Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Xya)

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

Tej Hauv Paus Ntsiab Lus rau Txoj Kev Daws Cov Uas Koom Tej Kev Sib Raug Zoo Uas Tsis Tsim Nyog

Hais txog ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas li ib txwm muaj ntawm pawg ntseeg ntawd, tag nrho peb tau muab faib ua kaum ib qho teeb meem. Dhau los ntawd, peb tau sib qhia txog qhov teeb meem rau—ua tej kev sib raug zoo uas tsis tsim nyog. Qhov no tseem ceeb yog hais txog dab tsi? Qhov lam tau lam haub ntxias lwm tus thiab ua tej kev sib raug zoo ntawm txoj kev ntshaw ntawm sab cev nqaij daim tawv. Peb tau sib qhia dab tsi txog kis no? Thaum cov tib neeg zoo li no tshwm sim hauv pawg ntseeg, yuav tsum daws lawv li cas? Muaj cov hau kev daws dab tsi? Peb puas tsim nyog ua ntsej lag muag dig thiab cia li tsis quav ntsej, los sis peb puas tsim nyog daws qhov teeb meem ntawd raws li qhov tseeb tej hauv paus ntsiab lus? Peb puas tsim nyog zam qhov ntawd los sis siv kev hlub los hloov cov uas muaj feem xyuam ntawd? Peb puas tsim nyog sib qhia qhov tseeb rau lawv los sis ceeb toom rau lawv thiab ntsaig lawv tawm mus? Txoj kev tsim nyog tshaj plaws los daws qhov ntawd yog dab tsi? (Ceeb toom thiab txwv cov uas muaj feem xyuam ntawd. Yog txwv tsis tau lawv, ces ntsaig lawv tawm mus.) Yuav tsum txwv lawv li cas? Qhov no puas yooj yim ua? Thaum tej xwm txheej zoo li no tshwm sim, feem ntau yeej tsis yooj yim txwv cov uas muaj feem xyuam ntawd li. Ib txhia tib neeg pom qhov xwm txheej zoo li no thiab xav tias qhov ntawd tsis tsim nyog, tiam sis lawv txaj muag hais tawm. Ib txhia tib neeg tej zaum yuav tsis hais ncaj qha txog qhov ntawd, tiam sis cov uas muaj feem xyuam ntawd tej zaum yuav tsis mloog. Txhua tus tib neeg uas lam tau lam haub ntxias lwm tus ntawd lawv txoj kev ua neeg zoo li cas? Lawv puas yog cov tib neeg uas tsim txiaj thiab coj ncaj ncees? Lawv puas yog cov tib neeg uas muaj tus cwj pwm coj zoo ntawm cov neeg dawb huv? Lawv puas yog cov tib neeg uas muaj meej mom thiab paub txaj muag? (Tsis yog.) Yog muaj neeg tsuas siv tej lus hais ntuas lawv los sis sib qhia qhov tseeb rau lawv li ib txwm xwb, qhov ntawd puas daws tau qhov teeb meem? Yeej daws tsis tau. Thaum ib qho xwm txheej zoo li no tshwm sim, qhov ntawd txhais hais tias qhov tseeb tiag lawv twb xav txog qhov no nyob hauv lawv lub siab tau ntev los lawm. Thaum txog rau theem ntawd, puas yooj yim tswj? Qhov pab thiab siv kev hlub los hloov lawv ntawd puas daws tau qhov teeb meem? (Tsis tau.) Yog li, txoj kev daws teeb meem uas zoo tshaj plaws yog dab tsi? Qhov ntawd yog ntsaig cov tib neeg zoo li no tawm mus, muab lawv cais tawm ntawm cov uas ntseeg Vajtswv thiab ua lawv tej dej num yam siab dawb paug, thiab tsis txhob cia lawv pheej cuam tshuam thiab ua phem rau lwm tus ntxiv.

Tam sim no nyob rau hauv qee lub pawg ntseeg, tej xwm txheej uas txiv neej thiab poj niam sib haub sib ntxias ntawd tseem tshwm sim tas li. Cov tib neeg no, tsuav lawv muaj lub cib fim xwb, lawv yuav nyob ua ke sib haub sib ntxias, coj tus cwj pwm uas ua ywj siab tshwj xeeb thiab tsis paub txaj muag kiag li. Kuv hnov txog ib tug txiv neej uas haub ntxias ntau tus poj niam; nws tsis yog tham ua nkauj nraug tiag tiag tiam sis tsuas lam haub ntxias thiab nplaum rawv rau txhua tus poj niam uas nws ntsib xwb. Ib txhia tib neeg hais tias, “Nws tsuas yog sib raug zoo li ib txwm xwb; qhov ntawd tsuas yog nws txoj kev sib raug zoo xwb.” Cov tib neeg feem coob pom tias txoj kev sib raug zoo ntawd tsis txhawb lawv, ntxim ntxub, thiab qias neeg. Qhov no tsis yog ib qho teeb meem lod? Qhov no puas ua pov thawj tau tias tej kev sib raug zoo no tsis tsim nyog? Yog ob tug tib neeg sib tham ua nkauj nraug tsis yog tsuas cuam tshuam rau lawv tus kheej txoj kev ua lawv tej dej num xwb tiam sis tseem cuam tshuam rau lwm tus thiab, ces yuav tsum txwv lawv. Yuav tsum tsis txhob cia lawv sib tham ua nkauj nraug nyob rau hauv lub neej hauv pawg ntseeg, tshwj xeeb tshaj yog tsis txhob cia nyob hauv pawg ntseeg uas ua tes dej num puv sij hawm, vim qhov no cuam tshuam rau lwm tus txoj kev ua tes dej num thiab tsis zoo rau pawg ntseeg tes hauj lwm. Thaum lawv tuaj yeem tsom ntsoov rau lawv tej dej num lawm, ces tuaj yeem cia lawv rov qab los rau hauv pawg ntseeg uas ua tes dej num puv sij hawm los ua lawv tej dej num. Ib txhia tib neeg tsis yog sib tham ua nkauj nraug tiag tiag tiam sis lam tau lam haub ntxias thiab nplaum rawv rau lwm tus, ua si nrog tej kev ntshaw ntawm sab cev nqaij daim tawv, cuam tshuam lub neej hauv pawg ntseeg, cuam tshuam tib neeg lub siab, thiab cuam tshuam lwm tus. Qhov xwm txheej no yog ib qho kev cuam tshuam pawg ntseeg tes hauj lwm thiab yuav tsum daws thiab saib xyuas raws li tej hauv paus ntsiab lus; yuav tsum muab cov tib neeg no cais tawm thiab ntsaig lawv tawm mus kom ncav sij hawm. Qhov teeb meem no puas yooj yim daws? Yuav tsum tsis txhob cia leej twg cuam tshuam thiab tab kaum lub neej hauv pawg ntseeg thiab pawg ntseeg tes hauj lwm, thiab yuav tsum daws tej teeb meem zoo li no raws li tej hauv paus ntsiab lus. Ib txhia tib neeg hais tias, “Yog daws lawv nyob rau hauv tej xwm txheej uas tsis muaj leej twg los ua lawv tes dej num, ces tsis tuaj yeem daws lawv; yuav tsum cia lawv ua mus ntxiv thiab haub ntxias lwm tus raws li lawv xav ua. Txawm lawv haub ntxias lwm tus li cas los xij, yuav tsum tso cai rau lawv.” Vajtswv lub tsev puas muaj txoj cai zoo li no? Puas muaj ib lub hauv paus ntsiab lus zoo li no nyob rau hauv txoj kev sib qhia thaum sib txoos ua ke zaum tas los ntawd uas hais txog kev daws cov tib neeg zoo li no? (Tsis muaj.) Thaum ntsib tej xwm txheej zoo li no, cov thawj coj thiab cov neeg saib xyuas hauv pawg ntseeg tsis paub meej lawm thiab tsis paub yuav daws tej ntawd li cas, cia cov tib neeg no lam tau lam haub ntxias lwm tus nyob rau hauv pawg ntseeg, uas ua rau tib neeg feem coob hnov tsis xis nyob thiab tsis txhawb rau lawv, tsis nyiam kiag li nyob hauv lawv lub siab tiam sis tsis muaj cuab kav hais tawm thiab yuav tsum tau thev xwb. Cov thawj coj thiab cov neeg saib xyuas ntseeg hais tias pawg ntseeg tes hauj lwm thiab Vajtswv lub tsev tsis muaj cov tib neeg no tsis tau, tias yog muab cov tib neeg uas lam tau lam haub ntxias lwm tus no ntiab tawm mus lawm, ces yuav muaj neeg tsawg los ua tes hauj lwm lawm. Hom laj thawj no puas yog? (Tsis yog.) Tsis yog li cas? (Cov tib neeg no ua tsis tau tes hauj lwm; lawv tsis muaj siab ua hauj lwm.) Qhov ntawd hais raug nkaus lub ntsiab lawm. Nej xav hais tias cov tib neeg uas muaj peev xwm lam tau lam haub ntxias lwm tus ntawd yog hom neeg zoo li cas? Lawv tsis muaj kev txwv hlo li; lawv yog cov tsis ntseeg, cov ib txwm tsis ntseeg. Tsis yog tias lawv tsis nyiam qhov tseeb, tsis nyiam qhov tseeb kiag li, muaj kev ntseeg me, tseem hluas, thiab muaj lub hauv paus ntiav xwb—tsis yog tsuas muaj npaum li ntawd xwb. Txhua tus ib txwm tsis ntseeg uas tsis ntseeg Vajtswv ntawd puas yog puav leej lam tau lam haub ntxias lwm tus? Lawv txhua tus puav leej ua tej kev plees kev yig lod? Tsuas yog ib feem ntawm lawv xwb; ib feem tsawg tseem saib kev coj ncaj ncees thiab meej mom muaj nqis, quav ntsej txog lawv lub koob npe, thiab muaj ib qho ciaj ciam rau lawv tus kheej txoj kev coj. Cov uas hu ua cov ntseeg Vajtswv no yeej piv tsis tau cov ib txwm tsis ntseeg li, yog li ntawd qhov hu lawv ua cov ib txwm tsis ntseeg thiab cov tsis ntseeg ntawd puas tshaj dhau? (Tsis tshaj li.) Txawm hais tias cov tib neeg no tuaj yeem siv dag zog ua tau qee yam hauj lwm nyob hauv Vajtswv lub tsev los, raws li lawv tus yam ntxwv xeeb txawm, lawv yog cov tsis ntseeg thiab cov ib txwm tsis ntseeg. Lawv tsis muaj tej hauv paus ntsiab lus nyob hauv txhua yam uas lawv ua thiab coj lawv tus kheej yam tsis muaj qhov txwv, tsis muaj meej mom, thiab tsis paub txaj muag li. Cov ib txwm tsis ntseeg haj tseem txhawb lub tswv yim uas hais tias “Tib neeg tim tsum lawv lub meej mom ib yam li tsob ntoo tim tsum nws cov tawv ntoo”; tiam sis cov tib neeg no twb tsis xav ceev lawv lub meej mom thiab, yog li ntawd lawv puas xav tau qhov tseeb? Lawv puas muab lawv tus kheej fij tau rau Vajtswv tiag tiag? Lawv puas ua tau raws li tej hauv paus ntsiab lus nyob hauv lawv tes dej num? Yeej tsis tau kiag li! Lawv tsuas yog siv zog ua hauj lwm xwb. Cov tib neeg uas siv zog ua hauj lwm tsis muaj qhov tseeb hlo li; lawv txoj kev siv zog ua hauj lwm mas tab kaum thiab cuam tshuam, thiab ua tsis tau raws li tus qauv ntawm kev ua tes dej num. Txawm hais tias nyob sab nraud mas zoo li lawv tab tom ua lawv tes dej num los, txawm koj sib qhia tej hauv paus ntsiab lus rau lawv li cas los, lawv yeej tsis mloog hlo li. Lawv ua txhua yam uas lawv xav ua, tsis ua raws li tej hauv paus ntsiab lus li. Thaum cov tib neeg no mloog cov lus qhuab qhia, lawv tus yam ntxwv thiab yeeb yam ntawm lub ntsej muag nthuav lawv lub ntsiab tseeb uas yog cov tsis ntseeg ntawd tawm. Lwm tus zaum ncaj ncaj, mloog tiag tiag thiab ua tib zoo mloog, tiam sis cov tib neeg no mloog li cas? Qee tus khooj rau saum rooj, ncab duav thiab rua lo tas li, zaum tsis zoo, saib tsis zoo li ib tug tib neeg hlo li. Cov tib neeg uas saib tsis zoo li tib neeg hlo li ntawd yog hom neeg zoo li cas? Lawv tsis yog tib neeg hlo li; lawv tsuas hnav tib neeg daim tawv xwb. Nej hnov zoo li cas thaum nej pom ib pab “kab nkag” tuaj mloog lus qhuab qhia? Qhov ntawd tsis ua rau nej tsis xis nyob lod? (Yog.) Pab neeg no saib qias neeg heev, thiab qhov pom lawv ua rau Kuv tsis xav hais lus lawm. Kuv hais lus rau tib neeg, tsis yog rau cov “kab nkag.” Cov tib neeg uas mloog lus qhuab qhia zoo li no lawv tej yam ntxwv puas tuaj yeem zoo zuj zus thaum ua lawv tes dej num? Lawv txoj kev ntseeg Vajtswv puas loj hlob tau thiab lawv puas to taub tau qhov tseeb meej zuj zus thaum lawv yim ua lawv tes dej num? Yeej tsis tau kiag li! Txawm lawv ua lawv tes dej num li cas los, lawv theem ntawm sab ntsujplig thiab kev ntseeg yeej tsis loj hlob li. Lawv ua txhua yam ywj siab thiab tsis muaj kev txwv, ua neej nyob hauv tej kev ntshaw ntawm sab cev nqaij daim tawv thiab ua neej nyob hauv tej moj yam qias vuab tsuab yam tsis muaj kev paub, kev cem tus kheej, los sis kev qhuab ntuas—lawv tsis yog tib neeg! Rau cov tib neeg zoo li no, tsis hais txog lwm yam phem uas lawv tau ua los sis lawv tej kev ua uas tau ua txhaum rau tej hauv paus ntsiab lus thiab ua puas tsuaj rau Vajtswv lub tsev tej txiaj ntsim, tsuas yog qhov ua tej kev sib raug zoo tsis tsim nyog xwb twb txaus los ntsaig lawv tawm mus lawm. Qhov no yog ib qho teeb meem uas yooj yim heev, tiam sis cov thawj coj thiab cov neeg saib xyuas hauv pawg ntseeg tsuas paub khawb taub hau, tsis paub yuav daws qhov teeb meem no li cas. Qhov teeb meem no yooj yim daws heev; yav tas los tau sib qhia txog qhov no lawm. Yuav tsum daws qhov no raws li tej hauv paus ntsiab lus, thiab cov uas tsim nyog raug ntsaig tawm mus ces yuav tsum ntsaig tawm mus. Tsis txhob xav ntau dhau; txawm tsis muaj lawv los Vajtswv lub tsev tes hauj lwm yeej yuav mus tau zoo. Qhia Kuv seb, ib tug neeg twg yuav tsum ua li cas yog lawv pom quav dev los sis quav nyob rau ib qho twg? Lawv yuav tsum ntxuav tawm kiag tam sid; yog tsis ntxuav tawm kom ncav sij hawm, yoov thiab yoov tshaj cum yuav tuaj sai sai, thiab tib neeg yuav tsis muaj kev thaj yeeb nyob rau qhov chaw zoo li ntawd. Tej Kuv hais tag nrho no txhais li cas? (Yuav daws qhov teeb meem uas ua tej kev sib raug zoo tsis tsim nyog hauv pawg ntseeg, thawj kauj ruam yuav tsum tshem cov tsis ntseeg uas liam ntawd tawm mus.) Yog lawm, yog lub ntsiab no. Yog muaj cov tib neeg uas yog hom “quav dev tsw ntxhiab” nyob hauv pawg ntseeg, lawv yeej yuav haub tau qee cov “yoov tsw ntxhiab” tuaj xwb. Los ntawm qhov tshem cov quav dev tsw ntxhiab ntawd tawm mus, cov yoov no yeej yuav ploj mus xwb. Qhov no tsis yog ib txoj kev daws lod? Txoj kev daws no puas tsim nyog? (Tsim nyog.) Thaum daws tej teeb meem zoo li no, qee cov thawj coj pawg ntseeg pheej muaj kev txhawj xeeb, hais tias, “Yog peb tshem cov uas lam tau lam haub ntxias lwm tus ntawd tawm lawm, puas yog yuav muaj neeg tsawg los ua tes hauj lwm lawm?” Qhov no puas yog ib qho teeb meem? (Tsis yog.) Vim li cas? Yuav tsum daws qhov kev txhawj xeeb no li cas? Txawm hais tias lawv qhov kev txhawj xeeb ntawd muaj laj thawj, xav hais tias yog tej kev cheem tsum rau tib neeg nruj dhau thiab cov uas ua tau tes hauj lwm ntawd raug tshem tawm lawm, yuav tsis muaj leej twg los ua feem hauj lwm no, qhov nrhiav lwm cov tib neeg uas muaj peev xwm los hloov lawv ntawd puas yog yooj yim? (Yog.) Thiab txawm hais tias nrhiav tsis tau cov neeg los hloov kiag tam sid los xij, tes hauj lwm ntawd tuaj yeem ua tau tom qab thaum nrhiav tau cov tib neeg uas tsim nyog yam tsis cuam tshuam rau Vajtswv lub tsev tes hauj lwm. Vajtswv lub tsev tsis yug cov tib neeg uas tsis ua tes hauj lwm uas tsim nyog ua no. Yog lawv tuaj yeem lees txim hloov dua siab tshiab thiab saib xyuas tej hauj lwm uas tsim nyog ua, lawv tuaj yeem ua tes hauj lwm ntawd mus ntxiv, tiam sis yog lawv tsis lees txim hloov dua siab tshiab, ces yuav tsum tshem lawv txoj cai ua tes dej num tawm. Qhov no tsis yog muaj laj thawj thiab tsim nyog lod? Vajtswv lub tsev xum yug cov neeg siv zog ua hauj lwm zoo dua li yug cov tsis ntseeg thiab cov ib txwm tsis ntseeg. Lub hauv paus ntsiab lus no puas yog? (Yog.) Yog nyob rau txoj kev twg? Txawm hais tias ib tug neeg siv zog ua hauj lwm tsis caum qhov tseeb los xij, lawv tseem txaus siab hlo siv zog ua hauj lwm, thiab lawv tuaj yeem siv dag zog ua yam coj zoo thiab mloog lus nyob rau hauv Vajtswv lub tsev. Txawm hais tias lawv tsuas yog siv zog ua xwb los, lawv ua siab ncaj, thiab yam tsawg tshaj plaws lawv tsis yog neeg phem. Cov no yog hom neeg uas Vajtswv lub tsev tseg cia. Yog ib tug neeg phem thiab liam, pheej ua tej nkhaus thiab phem, thiab txawm yog lawv siv zog ua hauj lwm xwb los twb ua tsis tau zoo thiab ua ib tug neeg siv zog ua hauj lwm xwb los twb tsis mus raws li tus qauv, ces cov tib neeg zoo li no yog cov ib txwm tsis ntseeg, thiab Vajtswv lub tsev tsis tseg lawv cia. Yog li ntawd, tsis yog vim lawv yog cov neeg siv zog ua hauj lwm es Vajtswv lub tsev thiaj li tsis tseg lawv cia, tiam sis vim lawv txoj kev siv zog ua hauj lwm twb tsis ua tau raws li tus qauv, vim txawm lawv siv zog ua hauj lwm los tseem muaj kev ua lag luam thiab. Yog vim lawv pheej xav ua phem thiab ua kev cuam tshuam, pheej xav ua tej yam nkhaus thiab phem nyob hauv pawg ntseeg, ua rau pawg ntseeg tes hauj lwm qhov raws qib raws duas ntxhov thiab cuam tshuam rau tib neeg feem coob txoj kev ua lawv tes dej num. Lawv ua rau pawg ntseeg qhov huab cua qias vuab tsuab thiab ua rau Vajtswv lub npe txaj muag—tsis muaj ib yam dab tsi uas yuav tsim nyog tshaj qhov tshem lawv tawm lawm. Tsis hais qhov twg uas muaj cov tib neeg uas yog hom “quav dev tsw ntxhiab”, yuav tsum tshem lawv tawm mus tam sid. Puas to taub? (To taub lawm.)

XI. Kev Tswj thiab Tab Kaum Tej Kev Xaiv Tsa

Hnub no, peb yuav sib qhia ntxiv txog lub luag hauj lwm kaum ob ntawm cov thawj coj thiab cov neeg ua hauj lwm: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Qhov kaum ib ntawm lub luag hauj lwm kaum ob no yog dab tsi? (Kev tswj thiab tab kaum tej kev xaiv tsa.) Peb twb tau sib qhia me ntsis txog kev tswj thiab tab kaum tej kev xaiv tsa ua ntej ntawd thaum uas sib qhia thiab nthuav tawm txog ntau yam kev qhia tshwm ntawm cov tawm tsam khetos lawm, puas yog? (Yog.) Vajtswv lub tsev tej kev npaj tes hauj lwm muaj cov kev cai rau pawg ntseeg tej kev xaiv tsa. Muaj tej kev xaiv tsa ib xyoos ib zaug, thiab kuj muaj tej kev xaiv tsa uas nyob rau hauv qee qhov xwm txheej tshwj xeeb thiab. Txhua pawg ntseeg yuav tsum xaiv cov thawj coj thiab cov neeg ua hauj lwm nyob rau txhua theem raws li tej hauv paus ntsiab lus uas Vajtswv lub tsev tau tsim tsa. Cov kev cai rau tej kev xaiv tsa muaj xws li tej hauv paus ntsiab lus ntawm kev xaiv tsa, cov qauv rau kev xaiv tib neeg, cov hau kev thiab kev xaiv tsa, thiab ntau yam uas yuav tsum tau ua tib zoo ceev faj uas cov kwv tij thiab cov nkauj muam yuav tsum tau paub thaum xaiv tsa. Muaj tseeb tiag, ua ntej txhua zaus kev xaiv tsa, cov thawj coj thiab cov neeg ua hauj lwm nyob rau txhua theem yuav tsum tau sib qhia txog txhua sab ntawm tej hauv paus ntsiab lus kev xaiv tsa kom paub tseeb tias cov neeg Vajtswv xaiv tseg tuaj yeem to taub tej ntawd meej. Ua li no, txoj kev xaiv tsa qhov txiaj ntsig thiaj li yuav zoo dua me ntsis. Hnub no peb yuav tsis sib qhia txog tej yam ntxaws ntxaws ntawm tej kev xaiv tsa lawm; lub ntsiab lus tseem ceeb ntawm txoj kev sib qhia hnub no yog qee qhov kev qhia tshwm ntawm kev tswj thiab tab kaum tej kev xaiv tsa.

A. Tej Kev Qhia Tshwm ntawm Txoj Kev Tswj thiab Tab Kaum Tej Kev Xaiv Tsa

Pawg ntseeg tej kev xaiv tsa yuav tsum tau ua raws li tej hauv paus ntsiab lus kev xaiv tsa uas Vajtswv lub tsev tau tsim tsa kom nruj los xaiv cov neeg uas tsim nyog tshaj plaws los ua cov thawj coj thiab cov neeg ua hauj lwm. Yog hais tias ua txhaum rau tej hauv paus ntsiab lus kev xaiv tsa thiab siv lwm txoj kev xaiv tsa, qhov no yog txoj kev ua ntawm cov thawj coj cuav thiab cov tawm tsam khetos. Vajtswv lub tsev yuav tsum txwv tej kev yuam cai zoo li no thiab tshawb xyuas thiab daws cov tib neeg tseem ceeb uas tau tswj tej kev xaiv tsa. Thaum muaj tej kev xaiv tsa hauv pawg ntseeg, ntau hom tib neeg yuav raug nthuav tawm, thiab tib neeg ntau yam kev xav yuav raug nthuav tawm. Ib txhia tib neeg ua ntau yam kev ua tsis ncaj nyob tom qab nraub qaum txhawm rau kom lawv tus kheej raug xaiv los ua cov thawj coj los sis kom cov tib neeg uas muaj txiaj ntsim rau lawv raug xaiv. Piv txwv li, ib txhia tib neeg ntshai tsam cov uas caum qhov tseeb raug xaiv los ua cov thawj coj thiab hem rau lawv lub meej mom, yog li ntawd lawv thiaj li siv txhua txoj hau kev los txiav txim rau cov tib neeg no tom qab nraub qaum tias lawv tau muaj dua kev qaug zog dab tsi thiab tau ua dua tej kev ua yuam kev twg, teem txim tias cov tib neeg no khav theeb thiab khav tias lawv tus kheej ncaj ncees uas muaj tus moj yam ntawm cov tawm tsam khetos, thiab lwm yam ntxiv, txhua yam yog txhawm rau sim ua kom cov tib neeg no txhob raug xaiv. Tseem muaj lwm cov, txhawm rau kom raug xaiv los ua cov thawj coj, thaum lub sij hawm xaiv tsa ntawd, lawv yuav khoom zoo mus xiab tib neeg los sis cog lus nrog cov lus uas zoo mloog, thiab kuj siv ntau txoj kev los txhawb thiab ntxias lwm tus txog qhov yuav pov ntawv rau leej twg los sis tsis pov rau leej twg. Tsis hais lawv siv txoj hau kev thiab lub tswv yim twg los xij, puav leej yog txhawm rau tswj tej kev xaiv tsa thiab cuam tshuam qhov tshwm sim los ntawm txoj kev xaiv tsa. Txawm hais tias pawg ntseeg pheej sib qhia txog tej hauv paus ntsiab lus kev xaiv tsa—xws li xaiv cov uas muaj kev ua neeg zoo, cov uas caum qhov tseeb, thiab cov uas tuaj yeem coj cov kwv tij thiab cov nkauj muam los ua lawv tej dej num li ib txwm, nyeem Vajtswv cov lus li ib txwm, nkag mus rau hauv qhov tseeb qhov muaj tiag, thiab lwm yam hauv paus ntsiab lus uas zoo li no—cov tib neeg no yeej tsis mloog thiab xav ua tej kev ua tsis ncaj. Qhov ua tej kev ua tsis ncaj ntawd txhais li cas? Qhov ntawd txhais hais tias lawv pheej xav ua kev dag. Lawv yeej tsis ntsuas nyob tab meeg sawv daws tias leej twg zoo thiab leej twg tsis zoo, pheej xav ua tej kev ua tsis ncaj thiab koom nrog tej kev npaj phem zais ntshis thiab tej tswv yim phem tom qab nraub qaum. Lawv haj tseem npaj tom qab txog qhov yuav xaiv leej twg thiab tsis xaiv leej twg, sim ua kom txhua tus muaj kev pom zoo. Tej no tsis yog tej kev ua tsis ncaj lod? Qhov no tsis yog kev ua dag lod? (Yog.) Qhov no puas yog kev tiv thaiv tej kev xaiv tsa yam qhib lug thiab ncaj ncees raws li qhov tseeb tej hauv paus ntsiab lus? Tsis yog—lawv siv tib neeg tej tswv yim phem thiab tej hau kev yam khav theeb xav tswj tej kev xaiv tsa. Lawv lub hom phiaj ntawm kev tswj tej kev xaiv tsa yog dab tsi? Lawv xav tswj tej kev xaiv tsa qhov txiaj ntsig, lawv xav kom lawv tus kheej raug xaiv, thiab yog lawv tsis tuaj yeem raug xaiv lawv xav txiav txim siab tias leej twg yog tus raug xaiv, yog li ntawd lawv thiaj li ua ntau yam kev ua tsis ncaj tom qab nraub qaum. Lawv tsis xav txog pawg ntseeg tes hauj lwm los sis cov kwv tij thiab cov nkauj muam txoj kev nkag mus rau hauv lub neej txoj sia li. Lawv tsis xav txog Vajtswv lub tsev los sis cov kwv tij thiab cov nkauj muam tej txiaj ntsim; lawv tsuas xav txog lawv tus kheej tej txiaj ntsim xwb. Thaum muaj tej kev xaiv tsa, lawv tus kheej tej kev npaj siab thiab tej kev ntshaw ntawd yog qhov tseem ceeb tshaj plaws. Yog li ntawd vim li cas lawv thiaj li xav tswj tej kev xaiv tsa? Yog ib tug neeg twg xav coj cov kwv tij thiab cov nkauj muam los rau ntawm Vajtswv lub xub ntiag thiab nkag mus rau hauv qhov tseeb qhov muaj tiag tseeb tiag, lawv puas yuav ua li no? Lawv puas yuav muaj tej kev ntshaw zoo li no? Lawv puas yuav qhia tshwm txoj kev coj zoo li no? Tsis qhia tshwm li. Tsuas yog cov uas muaj tej kev npaj siab zais ntshis, tej kev xav ua heev thiab tej kev ntshaw heev uas xav tswj pawg ntseeg tej kev xaiv tsa xwb thiaj li yuav ua li no. Nyob hauv pawg ntseeg, lawv haub ntxias qee cov tib neeg uas nrog lawv sib raug zoo dua me ntsis, uas muaj tej kev xam pom ib yam li lawv, thiab muaj tej kev npaj siab thiab tej hom phiaj zoo ib yam nkaus, thiab kuj ntxias qee cov tib neeg uas feem ntau qaug zog, tsis tshua caum qhov tseeb, thiab feeb tsis meej, tsis paub dab tsi, thiab yooj yim raug lwm tus haub thiab tswj, los ua ib lub zog los cuam tshuam pawg ntseeg tes hauj lwm xaiv tsa. Lawv lub hom phiaj ntawm kev tawm tsam pawg ntseeg yog kom lawv tus kheej raug xaiv, kom lawv tus kheej tau ua tus txiav txim siab thaum kawg txog kev xaiv tsa tej txiaj ntsig. Lawv xav xaiv cov tib neeg uas lawv tau teem tseg ua ntej, cov uas muaj txiaj ntsim rau lawv. Yog cov tib neeg no raug xaiv, ces lawv txoj kev npaj phem tau tiav hlo lawm. Yog li qhov txiaj ntsig ntawm kev xaiv tsa zaum no yog los sis yuam kev? (Tsis yog.) Yeej yuam kev xwb xwb li. Cov uas raug xaiv los ntawm kev xaiv tsa uas raug cov tib neeg phem tswj ntawd yeej yuav muaj txiaj ntsim rau cov tib neeg phem xwb. Vim li cas lawv thiaj li muaj txiaj ntsim rau cov tib neeg phem? Vim cov tib neeg phem tuaj yeem ua raws li lawv lub siab nyiam, thiab ua phem yam tsis muaj kev tswj nyob hauv pawg ntseeg yam tsis muaj leej twg kam nthuav tawm los sis txwv lawv. Lawv yuav tsis raug ntsaig tawm mus, hos cov uas caum qhov tseeb yuav raug lawv cais tawm thiab tsuj nias, thiab pawg ntseeg yuav dhau los ua cov neeg phem thaj chaw. Pom tseeb tias, qhov tshwm sim los thaum kawg ntawm kev xaiv tsa uas raug cov tib neeg phem tswj ntawd yeej tsis yog li; qhov ntawd yeej tawm tsam rau cov tib neeg feem coob txoj kev xam pom thiab yuam cai rau tej hauv paus ntsiab lus. Cov thawj coj pawg ntseeg thiab cov kwv tij thiab cov nkauj muam yuav tsum paub thiab ceev faj txog txhua yam kev coj thiab kev ua ntawm cov tib neeg no thaum xaiv tsa. Lawv yuav tsum tsis txhob feeb tsis meej txog qhov no. Thaum pom tej cim ntawm kev tswj thiab kev tab kaum kev xaiv tsa, yuav tsum nrhiav kev los txwv cov uas muaj feem xyuam ntawd tam sid, thiab yog txwv tsis tau cov tib neeg no, yuav tsum muab lawv cais tawm. Cov tib neeg no khav theeb tshwj xeeb, tsis muaj kev txwv, thiab nyuaj tswj heev. Txhawm rau tab kaum tej kev xaiv tsa thiab tswj qhov txiaj ntsig, lawv yeej yuav ua ntau yam kev ua tsis ncaj tom qab nraub qaum, hais thiab ua ntau yam. Yuav tsum ua li cas txog qhov no? Qhov teeb meem no yooj yim daws. Yog cov thawj coj pawg ntseeg pom qhov teeb meem lawm, lawv yuav tsum nthuav qhov ntawd tawm thiab tshaj tawm qhov ntawd rau sawv daws, kom cov kwv tij thiab cov nkauj muam sib qhia txog qhov hnyav thiab qhov tshwm sim los ntawm qhov teeb meem no, thiab sib qhia txog lub ntsiab xeeb txawm ntawm tej kev ua zoo li no yog dab tsi tiag tiag. Thaum kawg, lawv yuav tsum muaj qee txoj kev. Yuav tsum muaj txoj kev twg? Leej twg uas pheej ua ntau yam kev ua tsis ncaj tom qab nraub qaum thiab tswj thiab tab kaum kev xaiv tsa yuav tsum raug daws yam tsis zam thiab txwv tsis pub koom nrog kev xaiv tsa. Qhov no txhais li cas? Qhov ntawd txhais hais tias lawv daim ntawv tawm suab ntawd tsis xam. Tsis hais muaj pes tsawg tus neeg uas muaj feem xyuam rau kev tswj thiab tab kaum kev xaiv tsa, lawv cov ntawv tawm suab ntawd yuav tsum raug muab tshem tawm tag nrho, thiab yuav tsum tsis txhob tso cai rau lawv koom nrog kev xaiv tsa. Tsis hais leej twg uas raug coj mus yuam kev thiab raug cuam tshuam los xij, tsuav lawv ua raws txoj kev ntawm cov uas tswj kev xaiv tsa thiab koom tes nrog cov tib neeg phem los txhob txwm ua kom kev xaiv tsa puas tsuaj, ces cov neeg Vajtswv xaiv tseg yuav tsum sawv los nthuav lawv tawm thiab tshem lawv txoj cai koom nrog tej kev xaiv tsa. Qhov no puas yog ib txoj hau kev zoo? (Yog.) Qhov no yog ua txhawm rau tiv thaiv pawg ntseeg tes hauj lwm tag nrho. Tsis yog koj tsis lees txais kev txwv lod? Tsis yog koj tsis lees txais Vajtswv lub tsev tej hauv paus ntsiab lus kev xaiv tsa lod? Tsis yog koj xav ua tus txiav txim siab thaum kawg lod? Yog koj ua tus txiav txim siab thaum kawg, ces yog Ntxwgnyoog ua tus txiav txim siab thaum kawg. Vajtswv lub tsev thiab pawg ntseeg yog thaj chaw uas qhov tseeb kav; tsis tuaj yeem tso cai rau Ntxwgnyoog ua tus txiav txim siab thaum kawg. Vim koj xav ua tej kev ua tsis ncaj thiab txhob txwm tswj thiab tab kaum txoj kev xaiv tsa zaum no, qhov ntawd yooj yim xwb—koj daim ntawv tawm suab ntawd raug muab tshem tawm lawm. Tsis hais koj pov ntawv rau leej twg los xij, qhov ntawd tsis muaj qab hau; tsis muaj ib qho ntawm koj tej kev tawm tswv yim uas siv tau li, thiab txawm koj sawv khov yuav koom kev xaiv tsa kom tau xwb los, qhov ntawd yuav tsis muaj qab hau li. Vajtswv lub tsev muaj tej kev cai tswj fwm thiab tej kev cai, thiab koj txoj cai koom nrog kev xaiv tsa zaum no raug rho tawm thiab raug tshem tawm lawm. Yog koj tseem cuam tshuam txoj kev xaiv tsa lwm zaus thiab, ces koj txoj cai koom nrog kev xaiv tsa yuav raug rho tawm tag nrho, thiab yuav tsis tso cai rau koj koom nrog tej kev xaiv tsa ntxiv li lawm. Qhov no yog txoj kev uas yuav tsum tau daws cov uas pheej ua tej kev ua tsis ncaj los tswj thiab tab kaum tej kev xaiv tsa.

Txhua zaus uas pawg ntseeg muaj kev xaiv tsa, ib txwm muaj qee cov tib neeg phem uas pib nyob tsis tswm: Ib txhia ua ntau yam kev ua tsis ncaj tom qab nraub qaum txhawm rau sim tswj thiab tab kaum kev xaiv tsa, hos ib txhia kub siab lug los sib tw yam qhib lug nrog lwm tus rau txoj hauj lwm ua thawj coj, sib cav mus txog thaum lawv lub ntsej muag liab ploog, haj tseem yuav luag txog theem uas ua siab kub, siv kev nruj kev tsiv, thiab sib ntaus, ua rau cov kwv tij thiab cov nkauj muam tsis paub tias yuav mloog leej twg los sis xaiv leej twg. Thaum xaiv tsa, lawv tsis sib qhia txog qhov tseeb, thiab lawv tsis tham txog qhov hais tias lawv yuav ua pawg ntseeg tes hauj lwm li cas, muaj tej txoj kev twg hauv tes hauj lwm, los sis muaj tej tswv yim thiab tej kev npaj twg yog lawv raug xaiv los ua thawj coj. Tiam sis, lawv txhob txwm nthuav lwm cov neeg koom xaiv tej qhov tsis zoo tawm thiab tawm tsam cov neeg ntawd, thiab kuj haub ntxias ib pab neeg los ua kev tawm tsam rau lwm pab neeg, ua rau muaj ib qho xwm txheej uas faib ua ntau pab pawg nyob rau hauv pawg ntseeg. Txoj kev xaiv tsa zoo li no dhau los ua dab tsi? Qhov ntawd dhau los ua ib yam uas faib pawg ntseeg ua ntau pab pawg. Txoj kev xaiv tsa tej txiaj ntsig twb tsis tau tawm los, pawg ntseeg twb raug faib ua ntau pab pawg lawm. Qhov no puas yog ib qho xwm txheej uas tsim nyog tshwm sim thaum ib lub pawg ntseeg muaj kev xaiv tsa? Qhov no puas yog ib qho xwm txheej uas ib txwm muaj? Tsis yog. Yog koj xav ua ib tug thawj coj thiab ntseeg hais tias koj muaj qee lub peev xwm thiab ib qho kev paub txog lub nra thiab tsim nyog rau tes hauj lwm no, koj tuaj yeem koom nrog txoj kev xaiv tsa raws li Vajtswv lub tsev tej hauv paus ntsiab lus. Muaj tseeb tiag, koj kuj tuaj yeem qhia txog koj tej qhov ua tau zoo thiab tej kev txawj thiab sib qhia txog koj tej kev to taub thiab tej kev ntsib kev pom, kom cov kwv tij thiab cov nkauj muam thiaj li ntseeg siab thiab tso siab tau rau koj los ris pawg ntseeg tes hauj lwm ua thawj coj. Txawm li cas los xij, koj yuav tsum tsis txhob siv kev tawm tsam lwm tus los ua kom tiav koj lub hom phiaj ntawm kev raug xaiv, vim qhov no yooj yim coj tau tib neeg mus yuam kev thiab coj tau tej yam tsis zoo los. Cov kwv tij thiab cov nkauj muam uas muaj theem ntawm sab ntsujplig me thiab tsis muaj kev paub cais tuaj yeem raug koj coj mus yuam kev tau yam yooj yim thiab tsis paub tias yuav xaiv leej twg, thiab pawg ntseeg kuj tuaj yeem raug cuam tshuam kom ntxhov quav niab thiab tawg ua pab ua pawg. Qhov ntawd tsis yog muab ib lub cib fim rau Ntxwgnyoog los siv lod? Muab hais luv luv tias, kev koom nrog kev xaiv tsa yam tsis ua raws li tej hauv paus ntsiab lus, thiab pheej muaj tej kev xav ua heev thiab tej kev ntshaw heev thiab siv tej hau kev qias los ua kom tiav ib tug lub hom phiaj ntawm kev raug xaiv ntawd puav leej yog lub ntsiab xeeb txawm ntawm kev tswj thiab tab kaum tej kev xaiv tsa thiab yog txoj kev coj ntawm kev xaiv tsa uas tsis tsim nyog. Muaj tseeb tiag, ib txhia tib neeg muaj tej kev coj uas tsim nyog uas yuav tsum tau muab cais tawm ntawm qhov no. Piv txwv li, yog ib tug neeg koom kev xaiv sib qhia txog qhov yuav ua ntau yam ntawm pawg ntseeg tes hauj lwm kom zoo li cas, xws li tes hauj lwm tshaj tawm txoj moo zoo, tes hauj lwm uas ntsig txog ntaub ntawv, thiab tes hauj lwm dav dav, los sis yuav ua kom lub neej hauv pawg ntseeg zoo dua li cas, daws cov neeg Vajtswv xaiv tseg tej kev nyuaj hauv lawv txoj kev nkag mus rau hauv lub neej txoj sia, thiab lwm yam ntxiv, tag nrho tej no puav leej tsim nyog. Kev qhia txog ib tug tej kev xam pom thiab tej kev to taub yam tsim nyog, kev qhia txog ib tug txoj kev xav thiab tej kev npaj hais txog pawg ntseeg tes hauj lwm, thiab lwm yam ntxiv—tag nrho tej no puav leej yog ib feem ntawm kev hais lus thiab txoj kev coj li ib txwm muaj, thiab tej ntawd mus raws li tej hauv paus ntsiab lus kev xaiv tsa uas pawg ntseeg tau tsim tsa. Dhau ntawm tej no lawm, tib neeg yuav tsum quav ntsej txhua qhov kev coj uas tsis tsim nyog uas qhia tawm thaum lub sij hawm xaiv tsa uas pom tau meej tshwj xeeb ntawd. Tib neeg yuav tsum ceev faj txog tej no thiab paub cais tej ntawd—tsis txhob tsis xyuam xim.

Ib txhia tib neeg pheej siv qhov tias khwv ua hauj lwm, muaj ntau yam hauj lwm hauv tsev, los sis qhov xwm txheej tsis tsim nyog los ua kev zam es tsis ua lawv tej dej num thiab tsis koom lub neej hauv pawg ntseeg. Txawm li cas los xij, thaum txog lub sij hawm xaiv cov thawj coj pawg ntseeg, ces tej kev nyuaj no cia li ploj tag lawm, thiab lawv ua tib zoo tu cev kom zoo rau lub sij hawm ntawd thiab tuaj koom kev xaiv tsa. Lawv tsis tau tshwm ntsej muag ntev los lawm, tiam sis thaum hnov qhov xov loj txog pawg ntseeg kev xaiv tsa, lawv maj nroos tuaj yam kub siab lug. Lawv tuaj ua dab tsi? Lawv tuaj rau kev xaiv tsa, tuaj rau txoj hauj lwm ua thawj coj pawg ntseeg, tuaj rau txoj “hauj lwm ua nom” no. Cov tib neeg zoo li no mas txawj npaj tswv yim zais tob tshwj xeeb nyob hauv lawv tej kev ua. Lawv ntshai tsam lwm tus yuav ua xyem xyav tias lawv xav ua ib tug thawj coj pawg ntseeg, lawv thiaj li zam qhov hais txog kev xaiv tsa thiab tsuas tsom ntsoov rau qhov sib qhia txog lawv tej kev to taub thiab tej kev ntsib kev pom kom tib neeg saib lawv rau qhov siab xwb. Lawv kuj noj thiab haus Vajtswv cov lus nyob tab meeg sawv daws, coj txhua tus los sib qhia txog Vajtswv cov lus, thiab qhia txog lawv tus kheej cov lus tim khawv uas hais txog txoj kev ntsib kev pom. Qhov tseeb tiag, feem ntau lawv tsis tshua koom lub neej hauv pawg ntseeg thiab tsis tshua sib qhia qhov tseeb, thiab lawv kuj hais tsis tau txog tej kev to taub ntawm kev ntsib kev pom li thiab. Txawm li cas los xij, thaum kev xaiv tsa los ze lawm, lawv hloov txawv heev. Lawv nquag koom lub neej hauv pawg ntseeg thiab kub siab thov Vajtswv, hu nkauj qhuas Vajtswv, thiab sib qhia, ua kom pom tias lawv nquag thiab kub siab tshwj xeeb thiab qhia tawm kom sawv daws pom lawv tshwj xeeb. Tom qab kev sib txoos ua ke lawm, lawv nrhiav cib fim los nrog cov kwv tij thiab cov nkauj muam tham txog tsev neeg tej xwm txheej thiab tsim kev sib raug zoo. Thaum lawv pom ib tug thawj coj pawg ntseeg, lawv hais tias, “Ntu no saib koj lub ntsej muag tsis tshua tshiab. Kuv muaj ib cov txiv txaum liab nyob hauv tsev; cia kuv nqa me ntsis tuaj rau koj.” Thaum lawv pom ib tug nkauj muam twg, lawv hais tias, “Kuv hnov tias koj tsev neeg muaj kev nyuaj txog nyiaj txiag. Koj puas tim tsum kev pab? Kuv muab qee cov khaub ncaws rau koj.” Lawv nquag tshwj xeeb nyob rau txhua qhov kev sib txoos ua ke, txawv ntawm yav tas los heev. Yav tas los, lawv tsuas tshwm ntsej muag qee zaus los qhia tias lawv tuaj xwb, thiab tsis hais leej twg hu lawv tuaj koom kev sib txoos ua ke, lawv yeej zam los ntawm qhov hais tias lawv tsis khoom. Tiam sis thaum lub sij hawm xaiv tsa, lawv cia li tshwm tuaj thiab koom txhua qhov kev sib txoos ua ke yam tsis ncua ib zaug li. Nyob rau txhua zaus kev sib txoos ua ke, cov kwv tij thiab cov nkauj muam sib qhia txog tej yam thiab tej hauv paus ntsiab lus uas ntsig txog kev xaiv tsa, thiab tseeb tiag, lawv kuj koom nrog thiab. Thaum lub sij hawm no, lawv ua kawg zog los tsim kev sib raug zoo nrog cov kwv tij thiab cov nkauj muam, sim haub ntxias ib feem ntawm cov kwv tij thiab cov nkauj muam los rau lawv sab. Lawv haj tseem fij khoom ntau zaus nyob tab meeg ntawm cov kwv tij thiab cov nkauj muam, ua rau tib neeg feem coob xav tsis thoob, xav hais tias, “Lawv ntseeg Vajtswv tau ntev npaum li no lawm, tiam sis peb yeej tsis tau pom lawv fij khoom dua li. Vim li cas zaum no lawv thiaj li siab dawb ua luaj? Puas yog lawv hloov zoo dua lawm thiab tig hloov lawm tiag tiag?” Ib txhia tib neeg ruam thiab tsis paub dab tsi uas ntsuas tsis tau tej xwm txheej xav hais tias tus neeg no yeej tau hloov zoo dua lawm tiag, tias yav tas los lawv tau saib tus neeg no yuam kev lawm, thiab lawv cia li muaj kev xav zoo txog tus neeg no nyob hauv lawv lub siab yam tsis paub txog, xav hais tias, “Tus neeg no tsev neeg muaj nyiaj; lawv muaj neeg paub thiab muaj txoj kev los ua kom tiav ntau yam. Yog lawv ua ib tug thawj coj pawg ntseeg, lawv tuaj yeem ua tau ntau yam rau pawg ntseeg. Qhov no tsis yog yuav muab kev pab rau peb pawg ntseeg hauv txoj kev tshaj tawm txoj moo zoo thiab txais tos qee cov kwv tij thiab cov nkauj muam uas raug caum ntes thiab muaj tej kev nyuaj lod? Yog lawv tuaj yeem nquag li no mus ntxiv, qhov ntawd yuav zoo heev, tiam sis kuv tsis paub tseeb tias lawv puas tuaj yeem ua li no mus ntxiv los sis seb lawv puas yeem ua peb tus thawj coj pawg ntseeg.” Ib txhia tib neeg tsis yog raug coj mus yuam kev thiab raug dag lawm lod? Txhua yam uas tus neeg no tau ua ntawd, puas yog tab tom pib muaj txiaj ntsig lawm? Txhua yam tab tom pom qab pom hau thiab qhov txiaj ntsig twb yuav tawm los sai sai lawm. Qhov no tsis yog qhov uas lawv xav tau lod? (Yog.) Tsis tas li ntawd xwb, lawv muab ob ce khaub ncaws rau tus neeg no, muab ib pob tawb zaub rau tus neeg tod, thiab muab qee cov khoom ntawm sab kev noj qab haus huv rau lwm tus neeg thiab, ua kom paub tseeb tias puav leej saib xyuas tau txhua tus. Qhov no ua rau tib neeg xav hais tias, “Yog tus neeg no ua ib tug thawj coj pawg ntseeg, lawv tsis yog yuav ua ib tug neeg yug yaj uas zoo lod? Lawv tsis yog ib tug neeg uas tib neeg feem coob xav vam khom lod?” Tam sim no, tsis yog lub sij hawm tsim nyog lawm lod? Tsis yog cov kwv tij thiab cov nkauj muam yooj yim xaiv ib tug tib neeg zoo li no lod? Tus neeg no muaj kev kawm, txawj hais lus, thiab muaj ib qho meej mom nyob hauv lub zej zog. Yog pawg ntseeg ntsib kev ntes, lawv tuaj yeem tiv thaiv cov kwv tij thiab cov nkauj muam. Yog cov kwv tij thiab cov nkauj muam tsev neeg twg muaj tej kev nyuaj, lawv tuaj yeem cev tes pab, thiab lawv kuj tuaj yeem pab pawg ntseeg tes hauj lwm thaum tim tsum neeg pab ntxiv thiab. Txawm li cas los xij, muaj ib yam uas tib neeg feem coob tsis paub tseeb: “Yav tas los lawv tsis caum qhov tseeb, thiab tau ntev los twb tsis tuaj koom cov kev sib txoos ua ke ib zaug. Tiam sis tam sim no, thaum txog lub sij hawm xaiv tsa, lawv maj nroos tuaj koom ob peb zaug kev sib txoos ua ke. Yog xaiv lawv los ua ib tug thawj coj, lawv puas to taub qhov tseeb? Yog lawv tsis to taub qhov tseeb thiab tsuas tiv thaiv tau cov tib neeg no los sis muab qee yam txiaj ntsim rau cov tib neeg no xwb, lawv puas pab tau tib neeg kom to taub qhov tseeb? Lawv puas coj tau tib neeg los rau ntawm Vajtswv lub xub ntiag? Qhov no tsim nyog ua xyem xyav.” Ib txhia muaj kev ua xyem xyav hauv lawv lub siab, hos lwm cov twb raug ua rau siab muag thiab raug yuav los ntawm tus neeg no tej txiaj ntsim lawm. Qhov xwm txheej no tsis yog phom sij heev lod? Ib daim ntawv tawm suab ntxiv xwb twb ua tau rau lawv raug xaiv tau. Tsis hais qhov tshwm sim los ntawm kev xaiv tsa thaum kawg yuav yog li cas los xij, tej kev ua thiab tej kev coj ntawm cov tib neeg zoo li no puas tsim nyog? (Tsis tsim nyog.) Nyob rau lub sij hawm uas haum tshaj plaws, lawv muab khoom pub, muab khoom fij, thiab pab cov kwv tij thiab cov nkauj muam daws qee yam kev nyuaj tiag tiag. Thaum qee cov kwv tij thiab cov nkauj muam tsiv tsev, lawv muab tsheb thauj, thiab thaum qee cov kwv tij thiab cov nkauj muam tsev neeg tsis muaj nyiaj txaus, lawv qiv rau. Thaum qee tus tsis muaj xov tooj, lawv yuav ib lub rau, thiab thaum qee tus tsis muaj khoos phis tawj, lawv muab lawv li rau. … Lawv ua tej yam no nyob rau lub sij hawm uas haum tshaj plaws, lub sij hawm uas tseem ceeb tshaj plaws. Qhov no yog hom kev coj dab tsi? Qhov ua tej yam no nrog rau txoj kev npaj siab uas yuav sib tw ua thawj coj, nrog rau tej kev zais thiab tej hom phiaj uas hais tsis tau tawm, tsis yog kev tswj thiab tab kaum kev xaiv tsa lod? (Yog.) Lawv tsis tuaj ntxov los sis lig, tiam sis cia li tshwm tuaj raws nraim lub sij hawm xaiv tsa thawj coj. Lawv tsis yog tab tom zais tej kev zais uas hais tsis tau tawm lod? Qhov no yeej pom tau meej tshaj plaws lawm; lawv yeej yuav tsum zais tej kev zais uas hais tsis tau tawm xwb. Tsis yog tias lawv cia li muaj lub siab txawj xav thiab xav ua qee yam zoo; lawv lub hom phiaj yog los sib tw ua tus thawj coj pawg ntseeg, los ua tus saib xyuas pawg ntseeg, los tswj pawg ntseeg thiab cov neeg Vajtswv xaiv tseg. Lawv tswj cov tib neeg no puas yog kom lawv thiaj li ua tau tej yam rau cov neeg no tiag tiag? (Tsis yog.) Yog li lawv xav ua dab tsi? Lawv xav tswj cov neeg Vajtswv xaiv tseg, tswj pawg ntseeg, thiab nrhiav ib lub meej mom nyob hauv pawg ntseeg kom lawv thiaj li ua tau ib tug nom thiab ua tus txiav txim siab thaum kawg. Tej hau kev thiab tej kev xyaum ua uas txawv txawv no tsis suav tias yog kev tswj thiab tab kaum kev xaiv tsa lod? (Yog.)

Thaum pawg ntseeg xaiv tsa, ib txhia tib neeg ntshai tsam lawv yuav tau cov suab tsis txaus es thiaj li pov ntawv rau lawv tus kheej. Mloog qhov no tsis yog txaus luag thiab txawv txawv lod? Lub ntsiab xeeb txawm uas ib tug neeg pov ntawv rau lawv tus kheej yog dab tsi? Qhov ntawd puas yog ib qho kev qhia tshwm ntawm kev tsis muaj kev ntseeg siab, kev tsis paub txaj muag, los sis kev ntshaw uas loj dhau? Puav leej muaj tag nrho tej no. Lawv ntshai tsam tsis raug xaiv, yog li ntawd lawv thiaj li pov ntawv rau lawv tus kheej—qhov no yog kev tsis muaj kev ntseeg siab. Lawv tsis muaj lub peev xwm uas tim tsum tiam sis tseem xav ua ib tug thawj coj; ntshai tsam lwm tus tsis pov ntawv rau lawv, lawv thiaj li pov ntawv rau lawv tus kheej. Qhov no tsis yog kev tsis paub txaj muag lod? Tsis tas li ntawd, lawv txoj kev ntshaw uas ntau dhau ntawd ua rau lawv qhov kev txiav txim tsis meej pem mus txog theem uas lawv tsis yuav ntsej muag thiab dhau los ua neeg tsis muaj kev coj ncaj ncees thiab meej mom: “Yog koj tsis pov ntawv rau kuv, mas yuav tsis tau li; kuv yuav tsum ua ib tug thawj coj pawg ntseeg xwb. Yog kuv ua tsis tau ib tug thawj coj, kuv yuav tsis ntseeg vajtswv ntxiv lawm!” Lawv tuav rawv kom tau ua ib tug thawj coj, kom tau ua ib tug nom, tsuas hnov xis nyob thiab txaus siab hauv lub neej thaum lawv muaj lub meej mom xwb—lawv tej kev xav ua heev thiab tej kev ntshaw heev ntawd mas loj ua luaj li! Lawv saib lub meej mom muaj nqis dhau lawm, ntseeg Vajtswv tsuas yog kom tau ua ib tug thawj coj xwb. Qhov ua ib tug thawj coj zoo dab tsi? Yog koj tsis saib tej txiaj ntsim ntawm lub meej mom muaj nqis thiab tsis xyiv fab rau tag nrho tej kev saib xyuas tshwj xeeb uas lub meej mom coj los, koj puas tseem yuav ntshaw lub meej mom no? Koj puas tseem yuav pov ntawv rau koj tus kheej? Koj tej kev xav ua heev thiab tej kev ntshaw heev puas tseem yuav loj npaum li no? Koj puas tseem yuav saib lub meej mom muaj nqis npaum li no? Yuav tsis saib lawm. Cov tib neeg zoo li no pheej xav ua tsis ncaj thiab siv zog rau kev xaiv tsa, siv txhua yam kev ua uas qias. Txawm hais tias lawv tus kheej xav hais tias qhov ua li no mas txaj muag, tsis qhib lug los sis tsis ncaj ncees, thiab me ntsis poob nqi los xij, tom qab ua tib zoo xav, lawv xav hais tias, “Txawm li cas los xij, qhov tseem ceeb yog kom raug xaiv ua thawj coj!” Qhov no yog kev tsis paub txaj muag. Lawv haj tseem xav xyaum cov hau kev sib cav uas siv nyob hauv kev xaiv tsa ntawm cov teb chaws uas tswj los ntawm pej xeem, uas cov neeg sib tw ib leeg nthuav ib leeg tej qhov ua tsis tau zoo tawm, txiav txim thiab tawm tsam, thiab sib cav sib ceg, muab cov tswv yim no coj los siv rau pawg ntseeg txoj kev xaiv tsa—qhov no tsis yog ib qho kev ua yuam kev loj heev lod? Qhov no tsis yog siv cov tswv yim no yuam kev chaw lawm lod? Yog koj tuaj rau hauv pawg ntseeg los ua tej kev nkhaus thiab kev phem no thiab xav tswj thiab tab kaum tej kev xaiv tsa, Kuv qhia rau koj tias, koj xaiv chaw yuam kev lawm! Ntawm no yog Vajtswv lub tsev, tsis yog lub zej zog; txhua tus uas tswj thiab tab kaum kev tej xaiv tsa yeej yuav raug teem txim, tsis tseg ib tug li. Nyob rau hauv pawg ntseeg, tsis hais siv cov laj thawj, kev hais ub hais no, los sis cov hau kev twg los sim tswj thiab tab kaum tej kev xaiv tsa, tej ntawd yeej siv tsis tau li, thiab qhov no yog ib qho kev ua phem—yog ib qho kev ua phem mus ib txhis! Txhua tus uas sim tswj thiab tab kaum tej kev xaiv tsa puav leej raug teem txim. Cov tib neeg zoo li no tsis raug lees paub tias yog cov tswv cuab ntawm Vajtswv lub tsev los sis yog cov kwv tij thiab cov nkauj muam, tiam sis raug muab cais tias yog Ntxwgnyoog cov tub qhe. Ntxwgnyoog cov tub qhe ua tej hauj lwm dab tsi? Lawv tshwj xeeb ua txhua yam uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg. Cov uas tswj thiab tab kaum tej kev xaiv tsa yog ua cov hauj lwm uas tsis zoo no, ua tej yam uas Ntxwgnyoog cov tub qhe ua. Tsis hais pawg ntseeg ua tes hauj lwm twg los xij, cov tib neeg no yuav sawv los tab kaum thiab rhuav tshem qhov ntawd, tsis quav ntsej Vajtswv lub tsev tej kev npaj tes hauj lwm thiab tej kev cai, tsis quav ntsej Vajtswv tej kev cai tswj fwm, thiab haj yam tsis quav ntsej Vajtswv. Lawv sim ua txhua yam uas lawv xav ua nyob hauv Vajtswv lub tsev, tswj ntau yam hauj lwm hauv pawg ntseeg, thiab haj yam tswj pawg ntseeg cov tswv cuab, mus txog theem uas tswj thiab tab kaum pawg ntseeg tej kev xaiv tsa. Lawv xav tswj pawg ntseeg cov neeg ua hauj lwm los ntawm txoj kev twg? Lawv nrhiav cib fim los tswj thiab tab kaum pawg ntseeg tej kev xaiv tsa. Thaum ib qho kev xaiv tsa raug tswj thiab tab kaum los ntawm Ntxwgnyoog cov tub qhe no lawm, ces txoj kev xaiv tsa ntawd swb lawm. Yog Ntxwgnyoog cov tub qhe no ua tau raws li lawv txoj kev thiab dhau los ua pawg ntseeg cov thawj coj lawm, ces qhov tshwm sim los ntawm kev xaiv tsa ntawd yog los sis tsis yog? Yeej tsis yog li. Yuav tsum muaj kev xaiv tsa dua tom qab sib qhia qhov tseeb thiab muab xaus lus ua ib qho kev qhia.

B. Tej Hauv Paus Ntsiab Lus rau Txoj Kev Daws Cov Tib Neeg Phem Uas Tswj Pawg Ntseeg Tej Kev Xaiv Tsa

Thaum muaj ib qho xwm txheej uas cov tib neeg phem tswj tej kev xaiv tsa tshwm sim, yuav tsum tau ua kev xaiv tsa dua tshiab. Yuav tsum ua raws li qhov no li cas? (Yuav tsum muab qhov tshwm sim los ntawm txoj kev xaiv tsa ntawd rhuav thiab ua dua lwm qhov kev xaiv tsa dua tshiab.) Qhov no yog ib txoj kev. Tsim nyog qhib thiab tshaj tawm cov ntaub ntawv uas zais txog qhov uas cov tib neeg phem tswj txoj kev xaiv tsa no li cas kom txhua tus thiaj li paub tias qhov txheej txheem ntawm txoj kev xaiv tsa zoo li cas thiab qhov txiaj ntsig tau tshwm sim los li cas. Tom qab paub cov ntaub ntawv uas zais no lawm, yuav tsum muab qhov tshwm sim los ntawm txoj kev xaiv tsa no tso tseg, thiab yuav tsum ua kev xaiv tsa dua tshiab. Cov neeg Vajtswv xaiv tseg feem coob yeej yuav tsis pom zoo rau txoj kev xaiv tsa zoo li no; thiab tsis hais xaiv tau leej twg los xij—yeej lees txais tsis tau qhov tshwm sim los ntawd. Raws li ib txwm muaj mas, los ntawm kev sib qhia txog qhov tseeb thiab nthuav tawm cov xwm txheej zais ntawd, ces tuaj yeem tsis lees txais qhov tshwm sim los ntawm txoj kev xaiv tsa ntawd, thiab tuaj yeem ua kev xaiv tsa dua tshiab. Tiam sis qee zaus, nyob rau hauv qee qhov xwm txheej tshwj xeeb, txawm hais tias ib feem tsawg tsawg ntawm cov tib neeg pom hais tias qhov tshwm sim los ntawm txoj kev xaiv tsa ntawd raug Ntxwgnyoog cov tub qhe tswj thiab tias tus neeg raug xaiv ntawd yeej ua tsis tau tes hauj lwm hlo li thiab tsuas yog ib tug me nyuam roj hmab xwb, vim cov neeg feem coob hauv pawg ntseeg raug cov tib neeg phem coj mus yuam kev thiab sawv rau ntawm Ntxwgnyoog cov tub qhe sab hos tsuas muaj ib feem tsawg tsawg thiaj li muaj kev paub cais me ntsis thiab paub cov ntaub ntawv zais xwb—thiab tsis muaj leej twg ntseeg cov neeg feem tsawg tsawg no los sis mloog lawv thaum lawv hais tawm li—lawv raug cais tawm thiab tsis muaj hwj chim, thiab yeej tsis muaj lub zog los hloov qhov xwm txheej ntawd hlo li. Nyob rau hauv cov xwm txheej zoo li no, tej zaum koj xav nthuav tawm cov xwm txheej zais txog kev tswj kev xaiv tsa ntawd, tiam sis yuav tsis yooj yim los to taub qhov xwm txheej kom meej. Nyob rau hauv qhov xwm txheej ntawd, dhau ntawm qhov qhia tawm rau cov thawj coj thiab cov neeg ua hauj lwm theem siab, nej tseem ua tau dab tsi ntxiv? Yog koj tseem ua lub neej hauv pawg ntseeg mus ntxiv, koj yuav raug cais tawm. Kev tuaj koom kev sib txoos ua ke ntawm lwm pawg ntseeg zoo li tsis tsim nyog, vim cov tib neeg nyob ntawd tsis tuaj yeem lam tau lam txais tos ib tug neeg txawv ntsej muag. Qhov no ua rau koj nyob rau hauv ib qho kev nyuaj tiag tiag! Koj pom hais tias ib tug thawj coj pawg ntseeg uas raug xaiv ntawd muaj kev ua neeg tsis zoo, yog ib tug dab, thiab tsis yog ib tug neeg uas tsim nyog raug xaiv, yog li ntawd koj npau taws thaum pom lawv. Kev mus koom kev sib txoos ua ke ua rau koj xav tias tsis xis nyob, tiam sis kev tsis mus yeej tsis tau thiab. Yog koj tsis mus, thiab txiav koj txoj kev sib raug zoo nrog pawg ntseeg, koj yuav plam lub neej hauv pawg ntseeg, uas koj yuav ua tsis tau li ntawd thiab. Yog li puas muaj ib txoj kev daws uas zoo rau qhov teeb meem no? Qhov no tim tsum kev txawj ntse. Yog koj lam tau lam nthuav lawv tawm no yuav muaj qhov tshwm sim los dab tsi? Cov tib neeg ntawd tej zaum yuav koom ua ke los tsuj nias koj, ntiab koj mus, los sis yog txhua yam yeej tsis zoo tiag tiag, tej zaum lawv yuav ntsaig koj tawm mus, ua rau koj raug kev tsis ncaj ncees. Qhov no yog qhov tshwm sim los uas tej zaum yuav muaj ntau tshaj plaws. Yog li txoj kev daws uas zoo tshaj plaws yog dab tsi? (Koom tes nrog qee cov kwv tij thiab cov nkauj muam uas muaj kev paub cais thiab sau tag nrho cov pov thawj ntawm tej kev ua phem uas cov tib neeg no tswj txoj kev xaiv tsa yam zais ntshis. Qhia qhov ntawd tawm rau cov thawj coj thiab cov neeg ua hauj lwm theem siab, thiab kuj maj nroos sib qhia qhov tseeb nrog cov kwv tij thiab cov nkauj muam uas raug coj mus yuam kev kom coj tau lawv rov qab los thiab.) Qhov no puas suav hais tias yog ib txoj kev daws zoo? Puas tsim nyog ua tej yam zoo li no yam maj maj? Qhov tshwm sim los ntawm kev maj maj yog dab tsi? (Qhov ntawd yuav yooj yim ua rau tus yeeb ncuab ceeb yam tsis txhob txwm.) Thaum nej ntsib tej xwm txheej zoo li no, nej puas ntshai los sis tshee? Nej puas tsim nyog ntshai los sis tshee? (Tsis tsim nyog.) Raws li txoj kev xav mas, koj yuav tsum tsis txhob ntshai—qhov no yog koj qhov kev paub tias dab tsi yog qhov tsim nyog qhia rau koj. Tiam sis qhov ntawd zoo li cas rau tib neeg hauv qhov muaj tiag? Qhov tseem ceeb tshaj plaws yog seb tib neeg puas to taub qhov tseeb. Yog tib neeg tsis to taub qhov tseeb thiab tsuas muaj lawv txoj kev txiav txim siab xwb, lawv tseem yuav ntshai hauv lawv lub siab. Thaum koj ntshai, txawm koj ua dab tsi los sis koj ua li cas, qhov ntawd puas yooj yim tau txais txiaj ntsig? (Tsis yooj yim.) Thaum koj ntshai, koj nyob rau hauv hom yam ntxwv dab tsi? Koj ntshai cov tib neeg no lub hwj chim, ntshai tias lawv yuav paub tias koj tau paub cais lawv thiab ceev faj lawv, thiab ntshai tias lawv yuav tsuj nias thiab cais koj tawm thaum lawv pom tias koj tsis nyob ntawm lawv sab, thaum kawg ntsaig koj tawm ntawm pawg ntseeg mus. Koj yuav muaj cov kev txhawj xeeb no hauv koj lub siab. Thaum koj muaj cov kev txhawj xeeb zoo li no, koj puas tuaj yeem muaj kev txawj ntse, kev ua siab tawv, thiab txoj kev los sib cuag nrog cov tib neeg no, daws lawv cov teeb meem, los sis nthuav tawm lawv tej kev ua phem kom cov kwv tij thiab cov nkauj muam thiaj li muaj kev paub cais thiab tsis raug coj mus yuam kev? Txoj kev ua uas tsim nyog tshaj plaws yog dab tsi? Thaum koj ntshai, tsis yog koj nyob rau hauv ib qho xwm txheej uas qaug zog lod? Ua ntej tshaj plaws, koj qaug zog thiab tsis xav ua dab tsi. Rau ib qho mas, koj tsis muaj kev ntseeg ruaj khov rau Vajtswv, thiab rau lwm qhov mas, koj xav hais tias, “Yog li ces, cov tib neeg phem no tau ua tiav lawm. Tam sim no ua li cas thiaj li yog kuv tib tug uas paub cais qhov teeb meem no xwb? Lwm tus puas muaj kev paub cais? Yog kuv qhia lwm tus txog qhov xwm txheej tseeb tiag, lawv puas yuav ntseeg kuv? Yog lawv tsis ntseeg kuv, lawv puas yuav nthuav kuv tawm? Yog lawv txhua tus koom ua ke los tawm tsam kuv, thiab kuv nyob ib leeg thiab tsis muaj hwj chim, cov tib neeg phem ntawd puas yuav nrhiav txhua yam kev hais ub hais no los ntsaig kuv tawm mus?” Puas yog koj yuav muaj cov kev txhawj xeeb zoo li no? Thaum koj muaj cov kev txhawj xeeb no, koj yuav ua li cas rau cov tib neeg ntawd? Koj yuav sib cuag nrog lawv li cas hauv txoj kev uas haum tshaj plaws thiab txawj ntse tshaj plaws? Lub sij hawm no, puas yog koj tsis muaj hau kev los sis txoj kev taug? Muab hais kom meej tias, thaum koj ntshai tshaj plaws thiab qaug zog tshaj plaws, koj yeej tsis muaj peev xwm tawm tsam nrog lawv los sis sib cuag nrog lawv thiab daws cov teeb meem uas lawv ua. Yog li txoj kev daws uas zoo tshaj plaws rau koj lub sij hawm no yog dab tsi? Puas yog kev ua tus pib ntaus ua ntej, tawm tsam lawv thiab nthuav lawv tej kev ua phem tawm los tiv thaiv koj tus kheej? Txoj kev no puas tsim nyog? (Tsis tsim nyog.) Vim li cas qhov ntawd thiaj li tsis tsim nyog? Vim koj tseem tsis tau xav tau zoo txog tias yuav ua li cas, koj pom tsis tshab lawv lub ntsiab tseeb, thiab koj tsis paub yuav nthuav lawv tawm li cas, tsis tas yuav hais txog tias cov uas raug coj mus yuam kev ntawd puas tuaj yeem lees txais qhov tseeb thiab puas tig rov los tau. Koj tsis paub txog ntau yam no, thiab koj tsis paub meej tias txoj kev daws uas muaj txiaj ntsim thiab muaj txiaj ntsig tshaj plaws rau koj yog dab tsi. Txawm hais tias koj tseem tsis tau xav tsis zoo mus txog rau ib theem twg los, koj qhov xwm txheej tam sim no yam tsawg kawg yog ib qho ntawm kev qaug zog thiab kev ntshai, thiab nyob hauv koj muaj ntau yam kev txhawj xeeb. Txawm hais tias cov kev txhawj xeeb no tsim nyog los sis tshwm sim los ntawm koj txoj kev qaug zog thiab kev ntshai los xij, muab hais luv luv tias, cov no yog qhov muaj tseeb. Thaum cov xwm txheej no tshwm sim, txoj kev daws uas zoo tshaj plaws yog kawm tos thiab tsis txhob ua dab tsi. Qhov tsis ua dab tsi txhais li cas? Qhov ntawd txhais hais tias tsis txhob maj nthuav tawm qhov xwm txheej tseeb tiag txog txoj kev xaiv tsa rau cov uas raug coj mus yuam kev, thiab tsis txhob maj tawm tsam cov thawj coj pawg ntseeg uas nyuam qhuav raug xaiv los ntawd los sis pab neeg uas tswj thiab tab kaum kev xaiv tsa ntawd. Tsis txhob nthuav lawv tawm; lub sij hawm no, koj yuav tsum kawm tos. Ib txhia tib neeg hais tias, “Kev tos mas tsis ua dab tsi li; kuv yuav tsum tau tos ntev npaum li cas?” Qhov ntawd tsis tim tsum kom tos ntev dhau. Thaum koj tab tom tos ntawd, los rau ntawm Vajtswv lub xub ntiag los thov Vajtswv, nyeem Vajtswv cov lus, thiab nrhiav qhov tseeb. Nyob rau hauv cov xwm txheej zoo li no, thaum koj ntshai tshaj plaws thiab qaug zog tshaj plaws ntawd, koj cov lus thov yog cov uas muaj tseeb thiab siab dawb paug tshaj plaws. Koj tim tsum Vajtswv los coj thiab tsom kwm koj; koj tim tsum vam khom Vajtswv. Thaum koj thov Vajtswv ntawd, koj txoj kev ntshai yuav maj mam ploj mus me zuj zus kom txog thaum ploj tag nrho. Thaum koj txoj kev ntshai ploj tag lawm, tsis yog koj yuav qaug zog tsawg dua lawm lod? (Yog.) Koj kuj yuav muaj kev txhawj xeeb tsawg zuj zus thiab. Cov kev ntshai, kev qaug zog, thiab kev txhawj xeeb no tsis cia li ploj mus yam tsis muaj laj thawj; tiam sis, nyob hauv qhov txheej txheem hloov pauv no, koj yuav maj mam to taub qee yam. Koj yuav to taub tej yam dab tsi? Rau ib yam mas, koj yuav paub tias yuav ua li cas rau cov tib neeg no, yuav nthuav leej twg tawm ua ntej, thiab yuav hais thiab ua li cas hauv txoj kev uas muaj txiaj ntsim rau Vajtswv lub tsev tes hauj lwm. Tsis tas li ntawd, koj yuav paub lub ntsiab xeeb txawm ntawm cov tib neeg no txoj kev coj. Ua li cas koj thiaj li to taub tej no? Qhov ntawd yog los ntawm kev nrhiav qhov tseeb thaum koj tos uas koj maj mam to taub tej ntawd. Thaum koj pom tshab qhov no lawm, koj yeej yuav ua tib zoo xav tias koj yuav tsum siv kev txawj ntse li cas, tsim nyog nrog leej twg tham, thiab yuav hais li cas thiaj li chwv tau lawv lub siab, uas ua rau lawv paub qhov tseeb txog cov tib neeg phem uas tswj kev xaiv tsa, thiab ua rau lawv tuaj yeem tig rov qab los, paub cais lub ntsej muag tiag tiag ntawm cov uas tswj thiab tab kaum kev xaiv tsa, thiab paub cais tias cov uas hu ua cov thawj coj uas raug xaiv ntawd yog hom neeg zoo li cas tiag tiag. Koj yuav muaj hom kev txawj ntse no, thiab koj tej kev ua kuj yuav muaj kauj ruam thiab. Yog li cov txiaj ntsig zoo no tshwm sim los li cas? Txhua yam puav leej yog Vajtswv pub rau koj thaum koj tos. Qee yam los ntawm Vajntsujplig Dawb Huv tes hauj lwm thiab kev qhia, thiab qee yam yog qhov uas Vajtswv cia koj pom thiab to taub hauv Nws cov lus. Vajtswv cov lus hais tias tsis txhob ntaus rog yam tsis tau npaj. Qhov no txhais li cas? Qhov ntawd txhais hais tias txawm koj tawm tsam Ntxwgnyoog los sis nthuav Ntxwgnyoog cov tub qhe tej kev ua phem tawm, txawm koj ntaus rog nrog Ntxwgnyoog li cas los xij, koj tus kheej yuav tsum muaj zog, to taub qhov tseeb tej hauv paus ntsiab lus, thiab muaj peev xwm pom tshab lub ntsiab tseeb thiab tej kev ua phem ntawm Ntxwgnyoog thiab cov tib neeg phem thiab tom qab ntawd nthuav lawv tawm. Tsuas yog ua li ntawd xwb koj thiaj li yuav ua tau cov txiaj ntsig zoo thaum kawg. Thaum koj to taub tej no lawm, koj cov kev ntshai, kev qaug zog, thiab kev txhawj xeeb puas yog yuav tsis tshua hnyav thiab tsis tshua pom meej lawm? Koj yuav tsis hnov ntshai npaum li ntawd ntxiv lawm. Tej yam uas koj hnov no yuav maj mam hloov; koj yuav pom tias koj tsis qaug zog npaum li thaum qhov xwm txheej nyuam qhuav tshwm sim. Tiam sis, koj yuav hnov muaj zog dua me ntsis thiab muaj kev ntseeg siab rau tus kheej dua li yav tas los, thiab koj paub tias yuav ua dab tsi lawm. Lub sij hawm no, koj thov Vajtswv dua thiab thov kom Nws npaj lub cib fim uas yog, thiab tom qab ntawd koj mam li nqis tes ua. Ib qho mas qhia qhov xwm txheej tawm rau cov thawj coj thiab cov neeg ua hauj lwm theem siab, lwm qhov mas sib qhia nrog cov uas muaj kev ua neeg zoo thiab muaj lub siab dawb paug ntseeg Vajtswv tiam sis raug dag thiab raug coj mus yuam kev vim lawv tsis to taub qhov tseeb, nthuav cov ntaub ntawv zais txog cov tib neeg phem uas tswj kev xaiv tsa tawm rau lawv. Thaum koj yeej tau ib los sis ob tug ntawm cov tib neeg no lawm, koj txoj kev ntshai yuav ploj mus. Koj yuav paub tias txhua yam no ua tsis tau los ntawm kev vam khom tib neeg lub zog xwb, thiab haj yam ua tsis tau los ntawm kev vam khom kev ua siab kub xwb; koj vam khom tsis tau kev ua siab kub los sis kev npau taws ib lub sij hawm xwb, los sis vam khom tsis tau qhov uas hu ua kev paub txog kev ncaj ncees ib lub sij hawm xwb—tag nrho tej no puav leej tsis muaj txiaj ntsim. Vajtswv yuav npaj lub sij hawm uas yog rau koj thiab yuav qhia koj tias yuav hais dab tsi, thiab raws li qhov koj to taub, Nws yuav coj koj ib kauj ruam zuj zus, muab ib txoj kev rau koj taug. Los ntawm qhov xub thawj qaug zog thiab ntshai mus rau qhov nrhiav thiab to taub tej hauv paus ntsiab lus thiab txoj kev—thaum lub sij hawm no, koj tseem tuaj yeem sib cuag nrog cov tib neeg phem no li ib txwm. Thaum sib cuag li ib txwm ntawd, tib neeg lub hlwb tsis yog khoob lug xwb; lawv muaj lawv tus kheej tej kev xav. Thaum koj tab tom nrhiav thiab thov Vajtswv, koj soj ntsuam cov tib neeg no. Koj soj ntsuam dab tsi? Koj saib seb lawv taug txoj kev zoo li cas tiag tiag thiab lawv lub ntsiab tseeb yog dab tsi tiag tiag. Yog yam lawv hais yog thiab mus raws li pawg ntseeg tes hauj lwm tej hauv paus ntsiab lus, koj tuaj yeem mloog lawv; yog yam lawv hais tab kaum thiab cuam tshuam pawg ntseeg tes hauj lwm, koj tuaj yeem nrhiav ib qho kev zam es tsis txhob mloog los sis ncua sij hawm, siv txoj kev txawj ntse los sib cuag nrog lawv “yam sib haum xeeb” yam tsis ua rau lawv ceeb. Thaum sib cuag nrog lawv “yam sib haum xeeb” ntawd, koj sau cov pov thawj ntawm lawv tej kev ua phem, paub cais lawv raws li lawv ntau yam kev ua thiab tej laj thawj cuav uas ua txhaum rau qhov tseeb tej hauv paus ntsiab lus thiab ntxiv kev paub tseeb tias cov tib neeg no yog Ntxwgnyoog cov tub qhe. Kev ua raws li no ua rau koj tsis raug lawv txwv kuj ho ua koj lub luag hauj lwm thiab tes dej num kom tiav thiab—qhov no yog qhov uas ib tug neeg txawj ntse ua. Tsuas yog cov uas muaj kev ua neeg, kev txawj ntse, thiab kev nyiam qhov tseeb xwb thiaj li taug tau txoj kev yog. Rau cov tib neeg uas tsis muaj kev txawj ntse uas ua yam tsis xyuam xim thiab ntxhib ntxhuav, ib txwm vam khom kev ua siab kub thiab lub siab xav tsis hais lawv tab tom ua dab tsi los sis lawv tab tom ntsib xwm txheej dab tsi, lawv tej kev ua feem ntau ua rau muaj qhov tshwm sim los tsis zoo. Cov tib neeg zoo li no tsis yog tsuas tab kaum thiab cuam tshuam pawg ntseeg tes hauj lwm xwb tiam sis kuj coj ntau yam kev teeb meem thiab kev ntxhov siab uas tsis tim tsum los rau lawv tus kheej thiab. Hos cov neeg txawj ntse mas txawv. Nyob hauv txhua yam uas lawv ua, lawv tos, soj ntsuam, thiab nrhiav, tos lub sij hawm uas yog, tos Vajtswv tej kev npaj thiab kev tswj hwm. Thaum lub sij hawm uas tos ntawd, lawv tuaj yeem nrhiav Vajtswv tej kev npaj siab, muaj hom phiaj noj thiab haus Vajtswv cov lus, haj yam to taub qhov tseeb tej hauv paus ntsiab lus kom meej dua, thiab ua raws li Vajtswv tej kev npaj siab. Lawv siv Vajtswv cov lus thiab qhov tseeb los ua ib qho kev ntaus rog uas zoo thiab ua tim khawv rau Vajtswv, tsis yog ntaus rog nrog tib neeg los sis sib cav sib ceg vim kev ua siab kub.

Thaum ntsib tej xwm txheej uas cov tib neeg phem tswj thiab tab kaum tej kev xaiv tsa, qhov tseem ceeb tshaj plaws tsis yog qhov hais tias koj puas pom tshab cov tib neeg no los sis koj npaj yuav nthuav lawv tawm li cas; tiam sis yog qhov yuav tsum tau qhia qhov xwm txheej ntawd tawm rau theem saud kom ncav sij hawm. Koj yuav tsum siv kev txawj ntse los tawm tsam lawv, tos Vajtswv lub sij hawm, nrhiav Vajtswv tej kev npaj siab, thiab nrhiav qhov tseeb tej hauv paus ntsiab lus, tib lub sij hawm ntawd tsis tab kaum koj tes dej num. Qhov tshwm sim los thaum kawg ntawm qhov ua li no yog dab tsi? Koj ua tau koj lub luag hauj lwm thiab tes dej num tiav. Los ntawm qhov qhia qhov xwm txheej ntawd tawm rau theem saud thiab nrhiav txoj kev daws, tsis yog tsuas daws tau qhov teeb meem xwb, tiam sis koj kuj tau txais kev paub kev pom, ua rau koj txoj kev paub cais thiab kev txawj ntse nce ntxiv, loj hlob hauv theem ntawm sab ntsujplig, thiab ua rau koj txoj kev ntseeg rau Vajtswv khov kho ntxiv. Tib neeg tau txais ntau heev los ntawm qhov tau ntsib tau pom txoj kev tawm tsam Ntxwgnyoog thiab qhov ntawd muaj txiaj ntsim zoo heev rau lawv. Tiam sis, yog hais tias koj ua raws li kev siab kub thiab lub siab xav, sib ntaus sib cav hnyav nrog cov tib neeg no thiab sib cav nrog lawv tim ntsej tim muag, hais tias, “Nej tab tom tswj thiab tab kaum kev xaiv tsa. Txawm hais tias nej muaj hwj chim loj los xij, kuv yuav tsis zwm rau nej, thiab kuv tsis ntshai nej!” Qhov tshwm sim los ntawm txoj hau kev no yog raug ntiab tawm hauv pawg ntseeg mus, ua rau koj quaj thiab raug kev txom nyem nyob hauv tsev tau ntau lub hlis; tiam sis koj tseem tsis to taub Vajtswv tej kev npaj siab: “Vim li cas kuv thiaj li poob rau hauv qhov xwm txheej ntxhov quav niab no? Vajtswv, puas yog Koj tsis xav tau kuv lawm? Puas yog Koj tsis quav ntsej kuv lawm?” Tau ntau lub hli, koj tsis tau mloog cov lus qhuab qhia thiab cov nkauj qhuas Vajtswv tshiab, tsis paub tias pawg ntseeg tab tom ua tes hauj lwm dab tsi, ua tsis tau koj tej dej num, thiab raug cais tawm tag nrho, poob rau hauv txoj kev tsaus ntuj nti. Txhua hnub, dhau ntawm qhov quaj, ces txhua yam uas koj ua yog txhawj. Koj kuj tsis kawm paub thov Vajtswv los sis noj thiab haus Nws cov lus uas muaj feem xyuam nyob hauv qhov xwm txheej no, thiab haj yam tsis kawm paub nrhiav qhov tseeb tej hauv paus ntsiab lus nyob hauv tej xwm txheej uas nyuaj; koj txoj kev txawj ntse yeej tsis nce ntxiv hlo li. Tom qab quaj tau ob peb lub hlis, thaum kawg, muaj ib hnub, muaj neeg txais koj rov qab los rau hauv pawg ntseeg thiab hais kom koj sib qhia txog koj txoj kev ntsib kev pom nyob rau lub sij hawm no, tiam sis koj tsuas quaj yws tias: “Kuv raug ua tsis ncaj ncees heev! Kuv tsis tau cuam tshuam pawg ntseeg. Kuv tsis yog ib tug tib neeg phem; kuv raug cov tib neeg phem liam.” Thaum raug nug hais tias, “Koj kawm tau dab tsi nyob rau lub sij hawm no? Koj puas tau txais ib yam dab tsi?” koj teb hais tias, “Kuv yuav tau txais dab tsi? Lawv cais kuv tawm, muab cov phau ntawv ntawm Vajtswv cov lus thiab cov phau nkauj nqa rov qab mus lawm, thiab kuv tsis tau mloog tej lus qhuab qhia li. Txhua yam uas kuv ua tau tsuas yog tham txog kev ntseeg thiab qee zaus hu ob peb zaj nkauj qhuas Vajtswv uas kuv nco tau xwb. Kuv tsis tau txais ib yam dab tsi li. Ua Vajtswv tsaug uas, Vajtswv tau npaj ib lub sij hawm coj kuv rov qab los; yog tsis li ntawd, kuv twb npaj yuav tawm mus ua lag luam khwv nyiaj lawm, vim tsis muaj kev cia siab rau txoj kev cawm dim lawm. Vajtswv tsis xav tau kuv ntxiv lawm, thiab kuv ntseeg tsis tau ntxiv lawm. Kuv lub siab tsaus ntuj nti lawm.” Thaum kawg, koj haj tseem hais ntxiv tias, “Yog Vajtswv cov yaj ces Vajtswv yeej yuav tsis muab tso tseg li,” los xaus lus li no. Qhov tau ntsib tau pom ib qho xwm txheej uas tseem ceeb thiab tshwj xeeb zoo li no tiam sis tau txais tsawg heev—qhov no tsis yog txaus khuv leej me ntsis lod? Qhov no tsis yog tsis tsim nyog lod? Thaum ntsib ib qho xwm txheej loj zoo li no, koj kawm tsis tau ib yam dab tsi li thiab koj txoj kev txawj ntse los sis kev ntseeg tsis nce ntxiv li; txawm hais tias koj tseem ntseeg Vajtswv hauv koj lub siab los xij, koj raug cov Ntxwgnyoog, cov dab, thiab cov tawm tsam khetos tsim txom mus txog theem uas koj yuav luag tsis ntseeg lawm. Koj puas ua tau tim khawv rau Vajtswv? Koj tsis yog ib tug neeg tais caus uas tsis muaj qab hau lod? Qhov quaj nyob hauv tsev muaj txiaj ntsim dab tsi? Txawm hais tias koj quaj mus txog thaum koj dig muag los, qhov ntawd puas yuav pab tau? Qhov ntawd puas daws tau qhov teeb meem ntawm cov tawm tsam khetos? Cov tib neeg phem ua tau tiav lawm, thiab thaum kawg, txhua yam uas koj tau tsuas yog cov lus hais tias, “Yog Vajtswv cov yaj ces Vajtswv yeej yuav tsis muab tso tseg li,” yam tsis tau txais lwm yam ntxiv li. Koj tsis muaj kev txawj ntse, koj tsis muaj txoj hau kev ua, thiab koj tsis paub nrhiav Vajtswv raws li txoj kev uas Vajtswv muab, los rau ntawm Vajtswv lub xub ntiag nqa Vajtswv cov lus thiab qhov tseeb los tawm tsam nrog Ntxwgnyoog. Qhov kev qhuab qhia me me uas koj ib txwm hais ntawd tsis muaj txiaj ntsig rau koj li; thaum ntsib tej xwm txheej zoo li no, dhau ntawm qhov quaj lawm, txhua yam uas koj ua yog hnov tias raug ua tsis ncaj ncees rau thiab yws—qhov no yog ib tug neeg tais caus uas tsis muaj qab hau. Cov neeg tais caus uas tsis muaj qab hau feem ntau muaj ntau yam kev qhia tshwm, uas kuj yog lawv cov yam ntxwv tseem ceeb thiab. Qhov ib, lawv quaj. Qhov ob, lawv hnov tias raug ua tsis ncaj ncees rau. Qhov peb, lawv yws nyob hauv lawv lub siab. Nyob hauv lawv lub siab, lawv kuj hais tias, “Vajtswv, Koj nyob qhov twg? Vim li cas Koj tsis quav ntsej txog kuv? Kuv raug Ntxwgnyoog ua phem rau heev, kuv ua neej nyob tsis tau ntxiv lawm. Thov cawm kuv sai sai!” Vajtswv hais tias, “Koj yog ib tug neeg tais caus uas tsis muaj qab hau, yog ib yam khoom seem txheej uas qhwv rau hauv tib neeg daim tawv. Koj yog ntseeg Vajtswv, koj tseem ntshai dab tsi? Ntxwgnyoog muaj dab tsi txaus ntshai?” Tsis hais Ntxwgnyoog siv tej kev npaj phem thiab tej tswv yim phem dab tsi thaum nws ua los xij, peb tsis ntshai. Peb muaj Vajtswv, peb muaj qhov tseeb. Vajtswv yuav muab kev txawj ntse rau peb. Vajtswv muaj hwj chim kav txhua yam; txhua yam nyob hauv Vajtswv txoj kev tswj hwm. Koj ntshai dab tsi? Qhov quaj tsuas qhia hais tias koj tais caus thiab tsis muaj peev xwm; koj yog ib yam khoom seem txheej, ib qho nkim huab cua xwb! Qhov quaj txhais hais tias koj tab tom swb rau Ntxwgnyoog thiab thov kev hlub tshua los ntawm Ntxwgnyoog. Vajtswv puas nyiam cov neeg tais caus uas tsis muaj qab hau zoo li no? (Tsis nyiam.) Vajtswv saib koj zoo li ib tug neeg tais caus uas tsis muaj qab hau, ib tug neeg ruam, ib yam khoom seem txheej, uas tsis muaj lus tim khawv thiab tsis muaj kev txawj ntse hlo li. Qhov tseeb uas koj to taub ntawd mus qhov twg lawm? Tej kev qhia tshwm ntawm cov tawm tsam khetos thiab Ntxwgnyoog uas Vajtswv nthuav tawm ntawd koj mloog puas tseem tsawg lawm? Koj tsis to taub los sis pom tsis tshab tej no lod? Koj tsis paub tias lawv yog cov Ntxwgnyoog lod? Yog koj paub tias lawv yog cov Ntxwgnyoog, koj ntshai dab tsi? Vim li cas koj tsis hwm thiab ntshai Vajtswv? Koj tsis ntshai tsam ua txhaum rau Vajtswv los ntawm qhov ntshai Ntxwgnyoog lod? Qhov ntawd tsis yog ib qho kev lim hiam lod? Thaum tej xwm txheej zoo li no tshwm sim, koj ntshai thiab tsis muaj txoj kev daws, tsis muaj kev txawj ntse los sis kev tiv thaiv hlo li. Koj tau txais dab tsi los ntawm qhov mloog cov lus qhuab qhia ntau xyoo los no? Puas yog txhua yam puav leej nkim lawm xwb? Cov neeg tais caus uas tsis muaj qab hau zoo li no puas tuav tau tej lus tim khawv khov kho? (Tuav tsis tau.) Thaum ntsib tej xwm txheej uas cov Ntxwgnyoog thiab cov tib neeg phem tswj thiab tab kaum kev tej xaiv tsa, txawm hais tias koj ib leeg thiab tsis muaj hwj chim los sis yeej muaj ob peb tug kwv tij thiab nkauj muam uas muaj ib lub siab ib lub ntsws nrog koj los xij, tsis txhob maj ua dab tsi. Qhov ib, kawm tos. Qhov ob, kawm nrhiav. Nyob rau lub sij hawm uas tos thiab nrhiav ntawd, tsis txhob tso koj tes dej num tseg. Qhov tos ntawd txhais li cas? Qhov ntawd txhais hais tias tos kom Vajtswv npaj lub sij hawm thiab lub cib fim uas yog. Thiab koj yuav tsum nrhiav dab tsi? Nrhiav tej hauv paus ntsiab lus thiab txoj kev uas koj yuav tsum xyaum ua raws nyob hauv txoj kev ntseeg thiab raws Vajtswv qab; nrhiav seb yuav ua li cas thiaj li mus raws li Vajtswv tej kev npaj siab, thiab yuav ua li cas thiaj li tawm tsam tau nrog Ntxwgnyoog thiab cov tawm tsam khetos lub zog, thaum kawg kov yeej Ntxwgnyoog lub zog los ua ib tug uas kov yeej. Yog tsuas muaj koj ib leeg xwb, ces koj yuav tsum thov Vajtswv kom ntau ntxiv, tos, thiab nrhiav. Yog muaj ob los sis peb tug neeg uas muaj ib lub siab ib lub ntsws nrog koj, nej tuaj yeem sib qhia, thov Vajtswv, tos, thiab nrhiav ua ke. Thaum Vajtswv tau npaj ib lub sij hawm uas tsim nyog lawm, ces thov kom Vajtswv muab lub zog thiab kev txawj ntse, kom txhua yam uas koj ua thiab txhua lo lus uas koj hais ntawd tsim nyog. Qhov ua li no, ib qho yog, koj ua tau koj tes dej num li ib tug neeg uas raug tsim tawm los tiav, thiab lwm qhov yog, koj kuj tuaj yeem nthuav Ntxwgnyoog tawm yam muaj zog thiab muaj txiaj ntsig, nthuav tawm kom tag nrho thiab ua kom Ntxwgnyoog cov tub qhe thiab cov tawm tsam khetos tej kev npaj phem ntawd puas tsuaj. Qhov no puas tsim nyog? Tej kev, tej hau kev, tej xub ke, thiab tej hauv paus ntsiab lus no twb tau qhia rau nej lawm, yog li ntawd qhov nej yuav muab coj los siv li cas ntawd mas nyob ntawm nej tus kheej lawm xwb. Txoj kev no puas yog meej txaus lawm? (Yog.) Yog li ntawd, thaum nej ntsib tej xwm txheej zoo li no, ua raws li lub hauv paus ntsiab lus no. Qhov no yooj yim ua tau.

Txhua zaus thaum pawg ntseeg muaj kev xaiv tsa, tsis hais cov thawj coj thiab cov neeg ua hauj lwm, thiab cov neeg Vajtswv xaiv tseg, puav leej muaj lub luag hauj lwm thiab txoj num los tiv thaiv tes hauj lwm xaiv tsa. Cov thawj coj thiab cov neeg ua hauj lwm yuav tsum ris tes hauj lwm uas sib qhia qhov tseeb thiab tej hauv paus ntsiab lus kev xaiv tsa; cov neeg Vajtswv xaiv tseg yuav tsum qhia txog txhua yam teeb meem uas lawv muaj, thiab tom qab ntawd yuav tsum sib qhia qhov tseeb los daws cov teeb meem no. Tsuas yog ua li no xwb thiaj li yuav paub tseeb hais tias kev xaiv tsa mus tau zoo. Rau ib sab mas, cov thawj coj thiab cov neeg ua hauj lwm yuav tsum ua raws li Vajtswv lub tsev tej hauv paus ntsiab lus ntawm kev xaiv tsa kom nruj thiab ua tes hauj lwm ntawm kev xaiv tsa nyob hauv Vajtswv lub tsev txhua zaus raws li tej hauv paus ntsiab lus. Rau lwm sab mas, lawv kuj yuav tsum ceev faj txog cov tib neeg phem thiab cov tawm tsam khetos uas tswj thiab tab kaum tej kev xaiv tsa thiab. Cov tib neeg no yog Ntxwgnyoog cov tub qhe, lawv yog Ntxwgnyoog ib pab neeg. Cov thawj coj thiab cov neeg ua hauj lwm yuav tsum tiv thaiv thiab xyuam xim kom nruj txog cov tib neeg no, ceev faj thaum muaj tej kev xaiv tsa tsam lawv sim los tswj tej yam tom qab nraub qaum thiab ua tej yam zais ntshis uas tsis ncaj los tswj qhov txheej txheem ntawm txoj kev xaiv tsa. Yog hais tias tshwm sim kev xaiv tsa raug cov tib neeg phem tswj tiag tiag, ua rau tus neeg uas tsim nyog raug xaiv ntawd raug cais tawm thiab tib neeg feem coob raug coj mus yuam kev, tus thawj coj uas raug xaiv ntawd tsis yog tus neeg uas yog thiab tsis haum ua ib tug thawj coj. Yog muaj ib qho xwm txheej zoo li no tshwm sim, ces tseem muaj txoj kev daws. Yuav tsum muab tus neeg uas raug xaiv ntawd qhov xwm txheej tseeb tiag nthuav tawm los. Yog tib neeg feem coob pom zoo, ces tuaj yeem rov xaiv tsa dua tshiab. Txoj kev xaiv tsa uas raug Ntxwgnyoog thiab cov tib neeg phem tswj ntawd tsis yog qhov txiaj ntsig ntawm ib qho kev xaiv tsa li ib txwm muaj uas pawg ntseeg ua raws li qhov tseeb tej hauv paus ntsiab lus. Qhov no tsis yog ib yam uas zoo, thiab tsis ntxov los lig, nws yeej yuav raug muab qhia tshwm, nthuav tawm, thiab muab tshem tawm. Qhov ntseeg li no, yog koj ntsib tej xwm txheej zoo li no, koj yuav tsum ua li cas? Koj yuav tsum npaj txhij txhua lub sij hawm thiab txhua qhov chaw los tawm tsam nrog Ntxwgnyoog, tsis txhob sawv saib xwb. Yog koj yog ib tug neeg siab yau, ib tug neeg ruam feeb tsis meej, los sis ib tug neeg tais caus uas tsis muaj qab hau, tej zaum koj yuav swb rau lawv thiab koom tes nrog lawv ua phem, los sis raug lawv ntaus kom koj xav tsis zoo thiab sawv tsis taus rov los. Ib txhia tib neeg tsuas sawv saib xwb, hais tias, “Li cas los kuv yeej tsis tau ua tus thawj coj pawg ntseeg li. Leej twg ua los yeej zoo ib yam xwb. Leej twg muaj peev xwm ces leej twg ua xwb! Yog ib tug tawm tsam khetos xav ua, qhov ntawd tsis muaj feem cuam tshuam rau kuv, thiab tsuav lawv tsis ntsaig kuv tawm mus xwb, ces tsis ua li cas.” Cov uas hais li no yeej tsis yog neeg zoo. Lawv xav tsis txog hais tias yog ib tug tawm tsam khetos los ua tus thawj coj no, qhov tshwm sim los yuav zoo li cas, los sis yuav muaj qhov cuam tshuam li cas rau lawv txoj kev ntseeg Vajtswv thiab txoj kev cawm dim. Tsuas yog cov tib neeg uas to taub qhov tseeb xwb thiaj li pom tshab qhov no. Lawv yuav hais tias: “Yog ib tug tawm tsam khetos dhau los ua tus thawj coj pawg ntseeg, ces cov uas yuav raug kev txom nyem ntawd yog cov neeg Vajtswv xaiv tseg. Tshwj xeeb tshaj yog, cov uas caum qhov tseeb, cov uas muaj kev paub txog kev ncaj ncees, thiab cov uas txaus siab hlo ua lawv tes dej num puav leej yuav raug tsuj nias thiab raug cais tawm. Tsuas yog cov tib neeg ruam feeb tsis meej thiab cov tib neeg uas ua kom lwm tus zoo siab xwb thiaj li yuav raug nyiam, thiab lawv yuav raug muab kaw thiab coj los nyob hauv txoj kev tswj ntawm tus tawm tsam khetos lub hwj chim.” Tiam sis cov uas tsis caum qhov tseeb yeej tsis xav txog tej no li. Lawv xav hais tias: “Yus ntseeg Vajtswv kom tau txais kev cawm dim. Txhua tus taug nyias tus kheej txoj kev. Txawm hais tias ib tug tawm tsam khetos dhau los ua tus thawj coj los, qhov ntawd yuav tsis muaj kev cuam tshuam rau kuv. Tsuav kuv tsis ua tej yam phem, lawv yuav tsis tuaj yeem tsuj nias kuv los sis cais kuv tawm, los sis ntsaig kuv tawm hauv pawg ntseeg mus.” Qhov kev xam pom no puas yog? (Tsis yog.) Yog tsis muaj ib tug ntawm cov neeg Vajtswv xaiv tseg twg quav ntsej txog pawg ntseeg tej kev xaiv tsa, es kiag thaum ib tug tawm tsam khetos tuav hwj chim lawm, qhov tshwm sim los yuav yog dab tsi? Qhov ntawd puas yuav yooj yim ib yam li tib neeg xav hauv nruab siab tiag? Lub neej hauv pawg ntseeg yuav muaj hom kev hloov zoo li cas? Qhov no muaj feem cuam tshuam ncaj qha rau cov neeg Vajtswv xaiv tseg txoj kev nkag mus rau hauv lub neej txoj sia. Yog ib tug tawm tsam khetos tuav hwj chim nyob hauv ib pawg ntseeg, yuav muaj dab tsi tshwm sim? Lub pawg ntseeg ntawd yuav tsis yog qhov tseeb tuav hwj chim, thiab tsis yog Vajtswv cov lus tuav hwj chim mus ntxiv lawm—tiam sis, yog cov tsis ntseeg thiab Ntxwgnyoog tuav hwj chim nyob rau ntawd. Txawm hais tias tej zaum tseem nyeem Vajtswv cov lus thaum sib txoos ua ke los, tus tawm tsam khetos tswj txoj cai hais lus. Tus tawm tsam khetos puas sib qhia tau qhov tseeb kom meej? Tus tawm tsam khetos puas tuaj yeem tso cai rau cov neeg Vajtswv xaiv tseg sib qhia qhov tseeb yam ywj pheej thiab tsis muaj kev txwv? Qhov ntawd yeej ua tsis tau li. Kiag thaum ib tug tawm tsam khetos tuav hwj chim lawm, yuav muaj tej kev tab kaum thiab kev cuam tshuam ntau zuj zus tuaj ntxiv, tej txiaj ntsig ntawm lub neej hauv pawg ntseeg yuav tsawg zuj zus, thiab cov neeg Vajtswv xaiv tseg yuav tsis tau txais ntau thaum lawv sib txoos ua ke, uas yuav ua rau muaj kev nyuaj rau cov neeg Vajtswv xaiv tseg txoj kev nkag mus rau hauv lub neej txoj sia. Cov neeg Vajtswv xaiv tseg tej teeb meem kuj yuav nce ntau zuj zus ntxiv thiab daws tsis tau, thiab ib txhia uas muaj peev xwm ua raws li qhov tseeb los kuj yuav raug cuam tshuam thiab; qhov xwm txheej ntawm lub neej hauv pawg ntseeg yuav raug hloov tag nrho, cuag li cov huab dub tau thaiv lub hnub lawm. Thaum ntawd puas tseem yuav muaj kev xyiv fab nyob hauv lub neej hauv pawg ntseeg thiab? Qhov ntawd yeej yuav raug txo qis yam tsis yog me me li. Nyob hauv pawg ntseeg, cov uas caum qhov tseeb yeej yog feem tsawg xwb. Yog feem neeg tsawg no raug tsuj nias thiab cais tawm, tuaj yeem hais tau tias tsis muaj lub neej hauv pawg ntseeg ntxiv lawm. Yog tib neeg pom tsis tshab qhov tshwm sim los no, ces lawv yuav tsis quav ntsej los sis txhawj txog tej kev xaiv tsa lawm. Yog tib neeg feem coob tsis saib tej kev xaiv tsa yam mob siab, tsis tuav rawv tej hauv paus ntsiab lus, coj tus cwj pwm xav tsis zoo rau kev xaiv tsa, thiab ua raws li cov thawj coj cuav thiab cov tawm tsam khetos qhia, kiag thaum cov tib neeg phem los sis cov uas tsis nyiam qhov tseeb dhau los ua cov thawj coj pawg ntseeg lawm, cov neeg Vajtswv xaiv tseg feem coob yuav raug kev puas tsuaj rau lawv txoj kev nkag mus rau hauv lub neej txoj sia. Yog li ntawd, pawg ntseeg cov txiaj ntsig ntawm tej kev xaiv tsa mas muaj feem cuam tshuam ncaj qha rau cov neeg Vajtswv xaiv tseg txoj kev loj hlob ntawm lub neej txoj sia thiab pawg ntseeg lub neej yav tom ntej. Cov neeg Vajtswv xaiv tseg yuav tsum pom qhov no kom meej thiab yuav tsum tsis txhob coj tus cwj pwm xav tsis zoo hlo li. Ib txhia tib neeg ruam feeb tsis meej pom tsis tshab qhov teeb meem no; lawv pheej vam khom rau lawv tus kheej tej kev xav hauv nruab siab, xav hais tias, “Txhua tus hauv pawg ntseeg yog cov neeg ntseeg yam siab dawb paug, yog li ntawd leej twg los yeej raug xaiv tau; tsuav lawv yog ib tug kwv tij los sis ib tug nkauj muam xwb, leej twg los yeej ua tau thawj coj.” Lawv saib pawg ntseeg txoj kev xaiv tsa yam yooj yim dhau lawm, thiaj li ua rau muaj ntau yam kev xav thiab kev xam pom uas xav tsis zoo thiab yuam kev. Yog cov thawj coj cuav thiab cov tawm tsam khetos raug xaiv los ua cov thawj coj thiab cov neeg ua hauj lwm tiag tiag, ces pawg ntseeg tes hauj lwm yuav raug rhuav, thiab cov neeg Vajtswv xaiv tseg txoj kev nkag mus rau hauv lub neej txoj sia yeej yuav raug kev puas tsuaj xwb. Lub sij hawm ntawd, tib neeg yuav paub hais tias qhov ua cov kev xaiv tsa raws li tej hauv paus ntsiab lus ntawd tseem ceeb npaum li cas.

Txhua lub pawg ntseeg puav leej muaj qee cov tib neeg uas ua kom lwm tus zoo siab nyob. Cov tib neeg uas ua kom lwm tus zoo siab no tsis muaj kev paub cais txog cov tib neeg phem uas tswj thiab tab kaum tej kev xaiv tsa. Tab txawm hais tias lawv muaj kev paub cais me ntsis los, lawv tsis quav ntsej qhov ntawd. Lawv tus cwj pwm rau txhua yam teeb meem uas tshwm sim nyob hauv pawg ntseeg tej kev xaiv tsa yog “Yam twg tsis cuam tshuam rau tus kheej ces tso mus li ntawd xwb.” Lawv xav hais tias tsis ua li cas txawm leej twg yuav dhau los ua tus thawj coj los xij, tias qhov ntawd tsis muaj feem cuam tshuam rau lawv. Tsuav lawv tuaj yeem ua lawv lub neej txhua hnub yam zoo siab xwb, ces tau lawm. Koj xav li cas txog cov tib neeg zoo li no? Lawv puas yog cov tib neeg uas nyiam qhov tseeb? (Tsis yog.) Lawv yog hom neeg dab tsi? Cov no yog cov tib neeg uas ua kom lwm tus zoo siab, thiab kuj tuaj yeem hu lawv ua cov tsis ntseeg thiab. Cov tib neeg no tsis caum qhov tseeb; lawv tsuas nrhiav kev ua ib lub neej yooj yim, ntshaw kev tau zoo ntawm sab cev nqaij daim tawv xwb. Lawv qia dub dhau thiab txawj ntxias dhau lawm. Puas muaj cov tib neeg zoo li no coob nyob hauv lub zej zog? Tsis hais pawg nom tswv twg tuav hwj chim, tsis hais leej twg ua nom ua tswv, lawv puav leej raug nyiam, lawv tuaj yeem saib xyuas lawv tej kev sib raug zoo hauv lub zej zog tau zoo heev, thiab lawv ua neej nyob xis nyob heev; tsis hais muaj kev nom kev tswv dab tsi tshwm sim los xij, lawv yeej tsis raug cuam tshuam rau hauv. Cov no yog hom neeg dab tsi? Cov no yog cov tib neeg uas txawj dag tshaj plaws, txawj ntxias tshaj plaws, hu ua “cov niag ntses nab” thiab “cov neeg txawj ntxeev ntxias.” Lawv ua neej raws li Ntxwgnyoog tej tswv yim, yam tsis muaj ib qho hauv paus ntsiab lus hlo li. Tsis hais leej twg tuav hwj chim los xij, lawv yoog raws li cov ntawd lub siab nyiam, ua kom cov ntawd zoo siab, hu nkauj qhuas cov ntawd tej qhov zoo. Lawv tsuas paub tiv thaiv lawv cov coj, thiab yeej tsis ua rau cov coj ntawd chim li. Txawm hais tias lawv cov coj ua phem npaum li cas los xij, lawv tsis tawm tsam los sis tsis txhawb nqa qhov ntawd, tiam sis muab lawv tej kev xav zais cia rau hauv qhov tob tob. Lawv raug nyiam tsis hais leej twg tuav hwj chim los xij. Ntxwgnyoog thiab cov vajntxwv dab nyiam hom neeg zoo li no. Vim li cas cov vajntxwv dab thiaj li nyiam hom neeg zoo li no? Vim lawv tsis ua rau cov vajntxwv dab tej hauj lwm puas tsuaj thiab tsis ua ib qho kev hem thawj rau cov vajntxwv dab. Hom neeg zoo li no tsis muaj hauv paus ntsiab lus thiab tsis muaj ciaj ciam rau lawv tus kheej txoj kev coj tus kheej, thiab tsis muaj kev coj ncaj ncees thiab meej mom; lawv tsuas paub ua raws li lub zej zog tej kev thiab nyo hau rau cov vajntxwv dab, yoog raws li cov vajntxwv dab ntawd tej kev nyiam. Puas yog muaj cov tib neeg zoo li no nyob hauv pawg ntseeg thiab? Cov tib neeg zoo li no puas ua tau cov uas kov yeej? Lawv puas yog Khetos cov tub rog zoo? Lawv puas yog cov ua tim khawv rau Vajtswv? Thaum cov tib neeg phem thiab cov tawm tsam khetos tshwm los cuam tshuam pawg ntseeg tes hauj lwm ntawd, cov tib neeg zoo li no puas tuaj yeem sawv los tawm tsam nrog cov tib neeg phem thiab cov tawm tsam khetos ntawd, nthuav tawm, paub cais, thiab tsis lees txais, cheem lawv tej kev ua phem thiab ua tim khawv rau Vajtswv? Lawv yeej ua tsis tau kiag li. Cov niag ntses nab no tsis yog cov uas Vajtswv yuav ua kom zoo tiav log los sis tsis yog cov uas Nws yuav cawm. Lawv yeej tsis ua tim khawv rau Vajtswv los sis tiv thaiv Nws lub tsev tej txiaj ntsim li. Raws li Vajtswv saib lawv mas, cov tib neeg no tsis yog cov uas raws Nws qab los sis zwm rau Nws li, tiam sis yog cov uas dig muag ntsuav raws sawv daws qab los tsim teeb meem, cov tswv cuab ntawm Ntxwgnyoog pab neeg—lawv yog cov uas Nws yuav muab pov tseg thaum Nws tes hauj lwm xaus. Vajtswv tsis saib cov neeg phem zoo li no muaj nqis. Lawv tsis muaj qhov tseeb los sis txoj sia; lawv yog cov tsiaj nyaum thiab dab; lawv tsis tsim nyog tau txais Vajtswv txoj kev cawm dim thiab xyiv fab rau Nws txoj kev hlub. Yog li ntawd, Vajtswv muab cov tib neeg zoo li no tso tseg thiab pov tseg yam yooj yim, thiab pawg ntseeg yuav tsum ntsaig lawv tawm mus kom ncav sij hawm tam li cov tsis ntseeg. Lawv tsis muaj lub siab tseeb tiag rau Vajtswv, yog li ntawd Vajtswv puas yuav muab txoj kev yug tiag tiag rau lawv? Nws puas yuav qhia thiab pab lawv? Nws yeej yuav tsis ua li ntawd li. Thaum pawg ntseeg tej kev xaiv tsa muaj kev cuam tshuam thiab kev tab kaum tshwm sim, thiab cov txiaj ntsig ntawm txoj kev xaiv tsa raug cov tib neeg phem tswj thiab cuam tshuam, cov tib neeg no yeej yuav tsis sawv rau ntawm Vajtswv sab los tiv thaiv Vajtswv lub tsev tej txiaj ntsim li. Lawv yeej yuav tsis tuav rawv qhov tseeb tej hauv paus ntsiab lus los tawm tsam nrog cov tib neeg phem thiab cov tawm tsam khetos, thiab los tawm tsam Ntxwgnyoog lub zog mus txog thaum kawg li. Lawv yeej yuav tsis ua li no, lawv tsis muaj lub siab tawv no. Yog li ntawd, cov uas tuaj yeem ua tim khawv rau Vajtswv yuav tsum paub cais cov tib neeg no thiab yuav tsum tsis txhob sib qhia qhov tseeb uas lawv to taub los sis lawv txoj kev paub cais txog Ntxwgnyoog nrog cov tib neeg no. Txawm hais tias koj sib qhia tej no nrog lawv los, qhov ntawd yeej yuav tsis muaj qab hau; lawv yeej yuav tsis sawv ntawm qhov tseeb sab li. Thaum xaiv cov neeg ua hauj lwm ua ke thiab cov neeg koom tes ua ke ntawd, koj yuav tsum cais cov tib neeg zoo li no tawm thiab tsis txhob xaiv lawv. Vim li cas koj thiaj li tsis tsim nyog xaiv lawv? Vim lawv yog cov niag ntses nab; lawv yuav tsis sawv rau ntawm Vajtswv sab, yuav tsis sawv rau ntawm qhov tseeb sab, thiab yuav tsis muaj ib lub siab ib lub ntsws nrog koj los tawm tsam nrog Ntxwgnyoog. Yog koj qhia koj cov lus hauv siab rau lawv, koj yog tus neeg ruam thiab yuav dhau los ua ib qho chaw luag rau Ntxwgnyoog. Tsis txhob sib qhia qhov tseeb los sis hais lus ntuas rau cov tib neeg zoo li no, thiab tsis txhob muab kev cia siab rau lawv, vim Vajtswv tsis cawm cov tib neeg no hlo li. Lawv tsis yog cov tib neeg uas muaj ib lub siab ib lub ntsws nrog Vajtswv; lawv yog cov uas nyob deb saib kev sib ntaus xwb; lawv yog cov niag ntses nab xwb. Hom neeg zoo li no nkag los rau hauv Vajtswv lub tsev tsuas yog los saib kev lom zem thiab dig muag ntsuav raws sawv daws qab los tsim teeb meem xwb. Lawv tsis muaj kev paub txog kev ncaj ncees thiab tsis muaj kev paub txog lub luag hauj lwm; lawv haj tseem tsis muaj kev khuv leej rau cov neeg zoo uas raug cov tib neeg phem ua phem rau thiab. Qhov hu cov tib neeg zoo li no ua dab thiab Ntxwgnyoog mas tsim nyog tshaj plaws. Yog ib tug neeg uas muaj kev paub txog kev ncaj ncees nthuav cov tib neeg phem tawm, lawv twb yuav tsis txhawb zog los sis txhawb nqa tus neeg ntawd thiab. Yog li ntawd, tsis txhob ntseeg cov tib neeg no kiag li; lawv yog cov niag ntses nab, cov neeg ob lub ntsej muag, cov neeg txawj ntxeev ntxias. Lawv tsis yog cov ntseeg Vajtswv yam siab dawb paug tiam sis yog Ntxwgnyoog cov tub qhe xwb. Cov tib neeg no yeej tsis muaj hnub raug cawm dim, thiab Vajtswv tsis xav tau lawv; qhov no yog Vajtswv lub siab nyiam uas meej meej. Tej zaum cov pawg ntseeg feem ntau muaj cov tib neeg zoo li no. Saib seb nyob hauv koj pawg ntseeg leej twg yog cov tib neeg zoo li no. Thaum muaj xwm txheej tshwm sim, tsis txhob sib qhia qhov tseeb nrog lawv, thiab tsis txhob cia lawv paub tias koj qhov xwm txheej tiag tiag yog dab tsi. Ceev faj txog cov tib neeg zoo li no thiab tsis txhob quav ntsej lawv. Nrhiav cov uas ntseeg Vajtswv tiag tiag thiab muaj kev paub txog kev ncaj ncees—thaum lawv pom Vajtswv lub tsev tej txiaj ntsim raug puas tsuaj, pawg ntseeg tes hauj lwm thiab qhov raws qib raws duas ntawm lub neej hauv pawg ntseeg raug cuam tshuam los sis raug tswj, lawv ntxhov siab thiab npau taws; lawv ntxub tshwj xeeb rau cov tib neeg phem no uas cuam tshuam pawg ntseeg; lawv xav sawv tsees los thiab nthuav cov tib neeg phem tawm thiab ntshaw kom nrhiav tau cov tib neeg uas to taub qhov tseeb los koom ua ke thiab tawm tsam cov dab phem. Koj nrhiav nrog cov tib neeg zoo li no sib qhia thiab koom tes nrog lawv los tawm tsam Ntxwgnyoog. Cov tib neeg zoo li no yog cov uas kov yeej, yog Khetos cov tub rog zoo; tsuas yog cov tib neeg no xwb thiaj li muaj feem nyob hauv Khetos lub nceeg vaj. Cov tib neeg uas ua kom lwm tus zoo siab, cov neeg txawj ntxeev ntxias, cov neeg ob lub ntsej muag, thiab cov uas loog thiab ruam ruam puav leej raug nthuav tawm lawm; lawv yog cov neeg uas yuav tsum raug muab pov tseg. Lawv tsis yog cov kwv tij thiab cov nkauj muam, tsis yog cov neeg ntawm Vajtswv lub tsev, tiam sis yog cov tsis ntseeg thiab cov neeg uas nrhiav hwv tsam uas tsis tsim nyog ntseeg tau. Qhov no yog txoj kev saib xyuas rau cov tib neeg no: Yog lawv tuaj yeem ua phem, ces tshem lawv tawm mus; yog lawv tsis yog cov tib neeg phem thiab tsis raws cov tib neeg phem cuam tshuam pawg ntseeg, ces tuaj yeem cia lawv nyob hauv pawg ntseeg ib ntus tos lawv txoj kev lees txim hloov dua siab tshiab. Ib qho yog, soj ntsuam thiab to taub cov tib neeg no tej moj yam, kev ua neeg, thiab lawv tej kev xam pom thiab tej cwj pwm uas muaj rau ntau yam teeb meem, thiab xyaum paub cais, nrhiav kom paub lub ntsiab tseeb ntawm cov tib neeg zoo li no. Nyob rau tib lub sij hawm ntawd, thaum cov tib neeg phem tswj thiab tab kaum tej kev xaiv tsa, ceev faj txog cov tib neeg uas ua kom lwm tus zoo siab no uas sawv rau ntawm cov tib neeg phem sab, ua lawv cov dev khiav kev thiab cov neeg koom tes. Muab hais luv luv tias, rau txhua txoj kev coj uas tsis tsim nyog ntawm cov tib neeg phem uas tswj thiab tab kaum tej kev xaiv tsa, qhov ntawd yog qhov yuav tsum paub cais raws li Vajtswv cov lus; thaum koj pom lawv lub ntsiab tseeb meej meej lawm, koj yuav paub tias yuav ua li cas rau lawv yam tsim nyog raws li tej hauv paus ntsiab lus.

Nyuam qhuav no, peb tau sib qhia txog qee qhov xwm txheej ntawm kev tswj thiab tab kaum tej kev xaiv tsa thiab qee cov tib neeg tej kev ua. Txawm hais tias tsis yog hais txog txhua seem lawm los, tej hauv paus ntsiab lus rau txoj kev daws cov teeb meem no feem ntau twb tau sib qhia tag lawm. Thaum nej pom cov tib neeg tswj thiab tab kaum tej kev xaiv tsa nyob hauv pawg ntseeg, nej yuav tsum sawv los txwv lawv. Tsis txhob yoog raws los sis ua zoo li cov tib neeg uas ua kom lwm tus zoo siab. Yog leej twg pheej tswj thiab tab kaum tej kev xaiv tsa, kiag thaum lub cim no tshwm sim, cov kwv tij thiab cov nkauj muam yuav tsum koom ua ke sawv los txwv thiab nthuav lawv tawm. Yog lawv ua qhov ntawd yam feeb tsis meej, tsis paub tias qhov no suav hais tias yog kev tswj thiab tab kaum tej kev xaiv tsa, nej tuaj yeem qhia rau lawv tias: “Yam uas koj ua ntawd yog kev tswj thiab tab kaum tej kev xaiv tsa. Tsis txhob ua Ntxwgnyoog tus tub qhe. Qhov no yog kev xaiv tsa cov thawj coj pawg ntseeg, tsis yog kev xaiv tsa cov kav nroog los sis cov kav zos loj. Vajtswv lub tsev muaj tej kev cai thiab muaj tej hauv paus ntsiab lus rau kev ua tes hauj lwm no. Tsis tsim nyog muab tib neeg tej kev npaj siab sib xyaw rau hauv; peb yuav tsum ua raws li qhov tseeb tej hauv paus ntsiab lus kom nruj rau tes hauj lwm no. Yog koj lub peev xwm tsis zoo thiab koj to taub tsis tau qhov tseeb tej hauv paus ntsiab lus, los sis yog koj laus thiab feeb tsis meej lawm, muaj kev txawj ntse tsis txaus los koom nrog tej kev xaiv tsa, ces koj tuaj yeem tsis pov ntawv thiab tsuas tos qhov tshwm sim los xwb, tiam sis koj yuav tsum tsis txhob tswj los sis tab kaum txoj kev xaiv tsa, los sis cuam tshuam thiab tsim kev tab kaum; tej no yog kev ua phem, thiab Vajtswv ntxub qhov ntawd. Tej kev ua phem zoo li no raug teem txim mus ib txhis; tsis txhob ua hom neeg zoo li no los sis taug txoj kev no hlo li. Yog koj yog tib neeg tiag tiag, ces tsis txhob koom nrog kev tswj thiab tab kaum tej kev xaiv tsa, vim thaum qhov ntawd dhau los ua qhov muaj tseeb lawm, koj yuav raug txiav txim tias yog Ntxwgnyoog ib tug tub qhe thiab yuav raug ntsaig tawm hauv pawg ntseeg mus.” Yog pom cov tib neeg uas tswj thiab tab kaum tej kev xaiv tsa, rau cov uas lub peev xwm tsis zoo thiab tsis to taub tias muaj dab tsi tshwm sim tiag tiag ntawd, tuaj yeem siv kev hlub los sib qhia rau lawv, txhawb lawv, muab kev yug rau lawv, thiab pab lawv. Tiam sis yuav ua li cas rau cov uas, txawm hais tias paub qhov tseeb tej hauv paus ntsiab lus zoo lawm los, tseem txhob txwm tswj thiab tab kaum kev xaiv tsa, haj tseem tsis quav ntsej cov lus ntuas txog qhov no thiab? Kuj muaj ib txoj kev daws rau lawv thiab: Tsis cia rau lawv koom nrog kev xaiv tsa ntxiv lawm; tshem lawv txoj cai xaiv tsa tawm. Muab hais luv luv tias, txhua yam kev ua uas tswj thiab tab kaum tej kev xaiv tsa yuav tsum raug paub cais, raug cheem, thiab raug txwv ib yam nkaus los hloov qhov xwm txheej kom zoo dua. Yuav tsum tsis txhob tso cai rau tej kev coj thiab tej kev ua zoo li no muaj nyob hauv pawg ntseeg, txhawm rau tiv thaiv kom tsis txhob muaj qhov tshwm sim los ntawm kev xaiv tsa uas yuam kev es ua rau coj kev cuam tshuam thiab kev puas tsuaj los rau pawg ntseeg tes hauj lwm.

Ib Qho Kev Xaus Lus Txog Ntau Hom Tib Neeg, Xwm Txheej, thiab Yam Khoom Uas Tsim Kev Tab Kaum thiab Kev Cuam Tshuam

Cov thawj coj thiab cov neeg ua hauj lwm lub luag hauj lwm kaum ob ntsig txog ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg. Peb tau muab tej no faib ua kaum ib qho teeb meem los sib qhia. Cov teeb meem los sis tej xwm txheej ntawm kev tab kaum thiab kev cuam tshuam uas teev tseg hauv txhua qho teeb meem puav leej ntsig txog tib neeg txoj kev ua tes dej num thiab lawv txoj kev ntseeg tseeb tiag rau Vajtswv. Vim li cas thiaj li muab faib ntxaws ua luaj? Vim li cas Kuv thiaj li muab txhua qhov teeb meem coj los sib qhia thiab txheeb xyuas? Raws li saib los ntawm txhua qhov teeb meem lub npe, cov tib neeg uas ua tej yam no txoj kev ua neeg tsis zoo. Dhau ntawm qhov teeb meem ib—thaum qhia qhov tseeb pheej tham dhau ntawm lub ncauj lus mus lawm tas li, uas suav hais tias tsis hnyav—tag nrho lwm qhov puav leej muaj lub ntsiab xeeb txawm uas hnyav heev. Cov kev qhia tshwm no puav leej muaj lub ntsiab xeeb txawm uas ua rau muaj kev tab kaum thiab kev cuam tshuam, thiab tej ntawd puav leej ua rau muaj kev tab kaum thiab kev cuam tshuam rau pawg ntseeg tes hauj lwm, vim li ntawd peb thiaj li muab tej ntawd coj los sib qhia thiab txheeb xyuas ib qho zuj zus. Thaum cov teeb meem no tshwm sim hauv lub neej hauv pawg ntseeg los sis hauv qhov txheej txheem uas ua tib neeg tes dej num, tib neeg yuav tsum tau ceev faj tshwj xeeb thiab paub cais tej ntawd thiab pom tshab tej ntawd. Thaum tib neeg pom tej xwm txheej zoo li no tshwm sim uas ua rau muaj kev tab kaum thiab kev cuam tshuam, lawv yuav tsum sawv los cheem thiab txwv tej ntawd. Hais txog qhov teeb meem ib, “thaum qhia qhov tseeb pheej tham dhau ntawm lub ncauj lus mus lawm tas li,” qee zaus tib neeg ua qhov no yam tsis txhob txwm, thiab tej xwm txheej uas muaj feem xyuam thiab lub ntsiab xeeb txawm ntawm qhov ntawd tsis hnyav heev; tiam sis yog lawv pheej tham dhau ntawm lub ncauj lus mus thiab hais lus tsis meej pem, ua rau cov mloog dhuav, thiab vim li ntawd thiaj li tsis muaj qhov tshwm sim los uas zoo nyob hauv lub neej hauv pawg ntseeg, ces qhov no ua rau muaj qhov tshwm sim los uas tab kaum thiab cuam tshuam pawg ntseeg tes hauj lwm. Cov teeb meem uas tshuav ntawd ces tsis tas hais lawm; tsis hais qhov twg los yeej txaus los ua kev tab kaum thiab kev cuam tshuam rau pawg ntseeg tes hauj lwm thiab qhov raws qib raws duas ntawm lub neej hauv pawg ntseeg lawm. Yog li ntawd, qhov ntawd yog qhov tsim nyog uas yuav tsum sib qhia, tshuaj xyuas, thiab txheeb xyuas txhua qhov ntawm cov teeb meem no kom ntxaws. Thaum muaj tej xwm txheej phem tshwm sim, yog koj muaj kev paub cais thiab kev paub txog tej kev ua phem uas cuam tshuam pawg ntseeg, ces koj yuav tsum sawv los cheem thiab txwv tej ntawd. Muab hais kom dav mas, qhov no yog qhov ua tes dej num ntawm ib tug neeg uas raug tsim tawm los; muab hais kom nqaim mas, yam tsawg tshaj plaws, qhov ntawd yog qhov ua tes dej num thiab lub luag hauj lwm ntawm ib tug tswv cuab hauv pawg ntseeg kom tiav. Qhov no tsis yog yam uas koj yuav tsum muaj peev xwm ua tau lod? (Yog.) Yog koj ua tsis tau qhov no, qhov tshwm sim los yuav yog dab tsi? Peb yuav tsum txiav txim txog qhov uas koj ua tsis tau qhov no li cas? Yam tsawg tshaj plaws mas, qhov ntawd txhais hais tias koj yog ib tug neeg ruam feeb tsis meej; tsis tas li ntawd, koj yog ib tug neeg tais caus uas tsis muaj qab hau, ntshai Ntxwgnyoog. Tsis tas li ntawd xwb, thaum cov Ntxwgnyoog thiab cov dab tshwm los cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg, koj haj tseem tsis quav ntsej thiab tsis muaj zog, tsis muaj ib qho kev teb rov qab hlo li, thiab tsis muaj kev ntseeg thiab lub siab tawv sawv tsees los tawm tsam nrog Ntxwgnyoog thiab tuav koj tej lus tim khawv khov kho rau Vajtswv. Yog li ntawd, koj yog ib tug neeg uas tsis muaj qab hau, tsis tsim nyog ua ib tug uas raws Vajtswv qab.

Cov thawj coj thiab cov neeg ua hauj lwm lub luag hauj lwm kaum ob teev ntau yam xwm txheej hauv pawg ntseeg uas tab kaum thiab cuam tshuam Vajtswv tes hauj lwm. Txhua qhov xwm txheej muaj feem xyuam txog cov thawj coj thiab cov neeg ua hauj lwm, nrog rau cov kwv tij thiab cov nkauj muam dog dig, lawv tus cwj pwm uas muaj rau Vajtswv. Qhov ntawd kuj muaj feem xyuam txog txhua tus neeg tus cwj pwm uas muaj rau lawv tes dej num thiab tej luag hauj lwm, nrog rau lawv qhov chaw sawv thiab txoj kev xam pom rau tej xwm txheej thiab tej yam tsis zoo no uas cuam tshuam Vajtswv lub tsev tes hauj lwm. Tseeb tiag, qhov ntawd kuj muaj feem xyuam txog qhov hais tias ib tug neeg uas tau ntseeg Vajtswv thiab mloog cov lus qhuab qhia tau ntau xyoo lawm puas muaj theem ntawm sab ntsujplig thiab kev ntseeg txaus los ua tsov rog nrog Ntxwgnyoog thiab ua tim khawv rau Vajtswv thaum tej xwm txheej thiab tej yam tsis zoo no tshwm tuaj. Qhov no puas yog muaj feem xyuam txog tej teeb meem tseem ceeb? Qhov ntawd muaj feem xyuam txog ib tug neeg qhov chaw sawv thiab txoj kev uas lawv taug, nrog rau lawv tus cwj pwm uas muaj rau Vajtswv, rau qhov tseeb, thiab rau lawv tes dej num. Yog li ntawd, tom qab hnov cov lus no lawm, nej yuav tsum to taub hais tias tej no yog Vajtswv tej kev cheem tsum rau tib neeg. Tsis txhob saib tej ntawd yam li yog tej kev qhuab qhia, tej kev cai, los sis tej kev cai tswj los ua thiab muab coj los ua tiag xwb, tiam sis yuav tsum ua tib zoo xav txog tej ntawd kom ntau ntxiv kom thiaj li to taub qhov tseeb, thiab tom qab ntawd ua raws thiab nkag mus rau hauv tej ntawd, kom thiaj li ua tau raws li Vajtswv tej kev cheem tsum. Thaum cov tib neeg phem tab kaum thiab cuam tshuam pawg ntseeg tes hauj lwm ntawd, tsis txhob sawv saib xwb, tsis txhob siv ntau yam kev hais ub hais no los zam nej tej luag hauj lwm, hais tias nej ntseeg Vajtswv tau ib ntus luv luv xwb, muaj theem ntawm sab ntsujplig me, los sis tseem hluas, thiab lwm yam ntxiv. Thaum Vajtswv tshuaj xyuas tes hauj lwm, thaum Nws tsim tsa tej xwm txheej los saib koj tus cwj pwm, Nws tsis saib koj lub hnub nyoog, koj tau ntseeg Nws tau pes tsawg xyoo lawm, los sis koj tau tiv kev txom nyem dab tsi thiab koj tau ua tiav tej txiaj ntsig dab tsi; Vajtswv xav tau koj tus cwj pwm nyob rau lub sij hawm ntawd. Yog koj yeej ib txwm tsis tau ua tib zoo xav los sis nrhiav txog tej yam no, thiab koj cia txhua yam dhau mus yam tsis meej pem, yam tsis tseg ib yam dab tsi li, yam tsis nrhiav qhov tseeb, yam tsis kawm ib zaj lus qhia, los sis tsis mob siab saib ntau yam xwm txheej uas Vajtswv tau tsim tsa ntawd, yog koj khiav thaum koj pom cov tib neeg phem ua tej kev cuam tshuam thiab kev tab kaum, thiab yeej tsis qhia qhov no tawm rau Vajtswv lub tsev los sis qhia koj tus cwj pwm, ces txawm hais tias koj tsis tau koom nrog kev ua phem los xij, koj tus cwj pwm nyob hauv qhov teeb meem no twb nthuav koj qhov chaw sawv thiab kev xam pom tawm lawm—koj yog ib tug neeg sawv saib, sawv txhawb rau Ntxwgnyoog. Vajtswv tshawb xyuas txhua yam kom meej, thiab koj dag tsis tau Nws. Yog li ntawd, thaum tej xwm txheej tsis zoo no tshwm sim, thaum koj pom ntau hom tib neeg, xwm txheej, thiab yam khoom uas tab kaum thiab cuam tshuam pawg ntseeg tes hauj lwm thiab qhov raws qib raws duas uas ib txwm muaj ntawm lub neej hauv pawg ntseeg, qhov ntawd nthuav tawm koj tus cwj pwm uas muaj rau Vajtswv meej heev. Tej zaum koj ntseeg Vajtswv tau ib ntus luv luv xwb, koj tseem hluas, thiab theem ntawm koj sab ntsujplig me, tiam sis yog thaum tej yam no tshwm sim koj ua raws li tej hauv paus ntsiab lus, thiab koj cheem, txwv, los sis haj tseem nthuav cov tib neeg phem tawm, tiv kev phom sij thiab tsis quav ntsej koj tus kheej txoj kev nyab xeeb sawv los tiv thaiv Vajtswv lub tsev tej txiaj ntsim—yog koj muaj lub siab no, ces koj tus cwj pwm uas muaj rau Vajtswv, nrog rau koj txoj kev txiav txim siab los ua tim khawv rau Vajtswv thiab ua tsov rog nrog Ntxwgnyoog, yuav dhau los ua ib zaj lus tim khawv uas tib neeg thiab Vajtswv pom. Tib neeg tej kev ua phem, lawv txoj kev dag thiab kev zais rau Vajtswv, lawv txoj kev zam tej luag hauj lwm, lawv txoj kev zwm thiab swb rau Ntxwgnyoog thaum Ntxwgnyoog ua phem—Vajtswv yuav pom tag nrho tej no, thiab tej kev ua phem no muaj ib hnub yuav raug muab los xam thiab tau txais ib qho kev txiav txim. Tiam sis ib yam nkaus li ntawd, yog thaum Ntxwgnyoog tab kaum thiab cuam tshuam, ib tug neeg twg tuaj yeem sawv los hais lus rau Vajtswv lub tsev thiab rau cov kwv tij thiab cov nkauj muam, thiab ua tsov rog nrog Ntxwgnyoog los tiv thaiv Vajtswv lub tsev tej txiaj ntsim, nrhiav qhov tseeb nrog txoj kev txiav txim siab los ua tim khawv rau Vajtswv—txawm hais tias qee zaus lawv xav hais tias lawv tsis muaj zog thiab nyob ib leeg, thiab tsis muaj kev txawj ntse, thiab tias lawv tsuas muaj ib qho kev to taub ntiav txog qhov tseeb xwb, thiab txawm xav sib qhia txog qhov tseeb los, lawv qhia tawm tau tsis meej, ua rau qee tus thuam thiab saib tsis taus lawv—nyob ntawm Vajtswv lub qhov muag Nws pom lawv lub siab dawb paug, thiab Nws saib tej kev ua thiab tej kev coj no tias yog tej kev ua zoo. Tej kev ua phem muaj ib hnub yuav tau txais ib qho kev txiav txim thiab muaj qhov xaus lus nyob rau ntawm Vajtswv lub xub ntiag, thiab tej kev ua zoo los yuav zoo ib yam nkaus li ntawd—tiam sis qhov kawg rau txhua yam ntawm ob hom kev coj no yuav txawv kiag lawm. Tej kev ua phem yuav tau txais qhov kev ua pauj uas tsim nyog, thiab tej kev ua zoo yuav raug pauj nrog tej kev ua zoo. Vajtswv twb tau txiav txim siab rau txhua tus neeg txog qhov no ntev los lawm, tsuas yog tos kom tib neeg ntau yam kev qhia tshwm nyob rau lub sij hawm uas Vajtswv ua hauj lwm dhau los ua tej uas muaj tseeb uas ruaj khov lawm, mam li muab nqi zog rau cov zoo thiab rau txim rau cov phem.

Cov thawj coj thiab cov neeg ua hauj lwm lub luag hauj lwm kaum ob tau teev kaum ib qho teeb meem hais txog cov tib neeg, tej xwm txheej, thiab tej yam khoom uas tab kaum thiab cuam tshuam pawg ntseeg tes hauj lwm. Kaum ib qho teeb meem no puas tseem ceeb? Tej ntawd puas nthuav tib neeg tawm kom meej? Thaum nej sib qhia txog txhua qhov teeb meem, nej yuav tsum siv zog ntau ntxiv rau qhov ntawd kom thiaj li to taub qhov tseeb kom meej. Qhov no muaj feem xyuam txog qhov seb tib neeg tiv thaiv txoj kev ncaj ncees thiab tej yam uas zoo li cas, thiab lawv tiv thaiv Vajtswv cov lus tim khawv li cas; qhov ntawd kuj muaj feem xyuam txog qhov tib neeg sawv los ua tsov rog nrog Ntxwgnyoog thiab, nthuav tawm thiab qhia tawm Ntxwgnyoog lub ntsej muag, cheem thiab txwv Ntxwgnyoog tej kev ua phem li cas—tej no yog ob kis uas muaj feem xyuam. Thaum Ntxwgnyoog tab kaum thiab cuam tshuam pawg ntseeg tes hauj lwm, koj puas ua ib feem hauj lwm? Koj ua feem hauj lwm dab tsi? Koj puas tau ua yam uas Vajtswv cheem tsum ntawm koj lawm? Koj puas tau ua tej luag hauj lwm thiab tej num uas ib tug neeg raws Vajtswv qab tsim nyog ua kom tiav lawm? Thaum tej teeb meem no tshwm tuaj, koj puas thim rov qab, ua kom tsis muaj teeb meem, thiab taug txoj kev nruab nrab li ib tug neeg uas ua kom lwm tus zoo siab, los sis koj puas sawv los cheem thiab txwv Ntxwgnyoog tej kev ua phem, koom ua ib lub siab ib lub ntsws nrog ntau cov kwv tij thiab cov nkauj muam tseeb tiag los tiv thaiv Vajtswv lub tsev tej txiaj ntsim? Koj tiv thaiv dab tsi? Koj tiv thaiv cov tib neeg phem tej txiaj ntsim, Ntxwgnyoog tej txiaj ntsim, los sis koj tiv thaiv Vajtswv lub tsev tej txiaj ntsim? Yog muaj ib yam dab tsi uas tab kaum los sis cuam tshuam pawg ntseeg tes hauj lwm tshwm sim tuaj, es koj tsis ua dab tsi li, tsuas ua ib tug neeg uas ua kom lwm tus zoo siab thiab tiv thaiv koj tus kheej xwb, ua kom paub tseeb tias koj tuaj yeem saib xyuas koj tej kev sib raug zoo nrog lwm tus tau zoo thiab tsis raug xwm txheej dab tsi, yam yeej tsis hnov txhawj xeeb los sis ntxhov siab txog pawg ntseeg tes hauj lwm uas raug cuam tshuam ntawd li, yam tsis muaj kev ntxub los sis kev npau taws rau cov tib neeg phem ntawd tej kev ua phem, yam tsis muaj ib lub nra rau Vajtswv lub tsev thiab txhua tus kwv tij thiab nkauj muam tej txiaj ntsim, yam tsis muaj kev hnov tshuav Vajtswv nqi, thiab yam tsis hnov tias tim tus kheej li, ces koj yeej muaj kev phom sij lawm. Yog nyob hauv Vajtswv lub qhov muag saib, koj yog ib tug neeg uas ua kom lwm tus zoo siab tag nrho, qaim tes sawv ntsia txhua yam uas tshwm sim tuaj thiab zam qhov ntawd, thiab tsis ua koj tej luag hauj lwm los sis tej num kom tiav hlo li, ces koj yeej muaj kev phom sij tiag tiag thiab yuav raug Vajtswv muab pov tseg. Yog Vajtswv muaj ib qho kev xav uas txawm yog txoj kev npaj siab uas cia koj siv zog ua hauj lwm los twb tsis tshuav lawm, thiab Nws tsis nyiam koj kiag li lawm, ces txog rau theem no, yeej teem tseg tias koj yeej yuav raug pov tseg, uas yog ib qho phom sij heev! Thaum Vajtswv hais tias Nws tsis xav pom cov tib neeg uas zoo li koj ntxiv lawm, thiab tias Nws tsis saib cov tib neeg uas zoo li koj uas ua tes dej num los sis siv zog ua hauj lwm nyob hauv Vajtswv lub tsev muaj nqis lawm, ces tej zaum tsis ntev no muaj ib hnub twg, ib lub sij hawm twg koj yuav raug pawg ntseeg muab pov tseg, uas yuav hloov koj txoj hmoo lawm. Qhov ntawd yog vim koj txoj kev sib raug zoo nrog Vajtswv tsis zoo li ib txwm lawm los sis koj tau nyob deb ntawm Vajtswv thiab ntxeev siab rau Nws thiab qhov no tau ua rau muaj ib qho kev tshwm sim los. Koj puas pom qhov uas muaj tseeb no? Thaum koj ras txog qhov uas muaj tseeb no, txawm hais tias koj puas tuaj yeem lees txais tau qhov ntawd, txhua txoj kev cia siab uas zoo nkauj nyob hauv koj lub siab yuav ploj mus kiag tam sid.

Thaum tib neeg pib ntseeg Vajtswv, lawv txhua tus puav leej muaj ib lub siab kub lug. Txawm hais tias lawv tsis pom lawv qhov chaw kawg los sis tej kev cia siab nyob rau yav tom ntej los xij, lawv yeej ib txwm muaj ib hom kev vam khom rau Vajtswv. Lawv yeej ib txwm ntshaw tej yam uas zoo nkauj thiab tej yam uas zoo. Lub zog no los qhov twg los? Tib neeg tsis paub; lawv xav tsis tawm: “Tib neeg txhua tus puav leej zoo ib yam, txhua tus ua neej nyob hauv tib co huab cua thiab nyob hauv qab tib lub hnub. Yog li, vim li cas cov ib txwm tsis ntseeg thiaj li tsis muaj tej yam no nyob hauv lawv lub siab hos peb ho muaj?” Qhov no tsis yog ib qho kev zais tob lod? Lub zog no yog los ntawm Vajtswv los. Qhov ntawd yog ib yam uas muaj nqis heev; qhov ntawd tsis yog ib yam uas tib neeg yug los es yeej muaj. Yog txhua tus muaj qhov ntawd txij thaum yug los, lawv yuav zoo ib yam nkaus; nyob hauv cov tib neeg ntiaj teb no yuav tsis muaj kev faib qib siab los sis qis, muaj meej mom los sis tsis muaj, thiab yuav tsis muaj kev sib txawv nyob ntawm cov uas ntseeg Vajtswv thiab cov uas tsis ntseeg lawm. Yam uas lawv tsis muaj, koj muaj tau; koj muaj tau yam uas muaj nqis tshaj plaws nyob hauv cov tib neeg ntiaj teb. Vim li cas thiaj li hu ua yam uas muaj nqis tshaj plaws? Yeej vim yog txoj kev cia siab thiab kev ntshaw no tiag tiag, koj thiaj li tuaj yeem tsom ntsoov rau qhov ua koj tej dej num nyob hauv Vajtswv lub tsev. Qhov no yog yam yuav tsum muaj uas tseem ceeb tshaj plaws rau ib tug neeg kom muaj peev xwm tau txais kev cawm dim. Yog vim qhov kev cia siab no es koj thiaj li muaj ib lub cib fim, thiab muaj kev txiav txim siab me ntsis los muab tus kheej fij rau Vajtswv, los ua koj tes dej num li ib tug neeg uas raug tsim tawm los thiab los ua ib tug neeg zoo, ib tug neeg uas tau txais kev cawm dim. Tej txiaj ntsim uas qhov no coj los mas loj heev. Yog li, qhov no los qhov twg los? Qhov ntawd los ntawm Vajtswv los; yog Vajtswv muab. Txawm li cas los xij, thaum Vajtswv tsis xav tau ib tug neeg twg lawm, qhov no yuav raug muab tshem tawm mus. Lawv tsis ntshaw los sis cia siab rau tej yam uas zoo nkauj lawm; lawv tsis tso lawv txoj kev cia siab rau tej ntawd ntxiv lawm. Lawv lub siab tsaus ntuj nti thiab pib poob siab. Lawv poob lub zog los caum txhua yam uas zoo nkauj los sis yam uas zoo, nrog rau Vajtswv tej lus cog tseg. Lawv tau dhau los zoo ib yam nkaus li ib tug ib txwm tsis ntseeg lawm. Thaum qhov no ploj lawm, lawv puas tseem yuav nyob tau hauv Vajtswv lub tsev thiab ntseeg Vajtswv thiab raws Nws qab txuas ntxiv? Lawv txoj kev ntseeg Vajtswv tsis yog mus txog qhov kawg lawm lod? Thaum koj poob yam uas yuav tsum muaj ua ntej ntawm qhov muaj kev txiav txim siab los caum no lawm, koj yuav dhau los ua ib lub cev tuag uas mus taus kev. Qhov ua ib “lub cev tuag uas mus taus kev” ntawd txhais li cas? Qhov ntawd txhais hais tias koj to taub tsis tau Vajtswv cov lus ntxiv lawm. Thaum koj muaj qhov uas yuav tsum muaj ua ntej no, koj to taub tau Vajtswv cov lus, muaj kev cia siab, muaj kev txhawb hauv koj txoj kev ntseeg, thiab qhov uas yuav tsum muaj ua ntej no tuaj yeem muab lub zog rau koj los caum qhov tseeb. Txawm li cas los xij, thaum koj poob qhov uas yuav tsum muaj ua ntej uas tseem ceeb no lawm, lub zog no yuav ploj mus thiab. Koj tsis muaj zog los sis tsis nyiam mloog Vajtswv cov lus. Tej lus cog tseg thiab tej kev cia siab tsis ua rau koj nyiam los sis tsis txhawb zog rau koj ntxiv lawm. Rau koj mas, Vajtswv cov lus tau dhau los ua ib qho kev xav uas siab. Koj tsis siv zog mus rau tej ntawd, thiab Vajtswv tsis qhia kom koj paub ntxiv lawm. Koj tsis tau txais ib qho qhov tseeb twg los ntawm Vajtswv cov lus li. Txoj kev ntseeg Vajtswv no tsis yog tau los txog qhov kawg rau koj lawm lod? Thaum mus txog theem no, Vajtswv twb ntxub thiab tso koj tseg lawm; koj puas tseem yuav ua tau kom Vajtswv hloov Nws lub siab? Yeej tsis yooj yim li lawm. Thaum Vajtswv txiav txim siab tsis xav tau ib tug neeg twg lawm, qhov uas tus neeg ntawd hnov nyob hauv nruab siab yeej yog zoo li no ntag. Thaum qhov no raug muab tshem tawm lawm, koj tus cwj pwm rau ntau yam xws li kev ntseeg Vajtswv, kev ua koj tej dej num, thiab kev tau txais kev cawm dim yuav txawv kiag ntawm yav tas los lawm. Thaum thim xav txog koj txoj kev kub siab lug caum uas tau muaj yav tas los, koj yuav pom hais tias qhov ntawd piav tsis tau, tsis nkag siab, thiab tsis txaus ntseeg li. Thaum koj pom hais tias qhov ntawd tsis txaus ntseeg li, muab koj tam sim no mus piv rau koj yav tas los, koj tus yam ntxwv sab hauv yuav muaj ib qho kev hloov ntawm lub ntsiab lawm; koj yuav yog ib tug neeg uas txawv kiag, koj yuav tsis yog tus neeg qub li koj yav tas los lawm. Vim li cas thiaj li yuav muaj li no? Qhov no tsis yog vim qhov xwm txheej tau hloov lawm; tsis yog vim koj tau laus dua thiab dhau los ua neeg tswv yim phem ntau dua lawm; tsis yog vim koj tau txais ntau txoj kev ntsib kev pom thiab kev paub txog lub neej, es hloov koj tej kev xav thiab tej kev xam pom lawm. Tiam sis, qhov ntawd yog vim Vajtswv tau hloov Nws lub siab, Nws tej kev xav tau hloov lawm, thiab Nws tus cwj pwm thiab tej kev cia siab rau koj tau hloov lawm. Yog li ntawd, koj tau dhau los ua ib tug neeg txawv yam koj tsis paub txog koj tus kheej li. Saib tam sim no mas, yog ib tug neeg tsis muaj qhov uas Vajtswv muab rau lawv uas tib neeg xav tias yog qhov me me tsis tsim nyog hais txog ntawd, lub sij hawm no tus neeg ntawd yuav poob rau hauv txoj kev txom nyem yam tsis muaj kev zoo siab li. Yog li, txhob mus txog theem ntawd kiag li. Yog koj mus txog theem ntawd, koj yuav xav tias zoo li ib lub nra hnyav tau raug muab tshem tawm ntawm koj lub xub pwg, tau kev ywj pheej, kaj siab lug, tias koj tsis tas yuav ntseeg Vajtswv los sis ua koj tej dej num ntxiv lawm, thiab tias koj tuaj yeem ua neej nyob yam ywj pheej thiab ua raws siab nyiam li cov ib txwm tsis ntseeg, zoo li ib tug me nyuam noog uas tawm hauv lub tawb lawm. Tiam sis qhov ntawd tsuas yog kev nplig siab, kev xyiv fab, thiab kev tso tus kheej ua raws li siab nyiam ib ntus xwb. Thaum koj taug kev mus tom ntej, saib txoj kev nyob tom ntej—koj puas tseem yuav zoo siab npaum li no? Tsis zoo siab li. Lub sij hawm nyuaj tab tom tos koj nyob tom ntej! Thaum koj ua neej nyob hauv tus Tswv Tsim txoj kev tswj fwm, txawm tus Tswv Tsim yuav tswj hwm txhua yam rau koj li cas los xij, Nws ua dab tsi rau koj thiab Nws ua li cas, Nws coj pes tsawg txoj kev sim siab thiab kev txom nyem los rau koj, koj tiv kev txom nyem npaum li cas, los sis txawm hais tias muaj kev tsis to taub, kev to taub yuam kev, thiab lwm yam tshwm tuaj los xij, yam tsawg tshaj plaws, koj yuav hnov tias koj nyob hauv Vajtswv ob txhais tes, Vajtswv yog koj qhov chaw vam khom, thiab koj lub siab muaj kev thaj yeeb. Tiam sis thaum Vajtswv tsis xav tau koj ntxiv lawm, thiab koj tsis tuaj yeem paub tias Vajtswv ua li cas rau koj ntxiv lawm, thiab koj poob qhov chaw vam khom no, qhov ntawd zoo li tag nrho lub ntiaj teb vau los puag ncig koj. Qhov ntawd zoo li thaum koj tseem yau, thiab koj tsuas xav hais tias, “Niam yog tus ntxim hlub tshaj plaws, Niam saib xyuas kuv thiab hlub kuv tshaj plaws, Niam tsis tuaj yeem tuag li.” Koj yeej thev tsis taus thaum koj hnov hais tias koj niam muaj mob. Koj xav hais tias yog koj niam tuag tiag tiag, lub ntuj yuav vau, thiab koj yuav tsis muaj txoj kev ua neej nyob ntxiv lawm. Tib qho laj thawj no kuj siv tau rau txoj kev ntseeg Vajtswv thiab. Qhov kev thaj yeeb nyab xeeb thiab kev xyiv fab uas loj tshaj plaws nyob rau hauv ib tug tib neeg txoj kev ntseeg Vajtswv mas los ntawm qhov vam khom rau Vajtswv los, ntseeg hais tias yus txoj hmoo yog nyob rau hauv tus Tswv Tsim ob txhais tes. Ib tug neeg muaj txoj kev ruaj khov no yog los ntawm qhov muaj txoj kev ntseeg siab thiab kev vam khom tiag tiag no. Thaum koj hnov tias txoj kev ntseeg siab thiab kev vam khom no ploj mus lawm, thiab koj lub siab hnov khoob lug, zoo li nyuam qhuav khawb ib lub qhov, koj lub ntuj tsis yog vau lawm lod? Thaum koj tsis muaj lub chaw vam khom lawm, koj puas tseem muaj zog ua neej nyob ntxiv mus? Cov tib neeg zoo li no zoo li cov cev tuag uas mus taus kev, tsuas yog noj kom tsau plab tos lawv qhov kawg lawm xwb.

Tam sim no, ib txhia tib neeg ib txwm qhia txoj kev coj uas tsis zoo, thiab pheej ua phem thiab tab kaum, cuam tshuam, thiab ua puas tsuaj rau pawg ntseeg tes hauj lwm thaum ua lawv tej dej num, haj tseem mus txog theem uas ua rau muaj kev puas tsuaj loj rau Vajtswv lub tsev tej txiaj ntsim thiab. Lawv yeej tsis tau qhia tawm lub siab dawb paug los sis kev ua siab ncaj rau Vajtswv li, tsis tas yuav hais txog kev zwm rau lawm. Vim li ntawd, Vajtswv yeej tsis tau lees paub lawv li. Lawv yog cov tib neeg phem uas nkag los rau hauv Vajtswv lub tsev nrog txoj kev npaj siab kom tau txais koob hmoov. Vajtswv tso cai rau lawv nkag los kom cov neeg Vajtswv xaiv tseg thiaj li tuaj yeem kawm tau cov lus qhia thiab muaj kev paub cais ntau ntxiv. Txawm hais tias lawv kuj yog cov uas raug hu los thiab, tiam sis lawv tsis raug xaiv vim yog txoj kev coj uas lawv ib txwm qhia tshwm ntawd. Lawv qhov xwm txheej zoo li cas? Nej tuaj yeem nug tau; tsis muaj ib tug ntawm lawv uas ua neej nyob tau zoo li. Cov uas vam khom rau Vajtswv thiab tau txais Nws txoj kev yug txhua lub sij hawm, txhua qhov chaw txoj kev ua neej zoo ntawd mas txawv kiag li ntawm cov uas tsis tau txais Vajtswv txoj kev yug thiab kev pab thiab ib txwm poob rau hauv lub qhov ntuj tob tsis muaj chaw tws thaum lawv ntsib tej xwm txheej. Cov uas tsis tau txais Vajtswv txoj kev yug mas tsis muaj kev thaj yeeb los sis kev zoo siab, tsheej hnub lawv ntsib kev ntshai, kev tsis kaj siab, kev ntxhov siab, thiab kev txhawj xeeb. Lawv ua lub neej nyob zoo li cas? Qhov ua neej nyob rau hauv lub qhov ntuj tob tsis muaj chaw tws ntawd puas yooj yim? Yeej tsis yooj yim li. Tsis tas yuav hais txog lub qhov ntuj tob tsis muaj chaw tws no, tab txawm yog koj muaj kev xav tsis zoo sib law liag ob peb hnub xwb, koj yeej yuav raug kev txom nyem heev. Yog li ntawd, saib lub sij hawm tam sim no kom muaj nqis, thiab tsis txhob plam lub cib fim zoo no. Qhov ua tau koj tes dej num nyob rau hauv Vajtswv tes hauj lwm tswj hwm rau txhiab xyoo ntawd yog koj lub koob meej. Qhov no yog txhua tus tib neeg lub koob meej. Qhov ntawd tsis yog ib qho kev poob ntsej muag; qhov tseem ceeb yog koj coj li cas thiab pauj lub koob meej uas koj tau txais los ntawm Vajtswv no li cas. Vajtswv tau tsa koj siab lawm; tsis txhob tsis paub ris txiaj ntsig rau Nws lub siab zoo. Koj yuav tsum paub pauj Vajtswv txoj hmoov hlub. Koj yuav pauj li cas? Vajtswv tsis xav tau koj tej nyiaj los sis koj txoj sia, thiab Nws tsis xav tau tej khoom qub txeeg qub teg zoo uas tau txais los ntawm koj tsev neeg. Vajtswv xav tau dab tsi? Vajtswv xav tau koj lub siab dawb paug thiab kev ua siab ncaj. Lub siab dawb paug thiab kev ua siab ncaj no qhia tshwm li cas? Qhov uas qhia tshwm ces yog txawm Vajtswv yuav hais li cas los xij, koj yuav tsum siv zog tshaj plaws los muab lub siab dawb paug tawm los thiab ua raws li Vajtswv cov lus. Vajtswv cov lus yog dab tsi? Cov lus ntawd yog qhov tseeb. Thaum koj lees paub thiab lees txais qhov tseeb lawm, koj yuav tsum siv qhov ntawd li cas? Koj yuav tsum ua raws li qhov tseeb tej hauv paus ntsiab lus. Ua raws nraim li Vajtswv hais. Tsis txhob tsuas hais ntawm ncauj tias ua raws li qhov tseeb es tom qab ntawd ua raws li koj tus kheej lub siab nyiam thaum ntsib tej xwm txheej, tom qab ntawd nrhiav kev hais ub hais no thiab hais cov lus ua txuj thiab dag—qhov no yog qhov tsis muaj lub siab dawb paug thiab kev ua siab ncaj, thiab Vajtswv tsis xav pom qhov no. Yam uas muaj nqis tshaj plaws nyob hauv ib tug neeg yog lub siab dawb paug. Ib tug neeg uas muaj lub siab dawb paug tsim nyog muaj txoj kev coj li cas? Koj yuav tsum ua raws nkaus li Vajtswv cheem tsum, pheej tuav rawv ua raws li Vajtswv cov lus. Txawm hais tias koj ua tshaj dhau thiab ua zoo li koj tab tom ua raws li tej kev cai tswj—nrog rau lwm tus xav tias koj me ntsis ruam thaum lawv pom qhov no—koj tseem tsis quav ntsej, thiab tuav rawv ua raws li Vajtswv cov lus mus ntxiv, qhov no yog lub siab dawb paug uas Vajtswv xav tau los ntawm tib neeg. Yog koj pheej siv tswv yim phem thiab txawj ntxias, thiab yeej tsis txaus siab hlo raug saib zoo li ib tug neeg ruam nyob hauv lwm tus lub qhov muag, tsis txaus siab cia koj tus kheej tej txiaj ntsim poob me me li, ces koj tsis tuaj yeem ua raws li qhov tseeb vim koj tsis muaj lub siab dawb paug. Cov tib neeg uas tsis muaj lub siab dawb paug thiab tseem sim ua tej kev txawj dag yog cov uas ntse dhau hwv lawm, thiab Vajtswv tsis nyiam lawv. Thaum lawv ua raws li Vajtswv cov lus, lawv rho thiab xaiv, tsuas xyaum ua raws yam uas muaj txiaj ntsim rau lawv xwb thiab zam yam uas tsis muaj. Feem ntau lawv hais lus zoo mloog, tsuas hais tej tswv yim uas mloog zoo heev xwb, tiam sis thaum muaj teeb meem tshwm tuaj, lawv nkaum lawm, ploj mus yam tsis muaj lw, thiab tsuas tshwm rov qab los tom qab lwm tus tau daws cov teeb meem tag lawm xwb. Tus neeg zoo li no yog hom neeg phem dab tsi? Thaum muaj ib yam dab tsi uas muaj txiaj ntsim rau lawv, lawv ua tus pib thiab mus ua ntej, lawv nquag dua lwm tus. Txawm li cas los xij, kiag thaum lawv tus kheej tej txiaj ntsim muaj kev phom sij, lawv thim rov qab thiab dhau los xav tsis zoo. Lawv yeej tsis muaj ib lo lus zoo mloog li lawm, tsis muaj lawv qhov chaw sawv, thiab lawv txoj kev xam pom lawm. Vajtswv tsis nyiam hom neeg zoo li no. Nws xum yuav ib tug neeg uas saib zoo li ruam nyob hauv lwm tus lub qhov muag ntawd zoo dua li ib tug neeg uas txawj dag zoo li no.

XII. Tham Txog Kev Nom Kev Tswv

Peb tau sib qhia txog kaum ib qho teeb meem uas nyob hauv cov thawj coj thiab cov neeg ua hauj lwm lub luag hauj lwm kaum ob tag lawm. Dhau rau kaum ib qho teeb meem no lawm, cia peb ntxiv ib qho ntxiv. Txawm hais tias qhov no tsis tshua pom nyob rau hauv lub neej hauv pawg ntseeg los xij, qhov ntawd tsim nyog muab hais nyob ntawm no, qhov no tsim nyog yog qhov teeb meem kaum ob—tham txog kev nom kev tswv. Qhov tham txog tej ncauj lus kev nom kev tswv nyob rau hauv lub neej hauv pawg ntseeg puas yog yam tsim nyog? (Tsis yog.) Lub neej hauv pawg ntseeg yog rau kev nyeem Vajtswv txoj lus, pe hawm Vajtswv, thiab sib qhia txog yus txoj kev paub txog Vajtswv thiab txoj kev paub ntawm kev ntsib kev pom txog Vajtswv cov lus. Txawm li cas los xij, nyob rau lub sij hawm no, ib txhia tib neeg tham ntev heev txog kev nom kev tswv, xws li tej xwm txheej kev nom kev tswv, cov neeg ua nom ua tswv, txoj kev teeb tsa ntawm kev nom kev tswv, tej kev xam pom ntawm kev nom kev tswv, thiab tej chaw sawv ntawm kev nom kev tswv. Qhov no puas tsim nyog? Thaum tham txog tej ncauj lus uas hais txog Vajtswv muaj hwj chim kav txhua yam thiab tib neeg ntiaj teb, ib txhia tib neeg cia li lam muab lub tswv yim uas hais tias cov neeg ua nom ua tswv kuj nyob hauv Vajtswv ob txhais tes los siv, hais tias qee cov neeg ua nom ua tswv kuj ntseeg thiab raws Vajtswv qab thiab, thiab haj tseem sau tej ntawv ntawm sab ntsujplig thiab lwm yam ntxiv. Qhov no tsis yog ua rau lwm tus feeb tsis meej lod? Haj tseem muaj ib txhia tib neeg uas hais tias, “Peb cov Ntseeg Vajtswv yuav tsum txhawb tus neeg ua nom ua tswv no vim lawv tsis tsuas yog ib tug neeg ntseeg xwb, tiam sis kuj tiv thaiv peb cov ntseeg tej txiaj ntsim thiab. Lawv muaj kev xav ib yam li peb, thiab peb yuav tsum txhawb thiab xaiv lawv.” Nyob rau hauv lub neej hauv pawg ntseeg, lawv haj tseem txhawb nqa tus neeg ua nom ua tswv no ntau heev. Qhov no puas tsim nyog? Cov Ntseeg Vajtswv puas koom nrog kev nom kev tswv? (Tsis koom.) Koj yuav ua li cas thiaj li tsis koom nrog? Ua ntej tshaj, txawm koj yuav txhawb nqa pawg twg, los sis koj tej kev xam pom kev nom kev tswv yog dab tsi los xij, txhob coj tej ntawd tuaj tham rau hauv lub neej hauv pawg ntseeg. Muaj tseeb tiag, qhov tseem ceeb tshaj yog kev sib cav sib ceg ntawm cov tib neeg uas muaj tej kev xam pom txog kev nom kev tswv sib txawv yuav tsum tsis txhob tshwm sim nyob hauv lub neej hauv pawg ntseeg thiab. Piv txwv li, yog koj thiab lwm tus muaj tej kev xam pom txawv thiab txhawb cov neeg ua nom ua tswv txawv, tej zaum neb yuav xav tham txog qhov ntawd thaum neb sib ntsib; qhov no ua tau, tiam sis yuav tsum tsis txhob ua li ntawd nyob hauv tej kev sib txoos ua ke. Neb ob leeg tuaj yeem xa ntawv ntiag tug, neb tuaj yeem sib ntsib thiab tham, los sis neb haj tseem tuaj yeem sib cav mus txog thaum neb ntsej muag liab ploog, thiab yuav tsis muaj leej twg cuam tshuam; qhov no yog txoj cai ntawm ib tug pej xeem nyob hauv ib qho kev tswj hwm uas muaj kev ywj pheej. Tiam sis thaum ua lub neej hauv pawg ntseeg, koj tsis tsuas yog ib tug pej xeem ntawm ib lub teb chaws xwb; qhov tseem ceeb tshaj mas, koj yog ib tug tswv cuab ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus. Nyob rau qhov chaw no, qhov ntawd yog koj tus kheej. Tsis txhob coj tej ncauj lus kev nom kev tswv los sis tej ncauj lus uas ntsig txog cov neeg ua nom ua tswv tuaj rau hauv pawg ntseeg. Yam uas koj tham ntawd tsuas sawv cev rau koj tus kheej qhov chaw sawv thiab tej kev xam pom xwb, tsis sawv cev rau pawg ntseeg. Pawg ntseeg tsis quav ntsej txog kev nom kev tswv, thiab tsis quav ntsej txog tej kev tswj hwm kev nom kev tswv, cov neeg ua nom ua tswv, cov thawj coj nom tswv, los sis cov pab pawg nom tswv twg li, vim tej yam no tsis muaj feem cuam tshuam rau qhov tseeb thiab tsis muaj feem xyuam rau kev ntseeg Vajtswv. Txhua yam ncauj lus uas ntsig txog kev nom kev tswv yuav tsum tsis txhob coj tuaj tham nyob hauv lub neej hauv pawg ntseeg. Ib txhia hais tias: “Yog li nyob sab nraud ntawm lub neej hauv pawg ntseeg sawv daws sib sau ua ke tham txog tej no puas tau?” Qhov zoo tshaj plaws mas tsis txhob tham. Yog koj xav koom nrog kev sib tham ntawm cov ib txwm tsis ntseeg uas muaj tej kev xam pom txog kev nom kev tswv sib txawv, qhov ntawd nyob ntawm koj xwb; qhov ntawd yog koj txoj kev ywj pheej, thiab Vajtswv lub tsev yuav tsis cuam tshuam. Tiam sis tsuav yog cov tswv cuab hauv pawg ntseeg tuaj sib sau ua ke, los sis thaum lub sij hawm sib txoos ua ke raws kev raws cai, ces tsis txhob muab tej kev xam pom txog kev nom kev tswv los sis kev sib cav no los ua cov ncauj lus tseem ceeb, thiab tsis txhob ua txuj hais tias koj tej kev xam pom txog kev nom kev tswv muaj feem xyuam nrog Vajtswv cov lus, qhov tseeb, los sis Vajtswv lub hwj chim kav. Koj tej kev xam pom txog kev nom kev tswv yeej tsis muaj feem xyuam txog qhov tseeb hlo li, yeej tsis muaj ib qho kev sib txuas me me nyob nruab nrab ntawm tej ntawd li, yog li ntawd tsis txhob ua txuj!

Ib txhia tib neeg xav tham txog kev nom kev tswv tiam sis tsis muaj leej twg nrog tham txog lub ncauj lus no nyob hauv tsev, yog li qhov kev sib tham yeej tshwm sim tsis tau. Lawv pom hais tias cov kwv tij thiab cov nkauj muam puav leej yog neeg loj lawm, lawv ntseeg hais tias lawv nrhiav tau ib qho chaw los tham txog kev nom kev tswv thiab tso lawv tej kev xam pom ntawm kev nom kev tswv tawm. Lawv zoo siab txog qhov uas nrhiav tau lub cib fim zoo zoo no, xav tham txog tej kev xam pom ntawm kev nom kev tswv, tej xwm txheej tam sim no, thiab qhov xwm txheej thoob ntiaj teb. Thaum sib tham txog tej no, lawv pib los ntawm qhov hais tias, “Txhua yam no puav leej nyob hauv Vajtswv lub hwj chim kav. Tib neeg ntiaj teb txoj kev nom kev tswv thiab cov neeg ua nom ua tswv no kuj nyob hauv Vajtswv lub hwj chim kav thiab. Lawv yog Vajtswv teem tseg.” Tom qab cov lus qhia ua ntej no, lawv pib tham txog kev nom kev tswv thiab tej xwm txheej tam sim no yam ntev heev, thiab xaus lus nrog qhov hais tias, “Kev nom kev tswv khiav tsis dhau Vajtswv lub hwj chim kav; txhua yam puav leej muaj Vajtswv tej kev npaj siab uas zoo.” Yog tib neeg pom tsis tshab tej yam no, lawv yuav tsum tsis txhob lam tau lam hais txog tej ntawd. Qhov sib qhia qhov tseeb ces sib qhia qhov tseeb xwb; tsis txhob tham txog kev nom kev tswv los sis cov neeg ua nom ua tswv. Qhov tham txog kev nom kev tswv tsis yog kev sib qhia qhov tseeb, qhov ntawd yog kev coj tib neeg mus yuam kev. Yog koj xav tham txog kev nom kev tswv, ces mus nrhiav ib pab neeg uas nyiam kev nom kev tswv thiab mus nrog lawv tham ntawm koj tus kheej xwb; koj yuav tham tau yam txaus siab hlo. Koj pheej tham txog tej ncauj lus no nyob hauv pawg ntseeg tas li, koj lub hom phiaj yog dab tsi? Koj yog txhob txwm ua kom tib neeg qhuas koj thiab xaiv koj los ua ib tug thawj coj lod? Qhov no yog muaj tej kev npaj siab uas zais ntshis! Cov tib neeg uas nyiam tham txog kev nom kev tswv yog cov tib neeg uas tsis ua lawv tej hauj lwm uas tsim nyog ua thiab yeej tsis caum qhov tseeb li. Tsis txhob tham txog tej ncauj lus ntawm kev nom kev tswv nyob hauv pawg ntseeg tej kev sib txoos ua ke kiag li. Ib txhia tib neeg hais tias, “Yog peb tham tsis tau txoj kev xaiv tsa uas pej xeem yog tus tswj, tej kev tswj hwm kev nom kev tswv, thiab tej cai ntawm cov teb chaws uas muaj kev ywj pheej, yog li qhov tham txog kev nom kev tswv thiab tej yam txaus txaj muag ntawm cov nom tswv qib siab nyob hauv tus zaj loj liab ploog lub teb chaws, xws li tus nom noj nyiaj txiag twg tau kub ntau npaum li cas, thiab nws yug pes tsawg tus niam yau? Peb puas tham tau txog tej yam no?” Tej ncauj lus no tsis ua rau koj qias lod? Vim li cas koj thiaj li quav ntsej heev txog tej yam uas qias neeg no? Vim li cas Kuv thiaj li xav hais tias qhov quav ntsej thiab nyeem txog tej yam no mas qias neeg heev? Ib txhia tib neeg mas nyiam tej no tshwj xeeb, tsis xav tias qias neeg hlo li. Lawv txaus siab hlo nyeem txog tej no hauv is taws nev, ua li ntawd thaum twg lawv muaj sij hawm xwb. Lawv lub siab hnov xis nyob, ruaj ntseg, thiab puv npo thaum lawv nyeem txog tej no. Ua li cas lawv thiaj li tsis hnov puv npo li no thaum nyeem Vajtswv cov lus? Qhov no tsis yog qias neeg me ntsis lod? Qhov no tsis yog qhov tsis ua tej hauj lwm uas tsim nyog ua lod? Nyob rau lub sij hawm zoo li no, tab txawm yog mus taug kev hauv tshav puam, ua pa kom tau huab cua zoo, thiab saib tej chaw zoo nkauj los yuav ua rau koj lub siab zoo dua. Tiam sis ib txhia yeej tsis ua tej no; tiam sis, thaum twg lawv muaj sij hawm lawv tsuas ntsia ntsoov lub khoos phis tawj, tshawb saib xov xwm, sau cov lus paj lus cua—tus nom noj nyiaj txiag twg raug tshawb pom hais tias yug pes tsawg tus niam yau, tus nom noj nyiaj txiag twg tej khoom muaj nqis ntau npaum li cas nyob hauv tsev raug txeeb lawm, tus nom qib siab twg ntawm tus zaj loj liab ploog muab leej twg rhuav tshem, los sis leej twg tua leej twg. Tej no yog tej yam uas feem ntau lawv quav ntsej txog. Lawv xav hais tias lawv muaj kev paub puv npo tom qab sau tau cov ntaub ntawv no, uas tom qab ntawd lawv muab tso tawm rau txhua tus thaum muaj tej kev sib txoos ua ke. Qhov no tsis yog kev tseb tshuaj lom lod? Qhov uas cov dab phem ntawd ua tej yam phem tsis yog ib qho uas ib txwm muaj dhau lawm lod? Ib txhia tib neeg hais tias, “Qhov uas lawv ua tej yam phem ntawd mas yog ib qho uas ib txwm muaj, tiam sis muaj qee yam phem uas lawv ua mas koj yeej xav tsis txog li.” Qhov uas xav txog tej ntawd muaj txiaj ntsig dab tsi? Puas yog muab hlwb rau koj kom koj thiaj li xav tau tej yam lim hiam uas lawv ua ntawd xwb? Qhov no tsis yog qhov tsis ua koj tej hauj lwm uas tsim nyog ua lod? Koj xav hais tias qhov paub txog qee yam lim hiam uas xav tsis txog ntawd yuav ua rau koj zoo dua lwm tus lod? Koj yuav tau txais dab tsi los ntawm qhov no? Qhov ntawd tsis yog tsuas ua rau koj haj yam hnov qias ntxiv xwb lod? Cov tib neeg uas tsis ua lawv tej hauj lwm uas tsim nyog ua no ib txwm quav ntsej txog tej xwm txheej uas qias neeg thiab phem ntawm kev nom kev tswv no. Lawv tsis yog cov uas ruam feeb tsis meej lod? Vim li cas thiaj li pheej txhawj txog lawv tej xwm txheej es tsis ua koj lub neej xwb? Qhov no tsis yog ruam lod? Qhov no tsis yog noj tsau tsis muaj hauj lwm ua lod? Ib txhia tib neeg hais tias, “Cov ntseeg raug tus zaj loj liab ploog tsim txom. Lawv yeej yuav tsum ntxub tus zaj loj liab ploog xwb xwb. Cov ntseeg yeej yuav tsum xav paub txog tej yam txaus txaj muag, kev noj nyiaj txiag, kev tsim txom, thiab kev ua plees ua yig ntawm tus zaj loj liab ploog cov nom tswv qib siab, nrog rau tej yam phem zais ntshis uas lawv ua. Cov ntseeg puas tsim nyog npuaj teg zoo siab thaum tej yam txaus txaj muag no raug nthuav tawm?” Koj ntseeg Vajtswv thiab raws Vajtswv qab kom tau txais tej no lod? Qhov tham txog tej xwm txheej kev nom kev tswv nyob hauv pawg ntseeg, tshwj xeeb yog tej xwm txheej txaus txaj muag uas raug nthuav tawm ntawm tus zaj loj liab ploog cov nom tswv qib siab, mas qias neeg tshaj plaws. Koj yeej yuav tsum tsis txhob tham txog qhov ntawd kiag li! Tsis txhob nrog Kuv tham txog qhov ntawd; qhov ntawd ua rau Kuv qias! Kuv qhia rau koj tias, tsis txhob tham txog qhov ntawd thiab txhob nyeem txog qhov ntawd thiab, yog tsis li ntawd tsis ntxov los lig yeej yuav muaj ib hnub uas koj yuav khuv xim uas nyeem tej ntawd. Thaum koj khuv xim, koj yuav paub tias qhov ntawd zoo li cas; tej no yeej qias tsis muaj chaw kawg li. Qhov mloog thiab nyeem txog tej no ntau dhau tsis muaj txiaj ntsim dab tsi li. Vim li cas Kuv thiaj li hais tias qhov ntawd tsis muaj txiaj ntsim dab tsi? Vim qhov muab tej yam uas qias neeg no los ntim rau hauv koj lub hlwb yuav ua rau koj tsis muaj siab xav mloog Vajtswv cov lus ntxiv lawm. Txawm hais tias tej ncauj lus no muaj feem cuam tshuam rau kev nom kev tswv los, tej yam ntawd haj yam qias dua. Yog koj xav tham txog tej no, ces mus tham qhia koj lub siab rau cov ib txwm tsis ntseeg, hais txhua yam uas koj xav hais rau lawv, tiam sis tsis txhob tham txog tej ntawd nyob hauv lub neej hauv pawg ntseeg los sis nyob hauv cov kwv tij thiab cov nkauj muam hlo li. Ib txhia tib neeg hais tias, “Qhov tham txog tej yam qias neeg thiab lim hiam ntawm tus zaj loj liab ploog cov nom tswv qib siab ntawd pab kom cov kwv tij thiab cov nkauj muam muaj kev paub cais ntau ntxiv thiab cia lawv tso lawv txoj kev npau taws tawm.” Qhov tso kev npau taws tawm ntawd muaj txiaj ntsig dab tsi? Qhov tso kev npau taws tawm ntawd puas yog kev ua tim khawv? Puas yog koj lub luag hauj lwm los sis tes dej num? Qhov tham txog tej ntawd tsis muaj txiaj ntsig, tsis muaj nuj nqis dab tsi li. Txawm koj yuav nthuav tawm tus zaj loj liab ploog tej kev ua lim hiam ntau npaum li cas los, Vajtswv yeej yuav tsis cim nco txog qhov ntawd li. Rov qab qees, yog koj tham txog qhov uas, nyob hauv tus zaj loj liab ploog lub teb chaws, koj tau ntsib tau pom nws txoj kev tsim txom thiab khiav dim thiab kov yeej nws txoj kev hem thiab kev ua kom ntshai li cas, thiab qhov uas koj vam khom Vajtswv thiab tuav koj tej lus tim khawv khov kho nyob rau hauv ib qho xwm txheej zoo li ntawd li cas, Vajtswv lees txais qhov no. Tiam sis qhov tham txog kev nom kev tswv tsis muaj feem xyuam dab tsi rau kev nkag mus rau hauv lub neej txoj sia, thiab Vajtswv tsis lees txais qhov ntawd. Ib txhia tib neeg hais tias, “Kuv nthuav tawm txoj kev noj nyiaj txiag ntawm tus zaj loj liab ploog cov nom tswv, qhov uas lawv siv ntau caum txhiab nyiaj suav rau ib pluag mov, los sis lawv siv nyiaj ntau npaum li cas rau cov tsev so uas kim heev; qhov no puas tau?” Tej ntawd muaj feem xyuam dab tsi rau koj? Qhov ntawd tsis yog qhov uas lub ntiaj teb no thiab lub zej zog no yeej zoo li ntawd lod? Koj tab tom sawv cev rau leej twg? Qhov no tsis yog kev ua tim khawv rau Vajtswv, kuj tsis yog kev nthuav tus zaj loj liab ploog lub tseem ntsiab tawm, qhov ntawd kuj tsis yog ib qho kev qhia tshwm ntawm kev ntxeev siab rau tus zaj loj liab ploog thiab. Tsis txhob ua rau tib neeg paub tsis meej los sis ua txuj ua neeg zoo; tsis muaj ib qho ntawm tej no uas yog kev ua raws li qhov tseeb. Kev noj nyiaj ntawm cov nom noj nyiaj txiag thiab cov neeg ua nom ua tswv tsis muaj feem xyuam rau peb, thiab tsis yog ib yam uas peb yuav tsum nthuav tawm. Tsis txhob quav ntsej txog tej yam no. Tej no yeej ib txwm muaj nyob hauv Ntxwgnyoog txoj kev tswj hwm thaum ub los lawm, thiab yam uas lawv ua yeej tsis muaj feem xyuam txog peb txoj kev ntsib kev pom Vajtswv tes hauj lwm los sis kev ua tim khawv rau Vajtswv dab tsi hlo li. Yog li ntawd, tsis txhob muab tej ncauj lus ntawd los xyaw rau hauv lub ncauj lus uas hais tias “ntxeev siab tawm tsam tus zaj loj liab ploog thiab nthuav nws tawm los ua tim khawv rau Vajtswv” ntawd hlo li, thiab tsis txhob coj tej xwm txheej uas txawv txawv, qias neeg, thiab lim hiam no tuaj tham rau hauv lub neej hauv pawg ntseeg los sis nyob hauv cov kwv tij thiab cov nkauj muam. Yog koj xav tham txog kev nom kev tswv tiag tiag, ces mus tham nrog cov ib txwm tsis ntseeg. Txawm koj yuav tham ntiag tug nrog cov uas muaj tej kev nyiam thiab kev txaus siab ntawd li cas los yeej tau. Qhov ntawd yog koj tus kheej txoj kev nyiam thiab kev txaus siab; qhov ntawd yog koj txoj kev ywj pheej thiab txoj cai, thiab tsis muaj leej twg cuam tshuam. Tiam sis thaum lub sij hawm sib txoos ua ke thiab nyob ntawm cov kwv tij thiab cov nkauj muam lub xub ntiag, ces tsis txhob tham txog tej yam no. Txawm tias muaj neeg txaus siab mloog los, tsis txhob tham txog tej ntawd, vim qhov ntawd cuam tshuam rau lub neej hauv pawg ntseeg thiab cuam tshuam rau cov neeg Vajtswv xaiv tseg txoj kev to taub qhov tseeb.

Tsis hais tej ntawd ntsig txog kev nom kev tswv los sis tej xwm txheej txaus txaj muag ntawm cov neeg ua nom ua tswv lub neej ntiag tug los xij, tsis txhob coj tej ncauj lus no tuaj tham rau hauv lub neej hauv pawg ntseeg. Yog muaj ib tug neeg twg tsis nyiam cov ntsiab lus ntawm tej kev sib txoos ua ke nyob hauv lub neej hauv pawg ntseeg thiab pheej nyiam tham txog tej yam no, hais txog tej ntawd nyob hauv txhua txoj kev sib txoos ua ke, cov kwv tij thiab cov nkauj muam yuav tsum ua li cas? Lawv yuav tsum txwv cov neeg zoo li ntawd, hais tias, “Qhov no yog lub sij hawm sib txoos ua ke, tsis txhob tham txog tej khoom seem txheej ntawd. Yog koj xav tham txog tej ntawd, mus tsev thiab mus tham tom tsev!” Yog tias txwv tsis tau lawv thiab lawv tseem tham txog tej ntawd ntxiv no yuav ua li cas? Ntiab lawv tawm mus, thiab qhia rau lawv hais tias thaum twg lawv tseg tsis tham lawm mam li rov qab tuaj. Tseem muaj lwm txoj kev uas haj yam muaj txiaj ntsig dua: Thaum lawv qhib qhov ncauj los tham txog kev nom kev tswv, cov kwv tij thiab cov nkauj muam sawv tsees thiab mus rau lwm chav, tso lawv nyob tham ib leeg. Muab hais kom luv luv tias, cov tib neeg uas nyiam tham txog kev nom kev tswv mas yeej muaj nyob tiag. Cov tib neeg zoo li no tsis ua lawv tej hauj lwm uas tsim nyog ua, tsis caum qhov tseeb, tsis ua tib zoo xav tias yuav ua lawv tej dej num kom zoo li cas, tsis ua tib zoo xav tias muaj tej kev nyuaj dab tsi nyob hauv pawg ntseeg tes hauj lwm los sis cov kwv tij thiab cov nkauj muam ntsib tej kev nyuaj dab tsi, thiab tsis ua tib zoo xav tias lawv tus kheej muaj tej teeb meem tiag tiag dab tsi uas tim tsum kev daws—lawv tsis ua tib zoo xav txog tej yam uas tsim nyog no. Tiam sis, lawv tsuas ua tib zoo xav txog tej yam uas qias neeg thiab nkhaus ntawd xwb, thiab kub siab tshwj xeeb rau tej ntawd. Tshwj xeeb mas tam sim no, uas cov ntaub ntawv nthuav dav thoob plaws thiab nrhiav tau los ntawm txhua txoj kev—qhov no ua rau cov tib neeg no tau raws li lawv tej kev nyiam thiab kev txaus siab. Peb tsis cuam tshuam nrog lawv tej kev nyiam thiab kev txaus siab, tiam sis Vajtswv lub tsev muaj ib txoj kev cai tswj hais tias qhov tham txog tej ncauj lus ntawm kev nom kev tswv thaum muaj tej kev sib txoos ua ke yog raug teev nyob rau hauv qhov teeb meem uas tab kaum thiab cuam tshuam pawg ntseeg tes hauj lwm. Yog li ntawd, tej ncauj lus no raug txwv nruj thaum lub sij hawm ua lub neej hauv pawg ntseeg thiab thaum cov kwv tij thiab cov nkauj muam tuaj sib sau ua ke. Ib txhia tib neeg hais tias, “Tej ncauj lus no raug txwv, tiam sis yog hais txog peb ntau yam kev xam pom txog kev nom kev tswv, peb nyiam los sis tsis nyiam pawg nom tswv twg, peb xaiv los sis tsis xaiv leej twg—pawg ntseeg puas cuam tshuam nrog tej no?” Cia peb hais kom meej tias: Xaiv leej twg uas koj xav xaiv, nyiam leej twg uas koj xav nyiam—pawg ntseeg tsis cuam tshuam nrog tej yam no, qhov ntawd yog koj txoj kev ywj pheej. Qhov tsis cuam tshuam no tsis yog twb dav heev lawm lod? Koj twb tau xyiv fab puv npo rau koj tej luag hauj lwm thiab leej tib neeg txoj cai li ib tug pej xeem lawm; qhov ntawd tsis yog kev hwm txaus lawm lod? Qhov no twb zoo txaus lawm; tiam sis koj tseem xav hais yam ywj pheej thiab hais kom txaus koj siab nyob hauv pawg ntseeg thiab? Qhov ntawd tsis mus raws li cov kev cai lawm. Yog nej ntsib cov tib neeg zoo li no, nrhiav txoj kev los txwv lawv. Ua ntej, sib qhia kom meej rau lawv, hais tias, “Koj puas yog cov uas nyuam qhuav ntseeg tshiab? Koj puas yog nyuam qhuav tuaj sib txoos ua ke thawj zaug xwb, thiab koj tsis paub Vajtswv lub tsev cov kev cai tswj? Yog li ntawd kuv yuav tsum qhia rau koj tias: Qhov chaw no yog qhov chaw sib txoos ua ke, thiab lub sij hawm no yog lub sij hawm sib txoos ua ke. Txawm koj muaj tej kev xam pom txog kev nom kev tswv los sis kev xav dab tsi los xij, koj yuav tsum tsis txhob nthuav tawm tej ntawd nyob hauv pawg ntseeg, thiab tsis txhob tham txog tej ntawd thaum muaj tej kev sib txoos ua ke hlo li. Peb tsis xav mloog, thiab peb yeej tsis muaj lub luag hauj lwm yuav mloog koj tham txog tej yam no. Koj xaiv yuam kev chaw lawm. Tom qab sib txoos ua ke tag lawm, thaum koj ncaim ntawm qhov chaw no mus lawm, koj tuaj yeem hais txhua yam uas koj xav hais; tsis muaj leej twg cuam tshuam. Qhov ntawd yog koj txoj kev ywj pheej.” Yog lawv to taub thiab nco yam uas koj hais ntawd cia, thiab lwm zaus tsis tham txog qhov ntawd lawm, ces qhov ntawd kuj tau thiab, qhov ntawd qhia tias lawv tseem muaj qee qhov laj thawj thiab. Tiam sis yog tom qab sib qhia lawm los lawv tseem hais txuas ntxiv, pheej qhia tawm tej kev xam pom txog kev nom kev tswv nyob hauv txhua txoj kev sib txoos ua ke, ua li puas tsim nyog txwv tsis pub lawv hais lus ntxiv? (Tsim nyog txwv.) Txawm lawv yuav koom nrog kev nom kev tswv los tsis koom los xij, tsuav yog muaj leej twg tham txog tej ncauj lus ntawm kev nom kev tswv xwb, qhov no tsim nyog muab cais ua ke nrog kev tsim pab tsim pawg, txeeb lub meej mom, tso tej kev xav tsis zoo tawm, thiab lwm yam kev coj zoo li no uas yog ntau hom tib neeg, xwm txheej, thiab yam khoom uas tab kaum thiab cuam tshuam Vajtswv lub tsev tes hauj lwm. Tsis txhob ua siab mos siab muag rau cov tib neeg zoo li no; lawv yuav tsum raug cheem thiab txwv. Muaj tseeb tiag, cov tib neeg uas tham txog kev nom kev tswv yeej tsis yog tias lawv yuav yog cov tib neeg phem los sis cov tib neeg zoo; tej zaum tsuas yog lawv nyiam tej yam no thiab tej ncauj lus no xwb. Tiam sis peb paub tseeb tias cov tib neeg no tsis caum qhov tseeb tiag tiag. Muab hais luv luv tias, lub hauv paus ntsiab lus rau kev daws cov tib neeg no twb tau sib qhia kom meej lawm: Qhia Vajtswv lub tsev cov kev cai rau lawv. Yog tom qab piav qhia meej rau lawv lawm lawv tseem tham txog tej ncauj lus ntawm kev nom kev tswv thiab tsis mloog cov lus ntuas, ces muab lawv cais tawm. Lawv tsuas tuaj yeem ua lub neej hauv pawg ntseeg txuas ntxiv tom qab lees txim hloov dua siab tshiab lawm xwb. Yog lawv yeej tsis lees txim hloov dua siab tshiab, ces tsis txhob cia lawv tuaj koom tej kev sib txoos ua ke lawm. Kev daws qhov teeb meem no yuav tsum yooj yim npaum li ntawd xwb. Tsis txhob muab ib qho teeb meem uas yooj yim ua kom nyuaj, qhov no tsis muaj txiaj ntsig rau leej twg li.

Lub Xya Hli Hnub Tim 24, Xyoo 2021