Qee tus tib neeg twb ntseeg Vajtswv tau ntau xyoo lawm tiam sis tseem tuav rawv tej kev zoo siab rau zaub mov, khaub ncaws, thiab lwm yam kev xyiv fab ntawm lub cev nqaij daim tawv thiab. Tej no ua puas tau rau tib neeg txaus siab? Qee tus uas twb ntseeg Vajtswv tau ntau xyoo lawm ntawd twb paub tsis tseeb txog qhov uas tib neeg tim tsum tshaj plaws li. Thaum qee tus tib neeg pom Kuv muab qee yam rau qee tus neeg mas nws pib yws hais tias, “Yog ua cas Vajtswv thiaj li saib xyuas lawv es tsis saib xyuas kuv? Kuv tseem tsis tau muaj yam khoom ntawd.” Qhov tseeb tiag, koj tsis tshaib plab, thiab koj tsis yog tsis muaj khaub ncaws hnav. Koj tsuas siab hlob xwb; tsis paub txaus koj lub siab li, thiab koj nyiam sib tw rau txhua yam. Qhov saib xyuas nej ntawd tsis yog Kuv txoj hauj lwm. Koj yuav tsum coj koj tus kheej kom muaj tej hauv paus ntsiab lus. Tsis txhob ua kom tau raws li koj tej kev ntshaw los sis kom tau txiaj ntsim. Tej no puav leej yog cov sab nraud xwb; tej no tsis yog qhov ua kom koj tau txais qhov tseeb thiab txoj sia. Txawm nyob rau sab nraud koj yuav hnav khaub ncaws zoo npaum li cas los xij, koj lub siab yeej tseem tsis muaj dab tsi li yog koj tsis tau txais qhov tseeb. Thaum tham xwb mas tib neeg to taub tej no kawg, tiam sis thaum ntsib tej no tiag tiag lawm mas lawv pab tsis tau lawv tus kheej li. Lawv tsis tuaj yeem paub tias tej no yog dab tsi. Nyob rau hauv lub ntiaj teb no muaj ntau tus tib neeg uas muaj txiag nplua nuj thiab muaj hwj chim, yog li ntawd cov tib neeg no ua hom neej zoo li cas? Puav leej yog noj, haus, thiab ua kom lawv tus kheej muaj kev lom zem; ua kom yeej thiab noj haus txhua hnub; ua kom qhua muaj kev lom zem thiab muab khoom plig xwb; thiab ua yam tsis xyuam xim li. Lawv ua neej li no. Lawv puas muaj tib neeg lub neej? Lawv tsis muaj. Yam uas lawv tsom ntsoov rau tag hnub ntawd ces yog ua rau lawv tus kheej ruam, hnav cov khaub ncaws zoo zoo, muaj plhus rau txhua qhov chaw uas lawv mus, thiab ua dab tsi los yuam pes ntiag xwb. Cov tib neeg zoo li no zoo li cas? Lawv yog cov dab phem thiab Ntxwgnyoog cov tib neeg; lawv yog tsiaj xwb. Thaum cov tib neeg muaj txiag nplua nuj qee tus muaj kev zoo siab txaus lawm, ces lawv tsis xav ua neej nyob lawm yog li ntawd lawv thiaj li tua lawv tus kheej. Tej zaum lawv muaj kev zoo siab rau zaub mov, khaub ncaws, thiab kev lom zem txaus lawm, tiam sis vim li cas lawv thiaj li tua lawv tus kheej? Los ntawm qhov no yus tuaj yeem pom tau hais tias lub koob lub npe thiab txiaj ntsim, lub meej mom, kev muaj txiag nplua nuj, zaub mov, khaub ncaws, thiab tej kev xyiv fab ntawd tsis yog yam uas tib neeg xav tau tiag tiag. Nej yuav tsum tsis txhob caum tej ntawd. Yog koj tos kom txog thaum koj ua phem dhau uas cawm tsis tau lawm mam li thim rov qab, ces yuav lig dhau lawm! Thaum tus tib neeg txawj ntse pom lwm tus tib neeg ua tsis tiav, mas tus tib neeg txawj ntse ntawd tau txais kev paub ncaj qha los ntawm qhov ua tsis tiav ntawd yam lawv tus kheej tsis tas yuav raug qhov ntawd li. Tiam sis, tus tib neeg tsis paub dab tsi mas txawm twb ua tsis tiav tag thiab ua tsis tiav dua los yeej tseem kawm tsis tau dab tsi los ntawm tej uas ua tsis tiav ntawd li. Yuav tsum tau qhuab ntuas lawv ua ntej mas lawv thiaj li yuav paub txog qee yam, tiam sis thaum ntawd ces nws lig dhau lawm. Cov uas tsis paub dab tsi hlo li mas yuav txais tsis tau qhov tseeb. Tsuas yog cov tib neeg txawj ntse uas paub Vajtswv tes hauj lwm xwb thiaj li txais tau qhov tseeb. Qhov tseeb yog qhov hais tias txhua tus tib neeg puav leej tim tsum qhov tseeb, thiab tsuas yog caum qhov tseeb xwb mas lawv thiaj li yuav dim. Txawm koj yog ib tug ntawm cov neeg Vajtswv xaiv los sis yog Lwm Haiv Neeg los xij, koj tim tsum txoj kev pab los ntawm qhov tseeb, thiab koj tim tsum Vajtswv txoj kev cawm dim. Qee tus tib neeg tsis muaj kev ua neej kiag li thiab tsis lees txais qhov tseeb ib qho me me li—cov tib neeg zoo li no yog tsiaj xwb. Tej zaum lawv koom tej kev pe hawm thiab, tiam sis yam lawv caum hauv lawv lub siab ces yog tej kev zoo siab uas txhaum, tej kev zoo siab rau zaub mov, khaub ncaws, thiab tej kev lom zem, thiab lawv muaj tej no puv npo xwb. Lawv tsis nrhiav qhov tseeb kiag li, thiab lawv lub siab puv npo tej kev xav uas ntseeg hais tias tsis muaj Vajtswv, thiab tej tswv yim ntawm txoj kev xav uas xav hais tias tib neeg los ntawm liab los xwb. Txawm yog koj yuav qhia lawv txog qhov tseeb npaum li cas los xij lawv tsis hnov koj hais li, thiab tab txawm yog lawv paub hais tias kev ntseeg Vajtswv mas yog ib qho zoo thiab muaj peev xwm ua tau siab ntev nyob rau hauv lawv txoj kev ntseeg los xij, lawv tsis muaj peev xwm pib taug txoj kev caum qhov tseeb ntawd li. Vim li ntawd cov uas tsis nyiam qhov tseeb thiaj li tsis yog cov uas Vajtswv tau npaj tseg rau Nws txoj kev cawm dim lawm.

Tam sim no muaj ntau tus tib neeg uas muaj txoj kev ntseeg Vajtswv uas tsis meej pem kiag li. Lawv tsis paub tias yuav tau txais dab tsi nyob rau hauv txoj kev ntseeg Vajtswv; lawv tsis to taub tias txoj kev ntseeg Vajtswv ntawd yog ntseeg rau dab tsi—lawv tsis paub li. Lawv tsis paub dab tsi txog yam uas tib neeg yuav tsum ua neej nyob txhawm rau, yam lawv yuav tsum ua neej raws, los sis yuav ua neej li cas es thiaj li yuav muaj nuj nqis thiab tseem ceeb ntawd kiag li. Yog koj paub tsis tseeb nyob rau hauv koj lub siab hais tias vim li cas koj thiaj li yuav tsum ntseeg Vajtswv, ces qhov kev tsim txom thiab qhov kev mob siab uas koj muaj nyob rau hauv koj txoj kev ntseeg Vajtswv ntawd tsis muaj nuj nqis los sis tsis tseem ceeb li. Qhov tib neeg hais tias tau txais txiaj ntsim los ntawm lawv txoj kev ntseeg Vajtswv ntawd yog txhais li cas kiag? Yog koj txoj kev ntseeg tsis yog kom tau txais qhov tseeb thiab txoj sia no, koj yuav tsis khuv xim thaum Vajtswv tes hauj lwm tag thiab txiav txim rau tib neeg tej txiaj ntsim lod? Thaum koj txiav txim siab los raws Vajtswv qab thawj zaug ntawd, qhov ntawd puas yog nyob nyob es cia li tshwm sim, los sis puas yog koj xav txog txoj kev ntseeg Vajtswv thiab xav ua ntej koj txiav txim siab lawm? Koj ua neej nyob txhawm rau dab tsi kiag? Koj txoj hauv kev hauv lub neej yog dab tsi, thiab koj tej hom phiaj yog dab tsi? Koj puas muaj qhov kev txiav txim siab los raws Vajtswv qab kom mus txog thaum kawg thiab kom thaum kawg tau txais qhov tseeb? Koj puas paub tseeb tias koj yuav tsis tso tseg nrab ke? Koj puas muaj peev xwm ua siab ncaj ncees ua koj tes dej num txawm yuav muaj xwm txheej dab tsi tshwm sim los xij los sis txawm koj yuav ntsib tej kev txom nyem, tej kev sim siab, tej kev nyuaj, los sis tej teeb meem dab tsi los xij li? Qee tus tib neeg twb tsis muaj qhov kev ntseeg me me no los sis qhov kev txiav txim siab los caum qhov tseeb li. Yog li ntawd, qhov tau txais qhov tseeb mas yuav tsis yooj yim. Thaum tib neeg tsis nyiam qhov tseeb, ces lawv tsis muaj peev xwm ua lawv tes dej num yam txaus siab hlo thiab tsis muab lawv tus kheej fij rau Vajtswv tiag tiag. Cov tib neeg uas zoo li no yuav ua li cas raws tau Vajtswv qab mus kom txog thaum kawg? Yog koj nug lawv hais tias, “Vim li cas koj thiaj li ntseeg Vajtswv? Koj xav tau dab tsi los ntawm txoj kev ntseeg Vajtswv? Koj yuav tsum taug txoj kev twg?” mas lawv yuav tsis paub thiab yuav teb tsis tau li. Qhov no ua tau pov thawj qhia hais tias lawv tsis yog raws Vajtswv qab kom tau qhov tseeb thiab txoj sia, tiam sis yog nrhiav lub cib fim kom tau txais koob hmoov xwb. Tus tib neeg uas zoo li ntawd yuav ua li cas ua tau nws tes dej num tiav tiag tiag? Cov uas nyiam qhov tseeb tiag tiag yim to taub qhov tseeb, ces lawv yim kub siab ua lawv tes dej num xwb. Cov uas tsis to taub qhov tseeb mas feem ntau pheej xav phem thaum ua lawv tes dej num. Yog lawv tsis tuaj yeem lees txais qhov tseeb, ces lawv yuav tso tseg. Cov uas caum qhov tseeb mas txawv xws li: Lawv yim ua lawv tes dej num, mas lawv yim to taub qhov tseeb xwb, thiab thaum lawv to taub lawm, ces yaug tau lawv txoj kev qias vuab tsuab dawb huv lawm. Tib neeg yim to taub qhov tseeb, ces lawv yim xav tias yam lawv tau txais nyob rau hauv qhov raws Vajtswv qab ntawd mas puav leej zoo dua, thiab lawv tuaj yeem paub hais tias txoj kev uas raws Vajtswv qab ntawd mas lawv yim taug mas yim pom kev tuaj xwb. Cov no yog cov tib neeg uas tau txais qhov tseeb lawm. Yog tib neeg yeej to taub qhov tseeb tiag tiag lawm, ces lawv yeej yuav ruaj siab rau txoj kev raws Vajtswv qab thiab ua lub siab ncaj ncees kom mus txog thaum kawg xwb.

Thaum ib txhia muaj mob es lawv txoj sia yuav ciaj yuav tuag ntawd, mas lawv thov Vajtswv kom cawm lawv, ces thaum lawv dhau tus mob ntawd lawm, lawv to taub txog qhov tseeb me ntsis lawm. Tiam sis tsis yog txhua tus yuav raug qhov hu Vajtswv thaum yuav ciaj yuav tuag ntawd. Saib tej kev ntsib kev pom uas ib txhia tib neeg tau ntsib tau pom thiab mloog lawv tej lus qhia thiab lawv tej kev xav ntawd xwb, ces koj yuav kawm tau los ntawm tej ntawd. Tab txawm yog koj tus kheej tsis raug los xij, koj tuaj yeem nkag siab qee yam los ntawm tej uas lwm tus raug ntawd. Ib txhia tib neeg mas, thaum lawv yuav tuag, lawv xav hais tias lawv tsis tau hloov ntau yam, tias lawv paub Vajtswv me ntsis xwb, thiab tias yam uas lawv tau ua thiab tau siv rau Vajtswv lawm ntawd mas tsawg heev. Lawv xav hais tias lawv tsis tau caum qhov tseeb nyob rau ntau lub xyoo uas lawv ntseeg Vajtswv ntawd, tias lawv tau txais tsawg heev hos tshuav Vajtswv nuj nqis ntau heev. Yog lawv tuag, lawv yuav tuag yam tsis txaus siab li, vim lawv yuav tsis muaj lub hwv tsam los lees txim hloov dua siab tshiab ntxiv lawm. Thaum Yauj ntsib tej kev sim siab, nws lub cev ua pob thoob plaws; nws tus poj niam tsis to taub nws thiab thuam nws, thiab nws tej phooj ywg tsis to taub nws thiab haj tseem txiav txim thiab thuam nws thiab, lawv ntseeg hais tias nws yuav tsum tau ua ib yam dab tsi tsis zoo thiab ua txhaum rau Vajtswv Yehauvas lawm xwb. Lawv hais rau Yauj hais tias, “Yog ua cas koj thiaj li ua txhaum rau Vajtswv Yehauvas? Cia li lees koj tej kev txhaum. Vajtswv Yehauvas yog tus ncaj ncees.” Tiam sis Yauj to taub hauv nws lub siab thiab tsis xav tias nws tau ua ib yam dab tsi tsis zoo lawm. Tiam sis qhov nws raug ib txoj kev sim siab zoo li no yeej tseem yog ib qho mob heev! Nws xav tuag lawm xwb tsis xav ua neej li lawm thaum nws raug txoj kev txom nyem; nws raug kev txom nyem loj heev txog ntua qhov uas nws xav hais tias txoj kev tuag lawm xwb mas nws thiaj li yuav dim ntawm txoj kev txom nyem ntawd, tias txoj kev tuag thiaj li yuav xaus tau qhov kev txom nyem ntawd, tiam sis nws yeej tseem muaj peev xwm qhuas Vajtswv hauv nws lub siab thiab. Qhov no tsis yog ib yam uas tus neeg dog dig yuav ua tau. Tib neeg feem coob tsis qhuas Vajtswv thaum lawv raug mob. Lawv cia li yuam Nws hais tias, “Vajtswv, cia li muab ib txoj pa rau kuv ntxiv. Ua kom kuv zoo rov qab tsuag tsuag! Kuv mam li ua txhua yam li Koj xav kom kuv ua thaum kuv zoo lawm.” Lawv pib sim khom nqi. Koj yuav tsum ua li cas rau kev mob nkeeg thaum kev mob nkeeg los txog lawm? Koj yuav tsum los cuag Vajtswv thiab thov Vajtswv, tshawb thiab nrhiav Vajtswv qhov kev npaj siab; koj yuav tsum saib koj tus kheej kom meej seb yam uas koj tau ua uas tawm tsam qhov tseeb ntawd yog dab tsi, thiab qhov kev qias vuab tsuab uas koj tseem tsis tau daws ntawd yog dab tsi. Yog tsis raug kev txom nyem mas yeej daws tsis tau koj tus moj yam qias vuab tsuab li. Tsuas yog raug kev txom nyem xwb mas tib neeg thiaj li tsis phem, thiab muaj peev xwm nyob tau rau ntawm Vajtswv lub xub ntiag txhua lub sij hawm. Thaum tib neeg raug kev txom nyem, mas lawv thov Vajtswv tas li xwb. Lawv tsis xav txog tej kev zoo siab rau zaub mov, khaub ncaws, thiab lwm yam kev xyiv fab li; lawv thov Vajtswv tas li hauv lawv lub siab, saib lawv tus kheej kom meej seb lawv puas tau ua ib yam dab tsi uas yuam kev los sis tej zaum lawv tau tawm tsam qhov tseeb nyob rau qhov twg lawm. Feem ntau, thaum koj muaj ib tug mob hnyav los sis ib tug mob txawv txawv uas ua rau koj raug kev txom nyem loj heev, mas qhov no tsis yog nyob nyob es cia li tshwm sim. Tsis hais koj muaj mob los sis noj qab nyob zoo li, qhov ntawd yog raws li Vajtswv qhov kev npaj siab. Thaum Vajntsujplig Dawb Huv ua hauj lwm thiab koj lub cev nqaij daim tawv noj qab nyob zoo, mas feem ntau koj yeej nrhiav tau Vajtswv, tiam sis thaum koj muaj mob thiab raug kev txom nyem lawm koj tsis nrhiav Vajtswv, thiab koj tsis paub tias yuav nrhiav Nws li cas lawm. Koj nyob nrog kev mob kev nkeeg, pheej xav hais tias yuav kho li cas es thiaj li yuav ua rau koj zoo sai sai xwb. Koj khib cov uas tsis muaj mob nyob rau lub sij hawm zoo li no, thiab koj xav muab koj txoj kev mob kev nkeeg thiab txoj kev mob tshem tawm mus kom sai li sai tau. Tej no yog tej kev xav tsis zoo thiab tawm tsam. Thaum tib neeg muaj mob, mas tej thaum lawv xav hais tias, “Puas yog qhov kuv tus kheej tsis paub dab tsi ntawd ua rau kuv muaj qhov kev mob kev nkeeg no, los sis qhov kev mob kev nkeeg no yog Vajtswv qhov kev npaj siab?” Lawv cia li xav tsis tawm li lawm. Tseeb tiag lawm, qee tus mob mas yeej ib txwm muaj, tej yam xws li ua npaws, kab mob sib kis, los sis khaub thuas. Thaum koj raug ib tug mob loj ua rau txom nyem uas cia li ua rau koj ntog, uas koj yeem tuag dua li raug kev txom nyem lawm, mas ib tug mob uas zoo li no tsis yog nyob nyob es cia li tshwm sim. Koj puas thov Vajtswv thiab nrhiav los ntawm Nws thaum kev mob kev nkeeg thiab kev txom nyem los thaiv koj kev? Vajntsujplig Dawb Huv tes hauj lwm coj koj kev thiab coj koj li cas? Puas yog Nws tsuas qhia thiab qhia kom koj paub qhov tseeb xwb? Qhov ntawd tsis yog tsuas yog Nws lub tswv yim nkaus xwb; Nws kuj yuav sim koj thiab tsim kho kom koj zoo thiab. Vajtswv sim tib neeg li cas? Nws tsis sim tib neeg los ntawm qhov ua kom lawv raug kev txom nyem lod? Kev raug txom nyem mas nrog kev sim mus ua ke ntag. Yog tsis sim no, tib neeg raug kev txom nyem tau li cas? Thiab yog tsis raug kev txom nyem no, tib neeg yuav ua li cas hloov tau? Kev raug txom nyem mas nrog kev sim mus ua ke ntag—qhov ntawd yog Vajntsujplig Dawb Huv tes hauj lwm. Qee zaus Vajtswv cia tib neeg raug qee yam kev txom nyem vim tias yog tsis ua li ntawd ces lawv yuav tsis paub lawv qhov chaw nyob rau hauv lub qab ntuj khwb no, ces lawv yuav khav txiv. Txoj kev qhia txog qhov tseeb nkaus xwb yuav daws tsis tau tus moj yam qias vuab tsuab tag nrho. Lwm tus yuav muab koj tej teeb meem qhia tawm, ces koj tus kheej mam li paub tej teeb meem ntawd, tiam sis koj hloov tsis tau tej teeb meem ntawd. Txawm koj yuav vam khom rau koj txoj kev npaj siab los txwv koj tus kheej npaum li cas los xij, tab txawm npuaj koj tus kheej lub ntsej muag, ntaus koj tus kheej lub taub hau, muab koj tus kheej tsoo phab ntsa, thiab rhuav tshem koj tus kheej lub cev nqaij daim tawv los yuav daws tsis tau koj tej teeb meem li. Vim tias muaj ib tug moj yam phem nyob rau hauv koj uas pheej tsim txom koj, cuam tshuam koj, thiab ua rau koj muaj txhua hom kev xav thiab tswv yim, ces koj tus moj yam qias vuab tsuab yuav tawm tuaj. Yog li ntawd, koj yuav ua li cas yog koj kho tsis tau tus moj yam qias vuab tsuab ntawd? Yuav tsum yog muab kev mob los kho koj mas thiaj li yuav zoo xwb. Ib txhia mas raug kev txom nyem heev nyob rau hauv qhov kev kho kom zoo no uas lawv tiv tsis taus li lawm, yog li ntawd lawv thiaj li pib thov Vajtswv thiab nrhiav. Thaum koj tsis muaj mob, mas koj siab phem thiab khav theeb heev. Thaum koj muaj mob lawm, mas koj thiaj li mloog lus—koj puas tseem tuaj yeem khav theeb heev thaum muaj mob lawm? Thaum koj yuav luag tsis muaj zog hais lus lawm, koj puas yuav qhia tau lwm tus los sis khav theeb tau lawm? Thaum lub sij hawm zoo li ntawd lawm, koj tsis tim tsum dab tsi li lawm; koj tsuas xav muab koj qhov kev txom nyem ntawd tshem tawm mus lawm xwb, tsis xav txog ib yam zaub mov, khaub ncaws, los sis kev xyiv fab li lawm. Nej feem coob tseem tsis tau raug qhov kev xav ntawd, tiam sis thaum nej raug lawm nej mam li paub. Tam sim no muaj ib txhias uas ua txhua yam rau txoj hauj lwm, rau tej kev zoo siab ntawm lub cev nqaij daim tawv, thiab rau lawv tus kheej tej kev ntshaw. Qhov no puav leej yog vim lawv qhov ntawd loj dhau, qhov lawv raug kev txom nyem ntawd me dhau, thiab lawv poob ntsej muag lawm. Cov tib neeg no muaj kev nyuaj siab thiab kev tsim kho kom zoo ua ntej lawv lawm!

Qee zaum Vajtswv yuav npaj qee qhov xwm txheej rau koj, qhuab qhia koj los ntawm cov tib neeg uas nyob ib puag ncig koj thiab ua rau koj raug kev txom nyem, ua kom koj kawm tej kev qhia ntawd thiab ua rau koj to taub qhov tseeb thiab pom tias tej ntawd zoo li cas. Tam sim no Vajtswv tab tom ua tes hauj lwm no, uas yog ua kom koj lub cev nqaij daim tawv raug kev txom nyem, kom koj thiaj li tau kawm qhov qhia koj, kho koj tus moj yam qias vuab tsuab thiab ua koj tes dej num kom tiav zoo. Povlauj pheej hais tias nws muaj ib tug pos nyob rau hauv nws lub cev nqaij daim tawv. Tus pos no yog dab tsi? Tus pos no yog ib tug mob uas nws khiav tsis dim. Nws yeej paub zoo heev hais tias tus mob ntawd yog dab tsi, tias tus mob ntawd yog qhia txog nws tus moj yam thiab nws tus yam ntxwv ntag. Yog tus pos no tsis daig nyob rau hauv nws, yog tus mob no tsis raws nws qab, ces tej zaum nws yuav tsa nws tus kheej lub nceeg vaj nyob rau ib qho chaw twg thiab lub sij hawm twg los tau, tiam sis vim nws muaj mob lawm nws thiaj li tsis muaj zog. Yog li ntawd, qhov mob ntev ntev ntawd yog ib hom “kaus tiv thaiv” tib neeg. Yog koj tsis muaj mob, es muaj muaj zog, ces koj yuav ua qee yam kev phem thiab ua rau muaj qee yam teeb meem. Tib neeg yuav feeb tsis meej yam yooj yim heev thaum lawv khav theeb thiab siab phem heev lawm. Lawv yuav tu siab thaum lawv ua kev phem, tiam sis thaum ntawd lawv yuav pab tsis tau lawv tus kheej lawm. Vim li ntawd qhov muaj ib tug mob me me ntawd mas yog ib qho zoo, yog ib qho kev tiv thaiv tib neeg. Tej zaum koj yuav daws tau lwm tus tib neeg tej teeb meem tag nrho thiab koj kho tau tej teeb meem uas nyob rau hauv koj tus kheej txoj kev xav, tiam sis koj yeej ua tsis tau dab tsi thaum koj mob tsis zoo lawm. Qhov muaj mob ntawd koj yeej tswj tsis tau li. Yog koj muaj mob es tsis muaj kev kho tau li, ces qhov ntawd yog qhov kev txom nyem uas koj yuav tsum tau nyiaj. Tsis txhob sim muab tus mob ntawd tshem tawm mus; koj yuav tsum xub ua raws li Vajtswv hais, thov Vajtswv, thiab nrhiav Vajtswv tej kev ntshaw tso. Cia li hais tias: “Au Vajtswv, kuv paub hais tias kuv qias vuab tsuab thiab kuv tus yam ntxwv mas tsis zoo. Kuv muaj peev xwm ua tej yam uas ntxeev siab thiab tawm tsam Koj, tej yam uas ua rau Koj mob siab thiab ua rau mob Koj. Qhov Koj cia kuv muaj tus mob no mas zoo heev. Kuv yuav tsum mloog lus. Thov qhia kuv, ua kom kuv to taub Koj qhov kev npaj siab tias yog dab tsi, thiab yam uas Koj xav hloov thiab ua kom zoo tshaj plaws nyob rau hauv kuv ntawd yog dab tsi. Kuv tsuas thov kom Koj coj kuv kev, kom kuv thiaj li to taub qhov tseeb thiab taug tau txoj kev yog ntawm lub neej xwb.” Koj yuav tsum nrhiav thiab thov Vajtswv. Koj yuav cia li tsis meej pem tsis tau, ntseeg tias tsis muaj dab tsi ua rau muaj mob, tias qhov koj raug qhuab qhia ntawd tsis yog vim ua txhaum rau Vajtswv. Tsis txhob txiav txim ceev ceev. Yog koj yeej yog tus uas muaj Vajtswv nyob rau hauv siab tiag tiag, ces txawm koj yuav ntsib dab tsi los xij li, tsis txhob cia yam ntawd dhau koj mus. Koj yuav tsum thov Vajtswv thiab nrhiav, xav txog Vajtswv txoj kev ntshaw txhua lub sij hawm, thiab xyaum ua raws li Vajtswv hais. Thaum Vajtswv pom hais tias koj tuaj yeem ua raws li Vajtswv hais thiab tias koj muaj lub siab uas ua raws li Vajtswv hais lawm, ces Nws mam li txo koj txoj kev txom nyem. Vajtswv ua tau tej yam zoo li no los ntawm qhov kev txom nyem thiab kev kho kom zoo.

Thoob plaws hauv keeb kwm, mas cov Ntseeg Vajtswv, cov thwj tim, thiab cov cev Vajtswv lus puav leej raug xuas pob zeb ntaus tuag, raug muab nees hai kom tuag, raug muab txiav ua tej toom, raug muab roj hau, raug ntsia rau saum ntoo khaub lig.... Tus tuag li cas los muaj li. Qhov Kuv hais li no yog txhais hais tias, tsis txhob xav tias yuav tau ua hauj lwm nyob rau hauv lub tuam txhab uas zoo thaum koj raws Vajtswv qab. Tsis txhob thov kom tau qhov no; tsis txhob muaj qhov kev xav kom tau qhov no hlo li. Vim li cas Kuv thiaj li hais tias qhov tib neeg yuam Vajtswv ntawd mas tsis yog lawm? Vim hais tias txhua qhov kev yuam me ntsis ntawd mas npaum nkaus li ib qho kev xav tau uas loj dhau lawm, yog li ntawd koj yuav tsum tsis txhob muaj tej no. Tsis txhob xav kom tau yam ub yam no, hais tias, “Au Vajtswv, Koj muab khaub ncaws zoo rau kuv hnav, vim kuv tsim nyog hnav yam zoo lawm. Au Vajtswv, tam sim no kuv tab tom ua kuv tes dej num, yog li ntawd kuv yeej tsim nyog thov kom Koj foom koob hmoov rau kuv thiab ua kom kuv noj qab nyob zoo.” Yog muaj ib hnub es koj muaj mob lawm no, koj puas yuav xav phem? Koj puas yuav tsis ntseeg Vajtswv lawm? Koj puas tseem ua koj tes dej num lawm yog koj noj tsis qab nyob tsis zoo? Qhov ua koj tes dej num ntawd tsis yog qhov koj yuav tsum tau ua lod? Tes dej num ntawd yog ib teg uas lub ntuj muab los, yog ib lub luag hauj lwm uas muab pov tseg tsis tau. Koj yuav tsum ua koj tes dej num, tab txawm yog tsis muaj leej twg ua los xij. Nov yog qhov kev txiav txim siab uas koj yuav tsum muaj. Ntau tus tib neeg xav hais tias, “Yog kuv tseem yuav tsum tau raug kev txom nyem thaum kuv ntseeg Vajtswv thiab, ces qhov kuv raws Nws qab ntawd yog raws ua dab tsi? Kuv raws Vajtswv qab kom tau Nws tej koob hmoov xwb. Yog tsis tau koob hmoov, ces kuv yuav tsis raws Nws qab lawm!” Qhov saib zoo li no tsis yuam kev lod? Nej sawv daws twb pom nyob rau hauv qhov nej raug los tau npaum li no lub xyoo lawm hais tias cov uas caum qhov tseeb tiag tiag ntawd mas yeej tsis pom lawv tau koob hmoov zoo li tib neeg xav li. Qhov yog tus neeg uas leej twg los qhuas thiab txhua hnub tsis muaj kev txhawj xeeb, tau hnav zoo, txhua yam mus zoo, thiab vam meej nyob rau hauv lub ntiaj teb ntawd—mas txhua yam tsis zoo li no rau txhua tus. Lawv txhua tus puav leej ua neej ib hnub dhau ib hnub, raug teeb meem tag raug teeb meem tuaj. Ib txhia tib neeg mas raug ntxub ntxaug thiab raug thab nyob rau ntawm lawv tej hauj lwm uas nyob rau lwm qhov chaw; ib txhia tib neeg mas kab mob raws tas li xwb; tseem muaj lwm tus uas ua lag ua luam tsis nce tes, thiab lawv tsev neeg uas tsis ntseeg ntawd tso lawv tseg thiab. Lub neej muaj qhov nce thiab qhov nqis; nws yeej tsis cia li mus zoo zoo li. Tib neeg yim caum qhov tseeb, mas lawv yim raug kev txom nyem, hos cov uas tsis caum qhov tseeb mas puav leej ua neej kaj siab lug xwb. Lawv tsis muaj mob los sis teeb meem li; txhua yam mus tau zoo heev rau lawv, thiab lwm tus khib lawv. Tiam sis lawv tsis muaj kev to taub lub neej txoj sia ib qho me me li, thiab lawv ua neej zoo li cov tsis ntseeg. Cov uas raws Vajtswv qab tiag tiag ntawd yeej yuav tsum raug kev tsim txom thiab kev txom nyem xwb. Yog li ntawd qhov ntawd ua tau pov thawj li cas thaum koj raug kev tsim txom thiab kev txom nyem? Qhov ntawd ua tau pov thawj qhia hais tias Vajtswv tseem tsis tau ncaim ntawm koj mus, tias Vajtswv tsis tau muab koj tso tseg, tias Vajtswv txhais tes yeej tuav rawv koj tsis tso li. Yog Nws tso, es koj poob mus rau hauv Ntxwgnyoog lub voj hlua lawm no, koj yuav tsis nyob rau qhov kev phom sij lod? Yog txhua hnub koj ua neej nyob rau hauv txoj kev txhaum uas nrhiav lub koob lub npe thiab txiaj ntsim, ntshaw kev zoo siab, thiab quav dej quav cawv, twv txiaj, thiab ua kev phem kev qias xwb, ces Vajtswv yuav muab koj tso tseg. Nws yuav tsis ceeb toom rau koj ntxiv lawm, ces koj yeej yuav raug muab tshem tawm mus xwb xwb li. Tej zaum koj yuav tau kev muaj txiag nplua nuj thiab lub meej mom ntawm sab ntiaj teb, tiam sis qhov tseeb tiag, koj plam yam uas muaj nqis tshaj plaws txhua yam lawm—qhov tseeb, uas yog txoj sia uas nyob mus ib txhis—uas koj twb tsis paub txog li!

Ib txhia tib neeg hais tias, “Vim li cas Vajtswv thiaj li pheej qhuab qhia kuv xwb? Vim li cas lwm tus tib neeg noj qab nyob zoo ua luaj hos kuv mas muaj mob tas li xwb? Vim li cas kuv thiaj li raug kev txom nyem tas li xwb? Vim li cas kuv tsev neeg txom nyem ua luaj? Vim li cas peb thiaj li tsis nplua nuj? Vim li cas kuv thiaj li hnav cov khaub ncaws zoo tsis tau? Yog ua cas lwm tus tib neeg thiaj li hnav tau cov khaub ncaws zoo?” Tsis txhob khib tias lwm tus tib neeg tau Vajtswv txoj hmoov hlub thiab tej koob hmoov ntau npaum li cas. Tej zaum yog vim lawv lub siab me thiab Vajtswv to taub qhov lawv ua tsis tau zoo, yog li ntawd Nws thiaj li muab qee qhov hmoov hlub rau lawv xyiv fab, cia lawv tau ntsib tau pom txoj hmoov hlub ntawd ib qho zuj zus, kom lawv thiaj li maj mam los to taub Nws tej dej num. Hos nyob li ntawm koj mas, Vajtswv muaj tej kev cheem tsum uas nruj heev. Raws li tib neeg pom koj lub neej mas tsis kaj siab kiag li, thiab koj pheej raug kev txom nyem xwb, tiam sis koj to taub ntau qhov tseeb, thiab koj yuav tsum ua Vajtswv tsaug thiab qhuas Vajtswv heev. Nov yog tus uas paub Vajtswv tej dej num. Tsuav tib neeg tuaj yeem to taub qhov tseeb xwb, ces qhov ntawd yog Vajtswv txoj koob hmoov uas loj tshaj plaws lawm, txawm lawv yuav raug kev txom nyem dab tsi los xij. Qhov pheej raug Vajtswv qhuab qhia thiab pheej raug tej kev sim siab ntawd, mas yog ua li ntawd kom koj thiaj li yuav tau kawm tas li thiab to taub qhov tseeb—qhov no txhais tau hais tias Vajtswv txoj kev hlub raws koj qab. Yog koj pheej ua siab phem es tseem tsis tau raug qhuab qhia, thiab tsis raug qhuab qhia, koj ua siab phem los ntev npaum li cas los, tsis muaj leej twg qhuab qhia koj los sis paub txog koj li, ces koj tag li ko lawm. Qhov no txhais tau hais tias Vajtswv twb tso koj tseg lawm. Muaj ib txhia tib neeg uas tsis ua dej num thiab tsis leg lub luag hauj lwm li. Lawv nyob ywj siab thiab tsis muaj kev txhawj xeeb li, nyob tau zoo heev. Lawv kawm tsis tau ib yam dab tsi, thiab lawv tsis tau dab tsi li. Qhov no puas yog kev zoo siab? Lawv tau txais dab tsi los ntawm qhov lawv tus kheej txaus siab hlo ua siab phem, los ntawm qhov lawv caum txoj kev ywj pheej thiab lawv tej kev xyiv fab ntawm sab cev nqaij daim tawv ntawd? Koj raug kev txom nyem thiab ua rau koj tus kheej sab los ntawm qhov ua koj tes dej num, thiab txhua tus txhawj txog koj; qee zaus lawv qhuab qhia koj. Qhov no qhia tias Vajtswv hlub koj thiab saib xyuas koj. Muaj ntau yam teeb meem, uas koj yuav tsum nrhiav, thiab koj yuav tsum thov Vajtswv ntxiv. Mas koj thiaj li yuav to taub Nws tej kev npaj siab. Txawm koj yuav ua tes dej num dab tsi los xij, koj yuav tsum tsis txhob ua raws li koj lub siab hlo li, los sis ua siab phem, los sis lam taus lam ua, los sis tawv ncauj txog koj tej kev uas yuam kev. Maj nroos los nrhiav qhov tseeb thaum koj muaj teeb meem. Qhov ua tau koj tes dej num tiav thiab ua tau rau Vajtswv txaus siab ntawd mas yog qhov tseem ceeb tshaj plaws, thiab koj lub siab yuav cia li muaj kev thaj yeeb thiab kev zoo siab lawm xwb. Yog koj txhob txwm los sis siab phem dhau lawm, thiab tsis lees txais kev qhuab qhia, thiab tawv ncauj heev thiab, ces koj yuav raug kev phom sij. Thaum koj raug rhuav tshem lawm, koj yuav tsis muaj lub hwv tsam ntxiv lawm, thiab mam li tu siab ces lig dhau lawm. Ib txhia tib neeg mas thov Vajtswv txhua lub sij hawm thaum lawv muaj mob thawj zaug, tiam sis tom qab ntawd, thaum lawv pom hais tias lawv cov lus thov kho tsis tau lawv lawm, ces lawv tsis tshua zoo siab rau lawv tus mob ntawd, yws txhua lub sij hawm, thiab hais hauv lawv lub siab hais tias, “Qhov ntseeg Vajtswv ntawd ua tsis tau ib qho dab tsi zoo rau kuv li. Kuv mob, es Vajtswv tsis kho kuv li!” Qhov no tsis yog txoj kev ntseeg tseeb. Tsis muaj kev mloog lus nyob rau hauv txoj kev ntseeg ntawd kiag li, thiab yam uas tawm ntawm txoj kev ntseeg ntawd los ces yog lawv txoj kev tuag xwb, thaum lawv yws tag lawm. Qhov no yog Vajtswv tshem lawv lub cev nqaij daim tawv tawm mus thiab muab lawv xa mus rau hauv ntuj tawg; uas yog qhov kawg ntawm txhua yam rau lawv. Lawv tsis muaj lub hwv tsam uas tau txais kev cawm dim nyob rau tiam no, thiab lawv tus ntsujplig yuav tsum mus rau hauv ntuj tawg. Qhov no yog theem kawg ntawm Vajtswv tes hauj lwm uas cawm tib neeg, thiab yog leej twg raug rhuav tshem lawm, mas tus ntawd yuav tsis muaj lwm lub hwv tsam li lawm! Yog koj tuag thaum Vajtswv tab tom ua Nws tes hauj lwm uas cawm tib neeg, ces qhov kev tuag no yog ib qho kev rau txim, tsis yog ib qho kev tuag li ib txwm tuag. Cov uas tuag vim txoj kev rau txim ntawd mas tsis muaj lub hwv tsam uas yuav dim li. Povlauj tsis raug rau txim tas li nyob rau hauv dab teb lod? Twb tau ob txhiab xyoo lawm los nws yeej tseem nyob li qub, uas yog raug rau txim! Thaum koj txhob txwm ua qee yam txhaum mas lub txim haj yam loj, thiab txoj kev rau txim haj yam yuav hnyav dua!

Ib txhia tib neeg hais tias, “Kuv muaj mob tas li, raug kev txom nyem thiab mob tas li xwb. Pheej muaj qee yam xwm txheej uas nyob ib puag ncig kuv, tiam sis kuv yeej tsis hnov Vajntsujplig Dawb Huv ua hauj lwm li.” Qhov no yog lawm. Feem ntau Vajntsujplig Dawb Huv yeej ua hauj lwm li no—koj yeej tsis paub li. Qhov no yog kev tsim kho kom zoo. Qee zaus Vajntsujplig Dawb Huv yuav qhia koj thiab cia koj to taub qee qhov tseeb los ntawm tej lus qhia. Qee zaus Nws yuav ua kom koj paub qee yam los ntawm cheeb tsam uas nyob puag ncig koj, thiab sim koj, tswj koj, thiab cob qhia koj nyob rau hauv cheeb tsam uas nyob puag ncig koj ntawd, ua kom koj loj hlob—qhov no yog qhov Vajntsujplig Dawb Huv ua hauj lwm. Yav dhau los nej yeej tsis paub thaum nej raug ntau yam vim nej tsis mob siab rau nrhiav qhov tseeb nyob rau hauv nej lub siab. Thaum ib tug tib neeg twg tsis to taub qhov tseeb, ces tus tib neeg ntawd yeej tsis pom tias txhua yam zoo li cas thiab pheej ua rau nws nkag siab yuam kev tas li xwb. Zoo ib yam li thaum ib tug tib neeg twg muaj mob es ntseeg hais tias qhov mob ntawd mas yog Vajtswv qhuab qhia nws, tiam sis qhov tseeb tiag lawm qee yam mob uas tib neeg mob ntawd mas yog los ntawm qhov tsis to taub txog tej kev ua neej xwb. Thaum koj noj yam tsis xyuam xim thiab tsis to taub txoj kev ua neej uas noj qab nyob zoo, ces ua txoj kev twg los koj yeej muaj mob li. Tiam sis koj hais tias qhov ntawd yog Vajtswv txoj kev qhuab qhia, tiam sis qhov tseeb tiag qhov ntawd tshwm sim tuaj yog vim koj tus kheej txoj kev tsis paub dab tsi xwb. Tiam sis tom qab ntawd, txawm tus mob ntawd yuav yog tib neeg ua los sis yog Vajntsujplig Dawb Huv ua los xij, qhov ntawd yog ib lub siab zoo los ntawm Vajtswv; qhov ntawd yog txhob txwm los ua kom koj muaj kev kawm xwb, yog li ntawd koj yuav tsum ua Vajtswv tsaug es tsis txhob yws. Txhua los lus uas koj yws yuav ua rau muaj ib qho tsuas, ces qhov tsuas ntawd yog ib qho kev txhaum uas ntxuav tsis tau pov tseg li! Thaum koj yws, yuav siv sij hawm ntev npaum li cas es koj thiaj li mam hloov? Yog koj xav phem me ntsis, ces tej zaum tom qab li ib lub hlis koj mam li hloov. Thaum koj yws thiab koj hais qee yam kev xav tsis zoo, ces tej zaum tom qab li ib lub xyoos los koj yuav tsis hloov, thiab Vajntsujplig Dawb Huv yuav tsis ua hauj lwm nyob rau hauv koj. Yog koj pheej yws tas li mas yuav tsis zoo rau koj, thiab yuav nyuaj rau koj uas tau txais Vajntsujplig Dawb Huv tes hauj lwm. Tib neeg yuav tsum tau siv zog thov Vajtswv heev mas thiaj li kho tau lawv lub siab kom tus thiab tau txais Vajntsujplig Dawb Huv qee qhov hauj lwm. Qhov hloov ib lub siab kom tag nrho mas tsis yooj yim. Tsuas yog nrhiav qhov tseeb thiab tau txais kev qhuab qhia thiab kev to taub zoo ntawm Vajntsujplig Dawb Huv xwb mas thiaj li yuav tau. Yeej muaj lub sij hawm uas nej tus kheej tau txais Vajntsujplig Dawb Huv tes hauj lwm. Tej no mas feem ntau yog thaum nej raug kev tsim txom thiab kev txom nyem los sis kev mob kev nkeeg thiab kev mob. Tsuas yog thaum ntawd xwb mas nej thiaj li thov Vajtswv tiag tiag, thov kom Nws kho nej, muab kev ntseeg thiab lub zog rau nej. Nej thov Vajtswv rau tib qho no xwb. Tej zaum nej xav thov Vajtswv ntxiv thiab nrhiav Vajtswv qhov kev npaj siab, tiam sis nej tsis paub tias yuav hais li cas. Nej xav qhia qee cov lus hauv nej lub siab rau Vajtswv, tiam sis nej tsis muaj dab tsi hais. Nej lub siab me dhau lawm. Qee zaus Vajtswv yuav muab ib lub sij hawm nyuaj rau koj los ntawm cov tib neeg uas nyob ib puag ncig koj ntawd. Nyob rau lub sij hawm ntawd, koj yeej ua tsis tau dab tsi li tsuas yog rov qab los nyob rau ntawm Vajtswv lub xub ntiag thiab pib thim xav hais tias, “Kuv tau ua txhaum dab tsi kiag? Vajtswv, thov qhia kuv thiab cia kuv to taub. Yog Vajtswv tsis qhia kuv, ces kuv yuav thov Vajtswv mus li. Yog kuv thov Vajtswv es kuv tseem tsis to taub thiab, ces kuv yuav nrhiav qhov no mus li, thiab kuv yuav nrhiav los ntawm tus uas to taub qhov tseeb” xwb. Qhov no yog qhov los leg lub luag hauj lwm rau koj tus kheej ntag. Ib txhia tib neeg mas yeej tsis nrhiav qhov tseeb li thaum muaj tej yam tshwm sim rau lawv. Lawv to taub qee cov lus thiab qee qhov kev qhuab qhia yog li ntawd lawv thiaj li xav tias lawv to taub qhov tseeb. Lawv ua rau lawv tus kheej ruam xwb, thiab qhov ntawd yog kev ruam. Lawv yog cov tib neeg uas ruam thiab tsis paub dab tsi tshaj plaws, thiab qhov uas yuav tshwm sim los ces yog lawv yuav ua rau lawv tus kheej puas tsuaj thiab rhuav tshem lawv tus kheej xwb, yeej tsis tau txais ib qho tseeb kiag li.

Nej yeej ib txwm tsis thov Vajtswv heev, puas yog? Thaum tib neeg tsis thov Vajtswv heev, ces lawv yeej tsis nrhiav heev, thiab yog lawv tsis nrhiav heev, ces nyuaj rau lawv los to taub qhov tseeb, thiab lawv tsis muaj kev mloog lus. Yog koj tsis muaj tus cwj pwm nrhiav, koj yuav ua li cas mloog lus? Koj yuav ua li cas to taub Vajtswv tej dej num? Koj twb tsis paub tias Vajtswv ua hauj lwm li cas rau hauv koj, thiab twb tsis paub tias koj yuav tsum mloog leej twg lus los sis koj yuav tsum ua raws li leej twg cov lus. Ces tsis tas nug txog qhov kev mloog lus ntawd li. Kev mloog lus tsis yog ib yam uas pom tsis tseeb. Qhov kev mloog lus ntawd cheem tsum ib lub hom phiaj thiab ib daim phiaj. Yog koj twb tsis paub tias vim li cas Vajtswv thiaj li nthuav qhov tseeb tawm los sis yam Nws ua ntawd no, koj yuav ua li cas mloog tau lus? Qhov kev mloog lus ntawd dhau los ua ib lo lus qhuav qhawv lawm xwb thaum koj hais lo lus ntawd. Thaum ib yam dab tsi tshwm sim rau koj lawm, koj yuav tsum thov Vajtswv li cas, thiab koj yuav tsum nrhiav li cas los ntawm qhov hais yam uas nyob rau hauv koj lub siab? Koj yuav tsum nrhiav dab tsi? Koj yuav tsum paub kom meej txog tej no ua ntej koj thov tau Vajtswv tiag tiag. Tsis txhob qog qhov uas lwm tus hais thaum koj thov Vajtswv, thiab haj yam tsis txhob qog Yexus cov lus uas hais tias, “Thov kom tiav raws li Koj lub siab nyiam.” Tsis txhob qog cov lus no yam dig muag ntsuav. Yam uas koj muaj nyob rau hauv koj ces tsuas yog kev qhuab qhia thiab kev to taub zoo xwb, nws yeej tsis npaum qhov ua kom tiav raws li Vajtswv lub siab nyiam li. Qee zaus thaum koj raug qhuab qhia los sis koj nyiaj qee qhov kev txom nyem ntawd, tsis txhob hais tias qhov no yog Vajtswv ua kom koj zoo tiav log los sis tias qhov no yog raws li Nws lub siab nyiam. Hais li no mas tsis yog lawm, thiab koj yuav tsum tsis txhob thov Vajtswv li no. Koj tab tom ua qhov tsis yog lawm, yog li ntawd Vajntsujplig Dawb Huv yuav tsis ua hauj lwm rau hauv koj. Ib txhia tib neeg qog Yexus cov lus thov Vajtswv uas hais tias, “Txawm li cas los xij, thov txhob ua li Kuv lub siab nyiam, tiam sis cia ua raws li Koj lub siab nyiam.” Qhov ua li ntawd puas yuav ua rau koj tus kheej zoo ib yam nkaus li Vajtswv? Raws li qhov kev xav ntawm lub cev nqaij daim tawv, Khetos thiaj li hais cov lus thov ntawd rau tus Ntsujplig uas nyob saum Ntuj Ceeb Tsheej. Nkawv muaj vaj huam sib luag ib yam nkaus, muaj meej mom tib yam nkaus. Nkawv yog tib tug Vajtswv, tsuas yog kev xav sib txawv xwb. Khetos thov Vajtswv li ntawd; yog tib neeg kuj thov Vajtswv li ntawd thiab, ces qhov ntawd qhia hais tias lawv tsis muaj qhov tsim nyog li, vim li ntawd es Vajntsujplig Dawb Huv thiaj li tsis qhia lawv kiag li! Cov lus uas koj hais yog cov lus qog xwb, tsis yog cov lus uas hais tawm hauv lub siab tuaj. Cov lus ntawd puav leej tsis muaj dab tsi li thiab tsis muaj qab hau, uas qhia tau hais tias koj lub siab me dhau lawm uas yuav muaj peev xwm to taub Vajtswv cov lus los sis tej kev cheem tsum. Vajntsujplig Dawb Huv yuav ua li cas qhia koj? Tib neeg paub tsis meej li! Yog tias lawv twb xav tsis tawm qhov no, ces lawv yeej yuav tsis to taub qhov tseeb li. Tsis txhob cia li qog lwm tus thaum koj thov Vajtswv. Koj yuav tsum muaj koj tus kheej tej kev xav thiab tej kev xam pom. Yog koj tsis to taub ib yam dab tsi, ces koj yuav tsum nrhiav qhov tseeb. Koj yuav tsum tau xav tas li tias yuav thov Vajtswv li cas thaum muaj lwm yam teeb meem los raug rau koj, thiab yog koj nrhiav tau ib txoj hauv kev mus rau yav tom ntej no, koj yuav tsum coj koj cov kwv tij thiab cov nkauj muam los thov Vajtswv li ntawd thiab. Qhov no yog qhov uas Vajtswv txaus siab rau. Txhua tus yuav tsum kawm tias yuav los rau ntawm Vajtswv lub xub ntiag li cas. Koj tus kheej tsis txhob sim daws txhua yam yam dig muag ntsuav, thiab tsis txhob ua raws li koj tej kev xav hauv siab. Yog ua li ntawd, koj ua tej yam uas ua rau muaj tej kev tab kaum thiab kev cuam tshuam thiab tawm tsam Vajtswv tej kev npaj siab xwb, ces qhov ua li ntawd yuav ua rau muaj teeb meem. Yog luag kom koj coj ib pawg ntseeg es koj pheej tshaj tawm tej lus qhuab qhia thiab kev qhuab qhia xwb, tiam sis tsis qhia tias yuav noj thiab haus Vajtswv cov lus li cas los sis yuav thov Vajtswv li cas li, ces koj ua yuam kev lawm. Yog koj pheej tshaj tawm tej lus qhuab qhia thiab kev qhuab qhia thiab qhia tib neeg txog cov lus thov Vajtswv uas tsis muaj dab tsi, uas lawv tsuas qog qee lus cov los ntawm phau Vajluskub thiab cov lus qhuab qhia xwb, ces txawm lawv yuav thov Vajtswv li cas los xij li, yeej yuav tsis tau dab tsi. Lawv lub neej yuav tsis nce qib, lawv txoj kev sib raug zoo nrog Vajtswv yuav tsis zoo li qub, thiab qhov no txhais hais tias koj kuj yuav coj lawv mus yuam kev thiab. Hom kev thov Vajtswv twg es thiaj li tau txais txiaj ntsim? Nws yog hom uas qhib siab lug qhia rau Vajtswv. Qhov tseem ceeb tshaj plaws yog, yus yuav tsum thov Vajtswv thiab nrhiav qhov tseeb raws li Nws cov lus thiab Nws tej kev cheem tsum. Qhov no xav kom yus ua tag siab nrho. Cov uas tsis ua kom tag siab nrho ntawd yuav pom tias qhov no mas ua tau nyuaj. Hom tib neeg twg uas Vajntsujplig Dawb Huv qhia? Hom uas kub siab lug thiab txawj xav. Thaum Vajntsujplig Dawb Huv ua rau lawv muaj ib qho kev xav los sis qhia lawv lawm, mas lawv paub hais tias qhov ntawd yog Vajntsujplig Dawb Huv tes hauj lwm, tias qhov ntawd yog Vajtswv ua. Los sis qee zaus, thaum Vajntsujplig Dawb Huv qhia los sis thuam lawv, mas lawv qhia tau tam sid thiab tswj tau lawv tus kheej. Cov no yog cov tib neeg uas Vajntsujplig Dawb Huv qhia. Yog tib neeg tsis xyuam xim thiab tsis muaj kev to taub sab ntsujplig, ces lawv yuav tsis paub thaum Vajntsujplig Dawb Huv ua rau lawv muaj ib qho kev xav. Lawv tsis mob siab rau Vajntsujplig Dawb Huv tes hauj lwm. Tej zaum Vajntsujplig Dawb Huv qhia lawv peb plaub zaug los, lawv tseem tsis lees txais qhov kev qhia ntawd li, yog li ntawd Vajntsujplig Dawb Huv thiaj li tsis ua hauj lwm rau hauv lawv ntxiv lawm. Vim li cas es ib txhia tib neeg thiaj li ntseeg mus ntxiv, tiam sis mus tsis txog Vajtswv los sis tsis hnov Vajntsujplig Dawb Huv ua hauj lwm, thiab hauv lub siab mas tsaus ntuj nti xwb, thiab nyuaj siab, thiab tsis muaj zog li? Vim lawv tsis muaj Vajntsujplig Dawb Huv txoj kev qhuab qhia kiag li. Lawv yuav ua li cas muaj zog rau tej yam uas tsis muaj sia thiab tej kev qhuab qhia ntawd? Tib neeg kub siab nkaus xwb yeej kav tsis ntev; tib neeg yuav tsum to taub qhov tseeb mas thiaj li muaj zog. Yog li ntawd, yuav kom ntseeg tau Vajtswv mas, tib neeg yuav tsum txawj xav, thiab lawv yuav tsum mob siab rau nyeem Vajtswv cov lus txog qhov paub lawv tus kheej, thiab txog qhov to taub qhov tseeb thiab qhov xyaum ua qhov tseeb ntawd. Tsuas yog thaum ntawd xwb mas lawv thiaj li yuav tau txais Vajntsujplig Dawb Huv tes hauj lwm thiab txoj kev coj. Ib txhia tib neeg tsuas muaj lub peev xwm to taub qhov tseeb xwb, tiam sis lawv yeej tsis tau pom los sis tsis tau ntsib Vajntsujplig Dawb Huv tes hauj lwm dua li. Qhov yuav mus rau tom ntej ntawd, nej yuav tsum mob siab rau qhov txawj xav thiab qhov pom kev zoo tshaj plaws. Txhua zaus uas muaj ib yam dab tsi tshwm sim rau nej, mas nej yuav tsum saib qhov ntawd kho qhov ntawd raws li qhov tseeb. Qhov no yog qhov uas koj yuav maj mam taug tau txoj kev ntseeg Vajtswv uas yog. Yog koj saib txhua yam raws li qhov koj lub cev nqaij daim tawv pom xwb; yog koj siv txoj kev qhuab qhia, qhov tsim nyog, thiab tej kev cai los tshuaj xyuas txhua yam xwb; yog koj tshuaj xyuas thiab daws txhua yam raws li tib neeg txoj kev xav xwb, ces qhov ntawd tsis yog nrhiav qhov tseeb, thiab koj yuav zwm tsis tau rau ntawm Vajtswv. Txawm koj twb ntseeg Vajtswv tau pes tsawg xyoo lawm los xij, koj yuav tsis nyob rau hauv Vajtswv cov lus, koj yuav yog tus nyob rau sab nraud, thiab koj yuav tsis to taub qhov tseeb. Tam sim no nej yuav tsum maj mam txav qhov nej mob siab mus rau txoj hauv kev no thiab siv zog mus rau qhov tseeb. Tom qab ua li no ntau xyoo lawm, nej lub siab yuav loj tuaj me ntsis thiab muaj peev xwm to taub qee qhov tseeb. Tsis txhob xav hais tias qhov los ntseeg Vajtswv qeeb ntawd tsis yog ib qho teeb meem, tias koj kuj to taub qhov tseeb qhov muaj tiag thaum lwm tus to taub thiab, los sis tias koj yeej yuav tsis poob qab li. Koj yuav tsum tsis txhob xav li no. Yog koj xav li no, koj yeej yuav poob qab xwb. Yog koj los ntseeg Vajtswv qeeb, mas koj haj yam yuav tsum tau maj nrawm nroos. Koj yuav tsum ua txhua yam li koj ua tau kom caum cuag, tsuas yog thaum ntawd xwb koj thiaj li yuav muaj peev xwm taug tau cov hneev taw ntawm Vajtswv tes hauj lwm thiab cheem tau koj tus kheej kom txhob poob qab thiab raug tshem tawm mus.

Txawm yuav muaj dab tsi tshwm sim rau koj los xij, koj yuav tsum saib yam ntawd raws li Vajtswv cov lus thiab daws yam ntawd raws li qhov tseeb. Ua li no mas pom teeb meem yooj yim, thiab qhov saib txhua yam raws li Vajtswv cov lus ntawd, koj yuav muaj peev xwm pom tias lub ntsiab tseeb ntawm txhua yam zoo li cas yam yooj yim heev. Ib txhia tib neeg pheej saib txhua yam raws li qhov kev kawm xwb. Lawv pheej kawm thiab tshuaj xyuas txhua yam raws li lawv lub hlwb los sis qhov kev saib thiab saib txhua yam raws li qhov lawv lub cev nqaij daim tawv pom xwb. Yog li ntawd lawv thiaj li tsis pom tias lub ntsiab tseeb ntawm tej teeb meem ntawd zoo li cas thiab thiaj li pheej mus yuam kev. Qhov no tuaj yeem zoo li no mus txog caum xyoo—lawv tuaj yeem zoo li no mus txog hnub tuag los yeej tsis pom txhua yam tseeb li. Piv txwv li, tej thaum koj muaj ib tug mob es koj xav hais tias tus mob ntawd tsuas yog ib tug mob li ib txwm mob xwb uas yeej tsim nyog mob lawm, tias tus mob ntawd tsis yog Vajtswv qhov kev qhuab qhia thiab tsis yog ib qho teeb meem, tiam sis qhov tseeb tiag, muaj ib qho teeb meem loj nyob rau hauv tus mob ntawd. Yog koj txawj xav txog qhov no thiab tuaj yeem thov Vajtswv thiab nrhiav qhov tseeb, ces tej thaum, thaum Vajntsujplig Dawb Huv qhia lub ntsiab lus rau koj, koj yuav paub txog qee qhov uas ua tsis tau zoo nyob rau hauv koj tus kheej los sis tej teeb meem uas nyob rau ntawm koj tus moj yam ntawd. Vajtswv muab ib tug mob rau koj yog los tsim kho koj, los ua kom koj raug kev txom nyem, los ua kom koj rov qab los rau hauv qhov ua tib zoo saib kom meej thiab ua tib zoo xav, kom pom tias tus mob no yog vim dab tsi kiag. Thaum koj rov qab los rau hauv qhov ua tib zoo saib koj tus kheej kom meej lawm, koj yuav pom lub hauv paus ntawm qhov teeb meem ntawd thiab muaj qee qhov kev paub txog koj tus kheej txoj kev qias vuab tsuab. Yog tsis muaj kev txom nyem me ntsis, ces koj yeej yuav xav hais tias koj zoo heev tas li xwb, thiab koj yuav tsis pom qhov kev qias vuab tsuab no. Ces koj yuav tsis to taub qhov tseeb uas koj xav tau. Nej puas tau muaj qhov zoo li no li? Vajntsujplig Dawb Huv ua txhua yam raws li lub sij hawm xwb, puav leej ua raws li qhov tib neeg tim tsum thiab puav leej ua raws li lawv lub siab thiab qhov xwm txheej tam sim ntawd xwb. Muaj lus hais tseg lawm hais tias Vajtswv tes hauj lwm mas raws sij hawm thiab twb ntsuas zoo zoo lawm, thiab raws li tau teem sij hawm tseg lawm yam tsis muaj ib qho qeeb li. Koj twb pom qhov no nyob rau hauv qhov koj tau ntsib tau pom tiag tiag lawm. Txhua zaus uas koj ntsib ib yam dab tsi, mas Vajntsujplig Dawb Huv tshoov koj siab thiab qhia koj tam sid, tiam sis koj koom tes tsis tau zoo kiag li. Koj ruam dhau lawm. Qee zaus koj paub tias muaj dab tsi tshwm sim tiam sis koj cia nws nyob nws li ntawd xwb tsis ua kom to taub qhov ntawd kom tob tob li. Koj txaus siab rau qhov kev to taub raws li qhov kev xav xwb, ces koj xav hais tias koj to taub lawm, tiam sis koj tseem tsis tau to taub tiag tiag. Yuav tsum tau txhawb qhov koj to taub raws li qhov kev xav ntawd mus rau ib qho kev to taub uas tsim nyog ua ntej koj muaj ib txoj hauv kev mus rau tom ntej. Yog Vajntsujplig Dawb Huv tshoov koj siab dua es koj tseem tsis quav ntsej qhov ntawd thiab tsis xav muab qhov ntawd sau cia rau hauv koj phau ntawv thiab, ces tsis ntev xwb koj yuav hnov qab qhov ntawd lawm. Koj yuav tsis tau txais qhov kev kaj no, qhov uas muaj qab hau no, thiab qhov ntawd yuav yog ib qho uas txaj muag heev. Cov tib neeg nquag muab txhua yam sau cia rau hauv lawv phau ntawv thiab zoo siab heev thaum lawv rov qab saib lawv phau ntawv dua. Lawv tau txais qee qhov pom kev nyob rau hauv qhov ua li no. Tus uas tsis quav ntsej thiab tsis muaj kev to taub sab ntsujplig yeej tsis paub qhov pom kev no—lawv twb tsis paub tias qhov pom kev yog dab tsi. Qhov pom kev no ci nyob rau hauv lawv thiab ploj mus lawm, thiab yog lawv pheej zoo li no, ces Vajntsujplig Dawb Huv yuav tsis ua hauj lwm rau hauv lawv. Yuav kom caum tau qhov tseeb mas, koj yuav tsum ua tib zoo xav thiab txawj xav; koj yuav tsum tsis txhob nkees. Koj kuj yuav tsum koom tes kiag tam sim ntawd thiab. Thaum koj muaj ib qho kev to taub raws li qhov kev xav lawm, koj yuav tsum tuav qhov kev to taub ntawd, maj nroos los ua tib zoo xav txog qhov kev to taub ntawd, thiab thov Vajtswv. Koj yuav tsum thov Vajtswv li cas? Thov Vajtswv raws li qhov kev qhuab qhia uas koj tau txais nkaus xwb. Tej zaum qhov ntawd yuav mloog zoo li yog koj tus kheej tej kev xav xwb los tsis ua cas. Tsuav koj muaj kev xyiv fab thiab paub meej xwb, ces koj yuav tsum thov Vajtswv thiab nrhiav. Kev paub qhov pom kev tshiab no thiab ua kom yog mas yog qhov tseem ceeb tshaj plaws. Yog thaum koj thov Vajtswv koj hais lus tau zoo heev, thiab koj kaj siab, ces yog koj raug qhia dua, thiab koj lub siab raug qhia kom paub qhov tseeb lawm, mas koj yuav tsum muab qhov pom kev tshiab no sau cia. Qhov no yog vim qee zaum koj tuaj yeem nco tau thaum koj muaj kev kaj siab, tiam sis koj hnov qab thaum koj tsis muaj kev kaj siab. Tib neeg tuaj yeem sau tau ntau nplooj ntawv thaum lawv sau ib tsab ntawv, tiam sis hais txog tej lus tim khawv uas hais txog kev paub los sis lawv qhov kev paub txog Vajtswv mas lawv sau tsis tau ib los li. Lawv tseem tsis muaj qhov tseeb. Cov uas nyiam qhov tseeb mas tsom ntsoov rau Vajntsujplig Dawb Huv txoj kev qhuab qhia thiab kev qhia kom paub qhov tseeb xwb. Cov uas tsis nyiam qhov tseeb yeej tsis saib qhov uas Vajntsujplig Dawb Huv qhuab qhia ntawd muaj nqis, uas qhia tau hais tias lawv tsis paub tias dab tsi yog qhov tseem ceeb, dab tsi yog qhov tsis tshua tseem ceeb, dab tsi yog qhov tim tsum, los sis qhov uas lawv yuav tsum tau txais ntawd yog dab tsi. Vim li no, lawv thiaj li plam Vajntsujplig Dawb Huv qhov kev qhuab qhia lawm. Qhov zoo tshaj plaws yog nqa ib phau ntawv me me nrog koj, kom thaum uas Vajntsujplig Dawb Huv qhia koj thiab koj tau txais qhov pom kev tshiab ntawd, koj thiaj li yuav tuav tau thiab muab sau tau cia. Vajntsujplig Dawb Huv ua hauj lwm lub sij hawm twg los tau thiab nyob rau qhov chaw twg los tau. Txawm tib neeg yuav nyob rau qhov xwm txheej zoo li cas los xij, tsuav lawv ua tib zoo xav txog Vajtswv cov lus thiab tuaj yeem nrhiav qhov tseeb xwb, ces Vajntsujplig Dawb Huv mam li qhia lawv. Tab txawm thaum koj ua hauj lwm tsis khoom li thiab sab heev los xij, Vajntsujplig Dawb Huv mam li qhia koj yog koj nhiav thiab thov Vajtswv. Vajntsujplig Dawb Huv mam li qhia koj thaum koj nyeem Vajtswv cov lus los sis kawm txog qhov tseeb. Nws mam li qhia koj thaum koj ua tib zoo xav txog Vajtswv cov lus thiab thim xav txog koj tus kheej. Thaum Vajntsujplig Dawb Huv qhia koj, cia li muab qhov ntawd sau cia es ua tib zoo xav txog qhov ntawd, ces koj lub siab yuav paub tseeb. Thaum koj to taub qhov tseeb tiag tiag lawm, koj yuav dim plaws. Thaum koj tau ntsib tau pom Vajtswv tes hauj lwm zoo li no lawm, cov qoob loo uas koj sau ntawd yuav ntau zuj zus lawm xwb. Qhov tseeb yog qhov hais tias Vajntsujplig Dawb Huv qhov kev qhuab qhia ntawd feem ntau raug nej muab rhuav tshem tag lawm. Nej zoo ib yam li cov neeg uas siv khoom tsis muaj nuj nqis, plam tag nrho txhua tes hauj lwm uas Vajntsujplig Dawb Huv ua nyob rau hauv nej, plam ntau lub hwv tsam uas raug Vajtswv ua kom zoo tiav log dhau lawm! Vajntsujplig Dawb Huv tau ua ntau yam hauj lwm heev, tiam sis koj txais tsis tau. Koj hais puas tau tiag tiag hais tias Vajtswv tsis ua siab zoo rau koj? Qhov tseeb tsis yog qhov hais tias Vajtswv tsis ua siab zoo rau koj kom txaus—nws yog qhov hais tias koj tsis tau txais tes hauj lwm ntawd xwb.

Vajntsujplig Dawb Huv tes hauj lwm mas muaj ib tug qauv, thiab yuav tsum tau xav txog tus qauv ntawd. Yog tib neeg siv lawv tus kheej los xav, mas lawv yuav muaj peev xwm txiav txim siab tau ntau yam. Yeej yuav tau txais ib yam dab tsi xwb xwb li. Muab kev thov Vajtswv los ua qhov piv txwv. Muaj qee lub sij hawm uas koj tau txais kev qhuab qhia ntau heev los ntawm kev thov Vajtswv, tiam sis yog koj tsis quav ntsej, ces koj yuav tsis paub. Txawm cov lus qhuab qhia ntawd ib co yuav yog los ntawm koj lub qhov ncauj los los xij, koj yuav tsis paub yog koj tsis ua tib zoo mloog. Thaum Vajntsujplig Dawb Huv qhia thiab qhia kom koj paub qhov tseeb txog txoj kev thov Vajtswv xwb mas koj thiaj li yuav paub hais tias koj thov tau Vajtswv zoo. Tej no puav leej yog qhov pom kev tshiab, tiam sis koj cia tej no plam mus. Txoj kev uas Vajntsujplig Dawb Huv tes hauj lwm pab tib neeg tshaj plaws ntawd mas yog qhia thiab qhia kom lawv paub qhov tseeb, ua rau lawv to taub qhov tseeb thiab Vajtswv tej kev npaj siab, kom muaj peev xwm ua txhua yam raws li Vajtswv tej kev tim tsum, thiab kom tsis txhob ncaim ntawm txoj kev uas yog mus. Lub hom phiaj ntawm Vajntsujplig Dawb Huv tes hauj lwm uas qhia tib neeg ntawd yog dab tsi? Qee zaus, tes hauj lwm ntawd yog los coj kev; qee zaus, tes hauj lwm ntawd yog los ceeb toom, los ua kom koj muaj qee qhov uas tsim nyog; qee zaus, tes hauj lwm ntawd qhia koj thiab pab koj kom to taub qhov tseeb, thiab muab ib txoj kev xyaum ua rau koj. Thaum koj mus taug koj tus kheej txoj kev lawm, Nws txhawb thiab pab koj zoo li ib tug pas nres, coj koj los rau hauv txoj kev yog thiab coj koj kev. Txawm Vajntsujplig Dawb Huv yuav qhia qhov pom kev thiab qhov kev paub dab tsi rau tib neeg, uas tej zaum yuav txawv vim tib neeg tus kheej li keeb kwm los xij, qhov ntawd yeej tsis tawm tsam los sis cov nyom qhov tseeb kiag li. Yog txhua tus tau ntsib tau pom txoj kev uas zoo li no uas yog nrhiav thiab thov Vajtswv tiag tiag, thiab mloog lus tiag tiag, uas muaj Vajntsujplig Dawb Huv ua hauj lwm los qhia thiab coj lawv kev tas li, thiab yog lawv kub siab lug thiab txawj xav, thiab muaj peev xwm xyaum ua thiab to taub txog tej uas Vajntsujplig Dawb Huv qhia ntawd, ces lawv qhov kev loj hlob yuav loj hlob sai heev. Ces thaum ntawd lawv yuav tau lub cib fim ntawd. Ib tug yam ntxwv ntawm Vajntsujplig Dawb Huv tes hauj lwm mas yog qhov hais tias nws ceev heev. Tib laim xwb dhau plaws lawm, tsis zoo li cov ntsujplig phem tes hauj lwm, uas pheej yaum thiab yuam tib neeg ua txhua yam, uas lawv ua txoj kev twg los yeej ua tsis tau li. Qee zaus Vajntsujplig Dawb Huv ua hauj lwm los ntawm qhov ua kom tib neeg muaj kev xav thaum lawv nyob rau qhov kev phom sij, ua kom lawv tsis kaj siab thiab ntxhov siab heev. Qhov no tshwm sim nyob rau tej xwm txheej uas tshwj xeeb. Feem ntau mas, thaum uas tib neeg txav los ze Vajtswv, thiab nrhiav qhov tseeb, los sis thaum lawv nyeem Vajtswv cov lus ntawd, Vajntsujplig Dawb Huv ua rau lawv muaj ib qho kev xav, los sis txawj xav los sis muaj tswv yim. Los sis, tej zaum Nws qhia ib nqe lus los sis ib co lus rau koj. Qhov ntawd mas cuag nkaus li muaj ib lub suab, tiam sis kuj cuag nkaus li tsis muaj suab li thiab; nws zoo li ib qho kev ceeb toom, ces koj tuaj yeem to taub tias nws txhais li cas xwb. Yog koj yuav raws li lub ntsiab lus uas koj to taub thiab nthuav tawm lub ntsiab lus ntawd raws li cov lus uas tsim nyog, ces koj yuav tau txais qee yam, thiab qhov ntawd yuav txhim kho tau lwm tus thiab. Yog tib neeg tau ntsib tau pom li no tas li, ces lawv yuav maj mam to taub ntau qhov tseeb. Yog tib neeg muaj Vajntsujplig Dawb Huv tes hauj lwm nyob rawv ntawm lawv ib sab tas li, thiab muaj qhov pom kev tshiab coj lawv tas li, ces lawv yeej yuav tsis yuam kev ntawm txoj kev tseeb mus li. Tab txawm yog tsis muaj leej twg qhia koj, thiab tsis muaj leej twg coj koj kev, thiab koj tsis muaj tej txheej txheem hauj lwm los xij, yog koj taug txoj kev uas Vajntsujplig Dawb Huv coj koj los taug, ces koj yeej yuav tsis yuam kev li. Petus pom tus Tswv Yexus tom qab Nws sawv hauv qhov tuag rov qab los thiab nce mus rau saum ntuj ceeb tsheej lawm, tiam sis tsuas yog ob peb zaug xwb. Petus tsis tuaj yeem pom tau tus Tswv Yexus tas li li tib neeg xav hauv nruab siab, los sis pom Nws thaum Petus xav pom, thiab Petus tsis pom Nws thaum Petus thov txog yam uas Petus tsis to taub. Qhov ntawd tsis zoo li no. Puas yooj yim pom Vajtswv? Vajtswv tsis lam cia li tshwm rau tib neeg pom. Feem ntau, Vajtswv ua rau Petus to taub txhua yam los ntawm Vajntsujplig Dawb Huv tes hauj lwm xwb. Vim li cas nej thiaj li ua tsis tau li Petus? Thaum kawg, qhov no ua pov thawj qhia txog dab tsi? Nws ua pov thawj qhia hais tias nej lub peev xwm tsis txaus, tias nej tsis muaj lub hwj chim ntawm kev to taub, thiab tias nej tsis muaj peev xwm ua tib zoo xav kom xav tawm txhua yam. Txawm nej yuav ntsib dab tsi los xij, nej yuav tsum saib qhov ntawd raws li qhov tseeb hauv Vajtswv cov lus. Yog tib neeg pheej ua neej nyob rau hauv lawv tus kheej tej kev xav thiab tej hlwb thaum muaj tej yam dab tsi tshwm sim rau lawv, thiab lawv daws tej ntawd raws li tib neeg tej kev daws xwb, ces lawv yuav tsis tau txais dab tsi li. Petus xav li cas thaum muaj ib yam dab tsi tshwm sim rau nws? Nws xav txog qhov ntawd thiab ua tib zoo xav txog qhov ntawd raws li tus Tswv Yexus cov lus, yog li ntawd nws thiaj li muaj peev xwm xav tawm Vajtswv tej kev npaj siab. Thiab tom qab ntawd, thaum tus Tswv Yexus tau nce mus rau saum ntuj ceeb tsheej lawm, vim li cas Petus thiaj li tseem muaj peev xwm xav tawm Vajtswv tej kev npaj siab? Nws xav tawm los ntawm qhov Vajntsujplig Dawb Huv qhuab qhia. Yog nws tsis paub qhov Vajntsujplig Dawb Huv qhuab qhia, thiab tus Tswv Yexus tsis tshwm los rau nws pom tom qab tus Tswv Yexus sawv hauv qhov tuag rov qab los thiab nce mus rau saum ntuj ceeb tsheej lawm no, nws yuav ua li to taub Vajtswv tej kev npaj siab? Tus Vajtswv uas muaj lub cev nqaij daim tawv tsis ua hauj lwm li tib neeg xav hauv nruab siab, uas coj tib neeg kev txhua hnub tas li kom ua tau rau lawv zoo tiav log. Nws tsis zoo li ntawd. Vajntsujplig Dawb Huv tes hauj lwm mas yuav tau koom tes. Tes hauj lwm koom tes ntawm tus Ntsujplig ntawd ua qhov ntau lawm. Lub cev nqaij daim tawv ntaus thawj ua tes hauj lwm, ces thaum tes hauj lwm ntawd tiav lawm, tej teeb meem me me uas tseem muaj nyob ntawd yog tej uas Vajntsujplig Dawb Huv qhia kom tib neeg to taub xwb. Yog tib neeg tuav tsis tau qhov no thiab tsuas txais tau ib feem xwb, ces lawv yuav txais tsis tau cov ntsiab lus uas deb ntxiv—thiab yog lawv txais tsis tau tej ntawd, ces lawv yuav tsis hloov, thiab lawv yuav tsis muaj qhov nce qib li.

Nws tsis yooj yim rau cov uas tsis tau ntsib tsis tau pom Vajntsujplig Dawb Huv tes hauj lwm los sis qhov kev qhuab qhia ntawd to taub tej ntawd. Qhov tseeb yog qhov hais tias muaj ib tug qauv nyob rau ntawm Vajntsujplig Dawb Huv tes hauj lwm thiab qhov kev qhuab qhia. Thaum twg uas hais txog Vajntsujplig Dawb Huv tes hauj lwm thiab qhov kev qhuab qhia, mas tib neeg pheej to taub yuam kev, xav hais tias lawv yuav tsum tau raug kev txom nyem ntau heev thiab tiv kev txom nyem loj heev ua ntej lawv tau txais Vajntsujplig Dawb Huv tes hauj lwm. Qhov no tsis yog tib neeg txoj kev xav phem lod? Vim tib neeg tub nkeeg thiab lawv lub siab tawv heev, lawv yeej tsis mob siab rau tej kev xav hauv lawv lub siab li, thiab thaum muaj ib qho pom kev thiab kev qhuab qhia, mas lawv saib qhov ntawd yam tsis muaj dab tsi li. Yog koj ua neej raws li koj tej hauj lwm tag hnub, ua raws li cov lus thiab tej kev qhuab qhia thiab tej kev cai, ua lub neej raws li lub cev nqaij daim tawv thiab txoj kev hlub xwb, ces Vajntsujplig Dawb Huv qhia tsis tau koj thiab coj tsis tau koj kev. Yeej tsis muaj ib txoj hauv kev uas Nws ua tau li no li. Koj yuav tsum thov Vajtswv ntxiv, nrhiav Vajntsujplig Dawb Huv tes hauj lwm, nrhiav seb yuav txais Vajntsujplig Dawb Huv tes hauj lwm li cas es tsis txhob cia tes hauj lwm ntawd plam mus. Thov Vajtswv hais tias: “Au Vajtswv! Thov koj ua hauj lwm nyob rau hauv kuv, ua kom kuv zoo tiav log thiab hloov kuv, cia kuv to taub Koj tej kev npaj siab nyob rau hauv txhua yam thiab ua raws li Koj tej kev ntshaw. Koj txoj kev hlub loj thiab Koj qhov kev npaj siab yog nyob rau hauv Koj txoj kev cawm kuv. Txawm tib neeg ntxeev siab thiab tawm tsam Koj, txawm lawv tus yam ntxwv yog tus uas ntxeev siab los xij, tam sim no kuv to taub Koj qhov kev npaj siab txog qhov cawm tib neeg lawm, yog li ntawd kuv thiaj li xav koom tes nrog Koj. Thov Koj muab xwm txheej, tej kev sim siab, thiab tej kev txom nyem rau kuv kom ntau ntxiv, cia kuv pom koj txhais tes nyob rau hauv tej kev txom nyem no, thiab pom Koj tej dej num, kom kuv thiaj li yuav yog tus uas to taub Koj tej kev npaj siab thiab ua raws li tej kev npaj siab ntawd. Cia kom kuv tsis txhob ua tus neeg siab phem, tiam sis ua tus uas nws ob txhais ko taw sawv khov kho.” Thov Vajtswv li no, thiab ua li no tas li; thov kom Vajntsujplig Dawb Huv ua hauj lwm rau hauv koj thiab coj koj tas li. Thaum Vajntsujplig Dawb Huv pom hais tias koj tab tom taug txoj kev yog thiab ua raws li qhov koj yuav tsum ua lawm, ces Nws mam li xub muab qee qhov xwm txheej thiab ib qho kev sim siab hnyav hnyav los sim koj seb koj kov puas yeej. Ib txhia yuav tiv tsis taus qhov kev sim siab ntawd. Lawv yuav hais tias, “Au Vajtswv, qhov xwm txheej no hnyav dhau lawm—Kuv ris tsis taus!” Ces lawv yuav ua tsis tau nyob rau hauv qhov teeb meem no. Yog koj yeej xav hais tias qhov xwm txheej uas koj nyob rau hauv ntawd hnyav dhau rau koj lawm, ces thov Vajtswv li no hais tias: “Au Vajtswv, qhov xwm txheej uas Koj tau muab rau kuv ntawd hnyav dhau lawm. Kuv ris tsis taus, tiam sis kuv txaus siab hlo siv zog ua. Txawm kuv yuav raug txoj kev txom nyem hnyav thiab sib los xij, thov muab rau kuv raws li qhov kuv ua tau thiab cia kuv to taub Koj tej kev npaj siab, kom tsis txhob ntxeev siab rau Koj los sis yws Koj. Ua kom kuv muaj peev xwm ua tau li ntawd tiag tiag, ua li ntawd mas Koj thiaj li yuav txaus siab. Txawm kuv yuav raug kev txom nyem hnyav thiab sib los xij, tsuav qhov ntawd yog Koj tej kev ntshaw xwb, ces kuv yeej txaus siab hlo ua raws li tej ntawd yam tsis yws ib los li. Kuv tsis kam tawm tsam Koj tej kev ntshaw, thiab txawm txoj kev txom nyem yuav hnyav npaum li cas los xij, tsuav kuv ris taus xwb, ces kuv thov kom Koj muab rau kuv.” Koj yuav tsum thov Vajtswv yam ruaj siab thiab siab loj. Tsis txhob khiav los sis tais caus. Thaum Vajntsujplig Dawb Huv pom hais tias koj tab tom taug txoj kev yog, tias feem ntau koj ua yam uas koj yuav tsum tau ua, tias koj xav tau Vajtswv nyob rau hauv koj lub siab tiag tiag, thiab tias koj caum qhov tseeb lawm, ces Nws mam li muab ib qho xwm txheej hnyav rau koj thiab lub zog loj rau koj kom kov yeej—ces tom qab ntawd koj yeej yuav yeej xwb. Qhov koj kov yeej ib qho xwm txheej tshwj xeeb uas nyuaj ntawd mas yog ib qho uas siab dua li qhov cia li to taub qee cov lus thiab tej kev qhuab qhia xwb. Qhov ntawd yog ib qho uas ua tim khawv.

Nyob rau hauv lub neej txhua hnub mas, tib neeg ntsib txhua hom tib neeg, xwm txheej, thiab txhua yam li, ces yog lawv tsis muaj qhov tseeb thiab tsis thov Vajtswv thiab nrhiav, ces lawv yuav muab qhov kev sim siab ntawd tshem tawm mus nyuaj. Muab qhov kev sib raug zoo ntawm txiv neej thiab poj niam coj los ua piv txwv. Ib txhia tib neeg mas tiv tsis taus tej kev sim siab uas zoo li no, thiab lawv ntog kiag thaum lawv ntsib hom xwm txheej zoo li no lawm. Qhov no tsis qhia tias lawv lub siab me dhau lawm lod? Cov tib neeg uas tsis muaj qhov tseeb mas txaus hlub zoo li no thiab lawv tsis ua ib qho tim khawv kiag li. Ib txhia tib neeg poob rau kev sim siab thaum lawv ntsib tej xwm txheej uas ntsig txog nyiaj txiag. Thaum lawv pom lwm tus muaj nyiaj, mas lawv yws hais tias, “Yog ua cas lawv muaj nyiaj ntau ua luaj hos kuv pluag ua luaj? Nws tsis ncaj ncees!” Lawv yws thaum qhov no tshwm sim rau lawv, thiab lawv lees txais tsis tau qhov no los ntawm Vajtswv los sis ua tsis tau raws li Nws qhov kev coj kev qhia thiab qhov kev npaj. Kuj muaj ib txhia tib neeg uas pheej mob siab rau lub meej mom xwb, ces thaum raug hom kev sim siab zoo li no lawm, lawv tsis muaj peev xwm kov yeej. Piv txwv li, ib tug tsis ntseeg xav ntiav lawv ua ib txoj hauj lwm nom txwv, muab ntau yam zoo rau lawv, ces lawv sawv tsis tau ruaj khov lawm. Lawv xav hais tias, “Puas tsim nyog kuv ua?” Lawv thov Vajtswv, thiab lawv ua tib zoo xav, ces tom qab ntawd lawv hais tias: “Tsim nyog lawm—kuv yuav tsum tau ua!” Lawv txiav txim siab lawm, ces qhov lawv nrhiav ntawd tsis muaj qab hau dab tsi ntxiv li lawm. Lawv yeej tau txiav txim siab los ua txoj hauj lwm nom tswv no thiab txais tej uas muaj txiaj ntsim ntawm txoj hauj lwm no lawm, tiam sis lawv kuj xav rov qab los ntseeg Vajtswv, vim ntshai tsam plam tej koob hmoov ntawm txoj kev ntseeg Vajtswv ntawd thiab. Yog li ntawd lawv thiaj li thov Vajtswv hais tias: “Thov sim kuv os Vajtswv.” Tseem tshuav dab tsi los sim koj thiab? Koj twb txiav txim siab los ua koj txoj hauj lwm nom tswv lawm. Koj tsis sawv khov kho rau qhov no, thiab koj twb ntog lawm. Puas tseem yuav tsum tau sim koj thiab? Tsis tsim nyog Vajtswv sim koj. Koj lub siab me uas txaus txaus hlub ntawd puas yuav tiv taus? Haj tseem muaj ib txhia tib neeg ntxim ntxub uas sib tw kom tau yam zoo uas lawv pom thiab. Vajntsujplig Dawb Huv nyob kiag ntawm lawv ib sab, saib ntsoov lawv seb lawv yuav nthuav hom kev xav zoo li cas tawm thiab seb lawv tus cwj pwm yog tus cwj pwm zoo li cas ces mam li pib sim lawv. Ib txhia tib neeg xav hauv lawv tus kheej hais tias, “Kuv tsis xav tau qhov kev sim ntawd, tab txawm qhov kev sim ntawd yog qhov Vajtswv ua siab zoo rau kuv los xij. Kuv twb raug txaus lawm, thiab Vajtswv ua siab zoo rau kuv ntau dhau lawm. Kuv tsis quav ntsej txog qhov tau noj qab hnav zoo, kuv tsuas quav ntsej txog qhov caum qhov tseeb thiab qhov muaj peev xwm txais tau Vajtswv xwb. Qhov tseeb uas kuv tau txais ntawd yog Vajtswv muab pub dawb dawb rau kuv xwb. Kuv tsis tsim nyog tau tej no li.” Vajntsujplig Dawb Huv tshawb xyuas lawv lub siab kom meej thiab haj yam qhia lawv ntxiv, ua rau lawv to taub ntxiv, thiab muaj zog ntxiv, thiab ua rau lawv pom qhov tseeb tseeb dua tuaj ntxiv. Txawm li cas los xij, cov tib neeg uas ntxim ntxub ntawd pom qhov txiaj ntsig uas luag muab ntawd ces lawv xav hais tias, “Kuv yuav ua kom tau qhov ntawd ua ntej lwm tus ua. Yog lawv muab qhov ntawd rau lwm tus es tsis muab rau kuv, mas kuv yuav ua tib zoo cem lawv thiab ua rau lawv nyuaj siab ntag. Kuv yuav qhia rau lawv paub tias kuv txawj npaum li cas, ces tom qab ntawd peb yuav pom tias lwm zaus lawv muab rau leej twg!” Vajntsujplig Dawb Huv pom hais tias lawv yog hom zoo li no yog li ntawd thiaj li muab lawv nthuav tawm. Lawv txoj kev qias neeg raug muab qhia tshwm lawm, thiab hom tib neeg zoo li no yuav tsum tau muab rau txim. Txawm lawv twb ntseeg tau pes tsawg xyoo lawm los xij, yeej pab tsis tau lawv dab tsi. Lawv tsis tau dab tsi li! Muaj ntau zaus, thaum Vajntsujplig Dawb Huv ua siab zoo rau tib neeg, lawv tau txais lub siab zoo ntawd thaum lawv xav tsis txog li. Yog Vajtswv tsis ua siab zoo rau koj, ces qhov koj raug rau txim ntawd kuj yuav tshwm sim thaum koj xav tsis txog li thiab. Qhov no yog qhov uas phom sij npaum li cas rau cov uas tsis caum qhov tseeb.

Thaum tib neeg tsis muaj kev paub tob txog tej uas tshwm sim rau lawv, thiab tsis paub ua yam uas tsim nyog ntawd, qhov uas lawv yuav tsum xub xub ua yog dab tsi? Lawv yuav tsum xub xub thov Vajtswv; thov Vajtswv ua ntej tso. Kev thov Vajtswv qhia txog dab tsi? Qhia hais tias koj muaj lub siab ncaj ncees, tias koj muaj lub siab hwm Vajtswv, thiab tias koj paub nrhiav Vajtswv, ua pov thawj qhia hais tias koj muab Vajtswv saib ua qhov tseem ceeb tshaj plaws txhua yam huv si. Thaum Vajtswv nyob rau hauv koj lub siab thiab muaj ib qho chaw nyob rau hauv koj lub siab lawm, thiab thaum koj muaj peev xwm zwm rau Vajtswv lawm, ces koj yog ib tug Ntseeg Vajtswv uas muaj lub siab ncaj ncees lawm. Muaj ntau tus ntseeg uas laus lawm uas txhos caug thov Vajtswv nyob rau ntawm tib lub sij hawm thiab tib qho chaw txhua hnub li. Ib zaug twg mas lawv txhos caug li ib los sis ob teev, tiam sis txawm lawv txhos caug zoo li no los tau pes tsawg xyoo lawm los xij, yeej daws tsis tau lawv tej teeb meem ntawm txoj kev txhaum li. Cia peb muab qhov kev thov Vajtswv ntawm sab kev lis kev cai ntseeg uas puas muaj nuj nqis los tsis muaj ntawd tso tseg tso. Yam tsawg kawg cov kwv tij thiab cov muam uas laus lawm no muaj lub siab ncaj ncees me ntsis. Lawv ua tau zoo dua cov hluas hais txog qhov no. Yog koj xav ua neej nyob rau ntawm Vajtswv lub xub ntiag thiab tau ntsib tau pom Vajtswv tes hauj lwm, ces qhov uas koj yuav tsum xub ua ua ntej tshaj plaws thaum muaj ib yam dab tsi tshwm sim rau koj ntawd yog thov Vajtswv ntag. Kev thov Vajtswv tsis yog ib qho kev hais cov sob lus uas yus nco yam tsis muaj qab hau dab tsi, es tsis muaj dab tsi ntxiv lawm; ua li no ces koj yuav mus tsis txog twg. Koj yuav tsum tau xyaum thov los ntawm koj lub siab. Tej zaum koj yuav thov Vajtswv zoo li no li yim los sis kaum zaus yam tsis muaj dab tsi tshwm sim li los xij, tiam sis tsis txhob poob siab: Koj yuav tsum xyaum mus li. Thov Vajtswv ua ntej thaum muaj ib yam dab tsi tshwm sim rau koj. Qhia rau Vajtswv ua ntej thiab cia Nws saib xyuas. Qhia rau Vajtswv ua ntej thiab cia Nws saib xyuas. Cia Vajtswv pab koj, cia Nws coj koj kev thiab qhia txoj hauv kev rau koj. Qhov no yuav ua pov thawj qhia hais tias koj muaj lub siab hwm Vajtswv thiab tias koj muab Vajtswv saib tseem ceeb tshaj txhua yam huv si. Thaum muaj ib yam dab tsi tshwm sim rau koj los sis koj ntsib qee qhov kev nyuaj thiab koj xav phem, thiab npau taws, ces qhov no yog ib qho kev qhia kom pom tseeb txog qhov tsis muaj Vajtswv nyob rau hauv koj lub siab thiab qhov koj tsis hwm Vajtswv. Txawm koj yuav ntsib tej kev nyuaj dab tsi nyob rau hauv lub neej tiag tiag los xij, koj yuav tsum los rau ntawm Vajtswv lub xub ntiag. Thawj qhov uas yuav tsum tau ua ces yog txhos caug thov Vajtswv ntag. Qhov no yog qhov tseem ceeb tshaj plaws. Kev thov Vajtswv qhia hais tias Vajtswv muaj ib qho chaw nyob rau hauv koj lub siab. Thaum koj muaj teeb meem, qhov cia siab rau Vajtswv thiab qhov thov Nws thiab qhov nrhiav los ntawm Nws ntawd qhia hais tias koj muaj lub siab uas hwm Vajtswv; koj yuav tsis ua li no yog Vajtswv tsis nyob rau hauv koj lub siab. Ib txhia tib neeg hais tias, “Kuv thov Vajtswv, tiam sis Vajtswv tseem tsis tau qhia kuv li!” Hais li ntawd mas tsis yog lawm. Koj yuav tsum xub saib seb qhov kev npaj siab uas nyob tom qab qhov koj thov Vajtswv ntawd puas yog tso. Yog koj yeej nrhiav qhov tseeb tiag tiag thiab thov Vajtswv tas li, ces yeej yuav muaj ib qho uas Vajtswv qhia koj thiab ua rau koj to taub xwb. Txawm yuav yog dab tsi los xij, Vajtswv yuav ua kom koj to taub. Yog Vajtswv tsis qhia koj, koj tus kheej yeej yuav tsis muaj peev xwm to taub li. Txawm koj muaj lub hwj chim to taub thiab tsis muaj thiab txawm koj yuav muaj lub peev xwm zoo li cas los xij, muaj qee yam uas tib neeg txoj kev xav yeej xav tsis txog li. Thaum koj to taub lawm, qhov ntawd puas yog los ntawm koj txoj kev xav? Raws li Vajtswv tej kev npaj siab thiab Vajntsujplig Dawb Huv tes hauj lwm mas, yog Vajntsujplig Dawb Huv tsis qhia koj, ces koj yuav nrhiav tsis pom tus uas paub li. Koj tsuas paub thaum Vajtswv Tus Kheej qhia koj tias txhais li cas xwb. Yog li ntawd, thauj qhov uas yuav tsum tau ua ua ntej tshaj plaws thaum muaj ib yam dab tsi tshwm sim rau koj ntawd ces yog thov Vajtswv ntag. Thaum koj thov Vajtswv, koj yuav tsum nthuav koj tej kev xav, tej kev xam pom thiab tus cwj pwm uas coj rau Vajtswv ntawd tawm, thiab nrhiav qhov tseeb los ntawm Nws, los ntawm txoj kev xav ua raws; qhov no yog qhov uas tib neeg yuav tsum xyaum ua. Koj yuav tsis tau txais ib qho txiaj ntsim li yog koj tsuas lam ua kom dhau xwb, thiab tom qab ntawd koj yuav tsum tsis txhob yws hais tias Vajntsujplig Dawb Huv tsis tau qhia koj. Kuv pom ib txhia tib neeg mas tsuas coj raws li tej kev cai ntawm txoj kab lis kev cai ntseeg thiab ua raws li tej dej num ntawm txoj kab lis kev cai ntseeg ntawd nyob rau hauv lawv txoj kev ntseeg Vajtswv xwb. Nyob rau hauv lawv lub siab yeej tsis muaj ib qho chaw rau Nws nyob kiag li; lawv haj tseem tsis lees paub Vajntsujplig Dawb Huv tes hauj lwm thiab. Lawv tsis thov Vajtswv los sis tsis nyeem Vajtswv cov lus li. Lawv tsuas yog pheej mus sib koom ua ke xwb tsis muaj dab tsi ntxiv li. Qhov no puas yog kev ntseeg Vajtswv? Lawv ntseeg li lawv ntseeg mus, tiam sis tsis muaj Vajtswv nyob rau hauv lawv txoj kev ntseeg. Vajtswv tsis nyob rau hauv lawv lub siab, lawv tsis xav thov Vajtswv ntxiv lawm, thiab lawv tsis xav nyeem Vajtswv cov lus ntxiv li lawm. Yog li tsis yog lawv dhau los ua cov tsis ntseeg lawm lod? Muaj ib txhia thawj coj thiab cov neeg ua hauj lwm mas pheej saib xyuas lwm yam hauj lwm xwb. Lawv yeej tsis mob siab rau txoj kev to taub lub neej txoj sia li tiam sis saib lwm yam hauj lwm yam li yog lawv txoj hauj lwm tseem ceeb. Lawv tsuas yog cov thawj tswj txoj hauj lwm lawm xwb yeej tsis ua ib qho hauj lwm uas tseem ceeb ntawm cov thawj coj thiab cov neeg ua hauj lwm li. Vim li ntawd, tom qab ntseeg Vajtswv tau nees nkaum peb caug xyoo lawm los, lawv tsis muaj ib lo lus qhia txog lawv txoj kev paub txog lub neej thiab lawv tsis muaj kev paub tseeb txog Vajtswv li. Lawv tsuas hais tau ob peb lo lus thiab ob peb qho kev qhuab qhia xwb. Yog li ntawd tsis yog lawv dhau mus ua cov thawj coj cuav lawm lod? Qhov no yog vim hais tias nyob rau hauv lawv txoj kev ntseeg Vajtswv, mas lawv tsis mob siab rau ua lawv tej dej num uas tsim nyog los sis tsis caum qhov tseeb. Qhov tsuas vam khom rau yus txoj kev to taub txog qee cov lus thiab qee qhov kev qhuab qhia ntawd xwb yuav daws tsis tau ib yam dab tsi li. Lawv yws Vajtswv kiag thaum lawv raug sim, raug kev puas tsuaj, los sis muaj mob. Lawv tsis muaj ib qho kev paub tseeb txog lawv tus kheej, thiab lawv tsis muaj tej lus tim khawv uas hais txog kev paub kiag li. Qhov no qhia tau hais tias lawv tsis tau caum qhov tseeb nyob rau ntau lub xyoo uas lawv tau ntseeg Vajtswv los no, tias lawv tus kheej tsuas khwv heev rau yam uas nyob sab nraud xwb, yog li ntawd thiaj li ua rau lawv tus kheej puas tsuaj. Txawm tib neeg yuav ntseeg Vajtswv tau pes tsawg xyoo los xij, yam tsawg kawg lawv yuav tsum los to taub qee qhov tseeb yog lawv xav paub tseeb tias lawv yuav tsis ntog, tsis ua kev phem, los sis raug muab tshem tawm mus. Yam tsawg kawg qhov no yog qhov uas lawv yuav tsum npaj kom muaj. Ib txhia tib neeg mas tsis tshua kub siab li thaum lawv mloog lus qhuab qhia thiab tsis ua tib zoo xav txog Vajtswv cov lus li. Txawm yuav muaj dab tsi tshwm sim rau lawv los xij lawv tsis nrhiav qhov tseeb li. Lawv tsuas yog txaus siab rau qhov kev to taub cov lus thiab cov kev qhuab qhia ntawd xwb, lawv xav hais tias lawv twb tau txais qhov tseeb lawm. Ces thaum muaj ib qho kev sim siab tuaj lawm, lawv tsis muaj kev paub kiag li, thiab lawv lub siab puv npo tej kev tsis txaus siab thiab tej lus yws uas lawv tsis muaj cuab kav hais tawm kom nrov xwb, txawm tias lawv xav hais los xij. Cov tib neeg uas zoo li no tsis yog txaus hlub dhau lawm lod? Ntau tus tib neeg mas pheej lam taus lam ua lawv tes dej num xwb. Lawv tsis thim xav los sis tsis ua txhua yam kom to taub lawv tus kheej thaum lawv raug qhuab qhia li. Lawv pheej cam tas li xwb, yog li ntawd lawv txoj kev phem thiaj li tshwm tuaj rau ntau txoj kev uas sib txawv, thiab lawv thiaj li raug muab nthuav tawm thiab raug muab tshem tawm mus, tsis muaj peev xwm paub txog lawv tus kheej mus txog hnub kawg li. Yog li qhov lawv to taub tej kev qhuab qhia ntawd muaj qab hau dab tsi? Tsis muaj qab hau kiag li. Txawm tib neeg yuav ntseeg Vajtswv tau pes tsawg xyoo los xij, qhov tsuas to taub thiab muaj peev xwm hais lus qhuab qhia ntawd xwb yeej tsis muaj txiaj ntsim li. Lawv tsis tau txais qhov tseeb tiam sis mus yuam kev lawm. Yog li ntawd, thaum muaj ib yam dab tsi tshwm sim rau koj es koj thov Vajtswv, tshawb nrhiav Nws tej kev npaj siab ntawd, qhov tseem ceeb ces yog to taub txog qhov tseeb xwb yog yuav daws kom tau qhov teeb meem ntawd. Qhov no yog txoj kev yog, thiab koj yuav tsum xyaum ua li no tas li.

1997