Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Yim)

Peb tau sib qhia txog cov thawj coj thiab cov neeg ua hauj lwm lub luag hauj lwm kaum ob tag nyob rau qhov kev sib txoos ua ke zaum tas los ntawd lawm. Nej puas tau muab nej tus kheej los piv rau cov ntsiab lus ntawm txoj kev sib qhia no? Nej puas tau ua tib zoo xav txog txoj kev sib qhia no? Cov uas nyiam qhov tseeb thiab cov uas paub txog kev ncaj ncees thiab muaj kev ua neeg me ntsis ntawd mas, thaum lawv tau hnov Kuv txoj kev sib qhia lawm tuaj yeem ua raws li qee qhov tseeb tom qab lawv to taub tej ntawd lawm. Ua ntej tshaj, lawv tuaj yeem muab tej qhov tseeb uas lawv to taub ntawd los piv rau lawv qhov xwm txheej, ntsuam xyuas lawv tus kheej raws li qhov tseeb, nrhiav pom lawv tej teeb meem, thiab tom qab ntawd siv qee yam dab tsi thiab qee yam xwm txheej hauv lub neej tiag tiag thiab hauv kev ua lawv tej dej num los daws cov teeb meem no. Maj mam nyob hauv tej qhov tseeb uas lawv to taub ntawd, lawv tuav tau tej hauv paus ntsiab lus uas tib neeg yuav tsum ua raws thiab tuav rawv. Nyob rau ib kis, lawv tau txais ib txoj kev to taub thiab kev paub tob dua txog lawv tus kheej, thiab nyob rau lwm kis, lawv to taub raws li qhov muaj tiag thiab yog dua txog qhov uas qhov tseeb hais thiab muaj nyob rau hauv ntawd yog dab tsi tiag tiag. Txawm li cas los xij, cov uas tsis nyiam qhov tseeb tiam sis ntxub qhov tseeb ntawd, txawm lawv yuav mloog qhov tseeb ntau npaum li cas los, lawv tsis muaj ib qho kev paub thiab kev hloov nyob hauv lawv hlo li. Lawv tus yam ntxwv, tus cwj pwm thaum ua lawv tes dej num, tej hom phiaj uas lawv caum, txoj kev ua neej, thiab tej hauv paus ntsiab lus ntawm kev coj lawv tus kheej tsis hloov ib qho li. Lawv pheej ua raws li lawv lub siab nyiam thiab ua neej raws li lawv xav ua; tej qhov tseeb no tsis muaj txiaj ntsig dab tsi rau lawv li, thiab tsis muaj peev xwm ua rau lawv thim xav thiab paub lawv tus kheej mus txog theem uas ntxub lawv tus kheej li. Yog lawv ua tsis tau txog qhov uas ntxub lawv tus kheej, ces lawv yeej yuav tsis muaj txoj kev lees txim hloov dua siab tshiab tiag tiag li. Yog tsis muaj txoj kev lees txim hloov dua siab tiag tiag, ces tsis muaj txoj kev nkag mus rau hauv tiag tiag; yog tsis muaj txoj kev nkag mus rau hauv tiag tiag, ces yeej tsis muaj txoj kev hloov tus moj yam li. Yog li ntawd, ntau tus tib neeg uas ntseeg Vajtswv tau ntau xyoo lawm, txawm hais tias lawv kuj sib txoos ua ke, ua tej dej num, mloog cov lus qhuab qhia tau ntau xyoo lawm, thiab nquag nrog cov kwv tij thiab cov nkauj muam sib cuag tas li los xij, lawv tsis muaj kev to taub txog lawv tus kheej hlo li, tsis muaj kev hloov hlo li, thiab lawv txoj kev ntseeg Vajtswv tsis nce ntxiv ib qho li. Lawv raws Vajtswv qab nrog lawv tej kev xav phem thiab tej kev xav hauv nruab siab thaum pib thiab nrog txoj kev npaj siab thiab kev ntshaw kom tau txais koob hmoov xwb. Txawm lawv yuav ntseeg Vajtswv tau ntau xyoo npaum li cas los, lawv tej kev xam pom txog txoj kev ntseeg Vajtswv, lawv tej kev xam pom txog tej yam, lawv tej kev caum thiab tej hom phiaj uas lawv caum, thiab lawv cov cwj pwm thaum ua lawv tej dej num ntawd yeej tsis hloov ib qho hlo li. Lawv tej kev nthuav tawm tam sim no thiab tej kev qhia tshwm uas lawv ua neej ntawd yog qhov tshwm sim los ntawm qhov tsis caum qhov tseeb. Peb tau sib qhia txog kaum ob yam ntawm cov thawj coj thiab cov neeg ua hauj lwm lub luag hauj lwm lawm, tiam sis qee cov thawj coj thiab cov neeg ua hauj lwm txoj kev coj yeej tsis hloov ib qho li. Lawv tej cwj pwm thaum ua lawv tej dej num thiab tej cwj pwm coj rau Vajtswv tej kev cheem tsum yeej tsis hloov ib qho li. Cov ntsiab lus uas tau sib qhia ntawd tau pab ceeb toom, saib xyuas, thiab txhawb cov uas kuj caum qhov tseeb, thiab cov uas muaj kev ua neeg me ntsis thiab cov uas lawv lub siab txawj xav muaj kev paub me ntsis. Txawm li cas los xij, qhov ntawd tsis muaj txiaj ntsig dab tsi rau qee cov uas tawv ncauj dhau, txawj ntxias, thiab tsis lees txais qhov tseeb hlo li. Vim li cas thiaj li zoo li no? Vim cov tib neeg no tus cwj pwm uas muaj rau qhov tseeb yog kev tawm tsam thiab kev ntxub. Txawm yuav sib qhia qhov tseeb ntau npaum li cas los, lawv tus cwj pwm tseem zoo li qub: “Txawm yuav zoo li cas los xij, kuv tab tom ua kuv tes dej num thiab raws Vajtswv qab; kuv tab tom muab kuv tus kheej fij rau Vajtswv tiag tiag. Tsis hais kuv yuav coj li cas los xij, tsuav kuv sawv khov mus txog thaum kawg xwb, kuv yeej yuav tau txais koob hmoov!” Hom kev xav zoo li no puas muaj laj thawj me me li? Lawv tsis yog cov npua tuag uas tsis ntshai dej kub lod? Qhov no tsis yog qhov tawv ncauj thiab tsis kam lees txim hloov dua siab tshiab txawm yuav zoo li cas los xij lod? (Yog.)

Cov thawj coj thiab cov neeg ua hauj lwm lub luag hauj lwm kaum ob yog: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Dhau los ntawd, peb tau muab lub luag hauj lwm no faib ua kaum ob qho teeb meem los sib qhia. Cov ntsiab lus ntawm kaum ob qho teeb meem no tseem ceeb yog hais txog cov thawj coj thiab cov neeg ua hauj lwm yuav tsum ua li cas thiab daws cov teeb meem no li cas thaum ntau hom tib neeg, xwm txheej, thiab yam khoom uas ua rau muaj kev tab kaum thiab kev cuam tshuam tshwm tuaj hauv pawg ntseeg kom thiaj li ua tau tiav cov txiaj ntsig ntawm kev tiv thaiv Vajtswv lub tsev tes hauj lwm thiab qhov raws qib raws duas uas ib txwm muaj ntawm pawg ntseeg, uas yog ua kom tiav cov hauj lwm uas cov thawj coj thiab cov neeg ua hauj lwm tsim nyog ua thiab tej luag hauj lwm uas lawv tsim nyog ua kom tiav. Peb tau sib qhia ntxaws txog txhua qhov teeb meem uas nyob hauv cov thawj coj thiab cov neeg ua hauj lwm lub luag hauj lwm no lawm, tau sib qhia txog qee qhov kev qhia tshwm ntawm txhua qhov, thiab kuj tau muab qee qhov piv txwv ntxaws ntxaws los ua piv txwv lawm. Saib raws li tej hauv paus ntsiab lus mas, cov ntsiab lus uas tau sib qhia ntawd muaj tiag heev thiab. Txawm hais tias cov piv txwv uas muab ntawd tej zaum yuav tsis hais txhij hais txhua los, tej teeb meem txog lub ntsiab tseeb ntawm ntau hom tib neeg, xwm txheej, thiab yam khoom tau sib qhia meej lawm. Tshwj xeeb tshaj yog, nej cov uas ua cov thawj coj thiab cov neeg ua hauj lwm yuav tsum to taub qhov tseeb sab no kom thiaj li daws tau ntau yam teeb meem uas tshwm sim tuaj hauv pawg ntseeg. Ua ntej tshaj plaws, nej yuav tsum nrhiav cov lus uas txheeb xyuas lub ntsiab tseeb ntawm cov teeb meem los ntawm cov ntsiab lus uas tau sib qhia ntawd thiab muab cov lus ntawd los piv rau cov teeb meem ntawd. Qhov to taub lub ntsiab tseeb ntawm cov teeb meem ntawd thiaj li ua rau yooj yim nrhiav tau cov hau kev daws teeb meem uas sib xws thiab daws cov teeb meem raws li qhov tseeb tej hauv paus ntsiab lus. Qhov to taub lub ntsiab tseeb ntawm ib qho teeb meem ua ntej daws qhov teeb meem ntawd mas tseem ceeb heev. Thaum koj to taub lub ntsiab tseeb ntawm qhov teeb meem ntawd lawm, koj kuj yuav tsum to taub thiab tuav tau tej hauv paus ntsiab lus rau kev daws qhov teeb meem no thiab. Ob kis no puav leej tsis muaj tsis tau: Ib kis yog lub ntsiab tseeb ntawm qhov teeb meem, thiab lwm kis yog tej hauv paus ntsiab lus rau kev daws cov teeb meem zoo li no. Tej no yog tej yam uas cov thawj coj thiab cov neeg ua hauj lwm yuav tsum paub meej. Tsuas yog los ntawm qhov tuav tau ob lub hauv paus ntsiab lus no xwb koj thiaj li daws tau txhua yam teeb meem kom yog thiab daws cov tib neeg, xwm txheej, thiab yam khoom uas muaj feem xyuam rau hauv ntau yam teeb meem ntawd kom tsim nyog, es tsis yog siv cov kev cai tswj thiab ua rau cov teeb meem ntawd loj tshaj qhov muaj tiag. Tam sim no, thaum ib txhia thawj coj thiab neeg ua hauj lwm daws qee qho teeb meem mas, nyob rau ib kis, lawv tsuas ua raws li cov kev cai tswj xwb, thiab nyob rau lwm kis lawv tuav tsis tau lub ntsiab tseeb ntawm cov teeb meem ntawd, yooj yim liam txhaum rau tib neeg thiab ua qhov tsis tshua ncaj. Qhov no cheem tsum kom muaj ib txoj kev to taub meej meej txog tej ntxaws ntxaws, tej yam hauv paus hauv ntsis, thiab qhov xwm txheej ntawm cov teeb meem ntawd. Tsis tas li ntawd, yuav tsum tau saib ib tug neeg txoj kev coj uas ib txwm ua ntawd los txiav txim seb lawv yog hom neeg twg tiag tiag. Tsuas yog los ntawm kev paub zoo txog tej kis no xwb mas thiaj li daws tau cov teeb meem raws li tej hauv paus ntsiab lus. Ib txhia thawj coj thiab neeg ua hauj lwm, thaum ua lawv tes hauj lwm, tsuas yog siv tej kev cai tswj rau cov teeb meem thiab ua rau cov teeb meem ntawd loj tshaj qhov muaj tiag xwb, hos lawv pom tsis tshab lub ntsiab tseeb tiag tiag ntawm cov tib neeg uas muaj feem xyuam ntawd, seb lawv yog cov neeg zoo los sis cov neeg phem, seb lawv txoj kev coj ntawd yog ib txwm ua los sis tsuas yog ib qho kev ua txhaum rau ib lub sij hawm xwb. Lawv tsis paub cais tej no, yog li ntawd lawv thiaj li yooj yim ua yuam kev heev. Nyob rau hauv cov xwm txheej zoo li no, yog pawg ntseeg tuaj yeem pov ntawv txiav txim tau, qhov ntawd tuaj yeem zam tau qee qhov kev ua yuam kev yam muaj txiaj ntsig. Qhov muaj tej kev ua uas tsis tshua ncaj thiab tej kev ua yuam kev no nyob hauv cov thawj coj thiab cov neeg ua hauj lwm tes hauj lwm ntawd tuaj yeem nthuav tawm tau meej tshaj plaws tias lawv puas muaj kev paub cais thiab puas daws tej yam raws li tej hauv paus ntsiab lus. Tib lub sij hawm ntawd kuj nthuav tawm tias cov thawj coj thiab cov neeg ua hauj lwm puas muaj qhov tseeb qhov muaj tiag thiab. Yog ib tug thawj coj los sis ib tug neeg ua hauj lwm uas ntseeg Vajtswv tau ntau xyoo lawm es daws tsis tau cov teeb meem tiag tiag no, qhov ntawd txaus los ua pov thawj hais tias tus thawj coj los sis tus neeg ua hauj lwm no tsis yog ib tug neeg uas caum qhov tseeb.

Tom qab to taub cov thawj coj thiab cov neeg ua hauj lwm tej luag hauj lwm uas yuav tsum ua, tej hauv paus ntsiab lus uas lawv yuav tsum ua raws, thiab ciaj ciam ntawm lawv tes hauj lwm lawm, peb yuav rov qab mus rau lub ntsiab lus ntawm lub caij nyoog kev sib qhia no: qhov nthuav tawm cov thawj coj cuav. Qhov no yog lub ntsiab lus tseem ceeb. Hais txog cov thawj coj thiab cov neeg ua hauj lwm tej luag hauj lwm yam kaum ob, cov thawj coj cuav muaj tej uas tsis ua lawv lub luag hauj lwm twg, thiab muaj tej kev qhia tshwm ntawm qhov tsis ua tes hauj lwm tiag tiag twg, qhov no yog lub ntsiab lus uas peb yuav sib qhia hnub no. Ua ntej, cia peb nyeem cov ntsiab lus ntawm lub luag hauj lwm kaum ob tso. (Yam kaum ob: Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.) Lub luag hauj lwm kaum ob qhia meej txog peb kis ntawm tes hauj lwm uas cov thawj coj thiab cov neeg ua hauj lwm yuav tsum to taub. Qhov no muaj feem xyuam rau qhov nthuav tawm cov thawj coj cuav li cas? (Ua ntej, peb yuav tsum to taub tias nyob hauv tes hauj lwm no, cov thawj coj thiab cov neeg ua hauj lwm lub luag hauj lwm muaj pes tsawg qhov. Tom qab ntawd, peb muab piv saib seb cov thawj coj cuav puas ua tau cov luag hauj lwm no kom tiav, thiab cov thawj coj cuav tej kev qhia tshwm yog dab tsi; qhov ntsuas lawv raws li tus qauv no mas kuj yog lawm.) Yog lawm. Kev paub cais seb ib tug neeg puas yog ib tug thawj coj cuav ntawd tsis yog ua los ntawm qhov siv koj lub qhov muag los saib lawv lub ntsej muag thiab saib seb lawv lub ntsej muag puas zoo los sis phem, thiab tsis yog ua los ntawm qhov saib seb sab nraud lawv zoo li tau raug kev txom nyem ntau npaum li cas, los sis lawv tau khiav mus khiav los ntau npaum li cas. Tiam sis, koj yuav tsum saib seb lawv puas ua tau cov thawj coj thiab cov neeg ua hauj lwm tej luag hauj lwm kom tiav thiab seb lawv puas tuaj yeem siv qhov tseeb los daws cov teeb meem tiag tiag. Qhov no yog tib tug qauv uas yog uas yuav siv los ntsuas lawv. Qhov no yog lub hauv paus ntsiab lus ntawm kev txheeb xyuas, kev paub cais, thiab kev txiav txim seb ib tug neeg puas yog ib tug thawj coj cuav. Tsuas yog ua li no xwb qhov kev ntsuas thiaj li ncaj ncees, mus raws li tej hauv paus ntsiab lus, mus raws li qhov tseeb, thiab ncaj ncees rau txhua tus. Qhov muab ib tug neeg twg cais tias yog ib tug thawj coj cuav los sis ib tug neeg ua hauj lwm cuav ntawd mas yuav tsum muaj tej yam muaj tseeb txaus los ua lub hauv paus. Yuav tsum tsis txhob cais raws li ib los sis ob qho xwm txheej los sis ib los sis ob qho kev ua txhaum, haj yam tsis txhob cais raws li qhov kev nthuav tawm txog txoj kev qias vuab tsuab ib lub sij hawm ntawd xwb. Yuav tsum cais lawv raws li qhov seb lawv puas ua tau tes hauj lwm tiag tiag, puas siv tau qhov tseeb los daws tej teeb meem mas thiaj li yog, nrog rau qhov hais tias seb lawv puas yog ib tug neeg uas yog, seb lawv puas yog ib tug neeg uas nyiam qhov tseeb thiab zwm tau rau Vajtswv, thiab seb lawv puas muaj Vajntsujplig tes hauj lwm thiab kev qhia kom paub. Tsuas yog cais ib tug neeg twg raws li cov laj thawj no tias yog ib tug thawj coj cuav los sis ib tug neeg ua hauj lwm cuav xwb mas thiaj li yog. Cov laj thawj no yog cov qauv thiab tej hauv paus ntsiab lus rau kev ntsuas thiab txiav txim seb ib tug neeg puas yog ib tug thawj coj cuav los sis ib tug neeg ua hauj lwm cuav.

Peb Yam Hauj Lwm Uas Cov Thawj Coj thiab Cov Neeg Ua Hauj Lwm Tsim Nyog Ua Nyob Rau Hauv Lub Luag Hauj Lwm Kaum Ob

I. Txheeb Ntau Hom Tib Neeg, Xwm Txheej, thiab Yam Khoom Uas Tsim Kev Tab Kaum thiab Kev Cuam Tshuam Kom Ncav Sij Hawm thiab Kom Yog

Cov thawj coj thiab cov neeg ua hauj lwm lub luag hauj lwm kaum ob muaj peb yam, los sis peb kauj ruam. Los ntawm qhov ua raws li peb kauj ruam no los ua tes hauj lwm no kom tiav, ces yog ua tau raws li tej hauv paus ntsiab lus ntawm tes hauj lwm no, thiab ua tau tiav tej luag hauj lwm ntawm tes hauj lwm no lawm. Peb yam no yog dab tsi? (Thawj yam yog, txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog. Qhov ob yog, cheem thiab txwv, thiab hloov txhua yam kom zoo dua. Qhov peb yog, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.) Peb yam no yog tej kev cheem tsum rau cov thawj coj thiab cov neeg ua hauj lwm hauv lub luag hauj lwm kaum ob. Ua ntej tshaj, thawj qhov kev cheem tsum rau cov thawj coj thiab cov neeg ua hauj lwm yog kom txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab lub neej hauv pawg ntseeg kom ncav sij hawm thiab kom yog. Qhov ntawd yog kom txheeb kom ncav sij hawm thiab kom yog, tsis yog teb rov qab yam qeeb thiab loog, thiab tsis yog lam tau lam txiav txim yam dig muag ntsuav thiab tsis xyuam xim—qhov lam tau lam txiav txim ntawd mas txais yuav tsis tau li. Ib txhia thawj coj thiab neeg ua hauj lwm, vim lawv lub peev xwm tsis zoo thiab ruam feeb tsis meej, lawv thiaj li lam tau lam ntuas thiab cem tib neeg txog tej yam me me uas tsis tseem ceeb, lam tau lam txiav txim thiab lam tau lam tshab txhais tej yam yam dig muag ntsuav uas tsis ua raws li tej hauv paus ntsiab lus. Qhov ua hauj lwm zoo li no ua txhaum qhov tseeb tej hauv paus ntsiab lus. Yog li ntawd, cov thawj coj thiab cov neeg ua hauj lwm hauv Vajtswv lub tsev yam tsawg kawg nkaus yuav tsum muaj peev xwm paub cais ntau hom tib neeg, xwm txheej, thiab yam khoom. Tsuas yog muaj kev paub cais xwb lawv thiaj li tuaj yeem txheeb tau ntau yam teeb meem uas tshwm tuaj hauv pawg ntseeg kom ncav sij hawm thiab kom yog. Yuav kom muaj peev xwm paub cais ntau hom tib neeg, xwm txheej, thiab yam khoom ntawd, ua ntej tshaj yuav tsum muaj dab tsi? Ua ntej tshaj, yuav tsum tau to taub Vajtswv tej kev cheem tsum rau ntau hom tib neeg, nrog rau qhov uas Vajtswv txiav txim rau ntau hom tib neeg thiab ntau tus yam ntxwv uas lawv muaj ntawd li cas. Tsis tas li ntawd, tseem yuav tsum tau txheeb xyuas seb ntau tus yam ntxwv uas xav tsis zoo ntawd tshwm tuaj li cas thiab tej hauv paus yog dab tsi. Tsis tas li ntawd xwb, yuav tsum to taub qhov cuam tshuam ntawm ntau hom tib neeg, xwm txheej, thiab yam khoom rau Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg ntawd li cas. Lub hauv paus rau qhov ua kom tau raws li tej kev cheem tsum no yog dab tsi? Cov thawj coj thiab cov neeg ua hauj lwm yuav tsum xub ua tes hauj lwm twg ua ntej tshaj plaws? Yog cov thawj coj thiab cov neeg ua hauj lwm pheej nyob qhov chaw siab siab, ua nom ua tswv thiab tsis sib cuag nrog cov kwv tij thiab cov nkauj muam li, tsis paub txog cov kwv tij thiab cov nkauj muam ntau tus yam ntxwv, tsis sib cuag kom ze nrog ntau hom tib neeg, thiab tsis muaj kev soj ntsuam kom ntxaws thiab kev to taub tob txog lawv, qhov no puas lees txais tau? Qhov no yeej lees txais tsis tau kiag li. Ib txhia thawj coj thiab neeg ua hauj lwm pheej nkaum nyob rau hauv lawv chav, siv qhov tias pe hawm ntawm sab ntsujplig thiab sau cov ntawv lus tim khawv uas hais txog txoj kev ntsib kev pom los ua laj thawj es tsis quav ntsej thiab tsis to taub txog pawg ntseeg tes hauj lwm li. Saib sab nraud mas, zoo li lawv nkaum nyob rau hauv lawv chav ua pawg ntseeg tej hauj lwm, tiam sis qhov tseeb tiag, lawv twb cais lawv tus kheej tawm ntawm pawg ntseeg tes hauj lwm thiab tawm ntawm cov neeg Vajtswv xaiv tseg lawm. Txoj hau kev ua hauj lwm zoo li no puas daws tau tej teeb meem uas muaj nyob hauv ntau yam ntawm pawg ntseeg tes hauj lwm? Qhov ntawd puas pab tau cov neeg Vajtswv xaiv tseg ua lawv tej dej num kom zoo? Thaum lawv nkaum nyob rau hauv lawv chav es sau cov ntawv lus tim khawv, puas yog lawv tab tom ntsib pom rau Vajtswv tes hauj lwm? Yog li ntawd, txoj hau kev ua no mas tsis tsim nyog li. Raws li lub luag hauj lwm kaum ob, thawj yam hauj lwm uas cov thawj coj thiab cov neeg ua hauj lwm tsim nyog ua yog txheeb ntau hom tib neeg, xwm txheej, thiab yam khoom uas tab kaum thiab cuam tshuam pawg ntseeg tes hauj lwm kom ncav sij hawm raws li Vajtswv cov lus thiab qhov tseeb tej hauv paus ntsiab lus. Ib txhia tib neeg nug hais tias, “Qhov kom cov thawj coj thiab cov neeg ua hauj lwm koom nrog lub neej hauv pawg ntseeg kom tob ntawd puas yog tsuas kom lawv tuaj yeem txheeb cov tib neeg, xwm txheej, thiab yam khoom uas ua rau muaj kev cuam tshuam thiab kev tab kaum kom ncav sij hawm thiab kom yog xwb?” Qhov kev nkag siab no puas yog? (Tsis yog.) Qhov no yog ib qho kev nkag siab uas nkhaus lawm. Cov thawj coj thiab cov neeg ua hauj lwm yuav tsum muaj tus cwj pwm thiab txoj hau kev uas yog rau lawv tes hauj lwm thiab kuj yuav tsum nkag mus kom tob hauv theem hauv paus thiab. Tsuas yog ua li no xwb lawv thiaj li txheeb thiab daws tau cov teeb meem kom ncav sij hawm thiab kom yog. Yog lawv tsis nkag mus kom tob rau hauv theem hauv paus thiab nrog cov neeg Vajtswv xaiv tseg ua neej nyob ua ke, qhov ntawd yuav nyuaj heev los txheeb txhua qhov teeb meem hauv pawg ntseeg tes hauj lwm. Yog lawv tsuas daws tau teeb meem me ntsis tom qab tib neeg qhia tawm thiab nrhiav kev daws xwb, ces cov txiaj ntsig ntawm tes hauj lwm no yuav muaj tsawg heev. Txoj hau kev ua hauj lwm uas yuam kev tshaj plaws ntawm cov thawj coj thiab cov neeg ua hauj lwm yog qhov cais lawv tus kheej tawm ntawm lwm tus thiab kaw qhov rooj ua hauj lwm, zoo li cov neeg kawm ntawv thaum ub uas muab lawv tus kheej tsom ntsoov rau kev kawm cov neeg txawj ntse cov phau ntawv yam tsis quav ntsej tej xwm txheej sab nraud li. Tus cwj pwm thiab txoj kev ua neej no txais yuav tsis tau rau cov thawj coj thiab cov neeg ua hauj lwm. Koj nyob ib leeg hauv koj chav, mloog lus qhuab qhia, nyeem Vajtswv cov lus, sau ntawv txog kev pe hawm ntawm sab ntsujplig, thiab sau lus qhuab qhia, tiam sis qhov tau txais qee cov kev qhuab qhia thiab cov lus ntawd puas txhais tau hais tias koj to taub qhov tseeb? Qhov ntawd puas txhais tau hais tias koj to taub cov xwm txheej tiag tiag thiab cov yam ntxwv tseeb tiag ntawm cov tib neeg uas raug qhov tseeb nthuav tawm? (Tsis txhais li ntawd.) Yog li ntawd, txawm hais tias lub neej ntawm kev pe hawm ntawm sab ntsujplig tseem ceeb heev rau cov thawj coj thiab cov neeg ua hauj lwm tes hauj lwm los xij, qhov tseem ceeb tshaj plaws yog yuav tsum muaj cov hau kev ua hauj lwm thiab txoj kev ua neej uas yog.

II. Cheem thiab Txwv Cov Tib Neeg Phem Kom Ncav Sij Hawm

Qhov kev cheem tsum ob rau cov thawj coj thiab cov neeg ua hauj lwm uas tau qhia nyob hauv lub luag hauj lwm kaum ob yog thaum lawv txheeb tau ntau hom tib neeg, xwm txheej, thiab yam khoom uas tab kaum thiab cuam tshuam pawg ntseeg tes hauj lwm, lawv yuav tsum muaj peev xwm txiav txim kom ncav sij hawm thiab kom yog. Lawv yuav tsum paub cais kom meej txog lub ntsiab xeeb txawm ntawm ntau hom tib neeg thiab xwm txheej, thiab to taub tias tej ntawd yuav cuam tshuam rau lub neej hauv pawg ntseeg li cas, seb tej ntawd puas hem, cuam tshuam, los sis ua puas tsuaj rau cov neeg Vajtswv xaiv tseg tej yam ntxwv, txoj kev nkag mus rau hauv lub neej txoj sia, thiab qhov ua lawv tes dej num, thiab seb tej ntawd puas cuam tshuam rau cov txiaj ntsig ntawm qhov tib neeg ua lawv tes dej num—cov thawj coj thiab cov neeg ua hauj lwm yuav tsum txiav txim thiab ntsuas cov teeb meem no kom ncav sij hawm thiab kom yog. Qhov no yog cov thawj coj thiab cov neeg ua hauj lwm lub luag hauj lwm. Yog lawv tsis muaj lub hlwb rau qhov no thiab lawv tsis muaj lub peev xwm uas tsim nyog, lawv yuav ua tsis tau pawg ntseeg tes hauj lwm. Tsis tas li ntawd, cov thawj coj thiab cov neeg ua hauj lwm yuav tsum teb rov qab yam ntse thiab muaj kev paub cais rau ntau hom tib neeg, xwm txheej, thiab yam khoom. Piv txwv li, thaum muaj kev sib cav tshwm tuaj hauv pawg ntseeg thiab muaj ntau yam kev tab kaum thiab kev cuam tshuam tshwm tuaj, koj txheeb tsis tau qhov teeb meem thiab xav hais tias qhov ntawd tsis tseem ceeb, uas ua rau ntau tus tib neeg raug kev cuam tshuam thiab ua tsis tau lawv tej dej num kom zoo. Ib tug thawj coj los sis ib tug neeg ua hauj lwm zoo li no tsis yog loog thiab dig muag lod? (Yog.) Qhov no yog ib qho teeb meem ntawm cov thawj coj thiab cov neeg ua hauj lwm. Koj yuav tsum ua li cas thaum koj pom tias muaj neeg tab kaum thiab cuam tshuam pawg ntseeg tes hauj lwm? Ua ntej tshaj plaws, koj yuav tsum paub tseeb txog qhov hnyav ntawm qhov teeb meem thiab ntsuas thiab txiav txim lub ntsiab tseeb ntawm cov tib neeg zoo li no thiab qhov cuam tshuam thiab qhov tshwm sim los ntawm tej yam zoo li no uas muaj rau pawg ntseeg tes hauj lwm thiab lub neej hauv pawg ntseeg. Lub hauv paus rau qhov kev txiav txim zoo li no tsim nyog yog dab tsi? Qhov ntawd yuav tsum yog raws li Vajtswv cov lus thiab qhov tseeb. Ib txhia tib neeg hais tias, “Yuav ua raws li Vajtswv cov lus li cas? Kuv pom hais tias qhov no yog ib qho lus khoob xwb.” Qhov tseeb tiag, qhov ntawd tsis yog lus khoob. Vim li cas Kuv thiaj li hais li no? Thaum koj ntsib tej yam zoo li no los sis pom los sis hnov txog tej ntawd, koj tsuas yog yuav tsum muab tej ntawd los piv rau cov teeb meem uas Vajtswv cov lus nthuav tawm xwb. Saib seb Vajtswv cov lus nthuav tawm thiab txheeb xyuas cov tib neeg thiab tej teeb meem zoo li no li cas, thiab seb Nws txiav txim rau cov teeb meem no li cas, xws li seb Nws nthuav tawm cov thawj coj cuav thiab cov tawm tsam khetos li cas, los sis seb Nws nthuav tawm ntau hom tib neeg cov moj yam qias vuab tsuab li cas, thiab lwm yam ntxiv. Tom qab ntawd, koj muab tej yam no los piv thiab txheeb xyuas raws li cov lus ntawd, thiab los ntawm txoj kev sib qhia nrog cov kwv tij thiab cov nkauj muam thiab koj tus kheej tej kev soj ntsuam, thaum kawg koj tuaj yeem ntsuas thiab txiav txim kom yog txog cov tib neeg, xwm txheej, thiab yam khoom uas koj pom, thiab tsim cov kev daws uas sib xws. Cov uas raug txiav txim hais tias nyob hauv ntau hom tib neeg uas tab kaum thiab cuam tshuam ntawd yuav tsum daws li cas? Tsis tsuas yog muab lawv nthuav tawm thiab txheeb xyuas kom tib neeg paub cais lawv xwb, tiam sis kuj yuav tsum cheem thiab txwv lawv thiab, cov uas tseem tawv ncauj tsis kam hloov txawm yog tau qhia ntau zaus lawm ntawd yuav tsum muab ntsaig tawm mus. Cov hau kev thiab cov kev ua ntxaws ntxaws rau qhov cheem thiab txwv lawv yog dab tsi? (Ntuas thiab ceeb toom rau lawv.) Kev ntuas puas yog ib txoj kev zoo? (Yog.) Qhov nthuav tawm lawv tej kev ua, taw qhia lawv cov teeb meem uas phem tshaj plaws, txheeb xyuas lawv lub ntsiab tseeb, thiab muab kev ceeb toom—tej no tsis yog tej hau kev uas siv tau lod? Tseeb tiag, qhov tseem ceeb tshaj plaws yog qhov nyeem Vajtswv cov lus rau lawv thiab siv Vajtswv cov lus los ua lub hauv paus los ntuas thiab txheeb xyuas lawv. Yog lawv tsis lees txais qhov tseeb thiab tawv ncauj tsis kam lees lawv tej kev ua yuam kev, ces yuav tsum tau siv tej hau kev uas hnyav dua. Ua ntej tshaj plaws, muab kev ceeb toom rau lawv, tom qab ntawd siv pawg ntseeg cov kev cai tswj fwm los txwv lawv, tsis pub lawv lam tau lam ua kev phem thiab cuam tshuam cov kwv tij thiab cov nkauj muam. Lawv kuj yuav tsum raug ntuas thiab tom qab ntawd raug saib xyuas thiab. Tej hau kev no yog qhov tim tsum, tag nrho yog txhawm rau kom paub tseeb tias pawg ntseeg tes hauj lwm ua tau zoo thiab los cawm tib neeg, coj lawv mus rau txoj kev yog. Qhov siv tej hau kev no yeej yuav ua tau cov txiaj ntsig uas zoo xwb. Nyob rau ib kis mas, siv qhov tseeb uas tib neeg to taub ntawd los ntuas thiab nthuav lawv tawm, txheeb xyuas lawv tus moj yam thiab lub ntsiab tseeb, nthuav tawm lub ntsiab xeeb txawm ntawm lawv tej kev ua thiab tej qhov ua tau los hnyav uas tshwm sim los ntawm lawv—qhov no yog qhov tsawg tshaj plaws uas tib neeg tuaj yeem ua tau. Kauj ruam tom ntej yog qhov txheeb xyuas thiab paub cais lawv raws li Vajtswv cov lus, thiab txiav txim rau lawv raws li ntawd. Yog lawv mloog cov lus ntuas, lees txais, thiab lees txim hloov dua siab tshiab, qhov ntawd yeej yuav yog qhov zoo tshaj plaws. Txawm li cas los xij, yog lawv tsis lees txais qhov ntawd thiab pheej cuam tshuam pawg ntseeg tes hauj lwm mus ntxiv, thaum ntawd yuav tsum ua li cas? Nyob hauv qhov xwm txheej ntawd, tsis tas yuav ua siab mos siab muag lawm. Vajtswv lub tsev muaj cov kev cai tswj fwm, thiab txog rau theem no lawm, tus neeg ntawd yuav tsum raug cheem thiab txwv raws li Vajtswv lub tsev cov kev cai tswj fwm. Yog tus neeg ntawd yog ib tug ntseeg tshiab muaj theem ntawm sab ntsujplig me uas tsis to taub qhov tseeb, ces tuaj yeem pab lawv los ntawm lub siab hlub; koj tuaj yeem sib qhia qhov tseeb los pab kom lawv paub lawv tus kheej. Rau cov uas lees txais tau qhov tseeb thiab lees txim hloov dua siab tshiab, tsis tas yuav cheem, txwv, los sis ntuas lawv. Yog lawv tsis lees txais qhov tseeb, qhov ntawd tsis yog teeb meem ntawm qhov muaj lub hauv paus ntiav los sis theem ntawm sab ntsujplig me thiab tsis to taub qhov tseeb lawm; qhov ntawd yog ib qho teeb meem ntawm lawv txoj kev ua neeg. Rau cov tib neeg zoo li no, yuav tsum siv kev tswj hwm thiab kev rau txim ntawm kev cai tswj fwm los cheem thiab txwv lawv. Qhov txiaj ntsig thaum kawg uas ua tau tiav yog qhov tiv thaiv pawg ntseeg tes hauj lwm thiab qhov raws qib raws duas uas ib txwm muaj ntawm lub neej hauv pawg ntseeg, ua rau lub neej hauv pawg ntseeg mus tau raws qib raws duas. Qhov no hu ua qhov hloov txhua yam kom zoo dua, thiab qhov no yog qhov txiaj ntsig uas cov thawj coj thiab cov neeg ua hauj lwm yuav tsum ua kom tiav hauv lawv tes hauj lwm. Tsuas yog los ntawm qhov ua tau tiav qhov txiaj ntsig no xwb mas lawv thiaj li ua lawv lub luag hauj lwm tiav lawm. Yog cov thawj coj thiab cov neeg ua hauj lwm tsis quav ntsej tej teeb meem dab tsi uas tshwm sim tuaj, tsuas yog teb ua dog ua dig nrog qee cov lus thiab cov kev qhuab qhia, los sis cem thiab ntuas cov uas tab kaum thiab cuam tshuam pawg ntseeg tes hauj lwm yam yooj yim nrog ob peb lo lus xwb, qhov no puas daws tau qhov teeb meem? Qhov no tsis yog tsuas daws tsis tau qhov teeb meem xwb, tiam sis kuj ua rau pawg ntseeg haj yam muaj kev ntxhov quav niab loj dua tuaj thiab—tib neeg feem coob tsis muaj lub siab xav ua lawv tej dej num thiab raug cuam tshuam rau ntau theem, cuam tshuam rau qhov ua lawv tes dej num lawm. Cov thawj coj thiab cov neeg ua hauj lwm zoo li no puas tau ua lawv lub luag hauj lwm kom tiav? (Tsis tau.) Qhov no qhia hais tias cov thawj coj thiab cov neeg ua hauj lwm no tsis muaj peev xwm txaus hauv lawv tes hauj lwm.

III. Nthuav Tawm Cov Tib Neeg Phem Tej Kev Ua Phem, Kom Cov Neeg Vajtswv Xaiv Tseg Thiaj Li Paub Cais thiab Kawm Paub

Qhov kev cheem tsum thib peb nyob rau hauv cov thawj coj thiab cov neeg ua hauj lwm tej luag hauj lwm kaum ob yog thaum daws tej kev tab kaum thiab tej kev cuam tshuam uas los ntawm cov tib neeg phem, cov thawj coj thiab cov neeg ua hauj lwm yuav tsum noj thiab haus Vajtswv cov lus ua ke nrog cov neeg Vajtswv xaiv tseg los thim xav thiab paub lawv tus kheej, thiab muaj ib qho kev tig hloov tiag tiag. Lawv yuav tsum muaj peev xwm coj cov neeg Vajtswv xaiv tseg nkag mus rau hauv qhov tseeb qhov muaj tiag, muab lawv tej moj yam qias vuab tsuab tso tseg, thiab ua tau tiav qhov raws Vajtswv qab, zwm rau Vajtswv, thiab ua tim khawv rau Vajtswv. Tsuas yog txoj kev ua hauj lwm zoo li no xwb mas thiaj li mus raws li Vajtswv tej kev npaj siab. Nyob rau ib kis mas, cov thawj coj thiab cov neeg ua hauj lwm uas ua hauj lwm li no muaj peev xwm daws tau cov teeb meem thiab npaj qhov tseeb thaum ua hauj lwm. Tsis tas li ntawd xwb, los ntawm qhov sib qhia qhov tseeb los daws cov teeb meem ntawd, lawv pab cov kwv tij thiab cov nkauj muam kom to taub qhov tseeb, paub tig xav txog thiab paub lawv tus kheej, muab lawv tej moj yam qias vuab tsuab tso tseg, ua lawv tej dej num kom zoo, paub cais thiab coj rau tib neeg, ua tau tiav qhov raws Vajtswv qab thiab zwm rau Vajtswv, tsis raug lwm tus txwv, thiab muaj peev xwm tuav lawv tej lus tim khawv khov kho. Qhov no yog qhov ua cov thawj coj thiab cov neeg ua hauj lwm tej dej num kom tiav; qhov no yog lub hauv paus ntsiab lus uas cov thawj coj thiab cov neeg ua hauj lwm yuav tsum xyaum ua raws los daws cov teeb meem thaum ua pawg ntseeg tes hauj lwm. Txawm yuav muaj tej teeb meem dab tsi tshwm tuaj hauv pawg ntseeg los xij, ua ntej tshaj plaws, cov thawj coj thiab cov neeg ua hauj lwm yuav tsum nrhiav qhov tseeb, to taub Vajtswv tej kev npaj siab, thiab nrhiav Vajtswv txoj kev coj ua ke. Tom qab ntawd lawv yuav tsum nrhiav Vajtswv cov lus uas muaj feem xyuam los daws ntau yam teeb meem uas muaj nyob ntawd. Nyob rau hauv txheej txheem ntawm kev daws cov teeb meem, cov thawj coj thiab cov neeg ua hauj lwm yuav tsum sib qhia kom ntau ntxiv txog Vajtswv cov lus uas muaj feem xyuam nrog cov kwv tij thiab cov nkauj muam, thiab to taub lub ntsiab tseeb ntawm cov teeb meem raws li Vajtswv cov lus. Lawv kuj yuav tsum kom cov neeg Vajtswv xaiv tseg sib qhia lawv tus kheej txoj kev to taub los paub cais cov teeb meem no thiab. Thaum feem coob muaj peev xwm muaj txoj kev to taub tib yam thiab pom zoo ua ke lawm, ces cov teeb meem yuav yooj yim daws lawm. Nyob rau hauv qhov kev daws cov teeb meem, tsis txhob pheej hais tag hais dua txog cov xwm txheej los sis tsom rau tej ntsiab lus me me los sis yws cov tib neeg uas muaj feem xyuam hauv cov teeb meem ntawd. Thaum pib, tsis txhob tsom ntsoov rau cov teeb meem me me; tiam sis, yuav tsum sib qhia qhov tseeb kom meej, vim qhov no yuav nthuav tawm lub ntsiab xeeb txawm ntawm cov teeb meem. Tsuas yog txoj hau kev no xwb thiaj li pab tau cov neeg Vajtswv xaiv tseg kawm paub cais cov teeb meem raws li Vajtswv cov lus, tau txais kev paub cais los ntawm cov tib neeg, tej xwm txheej, thiab tej yam khoom uas tshwm tuaj ntawd, thiab kawm tau tej kev kawm uas muaj tiag los ntawm tej ntawd. Qhov no kuj cia rau lawv muab cov lus thiab cov kev qhuab qhia uas feem ntau lawv to taub ntawd los piv rau lub neej tiag tiag, ua rau lawv to taub qhov tseeb tiag tiag. Qhov no tsis yog qhov uas cov thawj coj thiab cov neeg ua hauj lwm tsim nyog ua lod? Qhov coj cov neeg Vajtswv xaiv tseg nkag mus rau hauv qhov tseeb qhov muaj tiag tseem ceeb yog siv qhov tseeb los daws cov neeg Vajtswv xaiv tseg tej kev xav phem thiab tej kev xav hauv nruab siab thiab lawv tej moj yam qias vuab tsuab. Txoj hau kev no ua tau tiav cov txiaj ntsig zoo tshaj plaws. Cov thawj coj thiab cov neeg ua hauj lwm yim muaj peev xwm siv qhov tseeb los daws cov teeb meem, cov neeg Vajtswv xaiv tseg yim to taub qhov tseeb yooj yim dua. Ua li no, lawv yuav paub tias yuav xyaum ua raws thiab siv Vajtswv cov lus hauv lub neej tiag tiag li cas lawm. Yog cov thawj coj thiab cov neeg ua hauj lwm pheej coj cov neeg Vajtswv xaiv tseg daws cov teeb meem tiag tiag, lawv yuav muaj peev xwm coj cov neeg Vajtswv xaiv tseg nkag mus rau hauv qhov tseeb qhov muaj tiag thiab kuj muab Vajtswv cov lus coj los siv rau hauv lawv tus kheej lub neej txhua hnub thiab. Ib txhia tib neeg hais tias, “Qhov kev cheem tsum no tsis yog siab dhau rau cov thawj coj thiab cov neeg ua hauj lwm lawm lod? Peb yuav ua li cas muaj kev to taub ntau npaum li ntawd?” Yav tas los mas koj yeej tsis muaj qhov ntawd, tiam sis koj puas tuaj yeem kawm thiab xyaum ua kom tau tiav qhov txiaj ntsig no? Qhov no yog txoj kev uas Vajtswv tes hauj lwm cob qhia cov thawj coj thiab cov neeg ua hauj lwm thiab cov neeg Vajtswv xaiv tseg kom nkag mus rau hauv qhov tseeb qhov muaj tiag. Yog koj tsis paub ua, koj tuaj yeem kawm thiab xyaum ua. Txawm yuav muaj tej teeb meem dab tsi tshwm sim tuaj los xij, koj yuav tsum kawm tig xav txog koj tus kheej thiab paub koj tus kheej raws li Vajtswv cov lus; qhov no yog txheej txheem ntawm kev xyaum ua. Tom qab xyaum ua ob peb zaug thiab ua tau tiav cov txiaj ntsig lawm, koj yuav muaj ib txoj hau kev thiab paub tias yuav xyaum ua raws qhov tseeb li cas lawm. Thaum Vajtswv los ua hauj lwm, qhov no yog txoj kev uas Nws coj tib neeg kawm nkag mus rau hauv qhov tseeb qhov muaj tiag. Cov thawj coj thiab cov neeg ua hauj lwm yuav tsum nrog cov kwv tij thiab cov nkauj muam sib txuas lus tas li, ntsib cov teeb meem ua ke, daws cov teeb meem ua ke, thiab ua pawg ntseeg tes hauj lwm kom zoo. Cov thawj coj pawg ntseeg yuav tsum coj cov neeg Vajtswv xaiv tseg li cas? Txoj kev tseem ceeb yog coj cov neeg Vajtswv xaiv tseg txheeb thiab daws cov teeb meem nyob hauv lub neej tiag tiag, xyaum ua raws thiab ntsib pom Vajtswv cov lus hauv lub neej tiag tiag, kom cov neeg Vajtswv xaiv tseg tsis yog tsuas muaj peev xwm xyaum ua raws li qhov tseeb xwb, tiam sis kuj muaj peev xwm paub cais tej yam tsis zoo thiab cov tib neeg tsis zoo—cov thawj coj cuav, cov neeg ua hauj lwm cuav, cov tib neeg phem, cov tsis ntseeg, thiab cov tawm tsam khetos. Lub hom phiaj ntawm kev paub cais ntau hom tib neeg yog txhawm rau qhov los daws cov teeb meem. Tsuas yog los ntawm qhov daws kom tag nrho cov kev cuam tshuam uas los ntawm cov tib neeg phem thiab cov tawm tsam khetos xwb mas pawg ntseeg tes hauj lwm thiaj li yuav mus tau zoo, thiab Vajtswv lub siab nyiam thiaj li yuav raug ua tiav nyob rau hauv pawg ntseeg. Nyob rau tib lub sij hawm ntawd, qhov daws cov tib neeg phem kuj ua ib qho kev ceeb toom rau tus kheej kom zam tej kev ua yuam kev los sis ua phem, ua rau tus kheej ua tau qhov hwm thiab ntshai Vajtswv thiab zam kev phem. Ua li no, tsis yog tsuas ua tau koj tes dej num kom tiav thiab muaj kev nkag mus rau hauv lub neej txoj sia xwb, tiam sis koj kuj to taub tau qhov tseeb thiab nkag mus rau hauv qhov tseeb qhov muaj tiag thiab. Qhov no tsis yog tua ib phom tau ob tug noog lod? Thaum koj to taub qhov tseeb thiab tuaj yeem daws cov teeb meem, qhov no ua pov thawj hais tias koj muaj lub peev xwm los ua ib tug thawj coj los sis ib tug neeg ua hauj lwm thiab ua tau raws li cov kev cheem tsum rau kev raug cob qhia hauv Vajtswv lub tsev; yog li ntawd, koj yuav tsum ua tus coj thiab coj qhia cov kwv tij thiab cov nkauj muam hauv kev kawm paub cais ntau hom tib neeg, xwm txheej, thiab yam khoom hauv lub neej tiag tiag; ua tau tiav qhov kev to taub qhov tseeb; paub tias yuav coj li cas rau txhua hom tib neeg uas tab kaum thiab cuam tshuam pawg ntseeg tes hauj lwm; paub tias yuav xyaum ua raws qhov tseeb li cas, coj rau ntau hom tib neeg raws li tej hauv paus ntsiab lus, thiab sib qhia qhov tseeb los daws cov teeb meem. Qhov no yog koj lub luag hauj lwm. Qhov xyaum ua raws li no, koj thiaj li nkag mus rau hauv qhov muaj tiag ntawm Vajtswv cov lus lawm. Koj yuav kawm tau tej kev kawm, tau txais kev paub cais, thiab to taub Vajtswv tej kev npaj siab hauv txhua yam uas los raug rau koj hauv lub neej tiag tiag, muaj tej hauv paus ntsiab lus rau txoj kev ua raws hauv qhov koj lis hauj lwm, coj rau tib neeg, thiab ua koj tej dej num lawm. Ua li no, koj yuav muaj peev xwm xyaum ua raws qhov tseeb lawm. Vajtswv txoj kev cheem tsum rau tib neeg yog kom ua tau tiav cov txiaj ntsig zoo li no. Yog li ntawd, txawm yuav muaj teeb meem dab tsi tshwm tuaj los xij, koj yuav tsum kawm tau kev kawm thiab paub cais tas li; koj tsis tuaj yeem tso tej ntawd dhau mus dawb dawb, thiab koj tsis tuaj yeem plam ib lub cib fim twg los kawm tau kev kawm thiab paub cais. Vim hais tias tej yam twb tshwm sim lawm, peb yuav tsum tsis txhob daws qhov ntawd nrog ib tug cwj pwm uas xav tsis zoo thiab yws; tiam sis, peb yuav tsum muaj ib tug cwj pwm uas xav zoo mus tim ntsej muag nrog qhov ntawd. Ua li ntawd li cas? Los ntawm qhov nrhiav qhov tseeb los daws qhov teeb meem. Txhua tus tib neeg puav leej muaj tej moj yam qias vuab tsuab, thiab lawv txoj kev ua neeg muaj qhov sib txawv ntawm qhov zoo thiab qhov phem, yog li yuav ua li cas es thiaj li tsis muaj teeb meem tshwm sim tuaj thaum tib neeg sib sau ua ke? Vim Vajtswv tau tsim tsa qhov xwm txheej no rau koj, thiab Nws tau cia koj pom ntau hom tib neeg, xwm txheej, thiab yam khoom uas tshwm tuaj nyob ib puag ncig koj, yog li koj tus cwj pwm tsim nyog yog dab tsi? Ua Vajtswv tsaug uas muab ntau yam teeb meem no los tso rau ntawm koj lub xub ntiag. Nws tab tom muab ib lub cib fim rau koj los xyaum thiab kawm tau tej kev kawm, thiab nkag mus rau hauv qhov tseeb qhov muaj tiag. Ua ib tug thawj coj los sis ib tug neeg ua hauj lwm, koj kuj yuav tsum ua Vajtswv tsaug uas muab lub cib fim zoo li no rau koj thiab. Txawm yuav ntsib teeb meem dab tsi los xij, koj yuav tsum coj cov kwv tij thiab cov nkauj muam kawm paub cais, kawm tej kev qhia, thiab kawm tau tej kev kawm ua ke nrog koj. Tsis tas li ntawd xwb, koj yuav tsum coj lawv ua ke nrog koj los tig xav txog thiab to taub tias tib neeg muaj tej kev xav phem thiab tej kev xav hauv nruab siab dab tsi txog qhov teeb meem no, muaj tej kev xam pom uas nkhaus dab tsi, kawm tau tej kev kawm dab tsi los ntawm qhov ntsib qhov teeb meem no, daws tau tej kev xav phem thiab tej kev xam pom uas yuam kev dab tsi, thiab thaum kawg to taub tej qhov tseeb dab tsi lawm. Qhov no yog txoj kev uas ib tug yuav tsum ntsib pom Vajtswv tes hauj lwm, tsis txhob cia ib qho teeb meem dhau mus li. Yog koj tau ntsib tau pom Vajtswv tes hauj lwm tau ob peb xyoos thiab daws tau ntau yam teeb meem lawm, koj yuav pom tias Vajtswv cov lus puav leej yog qhov tseeb thiab yeej tuaj yeem ntxuav tib neeg kom dawb huv thiab cawm lawv dim ntawm Ntxwgnyoog lub zog. Thaum tib neeg to taub thiab tau txais qhov tseeb lawm, lawv yuav pom tias Vajtswv cov lus raug ua tiav thiab muaj tseeb tag nrho lawm. Thaum cov neeg Vajtswv xaiv tseg muaj peev xwm xyaum ua raws thiab ntsib pom Vajtswv cov lus, lawv thiaj li yuav muaj peev xwm muab Vajtswv cov lus coj los siv nyob rau hauv lawv lub neej tiag tiag, siv Vajtswv txoj lus kom yog los saib tib neeg thiab tej xwm txheej, thiab ntsuas tib neeg thiab txhua yam uas tib neeg ua los ntawm Vajtswv txoj lus, es tsis yog vam khom rau yam uas lawv pom los sis lawv tej kev xav hauv siab, thiab yeej tsis yog vam khom rau tej kev xav phem thiab tej kev xav hauv nruab siab li. Thaum lawv tau kawm tau tej kev kawm lawm, qhov ntawd yuav yooj yim dua rau lawv los ua neej raws li Vajtswv cov lus, thiab lawv tuaj yeem ua neej nyob rau ntawm Vajtswv lub xub ntiag tas li. Ua li no, cov thawj coj thiab cov neeg ua hauj lwm thiaj li ua tau raws li tus qauv tag nrho hauv lawv tes hauj lwm, thiab lawv tej luag hauj lwm thiaj li raug ua tiav lawm. Tsuas yog thaum cov thawj coj thiab cov neeg ua hauj lwm ua lawv tes hauj lwm kom tag nrho lawm xwb cov neeg Vajtswv xaiv tseg thiaj li tau txais tej txiaj ntsim no. Yog hais tias, nyob rau hauv ntau qhov xwm txheej uas koj ntsib, koj tsis paub tias yuav coj cov kwv tij thiab cov nkauj muam kawm tau tej kev kawm li cas thiab koj tsis paub cais ntau hom tib neeg, xwm txheej, thiab yam khoom, ces koj yog ib tug neeg uas dig muag, ib tug neeg ruam feeb tsis meej uas loog thiab ruam ruam. Thaum ntsib cov xwm txheej zoo li no, tsis yog koj tsuas xav tias ntau dhau ua tsis tau, tsis paub xyov yuav daws tej ntawd li cas, thiab tsis muaj peev xwm ua tes hauj lwm no xwb, tiam sis qhov ntawd kuj yuav cuam tshuam rau cov kwv tij thiab cov nkauj muam txoj kev ntsib kev pom txog cov tib neeg, tej xwm txheej, thiab tej yam khoom thiab. Yog koj daws tej yam tsis tsim nyog, tsis ua ib qho hauj lwm twg li, qhov tseeb uas tsim nyog qhia, koj tsis tau qhia ib los li, thiab hais tsis tau ib yam dab tsi uas muaj txiaj ntsim los sis txhawb lwm tus li, ces thaum ntau tus tib neeg tim ntsej muag nrog cov tib neeg, tej xwm txheej, thiab tej yam khoom uas ua rau muaj tej kev tab kaum thiab tej kev cuam tshuam no, tsis yog lawv tsis lees txais tej yam no los ntawm Vajtswv los, coj rau tej ntawd yam xav zoo thiab nquag plias, thiab kawm tau tej kev kawm los ntawm tej ntawd xwb, tiam sis lawv tej kev xav phem thiab kev ceev faj rau Vajtswv yuav hnyav zuj zus tuaj, lawv txoj kev tsis ntseeg thiab kev kwv yees txog Nws los hnyav zuj zus tuaj. Qhov no tsis yog qhov tshwm sim los ntawm cov thawj coj thiab cov neeg ua hauj lwm uas tsis muaj qhov tseeb qhov muaj tiag thiab tsis muaj peev xwm siv qhov tseeb los daws cov teeb meem lod? Qhov no tsis yog ib lub cim uas qhia tias cov thawj coj thiab cov neeg ua hauj lwm ua tsis tau tes hauj lwm tiag tiag lod? Koj tsis tau ua pawg ntseeg tes hauj lwm kom zoo, tsis tau ua kom tiav cov lus txib uas Vajtswv muab rau koj, tsis tau ua cov thawj coj thiab cov neeg ua hauj lwm tej luag hauj lwm kom tiav, thiab tsis tau coj cov kwv tij thiab cov nkauj muam tawm hauv Ntxwgnyoog txoj kev tswj hwm los. Lawv tseem ua neej nyob hauv cov moj yam qias vuab tsuab thiab Ntxwgnyoog tej kev dag ntxias. Koj tsis tab kaum cov neeg Vajtswv xaiv tseg txoj kev nkag mus rau hauv lub neej txoj sia lod? Koj tab tom ua phem hnyav rau tib neeg! Ua ib tug thawj coj los sis ib tug neeg ua hauj lwm, koj yuav tsum lees txais Vajtswv cov lus txib, thiab coj cov kwv tij thiab cov nkauj muam los rau ntawm Vajtswv xub ntiag, cia cov neeg Vajtswv xaiv tseg noj thiab haus Vajtswv cov lus kom ua tau qhov to taub qhov tseeb thiab ua lawv tej dej num yam muaj tej hauv paus ntsiab lus, vim li ntawd thiaj li ua rau lawv txoj kev ntseeg Vajtswv nce ntxiv. Koj tsis yog tsis tau xyaum ua raws li no xwb, tiam sis koj kuj tsis tau txwv los sis daws cov kev cuam tshuam uas los ntawm cov tib neeg phem, es ua rau cov neeg Vajtswv xaiv tseg txoj kev nkag mus rau hauv lub neej txoj sia raug kev puas tsuaj. Tom qab ntseeg Vajtswv tau ntau xyoo lawm, tsis yog lawv tsis tau nce qib thiab tsis to taub qhov tseeb los sis tau txais kev paub txog Vajtswv xwb, tiam sis lawv haj tseem tsim tuaj ntau yam kev xav phem thiab kev to taub yuam kev txog Vajtswv, tsis muaj txoj kev zwm rau tiag tiag hlo li. Txhua yam uas koj tau ua ntawd tsis yog qhov tab kaum thiab cuam tshuam Vajtswv tes hauj lwm tiag tiag lod? Tsis yog koj tsis coj cov neeg Vajtswv xaiv tseg nkag mus rau hauv qhov tseeb qhov muaj tiag los sis tiv thaiv lawv xwb, tiam sis koj ho cia cov tib neeg phem cuam tshuam lawv thiab cia cov tawm tsam khetos coj lawv mus yuam kev thiab tswj lawv. Koj tsis tau ua tej yam uas ua phem rau koj cov neeg thiab ua rau koj cov yeeb ncuab zoo siab lod? Koj tsis tab tom pab thiab txhawb kev phem lod? Koj ua hauj lwm tau ntev npaum li no lawm; txawm li cas los xij, tsis yog koj ua tsis tau tiav cov txiaj ntsig zoo xwb, tiam sis koj haj tseem ua rau qhov kev sib nrug ntawm cov kwv tij thiab cov nkauj muam thiab Vajtswv loj zuj zus tuaj, thiab ua rau cov neeg Vajtswv xaiv tseg ntseeg Vajtswv tau ntau xyoo yam tsis to taub qhov tseeb los sis tsis paub tias yuav cais tej kev tab kaum thiab kev cuam tshuam ntawm cov tib neeg phem li cas, uas cuam tshuam hnyav heev rau lawv txoj kev nkag mus rau hauv lub neej txoj sia. Qhov no yog teeb meem dab tsi? Qhov no tsis yog ua kev phem ntau heev lod? Txawm cov thawj coj thiab cov neeg ua hauj lwm yuav ua hauj lwm dab tsi los xij, yog lawv tsis tuaj yeem ua raws li Vajtswv tej kev cheem tsum thiab saib xyuas tej yam thiab daws tej teeb meem raws li qhov tseeb tej hauv paus ntsiab lus, lawv qhov kev cuam tshuam yuav tsis yog rau lawv tus kheej los sis ob peb tug tib neeg xwb; qhov ntawd yuav cuam tshuam rau pawg ntseeg tes hauj lwm, txoj kev nkag mus rau hauv lub neej txoj sia ntawm tag nrho cov neeg Vajtswv xaiv tseg hauv pawg ntseeg, cov txiaj ntsig ntawm cov neeg Vajtswv xaiv tseg qhov ua lawv tej dej num, cov txiaj ntsig ntawm kev tshaj tawm lub nceeg vaj txoj moo zoo, thiab haj tseem cuam tshuam rau qhov hais tias cov neeg Vajtswv xaiv tseg puas tuaj yeem raug cawm dim thiab raug coj mus rau hauv Vajtswv lub nceeg vaj—tej no puav leej yog tej yam uas tej zaum yuav tuaj yeem cuam tshuam tau. Ib txhia tib neeg ntseeg Vajtswv tiam sis raws cov thawj coj cuav thiab cov tawm tsam khetos qab, uas ua rau lawv raug kev puas tsuaj lawm. Qhov ntawd zoo li cov tib neeg ntawm sab kab lis kev cai ntseeg uas raug cov xib fwb thiab cov txwj laug coj mus yuam kev thiab tswj, uas qhov tshwm sim los yog lawv txais tos tsis tau Vajtswv thaum Nws rov qab los thiab ho poob mus rau hauv kev puas tsuaj. Tag nrho cov no yog qhov muaj tseeb uas ua pov thawj tau. Yog li ntawd, qhov muaj peev xwm paub cais cov thawj coj cuav thiab cov tawm tsam khetos mas muaj txiaj ntsim rau cov neeg Vajtswv xaiv tseg txoj kev nkag mus rau hauv lub neej txoj sia heev!

Cov thawj coj thiab cov neeg ua hauj lwm lub luag hauj lwm kaum ob cheem tsum kom lawv ua peb yam hauj lwm uas tseem ceeb tshaj plaws: Ua ntej tshaj plaws, lawv yuav tsum txheeb ntau hom tib neeg, xwm txheej, thiab yam khoom uas ua rau muaj tej kev tab kaum thiab tej kev cuam tshuam hauv pawg ntseeg tes hauj lwm. Qhov ob, tom qab paub cais thiab txiav txim rau tej ntawd lawm, lawv yuav tsum cheem thiab txwv cov tib neeg phem kom ncav sij hawm; qhov no yog kauj ruam ob. Qhov peb, thaum cheem thiab txwv cov tib neeg phem thiab hloov txhua yam kom zoo dua ntawd, lawv yuav tsum sib qhia Vajtswv cov lus nrog cov kwv tij thiab cov nkauj muam los nthuav tawm cov tib neeg phem tej kev ua phem tas li, thiab ua tib zoo saib xyuas cov kwv tij thiab cov nkauj muam tej kev teb rov qab thiab kev to taub txog qhov teeb meem no, kho tej kev xam pom uas tsis yog uas lawv muaj kom ncav sij hawm. Muaj tseeb tiag, yog qee cov kwv tij thiab cov nkauj muam uas caum qhov tseeb muaj tej kev to taub tob, yuav tsum txhawb kom lawv sib qhia ntau ntxiv. Tsis tas li ntawd xwb, cov thawj coj thiab cov neeg ua hauj lwm kuj yuav tsum pab cov uas qaug zog los sis muaj lub siab ntseeg me, thiab txhawb kom lawv hais lus ntau ntxiv. Lub hom phiaj yog los pab cov kwv tij thiab cov nkauj muam kom muaj kev paub cais thiab kawm tau tej kev kawm los ntawm cov xwm txheej uas tshwm tuaj, kawm paub cais tib neeg thiab tej xwm txheej. Lub hom phiaj ntawm kev paub cais tib neeg thiab tej tej xwm txheej yog los pab lawv kom to taub ntau hom tib neeg kom yog thiab, coj rau ntau hom tib neeg los ntawm txoj hau kev uas yog raws li qhov tseeb tej hauv paus ntsiab lus, tib lub sij hawm ntawd lawv tus kheej kuj kawm tau tej kev kawm thiab. Lawv yuav tsum kawm tau tej kev kawm dab tsi? Lawv yuav tsum saib seb Vajtswv tus cwj pwm uas muaj rau cov tib neeg no yog dab tsi thaum Nws txheeb xyuas thiab nthuav tawm lawv tej yam ntxwv—qhov paub Vajtswv tus cwj pwm uas muaj rau cov tib neeg no puas yog yuav ua rau qhov ntawd meej dua tias yus tus kheej yuav tsum ua hom neeg zoo li cas thiab yuav tsum taug txoj kev zoo li cas lawm? (Yog.) Muab hais luv luv tias, qhov txiaj ntsig thaum kawg uas yuav tsum ua kom tiav yog kom cov neeg Vajtswv xaiv tseg to taub qhov tseeb thiab nkag mus rau hauv qhov muaj tiag hauv qhov xwm txheej ntawm lub neej tiag tiag, kom muaj peev xwm ua lawv tej dej num li ib txwm, thiab zwm rau Vajtswv tej kev tswj hwm thiab kev npaj. Ua li no, cov thawj coj thiab cov neeg ua hauj lwm qhov ua pawg ntseeg tes hauj lwm yuav mus raws li Vajtswv tej kev npaj siab lawm. Saib los ntawm peb kauj ruam ntawm kev ua tes hauj lwm no, puas nyuaj rau cov thawj coj thiab cov neeg ua hauj lwm los ua txoj hauj lwm no kom zoo? (Tsis nyuaj.) Yog vam khom rau tib neeg lub siab zoo thiab lub peev xwm, qhov yuav ua txoj hauj lwm no kom zoo mas nyuaj me ntsis, vim koj yuav tsis ua tau tiav qhov txiaj ntsig uas Vajtswv cheem tsum thiab yuav ua tsis tiav cov thawj coj thiab cov neeg ua hauj lwm tej luag hauj lwm tiag tiag. Yog vam khom rau tib neeg tej moj yam qias vuab tsuab, koj puas yuav ua tau txoj hauj lwm no kom zoo? (Tsis tau.) Hais kom meej mas, qhov vam khom rau tej moj yam qias vuab tsuab los ua txoj hauj lwm no txhais hais tias ua raws li koj tus kheej tej tswv yim. Qhov no yuav ua rau muaj dab tsi tshwm sim? (Qhov ntawd yuav ua rau muaj kev ntxhov quav niab hauv pawg ntseeg.) Qhov no yog ib qho kev tshwm sim los: Koj yim ua hauj lwm, txhua yam yim ntxhov quav niab zuj zus. Kev ntxhov quav niab yog dab tsi? Tej xwm txheej meej meej ntawm kev ntxhov quav niab yog dab tsi? Qhov ntawd yog thaum sib txoos ua ke, tib neeg tsis tuaj yeem noj thiab haus Vajtswv cov lus los sis sib qhia qhov tseeb li ib txwm muaj. Pheej muaj cov tib neeg phem thiab cov tsis ntseeg ua rau muaj kev cuam tshuam, los sis pheej muaj kev sib cav, uas txhua tus tuav rawv lawv tus kheej tej kev xam pom thiab tsim pab tsim pawg; cov kwv tij thiab cov nkauj muam tsis muaj kev paub cais thiab tsis paub xyov yuav ua li cas, cov uas muaj kev to taub ntawm sab ntsujplig thiab cov uas nyiam qhov tseeb los kuj raug cuam tshuam thiab, thiab lawv lub neej txoj sia tsis loj hlob. Nyob rau hauv ib lub pawg ntseeg zoo li no, cov tib neeg phem thiab cov tsis ntseeg tswj tag nrho lub hwj chim, thiab Vajntsujplig Dawb Huv tsis ua hauj lwm lawm. Nyob rau hauv ib lub pawg ntseeg zoo li no, txawm yuav muaj dab tsi tshwm sim tuaj los xij, tib neeg txhua tus tsuas paub sib txeeb hais lus, nthuav tawm txhua yam kev xam pom, uas yuav luag tsis muaj ib qho kev xam pom uas yog li. Pawg ntseeg raug cais ua ntau pab ntau pawg yam sai heev, nyob hauv cov tib neeg tsis muaj kev koom siab li, thiab tsis muaj Vajntsujplig tes hauj lwm los sis txoj kev coj lawm. Tib neeg ib leeg ceev faj ib leeg thiab ib leeg ua xyem xyav thiab xav phem rau ib leeg; ob los sis peb pab pawg sib tw kom tau hwj chim thiab txiaj ntsim; txhua tus nrhiav lawv tus kheej cov neeg txhawb nqa, thiab tawm tsam thiab cais cov neeg uas tsis pom zoo tawm; thiab tuaj yeem ua tau txhua yam kev phem. Qhov no yog qhov xwm txheej ntawm kev ntxhov quav niab. Qhov xwm txheej no tshwm sim los li cas? Qhov no tsis yog vim cov thawj coj thiab cov neeg ua hauj lwm ua tsis tau lawv tes hauj lwm lod? (Yog.) Cov thawj coj thiab cov neeg ua hauj lwm uas ua hauj lwm raws li lawv tus kheej tej tswv yim coj cov kev tshwm sim no los. Qhov ua hauj lwm raws li tus kheej tej tswv yim ntawd txhais li cas? Qhov ntawd txhais hais tias tsis to taub qhov tseeb, tsis muaj tej hauv paus ntsiab lus, thiab lam tau lam ua yam dig muag ntsuav raws li tej moj yam qias vuab tsuab thiab tib neeg tej kev xav phem thiab tej kev xav hauv nruab siab, uas ua rau muaj ib qho xwm txheej uas ntxhov quav niab dua nyob rau hauv pawg ntseeg. Tej zaum ib txhia tib neeg yuav hais tias, “Ua li cas thiaj li muaj cov tib neeg phem ua rau muaj kev cuam tshuam nyob hauv pawg ntseeg? Kuv tsis paub tias leej twg yog thiab leej twg yuam kev, los sis yuav sawv rau sab twg.” Tej zaum lwm cov yuav hais tias, “Pawg ntseeg raug faib ua ntau pab ntau pawg. Peb yuav ua lub neej hauv pawg ntseeg li cas? Txhua zaus sib txoos ua ke tsis muaj txiaj ntsig thiab nkim sij hawm xwb. Qhov ntseeg zoo li no mus ntxiv yuav tsis muaj txiaj ntsig dab tsi li.” Thaum ib lub pawg ntseeg ntxhov quav niab txog theem uas cov neeg Vajtswv xaiv tseg tsis tuaj yeem ua lub neej hauv pawg ntseeg, ces Vajtswv yeej ntxub thiab tso tseg lub pawg ntseeg ntawd tag nrho lawm. Qhov no qhia meej hais tias tsuav cov tib neeg phem thiab cov tsis ntseeg tuav hwj chim xwb, lawv yuav ua rau pawg ntseeg puas tsuaj. Pawg ntseeg ua tsis tau hauj lwm yog tsis muaj cov tib neeg zoo thiab cov uas xyaum ua raws qhov tseeb ua cov thawj coj thiab cov neeg ua hauj lwm—yog tsis muaj lawv, mas tswj tsis tau qhov xwm txheej! Yog cov tib neeg phem thiab cov tsis ntseeg tsis raug txwv, yuav tsis muaj lub neej hauv pawg ntseeg, thiab qhov raws qib raws duas uas ib txwm muaj ntawm pawg ntseeg yuav raug ua kom puas tag nrho, dhau los ua ib qho ntxhov quav niab. Qhov no yog qhov tshwm sim los ntawm qhov cov thawj coj thiab cov neeg ua hauj lwm tsis ua lawv tej hauj lwm kom zoo. Yog cov thawj coj thiab cov neeg ua hauj lwm lees txais tsis tau qhov tseeb, tsis ua tib zoo xav txog Vajtswv tej kev npaj siab, los sis tsis vam khom rau Vajtswv, ces lawv yuav ua tsis tau pawg ntseeg tes hauj lwm kom zoo li. Lawv yuav daws tsis tau tej teeb meem twg uas tshwm sim hauv pawg ntseeg los sis daws tsis tau tej kev nyuaj twg uas cov neeg Vajtswv xaiv tseg ntsib. Yog cov thawj coj thiab cov neeg ua hauj lwm zoo li no tuav hwj chim, lawv puas yuav tsim tau cov txiaj ntsig uas zoo? Lawv tsuas coj tau kev ntxhov quav niab los rau pawg ntseeg xwb—thaum kawg, qhov no yog hom xwm txheej uas tshwm tuaj. Lub pawg ntseeg no dhau los ua ib qho chaw puas tsuaj, ib qho chaw uas Ntxwgnyoog tuav hwj chim; lub pawg ntseeg no dhau los ua lwm yam lawm. Vajtswv yuav tsis lees paub lub pawg ntseeg no, thiab Vajntsujplig yuav tsis ua hauj lwm nyob hauv lub pawg ntseeg no. Ib lub pawg ntseeg zoo li no tsuas yog muaj npe lawm xwb thiab yuav tsum raug kaw.

Txheeb Xyuas Tej Kev Qhia Tshwm ntawm Cov Thawj Coj Cuav txog Lub Luag Hauj Lwm Kaum Ob

I. Cov Thawj Coj Cuav Lub Peev Xwm Tsis Zoo thiab Txheeb Tsis Tau Tej Teeb Meem ntawm Kev Tab Kaum thiab Kev Cuam Tshuam

Cov no yog cov hauj lwm uas cov thawj coj thiab cov neeg ua hauj lwm yuav tsum tau ua raws li tau teev tseg nyob rau hauv lub luag hauj lwm kaum ob; tam sim no peb yuav tsis sib qhia txog tej piv txwv ntxaws ntxaws ntxiv lawm. Lub ntsiab lus ntawm txoj kev sib qhia hnub no mas tseem ceeb yog los nthuav tawm cov kev qhia tshwm ntxaws ntxaws ntawm cov thawj coj cuav thaum lawv ua tej hauj lwm no, thiab los txheeb seb cov cwj pwm twg uas qhia txog lub ntsiab tseeb ntawm cov thawj coj cuav thiab tuaj yeem raug siv los cais ib tug neeg tias yog ib tug thawj coj cuav. Qhov no yog lub ntsiab lus tseem ceeb ntawm txoj kev sib qhia hnub no. Ua ntej tshaj plaws, qhov kev cheem tsum rau cov thawj coj thiab cov neeg ua hauj lwm nyob hauv tes hauj lwm no yog kom txheeb ntau hom tib neeg, xwm txheej, thiab yam khoom uas ua rau muaj kev tab kaum thiab kev cuam tshuam rau Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm. Kev txheeb kom ncav sij hawm yog ib tug qauv uas cheem tsum rau cov thawj coj thiab cov neeg ua hauj lwm. Thaum twg muaj ib yam dab tsi tshwm tuaj, thaum muaj ib qho cim me me uas qhia tias muaj ib yam dab tsi tsis yog, xws li cov cim uas qhia tias cov tib neeg phem pib ua hauj lwm, los sis muaj neeg qhia cov cim uas ua rau muaj teeb meem ntawd tawm, cov thawj coj thiab cov neeg ua hauj lwm yuav tsum hnov qhov ntawd thiab ceev faj. Yog lawv loog thiab ruam ruam, qhov ntawd yuav muaj teeb meem lawm. Tshwj xeeb tshaj yog nyob rau hauv cov xwm txheej uas muaj cov tib neeg phem ua rau muaj tej kev cuam tshuam, thaum qhov teeb meem no pib tshwm tuaj thiab qhov ntawd tsis meej tias cov tib neeg no xav ua dab tsi tiag tiag los sis qhov xwm txheej yuav mus li cas—qhov ntawd yog, thaum cov thawj coj thiab cov neeg ua hauj lwm tseem pom tsis tshab qhov teeb meem no—lawv yuav tsum tsis txhob lam tau lam ua yam dig muag ntsuav los sis ua rau cov tib neeg no ceeb ntxov dhau kom zam dhau qhov txiav txim yuam kev. Txawm li cas los xij, qhov no tsis tau txhais hais tias tsis pom thiab tsis paub txog qhov xwm txheej no. Tiam sis, qhov ntawd txhais hais tias tos thiab saib seb tej yam mus zoo li cas thiab cov tib neeg no tej kev npaj siab, tej hom phiaj, thiab tej kev txhawb siab yog dab tsi. Qhov no yog tes hauj lwm uas cov thawj coj thiab cov neeg ua hauj lwm yuav tsum tau ua. Thaum qhov xwm txheej mus txog ib theem twg, thiab cov tib neeg no pib tso tej kev xav tsis zoo tawm thiab nthuav tawm tej kev xam pom uas yuam kev, ua rau muaj kev cuam tshuam rau cov neeg Vajtswv xaiv tseg, cov thawj coj thiab cov neeg ua hauj lwm yuav tsum nqis tes ua hauj lwm tam sid. Lawv yuav tsum sawv yam tsis ua ywj fab ywj fwj los nthuav tawm, txheeb xyuas, thiab txwv cov tib neeg no tej kev ua phem, pab lwm tus kawm tau tej kev kawm thiab paub cais thiab pom tshab cov tib neeg phem. Qhov no yog qhov txheej txheem ntawm kev txheeb ntau hom tib neeg, xwm txheej, thiab yam khoom uas ua rau muaj tej kev tab kaum thiab tej kev cuam tshuam kom ncav sij hawm thiab kom yog—qhov no yog qhov uas txhais tau hais tias cov thawj coj thiab cov neeg ua hauj lwm tab tom ua tes hauj lwm no. Lub hom phiaj tseem ceeb ntawm tes hauj lwm no yog los txheeb ntau hom tib neeg, xwm txheej, thiab yam khoom uas tab kaum thiab cuam tshuam pawg ntseeg tes hauj lwm, thiab tom qab ntawd daws tej ntawd kom ncav sij hawm. Qhov no yog qhov uas cov thawj coj thiab cov neeg ua hauj lwm tuaj yeem ua tau tiav. Yog li, cov thawj coj cuav tej kev qhia tshwm hauv tes hauj lwm no yog dab tsi? Peb yuav txheeb xyuas thiab paub cais cov thawj coj cuav li cas? Pom tau meej hais tias, cov thawj coj cuav txheeb tsis tau cov kev cuam tshuam uas los ntawm cov tib neeg phem uas muaj rau pawg ntseeg tes hauj lwm kom ncav sij hawm thiab kom yog. Qhov no yog qhov teeb meem uas pom tau meej tshaj plaws nyob hauv cov thawj coj cuav qhov ua pawg ntseeg tes hauj lwm—lawv tsis muaj kev paub cais txog cov kev cuam tshuam uas los ntawm cov tib neeg phem uas muaj rau pawg ntseeg tes hauj lwm me me li. Vim li cas thiaj li hais tias cov thawj coj cuav txheeb tsis tau cov teeb meem los sis pom tsis tshab lub ntsiab tseeb ntawm cov teeb meem? Ib txhia tib neeg tej kev ua pom tau meej hais tias yog tej kev tab kaum thiab kev cuam tshuam rau pawg ntseeg tes hauj lwm, tiam sis cov thawj coj cuav tsis paub cais los sis saib tsis tawm cov teeb meem ntawd; lawv dig muag. Ib txhia tib neeg tso tej kev xav tsis zoo tawm, coj lwm cov mus yuam kev, thiab cuam tshuam lwm cov hauv pawg ntseeg. Lwm cov tsim pab tsim pawg, ua tej yam uas tsis ncaj ncees yam zais ntshis, pheej txiav txim rau qee tus tib neeg tom qab lawv nraub qaum. Hos lwm cov lam tau lam sib thab sis zes thiab ib leeg ua qhov muag qab zib rau ib leeg. Cov thawj coj cuav ua txuj tsis pom tej no; lawv yeej tsis paub txog qhov hnyav ntawm cov teeb meem no kiag li thiab kuj tsis paub txog tias yog cov teeb meem no tsis raug daws yuav cuam tshuam rau pes tsawg tus tib neeg txoj kev caum qhov tseeb thiab kev ua lawv tej dej num, nrog rau qhov tias tej ntawd yuav coj tej qhov tshwm sim los li cas, yog li ntawd lawv thiaj li tsis quav ntsej tej ntawd. Thaum ib txhia tib neeg pom cov teeb meem thiab qhia tawm rau ib tug thawj coj cuav, tej zaum tus thawj coj cuav ntawd yuav hais tias, “Lawv txhua tus puav leej yog cov kwv tij thiab cov nkauj muam—leej twg thiaj li tsis nthuav txoj kev qias vuab tsuab tawm? Leej twg thiaj li tsis muaj tej kev xav hauv siab thiab tej kev ntshaw? Tsis txhob txiav txim los sis teem txim rau lwm tus yam yooj yim!” Txawm yuav tshwm sim yam dab tsi uas tsis muaj qab hau, lim hiam, los sis tsis mus raws li qhov tseeb npaum li cas nyob hauv pawg ntseeg los xij, cov thawj coj cuav yeej tsis pom qhov ntawd li. Ib txhia tib neeg, thaum sib txoos ua ke mas, pheej hais lus tsis zoo, hais tej yam xws li, “Lawv pheej hais tias Vajtswv hnub twb los ze lawm—thaum twg tiag thiaj li yuav los txog?” Ib txhia kwv tij thiab nkauj muam raug cuam tshuam los ntawm qhov no yam tsis paub txog, tiam sis tus thawj coj cuav qhov kev teb rov qab yog dab tsi? Lawv xav hais tias qhov ntawd yog qhov qaug zog li ib txwm thiab tsis pom hais tias qhov ntawd yog qhov tso tej kev xav tsis zoo tawm, kev coj lwm tus mus yuam kev, thiab kev cuam tshuam lwm tus. Ib txhia kwv tij thiab nkauj muam pom tau meej hais tias raug cuam tshuam hauv kev ua lawv tej dej num lawm. Lawv tsis xav tshaj tawm txoj moo zoo ntxiv lawm thiab tsis koom kev sib txoos ua ke yam xav zoo los sis nquag plias ntxiv lawm. Txhua zaus uas muaj kev sib txoos ua ke, yuav tsum tau mus hu lawv tuaj koom. Tiam sis, tus thawj coj cuav tsis pom qhov no tias yog ib qho teeb meem. Thaum muaj teeb meem tshwm tuaj, lawv saib tsis pom tias txhua tus neeg hauv pawg ntseeg muaj kev hloov pauv dab tsi. Lawv tsuas yog coj kev sib txoos ua ke raws li txoj kev cai tswj xwb, tsis paub txog tias muaj dab tsi tshwm sim tom qab, cov kev tig hloov hauv tib neeg tej yam ntxwv, tib neeg muaj tej teeb meem dab tsi, leej twg ua rau muaj tej ntawd, leej twg yog cov neeg ua txhaum tseem ceeb, cov teeb meem tshwm sim los ntawm leej twg, thiab tej teeb meem twg uas yuav tsum tau daws tiag tiag—lawv saib tsis pom ib yam dab tsi ntawm tej no li. Puas yog vim lawv yog neeg dig muag tsis pom kev lawv thiaj li saib tsis pom tej no? (Tsis yog.) Vim lawv tsis yog neeg dig muag tsis pom kev, vim li cas thaum muaj tej kev tab kaum, kev cuam tshuam uas hnyav, thiab tej kev xam pom uas yuam kev tshwm tuaj hauv pawg ntseeg, lawv thiaj li tsis pom los sis txheeb tsis tau tej ntawd? Pom tau meej hais tias, tus thawj coj no dig muag yam rua muag plias thiab tsis muaj kev to taub ntawm sab ntsujplig. Ib txhia tib neeg hais tias, “Txawm hais tias lawv txheeb tsis tau cov teeb meem no los xij, lawv tuaj yeem nyeem Vajtswv cov lus rau tib neeg thaum sib txoos ua ke. Txawm tib neeg yuav mloog zoo li cas los sis qhov ntawd puas muaj tej txiaj ntsig los, lawv yeej tseem nyeem Vajtswv cov lus yam tsis tso tseg thiab tsis dhuav li. Rau qhov no xwb, tuaj yeem hais tau tias lawv yog ib tug thawj coj zoo.” Lawv tsuas tsom ntsoov rau qhov nyeem Vajtswv cov lus xwb—yog qhov no tsis ua rau muaj txiaj ntsig dab tsi li, qhov no tsis yog qhov lam ua kom dhau xwb lod? Yog lawv daws tsis tau cov teeb meem, tib neeg yuav tau txais txiaj ntsim dab tsi los ntawm qhov kev sib txoos ua ke? Yog li tus thawj coj no puas yog ib tug thawj coj cuav? (Yog.) Ib qho kev qhia tshwm ntawm ib tug thawj coj cuav thaum ua tes hauj lwm no yog tej kev dig muag. Lawv dig muag yam rua muag plias—txawm qhov teeb meem yuav pom tau meej npaum li cas nyob ntawm lawv xub ntiag los sis tshwm sim ib puag ncig lawv los, lawv saib tsis pom los sis txheeb tsis tau qhov ntawd li. Nyob sab nraud saib mas, tej zaum yuav zoo li lawv hlub Vajtswv cov lus ntau dua li tus tib neeg li sawv daws, tiam sis lawv tsis to taub tias Vajtswv cov lus yog hais txog dab tsi, cov lus ntawd hais txog cov tib neeg twg, los sis hais txog cov xwm txheej twg—lawv tsis tuaj yeem muab Vajtswv cov lus coj los sib txuas rau hauv lub neej tiag tiag. Yog li ntawd, txoj kev to taub uas lawv sib qhia ntawd yog dab tsi? Tej ntawd puas mus raws li qhov tseeb? Tej ntawd puas daws tau tej teeb meem tiag tiag? (Tsis tau.) Thaum lawv qhuab qhia, lawv hais lus khoob xwb, cuag nkaus li lawv muaj kev to taub ntau heev txog qhov tseeb, tiam sis nyob hauv pawg ntseeg lawv txheeb tsis tau cov kev cuam tshuam uas pom tau meej uas los ntawm cov tib neeg phem los, ua yam nkaus li tsis muaj xwm txheej dab tsi tshwm sim li. Qhov no puas qhia tias lawv to taub qhov tseeb thiab muaj kev paub cais? Lawv puas muaj kev to taub tiag tiag txog Vajtswv cov lus? (Tsis muaj.) Yog lawv tuaj yeem nyeem Vajtswv cov lus li ib txwm, vim li cas lawv thiaj li siv tsis tau cov lus ntawd los saib thiab daws tej teeb meem? Vim li cas lawv lub siab thiaj li tsis qhib thaum lawv nyeem Vajtswv cov lus? Vim li cas lawv thiaj li tsis muaj lub siab ntse thaum nyeem Vajtswv cov lus? Lub hauv paus ntawm qhov teeb meem no yog dab tsi? Vim li cas lawv thiaj li dig muag? Qhov ua rau lawv dig muag yog dab tsi? (Qhov ntawd yog vim lawv tsis muaj lub peev xwm nkag siab Vajtswv txoj lus thiab lub peev xwm tsis zoo kiag li.) Yog lawm. Qhov ntawd tsis yog lawv lub qhov muag dig, tiam sis yog lawv lub siab dig. Qhov lub siab dig ntawd txhais li cas? Qhov ntawd txhais hais tias lub peev xwm tsis zoo kiag li thiab tsis muaj lub peev xwm nkag siab Vajtswv cov lus. Txawm lawv yuav nyeem Vajtswv cov lus ntau npaum li cas los xij, lawv tsuas to taub cov lus ntawd nyob rau sab nraud xwb. Lawv tsis tuaj yeem muab cov lus ntawd los sib txuas rau ntau hom tib neeg, xwm txheej, yam khoom, thiab ib puag ncig uas tshwm sim tuaj hauv pawg ntseeg, thiab lawv kuj tsis tuaj yeem coj rau, saib xyuas, thiab daws ntau yam teeb meem raws li qhov tseeb tej hauv paus ntsiab lus thiab. Qhov no yog lub hauv paus ntawm lawv txoj kev dig muag—lawv muaj peev xwm tsis zoo thiab tsis muaj peev xwm ua tes hauj lwm no. Yog li ntawd, txawm lawv yuav rau siab kawm thiab xyaum hnyav npaum li cas los xij, thiab txawm lawv yuav ua hauj lwm hnyav npaum li cas los ntxiv rau lawv qhov tsis muaj peev xwm los xij, lawv puas ua tau cov thawj coj thiab cov neeg ua hauj lwm tej luag hauj lwm kom tiav? Lawv ua tsis tau. Cov tib neeg no txaus khuv leej heev. Txawm lawv yuav npaj lawv tus kheej nrog cov lus thiab cov kev qhuab qhia ntau npaum li cas los xij, lawv ua tsis tau cov thawj coj thiab cov neeg ua hauj lwm tej luag hauj lwm kom tiav los sis ua tsis tau tes hauj lwm no.

Nyuam qhuav no, peb tau sib qhia txog ib qho kev qhia tshwm ntawm cov thawj coj cuav no, uas yog lawv tsis pom hais tias cov tib neeg phem thiab cov tawm tsam khetos tej kev ua ntawd ua rau muaj kev cuam tshuam rau pawg ntseeg, thiab lawv pom tsis tshab cov tib neeg phem thiab cov tawm tsam khetos lub ntsiab tseeb. Thaum ntsib tej xwm txheej uas cov tib neeg phem ua rau muaj kev tab kaum thiab kev cuam tshuam, qee zaus lawv kuj pom ib qho cim me ntsis, los sis, txawm yog los ntawm lawv txoj kev ntsib kev pom, kev xav, los sis kev paub hauv nruab siab los xij, lawv tsuas hnov hais tias muaj qee yam txawv xwb, tias tus neeg no lub ntsej muag, qhov muag, thiab lawv cov lus ntawd tsis zoo li ib txwm muaj. Tej zaum lawv yuav muaj kev xav me ntsis, tiam sis lawv pom tsis tshab txog ntau yam, thiab lawv txheeb tsis tau feem ntau ntawm cov teeb meem. Vim li cas lawv thiaj li pom tsis tshab lub ntsiab tseeb ntawm cov teeb meem? Qhov no muaj feem xyuam rau lwm qhov teeb meem thiab. Lawv nquag ua luaj, nyob rawv rau hauv lawv chav tsheej hnub sau cov lus qhuab qhia, sau ntawv txog lawv txoj kev pe hawm ntawm sab ntsujplig, sau lawv tej kev to taub thiab kev ntsib kev pom txog Vajtswv cov lus, kawm cov nkauj qhuas Vajtswv, teem hom phiaj tias ib hnub yuav thov Vajtswv pes tsawg zaus, yuav nyeem Vajtswv cov lus ntau npaum li cas, thiab yuav mloog cov lus qhuab qhia pes tsawg zaj, thiab yuav siv sij hawm ntev npaum li cas los sau ib tsab ntawv lus tim khawv uas hais txog txoj kev ntsib kev pom—lawv ua txhua yam hauj lwm no tiav hlo lawm, yog li ntawd vim li cas thaum muaj xwm txheej tshwm tuaj lawv thiaj li tseem pom tsis tshab? Lawv tsis to taub qhov tseeb. Lawv tsuas paub hais cov lus thiab cov kev qhuab qhia xwb thiab lawv daws tsis tau cov teeb meem tiag tiag. Ib txhia tib neeg pheej hais cov lus thiab cov kev qhuab qhia los coj lwm tus mus yuam kev, thiab cov thawj coj cuav pom tsis tshab qhov no li. Txawm hais tias qee zaus lawv hnov tias muaj qee yam tsis zoo, zoo li muaj me ntsis teeb meem, thaum pom tias cov tib neeg ntawd tsis zoo li cov tib neeg phem, lawv cia li cia qhov teeb meem ntawd dhau mus yam tsis meej pem. Lawv tsis muaj peev xwm nrhiav qhov tseeb tej hauv paus ntsiab lus los paub cais cov teeb meem zoo li no, thiab txawm lawv tau nyeem Vajtswv cov lus uas nthuav tawm tej yam ntxwv thiab lub ntsiab tseeb ntawm cov tib neeg zoo li no los, lawv tsis paub yuav muab Vajtswv cov lus ntawd los piv rau cov xwm txheej no li cas. Lawv lub siab feeb tsis meej thiab lawv pom tsis tshab tej no. Thaum lawv xav nrhiav, los lawv tsis paub yuav hais li cas. Lawv hais lus tau ntev heev tiam sis tsis tau piav qhia txog lub ntsiab tseeb ntawm qhov teeb meem, thiab tsis tau piav qhia meej meej tias cov kev qhia tshwm tag nrho ntawm cov tib neeg zoo li no yog zoo li cas, lawv txoj kev ua neeg, kev caum, qhov ua lawv tej dej num, thiab kev txiav txim siab los muab lawv tus kheej fij rau Vajtswv ntawd zoo li cas, los sis lawv tus cwj pwm uas muaj rau qhov tseeb ntawd zoo li cas, thiab seb lawv puas yog cov tib neeg uas lees txais qhov tseeb. Cov thawj coj cuav no pom tsis tshab los sis piav qhia tsis meej txog tej teeb meem no. Txawm yog lawv paub tias muaj ib qho teeb meem los, lawv pheej hais lus ntau ntau tsis nres, hais ntau yam, yam tsis qhia lawv lub ntsiab lus kom meej li. Cov uas mloog yuav tsum muaj peev xwm paub cais, rho cov ntsiab lus tseem ceeb, thiab soj ntsuam lawv cov lus kom thiaj li paub cov lus nug uas lawv nug ntawd, tus yam ntxwv tag nrho ntawm tus neeg uas lawv tab tom piav txog ntawd, thiab thaum kawg cais tus neeg ntawd lub ntsiab tseeb—seb lawv yog tib neeg phem los sis tib neeg zoo, seb lawv yog ib tug neeg uas caum qhov tseeb los sis tsuas yog ib tug neeg ua dej num txhawb xwb. Thaum koj kom ib tug thawj coj cuav piav txog ib qho teeb meem los sis nug ib lo lus nug, lawv yeej tsis muaj hnub piav tau lub hauv paus thiab lub ntsiab tseeb ntawm qhov teeb meem los sis qhov tseem ceeb ntawm qhov ntawd kom meej li. Muab hais luv luv tias, cov thawj coj cuav tsis muaj ib tug cwj pwm tshwj xeeb twg rau cov teeb meem uas lawv pom tsis tshab li, thiab rau cov xwm txheej uas lawv tuaj yeem pom qee lub cim, los lawv tseem pom tsis tshab cov teeb meem no lub ntsiab tseeb thiab. Txawm thaum qee tus tib neeg tso tej kev xav tsis zoo tawm thiab tshaj tawm tej kev xav phem, uas ua rau muaj kev cuam tshuam tsis zoo rau lub neej hauv pawg ntseeg los, lawv pom tsis tshab qhov no. Lawv pom tsis tshab los sis cais tsis tau ib qho teeb meem lub ntsiab tseeb los ntawm qhov tshwm sim sab nraud los sis los ntawm qhov nyuam qhuav pib tshwm. Muaj tseeb tiag, qhov pom tshab ib qho teeb meem lub ntsiab tseeb ntawd mas tsis yog ib qho yooj yim. Qhov tseem ceeb tshaj plaws hauv pawg ntseeg tes hauj lwm yog qhov pom tshab ntau hom tib neeg lub ntsiab tseeb raws li Vajtswv cov lus. Cov uas to taub qhov tseeb tuaj yeem ua tau qhov no, tiam sis cov thawj coj cuav thiab cov neeg ua hauj lwm cuav ua tsis tau. Thaum lawv pom cov tawm tsam khetos cuam tshuam pawg ntseeg tes hauj lwm, lawv pom tsis tshab lub ntsiab tseeb ntawm qhov teeb meem thiab haj tseem tiv thaiv cov tawm tsam khetos thiab, hais tias, “Lawv tsuas nthuav tawm qee cov moj yam qias vuab tsuab xwb, thiab khav theeb me ntsis, ua raws li siab nyiam, thiab lam tau lam ua. Lawv tseem tuaj yeem tiv kev txom nyem thaum ua lawv tej dej num. Yog li ntawd peb yuav tsum tsis txhob txiav txim thiab teem txim rau lawv; peb yuav tsum tsis txhob ua rau ib qho teeb meem me dhau mus ua teeb meem loj.” Lwm tus nug hais tias, “Yog lawv tuaj yeem tiv kev txom nyem thaum ua lawv tej dej num, lawv puas yog cov tib neeg uas caum qhov tseeb? Lawv puas nyob tom qab nraub qaum haub ntxias, coj mus yuam kev, los sis rub lwm tus los rau lawv sab? Lawv puas tsa thiab ua tim khawv rau lawv tus kheej?” Cov thawj coj cuav pom tsis tshab tej teeb meem no. Haj tseem muaj ib txhia tib neeg uas, nyob hauv lub npe ntawm kev ua tim khawv rau Vajtswv, thaum txheeb xyuas thiab tham txog qhov paub lawv tus kheej tej kev xav phem txog Vajtswv, es txhob txwm hais phem rau Vajtswv thiab tuam mom Vajtswv thiab txhob txwm tshaj tawm cov lus xaiv uas tsis muaj tseeb. Tom qab mloog tag, txawm tias cov thawj coj cuav hnov tias yam uas lawv hais ntawd tsis tshua zoo, tiam sis lawv pom tsis tshab qhov hnyav ntawm qhov teeb meem, thiab lawv haj yam pom tsis tshab qhov cuam tshuam tsis zoo thiab tej qhov tshwm sim los hnyav uas cov lus no coj los. Yog li ntawd, ntau yam kev tab kaum thiab kev cuam tshuam uas tshwm sim nyob ntawm cov thawj coj cuav xub ntiag ntawd lawv yeej saib tsis tawm kiag li, los sis yog lawv pom los, lawv tsis paub yuav cais tej ntawd li cas los sis yuav muab Vajtswv cov lus los piv rau cov xwm txheej no li cas. Cov teeb meem uas meej heev no dhau los ua ib qho kev ntxhov quav niab uas tsis meej pem rau lawv. Cov thawj coj cuav yog cov neeg ruam feeb tsis meej. Nyob rau hauv pawg ntseeg, lawv tsis tuaj yeem paub cais tias cov tib neeg twg yog cov uas caum qhov tseeb, thiab cov tib neeg twg yog cov uas ntseeg tiag tiag uas lees txais tau qhov tseeb. Lawv tsis tuaj yeem paub cais tias cov tib neeg twg tsis caum qhov tseeb tiam sis tseem ua dej num txhawb tau, thiab txawm hais tias qee zaus hais qee cov lus uas xav tsis zoo, tiam sis feem ntau txaus siab them tus nqi thiab ua raws li tej hauv paus ntsiab lus, thiab kuj mloog hais thiab zwm rau. Lawv kuj tsis tuaj yeem paub cais tias cov tib neeg twg pheej ua tej yam tsis zoo, tso txoj kev xav tsis zoo tawm thiab txiav txim rau lwm tus, thiab pheej muaj tej kev xav phem txog tag nrho Vajtswv lub tsev tej kev npaj tes hauj lwm thiab txog cov kev cai thiab tej kev cheem tsum txog txhua yam hauj lwm hauv Vajtswv lub tsev, muaj ib tug cwj pwm tawm tsam es tsis yog lees txais, thiab tsis hwm tej no kiag li, haj tseem mus txog theem uas txiav txim rau tej ntawd thiab. Muab hais luv luv tias, cov thawj coj cuav pom tsis tshab txhua hom tib neeg li. Qhov phem dua ntawd yog, nyob hauv pawg ntseeg, muaj ib txhia tib neeg uas nquag tshaj tawm tej kev xav phem, tso tej kev xav tsis zoo tawm, thiab tsis nyeem Vajtswv cov lus thaum sib txoos ua ke li. Lawv pheej tsim pab tsim pawg, sib khib thiab sib cav sib ceg. Ib txhia tib neeg pheej xav ua cov thawj coj, pheej xav ua neej nyob vam khom rau pawg ntseeg, thiab pheej xav txeeb Vajtswv lub tsev tej khoom muaj nqis. Kuj muaj ib txhia tib neeg uas nyob sab nraud mas zoo li muaj txoj kev coj zoo me ntsis tiam sis siv tsis tau dab tsi zoo thaum ua lawv tej dej num. Cov thawj coj cuav pom tsis tshab cov tib neeg uas tsis zoo no thiab cais tsis tau lawv mus rau lawv hom. Lawv pom tsis tshab tias cov tib neeg no tab tom taug txoj kev twg tiag tiag, lawv lub ntsiab tseeb yog dab tsi, thiab seb lawv puas yog cov tib neeg uas lees txais qhov tseeb. Qhov no tsis yog ib qho teeb meem ntawm cov thawj coj cuav lub peev xwm lod? Cov thawj coj cuav no lub peev xwm tsis zoo kiag li. Txawm lawv ua dab tsi los ntxhov quav niab, thiab tsis hais lawv ua tes hauj lwm twg los thaum kawg yeej ntxhov hnyo tag nrho.

Ib txhia tib neeg siv cov khoom fij yam tsis muaj tej hauv paus ntsiab lus thaum lawv yuav khoom rau Vajtswv lub tsev, lam tau lam yuav khoom yam tsis tau kev tso cai. Thaum pom qhov no, cov thawj coj cuav haj tseem hais tias, “Txawm hais tias lawv siv nyiaj ntau me ntsis los, lawv lub siab mas zoo. Thaum yuav khoom rau Vajtswv lub tsev, peb yuav tsum yuav cov uas zoo tshaj plaws; qhov no tsis yog nkim nyiaj. Cov khoom fij tsis yog tsim nyog siv li no lod?” Lawv cov lus puas muaj tej hauv paus ntsiab lus? (Tsis muaj.) Yog li, cov no yog hom lus dab tsi? Cov no tsis yog lus ruam feeb tsis meej lod? Cov lus uas tsis muaj hauv paus ntsiab lus yog cov lus ruam feeb tsis meej, thiab cov lus uas tsis muaj hauv paus kuj yog cov lus ruam feeb tsis meej thiab. Ib txhia tib neeg nquag hais cov lus thiab cov kev qhuab qhia thaum ua lub neej hauv pawg ntseeg; lawv hais taus tshwj xeeb, thiab hais lus muaj paus muaj ntsis uas mloog zoo li muaj txheej txheem kawg li, thiab lawv muaj kev txawj hais lus zoo tshwj xeeb. Cov thawj coj cuav hais li cas txog cov tib neeg zoo li no? “Peb lub neej hauv pawg ntseeg vam khom tag nrho rau ib tug neeg no. Lawv yog cov uas hais taus lus tshaj plaws thiab lawv to taub Vajtswv cov lus ntau tshaj plaws. Yog tsis muaj lawv, peb lub neej hauv pawg ntseeg yuav qhuav thiab tsis txaus nyiam tshwj xeeb li.” Lawv tsis paub hais tias cov tib neeg no tsuas hais cov lus thiab cov kev qhuab qhia xwb. Txawm tib neeg yuav mloog ntau npaum li cas los xij, tib neeg yuav tsis tau txais txiaj ntsim dab tsi li, kuj yuav tsis to taub qhov tseeb li, los sis tsis paub yuav muab qhov tseeb los piv rau lawv tus kheej li cas kom to taub lawv tus kheej tus yam ntxwv thiab daws lawv tej teeb meem. Nyob hauv qab txoj kev qhuas thiab kev haub ntxias ntawm cov thawj coj cuav, cov tib neeg uas hais cov lus thiab cov kev qhuab qhia, cov tib neeg uas nyiam tshwm ntsej muag, thiab haj tseem yog cov tib neeg uas tham dhau ntawm lub ncauj lus mus lawm tas li, hais lus ntau yam nyob rau ntawm txhua qhov kev sib txoos ua ke txog tej ncauj lus uas loj dhau, tsis muaj qab hau thiab dav heev, cov tib neeg no puav leej muaj chaw los nthuav tawm. Cov thawj coj cuav tsis paub cais cov tib neeg no thiab haj tseem xav hais tias cov tib neeg no yog cov neeg muaj peev xwm, qhuas lawv hais tias, “Nej hais tau zoo npaum li no; ua cas nej tsis sau cov ntawv lus tim khawv uas hais txog txoj kev ntsib kev pom? Khuv xim tiag tiag li!” Nyob hauv pawg ntseeg, cov tub ntxhais kawm ntawv qib siab, cov xib fwb qhia ntawv theem siab, thiab cov neeg txawj ntse ntawd raug cov thawj coj cuav saib zoo li cov khoom muaj nqis. Lawv hais tias, “Cov neeg txawj ntse thiab cov xib fwb qhia ntawv theem siab no yog cov tib neeg muaj peev xwm. Lawv muaj kev ntsib kev pom dav thiab muaj suab npe nyob hauv lub zej zog. Yog lawv ua cov thawj coj thiab cov neeg ua hauj lwm hauv pawg ntseeg, tes hauj lwm yuav ua tau tiav ntau dua, thiab cov neeg Vajtswv xaiv tseg yuav tau txais txiaj ntsim ntau dua thiab tau txais qee yam ntau dua. Nyob rau yav tom ntej, pawg ntseeg tes hauj lwm yuav vam khom rau lawv tag nrho. Yog muaj cov neeg txawj ntse no coj peb, peb ntseeg Vajtswv yeej yuav tau koob hmoov xwb xwb.” Yog li ntawd, nyob rau hauv cov pawg ntseeg uas muaj cov thawj coj cuav, cov uas muaj meej mom hauv lub zej zog, cov uas muaj kev paub siab, cov uas txawj hais lus, cov uas hais lus khoob txog cov lus thiab cov kev qhuab qhia, cov uas muaj koob meej me ntsis, thiab lwm yam ntxiv—tag nrho cov tib neeg uas tsis muaj qhov tseeb qhov muaj tiag hlo li no—tuav cov hauj lwm tseem ceeb hauv pawg ntseeg thiab raug cov thawj coj cuav saib zoo li cov zog tseem ceeb thiab haj tseem yog cov uas hu ua pawg ntseeg cov ncej tse thiab. Thaum muaj dab tsi tshwm sim hauv pawg ntseeg, cov thawj coj cuav hais tias, “Mus nug tus no tus tod; dhau los nws yog tus thawj tswj ntawm ib lub tuam txhab,” los sis “Mus nug tus no tus tod; nws yog ib tug xib fwb qhia ntawv theem siab nyob rau hauv tsev kawm qib siab,” los sis “Mus nug tus no tus tod; dhau los nws yog tus kws lij choj zeeg ib nyob rau ib lub chaw ua hauj lwm kws lij choj.” Cov thawj coj cuav saib cov tib neeg no zoo li cov ncej tse thiab cov zog tseem ceeb ntawm pawg ntseeg. Lub neej hauv pawg ntseeg puas tuaj yeem zoo tau nyob hauv cov xwm txheej zoo li no? (Tsis tau.) Yog li, qhov tshwm sim los yog dab tsi? Cov uas hu ua cov zog tseem ceeb thiab cov ncej tse no zais ntshis los sis haj tseem qhib lug txeeb lub meej mom thiab tsim pab tsim pawg, thiab nquag tshaj tawm tej kev xav phem thiab tshaj tawm cov lus xaiv uas tsis muaj tseeb. Cov kwv tij thiab cov nkauj muam hauv pawg ntseeg uas yog cov ntseeg tiag tiag, nyiam qhov tseeb, lees txais tau qhov tseeb, thiab muaj ib txoj kev to taub yog txog qhov tseeb nquag raug lawv cais tawm thiab tsuj nias. Cov uas hu ua cov neeg muaj koob meej hauv lub zej zog no, tsis hais ua lawv tej dej num los sis ua hauj lwm dab tsi los xij, lawv tsis muaj kev ua siab ncaj thiab yeej tsis ua raws li qhov tseeb tej hauv paus ntsiab lus hlo li—lawv ua raws li lub zej zog ntawm cov ib txwm tsis ntseeg tej kev tag nrho xwb. Yog li ntawd, nyob rau hauv ib lub pawg ntseeg zoo li no, cov uas caum qhov tseeb tiag tiag, cov uas muaj txoj kev nkag siab yog, thiab cov uas muaj kev ua neeg me ntsis thiab paub txog kev ncaj ncees, tsis muaj chaw hais lus, tsis muaj cai hais lus, thiab yeej tsis muaj cai txiav txim siab li. Tsis hais muaj dab tsi tshwm sim nyob hauv pawg ntseeg, cov uas txiav txim siab thaum kawg yeej ib txwm yog pab neeg uas hu ua cov tswv cuab tseem ceeb no xwb. Cov thawj coj cuav pe hawm thiab ntseeg cov neeg no yam dig muag ntsuav, yog li ntawd thaum kawg lawv thiaj li vam khom rau cov neeg no los daws teeb meem thaum muaj ib yam dab tsi tshwm tuaj. Yog cov neeg no caum qhov tseeb thiab ua raws li qhov tseeb tej hauv paus ntsiab lus, qhov no yuav yog ib yam uas zoo. Txawm li cas los xij, feem coob ntawm cov neeg no tsis caum qhov tseeb. Cov neeg no muaj kev paub thiab kev kawm ntawv me ntsis, lawv muaj lub meej mom hauv zej zog, thiab ntxiv rau ntawd, lawv muaj txoj kev ua neeg uas txawj dag thiab lim hiam zais ntshis, thiab txawj hais lus zoo thiab txawj coj lwm tus mus yuam kev. Qhov no yog kiag cov tawm tsam khetos tus yam ntxwv xeeb txawm lub ntsiab tseeb ntag. Qhov tshwm sim los ntawm qhov uas cov thawj coj cuav vam khom cov neeg no yog dab tsi? Lawv ua rau pawg ntseeg tes hauj lwm thiab txheej txheem ntawm lub neej hauv pawg ntseeg ntxhov quav niab tag nrho, thiab lawv rhuav tshem cov neeg Vajtswv xaiv tseg txoj kev nkag mus rau hauv lub neej txoj sia, ua rau pawg ntseeg poob nws tej lus tim khawv tag nrho. Ib txhia thawj coj cuav cia siab tias yuav muaj ib tug neeg tseem ceeb nyob hauv pawg ntseeg uas to taub txog kev nom kev tswv thiab tej xwm txheej tam sim no, xav hais tias, “Yog tias muaj ib tug neeg zoo li no los ua kom pawg ntseeg loj ntxiv, txhawb pawg ntseeg lub hwj chim, thiab ua kom pawg ntseeg muaj koob muaj npe ntxiv, ces tes hauj lwm tshaj tawm txoj moo zoo yuav muaj kev cia siab. Qhov ntawd yeej yuav yog ib yam uas tsim nyog ua kev zoo siab tiag tiag li!” Nyob rau hauv cov pawg ntseeg uas cov thawj coj cuav tswj ntawd, thaum ua lub neej hauv pawg ntseeg ib txhia tib neeg tham ntau heev txog kev nom kev tswv, tej xwm txheej tam sim no, xwm txheej thoob ntiaj teb, thiab tej xwm txheej hauv lub teb chaws; lawv tham txog lub neej ntiag tug ntawm cov nom tswv qib siab thiab haj tseem soj ntsuam cov phiaj xwm zais thiab cov phiaj xwm qhib lug ntawm cov nom tswv no yam meej heev thiab muaj laj thawj. Cov thawj coj cuav, ntshaw txog theem uas los qaub ncaug, hais tias, “Thaum kawg, peb pawg ntseeg muaj ib tug neeg tseem ceeb los pab tuav peb lub ntsej muag lawm! Kuv pheej xav tias qaug zog, ntxhov siab, thiab tsa tsis taus taub hau, vim hais tias peb pawg ntseeg tsis muaj hom neeg tseem ceeb zoo li no. Tiam sis tam sim no peb twb muaj tus neeg zoo li no nyob hauv peb pawg ntseeg lawm. Yog li ntawd, peb yuav tsum cia tus neeg no ua yam uas lawv xav ua thiab hais yam uas lawv xav hais, thiab muab kev ywj pheej rau lawv. Vajtswv lub tsev tsis yog xyaum ua kev ywj pheej thiab leej tib neeg txoj cai lod? Tiam Lub Nceeg Vaj tsis yog qhia txog leej tib neeg txoj cai lod?” Cov thawj coj cuav saib cov uas nyiam tham txog kev nom kev tswv thiab hais txog cov neeg muaj koob nrov npe, cov uas pheej tham ub tham no ntev ntev tas li txog tej tswv yim siab siab uas khoob lug rau ntawm tib neeg, uas yog tej khoom muaj nqis uas muaj tsawg heev thiab xav cob qhia cov neeg no los ua cov ncej tse thiab cov hauv paus ntawm pawg ntseeg. Yog li ntawd, lawv thiaj li nquag txhawb zog thiab qhuas cov neeg no, ntshai tsam tias cov neeg no xav tsis zoo es yuav cuam tshuam rau pawg ntseeg tes hauj lwm. Hais kom luv luv ces, cov thawj coj cuav no loog thiab dig muag. Lawv txheeb tsis tau ntau hom tib neeg uas tab kaum thiab cuam tshuam pawg ntseeg tes hauj lwm kom ncav sij hawm. Txawm tias lawv txheeb tau los, lawv kuj pom tsis tshab cov tib neeg phem lub ntsiab tseeb thiab. Lawv haj tseem pom tsis tshab txog cov tib neeg phem uas pom tau meej meej uas yog hom ntawm cov tawm tsam khetos, xws li cov uas tsim pab tsim pawg thiab tsim tej nceeg vaj rau lawv tus kheej. Thaum lawv pom cov tawm tsam khetos tsim pab tsim pawg, khav lawv lub peev xwm, thiab siv lub hwj chim loj uas lawv tswj hwm ntawd los ua raws siab nyiam, cov thawj coj cuav ntsuas lawv li cas? “Tus neeg no mas tsis yog neeg dog dig, lawv yeej txawj heev tiag tiag! Yav tas los kuv tsis tau pom tus neeg muaj peev xwm no; lawv zoo dua kuv lawm ntau, lawv yeej ua rau kuv txaj muag tiag tiag. Saib rau lawv tej peev xwm seb—lawv muaj peev xwm ua ntau yam thiab muab ntau yam tso tseg, hais lus muaj meej mom, thiab ua raws li lawv tej lus. Hos kuv mas tsis zoo kiag li; kuv zoo li ib tug me nyuam ntxhais uas txawj ntshai.” Lawv qhuas cov tawm tsam khetos heev, pe hawm lawv, thiab txaus siab los ua cov raws lawv qab. Ib qho ntawm tus yam ntxwv ntawm qhov kev qhia tshwm txog cov thawj coj cuav yog qhov dig muag, thiab lwm qhov yog kev loog. Nyob rau tag nrho mas, lub ntsiab tseeb ntawm qhov teeb meem ntawm cov thawj coj cuav no yog lub peev xwm tsis zoo.

Tib neeg muaj ob lub qhov muag kom lawv thiaj li pom tau tej yam. Tom qab ib tug neeg pom ib yam dab tsi lawm, lawv lub hlwb yuav teb rov qab thiab txiav txim, thiab tom qab lawv txiav txim lawm, lawv yuav muaj ib qho kev xam pom thiab tau txais ib txoj kev ua raws. Qhov no ua pov thawj hais tias lawv tsis dig muag—txawm lawv pom dab tsi los xij, lawv muaj qhov kev teb rov qab li ib txwm thiab paub tias yuav ntsib thiab daws qhov ntawd li cas. Qhov no yog ib tug neeg uas muaj kev xav li ib txwm muaj. Tib neeg muaj ib tug txheej txheem ntawm kev teb rov qab rau yam uas lawv pom; lawv yuav ua tib zoo xav thiab xav txog qhov ntawd tsis ntau los tsawg. Thaum lawv tej kev xav nthuav tawm, ib daim duab txog yam ntawd maj mam tsim tuaj hauv lawv lub siab, thiab lawv thiaj li muaj lawv tus kheej tej kev xam pom, cwj pwm, thiab tej kev ua. Yog li ntawd, yam uas yuav tsum muaj ua ntej rau kev ua kom muaj tej yam no yog dab tsi? Ib tug neeg ob lub qhov muag yuav tsum muaj peev xwm pom tau tej yam, tom qab ntawd muab tej ntaub ntawv uas sau tau xa mus rau hauv lawv lub hlwb thiab lub siab los xav txog. Yog ib tug neeg pom tau tej yam ntawm lawv ob lub qhov muag, ces lawv tsis dig muag, thiab lawv tuaj yeem xav thiab ua tib zoo xav, muaj kev paub ras, tus cwj pwm, thiab tej kev xam pom, thiab thaum kawg xaus lus tau yog. Muaj tseeb tiag, qhov uas xaus lus tau li no cheem tsum sij hawm me ntsis. Qhov uas muaj kev paub ras, kev xam pom, thiab tus cwj pwm ua ntej uas yuav xaus lus tau li no txhais li cas? Qhov ntawd txhais hais tias ib tug neeg lub siab tseem nquag, tsis loog, ua pov thawj hais tias tus neeg no tseem ciaj, tsis yog neeg tuag. Cov thawj coj cuav lub peev xwm tsis zoo. Tsis zoo nyob rau qhov twg? Cov thawj coj cuav tsis muaj ob lub peev xwm no. Lawv qhib qhov muag tiam sis pom tsis tau tej yam uas tshwm sim los sis tab tom ua, qhov no yog dig muag. Tsis tas li ntawd, thaum lawv pom tej yam, lawv lub siab tsis muaj kev teb rov qab dab tsi li, lawv tsis tsim tau tej kev xam pom los sis tej kev xav dab tsi li, thiab lawv tsis muaj txoj kev los sis tej hau kev uas yog los txiav txim thiab xaus lus tau. Qhov no yog qhov loog ntawm sab ntsujplig. Cov neeg uas loog ntawm sab ntsujplig tsis paub cais ib yam dab tsi li, lawv tsis muaj txoj kev ntsuas uas yog los sis tej kev txiav txim uas raug, thiab thaum kawg, lawv xaus lus tsis tau kom yog, thiab tsis paub tias yuav ua li cas, saib xyuas, los sis daws tej teeb meem ntawm no li cas. Qhov no yog qhov loog thiab ruam ruam. Thaum ib tug neeg loog thiab ruam nyob hauv lawv sab ntsujplig mus txog theem uas lawv tsis muaj kev teb rov qab dab tsi li thaum muaj ib yam dab tsi tshwm sim, qhov no ces yog neeg tuag—qhov no yog kev piav txog qhov teeb meem raug nkaus lawm. Tam sim no tsis hais tias cov thawj coj cuav puas yog neeg tuag los tsis yog, tsuas hais qhov lawv lub peev xwm tsis zoo xwb. Qhov ntawd tsis zoo txog theem twg? Tsis hais muaj xwm txheej loj npaum li cas tshwm tuaj los xij, lawv saib tsis pom qhov ntawd, thiab txawm tias lawv pom los, lawv pom tsis tshab qhov ntawd. Piv txwv li, txawm cov thawj coj cuav ua hauj lwm ntev npaum li cas los xij, lawv xaus lus tsis tau tias lub ntsiab tseeb ntawm ib qho xwm txheej ntawd yog dab tsi, yuav faib tej ntawd li cas, yuav teem seb tej ntawd yog dab tsi, los sis lub hauv paus ntawm kev teem ntawd yog dab tsi; lawv tsis paub tias yuav ntsuas tej no li cas, thiab tsis muaj qauv los sis hauv paus ntsiab lus los ntsuas tej ntawd. Lawv yog cov neeg ruam feeb tsis meej uas tsis muaj kev to taub ntawm sab ntsujplig. Qhov no yog qhov kev qhia tshwm tseem ceeb tshaj plaws ntawm cov thawj coj cuav nyob rau hauv thawj tes hauj lwm. Lawv dig muag, tsis ntse, ruam, thiab loog, tiam sis lawv tseem xav ua thawj coj. Qhov no tsis yog qhov ua rau hauj lwm qeeb lod? Qhov no tsis ua rau muaj teeb meem heev lod? Yog ib tug neeg twg tsis tau ua ib tug thawj coj dua li, thiab yog lawv nyuam qhuav ntsib ib yam dab tsi thawj zaug, thiab qhov teeb meem no tsis tau hais txog hauv Vajtswv cov lus thiab tsis tau hnov dua hauv cov tib neeg—uas yog, yog lawv tsis muaj kev ntsib kev pom los sis kev paub txog qhov no—nyob hauv cov xwm txheej zoo li no mas yuav cheem tsum sij hawm kom tus neeg ntawd tsim cov kev nkag siab tob, tus cwj pwm, thiab kev xam pom uas yog. Tiam sis vim li cas thiaj hais tias cov thawj coj cuav loog thiab dig muag? Qhov ntawd yog vim Kuv twb hais ntau lo lus heev lawm, tiam sis txawm Kuv yuav nthuav tawm thiab txheeb xyuas tej yam ntau npaum li cas los xij, los sis muab piv txwv ntau npaum li cas los, cov thawj coj cuav tsuas paub txog tej xwm txheej ntawd tom qab hnov Kuv cov lus xwb, tiam sis tsis to taub qhov tseeb tej hauv paus ntsiab lus ntawm tej ntawd. Tsis tas li ntawd, thaum Kuv yim hais ntau, lawv yim paub tsis meej. Lawv hais tias, “Muaj ntau yam teeb meem, ntau cov lus, ntau zaj dab neeg, leej twg thiaj li yuav nco tau txhua yam thiab muab coj los piv rau lub neej tiag tiag tau? Tsis txhob hais ntau dhau, kuv muaj kev nyuaj me ntsis los lees txais thiab to taub tag nrho tej ntawd. Tsuas yog qhia rau kuv tias yuav daws tus neeg no li cas: Yuav tsum muab lawv ntiab tawm mus los sis cia lawv nyob?” Qhov no tsis yog qhov loog lod? Loog dhau lawm! Tseeb tiag, qhov hais tias lawv loog ntawd mas yog muab chaw rau lawv me ntsis xwb, vim tej zaum tus neeg no yuav hluas, los sis tej zaum tsis tau kawm ntawv, los sis tej zaum lawv laus heev thiab me ntsis tsis meej pem—qhov hais li no yog tseg ntsej muag rau lawv. Tiam sis qhov tseeb tiag, qhov ntawd yog lub peev xwm tsis zoo thiab tsis muaj lub peev xwm nkag siab qhov tseeb. Qhov kev piav qhia no ua rau qhov ntawd meej.

Yog tias muaj kev tab kaum thiab kev cuam tshuam loj tshwm sim nyob hauv pawg ntseeg thiab cov thawj coj cuav pom tsis tshab lub ntsiab tseeb ntawm tej teeb meem no, lawv puas muaj peev xwm ua tes hauj lwm ua thawj coj? Cov kwv tij thiab cov nkauj muam puas raug tiv thaiv nyob hauv qab lawv txoj kev coj? Pawg ntseeg tes hauj lwm, qhov chaw uas cov kwv tij thiab cov nkauj muam ua lawv tej dej num, thiab qhov raws qib raws duas uas ib txwm muaj ntawm lub neej hauv pawg ntseeg puas raug tiv thaiv thiab tswj xyuas tau? Tej no yog tej yam theem hauv paus tshaj plaws uas cov thawj coj thiab cov neeg ua hauj lwm yuav tsum ua kom tau. Cov thawj coj cuav puas ua tau tej no? Ua tsis tau li. Lawv haj tseem txheeb tsis tau los sis pom tsis tshab cov tib neeg, xwm txheej, thiab yam khoom uas ua rau muaj kev tab kaum thiab kev cuam tshuam, yog li lawv yuav ua li cas thiaj li mus tau rau cov kauj ruam tom ntej ntawm lawv tes hauj lwm? Lawv haj tseem paub cais tsis tau tej yam hauv paus tshaj plaws, xws li ib tug neeg zoo yog dab tsi, ib tug neeg phem yog dab tsi, ib tug neeg uas txawj dag yog dab tsi, los sis ib tug neeg uas ntsej muag ncaj siab nkhaus yog dab tsi—lawv puas muaj peev xwm ua tau pawg ntseeg tes hauj lwm? Lawv yeej ua tsis tau li. Qhov ntawd tsis yog tias lawv txhob txwm tsis ua tes hauj lwm tiag tiag, los sis tias lawv tub nkeeg thiab xyiv fab rau tej txiaj ntsim ntawm lub meej mom; qhov ntawd yog lawv lub peev xwm tsis zoo thiab ua tsis tau lawv tes hauj lwm xwb. Qhov no yog lub ntsiab tseeb ntawm qhov teeb meem. Cov tib neeg uas lub peev xwm tsis zoo kiag li tsuas paub hais cov lus thiab cov kev qhuab qhia, thiab ua raws li cov kev cai tswj; thaum sib txoos ua ke, lawv tsuas paub hais lus nplig thiab ntuas lwm tus xwb, hais tej lus xws li, “Ntseeg Vajtswv kom zoo! Twb yog lub sij hawm twg lawm, ua cas koj thiaj li tseem ntshaw kev tau zoo ntawm lub cev nqaij daim tawv? Koj tseem yuav ntshaw nyiaj txiag thiab tej yam hauv ntiaj teb tau li cas? Vajtswv yeej yuav tu siab heev!” Lawv tsuas qhia tau hom lus qhuab qhia no xwb. Thaum ntau yam kev ua phem xws li tej kev tab kaum, tej kev cuam tshuam, thiab kev tso tej kev xav tsis zoo tawm ntawd tshwm tuaj, lawv pom tsis tau los sis txheeb tsis tau tej ntawd li. Cov kwv tij thiab cov nkauj muam xav ua lub neej hauv pawg ntseeg li ib txwm muaj tiam sis ua tsis tau li ntawd, thiab lawv xav muaj qhov xwm txheej uas tsim nyog los ua lawv tej dej num tiam sis ua tsis tau. Cov thawj coj cuav daws tsis tau cov teeb meem no li, yog li lawv siv tau dab tsi? Cov kwv tij thiab cov nkauj muam xav ua lub neej hauv pawg ntseeg, to taub qhov tseeb thiab daws lawv tej kev nyuaj thiab tej yam ntxwv uas xav tsis zoo. Lawv cia siab heev tias cov thawj coj thiab cov neeg ua hauj lwm yuav sib qhia qhov tseeb kom meej thiab ntxaws los daws cov teeb meem tiag tiag no. Yog ib lub pawg ntseeg yog ib qho chaw uas cov thawj coj cuav tuav hwj chim, cov teeb meem tiag tiag no puas tuaj yeem raug daws? Cov thawj coj cuav tsis to taub cov neeg Vajtswv xaiv tseg lub siab, thiab lawv kuj tsis pom cov neeg Vajtswv xaiv tseg ntawd tej kev nyuaj thiab. Tiam sis, lawv tseem pheej hais cov lus thiab cov kev qhuab qhia thiab nquag hais lus ntev ntev txog tej tswv yim siab uas khoob lug, uas ua rau cov neeg Vajtswv xaiv tseg tag kev cia siab loj heev. Leej twg tseem yuav xav tuaj koom kev sib txoos ua ke tas li? Cov thawj coj cuav puas tuaj yeem ua tib zoo xav txog Vajtswv tej kev npaj siab, thiab tshem cov tib neeg phem, cov tsis ntseeg, cov neeg nrhiav cib fim, thiab cov neeg ua plees ua yig uas lim hiam thiab nyiam tej yam hauv ntiaj teb ntawd tawm ntawm pawg ntseeg mus raws li Vajtswv cov lus thiab tej kev cheem tsum, tiv thaiv tsis pub cov neeg Vajtswv xaiv tseg raug cuam tshuam thiab tab kaum los ntawm cov tib neeg ntawd los, thiab ua kom cov neeg Vajtswv xaiv tseg tuaj yeem ua lub neej hauv pawg ntseeg li ib txwm muaj? Cov thawj coj cuav puas ua tau qhov no kom tiav? Lawv ua tsis tau. Thaum muaj neeg thov li no, cov thawj coj cuav hais li cas? “Koj mas teeb meem ntau tshaj! Koj xav tias tsuas yog koj xwb thiaj li hlub Vajtswv thiab xav ua siab ncaj rau kev ua tus kheej tes dej num xwb lod? Leej twg tsis xav ua li ntawd? Lawv kuj ntseeg Vajtswv thiab raug Vajtswv xaiv tseg thiab. Txawm hais tias lawv muaj qee qhov teeb meem los, peb yuav tsum coj kom yog rau lawv. Tsis txhob pheej nrhiav lwm tus tej qhov ua yuam kev. Siv lub cib fim no los thim xav thiab paub txog koj tus kheej kom ntau ntxiv; koj yuav tsum kawm ua siab ntev thiab thev taus.” Cov thawj coj cuav ruam feeb tsis meej thiab dig muag, thiab lawv tsis muaj tej hauv paus ntsiab lus rau txoj kev uas lawv coj rau ntau hom tib neeg. Lawv pom tsis tshab cov uas tsim nyog raug txwv los sis ntsaig tawm mus, tiam sis lawv tso cai rau cov tib neeg no ua txhua yam uas cov neeg no xav ua thiab quab yuam lwm tus nyob rau hauv pawg ntseeg, muab chaw ntau heev rau lawv ua hauj lwm, uas ua rau pawg ntseeg ntxhov quav niab, mus txog theem uas qhov sib xyaw ntau hauv qee cov pawg ntseeg tuaj yeem piav qhia tau nrog ib kab lus: Cov pawg ntseeg ntawd dhau los sib chab sib chaws tiag tiag. Cov tib neeg phem, cov tsis ntseeg, cov neeg ua plees ua yig, cov neeg quab yuam lwm tus hauv qhov chaw ntawd, thiab txawm yog ib txhia uas yuav muag tau pawg ntseeg thiab cov kwv tij thiab cov nkauj muam thaum ntsib kev phom sij me ntsis ntawd los, puav leej nyob sib xyaw ua ke hauv cov pawg ntseeg no. Cov thawj coj cuav pom tsis tshab txog cov tib neeg no, thiab lawv tsis saib xyuas los sis tsis daws cov neeg ntawd li. Yog li ntawd, nyob hauv qab kev coj ntawm cov thawj coj cuav uas dig muag thiab loog no, cov neeg Vajtswv xaiv tseg tsis tuaj yeem raug tiv thaiv, thiab pawg ntseeg tes hauj lwm thiab qhov raws qib raws duas uas ib txwm muaj ntawm lub neej hauv pawg ntseeg yeej saib xyuas tsis tau li. Cov neeg uas nyiam qhov tseeb thiab txaus siab hlo lees txais qhov tseeb yuav to taub thiab tau txais qhov tseeb hauv ib lub neej hauv pawg ntseeg uas sib chab sib chaws li no tau li cas? Cov tib neeg ntawd puas yog hnov mob hauv lawv lub siab? Yog ib tug thawj coj pawg ntseeg tsis tuaj yeem saib xyuas tau pawg ntseeg tes hauj lwm, qhov raws qib raws duas uas ib txwm muaj ntawm lub neej hauv pawg ntseeg, los sis qhov xwm txheej rau cov kwv tij thiab cov nkauj muam los ua lawv tej dej num ntawd kom zoo, los sis ua kom paub tseeb txog kev nyab xeeb ntawm tej no, ces tus thawj coj no yeej yog ib tug thawj coj cuav yam tsis muaj qhov ua xyem xyav li. Vim li cas lawv thiaj li raug hu ua thawj coj cuav? Qhov ntawd yog vim lawv dig muag thiab loog, uas ua rau muaj cov tib neeg phem tab kaum thiab cuam tshuam pawg ntseeg tes hauj lwm zaum tag zaum tuaj; tsis tas li ntawd xwb, txawm tias qhov no tau muaj qhov tshwm sim los uas phem lawm los xij, lawv tseem saib xyuas tsis tau thiab daws tsis tau cov teeb meem ntawd kom ncav sij hawm thiab kom yog, thiab lawv tswj xyuas tsis tau pawg ntseeg tes hauj lwm thiab lub neej hauv pawg ntseeg ntawm cov kwv tij thiab cov nkauj muam kom zoo. Muab hais kom zoo mloog ces, cov thawj coj zoo li no tsis muaj peev xwm hauv lawv tes hauj lwm; muab hais kom yog ces, lawv tab tom tsis ua lawv tej luag hauj lwm yam hnyav heev. Txawm lawv ua cov thawj coj los, lawv tiv thaiv cov tib neeg phem tej txiaj ntsim thiab Ntxwgnyoog cov tub qhe tej txiaj ntsim, tiam sis tsis quav ntsej pawg ntseeg tes hauj lwm thiab txoj kev nkag mus rau hauv lub neej txoj sia ntawm cov neeg Vajtswv xaiv tseg. Lawv tiv thaiv thiab tso cai rau cov tib neeg phem ntawd tab kaum thiab cuam tshuam lub neej hauv pawg ntseeg los ntawm qhov ua phem rau cov kwv tij thiab cov nkauj muam. Txawm hais tias saib los ntawm lawv lub peev xwm thiab cov kev qhia tshwm, lawv tsuas yog lub peev xwm tsis zoo thiab ua tsis tau lawv tes hauj lwm xwb, thiab teem tsis tau tias lawv yog cov tawm tsam khetos los, tej qhov tshwm sim los ntawm lawv tej kev ua rau pawg ntseeg tes hauj lwm ntawd mas yog qhov hnyav heev. Lub ntsiab xeeb txawm ntawm lawv tej kev ua mas zoo tib yam nkaus li cov tawm tsam khetos uas tsim tej nceeg vaj rau lawv tus kheej thiab tsuj nias cov kwv tij thiab cov nkauj muam. Ob qho no puav leej tiv thaiv thiab tso cai rau cov tib neeg phem, thiab tso cai rau Ntxwgnyoog cov tub qhe ua txhua yam uas lawv xav ua hauv pawg ntseeg. Tsuas yog tias cov thawj coj cuav tsis ua phem thiab cuam tshuam pawg ntseeg tes hauj lwm ib yam li cov tawm tsam khetos uas ua yam tab meeg thiab tsis paub txaj muag xwb. Lawv tsis yog txhob txwm rub tib neeg los rau ntawm lawv tus kheej lub xub ntiag thiab ua kom cov tib neeg ntawd mloog lawv hais, tiam sis qhov tshwm sim los thaum kawg yeej zoo tib yam li cov tawm tsam khetos uas tsim tej nceeg vaj rau lawv tus kheej. Ob qho no puav leej ua rau cov kwv tij thiab cov nkauj muam uas nyiam qhov tseeb thiab ua lawv tej dej num yam siab dawb paug raug ua phem rau thiab raug puas tsuaj, thiab tsis muaj txoj kev ua neej nyob. Nyob rau hauv ib qho xwm txheej thiab lub neej hauv pawg ntseeg zoo li no, mas nyuaj heev rau cov kwv tij thiab cov nkauj muam uas ua lawv tej dej num yam siab dawb paug uas yuav muaj kev loj hlob hauv lub neej txoj sia, thiab nyuaj heev rau lawv ua lawv tej dej num li ib txwm. Muaj tseeb tiag, tes hauj lwm tshaj tawm txoj moo zoo thiab ntau yam ntawm pawg ntseeg tes hauj lwm kuj raug thaiv hnyav heev thiab tsis tuaj yeem nce qib li ib txwm. Qhov no yog thawj qhov kev qhia tshwm ntawm cov thawj coj cuav uas peb tab tom txheeb xyuas ntawm lub luag hauj lwm kaum ob—tsis pom thiab pom tsis tshab cov tib neeg, tej xwm txheej, thiab tej yam khoom uas tshwm tuaj nyob ib puag ncig lawv. Qhov kev qhia tshwm no txaus los teem cov tib neeg zoo li no tias yog cov thawj coj cuav.

II. Cov Thawj Coj Cuav Tsis Daws Cov Tib Neeg Uas Tab Kaum thiab Cuam Tshuam Pawg Ntseeg Tes Hauj Lwm Raws Li Tej Hauv Paus Ntsiab Lus

Hais txog yam hauj lwm ob uas tau qhia nyob hauv cov thawj coj thiab cov neeg ua hauj lwm lub luag hauj lwm kaum ob, peb yuav nthuav tawm thiab txheeb xyuas cov thawj coj cuav tej kev qhia tshwm. Yam hauj lwm ob yog qhov uas cov thawj coj thiab cov neeg ua hauj lwm yuav tsum siv qhov tseeb tej hauv paus ntsiab lus los daws cov teeb meem kom ncav sij hawm thaum lawv txheeb tau tej ntawd lawm. Txawm li cas los xij, cov thawj coj cuav kuj tsis muaj peev xwm txaus rau hauv tes hauj lwm no thiab. Yog li ntawd, qhov kev qhia tshwm ob ntawm cov thawj coj cuav uas peb yuav txheeb xyuas mas yog qhov tias lawv tsis paub tej hauv paus ntsiab lus rau qhov daws ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm lub neej hauv pawg ntseeg. Thaum cov thawj coj cuav ua lub neej hauv pawg ntseeg, lawv noj thiab haus Vajtswv cov lus thiab nyeem thov Vajtswv cov lus, tiam sis lawv yeej ib txwm tsis to taub tias Vajtswv cov lus txhais li cas, ib txwm tsis to taub tej hauv paus ntsiab lus ntawm txhua yam uas Vajtswv hais, thiab tsis paub tej hauv paus ntsiab lus thiab cov qauv uas Vajtswv cheem tsum rau ntau yam. Qhov no haj yam ua pov thawj qhia hais tias cov thawj coj cuav tsis muaj lub peev xwm nkag siab qhov tseeb thiab muaj lub peev xwm tsis zoo kiag li. Ib txhia tib neeg hais tias, “Ua cas Koj thiaj li hais tias lawv lub peev xwm tsis zoo? Lawv ua zaub mov qab heev, txawj tu cev, thiab hais lus zoo mloog thaum nrog lwm tus sib raug zoo; txhua tus nyiam mloog lawv hais.” Ib tug tib neeg sab nraud puas sawv cev tau rau lawv lub ntsiab tseeb? Qhov ua tau qee yam sab nraud zoo puas txhais hais tias lawv lub peev xwm zoo? Yuav ntsuam xyuas, ntsuas, thiab txiav txim txog ib yam dab tsi, yeej yuav tsum muaj ib tug qauv uas yog. Yuav ntsuas ib tug tib neeg lub peev xwm, tus qauv ntawd yog saib seb lawv txoj kev nkag siab txog Vajtswv cov lus puas ncaj. Qhov hais tias cov tib neeg no muaj peev xwm tsis zoo ntawd mas qhov tseem ceeb yog hais txog qhov uas lawv tsis muaj lub peev xwm nkag siab qhov tseeb. Peb ntsuas ib tug neeg lub peev xwm raws li nws lub peev xwm nkag siab Vajtswv cov lus. Qhov no puas yog muaj tseeb thiab ncaj ncees heev? (Yog.) Ua ib tug neeg uas raug tsim tawm los, yog koj to taub tsis tau tus Tswv Tsim cov lus, ces koj muaj lub peev xwm dab tsi? Koj puas muaj hlwb xav? Ib tug neeg zoo li no tsis muaj tib neeg lub peev xwm; lawv lub peev xwm tsis zoo txog theem uas lawv twb to taub tsis tau Vajtswv cov lus—ib tug neeg zoo li no puas yuav tau txais qhov tseeb thaum ntseeg Vajtswv?

Tam sim no peb yuav sib qhia thiab txheeb xyuas qhov kev qhia tshwm ob ntawm cov thawj coj cuav. Cov thawj coj cuav tsis paub yuav ua li cas rau cov tib neeg uas tab kaum thiab cuam tshuam pawg ntseeg tes hauj lwm thiab tsis tuaj yeem paub cais ntau hom tib neeg, xwm txheej, thiab yam khoom. Qhov no txaus los qhia hais tias cov thawj coj cuav lub peev xwm tsis zoo, tsis muaj lub peev xwm nkag siab qhov tseeb, thiab tsis muaj lub peev xwm nkag siab Vajtswv cov lus. Piv txwv li, muaj ib tug tib neeg uas ib txwm tsis kam zwm rau leej twg uas ua tus thawj coj. Cov thawj coj cuav kuj pom tau tias tus tib neeg no muaj teeb meem thiab xav tias tus tib neeg ntawd zoo li ib tug tib neeg phem thiab ib tug tawm tsam khetos. Lawv pom tau qee yam cim ntawm tej xwm txheej, qhov no tsis phem pes tsawg thiab. Tiam sis yog koj nug lawv hais tias, “Koj saib raws li dab tsi es thiaj li hais tias lawv zoo li ib tug tawm tsam khetos thiab ib tug tib neeg phem? Puas muaj tej kev qhia tshwm los ua pov thawj? Koj puas tuaj yeem txiav txim tias lawv yog ib tug tawm tsam khetos thiab ib tug tib neeg phem raws li qhov uas lawv tsis kam zwm rau leej twg uas ua thawj coj ntawd xwb? Qhov ntawd xwb tsis txaus muab txiav txim li no; qhov ntawd tsuas yog ib qho teeb meem ntawm tus moj yam xwb, uas yog ib qho teeb meem ntawm kev khav theeb thiab kev khav tias yus tus kheej coj ncaj ncees xwb. Lawv puas muaj tus yam ntxwv xeeb txawm ntawm ib tug tawm tsam khetos? Lawv puas yog ib tug tib neeg uas tsis nyiam qhov tseeb kiag li thiab ntxub qhov tseeb? Lawv puas tau cuam tshuam pawg ntseeg tes hauj lwm? Lawv puas tau txiav txim rau txhua tus thawj coj thiab neeg ua hauj lwm tias yog cov thawj coj cuav thiab cov tawm tsam khetos? Lawv puas tau ua tej no?” lawv txawm teb hais tias, “Zoo li lawv tau ua lawm.” Yog tom qab ntawd koj nug hais tias, “Yog li ntawd yuav tsum txiav txim thiab daws lawv li cas?” lawv hais tias lawv tsis paub. Yog koj nug hais tias, “Rau hom neeg zoo li no, peb puas tsim nyog ceeb toom rau lawv, thiab muab lawv nthuav tawm kom pab tau cov kwv tij thiab cov nkauj muam muaj kev paub cais?” lawv tseem tsis paub thiab. Qhov no yog qhov uas nug dab tsi los tsis paub thiab pom tsis tshab ib yam dab tsi li. Lawv pom tau qee yam cim ntawm tej xwm txheej tiam sis tsis paub txiav txim los sis daws hom neeg zoo li no raws li tej hauv paus ntsiab lus. Lawv puas daws tau tej teeb meem tiag tiag? Lawv puas tuaj yeem pab cov neeg Vajtswv xaiv tseg kawm paub? Vim cov tib neeg zoo li no yog cov tib neeg phem thiab cov tawm tsam khetos, tsis ntxov los lig lawv yeej yuav raug ntiab tawm mus xwb. Txawm li cas los xij, yog koj muab lawv ntsaig tawm mus los sis cais lawv tawm ua ntej lawv ua tej kev ua phem tiag tiag, lawv yuav tsis kam zwm rau, thiab cov kwv tij thiab cov nkauj muam yuav to taub tsis tau tias vim li cas koj thiaj li ua li ntawd. Yog li ntawd, qhov ntawd thiaj li cheem tsum cia lawv ua yeeb yam mus ib ntus tso. Thaum lawv tej kev ua phem pom tau meej zuj zus, thiab lawv pib tshaj tawm tej kev xam pom yuam kev thiab tej lus xaiv uas tsis muaj tseeb, kev coj mus yuam kev thiab xav rub cov kwv tij thiab cov nkauj muam los rau lawv sab, txeeb hwj chim thiab lub zog, tsim lub nceeg vaj rau lawv tus kheej, thiab xav rhuav tshem pawg ntseeg tes hauj lwm, tib neeg feem coob tuaj yeem pom meej txog lawv tus yam ntxwv xeeb txawm lub ntsiab tseeb, thiab cia li tuaj yeem sawv los muab lawv nthuav tawm, paub cais, thiab tso lawv tseg. Tom qab ntawd, koj tuaj yeem muab lawv ntsaig tawm mus thiab daws lawv raws li qhov tseeb tej hauv paus ntsiab lus. Tsuas yog ua hauj lwm zoo li no xwb mas thiaj li pab tau cov kwv tij thiab cov nkauj muam muaj kev paub cais. Cov thawj coj cuav puas tuaj yeem saib xyuas thiab daws tej teeb meem zoo li no? Cov thawj coj cuav tsis muaj lub peev xwm thiab txoj kev txawj ntse no. Koj puas pom muaj ib tug thawj coj cuav twg uas tuaj yeem daws cov tib neeg phem thiab cov tawm tsam khetos kom ncav sij hawm? Tsis muaj ib tug li. Yog li ntawd, cov thawj coj cuav yeej tsis tiv thaiv cov kwv tij thiab cov nkauj muam ntawm cov tib neeg phem tej kev cuam tshuam thiab cov tawm tsam khetos txoj kev coj mus yuam kev li. Tom qab raug rho tawm lawm, cov thawj coj cuav feem coob tsis yog tsuas tsis paub lawv tus kheej xwb, tiam sis lawv tseem yws ntau heev thiab yws tias Vajtswv lub tsev tsis ncaj ncees rau lawv, hais tias qhov no zoo li “tua tus nees luav tom qab tshem lub zeb zom lawm,” lawv hais tias lawv tau siv dag zog ua hauj lwm tiam sis tsis muaj leej twg pom qhov zoo thiab raug ua tsis ncaj ncees rau. Yog koj muab lawv nthuav tawm tias yog cov thawj coj cuav, lawv yeej tsis kam zwm rau, xav hais tias: “Kuv ua ib tug thawj coj tau ob peb xyoos lawm; txawm kuv tsis tau ua tau dab tsi los, yam tsawg kawg kuv twb tau tiv kev txom nyem lawm. Vim li cas thiaj li muab kuv rho tawm? Qhov no zoo li tua tus nees luav tom qab tshem lub zeb zom lawm!” Txawm koj muab lawv nthuav tawm li cas los, lawv yeej tsis kam zwm rau li. Lawv tseem hais tias, “Thaum kuv pom ib tug tawm tsam khetos, kuv ntxhov siab heev uas kuv lub qhov ncauj sawv hlwv tas li thiab pw tsis tsaug zog li. Kuv yuav ua li cas muaj lub nra zoo li no yog tias kuv yog ib tug thawj coj cuav?” Tej hauj lwm uas tsim nyog ua ntawd lawv yeej tsis tau ua li, ua tsis tau ib yam dab tsi li, thiab twb tsis paub tias tsim nyog ua dab tsi, tiam sis lawv tseem qhuas lawv tus kheej thiab. Qhov no tsis muaj teeb meem lod? Qhov ntawd qias npaum li cas!

Hais txog ntau yam teeb meem uas tshwm sim nyob rau hauv pawg ntseeg, cov thawj coj cuav yeej paub meej tias tej ntawd yog lub ntsiab xeeb txawm ntawm tej kev tab kaum thiab kev cuam tshuam pawg ntseeg tes hauj lwm, tiam sis lawv tsis quav ntsej li. Thaum lawv pom tej teeb meem uas pom tau meej, lawv tsuas yog lam ua kom dhau xwb thiab tsis muaj cuab kav muab tej teeb meem tseem ceeb uas yog lub ntsiab tseeb ntawd nthuav tawm. Lawv tsuas yog lam hais sab nraud thiab txhawb zog me ntsis los ntawm kev hais kev qhuab qhia yam tsis daws lub ntsiab ntawm tej teeb meem ntawd, ces tag li ntawd xwb. Thaum ntsib cov tib neeg phem thiab cov tawm tsam khetos, lawv yeej tsis paub ua li cas, coj ib tug cwj pwm uas tsis quav ntsej ib yam li qhov ntawd tsis muaj feem xyuam rau lawv. Lawv tsis paub tias yuav ua li cas thiaj li haum tshaj plaws los daws tej teeb meem no, tsis paub tias yuav hais li cas thiaj li daws tau tej teeb meem ntawd, tsis paub tias yuav tiv thaiv cov kwv tij thiab cov nkauj muam li cas, thiab tsis muaj lub nra dab tsi li. Tsuas yog lawv muaj lub siab zoo me ntsis xwb: Kuv paub tias koj yog ib tug tib neeg phem. Kuv yeej tsis pub koj cuam tshuam thiab ua phem rau cov kwv tij thiab cov nkauj muam. Tsuav yog kuv nyob rau txoj hauj lwm no, kuv yuav tsum tiv thaiv cov kwv tij thiab cov nkauj muam thiab ua kuv lub luag hauj lwm kom txog thaum kawg. Qhov no puas muaj qab hau dab tsi? Koj puas tau daws qhov teeb meem ntawd? Thaum koj tab tom ntxhov siab, cov tawm tsam khetos puas yuav nyob twj ywm? Lawv puas yuav tso tseg txoj kev cuam tshuam pawg ntseeg tes hauj lwm? Thaum lawv pom tias koj yog ib tug thawj coj uas siv tsis tau dab tsi thiab tais caus, ib tug uas nkim mov, yog ib tug uas tsis muaj txoj kev txawj ntse dab tsi thiab yeej tsis muaj lub peev xwm ua hauj lwm li, lawv yeej saib koj tsis khuab qhov muag hlo li. Cov tawm tsam khetos thiab cov tib neeg phem feem coob tshwj xeeb yog txawj dag thiab lim hiam. Lawv cuam tshuam thiab coj cov kwv tij thiab cov nkauj muam mus yuam kev, thiab koj yeej tsis muaj txoj hau kev los cheem los sis txwv lawv li. Koj kuj tsis paub tias yuav mus nrhiav leej twg los pab daws tej teeb meem no thiab; koj tsuas yog txhawj thiab ntxhov siab, quaj thaum koj thov Vajtswv. Saib koj txaus khuv leej heev; cuag nkaus li koj mas ua tib zoo xav txog Vajtswv tej kev npaj siab thiab hlub cov kwv tij thiab cov nkauj muam heev. Txawm yog cov tib neeg phem uas pom tau meej xws li cov tawm tsam khetos los, koj twb daws tsis tau lawv. Koj tsis muaj peev xwm soj ntsuam cov tawm tsam khetos tej kev ua thiab kev coj raws li qhov tseeb, thiab koj kuj tsis muaj peev xwm muab cov tawm tsam khetos tej kev npaj siab, kev txhawb siab, thiab tej kev coj nthuav tawm rau txhua tus los pab cov kwv tij thiab cov nkauj muam kom paub cais. Koj ua tsis tau ib yam dab tsi ntawm tej no li. Haj tseem muaj qee cov thawj coj cuav hais tias, “Leej twg los tsis txhob muab cov tawm tsam khetos nthuav tawm. Yog cov kwv tij thiab cov nkauj muam paub tias lawv yog cov tawm tsam khetos thiab txav deb ntawm lawv lawm, ces cov tawm tsam khetos yuav nrhiav kev ua pauj.” Qhov no tsis yog ib tug uas siv tsis tau thiab tais caus lod? Cov tib neeg zoo li no puas tuaj yeem ua tau pawg ntseeg tes hauj lwm? Lawv puas tiv thaiv tau cov kwv tij thiab cov nkauj muam kom thiaj li ua tau ib lub neej hauv pawg ntseeg li ib txwm? Qhov no yog hom kev daws teeb meem zoo li cas? Thaum tsis muaj dab tsi tshwm sim, lawv hais tau cov kev qhuab qhia yam tsis paub xaus li, tiam sis thaum muaj ib yam dab tsi tshwm tuaj, lawv cia li paub tsis meej thiab yoob, tsuas paub quaj xwb. Lawv tsis yog cov uas siv tsis tau thiab tais caus lod? Pom ntsoov cov kwv tij thiab cov nkauj muam raug cov tawm tsam khetos coj mus yuam kev thiab raug cov tib neeg phem cuam tshuam, lawv tsis paub ua li cas, thiab tsis muaj txoj kev los teb rov qab li. Lawv twb tsis paub yuav ua tes hauj lwm theem hauv paus tshaj plaws xws li kev koom nrog cov kwv tij thiab cov nkauj muam nyob hauv pawg ntseeg uas paub txog kev ncaj ncees, muaj kev ua neeg, thiab lees txais tau qhov tseeb ntawd los sib qhia, siv Vajtswv cov lus los daws tej teeb meem no, thiab muab cov tawm tsam khetos nthuav tawm thiab paub cais cov tawm tsam khetos. Ib tug neeg zoo li no tsis yog ib yam khoom seem txheej xwb lod? (Yog.) Qee cov thawj coj cuav mas xyuam xim dhau, tais caus, thiab siv tsis tau dab tsi. Lawv tais caus thiab siv tsis tau txog theem twg? Thaum muaj cov tib neeg phem tawm los tab kaum thiab cuam tshuam pawg ntseeg tes hauj lwm, hais lus phem thiab khav theeb tshwj xeeb, lawv ntshai ua rau lawv tshee hnyo, xav hais tias, “Kuv tsis muaj cuab kav daws lawv. Lawv phom sij heev; lawv yog ib tug tib neeg phem nyob hauv ntiaj teb. Yog kuv muab lawv nthuav tawm los tiv thaiv cov kwv tij thiab cov nkauj muam, lawv yeej yuav nrhiav kuv tej qhov tsis zoo los tawm tsam thiab ua pauj rau kuv. Yog li kuv puas yuav tau ua ib tug thawj coj mus ntxiv? Lawv paub tias kuv nyob qhov twg. Lawv puas yuav ua phem rau kuv tsev neeg? Lawv puas yuav qhia tawm txog qhov kuv ntseeg Vajtswv?” Cov thawj coj cuav zoo li no ris tsis tau pawg ntseeg tes hauj lwm. Lawv txoj kev ntshai heev ntawd ua rau lawv nyob twj ywm yam tsis ua dab tsi li; muaj tseeb tiag, lawv yeej tsis to taub tej hauv paus ntsiab lus rau qhov daws tej teeb meem thiab cov tib neeg zoo li no. Leej twg uas raug txiav txim tias yog tus tab kaum thiab cuam tshuam pawg ntseeg tes hauj lwm ntawd tsis yog ib tug neeg uas tsuas ua yuam kev qee zaus xwb. Tiam sis, lawv txoj kev ua neeg phem heev uas lawv yeej ib txwm lam tau lam ua kev phem yam tsis muaj kev tswj thiab ua ntau yam kev phem. Cov tib neeg zoo li no yeej muaj lub ntsiab tseeb ntawm cov tib neeg phem yam tsis muaj qhov ua xyem xyav li. Qhov daws cov tib neeg phem kuj tim tsum kom muaj qee txoj hau kev uas txawj ntse thiab. Koj yuav tsum xav txog qhov xwm txheej thiab ib puag ncig thiab tej kev ua uas cov tib neeg phem yuav ua tom qab raug daws lawm, thiab seb qhov no puas yuav coj teeb meem los rau pawg ntseeg. Tsuas yog los ntawm qhov ua tib zoo xav txog tej yam no xwb koj thiaj li tuaj yeem daws qhov teeb meem kom tsim nyog, nyob rau hauv ib txoj hau kev uas mus raws li qhov tseeb tej hauv paus ntsiab lus thiab muaj kev txawj ntse. Cov uas to taub qhov tseeb yuav to taub tau tej hauv paus ntsiab lus yam tsis paub thaum daws cov teeb meem zoo li no. Thaum lawv ua tes hauj lwm no, lawv yuav maj mam to taub tias yuav ua li cas rau ntau hom tib neeg, muaj tej txoj kev thiab tej hau kev, thiab muaj kev txawj ntse nyob hauv lawv lub siab. Tiam sis cov thawj coj cuav yeej tsis muaj tej kev, tej hau kev, thiab kev txawj ntse no hlo li. Qhov no yog vim lawv tsis ua tib zoo xav txog Vajtswv tej kev npaj siab; lawv tsis xav tias Vajtswv lub tsev tes hauj lwm puas yuav raug cuam tshuam, los sis seb cov thawj coj thiab cov neeg ua hauj lwm puas yuav ntsib kev phom sij. Vim lawv tsis xav txog tej no li, lawv daws tej teeb meem yam tsis muaj tej hauv paus ntsiab lus thiab haj yam tsis muaj kev txawj ntse. Cov thawj coj cuav daws tsis tau cov teeb meem no thiab tsis kawm paub los ntawm tej ntawd, ua pov thawj qhia hais tias lawv tsis kam kawm, tsis muaj peev xwm, tsis quav ntsej tej hauj lwm uas tsim nyog ua, thiab ua tsis tau ib qho hauj lwm twg li. Thaum lawv pom cov tib neeg phem thiab cov tawm tsam khetos ua phem thiab ua rau muaj tej kev cuam tshuam, lawv tsis muab cov tib neeg no nthuav tawm thiab tsis daws tej teeb meem ntawd. Lawv tsuas xav txog qhov tiv thaiv lawv tus kheej tej txiaj ntsim xwb, yam tsis quav ntsej txog pawg ntseeg tes hauj lwm los sis cov neeg Vajtswv xaiv tseg txoj kev nkag mus rau hauv lub neej txoj sia. Qee cov thawj coj cuav mas thab cov uas qaug zog thaum uas kuj ntshai cov uas muaj hwj chim dua lawv tus kheej thiab; lawv thab thiab khav hwj chim rau cov uas tsis tshua muaj zog, tiam sis thaum lawv ntsib cov tib neeg phem thiab cov tawm tsam khetos mas lawv luag ntxhi thiab hais lus qhuas ntxhias. Vajtswv puas nyiam cov thawj coj cuav thiab cov neeg ua hauj lwm cuav uas tsis muaj tej hauv paus ntsiab lus no? Yeej tsis nyiam kiag li. Vajtswv lub tsev puas yuav cob qhia cov tib neeg uas thab cov uas qaug zog thiab ntshai cov uas muaj zog, thiab cov tib neeg uas tsis paub txog kev ncaj ncees ntawd los ua cov thawj coj thiab cov neeg ua hauj lwm? Yeej tsis cob qhia kiag li! Cov tib neeg no puav leej yog cov tsis ntseeg thiab cov ib txwm tsis ntseeg uas tsis muaj lub siab txawj xav los sis laj thawj thiab yeej tsis lees txais qhov tseeb kiag li, thiab Vajtswv lub tsev yeej tsis xav tau lawv li.

Thaum muaj teeb meem tshwm sim nyob rau hauv tus thawj coj cuav tes hauj lwm, lawv yeej ib txwm zam kev ris lawv lub luag hauj lwm. Ib lo lus uas lawv nyiam hais tshaj plaws yog “Kuv tau sib qhia nrog lawv lawm.” Qhov no txhais hais tias “Kuv twb hais txhua yam uas kuv tsim nyog hais lawm, yog li ntawd thaum muaj xwm txheej dab tsi, qhov ntawd yog lawv lub luag hauj lwm. Kuv tsis muaj feem xyuam nrog qhov ntawd li.” Qhov no yog qhov vim li cas uas kab lus hais tias “Kuv tau sib qhia nrog lawv lawm” yog yam khoom uas tiv thaiv thiab kab lus niaj hnub hais rau cov thawj coj cuav. Yog ib tug thawj coj cuav pom ib tug tawm tsam khetos ua raws li lawv tus kheej txoj kev cai, lam tau lam ua phem yam tsis muaj kev tswj, thiab ua rau muaj kev cuam tshuam hauv pawg ntseeg, lawv kuj siv txoj kev sib qhia thiab kev pab thiab. Tom qab hais ob peb lo lus txhawb zog thiab ceeb toom, lawv xav tias tus tawm tsam khetos yuav mloog hais thiab zwm rau, thiab tsis coj neeg mus yuam kev los sis cuam tshuam lub neej hauv pawg ntseeg ntxiv lawm. Qhov no tsis yog ib qho kev xav uas ruam lod? Qhov kev siv txoj kev uas ruam zoo li no los txwv cov tawm tsam khetos txoj kev cuam tshuam ntawd mas yog ib tug thawj coj cuav txoj kev ua hauj lwm, thiab yog qhov uas ruam tshaj plaws tiag tiag! Ib tug thawj coj cuav mas tsuas yog khwv yam dig muag ntsuav xwb. Lawv tsuas yog khwv rau tej hauj lwm dav dav yam ua tsis tau tes hauj lwm tseem ceeb li. Lawv tsis ywg dej rau cov uas lees txais tau qhov tseeb, lawv tsis txwv cov uas tab kaum thiab cuam tshuam, thiab lawv tsis muab cov uas lam tau lam ua phem yam tsis muaj kev tswj thiab cov uas tsis kam hloov txawm yuav raug qhuab ntuas ntau zaus ntawd ntsaig tawm mus li. Tshwj xeeb tshaj yog lawv tsis quav ntsej tias cov tawm tsam khetos ua phem thiab cuam tshuam li cas li. Lawv tsis nthuav tawm los sis paub cais, thiab lawv kuj tsis muab cov tawm tsam khetos ntsaig tawm mus los sis ntiab tawm mus, cia cov tawm tsam khetos ntawd ua phem thiab cuam tshuam pawg ntseeg tes hauj lwm. Lawv yeej tsis quav ntsej kiag li thiab xav tias cov tawm tsam khetos tej kev ua phem yeej tsis muaj feem xyuam dab tsi rau lawv. Nyob hauv cov thawj coj cuav tes hauj lwm mas, lawv tsuas paub lam ua kom dhau xwb; lawv ua me ntsis cov hauj lwm dav dav ces xav tias lawv tau ua tes hauj lwm tiag tiag lawm thiab tias lawv yog cov thawj coj thiab cov neeg ua hauj lwm uas mus raws li tus qauv lawm. Txawm yog leej twg tab kaum thiab cuam tshuam pawg ntseeg tes hauj lwm los, lawv tsuas hais cov kev qhuab qhia rau cov neeg ntawd, txhawb zog thiab ceeb toom ob peb lo lus, ces xav tias daws tau qhov teeb meem lawm. Lawv khwv tas hnub, saib xyuas tag tej teeb meem loj me, thiab xav tias lawv ua tau hauj lwm zoo lawm, thiab tseem khav hais tias, “Saib peb pawg ntseeg seb. Txhua tus raug muab siv yam muaj txiaj ntsig: Cov uas tshaj tawm tau txoj moo zoo ces mus tshaj tawm txoj moo zoo, cov uas ua tau yeeb yaj kiab ces ua yeeb yaj kiab, cov uas txawj hu nkauj ces kaw nkauj qhuas Vajtswv—peb lub neej hauv pawg ntseeg mas tab tom vam meej!” Txawm li cas los xij, lawv yeej tsis pom ntau yam teeb meem uas zais nyob hauv pawg ntseeg hlo li. Lawv tsis muaj cuab kav daws cov tib neeg phem thiab cov tsis ntseeg uas yeej ib txwm tab kaum thiab cuam tshuam lub neej hauv pawg ntseeg, yog li ntawd lawv thiaj li tsis quav ntsej cov neeg ntawd. Lawv ua ntsej lag muag dig rau cov tawm tsam khetos uas ua raws li lawv tus kheej txoj kev, txhua tus xav rub tib neeg los rau lawv sab thiab tsim lawv tus kheej cov pab pawg me me. Lawv teb tsis tau ntau yam lus nug uas cov ntseeg tshiab uas tshaib thiab nqhis txoj kev ncaj ncees ntawd nug. Tsis hais tias nrhiav kev los daws cov teeb meem tiag tiag no hos, cov thawj coj cuav pheej xav zam tej ntawd, thaum uas tseem hais tias “lub neej hauv pawg ntseeg tab tom vam meej.” Qhov no tsis yog qhov ua txuj thiab dag lod? Cov thawj coj cuav cia cov tsis ntseeg, cov tib neeg phem, thiab cov tawm tsam khetos no nyob hauv pawg ntseeg yam tsis ntsaig lawv tawm mus los sis daws lawv, tso cai rau lawv lam tau lam ua kev phem yam tsis muaj kev tswj thiab ua rau lub neej hauv pawg ntseeg ntxhov quav niab, tib lub sij hawm ntawd lawv tseem ua txuj tsis pom qhov ntawd thiab. Cov thawj coj cuav zoo li no dig muag dhau lawm! Lawv ua ib lub kaus tiv thaiv rau cov tsis ntseeg, cov tib neeg phem, thiab cov tawm tsam khetos, thiab haj tseem muaj kev txaus siab los ntawm qhov no, xav hais tias qhov tsis ntsaig cov tib neeg phem no tawm mus yog kev hlub thiab tiv thaiv cov neeg Vajtswv xaiv tseg. Qhov no tsis yog qhov tab kaum thiab cuam tshuam pawg ntseeg tes hauj lwm lod? Qhov no tsis yog qhov txhob txwm tawm tsam Vajtswv thiab sawv tawm tsam Nws lod? Tiam sis cov thawj coj cuav yeej tsis paub txog qhov no kiag li. Yog koj nug lawv seb tej teeb meem tiag tiag no puas tau daws lawm, lawv hais tias, “Kuv tau ntuas lawv lawm; kuv tau sib qhia nrog lawv lawm,” uas qhia hais tias cov teeb meem raug daws lawm thiab tsis muaj feem xyuam rau lawv ntxiv lawm. Qhov no tsis yog qhov zam kev ris lub luag hauj lwm lod? Rau ib tug thawj coj cuav mas, thaum leej twg ua txhaum dab tsi, tsuav yog lawv lam ua kom dhau es muab tus ua txhaum ntawd ntuas thiab ceeb toom thiab txhawb zog me ntsis, ces lawv tes hauj lwm tiav lawm, thiab cuag nkaus li lawv tau daws qhov teeb meem ntawd lawm. Qhov no tsis yog qhov dag lod? Pom tau meej tias cov thawj coj cuav tsis ntsaig cov tsis ntseeg, cov tib neeg phem, thiab cov tawm tsam khetos tawm mus kom ncav sij hawm, thiab tom qab ntawd lawv nrhiav cov lus daws uas tsis muaj tseeb, hais tias, “Kuv tau sib qhia Vajtswv cov lus nrog lawv lawm, lawv puav leej paub txog yam lawv tau ua thiab hnov tu siab, thiab lawv puav leej quaj thiab hais tias lawv yeej yuav lees txim hloov dua siab tshiab thiab yuav tsis tsim lub nceeg vaj rau lawv tus kheej ntxiv lawm.” Cov thawj coj cuav no tsis yog tsuas dag lawv tus kheej, zoo li cov me nyuam yaus ua si xwb lod? Cov tsis ntseeg, cov tib neeg phem, thiab cov tawm tsam khetos no puav leej yog cov tib neeg uas tsis nyiam qhov tseeb kiag li. Lawv tsis lees txais qhov tseeb kiag li, thiab lawv tsis yog cov uas yuav tau txais Vajtswv txoj kev cawm dim; tiam sis, lawv yog cov uas Vajtswv tsis nyiam kiag li thiab ntxub. Tiam sis cov thawj coj cuav coj rau cov tsis ntseeg, cov tib neeg phem, thiab cov tawm tsam khetos no ib yam li cov kwv tij thiab cov nkauj muam, thiab pab lawv nrog txoj kev hlub. Lub ntsiab xeeb txawm ntawm qhov teeb meem no yog dab tsi tiag? Qhov ntawd puas yog kev ruam thiab kev tsis paub dab tsi uas txwv lawv kom pom tsis tshab cov tib neeg no, los sis yog lawv tab tom ua kom cov tib neeg ntawd zoo siab vim ntshai tsam ua rau cov tib neeg ntawd chim? Txawm yog vim li cas los xij, qhov tseem ceeb tshaj plaws mas yog cov thawj coj cuav tsis ua tes hauj lwm tiag tiag, thiab lawv tsis lees txais qhov tseeb los sis tsis lees paub lawv tej kev ua yuam kev thaum lawv raug ntuas li. Qhov no txaus los qhia hais tias cov thawj coj cuav tsis muaj qhov tseeb qhov muaj tiag hlo li. Lawv tsis ua hauj lwm raws li tej kev npaj tes hauj lwm ntawm Vajtswv lub tsev, tshwj xeeb yog qhov ntsig txog tes hauj lwm yaug pawg ntseeg kom dawb huv, lawv ua dog ua dig xwb. Lawv tsuas lam ua kom dhau los ntawm txoj kev muab ob peb tug tib neeg phem uas pom tau meej tshem tawm xwb. Thaum raug nthuav tawm thiab raug ntuas, lawv haj tseem nrhiav ntau yam laj thawj thiab hais ub hais no los zam kev ris lub luag hauj lwm thiab ntxeev lus los cav rau lawv tus kheej. Yog li ntawd, ib tug thawj coj cuav uas tsis ua tes hauj lwm tiag tiag yog ib lub pob zeb uas thaiv Vajtswv lub siab nyiam kom tsis txhob raug ua tiav. Cov thawj coj cuav tsuas ua qee yam hauj lwm dav dav sab nraud xwb, tej hauj lwm uas lawv ua mas tsis muaj nqis dab tsi kiag li. Lawv yeej tsis daws ntau yam teeb meem uas tshwm sim nyob rau hauv pawg ntseeg li; lawv tsuas nrhiav kev zam tej ntawd xwb. Qhov no tsis yog tsuas ua rau pawg ntseeg tes hauj lwm qhov kev nce qib li ib txwm qeeb xwb, tiam sis kuj cuam tshuam rau cov neeg Vajtswv xaiv tseg txoj kev nkag mus rau hauv lub neej txoj sia thiab. Hais yam tsis ua xyem xyav tias, cov thawj coj cuav tab kaum thiab cuam tshuam pawg ntseeg tes hauj lwm thiab ua lub kaus tiv thaiv rau cov tsis ntseeg, cov tib neeg phem, thiab cov tawm tsam khetos. Thaum lub sij hawm tseem ceeb ntawm kev ua tsov rog ntawm sab ntsujplig, lawv sawv ntawm cov tib neeg phem thiab cov tawm tsam khetos sab los tawm tsam thiab dag Vajtswv. Qhov no tsis yog ib qho kev qhia tshwm ntawm kev ntxeev siab rau Vajtswv lod? Saib los ntawm cov thawj coj cuav tej kev xam pom thiab tej kev coj, yeej pom tau meej tias lawv tsis yog cov tib neeg uas caum qhov tseeb li, lawv tsis to taub qhov tseeb kiag li, thiab lawv ua tsis tau tes hauj lwm ua thawj coj hlo li.

Cov thawj coj cuav tsis coj rau tib neeg raws li Vajtswv cov lus tiam sis ua raws li lawv tus kheej tej kev nyiam xwb. Lawv ua yam tsis muaj tej hauv paus ntsiab lus, ua txhua yam raws li lawv xav ua. Thaum lawv pom cov tawm tsam khetos cuam tshuam pawg ntseeg, cov thawj coj cuav tsis ntxub. Lawv ntseeg hais tias qhov nyeem Vajtswv cov lus me ntsis rau cov tawm tsam khetos yuav tuaj yeem txwv tau lawv tej kev tab kaum thiab kev cuam tshuam. Cov tawm tsam khetos yog hom neeg dab tsi? Lawv yog cov dab, lawv yog cov Ntxwgnyoog! Txawm lawv yuav ntseeg Vajtswv tau ntau xyoo npaum li cas los xij, cov tawm tsam khetos tsis lees txais qhov tseeb kiag li thiab tseem tuaj yeem tab kaum thiab cuam tshuam pawg ntseeg tes hauj lwm thiab cuam tshuam cov neeg Vajtswv xaiv tseg txoj kev nkag mus rau hauv lub neej txoj sia. Lawv yog cov dab thiab Ntxwgnyoog hauv lub neej tiag tiag no. Cov thawj coj cuav cia siab tias yuav ua rau cov tawm tsam khetos hnov tu siab thiab hloov lawv lub siab los ntawm qhov nyeem ob peb nqe Vajtswv cov lus rau lawv. Qhov no tsis yog ruam dhau lawm lod? Cov tib neeg zoo li cov tawm tsam khetos mas tsis lees txais qhov tseeb kiag li. Txawm lawv yuav ua kev phem ntau npaum li cas los xij, lawv yuav tsis tig xav txog los sis paub lawv tus kheej, thiab txawm lawv yuav ua yuam kev ntau npaum li cas los xij, lawv yuav tsis lees lawv tej kev ua yuam kev. Lawv yog cov niag neeg phem uas raug teem tseg kom mus rau hauv ntuj tawg, tiam sis koj xav hais tias qhov nyeem ob peb nqe Vajtswv cov lus thiab muab qee cov lus ntuas ntawd tuaj yeem hloov lawv—qhov no tsis yog kev ua npau suav lod? Yog cov noob neej uas qias vuab tsuab tuaj yeem lees txais qhov tseeb yam yooj yim, Vajtswv yeej yuav tsis tas ua tes hauj lwm txiav txim thiab rau txim. Vim li cas Vajtswv thiaj li hais ntau cov lus thiab nthuav tawm ntau qhov tseeb nyob rau hauv Nws tes hauj lwm? Qhov ntawd yog vim qhov cawm tib neeg mas tsis yooj yim, vim tib neeg tej kev nyuaj ntau dhau thiab lawv txoj kev tig tawm tsam loj dhau! Tsuas yog cov uas lees txais tau qhov tseeb xwb thiaj li yuav tau txais kev cawm dim. Cov uas tsis nyiam qhov tseeb kiag li thiab ntxub qhov tseeb yeej yuav tsis tau txais kev cawm dim. Txawm li cas los xij, cov thawj coj cuav ntseeg hais tias yog lawv hais qee cov lus hnyav rau cov tsis ntseeg, cov tib neeg phem, thiab cov tawm tsam khetos, ces cov tib neeg no yuav hnov tu siab thiab los paub lawv tus kheej, thiab tias yog tom qab ntawd lawv hais qee cov lus ntuas thiab nplig siab rau cov neeg ntawd, cov neeg ntawd yuav lees txim hloov dua siab tshiab, ua rau cov neeg ntawd tuaj yeem tsom ntsoov rau qhov ua lawv tej dej num, dhau los ua cov uas ua siab ncaj, thiab hloov hauv tus moj yam, hloov cov tawm tsam khetos los ua cov yaj uas mloog lus. Qhov no tsis yog ib qho kev xav uas ruam lod? Qhov kev xav no ruam heev! Qhov no zoo li ib tug neeg vwm lam tau lam hais lus—tej yam yuav yooj yim npaum li ntawd tau li cas! Vajtswv ua tes hauj lwm txiav txim tau peb caug tawm xyoo lawm, thiab tib neeg muaj txoj kev paub txog lawv tus kheej thiab muaj txoj kev hloov ntau npaum li cas lawm? Tsuas muaj tib neeg feem tsawg thiaj li ua tau qee yam txiaj ntsig xwb. Cov uas tsis nyiam qhov tseeb, txawm lawv yuav mloog lus qhuab qhia ntau npaum li cas los, ntau kawg lawv yeej tsuas to taub qee qhov kev qhuab qhia xwb. Lawv lub neej txoj sia tus moj yam yeej tsis hloov kiag li, thiab txawm yog tej kev coj zoo thiab kev ua zoo los yeej tsis tshua pom los ntawm lawv li. Cov neeg no yog hom neeg dab tsi? Lawv yog cov tib neeg uas noj ncuav kom tsau plab—lawv yeej tsis lees txais qhov tseeb kiag li. Lawv tsuas tsom ntsoov rau txoj kev xyiv fab rau Vajtswv txoj hmoov hlub thiab tsuas caum kom tau koob hmoov xwb; lawv tsuas yog cov niag tsiaj nyaum uas hnav khaub ncaws xwb! Tib neeg raug Ntxwgnyoog muab ua qias vuab tsuab tob heev; lawv muaj cov moj yam qias vuab tsuab puv npo, thiab lawv cov pob txha thiab cov ntshav muaj Ntxwgnyoog tej tshuaj lom puv npo. Yog lawv lees txais tsis tau qhov tseeb, los sis Vajtswv txoj kev txiav txim thiab rau txim, lawv yuav ua li cas thiaj li zwm tau rau Vajtswv tiag tiag? Lawv yuav ua li cas thiaj li ua tau lawv tej dej num yam muaj kev ua siab ncaj? Lawv yuav ua li cas thiaj li tuaj yeem hwm thiab ntshai Vajtswv thiab zam kev phem? Qhov tau txais kev cawm dim ntawd puas yuav yooj yim li qhov tib neeg xav hauv nruab siab? Ntxwgnyoog muab tib neeg ua qias vuab tsuab tau ntau txhiab xyoo lawm, mus txog theem uas lawv tau dhau los ua cov dab lawm. Tam sim no Vajtswv tau los cawm tib neeg, thiab txawm Nws yuav hais ntau cov lus npaum li cas los, qhov hloov cov tib neeg uas tau dhau mus ua cov dab los ua cov tib neeg tiag tiag ntawd mas yog ib txoj hauj lwm uas nyuaj kawg nkaus. Tsis yog Vajtswv yuav tsum nthuav tawm qhov tseeb ntau yam xwb, tiam sis tib neeg kuj yuav tsum siv zog koom tes los ntawm qhov caum, lees txais, thiab ua raws li qhov tseeb—tsuas yog ua li ntawd xwb lawv thiaj li khiav dim ntawm Ntxwgnyoog lub zog thiab tau txais Vajtswv txoj kev cawm dim. Vajtswv tau hais dua tias, “Muaj coob leej raug hu, tiam sis muaj tsawg leej thiaj li raug xaiv xwb.” Txawm hais tias ntau tus tib neeg ntseeg Vajtswv los, tsuas yog cov uas ntsib pom Vajtswv txoj kev txiav txim thiab kev rau txim tiag tiag, thiab zwm rau Nws tes hauj lwm tag nrho xwb, thiaj li tuaj yeem raug ntxuav kom dawb huv thiab raug ua kom zoo tiav log. Cov tsis ntseeg, cov tib neeg phem, thiab cov tawm tsam khetos uas yeej tsis lees txais qhov tseeb me me li ntawd, lawv lub siab tsis nyiam qhov tseeb kiag li; lawv yeej yuav tsis muaj hnub tau txais Vajtswv txoj kev cawm dim li, thiab lawv tsuas yuav raug nthuav tawm thiab muab pov tseg los ntawm Vajtswv tes hauj lwm xwb. Cov thawj coj cuav yeej tsis muaj kev paub txog Vajtswv tes hauj lwm li. Lawv xav txog Vajtswv tes hauj lwm uas cawm tib neeg yam uas yooj yim zoo li no, ntseeg hais tias los ntawm qhov nyeem Vajtswv cov lus me ntsis rau cov tib neeg phem thiab cov tawm tsam khetos thiab hais qee cov lus ntuas uas hnyav, ces lawv yuav lees txim hloov dua siab tshiab thiab hloov lawm, thiab dhau los ua cov uas ua siab ncaj nyob hauv qhov ua lawv tej dej num. Qhov no yog teeb meem dab tsi? Dhau ntawm qhov tsis caum qhov tseeb thiab tsis to taub qhov tseeb lawm, qhov ntawd kuj yog vim cov thawj coj cuav lub peev xwm tsis zoo kiag li thiab; yog li ntawd, lawv tsis muaj kev to taub kiag li thaum hais txog Vajtswv tes hauj lwm thiab qhov uas Vajtswv cawm tib neeg li cas ntawd. Yuav saib seb ib tug neeg lub ntsiab tseeb yog dab tsi, seb lawv puas muaj qhov tseeb qhov muaj tiag, thiab seb yuav tsum coj li cas rau lawv, qhov ntawd yuav tsum ua tib zoo saib los ntawm lawv lub peev xwm thiab lawv tus cwj pwm uas muaj rau qhov tseeb—koj yuav tsum saib seb lawv txoj kev to taub qhov tseeb zoo li cas thiab seb lawv puas lees txais tau qhov tseeb. Yog li, lub hauv paus rau qhov ntsuas seb ib tug neeg puas to taub tau qhov tseeb yog dab tsi? Qhov tseem ceeb mas yog saib raws li lawv lub peev xwm zoo li cas thiab seb lawv txoj kev to taub txog Vajtswv cov lus puas yog. Qee tus tib neeg ua neej nyob mus txog tsib caug los sis rau caum xyoo thiab tseem pom tsis tshab lub ntsiab tseeb thiab qhov muaj tiag ntawm noob neej txoj kev qias vuab tsuab. Lawv tseem xav hauv nruab siab tias noob neej lub zej zog zoo nkauj heev thiab xav ua neej nyob kaj siab lug thiab sib haum xeeb nrog lwm tus. Qhov no puas yog qhov uas ruam dhau thiab tsis paub qab hau li? Yog kev ntseeg Vajtswv tuaj yeem hloov txhua tus mus ua cov tib neeg zoo, ua li puas yuav muaj kev tim tsum rau Vajtswv ua tes hauj lwm txiav txim thiab rau txim los cawm tib neeg? Cov thawj coj cuav tsis txiav txim txog ntau hom tib neeg raws li Vajtswv cov lus tiam sis tsuas yog raws li cov tib neeg ntawd txoj kev coj sab nraud thiab raws li tej kev xav ntawm tus kheej xwb. Tib lub sij hawm ntawd tes hauj lwm uas lawv ua kuj ntiav heev thiab, zoo li cov me nyuam yaus ua si. Lawv xav hais tias qee zaus lawv nrhiav tau Vajtswv cov lus uas raug los siv rau ib qho xwm txheej twg, thiab tias tsuas yog nyeem Vajtswv cov lus me ntsis rau tib neeg ces lawv yuav hloov tau lawm: “Saib seb, nyob rau hauv kuv txoj kev coj thiab kev ntuas, nrog rau kuv txoj kev pab uas muaj lub siab hlub ntawd, Vajtswv cov lus tau muaj txiaj ntsig rau hauv tib neeg lawm. Lawv tsis xav ua cov tawm tsam khetos ntxiv lawm, thiab lawv txaus siab hlo hloov lawv tej kev xam pom txog kev ntseeg Vajtswv. Lawv yuav tsis txeeb kom tau lub hwj chim thiab kev tau txais txiaj ntsim ntxiv lawm, thiab lawv yuav tsis tsim tej nceeg vaj rau lawv tus kheej lawm; lawv yuav tsis tab kaum thiab cuam tshuam pawg ntseeg tes hauj lwm ntxiv lawm, thiab lawv yuav tsis ntxias los sis coj cov kwv tij thiab cov nkauj muam mus yuam kev ntxiv lawm!” Koj puas txwv tau lawv? Koj yeej yuav txwv tsis tau cov uas yog cov tib neeg phem tiag tiag uas ua rau muaj tej kev tab kaum thiab kev cuam tshuam li. Vim lawv muaj lub ntsiab tseeb ntawm cov tib neeg phem, lawv yuav ua kev phem txhua lub sij hawm nruab hnub los sis hmo ntuj; thaum twg lawv tau lub cib fim, lawv yeej yuav ua kev phem. Yog koj tsis muab lawv ntsaig tawm hauv pawg ntseeg mus puas tau? Lawv puas yuav yeem tso lawv tej kev ua phem tseg? Lawv tsis yog tib neeg; lawv yog cov dab thiab Ntxwgnyoog! Cov dab thiab Ntxwgnyoog tawm tsam Vajtswv tau ntau xyoo npaum li cas lawm? Txog niaj hnub no los lawv yeej tseem tawm tsam Vajtswv. Cov tawm tsam khetos thiab txhua hom tib neeg phem uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg yog cov dab thiab Ntxwgnyoog hauv lub neej tiag tiag; lawv yog cov yeeb ncuab hauv lub neej tiag tiag. Lawv puas hloov tau lawv lub ntsiab tseeb vim yog koj ob peb lo lus los sis vim yog koj lub siab hlub? Koj ruam dhau lawm! Koj xav tias koj tuaj yeem cawm tib neeg dim ntawm kev txhaum tsuas yog vim koj to taub kev qhuab qhia me ntsis xwb lod? Koj puas tuaj yeem cawm tau lawv? Lawv raug teem tseg kom mus rau hauv ntuj tawg, hos koj tseem xav tias ob peb lo lus zoo tuaj yeem hloov lawv. Qhov ntawd puas yooj yim npaum li ntawd? Yog tib neeg yooj yim cawm npaum li ntawd, ces Vajtswv yeej tsis tas hais lus ntau npaum li ntawd los sis ua tes hauj lwm txiav txim thiab rau txim lawm. Nws puas yuav siv sij hawm ntau npaum li ntawd thiab siv cov ntshav ntawm Nws lub siab ntau npaum li ntawd los cawm tib neeg?

Tam sim no, nyob rau hauv pawg ntseeg, ntau hom tib neeg tau raug nthuav tawm thiab cais raws li lawv hom. Txhua tus yuav tsum raug faib raws li lawv hom, thiab muaj tej hauv paus ntsiab lus thiab cov kev cai tswj fwm hauv Vajtswv lub tsev uas tswj hwm seb yuav coj rau thiab daws ntau hom tib neeg li cas. Vajtswv muaj kev ua siab ntev thiab kev thev taus, kev hlub tshua thiab lub siab zoo uas muaj kev hlub, thiab ib tug moj yam uas ncaj ncees—tiam sis tsis txhob hnov qab tias Vajtswv kuj muaj kev npau taws thiab kev muaj hwj chim heev thiab. Ib txhia tib neeg hais tias, “Vajtswv xav kom txhua tus tib neeg raug cawm dim thiab tsis xav kom ib tug twg raug kev puas tsuaj li.” Qhov no muaj tseeb, tiam sis Vajtswv xav kom “txhua tus tib neeg” raug cawm dim, tsis yog txhua yam los sis txhua tus dab. Thaum tib neeg raug kev puas tsuaj, Vajtswv tu siab thiab mob siab. Thaum cov dab raug kev puas tsuaj, qhov ntawd yog lawv qhov kawg uas tsim nyog thiab kev rau txim uas tsim nyog tau txais; Vajtswv tsis mob siab rau lawv. Qhov no yog Vajtswv tus moj yam thiab Nws lub hauv paus ntsiab lus uas coj rau tib neeg. Tib neeg pheej xav sawv tawm tsam Vajtswv, xav hais tias cov tsis ntseeg, cov tib neeg phem, thiab cov tawm tsam khetos kuj yog tib neeg thiab. Lawv ntseeg hais tias cov uas yeej ib txwm tab kaum thiab cuam tshuam pawg ntseeg tes hauj lwm los kuj yog tib neeg thiab, cov uas txeeb lub meej mom thiab tsim tej nceeg vaj rau lawv tus kheej los kuj yog tib neeg thiab, thiab cov uas yeej ib txwm ua plees ua yi los kuj yog tib neeg thiab. Lawv muab tag nrho cov tib neeg uas yog hom dab no teev rau hauv cov neeg Vajtswv xaiv tseg. Qhov no puas yog qhov uas tsis muaj qab hau kiag li? Qhov no tsis yog tawm tsam rau yam uas Vajtswv lub siab xav lod? Vim lawv tej kev xam pom txog tej yam ntawd mas tawm tsam Vajtswv cov lus thiab qhov tseeb tag nrho, lawv tej kev xav txog ntau hom tib neeg uas tsis zoo, cov dab thiab Ntxwgnyoog ntawd yeej txawv kiag ntawm Vajtswv cov lus, txawv loj heev li. Vajtswv yeej tsis tau coj rau cov dab uas raws Ntxwgnyoog qab ntawd tam li yog tib neeg. Vajtswv txiav txim cov tib neeg no li cas? Lawv yog dab Ntxwgnyoog cov tub qhe; lawv yog cov tsiaj nyaum. Los ntawm cov thawj coj cuav tej kev npaj siab zoo thiab kev hlub uas tsis meej pem, thiab raug yuam los ntawm lawv tus kheej tej kev xav hauv nruab siab, lawv coj rau cov tsis ntseeg, cov dab, thiab Ntxwgnyoog cov tub qhe yam li yog cov kwv tij thiab cov nkauj muam. Yog li ntawd, lawv thiaj muab kev hlub thiab kev ua siab zoo loj heev rau cov neeg ntawd, pab thiab txhawb cov neeg ntawd tas li. Qhov tshwm sim los, vim cov thawj coj cuav muab kev txhawb, kev pab, thiab kev coj rau cov tib neeg ntawd, cov kwv tij thiab cov nkauj muam tiag tiag, cov uas Vajtswv xav cawm ntawd, raug cuam tshuam loj heev; lub neej hauv pawg ntseeg yeej tsis tuaj yeem nkag mus rau txoj kev uas yog li, thiab cov kwv tij thiab cov nkauj muam yeej tsis tuaj yeem noj thiab haus Vajtswv cov lus thiab sib qhia qhov tseeb li ib txwm yam tsis muaj kev cuam tshuam los ntawm cov tib neeg phem li. Qhov no tsis yog cov thawj coj cuav qhov “txiaj ntsig” lod? Lawv qhov “txiaj ntsig” mas loj heev: Tsis yog tsuas tiv thaiv tsis tau cov kwv tij thiab cov nkauj muam xwb, tiam sis lawv kuj muab kev hwm thiab kev tiv thaiv uas tsis tsim nyog rau cov tib neeg phem thiab cov tawm tsam khetos ntawd thiab. Qhov no tsis yog qhov tab kaum pawg ntseeg tes hauj lwm lod? Lub ntsiab xeeb txawm ntawm qhov uas cov thawj coj cuav ua li no yeej yog kev tab kaum, tiam sis lawv xav hais tias lawv tab tom tiv thaiv pawg ntseeg tes hauj lwm thiab pab thiab txhawb cov neeg Vajtswv xaiv tseg. Vajtswv saib cov thawj coj cuav tej kev ua no li cas? Vajtswv ntxub, Nws ntxub tej ntawd tshwj xeeb! Cov thawj coj cuav tsis ua tes hauj lwm tiag tiag tiam sis tsom ntsoov rau qhov tiv thaiv cov tib neeg phem, ua Ntxwgnyoog cov tub qhe. Qhov no ua rau cov neeg Vajtswv xaiv tseg—cov uas nyiam qhov tseeb—tsis tuaj yeem tau txais kev yug thiab kev txhawb los ntawm pawg ntseeg txawm hais tias ua lub neej hauv pawg ntseeg los xij, thiab lawv xav ua lawv tej dej num tiam sis tsis muaj kev nyab xeeb uas ruaj ntseg. Cov thawj coj cuav tsis paub txog cov teeb meem no kiag li thiab xav hais tias, “Kuv coj rau txhua tus ib yam nkaus lawm, yog li ntawd vim li cas nej thiaj li tseem yws? Kuv yuav tsum ua li cas es nej thiaj li yuav txaus siab? Qhov no yog qhov txhais hais tias coj ncaj ncees rau tib neeg. Nej tsuas yog xaiv thiab nyuaj ua kom txaus siab xwb! Txawm li cas los xij, kuv muaj kev ris lub luag hauj lwm rau Vajtswv; kuv tab tom ua txhua yam nyob rau ntawm Vajtswv lub xub ntiag!” Lawv hais tau tej lus zoo li no puas yog lawv tsis muaj laj thawj kiag li? Lawv tsis yog cov uas ruam tshaj plaws lod? Lawv yeej tsis muaj laj thawj thiab ruam tshaj plaws li. Vajtswv lub tsev hais txhua hnub txog qhov uas Vajtswv cawm noob neej li cas, tiam sis cov thawj coj cuav yeej tsis to taub Vajtswv cov lus li. Lawv xav hais tias txawm tus neeg ntawd yog leej twg, txawm tus neeg ntawd lub ntsiab tseeb yog dab tsi, txawm tej yam phem uas lawv tau ua ntawd phem npaum li cas, thiab txawm lawv txoj kev ua neeg lim hiam npaum li cas los xij, nyob rau hauv txoj kev coj ntawm Vajtswv cov lus thiab nrog txoj kev pab los ntawm tib neeg txoj kev txhawb uas muaj kev hlub, lawv yeej yuav lees txim hloov dua siab tshiab thiab tig rov qab ib hnub xwb. Qhov kev xam pom no tsis yog yuam kev tag nrho lod? (Yog.) Dhau ntawm qhov uas muaj kev to taub yuam kev hnyav txog Vajtswv cov lus ntawd, cov thawj coj cuav kuj ua txuj tias lawv to taub Vajtswv tej kev npaj siab thiab, xav hauv ib txoj kev uas yog ib sab xwb thiab ua tej yam raws li lawv tus kheej tej kev ntshaw uas twm xeeb, lawv muab kev ua zoo thiab kev hlub rau cov tib neeg phem thiab cov tawm tsam khetos. Thiab qhov tshwm sim los yog dab tsi? Thaum kawg lawv tiv thaiv cov tib neeg phem thiab cov tawm tsam khetos, dhau los ua cov neeg ntawd cov neeg koom tes, muab tej cib fim thiab ib qho chaw zoo rau cov neeg ntawd los tab kaum thiab cuam tshuam pawg ntseeg tes hauj lwm thiab lub neej hauv pawg ntseeg. Tib lub sij hawm ntawd, cov kwv tij thiab cov nkauj muam uas tim tsum kev tiv thaiv tiag tiag ntawd raug tsis quav ntsej los ntawm cov thawj coj cuav, uas yeej ib txwm tsis nug lawv hais tias, “Nej xav li cas txog qhov uas muaj cov tib neeg phem thiab cov tawm tsam khetos no nyob hauv pawg ntseeg, thiab cov uas tso tej kev xav tsis zoo tawm thiab tshaj tawm tej kev xav phem? Nej puas pom zoo nrog qhov cia lawv nyob hauv pawg ntseeg? Nej puas txaus siab ua nej tej dej num thiab ua lub neej hauv pawg ntseeg nrog lawv?” Lawv yeej ib txwm tsis nug seb cov kwv tij thiab cov nkauj muam xav li cas txog tej no li. Nej xav li cas—cov thawj coj thiab cov neeg ua hauj lwm zoo li no tsis qias heev lod? Lawv ua hauj lwm nyob rau hauv lub npe tias yog cov thawj coj thiab cov neeg ua hauj lwm, nyob hauv tej npe zoo li no, tiam sis lawv tab tom ua tes hauj lwm tiv thaiv Ntxwgnyoog thiab Ntxwgnyoog cov tub qhe. Qhov ntawd mas tu siab tiag tiag! Yog koj hais tias cov thawj coj thiab cov neeg ua hauj lwm zoo li no lub peev xwm tsis zoo thiab ua tsis tau tes hauj lwm tiag tiag, tej zaum lawv yuav tsis kam zwm rau. Lawv yuav hnov tias raug ua tsis ncaj ncees rau, xav hais tias lawv khwv txhua hnub thiab tsis tau nyob dawb, yog li ntawd ua li cas thiaj li hais tias lawv tsis ua tes hauj lwm tiag tiag? Tiam sis raws li lawv tej kev qhia tshwm—lawv xav hais tias ob pab neeg no puav leej tseem ceeb, xav hais tias yuav tsum coj rau ob pab neeg no ib yam nkaus, siv qhov kev coj kom ncaj ncees los ua qhov laj thawj tso cai rau cov tib neeg phem thiab cov uas tab kaum thiab cuam tshuam kom quab yuam lwm tus hauv pawg ntseeg, thiab tso cai rau ntau yam kev ua phem kom muaj nyob hauv pawg ntseeg mus ntxiv—cov thawj coj thiab cov neeg ua hauj lwm no yog dab tsi? Raws li lawv tej kev qhia tshwm, lawv txoj hau kev thiab tej hauv paus ntsiab lus ntawm kev ua hauj lwm, thiab lawv tej kev txhawb siab rau kev ua hauj lwm, lawv yeej yog cov thawj coj cuav thiab cov neeg ruam uas feeb tsis meej tiag tiag. Qhov hais li no puas yog? (Yog.)

Nyob rau hauv lub zej zog, txawm yog nyob rau pab pawg los sis theem tib neeg twg los xij, lawv tsis faib cov tib neeg phem thiab cov tib neeg zoo, thiab haj yam tsis tham txog tias Ntxwgnyoog ua rau tib neeg qias vuab tsuab li cas los sis noob neej uas qias vuab tsuab lub ntsiab tseeb yog dab tsi; lawv haj tseem twb tsis faib qhov zoo thiab qhov phem thiab. Tiam sis nyob rau hauv Vajtswv lub tsev, txhua yam puav leej ua raws li Vajtswv cov lus; qhov tseeb yeej tsis muaj hnub hloov, thiab Vajtswv cov lus ua tau txhua yam tiav. Nyob rau hauv pawg ntseeg, ntau hom tib neeg raug nthuav tawm los ntawm Vajtswv cov lus, thiab lawv cia li raug cais raws li lawv hom lawm. Txhua hom tib neeg yuav tsum raug muab siv kom tau zoo raws li lawv txoj kev ua neeg, lawv tej kev caum, thiab lub ntsiab tseeb. Qhov no puas yog kev cais tib neeg raws qib? Qhov no tsis yog kev cais tib neeg raws qib, tiam sis yog kev cais lawv ua pawg. Txhua tus tib neeg yuav tsum raug cais raws li lawv hom—lawv yuav tsum raug muab tso rau qhov chaw uas tsim nyog rau lawv. Qhov muab sib xyaw ua ke mas txais yuav tsis tau li; qhov sib xyaw ua ke ntawd tsuas yog ib ntus thiab muaj lub sij hawm teem tseg xwb. Piv txwv li, thaum cov txhauv thiab cov nplej sib xyaw ua ke, yog tias qhov dob cov txhauv ntawd yuav cuam tshuam rau cov nplej thiab tej zaum yuav ua rau cov nplej tuag, ces xub tsis txhob maj dob cov txhauv ntawd. Tiam sis qhov tsis dob cov txhauv ntawd tsis tau txhais hais tias tej ntawd tsis raug cais ua pawg—yog li ntawd thaum twg mam li dob? Thaum txog lub sij hawm uas tsim nyog; Vajtswv yuav npaj lub sij hawm ntawd. Tam sim no yog lub sij hawm uas txhua tus yuav raug cais raws li lawv hom lawm; txhua hom tib neeg yuav tsum raug cais ua pawg. Qhov no yog qhov tim tsum. Vim li cas thiaj li yuav tsum ua tes hauj lwm no? Thaum saib raws li lub tswv yim mas, muaj lub hauv paus ntawm Vajtswv cov lus; thaum saib raws li qhov xwm txheej tiag tiag mas, qhov ntawd yog ib qho uas yuav tsum ua li no—qhov ntawd muaj nuj nqis tseeb tiag, thiab yog qhov uas yuav tsum ua li ntawd. Thaum qhov dob cov txhauv tsis cuam tshuam rau cov nplej lawm, ces yuav tsum muab cov txhauv ntawd dob tawm mus thiab muab cais tawm ntawm cov nplej. Yog muab cov tsis ntseeg thiab cov tib neeg phem—cov uas yog cov txhauv ntawd—los coj rau yam li yog cov kwv tij thiab cov nkauj muam, qhov ntawd mas tsis ncaj ncees kiag li rau txhua tus kwv tij thiab nkauj muam uas muab lawv tus kheej fij rau Vajtswv tiag tiag. Nyob rau ib qho mas, cov tib neeg no nquag raug cuam tshuam, thiab raug ua phem los ntawm cov tib neeg phem uas tab kaum thiab cuam tshuam pawg ntseeg tes hauj lwm. Hos nyob rau lwm qhov mas, qee tus tib neeg uas theem ntawm sab ntsujplig me tsis to taub qhov tseeb, thaum lawv ntsib cov tib neeg phem uas tab kaum thiab cuam tshuam ntawd, lawv yuav raug txwv, dhau los xav tsis zoo thiab qaug zog, los sis haj tseem yuav ntog thiab. Tsis tas li ntawd xwb, txhua yam uas cov tab kaum thiab cuam tshuam ua thiab txhua lo lus uas lawv hais puav leej ua rau muaj kev ntxhov quav niab, ntxhov hnyo, thiab tej xwm txheej uas muaj kev kub ntxhov. Qhov xwm txheej uas muaj tiag tshaj plaws yog thaum lawv ua ib teg dej num los sis ua qee yam hauj lwm, lawv lam tau lam ua kev phem yam tsis muaj kev tswj thiab tsis ua raws li tej hauv paus ntsiab lus, uas ua rau nkim tib neeg lub zog, khoom siv, thiab nyiaj txiag ntau heev yam ua tsis tau cov txiaj ntsig dab tsi li. Thaum kawg, zoo li cas? Thaum lawv raug rho tawm, txhua tus yuav tau them rau lawv tej kev ua phem ntawd. Yuav tsum tau muab tes hauj lwm los ua dua tshiab, thiab tib neeg lub zog, khoom siv, lub sij hawm, thiab lub zog uas muaj nqis tshaj plaws ntawm txhua tus uas tau siv ua ntej ntawd raug nkim pov tseg vim lawv tej kev ua phem uas lam tau lam ua thiab tsis muaj txoj kev yuav them tau rov qab los. Qhov kev cuam tshuam tsis zoo uas lawv coj los rau tes hauj lwm no mas loj dhau lawm! Tsis muaj leej twg ris taus lub luag hauj lwm no. Txawm hais tias tom qab no tau muab tes hauj lwm no ua tau zoo lawm los xij, tej kev puas tsuaj yav tas los yeej tsis muaj leej twg them tau rov qab los li. Ib txhia tib neeg hais tias kom lawv them nyiaj; qhov no mas yeej tsim nyog ua, tiam sis nyiaj puas yuav tau lub sij hawm? Nyiaj puas yuav tau cov kwv tij thiab cov nkauj muam lub sij hawm thiab lub zog, los sis tus nqi uas lawv tau them los ntawm lub siab dawb paug? Yuav tsis tau—tej ntawd tsis muaj tus nqi twg yuav tau li! Txawm hais tias muaj pes tsawg tus neeg ua rau muaj tej kev tab kaum thiab kev cuam tshuam nyob rau hauv pawg ntseeg los, tej uas tshwm sim los mas ntsuas tsis tau li. Ntau tus kwv tij thiab nkauj muam txoj kev nkag mus rau hauv lub neej txoj sia yuav raug cuam tshuam. Qhov kev puas tsuaj no mas loj heev thiab them tsis tau rov qab li. Qhov kev puas tsuaj rau cov kwv tij thiab cov nkauj muam lub neej txoj sia puas them tau rov qab los? Leej twg yuav them rau qhov kev puas tsuaj no? Yog li ntawd, cov tib neeg phem no yuav tsum raug tshem tawm mus. Lawv tsis yog tib hom ntawm cov kwv tij thiab cov nkauj muam uas caum qhov tseeb. Lawv yog ib pab ntawm cov dab thiab Ntxwgnyoog, uas tuaj rau hauv Vajtswv lub tsev tuaj cuam tshuam thiab rhuav tshem. Yog cov tib neeg phem no tsis raug ntsaig tawm hauv pawg ntseeg mus, pawg ntseeg tes hauj lwm thiab qhov raws qib raws duas ntawm lub neej hauv pawg ntseeg yuav tsis muaj hnub ruaj ntseg tau li. Txawm hais tias muaj pes tsawg tus neeg nyob hauv ib pab pawg los xij, tsuav yog muaj ib tug neeg nyob hauv lawv uas tab kaum thiab cuam tshuam—ib tug neeg uas lam tau lam ua yam tsis quav ntsej dab tsi, yeej tsis daws tej yam raws li tej hauv paus ntsiab lus, yeej tsis lees txais tej yam uas zoo los sis qhov tseeb, tsis mloog leej twg hais li, txawm hais tias lawv puas muaj meej mom los sis hwj chim los lawv yeej ua raws li lawv tus kheej lub siab nyiam, thiab lub ntsiab tseeb lawv yog ib tug Ntxwgnyoog uas ua neej nyob—ib tug neeg zoo li no, tsuav lawv tseem nyob hauv pawg ntseeg, ces tsis ntxov los sis lig lawv yeej yuav coj kev cuam tshuam thiab kev rhuav tshem loj heev los rau pawg ntseeg tes hauj lwm xwb. Thaum txog hnub uas tsim nyog ntsaig lawv tawm thiab daws lawv, xyov yuav muaj pes tsawg tus neeg uas yuav tau los tu tej qhov tshwm sim los phem thiab tej xwm txheej uas muaj kev kub ntxhov uas lawv tau ua ntawd! Yog li ntawd, qhov ntsaig tawm mus los sis ntiab cov tib neeg phem thiab cov tawm tsam khetos no tawm mus ntawd mas yog ib teg hauj lwm tseem ceeb uas cov thawj coj thiab cov neeg ua hauj lwm yuav tsum tau ua thiab yuav tsum tsis txhob ua dog dig rau. Txawm li cas los xij, cov thawj coj cuav ua siab zoo thiab siab hlub rau cov uas tsim nyog raug ntsaig tawm mus los sis ntiab tawm mus, ua ntsej lag muag dig rau lawv tej kev ua phem, thev thiab ua siab ntev rau lawv yam li yog cov kwv tij thiab cov nkauj muam, thiab haj tseem saib cov uas muaj txiaj ntsim rau lawv tias yog cov neeg muaj peev xwm es cob qhia thiab siv lawv. Txawm hais tias lawv ua tej yam phem dab tsi los xij, cov thawj coj cuav nrhiav kev hais ub hais no los daws lawv lub txim, thiab haj tseem muab kev pab thiab kev txhawb uas muaj kev hlub rau lawv thiab. Nyob rau qee theem mas, qhov no tsis yog txhob txwm tab kaum lod? (Yog.) Cov thawj coj cuav ua tej yam raws li lawv tus kheej tej tswv yim thiab lawv tus kheej lub siab zoo thiab kev kub siab, thaum kawg ua rau muaj teeb meem loj heev rau pawg ntseeg thiab cov neeg Vajtswv xaiv tseg! Yog cov tib neeg phem no tuav hwj chim, tej kev puas tsuaj thiab tej tshwm sim los uas lawv coj los rau pawg ntseeg mas ntsuas tsis tau li.

Tam sim no muaj ib txoj kev cai nyob rau hauv Vajtswv lub tsev uas hais tias txawm yog leej twg ua kev phem los xij, tsuav yog ua rau Vajtswv lub tsev puas tsuaj xwb, lawv yuav tsum them rov qab. Yog qhov kev puas tsuaj loj dhau lawm thiab tej uas tshwm sim los hnyav heev, qhov them nyiaj xwb puas yuav daws tau qhov teeb meem? Muaj qee qhov kev puas tsuaj, txawm them nyiaj ntau npaum li cas los yeej daws tsis tau qhov teeb meem. Tej ntawd kho tsis tau thiab ntxiv tsis tau rov qab los lawm. Txhua hnub tam sim no mas muaj nuj nqis thiab tseem ceeb heev. Thaum ib hnub dhau mus lawm, lub sij hawm ntawd puas rov qab los tau? Qhov ntawd los kuj muab tsis tau rov qab los thiab. Vim li cas peb thiaj li hais tias qhov plam qee yam ntawd yog ib qho kev khuv xim mus ib txhis? Vim yeej tig tsis tau lub sij hawm rov qab los. Kuv hais li no txhais li cas? Qhov zoo tshaj plaws yog qhov tiv thaiv ua ntej tej teeb meem tshwm sim, es tsis yog siv nyiaj los daws tom qab teeb meem tshwm sim lawm; qhov no yog txoj kev zoo tshaj plaws los daws tej teeb meem. Qhov “nees khiav lawm mam li kaw nkuaj” ntawd yog ib qho uas tsis muaj lwm txoj kev lawm xwb. Qhov zoo tshaj plaws yog qhov ua tes hauj lwm tiv thaiv ua ntej tej yam tshwm sim. Qhov no txhais tau hais tias ua ntej muaj tej kev tab kaum los sis kev cuam tshuam tshwm tuaj ntawd, cov thawj coj thiab cov neeg ua hauj lwm yuav tsum muaj kev paub cais meej meej thiab ib qho kev to taub thoob plaws txog ntau hom tib neeg hauv pawg ntseeg, thiab ua tib zoo soj ntsuam thiab to taub kom ncav sij hawm txog cov yam ntxwv, cov moj yam, thiab tej kev caum ntawm ntau hom tib neeg, nrog rau lawv cov cwj pwm thiab tej kev xam pom thaum ua lawv tes dej num, ua kom paub tseeb tias txhua tus kwv tij thiab nkauj muam muaj lub neej hauv pawg ntseeg thiab ib puag ncig uas ib txwm muaj rau kev ua lawv tej dej num. Ua li no, pawg ntseeg tes hauj lwm thiaj li mus tau raws qib raws duas. Tej no yog cov thawj coj thiab cov neeg ua hauj lwm tej luag hauj lwm. Muaj tseeb tiag, cov thawj coj cuav ua tsis tau tes hauj lwm no; lawv yog cov neeg ruam feeb tsis meej thiab cov neeg tsis muaj qab hau. Tam sim no lawv muaj ib lub tswv yim ntse tias: “Leej twg uas tsis ua raws li tej hauv paus ntsiab lus thiab ua rau tes hauj lwm puas lawm ces yuav raug nplua nyiaj! Yog ib tug tawm tsam khetos ua ib yam dab tsi yuam kev, lawv yuav raug nplua nyiaj!” Lawv xav hais tias qhov muab nplua nyiaj yog txoj kev daws uas zoo tshaj plaws thiab yog lub hauv paus ntsiab lus ntawm txoj kev ua raws uas zoo tshaj plaws. Yog txhua yam teeb meem tuaj yeem daws los ntawm qhov muab nplua nyiaj, ces qhov caum qhov tseeb ntawd yuav muaj qab hau dab tsi? Vim li cas thiaj li hu ib tug thawj coj cuav hais tias cuav? Qhov ntawd yog vim lawv tsis to taub qhov tseeb, thiab lawv saib qhov ua raws tej kev cai tswj tias yog kev ua raws li qhov tseeb thiab saib cov lus thiab cov kev qhuab qhia uas lawv to taub tias yog qhov tseeb, thiab thaum muaj tej yam tshwm sim tuaj, lawv yeej nrhiav tsis tau tej hauv paus ntsiab lus los sis txoj hau kev uas yog kiag li thiab daws tsis tau tej teeb meem ntawm lub hauv paus. Lawv tsis to taub Vajtswv cov lus thiab nkag siab tsis tau lub ntsiab lus uas Vajtswv hais kiag li tiam sis tseem xav ua hauj lwm thiab ua ib tug thawj coj los sis ib tug neeg ua hauj lwm—ruam dhau lawm! Nyob hauv qhov no, qhov kev qhia tshwm tseem ceeb ntawm ib tug thawj coj cuav yog dab tsi? Lawv pom tsis tshab lub ntsiab tseeb ntawm ntau hom tib neeg uas tab kaum thiab cuam tshuam pawg ntseeg tes hauj lwm, cais tsis tau lawv ua pawg, thiab yeej tsis tuaj yeem coj thiab daws txhua hom tib neeg raws li tej hauv paus ntsiab lus. Nyob hauv ib tug thawj coj cuav lub siab mas, tag nrho tej no yog ib qho ntxhov quav niab. Lawv kwv yees txog Vajtswv cov lus thiab lub ntsiab lus uas Vajtswv hais ntawd raws li lawv txoj kev kub siab thiab lawv tus kheej tej kev xav phem thiab tej kev xav hauv nruab siab. Nyob rau tib lub sij hawm ntawd, lawv muab lawv lub siab zoo, kev kub siab, thiab lawv tus kheej tej kev xav hauv nruab siab thiab tej kev xav phem los yuam tso rau saum Vajtswv, ntseeg hais tias tej no mus raws li qhov tseeb, mus raws li Vajtswv tej kev npaj siab, thiab sawv cev tau rau Vajtswv lub siab nyiam. Yog li ntawd, lawv vam khom rau tej no los ua hauj lwm thiab coj cov neeg Vajtswv xaiv tseg. Qhov no yog qhov kev qhia tshwm tseem ceeb ntawm tus thawj coj cuav. Txoj kev sib qhia txog qhov kev qhia tshwm ob ntawm cov thawj coj cuav ntawd, peb yuav muab xaus rau ntawm no.

III. Cov Thawj Coj Cuav Tsis Nthuav Tawm thiab Tsis Cheem Cov Tib Neeg Phem

Txuas ntxiv no, peb yuav sib qhia txog qhov kev qhia tshwm peb ntawm cov thawj coj cuav, uas yog qhov tsis quav ntsej thiab tsis nug txog cov tib neeg uas tab kaum thiab cuam tshuam pawg ntseeg tes hauj lwm—txawm yog thaum lawv pom tias cov tib neeg phem thiab cov tawm tsam khetos tab tom cuam tshuam pawg ntseeg tes hauj lwm los, lawv tsis quav ntsej qhov ntawd li. Qhov no lub ntsiab xeeb txawm hnyav dua thawj ob qho kev qhia tshwm ntawd. Vim li cas thiaj li hais tias qhov no hnyav dua? Thawj ob qho kev qhia tshwm ntawd muaj feem xyuam rau cov thawj coj cuav lub peev xwm, tiam sis qhov kev qhia tshwm no muaj feem xyuam rau cov thawj coj cuav txoj kev ua neeg. Qee cov thawj coj cuav lub peev xwm tsis zoo mus txog rau ib theem twg uas lawv pom tsis tshab lub ntsiab xeeb txawm ntawm qhov tab kaum thiab cuam tshuam pawg ntseeg tes hauj lwm. Qee cov thawj coj cuav, txawm hais tias lawv pom tau tej teeb meem ntawm qhov tab kaum thiab cuam tshuam pawg ntseeg tes hauj lwm los, hmoov tsis zoo lawv tsis to taub qhov tseeb es saib xyuas thiab daws tsis tau tej teeb meem no. Lawv pheej ua raws li lawv tus kheej tej tswv yim thiab kev kub siab, ua yam uas lawv nyiam ua, xav hauv lawv lub siab hais tias, “Tsuav yog kuv tab tom ua pawg ntseeg tes hauj lwm xwb, ces yeej tau lawm; hos leej twg tab kaum thiab cuam tshuam, qhov ntawd yog lawv tus kheej li teeb meem thiab tsis muaj feem xyuam rau kuv.” Kuj muaj qee cov thawj coj cuav uas muaj lub peev xwm me ntsis thiab tuaj yeem ua hauj lwm me ntsis, thiab paub me ntsis txog tej hauv paus ntsiab lus rau qhov daws ntau hom tib neeg. Txawm li cas los xij, lawv ntshai tsam ua rau tib neeg chim, yog li ntawd thaum lawv pom cov tib neeg phem thiab cov tawm tsam khetos ua rau muaj kev tab kaum thiab kev cuam tshuam, lawv tsis muaj cuab kav nthuav tawm, cheem, los sis txwv cov tib neeg ntawd li. Lawv ua neej raws li ntxwg nyoog tej tswv yim, thiab lawv ua ntsej lag muag dig rau tej yam uas lawv xav tias tsis muaj feem xyuam rau lawv. Lawv tsis quav ntsej tias cov txiaj ntsig ntawm pawg ntseeg tes hauj lwm zoo li cas kiag li, los sis cov neeg Vajtswv xaiv tseg txoj kev nkag mus rau hauv lub neej txoj sia raug cuam tshuam loj npaum li cas; lawv xav tias tej yam zoo li no tsis muaj feem xyuam rau lawv. Yog li ntawd, thaum lub sij hawm uas ib tug thawj coj cuav zoo li no ua hauj lwm, qhov raws qib raws duas uas ib txwm muaj ntawm lub neej hauv pawg ntseeg tsis raug tswj xyuas, thiab cov neeg Vajtswv xaiv tseg tej dej num thiab txoj kev nkag mus rau hauv lub neej txoj sia tsis raug tiv thaiv. Qhov teeb meem no lub ntsiab xeeb txawm yog dab tsi? Tsis yog hais tias cov thawj coj cuav no ua tsis tau tes hauj lwm vim lawv lub peev xwm tsis zoo; qhov ntawd yog vim lawv txoj kev ua neeg tsis zoo, thiab lawv tsis muaj lub siab txawj xav thiab qhov laj thawj, lawv thiaj li tsis ua tes hauj lwm tiag tiag. Cov thawj coj cuav cuav nyob rau qhov twg? Lawv tsis muaj lub siab txawj xav thiab qhov laj thawj ntawm txoj kev ua neeg; yog li ntawd, thaum lub sij hawm uas lawv ua hauj lwm ua cov thawj coj ntawd, qhov teeb meem ntawm cov tib neeg phem thiab cov tawm tsam khetos uas tab kaum thiab cuam tshuam pawg ntseeg tes hauj lwm yeej tsis raug daws kiag li. Qee cov kwv tij thiab cov nkauj muam raug ua phem rau loj heev, thiab pawg ntseeg tes hauj lwm kuj raug kev puas tsuaj loj heev thiab. Thaum hom thawj coj cuav zoo li no pom ib qho teeb meem, thaum lawv pom ib tug tib neeg phem los sis ib tug tawm tsam khetos ua rau muaj kev tab kaum los sis kev cuam tshuam, lawv paub tias lawv lub luag hauj lwm yog dab tsi, lawv yuav tsum ua dab tsi thiab lawv yuav tsum ua li cas, tiam sis lawv yeej tsis ua ib yam dab tsi hlo li, thiab lawv haj tseem ua txuj tsis hnov tsis pom, tsis quav ntsej kiag li, thiab tsis qhia qhov teeb meem ntawd tawm rau theem siab saud. Lawv ua txuj tias lawv tsis paub dab tsi thiab tsis pom dab tsi, es cia cov tib neeg phem thiab cov tawm tsam khetos tab kaum thiab cuam tshuam pawg ntseeg tes hauj lwm. Qhov no tsis yog lawv txoj kev ua neeg muaj teeb meem lod? Lawv tsis yog ib pab ntawm cov tib neeg phem thiab cov tawm tsam khetos lod? Lawv siv lub hauv paus ntsiab lus dab tsi los ua ib tug thawj coj? “Kuv tsis ua rau muaj kev tab kaum los sis kev cuam tshuam, tiam sis kuv yuav tsis ua ib yam dab tsi uas ua rau lwm tus chim, los sis tsis ua ib yam dab tsi uas rhuav lwm tus ntsej muag. Tab txawm cais tias kuv yog ib tug thawj coj cuav los, kuv yeej tseem yuav tsis ua ib yam dab tsi uas ua rau lwm tus chim. Kuv yuav tsum tseg ib txoj kev tawm rau kuv tus kheej.” Qhov no yog hom laj thawj dab tsi? Yog Ntxwgnyoog lub laj thawj. Thiab qhov no yog hom moj yam dab tsi? Qhov no tsis yog txawj ntxias thiab txawj dag heev lod? Ib tug neeg zoo li no yeej tsis muaj lub siab dawb paug me me nyob hauv lawv txoj kev coj rau Vajtswv cov lus txib li; lawv yeej ib txwm ua dog ua dig thiab txawj ntxeev ntxias thaum ua lawv tes dej num, muaj tswv yim phem ntau heev, xav txog lawv tus kheej nyob hauv txhua yam. Lawv yeej tsis xav txog pawg ntseeg tes hauj lwm me me li thiab yeej tsis muaj lub siab txawj xav los sis qhov laj thawj hlo li. Lawv yeej tsis tsim nyog ua ib tug thawj coj pawg ntseeg kiag li. Cov tib neeg zoo li no yeej tsis ris lub nra rau pawg ntseeg tes hauj lwm los sis cov neeg Vajtswv xaiv tseg txoj kev nkag mus rau hauv lub neej txoj sia hlo li. Lawv tsuas quav ntsej txog lawv tus kheej tej txiaj ntsim thiab kev xyiv fab xwb; lawv tsuas tsom ntsoov rau qhov txaus siab rau tej txiaj ntsim ntawm lub meej mom xwb, yam tsis quav ntsej tias cov neeg Vajtswv xaiv tseg nyob rau hauv qhov xwm txheej twg li. Qhov no tsis yog tus neeg uas twm xeeb thiab qias tshaj plaws lod? Txawm yog thaum lawv pom cov tib neeg phem thiab cov tawm tsam khetos cuam tshuam pawg ntseeg tes hauj lwm los, lawv tsis quav ntsej qhov ntawd li, cuag nkaus li tej yam no tsis muaj feem xyuam rau lawv. Qhov ntawd zoo ib yam li ib tug tswv yug yaj uas pom ib tug hma noj cov yaj tiam sis tsis ua dab tsi li, tsuas quav ntsej txog qhov tiv thaiv lawv tus kheej txoj sia xwb. Ib tus neeg zoo li no tsis tsim nyog ua ib tug tswv yug yaj. Txhua yam uas hom thawj coj cuav no ua yog los tiv thaiv lawv tus kheej lub suab npe, lub meej mom, hwj chim, thiab ntau yam txiaj ntsim uas lawv tab tom xyiv fab rau tam sim no kom ntau tshaj plaws. Nyob hauv lawv lub siab lawv tsis ris lub nra rau Vajtswv cov lus txib, pawg ntseeg tes hauj lwm, los sis cov neeg Vajtswv xaiv tseg txoj kev nkag mus rau hauv lub neej txoj sia, uas yog lawv tej dej num thiab tej luag hauj lwm; lawv yeej tsis xav txog tej no li. Lawv xav hais tias, “Vim li cas ib tug thawj coj thiaj li yuav tsum ua cov hauj lwm no? Vim li cas qhov tsis ua cov hauj lwm no thiaj li ua rau raug ntuas thiab raug teem txim, thiab raug cov kwv tij thiab cov nkauj muam tso tseg?” Lawv tsis to taub thiab tsis quav ntsej kiag li. Nyob hauv Kuv lub siab mas, txawm hais tias hom neeg zoo li no yuav saib zoo li coj zoo npaum li cas, los sis ua raws li kev cai, los sis tsis tshua hais lus, los sis tiv taus kev txom nyem thiab muaj peev xwm npaum li cas los xij, qhov uas lawv ua yam tsis muaj tej hauv paus ntsiab lus thiab tsis ris lub luag hauj lwm rau pawg ntseeg tes hauj lwm ntawd ua rau Kuv yuav tsum tau saib lawv nyob rau hauv ib txoj kev tshiab. Thaum kawg, Kuv tau muab hom neeg zoo li no txhab txhais li no: Tej zaum lawv yuav tsis tau ua tej kev ua yuam kev loj, tiam sis lawv txawj ntxias thiab txawj dag heev; lawv yeej tsis ris ib lub luag hauj lwm hlo li, thiab lawv yeej tsis tiv thaiv pawg ntseeg tes hauj lwm kiag li—lawv tsis muaj kev ua neeg. Kuv xav hais tias lawv zoo ib yam li ib hom tsiaj—nyob hauv lawv txoj kev txawj ntxias, lawv me ntsis zoo li ib tug hma liab. Tib neeg hais tias cov hma liab txawj ntxias, tiam sis qhov tseeb tiag, cov tib neeg no haj tseem txawj ntxias dua cov hma liab thiab. Saib sab nraud mas, zoo li lawv tsis tau ua ib yam kev phem dab tsi li, tiam sis qhov tseeb tiag, txhua yam uas lawv hais thiab ua puav leej yog txhawm rau lawv tus kheej lub koob npe, kev tau txais txiaj ntsim, thiab lub meej mom xwb. Txhua yam uas lawv ua yog txhawm rau lub hom phiaj uas xyiv fab rau tej txiaj ntsim ntawm lawv lub meej mom, thiab lawv yeej tsis ua tib zoo xav txog Vajtswv tej kev npaj siab me me li. Lawv yeej tsis daws cov teeb meem uas tshwm sim tuaj hauv pawg ntseeg tes hauj lwm me me li, thiab lawv kuj tsis daws cov teeb meem tiag tiag uas ntsig txog cov neeg Vajtswv xaiv tseg txoj kev nkag mus rau hauv lub neej txoj sia li thiab. Cov thawj coj cuav no tsis ua ib teg hauj lwm dab tsi los coj cov neeg Vajtswv xaiv tseg nkag mus rau hauv qhov tseeb qhov muaj tiag li. Lub hom phiaj ntawm qhov lawv ua txhua yam no yog dab tsi tiag tiag? Qhov ntawd tsis yog tsuas yog los ua kom tib neeg zoo siab thiab ua kom lwm tus saib lawv siab xwb lod? Lawv ua kom txhua tus xav zoo txog lawv yam tsis ua rau leej twg chim li, yog li ntawd lawv thiaj li xyiv fab rau lub suab npe thiab tej txiaj ntsim ntawm lawv lub meej mom. Qhov uas ua rau muaj kev ntxub tshaj plaws txog lawv yog qhov uas txhua yam lawv ua ntawd tsis coj ib qho txiaj ntsim dab tsi los rau cov neeg Vajtswv xaiv tseg txoj kev nkag mus rau hauv lub neej txoj sia li; tiam sis, lawv coj tib neeg mus yuam kev, ua rau lwm tus saib lawv siab thiab pe hawm lawv. Cov tib neeg no tsis yog haj tseem txawj ntxias thiab txawj dag tshaj cov hma liab lod? Lawv yeej yog tus qauv ntawm cov thawj coj cuav tseem tseem. Lawv muaj lub meej mom ua thawj coj thiab tuav lub npe no tiam sis tsis ua ib qho hauj lwm tiag tiag li, tsuas yog ua qee yam hauj lwm dav dav uas pom tau nyob sab nraud xwb, los sis lawv tsuas lam ua tes hauj lwm uas tus Nyob Saud muab tshwj xeeb rau lawv ua ntawd me ntsis yam tsis ua tsis tau xwb. Yog tus Nyob Saud tsis muaj kev npaj tshwj xeeb, ces lawv yeej tsis ua pawg ntseeg tes hauj lwm uas yog lub ntsiab tseeb me ntsis li. Hais txog tej yam uas muaj feem xyuam rau qhov tiv thaiv pawg ntseeg tes hauj lwm thiab qhov raws qib raws duas ntawm lub neej hauv pawg ntseeg ntawd, lawv ntshai tsam ua rau tib neeg chim thiab tsis muaj cuab kav tuav raws li tej hauv paus ntsiab lus. Lawv yeej tsis daws tej teeb meem uas sib sau cia hauv pawg ntseeg tes hauj lwm kiag li, thiab haj tseem yog thaum lawv pom Vajtswv lub tsev cov khoom muaj nqis raug cov tawm tsam khetos thiab cov tib neeg phem nkim pov tseg los, lawv yeej tsis ua ib yam dab tsi los cheem los sis txwv qhov ntawd li. Nyob hauv lawv lub siab, lawv yeej paub meej tias cov tib neeg no tab tom ua kev phem thiab ua rau Vajtswv lub tsev tej txiaj ntsim puas tsuaj, tiam sis lawv ua txuj tsis hnov tsis pom, tsis hais ib lo lus li. Cov no yog cov tib neeg uas txawj ntxias thiab txawj dag. Cov tib neeg no tsis yog haj tseem txawj ntxias tshaj cov hma liab lod? Saib sab nraud mas lawv ua zoo rau txhua tus thiab tsis ua tej yam uas ua phem rau leej twg, tiam sis lawv ua rau qhov xwm txheej loj ntawm cov neeg Vajtswv xaiv tseg txoj kev nkag mus rau hauv lub neej txoj sia, pawg ntseeg tes hauj lwm, thiab tes hauj lwm tshaj tawm txoj moo zoo qeeb lawm. Cov tib neeg zoo li no puas tsim nyog ua cov thawj coj thiab cov neeg ua hauj lwm? Lawv tsis yog Ntxwgnyoog cov tub qhe lod? Lawv tsis yog cov uas tab kaum thiab cuam tshuam pawg ntseeg tes hauj lwm lod? Txawm hais tias nyob sab nraud lawv tsis tau ua ib qho kev phem uas pom tau meej los xij, tej uas tshwm sim los ntawm lawv txoj kev ua hauj lwm zoo li no haj tseem hnyav dua qhov ua kev phem thiab. Lawv txwv qhov ua li Vajtswv lub siab nyiam, tawm tsam Vajtswv, tab kaum thiab cuam tshuam pawg ntseeg tes hauj lwm. Lawv ua phem rau cov neeg Vajtswv xaiv tseg thiab haj tseem tuaj yeem rhuav tshem cov neeg Vajtswv xaiv tseg txoj kev cia siab uas yuav tau txais kev cawm dim thiab. Qhia Kuv seb, qhov no tsis yog qhov ua kev phem lod? Qhov no yog qhov uas cov tib neeg uas ua kom lwm tus zoo siab uas yeej tsis tuav raws li tej hauv paus ntsiab lus ntawd ua ntag. Cov tib neeg uas tsis to taub qhov tseeb pom tsis tshab tej qhov tshwm sim los uas txaus ntshai ntawm cov thawj coj cuav txoj kev ua hauj lwm zoo li no, thiab kuj nkag siab tsis tau tias lawv tej kev npaj siab, tej kev txhawb siab, thiab tej hom phiaj yog dab tsi thiab. Koj yeej yuav to taub tsis tau txog tias lawv xav ua dab tsi tiag tiag hauv lawv lub siab—cov tib neeg zoo li no txawj ntxias dhau lawm! Muab piv txwv hais mas, lawv yog cov hma liab uas txawj ntxias; hais kom yog mas, lawv yog cov dab uas ua neej nyob, cov dab uas ua neej nyob hauv cov tib neeg nruab nrab!

Thaum hais txog tias yuav txiav txim rau cov thawj coj cuav no li cas, raws li lawv tus moj yam lub ntsiab tseeb ntawd mas, tsis tuaj yeem cia li lam muab lawv cais rau hauv cov pawg ntawm cov tib neeg phem, cov tawm tsam khetos, cov neeg ntsej muag ncaj siab nkhaus, thiab lwm yam ntxiv. Txawm li cas los xij, thaum saib raws li yam uas lawv qhia tshwm, xws li tej kev qhia tshwm ntawm lawv txoj kev ua neeg thiab lawv tus cwj pwm uas coj rau pawg ntseeg tes hauj lwm, nrog rau qhov uas lawv tsis daws cov teeb meem uas lawv pom ntawd, ces lawv yog hom thawj coj cuav uas phem tshaj plaws. Thaum saib raws li ntau yam kev qhia tshwm ntawm lawv mas, txawm hais tias lawv tsis ua tus pib tsim pab tsim pawg los sis tsim tej nceeg vaj rau lawv tus kheej, thiab tsis tshua ua tim khawv rau lawv tus kheej, thiab txawm hais tias lawv tuaj yeem nrog cov kwv tij thiab cov nkauj muam sib raug zoo, tiv kev txom nyem, them tus nqi, yeej tsis nyiag tej khoom fij, thiab haj tseem txwv lawv tus kheej yam nruj kom tsis txhob nrhiav cov cai tshwj xeeb los xij, txawm li ntawd los, thaum lawv ntsib ntau hom tib neeg, xwm txheej, thiab yam khoom uas tab kaum thiab cuam tshuam pawg ntseeg tes hauj lwm, los sis ntau hom tib neeg uas nkim cov khoom fij thiab ua rau Vajtswv lub tsev cov khoom muaj nqis puas tsuaj, lawv tsis cheem los sis daws, lawv tsis hais ib lo lus los sis tsis ua ib qho hauj lwm dab tsi li. Cov tib neeg zoo li no txaus ntshai dhau! Lawv yog hom thawj coj cuav uas qias tshaj plaws; yeej cawm tsis tau lawm! Vim li cas Kuv thiaj li hais tias yeej cawm tsis tau lawm? Tsis yog hais tias lawv lub peev xwm tsis zoo los sis tias lawv to taub tsis tau Vajtswv cov lus—lawv yeej muaj lub peev xwm nkag siab thiab lub peev xwm ua hauj lwm mus txog ib theem twg, tiam sis thaum lawv pom muaj neeg tab kaum thiab cuam tshuam pawg ntseeg tes hauj lwm, lawv tsis saib xyuas los sis tsis daws qhov ntawd. Lawv tsuas ua tes hauj lwm no me ntsis yam tsis ua tsis tau thaum lawv ntsib txoj kev saib xyuas nruj thiab kev nug tas li ntawm lawv cov thawj coj txheej saud, los sis thaum lawv raug ntuas lawm xwb. Txawm hais tias lawv ua tes hauj lwm no los tsis ua, los sis lawv ua li cas los xij, qhov tiv thaiv lawv tus kheej yog lawv qhov hauj lwm tseem ceeb tshaj plaws. Lawv yeej tsis ua cov thawj coj thiab cov neeg ua hauj lwm tej luag hauj lwm kom tiav hlo li. Dhau ntawm qhov tiv thaiv lawv tus kheej thiab saib xyuas lawv tus kheej tej txiaj ntsim lawm, lawv tsis ua ib qho hauj lwm tseem ceeb li, lawv tsuas ua qee yam hauj lwm sab nraud me ntsis uas tsis ua tsis tau xwb. Dhau ntawm qhov tiv thaiv lawv tus kheej lawm, lawv tsis quav ntsej txog lwm yam li. Lawv tsis yog haj tseem txawj ntxias thiab txawj dag dua ib tug hma liab lod? Ib txhia tib neeg hais tias, “Qhov noj cov tsiaj me yog lub peev xwm xeeb txawm ntawm ib tug hma liab, yog li ntawd qhov tiv thaiv lawv tus kheej tsis yog cov thawj coj cuav lub peev xwm xeeb txawm thiab lod?” Qhov no puas yog lub peev xwm xeeb txawm? Qhov no yog lawv tus yam ntxwv xeeb txawm! Cov thawj coj cuav no tiv thaiv lawv tus kheej lub meej mom, lub suab npe, thiab lub ntsej muag, tiv thaiv tej kev sib raug zoo nrog tib neeg, thiab tsis ua rau leej twg chim, los ntawm qhov ua rau Vajtswv lub tsev tej txiaj ntsim puas tsuaj thiab ua rau pawg ntseeg tes hauj lwm puas tsuaj. Tab txawm yog qhov rho tawm los sis hloov cov neeg ua hauj lwm xwb los lawv twb tsis daws ntawm lawv tus kheej thiab, tiam sis muab rau lwm tus ua rau lawv. Lawv xav hais tias, “Yog tus neeg ntawd xav ua pauj rov qab, lawv yuav tsis los ua pauj rau kuv. Kuv yuav tsum tiv thaiv kuv tus kheej ua ntej hauv txhua qhov xwm txheej uas kuv ntsib.” Cov tib neeg no txawj ntxias dhau lawm! Ua ib tug thawj coj, koj twb ris tsis taus lub luag hauj lwm no, yog li ntawd koj puas tsim nyog ua ib tug thawj coj? Koj tsuas yog ib tug neeg tais caus uas siv tsis tau xwb! Yog twb tsis muaj lub siab tawv me ntsis no, koj puas tseem yog ib tug neeg uas ntseeg Vajtswv? Cov tib neeg txawj ntxeev ntxias uas khiav hauj lwm thaum ua lawv tej dej num puas yog cov uas raws Vajtswv qab? Vajtswv tsis xav tau cov tib neeg zoo li no. Cov thawj coj cuav no txawj ntxias thiab txawj dag ib yam li cov hma liab. Thaum lawv pom muaj neeg ua rau muaj kev tab kaum los sis kev cuam tshuam, lawv tsis saib xyuas los sis daws qhov ntawd—lawv yeej tsis ua tes hauj lwm tiag tiag li. Txawm lawv yuav raug nthuav tawm thiab raug ntuas li cas los xij, lawv yeej tsis ua. Vim koj tsis ua cov thawj coj thiab cov neeg ua hauj lwm tej luag hauj lwm kom tiav, vim li cas koj thiaj li nyob hauv txoj hauj lwm ntawd? Puas yog kom koj ua tau ib yam khoom zoo nkauj tso saib xwb lod? Puas yog kom koj tau xyiv fab rau tej txiaj ntsim ntawm lub meej mom lod? Koj tsis tsim nyog tau qhov ntawd! Tsis ua tes hauj lwm tiag tiag tiam sis tseem xav kom cov kwv tij thiab cov nkauj muam hwm thiab pe hawm koj—qhov no tsis yog dab lub tswv yim lod? Yeej tsis paub txaj muag kiag li! Ib txhia tib neeg hais tias lawv yeej tsis xav ua ib tug thawj coj hlo li. Yog li ntawd vim li cas koj thiaj li tiv thaiv koj lub suab npe thiab lub meej mom? Koj lub hom phiaj nyob hauv qhov coj tib neeg mus yuam kev yog dab tsi? Yog koj tsis xav ua ib tug thawj coj, koj tuaj yeem ua tus pib thov tawm. Vim li cas koj thiaj li tsis tawm? Vim li cas koj thiaj li nyob hauv txoj hauj lwm ntawd thiab tsis nqis mus? Yog koj tsis xav tawm, ces koj yuav tsum ua tib zoo ua qee yam hauj lwm tiag tiag. Tsis muaj lwm txoj kev xaiv—qhov no yog koj lub luag hauj lwm. Yog koj ua tsis tau tes hauj lwm tiag tiag, qhov zoo tshaj rau koj ces yog ris lub txim thiab tawm hauj lwm; koj yuav tsum tsis txhob ua rau pawg ntseeg tes hauj lwm qeeb, los sis ua phem rau cov neeg Vajtswv xaiv tseg. Yog koj tsis muaj lub siab txawj xav thiab qhov laj thawj me me no, koj puas tseem muaj kev ua neeg? Koj tsis tsim nyog raug hu ua tib neeg! Tsis hais lawv puas ua tau ib tug thawj coj los sis ib tug neeg ua hauj lwm los xij, yam tsawg kawg nkaus cov tib neeg uas ntseeg Vajtswv yuav tsum muaj lub siab txawj xav thiab qhov laj thawj me ntsis thiaj li tsim nyog raug hu tias yog tib neeg.

Qhov ua ib tug thawj coj los sis ib tug neeg ua hauj lwm ntawd mas, ib tug neeg yuav tsum muaj lub peev xwm txog rau ib theem twg. Ib tug neeg lub peev xwm txiav txim rau lawv lub peev xwm ua hauj lwm thiab qib uas lawv to taub tau qhov tseeb tej hauv paus ntsiab lus. Yog koj lub peev xwm tsis tshua zoo thiab koj tsis muaj txoj kev to taub tob txaus txog qhov tseeb, tiam sis koj tuaj yeem xyaum ua raws ntau npaum li qhov koj to taub, thiab koj tuaj yeem muab yam uas koj to taub ntawd coj los xyaum ua raws, thiab nyob hauv koj lub siab dawb paug thiab coj ncaj, thiab tsis tsim tswv yim dab tsi rau koj tus kheej los sis tsis caum lub koob npe, kev tau txais txiaj ntsim, thiab lub meej mom, thiab koj lees txais tau Vajtswv txoj kev tshawb xyuas kom meej, ces koj yog ib tug neeg uas yog. Txawm li cas los xij, cov thawj coj cuav tsis muaj tej yam no. Lawv tsis quav ntsej txog ntau yam ntawm kev tab kaum thiab kev cuam tshuam uas tshwm sim nyob hauv pawg ntseeg; txawm hais tias lawv pom tej teeb meem no los, lawv tsis quav ntsej tej ntawd hlo li. Yog nug hais tias lawv puas paub txog qhov xwm txheej ntawd, lawv hais tias, “Kuv xav hais tias kuv paub me ntsis txog qhov ntawd, tiam sis tsis yog txhua yam.” Qhov no tshwm sim nyob ntawm koj xub ntiag—vim li cas koj thiaj li hais tias koj tsis paub txog qhov ntawd? Koj tsis yog tab tom dag tib neeg lod? Rau qhov koj yeej paub txog qhov ntawd, koj puas tau xav txog tias yuav daws qhov ntawd li cas? Koj puas tau ua ib qho hauj lwm dab tsi? Koj puas tau nrhiav tej hau kev daws? Lawv teb hais tias, “Tus tib neeg ntawd lub peev xwm zoo dua kuv, thiab lawv hais tau lus npliag thiab hais tau lus zoo; kuv tsis muaj cuab kav thab lawv. Yuav ua li cas yog kuv daws ib yam dab tsi uas tsis yog ib qho teeb meem tiag tiag thiab ua rau lawv chim? Qhov ntawd yuav ua rau kuv tes hauj lwm nyuaj tom qab ntawd!” Vim koj tsis muaj cuab kav, koj tsuas yog ib tug neeg tais caus uas siv tsis tau thiab tsis ua koj tej luag hauj lwm, thiab koj tsis tsim nyog ua ib tug thawj coj! Thaum koj ntsib hom xwm txheej zoo li no, koj puas paub yuav daws qhov ntawd li cas? Lawv hais tias, “Txawm kuv paub tias yuav daws qhov ntawd li cas los, kuv tsis muaj cuab kav. Qhov ntawd tsis yog yam uas tus Nyob Saud los ua lod? Thiab kuj tseem muaj pawg txiav txim siab thiab. Kuv yuav yog tus uas ua tes hauj lwm no tau li cas?” Vim koj pom qhov ntawd thiab paub txog qhov ntawd, koj yuav tsum daws qhov xwm txheej no. Yog koj theem ntawm sab ntsujplig me dhau thiab koj daws tsis tau qhov teeb meem no, koj puas tau qhia koj cov thawj coj txheej saud txog qhov teeb meem ntawd? Koj puas tau qhia tawm qhov ntawd? Koj puas tau ua yam uas nyob hauv ciaj ciam ntawm koj tej luag hauj lwm thiab tes hauj lwm uas koj yuav tsum ua? Koj puas tau ua ib qho ntawm koj tej luag hauj lwm kom tiav li? Tsis tau kiag li! Nyob hauv lawv lub siab, lawv paub meej heev: “Kuv paub txog qhov teeb meem no, tiam sis kuv tsis tau ua dab tsi. Kuv hnov tias txhaum! Qhov teeb meem ntawd kuv tsim nyog qhia tawm tiam sis kuv tsis tau qhia tawm. Tiam sis lwm tus tib neeg los kuj tsis tau ua thiab—qhov ntawd muaj feem xyuam dab tsi rau kuv?” Lwm tus tib neeg puas yog cov thawj coj thiab? Txawm hais tias lwm tus tib neeg ua los tsis ua qhov ntawd yog cov tib neeg ntawd li teeb meem xwb—vim li cas koj thiaj li tsis ua qhov ntawd? Yog lwm tus tib neeg tsis ua qhov ntawd, puas txhais tau hais tias koj tsis tas yuav ua qhov ntawd? Qhov no puas yog qhov tseeb? Txawm hais tias lwm tus tib neeg tau ua qhov ntawd lawm los, qhov ntawd puas sawv tau koj chaw? Yam uas koj ua yog koj li teeb meem xwb. Koj puas tau ua koj tej luag hauj lwm thiab tej hauj lwm kom tiav? Yog koj tsis tau ua, ces koj tsis ua koj tej luag hauj lwm, tsis tsim nyog ua ib tug thawj coj, thiab koj yuav tsum ris lub txim thiab tawm hauj lwm. Koj tsis muaj kev ris txiaj rau qhov uas koj tau raug txhawb, koj tsis tsim nyog tau txais kev ntseeg siab los ntawm cov kwv tij thiab cov nkauj muam, koj tsis tsim nyog tau txais kev ntseeg siab los ntawm Vajtswv lub tsev, thiab koj haj tseem tsis tsim nyog tau txais Vajtswv txoj kev tsa kom siab thiab. Koj yog ib tug neeg uas tsis muaj siab muaj ntsws li. Hom thawj coj cuav peb muaj teeb meem rau lawv tus cwj pwm ua neeg. Tsis hais lawv tus kheej tej kev caum thiab txoj kev nkag mus rau hauv lub neej txoj sia yuav zoo li cas los xij, tsuas txiav txim los ntawm qhov muaj tseeb tias thaum lub sij hawm lawv ua txoj hauj lwm ntawd lawv tsis ua tes hauj lwm tiag tiag, nrhiav tsis tau tej uas poob lawm rov qab los rau pawg ntseeg, thiab yeej tsis muaj peev xwm cheem los sis daws cov tib neeg phem tej kev ua phem kom ncav sij hawm, hom neeg no tsis tsuas yog muaj teeb meem ntawm lub peev xwm tsis zoo thiab teeb meem ntawm qhov tsis ua tes hauj lwm tiag tiag xwb, tiam sis qhov tseem ceeb tshaj plaws, lawv tsis muaj txoj kev ua neeg. Lawv lub siab txawj xav lwj tag nrho, thiab lawv yeej tsis muaj laj thawj hlo li. Nyob hauv cov lus uas ib txwm hais mas, lawv tsis muaj kev coj ncaj ncees; lawv twm xeeb thiab qias tshaj plaws, thiab lawv tsis tsim nyog ntseeg siab li. Nyob ntawm peb hom tib neeg uas peb tau txheeb xyuas ntawd, hom tib neeg no txoj kev ua neeg phem dua ntais. Thawj ob hom tib neeg ntawd mas lub peev xwm tsis zoo, lawv ua tsis tau tes hauj lwm, thiab lawv tsis tau raws li tej hauv paus ntsiab lus thiab cov qauv uas txhawb thiab cob qhia tib neeg ntawm Vajtswv lub tsev, yog li ntawd thiaj li tsis tuaj yeem cob qhia los sis siv lawv. Lawv lub peev xwm tsis zoo txog ib theem twg, lawv dig muag thiab loog, thiab lawv yuav luag yog cov neeg tuag lawm—tsis tsim nyog nthuav tawm thiab txheeb xyuas lawv lawm. Hom tib neeg thib peb mas yog cov uas phem tshaj plaws. Lawv qias kawg nkaus nyob hauv lawv txoj kev ua neeg, thiab peb txiav txim rau hom tib neeg no tias txawj ntxias thiab txawj dag. Cov tib neeg no haj tseem txawj ntxias dua cov hma liab thiab. Lawv tsis ua tes hauj lwm tiag tiag tiam sis muaj ntau yam kev hais ub hais no thiab nyob kaj siab lug. Tsis hais cov tib neeg phem thiab cov tawm tsam khetos cuam tshuam pawg ntseeg tes hauj lwm li cas los xij, lawv tsis ntxhov siab los sis tsis txhawj xeeb txog qhov ntawd thiab tseem xav ua cov thawj coj mus ntxiv. Vim li cas lawv thiaj li qaug hwj chim ua luaj? Cov thawj coj no hais tias, “Tib neeg phoom nce toj; hos dej ntws nqis hav. Txhua tus puav leej nyiam hwj chim!” Lawv tsis xav ua ib qho hauj lwm tiag tiag li tiam sis lawv hos tseem xav tuav lawv lub meej mom thiab xyiv fab rau tej txiaj ntsim ntawm lub meej mom. Qhov no yog hom neeg phem dab tsi? Lawv yog Ntxwgnyoog hom tag nrho, lawv yeej tsis yog ib yam dab tsi zoo kiag li.

Hnub no peb tau sib qhia peb yam txog cov thawj coj thiab cov neeg ua hauj lwm tej luag hauj lwm kaum ob. Cov thawj coj cuav uas peb tau txheeb xyuas hauv lub luag hauj lwm kaum ob yeej zoo ib yam li cov thawj coj cuav uas peb tau nthuav tawm yav dhau los ntawd. Txawm hais tias peb tau txheeb xyuas peb yam los xij, tej ntawd feem ntau hais txog ob qho teeb meem: Ib qho yog lawv lub peev xwm tsis zoo thiab ua tsis tau tes hauj lwm tiag tiag; lwm qhov yog lawv txoj kev ua neeg phem, qias, txawj ntxias, thiab txawj dag, thiab lawv tsis ua tes hauj lwm tiag tiag. Cov no yog cov teeb meem tseem ceeb uas yog lub hauv paus tshaj plaws ntawm cov thawj coj cuav. Tsuav yog ib tug neeg muaj ib qho ntawm ob qho teeb meem no xwb, ces lawv yog ib tug thawj coj cuav. Qhov no yeej tsis muaj kev ua xyem xyav li.

Lub Cuaj Hlis Hnub Tim 4, Xyoo 2021