Nqe Lus Uas Xaiv Tawm Los 61

Txhua tus tib neeg puav leej tau ua kev txhaum lawm, tsis hais loj los me. Thaum koj tsis paub tias qee yam yog ib txoj kev ua txhaum, ces koj yuav saib qhov ntawd los ntawm ib tug yam ntxwv uas pom tsis tseeb, thiab tej zaum koj tseem yuav tuav rawv rau koj tus kheej tej tswv yim, tej kev xyaum ua, thiab tej kev to taub txog qhov ntawd—tiam sis, muaj ib hnub, tsis hais los ntawm txoj kev nyeem Vajtswv cov lus, txoj kev sib qhia nrog koj cov kwv tij thiab cov muam, los sis los ntawm Vajtswv txoj kev qhia tshwm li, koj yuav kawm paub tias qhov no yog ib txoj kev ua txhaum, thiab ib txoj kev ua txhaum uas tawm tsam Vajtswv. Yog li thaum ntawd koj tus cwj pwm yuav zoo li cas? Koj puas tu siab tiag tiag, los sis koj puas yuav cam thiab cav, es tuav rawv rau koj tus kheej tej tswv yim, uas ntseeg hais tias txawm yam koj ua ntawd tsis mus raws li qhov tseeb los xij, qhov ntawd kuj tsis yog ib qho teeb meem loj thiab? Qhov no muaj feem ntsig txog rau tus cwj pwm uas koj muaj rau Vajtswv. Tus cwj pwm uas Davi muaj rau nws txoj kev ua txhaum yog dab tsi? (Tu siab.) Tu siab—uas txhais hais tias nws ntxub nws tus kheej nyob hauv nws lub siab, thiab yeej yuav tsis ua qhov kev txhaum ntawd dua li lawm. Yog li ntawd, nws ua li cas xwb? Nws thov Vajtswv, thov kom Vajtswv rau txim rau nws, thiab hais tias: “Yog kuv ua qhov no yuam kev dua, thov kom Vajtswv rau txim rau kuv thiab ua kom kuv tuag!” Qhov ntawd yog nws txoj kev txiav txim siab; qhov ntawd yog kev tu siab tiag tiag. Cov tib neeg dog dig ua puas tau qhov no? Rau cov tib neeg dog dig mas, yog hais tias lawv tsis tas zog cam los sis yog hais tias lawv cia li lees txhaum twj ywm xwb ces qhov ntawd xam tau hais tias yeej zoo lawm. Qhov tsis kam muab qhov teeb meem coj los hais dua vim ntshai tsam poob ntsej muag ntawd puas yog kev tu siab tiag tiag? Qhov poob ntsej muag ntawd ua rau ntxhov siab thiab chim siab xwb, tsis yog tu siab. Kev tu siab tiag tiag mas yog ntxub yus tus kheej uas tau ua phem, hnov mob siab thiab tsis kaj siab vim muaj peev xwm ua phem, liam rau yus tus kheej, thiab haj tseem foom phem rau yus tus kheej thiab. Qhov ntawd yog qhov muaj peev xwm cog lus tias tom qab ntawd yeej yuav tsis ua phem zoo li no mus ntxiv lawm thiab yeej yuav txaus siab hlo los lees txais Vajtswv txoj kev rau txim thiab los tiv txoj kev tuag uas nyuaj siab ntsuav yog hais tias lawv rov ua phem dua. Qhov no thiaj li yog kev tu siab tiag tiag. Yog ib tug tib neeg twg ib txwm xav rau hauv lawv lub siab tias lawv yeej tsis tau ua phem, thiab lawv tej kev ua ntawd tsuas yog tsis mus raws li cov hauv paus ntsiab lus los sis vim yog tsis muaj ib txoj kev ntse xwb, thiab lawv ntseeg hais tias yog lawv ua zais ntshis ces yeej tsis muaj dab tsi yuam kev li, qhov xav li no puas ua rau lawv muaj kev tu siab tiag tiag? Yeej tsis muaj kiag li, vim hais tias lawv tsis paub lub ntsiab tseeb ntawm lawv txoj kev ua phem. Txawm yog lawv tsis nyiam lawv tus kheej me ntsis los xij, lawv tsuas ntxub lawv tus kheej vim tsis muaj txoj kev ntse, thiab vim tswj tsis tau qhov xwm txheej ntawd zoo xwb. Lawv yeej tsis paub tias lub ntsiab uas lawv muaj peev xwm ua phem ntawd yog vim ib qho teeb meem ntawm lawv tus yam ntxwv lub ntsiab tseeb, qhov ntawd yog vim lawv tsis muaj txoj kev ua neeg, vim lawv tus moj yam phem, thiab vim txoj kev lim hiam. Cov tib neeg zoo li no yeej yuav tsis muaj kev tu siab tiag tiag. Vim li cas tib neeg thiaj li yuav tsum tau tig xav txog lawv tus kheej rau ntawm Vajtswv xub ntiag thaum lawv ua qee yam txhaum los sis ua kev txhaum lawm? Qhov no yog vim tias paub yus tus kheej tus yam ntxwv lub ntsiab tseeb ntawd mas tsis yooj yim. Qhov lees hais tias yus ua ib qho yuam kev thiab paub hais tias qhov yuam kev ntawd nyob rau qhov twg mas yooj yim. Txawm li cas los xij, qhov paub lub hauv paus ntawm qhov yus ua yuam kev thiab hom moj yam twg kiag uas raug nthuav tawm ntawd mas tsis yooj yim li. Yog li ntawd, thaum tib neeg feem coob ua qee yam txhaum lawm, lawv tsuas lees tias lawv ua txhaum lawm xwb, tiam sis lawv tsis tu siab nyob rau hauv lawv lub siab li, thiab lawv tsis ntxub lawv tus kheej li. Vim li no, lawv thiaj li tsis muaj txoj kev lees txim hloov dua siab tshiab tiag tiag. Yuav kom muaj tau txoj kev lees txim hloov dua siab tshiab mas, ib tug neeg twg yuav tsum muab txoj kev ua phem uas lawv tau ua lawm ntawd tso tseg thiab muaj peev xwm hais tau meej tseeb tias lawv yeej yuav tsis ua li ntawd dua lawm. Ces tsuas yog thaum ntawd xwb mas thiaj li muaj tau txoj kev lees txim hloov dua siab tshiab tiag tiag. Yog hais tias koj ib txwm daws teeb meem raws li koj tus kheej tej kev xav phem thiab tej kev xav hauv nruab siab xwb, yeej tsis tig xav txog los sis tsis paub koj tus kheej, thiab koj tsuas lam tau lam ua kom dhau xwb, ces koj tsis tau lees txim hloov dua siab tshiab thiab tsis tau hloov tiag tiag li. Yog hais tias Vajtswv xav muab koj nthuav tawm, koj yuav tsum daws qhov no li cas? Koj tus cwj pwm yuav zoo li cas? (Kuv yuav lees txais Vajtswv txoj kev rau txim.) Lees txais Vajtswv txoj kev rau txim—koj yuav tsum muaj hom cwj pwm no. Nyob rau tib lub sij hawm ntawd, koj yuav tsum lees txais Vajtswv txoj kev tshawb xyuas kom meej. Qhov ua li ntawd mas zoo dua, kom koj thiaj li paub tau koj tus kheej tiag tiag thiab lees txim hloov dua siab tshiab tau tiag tiag. Yog hais tias ib tug neeg tsis muaj kev tu siab tiag tiag, ces yeej yuav tsis muaj hnub lawv yuav tso txoj kev ua phem ntawd tseg tau li. Nyob rau txhua lub sij hawm thiab txhua qhov chaw, lawv yuav muaj peev xwm rov qab mus ua raws li lawv tus kheej tej qub ke, ua neej mus raws li lawv tus moj yam phem, thiab haj tseem ua yuam kev li qhov qub zaum tas zaum thiab. Yog li ntawd, lawv tsis yog ib tug neeg uas tau lees txim hloov dua siab tshiab lawm tiag tiag. Vim li no, lawv thiaj li raug muab nthuav tawm tag nrho. Yog li ntawd, tib neeg yuav ua li cas es thiaj li tso tau lawv tus kheej dim ntawm tej kev txhaum? Lawv yuav tsum nrhiav qhov tseeb los daws tej teeb meem thiab lawv kuj yuav tsum muaj peev xwm los xyaum ua raws li qhov tseeb thiab. Qhov no thiaj li yog tus cwj pwm yog uas tib neeg yuav tsum muaj rau qhov tseeb. Yog li ntawd, tib neeg yuav tsum xyaum ua raws li qhov tseeb li cas? Txawm koj yuav ntsib tej kev sim siab los sis tej kev sim twg los xij, koj yuav tsum thov Vajtswv hauv koj lub siab thiab zwm rau Vajtswv tej kev coj kev qhia tiag tiag—vim li cas Vajtswv thiaj li cia kom koj ntsib tej yam zoo li no? Qhov ntawd tsis yog nyob nyob es cia li muaj thiab tsis yog vim ntawm lub hwv tsam uas Vajtswv tso cai kom muaj tej yam zoo li no tshwm sim rau koj. Qhov ntawd yog Vajtswv sim thiab tshawb xyuas koj xwb. Yog hais tias koj tsis lees txais txoj kev tshawb xyuas no, yog hais tias koj tsis cuab pob ntseg mloog qhov no, ces koj tus cwj pwm coj rau Vajtswv tsis raug muab nthuav tawm rau lub sij hawm no lod? Koj tus cwj pwm coj rau Vajtswv yog dab tsi? Yog hais tias koj muaj ib tug cwj pwm tsis quav ntsej thiab thuam rau tej xwm txheej uas Vajtswv npaj tseg rau koj thiab tej kev sim siab uas Vajtswv muab rau koj ntawd, es koj yeej tsis thov Vajtswv thiab tsis nrhiav li, thiab tsis nrhiav ib txoj kev xyaum ua raws li qhov ntawd li, ces qhov no nthuav tawm tias koj tsis muaj ib tug cwj pwm zwm rau Vajtswv li. Vajtswv yuav cawm ib tug neeg zoo li no tau li cas? Vajtswv puas yuav muaj hnub ua kom lawv zoo tiav log li? Tsis muaj li. Qhov no vim hais tias koj tsis muaj ib tug cwj pwm zwm rau Vajtswv, thiab tab txawm tias Vajtswv npaj ib qho xwm txheej rau koj los xij, koj yuav tsis paub qhov xwm txheej ntawd, thiab koj yuav tsis koom tes nrog qhov xwm txheej ntawd. Qhov no qhia txog koj txoj kev saib Vajtswv tsis muaj nqis, uas koj tsis rau siab ua Vajtswv tes hauj lwm tiag tiag, thiab tias koj haj tseem muaj peev xwm muab Vajtswv cov lus thiab tej qhov tseeb tso tseg tau thiab, uas txhais tias koj tsis paub Vajtswv tes hauj lwm li. Vim li no, koj yuav ua li cas tau txais txoj kev cawm dim? Cov uas tsis nyiam qhov tseeb ntawd yuav tsis paub Vajtswv tes hauj lwm. Yeej yuav tsis muaj txoj hau kev tau txais txoj kev cawm dim li thaum tseem ntseeg Vajtswv zoo li no. Qhov no txhais tias yus tus cwj pwm coj rau Vajtswv thiab qhov tseeb mas tseem ceeb heev thiab qhov ntawd muaj feem ntsig txog ncaj qha rau qhov seb yus puas raug cawm. Cov tib neeg uas tsis cuab pob ntseg mloog qhov no mas yog cov ruam thiab tsis paub dab tsi li.

Nqe Lus Uas Xaiv Tawm Los 63

Muaj ntau tus tib neeg pheej muaj mob, thiab txawm lawv yuav thov Vajtswv npaum li cas los xij, lawv tseem tsis zoo li thiab. Txawm lawv xav tshem lawv tus kheej tawm ntawm lawv tus mob npaum li cas los xij, lawv yeej tshem tsis tau li. Qee zaus mas, tej zaum lawv haj tseem ntsib tej yam uas phom sij txog txoj sia thiab raug yuam kom fim tej ntawd kiag. Tseeb tiag, yog ib tug neeg twg muaj kev ntseeg Vajtswv tiag tiag nyob rau hauv nws lub siab mas, ua ntej tshaj plaws nws yuav tsum paub tias qhov ib tug tib neeg txoj sia nyob ntev npaum li cas ntawd yog nyob rau hauv Vajtswv ob txhais tes. Lub sij hawm ntawm qhov yus yug los thiab tuag ntawd yog Vajtswv twb npaj tseg lawm. Thaum Vajtswv muab kev mob nkeeg rau tib neeg, yeej muaj ib qho laj thawj nyob tom qab qhov ntawd—nws muaj qhov tseem ceeb. Yam uas lawv hnov tau ces yog kev mob nkeeg xwb, tiam sis, qhov tseeb tiag mas, yam uas muab lawv ntawd yog txoj hmoov hlub, tsis yog kev mob nkeeg. Ua ntej tshaj plaws tib neeg yuav tsum paub thiab paub tseeb txog qhov muaj tseeb no, thiab saib qhov ntawd kom tseem ceeb. Thaum tib neeg raug kev mob nkeeg, lawv yeej los tau rau ntawm Vajtswv lub xub ntiag, thiab ua tib zoo ceev faj ua tej yam uas lawv yuav tsum ua, thiab saib lawv tes dej num kom zoo dua thiab rau siab ua dua lwm tus. Raws li qhov tib neeg pom mas, qhov no yog ib qho kev tiv thaiv, tsis yog saw hlau khi. Qhov no yog ib txoj kev daws teeb meem ntawm sab tsis zoo. Tsis tas li ntawd, qhov txhua tus txoj sia nyob ntev npaum li cas ntawd Vajtswv twb npaj tseg ua ntej lawm. Tej zaum ib tug mob yuav yog tus mob uas ua rau tuag raws li kev kho mob pom xwb, tiam sis raws li Vajtswv txoj kev xam pom mas, yog koj txoj sia uas ua neej nyob tseem tsis tau tag thiab koj lub sij hawm tseem tsis tau los txog, ces koj yeej yuav tuag tsis taus txawm yog koj xav tuag los xij. Yog koj muaj ib lo lus txib los ntawm Vajtswv los, thiab koj txoj num tseem tsis tau tiav, ces koj yuav tsis tuag, tab txawm yog koj muaj ib tug mob uas yuav tsum tuag los xij—Vajtswv tseem yuav tsis coj koj mus. Txawm koj tsis thov Vajtswv thiab tsis nrhiav qhov tseeb, thiab tsis mob siab kho koj tus mob, los sis txawm txoj kev kho koj ntawd qeeb lawm los xij, koj yeej yuav tsis tuag. Qhov no muaj tseeb tshwj xeeb rau cov uas muaj ib lo lus txib tseem ceeb los ntawm Vajtswv los. Thaum lawv txoj num tseem tsis tau tiav, txawm lawv yuav raug tus mob dab tsi los xij, lawv yuav tsis tuag kiag tam sim ntawd; lawv yuav nyob mus txog lub sij hawj kawg ntawm qhov ua txoj num ntawd tiav. Koj puas muaj txoj kev ntseeg no? Yog koj tsis muaj, koj tsuas yuav hais tej lus thov uas ntiav ntiav rau Vajtswv xwb, hais tias, “Vajtswv, kuv yuav tsum ua txoj num uas Koj muab rau kuv lawm ntawd kom tiav. Kuv xav siv kuv lub sij hawm kawg los ua txhua yam rau Koj, kom kuv thiaj li tsis tshuav ib qho kev khuv xim tseg tuaj rau tom qab li. Koj yuav tsum tiv thaiv kuv!” Txawm koj thov Vajtswv li no los, yog koj tsis xub pib nrhiav qhov tseeb, ces koj yuav tsis muaj qhov kev txiav txim siab thiab lub zog los ua txhua yam. Vim koj tsis kam tiv kev txom nyem tiag, koj thiaj li pheej siv hom kev hais ub hais no thiab txoj kev no los thov Vajtswv thiab nrog Nws sib khom nqi—tus no puas yog ib tug tib neeg uas caum qhov tseeb? Yog koj tus mob zoo lawm, koj puas muaj peev xwm ua tau koj tes dej num kom zoo tiag tiag? Yeej tsis paub tseeb. Qhov muaj tseeb ces yog qhov tias txawm koj txoj kev sib khom nqi ntawd yog ua kom koj tus mob zoo thiab ua kom koj txhob tuag, los sis koj muaj lwm txoj kev npaj siab los sis lub hom phiaj nyob rau hauv los xij, raws li Vajtswv txoj kev xam pom ces, tsuav koj ua tau koj tes dej num, tsuav koj tseem siv tau, thiab tsuav Vajtswv tau txiav txim siab tias siv tau koj, ces qhov no txhais hais tias koj tsis tsim nyog tuag. Koj yeej yuav tuag tsis taus txawm yog koj xav tuag los xij li. Tiam sis yog koj ua teeb meem yam tsis xyuam xim, thiab ua txhua yam kev phem, thiab ua meem txom rau Vajtswv tus moj yam, ces koj yuav tuag sai dua; koj txoj sia yuav raug muab txiav kom luv. Qhov txhua tus tib neeg txoj sia nyob ntev npaum li cas ntawd Vajtswv twb npaj tseg ua ntej tsim lub ntiaj teb lawm. Yog lawv muaj peev xwm ua raws li Vajtswv tej kev npaj thiab tej kev coj kev qhia, ces txawm lawv raug mob los tsis raug, thiab txawm lawv noj qab nyob zoo los tsis zoo los xij, lawv yeej yuav nyob kom txog lub hnub nyoog uas Vajtswv npaj tseg ua ntej lawm. Koj puas muaj txoj kev ntseeg no? Yog koj tsuas lees paub qhov no raws li cov ntsiab ntawm kev qhuab qhia xwb, ces koj tsis muaj txoj kev ntseeg tseeb, thiab qhov hais tej lus zoo zoo mloog ntawd tsis muaj qab hau li; yog koj paub tseeb tawm hauv koj nruab siab tuaj tias Vajtswv yuav ua li no, ces koj txoj kev ua thiab txoj kev xyaum ua yeej cia li yuav hloov li. Tseeb tiag, tib neeg yuav tsum muaj qee qhov kev paub txog txoj kev saib xyuas lawv txoj kev noj qab haus huv thaum lawv ua neej txawm lawv muaj mob los tsis muaj mob li. Qhov no yog qhov uas Vajtswv tau muab rau tib neeg thaum yug los. Nws yog qhov laj thawj thiab qhov kev paub uas ib tug yuav tsum muaj nyob rau hauv txoj kev xav ywj siab uas Vajtswv tau muab rau lawv lawm. Thaum koj mob lawm, koj yuav tsum to taub qee qhov kev paub txog txoj kev noj qab haus huv thiab kev kho mob kom khotau tus mob no—qhov no yog qhov koj yuav tsum ua. Txawm li cas los xij, qhov kho koj tus mob li no tsis yog los tawm tsam qhov txoj sia nyob ntev npaum li cas uas Vajtswv npaj rau koj, thiab tsis yog los hais tias koj yuav nyob tau mus ntev tshaj li qhov txoj sia nyob ntev npaum li cas uas Nws npaj rau koj lawm ntawd. Qhov no txhais li cas? Hais tau li no tias: Yog saib rau ntawm sab uas tsis tawm tsam ces, yog koj tsis saib koj tus mob kom tseem ceeb, yog koj ua koj tes dej num li koj yuav tsum ua, thiab so ntau dua lwm tus me ntsis, yog koj tsis tau ua rau koj tes dej num qeeb, ces koj tus mob yuav tsis mob heev zuj zus, thiab nws yuav tsis ua rau koj tuag. Txhua yam yog nyob ntawm qhov Vajtswv ua xwb. Muab ua lwm yam lus hais ces, yog hais tias, raws li Vajtswv txoj kev xam pom, qhov koj txoj sia nyob ntev npaum li cas uas npaj tseg lawm ntawd tseem tsis tau tag, ces, txawm koj mob los, Nws yuav tsis cia koj tuag. Yog koj tus mob tsis txog qhov yuav tuag, tiam sis koj lub sij hawm los txog lawm, ces Vajtswv yuav coj koj mus thaum twg Nws los tau. Qhov no tsis yog nyob tag nrho rau ntawm Vajtswv ib lub tswv yim xwb lov? Nws yog nyob ntawm Nws txoj kev npaj tseg ua ntej! Qhov no yog qhov koj yuav tsum saib qhov teeb meem no. Tej zaum koj yuav ua koj feem es mus cuag kws kho mob, noj tshuaj, saib xyuas koj txoj kev noj qab haus huv, thiab dhia tes taw, tiam sis koj yuav tsum to taub hauv koj nruab siab tias ib tug tib neeg txoj sia yog nyob rau hauv Vajtswv ob txhais tes, qhov ib tug tib neeg txoj sia nyob ntev npaum li cas ntawd yog Vajtswv twb npaj tseg lawm, thiab tsis muaj leej twg yuav hla dhau qhov uas Vajtswv tau npaj tseg lawm. Yog koj haj tseem twb tsis muajqhov kev to taub me me no thiab, ces koj tsis muaj txoj kev ntseeg tiag tiag, thiab yeej tsis ntseeg Vajtswv tiag tiag.

Kev raug mob raug nkeeg yog ib txoj kev txom nyem rau tib neeg, vim hais tias qee yam kab mob tuaj yeem ua rau lawv txoj sia muaj kev phom sij lub sij hawm twg los tau. Qhov tseeb tiag, yog tias tib neeg muaj kev ntseeg Vajtswv tiag tiag, yam xub thawj uas lawv yuav tsum tau paub mas yog qhov tias lub sij hawm lawv ua neej nyob yog nyob rau hauv Nws ob txhais tes. Thaum Vajtswv cia ib tug kab mob los raug rau tib neeg ntawd, mas yeej yog vim ib qho dab tsi es Vajtswv thiaj li cia—qhov ntawd muaj qhov tseem ceeb. Qhov ntawd zoo li ib tug mob rau lawv, tiam sis, qhov tseeb tiag, yam uas tau muab rau lawv ntawd yog txoj hmoov hlub xwb, tsis yog kab mob. Tib neeg yuav tsum xub xub lees paub thiab ruaj siab txog qhov tseeb no ua ntej tshaj plaws, thiab ua tiag tiag. Thaum tib neeg raug mob raug nkeeg lawm, lawv tuaj yeem los rau ntawm Vajtswv lub xub ntiag, thiab kom ruaj siab tias yog los ua yam lawv tsim nyog ua, los ntawm kev ua tib zoo thiab kev ceev faj, thiab ua lawv tes dej num los ntawm kev saib xyuas thiab kev mob siab rau kom dua li lwm tus. Raws li tib neeg txhawj xeeb mas, qhov no yog ib txoj kev tiv thaiv, tsis yog kev khi. Nws yog ib txoj kev tsis zoo ntawm kev saib xyuas tej yam hauj lwm. Ib qho ntxiv, txhua tus lub sij hawm ua neej nyob Vajtswv twb tau npaj tseg ua ntej lawm. Yog tias zoo li tus kab mob ntawd mob loj heev li lawm, tiam sis, yog Vajtswv pom hais tias, koj lub sij hawm tseem tsis tau los txog thiab koj tes hauj lwm tseem tsis tau tiav, ces Nws yuav tsis coj koj mus. Yog tias koj yeej tsis tuag, ces, txawm hais tias koj tsis thov Vajtswv, los sis saib xyuas koj tus kheej, los sis rau siab kho koj tus mob tiag tiag, los sis pom zoo li twb yuav tuag es los nrhiav kev kho mob los xij, koj yeej yuav tsis tuag li. Yog tias Vajtswv tau txib kom koj ua ib teg hauj lwm, es koj tes hauj lwm tsis tau tiav, ces Nws yuav tsis cia koj tuag, tiam sis yuav cia koj muaj txoj sia nyob kom mus txog rau thaum lub sij hawm kawg kiag. Koj puas muaj kev ntseeg rau qhov no? Yog tias koj tsis muaj, koj pheej yuav thov Vajtswv tas li yam ceev faj heev hais tias, "Vajtswv! Kuv yuav tsum tau ua kom tiav kuv tes hauj lwm. Kuv xav siv kuv lub sij hawm kawg los hais kev mob siab rau Koj, kom kuv thiaj li tsis khuv xim tom qab!" Koj yuav nquag thov kev zam txim zoo li no heev li thiab siv tej tswv yim zoo li no los siv zog khom nqi nrog Vajtswv. Qhov tseeb, txawm koj yuav sim los khom nqi ntau zaus ntxiv, los sis tsis kho koj tus kab mob tiag tiag kiag li los xij, nws tsis tseem ceeb; raws li Vajtswv xam pom mas, tsuav yog koj tuaj yeem ua tau koj tes dej num tiav thiab tseem muaj siv tau xwb, thiab tsuav yog Nws tseem xav siv koj thiab txiav txim siab los ua li ntawd xwb—ces koj yeej tsis tuag li, vim rau qhov Vajtswv twb txiav txim siab rau koj lub sij hawm ua neej nyob ua ntej tsim lub ntiaj teb no lawm. Koj puas muaj kev ntseeg rau qhov no? Yog tias koj tsuas lees paub qhov no yam li ib txoj kev qhuab qhia xwb, ces koj txoj kev ua yuav tsis muaj nqis dab tsis li tsuas lam yog ib txoj kev ua xwb; yog tias koj lees paub hauv koj lub nruab siab tias Vajtswv yuav ua qhov no, ces yuav muaj ntau yam kev hloov pauv txog qhov koj ua tej yam hauj lwm thiab qhov koj xyaum ua raws. Yog lawm, muaj mob los sis tsis muaj, txhua tus tib neeg yuav tsum ua lawv lub neej raws li qee txoj kev nkag siab thaum hais txog kev tu lawv lub cev kom noj qab nyob zoo. Yog tias koj muaj mob, koj kuj yuav tsum muaj qee qhov kev paub ntau yam txog qhov yuav kho koj tus mob li cas thiab. Qhov no yog qee yam uas tib neeg yuav tsum ua los ntawm lawv tus kheej. Txawm li cas los xij, kev kho ib tug kab mob li no yuav tsum tsis yog txhob txwm los twv lub sij hawm ua neej nyob uas Vajtswv teem tseg rau koj lawm, los sis yuav tsum tsis yog koj ua li ntawd los lav tias koj tuaj yeem ua neej raws lub sij hawm ua neej nyob uas Nws tau teem tseg rau koj lawm. Qhov no txhais li cas? Nws tuaj yeem hais tau li no tias: Hauv qhov kev xav ua twj ywm mas, yog tias koj tsis kho koj tus kab mob tiag tiag, ua kom tiav koj tes dej num li koj yuav tsum tau ua, thiab so me ntsis ntau dua li lwm tus, yog tias koj tsis tau ncua koj tes dej num li, koj tus kab mob puas yuav loj tuaj? Nws yuav tsis loj tuaj, los sis nws yuav tsis ua rau koj tuag, uas yog nyob rau ntawm qhov Vajtswv ua xwb. Lwm lo lus mas, yog tias, raws li Vajtswv xam pom, koj lub sij hawm ua neej nyob uas twb tau npaj tseg ua ntej lawm tseem tsis tau ua raws li nws txoj kev, ces, tab txawm yog koj muaj mob los xij, Nws yuav tsis cia koj tuag. Yog tias koj tus kab mob tsis tau mob loj heev, tiam sis koj lub sij hawm twb los txog lawm, ces Vajtswv yuav coj koj mus thaum twg los tau raws li Nws xav tau. Qhov no tsis yog tag nrho txoj kev hlub tshua ntawm Vajtswv txoj kev xav lov? Qhov ntawd yog txoj kev hlub tshua ntawm Nws txoj kev npaj tseg ua ntej lawm! Qhov no yog qhov uas koj tsim nyog saib qhov teeb meem no. Tej zaum koj ua koj feem thiab mus ntsib kws kho mob, noj qee yam tshuaj, saib xyuas koj txoj kev noj qab nyob zoo, thiab qoj ib ce kom muaj zog, tiam sis koj yuav tsum to taub kom tob tias tib neeg txoj sia yog nyob rau hauv Vajtswv ob txhais tes, thiab Vajtswv twb tau npaj tib neeg lub sij hawm ua neej nyob tseg ua ntej lawm. Tsis muaj leej twg tuaj yeem hla dhau yam uas Vajtswv twb tau npaj tseg ua ntej lawm. Yog tias koj twb tsis muaj ib qho kev to taub me me txog qhov no li, ces koj yeej tsis muaj txoj kev ntseeg tiag tiag, thiab tsis ntseeg Vajtswv tiag tiag.

Kev ntseeg Vajtswv tiag tsis yog ib kev lam ntseeg Nws kom raug cawm nkaus xwb, thiab haj yam tsis yog ib qho lam ua kom yog tus neeg zoo xwb. Nws tsis yog ib qho lam ua kom muaj qhov zoo li tib neeg nkaus xwb. Qhov tseeb, tib neeg yuav tsum tsis txhob xav hais tias txoj kev ntseeg ces tsuas yog qhov kev ntseeg hais tias muaj ib tug Vajtswv nkaus xwb, thiab hais tias Nws yog qhov tseeb, txoj kev, txoj sia thiab tsis muaj dab tsi ntxiv lawm. Txoj kev ntseeg los kuj tsis yog qhov uas tsuas kom koj lees paub Vajtswv xwb thiab ntseeg hais tias Nws yog tus Kav tag nrho txhua yam, hais tias Nws yog tus muaj hwj chim loj kawg nkaus, hais tias Nws tsim txhua yam hauv lub ntiaj teb, thiab hais tias Nws zoo tsis thooj lwm tus thiab yog tus siab tshaj plaws. Txoj kev ntseeg tsis yog ib qho lam ntseeg qhov tseeb nkaus xwb. Vajtswv txoj kev xav ces yog kom tag nrho koj thiab koj lub siab yuav tsum muab rau Nws thiab zwm rau Nws—qhov ntawd ces yog, koj yuav tsum raws Vajtswv qab, cia Vajtswv siv koj, thiab txaus siab ua dej num rau Nws; dab tsi los xij uas koj ua tau rau Nws, koj yuav tsum ua. Nws tsis tau txhais hais tias tsuas yog cov uas raug Vajtswv npaj tseg ua ntej thiab raug xaiv tseg nkaus xwb thiaj li tsim nyog ntseeg Nws. Qhov tseeb ces yog tag nrho noob neej yuav tsum pe hawm Vajtswv, ua twb zoo mloog Nws thiab ua li Nws hais, vim noob neej yog Vajtswv tsim tawm los. Nws tsis tau txhais hais tias tsuas yog cov uas raug Vajtswv npaj tseg ua ntej thiab raug xaiv tseg nkaus xwb thiaj li tsim nyog ntseeg Nws. Yog koj pheej hais tas li tias, “Tsis yog peb ntseeg Vajtswv kom tau txais txoj sia ntev dhawv mus ib txhis xwb los? Tsis yog peb tsis ntseeg Vajtswv kom raug cawm dim xwb los?” ces koj txoj kev ntseeg Vajtswv tsuas zoo ib yam li ib qho xwm txheej tsis tseem ceeb xwb, tsuas lam ua kom tau txais qee yam xwb. Qhov no tsis yog qhov ib tug neeg tsim nyog saib txoj kev ntseeg Vajtswv li cas. Nrog rau txhua qhov tseeb, tib neeg yuav tsum nrhiav, ua twb zoo saib, thiab tshuaj xyuas seb lub ntsiab sab hauv ntawm qhov tseeb yog dab tsi, yuav xyaum raws kis ntawd ntawm qhov tseeb li cas, thiab yuav to taub qhov tseeb txog qhov ntawd li cas. Tej no yog tej uas tib neeg tsim nyog ua. Ntawm ntau kis ntawm qhov tseeb uas ib tug neeg yuav tsum muaj tam sim no rau hauv qhov kev ntseeg Vajtswv ntawd mas, nej tsuas to taub tej ntsiab, kev qhuab qhia, thiab tej kev tshwm sim sab nraud uas ncaj ncaj xwb; nej tsis to taub lub ntsiab tseeb ntawm qhov tseeb li, vim nej tsis tau ntsib tau pom txog nws li. Piv txwv li: Muaj qhov tseeb ntau heev nyob rau hauv cheeb tsam ntawm qhov kev ua ib tug neeg tes dej num thiab nyob rau hauv cheeb tsam ntawm kev hlub Vajtswv, thiab tib neeg yuav tsum to taub qhov tseeb kom ntau yog lawv xav paub lawv tus kheej. Kuj muaj ntau qhov tseeb uas yuav tsum tau to taub nyob rau hauv qhov tseem ceeb thiab cov lus zais tob ntawm kev yug los ua neeg thiab. Piv txiv li, tib neeg yuav tsum coj lawv tus kheej li cas; lawv yuav tsum pe hawm Vajtswv li cas; lawv yuav tsum mloog Vajtswv lus li cas; lawv yuav tsum ua dab tsi thiaj li yoog tau raws li Vajtswv lub siab nyiam; lawv yuav tsum ua dej num rau Vajtswv li cas—tag nrho tej no huv si puav leej muaj qhov tseeb ntau heev. Nej xav li cas txog los sis ua twb zoo saib qhov tseeb hauv ntau kis ntawm qhov tseeb no li cas? Muaj qhov tseeb tob heev nyob rau hauv txhua yam ntawm tej no uas tib neeg yuav tsum tau ntsib tau pom. Yog koj tsuas hais txog ntawm cov lus ntiav ntiav xwb, tab sis yeej tsis mus kom tob rau sab hauv tej no mus ua twb zoo saib thiab kom tau ntsib tau pom tej no li, ces koj yeej yuav ua neej nyob rau saum qhov ntiav ntiav ntawm cov lus mus ib txhis xwb, thiab koj yuav tsis muaj hnub hloov pauv li.