Yog koj xav ua koj tes dej num kom zoo, mas koj yuav tsum xub to taub qhov tseeb tso. Koj yuav tsum nrhiav qhov tseeb kom kawg koj lub siab. Nyob rau hauv txoj kev nrhiav qhov tseeb ntawd, qhov tseem ceeb ces yog los xyaum ua tib zoo xav txog Vajtswv cov lus xwb. Lub hom phiaj ntawm txoj kev ua tib zoo xav txog Vajtswv cov lus ntawd yog kom to taub cov lus ntawd lub ntsiab tseeb xwb. Los ntawm txoj kev nrhiav xwb mas koj thiaj li yuav to taub lub ntsiab ntawm Vajtswv cov lus ntawd, yam uas Vajtswv cheem tsum ntawm tib neeg yog dab tsi, thiab thiaj li yuav tshawb pom Vajtswv tej kev npaj siab uas nyob rau hauv Nws cov lus. Thaum koj muaj ib txoj kev to taub zoo li no lawm, koj yuav to taub qhov tseeb. Thaum koj to taub qhov tseeb lawm, nws yuav yooj yim to taub tej hauv paus ntsiab lus uas yuav tsum tau coj koj txoj kev xyaum ua, thiab tom qab ntawd koj thiaj li xyaum ua tau qhov tseeb. Thaum koj xyaum ua qhov tseeb lawm, koj yuav pib nkag mus rau hauv qhov tseeb qhov muaj tiag. Nyob rau lub sij hawm zoo li no, koj yuav to taub tej yam uas koj tsis to taub yav dhau los, koj yuav pom tej uas koj pom tsis tseeb yav dhau los, thiab koj yuav daws tau tej teeb meem uas yav tas los koj daws tsis tau. Muaj ntau yam uas koj yuav pib muaj siab thiab muaj txoj kev paub tob tshiab, tej kev ua hauj lwm yuav qhib rau koj, thiab koj yuav muaj peev xwm xyaum ua qhov tseeb tas li. Qhov no yog qhov uas koj yuav nkag tau mus rau hauv qhov tseeb qhov muaj tiag tag nrho. Txawm li cas los xij, yog koj tsis muab siab rau koj tes dej num, thiab tsis nrhiav qhov tseeb tej hauv paus ntsiab lus, yog koj tsis meej pem los sis paub tsis meej, es tsuas ua txhua yam kom yooj yim tshaj plaws li koj ua tau xwb no, hom kev xav no yog kev xav dab tsi? Nws yog ib hom kev xav uas lam taus lam ua txhua yam xwb. Yog koj tsis ua lub siab ncaj ncees rau koj tes dej num, yog koj tsis paub leg tes dej num ntawd, los sis tsis paub leg hauj lwm, koj puas yuav muaj peev xwm ua tau koj tes dej num kom zoo? Koj puas yuav muaj peev xwm ua tau koj tes dej num kom txog rau ib tug qauv uas siv tau? Thiab yog koj tsis muaj peev xwm ua tau koj tes dej num kom txog rau ib tug qauv uas siv tau no, koj puas yuav muaj peev xwm nkag tau mus rau hauv qhov tseeb qhov muaj tiag? Yeej tsis muaj peev xwm nkag tau li. Yog txhua zaus koj ua koj tes dej num, koj tsis rau siab, koj tsis xav siv zog, thiab koj tsuas lam ua kom dhau xwb, tsis muaj kev xav cuag nkaus li koj ua si xwb no, qhov no tsis yog teeb meem lod? Koj tau txais dab tsi los ntawm qhov ua koj tes dej num li no? Thaum kawg, tib neeg yuav pom hais tias thaum koj ua koj tes dej num, koj tsis paub leg lub luag hauj lwm, lam taus lam ua, thiab tsuas lam ua kom dhau xwb—uas yog qhov hais tias, koj nyob rau qhov phom sij uas yuav raug muab rhuav tshem mus lawm. Vajtswv saib thoob plaws qhov txheej txheem uas koj ua koj tes dej num ntawd kom meej, yog li ntawd Vajtswv yuav hais li cas? (Tus tib neeg no tsis tsim nyog ua Nws tes hauj lwm los sis tsis tsim nyog Nws tso siab rau.) Vajtswv yuav hais tias koj yog ib tug neeg uas tso siab tsis tau rau, thiab tias tsim nyog muab koj tshem tawm mus lawm. Yog li ntawd, txawm koj yuav ua tes dej num dab tsi, txawm tes dej num ntawd yog ib teg dej num uas tseem ceeb los sis dog dig los xij, yog koj tsis muab siab rau tes hauj lwm uas tau muab tso rau koj ua los sis tsis ua raws li koj lub luag hauj lwm, thiab yog koj tsis saib tes dej num ntawd yam li yog Vajtswv cov lus txib, los sis ua tes dej num ntawd yam li yog koj tus kheej tes dej num thiab txoj hauj lwm, pheej lam taus lam ua txhua yam xwb, ces qhov no yuav ua rau muaj teeb meem. “Tso siab tsis tau rau”—cov lus no yuav qhia txog qhov koj ua koj tes dej num li cas. Cov lus ntawd txhais hais tias koj txoj kev ua koj tes dej num ntawd ua tsis tau raws li tus qauv, thiab koj raug muab tshem tawm mus lawm, thiab Vajtswv hais tias koj tus cwj pwm tsis zoo txaus. Yog muab ib teg dej num rau koj ua, tiam sis qhov no yog tus cwj pwm uas koj coj rau teg dej num ntawd thiab qhov no yog qhov koj ua teg dej num ntawd xwb no, luag puas yuav muab dej num rau koj ua ntxiv nyob rau yav tom ntej lawm? Puas tuaj yeem muab tau ib qho tseem ceeb rau koj ua lawm? Yeej tsis tau lawm, tshwj yog koj lees txim hloov dua siab tshiab tiag tiag lawm xwb. Txawm li cas los xij, nyob rau hauv nruab siab mas Vajtswv yeej ib txwm muaj qee qhov kev tsis tso siab thiab kev tsis txaus siab rau koj. Qhov no yuav yog ib qho teeb meem, tsis yog lod? Tej zaum koj yuav plam lub cib fim los ua koj tes dej num, thiab koj yuav tsis dim.

Thaum tib neeg ua lawv tes dej num, qhov tseeb yog lawv ua yam uas lawv yuav tsum tau ua. Tab sis yog tias koj ua tes dej num ntawd rau ntawm Vajtswv xub ntiag, yog tias koj ua koj tes dej num nrog tus yeeb yam ncaj ncees thiab nrog lub siab, tus yeeb yam no yuav tsis raug qhov tseeb dua lod? Yog li koj tsim nyog coj tus yeeb yam no los siv li cas rau koj lub neej txhua hnub mas? Koj yuav tsum muab “kev pe hawm Vajtswv nrog lub siab thiab ua siab ncaj” los ua koj qhov uas muaj tseeb. Thaum twg koj xav ua dog ua dig thiab tsuas lam mus raws li tej kev txawv txav mus los, thaum twg koj xav lam tau lam ua thiab tub nkeeg, thiab thaum twg uas koj cia koj tus kheej ua ywj fab ywj fwj, koj yuav tsum xav kom thoob: “Kev coj tus xeeb ceem zoo li no, kuv puas yog ib tug neeg ntseeg tsis tau mas? Qhov no puas yog qhov muab kuv lub siab tso rau hauv qhov kev ua kuv tes dej num mas? Qhov ua li no puas yog kuv tsis muab siab npuab? Hauv qhov kev ua li no, puas yog kuv ua tsis tau raws li tes hauj lwm uas Vajtswv tau muab tso rau kuv ua lawm?” Koj yuav tsum tig rov xav txog koj tus kheej li no. Yog koj paub hais tias koj pheej lam taus lam ua koj tes dej num, tias koj tsis ua lub siab ncaj ncees, thiab tias koj tau ua rau Vajtswv mob siab lawm no, koj yuav tsum ua li cas? Koj yuav tsum hais tias, “Lub sij hawm uas kuv paub hais tias muaj qee yam tsis yog nyob rau ntawm no lawm, kuv tseem tsis saib qhov ntawd yam li yog ib qho teeb meem thiab; Kuv cia li npog qhov teeb meem ntawd yam tsis xyuam xim li xwb. Los txog rau tam sim no kuv yeej tsis paub hais tias kuv lam taus lam ua xwb, tias kuv tsis tau ua raws li kuv lub luag hauj lwm li. Kuv yeej tsis muaj lub siab uas txawj xav thiab qhov tsim nyog tiag tiag!” Koj twb pom qhov teeb meem thiab paub me ntsis txog koj tus kheej lawm—yog li ntawd tam sim no, koj yuav tsum hloov koj tus kheej! Tus cwj pwm uas koj coj rau txoj kev ua koj tes dej num ntawd tsis yog lawm. Thaum muaj ib txoj hauj lwm ntxiv mas koj tsis xyuam xim txog txoj hauj lwm ntawd, thiab koj tsis muab siab rau txoj hauj lwm ntawd. Yog koj lam taus lam ua li no dua, koj yuav tsum thov Vajtswv thiab cia Nws qhuab qhia thiab rau txim rau koj. Koj yuav tsum muaj ib qho kev txaus siab hlo zoo li no nyob rau hauv txoj kev ua koj tes dej num. Tsuas yog thaum ntawd xwb koj thiaj li tuaj yeem lees txim hloov dua siab tshiab tiag tiag. Tej zaum koj yuav hloov koj tus kheej thaum koj lub siab uas txawj xav paub meej thiab tus cwj pwm uas koj coj rau txoj kev ua koj tes dej num ntawd hloov pauv lawm xwb. Thiab thaum koj lees txim hloov dua siab tshiab ntawd, koj kuj yuav tsum thim xav tas li seb koj puas tau ua kom kawg koj lub siab, kawg koj laj lim tswv yim, thiab kawg koj lub zog rau hauv txoj kev ua koj tes dej num los tsis tau thiab; ces tom qab ntawd, siv Vajtswv cov lus los ua qhov ntsuas thiab siv cov lus ntawd rau koj tus kheej, koj yuav kawm paub hais tias cov teeb meem uas tseem nyob rau hauv txoj kev ua koj tes dej num ntawd yog dab tsi. Los ntawm qhov daws teeb meem raws li Vajtswv cov lus li no tas li ntawd, tsis yog koj ua koj tes dej num kom kawg lub siab, laj lim tswv yim, thiab lub zog kom muaj tseeb lod? Qhov ua tau koj tes dej num li no: tsis yog koj twb ua kawg koj lub siab, laj lim tswv yim, thiab lub zog lawm lod? Yog koj lub siab uas txawj xav tsis hais dab tsi ntxiv lawm, yog koj muaj peev xwm ua tau raws li cov qauv uas tsim nyog thiab ua tau lub siab ncaj ncees nyob rau hauv txoj kev ua koj tes dej num lawm, ces thaum ntawd xwb koj lub siab thiaj li yuav muaj kev thaj yeeb thiab kev xyiv fab tiag tiag. Qhov ua koj tes dej num ntawd yuav mloog zoo li yog ib lub luag hauj lwm uas yeej zoo li ib txwm thiab ncaj ncees lawm, uas tsis yog qhov ntxiv ib lub nra ntxiv, thiab tsis zoo li ib txoj hauj lwm uas ua rau lwm tus kiag li. Qhov ua ib teg dej num li no, mas koj mloog zoo li ua tiav lawm, thiab koj mloog zoo li tias koj tab tom nyob rau hauv Vajtswv lub xub ntiag ntag. Txoj kev coj koj tus kheej zoo li no mas kaj siab lug xwb. Txoj kev coj koj tus kheej zoo li no yuav tsis ua rau koj yog tib neeg me ntsis ntxiv es tsis tshua zoo li ib tug dab noj neeg lod? Qhov coj koj tus kheej li no puas yooj yim? Tseeb tiag lawm, yeej yooj yim, tiam sis tsis yooj yim rau cov uas tsis lees txais qhov tseeb.

Tseeb tiag lawm, txawm tib neeg ua tau lawv tes dej num mus txog rau ib tug qauv uas siv tau thiab tsis txog los xij, tsis hais qhov twg li yeej muaj ib lub teev luj nyob rau hauv lawv lub siab lawm. Yog lawv mloog lus qhuab qhia tas li, nyeem Vajtswv txoj lus tas li, thiab nrog lwm tus kawm tas li, ces tab txawm yog lawv to taub ntiav ntiav txog qhov tseeb xwb los xij, yam tsawg kawg lawv yuav muaj peev xwm to taub qee cov lus qhuab qhia. Qhov muab cov lus qhuab qhia no coj los ua qhov ntsuas lawv ntawd, lawv kuj tuaj yeem txiav txim tau hais tias lawv ua tau lawv tes dej num zoo npaum li cas thiab tias lawv puas ua raws li tej hauv paus ntsiab lus thiab. Qhov kev pom tseeb no yog nyob rau hauv txoj kev to taub txog txhua tus uas muaj lub siab uas txawj xav thiab qhov tsim nyog. Muaj ntau zaus, thaum tib neeg ua lawv tej dej num, lawv lam taus lam ua xwb. Lawv tsis siv tag nrho lawv lub zog, tsis nrhiav qhov tseeb thiab tsis ua raws li tej hauv paus ntsiab lus. Txawm lawv tej dej num yuav yog ua dab tsi los xij, lawv tsis quav ntsej li. Txawm lawv pom ib qho teeb meem los, lawv tsis nrhiav kev daws li, tiam sis ua cuag nkaus li qhov teeb meem ntawd tsis yog lawv li kev txhawj xeeb thiab lam ua txuj daws qhov teeb meem ntawd xwb. Nyob rau hauv lawv lub siab mas, lawv pom hais tias tsis tas yuav ua kom txhua yam nyuaj rau lawv tus kheej, tsis tas yuav mob siab rau qhov teeb meem no li. Txawm li cas los xij, qhov ua kom lawv tus kheej tau zoo li no mas ua rau lawv lub siab lub ntsws phem me ntsis tuaj. Yog koj ua koj tes dej num yam tsis muaj qhov paub tias yog lub nra li, ces koj lub siab yeej yuav lam taus lam ua xwb. Qhov ua li ntawd yuav leg tsis tau lub luag hauj lwm, thiab haj yam ua tsis tau lub siab ncaj ncees. Vim li ntawd, lawv thiaj li tsis lees paub Vajntsujplig Dawb Huv txoj kev qhuab qhia thiab kev coj kev. Koj yeej ib txwm ua raws li cov kev cai thiab cov kev cai tswj uas tsim tau los lawm yam tsis muaj ib qho kev kaj los sis kev paub tob tshiab li, tsis ua dab tsi li tsuas lam ua kom dhau xwb. Qhov ua koj tes dej num li no mas tsis muaj nuj nqis dab tsi li, tab txawm thaum koj ua hauj lwm los twb tsis txaus. Yog tab txawm koj ua hauj lwm los twb tsis txaus lawm no, koj ua puas tau ib tug neeg ua hauj lwm uas siab ncaj ncees? Yeej tsis tau li. Cov uas ua hauj lwm tsis txaus ntawd kawg raug muab tshem tawm mus lawm xwb. Cov tib neeg uas tsis meej pem ntawd mas qee tus tsis muaj ib qho kev to taub me me txog qhov tseeb li. Lawv saib txoj kev lam ua lawv tes dej num ntawd yam li yog kev xyaum ua qhov tseeb lawm. Lawv xav hais tias tsuav yog ua lawv tes dej num xwb, ces yog lawv xyaum ua qhov tseeb lawm. Yog koj nug ib tug tib neeg zoo li no hais tias, “Koj puas tuaj yeem xyaum ua qhov tseeb?” mas nws yuav teb hais tias, “Qhov kuv ua kuv tes dej num ntawd tsis yog kuv xyaum ua qhov tseeb lod?” Nws hais puas yog? Cov lus ntawd yog ib tug tib neeg uas tsis meej pem cov lus. Yuav kom ua tau koj tes dej num mas, yam tsawg kawg, koj yuav tsum siv tag nrho koj lub siab, laj lim tswv yim, thiab lub zog rau tes dej num ntawd mas thiaj li yuav xyaum ua tau qhov tseeb. Yuav kom xyaum ua tau qhov tseeb, mas koj yuav tsum ua raws li tej hauv paus ntsiab lus. Yog koj lam taus lam ua koj tes dej num xwb ces yuav ua tsis tau dab tsi. Koj hu tsis tau hais tias qhov no yog kev xyaum ua qhov tseeb, qhov no tsuas yog kev ua hauj lwm xwb. Pom tau tseeb tseeb hais tias koj tsuas yog ua hauj lwm xwb, qhov no txawv qhov xyaum ua qhov tseeb. Kev ua hauj lwm tsuas yog ua yam uas ua rau koj txaus siab raws li koj tus kheej lub siab nyiam xwb, hos tsis quav ntsej txhua yam uas koj tsis xav ua li. Txawm koj ntsib tej kev nyuaj dab tsi los xij, koj yeej tsis nrhiav qhov tseeb tej hauv paus ntsiab lus li. Nyob rau sab ntaud mas, tej zaum yuav zoo li koj ua koj tes dej num, tiam sis puav leej yog ua hauj lwm xwb. Txhua tus uas tsis ua lawv tes dej num los ntawm qhov ua raws li qhov tseeb tej hauv paus ntsiab lus ces yog ua hauj lwm xwb. Nyob rau hauv Vajtswv tsev neeg, mas muaj ntau tus tib neeg sim ua lawv tes dej num los ntawm qhov vam khom rau tib neeg tej kev xav phem thiab tej kev xav hauv nruab siab. Lawv siv zog ua tau ntau xyoo tsis tau dab tsi li, lawv tsis tuaj yeem xyaum ua qhov tseeb los sis ua raws li tej hauv paus ntsiab lus nyob rau hauv txoj kev ua lawv tes dej num. Yog li ntawd, yog tib neeg pheej ua raws li lawv tus kheej lub siab nyiam thiab ua lawv tej dej num raws li lawv tus kheej lub siab nyiam xwb, ces tab txawm lawv tsis ua kev phem los xij, qhov no yeej tsis suav tias yog kev xyaum ua qhov tseeb li. Thaum kawg, ntau lub xyoo uas lawv ua hauj lwm ntawd tsis coj lawv mus kom to taub txhua yam ntawm qhov tseeb, thiab lawv tsis muaj cov lus tim khawv uas hais txog txoj kev ntsib kev pom uas lawv tuaj yeem qhia tau li. Vim li cas thiaj zoo li no? Vim hais tias tej kev npaj siab uas coj cov tib neeg no mus ua lawv tes dej num ntawd tsis yog lawm. Qhov uas vim li cas lawv ua lawv tes dej num ntawd mas yog kom tau txais koob hmoov xwb, lawv xav nrog Vajtswv sib cog lus. Lawv tsis yog ua lawv tes dej num kom tau txais qhov tseeb xwb. Lawv ua lawv tes dej num vim lawv tsis muaj lwm txoj kev xaiv lawm. Vim li no, lawv thiaj li pheej paub tsis meej thiab lam taus lam ua xwb. Lawv tsis nrhiav qhov tseeb, yog li ntawd qhov lawv ua ntawd yog kev ua hauj lwm xwb. Txawm lawv ua pes tsawg tes dej num los xij, lawv tej kev ua tsis tau txiaj ntsim tiag tiag li. Nws txawv cov uas muaj kev hwm Vajtswv nyob rau hauv lawv lub siab. Lawv niaj hnub ua tib zoo xav txog qhov yuav ua li cas kom raws li Vajtswv tej kev npaj siab thiab yuav ua li cas es thiaj li muaj txiaj ntsim rau Vajtswv tsev neeg thiab cov neeg uas Nws xaiv lawm. Lawv xav kom tob txog tej hauv paus ntsiab lus thiab txiaj ntsim tas li xwb. Lawv siv zog xyaum ua qhov tseeb thiab zwm rau Vajtswv tas li xwb. Qhov no yog tus cwj pwm ntawm lub siab uas yog. Cov no yog cov tib neeg uas nrhiav qhov tseeb thiab nyiam yam zoo. Hom tib neeg no, thaum ua lawv tej dej num, mas Vajtswv lees txais thiab pom zoo. Txawm nyob rau sab nraud mas cov uas tsis nyiam qhov tseeb yuav zoo li ua lawv tes dej num los xij, lawv tsis nrhiav qhov tseeb ib qho me me li. Lawv ua raws li lawv tus kheej lub siab nyiam thiab tsuas ua yam uas yuav tsis muaj qhov tsis zoo rau lawv tus kheej thiab ua yam uas muaj txiaj ntsim rau lawv tus kheej xwb. Lawv tsuas yog siv dag zog me me thiab zam txhua yam kev txom nyem xwb, tiam sis lawv tseem xav tau txoj kev pom zoo ntawm cov neeg Vajtswv xiav thiab ib lub koob lub npe uas zoo thiab. Yog qhov no yog qhov lawv lub siab mob siab rau xwb no, lawv puas yuav muaj peev xwm ua tau lawv tej dej num kom txog rau ib tug qauv uas siv tau? Yeej tsis tau li. Txawm nyob rau sab nraud mas zoo li nej ua nej tes dej num los xij, tseeb tiag lawm nej lub siab tsis nyob rau ntawm Vajtswv lub xub ntiag li. Qhov uas nej mob siab rau ua ces yog tej kev ntxias thiab kev dag kom nej tus kheej tau txiaj ntsim xwb, nej yuav ua tsis tau dab tsi nce qib kiag li txawm nej twb tuav nej txoj kev ntseeg tau ntau xyoo lawm. Txawm nej tuaj sib sau ua ke tas li, noj thiab haus Vajtswv cov lus ua ke, mloog lus qhuab qhia thiab kawm los xij, kiag thaum nej npog phau ntawv uas hais txog Vajtswv cov lus thiab tawm ntawm nej qhov chaw sib tham mus lawm, ces tej ntawd tsis tshuav dab tsi nyob rau hauv nej lub siab li lawm. Tsis muaj Vajtswv cov lus ib lo, tsis muaj ib lo lus uas hais txog qhov tseeb nyob rau hauv nej lub siab li lawm. Qee zaus nej sau Nws cov lus rau hauv ib phau ntawv, tiam sis tsis khaws cov lus ntawd rau hauv nej lub siab li, thiab tib ntsais muag xwb nej hnov qab txhua yam lawm. Tsis tas li ntawd xwb, nej yeej tsis ua tib zoo xav txog qhov tseeb ntawm Vajtswv txoj lus nyob rau hauv nej lub neej txhua hnub li. Nyob rau hauv txoj kev ua nej tes dej num ntawd, nej yeej tsis nrhiav qhov tseeb tej hauv paus ntsiab lus. Txawm nej ntsib tej kev nyuaj dab tsi los xij, nej siv tus cwj pwm uas lam taus lam ua xwb. Tab txawm thaum tab tom raug qhuab qhia los, nej yeej tsis thov Vajtswv los sis nrhiav qhov tseeb li. Nyob rau hauv qhov no, nej yeej tsis txawv cov tsis ntseeg li. Nej twb ntseeg Vajtswv tau ntau xyoo lawm, tiam sis tsis muaj txoj kev to taub lub neej txoj sia los sis qhov tseeb qhov muaj tiag kiag li. Nej txoj kev ua dej num ntawd tsuas yog kev ua hauj lwm xwb, thiab nej qhov kev npaj siab yog los muab qhov kev ua hauj lwm uas zoo li no coj los pauv tej koob hmoov ntawm lub nceeg vaj saum ntuj ceeb tsheej xwb. Hais txog qhov no, yeej muaj tseeb. Txoj kev ntseeg Vajtswv li no, nws nyuaj rau nej los nkag rau hauv qhov tseeb qhov muaj tiag, nyuaj uas yuav tau txais txoj sia thiab qhov tseeb. Nyob rau ntawm nej, mas muaj cov uas muaj peev xwm zoo, tiam sis txawm lawv txoj kev ntseeg twb ntseeg tau kaum tawm xyoo lawm los, lawv tsuas hais tau ob peb lo lus thiab cov lus qhuab qhia xwb, thiab lawv nres rau ntawm cov lus thiab cov lus qhuab qhia uas ntiav ntiav ntawd lawm. Lawv txaus siab rau txoj kev to taub me ntsis txog cov lus qhuab qhia ntawd lawm thiab xav hais tias cia li ua raws li tej kev cai tswj xwb es txaus lawm. Nws yuav nyuaj rau lawv uas mus kom tob zog. Yog li ntawd tib neeg lub siab tsis tau sim kom to taub qhov tseeb li, lawv thiaj li nkag tau mus rau hauv qhov tseeb qhov muaj tiag ntawd tsawg tsawg xwb. Yam uas lawv ua tau ces yog ua raws li qee txoj kev cai tswj xwb. Yog muaj neeg nug nej hais tias nej yuav tsum xyaum ua qhov tseeb li cas nyob rau hauv txoj kev ua nej tes dej num, mas tej zaum nej yuav hais tias, “Thov Vajtswv kom ntau ntxiv, txaus siab hlo txais kev txom nyem, thaum ua nej tes dej num ntawd tsis txhob tub nkeeg los sis lam taus lam ua, ua raws li tej hauv paus ntsiab lus, thiab ua raws li Vajtswv tsev neeg hais raws li Vajtswv tsev neeg cheem tsum.” Nej muaj peev xwm tham txog yam nyob rau sab nraud, cov lus qhuab qhia uas hais txog txoj kev ua nej tes dej num, tiam sis hais txog qee yam teeb meem tseem ceeb uas muaj feem xyuam rau qhov tseeb tej hauv paus ntsiab lus ntawd, nej tsuas to taub me me xwb. Qhov no qhia tau hais tias tib neeg feem coob tsuas to taub lub ntsiab lus ncaj ncaj ntawm qhov tseeb xwb, tiam sis tsis to taub qhov muaj tiag ntawm qhov tseeb li. Yog li ntawd, lawv yeej tsis to taub qhov tseeb kiag li. Tej zaum cov tib neeg uas tsis to taub qhov tseeb yuav hais qee cov lus thiab cov lus qhuab qhia txog qhov tseeb, tiam sis puas tsim nyog peb suav hais tias lawv tau txais qhov tseeb lawm? (Yeej tsis tsim nyog suav li.) Yog li ntawd, nej yuav tsum mob siab rau dab tsi nyob rau yav tom ntej? Nej yuav tsum coj ib lub neej ntawm sab ntsujplig uas ib txwm muaj, thov Vajtswv, pe hawm Vajtswv, noj thiab haus Vajtswv cov lus, mloog lus qhuab qhia, thiab hu nkauj qhuas Vajtswv. Ib qho ntxiv rau txoj kev ua raws li tej kev xyaum ua uas nyob rau sab nraud no, nej yuav tsum tsis txhob tso nej tes dej num tseg, tiam sis nej yuav tsum ua tes dej num ntawd kom zoo. Kuj muaj qhov uas tseem ceeb tshaj plaws rau nej to taub thiab xws li: Yog nej xav caum qhov tseeb, yog nej xav to taub thiab tau txais qhov tseeb, mas nej yuav tsum kawm seb yuav nyob twj ywm rau ntawm Vajtswv lub xub ntiag li cas, yuav xav txog qhov tseeb li cas, thiab yuav xav txog Vajtswv cov lus li cas. Puas muaj cov kev coj rau txoj kev xav thaum xav txog qhov tseeb? Puas muaj ib txoj kev cai tswj li? Puas muaj lub sij hawm txwv li? Puas yog koj yuav tsum xav nyob rau qee qhov chaw xwb? Tsis yog—nej tuaj yeem xav txog Vajtswv cov lus nyob rau lub sij hawm twg los tau los sis qhov chaw twg los tau. Muab lub sij hawm uas nej pheej siv los nyob dawb los sis ua npau suav nruab hnub ntawd los ua tib zoo xav txog Vajtswv cov lus thiab qhov tseeb, kom thiaj li tsis nkim lub sij hawm hnub ntawd. Tib neeg nkim lub sij hawm li cas? Lawv siv lawv lub sij hawm los sib tham pem, ua yam uas muaj txiaj ntsim rau lawv, los sis raus tes rau tej yam uas tsis tseem ceeb uas tsis muaj dab tsi cuam tshuam rau qhov tseeb li, thiab thaum lawv tsis muaj dab tsi ua, mas lawv xav txog yam uas tsis muaj qab hau thiab yam uas twb tshwm sim lawm xwb. Lawv xav hauv nruab siab tias yav tom ntej yuav zoo li cas, lub nceeg vaj yav tom ntej yuav nyob rau qhov twg thiab lub ntuj tawg nyob rau qhov twg, thiab ntau yam ntxiv. Tej no tsis yog tej uas tsis tseem ceeb lod? Yog nej siv lub sij hawm no rau yam zoo—yog nej nyob twj ywm rau ntawm Vajtswv lub xub ntiag, siv sij hawm los xav txog Vajtswv cov lus thiab kawm txog qhov tseeb kom ntau ntxiv, saib nej txhua txhua qhov kev ua kom meej, thiab muab tej kev ua ntawd tso rau ntawm Vajtswv lub xub ntiag kom Nws tshawb xyuas kom meej; yog tom qab ntawd nej thim xav seb tej teeb meem uas tseem daws tsis tau tau nyob rau hauv nej ntawd yog dab tsi thiab tej kev nyuaj uas tseem tsis tau daws nyob rau hauv txoj kev ua nej tes dej num ntawd yog dab tsi, thiab seb nej cov moj yam qias vuab tsuab uas pheej nthuav tawm—tshwj xeeb yog cov uas ntxeev siab rau Vajtswv tshaj plaws thiab phem tshaj plaws ntawd—twb daws tau los ntawm txoj kev nrhiav qhov tseeb hauv Vajtswv cov lus lawm los tsis tau; yog ib ntus xwb twb daws tau tag nrho tej teeb meem no lawm, ces nej yuav maj mam nkag tau mus rau hauv qhov tseeb qhov muaj tiag.

Yuav ua li cas xyaum ua tib zoo xav txog Vajtswv cov lus? Ua ntej tshaj plaws, xav thiab kawm txog cov lus ntawm sab ntsujplig thiab tej kev nthuav tawm uas koj nquag siv tas li. Nug koj tus kheej hais tias: “Tej zaum kuv paub hais tias tej no txhais li cas yam ncaj ncaj thiab raws li kev xav xwb, tiam sis qhov muaj tiag ntawm tej no yog dab tsi? Qhov muaj tiag no muaj dab tsi? Kuv yuav ua li cas es thiaj li muaj qhov muaj tiag uas tej kev nthuav tawm ntawm sab ntsujplig ntawd hais txog? Kuv yuav tsum pib xyaum ua qhov muaj tiag ntawd ntawm qhov twg es thiaj li nkag tau mus rau hauv qhov muaj tiag ntawd? Nov yog qhov uas koj yuav tsum ua tib zoo xav. Nov yog qhov pib ua tib zoo xav txog Vajtswv txoj lus. Qhov yuav to taub qhov tseeb thiab muab qhov tseeb coj los xyaum ua ntawd mas nyuaj yog tib neeg ntseeg Vajtswv tiam sis tsis tau xyaum los ua tib zoo xav txog Vajtswv cov lus li. Yog tib neeg tsis to taub qhov tseeb no, lawv nkag puas tau mus rau hauv qhov tseeb qhov muaj tiag? (Tsis tau.) Yog nkag tsis tau mus rau hauv qhov tseeb qhov muaj tiag no, tib neeg puas tau txais qhov tseeb? (Tsis tau.) Yog tsis tau txais qhov tseeb no, tib neeg ua puas tau raws li Vajtswv tej kev npaj siab? (Tsis tau.) Lawv ua tsis tau—qhov ntawd yeej muaj tseeb. Vim tib neeg tsis to taub qhov tseeb, lawv thiaj li ua neej raws li lawv tus moj yam qias vuab tsuab xwb, thiab lawv tawm tsam Vajtswv. Cov tib neeg zoo li no yuav ua li cas ua tau raws li Vajtswv tej kev npaj siab? Yeej ua tsis tau li. Yog li, tib neeg yuav ua li cas ua tib zoo xav txog Vajtswv cov lus? Piv txwv li, thaum koj xav txog cov lus uas pheej hais tias “hwm Vajtswv thiab zam kev phem” ntawd, qhov no yog qhov uas koj yuav tsum xav hais tias: Qhov hwm Vajtswv ntawd yog dab tsi? Qhov hais ib yam dab tsi yuam kev ntawd puas npaum nkaus li tsis hwm Vajtswv? Txoj kev hais lus zoo li no puas phem? Vajtswv puas suav tias yog kev txhaum? Tej kev ua twg uas yog kev phem? Kuv tej kev xav, tej kev npaj siab, tej tswv yim thiab tej kev xam pom, tej kev muaj siab thiab lub hauv paus ntawm kuv cov lus thiab tej kev ua, thiab ntau tus moj yam uas nthuav tawm nyob rau hauv kuv ntawd—tag nrho tej no puas mus raws li qhov tseeb? Tej no yam twg uas Vajtswv nyiam, thiab yam twg uas Nws ntxub? Yam twg uas Nws thuam? Qhov twg uas tib neeg nquag ua yuam kev loj? Tag nrho tej no puav leej tsim nyog ua tib zoo xav. Nws puas yog ib qho uas nej yuav tau xav txog qhov tseeb? (Peb tsis siv sij hawm ntau los xav txog qhov tseeb; feem ntau, peb lub hlwb tsis ua tib zoo xav.) Xav seb nej nkim sij hawm ntau npaum li cas tau ntau lub xyoo lawm! Nej xav txog tej yam uas ntsig txog qhov tseeb, txog txoj kev ntseeg Vajtswv, txog txoj kev to taub lub neej txoj sia, thiab txog txoj kev hwm Vajtswv thiab kev zam kev phem ntawd pes tsawg zaus? Nej puas tau xav txog tej no tiag tiag? Thaum nej ua tib zoo xav txog Vajtswv cov lus mus txog rau qhov uas to taub qhov tseeb thiab xyaum ua qhov tseeb ntawd raws li tej hauv paus ntsiab lus lawm, ces thaum ntawd yog thaum uas nej yuav pib pom cov txiv, thiab thaum ntawd yog thaum uas nej yuav muaj txoj kev to taub lub neej txoj sia. Nej tseem tsis tau paub tias yuav ua tib zoo xav txog Vajtswv cov lus li cas, thiab nej tseem tsis tau mus txog qhov uas to taub qhov tseeb. Nej tseem tsis tau nkag mus rau hauv lub neej. Nej yuav tsum tau siv zog tom qab qhov no es tsis txhob nkim nej lub sij hawm. Txawm tus tib neeg ntawd yuav laus npaum li cas los xij, tsuav tus tib neeg ntawd pib xav txog tias yuav ua lag luam li cas, yuav khwv noj khwv haus thiab txhawb nws tsev neeg li cas, yuav ua ib lub neej kom zoo li cas, yuav ua li cas rau lwm tus, nws lub neej yav tom ntej yuav zoo li cas, thiab ntau yam ntxiv xwb, ces qhov no txhais tau hais tias tus tib neeg no lub siab twb paub tab thiab nws twb pib ua ib lub neej uas muaj kev ywj pheej lawm. Tus tib neeg uas tsis xav txog tej no thiab yeej tsis tau xav txog tej no li ces yog tus uas tsis muaj kev xav los sis tsis muaj tej kev xam pom ntawm nws tus kheej. Lawv tsis tuaj yeem to taub tej no txog lub neej, yog li ntawd lawv yuav tsum vam khom rau lawv niam lawv txiv txog txhua yam. Lawv vam khom rau lawv niam lawv txiv txog nyiaj txiag siv, txog zaub mov noj, thiab txog khaub ncaws hnav. Yog lawv niam lawv txiv tsis saib xyuas lawv, mas lawv yuav txom nyem, tshaib plab, thiab tuag no. Tus tib neeg zoo li no nws nyob nws puas tau? Qhov no puas yog ib tug tib neeg paub tab? (Yeej tsis yog.) Tam sim no nej nyob rau theem twg? Nej puas tau mus txog theem neeg laus hauv nej txoj kev ntseeg? Tam sim no, yog tsis muaj leej twg los txhawb nej, yog tus Nyob Saud tsis qhuab qhuab nej, yog tsis muaj leej twg coj nej tiam sis cia nej noj nej thiab nej haus nej txog Vajtswv cov lus thiab nej mloog nej txog cov nkauj qhuas Vajtswv xwb no, nej puas yuav muaj peev xwm muaj txoj kev to taub lub neej txoj sia? Nej puas yuav muaj peev xwm xyaum ua qhov tseeb, ua nej tes dej num kom zoo, thiab ua raws li tej hauv paus ntsiab lus? (Tsis muaj.) Ntawm no yog qhov teeb meem. Qhov no txhais tau hais tias nej lub siab tseem me heev. Nej twb ua tsis tau nej tes dej num kom zoo thiab twb tseem mus tsis tau txog qhov yog neeg laus. Nyob rau niaj hnub tam sim no mas, yog ib tug tib neeg twg coj thiab saib xyuas nej, mas nej thiaj li ntseeg tau Vajtswv thiab ua tau nej tes dej num xwb. Nej muaj txoj kev ntseeg zoo ib yam li tus tib neeg ntawd txoj kev ntseeg. Tiam sis yog yav tom ntej tsis muaj leej twg coj nej lawm no, qhov ntawd yuav tsis qhia tawm hais tias nej sawv tau khov kho thiab ua tau nej tes dej num zoo, thiab tias nej tau txais qhov tseeb qhov muaj tiag ntau npaum li cas lod? Yog nej tsis paub hais tias nej tsis muaj qhov tseeb qhov muaj tiag ib qho mus txog rau thaum lub sij hawm ntawd los txog li no, qhov ntawd tsis txaus txhawj xeeb lod? Nws yog ib qho phom sij heev! Thaum koj raug tej kev sim siab, koj yuav tsis paub tias yuav tuav koj tej lus tim khawv kom khov kho li cas, thiab koj yuav tsis paub tias yuav ua kom tau raws li Vajtswv tej kev npaj siab ntawd li cas. Koj yuav tsis muaj hauv kev, tsis muaj txoj kev taug nyob rau hauv koj lub siab, thiab tsis muaj qhov tseeb yuav cog qhov tseeb lub hauv paus rau hauv koj. Yog li, koj yuav ua li cas es thiaj li sawv tau khov kho? Yog koj tsis muaj qhov tseeb qhov muaj tiag, ces koj yuav muaj teeb meem thaum koj ntsib tej kev sim siab. Thaum koj ntsib cov thawj coj cuav los sis cov tawm tsam Khetos uas ua kev pham thiab ua txhua yam los cuam tshuam pawg ntseeg tes hauj lwm ntawd, koj yuav tsis muaj peev xwm paub tias lawv yog leej twg thiab khiav kom dim ntawm lawv txhais tes. Yog koj tseem raws cov thawj coj cuav thiab cov tawm tsam Khetos qab thiab, ces koj yuav muaj teeb meem. Ob lo lus nug no yuav muab koj nthuav tawm, thiab koj yuav nyob rau qhov phom sij uas raug muab tshem tawm mus. Yog li ntawd, txoj kev ntseeg Vajtswv ntawd koj yuav tsum tau ua tib zoo xav txog Vajtswv txoj lus thiab xav txog qhov tseeb tas li li. Ua li no mas koj thiaj li yuav nkag tau mus rau hauv qhov tseeb qhov muaj tiag thiab tau txais qhov tseeb.

Tam sim no, puas muaj ntau yam kev sim siab rau cov tib neeg uas nyob rau lub neej no? Kev sim siab nyob ib puag ncig koj txhua sab txhua seem, txhua yam kev phem tam sim no, txhua yam kev hais lus, txhua yam kev xav thiab kev xam pom, txhua yam kev dag thiab kev ntxias los ntawm txhua hom tib neeg, txhua lub ntsej muag phem uas txhua hom tib neeg muaj. Tej no puav leej yog tej kev sim siab uas koj ntsib. Piv txwv li, tej zaum tib neeg yuav txhawb koj, ua rau koj nplua nuj, ua phooj ywg nrog koj, mus nrog koj ua si, muab nyiaj rau koj, muab hauj lwm rau koj ua, caw koj mus seev cev, ntsia ntsoov koj, los sis muab khoom plig rau koj. Tag nrho tej no tej zaum yuav yog tej kev sim siab. Yog txhua yam mus tsis zoo, ces koj yuav mag ntxiab. Yog koj tsis muaj qee qhov tseeb nyob rau hauv nruab siab thiab tsis muaj ib qho kev loj hlob tiag tiag li, ces koj yuav tsis muaj peev xwm pom tej no tias tej no zoo li cas, thiab tej no yuav puav leej yog rooj ntxiab cuab koj thiab yog tej kev sim koj siab xwb. Ib qho mas yog, yog koj tsis muaj qhov tseeb, ces koj yuav tsis muaj peev xwm pom tias Ntxwgnyoog tej tswv yim dag zoo li cas, thiab koj yuav tsis muaj peev xwm pom txhua hom neeg lub ntsej muag phem. Koj yuav tsis muaj peev xwm kov yeej Ntxwgnyoog, ntxeev siab rau lub cev nqaij daim tawv, thiab zwm rau Vajtswv. Hos lwm qhov mas yog, yog tsis muaj qhov tseeb, ces koj yuav tsis muaj peev xwm tawm tsam txhua yam kev phem tam sim no, tej kev xam pom uas phem, thiab tej kev xav thiab tej lus hais uas tsis muaj tseeb. Thaum ntsib tej no, nws yuav zoo li cia li no kiag tam sid. Tej zaum koj tsuas yog tau khaub thuas, los sis tej zaum qee yam hnyav me ntsis xwb—tej zaum koj haj tseem yuav tuag no thiab.^[a] Tej zaum koj yuav poob koj txoj kev ntseeg tag nrho. Yog koj tsis muaj qhov tseeb, ces tsuas yog ob peb los lus los ntawm Ntxwgnyoog thiab cov dab phem uas nyob rau ntawm cov tsis ntseeg lub ntiaj teb los xwb yuav ua rau koj paub tsis meej thiab tsis meej pem lawm. Koj yuav nug tias puas tsim nyog koj ntseeg Vajtswv los tsis tsim nyog thiab txoj kev ntseeg zoo li no puas yog lawm. Tej zaum yuav yog, qhov kev pe hawm hnub no, koj kaj siab, tiam sis tag kis, koj mus tsev mus saib ob ntu kev ua yeeb yam hauv this vis. Ces koj raug ntxias mus lawm. Thaum tsaus ntuj, koj tsis nco qab thov Vajtswv ua ntej pw, thiab koj lub siab raug qhov kev ua yeeb yam dag hauv this vis ntawd tswj kav tag nrho li lawm. Yog koj saib this vis li ob hnub ntxiv, koj lub siab twb nyob deb ntawm Vajtswv lawm. Koj yuav tsis xav nyeem Vajtswv txoj lus los sis kawm txog qhov tseeb li lawm. Koj haj tseem tsis xav thov Vajtswv li lawm thiab. Nyob rau hauv koj lub siab mas, koj pheej hais tias, “Thaum twg kuv thiaj li mam ua tau ib yam dab tsi? Thaum twg kuv thiaj li mam pib tau qee qhov uas tseem ceeb? Kuv lub neej yuav cia li tsis muaj qab hau tsis tau!” Qhov ntawd puas yog ib qho kev hloov siab? Thaum xub thawj, koj xav to taub txog qhov tseeb kom ntau ntxiv kom koj thiaj li tshaj tawm tau txoj moo zoo thiab ua tau tim khawv rau Vajtswv. Vim li cas tam sim no koj hloov lawm? Vim qhov saib yeeb yaj kiab thiab this vis xwb, es koj thiaj li cia Ntxwgnyoog los tswj koj lub siab lawm. Koj lub siab me dhau lawm. Koj puas xav tias koj muaj lub siab los tawm tsam cov kev phem uas tshwm tuaj no? Tam sim no Vajtswv muab txoj hmoov hlub rau koj thiab coj koj los rau hauv Nws lub tsev los ua koj tes dej num. Tsis txhob hnov qab koj lub siab. Tam sim no, koj yog ib lub paj uas nyob rau hauv ib lub tsev cog khoom, uas tiv tsis tau cov cua thiab cov nag uas nyob rau sab nraud. Yog tib neeg tsis paub thiab tiv tsis tau tej kev sim siab no, ces Ntxwgnyoog tuaj yeem coj lawv mus ua qhev lub sij hawm twg los tau, nyob rau qhov chaw twg los tau. Qhov zoo li no yog tib neeg lub siab uas me thiab tus yam ntxwv uas txaus hlub. Thaum koj tsis muaj qhov tseeb qhov muaj tiag thiab tu ncua kev to taub txog qhov tseeb, ces Ntxwgnyoog txhua lo lus yog tshuaj lom koj xwb. Yog koj cuab pob ntseg mloog cov lus ntawd, ces cov lus ntawd yuav daig rau hauv koj lub siab yam tshem tsis tau tawm mus li. Hauv koj lub siab, koj hais tias, “Kuv yuav npog kuv ob lub pob ntseg thiab qi kuv ob lub qhov muag,” tiam sis koj yeej khiav tsis dim Ntxwgnyoog txoj kev sim siab li. Koj nyob tsis tau ib leeg. Yog koj hnov Ntxwgnyoog cov lus, koj yuav tawm tsam tsis tau. Koj yuav mag ntxiab. Koj cov lus thov Vajtswv thiab cov lus foom tsis zoo rau koj tus kheej ntawd yuav tsis muaj txiaj ntsim lawm. Koj tawm tsam tsis tau. Tej yam zoo li no tuaj yeem haub ntxias koj tej kev xav thiab haub ntxias koj tej kev ua. Cov lus ntawd thaiv tau txoj kev uas koj caum qhov tseeb. Cov lus ntawd haj tseem tswj koj, thaiv koj tsis pub muab koj tus kheej fij rau Vajtswv, ua rau koj xav phem thiab qaug zog, thiab ua kom koj txav deb ntawm Vajtswv thiab. Thaum kawg, koj yuav tsis muaj nqis thiab tsis muaj kev cia siab rau txhua yam li lawm.

Tam sim no koj xav hais tias koj ua lub siab ncaj ncees rau Vajtswv. Koj muaj lub hom phiaj, qhov kev txiav txim siab, thiab qhov kev xav ua kom Vajtswv txaus siab. Tiam sis koj yuav ua li cas thaum koj raug Vajtswv tej kev sim siab? Koj hais tias koj mam li lees txais, tiam sis thaum Vajtswv muab ib qho nyuaj nyuaj tso rau ntawm koj hauv ntej uas tsis mus raws li koj tej kev xav phem thiab tej kev ntshaw no, koj yuav ua li cas thaum koj zwm tsis tau rau Nws ntawd? Thaum Vajtswv muab nqi zog rau tib neeg, mas qhov nqi zog ntawd haum rau lawv tej kev tim tsum ntawm txoj kev xav ntawm siab ntsws thiab mus raws li lawv tej kev xav phem thiab tej kev xav tau, kom tib neeg thiaj li zwm tau rau Nws. Tiam sis thaum Vajtswv muab ib yam dab tsi ntawm koj mus lawm, koj yuav ua li cas? Koj puas tuaj yeem tuav tau koj tej lus tim khawv kom khov kho nyob rau hauv Vajtswv tej kev sim siab thiab nyob rau hauv cheeb tsam uas Nws tau npaj tseg rau koj lawm? Qhov no puas yuav yog ib qho teeb meem? Thaum koj hais tias, “Kuv yeej yuav tuav kuv tej lus tim khawv kom khov kho,” ces koj cov lus ntawd yog kev khav theeb, kev tsis paub qab hau, kev tsis paub dab tsi, thiab kev ruam xwb. Koj puas paub tias Vajtswv xav ua li cas rau koj? Koj puas paub tias vim li cas Vajtswv thiaj li xav sim koj? Yam nyob rau hauv koj uas Nws xav muab nthuav tawm ntawd yog dab tsi? Koj hais tias, “Kuv muaj qhov txaus siab hlo los raug kev txom nyem, kuv npaj txhij lawm, kuv tsis ntshai tej kev sim siab uas tej zaum Vajtswv yuav cia los sim kuv ntawd ib qho li,” tiam sis tom qab ntawd muaj qee yam tshwm sim kiag tam sim ntawd uas koj yeej xav tsis txog, qee yam uas koj yeej tsis tau npaj rau li. Yog li qhov koj npaj ntawd muaj txiaj ntsim dab tsi? Tsis muaj kiag li. Muab hais tias koj yeej ib txwm noj qab nyob zoo. Koj ua koj tes dej num tau ntau xyoo thiab Vajtswv tiv thaiv koj tsis pub muaj ib qho mob li. Txoj kev uas koj taug mas mus tau zoo heev. Ua cas, muaj ib hnub koj mus kuaj na has kws kho mob pom qee tus mob txawv txawv, uas tom qab ntawd lawv pom hais tias yog ib tug mob uas loj kawg nkaus lawm. Hauv koj lub siab, mas qhov ntawd cuag nkaus li ib lub zog uas tau muab tus dej loj tig mus rau lwm qhov thiab muab tus dej hiav txwv loj ntxeev npaus kiag lawm. Koj hais tias, “Cov kwv tij thiab cov muam hauv pawg ntseeg tsis muaj ib tug muaj tus mob no li.” “Kuv yog tus ntseeg Vajtswv ntev tshaj plaws, rau siab ua kuv tes dej num tshaj plaws, thiab raug kev txom nyem tshaj plaws. Yog ua cas kuv thiaj li muaj tus mob no?” Tom qab xav txog qhov no lawm, koj mam li paub hais tias qhov no yuav tsum yog ib qho kev sim siab los ntawm Vajtswv xwb yog li ntawd koj yuav tsum lees txais. Tam sim no, koj tseem muaj txoj kev ntseeg los thov Vajtswv. Tiam sis tom qab koj thov Vajtswv li ib ntus lawm es tseem tsis zoo li thiab, ces koj txiav txim siab hais tias, “Qhov no yog Vajtswv cia kuv tuag. Vajtswv xav muab kuv txoj sia rho tawm mus!” Tam sim no koj puas tseem yuav zwm rau Vajtswv? (Tsis tshua zwm lawm.) Koj yuav quaj hais tias, “Kuv tus Vajtswv! Kuv tsis xav tuag. Kuv ua neej nyob tseen tsis tau txaus. Kuv tseem hluas. Kuv nyuam qhuav ua kuv lub neej txog nrab xwb. Thov muab ob peb xyoos rau kuv ntxiv. Tseem muaj ntau yam uas kuv ua tau thiab!” Qhov thov kom Vajtswv kho koj ntawd tsis muaj txiaj ntsim lawm. Txawm yuav kuaj koj pes tsawg zaus los, tej ntawd yuav qhia tias koj tus mob twb mob txog qhov kawg lawm. Kho los, koj yeej yuav tuag. Tsis kho los, koj yeej yuav tuag. Yog li koj yuav ua li cas? Muaj ntau zaus, thaum Vajtswv sim tib neeg, mas lawv pib xav hais tias Vajtswv tej kev ua yeej yog thiab zoo lawm, tiam sis thaum pom qhov xaus tseeb lawm, lawv xav hais tias, “Tej zaum Vajtswv yeej xav kom kuv tuag tiag tiag. Yog Vajtswv xav kom kuv tuag, ces cia kuv tuag xwb!” Yog li ntawd lawv cia li nyob twj ywm tos tuag yam tsis muaj kev cia siab li lawm. Hom cwj pwm uas tos tuag zoo li no yog hom cwj pwm dab tsi? Puas muaj ib qho kev zwm rau nyob rau hauv tus cwj pwm no li? (Tsis muaj, tsuas muaj qhov lees txais txoj hmoo xwb.) Cov tib neeg zoo li no puas kam tuag tiag tiag? (Lawv tsis kam.) Yog li ntawd vim li cas lawv thiaj li tos tuag? Thaum txoj kev tuag los txog lawm, lawv tsis muaj kev xaiv lawm ces thiaj li kawg tuag lawm xwb. Yog lawv tsis muaj kev xaiv lawm, lawv thiaj li lees txais txoj kev tuag ntawd lawm xwb. Qhov “kev lees txais” no yog ib tug cwj pwm uas tawm tsam twj ywm, tsis yog ib qho kev ua tim khawv. Ib txhia tib neeg hais tias, “Vajtswv cia kuv tuag, yog li ntawd kuv tseem yuav tau ua tim khawv dab tsi ntxiv thiab?” Txawm Vajtswv cia koj tuag los, tsis yog Vajtswv tsim koj lod? Koj puas yuav tso koj tes dej num tseg? Koj ua puas tau tiav koj tes dej num? Koj ua puas tau koj tes dej num zoo? Koj yuav tsum muaj lub siab zoo li cas es thiaj li tuav tau tej lus tim khawv kom khov kho li yog ib tug neeg uas raug tsim tawm los? (Cia kuv hais txog kuv txoj kev ntsib kev pom. Ob peb hnub dhau los no, kuv mob hniav heev ua rau kuv pw tsis tsaug zog tau peb hnub vim qhov mob ntawd. Txawm li ntawd los kuv tseem yuav tsum tau ua kuv tes dej num txhua hnub thiab. Qhov mob uas mloog tsis tau hauv kuv lub taub hau ntawd mas ua rau kuv yuav luag nyiaj tsis taus li. Kuv yws me ntsis hauv kuv lub siab. Kuv xav hais tias kuv twb ua kuv tes dej num zoo heev li lawm, yog li ntawd vim li cas qhov no thiaj li tshwm sim rau kuv? Thaum lub sij hawm ntawd, kuv xav hais tias kuv tsis to taub Vajtswv qhov kev npaj siab. Cov kwv tij thiab cov muam qee tus thov kom kuv thim xav kom paub kuv tus kheej, yog li ntawd kuv thiaj li thov Vajtswv thiab nrhiav Vajtswv tas li. Kuv tsis pom tias kuv twb tau ntxeev siab rau Vajtswv nyob rau hauv txhua yam lawm. Tom qab ntawd, kuv xav txog Yauj cov lus uas hais rau nws tus poj niam thaum nws raug tej kev sim siab ntawd uas hais tias, “Peb yuav tau txais qhov zoo ntawm Vajtswv txhais tes thiab peb yuav tsis tau txais qhov phem los?” (Yauj 2:10). Yauj muaj peev xwm ua tim khawv rau Vajtswv thaum nws raug tej kev sim siab. Kuv xav txog kuv tus kheej thiab pom hais tias kuv qhuas Vajtswv thaum txhua yam zoo rau kuv, tiam sis xav phem thiab tawm tsam Vajtswv thaum muaj kev txom nyem. Kuv xav hais tias qhov no tsis yog txoj kev ua ib tug neeg raug tsim tawm los uas tsim nyog, thiab nyob rau lub sij hawm no, kuv lub siab uas txawj xav ntawd tawg tag li lawm. Kuv muaj lub siab xav los ntxeev siab rau lub cev nqaij daim tawv es ua kom Vajtswv txaus siab. Kuv xav hais tias, tab txawm yog kuv muaj mob los xij, kuv tseem yuav tsum tau zwm rau Vajtswv. Txawm yuav mob npaum twg los kuv yuav tsum txaus siab hlo ua kuv tes dej num mus ntxiv. Qhov no yog kuv tus kheej txoj kev ntsib kev pom.) Tsis hais tias yuav muaj dab tsi tshwm sim rau koj li, koj yuav tsum los rau ntawm Vajtswv xub ntiag—qhov no yog qhov yog. Koj yuav tsum tig rov xav txog koj tus kheej thiab tsis tab kaum txoj kev ua koj tes dej num. Tsis txhob tig rov xav txog tus kheej nkaus xwb es yeej tsis ua koj tes dej num li—qhov ntawd tsis yog lawm. Txawm hais tias muaj kev sim siab dab tsi raug rau koj los xij, koj yuav tsum muab saib li hais tias ntawd yog ib lub nra uas Vajtswv muab rau koj. Piv txwv tias muaj qee tus neeg raug kev mob nkeeg hnyav heev thiab muaj kev txom nyem loj uas yuav uv tsis taus, qee tus haj tseem ntsib kev ploj tuag thiab. Lawv yuav tsum saib rau tej xwm txheej no li cas? Hauv ntau kis, Vajtswv tej kev sim siab mas yog lub nra hnyav uas Nws muab rau tib neeg. Txawm lub nra hnyav uas Vajtswv tau muab rau koj ntawd yuav hnyav npaum li cas los xij, qhov ntawd yog qhov hnyav ntawm lub nra koj yuav tsum ris, vim Vajtswv to taub koj, thiab yeej paub tias koj muaj peev xwm ris taus lub nra hnyav ntawd. Lub nra uas Vajtswv muab rau koj ntawd yuav tsis pub tshaj koj lub siab los yog dhau ntawm koj kev nyiaj tiv taus, yog li tsis txhob nug tias koj puas yuav muaj peev xwm tiv taus qhov ntawd. Txawm hais tias Vajtswv yuav muab lub nra twg, hom kev sim siab twg rau koj los xij, nco ntsoov ib yam: Txawm tias koj yuav to taub los sis tsis to taub Vajtswv txoj kev xav thiab txawm tias koj yuav raug los sis tsis raug qhia kom paub thiab raug qhia kom paub qhov tseeb los ntawm Vajntsujplig thaum koj thov Vajtswv, txawm tias qhov kev sim siab no yog los sis tsis yog Vajtswv kev qhuab qhia koj los sis kev ceeb toom koj los xij, yeej tsis ua li cas yog tias koj tsis to taub. Tsuav yog tias koj tseem tsis tsum qhov ua tes dej num uas koj yuav tsum tau ua thiab ua koj tes dej num yam ncaj ncees hlo xwb, ces Vajtswv yeej txaus siab lawm, thiab koj yuav sawv ruaj nreeg hauv koj txoj kev hais lus tim khawv. Pom tias lawv tab tom raug kev txom nyem los ntawm kev mob nkeeg hnyav thiab yuav tuag mus, qee tus neeg xav rau lawv tus kheej tias: “Kuv pib mus ntseeg Vajtswv kom zam dhau txoj kev tuag xwb—tab sis tom qab kuv twb ua kuv tes dej num los tau ntau xyoo no lawm los ua cas Vajtswv tseem cia kuv tuag thiab. Kuv tsim nyog mus khiav kuv tus kheej txoj lag luam thiab hnov qab txog qhov kev ua kuv tes dej num.” Nov yog tus cwj pwm dab tsi? Koj tau ua koj tes dej num los tau ntau xyoo lawm, koj tau mloog txhua cov lus qhuab qhia no, tab sis koj tseem tsis tau to taub txog qhov tseeb kiag li. Ib qho kev sim siab xwb twb ua rau koj ntog, ua rau koj txhos caug, qhia koj tshwm. Ib tug neeg zoo li no puas tsim nyog raug saib xyuas los ntawm Vajtswv mas? Lawv tsis muaj siab npuab kiag li. Yog li tes dej num lawv tau ua los tau ntau lub xyoo no hu li cas? Nws hu ua “kev ua dej num,” thiab lawv tsuas yog siv zog rau lawv tus kheej xwb. Yog tias, nyob hauv koj txoj kev ntseeg Vajtswv thiab kev nrhiav qhov tseeb, koj muaj peev xwm hais tias, “Txawm tias Vajtswv yuav cia yam kev mob nkeeg los sis tej xwm txheej tsis pom zoo dab tsi raug rau kuv los xij peem—txawm hais tias Vajtswv yuav ua li cas los xij—kuv yuav tsum mloog lus, thiab nyob twj ywm tam li ib tug raug tsim tawm los. Ua ntej tshaj plaws, kuv yuav tsum muab qhov tseeb—kev mloog lus no—coj los xyaum ua, kuv ua kiag, thiab ua lub neej raws nraim li qhov uas muaj tseeb ntawm kev mloog Vajtswv lus. Ntxiv mus, kuv yuav tsum tsis txhob muab yam uas Vajtswv tau txib kuv ua thiab tes dej num uas kuv yuav tsum ua pov tseg. Txawm yog thaum kuv txoj pa kawg kiag lawm los, kuv yuav tsum ua raws li kuv tes dej num.” Qhov no tseem tsis yog hais lus tim khawv thiab lod? Thaum koj muaj hom kev txiav txim siab thiab tus yam ntxwv zoo li no lawm, ua koj puas tseem muaj peev xwm yws tau Vajtswv lawm mas? Tsis muaj, koj tsis muaj peev xwm yws lawm. Nyob rau thaum lub sij hawm ntawd, koj yuav tsum xav rau koj tus kheej tias, “Vajtswv muab txoj pa no rau kuv, Nws tau pab cuam kuv los tau ntau lub xyoo no, Nws tau tshem ntau yam mob tawm ntawm kuv mus, muab ntau qhov hmoov hlub, thiab ntau yam tseeb rau kuv. Kuv tau to taub ntau qhov tseeb thiab ntau cov lus zais tob uas tib neeg tsis tau to taub los tau ntau tiam neeg lawm. Kuv tau txais ntau yam los ntawm Vajtswv los, yog li kuv yuav tsum them rov qab rau Vajtswv! Ua ntej ntawd, kuv lub siab me dhau heev lawm, kuv tsis to taub dab tsi li, thiab txhua yam kuv ua mas yeej ua rau Vajtswv mob siab. Tej zaum Kuv yuav tsis muaj lwm lub hwv tsam los them rov qab rau Vajtswv nyob yav tom ntej lawm. Txawm kuv tshuav sij hawm npaum li cas los xij, kuv yuav tsum muab lub zog me me uas kuv muaj thiab ua yam uas kuv tuaj yeem ua tau rau Vajtswv, kom Vajtswv thiaj li pom tias ntau lub xyoo uas pab cuam kuv ntawd tsis nkim dawb, tab sis tau tawg paj txi txiv lawm. Cia kuv muab kev nplij siab rau Vajtswv, thiab tsis ua rau Nws mob siab los sis ua rau Nws tu siab ntxiv lawm.” Kev xav li no ne ho zoo li cas? Tsis txhob xav txog tias yuav cawm koj tus kheej los sis khiav kom dim tau li cas, es xav tias, “Thaum twg es qhov mob nkeeg no mam li zoo ne? Thaum nws zoo lawm, kuv yuav tsum ua kuv tes dej num kom zoo tshaj plaws thiab muab siab npuab. Kuv yuav muab siab npuab tau li cas thaum kuv tseem muaj mob? Kuv yuav ua tes dej num ntawm ib tug raug tsim tawm los tau li cas?” Tsuav yog tias koj muaj ib txoj pa xwb, puas yog koj tsis muaj peev xwm ua koj tes dej num lawm mas? Tsuav yog tias koj muaj ib txoj pa xwb, koj puas muaj peev xwm tsis txhob coj txoj kev txaj muag los rau Vajtswv mas? Tsuav yog tias koj ib txoj pa xwb, tsuav yog tias koj lub siab tseem feeb meej, koj puas muaj peev xwm tsis txhob yws txog Vajtswv mas? Nws yooj yim los hais tias “Yog” nyob rau tam sim no, tab sis nws yuav tsis yooj yim thaum qhov no tshwm sim rau koj tiag tiag. Yog li, nej yuav tsum nrhiav qhov tseeb, nquag sib zog ua hauj lwm rau qhov tseeb, thiab siv sij hawm kom ntau dua los xav tias, “Kuv yuav ua li cas thiaj li yuav ua tau zoo raws li Vajtswv txoj kev xav ne? Kuv yuav them Vajtswv txoj kev hlub rov qab li cas ne? Kuv yuav tuaj yeem ua tau tes dej num ntawm ib tug raug tsim tawm los li cas ne?” Ib tug raug tsim tawm los yog dab tsi? Puas yog lub luag hauj lwm ntawm ib tug raug tsim tawm los tsuas yog lam mloog Vajtswv cov lus xwb? Tsis yog—nws yog kom ua lub neej nyob raws nraim li Vajtswv cov lus. Vajtswv tau muab ntau qhov tseeb heev, ntau txoj hau kev heev, thiab ntau lub neej txoj sia heev rau koj lawm, es kom koj thiaj li ua lub neej nyob raws nraim li tej no, thiab hais lus tim khawv rau Nws. Qhov no yog yam uas tsim nyog ua kom tiav los ntawm ib tug neeg uas raug tsim tawm los, thiab qhov no yog koj lub luag hauj lwm thiab txoj hauj lwm. Koj yuav tsum ua tib zoo xav txog tej no tas li; yog koj pheej ua tib zoo xav txog tej no, mas koj yuav mus tau tob zog rau hauv txhua kis ntawm qhov tseeb.

Yog tib neeg tsis taug txoj kev uas caum qhov tseeb thiab tsis siv zog ua hauj lwm kom tau txais qhov tseeb, ces tsis ntev xwb lawv yuav dawm thiab ntog lawm. Qhov yuav sawv kom khov kho ntawd mas nyuaj vim tej teeb meem uas lawv ntsib ntawd daws tsis tau los ntawm qhov vam khom rau txoj kev paub thiab tej kev qhuab qhia uas lawv muaj me ntsis ntawd xwb. Txawm koj yuav txawj hais lus npaum li cas txog tej kev qhuab qhia ntawd los xij, koj yeej yuav daws tsis tau tej nyuaj tiag tiag li. Koj yuav tsum ua tib zoo xav txog ntau qhov tseeb tas li kom muaj kev paub tseeb. Tsuas yog thaum ntawd xwb koj thiaj li siv tau qhov tseeb los daws txhua yam teeb meem uas koj ntsib. Cov uas to taub qhov tseeb tiag tiag tsis tham txog lus thiab tej kev qhuab qhia. Lawv tuaj yeem thoob tsib to nrog txog txhua yam thiab pom tej ntawd tseeb heev, thiab lawv ua yam ruaj siab heev rau hauv txhua yam uas lawv ua. Yog koj tsis paub tias yuav nrhiav qhov tseeb hauv tej xwm txheej uas koj ntsib ntawd li cas thiab pheej ua raws li koj tus kheej lub siab nyiam xwb, ces yeej tsis muaj hnub uas koj to taub qhov tseeb li. Yuav kom to taub qhov tseeb mas, koj yuav tsum xav tias yuav siv qhov tseeb los daws tej teeb meem uas nyob rau hauv txoj kev ua koj tej dej num ntawd tas li xwb. Yog koj tsis ua tib zoo xav txog qhov no no, koj puas tuaj yeem tau txais qhov tseeb no? Yog koj tsis ua tib zoo xav txog Vajtswv cov lus, ces txawm koj yuav hnov lus qhuab qhia pes tsawg zaus, txawm koj yuav to taub tej kev qhuab qhia pes tsawg zaj, los koj yuav nyob rau qib ntawm cov lus thiab tej kev qhuab qhia ntawd tas li xwb. Yog koj paub tias yuav hais cov lus no thiab tej kev qhuab qhia no li cas, ces qhov no pheej dag koj kom xav hais tias koj txoj kev ntseeg Vajtswv mas twb txi txiv thiab qhov koj loj hlob ntawd twb siab heev li lawm, vim tam sim no koj kub siab thiab muaj zog heev. Tiam sis thaum ntsib qhov tiag tiag kiag lawm, thaum ntawd yog thaum uas raug tej kev sim siab thiab tej kev txom nyem, ces koj yuav pom hais tias cov lus thiab tej kev qhuab qhia no tiv thaiv koj me npaum li cas. Tej no tiv thais tsis tau koj ib qho kev sim siab li, tsis tas yuav hais txog qhov ua kom koj hla dhau txhua txhua qhov kev sim uas Vajtswv sim tib neeg ntawd. Tiam sis, koj yuav mloog zoo li cov lus thiab tej kev qhuab qhia no tau coj koj mus rau txoj kev puas tsuaj lawm. Nyob rau lub sij hawm zoo li no, koj yuav pom hais tias koj to taub qhov tseeb tsawg npaum li cas thiab pom tias koj twb tsis tau nkag mus rau hauv qhov tseeb qhov muaj tiag li. Feem ntau, thaum lawv raug tej kev sim siab thiab tsis pom txoj hauv kev mus rau tom ntej lawm, mas tib neeg mam li paub hais tias yog tsis muaj qhov tseeb ces pab tsis tau lawv li lawm thiab paub hais tias tag nrho lawv tej lus qhuab qhia ntawd mas tsis muaj txiaj ntsim npaum li cas. Tsuas yog thaum ntawd xwb lawv thiaj li pom hais tias lawv tu ncua ntau npaum li cas thiab lawv txaus hlub npaum li cas. Thaum txhua yam nyab xeeb thiab tsis muaj teeb meem, mas koj pheej xav hais tias koj to taub txhua yam lawm. Koj xav hais tias koj txoj kev ntseeg mas tsis yog tsis muaj qab hau thiab tias koj tau txais ntau yam heev los ntawm txoj kev ntseeg ntawd. Koj xav hais tias, txawm muaj dab tsi tshwm sim los xij, koj tsis tas yuav txhawj txog li. Tseeb tiag lawm, koj to taub ib co lus thiab ib co kev qhuab qhia uas tsis muaj qab hau kiag li. Thaum ntsib txoj kev puas tsuaj thiab kev puas ntsoog, ces koj tsis paub ua dab tsi, tsis paub tias yuav daws qhov xwm txheej ntawd li cas li lawm. Thaum thov Vajtswv, koj tsis paub tias yuav hais dab tsi los sis thov dab tsi. Koj nrhiav tsis tau txoj kev li lawm. Qhov no qhia hais tias tib neeg txaus hlub npaum li cas. Koj lub siab tsis muaj Vajtswv cov lus thiab koj tsis muaj Vajntsujplig Dawb Huv tes hauj lwm. Koj twb nyob rau hauv txoj kev tsaus ntuj lawm. Koj txoj kev ntseeg Vajtswv ua rau koj tsis tau dab tsi li, yog li ntawd tam sim no koj txom nyem zoo li ib tug neeg thov khawv lawm xwb. Tsuas yog thaum ntawd xwb koj thiaj li paub hais tias koj txoj kev ntseeg Vajtswv uas los tau npaum ntawd lub xyoo tsis muaj qhov tseeb qhov muaj tiag li. Tam sim no koj raug muab nthuav tawm tag nrho li lawm. Yog ntseeg Vajtswv tau ntau xyoo es ua rau koj zoo li no xwb, ces koj yeej yog yuav raug muab tshem tawm mus lawm.

Lub Ob Hlis 12, 2017

Lus taw qhia:

a. Khaub thuas, yog ib lo lus uas siv nyob rau hauv tshuaj Suav ntev los lawm uas yog hais txog qhov kev phom sij rau txoj sia uas ntxim yuav muaj hnyav heev, tus npaws uas yam sab nraud ua rau muaj ntawd.