Nej feem coob twb ntseeg Vajtswv tau ntau xyoo, thiab muaj lub hauv paus kev ntseeg txog txoj kev tseeb tsis ntau los tsawg lawm. Tam sim no nej muaj peev xwm muab tej kev cuam tshuam ntawm tsev neeg thiab lub ntiaj teb tso pov tseg es los raws Vajtswv qab lawm. Nej tab tom xyaum ua dej num nyob rau hauv Vajtswv lub tsev, nej txaus siab hlo muab nej tus kheej fij rau Vajtswv, thiab npaj txhij yuav siv zog rau qhov tseeb lawm. Qhov no txhais hais tias nej twb pib to taub txhua yam, thiab tias nej muaj lub siab uas txawj xav me ntsis thiab qhov tsim nyog lawm. Qhov ntawd yog ib qho zoo. Qhov tseem ceeb ntawm txoj kev ua ib teg dej num ntawd mas tseem ceeb heev! Qhov nej ua tau nej tes dej num zoo los sis tsis zoo ntawd muaj ib qho kev cuam tshuam ncaj qha rau nej txoj kev cawm dim thiab txoj kev ua kom zoo tshaj plaws. Tuaj yeem hais tau hais tias tib neeg tsuas muaj txoj kev to taub lub neej txoj sia los ntawm qhov paub Vajtswv tes hauj lwm thaum ua ib teg dej num xwb, thiab tias tib neeg tsuas tau txais Vajtswv txoj kev pom zoo los ntawm qhov ua lawv tes dej num kom zoo xwb. Yog li ntawd, qhov tim tsum nej me ntsis thaum hais txog nej tej dej num thiab qhuab qhia nej me ntsis ntawd, yuav muaj txiaj ntsim rau nej. Yam tsawg kawg, koj lub neej yuav nce qib sai dua. Tej kev tim tsum uas tim tsum nej heev ntawd tsis yog ib qho tsis zoo, thiab qhov muab ib qho teeb meem nyuaj los sim nej ntawd kuj tsis yog ib qho tsis zoo thiab. Txhua yam no yog ua los pab nej kom loj hlob nyob rau hauv lub neej thiab ua raws li Vajtswv lub siab nyiam, thiab kom nej muaj ib txoj kev to taub zoo txog qee qhov kev paub thiab ua tau nej tes dej num zoo tuaj xwb. Yog tsis tim tsum nej li no no, qhov tshwm sim los yuav zoo li cas? Nej tsuas yuav muaj peev xwm tshaj tawm tej kev qhuab qhia thiab ua raws li tej kev cai xwb, thiab nej yuav ntseeg Vajtswv mus ntau xyoo yam tsis hloov pauv hlo li. Thaum zoo li ntawd lawm, thaum twg nej thiaj li yuav muaj peev xwm nce qib? Nej yuav ua li cas ua tau nej tes dej num kom zoo? Tsis yog nej yuav tsis muaj kev nce qib txog qhov tseeb xwb, nej yuav tsis muaj kev nce qib txog txoj kev paub qib siab uas yuav tsum tau muaj nyob rau hauv nej tes dej num thiab. Yog li, nej puas ua tau nej tes dej num kom mus txog tus qauv uas siv tau thiab hais lus tim khawv rau Vajtswv? Raws li nej tus yeeb yam tam sim no mas, nej txoj kev to taub txog qhov tseeb ntawd mas ntiav heev, thiab nej tsis tau to taub txog tej hauv paus ntsiab lus uas hais txog txoj kev ua nej tes dej num li. Nej kuj nyob deb ntawm qhov ua tau raws li cov qauv uas ua nej tes dej num kom txaus siab heev ntawd thiab. Tiam sis, nej tsis paub txog qhov no thiab mloog zoo li nej ua tau zoo heev, thiab qee zaus nej haj tseem qhuas tias nej tus kheej coj ncaj thiab muaj cuab kav heev li thiab. Cov lus uas nej hais los sis tej uas nej ua ntawd mas tsis zoo, thiab tej ntawd tsis mus raws li qhov tseeb tej hauv paus ntsiab lus. Thaum muaj neeg muab koj tej teeb meem ib qho qhia tawm, mas koj tsis kam lees txais li, thiab koj tsis nrhiav qhov tseeb thiab koj haj tseem hais ub hais no rau koj tus kheej xwb. Qhov teeb meem nyob rau ntawm no yog dab tsi? Nws yog qhov hais tias koj twb tsis muaj qhov tsim nyog uas tseem ceeb tshaj plaws los coj koj tus kheej kom zoo li. Txawm koj yuav ua dab tsi los xij, yam tsawg kawg, tib neeg feem coob yuav tsum pom hais tias tsim nyog lawm. Koj yuav tsum mloog txhua tus tej lus qhia—yog qhov lawv hais ntawd yog lawm, mas koj yuav tsum lees txais, ces tom qab ntawd kho tej uas koj ua yuam kev ntawd. Yog txhua tus xav hais tias cov txiaj ntsim uas koj tau txais ntawd yog, thiab txhua tus pom zoo rau tej ntawd lawm, mas thaum ntawd xwb thiaj li suav tau hais tias koj tej kev ua siv tau lawm. Ib qho yog, qhov ua li no mas nej thiaj li yuav muaj peev xwm ua tau raws li tej hauv paus ntsiab lus thaum ua nej tes dej num, thiab nej thiaj li yuav paub tab tuaj thiab muaj kev paub txog kev daws teeb meem. Hos lwm qhov yog, nej thiaj li yuav kawm tau ntau ntxiv, thiab tib lub sij hawm ntawd nej thiaj li yuav to taub qhov tseeb thiab muaj kev to taub lub neej txoj sia. Yog li ntawd, thaum muaj ib yam dab tsi los raug rau nej, nej yuav tsum tsis txhob qhuas tias nej tus kheej coj ncaj. Koj tus kheej yuav tsum nyob twj ywm rau ntawm Vajtswv lub xub ntiag thiab kawm qhov uas qhia koj. Koj yuav tsum muaj peev xwm muab koj tus kheej tso tseg es thiaj li yuav kawm tau ntau ntxiv. Yog koj xav hais tias, “Kuv txawj ua qhov no tshaj nej, yog li ntawd kuv yuav tsum ua tus tswj hwm, thiab nej sawv daws yuav tsum mloog kuv hais!”—tus moj yam ntawd yog moj yam dab tsi? Nws yog kev khav theeb thiab kev qhuas tias yus tus kheej coj ncaj. Nws yog ib tus moj yam phem, qias vuab tsuab thiab nws yog ib yam uas nyob rau hauv txoj kev ua neej. Yog li ntawd, qhov kom tsis txhob qhuas tias yus tus kheej coj ncaj ntawd yog txhais li cas? (Qhov ntawd txhais hais tias mloog txhua tus tej lus qhia, thiab nrog txhua tus sib tham txog txhua yam.) Txawm koj tus kheej yuav muaj tej kev xav thiab tej tswv yim dab tsi los xij, yog koj txiav txim siab yam dig muag ntsuav hais tias tej ntawd yog thiab tias yuav tsum tau ua txhua yam li ntawd, ces qhov ntawd yog kev khav theeb thiab kev qhuas tias yus tus kheej coj ncaj xwb. Yog koj muaj qee lub tswv yim los sis kev xav uas koj xav hais tias yog lawm, tiam sis koj tsis muaj kev ntseeg hauv koj tus kheej tiag tiag, ces koj tuaj yeem ua kom paub tseeb tej ntawd los ntawm qhov nrhiav thiab kawm, qhov ntawd yog qhov txhais hais tias tsis qhuas tias koj tus kheej coj ncaj. Qhov tos kom txhua tus txhawb thiab pom zoo ua ntej ua ntawd mas yog ib qho ua txhua yam uas tsim nyog lawm. Yog ib tug tib neeg twg tsis pom zoo nrog koj, mas koj yuav tsum ua tib zoo teb rau nws kom paub meej, thiab ua tib zoo thaum hais txog tej yam qib siab ntawm koj tes hauj lwm. Koj tsis tuaj yeem tig lub qhov muag dig rau nws hais tias, “Koj to taub qhov no zoo dua, los kuv to taub zoo dua? Kuv twb muaj feem xyuam rau tes hauj lwm no los ntev npaum li no lawm—tsis tsim nyog kuv muaj ib txoj kev to taub txog qhov no zoo dua koj lod? Koj paub txog dab tsi? Koj tsis to taub qhov ntawd!” Qhov ntawd tsis yog ib tug moj yam zoo, qhov ntawd mas khav theeb dhau lawm thiab qhuas tias koj tus kheej coj ncaj. Tej zaum tus tib neeg uas tsis pom zoo nrog koj ntawd yog ib tug uas tsis muaj kev txawj, thiab nws tsis muaj ib txoj kev to taub zoo txog tes hauj lwm ntawd; tej zaum koj hais yog thiab tej zaum koj ua yog lawm, tiam sis koj tus moj yam yog qhov teeb meem. Yog li, yuav coj thiab yuav ua li cas es thiaj li yog? Koj yuav coj thiab yuav ua li cas es thiaj li mus raws li qhov tseeb tej hauv paus ntsiab lus? Koj yuav tsum muab koj tej tswv yim coj los tso rau saum rooj es cia txhua tus saib seb puas muaj teeb meem nyob rau ntawm tej tswv yim ntawd. Yog muaj neeg tawm tswv yim, koj yuav tsum xub lees txais lub tswv yim ntawd, ces tom qab ntawd cia txhua tus pom zoo rau txoj kev xyaum ua uas yog. Yog tsis muaj leej twg muaj teeb meem rau qhov ntawd, ces koj mam li txiav txim siab kom tsim nyog txog qhov ua txhua yam thiab ua li ntawd. Yog tias nrhiav pom ib qho teeb meem, mas koj yuav tsum nug txhua tus tej kev xav, thiab koj yuav tsum nrhiav qhov tseeb thiab kawm qhov tseeb ntawd ua ke, es ua li ntawd, koj thiaj li yuav tau txais Vajntsujplig Dawb Huv qhov kev qhuab qhia. Thaum koj lub siab paub qhov tseeb, thiab koj muaj ib txoj kev zoo dua lawm, ces tej uas koj ua tau ntawd yuav zoo dua yav tas los. Qhov no tsis yog Vajtswv txoj kev coj kev lod? Nws yog ib qho uas zoo tiag tiag! Yog koj tuaj yeem zam dhau qhov qhuas tias koj tus kheej coj ncaj, yog koj tuaj yeem muab koj tej kev xav hauv nruab siab thiab tej tswv yim tso tseg, thiab yog koj tuaj yeem mloog lwm tus tej kev xav uas yog, ces koj yuav tau txais Vajntsujplig Dawb Huv txoj kev qhuab qhia. Koj lub siab yuav paub qhov tseeb thiab koj yuav nrhiav tau txoj kev uas yog. Koj yuav muaj ib txoj hauv kev mus rau tom ntej, thiab thaum koj muab txoj hauv kev ntawd coj los xyaum ua lawm, yeej yuav mus raws li qhov tseeb xwb xwb li. Los ntawm qhov xyaum ua thiab qhov kev ntsib kev pom uas zoo li no koj yuav kawm paub tias yuav xyaum ua qhov tseeb li cas, thiab tib lub sij hawm ntawd koj yuav kawm paub qee yam tshiab txog tes hauj lwm ntawd. Qhov no tsis yog ib qho zoo lod? Los ntawm qhov no koj yuav paub hais tias thaum muaj tej yam tshwm sim rau koj, koj yuav tsum tsis txhob qhuas tias koj tus kheej coj ncaj thiab koj yuav tsum nrhiav qhov tseeb, thiab tias yog koj qhuas tias koj tus kheej coj ncaj thiab tsis lees txais qhov tseeb, mas txhua tus yuav tsis nyiam koj thiab Vajtswv yeej yuav tsis nyiam koj kiag li thiab. Qhov no tsis yog ib qho kev kawm lod? Yog koj caum li no tas li thiab xyaum ua qhov tseeb, koj yuav ua rau tej kev txawj uas koj siv rau hauv koj tes dej num ntawd zoo tuaj, koj yuav tau txiaj ntsim zoo zuj zus nyob rau hauv koj tes dej num, thiab Vajtswv yuav qhia koj thiab foom koob hmoov rau koj, thiab haj yam cia koj tau txais ntau ntxiv. Tsis tas li ntawd xwb, koj yuav muaj ib txoj kev los xyaum ua qhov tseeb, thiab thaum koj paub tias yuav xyaum ua qhov tseeb li cas lawm, koj yuav maj mam to taub tej hauv paus ntsiab lus ntawd. Thaum koj paub tias tej kev ua twg uas yuav ua rau Vajtswv qhuab qhia thiab coj koj kev, tej kev ua twg uas yuav ua rau Nws tsis nyiam thiab muab ntiab tawm mus, thiab tej kev ua twg uas yuav ua rau Nws pom zoo thiab foom koob hmoov, ces koj yuav muaj ib txoj hauv kev mus rau tom ntej lawm. Thaum tib neeg tau txais Vajtswv tej koob hmoov thiab kev qhuab qhia lawm, mas lawv lub neej yuav nce qib sai heev. Lawv yuav tau txais Vajtswv txoj kev qhuab qhia thiab kev coj kev txhua hnub, thiab hauv lawv lub siab yuav muaj kev thaj yeeb thiab kev kaj siab. Qhov no yuav tsis ua rau lawv muaj kev zoo siab lod? Thaum tuaj yeem qhia tau koj tej kev ua rau ntawm Vajtswv lub xub ntiag thiab Vajtswv lees txais lawm, mas hauv koj lub siab koj yuav zoo siab, thiab nyob rau sab hauv, koj yuav muaj kev thaj yeeb thiab kev zoo siab heev. Txoj kev thaj yeeb thiab kev zoo siab no yog tej uas Vajtswv muab rau koj, tej no yog qhov uas Vajntsujplig Dawb Huv muab rau koj.

Qhov khav theeb thiab qhuas tias yus tus kheej coj ncaj ntawd mas yog tib neeg tus moj yam phem uas pom tau tseeb heev, thiab yog tib neeg tsis lees txais qhov tseeb, ces lawv yuav tsis muaj kev yaug tau tus moj yam phem ntawd kom dawb huv li. Txhua tus tib neeg puav leej muaj tus moj yam khav theeb thiab qhuas tias yus tus kheej coj ncaj, thiab lawv khav txiv tas li xwb. Txawm lawv yuav xav li cas, los sis lawv yuav hais dab tsi, los sis lawv yuav saib txhua yam li cas los xij, lawv pheej xav hais tias lawv tus kheej tej kev xav thiab lawv tus kheej tus cwj pwm mas yog lawm, thiab tias qhov lwm tus hais mas tsis zoo los sis tsis yog npaum li qhov lawv hais. Lawv pheej ua raws li lawv tus kheej tej kev xav xwb, thiab txawm leej twg hais los, lawv tsis mloog li. Tab txawm yog qhov lwm tus hais ntawd yog, los sis mus raws li qhov tseeb los xij, lawv tsis lees txais li; tsuas zoo li lawv mloog xwb tiam sis lawv yeej yuav tsis txais yuav lub tswv yim ntawd, thiab thaum txog sij hawm ua lawm, lawv yeej tseem ua txhua yam li lawv tus kheej txoj kev ua, pheej xav tias qhov lawv hais ntawd mas yog thiab tsim nyog lawm xwb. Tej zaum qhov koj hais ntawd yeej yog thiab tsim nyog, los sis tias qhov koj ua ntawd mas yog thiab tsis txhaum lawm, tiam sis hom moj yam uas koj nthuav tawm ntawd yog moj yam dab tsi? Tsis yog hom uas khav theeb thiab qhuas tias yus tus kheej coj ncaj lod? Yog koj tsis muab tus moj yam uas khav theeb thiab qhuas tias koj tus kheej coj ncaj no tso pov tseg no, nws yuav tsis cuam tshuam rau koj txoj kev ua koj tes dej num lod? Nws yuav tsis cuam tshuam rau koj txoj kev xyaum ua qhov tseeb lod? Yog koj tsis kho koj tus moj yam uas khav theeb thiab qhuas tias koj tus kheej coj ncaj no, nws yuav tsis ua rau koj muaj teeb meem loj nyob rau yav tom ntej lod? Koj yeej yuav ntsib yuav pom teeb meem xwb xwb li, qhov no mas zam tsis dhau. Qhia Kuv seb, Vajtswv puas pom tib neeg tus cwj pwm uas zoo li no? Vajtswv tshaj qhov uas muaj peev xwm pom tus cwj pwm no lawm! Vajtswv tsis yog tsuas tshawb xyuas qhov tob ntawm tib neeg lub siab kom meej xwb, Nws kuj soj ntsuam lawv txhua lo lus thiab tes dej num txhua lub sij hawm thiab txhua qhov chaw thiab. Vajtswv yuav hais li cas thaum Nws pom koj tus cwj pwm no? Vajtswv yuav hais tias: “Koj tawv ncauj! Thaum koj tsis paub tias koj yuam kev mas yeej to taub hais tias koj yuav ua raws li koj tus kheej tej tswv yim xwb, tiam sis thaum koj twb paub meej meej tias koj yuam kev lawm es koj tseem ua raws li koj tej tswv yim, thiab yuav tuag ua ntej lees txim hloov dua siab tshiab thiab, ces koj yog ib tug neeg ruam uas tawv ncauj, thiab koj muaj teeb meem lawm. Txawm leej twg tawm tswv yim los xij, yog koj pheej muaj tus cwj pwm uas xav phem thiab tawm tsam lub tswv yim ntawd, thiab twb tsis lees txais qhov tseeb ib qho me me li, thiab yog koj lub siab yeej tawm tsam hlo, kaw, thiab tso tseg li lawm, ces koj ruam tshaj plaws, koj yog ib tug tib neeg uas tsis paub dab tsi hlo li! Qhuab ntuas koj nyuaj dhau lawm!” Qhuab ntuas koj nyuaj rau qhov twg? Qhuab ntuas koj nyuaj vim qhov koj tab tom qhia tawm ntawd tsis yog ib qho kev ua uas yuam kev, los sis ib tug cwj pwm uas yuam kev, tiam sis yog ib qho kev nthuav tawm txog koj tus moj yam. Ib qho kev nthuav tawm txog tus moj yam dab tsi? Tus moj yam uas koj tsis nyiam qhov tseeb, thiab ntxub qhov tseeb ntag. Thaum paub tias koj yog ib tug tib neeg uas ntxub qhov tseeb lawm, ces Vajtswv pom hais tias koj muaj teeb meem lawm, thiab Nws yuav tsis lees paub koj thiab tsis quav ntsej koj. Raws li tib neeg qhov kev xav mas, feem coob lawv yuav hais tias: “Tus tib neeg no tus moj yam mas tsis zoo, nws yog tus uas tsis mloog lus, tawv ncauj, thiab khav theeb tshaj plaws! Tus tib neeg no mas nrog ua ke nyuaj thiab tsis nyiam qhov tseeb. Nws yeej tsis tau lees txais qhov tseeb thiab nws tsis muab qhov tseeb coj los xyaum ua li.” Feem ntau, txhua tus yuav ntsuam xyuas koj li no, tiam sis qhov kev ntsuam xyuas no puas tuaj yeem txiav txim tau rau koj txoj hmoo? Qhov kev ntsuam xyuas uas tib neeg ntsuam xyuas koj ntawd txiav txim tsis tau rau koj txoj hmoo, tiam sis muaj ib yam uas koj yuav tsum tsis txhob hnov qab uas yog: Vajtswv tshawb xyuas tib neeg lub siab kom meej, thiab tib lub sij hawm ntawd Vajtswv soj ntsuam lawv txhua lo lus thiab tes dej num. Yog Vajtswv pom tias koj zoo li no, thiab hais tias koj ntxub qhov tseeb, yog Nws tsis yog tsuas hais tias koj muaj ib tug moj yam uas qias vuab tsuab me ntsis, los sis tias koj tsis tshua mloog lus xwb no, qhov no tsis yog ib qho teeb meem uas loj heev lod? (Yog ib qho uas loj heev.) Qhov no txhais hais tias muaj teeb meem, thiab qhov teeb meem no tsis yog raws li qhov uas tib neeg pom koj, los sis qhov lawv ntsuam xyuas koj, qhov teeb meem no yog raws li qhov Vajtswv xam pom koj tus moj yam qias vuab tsuab uas ntxub qhov tseeb. Yog li ntawd, Vajtswv xam pom qhov teeb meem no li cas? Vajtswv puas tau txiav txim siab tias koj ntxub thiab tsis nyiam qhov tseeb, ces tag li ntawd xwb? Puas yooj yim npaum li ntawd? Qhov tseeb los qhov twg los? Qhov tseeb sawv cev rau leej twg? (Qhov tseeb ntawd sawv cev rau Vajtswv.) Xav txog qhov no hais tias: Yog ib tug tib neeg twg ntxub qhov tseeb no, raws li Vajtswv qhov kev xav lawm, Nws pom tias tus tib neeg ntawd yog leej twg? (Yog Nws tus yeeb ncuab.) Qhov no tsis yog ib qho teeb meem loj lod? Thaum ib tug tib neeg twg ntxub qhov tseeb lawm, ces tus tib neeg ntawd ntxub Vajtswv ntag! Vim li cas Kuv thiaj li hais tias lawv ntxub Vajtswv? Lawv puas tau foom tsis zoo rau Vajtswv? Lawv puas tau tawm tsam Vajtswv rau Nws lub ntsej muag kiag? Lawv puas tau txiav txim los sis thuam Nws nyob tom Nws nraub qaum? Tsis tau ua li ntawd. Yog li ntawd vim li cas Kuv thiaj li hais tias qhov nthuav ib tug moj yam uas ntxub qhov tseeb tawm ntawd ces yog ntxub Vajtswv? Qhov no tsis yog muab hais tshaj dhau lawm, nws yeej yog qhov muaj tiag ntawm qhov xwm txheej ntawd. Nws zoo li cov Falixais uas ntsej muag ncaj siab nkhaus uas muab tus Tswv Yexus ntsia rau saum ntoo khaub lig vim lawv ntxub qhov tseeb—yog li ntawd yam uas rov qab los raug rau lawv ntawd thiaj li phem heev. Qhov no txhais hais tias yog ib tug tib neeg twg muaj ib tug moj yam uas tsis nyiam qhov tseeb thiab ntxub qhov tseeb, ces tus tib neeg ntawd yuav nthuav tus moj yam ntawd tawm lub sij hawm twg los tau thiab qhov chaw twg los tau, thiab yog tus tib neeg ntawd ua neej raws li tus moj yam ntawd no, nws yuav tsis tawm tsam Vajtswv lod? Thaum lawv ntsib ib yam dab tsi uas cuam tshuam rau qhov tseeb los sis txiav txim siab, mas yog lawv lees txais tsis tau qhov tseeb, thiab lawv ua neej raws li lawv tus moj yam qias vuab tsuab xwb, ces lawv yuav cia li tawm tsam Vajtswv, thiab ntxeev siab rau Nws xwb, vim lawv tus moj yam qias vuab tsuab yog tus uas ntxub Vajtswv thiab ntxub qhov tseeb. Yog koj muaj ib tug moj yam uas zoo li no, ces tab txawm thaum hais txog cov lus uas Vajtswv hais, los koj yuav nug cov lus ntawd, thiab xav tshuaj xyuas thiab soj ntsuam cov lus ntawd. Ces koj yuav ua xyem xyav txog Vajtswv cov lus, thiab hais tias, “Cov lus no puas yog Vajtswv cov lus tiag tiag? Nyob li ntawm kuv mas cov lus ntawd tsis zoo li yog qhov tseeb, nyob li ntawm kuv mas zoo li cov lus ntawd tsis yog tag nrho!” Qhov ua li no, koj tus moj yam uas ntxub qhov tseeb ntawd tsis tau nthuav nws tus kheej tawm lod? Thaum koj xav li no, koj puas tuaj yeem zwm tau rau Vajtswv? Koj yeej zwm tsis tau li. Yog koj zwm tsis tau rau Vajtswv no, Nws puas tseem yog koj tus Vajtswv lawm? Nws tsis yog lawm. Yog li ntawd no, Vajtswv yog dab tsi rau koj lawm xwb? Koj yuav saib Nws zoo li ib qho chaw tshawb fawb, zoo li ib tug tib neeg uas koj ua xyem xyav rau, tus uas koj thuam; koj yuav saib Nws zoo li ib tug tib neeg dog dig thiab tsis tseem ceeb, thiab thuam Nws li ub li no lawm xwb. Qhov ua li ntawd, koj yuav dhau los ua tus uas tawm tsam thiab tuam mom Vajtswv lawm. Hom moj yam twg uas ua rau muaj qhov no? Qhov no yog tshwm sim los ntawm tus moj yam khav theeb uas ua rau loj zuj zus mus rau ib qib; tsis yog koj yuav muab koj tus moj yam phem nthuav tawm xwb, koj kuj yuav muab koj lub ntsej muag phem nthuav tawm tag nrho thiab. Muaj dab tsi tshwm sim rau txoj kev sib raug zoo ntawm Vajtswv thiab tus tib neeg uas mus txog theem uas tawm tsam Vajtswv, thiab tus uas nws txoj kev ntxeev siab rau Vajtswv ntawd mus txog rau ib qib lawm? Qhov ntawd dhau los ua ib txoj kev sib raug zoo uas ua yeeb ncuab lawm vim tus tib neeg ntawd lawv tus kheej tawm tsam Vajtswv. Nyob rau hauv koj txoj kev ntseeg Vajtswv, yog koj lees txais tsis tau qhov tseeb thiab zwm tsis tau rau qhov tseeb, ces Vajtswv tsis yog koj tus Vajtswv. Yog koj tsis kam txais yuav qhov tseeb thiab tsis lees paub qhov tseeb, ces koj twb dhau los ua tus tib neeg uas tawm tsam Vajtswv lawm. Yog li ntawd, Vajtswv puas tseem cawm tau koj? Nws yeej cawm tsis tau li. Vajtswv muab ib lub cib fim rau koj los txais Nws txoj kev cawm dim thiab tsis saib koj yam li yog ib tug yeeb ncuab, tiam sis koj tsis tuaj yeem lees txais qhov tseeb thiab koj tawm tsam Vajtswv; qhov koj tsis muaj peev xwm lees txais Vajtswv los ua koj qhov tseeb thiab ua koj txoj kev ntawd ua rau koj yog ib tug tib neeg uas tawm tsam Vajtswv lawm. Yuav daws qhov teeb meem no li cas? Koj yuav tsum lees txim hloov dua siab tshiab thiab hloov txoj kev taug kom sai sai. Piv txwv li, thaum koj ntsib ib qho teeb meem los sis ib qho kev nyuaj thaum ua koj tes dej num es koj tsis paub tias yuav daws qhov teeb meem ntawd li cas, mas koj yuav tsum tsis txhob xav txog qhov teeb meem ntawd yam dig muag ntsuav, koj yuav tsum xub nyob twj ywm rau ntawm Vajtswv lub xub ntiag, thov thiab nrhiav los ntawm Nws, thiab saib seb Vajtswv cov lus hais li cas txog qhov teeb meem ntawd tso. Tom qab nyeem Vajtswv cov lus lawm, yog koj tseem tsis to taub, thiab tsis paub tias qhov teeb meem no muaj feem rau qhov tseeb dab tsi, ces koj yuav tsum tuav rawv ib lub hauv paus ntsiab lus kom khov kho—uas yog, xub mloog lus ua ntej tso, yog koj tsis muaj tswv yim los sis kev xav, ces ua lub siab thaj thaj yeeb tos, thiab saib seb Vajtswv npaj siab thiab xav ua li cas xwb. Thaum koj tsis to taub qhov tseeb, koj yuav tsum nrhiav qhov tseeb ntawd, thiab koj yuav tsum tos Vajtswv, zoo dua li ua yam dig muag ntsuav thiab tsis xyuam xim. Yog leej twg tawm ib lub tswv yim rau koj thaum koj tsis to taub qhov tseeb, thiab qhia koj tias yuav ua li cas es thiaj li raws li qhov tseeb, mas koj yuav tsum xub lees txais lub tswv yim ntawd thiab cia txhua tus kawm txog lub tswv yim ntawd tso, thiab saib seb txoj kev no yog los tsis yog, thiab seb txoj kev no mus raws li qhov tseeb tej hauv paus ntsiab lus los tsis mus. Yog koj paub tseeb hais tias txoj kev ntawd mus raws li qhov tseeb lawm, ces xyaum ua li ntawd; yog koj txiav txim siab hais tias txoj kev ntawd tsis mus raws li qhov tseeb, ces tsis txhob xyaum ua li ntawd. Yooj yooj yim li ntawd xwb. Thaum koj nrhiav qhov tseeb, koj yuav tsum nrhiav los ntawm ntau tus tib neeg. Yog leej twg muaj ib yam dab tsi hais, mas koj yuav tsum mloog lawv hais, thiab saib lawv txhua lo lus tseem ceeb. Tsis txhob tsis quav ntsej los sis tsis lees paub lawv, vim qhov no cuam tshuam rau tej teeb meem uas nyob rau hauv koj tes dej num thiab koj yuav tsum saib qhov no kom tseem ceeb. Qhov no yog tus cwj pwm uas yog thiab tus yam ntxwv uas yog. Thaum koj muaj tus yam ntxwv uas yog, thiab koj tsis nthuav tus moj yam uas tsis nyiam qhov tseeb thiab ntxub qhov tseeb ntawd tawm lawm, ces qhov xyaum ua li no yuav hloov tau koj tus moj yam qias vuab tsuab. Qhov no yog xyaum ua qhov tseeb. Yog koj xyaum ua qhov tseeb li no no, nws yuav txi cov txiv dab tsi? (Vajntsujplig Dawb Huv yuav coj peb kev.) Qhov tau txais Vajntsujplig Dawb Huv txoj kev coj kev ntawd mas yog ib qho. Qee zaus qhov teeb meem ntawd mas yooj yim heev thiab siv koj tus kheej lub laj lim tswv yim xwb daws tau lawm; tom qab lwm tus muab lawv tej tswv yim qhia rau koj thiab koj to taub lawm, koj yuav muaj peev xwm kho txhua yam thiab ua raws li tej hauv paus ntsiab lus. Tej zaum tib neeg yuav xav hais tias qhov no yog ib qho teeb meem me me xwb, tiam sis nyob li ntawm Vajtswv mas yog ib qho teeb meem loj heev. Vim li cas Kuv thiaj li hais li no? Vim hais tias, thaum koj xyaum ua li no lawm, mas Vajtswv pom hais tias koj yog ib tug tib neeg uas tuaj yeem xyaum ua qhov tseeb, ib tug tib neeg uas nyiam qhov tseeb, thiab ib tug tib neeg uas tsis yog tsis nyiam qhov tseeb—thaum Vajtswv pom koj lub siab lawm, Nws kuj pom koj tus moj yam thiab, yog li ntawd qhov no yog ib qho teeb meem uas loj heev. Lwm lo lus mas hais tias, thaum koj ua koj tes dej num thiab ua nyob rau hauv Vajtswv lub xub ntiag ntawd, mas yam uas koj ua neej thiab nthuav tawm ntawd puav leej yog qhov tseeb qhov muaj tiag uas tib neeg yuav tsum muaj xwb. Cov cwj pwm, tej kev xav, thiab tej yam ntxwv uas koj muaj nyob rau hauv txhua yam uas koj ua ntawd mas yog qhov tseem ceeb tshaj plaws rau Vajtswv, thiab tej ntawd yog tej uas Vajtswv tshawb xyuas kom meej ntag.

Qhov ib txhia tib neeg nyiam sib cav txog tej yam me me uas tsis tseem ceeb thaum muaj ib yam dab tsi tshwm sim rau lawv ntawd tsis phem lod? Qhov no yog ib qho teeb meem loj. Cov tib neeg uas muaj kev nkag siab zoo yuav tsis ua yuam kev li no, tiam sis cov tib neeg ruam yeej zoo li no. Lawv pheej xav hauv nruab siab hais tias lwm tus ua txhua yam nyuaj rau lawv, tias lwm tus txhob txwm muab lub sij hawm nyuaj rau lawv, kom lawv thiaj li ua yeeb ncuab rau lwm tus tib neeg xwb. Qhov no tsis yog qhov txawv lod? Lawv tsis siv zog li thaum hais txog qhov tseeb, lawv nyiam sib cav txog tej yam uas tsis tseem ceeb thaum muaj ib yam dab tsi tshwm sim rau lawv, lawv tim tsum kom piav qhia, cawm ntsej muag, thiab lawv siv tib neeg tej kev xav phem los daws tej no tas li xwb. Qhov no yog qhov teeb meem uas loj tshaj plaws rau txoj kev to taub lub neej txoj sia. Yog koj ntseeg Vajtswv li no, los sis xyaum ua li no, ces koj yuav tsis tau txais qhov tseeb vim koj yeej tsis los rau ntawm Vajtswv lub xub ntiag li. Koj yeej tsis los rau ntawm Vajtswv lub xub ntiag los lees txais txhua yam uas Vajtswv tau npaj tseg rau koj li, thiab koj tsis siv qhov tseeb los daws txhua yam no, tiam sis koj siv tib neeg tej kev daws teeb meem los daws txhua yam xwb. Yog li ntawd, raws li Vajtswv pom mas, koj tau ncaim deb ntawm Nws lawm. Tsis yog tias koj lub siab tau ncaim deb ntawm Nws lawm xwb, tag nrho koj tus kheej kuj tsis nyob rau hauv Nws lub xub ntiag li lawm thiab. Qhov no yog qhov uas Vajtswv pom cov uas pheej tshuaj xyuas txhua yam tshaj dhau lawm thiab pheej sib cav. Muaj cov uas hais tau lus zoo, cov hais lus ntaug leev, cov uas lawv lub laj lim tswv yim mas ceev thiab ntse, uas xav hais tias, “Kuv txawj hais lus heev. Lwm tus tib neeg puav leej qhuas thiab hwm kuv, thiab muab kuv saib rau lub sam xeeb. Feem ntau tib neeg mloog kuv hais xwb.” Qhov no siv puas tau? Koj tau tsim tsa koj lub koob meej nyob rau ntawm tib neeg, tiam sis tus cwj pwm uas koj coj nyob rau ntawm Vajtswv lub xub ntiag ntawd ua rau Nws tsis txaus siab. Vajtswv hais tias koj yog ib tug uas tsis ntseeg, thiab tias koj ua yeeb ncuab rau qhov tseeb. Nyob rau ntawm tib neeg mas, tej zaum koj yuav muaj kev paub thiab hais lus tau ntaug heev, tej zaum koj saib xyuas txhua yam tau zoo heev, thiab nrog txhua tus sib raug zoo; tej zaum koj nrhiav tau ib txoj hauv kev los daws thiab saib xyuas txhua yam tas li txawm yuav yog qhov xwm txheej dab tsi los xij, tiam sis koj tsis los rau ntawm Vajtswv lub xub ntiag thiab tsis nrhiav qhov tseeb los daws teeb meem. Cov tib neeg uas zoo li no mas ua rau muaj teeb meem heev. Vajtswv tsuas muaj ib yam uas hais nyob rau hauv qhov kev ntsuas cov tib neeg uas zoo li koj no xwb uas yog hais tias: “Koj yog tus uas tsis ntseeg, koj ua txhua yam los siv lub cib fim no kom tau txais koob hmoov los ntawm qhov ua txuj ntseeg Vajtswv xwb. Koj tsis yog tus tib neeg uas lees txais qhov tseeb.” Koj xav li cas rau qhov kev ntsuas no? Puas yog qhov nej xav tau? Yeej tsis yog li. Yeej muaj ib txhia tib neeg uas tsis quav ntsej, thiab hais tias, “Txawm vajtswv pom peb zoo li cas los xij, peb twb tsis pom vajtswv. Peb qhov teeb meem tam sim no ces yog xub xub nrog cov tib neeg uas nyob ib puag ncig peb sib raug zoo xwb. Thaum peb tsim tau ib qho chaw tiag taw khov kho rau peb tus kheej lawm, ces peb tuaj yeem kov yeej cov thawj coj thiab cov neeg ua hauj lwm, thiab txhua tus yuav qhuas peb.” Hom tib neeg no yog tib neeg dab tsi? Lawv puas yog cov uas ntseeg Vajtswv? Lawv yeej tsis yog; lawv yog cov tsis ntseeg. Cov uas ntseeg Vajtswv yuav tsum nyob rau hauv Vajtswv lub xub ntiag tas li; txawm lawv yuav ntsib teeb meem dab tsi los xij, lawv yuav tsum los rau ntawm Vajtswv lub xub ntiag los nrhiav qhov tseeb kom thaum kawg Vajtswv thiaj li hais tias, “Koj yog tus uas nyiam qhov tseeb, tus uas ua rau Vajtswv txaus siab, thiab tus uas Vajtswv pom hais tias zoo. Vajtswv pom koj lub siab thiab Nws kuj pom koj txoj kev mloog lus thiab.” Koj xav li cas rau qhov kev ntsuas no? Tsuas yog cov tib neeg zoo li no xwb thiaj li tau txais kev pom zoo los ntawm Vajtswv. Nej puas to taub qho no tag nrho? Kuv qhia rau nej hais tias txawm tus ntseeg Vajtswv yuav ua tes dej num dab tsi los xij—txawm lawv saib xyuas tej teeb meem sab nraud, los sis ib teg dej num uas cuam tshuam rau ntau tes hauj lwm los sis tej kev txawj ntawm Vajtswv lub tsev los xij—yog lawv tsis nquag los cuag Vajtswv, thiab nyob rau hauv Nws lub xub ntiag tas li, thiab lawv tsis muaj cuab kav lees txais Nws txoj kev tshawb xyuas kom meej, thiab lawv tsis nrhiav qhov tseeb los ntawm Vajtswv, ces lawv yog cov tsis ntseeg, thiab lawv tsis txawv cov tsis ntseeg li xwb. Nej puas to taub qhov no? Yeej muaj ib txhia tib neeg tam sim no uas ua tsis tau dej num vim cheeb tsam uas lawv nyob ntawd tsis haum rau lawv; lawv nyob rau cheeb tsam uas cov tsis ntseeg nyob, tiam sis lawv yeej tseem tau txais Vajtswv qhov kev qhuab qhia thiab kev coj kev tas li. Yog ua cas ho zoo li no? Qhov tseem ceeb tshaj plaws yog qhov uas lawv muaj peev xwm thov Vajtswv, noj thiab haus Vajtswv cov lus, nrhiav qhov tseeb thiab xyaum ua qhov tseeb ntawd, thiab tuav rawv txoj kev nrog Vajtswv sib raug zoo li qub. Tej no yog tej uas tseem ceeb rau txoj kev txiav txim siab seb tib neeg puas tuaj yeem nyob tau rau hauv Vajtswv lub xub ntiag tas li. Yog koj pheej tsis paub Vajtswv thiab koj pheej qaug zog thiab xav phem, los sis yog koj pheej ua siab phem, los sis yog koj tsis ris ib lub nra nyob rau hauv koj tes dej num li, thiab koj pheej tsis meej pem tas li xwb no, qhov no yog ib qho zoo los yog ib qho tsis zoo? Nws puas yog ib qho uas nyob rau ntawm Vajtswv lub xub tiag, los yog ib qho uas tsis nyob rau ntawm Vajtswv lub xub ntiag hlo li? (Nws yog ib qho uas tsis nyob rau ntawm Vajtswv lub xub ntiag.) Yog li ntawd, nej yuav tsum ntsuas qhov no—nej nyob rau ntawm Vajtswv lub xub ntiag tas li los tsis nyob? Yog koj yeej tsis tshua nyob, thiab koj twb tsis thov Vajtswv, los sis nyeem Vajtswv cov lus li, ces qhov no ua rau muaj teeb meem, nws txhais hais tias koj yog ib tug tsis ntseeg. Ib txhia tib neeg mas yeej tsis tshua mob siab rau tej hauj lwm uas tsim nyog li, lawv ua siab phem thiab ua ywj siab xwb, yog li ntawd thaum muaj tej yam tshwm sim rau lawv, mas lawv thiaj li pheej paub tsis meej thiab tsis paub tias yuav nrhiav qhov tseeb li cas. Lawv twb tsis paub tias xyov lawv puas tau txiaj ntsim nyob rau hauv qhov ua lawv tej dej num ntawd los tsis tau li. Lawv tsis paub tias lawv tej kev ua txhua hnub ntawd qhov twg tawm tsam Vajtswv, qhov twg uas Vajtswv pom hais tias siv tau, thiab qhov twg uas Vajtswv ntxub. Lawv tsuas lam ua ib hnub dhau ib hnub xwb. Koj xav li cas rau qhov no? Cov tib neeg uas muaj qhov zoo li no puas muaj lub siab hwm Vajtswv? Yam uas lawv ua ntawd puas muaj ib lub hauv paus ntsiab lus li? Lawv puas tuaj yeem ua tej uas tsim nyog? Thaum lawv ua lawv tes dej num lawv hais puas tau hais tias, “Kuv yuav tsum tswj, kuv yuav tsum ua kuv tes dej num kom zoo, kuv yuav tsum ua tes dej num ntawd kom kawg kuv lub siab thiab kawg kuv lub zog”? Lawv ua puas tau lub siab ncaj ncees? (Lawv ua tsis tau.) Yog li, cov tib neeg zoo li no ua dab tsi? Lawv tsuas yog siv zog ua hauj lwm xwb! Cov tib neeg zoo li no puas tau txais qhov tseeb? (Lawv tsis tau txais.) Qhov ntawd yog ib qho uas poob loj heev. Yog ua cas cov tib neeg ruam no tsis paub caum qhov tseeb li? Lawv twb ntseeg Vajtswv tau kaum los sis nees nkaum xyoo thiab twb hnov lus qhuab qhia ntau heev lawm, tiam sis lawv tsis paub tias yuav tau txais dab tsi los ntawm txoj kev ntseeg Vajtswv, tias lawv yuav tsum caum qhov tseeb li cas, lawv yuav tsum xyaum ua qhov tseeb li cas, los sis lawv yuav tsum ua lawv tej dej num li cas li. Yog lawv twb tsis paub meej txog tej uas tseem ceeb no no, tsis yog lawv me ntsis ruam lod? Lawv ruam thiab tsis paub xav dhau lawm. Lawv tsis muaj kev xav txog qhov tseeb kiag li, yog li ntawd qhov no yog qhov phom sij. Qhov tseem ceeb tshaj plaws nyob rau ntawm txoj kev ntseeg Vajtswv ntawd yog dab tsi? Yog kom tau txais qhov tseeb xwb. Thaum tib neeg tau txais qhov tseeb lawm yuav daws tau teeb meem dab tsi? Qhov daws tau ua ntej ces yog qhov teeb meem ntawm lawv tej kev txhaum, thiab qhov teeb meem ntawm lawv tus moj yam qias vuab tsuab, thiab tag nrho tej kev nyuaj hauv lawv txoj kev ntseeg Vajtswv, thiab lawv tej kev xav uas yuam kev. Yuav daws tau tag nrho cov teeb meem no. Thaum tib neeg tau txais qhov tseeb lawm, lawv yuav tsum muab qhov tseeb ntawd coj los siv rau qhov twg? Yuav tsum muab coj los siv rau hauv qhov kev ua lawv tes dej num, thiab hauv qhov kev hais lus tim khawv rau Vajtswv—tej no yog tej uas tseem ceeb tshaj plaws. Tam sim no, tej zaum nej tsis muaj kev paub tseeb txog qhov no, tej zaum nej tseem tsis tau paub qhov muaj nqis los sis qhov tseem ceeb ntawm qhov tseeb, tiam sis muaj ib hnub nej yeej yuav paub.

Nej puas tau nyeem Phau Ntawv Yauj li? Thaum nej nyeem, nej puas tu siab? Nej puas muaj qhov kev ntshaw uas ua rau nej xav ua ib tug neeg zoo li Yauj? (Muaj.) Hom yam ntxwv thiab lub siab uas zoo li no yuav kav ntev npaum li cas? Ib hnub los sis ob hnub, ib hlis los sis ob hlis, tej zaum ib xyoos los sis ob xyoos lod? (Ob peb hnub xwb.) Yog li ntawd hom yam ntxwv thiab lub siab no yuav ploj mus tom qab ob peb hnub lod? Koj yuav tsum thov Vajtswv thaum koj tu siab, thiab qhia rau Vajtswv hais tias koj xav ua ib tug tib neeg zoo li Yauj, tias koj xav to taub qhov tseeb, xav muaj kev paub txog Vajtswv, thiab ua ib tug tib neeg uas hwm Vajtswv thiab zam kev phem. Koj yuav tsum thov kom Vajtswv ua qhov no tshwm sim rau koj, thov kom Nws coj koj kev, npaj cheeb tsam uas yog rau koj, muab lub zog rau koj, thiab tiv thaiv koj kom koj thiaj li sawv tau khov kho rau hauv txhua qhov xwm txheej uas koj ntsib, kom txhob tawm tsam Vajtswv, tiam sis ua tej yam uas hwm Vajtswv thiab zam kev phem, thiab ua tau raws li Nws tej kev npaj siab. Koj yuav tsum thov Vajtswv tas li thiab thov Vajtswv txhawm rau lub hom phiaj no thiab thov rau tej uas koj cia siab tias yuav ua kom tiav, ces thaum Vajtswv pom koj lub siab tiag tiag lawm, Nws mam li ua li koj thov. Tsis txhob ntshai thaum Vajtswv ua. Vajtswv tsis lam ua rau koj lub cev mob ua paug vias thiab muab txhua yam uas koj muaj tshem tawm mus li Nws ua thaum Nws sim Yauj ntawd. Vajtswv yuav tsis ua li ntawd; Nws yuav maj mam muab ntxiv rau koj raws li koj lub siab. Koj yuav tsum thov Vajtswv tiag tiag—tsis txhob cia li thov Nws li ob hnub xwb tom qab koj nyeem Phau Ntawv Yauj ntawd es tseem tu siab los ntawm Phau Ntawv ntawd, ces tom qab ntawd hnub peb xwb hnov qab txog Phau Ntawv ntawd thaum koj tsis nyeem Phau Ntawv ntawd, thiab tsis khaws rau hauv koj lub siab lawm. Yog koj ua li ntawd, ces qhov ntawd yuav ua teeb meem rau koj! Yog koj qhuas cov tib neeg zoo li Yauj thiab koj xav ua hom tib neeg zoo li ntawd, mas koj yuav tsum muaj ib txoj kev tias yuav ua hom tib neeg ntawd li cas, koj yuav tsum muab koj lub siab tso rau ntawm Vajtswv lub xub ntiag ces tom qab ntawd thov Vajtswv rau qhov no tas li, thiab xav txog qhov no tas li, ces tom qab ntawd noj thiab haus cov lus uas Vajtswv hais txog Yauj, ua tib zoo xav txog cov lus ntawd tas li, thiab tom qab ntawd koj yuav tsum kawm los ntawm cov tib neeg uas muaj kev ntsib kev pom thiab kev paub txog hom no. Koj yuav tsum siv zog ua hauj lwm rau lub hom phiaj no. Koj yuav tsum siv zog ua hauj lwm li cas? Yog koj tsuas zaum ntsia thiab nyob tos xwb, ces qhov ntawd tsis yog siv zog ua hauj lwm. Koj yuav tsum muab qhov ntawd coj los xyaum ua, koj yuav tsum siv zog rau qhov ntawd, tib lub sij hawm ntawd yuav tsum muaj ib qho kev txiav txim siab los nyiaj kev txom nyem thiab lub siab ntshaw, ces tom qab koj thov Vajtswv tag rau qhov no lawm, mam li thov kom Vajtswv ua hauj lwm. Yog Vajtswv tsis ua hauj lwm, ces txawm tib neeg yuav muaj siab npaum li cas los xij, yuav tsis muaj txiaj ntsim dab tsi li. Vajtswv yuav ua li cas? Vajtswv yuav pib qhia thiab npaj tej cheeb tsam rau koj kom muaj txiaj ntsim rau koj lub siab. Koj yuav tsum qhia Vajtswv tias lub hom phiaj uas koj xav ua kom tau nyob rau hauv koj txoj kev ntseeg ntawd yog dab tsi, thiab koj muaj tej kev txiav txim siab zoo li cas. Koj puas tau thov Vajtswv thiab taij thov Vajtswv rau qhov no? Koj thov Vajtswv thiab taij thov Vajtswv ntev npaum li cas? Yog ntev ntev koj mam li thov Vajtswv ib ob zaug xwb, thiab thaum koj pom hais tias Vajtswv tsis tau ua hauj lwm, ces koj xav hais tias, “Kav liam lau, kuv kawg cia txhua yam zoo li no lawm xwb. Txawm muaj dab tsi tshwm sim los xij, kuv ua raws li feem coob lawm xwb. Kuv tsis quav ntsej tias yuav muaj dab tsi los raug rau kuv,” ua tsis tau li ntawd, thiab koj tsis ua tiag tiag. Yog koj tsuas kub siab li ob feeb xwb no, Vajtswv ua puas tau hauj lwm rau koj thiab pab npaj xwm txheej rau koj? Vajtswv yuav tsis ua li ntawd! Vajtswv xav pom koj lub siab dawb paug, thiab saib seb koj muaj lub siab dawb paug thiab ua siab ntev mus ntev npaum li cas, thiab seb koj lub siab puas yog tseeb los yog cuav xwb. Vajtswv yuav tos. Nws hnov koj cov lus thov thiab tej kev thov, Nws hnov tej kev txiav txim siab thiab tej kev ntshaw uas koj qhia rau Nws, tiam sis yog Nws tsis pom koj qhov kev txiav txim siab los nyiaj kev txom nyem, ces nws yuav tsis ua hauj lwm. Yog tom qab koj thov Vajtswv tag lawm, koj cia li ploj yam ua tsis tau ib yam dab tsi tiav li no, Vajtswv puas yuav ua hauj lwm nyob rau hauv tej xwm txheej uas zoo li no? Yeej tsis ua li. Koj yuav tsum tau thov Vajtswv thiab taij thov Vajtswv kom ntau ntxiv, siv zog rau qhov no thiab ua tib zoo xav txog qhov no, ces tom qab ntawd saib kom ntxaws ntxaws txog tej xwm txheej uas Vajtswv tau npaj rau koj lawm; tej ntawd yuav los raug rau koj ib qho zuj zus, ces Vajtswv mam li pib ua hauj lwm. Yog koj tsis muaj lub siab tiag, ces qhov no yuav tsis ua hauj lwm. Tej zaum koj yuav hais tias, “Kuv qhuas Yauj heev, thiab kuv qhuas Petus heev!” tiam sis qhov koj qhuas ntawd zoo dab tsi? Koj tuaj yeem qhuas nkawv li koj nyiam, tiam sis koj tsis yog nkawv, thiab tag nrho qhov koj qhuas ntawd yuav tsis ua rau Vajtswv ua hauj lwm tib yam nkaus rau koj li Nws ua rau nkawv, vim koj tsis yog tib hom neeg li nkawv. Koj tsis muaj nkawv qhov kev txiav txim siab, los sis nkawv txoj kev ua neej, los sis lub siab uas nkawv ntshaw thiab caum qhov tseeb. Tsuas yog thaum koj muaj tej no lawm xwb mas Vajtswv thiaj li yuav muab rau koj ntxiv.

Tam sim no nej puas muaj qhov kev txiav txim siab los caum qhov tseeb, los txais qhov tseeb, thiab los ua kom tau txoj kev cawm dim thiab kom raug Vajtswv ua kom zoo tiav log? (Muaj.) Nej txiav txim siab loj npaum li cas? Nej tuaj yeem ceev tau ntev npaum li cas? (Thaum kuv muaj tus yam ntxwv zoo, mas kuv txiav txim siab, tiam sis thaum kuv ntsib tej yam uas tsis haum rau kuv tej kev xav phem los sis tej kev ntshaw ntawm kuv lub cev nqaij daim tawv, los sis thaum kuv raug qee qhov kev tsim kho kom zoo los sis muaj qee qhov kev nyuaj, mas kuv muaj kiag tus yam ntxwv xav phem lawm, thiab txoj kev ntseeg thiab qhov kev txiav txim siab uas kuv muaj thaum xub thawj ntawd pib ploj zuj zus lawm.) Ua tsis tau li no. Nej tsis muaj peev xwm kiag li. Txawm koj yuav ntsib tej xwm txheej dab tsi los xij, koj yuav tsum mus kom txog rau qhov chaw uas tej xwm txheej ntawd hloov tsis tau koj qhov kev txiav txim siab. Tsuas yog thaum ntawd xwb koj thiaj li yog tus uas nyiam qhov tseeb thiab caum qhov tseeb tiag tiag. Yog thaum muaj ib yam dab tsi los raug rau koj thiab koj ntsib ib qho kev nyuaj me ntsis, es koj thim rov qab, xav phem thiab tag kev cia siab, thiab tso koj qhov kev txiav txim siab ntawd tseg lawm, mas ua tsis tau li no. Koj yuav tsum yog tus uas muaj lub zog npaj txhij muab nws txoj sia los tiv thaiv, thiab hais tias, “Txawm yuav muaj dab tsi tshwm sim los xij—tab txawm yog kuv tuag los xij, kuv yuav tsis tso qhov tseeb los sis kuv lub hom phiaj uas los caum qhov tseeb ntawd tseg.” Ces tsis muaj dab tsi yuav txwv tau koj li. Yog koj yeej ntsib tej kev nyuaj tiag tiag, thiab koj tws kev lawm, Vajtswv mam li ua hauj lwm. Tsis tas li ntawd xwb, koj yuav tsum muaj qhov kev to taub no hais tias: “Txawm kuv yuav ntsib dab tsi los xij, tej ntawd puav leej yog tej kev qhia uas kuv yuav tsum tau kawm nyob rau hauv kuv txoj kev caum qhov tseeb—tej ntawd yog Vajtswv npaj tseg. Tej zaum kuv tsis muaj peev xwm, tiam sis kuv tsis xav phem, thiab kuv ua Vajtswv tsaug uas muab lub cib fim rau kuv los kawm tej kev qhia no. Kuv ua Vajtswv tsaug uas npaj qhov xwm txheej no rau kuv. Kuv tsis tuaj yeem tso kuv txoj kev txiav txim siab los raws Vajtswv qab thiab txais qhov tseeb ntawd tseg. Yog kuv tso tseg, ces qhov ntawd yuav npaum nkaus li swb rau Ntxwgnyoog, rhuav tshem kuv tus kheej, thiab ntxeev siab rau Vajtswv lawm.” Nov yog hom kev txiav txim siab uas koj yuav tsum muaj. Txawm koj yuav ntsib tej teeb meem me dab tsi los xij, tej teeb meem ntawd puav leej yog tej yam me me uas nyob rau hauv txoj kev txhim kho koj lub neej xwb. Koj yuav tsum tsis txhob cia tej teeb meem ntawd thaiv txoj hauv kev uas koj nce qib. Thaum koj ntsib tej kev nyuaj koj tuaj yeem nrhiav thiab tos, tiam sis txoj hauv kev uas koj nce qib ntawd yuav tsum tsis txhob hloov, tsis yog li ntawd lod? (Yog.) Txawm lwm tus yuav hais dab tsi, los sis lawv yuav ua li cas rau koj, thiab txawm Vajtswv yuav ua li cas rau koj los xij, koj qhov kev txiav txim siab ntawd yuav tsum tsis txhob hloov li. Yog Vajtswv hais tias, “Koj tsis lees txais qhov tseeb kiag li, Kuv tsis nyiam koj,” ces koj hais tias, “Vajtswv tsis nyiam kuv, yog li ntawd kuv lub neej muaj nuj nqis dab tsi? Kuv ces kawg tuag thiab tag li no lawm xwb!” koj to taub Vajtswv yuam kev lawm. Qhov Vajtswv tsis nyiam koj ntawd yeej muaj tseeb, tiam sis koj yuav tsum ua mus ntxiv, koj yuav tsum lees txais qhov tseeb, thiab koj yuav tsum ua koj tes dej num kom tiav. Ces koj thiaj li yuav tsis yog ib tug tib neeg zoo uas tsis muaj txiaj ntsim dab tsi thiab Vajtswv thiaj li yuav lees paub koj. Tam sim no, nej lub siab tseem me heev thiab nej tseem ua tsis tau tau raws li cov qauv uas cheem tsum Vajtswv los sim nej. Tib yam uas nej ua tau ntawd yog dab tsi? Koj yuav tsum thov Vajtswv hais tias: “Vajtswv, thov coj kuv kev thiab qhia kuv kom kuv to taub Koj tej kev npaj siab, thiab kom muaj kev ntseeg thiab kev ua siab ntev taug txoj kev uas caum qhov tseeb, es kom kuv thiaj li hwm Vajtswv thiab zam kev phem. Txawm kuv tsis muaj peev xwm thiab kuv lub siab tsis paub tab los xij, kuv thov Koj pub lub zog rau kuv thiab tiv thaiv kuv kom kuv thiaj li raws tau Koj qab mus txog thaum kawg.” Koj yuav tsum los rau ntawm Vajtswv lub xub ntiag los thov Vajtswv tas li. Tej zaum lwm tus tib neeg xav tau tej khoom ntiaj teb, ua raws li lawv lub cev nqaij daim tawv, thiab ua raws li tej kev ntawm lub ntiaj teb, tiam sis koj yuav tsum tsis txhob nrog lawv ua ke—cia li mob siab rau qhov ua koj tus kheej tes dej num xwb. Thaum lwm tus xav phem thiab lawv tsis ua lawv tej dej num lawm, koj yuav tsum tsis txhob xav tias koj raug yuam, thiab koj yuav tsum nrhiav qhov tseeb los pab lawv. Thaum lwm tus ua raws li lub siab nyiam kom tau zoo mas koj yuav tsum tsis txhob khib lawv, koj yuav tsum txhawj koj tus kheej txog qhov nyob rau ntawm Vajtswv lub xub ntiag xwb. Thaum lwm tus caum lub koob lub npe, txiaj ntsim, thiab lub meej mom, mas koj yuav tsum thov Vajtswv rau lawv thiab pab lawv, tswj koj lub siab nyob twj ywm rau ntawm Vajtswv lub xub ntiag thiab tsis txhob cia tej no haub ntxias koj. Txawm yuav muaj dab tsi tshwm sim nyob ib puag ncig koj los xij, koj yuav tsum thov Vajtswv txog txhua yam. Koj yuav tsum nrhiav qhov tseeb tas li, tswj koj tus kheej, ua kom paub tseeb tias koj nyob rau hauv Vajtswv lub xub ntiag, thiab muaj ib txoj kev nrog Vajtswv sib raug zoo li qub. Vajtswv tshawb xyuas tib neeg kom meej txhua lub sij hawm, thiab Vajntsujplig Dawb Huv ua hauj lwm nyob rau hauv cov tib neeg zoo li no. Vajtswv tshawb xyuas tib neeg lub siab kom meej li cas? Nws tsis yog tsuas xuas Nws ob lub qhov muag ntsia xwb, Nws npaj xwm txheej rau koj thiab xuas Nws txhais tes tshoov koj lub siab. Vim li cas Kuv thiaj li hais li no? Vim thaum Vajtswv npaj ib qho xwm txheej rau koj ntawd, Vajtswv yeej pom hais tias koj tawm tsam thiab ntxub, los sis nyiam thiab ua raws li qhov xwm txheej ntawd, tias koj nyob twj ywm tos los sis rau siab ntso nrhiav qhov tseeb lawm. Vajtswv saib seb koj lub siab thiab koj tej kev xav hloov li cas, thiab seb koj lub siab thiab tej kev xav ntawd mus rau txoj hauv kev twg. Koj lub siab mas qee zaus xav zoo, thiab qee zaus xav phem. Yog koj tuaj yeem lees txais qhov tseeb, koj yuav muaj peev xwm lees txais tib neeg, xwm txheej thiab txhua yam los ntawm Vajtswv, thiab ntau qhov xwm txheej uas Nws npaj rau koj ntawd, thiab koj yuav muaj peev xwm daws tau tej ntawd yam yog heev. Vim txoj kev nyeem Vajtswv cov lus, thiab txoj kev ua tib zoo xav, es tag nrho koj tej kev xav thiab tej tswv yim, tag nrho koj tej kev xam pom, thiab tag nrho koj tej kev xav hauv siab ntawd thiaj li yuav hloov raws li Vajtswv cov lus. Koj yuav paub tseeb txog qhov no, thiab Vajtswv kuj yuav tshawb xyuas txhua yam no kom meej thiab. Tab txawm koj yuav tsis tau hais qhov no rau leej twg, los sis thov Vajtswv txog qhov no, thiab koj tsuas xav txog qhov no hauv koj lub siab thiab hauv koj tus kheej xwb los xij, raws li Vajtswv pom mas qhov no twb tseeb heev li lawm—Nws pom qhov no tseeb heev. Tib neeg xuas lawv ob lub qhov muag ntsia koj xwb, tiam sis Vajtswv xuas Nws txhais tes tshoov koj lub siab, qhov ntawd qhia hais tias Nws nyob ze koj npaum li cas. Yog koj hnov Vajtswv tshawb xyuas koj kom meej, ces koj nyob rau hauv Vajtswv lub xub ntiag lawm. Yog koj tsis hnov tias Nws tshawb xyuas koj kom meej kiag li, ces koj nyob rau hauv koj tus kheej lub ntiaj teb, thiab koj ua neej raws li koj tus kheej tej kev xav thiab tus moj yam qias vuab tsuab xwb, ces tom qab ntawd koj muaj teeb meem. Yog koj tsis nyob rau hauv Vajtswv lub xub ntiag, yog koj thiab Vajtswv mas sib nrug deb heev, thiab koj nyob deb ntawm Nws, yog koj tsis ua tib zoo xav txog Vajtswv tej kev npaj siab kiag li, thiab yog koj tsis lees txais Vajtswv txoj kev tshawb xyuas kom meej, ces Vajtswv yuav paub txhua yam no. Nws pom txhua yam no yooj yim heev. Yog li ntawd, thaum koj muaj kev txiav txim siab thiab lub hom phiaj, thiab koj txaus siab hlo cia Vajtswv muab koj ua kom zoo tiav log, thiab los ua tus tib neeg uas ua raws li Vajtswv lub siab nyiam uas hwm Vajtswv thiab zam kev phem lawm, thaum koj muaj qhov kev txiav txim siab no, thiab koj tuaj yeem thov Vajtswv thiab taij thov tej no tas li, thiab nyob rau hauv Vajtswv lub xub ntiag, tsis nrug ntawm Vajtswv los sis ncaim Nws mus lawm, ces koj yuav paub tseeb txog tej no, thiab Vajtswv los kuj paub txog tej no thiab. Ib txhia tib neeg hais tias, “Kuv paub kuv xwb, tiam sis xyov Vajtswv paub los tsis paub?” Lo lus nug no mas tsis yog lawm. Yog koj hais li no, ces qhov no uas pov thawj qhia hais tias koj yeej tsis muaj kev koom tes nrog Vajtswv thiab tias yeej tsis muaj kev sib raug zoo ntawm koj thiab Vajtswv kiag li. Vim li cas Kuv thiaj li hais tias tsis muaj kev sib raug zoo ntawm koj thiab Vajtswv? Koj tsis tau nyob rau ntawm Vajtswv lub xub ntiag yog li ntawd koj thiaj li tsis paub tias Nws nrog koj los tsis nrog, xyov Nws puas coj koj kev, xyov Nws puas tiv thaiv koj, thiab xyov Nws puas tau cem koj thaum koj ua ib yam dab tsi yuam kev lawm. Yog koj tsis muaj kev paub txog tej no, ces koj tsis nyob rau ntawm Vajtswv lub xub ntiag, koj tsuas yog xav hauv nruab siab txog qhov no thiab ua raws li koj tus kheej lub siab nyiam xwb—koj nyob rau hauv koj tus kheej lub ntiaj teb xwb, tsis yog nyob rau ntawm Vajtswv lub xub ntiag, thiab ntawm koj thiab Vajtswv mas tsis muaj kev sib raug zoo kiag li.

Tib neeg yuav ua li cas tuav tau txoj kev nrog Vajtswv sib raug zoo? Qhov kev tuav ntawd yog nyob ntawm dab tsi xwb? Qhov ntawd yog nyob ntawm lawv taij thov, thov Vajtswv, thiab nrog Vajtswv sib tham hauv lawv lub siab xwb. Txoj kev sib raug zoo uas zoo li no mas ua rau tib neeg nyob rau ntawm Vajtswv lub xub ntiag tas li. Yog li ntawd, yuav kom tsim tau ib txoj kev nrog Vajtswv sib raug zoo li qub, mas tib neeg yuav tsum xub nyob twj ywm tso. Ib txhia tib neeg mas pheej ua txhua yam nyob rau sab nraud, thiab lawv tus kheej tsuas khwv heev rau tej hauj lwm sab nraud xwb. Yog lawv tsis muaj ib lub neej ntawm sab ntsujpllig li ib ob hnub, mas lawv yuav tsis paub txog lub neej ntawd li lawm. Lawv yeej tseem yuav tsis paub txog lub neej ntawd tom qab peb plaub hnub lawm, los sis tab txawm twb tau ib ob hlis lawm los lawv yeej tseem tsis paub li. Qhov no yog vim lawv tsis tau thov Vajtswv, los sis taij thov Vajtswv, los sis sib koom nrog Vajtswv. Kev taij thov yog thaum muaj ib yam dab tsi tshwm sim rau koj es koj xav tau Vajtswv los pab koj, coj koj kev, pab cuam koj, qhia koj, ua rau koj to taub Nws tej kev npaj siab, paub tias qhov tseeb yog dab tsi, to taub tias qhov tseeb tej hauv paus ntsiab lus yog dab tsi, thiab paub tias yuav xyaum ua qhov tseeb li cas—qhov no yog hom kev taij thov uas mus raws li Vajtswv tej kev npaj siab. Kev thov Vajtswv mas npog tau ntau yam heev. Tej zaum koj yuav tham txog tej yam uas nyob hauv koj lub siab—thaum koj ntsib tej kev nyuaj los sis thaum koj xav phem thiab qaug zog, koj tham rau Vajtswv txog tej no tawm hauv lub siab tuaj los tau; koj kuj tuaj yeem thov Vajtswv rau lub sij hawm uas koj ntxeev siab, los sis koj tuaj yeem tham rau Vajtswv txog tej uas los raug rau koj txhua hnub thiab, tsis hais tej uas koj tuaj yeem pom tias zoo li cas, thiab tej uas koj tsis tuaj yeem pom—qhov no hu ua kev thov Vajtswv. Kev thov Vajtswv yog kev tham rau Vajtswv txog yam uas nyob hauv koj lub siab los sis yog kev nrhiav qhov tseeb los ntawm Vajtswv. Qee zaus koj yuav tsum teem sij hawm thov, qee zaus tsis teem sij hawm thov los tau; koj thov lub sij hawm twg thiab qhov chaw twg los tau. Kev sib koom hauv tus ntsujplig tsis muaj ib qho qauv tshwj xeeb li: Tej zaum muaj qee yam ua rau koj meem txom, tej zaum tsis muaj; tej zaum koj muaj tej yam uas koj xav hais, tej zaum koj tsis muaj. Thaum muaj ib yam dab tsi ua rau koj meem txom, koj yuav tsum tham rau Vajtswv txog qhov ntawd, thiab thov Vajtswv. Zoo tshaj mas, koj yuav tsum sim ua tib zoo xav txog cov lus nug xws li Vajtswv hlub tib neeg li cas, Nws txhawj txog tib neeg li cas, vim li cas Nws thiaj li qhuab qhia tib neeg, qhov zwm rau Vajtswv ntawd txhais li cas tiag tiag, thiab ntau yam ntxiv, nrog Vajtswv sib tham txhua lub sij hawm thiab txhua qhov chaw, thov Vajtswv, thiab nrhiav los ntawm Nws. Qhov no yog kev sib koom nyob rau hauv tus ntsujplig, los sis muab hais luv luv hais tias “kev sib koom ntsujplig.” Qee zaus, koj yuav xav txog tej yam uas ua rau koj chim siab heev thaum koj tab tom taug kev; koj tsis tas yuav txhos caug los sis qi koj ob lub qhov muag li. Koj cia li hais rau Vajtswv hauv koj lub siab xwb hais tias, “Vajtswv, qhov no tau los raug rau kuv lawm es kuv tsis paub tias yuav daws qhov no li cas, yog li ntawd kuv thov Koj coj kuv kev rau qhov no.” Thaum koj lub siab xav tau ib qho dab tsi lawm, es koj hais cov lus uas koj lub siab xav tau ntawd rau Vajtswv, ces Nws yeej yuav paub xwb. Tej zaum koj nco tsev es koj hais tias, “Vajtswv, kuv nco tsev heev.” Koj tsis tau hais tias koj nco leej twg kiag, tsuas yog hais tias koj tu siab es koj qhia rau Vajtswv xwb. Yog koj thov Vajtswv thiab qhia yam uas nyob rau hauv koj lub siab rau Nws xwb mas koj thiaj li yuav daws tau koj tej teeb meem. Yog koj tham rau lwm tus tib neeg no koj daws puas tau koj tej teeb meem? Yog koj ntsib tus uas to taub qhov tseeb no kuj tsis phem ua luaj twg thiab—tsis yog tias koj tsuas yuav daws tau koj tej teeb meem xwb, koj kuj yuav tau txais txiaj ntsim los ntawm tus tib neeg ntawd thiab. Tiam sis yog koj ntsib tus uas tsis to taub qhov tseeb, mas koj yuav daws tsis tau koj tej teeb meem, thiab tus tib neeg ntawd kuj yuav cuam tshuam rau tej teeb meem ntawd thiab. Yog koj hais rau Vajtswv, Vajtswv mam li nplij koj siab thiab tshoov koj siab. Yog koj tus kheej nyob tau twj ywm rau ntawm Vajtswv lub xub ntiag, thiab nyeem Vajtswv cov lus, thiab tom qab ntawd ua tib zoo xav thiab thov Vajtswv, ces koj yuav to taub qhov tseeb thiab daws tau koj tej teeb meem. Vajtswv cov lus pab tau koj nrhiav ib txoj hauv kev kom kov yeej koj tej kev nyuaj, thiab thaum koj ntsib qhov thaiv kev me me no, koj yuav tsis dawm, thiab nws yuav txwv tsis tau koj, thiab nws yuav cuam tshuam tsis tau koj txoj kev ua koj tes dej num. Yuav muaj lub sij hawm uas koj cia li nyuaj siab thiab nyob tsaus ntuj me ntsis. Thaum qhov no tshwm sim, koj yuav tsum thov Vajtswv tam sid, thiab txav los ze Nws, uas txhais hais tias hais rau Nws txog yam uas nyob hauv koj lub siab thiab qhia Nws txhua lub sij hawm thiab txhua qhov chaw uas koj nyob. Ua li no mas thiaj li hloov tau koj tus yam ntxwv. Koj yuav tsum muaj txoj kev ntseeg hais tias: “Vajtswv yeej nrog nraim kuv tas li, Nws yeej tsis tau ncaim kuv mus li, kuv paub li ntawd. Txawm hais tias kuv yuav nyob rau qhov twg los sis kuv tab tom ua dab tsi los xij—kuv tuaj yeem so tau, los sis mus rau ib qho kev sib txoos, los sis mus ua kuv tes dej num—hauv kuv lub siab, kuv paub tias Vajtswv coj kuv txhais tes, tias Nws yeej tsis tau ncaim kuv mus li.” Qee zaus, rov xav txog tias koj ua neej txhua hnub dhau ob peb xyoo los no tau li cas, koj hnov tias koj lub siab loj tuaj lawm, tias Vajtswv tau coj koj kev lawm, tias Vajtswv txoj kev hlub twb tau tiv thaiv koj los dhau lawm. Xav txog tej no, koj cia li thov Vajtswv hauv koj lub siab, ua tsaug rau Vajtswv hais tias: “Au Vajtswv, kuv ua Koj tsaug! Kuv qaug zog thiab siab muag heev, qias vuab tsuab dhau lawm. Yog tsis muaj Koj los coj kuv kev zoo li no, ces kuv yeej tsis nyob los txog hnub no yog kuv vam khom rau kuv tus kheej xwb.” Qhov no tsis yog kev koom ua ke ntawm sab ntsuj plig lov? Yog tias tib neeg tuaj yeem txuas lus tau li no, lawv yuav tsis muaj ntau yam los hais rau Vajtswv lov? Lawv yeej yuav tsis cia li tsis muaj ib yam dab tsi los hais rau Vajtswv rau ntau hnub li. Thaum koj tsis muaj ib yam dab tsi los hais rau Vajtswv li, ces Vajtswv tsis nyob hauv koj lub siab lawm. Yog tias Vajtswv nyob rau hauv koj lub siab, thiab koj muaj kev ntseeg Vajtswv, ces koj yeej yuav muaj peev xwm los hais txhua yam uas nyob hauv koj lub siab rau Nws xwb, nrog rau tej uas koj yuav hais rau koj tus phooj ywg uas tso siab tau. Tseeb tiag, Vajtswv yog koj tus phooj ywg uas tso siab tau tshaj plaws. Yog tias koj saib Vajtswv yam li koj tus phooj ywg uas tso siab tau tshaj plaws, yam li koj tsev neeg uas koj cia siab rau tshaj plaws, vam khom rau tshaj plaws, tso siab tshaj plaws, ntseeg tshaj plaws, tus uas koj nyob ze tshaj plaws, ces yeej tsis muaj hnub uas koj yuav tsis muaj ib yam dab tsi los hais rau Vajtswv li. Yog tias koj yeej muaj qee yam los hais rau Vajtswv tas li, koj yuav tsis nyob rau ntawm Vajtswv lub xub ntiag tas li lov? Yog tias koj tuaj yeem nyob rau ntawm Vajtswv lub xub ntiag tas li, ces txhua lub sij hawm, koj yuav paub tias Vajtswv coj koj kev li cas, Nws txhawj txog koj thiab tiv thaiv koj li cas, Nws coj kev thaj yeeb thiab kev xyiv fab los rau koj li cas, Nws foom koob hmoov rau koj li cas, Nws qhia koj li cas, thiab Nws cem koj, qhuab qhia koj, qhuab ntuas koj, thiab txiav txim thiab rau txim rau koj li cas; koj yuav paub meej thiab pom tseeb txog txhua yam no hauv koj lub siab. Yog txhua hnub koj tsuas lam ua kom dhau, tsuas hais lo lus tias ntseeg Vajtswv xwb, tsis muaj Vajtswv nyob rau hauv koj lub siab li, thiab yog koj tsuas lam ua koj tes dej num thiab lam koom tej kev pe hawm nyob rau sab nraud, thiab lam nyeem Vajtswv cov lus thiab lam thov Vajtswv txhua hnub, ua raws li tej kev xav phem no xwb, ces qhov no tsis yog txoj kev ntseeg Vajtswv—tej kev cai dab qhuas uas koj coj no tsis muaj ib qho cuam tshuam rau qhov tseeb li. Cov uas ntseeg Vajtswv yuav tsum ua tib zoo nyeem ib nqe lus ntawm Vajtswv cov lus txhua hnub, thiab thov Vajtswv thiab kawm cov lus no. Lawv yuav tsum tau txais kev qhia los ntawm Vajtswv cov lus txhua hnub, thiab to taub qhov tseeb me ntsis. Tshwj xeeb yog, lawv yuav tsum muaj peev xwm nrhiav qhov tseeb thiab daws teeb meem raws li tej hauv paus ntsiab lus thaum ua lawv tej dej num, thiab muaj peev xwm txais tau kev paub txog lub neej txhua hnub, thiab paub txog Vajtswv tes hauj lwm. Tus uas ua li ntawd yog tus ntseeg tseeb thiab yog tus tib neeg uas raws Vajtswv qab.

Qhov teeb meem twg yog qhov tseem ceeb tshaj plaws thiab yog qhov uas yuav tsum tau daws tshaj plaws nyob rau hauv koj txoj kev ntseeg Vajtswv? Yog qhov teeb meem ntawm koj txoj kev nrog Vajtswv sib raug zoo ntag. Yog koj ntseeg Vajtswv, tiam sis Nws tsis nyob hauv koj lub siab, thiab koj tsis muaj kev sib raug zoo nrog Nws, thiab koj tsis saib Vajtswv yam li yog koj tsev neeg thiab tus phooj ywg uas koj ncawg, tso siab rau, thiab zoo tshaj plaws, ces Vajtswv tsis yog koj tus Vajtswv. Xyaum ua raws li Kuv cov lus li ib ntus es saib seb nej tus yam ntxwv puas hloov. Qhov xyaum ua raws li Kuv cov lus ntawd koj tuaj yeem paub tseeb hais tias koj nyob rau hauv Vajtswv lub xub ntiag, tias koj muaj qhov xwm txheej zoo li qub thiab tus yam ntxwv zoo li qub. Thaum tib neeg tus yam ntxwv zoo li qub, thiab lawv tsis raug tib neeg, xwm txheej, thiab txhua yam, los sis tej xwm txheej uas los raug rau lawv uas nyob rau txhua theem ntawm lawv txoj kev paub txog lub neej ntawd haub ntxias, thiab lawv muaj peev xwm ua lawv tes dej num li qub lawm, ces lawv muaj lub siab tseeb thiab lawv yog cov uas to taub txog qhov tseeb qhov muaj tiag lawm.

Lub Xya hli ntuj 13, 2017