V. Cov Lus nyob rau ntawm Txoj Kev Sib Txuas Ntawm Tej Theem ntawm Vajtswv Tes Hauj Lwm thiab Vajtswv Lub Npe

231. Vajtswv tes hauj lwm thoob plaws tag nrho Nws qhov kev cawm tib neeg mas yeej pom tau meej tshaj plaws li: Tiam Hmoov Hlub yog Tiam Hmoov Hlub, thiab tiam kawg yog tiam kawg. Nws yeej muaj qhov sib txawv ntawm ib tiam twg thiab, vim nyob rau ib tiam twg mas Vajtswv ua tes hauj lwm uas sawv cev rau tiam ntawd xwb. Yog yuav ua kom tes hauj lwm ntawm tiam kawg ntawd tiav hlo, mas yuav tsum muaj kev hlawv, kev txiav txiv, kev qhuab ntuas, kev npau taws, thiab kev puas ntsoog los coj tiam ntawd los rau qhov chaw xaus. Tiam kawg ces yog hais txog tiam kawg nkaus. Nyob rau thaum tiam kawg nkaus, Vajtswv yuav tsis coj tiam no los rau qhov xaus lod? Yuav muab tiam no xaus, ces Vajtswv yuav tsum coj kev qhuab ntuas thiab kev txiav txim nrog Nws los. Tsuas yog txoj kev no xwb mas Nws thiaj li yuav coj tau tiam ntawd los rau qhov xaus. Yexus lub hom phiaj mas yog ua kom tib neeg dim, nyob ntxiv mus, thiab kom lawv muaj sia nyob rau ib txoj kev zoo zog. Nws cawm tib neeg tawm ntawm txoj kev txhaum ces kom lawv thiaj tsum qhov kev nqis mus rau txoj kev phem thiab kom tsis txhob nyob rau hauv Dab Teb thiab ntuj tawg ntxiv lawm, thiab los ntawm qhov kev cawm tib neeg tawm hauv Dab Teb thiab ntuj tawg los, Yexus cia lawv ua neej nyob ntxiv mus. Tam sim no, tiam kawg twb los txog lawm. Vajtswv yuav ua kom tib neeg puas tsuaj thiab rhuav tshem tag nrho haiv tib neeg, qhov ntawd ces yog, Nws yuav hloov noob neej txoj kev ntxeev siab. Vim qhov laj thawj no, nws yuav yog ib qho uas tsis muaj hnub yuav ua tau li, nrog rau tus moj yam uas muaj kev khuv leej thiab kev hlub yav tag los, rau qhov uas kom Vajtswv xaus tiam no los sis coj Nws qhov kev npaj cawm tib neeg rau-txhiab-xyoo los kom tawg paj txi txiv. Txhua txhua tiam yeej muaj ib qho kev sawv cev tshwj xeeb rau Vajtswv tus moj yam, thiab txhua tiam yeej muaj tes hauj lwm uas Vajtswv yuav tsum ua kom tiav. Yog li ntawd, tes hauj lwm uas Vajtswv Tus Kheej kiag ua nyob rau ib tiam twg yeej muaj kev hais qhia kom pom txog Nws tus moj yam tseeb, thiab tag nrho Nws lub npe thiab tes hauj lwm yeej hloov raws li tiam ntawd—lawv yeej tshiab tas mus li xwb. Nyob rau Tiam Muaj Kev Cai, tes hauj lwm coj noob neej kev yog ua nyob rau hauv lub npe ntawm Yehauvas, thiab thawj theem ntawm tes hauj lwm raug pib ua nyob rau hauv ntiaj teb. Nyob rau theem no, tes hauj lwm yog muaj kev tsim tsa lub tuam tsev thiab lub thaj, thiab siv kev cai los coj cov tib neeg ntawm Yixayee thiab los ua hauj lwm nyob nrog rau lawv. Qhov uas coj cov neeg ntawm Yixayee ntawd, Nws pib ib lub chaw tiag taw rau Nws tes hauj lwm nyob hauv ntiaj teb. Los ntawm qhov chaw tiag taw no, Nws tau nthuav Nws tes hauj lwm kom dav mus dhau plaws Yixayee, ces hais tau hais tias, pib hauv Yixayee mus, Nws nthuav Nws tes hauj lwm tawm mus rau sab nraud, kom cov neeg tej tiam tom qab thiaj li maj mam los paub hais tias Yehauvas yog Vajtswv, thiab hais tias Yehauvas yog tus tsim lub ntuj thiab lub ntiaj teb thiab tag nrho txhua yam, thiab hais tias Yehauvas yog tus uas tsim txhua yam uas raug tsim tawm los. Nws tseb Nws tes hauj lwm thoob plaws cov neeg ntawm Yixayee tawm mus dhau plaws lawv rau sab nraud lawm. Daim av ntawm Yixayee yog thawj qhov chaw dawb huv ntawm Yehauvas tes hauj lwm nyob rau hauv ntiaj teb, thiab nws yog nyob rau hauv daim av ntawm Yixayee uas Vajtswv xub los ua hauj lwm nyob rau hauv ntiaj teb. Qhov ntawd yog tes hauj lwm ntawm Tiam Muaj Kev Cai. Nyob rau ntawm Tiam Hmoov Hlub, Yexus yog tus Vajtswv uas cawm tib neeg. Qhov Nws muaj thiab yog ces yog hmoov hlub, kev hlub, kev khuv leej, kev uv, kev ua siab ntev, kev txo hwj chim, kev saib xyuas, thiab kev zam, thiab qhov ntau heev ntawm tes hauj lwm uas Nws ua ces yog ua rau txoj kev txhiv dim ntawm tib neeg. Nws tus moj yam yog tus uas muaj kev khuv leej thiab kev hlub, thiab vim yog Nws muaj kev khuv leej thiab kev hlub, Nws thiaj yuav tsum raug ntsia rau saum tus ntoo khaub lig rau tib neeg, es kom qhia tau kom pom hais tias Vajtswv hlub tib neeg ib yam nkaus li Nws Tus Kheej, hlub heev li es Nws thiaj li muab Nws Tus Kheej hauv tag nrho Nws ntawd coj los theej txhoj. Nyob rau Tiam Hmoov Hlub, Vajtswv lub npe hu ua Yexus, qhov ntawd ces hais tias, Vajtswv yog ib tug Vajtswv uas cawm tib neeg, thiab Nws yog ib tug Vajtswv uas muaj kev khuv leej thiab kev hlub. Vajtswv nrog tib neeg nyob. Nws txoj kev khuv leej, thiab Nws txoj kev cawm dim nrog nraim txhua txhua tus neeg. Tsuas yog lees txais Yexus lub npe thiab qhov uas muaj Nws nrog nyob ces tib neeg thiaj li tau txais kev thaj yeeb thiab kev kaj siab, tau txais Nws qhov koob hmoov, Nws tej hmoov hlub uas loj dav thiab muaj ntau, thiab Nws txoj kev cawm dim. Los ntawm qhov uas Yexus raug ntsia rau saum tus ntoo khaub lig, ces tag nrho cov uas raws Nws qab tau txais kev cawm dim thiab raug zam txim rau lawv tej kev txhaum lawm. Nyob rau ntawm Tiam Hmoov Hlub, Yexus yog Vajtswv lub npe. Nyob rau lwm yam lus hais, ces tes hauj lwm ntawm Tiam Hmoov Hlub ces feem ntau yog ua nyob rau hauv Yexus lub npe xwb. Nyob rau Tiam Hmoov Hlub, Vajtswv raug hu ua Yexus. Nws pib ua ib theem ntawm tes hauj lwm tshiab uas mus deb tshaj phau Vajluskub Qub lawm, thiab Nws tes hauj lwm ces xaus rau ntawm qhov raug ntsia rau saum tus ntoo khaub lig lawm. Qhov no ces yog qhov tag nrho ntawm Nws tes hauj lwm. Yog li ntawd, nyob rau Tiam Muaj Kev Cai ces Yehauvas yog Vajtswv lub npe, thiab nyob rau Tiam Hmoov Hlub ces lub npe Yexus sawv cev rau Vajtswv. Nyob rau tiam kawg, Nws lub npe yog Vajtswv Tus Uas Muaj Hwj Chim Loj Kawg Nkaus—Tus Uas Muaj Hwj Chim Loj Kawg Nkaus, tus uas siv Nws lub hwj chim los coj tib neeg kev, txeeb tib neeg, thiab muab kom tau tib neeg, thiab nyob rau thaum kawg, coj tiam ntawd los rau nws qhov chaw xaus. Nyob rau hauv txhua txhua tiam, nyob rau txhua txhua theem ntawm Nws tes hauj lwm, Vajtswv tus moj yam yeej muaj pov thawj.

Xaiv tawm los ntawm “Lub Zeem Muag ntawm Vajtswv Tes Hauj Lwm (3)” nyob hauv Txoj Lus Tshwm Hauv Lub Cev Nqaij Daim Tawv

232. “Yehauvas” yog lub npe uas Kuv siv nyob rau thaum Kuv tes hauj lwm nyob hauv Yixayee, thiab nws txhais tau hais tias tus Vajtswv ntawm cov neeg Yixayee (Vajtswv cov neeg xaiv tseg) uas muaj cuab kav hlub tib neeg, foom phem tib neeg, thiab coj lub neej ntawm tib neeg; tus Vajtswv uas muaj hwj chim loj heev thiab muaj tswv yim puv npo. “Yexus” yog Emanu-ee, uas txhais hais tias tus theej txhoj rau kev txhaum uas muaj txoj kev hlub puv npo, muaj txoj kev khuv leej puv npo, thiab tus uas txhiv tib neeg. Nws ua tes hauj lwm ntawm Tiam Hmoov Hlub, thiab Nws sawv cev rau Tiam Hmoov Hlub, thiab tsuas sawv cev tau rau ib qho ntawm tes hauj lwm cawm tib neeg xwb. Qhov ntawd ces hais tias, tsuas yog Yehauvas xwb thiaj yog tus Vajtswv ntawm cov neeg xaiv tseg ntawm Yixayee, Anplahas tus Vajtswv, Yiha tus Vajtswv, Yakhauj tus Vajtswv, Mauxe tus Vajtswv, thiab tus Vajtswv rau tag nrho cov neeg ntawm Yixayee. Thiab yog li ntawd, nyob rau tiam tam sim no, tag nrho cov neeg Yixayee, uas tsis yog cov neeg Yudais, pe hawm Yehauvas. Lawv fij Nws nyob rau saum lub thaj thiab tiam Nws nyob rau hauv lub tuam tsev thaum hnav cov pov thawj tej tsoos tsho. Qhov lawv cia siab ces yog qhov kev rov tshwm sim dua ntawm Yehauvas. Tsuas yog Yexus xwb thiaj yog tus Txhiv Dim tag nrho noob neej, thiab Nws yog qhov theej txhoj rau kev txhaum uas txhiv noob neej los ntawm txoj kev txhaum. Ces hais tau hais tias, lub npe Yexus yog los ntawm Tiam Hmoov Hlub los thiab tshwm sim los vim yog tes hauj lwm txhiv dim nyob rau hauv Tiam Hmoov Hlub. Lub npe Yexus yog tshwm sim los cia cov neeg ntawm Tiam Hmoov Hlub kom rau rov yug dua tshiab thiab raug cawm tau, thiab yog ib lub npe tshwj xeeb rau qhov kev cawm dim ntawm tag nrho noob neej. Yog li ntawd, lub npe Yexus sawv cev rau tes hauj lwm ntawm kev cawm dim, thiab qhia txog Tiam Hmoov Hlub. Lub npe Yehauvas yog ib lub npe tshwj xeeb rau cov neeg ntawm Yixayee uas nyob rau hauv txoj kev cai. Nyob rau ib tiam twg thiab ib theem twg ntawm tes hauj lwm, Kuv lub npe tsis yog tsis muaj qab hau, tab sis muaj qhov kev sawv cev uas tseem ceeb heev: Ib lub npe twg sawv cev rau ib tiam. “Yehauvas” sawv cev rau Tiam Muaj Kev Cai, thiab yog lub meej mom loj rau tus Vajtswv uas cov neeg ntawm Yixayee pe hawm. “Yexus” sawv cev rau Tiam Hmoov Hlub, thiab yog lub npe ntawm tus Vajtswv rau tag nrho cov uas raug txhiv dim nyob rau thaum Tiam Hmoov Hlub.

Xaiv tawm los ntawm “Tus Cawm Seej Twb Rov Qab Los Saum ib tauv ‘Huab Dawb’ Lawm” nyob hauv Txoj Lus Tshwm Hauv Lub Cev Nqaij Daim Tawv

233. Tiam Hmoov Hlub pib nrog Yexus lub npe. Thaum Yexus pib ua Nws tes hauj lwm qhuab qhia, Vajntsujplig pib hais lus tim khawv rau lub npe ntawm Yexus, thiab lub npe ntawm Yehauvas ces tsis hais txog ntxiv lawm; tab sis, Vajntsunplig pib tes hauj lwm tshiab uas qhov tseem ceeb tshaj ces nyob hauv Yexus lub npe. Tej lus tim khawv ntawm cov uas ntseeg Nws ces yog hais rau Yexus Khetos, thiab tes hauj lwm lawv ua kuj yog ua rau Yexus Khetos thiab. Qhov xaus ntawm Vajluskub Qub Tiam Muaj Kev Cai ces txhais tau hais tias tes hauj lwm uas qhov tseem ceeb tshaj yog ua nyob rau hauv Yehauvas lub npe tau los txog qhov xaus lawm. Txij ntawm no mus, Vajtswv lub npe yuav tsis yog Yehauvas lawm; tab sis Nws hu uas Yexus, thiab txij ntawm no mus Vajntsujplig pib tes hauj lwm uas qhov tseem ceeb yog nyob rau hauv Yexus lub npe. Yog li ntawd, cov neeg uas niaj hnub no tseem noj thiab haus Yehauvas cov lus, thiab tseem ua txhua yam rau tes hauj lwm ntawm Tiam Muaj Kev Cai—tsis yog koj yoog raws tej kev cai yam li tej neeg dig muag lod? Tsis yog nejtseem daig rau yav dhau los xwb lod? Tam sim no nej paub hais tias tiam kawg twb los txog lawm. Puas yog hais tias, thaum Yexus los, Nws tseem yuav raug hu ua Yexus no thiab mas? Yehauvas qhia rau cov neeg ntawm Yixayee hais tias ib tug Mexiyas yuav los, thiab tab sis thaum Nws los, Nws tsis yog hu ua Mexiyas tab sis yog Yexus. Yexus hais tias Nws yuav rov los dua, thiab hais tias Nws yuav los li qhov uas Nws ncaim mus. Tej no yog Yexus cov lus, tab sis koj puas pom Yexus mus li cas kiag? Yexus caij ib tauv huab dawb mus lawm, tab sis puas yog hais tias Nws yuav rov caij ib tauv huab dawb los kiag rau hauv cov tib neeg mas? Yog zoo li ntawd, Nws tseem yuav tsis yog hu ua Yexus no thiab lod? Thaum Yexus rov los dua, ces tiam ntawd twb hloov lawm, ces Nws tseem yuav hu ua Yexus tau li cas mas? Nws tseem tsis raug hu ib lub npe tshiab nyob rau ib tiam tshiab thiab lod? Daim duab ntawm ib tug neeg thiab ib lub peb twg kiag puas yuav muaj cuab kav sawv cev tau rau Vajtswv tag nrho mas? Nyob rau ib tiam twg, Vajtswv ua tes hauj lwm tshiab thiab raug hu dua ib lub npe tshiab; Nws yuav ua cas ua tib teg hauj lwm rau ntau tiam sib txawv mas? Nws ho yuav ua cas tuav rawv rau qhov qub xwb mas? Lub npe Yexus ces muab siv coj los rau tes dej num ntawm kev cawm dim, yog li ntawd Nws puas tseem yuav raug hu tib lub npe qub thaum Nws los rau tiam kawg mas? Nws puas tseem ua tes dej num ntawm kev cawm dim mas? Vim li cas Yehauvas thiab Yexus twb yog tib tug xwb, tab sis Nkawd ho raug hu lub npe sib txawv nyob rau tiam sib txawv mas? Tsis yog hais tias tej tiam ntawm Nkawd tes hauj lwm ntawd sib txawv lod? Ib lub npe puas sawv cev tau Vajtswv tag nrho mas? Qhov no yog li no, ces Vajtswv thiaj li yuav tsum raug hu ib lub npe txawv nyob rau ib tiam txawv lawm, thiab Nws yuav tsum siv lub npe los hloov tiam ntawd thiab tsuas sawv cev tau rau Vajtswv tus moj yam raws li lub sij hawm ib ntus nyob rau ib tiam twg xwb; tag nrho qhov uas nws yuav tau ua ces yog sawv cev rau Nws tes hauj lwm xwb. Yog li ntawd, Vajtswv thiaj li xaiv lub npe twg los tau uas tsim nyog rau Nws tus moj yam uas sawv cev tag nrho rau tiam ntawd. Tsis hais yuav yog tiam ntawm Yehauvas, los sis tiam ntawm Yexus, ib tiam twg yeej muaj ib lub npe los sawv cev rau.

Xaiv tawm los ntawm “Lub Zeem Muag ntawm Vajtswv Tes Hauj Lwm (3)” nyob hauv Txoj Lus Tshwm Hauv Lub Cev Nqaij Daim Tawv

234. Thaum Yexus los ua Nws tes hauj lwm, nws yog nyob rau hauv qab txoj kev coj ntawm Vajntsujplig; Nws ua li qhov uas Vajntsujplig xav tau, thiab tsis yog ua raws li Vajluskub Qub Tiam Muaj Kev Cai los sis ua raws li tes hauj lwm ntawm Yehauvas. Txawm hais tias tes hauj lwm uas Yexus los ua ntawd yuav tsis yog ua raws li Yehauvas tej kev cai los sis Yehauvas tej lus txib, los Nkawd lub hauv paus ces puav leej yog tib qho thiab zoo tib yam xwb. Tes hauj lwm uas Yexus ua sawv cev rau lub npe ntawm Yexus, thiab nws sawv cev rau Tiam Hmoov Hlub; hos tes hauj lwm uas Yehauvas ua, nws sawv cev rau Yehauvas, thiab nws sawv cev rau Tiam Muaj Kev Cai. Nkawd tes hauj lwm yog tes hauj lwm ntawm tib tug Ntsujplig nyob rau ob tiam uas sib txawv xwb. Tes hauj lwm uas Yexus ua ces tsuas sawv cev tau rau Tiam Hmoov Hlub xwb, thiab tes hauj lwm uas Yehauvas ua ces tsuas sawv cev tau rau Vajluskub Qub Tiam Muaj Kev Cai xwb. Yehauvas tsuas coj cov neeg ntawm Yixayee thiab Iyiv, thiab ntawm tag nrho txhua haiv neeg uas dhau ntawm Yixayee mus lawm. Tes hauj lwm ntawm Yexus hauv phau Vajluskub Tshiab Tiam Hmoov Hlub yog tes hauj lwm ntawm Vajtswv nyob rau hauv lub npe ntawm Yexus thaum uas Nws coj tiam ntawd. … Nws tsuas muaj tau ib tiam tshiab thaum Yexus los ua tes hauj lwm tshiab, los pib ib tiam tshiab, los tsoo dhau tes hauj lwm uas twb ua tiav dhau los lawm nyob rau hauv Yixayee, thiab los ua Nws tes hauj lwm tsis yog raws li tes hauj lwm uas Yehauvas ua tiav nyob rau hauv Yixayee lawm, los sis nrog Nws cov kev cai qub, los sis kom haum nrog rau ib txoj cai tswj fwm twg, tab sis tsuas yog los ua tes hauj lwm tshiab uas Nws yuav tsum tau ua xwb. Vajtswv Tus Kheej kiag los pib tiam tshiab, thiab Vajtswv Tus Kheej kiag los muab tiam qub xaus tseg. Tib neeg tsis muaj cuab kav yuav ua tau tes hauj lwm pib dua ib tiam tshiab thiab muab tiam qub xaus tseg. Yog Yexus tsis muab Yehauvas tes hauj lwm coj los xaus tom qab Nws los lawm, ces qhov ntawd yuav yog pov thawj qhia hais tias Nws tsuas yog ib tug tib neeg xwb thiab tsis muaj cuab kav yuav sawv cev tau rau Vajtswv. Vim yog kiag qhov uas Yexus los thiab muab Yehauvas tes hauj lwm xaus, ua Yehauvas tes hauj lwm ntxiv mus thiab, tshaj qhov ntawd, ua Nws tus kheej tes hauj lwm, ib teg hauj lwm tshiab, nws ua pov thawj qhia tau hais tias qhov no yog ib tiam tshiab, thiab hais tias Yexus yog Vajtswv Tus Kheej kiag. Nkawd ua ob theem ntawm tes hauj lwm uas yeej sib txawv. Ib theem ces yog ua nyob rau hauv lub tuam tsev, thiab ib theem ces yog ua nyob sab nraud ntawm lub tuam tsev. Ib theem ces yog coj lub neej ntawm tib neeg raws li txoj kev cai, thiab lwm theem ces yog muab ib qho kev theej txhoj rau kev txhaum. Ob theem ntawm tes hauj lwm no mas yeej sib txawv yam pom meej heev li; qhov no yog cais tiam tshiab tawm ntawm tiam qub, thiab nws yeej yog ib qho yog kawg nkaus los hais tias ntawd yog ob tiam uas sib txawv. Qhov chaw ntawm Nkawd ob qho hauj lwm los yeej sib txawv, thiab tej yam hauv Nkawd tes hauj los yeej sib txawv thiab, thiab lub hom phiaj ntawm Nkawd tes hauj lwm los yeej sib txawv. Zoo li ntawd, ces lawv raug muab cais ua ob tiam: phau Vajluskub Tshiab thiab Vajluskub Qub, ces hais tau hais tias, tiam tshiab thiab tiam qub. Thaum Yexus los Nws tsis mus rau hauv lub tuam tsev, ces yog pov thawj qhia hais tias tiam ntawm Yehauvas ces xaus lawm. Nws tsis nkag mus rau hauv lub tuam tsev vim tes hauj lwm ntawm Yehauvas nyob hauv lub tuam tsev twb ua tag lawm, thiab tsis tas yuav rov muab ua ntxiv lawm, thiab yog rov muab ua ntxiv ces yog ua qhov qub dua ib zaug ntxiv lawm xwb. Tsuas yog ncaim lub tuam tsev xwb, pib dua ib teg hauj lwm tshiab thiab pib dua ib txoj kev tshiab nyob sab nraud ntawm lub tuam tsev xwb, mas Nws thiaj li muaj peev xwm muab Vajtswv tes hauj lwm coj los rau nws qhov siab tshaj plaws tau. Yog Nws tsis tawm ntawm lub tuam tsev mus ua Nws tes hauj lwm, ces Vajtswv tes hauj lwm tseem yuav nres twj yim nyob rau ntawm tej plag tse ntawm lub tuam tsev, thiab nws yuav tsis muaj ib qho hloov pauv tshiab twg hlo li. Thiab yog li ntawd, thaum Yexus los, Nws thiaj tsis nkag mus rau hauv lub tuam tsev, thiab tsis ua Nws tes hauj lwm nyob rau hauv lub tuam tsev lawm. Nws ua Nws tes hauj lwm sab nraud ntawm lub tuam tsev, thiab, coj cov thwj tim, ncig mus ua Nws tes hauj lwm yam ywj pheej lug. Vajtswv qhov kev ncaim ntawm lub tuam tsev mus ua Nws tes hauj lwm ces txhais tau hais tias Vajtswv muaj qhov phiaj xwm tshiab lawm. Nws tes hauj lwm ces yuav ua nyob sab nraud ntawm lub tuam tsev, thiab nws yuav yog tes hauj lwm tshiab uas yuav tsis raug txwv txiav dab tsi los ntawm txoj kev nqis tes ua kiag. Thaum Yexus los txog ntua, Nws coj Yehauvas tes hauj lwm nyob rau lub sij hawm ntawm Vajluskub Qub los rau qhov chaw xaus. Txawm hais tias Nkawd raug hu ob lub npe uas sib txawv, los nws yeej yog tib tug Ntsujplig uas ua ob theem ntawm tes hauj lwm ntawd tiav hlo xwb, thiab tes hauj lwm uas muab ua tiav ntawd ces yeej ua sib txuas zws los mus li. Thaum uas lub npe txawv lawm, thiab qhov tseem ntsiab ntawm tes hauj lwm sib txawv lawm, ces tiam ntawd los kuj txawv lawm thiab. Thaum Yehauvas los, qhov ntawd yog Yehauvas tiam, thiab thaum Yexus los, qhov ntawd yog Yexus tiam. Thiab yog li ntawd, nyob rau txhua qhov kev los ntawd, Vajtswv raug hu ib lub npe, Nws sawv cev rau ib tiam, thiab Nws pib dua ib txoj kev tshiab; thiab nyob rau ib txoj kev tshiab ntawd, Nws siv dua ib lub npe tshiab, uas cia Vajtswv tshiab tag mus li xwb thiab tsis muaj qub li, thiab hais tias Nws tes hauj lwm mas yeej tsis muaj nres rau qhov kev mus tas zog lawm tom ntej ntawd li. Keeb kwm ces yeej khiav mus tom ntej tas zog xwb, thiab tes hauj lwm ntawm Vajtswv los yeej khiav mus tom ntej tas zog thiab xwb. Yuav kom Nws qhov kev npaj cawm tib neeg rau-txhiab-xyoo mus txog qhov xaus, ces nws yuav tsum khiav mus lawm tom ntej tas zog xwb. Txhua hnub mas Nws yuav tsum ua qhov hauj lwm tshiab, txhua xyoo Nws yuav tsum ua qhov hauj lwm tshiab; Nws yuav tsum pib tej kev tshiab, pib tej tiam tshiab, pib dua tes hauj lwm tshiab thiab loj dua, thiab nrog rau tej no, coj tej npe tshiab thiab hauj lwm tshiab los.

Xaiv tawm los ntawm “Lub Zeem Muag ntawm Vajtswv Tes Hauj Lwm (3)” nyob hauv Txoj Lus Tshwm Hauv Lub Cev Nqaij Daim Tawv

235. Muab piv txwv li hais tias Vajtswv tes hauj lwm nyob rau txhua txhua tiam mas zoo tib yam nkaus xwb, thiab Nws kuj raug hu tib lub npe nkaus xwb thiab, ces tib neeg ho yuav paub Nws tau li cas? Vajtswv yuav tsum raug hu ua Yehauvas, leej twg los xij uas hu ua lwm lub npe ces tsis yog Vajtswv. Hos tsis li ces Vajtswv tsuas yog Yexus nkaus xwb, thiab dhau ntawm lub npe Yexus lawmces Nws yuav tsum tsis txhob muab hu ua lwm lub npe li; dhau ntawm Yexus lawm, Yehauvas tsis yog Vajtswv, thiab Vajtswv Tus Uas Muaj Hwj Chim Loj Kawg Nkaus los tsis yog Vajtswv thiab. Tib neeg ntseeg hais tias yeej muaj tseeb hais tias Vajtswv yeej muaj lub hwj chim loj kawg nkaus, tab sis Vajtswv yog tus Vajtswv uas nrog tib neeg nyob, thiab Nws yuav tsum raug hu ua Yexus, vim Vajtswv nrog tib neeg nyob ua ke lawm. Yog ua li no ces yog yoog raws tej kev qhuab qhia, thiab muab Vajtswv kem ciam tseg rau ib qho ciaj ciam nkaus xwb. Yog li ntawd, nyob rau txhua txhua tiam, tes hauj lwm uas Vajtswv ua, lub npe uas Nws raug hu, thiab tus duab uas Nws siv—tes hauj lwm uas Nws ua nyob rau txhua txhua theem tag nrho los txog ntua niaj hnub no—tej no tsis ua raws li ib txoj kev cai tswj fwm nkaus xwb, thiab tsis raug rau ib qho kev txwv txiav dab tsi hlo li. Nws yog Yehauvas, tab sis Nws kuj yog Yexus, kuj tseem yog Mexiyas, thiab Vajtswv Tus Uas Muaj Hwj Chim Loj Kawg Nkaus. Nws tes hauj lwm mas yeej maj mam hloov mus tau, nrog rau tej kev hloov hauv Nws lub npe los mus kom phim rau. Tsis muaj ib lub npe twg uas yuav sawv tau rau Nws tag nrho, tab sis tag nrho cov npe uas Nws raug hu ntawd thiaj li muaj cuab kav sawv cev tau rau Nws xwb, thiab tes hauj lwm uas Nws ua nyob rau txhua txhua tiam thiaj sawv cev tau rau Nws tus moj yam xwb.

Xaiv tawm los ntawm “Lub Zeem Muag ntawm Vajtswv Tes Hauj Lwm (3)” nyob hauv Txoj Lus Tshwm Hauv Lub Cev Nqaij Daim Tawv

236. Ib txhia hais tias Vajtswv lub npe yeej tsis hloov. Vim li cas, tom qab ntawd, es lub npe Yehauvas thiaj li rais los ua Yexus? Twb tau muaj lus zuag cev lus txog yav tom ntej hais tias tus Mexiyas yuav los, yog li ntawd vim li cas es ho muaj ib tug neeg hu ua Yexus no los xwb? Vim li cas Vajtswv lub npe hos hloov lawm? Tej hauj lwm ntawd tsis yog twb ua tag ntev los lawm los? Vajtswv tsis muaj peev xwm ua tej hauj lwm tshiab dua rau hnub no los? Tes hauj lwm nag hmo mas muab hloov tau kawg, Yexus tes hauj lwm mas yeej ua tau tom qab txuas ntxiv Yehauvas tes hauj lwm. Yog li ntawd, muab lwm qhov hauj lwm coj los ua tom Yexus tes hauj lwm tsis tau los? Yog lub npe Yehauvas twb muab hloov tau ua Yexus, ces lub npe Yexus ho muab hloov tsis tau los? Tsis muaj ib qho no yog tej yam txawv txawv li; nws tsuas yog tib neeg lub siab mas ruam qauj dhau heev lawm xwb. Vajtswv ces yeej yuav yog Vajtswv tas mus li. Tsis hais Nws tes hauj lwm yuav hloov mus li cas li, thiab tsis hais Nws lub npe yuav hloov li, Nws tus moj yam thiab lub tswv yim yeej tsis muaj hnub hloov li. Yog koj ntseeg hais tias tsuas yog Vajtswv nkaus xwb mas thiaj li yuav hu tau lub npe Yexus, ces koj qhov kev txawj ntse tsawg dhau heev lawm. Koj puas kam hais tawm hais tias Yexus yuav yog Vajtswv lub npe mus ib txhis, hais tias Vajtswv siv tib lub npe Yexus tag mus li kom tag ib txhis, thiab hais tias yuav tsis hloov li no mas? Koj puas kam hais tawm yam ruaj siab hlo hais tias lub npe Yexus yuav yog lub uas muab Tiam Muaj Kev Cai xaus tseg thiab tseem yuav muab tiam kawg xaus tib si no mas? Leej twg muaj cuab kav hais tau hais tias Yexus qhov hmoov hlub yuav muab tiam ntawd xaus no mas?

Xaiv tawm los ntawm “Tus Tib Neeg Uas Twb Tau Kem Ciam Rau Vajtswv Nyob Rau Hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?” nyob hauv Txoj Lus Tshwm Hauv Lub Cev Nqaij Daim Tawv

237. Ua lub npe ntawm Yexus—“Vajtswv nrog peb”—puas sawv cev tau rau tag nrho Vajtswv tus moj yam mas? Nws puas muaj cuab kav yuav piav ntxaws ntxaws tag nrho txog Vajtswv mas? Yog tib neeg hais tias Vajtswv ces tsuas hu tau ua Yexus nkaus xwb thiab yeej hu tsis tau ua lwm lub npe li lawm vim Vajtswv yeej hloov tsis tau Nws tus moj yam li, ces tej lus no yog lus thuam kev ntseeg tiag tiag li! Koj puas ntseeg hais tias lub npe Yexus, Vajtswv nrog peb, nkaus xwb es yuav sawv cev tau rau Vajtswv hauv Nws tag nrho? Vajtswv mas tej zaum yuav raug hu ntau ntau lub npe, tab sis nyob rau hauv cov npe no, yeej tsis muaj ib lub twg uas yuav muaj peev xwm qhia tau txhua yam tag nrho ntawm Vajtswv, tsis muaj ib lub uas yuav sawv cev tau rau Vajtswv tag nrho li. Thiab yog li ntawd, Vajtswv thiaj muaj ntau ntau lub npe, tab sis tej npe no tsis muaj peev xwm yuav piav tau tag nrho Vajtswv tus moj yam, vim Vajtswv tus moj yam mas muaj ntau dhau heev lawm ces nws cia li tshaj qhov tib neeg lub peev xwm uas yuav paub tau Nws lawm. Tsis muaj ib txoj kev rau ib tug neeg twg, siv noob neej cov lus, los hais qhia tau txhua yam puv npo txog Vajtswv. Noob neej tsuas muaj tej lus hais tsawg tsawg xwb uas siv tau los mus hais qhia tau txhua yam txog tej uas lawv paub txog Vajtswv tus moj yam: zoo tshaj, txaus hwm, phim hwj, xav tsis txog, siab tshaj plaws, dawb huv, ncaj ncees, ntse thiab lawm yam ntxiv mus. Ntau lo lus heev! Cov lus hais uas muaj tsawg tsawg no ces tsis muaj peev xwm yuav piav tau qhov me me uas tib neeg tau pom kiag ntawm Vajtswv tus moj yam. Thaum sij hawm dhau mus, muaj coob tus ntxiv ntau lo lus uas lawv xav hais tias yuav piav tau zoo zog txog txoj kev kub siab nyob rau hauv lawv nruab siab: Vajtswv mas zoo tshaj! Vajtswv mas dawb huv tshaj! Vajtswv mas txaus hlub tshaj! Niaj hnub no, tib neeg tej lus hais xws li tej no tau mus txog qhov siab tshaj plaws lawm, tab sis tib neeg tseem tsis muaj peev xwm yuav hais tawm kom meej meej txog lawv tus kheej. Thiab yog li ntawd, rau tib neeg, ces Vajtswv muaj ntau lub npe, tab sis Nws tsis muaj ib lub npe li, thiab qhov no yog vim Vajtswv kiag mas muaj ntau heev li, thiab tib neeg cov lus mas muaj tsawg heev li. Ib lo lus twg los sis ib lub npe twg tsis muaj lub peev xwm uas yuav sawv cev tau rau Vajtswv nyob rau hauv Nws tag nrho, yog li ntawd koj puas xav hais tias Nws lub npe mas yog qhov hloov tsis tau li? Vajtswv zoo tshaj thiab dawb huv tshaj, tab sis koj tseem ho tsis pub Nws hloov Nws lub npe rau txhua tiam tshiab thiab lod? Yog li ntawd, nyob rau txhua txhua tiam uas Vajtswv tus kheej kiag ua Nws tes hauj lwm, Nws siv ib lub npe uas haum rau tiam ntawd es kom hais qhia tau txhua yam txog teshauj lwm uas Nws npaj siab yuav ua. Nws siv lub npe uas txawv lwm lub no, lub uas muaj qhov tseem ceeb rau lub caij nyoog, los sawv cev rau Nws tus moj yam nyob rau tiam ntawd. Qhov no yog Vajtswv siv noob neej cov lus los hais qhia txog Nws tus kheej tus moj yam. Txawm li ntawd los xij, coob tus neeg uas tau muaj kev ntsib kev pom sab ntsuj plig thiab tau pom kiag Vajtswv lawm los xij tseem xav hais tias lub npe uas tsis zoo li lwm lub no tseem tsis muaj cuab kav sawv cev tau Vajtswv rau tag nrho Nws thiab—ntuj aw, cas qhov no los tseem pab tsis tau thiab—yog li ntawd ces tib neeg thiaj li tsis hu Vajtswv rau ib lub npe twg li lawm, tab sis tsuas hu Nws ua “Vajtswv” lawm xwb. Cuag nkaus li tib neeg lub siab mas muaj kev hlub puv nkaus thiab tab sis tseem ho raug tej lus tsis sib dhos muab vij ncig tag li, vim tib neeg tsis paub xyov yuav piav txog Vajtswv li cas. Qhov uas Vajtswv yog ntawd mas muaj ntau thiab dav heev li ces thiaj tsis muaj ib txoj kev twg uas yuav muab piv tau yooj yooj yim li. Tsis muaj ib lub npe twg uas yuav muaj peev xwm muab Vajtswv tus moj yam coj los sau zog hais ua ib kab lus luv luv tau li, thiab tsis muaj ib lub npe twg uas yuav piav tau tag nrho tej uas Vajtswv muaj thiab yog ntawd li. Yog muaj ib tug neeg nug Kuv tias, “Koj siv lub npe twg kiag?” Kuv yuav qhia rau lawv hais tias, “Vajtswv yog Vajtswv!” Qhov ntawd tseem tsis yog lub npe zoo tshaj plaws rau Vajtswv thiab lod? Qhov ntawd tseem tsis yog qhov uas hais qhia tau txhua yam txog Vajtswv tus moj yam thiab lod? Qhov no yog li no, vim li cas nej yuav siv zog ntau ua luaj li los tshawb nrhiav Vajtswv lub npe? Vim li cas nej pheej yuav xuas qws rau nej lub hlwb, yoo tshaib thiab yoo dab ntub zias, tag nrho tej no rau ib lub npe xwb? Muaj ib hnub yuav los txog thaum uas Vajtswv yuav tsis hu ua Yehauvas, Yexus, los sis Mexiyas lawm—Nws yuav cia li yog tus Tswv Tsim lawm xwb. Nyob rau lub sij hawm ntawd, tag nrho cov npe uas Nws tau siv nyob rau hauv ntiaj teb yuav los xaus, vim Nws tes hauj lwm nyob rau hauv ntiaj teb yuav los xaus lawm thiab, tom qab ntawd ces Nws tej npe ntawd yuav tsis muaj ntxiv lawm. Thaum uas txhua yam los rau hauv qab txoj kev tswj fwm ntawm tus Tswv Tsim lawm, Nws tseem ho yuav xav tau ib lub npe uas yeej zoo tsim nyog kawg tab sis tsis muaj txhua yam txhij ntawd ua dab tsi thiab? Koj puas tseem tshawb nrhiav Vajtswv lub npe tam sim no lawm? Koj puas tseem tau luag hais tias Vajtswv mas tsuas hu tau ua Yehauvas xwb? Koj puas tseem tau luag hais tias Vajtswv mas tsuas hu tau ua Yexus nkaus xwb? Koj puas muaj cuab kav yuav ris taus lub txim txhaum ntawm kev thuam Vajtswv? Koj yuav tsum paub hais tias thaum xub thawj mas Vajtswv yeej tsis muaj npe li. Nws tsuas siv ib lub, los sis ob lub, los sis ntau ntau lub vim Nws muaj tes hauj lwm yuav ua thiab yuav tsum tau cawm noob neej. Lub npe twg los xij uas Nws raug hu—tsis yog Nws Tus Kheej xaiv raws siab nyiam lod? Nws puas xav tau koj—ib tug ntawm cov uas Nws tsim tawm—los txiav txim siab rau nws mas? Lub npe uas Vajtswv raug hu ntawd yog ib lub npe uas haum nrog rau qhov uas tib neeg muaj peev xwm to taub tau, nrog rau noob neej cov lus, tab sis lub npe no tsis yog tej yam uas tib neeg yuav muab coj los hais ua zaj lus luv luv tau. Koj tsuas muaj peev xwm hais tau hais tias muaj ib tug Vajtswv nyob saum ntuj ceeb tsheej, hais tias Nws hu ua Vajtswv, hais tias Nws yog Vajtswv Tus Kheej kiag uas muaj hwj chim loj, tus uas ntse heev, nyob siab heev, phim hwj heev, raug zais tob heev, thiab muaj lub hwj chim loj kawg nkaus li, thiab tom qab ntawd ces koj txhob hais ntxiv lawm; qhov me me no yog tag nrho qhov uas koj muaj peev xwm paub tau xwb. Qhov no yog li no, lub nyuag npe Yexus puas sawv cev tau rau Vajtswv Tus Kheej? Thaum tiam kawg los txog, txawm hais tias yeej tseem yog Vajtswv tus uas ua Nws tes hauj lwm, Nws lub npe yuav tsum tau hloov, vim nws yog ib tiam tshiab lawm.

Xaiv tawm los ntawm “Lub Zeem Muag ntawm Vajtswv Tes Hauj Lwm (3)” nyob hauv Txoj Lus Tshwm Hauv Lub Cev Nqaij Daim Tawv

238. Txhua zaum uas Vajtswv los rau hauv ntiaj teb, Nws hloov Nws lub npe, qhov uas seb Nws yog poj niam los txiv neej, Nws tus duab, thiab Nws tes hauj lwm; Nws tsis rov ua Nws tes hauj lwm qub dua lawm. Nws yog ib tug Vajtswv uas tshiab tas li xwb tsis muaj qub li. Thaum Nws los ua ntej ntawd, Nws hu ua Yexus; Nws puas tseem yuav hu ua Yexus zaum no thaum Nws rov los dua thiab mas? Thaum Nws los ua ntej ntawd, Nws yog txiv neej; Nws puas yuav rov yog txiv neej dua zaum no thiab mas? Nws tes hauj lwm thaum Nws los thaum Tiam Hmoov Hlub ntawd yog los kom raug ntsia rau saum tus ntoo khaub lig; thaum Nws rov los dua, Nws puas tseem yuav rov txhiv tib neeg tawm los ntawm kev txhaum mas? Nws puas tseem yuav raug ntsia rau saum tus ntoo khaub li dua thiab mas? Qhov ntawd tsis yog rov ua tes hauj lwm qub dua thiab lod? Koj puas paub hais tias Vajtswv mas tshiab tas li xwb tsis muaj qub li mas? Muaj ib txhia hais tias Vajtswv mas yeej tsis hloov cev li. Qhov ntawd yeej muaj tseeb, tab sis nws tsuas yog hais txog qhov kev tsis hloov cev ntawm Vajtswv tus moj yam thiab Nws lub ntsiab tseem ceeb xwb. Kev hloov ntawm Nws lub npe thiab tes hauj lwm tsis yog pov thawj qhia hais tias Nws lub ntsiab tseem ceeb tau hloov lawm; nyob rau lwm qhov lus hais, ces Vajtswv yeej yuav ib txwm yog Vajtswv, thiab qhov no yuav tsis muaj hnub hloov li. Yog koj hais tias Vajtswv tes hauj lwm yeej tsis hloov li, ces Nws ho yuav ua cas muaj peev xwm ua tau kom Nws qhov kev npaj cawm tib neeg rau-txhiab-xyoo tiav hlo mas? Koj tsuas paub hais tias Vajtswv ces yeej tsis hloov ib txhiab ib txhis li xwb, tab sis koj puas paub hais tias Vajtswv mas yeej tshiab tas mus li xwb thiab tsis muaj qub li mas? Yog hais tias Vajtswv tes hauj lwm yeej tsis hloov li, ces Nws ho yuav cawm noob neej tag nrho los txog niaj hnub no tau li cas mas? Yog Vajtswv yeej tsis hloov cev li, ces vim li cas Nws twb ho ua tau ob tes hauj lwm ntawm ob tiam tiav hlo lawm mas? Nws tes hauj lwm yeej tsis nres qhov khiav mus tom ntej li, ces hais tias Nws tus moj yam maj mam raug nthuav tawm rau tib neeg, thiab qhov raug nthuav tawm ntawd yog Nws tus moj yam xeeb txawm. Nyob rau thaum pib, Vajtswv tus moj yam raug muab zais kom tib neeg txhob pom lawm, Nws yeej tsis tau nthuav tawm kiag Nws tus moj yam qhib lug rau tib neeg li, thiab tib neeg yeej cia li tsis paub txog Nws li. Vim qhov no, Nws thiaj li siv Nws tes hauj lwm los maj mam nthuav tawm Nws tus moj yam rau tib neeg, tab sis ua hauj lwm li no los tsis tau txhais hais tias Nws tus moj yam hloov nyob rau txhua txhua tiam. Nws tsis yog hais tias Vajtswv tus moj yam hloov tas mus li vim Nws txoj kev xav hloov tas mus li. Tab sis, nws yog qhov hais tias, vim peb theem ntawm Nws tes hauj lwm mas sib txawv, Vajtswv thiaj li muab tag nrho Nws tus moj yam xeeb txawm thiab, ib kauj ruam zuj zus, nthuav tawm rau tib neeg, ces kom tib neeg thiaj li muaj cuab kav paub Nws. Tab sis qhov no mas tsis yog pov thawj dab tsi uas hais tias thaum xub thawj Vajtswv tsis muaj ib tug moj yam tshwj xeeb los sis hais tias Nws tus moj yam tau maj mam hloov nrog rau lub sij hawm uas dhau zuj zus mus—tej qhov kev to taub li ntawd ces yog yuam kev lawm. Vajtswv nthuav tawm rau tib neeg txog Nws tus moj yam xeeb txawm thiab tus moj yam tshwjxeeb—qhov uas Nws yog—raws li tej tiam uas dhau mus ntawd; tes hauj lwm ntawm ib tiam twg tsis muaj cuab kav hais qhia tau tag nrho Vajtswv tus moj yam. Thiab yog li ntawd, cov lus “Vajtswv mas yeej tshiab tas mus li xwb thiab tsis muaj qub li” ces yog hais txog Nws tes hauj lwm, thiab cov lus “Vajtswv yeej tsis hloov cev li” ces hais txog qhov uas Vajtswv yeej xeeb txawm muaj thiab yog. Txawm li cas los xij, koj tsis muaj cuab kav yuav muab tes hauj lwm rau txhiab xyoo coj los ntsia rau ib qho chaw, los sis siv tej niag lus tuag coj los kos voj voog ncig nws. Qhov ntawd ces yog tib neeg txoj kev ruam. Vajtswv mas tsis yog yoog yim li qhov tib neeg xav, thiab Nws tes hauj lwm mas yuav cia li khuam twj ywm tsis tau rau ib tiam twg nkaus xwb. Yehauvas, piv txwv, tsis muaj cuab kav yuav sawv cev rau Vajtswv lub npe tag mus li xwb; Vajtswv kuj muaj cuab kav ua Nws tes hauj lwm nyob rau hauv Yexus lub npe thiab. Qhov no yog ib qho cim uas qhia hais tias Vajtswv tes hauj lwm mas yeej khiav mus lawm tom txoj xub ke tom ntej nkaus xwb.

Vajtswv ces yeej ib txwm yog Vajtswv, thiab Nws yeej tsis muaj hnub yuav rais mus ua Ntxwgnyoog li; Ntxwgnyoog ces yeej ib txwm yog Ntxwgnyoog, thiab nws yuav tsis muaj hnub rais tau mus ua Vajtswv li. Vajtswv lub tswv yim, Vajtswv qhov txuj ci phim hwj, Vajtswv txoj kev ncaj ncees, thiab Vajtswv qhov muaj tsim yuav tsis muaj hnub hloov li. Nws lub ntsiab tseem ceeb thiab qhov Nws muaj thiab yog ntawd yuav tsis muaj hnub hloov li. Hos hais txog Nws tes hauj lwm, txawm li cas los xij, nws yeej ib txwm khiav lus lawm tom ntej tas mus li xwb, yeej mus tob zuj zus tas mus li xwb, vim Nws yeej tshiab tas mus li xwb thiab tsis muaj qub li. Nyob rau txhua txhua tiam, Vajtswv siv ib lub npe tshiab, nyob rau txhua txhua tiam Nws ua tes hauj lwm tshiab, thiab nyob rau txhua txhua tiam Nws cia cov uas Nws tsim tawm los ntawd pom Nws txoj kev xav tshiab thiab tus moj yam tshiab. Yog li hais tias, nyob rau hauv ib tiam tshiab, tib neeg tsis pom qhov kev hais qhia kom pom txog Vajtswv tus moj yam tshiab, ces lawv tseem tsis muab Nws ntsia rau saum tus ntoo khaub lig mus ib txhis lod? Thiab yog ua li ntawd, ces tsis yog lawv kem ciam rau Vajtswv lod?

Xaiv tawm los ntawm “Lub Zeem Muag ntawm Vajtswv Tes Hauj Lwm (3)” nyob hauv Txoj Lus Tshwm Hauv Lub Cev Nqaij Daim Tawv

239. Yog tib neeg tseem tos ntsoov qhov kev rov los ntawm Yexus uas yog tus Cawm Seej nyob rau thaum tiam kawg, thiab tseem xav kom Nws los muaj lub ntsej muag zoo nkaus li thaum Nws muaj nyob rau hauv Yudias, ces tag nrho txoj kev npaj cawm tib neeg rau-txhiab-xyoo yuav nres nyob rau Tiam Txhiv Dim lawm, thiab yuav muaj mus tsis tau dhau deb tshaj ntawd lawm. Tiam kawg, dhau ntxiv mus, yuav tsis muaj hnub los txog, thiab tiam ntawd yuav tsis tsis muaj hnub muab coj los xaus li. Qhov no vim yog Yexus uas yog tus Cawm Seej ces tsuas muaj rau noob neej txoj kev txhiv dim thiab txoj kev cawm dim nkaus xwb. Kuv tsuas siv lub npe Yexus rau tag nrho cov neeg muaj kev txhaum nyob rau Tiam Hmoov Hlub, tab sis nws tsis yog lub npe uas Kuv yuav coj tag nrho noob neej los rau ib qho chaw xaus. Txawm hais tias Yehauvas, Yexus, thiab tus Mexiyas tag nrho yeej sawv cev rau Kuv tus Ntsujplig, tej npe no tsuas qhia txog tej tiam uas sib txawv ntawm Kuv qhov kev npaj cawm tib neeg xwb, thiab tsis sawv cev Kuv nyob rau tag nrho txhua yam ntawm Kuv. Tej npe uas cov tib neeg hauv ntiaj teb hu Kuv mas yuav piav tsis tau kom ntxaws ntxaws txog tag nrho Kuv tus moj yam thiab tag nrho txhua yam uas Kuv yog. Lawv tsuas yog tej npe sib txawv uas Kuv raug hu nyob rau tej tiam sib txawv xwb. Thiab yog li ntawd, thaum tiam kawg—tiam ntawm hnub kawg—los txog, ces Kuv lub npe yuav hloov dua. Kuv yuav tsis hu ua Yehauvas, los sis Yexus, haj yam tsis hu ua tus Mexiyas lawm—Kuv yuav raug hu ua Vajtswv Tus Kheej Uas Muaj Hwj Chim Loj Kawg Nkaus, thiab nyob rau hauv lub npe no ces Kuv yuav coj tag nrho tiam no mus rau qhov chaw xaus. Muaj ib zaug Kuv twb raug hu ua Yehauvas lawm. Kuv kuj raug hu ua tus Mexiyas, thiab tib neeg kuj hu Kuv ib zaug ua Yexus uas yog tus Cawm Seej nrog rau txoj kev hlub thiab kev hwm lawm. Hnub no, txawm li cas los xij, Kuv tsis yog tus Yehauvas los sis Yexus uas tib neeg paub rau yav tag dhau los lawm; Kuv yog tus Vajtswv uas tau rov los rau tiam kawg, tus Vajtswv uas yuav coj tiam no mus rau qhov chaw xaus. Kuv yog tus Vajtswv Tus Kheej kiag uas sawv los ntawm qhov kawg ntawm lub ntiaj teb los, muaj txhij tag nrho Kuv tus moj yam, thiab muaj lub hwj chim, meej mom thiab yeeb koob puv npo. Tib neeg yeej tsis tau nrog Kuv sib txuas ncauj txuas lus li, tsis tau paub Kuv dua li, thiab yeej ib txwm tsis paub txog Kuv tus moj yam. Txij puag thaum tsim lub ntiaj teb los txog ntua niaj hnub no, tsis tau muaj ib tug neeg tau pom Kuv li. Ntawm no yog tus Vajtswv uas tshwm sim rau tib neeg pom nyob rau tiam kawg tab sis nkaum nyob rau hauv cov tib neeg. Nws nyob nrog tib neeg, tseeb thiab tiag, zoo li lub hnub uas kub lug thiab tus nplaim taws cig liab vog, muaj hwj chim txaus nkaus thiab muaj hwj chim puv npo. Tsis muaj ib tug neeg twg los sis ib yam dab tsi uas yuav tsis raug Kuv tej lus txiav txim rau li, thiab tsis muaj ib tug neeg twg los sis ib yam dab tsi uas yuav tsis raug lim kom dawb huv los ntawm qhov kev kub hnyiab ntawm hluav taws li. Thaum kawg, txhua haiv neeg yuav tau txais koob hmoov vim Kuv tej lus, thiab kuj yuav raug tsoo ua tej daim mos mos vim yog Kuv tej lus. Nyob rau hauv txoj kev no, tag nrho cov tib neeg nyob rau tiam kawg yuav pom hais tias Kuv yog tus Cawm Seej uas tau rov qab los lawm, thiab hais tias Kuv yog Vajtswv Tus Uas Muaj Hwj Chim Loj Kawg Nkaus uas txeeb tau tag nrho noob neej. Thiab tag nrho sawv daws yuav pom hais tias Kuv yeej yog qhov khoom fij rau kev txhaum rau tib neeg ib zaug dhau los lawm, tab sis nyob rau tiam kawg Kuv kuj yuav rais mus ua cov nplaim taws ntawm lub hnub thiab kub tag nrho txhua yam, nrog rau lub Hnub ntawm txoj kev ncaj ncees uas nthuav tawm tag nrho txhua yam. Qhov no yog Kuv tes hauj lwm nyob rau tiam kawg. Kuv siv lub npe no thiab muaj tus moj yam no ces kom tag nrho tib neeg thiaj li pom hais tias Kuv yog ib tug Vajtswv uas ncaj ncees, lub hnub uas kub lug, tus nplaim taws uas cig liab vog, thiab kom tag nrho sawv daws thiaj li tau pe hawm Kuv, tib tug Vajtswv tseeb, thiab kom lawv thiaj li pom Kuv lub ntsej muag tseeb: Kuv tsis yog tus Vajtswv rau cov neeg Yixayee xwb, thiab Kuv tsis yog tus Txhiv Dim nkaus xwb, Kuv yog tus Vajtswv rau tag nrho tej uas raug tsim tawm los thoob plaws saum ntuj thiab ntiaj teb thiab hiav txwv.

Yog tus Cawm Seev los txog nyob rau thaum tiam kawg thiab tseem hu ua Yexus, thiab twb yug los ib zaug rau hauv Yudias lawm thiab ua Nws tes hauj lwm rau qhov ntawd, ces qhov no yuav yog pov thawj qhia hais tias Kuv tsuas tsim cov neeg ntawm Yixayee nkaus xwb thiab tsuas txhiv cov neeg ntawm Yixayee xwb, thiab Kuv tsis muaj dab tsi nrog Lwm Haiv Neeg li. Qhov no tseem tsis sib txawv nrog Kuv tej lus hais tias “Kuv yog tus Tswv uas tsim lub ntuj thiab lub ntiaj teb thiab tag nrho txhua yam” thiab lod? Kuv ncaim Yudias thiab ua Kuv tes hauj lwm nrog rau Lwm Haiv Neeg vim Kuv tsis yog Vajtswv rau cov neeg ntawm Yixayee nkaus xwb, tab sis yog Vajtswv rau tag nrho txhua yam uas raug tsim tawm los. Kuv tshwm sim nrog rau Lwm Haiv Neeg nyob rau tiam kawg vim Kuv tsis yog Yehauvas nkaus xwb, tus Vajtswv ntawm cov neeg ntawm Yixayee nkaus xwb, tab sis, tshaj qhov ntawd, vim Kuv yog tus Tswv Tsim ntawm tag nrhov cov Kuv cov xaiv tseg nyob rau Lwm Haiv Neeg. Tsis yog Kuv tsim Yixayee, Iyiv, thiab Lenpanoo nkaus xwb, tab sis tag nrho Lwm Haiv Neeg dhau ntawm Yixayee mus tib si. Vim qhov no, Kuv yog tus Tswv rau tag nrho txhua yam uas raug tsim tawm los. Kuv tsuas siv Yixayee ua qhov chaw pib rau Kuv tes hauj lwm xwb, siv Yudias thiab Kalilai uas qhov chaw khov rau Kuv tes hauj lwm txhiv dim, thiab tam sim no Kuv siv Lwm Haiv Neeg los ua qhov chaw tiag taw uas Kuv yuav coj tag nrho tiam no los rau ib qho chaw xaus. Kuv ua ob theem hauj lwm nyob rau Yixayee lawm (ob theem no ntawm tes hauj lwm ces yog Tiam Muaj Kev Cai thiab Tiam Hmoov Hlub), thiab Kuv twb tau ua ob theem dhau zog ntawm tes hauj lwm (Tiam Hmoov Hlub thiab Tiam Vajtswv Los Kav) thoob plaws daim av uas dhau ntawm Yixayee mus lawm. Nyob rau Lwm Haiv Neeg ntawd, Kuv yuav ua qhov kev txeeb tau, thiab thiaj li xaus kiag tiam no. Yog tib neeg tseem pheej hu Kuv uas Yexus Khetos tas mus li, tab sis tsis paub hais tias Kuv twb pib ib tiam tshiab nyob rau tiam kawg lawm thiab twb tau pib dua ib teg hauj lwm tshiab lawm, thiab yog tib neeg tseem pheej tos tas zog ntxiv yam tag siab tag ntsws hlo rau txoj kev rov los ntawm Yexus uas yog tus Cawm Seej xwb, ces Kuv yuav hu cov neeg zoo li no ua cov uas tsis ntseeg Kuv; lawv yog cov neeg uas tsis paub Kuv, thiab lawv txoj kev ntseeg Kuv ces yog cuav xwb. Cov neeg zoo li ntawd puas yuav muaj cuab kav pom kiag qhov uas Yexus uas yog tus Cawm Seej rov los saum ntuj ceeb tsheej los txog mas? Qhov lawv tos tsis yog qhov Kuv los txog, tab sis yog qhov kev los txog ntawm tus Vajntxwv ntawm cov neeg Yudais xwb. Lawv tsis ntshaw kom Kuv los muab lub ntiaj teb qub uas tsis dawb huv no rhuav tshem kom tu noob, tab sis tsuas tos ntsoov Yexus qhov kev rov los zaum ob xwb, ces kom lawv raug txhiv dim xwb. Lawv npaj siab tos Yexus rov los txhiv tag nrho noob neej ib zaug ntxiv tawm ntawm daim av dub tsuas thiab tsis ncaj ncees no xwb. Cov neeg zoo li ntawd yuav ua cas ua tau Kuv tes hauj lwm kom tiav hlo nyob rau tiam kawg mas? Tib neeg txoj kev ntshaw tsis haum nrog qhov kev ua kom tej Kuv xav tau tiav hlo los sis tsis haum rau qhov kev ua kom Kuv tes hauj lwm tiav hlo, vim tib neeg tsuas qhuas thiab khaws tes hauj lwm uas Kuv tau ua tiav ua ntej xwb, thiab tsis paub txog hais tias Kuv yog Vajtswv Tus Kheej kiag uas tsuas muaj tshiab tas li xwb thiab tsis muaj qub li. Tib neeg tsuas paub hais tias Kuv yog Yehauvas, thiab Yexus, thiab tsis quav ntsej hais tias Kuv yog Tus kawg uas yuav coj noob neej mus rau ib qho chaw xaus. Tag nrho tej tib neeg ntshaw thiab paub ces los ntawm lawv tej kev xav phem los xwb, thiab tsuas yog tej yam uas lawv pom kiag ntawm lawv ob lub qhov muag nkaus xwb. Nws tsis ncaj kab nrog rau tes hauj lwm Kuv ua, tab sis tsis sib haum nrog rau nws.

Xaiv tawm los ntawm “Tus Cawm Seej Twb Rov Qab Los Saum ib tauv ‘Huab Dawb’ Lawm” nyob hauv Txoj Lus Tshwm Hauv Lub Cev Nqaij Daim Tawv

Qhov Dhau Los: IV. Cov Lus nyob rau ntawm Kev Qhia Tshwm Txog Tej Lus Zais Tob ntawm Txoj Kev Yug Los Ua Neeg

Ntxiv Mus: VI. Cov Lus nyob rau ntawm Phau Vajluskub

Tej kev puas tsuaj tab tom tshwm sim ib yam zuj zus tuaj. Tus Tswv twb los rau hauv qhov kev zais npog ua ntej txoj kev txom nyem loj tshaj plaws lawm. Koj puas paub tias yuav tos txais Nws li cas? Txhob me siab hu rau peb los nrhiav qhov kev tos txais no.

Cov Ntsiab Lus Uas Zoo Sib Thooj

Tshooj 15

Vajtswv qhov kev tshwm sim twb tau tshwm sim rau hauv txhua pawg ntseeg lawm. Yog tus Ntsujplig uas hais; Nws yog hluav taws kub, muaj hwj...

Tshooj 20

Tej kev nplua nuj ntawm Kuv tsev neeg mas dhau txoj kev suav lawm thiab piav tsis tau li, txawm li ntawd los tib neeg yeej ib txwm tsis los...

Qhov Kho Kev Teeb Txhua Yam

  • Cov ntawv
  • Cov Ntsiab Lus Tom Qab

Ib Xim Nkaus Xwb

Cov Ntsiab Lus Tom Qab

Tus Ntawv

Tus Ntawv Luaj Li Cas

Kev Sib Nrug Ntawm Tej Kab Ntawv

Kev Sib Nrug Ntawm Tej Kab Ntawv

Nplooj Ntawv Qhov Dav

Cov Ntsiab Lus

Tshawb Nrhiav

  • Tshawb Nrhiav Lo Lus No
  • Tshawb Nrhiav Phau Ntawv No