tseem ceeb tshaj plaws li. Yog li ntawd, nws thiaj tsis muaj cuab kav hais lus sawv cev Vajntsujplig. Nws cov lub tsis yog Vajntsujplig cov lus, haj yam hais tsis tau hais tias yog Vajtswv cov lus, vim Povlauj ces tsis yog ib yam dab tsi tshaj li ib tug uas raug Vajtswv tsim tawm los, thiab tsis yog qhov kev yug los ua neeg ntawm Vajtswv tiag tiag li. Nws lub koob meej tsis yog lub zoo tib yam li Yexus lub. Yexus cov lus yog Vajntsujplig cov lus, tej ntawd yog cov lus ntawm Vajtswv, vim Nws lub koob meej yog Khetos lub—Vajtswv tus Tub. Povlauj yuav ua cas yog tus sib txig nrog Nws? Yog tib neeg pom Povlauj cov ntawv los sis cov lus uas hais tawm ntawm Vajntsujplig, thiab pe hawm lawv li Vajtswv, ces tsuas hais tau hais tias lawv mas tsis txawj saib qhov yog los tsis yog li. Yog yuav muab hais nchav zog, ces qhov no tseem tsis yog kev thuam txoj kev ntseeg thiab lod? Ib tug tib neeg yuav hais lus sawv cev Vajtswv tau li cas? Thiab ua cas tib neeg ho nyo hau rau tej lus teev tseg ntawm nws cov ntawv thiab rau cov lus nws hais cuag nkaus li lawv yog ib phau ntawv dawb huv, los sis ib phau ntawv qaum ntuj? Vajtswv tej lus puas yuav muaj ib tug neeg lam tau lam muab coj los hais tau mas? Ib tug tib neeg yuav ua cas hais lus sawv cev Vajtswv tau mas? Thiab yog li ntawd, qhov koj hais—cov ntawv uas nws sau rau cov pawg ntseeg ntawd tseem yuav tsuas dub tsis tau los ntawm nws tus kheej tej tswv yim thiab lod? Ua cas lawv thiaj li yuav tsis tsuas dub los ntawm tib neeg tej tswv yim mas? Nws sau cov ntawv ntawd rau cov pawg ntseeg raws li nws tus kheej tes kev ntsib kev pom thiab nws tus kheej qhov kev paub. Piv txwv li, Povlauj sau ib tsab ntawv mus rau cov pawg ntseeg ntawm Kalatia uas muaj qee yam kev xav, thiab Petus sau dua ib tsab, uas muaj lwm qhov kev xav. Qhov twg yog qhov uas los ntawm Vajntsujplig los mas? Tsis muaj leej twg yuav hais tau tseeb tseeb li. Yog li ntawd, nws thiaj tsuas hais tau hais tias nkawd ob leeg puav leej ris ib lub nra rau cov pawg ntseeg, tab sis nkawd cov ntawv sawv cev nkawd lub siab, lawv sawv cev nkawd txoj kev pab cuam thiab kev txhawb nqa rau cov kwv tij thiab cov nkauj muam, thiab nkawd lub nra rau cov pawg ntseeg, thiab lawv tsuas sawv cev tib neeg tes hauj lwm xwb—lawv tsis yog Vajntsujplig li tag nrho. Yog koj hais tias nws cov ntawv yog Vajntsujplig cov lus, ces koj ruam dhau heev lawm, thiab koj tab tom thuam txoj kev ntseeg! Povlauj cov ntawv thiab lwm cov ntawv nyob rau hauv phau Vajluskub Tshiab ces zoo ib yam li cov ntawv sau txog tej kev nco qab ntawm cov neeg tseem ceeb fab kev ntseeg tsis ntev dhau los xwb: Lawv nyob sib txig zos nrog rau cov ntawv ntawm Faj Xwm Nis los sis tej kev ntsib kev pom ntawm Laulee, thiab tej yam zoo li ntawd ntxiv mus xwb. Nws tsuas yog hais tias cov ntawv ntawm cov neeg tseem ceeb fab kev ntseeg tsis ntev dhau los no tsis tau raug muab sau coj los tso rau hauv phau Vajluskub Tshiab xwb, tab sis lub ntsiab tseeb ntawm cov neeg ces yeej zoo ib yam nkaus: Lawv yog cov neeg uas raug Vajntsujplig siv nyob rau ib lub caij twg, thiab lawv tsis muaj cuab kav sawv cev ncaj qha rau Vajtswv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (3)

249. Niaj hnub no, leej twg ntawm nej tau luag hais tias tag nrho cov lus uas hais los ntawm cov uas raug Vajntsujplig siv ntawd mas yog los ntawm Vajntsujplig los mas? Puas muaj leej twg tau luag hais li ntawd mas? Yog koj hais tej zoo li ntawd, ces vim li cas Exala phau ntawv qhia txog tej uas yuav tshwm sim tom ntej ho raug muab pov tseg lawm mas, thiab vim li cas ho ua tib yam nkaus li ntawd rau cov ntawv ntawm cov neeg dawb huv thiab cov xib fwb cev Vajtswv lus puag thaum ub mas? Yog tag nrho lawv puav leej yog los ntawm Vajntsujplig los, ces vim li cas nej ho tau luag txiav txim siab yam tsis ruaj siab li ntawd mas? Koj puas muaj tej yam uas ua rau koj tsim nyog los xaiv tes hauj lwm ntawm Vajntsujplig mas? Muaj ntau zaj dab neeg tawm hauv Yixayee tuaj kuj raug muab pov tseg lawm thiab. Thiab yog koj ntseeg hais tias tej lus sau tseg yav tag los no puav leej yog los ntawm Vajntsujplig los tag nrho, ces vim li cas ho muaj ib co ntawv raug muab pov tseg tag lawm mas? Yog hais tias tag nrho lawv yeej yog los ntawm Vajntsujplig los, ces tag nrho lawv yuav tsum raug muab khaws tseg pob, thiab muab xa mus rau cov kwv tij thiab cov nkauj muam ntawm tej pawg ntseeg tau nyeem. Lawv tsis tsim nyog yuav raug xaiv los sis raug pov tseg raws li tib neeg txoj kev xav; ua li ntawd ses yog ib qho txhaum laiv. Hais tias tej kev ntsib kev pom ntawm Povlauj thiab Yauhas raug muab sib xyaws nrog rau nkawd tej kev to taub tob ntawm nkawd tus kheej mas tsis tau txhais hais tias nkawd tej kev ntsib kev pom thiab kev paub los ntawm Ntxwgnyoog los, tab sis tsuas hais tias nkawd muaj tej yam uas los ntawm nkawd tus kheej tej kev ntsib kev pom thiab kev to taub tob xwb. Nkawd qhov kev paub ces yoog raws keeb kwm ntawm tej yam uas nkawd tau ntsib tau pom kiag rau lub sij hawm ntawd, thiab leej twg thiaj yuav hais tau yam ruaj siab hlo hais tias tag nrho tej ntawd yog los ntawm Vajntsujplig los? Yog Plaub Txoj Moo Zoo puav leej yog los ntawm Vajntsujplig los, ces vim li cas Mathai, Malakau, Luka thiab Yauhas lawv ib leeg ho hais ib yam txawv txog Yexus tes hauj lwm mas? Yog nej tsis ntseeg qhov no, ces saib cov lus tham nyob rau hauv Vajluskub txog qhov uas Petus tsis lees tus Tswv peb zaug: Tej ntawd yeej puav leej sib txawv tag nrho li, thiab tej ntawd mas ib qho yeej muaj ib tug yam ntxwv txawv. Coob tus uas tsis paub dab tsi mas hais tias, “Tus Vajtswv uas yug los ua neeg kuj yog ib tug tib neeg thiab, yog li ntawd cov lus Nws hais puas yuav yog los ntawm Vajntsujplig los tag nrho mas? Yog Povlauj thiab Yauhas nkawd cov lus raug sib xyaws nrog tib neeg txoj kev xav, ces ua cov lus uas Nws hais puas yuav tsis raug sib xyaws nrog tib neeg txoj kev xav tiag mas?” Cov neeg uas hais li ntawd ces dig muag lawm thiab ruam tiag tiag li! Ua twb zoo nyeem Plaub Txoj Moo Zoo; nyeem tej uas lawv teev tseg txog tej uas Yexus ua, thiab tej lus Nws hais. Ib zaj lus twg mas yeej sib txawv me ntsis, thiab ib zaj twg mas nws yeej muaj nws kis. Yog tej uas sau txog cov neeg sau cov ntawv ntawd puav leej yog los ntawm Vajntsujplig los, ces nws yeej yuav zoo ib yam thiab mus raws tib kis xwb. Vim li cas ho muaj tej yam tsis sib dhos thiab mas? Ua tib neeg tsis ruam tshaj plaws li, es tsis muaj peev xwm pom qhov no lod?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog Lub Npe thiab Lub Koob Meej

250. Txoj Moo Zoo ntawm Mathai ntawm phau Vajluskub Tshiab teev ua ntaub ntawv txog Yexus caj ces. Nyob rau thaum pib, nws hais tias Yexus yog ib tug xeeb leej xeeb ntxwv ntawm Anplahas thiab ntawm Davi, thiab tus tub ntawm Yauxej; ntxiv mus nws hais tias Yexus yog xeeb los ntawm Vajntsujplig, thiab yug los ntawm ib tug nkauj xwb—ces yuav txhais tau hais tias Nws tsis yog Yauxej tus tub los sis xeeb leej xeeb ntxwv ntawm Anplahas thiab Davi. Qhov caj ces, txawm li ntawd los xij, yeej hais nias qees txog qhov muab Yexus coj los sib sau txuas nrog rau Yauxej. Ntxiv mus, qhov caj ces pib teev txog qhov dhau los uas Yexus yug los. Nws hais tias Yexus yog xeeb los ntawm Vajntsujplig, hais tias Nws yog yug los ntawm ib tug nkauj xwb, thiab tsis yog Yauxej tus tub. Tab sis nyob rau hauv qhov caj ces nws yeej sau hais meej meej hais tias Yexus yog Yauxej tus tub, thiab vim qhov caj ces yog sau rau Yexus, nws teev muaj plaub-caug-ob tiam neeg. Thaum nws mus rau tiam ntawm Yauxej, nws hais ceev ceev hais tias Yauxej yog Maivliag tus txiv, cov lus uas hais ua pov thawj hais tias Yexus yog tus xeeb leej xeeb ntxwv ntawm Anplahas. Qhov ntawd tseem tsis yog ib qho tswv yim uas rov sib nraus thiab lod? Qhov caj ces ntawd yeej teev muaj Yauxej tej poj koob yawm txwv meej meej, nws yeej pom tau meej meej hais tias yog caj ces ntawm Yauxej, tab sis Mathai hais nias qhi hais tias yog caj ces ntawm Yexus. Qhov no tsis yog kev tsis lees qhov tseeb hais tias Yexus yog xeeb los ntawm Vajntsujplig lod? Yog li ntawd, Mathai qhov kev qhia txog caj ces ntawd tsis yog tib neeg lub tswv yim thiab lod? Nws txaus luag dhau heev lawm lau! Qhov no yog qhov uas koj muaj cuab kav paub tau hais tias phau ntawv no tsis yog los ntawm Vajntsujplig los tag nrho. Yeej muaj, tej zaum, ib txhia neeg uas Vajtswv yuav tsum muaj ib qho caj ces nyob rau hauv ntiaj teb, yog li qhov tau los ntawd ces yog lawv muab Yexus tso ua tiam thib plaub-caug-ob ntawm Anplahas. Qhov no mas txaus luag dhau heev lawm lau! Tom qab los txog hauv ntiaj teb lawm, ua li cas Vajtswv ho muaj ib qho caj ces mas? Yog koj hais tias Vajtswv muaj ib qho caj ces, ces tsis yog koj muab Nws tso raws tej theem ntawm cov uas Vajtswv tsim tawm los thiab lod? Vim Vajtswv tsis yog ntiaj teb tug, Nws yog tus Tswv ntawm txoj kev tsim txhua yam, thiab txawm hais tias Nws muaj cev nqaij daim tawv, los Nws tsis muaj tib lub ntsiab tseeb li tib neeg. Koj ho muab Vajtswv coj los tso rau ib qho chaw ib yam nkaus li ib tug uas Vajtswv tsim tawm los tau li cas mas? Anplahas tsis muaj cuab kav sawv cev Vajtswv; nws yog ib daim phiaj rau Yehauvas tes hauj lwm rau lub sij hawm ntawd xwb, nws tsuas yog ib tug tub qhe muaj lub siab ncaj uas tau txais kev pom zoo los ntawm Yehauvas xwb, thiab nws yog ib tug ntawm cov neeg ntawm Yixayee xwb. Nws yuav ua cas ua tau ib tug poj koob yawm txwv ntawm Yexus mas?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (3)

251. Hnub no, Kuv muab phau Vajluskub coj los phua saib ib qho zuj zus li qhov no thiab nws tsis tau txhais hais tias Kuv ntxub nws, los sis hais tias Kuv tsis lees nws qhov nuj nqis rau kev piv lus. Kuv piav txog thiab qhia kom meej txog qhov nuj nqis xeeb txawm thiab qhov chiv keeb ntawm phau Vajluskub rau koj los cheem koj kom tsis txhob raug ceev tseg rau hauv txoj kev tsaus ntuj. Vim tib neeg tau muaj ntau qhov kev xav kev pom txog phau Vajluskub, thiab feem ntau ces lawv yuam kev lawm; qhov nyeem phau Vajluskub li no ces tsis yog yuav tiv thaiv kom lawv tsis txhob tau yam uas lawv tsim nyog tau nkaus xwb, tab sis, qhov tseem ceeb tshaj, ces nws tseem khuam tes hauj lwm Kuv npaj siab ua thiab. Nws cuam tshuam loj heev rau tej hauj lwm yav tom ntej, thiab tsuas muaj tej tsis zoo nkaus xwb, tsis muaj tej uas pab tau li. Yog li ntawd, qhov uas Kuv qhia koj ces tsuas yog lub ntsiab tseem ceeb thiab zaj dab neeg sab hauv nkaus xwb. Kuv tsis tau hais kom koj tsis txhob nyeem phau Vajluskub, los sis kom koj ncig mus tshaj tawm hais tias nws tsis muaj nuj nqis, tsuas yog hais tias kom koj muaj qhov kev paub thiab kev pom uas yog ntawm phau Vajluskub xwb. Tsis txhob pheej xav rau ib-sab nkaus xwb! Txawm hais tias phau Vajluskub yog ib phau ntawv keeb kwm uas yog sau los ntawm tib neeg, los nws kuj teev muaj ntau yam ntsiab lus uas cov neeg dawb huv thiab cov xib fwb cev Vajtswv lus thaum ub siv los ua dej num rau Vajtswv, nrog rau cov thwj tim tsis ntev dhau los no tej kev ntsib kev pom nyob rau hauv txoj kev ua dej num rau Vajtswv—tag nrho uas yog tej uas cov neeg ntawd yeej tau pom thiab paub tiag tiag lawm, thiab yuav muab siv tau ua chaw piv lus rau cov neeg ntawm tiam no uas nrhiav txoj hau kev tseeb. Yog li ntawd, nyob rau hauv kev nyeem phau Vajluskub ces tib neeg kuj yuav tau ntau txoj hau kev ntawm txoj sia uas nrhiav tsis tau nyob rau hauv lwm phau ntawv li. Tej hau kev no yog tej hau kev ntawm txoj sia ntawm Vajntsujplig tes hauj lwm uas cov xib fwb cev Vajtswv lus thiab cov thwj tim nyob rau tej tiam dhau los lawm tau ntsib tau pom, thiab muaj ntau lo lus mas muaj nuj nqis heev, thiab muaj cuab kav muab tau tej uas tib neeg xav tau rau lawv. Yog li ntawd, tib neeg sawv daws thiaj li nyiam nyeem phau Vajluskub. Vim muaj ntau yam zais cia rau hauv phau Vajluskub, ces tib neeg tej kev xav rau nws thiaj li tsis zoo li tej kev xav rau lwm yam ntawv sau tseg los ntawm cov thawj coj tseem ceeb ntawm fab kev ntseeg. Phau Vajluskub yog ib co lus teev tseg thiab ib co lus khaws tseg txog tej kev ntsib kev pom thiab kev paub ntawm cov neeg uas tau ua dej num rau Yehauvas thiab Yexus nyob rau hauv tiam qub thiab tiam tshiab, thiab kom tej tiam tom qab thiaj li muaj tau txais ntau yam kev tig ras to taub, kev paub tseeb, thiab tej kev xyaum ua los ntawm nws. Qhov laj thawj uas vim li cas phau Vajluskub ho nyob siab dua lwm yam ntawv sau tseg ntawm lwm tus neeg tseem ceeb rau fab kev ntseeg ces yog vim tag nrho lawv tej ntawv sau tseg yog rub hauv phau Vajluskub los, lawv tej kev ntsib kev pom tag nrho los hauv phau Vajluskub los, thiab lawv sawv daws ces piav txog phau Vajluskub xwb. Thiab yog li ntawd, txawm hais tias tib neeg yuav tau kev pab cuam los ntawm cov ntawv ntawm lwm tus neeg tseem ceeb rau fab kev ntseeg, los lawv tseem pe hawm phau Vajluskub, vim zoo li nws siab dua thiab tob dua tej ntawd! Txawm hais tias phau Vajluskub muab ib co ntawv ntawm tej lus ntawm txoj sia coj los ua ke, xws li Povlauj cov ntawv thiab Petus cov ntawv, thiab txawm hais tias tib neeg muaj cuab kav tau txais kev pab cuam thiab raug pab los ntawm cov ntawv no, los cov ntawv no yeej tseem dhau caij nyoog lawm, lawv tseem yog tiam qub tug, thiab tsis hais lawv yuav zoo npaum li cas li, lawv tsuas zoo siv rau ib lub caij nyoog xwb, thiab tsis yog yuav kav mus ib txhis. Vim Vajtswv tes hauj lwm mas yeej loj hlob tas mus li, thiab nws tsis muaj cuab kav yuav cia li nres rau lub sij hawm ntawm Povlauj thiab Petus xwb, los sis tsuas nyob tas mus li rau hauv Tiam Hmoov Hlub uas Yexus raug ntsia rau saum tus ntoo khaub lig nkaus xwb. Thiab yog li ntawd, cov ntawv no ces tsuas zoo siv rau Tiam Hmoov Hlub xwb, tsis yog rau Tiam Lub Nceeg Vaj ntawm tiam kawg. Lawv tsuas pab cuam tau rau cov ntseeg ntawm Tiam Hmoov Hlub xwb, tsis yog rau cov neeg dawb huv ntawm Tiam Lub Nceeg Vaj, thiab tsis hais lawv yuav zoo npaum li cas li, lawv yeej tseem yuav qub rau lub caij nyoog lawm. Nws yeej zoo ib yam li no rau Yehauvas tes hauj lwm tsim txhua yam los sis Nws tes hauj lwm nyob rau hauv Yixayee: Tsis hais tes hauj lwm no yuav tseem ceeb npaum li cas li, nws yeej tseem qub rau lub caij nyoog lawm, thiab lub caij nyoog yeej yuav los txog thaum uas nws dhau mus lawm. Vajtswv tes hauj lwm los kuj zoo ib yam li no thiab: Nws yeej tseem ceeb kawg, tab sis nws yuav muaj ib lub sij hawm uas nws yuav xaus thiab; nws yuav nyob tag mus li rau hauv tes hauj lwm tsim txhua yam tsis tau, los sis nyob nrog rau tes hauj lwm raug ntsia rau saum tus ntoo khaub lig. Tsis hais tes hauj lwm raug ntsia rau saum tus ntoo khaub lig yuav txaus ntseeg npaum li cas li, tsis hais nws yuav ua tau zoo npaum li cas rau txoj kev tua yeej Ntxwgnyoog li, tes hauj lwm, ces thaum kawg, yeej tseem yog tes hauj lwm, thiab tej tiam ntawd, ces thaum kawg, yeej tseem yog tej tiam xwb; tes hauj lwm tsis muaj cuab kav yuav nyob rau tib qho hauv paus keeb cag tas mus li, los sis sij hawm los yeej tsis muaj qhov yuav tsis hloov mus li, vim yog muaj kev tsim txhua yam thiab thiaj li yuav tsum muaj hnub xaus. Qhov no yeej zam tsis dhau li! Yog li ntawd, niaj hnub no tej lus ntawm txoj sia nyob rau hauv phau Vajluskub Tshiab—cov ntawv sau ntawm cov thwj tim, thiab Plaub Txoj Moo Zoo—tau rais los ua ib cov ntawv keeb kwm lawm xwb, lawv tau rais los ua tej phau ntawv teev tej xwm txheej raws ciaj nyoog lawm xwb, thiab yuav ua cas es tej phau ntawv teev tej xwm txheej raws caij nyoog thiaj li yuav coj tau tib neeg mus rau tiam tshiab? Tsis hais tej phau ntawv teev tej xwm txheej raws caij nyoog no yuav muaj cuab kav npaum li cas los muab tau txoj sia rau tib neeg, tsis hais lawv yuav muaj cuab kav npaum li cas los coj tib neeg los rau tus ntoo khaub lig li, lawv tseem tsis yog qub rau lub caij nyoog lawm thiab lod? Lawv tseem tsis tau poob nqi thiab lod? Yog li ntawd, Kuv hais tias koj yuav tsum tsis txhob lam ntseeg tej ntawv teev tej xwm txheej raws caij nyoog no li ib tug neeg dig muag. Lawv qub dhau heev lawm, lawv tsis muaj cuab kav yuav coj tau koj mus rau tes hauj lwm tshiab, thiab lawv tsuas yog ua lub nra hnyav rau koj ris xwb. Tsis yog lawv tsis muaj cuab kav coj tau koj mus rau tes hauj lwm tshiab, thiab mus rau ib qho chaw nkag tshiab nkaus xwb, tab sislawv coj koj mus rau cov pawg ntseeg ntawm txoj kev ntseeg qub—thiab yog zoo li ntawd, ces tsis yog koj thaub qab nyob rau hauv koj txoj kev ntseeg Vajtswv lod?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog phau Vajluskub (4)

252. Kuv tau ua hauj lwm ntau nrog rau tib neeg, nyob rau lub sij hawm ntawd Kuv kuj tau hais tau ib co lus ntau heev. Tej lus no yog hais rau tib neeg txoj kev cawm dim thiab hais kom tib neeg muaj kev sib raug zoo nrog rau Kuv. Txawm li ntawd los xij, Kuv tsuas tau ob peb tug neeg hauv ntiaj teb no uas muaj kev sib raug zoo nrog Kuv nkaus xwb, thiab yog li ntawd Kuv thiaj hais tias tib neeg tsis saib Kuv cov lus muaj nuj nqis—nws yog vim tias tib neeg tsis muaj kev sib raug zoo nrog Kuv. Nyob rau qhov no, mas tej hauj lwm Kuv ua ntawd tsis yog lam ua kom tib neeg teev hawm Kuv tau xwb; qhov tseem ceeb tshaj ntawd, nws yog ua kom tib neeg muaj kev sib raug zoo nrog Kuv. Tib neeg yeej ib txwm siab tsis ncaj thiab ua neej nyob rau hauv Ntxwgnyoog rooj ntxiab. Tag nrho txhua tus neeg yeej nyob rau hauv cev nqaij daim tawv, nyob rau hauv tej kev ntshaw kom txhua yam mas yog lawv tus kheej li nkaus xwb, thiab yeej tsis muaj ib tug ntawm lawv kiag li uas yuav sib raug zoo nrog Kuv. Yeej muaj cov uas hais tias lawv yog cov muaj kev sib raug zoo nrog Kuv, tab sis cov neeg zoo li ntawd tseem pheej teev hawm tej mlom uas pom tsis meej. Txawm hais tias lawv lees paub Kuv lub npe hais tias yeej dawb huv los, lawv taug ib txoj kev uas khiav mus tsis thooj li Kuv, thiab lawv tej lus mas muaj kev khav theeb thiab kev ruaj siab rau lawv tus kheej puv nkaus nyob rau hauv xwb. Qhov no mas yog vim, nyob rau hauv tus cag, lawv sawv daws puav leej tawm tsam Kuv thiab tsis muaj kev sib raug zoo nrog Kuv. Txhua txhua hnub, lawv nrhiav Kuv tej lw nyob hauv Vajluskub thiab lam tau lam nrhiav tej nqe lus uas “zoo nyeem” uas lawv muab nyeem tsis paub xaus thiab muab hais tias yog tej nqe tej nqe Vajluskub. Lawv tsis paub tias yuav ua cas thiaj muaj kev sib raug zoo nrog Kuv los sis kev tawm tsam Kuv ho yuav zoo li cas. Lawv tsuas lam nyeem tej nqe Vajluskub li tej neeg dig muag xwb. Nyob rau hauv phau Vajluskub, lawv muab ib tug Vajtswv uas pom tsis tseeb kaw cia rau hauv, tus uas lawv yeej tsis tau pom dua li, thiab yeej tsis muaj cuab kav yuav pom tau li, thiab muab thau tawm coj los saib rau thaum lawv muaj sij hawm. Lawv ntseeg qhov uas muaj Kuv raws li qhov uas Vajluskub hais xwb, thiab lawv muab Kuv tso sib txig sib luag nrog phau Vajluskub; yog tsis muaj phau Vajluskub ces tsis muaj Kuv, thiab tsis muaj Kuv ces tsis muaj phau Vajluskub. Lawv tsis quav ntsej txog qhov uas muaj Kuv thiab tej yam Kuv ua li, tab sis ho rau siab ntso thiab kub siab lug kawm txhua lo lus hauv Vajluskub. Muaj coob tus haj tseem ntseeg hais tias kom Kuv txhob ua tej yam uas Kuv xav ua li yog hais tias Vajluskub tsis tau hais tseg ua ntej. Lawv muab Vajluskub saib tseem ceeb dhau heev lawm. Nws hais tau hais tias lawv saib tej lus thiab tej yam qhia tawm ntawd tseem ceeb dhau heev lawm, txog ntua qhov uas lawv siv tej nqe lus hauv Vajluskub los ntsuas txhua lo lus Kuv hais thiab los cem thuam Kuv. Qhov lawv nrhiav ntawd tsis yog txoj kev sib raug zoo nrog Kuv, los sis qhov uas yuav ua kom muaj kev sib raug zoo nrog qhov tseeb, tab sis tsuas yog qhov ua kom muaj kev sib raug zoo nrog cov lus ntawm phau Vajluskub, thiab lawv ntseeg, yam tsis muaj ib qho zam tau li, hais tias tej yam uas tsis yoog raws Vajluskub ces yeej tsis yog Kuv tes hauj lwm. Cov neeg ntawd tsis yog cov Falixai cov xeeb leej xeeb ntxwv uas paub lawv tes dej num lod? Cov Falixai uas yog neeg Yudai siv Mauxe txoj kev cai los teem txim rau Yexus. Lawv tsis nrhiav kev sib raug zoo nrog rau tus Yexus uas nyob rau lub sij hawm ntawd, tab sis mas tsuas rau siab ntso ua raws tej kev cai ntawd nruj npaum nkaus li txhua tus ntawv uas tau sau tseg, txog ntua qhov uas—tom qab nog txim rau Nws hais tias tsis ua raws cov kev cai hauv Vajluskub Qub thiab tsis yog tus Mexiyas—lawv muab Yexus tus uas tsis muaj kev txhaum ntawd ntsia kiag rau saum tus ntoo khaub lig. Lawv tus moj yam tseeb yog dab tsi? Tsis yog qhov uas lawv tsis nrhiav kev sib raug zoo nrog qhov tseeb los? Lawv mas mob siab tshaj plaws rau txhua lo lus hauv Vajluskub ces tsis quav ntsej txog qhov Kuv siab nyiam los sis tej kauj ruam thiab tej kev ua Kuv tes hauj lwm. Lawv tsis yog cov neeg uas nrhiav qhov tseeb, tab sis tsuas yog cov neeg uas tuav tej lus ruaj ruaj xwb; lawv tsis yog cov neeg ntseeg Vajtswv, tab sis tsuas yog cov neeg ntseeg Valuskub xwb. Qhov tseem ceeb tshaj, lawv yog cov dev zov phau Vajluskub xwb. Yuav kom tiv thaiv tau lawv qhov kev txaus siab rau phau Vajluskub, los mus txhawb nqa lub meej mom ntawm Vajluskub, thiab tiv thaiv Vajluskub lub koob npe zoo, lawv ua mus txog qhov uas muab tus Yexus uas muaj lub siab hlub tshua sawv daws ntawd ntsia kiag rau saum tus ntoo khaub lig. Qhov no lawv tsuas lam ua los tiv thaiv Vajluskub xwb, thiab ua los mus tuav lub meej mom ntawm txhua lo lus hauv Vajluskub uas nyob hauv neeg lub siab xwb. Yog li ntawd lawv yeem muab lawv lub neej yav pem suab thiab kev theej txhoj daws kev txhaum tso pov tseg es los nog txim rau Yexus, tus uas tsis ua raws li tej lus qhuab qhia hauv Vajluskub, rau lub qhov tuag. Lawv tsis yog qhev rau txhua lo lus hauv Vajluskub thiab los?

Thiab ua li cov neeg niaj hnub no ne? Khetos tau los nthuav tawm qhov tseeb, tab sis lawv yeem muab Nws ntiab tawm hauv lub ntiaj teb no es kom lawv thiaj li tau kev mus rau ntuj ceeb tsheej thiab tau txais kev hlub. Lawv yeem tsis lees paub qhov tseeb uas tshwm sim los ntawd es thiaj li tiv thaiv tau lawv txoj kev nyiam Vajluskub, thiab lawv yeem rov qab muab tus Khetos uas los muaj cev nqaij daim tawv ntawd ntsia rau saum ntoo khaub lig dua thiab es kom thiaj li paub meej hais tias phau Vajluskub yuav muaj nyob mus ib txhis. Tib neeg yuav ua cas tau txais Kuv txoj kev cawm dim thaum uas nws muaj lub siab phem thiab tus yam ntxwv tawm tsam Kuv tag npaum li mas? Kuv nrog tib neeg nyob, tab sis tib neeg tsis paub tias muaj Kuv. Thaum Kuv tsom Kuv lub teeb ci rau tib neeg, nws yeej tseem tsis paub tias muaj Kuv li. Thaum Kuv tso Kuv txoj kev npau taws rau saum tib neeg, nws haj yam muaj zog tsis lees paub tias muaj Kuv li thiab. Tib neeg nrhiav kev sib raug zoo nrog rau tej lus thiab kev sib raug zoo nrog rau Vajluskub, tab sis tsis muaj ib tug uas yuav los rau ntawm Kuv xub ntiag los nrhiav kev sib raug zoo nrog rau qhov tseeb. Tib neeg ntsia Kuv rau puag saum ntuj ceeb tsheej thiab mob siab txhawj xeeb tias muaj Kuv nyob saum ntuj ceeb tsheej, tab sis tsis muaj leej twg quav ntsej txog Kuv ntawm cev nqaij daim tawv, vim Kuv tus uas nrog tib neeg nyob ua ke ntawd yeej tsis tseem ceeb dab tsi li. Cov uas tsuas nrhiav kev sib raug zoo nrog rau cov lus hauv Vajluskub thiab cov uas nrhiav kev sib raug zoo nrog rau ib tug Vajtswv uas pom tsis tseeb mas yog ib qho laj ntsia tshaj plaws rau Kuv. Qhov no mas vim yog tej uas lawv teev hawm ntawd tsuas yog tej lus tsis ciaj sia xwb, thiab ib tug Vajtswv uas muaj peev xwm muab tej yam muaj nqis uas qhia tsis tau ntawd rau lawv; tus lawv teev hawm ntawd yog ib tug Vajtswv uas yuav muab Nws tus kheej pw kiag rau hauv tib neeg lub xib teg—ib tug Vajtswv uas tsis muaj nyob qhov twg li. Dab tsi, yog li ntawd nas, es cov neeg zoo li ntawd thiaj yuav tau txais los ntawm Kuv? Tib neeg mas qis dhau heev lawm rau tej lus. Cov uas tawm tsam Kuv, cov uas taij thov Kuv tsis tseg tsis tu, cov uas tsis nyiam qhov tseeb kiag, cov uas tig ntxeev siab rau Kuv—yuav ua li cas lawv thiaj muaj kev sib raug zoo nrog Kuv tau mas?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Nrhiav Txoj Hau Kev Kom Sib Raug Zoo Nrog Rau Khetos

253. Vajtswv Tus Kheej yog txoj sia, thiab qhov tseeb, thiab Nws txoj sia thiab qhov tseeb tshwm sim nyob ua ke. Cov uas tsis muaj peev xwm tau txais qhov tseeb ces yuav tsis muaj hnub tau txais txoj sia. Yog tsis muaj qhov kev qhia kev coj, kev txhawb nqa, thiab kev pab cuam ntawm qhov tseeb, koj ces tsuas tau tej tus ntawv, cov lus qhuab qhia, thiab, tshaj tag nrho ntawd, kev tuag nkaus xwb. Vajtswv txoj sia yeej muaj nyob tas mus li, thiab Nws qhov tseeb thiab txoj sia tshwm sim nyob ua ke. Yog koj nrhiav tsis tau lub hauv paus ntawm qhov tseeb, ces koj yuav tsis tau txais tej zaub mov yug txoj sia; yog koj tsis tau txais kev pab cuam ntawm txoj sia, ces koj yuav tsis muaj qhov tseeb tiag tiag li, thiab yog dhau ntawm kev khwv yees xav thiab kev xav phem lawm, ces tag nrho koj lub cev ces tsis muaj dab tsi li tsuas yog nqaij tawv nkaus xwb—koj cev nyuag nqaij tsw phem nkaus xwb. Yuav tsum paub hais tias tej lus hauv phau ntawv mas tsis raug suav hais tias yog txoj sia, tej lus teev tseg hauv keeb kwm yuav muab coj los pe hawm li qhov tseeb tsis tau, thiab tej kev cai yav tag los yuav muab coj los siv ua cov lus uas hnov Vajtswv hais tam sim no tsis tau. Tsuas yog cov uas Vajtswv hais kiag thaum Nws los rau ntiaj teb no thiab nyob nrog tib neeg kiag mas thiaj yog qhov tseeb, txoj sia, Vajtswv lub siab nyiam, thiab Nws qhov kev ua hauj lwm tam sim no. Yog koj muab tej lus teev tseg uas Vajtswv hais puag thaum ub coj los siv rau tam sim no, qhov ntawd yuav ua rau koj yog ib tug neeg kawm txog tej khoom qub xwb, thiab qhov kev zoo tshaj plaws uas siv los piav txog koj ces yog ib tug neeg paub txog tej qub txeeg qub teg hauv keeb kwm xwb. Qhov ntawd vim yog koj pheej ntseeg tej qub lw ntawm tes hauj lwm uas Vajtswv tau ua yav dhau los, tsuas ntseeg Vajtswv tus duab ntxoo thaum Nws ua hauj lwm nrog tib neeg yav dhau los, thiab tsuas ntseeg txoj kev uas Vajtswv muab tseg rau Nws cov ntseeg yav dhau los xwb. Koj tsis ntseeg txoj xub ke ntawm Vajtswv tes hauj lwm hnub no, tsis ntseeg Vajtswv lub ntsej muag uas muaj yeej koob ci ntsa iab hnub no, thiab tsis ntseeg txoj kev ntawm qhov tseeb uas Vajtswv hais qhia hnub no. Thiab yog li ntawd koj ces yeej cam tsis dhau qhov uas koj yog ib tug neeg npau suav nruab hnub uas yeej ncav tsis cuag qhov muaj tseeb li. Yog tam sim no koj tseem tuav rawv tej lus uas tsis muaj peev xwm muab tau txoj sia rau tib neeg, ces koj yog ib daig ntoo lwj^[a] uas tsis muaj kev cia siab dab tsi li, vim koj yog ib tug uas ntseeg lub tswv yim qub loj dhau heev lawm, tawv ncauj dhau heev lawm, siab twm xeeb heev lawm!

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg

254. Khetos ntawm tiam kawg ntawd nqa txoj sia los, thiab nqa txoj kev ntawm qhov tseeb uas ruaj khov thiab kav mus ib txhis ntawd los. Qhov tseeb no yog txoj kev uas tib neeg tau txoj sia, thiab nws yog tib txoj kev uas tib neeg yuav paub Vajtswv thiab tau txais kev pom zoo los ntawm Vajtswv. Yog koj tsis nrhiav txoj kev muaj sia nyob uas Khetos muab thaum tiam kawg ntawd, ces koj yeej yuav tsis tau txais kev pom zoo los ntawm Yexus ib zaug li, thiab yeej yuav tsis muaj hnub tsim nyog tau nkag rau hauv lub rooj vag ntawm vaj loog ceeb tsheej, vim koj yog ib tug moj zeej thiab neeg raug txim ntawm keeb kwm xwb. Cov uas raug khoo los ntawm kev cai, tus npe ntawv, thiab raug keeb kwm xauv ko taw cia ces yuav tsis tau txoj sia los sis tsis tau txoj kev muaj sia nyob uas tsis paub kawg. Qhov no mas vim yog tag nrho qhov lawv muaj ces tsuas yog tej nyuag dej nro uas lawv tuav rawv tseg los tau ntau txhiab xyoo uas tsis yog cov dej cawm siav uas txhawv ntawm lub zwm txwv los. Cov uas tsis tau txais cov dej cawm siav ces tsuas yog lub niag cev tuag, yog Ntxwgnyoog tej nyuag khoom ua si, thiab yog tub ki ntawm dab teb mus ib txhis xwb. Yog li ntawd, yuav ua cas es lawv thiaj yuav pom Vajtswv? Yog koj pheej xav tuav rawv yav tag los, tsuas sawv nres twj ywm tuav txhua yam cia kom zoo li qub, thiab tsis kam hloov qhov uas muaj tam sim no thiab muab keeb kwm tso pov tseg, ces tsis yog koj pheej yuav tawm tsam Vajtswv tas zog li los? Cov txheej txheem ntawm Vajtswv tes hauj lwm mas dav thiab loj heev li, zoo ib yam li nthwv dej nphau npog thiab nthwv xob nroo nrov deeg daws—tab sis koj tseem zaum twj ywm nyob tos kev puas tsuaj, khawm rawv koj txoj kev ruam thiab tsis ua ib qho dab tsi li. Nyob rau qhov no, yuav ua cas es thiaj yuav xam tau hais tias koj yog ib tug uas taug tus Me Nyuam Yaj tus hneev taw mas? Yuav ua cas es koj thiaj yuav ua pov thawj hais tias tus Vajtswv uas koj cia siab rau ntawd yog ib tug Vajtswv uas tshiab tas li xwb es yeej tsis txawj qub li? Thiab yuav ua cas es cov lus hauv koj phau ntawv daj ntawd thiaj li yuav coj tau koj hla mus rau tiam tshiab? Yuav ua cas es thiaj yuav coj tau koj mus nrhiav tej kauj ruam ntawm Vajtswv tes hauj lwm? Thiab yuav ua cas es thiaj coj tau koj mus rau saum ceeb tsheej? Qhov koj tuav ntawm koj txhais tes tsuas yog tus ntawv uas muab tau kev kaj siab ib nyuag pliag rau koj xwb, tsis yog tej qhov tseeb uas yuav muaj cuab kav muab tau txoj sia rau koj. Tej nqe Vajluskub koj nyeem tsuas pab tsim kho tau koj tus nplaig xwb, thiab tsis yog cov lus ntawm lub tswv yim uas pab tau kom koj paub tib neeg lub neej txoj sia, haj yam tsis yog txoj kev uas yuav coj tau koj mus rau qhov kev zoo tag nrho. Qhov uas zoo tsis sib xws no tseem tsis ua kom koj tig rov los xav txog koj tus kheej thiab los? Qhov ntawd tsis ua rau koj ras txog tej lus to taub nyuaj nyob rau hauv thiab los? Koj puas muaj peev xwm coj tau koj tus kheej mus saum ceeb tsheej mus ntsib Vajtswv? Yog hais tias Vajtswv tsis los, koj puas yuav coj tau koj tus kheej mus rau saum ceeb tsheej mus ntsib txoj kev zoo siab li tsev neeg nrog rau Vajtswv? Koj puas tseem npau suav toog tam sim no mas? Yog li ntawd, Kuv xav hais kom koj tsis txhob npau suav toog lawm thiab tig los saib tus uas tab tom ua hauj lwm tam sim no—saib kom pom hais tias leej twg tab tom ua tes hauj lwm cawm tib neeg nyob rau tiam kawg. Yog koj tsis ua li, koj yuav tsis muaj hnub tau txais qhov tseeb, thiab yuav tsis tau txoj sia.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg

Lus taw qhia:

a. Ib daig ntoo lwj: Suav ib lo lus paj lug, txhais tias “tsis muaj dab tsi yuav pab tau lawm.”