Nqe Lus Uas Xaiv Tawm Los 29

Ib txhia tib neeg nug hais tias, “Vajtswv soj ntsuam qhov tob tshaj plaws ntawm tib neeg lub siab, thiab Vajtswv lub cev nqaij daim tawv thiab tus Ntsujplig yog tib tug xwb. Vajtswv paub txhua yam uas tib neeg hais thiab ua, yog li ntawd Vajtswv puas paub tias tam sim no kuv ntseeg Nws?” Tej no ntsig txog lo lus nug uas hais tias, yuav to taub tus Vajtswv uas yug los ua neeg thiab txoj kev sib raug zoo ntawm Nws tus Ntsujplig thiab lub cev nqaij daim tawv ntawd li cas. Ib txhia tib neeg xav hais tias tej zaum Vajtswv yuav tsis paub lo lus nug ntawd vim yeej muaj Nws tiag, tiam sis muaj lwm tus uas xav hais tias Vajtswv paub lo lus nug ntawd vim Vajtswv lub cev nqaij daim tawv thiab tus Ntsujplig yog tib tug xwb. Yuav kom to taub Vajtswv mas yuav tsum to taub Nws lub ntsiab tseeb thiab tej yam ntxwv ntawm Nws tus Ntsujplig, thiab tib neeg yuav tsum tsis txhob sim txiav txim siab seb Vajtswv lub cev nqaij daim tawv puas paub ib yam dab tsi uas tau muab los los sis seb Nws tus Ntsujplig puas paub ib yam dab tsi uas tau muab los; Vajtswv ntse thiab zoo kawg nkaus, tib neeg yeej piav tsis tau li. Lub cev nqaij daim tawv thiab tus Ntsujplig, thiab txoj kev ua neej thiab lub hwj chim qaum ntuj—tej no yog tej yam uas nej tsis tau to taub meej. Thaum Vajtswv los ua cev nqaij daim tawv thiab tus Ntsujplig nyob rau hauv lub cev nqaij daim tawv, mas Nws lub ntsiab tseeb muaj hwj chim qaum ntuj, txawv kiag ntawm tib neeg lub ntsiab tseeb thiab hom ntsujplig uas nyob rau hauv tib neeg lub cev hlo li lawm; ob qho no yog ob qho uas sib txawv ntag. Tib neeg lub ntsiab tseeb thiab lawv tus ntsujplig mas txuas ruaj rau ntawm tus tib neeg ntawd. Vajtswv tus Ntsujplig nyob rau hauv Nws lub cev nqaij daim tawv, tiam sis Nws tseem muaj hwj chim loj kawg nkaus. Thaum Nws tab tom ua Nws tes hauj lwm nyob rau hauv lub cev nqaij daim tawv, Nws tus Ntsujplig kuj ua hauj lwm rau txhua qhov chaw li thiab. Koj nug tsis tau hais tias, “Vajtswv muaj hwj chim loj kawg nkaus li cas kiag? Qhia kuv seb thiab cia kuv pom kom tseeb.” Yeej tsis muaj hauv kev uas yuav pom tseeb tseeb li. Qhov koj pom Vajntsujplig Dawb Huv ua hauj lwm nyob rau hauv cov pawg ntseeg li cas thaum lub cev nqaij daim tawv ua Nws tes hauj lwm ntawd yeej txaus lawm. Vajtswv tus Ntsujplig muaj tus yam ntxwv uas muaj hwj chim loj kawg nkaus; Nws tswj kav tag nrho lub qab ntuj khwb thiab cawm cov uas Nws xaiv, thiab Nws kuj ua hauj lwm nyob rau hauv pawg ntseeg los qhia tib neeg nyob rau tib lub sij hawm thaum lub cev nqaij daim tawv tab tom ua Nws tes hauj lwm thiab. Koj hais tsis tau tias lub cev nqaij daim tawv tsis muaj tus Ntsujplig thaum tus Ntsujplig ua hauj lwm nyob rau hauv pawg ntseeg lawm. Yog koj hais li ntawd, tsis yog koj tsis lees paub qhov Vajtswv yug los ua neeg lod? Txawm li cas los xij, muaj qee yam uas lub cev nqaij daim tawv tsis paub. Qhov tsis paub no yog ib qho uas Khetos yeej zoo li sawv daws thiab muaj tiag. Qhov uas Vajtswv tus Ntsujplig nyob rau hauv lub cev nqaij daim tawv tiag tiag ntawd ua pov thawj qhia hais tias Vajtswv Tus Kheej yog lub ntsiab tseeb ntawm lub cev nqaij daim tawv ntawd. Nws tus Ntsujplig twb paub txhua yam uas muab los uas Nws lub cev nqaij daim tawv tsis paub lawm, yog li ntawd yus hais tau tias Vajtswv twb paub yam ntawd lawm. Yog koj tsis lees paub tus Ntsujplig sab vim sab uas muaj tiag ntawm lub cev nqaij daim tawv no, ces yog koj tsis lees paub tias lub cev nqaij daim tawv no yog Vajtswv Tus Kheej ntag, thiab koj ua yuam kev tib yam nkaus li cov Falixais ntag. Ib txhia hais tias, “Vajtswv lub cev nqaij daim tawv thiab tus Ntsujplig yog tib yug xwb, yog li ntawd tej zaum Vajtswv yuav paub hais tias peb tshaj tawm txoj moo zoo nyob rau ib zaug twg mas peb coj tau pes tsawg leej los cuag Nws. Tus Ntsujplig paub ces lub cev nqaij daim tawv kuj paub thiab, vim Nkawd yog tib tug xwb!” Qhov koj hais li no yog tsis lees paub lub cev nqaij daim tawv ntawd lub ntsiab tseeb lawm. Lub cev nqaij daim tawv Nws muaj qhov uas muaj tiag thiab qhov uas zoo li sawv daws: Muaj qee yam uas lub cev nqaij daim tawv paub thiab muaj qee yam uas lub cev nqaij daim tawv tsis tas yuav paub. Qhov ntawd yog qhov uas Nws zoo li sawv daws thiab qhov uas muaj tiag. Ib txhia hais tias, “Yam uas tus Ntsujplig paub, ces lub cev nqaij daim tawv yeej yuav tsum paub xwb xwb li thiab.” Qhov no yog tshaj ntuj tsim lawm, thiab qhov hais li no yog tsis lees paub lub ntsiab tseeb ntawm lub cev nqaij daim tawv ntag.

Tus Vajtswv uas yug los ua neeg ces yeej zoo li sawv daws thiab muaj tiag. Nyob rau hauv qee yam mas, Nws tsis zoo li tib neeg xav hauv nruab siab—muaj peev xwm paub tej uas zais ntshis yam tsis tau pom los sis tsis tau kov, paub tsis muaj chaw kawg li. Qhov ntawd tsis yog lub cev nqaij daim tawv tiam sis yog lub cev ntsujplig. Tom qab Yexus sawv hauv qhov tuag rov qab los lawm, Nws tuaj yeem tshwm los thiab ploj mus thiab mus tshab tej phab nra nkag rau hauv chav nyob, tiam sis qhov ntawd yog tus Yexus uas sawv hauv qhov tuag rov qab los lawm. Ua ntej sawv hauv qhov tuag rov qab los, Yexus yeej mus tsis tau kom tshab phab nra nkag mus rau hauv chav nyob li. Nws raug qhov chaw seem, qhov chaw nyob, thiab lub sij hawm muab thaiv lawm. Lub cev nqaij daim tawv yeej zoo li ntawd.

Qhov los paub qhov Vajtswv yug los ua neeg ntawd mas tsis yog ib qho yooj yim—koj yuav tsum saib los ntawm ntau ceg kaum raws li Vajtswv cov lus, ua tib zoo xav kom thoob thoob, es tsis txhob ua raws li koj txoj kev paub txog tej kev cai tswj los sis koj tus kheej tej kev xav hauv nruab siab kiag li. Koj hais tias Vajtswv lub cev nqaij daim tawv thiab tus Ntsujplig yog tib tug thiab lub cev nqaij daim tawv paub txhua yam uas tus Ntsujplig paub, tiam sis lub cev nqaij daim tawv kuj muaj qhov zoo li sawv daws thiab qhov muaj tiag thiab. Tsis tas li ntawd, muaj lwm qhov uas nyob rau lub sij hawm thaum lub cev nqaij daim tawv ua hauj lwm, mas yog Vajtswv Tus Kheej tab tom ua hauj lwm ntag xws li: Tus Ntsujplig ua hauj lwm ces lub cev nqaij daim tawv kuj ua hauj lwm thiab, tiam sis qhov tseem ceeb yog lub cev nqaij daim tawv ua hauj lwm xwb—lub cev nqaij daim tawv ua tus coj ua ntej, hos tus Ntsujplig ua qee yam hauj lwm los qhia, coj kev, pab, tiv thaiv thiab saib xyuas tib neeg. Tes dej num ntawm lub cev nqaij daim tawv ua qhov coj ua ntej—yog Nws xav paub txog ib tug tib neeg, mas yooj yim heev rau Nws. Thaum ib tug tib neeg twg xav paub txog ib tug neeg, yog lawv tsis tau soj ntsuam tus tib neeg ntawd tus cwj pwm ntau zaus, ces lawv yuav tsis to taub tob txog tus tib neeg ntawd. Tib neeg tsis pom hais tias tus yam ntxwv lub ntsiab tseeb ntawm lwm tus tib neeg ntawd zoo li cas, tiam sis tus Vajtswv uas yug los ua neeg ntawd yeej ib txwm paub thiab ib txwm txiav txim tau tias tus tib neeg ntawd yog ib tug tib neeg zoo li cas, nrog rau lawv tus cwj pwm thiab lub ntsiab tseeb. Yeej tsis muaj hnub uas Nws tsis muaj txoj kev nkag siab zoo li no li. Piv txwv li, Nws paub thiab nkag siab hais tias tib neeg coj li cas, lawv ua tau dab tsi, thiab yam kev phem dab tsi uas lawv ua tau thiab ua tau mus txog qib twg. Ib txhia hais tias, “Yog Vajtswv nkag siab txhua yam, Nws puas paub hais tias tam sim no kuv nyob qhov twg?” Qhov no tsis tseem ceeb kom paub. Rau qhov qhov Vajtswv nkag siab ib tug tib neeg ntawd tsis yog kom txhua hnub paub tias tus tib neeg ntawd nyob rau qhov twg. Tsis tas yuav paub qhov ntawd. Nkag siab txog yam uas tus tib neeg ntawd yuav ua los ntawm tus yam ntxwv xwb txaus lawm, thiab txaus rau Nws ua Nws tes hauj lwm lawm. Vajtswv ua muaj qab hau txog qhov Nws ua Nws tes hauj lwm. Qhov ntawd tsis zoo li tib neeg xav hauv nruab siab hais tias thaum Vajtswv xav paub txog ib tug tib neeg, mas Nws yuav tsum paub hais tias tus tib neeg ntawd nyob rau qhov twg, lawv tab tom xav dab tsi, lawv tab tom hais dab tsi, lawv yuav ua dab tsi tom qab ntawd, lawv hnav khaub ncaws li cas, lawv zoo li cas, thiab lwm yam. Tseeb tiag lawm, txoj kev cawm dim uas Vajtswv ua ntawd yeej tsis cheem tsum kom paub tej ntawd kiag li. Vajtswv tsuas tsom ntsoov rau qhov paub txog tus tib neeg ntawd lub ntsiab tseeb thiab qhov txheej txheem ntawm lawv txoj kev nce qib ntawm lub neej xwb. Thaum Vajtswv los ua cev nqaij daim tawv ntawd, txhua yam uas qhia kom pom tseeb txog lub cev nqaij daim tawv ntawd mas muaj tiag thiab zoo li sawv daws, thiab qhov muaj tiag thiab qhov zoo li sawv daws no yog muaj kom ua tiav tes hauj lwm uas kov yeej thiab cawm tib neeg dim xwb. Tiam sis, tib neeg yuav tsum tsis txhob hnov qab hais tias qhov muaj tiag thiab qhov zoo li sawv daws ntawm lub cev nqaij daim tawv ntawd yog qhov kev qhia kom pom tseeb txog Vajtswv tus Ntsujplig uas nyob rau hauv Nws lub cev nqaij daim tawv ntag. Yog li ntawd, koj puas xav hais tias tus Ntsujplig paub yam uas yog tib neeg li ntawd? Tus Ntsujplig paub, tiam sis Nws tsis quav ntsej txog tej ntawd. Yog li ntawd lub cev nqaij daim tawv kuj tsis quav ntsej txog tej ntawd ib yam nkaus thiab. Txawm yuav hais li cas los xij, Vajtswv tus Ntsujplig thiab lub cev nqaij daim tawv ntawd yeej yog tib yug, thiab yeej tsis muaj leej twg tsis lees paub tau qhov no. Qee zaus koj muaj qee qhov kev xav thiab tswv yim—tus Ntsujplig puas paub qhov koj tab tom xav? Tus Ntsujplig yeej paub. Vajtswv tus Ntsujplig tshawb xyuas qhov tob tshaj plaws ntawm tib neeg lub siab kom meej thiab paub qhov tib neeg xav, tiam sis Nws tes hauj lwm tsis los muab lawv tej kev xav thiab tej tswv yim qhia tawm thiab muab txoj kev qias vuab tsuab nthuav tawm xwb. Tiam sis, yog Nws muab qhov tseeb uas nyob rau hauv lub cev nqaij daim tawv ntawd nthuav tawm kom thiaj li hloov tau tib neeg tej kev xav thiab tej tswv yim, hloov tib neeg txoj kev xav thiab tej kev xam pom, kom thaum kawg, hloov tau tib neeg tej moj yam qias vuab tsuab. Nej tej kev xav txog qee yam mas tseem yog me nyuam yaus dhau lawm. Nej xav hais tias tus Vajtswv uas yug los ua neeg ntawd yuav tsum paub txhua yam. Ib txhia tib neeg neeg ua xyem xyav rau tus Vajtswv uas yug los ua neeg yog Nws tsis paub qee yam uas lawv xav hauv nruab siab tias Nws yuav tsum paub. Qhov no puav leej yog vim tib neeg tsis to taub txog lub ntsiab tseeb ntawm qhov Vajtswv yug los ua neeg ntawd txaus xwb. Muaj qee yam uas tsis yog nyob rau hauv lub cev nqaij daim tawv tes hauj lwm ntawd, yog li ntawd Nws yuav tsis thab tej ntawd. Vajtswv tsuas ua tes hauj lwm uas Nws yuav tsum tau ua xwb. Qhov no yog lub hauv paus ntsiab lus ntawm qhov Vajtswv ua hauj lwm. Tam sim no nej puas to taub tej no? Qhia Kuv seb, koj puas paub tias koj muaj hom ntsujplig twg? Koj puas hnov koj tus ntsuj duab ntsuj xyw? Koj kov puas tau koj tus ntsuj duab ntsuj xyw? Koj puas paub tias koj tus ntsuj duab ntsuj xyw tab tom ua dab tsi? Koj tsis paub, puas yog? Yog koj hnov los sis kov tau tej yam zoo li no, ces yog lwm tus ntsujplig uas nyob rau hauv koj ntawd ua qee yam los ntawm qhov kev yuam, kom koj ua thiab hais tej yam xwb. Qhov ntawd yog qee yam uas tsis yog nyob rau hauv koj tus kheej, uas koj yeej ib txwm tsis muaj. Cov uas muaj cov ntsujplig phem tes hauj lwm muaj kev to taub tob txog qhov no. Txawm Vajtswv lub cev nqaij daim tawv muaj qhov muaj tiag thiab qhov zoo li sawv daws los, yog ib tug tib neeg lawm yus yeej qhia tsis tau los sis txiav txim tsis tau txog Nws. Vajtswv txo hwj chim thiab zais Nws Tus Kheej los ua ib tug tib neeg; Nws tej kev ua tib neeg yeej piav tsis tau thiab tsis nkag siab li.