Nqe Lus Uas Xaiv Tawm Los 31

Txij li thaum tib neeg muaj tus moj yam qias vuab tsuab lawm, mas thaum lawv ua lawv tej dej num lawv lam tau lam ua xwb. Qhov no yog ib qho teeb meem loj tshaj plaws ntawm txhua yam. Yog tib neeg yuav ua lawv tes dej num kom zoo, mas lawv yuav tsum xub daws qhov teeb meem ntawm kev lam tau lam ua no tso. Tsuav yog lawv tseem muaj tus cwj pwm uas lam tau lam ua zoo li no xwb, ces lawv yuav ua tsis tau lawv tes dej num kom zoo li, uas txhais tau tias kev daws qhov teeb meem ntawm kev lam tau lam ua mas tseem ceeb tshaj plaws li. Yog li ntawd lawv yuav muab qhov no coj los xyaum ua raws tau li cas? Ua ntej tshaj, lawv yuav tsum daws qhov teeb meem ntawm lawv tus yam ntxwv hauv lub siab ntsws tso; lawv yuav tsum ua lawv tes dej num kom yog, thiab mob siab ntso ua txhua yam thiab leg lub luag hauj lwm. Lawv yuav tsum tsis txhob txhob txwm ntxias dag los sis lam tau lam ua. Yus tes dej num mas yog ua txhawm rau Vajtswv, tsis yog rau ib tug neeg twg li; yog hais tias tib neeg muaj peev xwm lees txais Vajtswv txoj kev tshawb xyuas, ces lawv yuav muaj tus yam ntxwv ntawm lub siab lub ntsws uas yog. Tshaj qhov ntawd, tom qab ua qee yam lawm, tib neeg yuav tsum tshuaj xyuas qhov ntawd, thiab tig xav txog qhov ntawd, thiab yog lawv lub siab tsis kaj siab, thiab tom qab tshuaj xyuas ntxaws ntxaws lawm, lawv pom tias yeej muaj teeb meem tiag tiag, ces lawv yuav tsum hloov pauv; thaum hloov tau tej no tag lawm, lawv lub siab yuav kaj. Thaum tib neeg kaj siab lawm, qhov no ua pov thawj qhia tias yeej muaj ib qho teeb meem lawm, thiab lawv yuav tsum mob siab tshuaj xyuas yam uas lawv ua, tshwj xeeb mas yog nyob rau ntawm theem uas tseem ceeb. Qhov no yog tus cwj pwm uas leg lub luag hauj lwm rau kev ua yus tes dej num. Thaum tib neeg ua tiag tiag, leg lub luag hauj lwm, thiab muab tag nrho lawv lub siab thiab lub zog coj los ua lawm, ces yuav ua tau tes hauj lwm tiav zoo. Qee lub sij hawm, koj muaj tus yam ntxwv tsis zoo nyob hauv lub siab lub ntsws lawm, thiab nrhiav tsis tau los sis tshawb tsis pom ib qho ua yuam kev uas pom meej cuag nruab hnub. Yog tias koj muaj tus yam ntxwv yog nyob hauv lub siab lub ntsws, ces, nrog rau Vajntsujplig txoj kev qhuab qhia thiab kev coj qhia, koj yeej yuav nrhiav tau qhov teeb meem xwb. Yog hais tias Vajntsujplig coj koj kev thiab muab ib txoj kev paub ntawd rau koj, ua rau koj paub meej meej rau hauv lub siab thiab paub tias qhov tsis yog nyob qhov twg lawm, ces koj thiaj li yuav muaj peev xwm kho qhov tsis yog ntawd thiab siv zog rau qhov tseeb tau. Yog koj muaj tus yam ntxwv tsis zoo nyob rau hauv lub siab lub ntsws, thiab tsis muaj siab muaj ntsws thiab tsis quav ntsej, ces koj puas yuav muaj peev xwm paub tau qhov uas yuam kev ntawd? Koj yuav tsis paub. Pom dab tsi los ntawm qhov no xwb? Qhov no qhia tau hais tias yuav kom ua tau lawv tej dej num zoo mas, nws yog ib qho tseem ceeb heev uas tib neeg yuav tsum koom tes; lawv txoj kev koom siab ntawd mas tseem ceeb heev, thiab qhov uas lawv xav txog thiab npaj tswv yim rau ntawd mas tseem ceeb heev. Vajtswv tshawb xyuas kom meej thiab pom hais tias tib neeg lub siab zoo li cas, thiab lawv siv zog ua lawv tej dej num npaum li cas. Qhov tib neeg muab tag nrho lawv lub siab thiab lub zog rau yam uas lawv ua ntawd mas tseem ceeb heev. Lawv qhov kev koom tes mas yog ib qho uas tseem ceeb heev. Tsuas yog qhov hais tias tib neeg rau siab ntso kom tsis txhob muaj qhov khuv xim txog lawv tes dej num thaum lawv tau ua tiav lawm thiab tej yam uas lawv tau ua lawm, thiab tsis txhob tshuav nuj tshuav nqi rau Vajtswv lawm xwb, mas lawv thiaj li yog ua kawg lawv lub siab thiab lub dag lub zog. Yog koj pheej muab tsis tau tag nrho koj lub siab thiab lub zog coj los ua koj tes dej num, yog koj lam taus lam ua tas li, thiab ua rau tes hauj lwm puas tsuaj loj, thiab ua tsis tau raws li tej uas Vajtswv cheem tsum li, ces tib qho uas yuav tshwm sim rau koj ces yog: Koj yuav raug muab tshem tawm mus xwb. Ces thaum ntawd puas tseem yuav muaj sij hawm los khuv xim lawm? Yuav tsis muaj lawm. Tej kev ua no yuav dhau los ua ib qho uas khuv xim mus tag ib txhis, dhau los ua ib qho uas tsuas lawm! Qhov lam taus lam ua tas li ntawd yog ib qho uas tsuas lawm, nws yog ib qho kev ua txhaum uas loj heev—yog los tsis yog? (Yog.) Koj yuav tsum siv zog ua koj tej hauj lwm, thiab txhua yam uas koj yuav tsum tau ua kom kawg koj lub siab thiab lub zog, koj yuav tsum tsis txhob lam taus lam ua, los sis khuv xim ib yam dab tsi li. Yog koj ua tau li ntawd, mas Vajtswv yuav nco ntsoov tes dej num uas koj ua ntawd. Tej uas Vajtswv nco ntsoov ntawd yog tej kev ua zoo. Yog li tej uas Vajtswv tsis nco ntsoov ntawd yog dab tsi? (Tej ntawd yog tej kev ua txhaum thiab tej kev ua phem.) Yog muab tej ntawd piav qhia li tam sim no mas tej zaum koj yuav tsis lees txais hais tias tej ntawd yog tej kev ua phem, tiam sis, yog muaj ib hnub twg uas tej no ua rau muaj ib qho kev tshwm sim los uas loj heev, ua rau muaj ib qho kev cuam tshuam uas tsis zoo, ces koj yuav paub hais tias qhov kev ua txhaum no tsis yog tsuas yog ib hom kev ua txhaum ntawm sab kev coj cwj pwm xwb, tiam sis yog tej kev ua phem ntag. Thaum koj paub li no lawm, koj yuav khuv xim heev, thiab xav hauv koj tus kheej hais tias: “Yog paub li mas ntshe kuv twb xaiv ib qho kev tiv thaiv me ntsis lawm! Yog ua tib zoo xav thiab siv zog me ntsis ntxiv nyob rau thaum pib, mas ntshe twb tsis muaj qhov uas rov qab los raug rau kuv no.” Tsis muaj ib yam dab tsi uas yuav so tau qhov tsuas uas nyob mus ib txhis no hauv koj lub siab tawm mus li, thiab yog qhov tsuas ntawd ua rau koj tshuav nws nqi mus ib txhis, ces koj yuav muaj teeb meem. Yog li ntawd hnub no koj yuav tsum siv zog muab tag nrho koj lub siab thiab lub zog coj los ua tes hauj lwm uas Vajtswv tau muab rau koj ua lawm, los ua txhua tes dej num los ntawm ib lub siab uas txawj xav heev yam tsis khuv xim ib qho dab tsi li, thiab ua kom Vajtswv nco ntsoov. Txawm koj ua dab tsi los xij, tsis txhob lam taus lam ua. Yog koj ua ib qhov yuam kev yam tsis xav ua ntej es qhov ntawd yog ib qho kev ua txhaum ua loj heev, ces qhov no yuav dhau los ua ib qho uas tsuas mus ib txhis li. Thaum koj khuv xim lawm, koj yuav kho tsis tau tej ntawd lawm, thiab tej ntawd yuav yog tej uas koj khuv xim mus ib txhis. Ob txoj kev no yuav tsum saib kom tseeb. Txoj twg yog txoj uas koj yuav tsum xaiv, kom thiaj li ua tau raws li qhov Vajtswv pom zoo? Txoj uas ua koj tes dej num kom kawg koj lub siab thiab lub zog, thiab npaj thiab nkaws tej kev ua zoo yam tsis khuv xim ib qho dab tsi li. Txawm koj ua dab tsi los xij, tsis txhob ua yam phem uas yuav cuam tshuam rau lwm tus txoj kev ua lawv tej dej num, tsis txhob ua ib yam dab tsi uas tawm tsam qhov tseeb thiab tawm tsam Vajtswv, thiab tsis txhob khuv xim mus tag sim neej. Yuav muaj dab tsi tshwm sim thaum tib neeg ua txhaum ntau dhau lawm? Lawv ua rau Vajtswv npau taws rau lawv nyob rau ntawm Nws lub xub ntiag xwb! Yog koj ua txhaum ntau tuaj, thiab Vajtswv npau taws rau koj ntau tuaj, ces, thaum kawg, koj yuav raug rau txim.

Nyob nraum daim tawv, ib txhia neeg mas yeej zoo li tsis muaj ib qho teeb meem loj rau tag nrho lub sij hawm uas lawv ua lawv tej dej num li. Lawv yeej tsis tau ua dab tsi phem phem li; lawv tsis tsim kev tab kaum los sis kev thab plaub, los sis taug cov tawm tsam khetos txoj kev. Nyob rau hauv qhov kev ua lawv tej dej num, lawv yeej tsis muaj ib qho yuam kev los sis teeb meem loj txog lub hauv paus ntsiab lus uas tshwm sim tuaj li, tab sis, yam niag tsis ras txog hlo li, nyuam qhuav tau ob peb xyoos xwb lawv twb raug muab nthuav tawm tias tsis lees txais qhov tseeb kiag li, tias yog ib tug ntawm cov tsis ntseeg lawm. Vim li cas ho zoo li no? Lwm tus mas tsis pom ib qho teeb meem hlo li, tab sis Vajtswv mas tshawb xyuas puag hauv cov tib neeg no nruab siab kom meej, thiab Nws yeej pom qhov teeb meem ntawd. Lawv yeej ib txwm lam ua kom dhau xwb thiab yeej tsis lees txim hloov dua siab tshiab ntawm qhov ua lawv tej dej num li. Thaum sij hawm dhau mus, lawv cia li raug muab nthuav tawm lawm. Qhov tsis lees txim hloov dua siab tshiab ntawd txhais li cas? Nws txhais tau hais tias txawm lawv twb ua lawv tej dej num txhua lub sij hawm lawm los xij, lawv yeej ib txwm coj tus cwj pwm tsis zoo rau tej dej num ntawd, ib tug cwj pwm uas tsis xyuam xim thiab lam ua kom dhau xwb, ib tug cwj pwm tsis paub txob paub txhawj, thiab lawv yeej tsis txawj xav li, haj yam tsis muab kom tag nrho lawv lub siab los ua lawv tej dej num li. Tej zaum mas lawv tsuas siv zog me ntsis xwb, tab sis lawv tsuas lam ua kom zoo li twb ua lawm xwb. Lawv yeej tsis ua lawv tej dej num kom kawg lawv lub siab kawg lub ntsws li, ces lawv tej kev ua txhaum thiaj li tsis muaj chaw kawg li. Raws li Vajtswv pom mas, lawv yeej tsis tau lees txim hloov siab tshiab li; lawv yeej ib txwm lam ua kom dhau xwb, thiab yeej tsis muaj ib qho kev hloov nyob rau hauv lawv li—qhov ntawd ces yog, lawv tsis tso qhov kev phem ntawm lawv txhais tes tseg thiab hloov siab lees txim rau Nws hlo li. Vajtswv tsis pom lawv hauv tus cwj pwm ntawm txoj kev hloov siab lees txim li, thiab Nws tsis pom ib qho kev tig hloov rov qab nyob rau hauv lawv tus cwj pwm li. Lawv mas rau siab ntso rau lawv tej dej num thiab Vajtswv cov lus txib nrog ib tug cwj pwm thiab ib txoj kab ke zoo li ntawd. Thoob plaws, yeej tsis muaj kev hloov pauv nyob rau hauv tus moj yam uas tawv ncauj, tsis mloog lus no li, thiab, tshaj qhov ntawd, mas lawv yeej tsis hnov zoo li tshuav Vajtswv nqi li, yeej tsis xav hais tias lawv txoj kev lam ua dog ua dig ntawd yog ib qho kev txhaum, ib qho kev ua phem li. Nyob hauv lawv lub siab, yeej tsis muaj ib qho kev tshuav nuj tshuav nqi li, tsis muaj kev txhaum, tsis muaj kev cem-tus kheej, thiab haj yam tsis muaj kev iab liam-tus kheej li. Thiab, thaum sij hawm tau dhau mus lawm, Vajtswv pom hais tias hom neeg no ces cawm tsis tau lawm. Tsis hais Vajtswv yuav hais li cas li, thiab tsis hais lawv yuav hnov pes tsawg qhov lus qhuab qhia los sis lawv yuav to taub qhov tseeb npaum li cas li, yeej tsis txhawb lawv lub siab li thiab lawv tus cwj pwm yeej tsis hloov los sis tig rov qab li. Vajtswv pom qhov no ces Nws thiaj li hais tias: “Tsis muaj kev cia siab rau tus neeg no lawm. Tsis muaj ib yam dab tsi Kuv hais es yuav txhawb tau lawv lub siab li, thiab tsis muaj ib yam dab tsi Kuv hais es yuav tig tau lawv rov qab li. Yeej tsis muaj ib txoj hau kev twg yuav hloov pauv tau lawv li lawm. Tus neeg no tsis zoo tsim nyog ua lawv tes dej num lawm, thiab lawv tsis tsim nyog ua hauj lwm nyob hauv Kuv lub tsev.” Vim li cas Vajtswv thiaj hais li no? Nws yog vim thaum lawv ua lawv tes dej num thiab ua hauj lwm mas lawv pheej lam ua kom dhau xwb. Txawm lawv yuav raug qhuab qhia thiab txawm yuav uv thiab ua siab ntev rau lawv ntau npaum li cas lawm los xij, qhov ntawd yeej tsis muaj dab tsi tshwm sim thiab ua tsis tau kom lawv hloov siab lees txim los sis hloov pauv kiag li. Nws yeej ua tsis tau kom lawv ua lawv tes dej num kom zoo, nws yeej ua tsis tau kom lawv taug txoj kev uas nrhiav qhov tseeb li. Yog li ntawd tus neeg no ces cawm tsis tau lawm. Thaum Vajtswv txiav txim siab hais tias ib tug neeg mas cawm tsis tau lawm, ces Nws puas tseem yuav tuav tus neeg no khov khov tseg mas? Nws yuav tsis tuav lawm. Vajtswv yuav cia lawv mus. Ib txhia neeg mas pheej thov tas mus li tias, “Vajtswv, txhob ua nruj nruj rau kuv, txhob ua rau kuv txom nyem, txhob qhuab ntuas kuv. Muab kev ywj pheej rau kuv me ntsis! Cia kuv lam taus lam ua me ntsis! Cia kuv ua dog ua dig me ntsis! Cia Kuv ua li kuv siab nyiam!” Lawv yeej tsis xav raug txwv hlo li. Vajtswv hais tias, “Vim koj tsis xav taug txoj kev yog, ces Kuv yuav cia koj mus. Kuv yuav cia koj ua ywj siab. Cia li mus ua qhov uas koj xav ua. Kuv yuav tsis cawm koj, vim koj ces cawm tsis tau lawm.” Cov uas cawm tsis tau lawm puas muaj ib qho kev txawj xav li thiab? Lawv puas muaj ib qho kev xav tias tshuav nuj tshuav nqi li? Lawv puas muaj ib qho kev xav ntawm txoj kev iab liam li? Lawv puas hnov Vajtswv txoj kev thuam, kev qhuab ntuas, kev ntaus, thiab kev txiav txim? Lawv tsis hnov qhov ntawd li. Lawv yeej tsis paub txog tej no ib qho li; tej no mas tsis nyob rau hauv lawv lub siab, los sis yeej tsis muaj li. Thaum ib tug neeg los txog theem no lawm, tsis muaj Vajtswv nyob rau hauv lawv lub siab lawm, ua lawv puas tseem tau txais kev cawm dim mas? Tsis paub. Thaum ib tug neeg txoj kev ntseeg los txog rau ib theem zoo li ntawd lawm, ces tus tib neeg ntawd nyob rau qhov phom sij lawm. Nej puas paub tias nej tsim nyog caum nrhiav li cas, nej tsim nyog xyaum ua li cas, thiab txoj kev twg uas nej tsim nyog taug kom zam dhau lub txim no thiab paub tseeb hais tias ib tug yam ntxwv zoo li ntawd yuav tsis tshwm sim tuaj lawm? Qhov tseem ceeb tshaj plaws ces yog qhov xub xaiv txoj kev kom yog, ces tom qab ntawd los mus rau siab ntso ua tes dej num uas nej tsim nyog ua tam sim no kom zoo xwb. Qhov no yog tus qauv uas qis tshaj plaws, tus qauv uas yooj yim tshaj plaws. Vim lub hauv paus no, es koj thiaj li yuav tsum nrhiav qhov tseeb thiab siv zog rau cov qauv uas ua koj tes dej num no kom txaus. Qhov no yog vim hais tias yam uas qhia kom pom tseeb tshaj plaws txog qhov uas muab koj txuas rau ntawm Vajtswv ntawd ces yog qhov koj ua tej uas Vajtswv muab tso rau koj ua thiab tes dej num uas Nws muab rau koj ua ntawd li cas, thiab coj tus cwj pwm uas koj muaj ntawd li cas ntag. Qhov uas pom tseeb tshaj plaws thiab muaj qab hau tshaj plaws ces yog qhov teeb meem no ntag. Vajtswv tos ntsoov; Nws xav pom koj tus cwj pwm. Nyob rau ntu uas tseem ceeb no, koj yuav tsum ua kom Vajtswv paub tias koj zoo li cas tsuag tsuag, lees txais Nws tes hauj lwm, thiab ua koj tes dej num kom zoo. Thaum koj to taub qhov tseem ceeb no thiab ua tau tes hauj lwm uas Vajtswv muab rau koj ua ntawd tiav lawm, ces koj txoj kev nrog Vajtswv sib raug zoo yuav zoo li qub lawm. Thaum Vajtswv muab ib tes hauj lwm rau koj ua, los sis hais kom koj ua ib teg dej num twg, yog koj tus cwj pwm tsis quav ntsej thiab tsis kub siab, thiab koj tsis ua tiag tiag no, qhov no tsis yog koj tsis muab tag nrho koj lub siab thiab lub zog coj los ua lod? Koj ua puas tau koj tes dej num zoo yog ua li no? Yeej tsis tau li. Koj yuav tsis ua koj tes dej num kom txaus. Yog li ntawd, koj tus cwj pwm thaum ua koj tes dej num mas tseem ceeb heev, ib yam nkaus li txoj kev thiab txoj hauv kev uas koj xaiv. Txawm lawv twb ntseeg Vajtswv tau ntau xyoo npaum li cas lawm los xij, cov uas ua tsis tau lawv tej dej num zoo yuav raug muab tshem tawm mus.