Yuav Ua Li Cas Thiaj Li Paub Qhov Txawv ntawm Cov Tawm Tsam Khetos thiab Cov Tib Neeg Uas Muaj Cov Tawm Tsam Khetos Tus Moj Yam

Paub Cais Lawv Raws Li Tej Cwj Pwm Lawv Coj Rau Qhov Tseeb

Hnub no peb yuav sib qhia txuas ntxiv txog cov thawj coj thiab cov neeg ua hauj lwm tej luag hauj lwm. Ua ntej yuav pib sib qhia yam raws kev raws cai, cia peb rov qab mus saib ib lub ncauj lus uas ntsig txog cov tawm tsam khetos uas tau sib qhia yav tas los lawm ntawd: yuav ua li cas thiaj li paub qhov txawv ntawm cov tib neeg uas muaj cov tawm tsam khetos tus moj yam thiab cov uas muaj cov tawm tsam khetos lub ntsiab tseeb, thiab qhov sib txawv ntawm ob hom tib neeg no yog dab tsi. Ua ntej tshaj, peb yuav sib qhia txog qhov tias yuav paub cais cov tawm tsam khetos li cas; qhov no tsis tshua nyuaj. Ua ntej tshaj plaws, koj yuav tsum pom kom meej tias tej kev qhia tshwm uas pom tau meej meej ntawm cov tawm tsam khetos tus yam ntxwv ntawd yog dab tsi, kom koj thiaj li paub tau ib tug tawm tsam khetos tseem tseem nyob rau hauv ib lub sij hawm luv luv, txiav txim tau hais tias lawv yeej tsis yog ib tug neeg uas tsuas muaj cov tawm tsam khetos tus moj yam los sis ib tug neeg uas taug cov tawm tsam khetos txoj kev xwb. Ua li no mas, koj yuav muaj kev paub cais txog cov tawm tsam khetos thiab yuav tsis raug lawv coj mus yuam kev, ntxias mag ntxiab, thiab tswj ntxiv lawm. Tam sim no qhov tseem ceeb tshaj plaws yog yuav tsum muaj peev xwm paub qhov txawv uas pom tau meej ntawm cov tib neeg uas muaj cov tawm tsam khetos tus yam ntxwv xeeb txawm lub ntsiab tseeb thiab cov uas muaj cov tawm tsam khetos tus moj yam. Yuav paub cais ob hom tib neeg no, koj yuav tsum xub to taub lawv cov yam ntxwv tseem ceeb ua ntej. Ib txhia tib neeg tsuas to taub cov tawm tsam khetos tej kev nthuav tawm txog txoj kev qias vuab tsuab nyob hauv lub neej txhua hnub xwb, xws li lawv tej kev nyiam siv lawv lub meej mom thiab qhuab ntuas lwm tus, tiam sis tsis paub cais cov tawm tsam khetos tus yam ntxwv xeeb txawm lub ntsiab tseeb. Ua li no puas tau? (Tsis tau.) Kuj muaj cov uas hais tias cov tawm tsam khetos tej kev qhia tshwm uas pom tau meej tshaj plaws mas yog lawv txoj kev khav theeb thiab khav txiv, thiab lawv txiav txim tias txhua tus tib neeg uas khav theeb thiab khav txiv puav leej yog cov tawm tsam khetos. Qhov no puas yog? (Tsis yog.) Vim li cas thiaj li tsis yog? Vim txoj kev khav theeb thiab khav txiv tsis yog cov tawm tsam khetos tej kev qhia tshwm uas pom tau meej tshaj plaws; tej ntawd yog tej moj yam qias vuab tsuab uas cov tib neeg ntiaj teb qias vuab tsuab puav leej muaj. Txhua tus puav leej muaj ib tus moj yam khav theeb thiab khav txiv, yog li ntawd qhov txiav txim tias txhua tus tib neeg uas khav theeb thiab khav txiv yog cov tawm tsam khetos mas yog ib qho kev ua yuam kev loj heev. Yog li ntawd, tej kev qhia tshwm twg thiaj li yog cov tawm tsam khetos tej kev qhia tshwm ntawm lub ntsiab tseeb, uas tuaj yeem ua rau saib ib muag es pom tshab plaws txog qhov txawv ntawm lub ntsiab tseeb ntawm cov tawm tsam khetos thiab cov tib neeg uas muaj cov tawm tsam khetos tus moj yam, thiab ua rau tib neeg paub cais tau hais tias ob hom tib neeg no lub ntsiab tseeb yeej txawv, thiab tias yuav tsum coj txawv rau cov tib neeg zoo li no? Nyob rau qee kis, xws li tej kev ua, tej kev coj, thiab tej moj yam, ob hom tib neeg no puas muaj qhov zoo sib xws thiab ib yam? (Muaj.) Yog koj tsis ua tib zoo saib, tsis ua tib zoo paub qhov txawv, los sis tsis muaj ib qho kev to taub thiab kev paub cais kom yog txog tus moj yam thiab lub ntsiab tseeb ntawm ob hom tib neeg no nyob hauv koj lub siab, ces yeej yooj yim heev uas yuav coj rau ob hom neeg no yam li yog tib hom tib neeg xwb. Tej zaum koj haj tseem yuav saib yuam kev tias ib tug tawm tsam khetos yog ib tug neeg uas muaj cov tawm tsam khetos tus moj yam thiab saib tias tus neeg uas muaj cov tawm tsam khetos tus moj yam yog ib tug tawm tsam khetos, uas yog, yooj yim ua tej kev txiav txim uas yuam kev zoo li no. Yog li ntawd, ob hom tib neeg no muaj tej yam ntxwv tseem ceeb thiab qhov txawv dab tsi uas yuav ua rau yus paub cais tau nrog cov pov thawj khov kho tias leej twg yog ib tug tawm tsam khetos thiab leej twg yog ib tug neeg uas muaj cov tawm tsam khetos tus moj yam? Nej yeej swm rau lub ncauj lus no, yog li ntawd cia nej los hais. (Ib kis uas siv los paub qhov txawv ntawm cov tawm tsam khetos thiab cov tib neeg uas muaj cov tawm tsam khetos tus moj yam mas yog los ntawm lawv tus cwj pwm uas coj rau qhov tseeb; lwm kis mas yog los ntawm lawv txoj kev ua neeg. Nyob rau hauv lawv tus cwj pwm uas coj rau qhov tseeb mas, cov tawm tsam khetos ntxub qhov tseeb thiab tsis lees txais qhov tseeb kiag li. Txawm lawv yuav ua kev ua phem ntau npaum li cas uas ua rau muaj kev tab kaum thiab kev cuam tshuam, thiab txawm yuav sib qhia nrog lawv los sis ntuas lawv li cas los xij, lawv yeej tsis lees paub thiab tawv ncauj tsis hloov dua siab tshiab kiag li. Cov tib neeg uas muaj cov tawm tsam khetos tus moj yam kuj yuav ua tej yam yuam kev thaum lawv tsis to taub qhov tseeb los sis tsis to taub tej hauv paus ntsiab lus, tiam sis thaum lawv raug ntuas, lawv lees txais tau qhov tseeb, tig xav txog thiab paub lawv tus kheej, thiab muaj peev xwm tu siab thiab hloov dua siab tshiab. Saib los ntawm lawv tus cwj pwm uas coj rau qhov tseeb mas, lub ntsiab tseeb ntawm cov tawm tsam khetos mas ntxub qhov tseeb, hos cov tib neeg uas muaj cov tawm tsam khetos tus moj yam mas lees txais tau qhov tseeb. Saib los ntawm lawv txoj kev ua neeg, cov tawm tsam khetos yog cov tib neeg phem uas tsis muaj lub siab txawj xav los sis tsis paub txaj muag kiag li, hos cov tib neeg uas muaj cov tawm tsam khetos tus moj yam mas muaj lub siab txawj xav thiab paub txaj muag.) Nej tau hais txog ob tug yam ntxwv; cov ntsiab lus no puas yog yav tas los tau sib qhia dua lawm? Tej no puas suav tau tias yog tej yam ntxwv uas pom tau meej lod? (Suav tau.) Cov tawm tsam khetos thiab cov tib neeg uas muaj cov tawm tsam khetos tus moj yam lawv tej cwj pwm uas coj rau qhov tseeb mas sib txawv tag nrho. Qhov no yog ib qho tseem ceeb heev, thiab yog ib qho kev qhia tshwm uas muaj tej yam ntxwv uas pom tau meej. Cov tawm tsam khetos tsis nyiam qhov tseeb kiag li thiab tsis lees txais qhov tseeb kiag li. Lawv yeej xum tuag zoo dua li lees paub tias Vajtswv cov lus yog qhov tseeb. Txawm koj yuav sib qhia txog qhov tseeb li cas los xij, nyob hauv lawv lub siab yeej tawm tsam thiab tsis nyiam qhov ntawd kiag li. Lawv haj tseem yuav foom phem rau koj nyob hauv lawv lub siab, thuam luag koj, thiab saib tsis taus koj, thiab coj rau koj yam tsis muaj nqis kiag li. Cov tawm tsam khetos ua yeeb ncuab rau qhov tseeb; qhov no yog ib tug yam ntxwv uas pom tau meej. Thiab cov tib neeg uas muaj cov tawm tsam khetos tus moj yam ntawd muaj tej yam ntxwv dab tsi? Hais kom raug thiab ncaj ncees mas, cov tib neeg uas muaj cov tawm tsam khetos tus moj yam tiam sis muaj lub siab txawj xav thiab laj thawj me ntsis ntawd hloov tau lawv tej kev xav phem thiab lees txais tau qhov tseeb los ntawm qhov uas lwm tus sib qhia qhov tseeb nrog lawv. Yog lawv raug ntuas, lawv kuj zwm tau rau thiab. Qhov ntawd yog, tsuav cov tib neeg uas muaj cov tawm tsam khetos tus moj yam ntawd ntseeg Vajtswv yam siab dawb paug xwb, ces feem coob ntawm lawv yeej lees txais tau qhov tseeb tsis ntau los tsawg. Muab hais luv luv tias, cov tib neeg uas muaj cov tawm tsam khetos tus moj yam lees txais tau qhov tseeb thiab zwm tau rau los ntawm tej hau kev xws li lawv tus kheej nyeem Vajtswv cov lus, lees txais Vajtswv kev qhuab ntuas thiab kev qhia kom paub, los sis kev ntuas, kev pab, thiab kev txhawb ntawm cov kwv tij thiab cov nkauj muam. Qhov no yog ib tug yam ntxwv uas pom tau meej. Txawm li cas los xij, cov tawm tsam khetos mas txawv. Txawm leej twg yuav sib qhia qhov tseeb los xij, lawv yeej tsis mloog thiab tsis zwm rau li. Lawv tsuas muaj ib tug cwj pwm xwb: Lawv xum tuag zoo dua li lees txais qhov tseeb. Txawm koj yuav ntuas lawv li cas los, yeej tsis muaj qab hau li. Txawm koj yuav sib qhia qhov tseeb kom meej npaum li cas los xij, lawv yeej tsis lees txais; lawv haj tseem tawm tsam nyob hauv lawv lub siab thiab tsis nyiam qhov ntawd kiag li. Ib tug neeg uas muaj tus moj yam uas ntxub qhov tseeb zoo li no puas yuav zwm tau rau Vajtswv? Yeej zwm tsis tau kiag li. Yog li ntawd, cov tawm tsam khetos yog Vajtswv cov yeeb ncuab, thiab lawv yog cov tib neeg uas cawm tsis tau lawm.

Paub Cais Lawv Raws Li Lawv Txoj Kev Ua Neeg

Nyuam qhuav no, nej kuj tau hais txog lwm tus yam ntxwv uas siv los paub cais cov tawm tsam khetos thiab cov tib neeg uas muaj cov tawm tsam khetos tus moj yam, uas yog saib los ntawm txoj kev ua neeg. Leej twg xav sib qhia ntxiv txog tus yam ntxwv no? (Cov tawm tsam khetos muaj ib txoj kev ua neeg uas lim hiam tshwj xeeb; lawv tuaj yeem tsuj nias thiab tsim txom tib neeg, thiab txawm lawv yuav ua kev phem ntau npaum li cas los xij, lawv yeej tsis paub hloov dua siab tshiab li.) Yog lawm, tus yam ntxwv tseem ceeb ntawm cov tawm tsam khetos yog lawv txoj kev ua neeg uas lim hiam, lawv qhov tsis paub txaj muag, thiab lawv qhov tsis muaj lub siab txawj xav thiab laj thawj. Txawm lawv yuav ua kev phem ntau npaum li cas nyob rau hauv pawg ntseeg los sis ua rau pawg ntseeg tes hauj lwm puas tsuaj ntau npaum li cas los xij, lawv tsis hnov txaj muag, thiab lawv tsis saib lawv tus kheej li cov neeg muaj kev txhaum. Txawm Vajtswv lub tsev yuav muab lawv nthuav tawm los sis cov kwv tij thiab cov nkauj muam ntuas lawv los xij, lawv yeej tsis ntshai, thiab tsis hnov tias tim lawv los sis nyuaj siab li. Qhov no yog cov tawm tsam khetos txoj kev qhia tshwm nyob rau ntawm txoj kev ua neeg. Lawv tej yam ntxwv tseem ceeb mas yog qhov tsis muaj lub siab txawj xav thiab laj thawj, thiab qhov tsis paub txaj muag, thiab muaj ib tus moj yam uas lim hiam heev. Txawm leej twg uas kov raug lawv tej txiaj ntsim los yeej raug lawv txiav txim thiab tsim txom, thiab lawv muaj ib lub siab xav ua pauj uas muaj zog tshwj xeeb, tsis zam rau leej twg li, txawm yog lawv cov txheeb ze los yeej tsis tseg li. Cov tawm tsam khetos yeej lim hiam npaum li no ntag. Tiam sis, cov tib neeg uas muaj cov tawm tsam khetos tus moj yam mas, txawm lawv yuav nthuav txoj kev qias vuab tsuab tawm ntau npaum li cas los xij, tej zaum lawv kuj yuav tsis yog cov tib neeg phem. Txawm lawv yuav muaj qhov tsis zoo los sis qhov tsis txaus hauv lawv txoj kev ua neeg dab tsi, lawv yuav ua yuam kev dab tsi, los sis lawv yuav ua tsis tiav thiab ntog rau qhov twg los xij, lawv tig xav txog lawv tus kheej tau thiab kawm tau tej lus qhia tom qab ntawd. Thaum lawv raug ntuas, lawv lees paub tau lawv tej kev ua yuam kev thiab tu siab; thiab thaum cov kwv tij thiab cov nkauj muam cem los sis nthuav tawm lawv—txawm yog lub sij hawm ntawd lawv yuav hais daws lawv tus kheej me ntsis thiab tsis kam lees paub los xij—tseeb tiag lawv twb lees paub lawv qhov kev ua yuam kev hauv lawv lub siab lawm thiab zwm rau lawm. Qhov no ua pov thawj tias lawv tseem lees txais tau qhov tseeb thiab tseem hloov tau. Thaum lawv ua yuam kev los sis ntsib ib qho teeb meem twg, lawv lub siab txawj xav thiab laj thawj tseem ua tau hauj lwm; lawv paub txog, tsis yog loog thiab tsis hnov dab tsi, los sis tsis yog tawv ncauj dhau thiab tsis kam lees paub. Tsis tas li ntawd, txawm hais tias hom tib neeg no muaj cov tawm tsam khetos tus moj yam los, lawv kuj muaj kev khuv leej thiab siab zoo dua me ntsis. Thaum lawv ntsib ntau yam xwm txheej, tej yam ntxwv uas lawv qhia tawm nyob rau ntawm txoj kev ua neeg mas piav tau—raws li txoj kev uas haum tshaj plaws thiab yooj yim to taub tshaj plaws—tias kuj muaj laj thawj me ntsis. Yog raug ntuas hnyav, yam ntau kawg mas lawv yuav hnov tsis nyiam me ntsis hauv lawv lub siab, tiam sis yog saib los ntawm qhov kev qhia tshwm ntawm lawv txoj kev ua neeg, yeej pom tau hais tias lawv tseem paub txaj muag, tias lawv lub siab txawj xav tuaj yeem cem lawv, thiab tias lawv qhov laj thawj txwv tau lawv rau ib theem twg. Yog lawv ua rau Vajtswv lub tsev tej txiaj ntsim puas tsuaj los sis ua phem rau ib tug kwv tij thiab ib tug nkauj muam twg, lawv yeej ib txwm hnov tsis xis nyob hauv nruab siab thiab hnov tias lawv tshuav Vajtswv nqi. Tej kev qhia tshwm no raug nthuav tawm ntau los tsawg sib txawv ntawm cov tib neeg uas muaj cov tawm tsam khetos tus moj yam. Txawm yog lawv tsis kho tam sim ntawd los sis xaiv kom yog thiab ua raws kom yog tom qab tej xwm txheej tshwm sim los xij, cov tib neeg no tseem muaj ib qho kev paub nyob hauv lawv lub siab. Lawv lub siab txawj xav cem lawv; lawv paub tias lawv ua txhaum lawm thiab tsis tsim nyog ua li ntawd ntxiv lawm, thiab lawv kuj hnov tias lawv tsis yog neeg zoo—yam tsis pom meej, lawv puav leej muaj tau tej kev xav no. Tsis tas li ntawd, sij hawm dhau mus, lawv tus yam ntxwv yuav hloov, thiab lawv yuav muaj kev hloov dua siab tshiab tiag tiag. Lawv yuav hnov tu siab heev, khuv xim tias thaum xub thawj lawv tsis tau xaiv kom yog los sis ua raws kom yog. Tej kev qhia tshwm no yog kiag tej kev qhia tshwm uas muaj ntau tshaj plaws thiab dog dig tshaj plaws ntawm cov tib neeg uas qias vuab tsuab. Txawm li cas los xij, cov uas yog cov tawm tsam khetos mas tshwj xeeb; lawv tsis yog tib neeg tiam sis yog cov dab. Txawm yuav siv sij hawm ntev npaum li cas tom qab lawv ua kev phem los sis ua txhaum los xij, lawv tsis hnov tu siab kiag li; lawv tseem tawv ncauj, thiab nias qees mus txog thaum kawg. Cov tib neeg uas muaj cov tawm tsam khetos tus moj yam zwm tau rau thaum lawv raug kev ntuas uas dog dig. Thaum raug kev ntuas hnyav, tej zaum lawv yuav hais daws lawv tus kheej, tsis lees paub tej yam, thiab tsis kam lees txais nyob rau lub sij hawm ntawd, tiam sis tom qab ntawd lawv muaj peev xwm tig xav txog thiab paub lawv tus kheej, thiab tu siab thiab hloov dua siab tshiab. Txawm muaj neeg thuam luag lawv thiab txiav txim tias lawv tsis muaj txoj kev ua neeg los xij, tej zaum lawv yuav hnov mob hauv lawv lub siab tiam sis yuav tsis tawm tsam rov qab los sis coj rau tus neeg ntawd yam li ib tug yeeb ncuab. Lawv kuj to taub lwm tus thiab, xav hais tias, “Kuv tsuas cem kuv tus kheej xwb rau qhov ua txhaum ntawd; txawm lwm tus yuav coj rau kuv li cas los yeej tsim nyog lawm.” Tej kev qhia tshwm no nthuav tawm ntau los tsawg sib txawv nyob rau hauv ntau tus tib neeg uas sib txawv. Muab hais kom luv luv ces, tej kev nthuav tawm no yog tej kev qhia tshwm uas ib txwm muaj thiab raws li ntuj tsim ntawm cov tib neeg uas muaj cov tawm tsam khetos tus moj yam, cov tib neeg uas muaj cov moj yam qias vuab tsuab, thiab qhov no yog qhov uas lawv txawv meej meej ntawm cov tawm tsam khetos. Los ntawm tej kev qhia tshwm uas sib txawv ntawm ob tug yam ntxwv no, qhov ntawd thiaj li ib muag es pom tau meej tias cov tib neeg twg yog cov tib neeg phem thiab cov tawm tsam khetos, thiab cov twg yog cov tib neeg uas tsuas muaj cov tawm tsam khetos tus moj yam xwb tiam sis tsis yog cov tib neeg phem.

Paub Cais Lawv Raws Li Qhov Seb Lawv Puas Hloov Dua Siab Tshiab Tiag Tiag los Tsis Lees

Ob kis ntawm qhov sib txawv ntawm cov tawm tsam khetos thiab cov tib neeg uas muaj cov tawm tsam khetos tus moj yam nyuam qhuav tau hais txog: Kis ib yog lawv tus cwj pwm coj rau qhov tseeb; tib neeg tus cwj pwm coj rau qhov tseeb yog lawv tus cwj pwm coj rau Vajtswv. Nyob rau kis no, muaj ib qho kev sib txawv meej meej ntawm ob hom tib neeg no. Qhov ob, nyob rau ntawm txoj kev ua neeg, ob hom tib neeg no kuj muaj ib qho kev sib txawv ntawm lub ntsiab tseeb uas meej meej thiab. Ob tug yam ntxwv no pom tau meej heev; lawv yog ob hom tib neeg uas txawv tag nrho li. Dhau ntawm ob qho kev sib txawv no lawm, lwm kis yog qhov seb puas muaj ib qho kev qhia tshwm ntawm kev hloov dua siab tshiab tom qab ua kev phem. Rau cov uas yog cov tawm tsam khetos mas, txawm lawv yuav ua kev phem dab tsi los xij—txawm lawv tsim txom tib neeg, tsim tej nceeg vaj rau lawv tus kheej, nrog Vajtswv txeeb lub meej mom, nyiag tej khoom fij, los sis lwm yam ntxiv—txawm yog lawv raug muab nthuav tawm ncaj qha los, lawv yeej tsis lees tej kev ua no. Yog lawv tsis lees tej ntawd, lawv puas yuav hloov dua siab tshiab tau? Lawv xum tuag zoo dua li hloov dua siab tshiab. Lawv tsis lees txais tej xwm txheej uas muaj tseeb txog lawv tej kev ua phem. Txawm lawv yuav paub tias qhov kev nthuav tawm ntawd yeej yog tag nrho los xij, lawv yeej tsis kam lees txais thiab tawm tsam qhov ntawd. Lawv yeej tsis tig xav txog lawv tus kheej kiag li tias seb lawv puas tab tom taug txoj kev uas yuam kev los sis hais tias, “Kuv raug txiav txim tias yog ib tug tawm tsam khetos lawm. Qhov no phom sij heev, thiab kuv yuav tsum tau hloov dua siab tshiab.” Nyob hauv lawv lub siab yeej tsis muaj hom kev xav zoo li no kiag li. Lawv txoj kev ua neeg yeej tsis muaj tej yam no. Yog li ntawd, cov tawm tsam khetos muaj ib tug yam ntxwv uas pom tau meej: Txawm lawv yuav ntseeg Vajtswv ntau xyoo npaum li cas los xij, lawv yeej tsis lees txais qhov tseeb kiag li thiab tsis muaj kev hloov tiag tiag li. Thaum lawv nyuam qhuav pib ntseeg Vajtswv ntawd, lawv nyiam tshwm ntsej muag nyob hauv cov neeg coob coob, sib txeeb lub hwj chim thiab txiaj ntsim, tsim txom tib neeg, thiab tsim pab tsim pawg thiab faib pawg ntseeg. Lawv lub hom phiaj ntawm qhov tuav lub hwj chim ntawd yog xav ua neej nyob vam khom rau pawg ntseeg thiab tsim ib lub nceeg vaj rau lawv tus kheej. Tom qab ntseeg tau peb mus txog tsib xyoos lawm, thaum koj rov pom lawv dua, lawv tseem nthuav tej kev qhia tshwm thiab tej yam ntxwv no tawm yam tsis hloov kiag li. Txawm yog tom qab yim los sis kaum xyoo lawm los, lawv yeej tseem nyob li qub. Ib txhia tib neeg hais tias, “Tej zaum lawv yuav hloov tom qab ntseeg tau 20 xyoo lawm!” Lawv hloov puas tau? (Tsis tau.) Lawv yeej yuav tsis hloov li. Lawv nthuav tej kev qhia tshwm no tawm txawm yog lawv nrog ob peb tug neeg los sis nrog tib neeg feem coob sib cuag, txawm yog ua tej dej num dog dig los sis ua cov thawj coj los sis cov neeg ua hauj lwm. Lawv yeej tsis hloov dua siab tshiab los sis tig rov qab, nias qees taug tib txoj kev ntawd mus txog thaum kawg. Lawv yeej yuav tsis hloov dua siab tshiab kiag li. Qhov no yog cov tawm tsam khetos. Hos cov tib neeg uas muaj cov tawm tsam khetos tus moj yam ntawd, txawm tias qee leej tsis yog cov tib neeg phem los, lawv kuj muaj cov moj yam qias vuab tsuab thiab. Lawv nthuav txoj kev khav theeb, kev txawj dag, kev twm xeeb, kev qias, thiab lwm hom kev qias vuab tsuab tawm. Lawv kuj qhia tawm txog txoj kev ua neeg uas tsis zoo thiab. Thaum lawv nyuam qhuav pib ntseeg Vajtswv ntawd, lawv kuj xav txeeb lub koob npe thiab kev tau txais txiaj ntsim, tshwm ntsej muag kom tib neeg qhuas, thiab muaj tej kev xav ua heev thiab kev ntshaw heev los ua cov thawj coj thiab tuav lub hwj chim. Tej kev qhia tshwm no muaj ntau los sis tsawg sib txawv nyob hauv cov tib neeg qias vuab tsuab thiab txawv tsis ntau ntawm cov tawm tsam khetos. Txawm li cas los xij, nyob rau hauv tus txheej txheem ntawm kev ntseeg Vajtswv, lawv los to taub qee qhov tseeb los ntawm qhov ntsib pom txoj kev txiav txim thiab kev nthuav tawm ntawm Vajtswv cov lus, thiab lawv nthuav cov moj yam qias vuab tsuab no tawm tsawg zuj zus. Vim li cas thiaj li nthuav cov moj yam qias vuab tsuab no tawm tsawg zuj zus? Qhov ntawd yog vim tom qab to taub qhov tseeb lawm, lawv paub tias tej kev coj thiab tej kev qhia tshwm no yog tej kev nthuav tawm txog cov moj yam qias vuab tsuab. Tsuas yog nyob rau theem no lawv lub siab txawj xav thiaj li paub txog, thiab lawv pom tias lawv qias vuab tsuab heev thiab yeej tsis zoo nkaus li ib tug tib neeg tiag. Tom qab ntawd lawv thiaj li txaus siab caum qhov tseeb thiab xav txog qhov yuav muab cov moj yam qias vuab tsuab no tso tseg li cas, thiab yuav ua li cas lawv thiaj li dim tau ntawm txoj kev raug khi, thiab los ua ib tug neeg uas caum thiab ua raws li qhov tseeb. Qhov kev qhia tshwm no yog dab tsi? Qhov no tsis yog maj mam hloov dua siab tshiab lod? (Yog.) Nyob rau hauv tus txheej txheem uas ntsib pom Vajtswv tes hauj lwm, lawv pom lawv tus kheej tej teeb meem, paub lawv cov moj yam qias vuab tsuab, thiab to taub lawv ntau tus yam ntxwv. Lawv kuj los paub txog lawv txoj kev ua neeg lub ntsiab tseeb, thiab lawv lub siab txawj xav paub txog ntau zuj zus; lawv hnov ntau zuj zus tias lawv qias vuab tsuab tob dhau thiab tsis haum rau Vajtswv siv thiab tias lawv ua rau Vajtswv ntxub, thiab lawv ntxub lawv tus kheej hauv nruab siab. Yam tsis nco qab paub, lawv maj mam hloov dua siab tshiab nyob rau hauv qhov tob tshaj plaws hauv lawv lub siab, thiab nrog rau txoj kev hloov dua siab tshiab no, thiaj li muaj qee yam kev hloov me me tshwm tuaj, uas yog tej kev hloov me me uas pom tau nyob rau hauv lawv txoj kev coj. Piv txwv li, thaum xub thawj mas, thaum ib tug neeg twg nthuav lawv tej teeb meem tawm, lawv yuav hnov tias tsis nyiam kiag li, npau taws vim txaj muag, thiab yuav hais daws lawv tus kheej, siv kawg zog los nrhiav ntau yam lus daws thiab laj thawj los tiv thaiv lawv tus kheej. Txawm li cas los xij, los ntawm tej kev ntsib kev pom uas tsis tu ncua, lawv thiaj li paub tias txoj kev ua no tsis yog thiab pib kho tus yam ntxwv thiab txoj kev ua no, siv zog los lees txais tej kev xam pom uas yog, siv zog kom muaj kev sib koom tes uas sib haum xeeb nrog lwm tus. Thaum muaj xwm txheej tshwm sim rau lawv, lawv kawm nrhiav thiab sib qhia nrog lwm tus, thiab lawv kawm sib txuas lus nrog lwm tus los ntawm lub siab tuaj thiab nrog lwm tus nyob sib haum xeeb. Tej no puas yog tej kev qhia tshwm ntawm kev hloov dua siab tshiab? (Yog.) Tom qab ntseeg Vajtswv lawm, lawv maj mam tau txais ib qho kev to taub tiag tiag txog qee tus moj yam, tej kev coj thiab tej kev qhia tshwm ntawm cov tawm tsam khetos uas lawv nthuav tawm. Tom qab ntawd lawv maj mam muab lawv cov moj yam qias vuab tsuab tso tseg, thiab muaj peev xwm tso lawv tej kev ua neej uas yuam kev yav tas los tseg, thiab tso txoj kev caum lub koob npe thiab lub meej mom tseg, thiab muaj peev xwm ua, coj lawv tus kheej, thiab ua lawv tes dej num raws li qhov tseeb tej hauv paus ntsiab lus. Qhov kev hloov zoo li no ua tau tiav li cas? Qhov ntawd puas yog ua tau tiav los ntawm kev qhov tseeb thiab pheej tig lawv tus kheej rov qab thiab hloov dua siab tshiab? (Yog.) Txhua yam no puav leej ua tau tiav nyob rau hauv tus txheej txheem ntawm txoj kev hloov dua siab tshiab uas tsis tu ncua. Tom qab ntawd, lawv tus yam ntxwv yeej yuav zoo zuj zus tuaj, lawv theem ntawm sab ntsujplig kuj yuav loj hlob tuaj raws li lawv tej kev ntsib kev pom uas tob zuj zus, thiab thaum muaj tej xwm txheej tshwm sim rau lawv, lawv muaj peev xwm tig xav txog lawv tus kheej. Txawm lawv yuav ntsib kev nyuaj los sis kev ua tsis tiav, los sis lawv raug ntuas los xij, lawv coj tej teeb meem no los rau ntawm Vajtswv lub xub ntiag thiab thov Vajtswv, thiab kuj tuaj yeem muab piv, txheeb xyuas, thiab to taub lawv tus yam ntxwv qias vuab tsuab thaum nyeem Vajtswv cov lus thiab. Txawm hais tias lawv tseem yuav nthuav txoj kev qias vuab tsuab tawm thiab muaj tej kev xav uas yuam kev thaum muaj xwm txheej tshwm sim rau lawv los, lawv muaj peev xwm tig xav txog thiab ntxeev siab tawm tsam lawv tus kheej. Tsuav lawv paub txog tej teeb meem no lawm xwb, lawv yeej yuav nrhiav qhov tseeb los daws tej ntawd yam tsis tu ncua thiab xyaum hloov dua siab tshiab. Txawm hais tias qhov kev nce qib no qeeb heev thiab tej txiaj ntsig tsawg heev los, lawv pheej hloov tas li nyob rau hauv qhov tob tshaj plaws hauv lawv lub siab. Cov tib neeg hom no ib txwm tuav rawv ib tus cwj pwm thiab tus yam ntxwv uas nquag, zoo, thiab txhawb tus kheej ntawm kev tig lawv tus kheej rov qab thiab hloov dua siab tshiab. Txawm hais tias qee zaum lawv txeeb lub koob npe thiab lub meej mom nrog lwm tus thiab nthuav qee yam kev qhia tshwm thiab kev ua ntawm cov tawm tsam khetos tawm ntau tsawg sib txawv los, tom qab ntsib pom qee yam kev ntuas, kev txiav txim, thiab kev rau txim, los sis Vajtswv txoj kev qhuab ntuas lawm, cov moj yam qias vuab tsuab no raug muab tso tseg thiab hloov tsis ntau los tsawg uas sib txawv. Lub hauv paus tseem ceeb rau qhov ua tau tej txiaj ntsig no yog qhov uas hom tib neeg no tuaj yeem, nyob rau hauv qhov tob tob ntawm lawv lub siab, tig xav txog thiab to taub lawv cov moj yam qias vuab tsuab thiab tej kev uas yuam kev uas lawv tau taug lawm, thiab tuaj yeem tig lawv tus kheej rov qab. Txawm hais tias tej kev hloov, kev loj hlob, thiab kev tau txais los ntawm lawv txoj kev tig rov qab ntawd tsawg heev, thiab kev nce qib qeeb heev, mus txog theem uas lawv tus kheej haj tseem yuav tsis paub txog los xij, tom qab peb mus rau tsib xyoos ntawm tej kev ntsib kev pom zoo li no, lawv yuav hnov tau qee qhov kev hloov nyob hauv lawv tus kheej, thiab cov uas nyob ib puag ncig lawv kuj pom tau qhov ntawd thiab. Txawm li cas los xij, yeej muaj ib qho kev sib txawv ntawm cov tib neeg uas muaj cov tawm tsam khetos tus moj yam thiab cov uas yog cov tawm tsam khetos. Tus yam ntxwv tseem ceeb nyob rau kis no yog dab tsi? (Cov tib neeg uas muaj cov tawm tsam khetos tus moj yam muaj peev xwm hloov dua siab tshiab.) Thaum lawv ua ib yam dab tsi uas yuam kev, ua txhaum, los sis ntsib kev ntuas, kev txiav txim thiab kev rau txim, kev nplawm los sis kev qhuab ntuas, lawv tuaj yeem hloov dua siab tshiab. Txawm yog thaum lawv paub tias lawv ua tsis yog los sis ua yuam kev lawm los, lawv tuaj yeem tig xav txog lawv tus kheej thiab muaj ib tus cwj pwm uas tig lawv tus kheej rov qab thiab hloov dua siab tshiab nyob hauv lawv lub siab. Qhov no yog ib qho kev sib txawv ntawm tus yam ntxwv uas ua rau cov tib neeg uas muaj cov tawm tsam khetos tus moj yam txawv kiag ntawm cov tawm tsam khetos.

Ib Qho Kev Xaus Lus Txog Qhov Sib Txawv Ntawm Cov Tawm Tsam Khetos thiab Cov Tib Neeg Uas Muaj Cov Tawm Tsam Khetos Tus Moj Yam

Cov tawm tsam khetos yog cov Ntxwgnyoog uas muaj sia nyob. Hais tau tias lawv ua neej nyob yog Ntxwgnyoog; lawv yog cov dab thiab Ntxwgnyoog uas tib neeg lub qhov muag pom tau. Yog li ntawd, cia peb xaus lus txog lub ntsiab tseeb uas sib txawv ntawm cov tawm tsam khetos thiab cov tib neeg uas muaj cov tawm tsam khetos tus moj yam. Ib kis mas yog lawv tus cwj pwm uas coj rau qhov tseeb. Cov tawm tsam khetos yeej tsis lees txais qhov tseeb kiag li. Txawm yog lawv lub ncauj lees tau tias Vajtswv cov lus yog qhov tseeb, thiab yog tej yam uas zoo, thiab yog cov lus uas muaj txiaj ntsim rau tib neeg, thiab yog tus qauv rau txhua yam uas zoo, thiab tib neeg yuav tsum lees txais, zwm rau, thiab ua raws—txawm yog lawv hais tau txhua yam no los—lawv yeej tsis tuaj yeem muab Vajtswv cov lus coj los ua raws kiag li. Vim li cas lawv thiaj li tsis ua raws? Vim lawv lub siab tsis lees txais qhov tseeb. Lawv lub qhov ncauj hais tias Vajtswv cov lus yog qhov tseeb, tiam sis lawv muaj lwm txoj kev npaj siab: Lawv hais li no kom npog tau qhov muaj tseeb uas lawv tsis lees txais qhov tseeb thiab kom coj tib neeg mus yuam kev. Qhov uas cov tawm tsam khetos txawj hais cov lus thiab cov kev qhuab qhia, tsis tau txhais hais tias lawv lub siab lees paub tias Vajtswv cov lus yog qhov tseeb. Lawv muab qhov tseeb coj los ua raws tsis tau vim lawv lub siab yeej tsis lees txais qhov tseeb ntawm Vajtswv cov lus kiag li; lawv tsis kam lees txais qhov tseeb thiab ua raws li qhov tseeb kom nkag mus rau hauv qhov tseeb qhov muaj tiag. Lwm kis mas, cov tib neeg uas muaj cov tawm tsam khetos tus moj yam tej zaum yuav tsis yog cov tawm tsam khetos. Ib txhia ntawm lawv tuaj yeem lees txais thiab zwm rau qhov tseeb, thiab tej yam uas zoo, thiab cov lus uas yog tau raws li ntau theem uas sib txawv—qhov no yog ib qho uas sib txawv. Cov tib neeg uas muaj cov tawm tsam khetos lub ntsiab tseeb ua yeeb ncuab rau qhov tseeb, thiab ntxeev siab tso qhov tseeb tseg, tiam sis qee cov tib neeg uas muaj cov tawm tsam khetos tus moj yam tuaj yeem lees txais thiab ua raws li qhov tseeb. Los ntawm qhov nyeem Vajtswv cov lus, thiab los ntawm qhov ntsib pom Vajtswv tes hauj lwm tau ob peb xyoos, lawv tus cwj pwm uas coj rau qhov tseeb tuaj yeem hloov tau me ntsis. Nyob tob tob hauv lawv lub siab xav tias txawm yog lawv muab coj los ua raws tsis tau los, qhov tseeb yeej zoo thiab yeej yog lawm. Tsuas yog lawv tsis nyiam qhov tseeb los sis tsis tshua xav paub txog qhov tseeb xwb, yog li ntawd qhov ua raws ntawd thiaj li tim tsum siv zog thiab khwv me ntsis. Yog li ntawd, cov tib neeg uas muaj cov tawm tsam khetos tus moj yam tiam sis muaj lub siab txawj xav thiab laj thawj me ntsis tuaj yeem lees txais qhov tseeb tau raws li ntau theem uas sib txawv. Yam tsawg kawg, nyob tob tob hauv lawv lub siab, lawv tsis tawm tsam los sis qias qhov tseeb, thiab lawv tsis yog tsis nyiam qhov tseeb kiag li. Tib neeg feem coob yeej nyob rau hauv hom yam ntxwv no thiab qhia tawm hom kev qhia tshwm no rau qhov tseeb. Qhov uas piav txog hom tib neeg no yeej tsis yog hais kom zoo dhau los sis hais kom phem dhau. Qhov no yeej ncaj ncees raws li qhov muaj tiag, puas yog? (Yog.) Lwm kis yog qhov paub cais lawv los ntawm txoj kev ua neeg, qhov ntawd yog, paub cais raws li lawv lub siab txawj xav, laj thawj, thiab qhov zoo los sis qhov phem hauv lawv txoj kev ua neeg. Tus neeg twg uas muaj txoj kev ua neeg phem, tsis lees txais qhov tseeb, thiab tshwj xeeb yog tsis nyiam qhov tseeb kiag li ces tus neeg ntawd yeej yog ib tug tsis ntseeg los sis ib tug tawm tsam khetos xwb xwb. Ib txhia tib neeg tsis tshua nyiam qhov tseeb thiab tsis xav paub txog qhov tseeb. Thaum lwm tus sib qhia qhov tseeb, lawv tsaug zog thiab tsis muaj zog li. Txawm li cas los xij, hom tib neeg no tsis muaj txoj kev ua neeg phem thiab tsis tsim txom lwm tus. Yog koj sib qhia txog Vajtswv txoj kev npaj siab, qhov tseeb tej hauv paus ntsiab lus, los sis Vajtswv lub tsev tej kev cai, lawv mloog tau thiab txaus siab lees txais qhov tseeb thiab siv zog mus rau qhov tseeb, tiam sis tej zaum lawv yuav tsis muaj peev xwm muab qhov tseeb coj los ua raws tau. Yog lawv ua ib tug thawj coj, txawm lawv yuav coj tsis tau koj kom to taub qhov tseeb los sis coj tsis tau koj los rau ntawm Vajtswv lub xub ntiag, tiam sis lawv yeej yuav tsis tsim txom koj kiag li. Qhov no yog txoj kev ua neeg ntawm cov tib neeg uas muaj cov tawm tsam khetos tus moj yam. Txawm li cas los xij, txoj kev ua neeg ntawm cov tib neeg uas muaj cov tawm tsam khetos tus moj yam tsis phem npaum li ntawd; lawv tuaj yeem lees txais qhov tseeb tau raws li ntau theem uas sib txawv. Tiam sis, cov tawm tsam khetos tsis yog tsuas tsis muaj lub siab txawj xav thiab laj thawj xwb tiam sis tseem muaj txoj kev ua neeg uas lim hiam tshwj xeeb thiab. Cov tib neeg uas muaj cov tawm tsam khetos tus moj yam muaj qhov paub txog ntawm lub siab txawj xav, thiab muaj laj thawj me ntsis, thiab lawv tuaj yeem daws qee yam teeb meem tau yam tsim nyog. Piv txwv li, hais txog kev xaiv thiab kev sawv sab twg thaum coj rau Vajtswv lub tsev tej kev cheem tsum, thaum coj rau ntau hom tib neeg hauv pawg ntseeg, thiab thaum coj rau tej yam uas zoo thiab tej yam uas tsis zoo, lawv tuaj yeem paub cais tej no thiab lwm yam teeb meem uas zoo li no thiab, thaum kawg, lawv tuaj yeem ua tau txoj kev xaiv uas yog raws li lawv lub siab txawj xav. Hom tib neeg no tsis muaj txoj kev ua neeg uas phem npaum li ntawd thiab muaj lub siab zoo dua me ntsis. Tseem muaj lwm qhov uas sib txawv, uas yog qhov peb nyuam qhuav sib qhia tas ntawd, uas yog qhov tias muaj qee cov tib neeg uas muaj cov tawm tsam khetos tus moj yam mas tuaj yeem lees txais qhov tseeb, thiab thaum lawv ua txhaum lawm, lawv tuaj yeem thim xav qhov ntawd thiab muaj lub siab hloov dua siab tshiab. Tiam sis, cov tawm tsam khetos yeej tsis muaj ob hom kev qhia tshwm no kiag li. Lawv tawv ncauj thiab tsis kam hloov vim lawv tsis nyiam qhov tseeb kiag li, tsis lees txais qhov tseeb, thiab muaj txoj kev ua neeg uas lim hiam heev li. Yeej tsis muaj txoj kev rau hom tib neeg no tig lawv tus kheej rov qab thiab ua kom tau txoj kev hloov dua siab tshiab li. Qhov seb ib tug neeg twg puas tuaj yeem hloov dua siab tshiab tau tiag tiag ntawd mas tseem ceeb yog nyob ntawm seb lawv puas muaj lub siab txawj xav thiab laj thawj, thiab nyob ntawm lawv tus cwj pwm uas coj rau qhov tseeb. Cov tib neeg uas muaj cov tawm tsam khetos tus moj yam, vim lawv tsis muaj txoj kev ua neeg uas phem, lawv muaj lub siab txawj xav thiab laj thawj me ntsis, thiab tuaj yeem lees txais qee qhov tseeb tau raws li ntau theem uas sib txawv, lawv thiaj li muaj kev cia siab tig lawv tus kheej rov qab. Thaum lawv ua yuam kev los sis muaj kev ua txhaum, lawv tuaj yeem hloov dua siab tshiab tau tom qab raug ntuas. Qhov no txiav txim tias cov tib neeg uas muaj cov tawm tsam khetos tus moj yam muaj kev cia siab tias yuav raug cawm dim, hos cov tawm tsam khetos mas cawm tsis tau li lawm; lawv yog hom dab thiab Ntxwgnyoog. Tej lub ntsiab tseeb uas sib txawv ntawm cov tawm tsam khetos thiab cov tib neeg uas muaj cov tawm tsam khetos tus moj yam yog ob peb tug yam ntxwv no. Qhov xaus lus no puas yog ncaj ncees tiag? (Yog.) Hais txog ob peb tug yam ntxwv ntawm cov tawm tsam khetos no, tej kev qhia tshwm ntxaws ntxaws uas peb tau sib qhia ntawd puav leej ncaj ncees thiab mus raws li qhov muaj tseeb, yam tsis muaj kev hais kom phem dhau kiag li. Cov neeg Vajtswv xaiv tseg txhua tus puav leej tau ntsib thiab tau pom txog qhov no; cov tawm tsam khetos yeej yog hom no ntag. Hais txog cov tib neeg uas muaj cov tawm tsam khetos tus moj yam, peb kuj tau nthuav tawm ntau yam kev qhia tshwm thiab, uas txhua yam ntawd tib neeg lub qhov muag puav leej pom tau thiab mus raws li qhov muaj tseeb, yam tsis muaj kev hais kom zoo dhau.

Cov tib neeg uas muaj cov tawm tsam khetos tus moj yam muaj ntau qhov tsis zoo thiab tsis txaus nyob hauv lawv txoj kev ua neeg, thiab lawv kuj nthuav tawm ntau hom moj yam qias vuab tsuab raws li ntau theem uas sib txawv thiab. Tej moj yam qias vuab tsuab no muaj qee yam cim qhia uas pom tau meej uas yog tej kev qhia tshwm nyob hauv txhua tus. Piv txwv li, ib txhia tib neeg khav theeb tshwj xeeb, ib txhia tswv yim ntau tshwj xeeb thiab txawj dag tshwj xeeb, ib txhia tawv ncauj tshwj xeeb, ib txhia tub nkeeg tshwj xeeb, thiab lwm yam ntxiv. Tej kev qhia kom pom no yog cov kev qhia tshwm ntawm cov tib neeg uas muaj cov tawm tsam khetos tus moj yam, thiab tej no yog tus yam ntxwv ntawm hom tib neeg no txoj kev ua neeg. Txawm yog hom tib neeg no muaj kev ua siab zoo me ntsis hauv lawv lub siab los—hais kom yooj yim mas, lawv muaj lub siab zoo me ntsis—thaum ntsib tej xwm txheej, lawv pom meej meej tias Vajtswv lub tsev tej txiaj ntsim tab tom raug kev puas tsuaj, tiam sis vim lawv ntshai tsam ua rau lwm tus chim, lawv thiaj li ua zoo li tus vaub kib uas nkaum rau hauv nws lub khauj khaum, ua neej nyob raws li Ntxwgnyoog lub tswv yim thiab tsis kam tuav rawv qhov tseeb tej hauv paus ntsiab lus. Txawm yog nyob hauv lawv lub siab tob tob lawv xav tias lawv tsis tsim nyog ua li no thiab qhov uas ua li no yog ua txhaum rau Vajtswv los, lawv yeej tswj tsis tau lawv tus kheej thiab xaiv ua ib tug tib neeg uas ua kom lwm tus zoo siab. Qhov no yog vim li cas? Vim lawv ntseeg tias txhawm rau ua neej nyob thiab muaj sia nyob, lawv yuav tsum vam khom Ntxwgnyoog lub tswv yim, tsuas yog ua li no xwb lawv thiaj li tiv thaiv tau lawv tus kheej. Yog li ntawd, lawv thiaj li xaiv ua ib tug tib neeg uas ua kom lwm tus zoo siab thiab tsis ua raws li qhov tseeb. Nyob hauv lawv lub siab lawv xav tias qhov ua li no mas, tsis muaj lub siab txawj xav thiab tsis muaj kev ua neeg; lawv tsis yog neeg thiab twb piv tsis tau ib tug dev zov tsev. Txawm li cas los xij, tom qab lawv cem lawv tus kheej lawm, thaum ntsib lwm qhov xwm txheej, lawv yeej tseem tsis hloov dua siab tshiab thiab tseem ua ib yam nkaus li qub. Lawv pheej qaug zog thiab pheej xav tias muaj kev tshuav nqi. Qhov no ua pov thawj qhia txog dab tsi? Qhov ntawd ua pov thawj qhia tias txawm yog cov tib neeg uas muaj cov tawm tsam khetos tus moj yam tsis yog cov tawm tsam khetos los, lawv txoj kev ua neeg yeej muaj teeb meem thiab muaj qhov tsis txaus tiag, yog li ntawd lawv yeej nthuav tawm txoj kev qias vuab tsuab ntau heev. Thaum saib tag nrho tej kev qhia tshwm ntawm hom tib neeg no mas, lawv yeej yog ib tug neeg uas tsis hloov kiag li nyob rau hauv qhov uas raug Ntxwgnyoog ua rau qias vuab tsuab tob heev; lawv yeej yog hom uas Vajtswv hu ua Ntxwgnyoog cov xeeb leej xeeb ntxwv ntag. Cov tib neeg uas muaj cov tawm tsam khetos tus moj yam zoo dua cov tawm tsam khetos nyob rau qhov twg? Hais kom meej mas, cov tib neeg uas muaj cov tawm tsam khetos tus moj yam tiam sis tsis muaj cov tawm tsam khetos lub ntsiab tseeb, txawm lawv nthuav ntau hom moj yam qias vuab tsuab ntawm Ntxwgnyoog tawm los, lawv yeej tsis yog cov tib neeg phem kiag li. Lawv qhov xwm txheej mas zoo li qhov uas tib neeg nquag hais txog tias ib tug neeg twg tsis yog neeg lim hiam thiab phem heev tiam sis kuj tsis yog neeg zoo thiab; tsuas yog tias lawv ntseeg Vajtswv yam siab dawb paug, txaus siab hloov dua siab tshiab, thiab lees txais tau qhov tseeb tom qab raug ntuas, thiab muaj kev zwm rau me ntsis. Txawm yog lawv tsis yog cov tib neeg phem thiab tseem muaj kev cia siab tias yuav tau txais Vajtswv txoj kev cawm dim los, lawv yeej nyob deb heev ntawm tus qauv uas hwm thiab ntshai Vajtswv thiab zam kev phem uas Vajtswv hais txog ntawd! Ib txhia tib neeg ntseeg Vajtswv tau peb mus rau tsib xyoos thiab muaj kev hloov thiab kev nce qib me ntsis. Ib txhia tib neeg ntseeg Vajtswv tau yim mus rau kaum xyoos thiab tsis muaj kev nce qib kiag li. Ib txhia tib neeg txawm ntseeg Vajtswv tau 20 xyoo los yeej tsis muaj kev hloov dab tsi loj thiab; lawv yeej tseem zoo ib yam li thaum ub. Lawv tuav rawv lawv tej kev xav phem tsis kam tso. Tsuas yog tias, vim lawv tau hnov Vajtswv cov lus thiab raug txwv los ntawm ntau yam kev cai thiab kev cai tswj ntawm Vajtswv lub tsev, lawv thiaj li tsis tau ua tej kev yuam kev uas loj, tsis tau ua tej kev ua phem uas ua rau Vajtswv lub tsev poob peev loj, thiab tsis tau ua rau muaj kev puas tsuaj loj. Cov tib neeg uas muaj cov tawm tsam khetos tus moj yam yeej tsis yog tias thaum kawg txhua tus yuav raug Vajtswv cawm dim. Feem coob ntawm lawv tej zaum yog cov neeg ua dej num txhawb, thiab ib txhia ntawm lawv yeej yuav raug muab pov tseg. Txawm yuav yog li cas los xij, txawm lawv tsis yog cov tib neeg phem los, lawv yog cov tib neeg uas muaj txoj kev ua neeg tsis zoo. Lawv qhov kawg thiab qhov chaw kawg yeej yuav tsis zoo ib yam. Txhua yam no yog nyob ntawm seb lawv puas lees txais tau qhov tseeb thiab lawv xaiv lawv txoj kev li cas. Ib txhia tib neeg hais tias, “Koj cov lus sib cov nyom. Tsis yog Koj tau hais tias cov tib neeg no tuaj yeem tig lawv tus kheej rov qab thiab hloov dua siab tshiab lod?” Lub ntsiab uas Kuv hais mas yog cov tib neeg no, nyob rau hauv qee yam xwm txheej thiab tej xwm txheej ib puag ncig uas sib txawv, lawv lees txais tau qhov tseeb raws li ntau theem uas sib txawv. “Ntau theem uas sib txawv” txhais li cas? Qhov ntawd txhais hais tias ib txhia tib neeg muaj kev hloov me ntsis tom qab ntseeg Vajtswv tau peb mus rau tsib xyoos, thiab muaj kev hloov loj tom qab 10 mus rau 20 xyoo. Ib txhia tib neeg ntseeg Vajtswv tau 10 mus rau 20 xyoo thiab yeej tseem zoo ib yam li thaum lawv nyuam qhuav pib ntseeg, pheej qw hais tias, “Kuv yuav tsum hloov dua siab tshiab, kuv yuav tsum pauj Vajtswv txoj kev hlub!” tiam sis qhov tseeb tiag yeej tsis muaj kev hloov dab tsi li. Tsuas yog vim lawv muaj kev paub txog ntawm lub siab txawj xav lawv thiaj li muaj lub siab ntshaw no nyob hauv lawv lub siab thiab txaus siab tig lawv tus kheej rov qab thiab hloov dua siab tshiab. Txawm li cas los xij, qhov txaus siab hlo ntawd tsis tau txhais hais tias tuaj yeem ua raws li qhov tseeb, thiab tsis tau txhais hais tias nkag mus rau hauv qhov muaj tiag lawm. Qhov txaus siab hlo ntawd tsuas yog qhov tsis tawm tsam qhov tseeb, tsis yog qhov tsis nyiam qhov tseeb kiag li, tsis tab meeg thuam qhov tseeb, tsis tab meeg txiav txim, teem txim, los sis tuam mom Vajtswv—qhov ntawd tsuas yog tej kev qhia tshwm no xwb. Tiam sis tsis tau txhais hais tias tuaj yeem zwm rau, lees txais thiab ua raws li qhov tseeb tau tiag tiag lawm, thiab tsis tau txhais hais tias tuaj yeem ntxeev siab tawm tsam lub cev nqaij daim tawv thiab tus kheej tej kev ntshaw lawm. Qhov no puas yog ib qho muaj tseeb tiag tiag? (Yog.) Qhov ntawd yeej yog li no ntag. Qhov uas muaj lub siab txawj xav thiab laj thawj me ntsis thiab muaj lub siab hloov dua siab tshiab me ntsis nyob hauv ib tug txoj kev ua neeg ntawd tsis tau txhais hais tias tsis muaj ib tug moj yam qias vuab tsuab lawm. Cov tib neeg uas muaj cov tawm tsam khetos tus moj yam yeej muaj lub ntsiab tseeb uas sib txawv ntawm cov tawm tsam khetos, tiam sis qhov no tsis tau txhais hais tias lawv yog cov tib neeg uas tuaj yeem lees txais thiab zwm rau qhov tseeb. Thiab kuj tsis tau txhais hais tias lawv yog cov tib neeg uas muaj qhov tseeb qhov muaj tiag, los sis tias lawv yog cov tib neeg uas Vajtswv hlub. Yeej muaj tej lub ntsiab tseeb uas sib txawv ntawm ob kis no; tej ntawd yeej txawv tag nrho. Cov tib neeg uas muaj cov tawm tsam khetos tus moj yam yeej zoo ntau dua thaum hais txog ntawm txoj kev ua neeg, lawv tus cwj pwm uas coj rau qhov tseeb, thiab theem uas lawv hloov dua siab tshiab thaum muab piv rau cov tawm tsam khetos. Txawm li cas los xij, tus qauv uas Vajtswv muab los ntsuas tib neeg tsis yog raws li qhov uas lawv sib txawv ntawm cov tawm tsam khetos li cas; qhov no tsis yog tus qauv. Vajtswv ntsuas ib tug neeg txoj kev ua neeg, seb lawv puas muaj lub siab txawj xav thiab laj thawj, seb lawv puas nyiam qhov tseeb thiab lees txais qhov tseeb, seb lawv puas ua lawv tej dej num nrog kev ua siab ncaj, seb lawv puas zwm rau Vajtswv, thiab seb lawv puas tuaj yeem tau txais qhov tseeb thiab tau txais kev cawm dim. Cov no yog cov qauv uas Vajtswv muab los ntsuas tib neeg. Vajtswv tau teem ntau yam kev cheem tsum rau cov uas muaj cov tawm tsam khetos tus moj yam. Vajtswv siv tej kev cheem tsum no los ntsuas cov tib neeg uas muaj cov tawm tsam khetos tus moj yam, lub hom phiaj yog yuav cawm cov tib neeg ntawd. Tom qab hais li no lawm, nej to taub lawm, puas yog? Ua ntej tshaj plaws, koj yuav tsum paub meej tias txawm yog koj muaj cov tawm tsam khetos tus moj yam ntau npaum li cas los xij, tsuav yog koj lees txais tau qhov tseeb xwb, ces koj yeej tsis yog ib tug tawm tsam khetos. Txawm koj tsis yog ib tug tawm tsam khetos los, qhov ntawd tsis tau txhais hais tias koj yog ib tug neeg uas zwm rau Vajtswv. Qhov tsis qias qhov tseeb los sis tsis muaj qhov tsis nyiam qhov tseeb kiag li ntawd tsis tau txhais hais tias koj yog ib tug neeg uas ua raws li qhov tseeb thiab zwm rau qhov tseeb. Qhov uas muaj lub siab txawj xav thiab laj thawj me ntsis, muaj lub siab zoo dua me ntsis, thiab muaj txoj kev ua neeg uas zoo dua cov tawm tsam khetos ntawd tsis yog txhais hais tias koj yog ib tug neeg zoo. Tus qauv uas muab los ntsuas seb ib tug neeg zoo los sis phem ntawd tsis yog nyob ntawm cov tawm tsam khetos txoj kev ua neeg. Txawm yog cov tawm tsam khetos yuav ua phem ntau npaum li cas los xij, lawv yeej tsis lees paub lawv tej kev txhaum thiab tsis hloov dua siab tshiab li, tiam sis tseem ua ib yam nkaus li qub; lawv yeej tsis tig rov qab li, thiab lawv tawm tsam Vajtswv mus txog thaum kawg. Txawm yog ib txhia tib neeg uas muaj cov tawm tsam khetos tus moj yam xav tig lawv tus kheej rov qab thiab hloov dua siab tshiab tiag tiag los, qhov uas tig lawv tus kheej rov qab me ntsis tsis tau txhais hais tias lawv muaj txoj kev hloov dua siab tshiab tiag tiag. Qhov uas muaj lub siab ruaj khov hloov dua siab tshiab ntawd tsis tau txhais hais tias tuaj yeem to taub qhov tseeb, tau qhov tseeb, thiab tau txais txoj sia.

Ib txhia tib neeg hais tias, “Kuv tsis yog ib tug tawm tsam khetos, yog li ntawd kuv thiaj zoo dua cov tawm tsam khetos thiab kuv txoj kev qias vuab tsuab tsis tob npaum li cov tawm tsam khetos.” Cov lus no puas yog? Qhov no puas yog ib qho kev to taub nkhaus? (Yog.) Cov tib neeg uas muaj cov tawm tsam khetos tus moj yam mas lawv tus moj yam qias vuab tsuab yeej zoo ib yam nkaus li cov tawm tsam khetos, tiam sis lawv tus yam ntxwv xeeb txawm lub ntsiab tseeb mas txawv. Nej sim xav txog qhov no seb—cov lus no puas yog? (Yog.) Yog li ntawd sim piav seb. (Cov tib neeg uas muaj cov tawm tsam khetos tus moj yam yeej muaj cov moj yam qias vuab tsuab ib yam li cov tawm tsam khetos. Lawv puav leej muaj tus moj yam khav theeb thiab lim hiam, thiab puav leej caum lub meej mom. Txawm li cas los xij, lawv txoj kev ua neeg lub ntsiab tseeb mas txawv. Cov tib neeg uas muaj cov tawm tsam khetos tus moj yam muaj kev paub txog ntawm lub siab txawj xav me ntsis, thiab lees txais tau qhov tseeb hauv ntau theem uas sib txawv. Lawv tsis yog cov uas tsis nyiam qhov tseeb kiag li thiab tsis ntxub qhov tseeb. Lwm sab mas, cov tib neeg uas muaj cov tawm tsam khetos lub ntsiab tseeb muaj txoj kev ua neeg lub ntsiab tseeb uas lim hiam. Lawv tsis muaj kev paub txog ntawm lub siab txawj xav, thiab tsis nyiam qhov tseeb kiag li thiab ntxub qhov tseeb. Lawv yuav tsis hloov dua siab tshiab li.) Lawv txhua tus puav leej muaj cov moj yam qias vuab tsuab ib yam, yog li ntawd vim li cas Vajtswv thiaj li cais cov tib neeg uas muaj cov tawm tsam khetos lub ntsiab tseeb ua cov tawm tsam khetos thiab ua Nws cov yeeb ncuab? (Qhov no tseem ceeb mas yog raws li lawv tus cwj pwm uas coj rau qhov tseeb. Cov tawm tsam khetos tsis nyiam qhov tseeb kiag li thiab ntxub qhov tseeb, thiab qhov uas ntxub qhov tseeb ntawd tiag tiag lawm yog ntxub Vajtswv.) Puas tshuav lwm yam ntxiv? (Cov tawm tsam khetos lub ntsiab tseeb yog cov dab lub ntsiab tseeb.) Cov tib neeg uas lawv lub ntsiab tseeb yog cov dab lub ntsiab tseeb puas muaj kev cia siab yuav raug cawm dim? (Tsis muaj.) Cov tib neeg no yeej tsis lees txais qhov tseeb kiag li thiab tsis tuaj yeem tau txais kev cawm dim. Raws li qhov uas ob hom tib neeg no puav leej muaj tej moj yam qias vuab tsuab, es cov uas tuaj yeem raug cawm dim thiab cov uas tsis tuaj yeem raug cawm dim ntawd sib txawv rau qhov twg? Yog tsuas hais txog lawv cov moj yam qias vuab tsuab xwb, ob hom tib neeg no yeej zoo ib yam nkaus, yog li ntawd vim li cas cov tawm tsam khetos thiaj li tsis tuaj yeem raug cawm dim, hos cov tib neeg uas muaj cov tawm tsam khetos tus moj yam tiam sis tsis muaj cov tawm tsam khetos lub ntsiab tseeb thiaj li muaj kev cia siab me me tias yuav raug cawm dim? (Cov tib neeg uas muaj cov tawm tsam khetos tus moj yam ntawd mas tsis zoo li cov tawm tsam khetos uas ua yeeb ncuab rau qhov tseeb thiab tej yam uas zoo. Txawm lawv tsis tshua nyiam qhov tseeb npaum li cas los, lawv tsis qias qhov tseeb thiab tuaj yeem lees txais qhov tseeb raws li tej theem uas sib txawv, thiab hloov zuj zus me ntsis. Tsis tas li ntawd, lawv txoj kev ua neeg muaj kev paub txog ntawm lub siab txawj xav me ntsis, tsis zoo li cov tawm tsam khetos uas tsis paub txaj muag kiag li.) Qhov kev cia siab uas yuav raug cawm dim ntawd yog nyob ntawm no; qhov no yog qhov txawv ntawm lub ntsiab tseeb. Thaum saib los ntawm cov tawm tsam khetos lub ntsiab tseeb, hom tib neeg no yeej cawm tsis tau li lawm thiab tsis muaj kev cia siab yuav raug cawm dim li. Txawm koj xav cawm lawv los, koj yeej cawm tsis tau; lawv hloov tsis tau li. Lawv tsis yog hom tib neeg dog dig uas muaj Ntxwgnyoog tus moj yam qias vuab tsuab, tiam sis yog hom tib neeg uas muaj cov dab thiab Ntxwgnyoog lub neej txoj sia lub ntsiab tseeb. Hom tib neeg no yeej tsis tuaj yeem raug cawm dim kiag li. Tiam sis, cov tib neeg dog dig uas muaj cov moj yam qias vuab tsuab ntawd lub ntsiab tseeb yog dab tsi? Lawv tsuas muaj cov moj yam qias vuab tsuab xwb; txawm li cas los xij, lawv muaj lub siab txawj xav thiab laj thawj mus txog ib theem twg, thiab tuaj yeem lees txais qee qhov tseeb. Qhov no txhais tau hais tias qhov tseeb tuaj yeem muaj txiaj ntsig rau ib theem twg nyob hauv cov tib neeg no, ua rau lawv muaj kev cia siab yuav raug cawm dim. Hom tib neeg no thiaj li yog cov uas Vajtswv cawm. Cov tawm tsam khetos yeej tsis tuaj yeem raug cawm dim kiag li, tiam sis cov tib neeg uas muaj cov tawm tsam khetos tus moj yam puas tuaj yeem raug cawm dim? (Tuaj yeem.) Yog peb hais tias lawv tuaj yeem raug cawm dim, qhov no tsis yog qhov tseeb tiag tiag. Peb tsuas tuaj yeem hais tias lawv muaj kev cia siab yuav raug cawm dim xwb—qhov no thiaj li yog qhov tseeb tiag dua. Thaum kawg, seb ib tug tib neeg puas raug cawm dim tau ntawd mas yog nyob ntawm tus tib neeg ntawd xwb. Qhov ntawd nyob ntawm seb lawv puas lees txais tau qhov tseeb, ua raws li qhov tseeb, thiab zwm rau qhov tseeb tiag tiag. Yog li ntawd, tsuas hais tau tias hom tib neeg no muaj kev cia siab tias yuav raug cawm dim xwb. Yog li ntawd vim li cas cov tawm tsam khetos thiaj li tsis muaj kev cia siab yuav raug cawm dim? Vim lawv yog cov tawm tsam khetos; lawv tus yam ntxwv xeeb txawm yog Ntxwgnyoog li. Lawv ua yeeb ncuab rau qhov tseeb, ntxub Vajtswv, thiab yeej tsis lees txais qhov tseeb kiag li. Vajtswv puas tseem yuav cawm lawv? (Tsis cawm.) Vajtswv cawm cov tib neeg uas qias vuab tsuab, tsis yog cawm Ntxwgnyoog thiab cov dab. Vajtswv cawm cov uas lees txais qhov tseeb, tsis yog cawm cov neeg phem uas ntxub qhov tseeb. Qhov hais li puas ua rau nej to taub meej lawm? (To taub lawm.) Peb sib qhia li no yog txhawm rau zam kom tsis txhob ua rau ib txhia muaj kev to taub nkhaus. Tom qab cais cov tawm tsam khetos thiab cov tib neeg uas muaj cov tawm tsam khetos tus moj yam lawm, ib txhia xav tias lawv tsis yog cov tawm tsam khetos ces qhov no txhais tau tias lawv nyob rau hauv ib qho chaw nyab xeeb lawm, tias lawv tau chaw nkaum tiag tiag rau lawv tus kheej lawm thiab yav tom ntej yeej yuav tsis raug ntsaig tawm mus, ntiab tawm, los sis muab pov tseg li. Qhov no puas yog ib qho kev to taub nkhaus? Qhov uas muaj kev cia siab yuav raug cawm dim ntawd tsis tau txhais tias yuav raug cawm dim. Qhov kev cia siab no tseem tim tsum kom tib neeg mus tuav cia. Koj tus cwj pwm uas coj rau qhov tseeb mas txawv ntawm cov tawm tsam khetos. Koj tsis muaj qhov tsis nyiam qhov tseeb kiag li, los sis koj txoj kev ua neeg zoo dua cov tawm tsam khetos li me ntsis; koj muaj kev paub txog ntawm lub siab txawj xav me ntsis, lub siab zoo dua me ntsis, tsis ua phem rau lwm tus, paub hloov dua siab tshiab thaum koj ua yuam kev, thiab tuaj yeem tig koj tus kheej rov qab los. Tsuas yog ob peb yam no xwb, qhov no txhais tau tias koj muaj tej yam theem hauv paus uas lees txais tau qhov tseeb, ua raws li qhov tseeb, thiab kom raug cawm dim xwb. Tiam sis qhov uas koj tsis yog ib tug tawm tsam khetos ntawd tsis tau txhais tias koj yuav tau txais kev cawm dim. Koj tsis yog ib tug tawm tsam khetos, tiam sis koj tseem yog ib tug tib neeg uas qias vuab tsuab. Txhua tus tib neeg uas qias vuab tsuab puas tuaj yeem raug cawm dim txhua tus? Yeej tsis paub tseeb li. Txawm tias ib tug twg tsis yog ib tug tawm tsam khetos los sis ib tug tib neeg phem los, tsuav yog lawv tsis caum qhov tseeb xwb, lawv yeej tseem tsis tuaj yeem raug cawm dim. Vajtswv txoj kev cawm dim rau tib neeg yog ua tau tiav los ntawm lawv txoj kev lees txais thiab kev caum qhov tseeb. Tib neeg cov moj yam qias vuab tsuab yeej ua yeeb ncuab rau Vajtswv. Tsuav yog tseem muaj cov moj yam qias vuab tsuab nyob rau hauv ib tug neeg twg xwb, lawv yeej tseem tuaj yeem ntxeev siab tawm tsam Vajtswv, ntxeev siab rau Vajtswv, tawm tsam Vajtswv thiab lwm yam ntxiv. Yog li ntawd, lawv yeej tim tsum lees txais kev txiav txim, kev rau txim, kev sim siab, thiab kev lim kom dawb huv ntawm Vajtswv cov lus; lawv tim tsum kev yug thiab kev coj qhia ntawm Vajtswv cov lus, Vajtswv txoj kev ntuas, kev qhuab ntuas, thiab kev rau txim, thiab lwm yam ntxiv—txhua tes hauj lwm uas Vajtswv ua no yeej tsis pub tsawg kiag li. Yog li ntawd, txhawm rau ua kom tau txais kev cawm dim, ib qho mas, tim tsum kom muaj Vajtswv tes hauj lwm, thiab ntxiv ntawd, tim tsum kom tib neeg muaj lub siab ruaj khov los koom tes. Lawv yuav tsum muaj peev xwm tiv kev txom nyem thiab them tus nqi, nkag mus rau hauv qhov tseeb qhov muaj tiag tom qab to taub qhov tseeb lawm, thiab lwm yam ntxiv. Qhov no yog tib txoj kev uas yuav tau txais Vajtswv tej hmoov hlub uas nyob rau tiam kawg, thiab tau txais qhov koob hmoov uas tau nyuaj kawg nkaus kom raug ua kom zoo tiav log los ntawm tus Vajtswv uas yug los ua cev nqaij daim tawv, nyob rau ntawm lub hauv paus ntawm kev to taub qhov tseeb. Qhov ntawd yooj yim li ntawd xwb. Tau lawm, qhov kev sib qhia txog lub ncauj lus no, cia peb muab xaus nyob rau ntawm no.

Yam Kaum Peb: Tiv Thaiv Cov Neeg Vajtswv Xaiv Tseg Kom Tsis Txhob Raug Cov Tawm Tsam Khetos Cuam Tshuam, Coj Mus Yuam Kev, Tswj, thiab Rhuav Tshem Yam Phem Heev, thiab Pab Kom Lawv Paub Cais Cov Tawm Tsam Khetos thiab Tso Cov Tawm Tsam Khetos Tseg Kiag Hauv Lub Siab Tuaj

Ob Peb Yam Hauj Lwm Uas Cov Thawj Coj thiab Cov Neeg Ua Hauj Lwm Yuav Tsum Ua Thaum Txheeb Tau Tias Cov Tawm Tsam Khetos Tab Tom Cuam Tshuam Pawg Ntseeg

Txuas ntxiv no, peb yuav sib qhia txog lub ntsiab lus tseem ceeb. Peb qhov kev sib qhia txog cov thawj coj thiab cov neeg ua hauj lwm lub luag hauj lwm kaum ob tau tiav lawm. Rau qhov kev sib qhia no, peb yuav tham txog lub luag hauj lwm kaum peb: “Tiv thaiv cov neeg Vajtswv xaiv tseg kom tsis txhob raug cov tawm tsam khetos cuam tshuam, coj mus yuam kev, tswj, thiab rhuav tshem yam phem heev, thiab pab kom lawv paub cais cov tawm tsam khetos thiab tso cov tawm tsam khetos tseg kiag hauv lub siab tuaj.” Lub luag hauj lwm kaum peb ntsig txog lub ncauj lus tias cov thawj coj thiab cov neeg ua hauj lwm yuav tsum coj li cas rau cov tawm tsam khetos. Cov thawj coj thiab cov neeg ua hauj lwm yuav tsum ua tes hauj lwm dab tsi thaum cov tawm tsam khetos tshwm sim nyob rau hauv pawg ntseeg? Ua ntej tshaj plaws, lub luag hauj lwm no qhia hais tias thaum daws tej teeb meem zoo li no, cov thawj coj thiab cov neeg ua hauj lwm yuav tsum tau sawv los tiv thaiv cov kwv tij thiab cov nkauj muam los ntawm kev cuam tshuam, kev coj mus yuam kev, kev tswj, thiab kev rhuav tshem yam phem heev ntawm cov tawm tsam khetos. Qhov no yog thawj yam uas lawv yuav tsum ua. Hais txog qhov tias cov tawm tsam khetos cuam tshuam, coj mus yuam kev, tswj, thiab rhuav tshem cov neeg Vajtswv xaiv tseg yam phem heev li cas ntawd, twb muaj kev sib qhia ntau txog qhov no ua ntej lawm, yog li ntawd cov ncauj lus no yuav tsis yog lub ncauj lus tseem ceeb rau qhov kev sib qhia hnub no. Hnub no, peb yuav tsom ntsoov rau qhov tias cov thawj coj thiab cov neeg ua hauj lwm yuav tsum ua tej luag hauj lwm dab tsi kom tiav thiab lawv yuav tsum ua tes hauj lwm dab tsi thaum ntsib cov tawm tsam khetos tej kev coj thiab tej kev ua no kom tiv thaiv tau cov neeg Vajtswv xaiv tseg kom tsis txhob raug ua phem. Thawj qhov, cov thawj coj thiab cov neeg ua hauj lwm yuav tsum tiv thaiv cov neeg Vajtswv xaiv tseg kom tsis txhob raug txoj kev cuam tshuam, kev coj mus yuam kev, kev tswj, thiab kev rhuav tshem yam phem heev ntawm cov tawm tsam khetos—qhov no yog ib qho ntawm cov thawj coj thiab cov neeg ua hauj lwm tej luag hauj lwm. “Ib qho ntawm tej luag hauj lwm” ntawd txhais li cas? Qhov ntawd txhais hais tias nyob rau hauv ntau yam hauj lwm uas cov thawj coj thiab cov neeg ua hauj lwm ua ntawd, qhov tiv thaiv cov neeg Vajtswv xaiv tseg kom lawv thiaj li ua tau lub neej hauv pawg ntseeg li ib txwm yam tsis raug txoj kev cuam tshuam thiab kev rhuav tshem yam phem heev ntawm cov tawm tsam khetos ntawd yog ib teg hauj lwm tseem ceeb. Qhov ntawd kuj yog ib teg hauj lwm uas khiav tsis dhau, uas lawv tsis tuaj yeem zam tau lawv lub luag hauj lwm. Cov thawj coj thiab cov neeg ua hauj lwm yuav tsum saib qhov no ua qhov tseem ceeb thiab yuav tsum tsis txhob tsis quav ntsej qhov no. Qhov tswj xyuas kom lub neej hauv pawg ntseeg mus tau li ib txwm ntawd yog ib teg hauj lwm uas tseem ceeb heev thiab yog tes hauj lwm ua ntej tshaj plaws nyob rau hauv tag nrho pawg ntseeg tes hauj lwm. Qhov no kuj yog cov thawj coj thiab cov neeg ua hauj lwm ib lub luag hauj lwm thiab. Cov thawj coj thiab cov neeg ua hauj lwm tes hauj lwm theem hauv paus yog coj cov neeg Vajtswv xaiv tseg nkag mus rau hauv qhov tseeb qhov muaj tiag. Thaum cov Ntxwgnyoog, cov tawm tsam khetos, los cuam tshuam thiab coj tib neeg mus yuam kev, thiab los txeeb cov neeg Vajtswv xaiv tseg nrog Vajtswv ntawd, cov thawj coj thiab cov neeg ua hauj lwm yuav tsum sawv los nthuav cov tawm tsam khetos tawm kom cov neeg Vajtswv xaiv tseg thiaj li paub cais lawv, ua kom cov tawm tsam khetos nthuav lawv tus yeeb yam tseeb tawm, thiab tom qab ntawd muab lawv ntsaig tawm hauv pawg ntseeg mus. Qhov no yog txhawm rau tiv thaiv cov neeg Vajtswv xaiv tseg kom tsis txhob raug cov tawm tsam khetos tswj thiab rhuav tshem yam phem heev. Qhov no yog lub luag hauj lwm uas cov thawj coj thiab cov neeg ua hauj lwm yuav tsum ua kom tiav thaum ua pawg ntseeg tes hauj lwm. Yog li ntawd qhov tiv thaiv tej no txhais li cas? Yuav tsum tiv thaiv tej no li cas? Lo lus “tiv thaiv” ntawd lub ntsiab lus tiag tiag yog txwv tsis pub ib yam dab tsi tshwm sim kom ntau tshaj plaws li qhov ua tau. Lub ntsiab tseem ceeb nyob ntawm no yog dab tsi? Qhov txwv tsis pub tej xwm txheej tshwm sim ntawd thiaj li ua tau txoj kev tiv thaiv. Thaum daws tej xwm txheej ntawm cov tawm tsam khetos, cov thawj coj thiab cov neeg ua hauj lwm tes hauj lwm tseem ceeb yog txwv cov tawm tsam khetos kom tsis txhob cuam tshuam, coj mus yuam kev, tswj, thiab rhuav tshem cov neeg Vajtswv xaiv tseg yam phem heev kom ntau tshaj plaws li qhov ua tau. Lawv yuav tsum tiv thaiv cov neeg Vajtswv xaiv tseg kom tsis txhob raug cov tawm tsam khetos ua phem rau yam ntau tshaj plaws li qhov ua tau. Qhov no yog tes hauj lwm tseem ceeb uas cov thawj coj thiab cov neeg ua hauj lwm yuav tsum tau ua, thiab qhov no yog yam uas peb yuav tsum sib qhia kom meej ntawm lub luag hauj lwm kaum peb. Yog li ntawd yuav tiv thaiv cov neeg Vajtswv xaiv tseg tau li cas? Los ntawm qhov txwv tsis pub cov kev ua phem uas cov tawm tsam khetos ua no tshwm sim. Yeej muaj ntau txoj kev thiab ntau txoj hau kev los txwv lawv, xws li kev nthuav tawm, kev ntuas, kev txheeb xyuas, thiab kev txwv. Tseem muaj dab tsi ntxiv? (Kev ntiab tawm.) Qhov ntawd yog theem kawg lawm. Thaum cov kwv tij thiab cov nkauj muam tseem tsis tau muaj kev paub cais thiab tsis paub tias ib tug neeg twg yog ib tug tawm tsam khetos, tiam sis cov thawj coj thiab cov neeg ua hauj lwm twb txheeb tau lawv lawm, yog hais tias lawv muab cov tib neeg ntawd ntiab tawm ncaj qha, ces cov uas tsis muaj kev paub cais ntawd tej zaum yuav tsim muaj tej kev xav phem thiab kev txiav txim, thiab ib txhia tej zaum yuav ntog. Nyob rau hauv tej xwm txheej zoo li no, cov thawj coj thiab cov neeg ua hauj lwm yuav tsum ua tes hauj lwm dab tsi? Nyuam qhuav no Kuv hais txog dab tsi? (Kev nthuav tawm, kev ntuas, kev txheeb xyuas, thiab kev txwv.) Nej puas muaj ib txoj kev zoo twg los txwv cov tawm tsam khetos kom tsis txhob ua phem? Qhov saib xyuas lawv puas yog ib txoj kev zoo? Qhov ntawd puas suav tau tias yog ib txoj kev thiab txoj hau kev uas muaj txiaj ntsig uas mus raws li tej hauv paus ntsiab lus? (Suav tau.) Txoj kev uas tsim nyog los coj rau cov tawm tsam khetos yog li cas? Qhov kev txiav txim, kev rau txim, kev sim siab, thiab kev lim kom dawb huv puas muaj txiaj ntsig rau cov tawm tsam khetos? (Tsis muaj.) Vim li cas thiaj li tsis muaj? (Cov tawm tsam khetos tsis lees txais qhov tseeb; lawv tsis nyiam qhov tseeb kiag li.) Cov tawm tsam khetos tsis nyiam qhov tseeb kiag li thiab tsis lees txais qhov tseeb, yog li ntawd qhov siv txoj kev sim siab, kev lim kom dawb huv, kev txiav txim, thiab kev rau txim los coj rau cov tawm tsam khetos yog tsis tsim nyog. Tsis tas li ntawd xwb, Vajtswv yeej tsis ua tes hauj lwm no nyob rau hauv lawv. Lub tswv yim no tsis tsim nyog, yog li ntawd txoj kev no yeej yuav tsis muaj txiaj ntsig li. Yog li ntawd txoj kev twg kiag thiaj li tsim nyog? Ntau tus tib neeg uas tau raug kev txom nyem loj heev ntawm txoj kev puas tsuaj uas los ntawm cov tawm tsam khetos los ntawd ntxub cov tawm tsam khetos heev thiab ntseeg hais tias yuav tsum muab cov tawm tsam khetos txiav txim, teem txim, thiab muab nthuav tawm rau sawv daws pom. Lawv xav hais tias yuav tsum ua kom cov tawm tsam khetos lees lawv tej kev yuam kev thiab lees lawv tej kev txhaum tab meeg nyob hauv pawg ntseeg thiab ua kom lawv poob ntsej muag tag nrho. Nej xav hais tias qhov siv cov kev no puas yuav tsim nyog? (Tsis tsim nyog.) Yog peb xav txog cov tawm tsam khetos lub ntsiab tseeb, qhov ua tej no yeej yuav tsis dhau kiag li—txawm yuav coj li cas rau cov dab los yeej tau; yeej ua tau dog dig yam li muab ib tug kab nyem kom tuag. Yog li ntawd lub hom phiaj ntawm cov thawj coj thiab cov neeg ua hauj lwm qhov uas ua li no zoo li tsim nyog heev thiab yog lawm, tiam sis puas muaj teeb meem dab tsi rau cov hau kev no? Tes hauj lwm no puas nyob hauv tus ciaj ciam ntawm cov thawj coj thiab cov neeg ua hauj lwm tej luag hauj lwm? Qhov ua tej yam zoo li no puas mus raws li tej hauv paus ntsiab lus? (Tsis mus raws.) Pom tau meej tias, qhov ntawd tsis mus raws li tej hauv paus ntsiab lus. Tej hauv paus ntsiab lus los qhov twg los? (Los ntawm Vajtswv cov lus los.) Yog lawm. Txawm hais tias cov tawm tsam khetos—cov dab—yog cov hom phiaj ntawm tej kev ua no los xij, cov kev ua ntawd kuj yuav tsum mus raws li tej hauv paus ntsiab lus thiab Vajtswv tej kev cheem tsum thiab, vim hais tias nyob rau hauv qhov ua tes hauj lwm no cov thawj coj thiab cov neeg ua hauj lwm tab tom ua lawv tej luag hauj lwm kom tiav, tsis yog daws tej yam hauv tsev neeg los sis yus tus kheej tej hauj lwm.

I. Kev Nthuav Tawm

Qhov daws cov tawm tsam khetos thiab txwv lawv kom tsis txhob ua phem thiab coj mus yuam kev thiab ua phem rau cov neeg Vajtswv xaiv tseg yog cov thawj coj thiab cov neeg ua hauj lwm lub luag hauj lwm. Lub hom phiaj yog los tiv thaiv cov neeg Vajtswv xaiv tseg kom tsis txhob raug ua phem rau, tsis yog txhawm rau tsim txom leej twg los sis nrhiav cib fim los ua pauj rau leej twg, thiab yeej tsis yog txhawm rau tsa pawg los tawm tsam leej twg li. Yog li ntawd, cov thawj coj thiab cov neeg ua hauj lwm yuav tsum ua tes hauj lwm dab tsi los txwv cov tawm tsam khetos txoj kev ua phem yam ntau tshaj plaws li qhov ua tau? Qhov ib yog nthuav lawv tawm. Lub hom phiaj ntawm qhov nthuav tawm yog dab tsi? (Txhawm rau pab tib neeg kom muaj kev paub cais.) Yog lawm. Qhov ntawd yog txhawm rau pab cov neeg Vajtswv xaiv tseg kom paub cais cov tawm tsam khetos lub ntsiab tseeb, ua kom lawv tuaj yeem nrug deb ntawm cov tawm tsam khetos kiag hauv lawv lub siab tuaj thiab tsis raug cov tawm tsam khetos coj mus yuam kev, thiab kom—thaum cov tawm tsam khetos xav coj lawv mus yuam kev thiab tswj lawv—lawv tuaj yeem ua tus pib muab cov tawm tsam khetos tso tseg, es tsis yog cia cov tawm tsam khetos kav thiab muab lawv tam li khoom ua si. Yog li ntawd, qhov nthuav tawm ntawd puas yog tseem ceeb heev? (Yog.) Qhov nthuav tawm ntawd tseem ceeb heev, tiam sis koj yuav tsum nthuav tawm kom yog. Yog li ntawd, koj yuav nthuav tawm li cas? Koj lub hauv paus rau qhov nthuav tawm yuav tsum yog dab tsi? Qhov lam muab npe phem rau lawv puas tau? Qhov lam tau lam teem txim rau lawv yam tsis muaj hauv paus puas tau? (Tsis tau.) Yog li ntawd koj yuav nthuav tawm kom yog li cas thiaj li ua tau raws li lub hom phiaj uas tiv thaiv cov neeg Vajtswv xaiv tseg? (Ib qho mas, peb yuav tsum saib raws li qhov muaj tseeb txog lawv tej kev ua phem, los muab lawv nthuav tawm raws li qhov pom tiag thiab qhov muaj tseeb. Tsis tas li ntawd, peb yuav tsum paub cais thiab txheeb xyuas lawv raws li Vajtswv cov lus.) Ob kab lus no yeej hais yog lawm; ob qho no yeej tsawg tsis tau li. Ib qho mas, yuav tsum muaj pov thawj tseeb. Koj yuav tsum txiav txim thiab muab lawv lub ntsiab tseeb teem raws li cov lus uas yuam kev, tej kev ua, thiab tej kev xav thiab kev xam pom uas tsis muaj qab hau uas cov tawm tsam khetos nthuav tawm los ntawd. Txawm li cas los xij, qhov tseem ceeb tshaj plaws yog qhov paub cais thiab txheeb xyuas lawv raws li Vajtswv cov lus. Koj yuav tsum saib raws li Vajtswv cov lus twg? Cov lus twg thiaj li yog cov uas ncaj qha thiab raug ntsiab tshaj plaws? (Cov lus uas nthuav cov tawm tsam khetos tawm.) Yog lawm; koj yuav tsum nrhiav qee cov lus uas nthuav cov tawm tsam khetos tawm los nthuav lawv tawm thiab muab los piv kom tsim nyog thiab ncaj ncees, kom paub tseeb tias raug nkaus. Cov kwv tij thiab cov nkauj muam yuav to taub tom qab hnov qhov no; lawv yuav muaj kev paub cais tam sim ntawd rau tus neeg ntawd, thiab muaj lub siab ceev faj. Thaum muaj kev paub cais hauv lawv lub siab lawm, lawv yuav tsis nyiam tus neeg no kiag li lawm: “Tseeb tiag, lawv yog ib tug tawm tsam khetos! Yav tas los lawv tau pab kuv dua thiab tau ua zoo rau kuv thiab. Kuv xav hais tias lawv yog ib tug neeg zoo no. Los ntawm txoj kev txheeb xyuas thiab kev sib qhia no, lawv txoj kev ua ntsej muag ncaj siab nkhaus thiab lawv tej kev qhia tshwm ntawm lub ntsiab tseeb uas yog tawm tsam khetos tau raug muab nthuav tawm, pab kom txhua tus pom tias tus neeg no muaj kev phom sij. Vajtswv cov lus tau nthuav tawm tau yog kawg nkaus li! Lawv tsis yog ib tug neeg zoo. Lawv hais lus zoo mloog thiab zoo li tsis muaj teeb meem dab tsi hauv lawv tej kev ua, tiam sis los ntawm qhov nthuav lawv lub ntsiab tseeb tawm, tam sim no pom tau meej tias lawv yeej yog ib tug tawm tsam khetos tiag tiag.” Yog saib los ntawm txoj kev hloov hauv tib neeg tej kev xav, thaum cov thawj coj thiab cov neeg ua hauj lwm ua tes hauj lwm nthuav cov tawm tsam khetos tawm ntawd, lawv tab tom txwv cov tawm tsam khetos tsis pub coj mus yuam kev thiab cuam tshuam cov neeg Vajtswv xaiv tseg yam ntau tshaj plaws li qhov ua tau lawm. Muaj tseeb tiag, lawv kuj tab tom ua lub luag hauj lwm tiv thaiv cov neeg Vajtswv xaiv tseg kom tsis txhob raug cov tawm tsam khetos tswj thiab rhuav tshem yam phem heev kom tiav thiab. Lawv tab tom ua ib yam ntawm lawv tej hauj lwm raws li qhov muaj tiag. Yam hauj lwm no yog dab tsi? Qhov nthuav cov tawm tsam khetos tawm. Tes hauj lwm nthuav cov tawm tsam khetos tawm yog ib teg hauj lwm uas cov thawj coj thiab cov neeg ua hauj lwm yuav tsum tau ua los tiv thaiv cov neeg Vajtswv xaiv tseg. Hais txog ntau yam hauj lwm uas cov thawj coj thiab cov neeg ua hauj lwm yuav tsum ua ntawd, peb yuav tsis muab tej ntawd teev raws li qhov loj me los sis cov txiaj ntsig uas ua tau los ntawd; cia peb xub sib qhia txog tes hauj lwm “nthuav tawm” tso. Qhov nthuav cov tawm tsam khetos tus yam ntxwv xeeb txawm lub ntsiab tseeb tawm ntawd muaj xws li qhov nthuav lawv tej kev npaj siab, tej hom phiaj, thiab tej qhov tshwm sim los ntawm lawv tej kev ua phem tas li uas tab kaum thiab cuam tshuam pawg ntseeg tes hauj lwm tawm; qhov nthuav tawm cov tawm tsam khetos, thaum ua cov thawj coj thiab cov neeg ua hauj lwm, yeej tsis ua pawg ntseeg tes hauj lwm tiag tiag kiag li thiab tsis quav ntsej txog cov neeg Vajtswv xaiv tseg txoj kev nkag mus rau hauv lub neej txoj sia li; qhov nthuav cov tawm tsam khetos lub ntsej muag phem tawm uas yog cov tib neeg uas yeej tsis paub lawv tus kheej kiag li, yeej ib txwm tsis xyaum ua raws qhov tseeb li, thiab tsuas hais cov lus thiab cov kev qhuab qhia los coj tib neeg mus yuam kev xwb; thiab qhov nthuav lawv tej lus hais thiab tej kev ua uas sib txawv nyob rau ntawm tib neeg xub ntiag thiab tib neeg nraub qaum tawm. Qhov muab tej no nthuav tawm kom tag nrho ua rau pom cov tawm tsam khetos tus yam ntxwv tseeb uas yog cov Ntxwgnyoog thiab cov dab phem. Qhov no yog ib teg hauj lwm tseem ceeb uas cov thawj coj thiab cov neeg ua hauj lwm yuav tsum tau ua. Yog li ntawd, cov thawj coj thiab cov neeg ua hauj lwm yuav tsum muaj dab tsi uas los ua tes hauj lwm no? Thawj qhov, lawv yuav tsum muaj ib lub nra, puas yog? (Yog.) Thaum cov thawj coj thiab cov neeg ua hauj lwm ris lub luag hauj lwm no, lawv pheej xav hais tias, “Tus neeg ntawd yog ib tug tawm tsam khetos. Muaj ib txhia kwv tij thiab nkauj muam nquag mus nrhiav lawv nug tej lus nug, pheej txav ze rau lawv thiab muaj kev sib raug zoo uas zoo nrog lawv. Qhov raug tus neeg no coj mus yuam kev ntawd, ua rau ntau tus tib neeg pe hawm lawv tshwj xeeb. Yuav tsum ua li cas rau qhov no?” Lawv thiaj li los rau ntawm Vajtswv lub xub ntiag los thov Vajtswv thiab nquag nrhiav Vajtswv cov lus uas nthuav cov tawm tsam khetos tawm, lawv tus kheej npaj qhov tseeb nyob rau sab no. Tom qab ntawd lawv thov Vajtswv npaj lub sij hawm uas tsim nyog los sis lawv tus kheej nrhiav lub sij hawm thiab lub cib fim uas tsim nyog los sib qhia nrog cov kwv tij thiab cov nkauj muam txog qhov teeb meem no. Lawv saib qhov no ua lawv lub nra thiab yog ib teg hauj lwm tseem ceeb uas lawv yuav tsum tau ua tom ntej no. Lawv pheej npaj, nrhiav, thiab thov Vajtswv rau Vajtswv txoj kev coj qhia; lawv yeej ib txwm nyob rau hauv hom kev xav thiab tus yam ntxwv zoo li no. Qhov no yog lub ntsiab lus ntawm qhov uas muaj ib lub nra. Tom qab npaj nrog lub nra zoo li no tau ib ntus, lawv tos txog lub sij hawm uas tsim nyog. Yam tsawg kawg, lawv yuav tsum tos kom txog thaum muaj ob los sis peb tug neeg muaj kev paub cais tiag tiag txog tus tawm tsam khetos ntawd ua ntej lawv thiaj li pib nthuav lawv tawm tau. Yog lawv txiav txim tias ib tug neeg twg zoo li yog ib tug tawm tsam khetos raws li lawv tej kev xav xwb, tiam sis lawv pom tsis tshab tias tus neeg ntawd puas yog ib tug tawm tsam khetos tiag tiag los sis tsis yog, ces lawv yuav tsum tsis txhob ua maj nroos. Muab hais luv luv tias, thaum ua tes hauj lwm no, lawv yeej yuav muaj Vajtswv txoj kev qhia kom paub thiab kev coj qhia. Qhov no yog lub ntsiab lus ntawm qhov ua tes hauj lwm tiag tiag thiab ua cov thawj coj thiab cov neeg ua hauj lwm tej luag hauj lwm kom tiav.

II. Kev Ntuas

Tom qab ua tes hauj lwm nthuav cov tawm tsam khetos tawm tas lawm, txawm hais tias cov kwv tij thiab cov nkauj muam muaj kev paub cais me ntsis lawm los xij, ua ntej cov tawm tsam khetos raug muab nthuav tawm tag nrho ntawd, lawv yeej yuav ua ntau yam ntxiv los coj mus yuam kev thiab cuam tshuam cov kwv tij thiab cov nkauj muam, ua rau tib neeg coob ntxiv pe hawm, saib lawv rau qhov siab, thiab caum lawv. Qhov no ua rau cov neeg Vajtswv xaiv tseg txoj kev nkag mus rau hauv txoj kev ntseeg Vajtswv uas yog ntawd qeeb heev, tab kaum lawv txoj kev nkag mus rau hauv lub neej txoj sia thiab raug ua phem loj heev. Yog li ntawd, yam hauj lwm ob uas cov thawj coj thiab cov neeg ua hauj lwm yuav tsum tau ua ntawd yog, thaum cov tawm tsam khetos cuam tshuam thiab coj cov kwv tij thiab cov nkauj muam mus yuam kev, los sis thaum lawv tej lus hais thiab tej kev ua pom tau meej tias ua txhaum rau qhov tseeb tej hauv paus ntsiab lus, cov thawj coj thiab cov neeg ua hauj lwm yuav tsum tuav cov pov thawj thiab sawv los ntuas lawv tam sim ntawd, thiab nthuav lawv tej kev ua phem tawm raws li Vajtswv cov lus, kom cov kwv tij thiab cov nkauj muam thiaj li paub cais thiab pom tshab txog cov tawm tsam khetos lub ntsej muag tseeb tiag. Qhov no yog lub luag hauj lwm uas zam tsis tau ntawm qhov los tiv thaiv cov neeg Vajtswv xaiv tseg thiab pov hwm Vajtswv lub tsev tes hauj lwm. Cov thawj coj thiab cov neeg ua hauj lwm yuav tsum tsis txhob zaum twj ywm thiab ua ntsej lag muag dig; lawv yuav tsum tuav lub cib fim, nrhiav tau tej xwm txheej ntawd kom ncav sij hawm, thiab sawv los ntuas cov tawm tsam khetos, nthuav cov tawm tsam khetos tej kev ua, tej kev xav ua heev, tej kev ntshaw heev, thiab lub ntsiab tseeb tawm kom yog. Muaj tseeb tiag, yeej tim tsum muab cov tawm tsam khetos teem kom yog dua tias lawv yog hom neeg zoo li cas, kom cov kwv tij thiab cov nkauj muam thiaj li pom qhov no tau meej, kom cov tawm tsam khetos tus kheej thiaj li paub, thiab kom cov tawm tsam khetos thiaj li paub tias tsis yog txhua tus puav leej tsis muaj kev paub cais txog lawv thiab raug lawv dag—tias yam tsawg kawg muaj qee tus tuaj yeem pom tshab txog lawv tej kev ua thiab txoj kev coj thiab pom tshab txog lawv tej kev xav ua heev thiab tej kev ntshaw heev uas zais ntshis, nrog rau lawv lub ntsiab tseeb. Lub hom phiaj ntawm kev ntuas cov tawm tsam khetos, muaj tseeb tiag, tsis yog tsuas nthuav lawv lub ntsiab tseeb tawm los ntawm cov lus hais xwb. Qhov tseem ceeb dua ntawd, yog dab tsi? (Ib qho mas, yog txhawm rau pab cov kwv tij thiab cov nkauj muam kom muaj kev paub cais, thiab kuj txhawm rau txwv cov tawm tsam khetos tej kev ua phem thiab.) Yog lawm. Qhov ntawd yog txhawm rau txwv lawv, kom thaum lawv ua tej yam uas cuam tshuam thiab coj tib neeg mus yuam kev, lawv thiaj li muaj kev txhawj xeeb me ntsis thiab muaj kev ntshai me ntsis; ua kom lawv raug txwv, raug cheem me ntsis, thiab tsis kam lam tau lam ua dog dig; qhia kom lawv paub tias Vajtswv lub tsev tsis yog tsuas muaj qhov tseeb, uas yog qhov tseeb tuav hwj chim xwb, tiam sis kuj muaj kev cai tswj fwm thiab, thiab tias qhov uas quab yuam lwm tus thiab lam tau lam ua yam tsis xav nyob hauv Vajtswv lub tsev, ua kom puas tsuaj rau Vajtswv lub tsev tej txiaj ntsim, thiab ua phem rau cov neeg Vajtswv xaiv tseg ntawd yeej yuav ua tsis tau kiag li; thiab kuj qhia kom lawv paub tias lawv yuav tsum tau ris lub txim rau qhov uas lam tau lam ua phem uas cuam tshuam pawg ntseeg tes hauj lwm thiab ua puas tsuaj rau cov neeg Vajtswv xaiv tseg txoj kev nkag mus rau hauv lub neej txoj sia. Thaum ntuas cov tawm tsam khetos kom ncav sij hawm ntawd, cov thawj coj thiab cov neeg ua hauj lwm kuj yuav tsum sawv los nthuav lawv tawm thiab, pab tib neeg kom muaj kev paub cais thiab pom tshab txog cov tawm tsam khetos tej kev xav ua heev, tej kev ntshaw heev, tej kev npaj siab, thiab tej hom phiaj. Muaj tseeb tiag, qhov no kuj yog txhawm rau tiv thaiv cov neeg Vajtswv xaiv tseg thiab pov hwm Vajtswv lub tsev tej txiaj ntsim thiab. Tej no puav leej yog tej yam uas cov thawj coj thiab cov neeg ua hauj lwm yuav tsum tau ua tib zoo xav txog, thiab qhov ntawd kuj yog tes hauj lwm uas nyob hauv tus ciaj ciam ntawm lawv tej luag hauj lwm; lawv tsis tuaj yeem tsis quav ntsej los sis ua dog ua dig rau qhov no. Yog cov thawj coj thiab cov neeg ua hauj lwm pom cov tawm tsam khetos nyob hauv pawg ntseeg, lawv yuav tsum pheej ceev faj txog cov tawm tsam khetos ntawd tej lus hais thiab tej kev ua nrog rau tej lus yuam kev uas cov tawm tsam khetos ntawd tshaj tawm nyob tom qab nraub qaum, thiab lawv yuav tsum ua raws li kev ntuas thiab kev nthuav tawm. Qhov no yog ib teg hauj lwm rau cov thawj coj thiab cov neeg ua hauj lwm los tiv thaiv cov neeg Vajtswv xaiv tseg kom tsis txhob raug cov tawm tsam khetos cuam tshuam thiab ua phem rau.

III. Kev Txheeb Xyuas

Tes hauj lwm tom ntej uas cov thawj coj thiab cov neeg ua hauj lwm yuav tsum ua yog dab tsi? Yog kev txheeb xyuas. Kev txheeb xyuas yeej yuav luag zoo ib yam li kev nthuav tawm, tiam sis muaj theem uas sib txawv. Thaum hais txog kev txheeb xyuas, qhov ntawd tsis yog tsuas nthuav ib qho muaj tseeb, qhov xwm txheej tiag tiag, los sis keeb kwm yav dhau los tawm xwb; qhov ntawd ntsig txog qhov teeb meem ntawm kev teem, qhov ntawd yog, ntsig txog cov tawm tsam khetos tus moj yam, uas yog lub hauv paus teeb meem ntawm lub ntsiab tseeb no. Yuav tsum txheeb xyuas lawv tus cwj pwm uas coj rau Vajtswv, coj rau qhov tseeb, coj rau lawv tes dej num, thiab coj rau Vajtswv lub tsev tes hauj lwm, nrog rau tej kev txhawb siab, tej kev npaj siab, thiab lub hom phiaj uas nyob tom qab lawv txoj kev tshaj tawm tej lus yuam kev—tej laj thawj uas ua rau lawv ua li no—thiab paub cais lawv lub ntsiab tseeb yog dab tsi tiag tiag los ntawm lawv tej kev xav, kev xam pom, lus hais, kev ua, thiab cov moj yam nrog rau tej kev qhia tshwm uas lawv nthuav tawm los. Yuav tsum muab tej no los piv nrog Vajtswv cov lus thiab piav qhia kom cov kwv tij thiab cov nkauj muam thiaj li to taub tau tob dua txog cov tawm tsam khetos thiab pom tau meej los ntawm qhov muaj tiag tias vim li cas tiag es cov tawm tsam khetos uas nyob ntawm lawv xub ntiag ntawd thiaj li hais thiab ua tej yam no, Vajtswv txoj kev pom rau hom neeg zoo li no yog dab tsi, thiab Nws teem lawv li cas. Muaj tseeb tiag, cov thawj coj thiab cov neeg ua hauj lwm kuj yuav tsum qhia rau cov kwv tij thiab cov nkauj muam kom nrug deb thiab tso cov tawm tsam khetos tseg, thiab kuj yuav tsum ceev faj kom tsis txhob raug cov tawm tsam khetos tej kev ua, tej kev coj, lus hais, thiab kev xam pom coj mus yuam kev kom thiaj li zam tau kev to taub Vajtswv yuam kev, kev thaiv rau Vajtswv, kev nrug deb ntawm Vajtswv, kev tso Vajtswv tseg, thiab haj tseem yog kev txiav txim thiab teem txim rau Vajtswv hauv nruab siab ib yam li cov tawm tsam khetos ua. Lub hom phiaj ntawm kev txheeb xyuas, mas zoo ib yam li lwm yam hauj lwm xws li kev nthuav tawm thiab kev ntuas, puav leej yog txhawm rau txwv cov tawm tsam khetos kom tsis txhob coj mus yuam kev, cuam tshuam, thiab ua phem rau cov neeg Vajtswv xaiv tseg. Qhov ntawd yog txhawm rau tiv thaiv cov neeg Vajtswv xaiv tseg kom tsis txhob raug cov tawm tsam khetos rhuav tshem yam phem heev thiab kom tsis txhob yuam kev tawm ntawm txoj kev ntseeg Vajtswv uas yog. Thaum cov neeg Vajtswv xaiv tseg pom qhov muaj tseeb thiab qhov xwm txheej tiag tiag txog qhov cov tawm tsam khetos cuam tshuam pawg ntseeg meej thiab pom cov tawm tsam khetos lub ntsiab tseeb meej lawm, lawv yeej yuav tsis raug cov tawm tsam khetos ntawd coj mus yuam kev thiab tswj ntxiv lawm. Txawm hais tias muaj ib txhia tib neeg feeb tsis meej thiab cov tib neeg ruam tseem saib lawv rau qhov siab thiab pe hawm lawv hauv nruab siab thiab tseem sib cuag nrog lawv thiab txav ze rau lawv los, cov tawm tsam khetos yeej tsim tsis tau teeb meem loj ntxiv lawm. Lawv tsuas yuav ua tau qee yam rau cov tib neeg ruam xwb, yam cuam tshuam tsis tau txog txoj kev nkag mus rau hauv lub neej txoj sia ntawm cov uas ntseeg Vajtswv yam siab dawb paug kiag li, thiab yog li ntawd, lawv yeej yuav cuam tshuam thiab tab kaum tsis tau pawg ntseeg tes hauj lwm lawm. Qhov ua tau txog theem no yog yam uas cov thawj coj thiab cov neeg ua hauj lwm yuav tsum ua tau. Qhov ntawd yog, lawv yuav tsum ua kom paub tseeb tias cov uas ntseeg Vajtswv yam siab dawb paug thiab txaus siab hlo ua lawv tej dej num thiab cov uas nyiam qhov tseeb ntawd tuaj yeem ua tau lub neej hauv pawg ntseeg li ib txwm muaj thiab ua lawv tej dej num kom tiav. Nyob rau tib lub sij hawm ntawd, lawv kuj yuav tsum ua kom paub tseeb tias cov tib neeg no tuaj yeem ceev faj cov tawm tsam khetos txoj kev coj mus yuam kev thiab kev cuam tshuam, thiab tso cov tawm tsam khetos tseg. Qhov no yog qhov txwv cov tawm tsam khetos tej kev ua phem thiab kev cuam tshuam kom ntau tshaj plaws li qhov ua tau, ua tau tiav hlo li cov txiaj ntsig ntawm kev tiv thaiv cov neeg Vajtswv xaiv tseg. Muaj tseeb tiag, txawm koj yuav ua koj tes hauj lwm tau zoo npaum li cas thiab koj yuav hais tau meej npaum li cas los xij, yeej yuav zam tsis tau qhov uas muaj qee cov tib neeg ruam, cov tib neeg uas lub peev xwm tsis zoo, thiab cov tib neeg feeb tsis meej uas tso tsis tau cov tawm tsam khetos tseg thiab tseem yuav saib lawv rau qhov siab thiab cia siab rau lawv nyob hauv nruab siab. Tiam sis, tib neeg feem coob yeej tau txog theem uas tuaj yeem muab cov tawm tsam khetos tso tseg lawm. Yog cov thawj coj thiab cov neeg ua hauj lwm tuaj yeem ua tau li no, lawv yeej tau tiv thaiv cov neeg Vajtswv xaiv tseg kom ntau tshaj plaws li qhov ua tau lawm, ua tau tiav hlo li cov txiaj ntsig uas xav tau lawm. Hais txog cov neeg ruam feeb tsis meej uas to taub tsis tau qhov tseeb txawm yuav sib qhia li cas los xij ntawd, yog hais tias lawv tseem tuaj yeem siv zog ua hauj lwm me ntsis tau, ces tsim nyog muab kev saib xyuas thiab kev pab me ntsis rau lawv, nrog rau kev hlub, kev ua siab ntev, thiab kev thev taus ntau ntxiv me ntsis. Qhov no yog qhov ua txhua yam uas ib tug neeg tsim nyog ua, qhov ua hauj lwm zoo li no yog muaj hauv paus ntsiab lus. Puas muaj cov thawj coj thiab cov neeg ua hauj lwm coob tus uas tuaj yeem ua tau raws li tus qauv no? (Tsis muaj coob.) Yog li ntawd, yuav tsum tau siv zog ua kom ntau tshaj plaws; yuav tsum tiv thaiv cov neeg Vajtswv xaiv tseg yam tsis dhuav thiab yam ntau tshaj plaws li qhov ua tau. “Yam ntau tshaj plaws li qhov ua tau” ntawd txhais li cas? Qhov ntawd txhais hais tias ua txhua yam uas ua tau los sib qhia qhov tseeb tej hauv paus ntsiab lus uas koj to taub, kom muab cov pov thawj uas koj tau lawm ntawd qhia tawm—ntau yam kev qhia tshwm txog cov tawm tsam khetos tej kev ua phem—muab tej ntawd los piv nrog Vajtswv cov lus uas nthuav tawm cov tawm tsam khetos, thiab los sib qhia thiab txheeb xyuas tej ntawd. Qhov no yog kom cov kwv tij thiab cov nkauj muam thiaj li pom tau qhov muaj tseeb, qhov xwm txheej tiag tiag kom meej, paub cais thiab pom tshab txog cov tawm tsam khetos lub ntsiab tseeb, thiab paub Vajtswv tus cwj pwm uas coj rau cov tawm tsam khetos. Qhov no yog ib teg hauj lwm tseem ceeb uas cov thawj coj thiab cov neeg ua hauj lwm yuav tsum tau ua.

IV. Kev Txwv

Tes hauj lwm tom ntej uas cov thawj coj thiab cov neeg ua hauj lwm yuav tsum ua yog dab tsi? Yog kev txwv. Tes hauj lwm “kev txwv” no yeej yooj yim ua; qhov ntawd ntsig txog qhov siv qee txoj kev ua tshwj xeeb los ua kom tau cov txiaj ntsig ntawm kev txwv. Piv txwv li, cov tawm tsam khetos pheej hais cov lus thiab cov kev qhuab qhia, pheej qhuas lawv tus kheej, qee zaus ua saib tsis taus lwm tus, nquag ua tim khawv txog qhov tias lawv tau raug kev txom nyem ntau npaum li cas thiab lawv tau ua tej txiaj ntsig dab tsi rau Vajtswv lub tsev thaum sib txoos ua ke, thiab ua tim khawv rau lawv tus kheej yam tsis paub txaj muag, tham txog qhov tias lwm tus saib lawv siab li cas, lawv zoo dua lwm tus li cas, lawv txawv lwm tus li cas, thiab lwm yam ntxiv. Cov thawj coj thiab cov neeg ua hauj lwm yuav tsum ua txhua yam uas ua tau los txwv cov tawm tsam khetos ntau yam kev ua phem uas tswj thiab coj cov neeg Vajtswv xaiv tseg mus yuam kev, es tsis yog pheej tso cai rau lawv ua phem. Cov thawj coj thiab cov neeg ua hauj lwm yuav tsum txwv lawv lub sij hawm hais lus thiab cov ncauj lus uas lawv tham. Tsis tas li ntawd xwb, hais txog cov tawm tsam khetos tej kev ua nyob rau ntawm tib neeg xub ntiag thiab tom qab nraub qaum, xws li qhov siv tej txiaj ntsim me me los rub tib neeg los rau lawv sab, tsim kev sib cais, tshaj tawm tej kev xav phem thiab tej lus hais uas xav tsis zoo, thiab lwm yam ntxiv, cov thawj coj thiab cov neeg ua hauj lwm yuav tsum tsis txhob ua li lawv lag ntseg los sis dig muag. Lawv yuav tsum to taub cov tawm tsam khetos tej kev ua kom ncav sij hawm; kiag thaum lawv pom tej kev ua uas cuam tshuam thiab coj lwm tus mus yuam kev, lawv yuav tsum nthuav tawm thiab txheeb xyuas tej kev ua no kom ncav sij hawm thiab txwv cov tawm tsam khetos, tsis pub lawv coj tib neeg mus yuam kev thiab cuam tshuam pawg ntseeg tes hauj lwm rau txhua qhov chaw. Qhov no puas yog ib teg hauj lwm tseem ceeb uas cov thawj coj thiab cov neeg ua hauj lwm yuav tsum ua? (Yog.) Koj puas txwv tau cov tawm tsam khetos tej kev ua phem los ntawm kev ntuas, kev nthuav tawm, thiab kev txheeb xyuas lawv xwb? (Tsis tau.) Koj txwv tsis tau lawv li vim lawv yog cov Ntxwgnyoog thiab cov dab phem. Tsuav yog lawv ob txhais tes thiab ob txhais taw tsis raug muab khi, thiab lawv lub qhov ncauj tsis raug muab kaw, lawv yeej yuav tshaj tawm tej lus yuam kev thiab hais tej lus dab uas cuam tshuam tib neeg. Cov thawj coj thiab cov neeg ua hauj lwm yuav tsum ua ib yam dab tsi los txwv lawv kom ncav sij hawm; tshwj xeeb yog thaum lawv tshaj tawm tej lus yuam kev los cuam tshuam thiab coj tib neeg mus yuam kev ntawd, cov thawj coj thiab cov neeg ua hauj lwm yuav tsum txiav lus thiab cheem lawv kom ncav sij hawm. Lawv kuj yuav tsum pab kom cov neeg Vajtswv xaiv tseg muaj kev paub cais thiab pom cov tawm tsam khetos lub ntsej muag tseeb kom meej. Qhov no yog tes hauj lwm tiag tiag uas cov thawj coj thiab cov neeg ua hauj lwm yuav tsum ua.

V. Kev Saib Xyuas

Tom qab txwv cov tawm tsam khetos lawm, qhov tom ntej yog kev saib xyuas lawv. Saib seb cov tawm tsam khetos tau coj leej twg mus yuam kev thiab lawv tau tshaj tawm tej lus yuam kev thiab tej lus dab dab tsi tom qab nraub qaum, tshuaj xyuas seb lawv puas sawv rau tus zaj loj liab ploog sab thiab koom tes ua ke nrog tus zaj loj liab ploog, seb lawv puas koom tes nrog lub ntiaj teb ntawm sab kab lis kev cai ntseeg, seb lawv puas tab tom ua tej yam tswv yim phem zais ntshis nrog lawv cov neeg hauv pab pawg, seb lawv puas yuav muag Vajtswv lub tsev qee cov ntaub ntawv tseem ceeb, thiab lwm yam ntxiv. Qhov no kuj yog ib lub luag hauj lwm uas cov thawj coj thiab cov neeg ua hauj lwm yuav tsum ua kom tiav thiab. Ua ntej cov tawm tsam khetos tej kev ua yuav raug nthuav tawm, cov thawj coj thiab cov neeg ua hauj lwm yuav tsum tsis txhob “tsuas tsom ntsoov rau qhov kawm cov neeg txawj ntse cov ntawv yam tsis quav ntsej txog tej xwm txheej sab nraud,” tiam sis yuav tsum ntse ib yam li cov nab. Thaum cov thawj coj thiab cov neeg ua hauj lwm pom tias ib tug neeg twg yog ib tug tawm tsam khetos, yog lub sij hawm tseem tsis tau txog qhov uas yuav muab tus neeg ntawd ntsaig tawm los sis ntiab tawm mus, lawv yuav tsum saib xyuas tus neeg ntawd kom nruj los tiv thaiv kom tus neeg ntawd tsis txhob ua phem ntxiv, xyuas kom paub tseeb tias tus neeg ntawd tej lus hais thiab tej kev ua nyob hauv cov neeg Vajtswv xaiv tseg txoj kev saib xyuas. Vim cov tawm tsam khetos nyiam lub hwj chim thiab nyiam tsim kev sib raug zoo nrog cov neeg muaj hwj chim, cov thawj coj thiab cov neeg ua hauj lwm yuav tsum ua tib zoo saib seb cov tawm tsam khetos pheej sib cuag mus los nrog leej twg nyob rau tom qab nraub qaum thiab seb lawv puas nrog cov neeg ntawm sab kab lis kev cai ntseeg sib cuag. Ib txhia tawm tsam khetos pheej sib cuag nrog cov xib fwb thiab cov txwj laug ntawm sab kab lis kev cai ntseeg, thiab qee tus haj tseem sib cuag nrog cov neeg ntawm Lub Chaw Uas Koom Tes Ua Hauj lwm ntawm Teb Chaws thiab. Thaum tej xwm txheej zoo li no tshwm sim, cov thawj coj thiab cov neeg ua hauj lwm yuav tsum tsis txhob ua ntsej lag muag dig rau qhov no, tiam sis yuav tsum ceev faj cov tawm tsam khetos thiab thaiv. Yog ib tug tawm tsam khetos pom tias lawv tej kev coj mus yuam kev thiab rub tib neeg los rau lawv sab ntawd tsis muaj txiaj ntsig hauv Vajtswv lub tsev thiab lawv tej kev ua phem tau raug nthuav tawm lawm, thiab lawv paub tias lawv yeej yuav tsis muaj qhov kawg uas zoo, koj yeej kwv yees tsis tau tias lawv yuav ua tau dab tsi los sis lawv txoj kev ua phem yuav mus txog theem twg li. Yog li ntawd, thaum koj paub tseeb hauv koj lub siab tias ib tug neeg twg yog ib tug tawm tsam khetos lawm, koj yuav tsum saib xyuas thiab tsom ntsoov rau lawv kom nruj yam tsis tso xoob. Qhov no yog koj lub luag hauj lwm. Lub ntsiab ntawm qhov ua li no yog dab tsi? “Qhov ntawd yog txhawm rau tiv thaiv cov neeg Vajtswv xaiv tseg, thiab txhawm rau txwv cov tawm tsam khetos kom kawg nkaus li qhov ua tau kom lawv tsis txhob ua tej yam phem rau pawg ntseeg thiab cov kwv tij thiab cov nkauj muam los ua phem rau cov kwv tij thiab cov nkauj muam.” Ib txhia tawm tsam khetos pheej nug txog tej khoom fij: “Leej twg tswj hwm Vajtswv lub tsev cov nyiaj? Leej twg yog tus teev cov nyiaj? Cov ntaub ntawv teev nyiaj puas teev meej? Puas muaj qhov uas nyiag nyiaj tshwm sim? Pawg ntseeg cov nyiaj muab cia rau qhov twg? Tej no puas tsim nyog muab tshaj tawm rau sawv daws paub, muab cai rau txhua tus kom paub txog tej no? Vajtswv lub tsev muaj tej khoom muaj nqis ntau npaum li cas? Leej twg yog tus muab khoom fij ntau tshaj plaws? Vim li cas kuv thiaj li tsis paub tej no li?” Lawv tej lus hais mas zoo li lawv txhawj xeeb txog Vajtswv lub tsev tej nyiaj txiag, tiam sis qhov tseeb tiag, lawv muaj lwm lub hom phiaj. Yeej tsis muaj ib tug tawm tsam khetos twg uas tsis ntshaw nyiaj li. Yog li ntawd cov thawj coj thiab cov neeg ua hauj lwm yuav tsum ua li cas nyob rau hauv tej xwm txheej zoo li no? Thawj qhov, koj yuav tsum tswj hwm tej khoom fij kom zoo, muab tso rau cov neeg uas vam khom tau saib xyuas, thiab koj yeej yuav tsum tsis txhob cia cov tawm tsam khetos ua tau tiav raws li lawv tej hom phiaj—koj yuav tsum tsis txhob feeb tsis meej txog qhov no. Kiag thaum hom xwm txheej zoo li no tshwm sim, koj yuav tsum paub txog tias: “Muaj teeb meem lawm. Tus tawm tsam khetos yuav ua ib yam dab tsi. Pawg ntseeg cov nyiaj tab tom raug lawv tsom ntsoov rau. Tej zaum lawv tab tom npaj koom tes nrog tus zaj loj liab ploog los npaj tswv yim phem thiab txeeb pawg ntseeg cov nyiaj. Peb yuav tsum muab tshem mus tam sim no!” Ib qho mas, koj yuav tsum tsis txhob cia cov tawm tsam khetos paub tias leej twg tswj hwm Vajtswv lub tsev tej nyiaj txiag. Tsis tas li ntawd xwb, yog cov neeg tswj hwm nyiaj txiag hnov tias muaj kev phom sij, ces cov nyiaj txiag thiab cov neeg tswj hwm cov nyiaj yuav tsum tau muab tshem mus kom sai. Qhov no puas yog ib yam uas cov thawj coj thiab cov neeg ua hauj lwm yuav tsum txhawj xeeb txog, thiab yog tes hauj lwm uas lawv yuav tsum ua? (Yog.) Tiam sis, cov thawj coj ruam hnov cov tawm tsam khetos hais tej lus no lawv tseem xav tias, “Tus neeg no ris ib lub nra thiab paub txhawj xeeb txog Vajtswv lub tsev cov nyiaj, yog li ntawd cia muab qee lub luag hauj lwm rau lawv thiab cia lawv pab teev nyiaj.” Thaum ua li no, tsis yog lawv dhau los ua cov Yudas lawm lod? (Yog.) Tsis yog lawv tsuas tiv thaiv tsis tau tej khoom fij xwb, tiam sis lawv tseem muab tej khoom fij ntawd muag tawm rau cov tawm tsam khetos thiab, uas lawv thiaj li dhau los ua cov Yudas tiag tiag lawm. Cov thawj coj thiab cov neeg ua hauj lwm no zoo li cas? Lawv puas yog cov tib neeg phem? Lawv puas yog cov dab? Lawv tsis yog tsuas ua tsis tau lawv tej luag hauj lwm kom tiav xwb, tiam sis lawv tseem muab Vajtswv tej khoom fij thiab cov kwv tij thiab cov nkauj muam cob rau cov tawm tsam khetos lawm. Yog li ntawd, nyob rau tej chaw uas muaj cov tawm tsam khetos, kiag thaum cov thawj coj thiab cov neeg ua hauj lwm pom ib qho cim twg txog qhov no, lawv yuav tsum pib tshuaj xyuas thiab ua qee tes hauj lwm ntxaws ntxaws, uas nyob hauv qhov ntawd mas tes hauj lwm “kev saib xyuas” yeej tsis muaj tsis tau li.

Tes hauj lwm kev saib xyuas uas cov thawj coj thiab cov neeg ua hauj lwm ua ntawd tsis yog hais txog qhov ua hauj lwm soj xyuas los sis ua tej hauj lwm neeg soj; qhov ntawd tsuas yog hais txog qhov ua koj lub luag hauj lwm kom tiav, txhawj xeeb ntau ntxiv, ua tib zoo soj ntsuam ntau ntxiv, thiab nco ntsoov saib seb cov tawm tsam khetos tab tom ua dab tsi thiab lawv xav ua dab tsi. Yog koj pom ib qho cim twg tias lawv tab tom ua phem thiab cuam tshuam pawg ntseeg, koj yuav tsum nrhiav kev los daws kom sai li sai tau; koj yeej yuav tsum tsis txhob cia lawv ua tau tiav li. Qhov no yog qhov txwv tej xwm txheej uas cov tawm tsam khetos cuam tshuam pawg ntseeg tes hauj lwm kom tsis txhob tshwm sim yam ntau tshaj plaws li qhov ua tau. Muaj tseeb tiag, qhov no kuj pov hwm pawg ntseeg tes hauj lwm thiab tiv thaiv cov neeg Vajtswv xaiv tseg tau zoo tshaj plaws thiab. Qhov no yog ib qho kev qhia tshwm tias cov thawj coj thiab cov neeg ua hauj lwm tab tom ua lawv tej luag hauj lwm kom tiav. Kev saib xyuas tsis tau txhais hais tias npaj ob peb tug neeg los ua cov neeg soj xyuas zais ntshis, thiab kom lawv taug qab, caum, thiab soj xyuas tib neeg ib yam li cov neeg soj, los sis tshawb lawv tsev thiab siv tej kev tsim txom nug lus hnyav. Vajtswv lub tsev tsis ua tej hauj lwm zoo li no. Txawm li cas los xij, koj yuav tsum to taub cov tawm tsam khetos qhov xwm txheej kom ncav sij hawm. Koj tuaj yeem nug txog lawv qhov xwm txheej tsis ntev los no los ntawm qhov nrog lawv tsev neeg los sis cov kwv tij thiab cov nkauj muam uas tuaj yeem paub cais lawv los sis paub zoo txog lawv tham. Tej no tsis yog tej kev thiab hau kev rau qhov ua tes hauj lwm no lod? Yog cov thawj coj thiab cov neeg ua hauj lwm ua tej hauj lwm uas nyob hauv tus ciaj ciam ntawm lawv tej luag hauj lwm thiab mus raws li tej hauv paus ntsiab lus uas Vajtswv cheem tsum ntawd, ces lawv tab tom ua lawv tej luag hauj lwm kom tiav. Lub hom phiaj ntawm cov thawj coj thiab cov neeg ua hauj lwm txoj kev ua lawv tej luag hauj lwm kom tiav yog dab tsi? Qhov ntawd yog txhawm rau kom koj ua txhua yam uas koj tuaj yeem ua tau los txwv cov tawm tsam khetos kom tsis txhob ua rau muaj tej kev tab kaum thiab kev cuam tshuam kom ntau tshaj plaws li qhov ua tau, uas yog qhov thaiv cov tawm tsam khetos kom tsis txhob ua phem rau cov neeg Vajtswv xaiv tseg thiab muag Vajtswv lub tsev tej txiaj ntsim tawm. Qhov no yog cov thawj coj thiab cov neeg ua hauj lwm lub luag hauj lwm. Qhov no puas yog qhov txwv cov tawm tsam khetos tej xwm txheej kom tsis txhob tshwm sim yam ntau tshaj plaws li qhov ua tau? Cov thawj coj thiab cov neeg ua hauj lwm uas ua tej kev ua no puas yog tab tom ua txhua yam uas tib neeg ua tau? (Yog.) Qhov ua li no puas nyuaj? (Tsis nyuaj.) Qhov no tsis nyuaj; qhov no yog ib yam uas cov tib neeg uas to taub qhov tseeb tuaj yeem ua tau. Yam uas tib neeg tuaj yeem ua tau, lawv yuav tsum siv zog ua kom tiav; qhov tshuav ntawd ces cia Vajtswv ua, cia Nws siv Nws lub hwj chim kav thiab npaj, thiab coj kev. Qhov no yog yam uas peb tsis txhawj tshaj plaws. Peb muaj Vajtswv nyob tom qab peb. Tsis yog peb tsuas muaj Vajtswv hauv peb lub siab xwb, tiam sis peb kuj muaj kev ntseeg tiag tiag thiab. Qhov no tsis yog ib qho kev txhawb ntawm sab ntsujplig; qhov tseeb tiag, Vajtswv nyob ntsiag to, thiab Nws nyob ntawm tib neeg ib sab, nrog nraim lawv nyob txhua lub sij hawm. Thaum twg tib neeg ua ib yam dab tsi los sis ua ib teg dej num twg, Nws yeej saib ntsoov; Nws yeej pab koj nyob rau txhua lub sij hawm thiab txhua qhov chaw, tsom kwm thiab tiv thaiv koj. Yam uas tib neeg tsim nyog ua yog siv zog ua yam uas lawv tsim nyog ua kom tiav. Tsuav yog koj paub txog, xav tau hauv koj lub siab, pom hauv Vajtswv cov lus, tau cov neeg nyob ib puag ncig koj ceeb toom rau koj, los sis tau txais ib qho cim los sis ib qho cim qhia los ntawm Vajtswv uas muab xov xwm rau koj—qhov no yog ib yam uas koj tsim nyog ua, qhov no yog Vajtswv cov lus txib rau koj—ces koj yuav tsum ua koj lub luag hauj lwm kom tiav thiab tsis txhob zaum es tsis quav ntsej los sis qaim tes ntsia xwb. Koj tsis yog ib tug neeg hlau; koj muaj ib lub hlwb thiab tej kev xav. Thaum ib yam dab tsi tshwm sim, koj yeej paub tias koj yuav tsum ua dab tsi, thiab koj yeej muaj tej kev xav thiab kev paub txog. Yog li ntawd muab tej kev xav thiab kev paub txog no los siv rau tej xwm txheej tiag tiag, ua neej raws li tej ntawd thiab muab tej ntawd hloov los ua koj tej kev ua, thiab ua li no, koj yeej yuav ua tau koj lub luag hauj lwm kom tiav lawm. Rau tej yam uas koj tuaj yeem paub txog, koj yuav tsum ua raws li qhov tseeb tej hauv paus ntsiab lus uas koj to taub. Ua li no, koj thiaj li tab tom siv zog ua thiab ua txhua yam uas koj ua tau los ua koj tes dej num. Ua ib tug thawj coj los sis ib tug neeg ua hauj lwm, thaum koj siv zog tshaj plaws, qhov ntawd yog, thaum koj txwv cov tawm tsam khetos tej kev ua phem kom tsis txhob tshwm sim yam ntau tshaj plaws li qhov ua tau, koj tuaj yeem ua raws li no, ces Vajtswv yeej yuav txaus siab. Vim li cas Vajtswv thiaj li txaus siab? Vajtswv yuav txiav txim txog cov thawj coj thiab cov neeg ua hauj lwm zoo li no: Lawv tab tom ua lawv tej luag hauj lwm kom tiav thiab siv zog kawg lawv lub peev xwm los ua tes hauj lwm uas yog txoj hauj lwm uas lawv yuav tsum ua. Qhov no puas yog Vajtswv txoj kev pom zoo? (Yog.)

VI. Kev Ntiab Tawm

Lub luag hauj lwm kaum peb ntawm cov thawj coj thiab cov neeg ua hauj lwm nrog rau tej hauj lwm ntxaws ntxaws uas lawv yuav tsum tau ua, uas peb tau teev tseg ob peb yam: Lawv yuav tsum ua raws li qhov kev nthuav tawm, kev ntuas, kev txheeb xyuas, kev txwv, thiab kev saib xyuas cov tawm tsam khetos. Qhov kev sib qhia txog tej hauv paus ntsiab lus theem pib no tau tiav lawm. Txawm hais tias cov thawj coj thiab cov neeg ua hauj lwm yuav muaj tej kev ua ntxaws ntxaws twg nyob rau hauv tej xwm txheej tshwj xeeb los xij, tej hauv paus ntsiab lus rau qhov daws cov tawm tsam khetos yeej tsis hloov li. Tsis tas li ntawd xwb, lub hom phiaj tseem ceeb ntawm tej hauj lwm no yog txhawm rau tiv thaiv cov neeg Vajtswv xaiv tseg. Yog hais tias cov neeg Vajtswv xaiv tseg twb pom zoo ua ke tias ib tug neeg twg yog ib tug tawm tsam khetos thiab twb paub cais thiab pom tshab tias tus tawm tsam khetos ntawd pheej nrhiav kev los coj tib neeg mus yuam kev thiab tswj tib neeg; lawv paub tias yog muaj tus tawm tsam khetos nyob ntawd, yeej yuav tsis muaj hnub zoo los sis lub neej hauv pawg ntseeg uas zoo li, thiab txhua tus pom zoo ua ke hais kom muab tus tawm tsam khetos ntsaig tawm hauv pawg ntseeg mus. Nyob rau hauv tej xwm txheej no, qee cov thawj coj thiab cov neeg ua hauj lwm tseem tawm tswv yim kom cia tus tawm tsam khetos nyob, kom muab siv ua kev xyaum rau qhov kev nthuav tawm, kev ntuas, kev txheeb xyuas, kev txwv, thiab kev saib xyuas cov tawm tsam khetos—puas tseem tim tsum ua raws li tej txheej txheem no? Qee cov thawj coj thiab cov neeg ua hauj lwm tej zaum yuav hais tias, “Yog peb tsis ua raws li tej txheej txheem no, tsis yog kuv tab tom tsis ua kuv tej luag hauj lwm lod? Tsuas yog qhov ua raws li tej txheej txheem no xwb thiaj li qhia tau kuv txoj hauj lwm uas yog ib tug thawj coj. Kuv yuav tsum ua tes hauj lwm no. Txawm cov kwv tij thiab cov nkauj muam yuav pom zoo los tsis pom zoo los xij, kuv yuav tsum xub cia tus tawm tsam khetos no nyob tso. Kuv yuav xub nthuav lawv tawm, thiab tom qab ntawd ntuas thiab txheeb xyuas lawv, thiab cia cov kwv tij thiab cov nkauj muam paub tseeb ntxiv tias lawv yog ib tug tawm tsam khetos. Tom qab txhua tus pom zoo ua ke lawm, peb mam li muab lawv ntsaig tawm mus los sis ntiab lawv tawm mus. Qhov no tsis yog yuav muaj txiaj ntsig dua lod?” Qhov tshwm sim los yog, thaum lub sij hawm no, tus tawm tsam khetos pib tshaj tawm tej kev xav phem los coj tib neeg mus yuam kev thiab cuam tshuam pawg ntseeg tes hauj lwm dua, ua rau txhua tus ntxhov siab, es qee tus twb tsis kam tuaj koom kev sib txoos ua ke lawm. Txhawm rau qhia lawv txoj kev txiav txim siab thiab ua pov thawj tias lawv tsis tau tso lawv tej luag hauj lwm tseg, cov thawj coj thiab cov neeg ua hauj lwm no lam ua kom dhau xwb thiab ncua tes hauj lwm kom qeeb. Qhov tshwm sim los yog, lawv mus ntau txoj kev nkhaus uas tsis tim tsum, cuam tshuam qhov raws qib raws duas ntawm lub neej hauv pawg ntseeg, thiab nkim cov neeg Vajtswv xaiv tseg lub sij hawm uas muaj nqis nyob rau hauv txoj kev caum qhov tseeb, ces tom qab ntawd mam li muab tus tawm tsam khetos ntsaig tawm mus. Txoj kev ua no puas lees txais tau? (Lees txais tsis tau.) Qhov no muaj teeb meem rau qhov twg? (Qhov ntawd tsuas yog ua raws li tej kev cai tswj thiab lam ua kom dhau xwb.) Lub hom phiaj ntawm cov thawj coj thiab cov neeg ua hauj lwm txoj kev ua tej hauj lwm no yog dab tsi? (Txhawm rau tiv thaiv cov neeg Vajtswv xaiv tseg.) Yog li ntawd, yog qee tus tseem tsis tau paub cais tus tawm tsam khetos thiab tseem tso tsis tau tus tawm tsam khetos ntawd tseg, thiab thaum cov thawj coj thiab cov neeg ua hauj lwm txiav txim siab ntiab tus tawm tsam khetos tawm hauv pawg ntseeg mus, qee tus txawm npau taws, hais tias Vajtswv lub tsev tsis muaj kev hlub los sis tsis ncaj ncees rau tib neeg, tsis muaj tej hauv paus ntsiab lus nyob rau hauv txoj kev ua tej yam, thiab lwm yam ntxiv, thiab haj tseem muaj qee cov tib neeg ruam feeb tsis meej raug tus tawm tsam khetos coj mus yuam kev thiab cuam tshuam es xav caum tus tawm tsam khetos tawm hauv pawg ntseeg mus, yuav tsum ua li cas nyob rau hauv qhov xwm txheej no? Thaum lub sij hawm no, cov thawj coj thiab cov neeg ua hauj lwm yuav tsum ua qee tes hauj lwm uas yog lub ntsiab tseeb, xws li ua raws kev ntuas tus tawm tsam khetos thiab siv Vajtswv cov lus los nthuav tawm thiab txheeb xyuas tus tawm tsam khetos kom cov kwv tij thiab cov nkauj muam thiaj li kawm tau tej lus qhia raws li qhov muaj tiag thiab thaum kawg paub cais tus tawm tsam khetos. Muaj ib hnub, lawv hais tias, “Tus neeg no ntxim ntxub dhau lawm. Lawv yeej yog ib tug tib neeg phem thiab yog ib tug tawm tsam khetos tiag tiag. Cia peb maj nroos muab lawv tshem tawm mus!” Qhov no tsis yog ib tug neeg lub suab xwb tiam sis yog ntau tus kwv tij thiab nkauj muam lub suab. Nyob rau hauv qhov xwm txheej no, puas tseem cheem tsum ua tes hauj lwm txwv thiab saib xyuas tus tawm tsam khetos ntxiv? Tsis cheem tsum lawm, tsuas cia li muab lawv ntiab tawm xwb. Cov thawj coj thiab cov neeg ua hauj lwm uas ua tau txog theem no nyob rau hauv lawv tes hauj lwm yeej ua tau tiav cov txiaj ntsig ntawm kev tiv thaiv cov neeg Vajtswv xaiv tseg kom tsis txhob raug cov tawm tsam khetos ua phem rau lawm. Qhov no ua pov thawj rau dab tsi? Ib kis mas, qhov ntawd ua pov thawj tias cov kwv tij thiab cov nkauj muam ntawm lub pawg ntseeg no muaj kev paub cais, muaj peev xwm, thiab paub txog kev ncaj ncees. Lwm kis mas, tej zaum yog vim cov thawj coj thiab cov neeg ua hauj lwm muaj peev xwm ua tes hauj lwm tiag tiag, los sis vim tus tawm tsam khetos no tej kev ua pom tau meej dhau, lawv txoj kev ua neeg phem dhau thiab lim hiam dhau, ua rau sawv daws npau taws, thiab lawv tus kheej txiav lawv txoj kev tu ntxov, ua rau cov thawj coj thiab cov neeg ua hauj lwm tsis tas yuav ua ntau yam txheej txheem los daws lawv. Qhov no tsis yog pab txuag tau zog ntau heev lod? Nyob rau hauv hom xwm txheej zoo li no, qhov muab lawv ntsaig tawm mus los sis ntiab lawv tawm mus ntawd tsis yog ib yam uas zoo lod? Tsis tas li ntawd xwb, tes hauj lwm uas cov thawj coj thiab cov neeg ua hauj lwm yuav tsum ua ntawd yeej ntau heev thiab tsis yog tsuas muaj tes hauj lwm no xwb. Koj xav tias qhov ntiab tus tawm tsam khetos tawm ntawd yog ua qhov no tiav lawm lod? Tias koj twb ua tau txhua yam tiav zoo lawm lod? Tseem nyob deb heev! Koj tseem muaj lwm yam hauj lwm uas yuav tsum ua. Dhau ntawm qhov daws cov tawm tsam khetos thiab tiv thaiv cov neeg Vajtswv xaiv tseg kom tsis txhob raug cov tawm tsam khetos ua phem rau lawm, cov thawj coj thiab cov neeg ua hauj lwm kuj muaj lub luag hauj lwm los coj cov neeg Vajtswv xaiv tseg nkag mus rau hauv qhov muaj tiag ntawm Vajtswv cov lus, coj lawv daws lawv cov moj yam qias vuab tsuab, thiab coj lawv daws lawv tus moj yam ntawm cov tawm tsam khetos, nrog rau lwm yam hauj lwm tseem ceeb ntau yam. Txawm li cas los xij, yog ib tug tawm tsam khetos tshwm los thaum ua tej hauj lwm no, ces qhov daws tus tawm tsam khetos ntawd yuav dhau los ua qhov tseem ceeb tshaj plaws. Lawv yuav tsum xub nthuav tawm thiab daws tus tawm tsam khetos, thiab kuj sib qhia txog lwm sab qhov tseeb thiab. Yog tshwm sim kev cuam tshuam ntawm ib tug tawm tsam khetos ces yuav ua rau lwm yam hauj lwm nyuaj heev uas yuav nce qib mus tau, uas tes hauj lwm ntawd raug kev tab kaum thiab kev cuam tshuam thiab tus tawm tsam khetos ua rau muaj kev cuam tshuam loj heev rau cov kwv tij thiab cov nkauj muam txoj kev loj hlob hauv lub neej txoj sia, qhov raws qib raws duas ntawm lub neej hauv pawg ntseeg, thiab qhov xwm txheej ib puag ncig rau txoj kev ua tej dej num, ces muaj tseeb tiag yeej tim tsum xub daws qhov kev puas tsuaj loj tshaj plaws thiab lub hauv paus ntawm kev puas tsuaj no tso. Tsuas yog tom qab muab tus tawm tsam khetos ntsaig tawm mus thiab daws tag lawm xwb mas thiaj li yuav ua tau lwm yam hauj lwm mus li ib txwm thiab raws qib raws duas. Yog li ntawd, yog ib tug tawm tsam khetos tshwm sim hauv ib lub pawg ntseeg thiab cov kwv tij thiab cov nkauj muam paub cais tus tawm tsam khetos ntawd tau sai nyob rau hauv ib lub sij hawm luv luv thiab hais tawm ib lub suab hais tias, “Tus tawm tsam khetos, tawm mus!” qhov no tsis yog yuav pab txo tau cov thawj coj thiab cov neeg ua hauj lwm txoj kev siv zog ntau heev lawm lod? Tsis yog koj tsim nyog zoo siab twj ywm lod? Koj yuav hais tias, “Kuv txhawj tias tsam kuv txwv tsis tau tus tawm tsam khetos no, tus dab no. Kuv kuj txhawj tias tsam qee cov kwv tij thiab cov nkauj muam yuav raug lawv coj mus yuam kev thiab rhuav tshem yam phem heev, thiab txhawj tias kuv theem ntawm sab ntsujplig me dhau tsis tuaj yeem los nthuav tus tawm tsam khetos lub ntsiab tseeb tawm, los txheeb xyuas tej teeb meem no kom tshab, thiab los daws qhov teeb meem no.” Tam sim no, tsis tas yuav txhawj lawm. Cov kwv tij thiab cov nkauj muam ib lo lus no xwb, yeej daws tau qhov teeb meem ntawd lawm, thiab cov thawj coj thiab cov neeg ua hauj lwm lub “nra” yeej raug muab tshem mus lawm. Qhov no mas zoo heev li! Koj tsim nyog ua Vajtswv tsaug; qhov no yog Vajtswv txoj hmoov hlub! Hom xwm txheej zoo li no tej zaum yeej yuav tshwm sim nyob rau hauv pawg ntseeg, vim tau muaj kev sib qhia ntau txog lub ntsiab lus ntawm kev nthuav cov tawm tsam khetos tawm lawm, thiab vim cov kwv tij thiab cov nkauj muam yeej tsis qis ntau dua cov thawj coj thiab cov neeg ua hauj lwm npaum li cas, yam li qhov uas koj xav ntawd. Nyob rau hauv txoj kev coj qhia ntawm Vajtswv cov lus, lawv kuj muaj peev xwm me ntsis los to taub qhov tseeb ntawm lawv tus kheej thiab daws tej teeb meem. Thaum lawv koom siab los pov ntawv thiab ntiab ib tug tawm tsam khetos tawm, qhov ntawd yog ib yam zoo, yog ib qho xwm txheej uas zoo! Cov thawj coj thiab cov neeg ua hauj lwm tsis tas yuav tu siab, poob siab, los sis xav tsis zoo txog qhov no. Tom qab muab tej yam uas tab kaum no, uas yog cov tawm tsam khetos ntsaig tawm mus lawm, txhua theem ntawm tes hauj lwm tom ntej yeej tseem yog ib qho kev sim uas hnyav rau cov thawj coj thiab cov neeg ua hauj lwm. Txhua yam hauj lwm uas lawv yuav tsum ua yeej ntsig txog lawv tej luag hauj lwm thiab tej teeb meem uas ntsig txog lawv lub peev xwm thiab lub peev xwm ua hauj lwm.

Tej Kev Qhia Tshwm uas Cov Thawj Coj Cuav Qhia Tawm Thaum Cov Tawm Tsam Khetos Tsim Tej Kev Cuam Tshuam

Peb tau sib qhia tas txog lub luag hauj lwm kaum peb ntawm cov thawj coj thiab cov neeg ua hauj lwm: “Tiv thaiv cov neeg Vajtswv xaiv tseg kom tsis txhob raug cov tawm tsam khetos cuam tshuam, coj mus yuam kev, tswj, thiab rhuav tshem yam phem heev, thiab pab kom lawv paub cais cov tawm tsam khetos thiab tso cov tawm tsam khetos tseg kiag hauv lub siab tuaj.” Txuas ntxiv no, peb yuav txheeb xyuas thiab nthuav tawm tej kev qhia tshwm ntawm ib hom tib neeg uas ua tsis tau cov thawj coj thiab cov neeg ua hauj lwm tej luag hauj lwm kom tiav—uas yog cov thawj coj cuav—los ntawm qhov muab lawv los piv nrog tes hauj lwm uas cov thawj coj thiab cov neeg ua hauj lwm yuav tsum tau ua kom tiav. Thaum ua tes hauj lwm no, muaj ntau yam hauj lwm uas cov thawj coj thiab cov neeg ua hauj lwm yuav tsum tau ua, uas cheem tsum kom lawv muaj lub peev xwm mus txog ib theem twg, cheem tsum lawv muab siab rau, ua tib zoo xyuas, mob siab, ris lub luag hauj lwm, ua tib zoo xav txog Vajtswv lub nra, muab lub siab hlub los tiv thaiv cov neeg Vajtswv xaiv tseg, thiab lwm yam ntxiv. Tsuas yog muaj tej yam no xwb lawv thiaj li yuav ua tau lawv tej luag hauj lwm thiab tej num kom tiav. Txawm li cas los xij, cov thawj coj cuav mas txawv kiag li ntawm qhov no; lawv txoj kev ua neeg tsis muaj tej yam no li. Tej zaum lawv muaj peev xwm txog rau ib theem twg, muaj lub peev xwm nkag siab qhov tseeb thiab paub cais cov tawm tsam khetos, los sis tej zaum lawv lub peev xwm qis dua me ntsis, uas yam tsawg kawg tuaj yeem paub cais tau qee cov tawm tsam khetos uas pom tau meej uas ua ntau yam kev ua phem txawm hais tias lawv paub cais tsis tau cov tawm tsam khetos tus yam ntxwv xeeb txawm lub ntsiab tseeb kom tshab plaws los xij; los sis, lawv lub peev xwm tej zaum yuav tsis zoo kiag li es lawv thiaj li cais tsis tau los sis pom tsis tshab txog qhov txawv ntawm cov uas muaj cov tawm tsam khetos lub ntsiab tseeb thiab cov uas muaj cov tawm tsam khetos tus moj yam. Txawm li cas los xij, cov thawj coj cuav qhia tawm ob qho kev qhia tshwm no: Ib qho yog lawv tsis ua tes hauj lwm tiag tiag; lwm qhov yog lawv tsuas ua tej hauj lwm dav dav uas pom sab nraud xwb, yam uas daws tsis tau tej teeb meem tiag tiag kiag li los sis ua tsis tau tes hauj lwm tiag tiag li. Nyob rau hauv tes hauj lwm uas ntsig txog lub luag hauj lwm kaum peb, ob qho kev qhia tshwm uas yog tus yam ntxwv ntawm cov thawj coj cuav no yeej tseem pom tau meej heev. Txuas ntxiv no, peb yuav sib qhia txog qhov tias lawv muaj tej kev qhia tshwm ntxaws ntxaws dab tsi.

I. Tsis Kam Nthuav Tawm thiab Daws Cov Tawm Tsam Khetos Vim Ntshai Tsam Ua Rau Lawv Chim

Thaum cov tawm tsam khetos cuam tshuam, coj mus yuam kev, tswj, los sis rhuav tshem cov neeg Vajtswv xaiv tseg yam phem heev ntawd, thawj qhov kev qhia tshwm ntawm cov thawj coj cuav yog qhov tsis ua dab tsi li. Qhov tsis ua dab tsi li ntawd txhais li cas? Qhov ntawd txhais hais tias tsis ua tes hauj lwm tiag tiag. Yeej muaj laj thawj nyob rau tom qab ntawm qhov tsis ua tes hauj lwm tiag tiag, tseem ceeb mas yog qhov ntshai tsam ua rau tib neeg chim thiab tsis muaj cuab kav tuav rawv tej hauv paus ntsiab lus. Tom qab dhau los ua cov thawj coj lawm, cov tib neeg no pib khav txog lawv lub hwj chim, xav hais tias, “Tam sim no kuv muaj lub meej mom lawm, thiab kuv yog ib tug nom tswv nyob hauv pawg ntseeg. Kuv yuav tsum saib xyuas cov kwv tij thiab cov nkauj muam tej zaub mov, khaub ncaws, chaw nyob, thiab kev mus los; kuv yuav tsum paub cais seb yam uas cov kwv tij thiab cov nkauj muam hais ntawd puas mus raws li qhov tseeb thiab puas haum rau cov neeg dawb huv tus cwj pwm coj zoo. Kuv yuav tsum saib seb lawv puas ua siab dawb paug rau Vajtswv, seb lawv lub neej ntawm sab ntsujplig puas zoo li ib txwm muaj, seb lawv puas thov Vajtswv thaum sawv ntxov thiab thaum tsaus ntuj, seb lawv tej kev sib txoos ua ke uas ib txwm muaj ntawd puas zoo li ib txwm—kuv yuav tsum saib xyuas txhua yam no.” Cov thawj coj cuav tsuas txhawj xeeb txog tej teeb meem no xwb. Yog hais txog tej cai sab nraud mas, zoo li lawv ua cov thawj coj thiab cov neeg ua hauj lwm tej luag hauj lwm kom tiav lawm, tiam sis thaum muaj tej teeb meem tseem ceeb ntawm lub hauv paus ntsiab lus tshwm tuaj, los sis txawm yog thaum cov tawm tsam khetos tshwm sim, cov thawj coj cuav nkaum rau hauv qhov tsaus ntuj yam tsis hais ib los li, lawv nyob twj ywm thiab ua txuj li lawv tsis paub thiab tsis pom dab tsi li. Txawm cov tawm tsam khetos yuav tshaj tawm tej lus yuam kev dab tsi los xij, lawv ua txuj tsis hnov. Thaum cov tawm tsam khetos cuam tshuam, coj mus yuam kev, thiab tswj cov neeg Vajtswv xaiv tseg, lawv kuj ua txuj li lawv tsis paub, ua zoo li tias tag nrho cov xov xwm no ploj mus lawm thaum tuaj txog ntawm lawv. Txawm yog cov tawm tsam khetos uas cov kwv tij thiab cov nkauj muam dog dig los twb tuaj yeem paub cais ntawd los lawv ua txuj tias tsis paub cais, hais tias, “Kuv pom tsis tshab txog lawv. Yog kuv ntiab neeg tawm yuam kev lawm ne yuav ua li cas? Yog kuv to taub cov kwv tij thiab cov nkauj muam yuam kev ne yuav ua li cas? Tsis tas li ntawd, Vajtswv lub tsev tseem cheem tsum neeg los ua dej num txhawb!” Siv ntau yam lus hais ub hais no los khiav kom dhau cov thawj coj thiab cov neeg ua hauj lwm tej luag hauj lwm, lawv tsis daws cov tawm tsam khetos thiab tsis tiv thaiv cov kwv tij thiab cov nkauj muam kom tsis txhob raug cov tawm tsam khetos ua phem rau. Haj tseem muaj ib txhia thawj coj cuav hais tias: “Yog kuv pheej nthuav cov tawm tsam khetos tawm, yog lawv ntxias cov kwv tij thiab cov nkauj muam los tawm tsam kuv no yuav ua li cas? Ces yuav tsis muaj leej twg pov ntawv rau kuv nyob rau qhov kev xaiv tsa lwm zaus lawm, thiab kuv yuav ua tsis tau ib tug thawj coj ntxiv lawm. Kuv lub zog tsis loj npaum li lawv li!” Txhawm rau tiv thaiv lawv lub meej mom thiab lawv tus kheej txoj kev nyab xeeb, cov thawj coj cuav tsis ua lawv lub luag hauj lwm los tiv thaiv cov neeg Vajtswv xaiv tseg kom tiav kiag li, thiab lawv kuj tsis txwv cov tawm tsam khetos kom tsis txhob ua phem rau cov kwv tij thiab cov nkauj muam kom ntau tshaj plaws li qhov ua tau li thiab. Lawv ua ib tug tib neeg uas ua kom lwm tus zoo siab thiab ua tus vaub kib uas nkaum rau hauv nws lub khauj khaum, thiab nyob rau tib lub sij hawm ntawd lawv kuj yog ib tug tib neeg uas twm xeeb thiab ntxim ntxub thiab. Lawv tsis tiv thaiv cov kwv tij thiab cov nkauj muam tiam sis lawv xav tau zoo heev txog qhov yuav tiv thaiv lawv tus kheej li cas. Thaum hais txog qhov daws cov tawm tsam khetos los sis ntuas thiab nthuav cov tawm tsam khetos tawm kom cov kwv tij thiab cov nkauj muam thiaj li muaj kev paub cais, lawv ntshai yuav tuag li, txhawj tsam poob lawv lub meej mom, thiab xav tias qhov ua li ntawd yuav tsis muaj txiaj ntsim rau lawv tus kheej. Lawv tsis quav ntsej txog cov neeg Vajtswv xaiv tseg tej txiaj ntsim kiag li, tsuas xav txog lawv tus kheej tej txiaj ntsim, lub koob npe, lawv tus kheej txoj kev nyab xeeb, thiab lawv tsev neeg txoj kev nyab xeeb xwb, ntshai tsam qhov tsis xyuam xim ua rau cov tawm tsam khetos chim ntawd yuav ua rau cov tawm tsam khetos ntawd tig hlo los ua tsiv ua nyaum thiab ua pauj rau lawv. Hom thawj coj cuav zoo li no qhov tseeb tiag yeej muaj peev xwm me ntsis. Rau lawv lub peev xwm thiab kev paub kev pom, lawv yeej paub zoo tias leej twg yog cov tawm tsam khetos, tiam sis qhov teeb meem yog nyob ntawm lawv txoj kev ntshai tsam ua rau cov tawm tsam khetos chim. Thaum pom cov tawm tsam khetos tus moj yam uas lim hiam, lawv thiaj li tsis kam ua rau cov tawm tsam khetos ntawd chim. Txawm li cas los xij, txhawm rau tiv thaiv lawv tus kheej, lawv yeej tsis khuv xim qhov muab Vajtswv lub tsev thiab cov neeg Vajtswv xaiv tseg tej txiaj ntsim tso tseg; lawv saib ntsoov yam tsis quav ntsej thaum muab cov kwv tij thiab cov nkauj muam cob rau cov tawm tsam khetos, cia rau cov tawm tsam khetos coj mus yuam kev, tswj, thiab rhuav tshem yam phem heev raws li lub siab nyiam. Cov thawj coj cuav tsuas nyob nraum nraub qaum hais qee zaus rau qee cov tib neeg uas tsis txawj dag thiab muaj kev ua neeg zoo thiab tsis muaj kev phom sij rau lawv hais tias, “Tus neeg ntawd yog ib tug tawm tsam khetos. Lawv coj lwm tus mus yuam kev. Lawv tsis yog ib tug neeg zoo.” Txawm li cas los xij, nyob rau ntawm txhua tus kwv tij thiab nkauj muam xub ntiag thiab nyob rau ntawm cov tawm tsam khetos xub ntiag, lawv yeej tsis kam hais ib lo “tsis” rau cov tawm tsam khetos li. Lawv yeej tsis muaj lub siab tawv los nthuav tej kev ua phem los sis cov tawm tsam khetos lub ntsiab tseeb tawm li. Txawm yog thaum sib txoos ua ke, thaum cov tawm tsam khetos txeeb hais lus ib leeg tau ib los sis ob teev, lawv kuj tsis kam hais ib los li. Yog cov tawm tsam khetos npuaj rooj thiab ua qhov muag dub txig ntsia ntsoov rau tib neeg, lawv haj tseem twb tsis kam ua pa hlob li. Nyob rau hauv tus ciaj ciam ntawm lawv tes hauj lwm, cov uas theem ntawm sab ntsujplig me, cov uas muaj kev ua neeg siab yau, thiab cov uas xav caum qhov tseeb tiam sis tseem tsis tau muaj kev paub cais ntawd xav tias ntxhov siab vim tsis muaj cov thawj coj los sis cov neeg ua hauj lwm uas tuaj yeem sawv los nthuav tawm thiab paub cais cov tawm tsam khetos tej kev ua phem. Lawv saib ntsoov cov tawm tsam khetos siv hwj chim quab yuam lwm tus hauv pawg ntseeg, ua raws siab nyiam thiab cuam tshuam lub neej hauv pawg ntseeg, yam yeej ua tsis tau dab tsi rau lawv li. Nyob rau lub sij hawm ntawd, cov thawj coj cuav tsis ua tes hauj lwm tiag tiag kiag li thiab tsis daws tej teeb meem tiag tiag rau cov neeg Vajtswv xaiv tseg li. Thaum cov kwv tij thiab cov nkauj muam poob rau hauv tej kev nyuaj, cov thawj coj cuav tsis yog tsuas tsis nthuav tawm thiab txwv cov tawm tsam khetos tej kev ua phem xwb, tiam sis txawm yog ib lo lus ncaj ncees xwb los lawv twb tsis kam hais li. Txawm hais tias lawv lub siab txawj xav yuav hnov me ntsis thiab cem lawv me ntsis, thiab lawv los ob peb tee kua muag thaum thov Vajtswv nyob tom qab nraub qaum los xij, hnub tom qab thaum sib txoos ua ke, thaum lawv pom cov tawm tsam khetos hais ub hais no txog Vajtswv lub tsev tes hauj lwm yam tsis ris lub luag hauj lwm thiab lam tau lam txiav txim, txawm yog txiav txim rau Vajtswv yam tsis ncaj qha thiab tshaj tawm tej kev xav phem txog Vajtswv los, lawv yeej tsis ua dab tsi rau qhov ntawd txawm paub tias qhov ntawd tsis yog lawm. Txawm yog thaum lawv pom cov tawm tsam khetos nkim tej khoom fij los, lawv coj tus cwj pwm uas tsis quav ntsej txog. Lawv tsis nthuav tawm los sis txwv cov tawm tsam khetos kiag li, thiab lawv twb tsis hnov tias raug cem me ntsis hauv lawv lub siab li—qhov no yog qhov uas tsis ris lub luag hauj lwm dhau lawm! Txhua tus uas muaj kev paub ntawm lub siab txawj xav me ntsis, txawm lawv xav tias lawv lub zog tsis txaus los, lawv yuav tsum koom tes nrog cov kwv tij thiab cov nkauj muam uas muaj theem ntawm sab ntsujplig thiab kev paub cais me ntsis los sib qhia txog qhov no thiab sib tham seb yuav daws cov tawm tsam khetos li cas. Tiam sis cov thawj coj cuav tsis muaj txoj kev txiav txim siab no thiab lub siab tawv zoo li no, thiab tshaj qhov ntawd, lawv tsis muaj lub siab ris lub luag hauj lwm zoo li no. Lawv haj tseem qhia rau cov kwv tij thiab cov nkauj muam hais tias, “Cov tawm tsam khetos lim hiam dhau lawm. Yog peb ua rau lawv chim, lawv yuav qhia peb tawm rau tsoom fwv, ces peb txhua tus yeej yuav ntseeg tsis tau Vajtswv lawm. Cov tawm tsam khetos paub cov chaw uas pawg ntseeg sib txoos ua ke, yog li ntawd peb yuav ua tsis tau rau lawv chim.” Qhov no yeej yog lub ntsej muag phem ntawm qhov tso riam phom tseg thiab zwm rau cov tawm tsam khetos, ntawm qhov yeem swb rau Ntxwgnyoog thiab thov kev hlub tshua ntawm nws.

Dhau ntawm qhov tiv thaiv lawv tus kheej lawm, cov thawj coj cuav tsis ua tej hauj lwm uas cov thawj coj thiab cov neeg ua hauj lwm tsim nyog ua kiag li, xws li qhov tiv thaiv cov neeg Vajtswv xaiv tseg thiab pab kom lawv muaj kev paub cais txog cov tawm tsam khetos, thiab lawv yeej tsis ua lawv tej luag hauj lwm kom tiav kiag li, tiam sis lawv pheej tseem xav kom cov kwv tij thiab cov nkauj muam xaiv lawv ua cov thawj coj. Tom qab lawv ua tas ib ntu lawm, lawv xav kom raug xaiv rau lwm ntu ntxiv. Qhov no tsis yog tsis paub txaj muag thiab cawm tsis tau li lawm lod? Hom tib neeg zoo li no puas tsim nyog ua cov thawj coj? (Tsis tsim nyog.) Vajtswv lub tsev muab pab yaj tso rau koj, tiam sis thaum cov tsiaj qus los, thaum lub sij hawm tseem ceeb, koj tsuas tiv thaiv koj tus kheej xwb thiab koj muab pab yaj cob rau cov tsiaj qus. Koj ua ib yam li tus vaub kib uas nkaum rau hauv nws lub khauj khaum, nrhiav ib qho chaw nkaum, ib qho chaw nyab xeeb, los rau koj tus kheej nkaum. Qhov tshwm sim los yog, pab yaj raug kev puas tsuaj—qee tus yaj raug tom tuag, thiab qee tus ploj lawm. Yog tias ib tug thawj coj pom cov tawm tsam khetos lam tau lam cuam tshuam pawg ntseeg tes hauj lwm, coj cov neeg Vajtswv xaiv tseg mus yuam kev thiab tswj cov neeg Vajtswv xaiv tseg, tiam sis lawv coj tus cwj pwm uas tsis quav ntsej txog txhawm rau tiv thaiv lawv tus kheej lub ntsej muag, lub meej mom, thiab txoj kev ua neej nyob, thiab txhawm rau pov hwm lawv tus kheej txoj kev nyab xeeb. Qhov tshwm sim los yog, cov neeg Vajtswv xaiv tseg feem coob raug coj mus yuam kev, xav tias tsis muaj kev pab, thiab dhau los xav tsis zoo thiab qaug zog; qee tus haj tseem raug cov tawm tsam khetos ntes mus, thiab qee tus tsis kam ua lawv tej dej num lawm. Tiam sis tus thawj coj no tsis hnov dab tsi kiag li thaum lawv pom tej kev cuam tshuam uas cov tawm tsam khetos ua; lawv lub siab txawj xav tsis hnov tias raug cem kiag li. Hom thawj coj los sis neeg ua hauj lwm zoo li no puas muaj txoj kev ua neeg li? Txhawm rau ua kom tau raws li lawv lub hom phiaj uas tiv thaiv lawv tus kheej, lawv yeej tsis yig rau qhov muab cov neeg Vajtswv xaiv tseg cob rau cov tawm tsam khetos thiab cia rau cov tawm tsam khetos coj mus yuam kev, rhuav tshem yam phem heev, thiab ua phem ua qias rau lawv. Qhov no yog hom thawj coj twg? (Yog ib tug thawj coj cuav.) Qhov no puas yog Ntxwgnyoog ib tug neeg pab ua phem? Lawv sawv rau sab twg tiag? Txawm hais tias muab lawv teem tias yog ib tug thawj coj cuav, tiam sis lub ntsiab tseeb ntawm teeb meem no tej zaum yuav hnyav dua qhov uas yog ib tug thawj coj cuav. Qhov ntawd muaj ib lub ntsiab xeeb txawm ntawm qhov ntxeev siab muab cov kwv tij thiab cov nkauj muam muag, zoo ib yam li cov tib neeg uas raug ntes thiab raug tsim txom thiab dhau los ua cov Yudas, muab cov kwv tij thiab cov nkauj muam cob rau tus zaj loj liab ploog kom raug rhuav tshem yam phem heev. Yog li ntawd, lub ntsiab xeeb txawm ntawm qhov ib tug thawj coj cuav muab cov neeg Vajtswv xaiv tseg cob rau cov tawm tsam khetos ntawd yog dab tsi? Cov thawj coj cuav zoo li no puas yog qias dhau lawm? Yog muab piv rau cov tawm tsam khetos, cov thawj coj cuav no zoo li tsis muaj ib qho kev npaj siab los tawm tsam qhov tseeb nyob rau sab nraud. Zoo li lawv sib qhia tau qee qhov tseeb, muaj lub peev xwm nkag siab me ntsis, thiab tuaj yeem ua raws li qhov tseeb me ntsis, thiab qee tus ntawm lawv haj tseem tuaj yeem tiv taus kev txom nyem thiab them tus nqi thiab. Tiam sis, thaum Vajtswv lub tsev muab Vajtswv pab yaj tso rau lawv, thiab thaum cov tib neeg phem thiab cov dab phem tshwm los, lawv tsis muab lawv lub neej txoj sia los pauv los ua txhua yam uas lawv ua tau los tiv thaiv cov neeg Vajtswv xaiv tseg. Tiam sis, lawv ua txhua yam uas lawv ua tau los tiv thaiv lawv tus kheej, muab cov kwv tij thiab cov nkauj muam thawb tawm mus ua ib daim phiaj thaiv txhawm rau pov hwm lawv tus kheej txoj kev nyab xeeb thiab tej txiaj ntsim. Cov tib neeg no twm xeeb thiab ntxim ntxub npaum li cas li! Saib sab nraud mas, lawv txoj kev ua neeg zoo li tsis muaj teeb meem loj dab tsi. Lawv muaj lub siab hlub rau tib neeg, lawv tuaj yeem pab lwm tus, lawv txaus siab them tus nqi thiab tuaj yeem tiv txhua yam kev txom nyem thaum ua lawv tej dej num. Txawm li cas los xij, thaum cov tawm tsam khetos tshwm los, lawv ua ib yam uas xav tsis txog thiab to taub tsis tau li: Txawm cov tawm tsam khetos yuav coj cov neeg Vajtswv xaiv tseg mus yuam kev los sis cuam tshuam lub neej hauv pawg ntseeg li cas los xij, lawv tsis ua dab tsi li, thiab txawm yuav muaj neeg coob npaum li cas raug cov tawm tsam khetos ntaus, cais tawm, los sis ua phem rau los xij, lawv yeej tsis quav ntsej txog li. Qhov no yog, cov thawj coj no tab tom muab cov neeg Vajtswv xaiv tseg cob rau cov tawm tsam khetos tswj yam tag nrho, cia rau cov tawm tsam khetos coj lawv mus yuam kev thiab rhuav tshem lawv yam phem heev raws li siab nyiam, hos cov thawj coj no lawv tus kheej tsis ua hauj lwm dab tsi kiag li. Thaum muab cov tawm tsam khetos tshem tawm mus thiab daws qhov teeb meem tas lawm, cov thawj coj no thiaj li tawm los sib qhia txog lawv txoj kev paub lawv tus kheej, tias lawv qaug zog, tais caus, ntshai, twm xeeb, thiab txawj dag, thiab tias lawv tsis muaj kev ua siab ncaj, tsis tiv thaiv cov neeg Vajtswv xaiv tseg kom zoo, ua rau Vajtswv thiab cov kwv tij thiab cov nkauj muam tag kev cia siab lawm. Zoo li lawv tu siab heev; zoo li lawv tau tig lawv tus kheej rov qab thiab tuaj yeem hloov dua siab tshiab. Txawm li cas los xij, thaum cov tawm tsam khetos tshwm sim los dua, lawv rov muab cov kwv tij thiab cov nkauj muam thawb mus rau cov tawm tsam khetos ib yam li lawv tau ua rau zaum tas los, thiab nrhiav ib qho chaw nyab xeeb rau lawv tus kheej nkaum. Txawm hais tias lawv tus kheej tsis raug cov tawm tsam khetos coj mus yuam kev los sis ua phem rau los xij, lawv tau tso lawv tej luag hauj lwm tseg thiab lawv tau ntxeev siab rau Vajtswv cov lus txib, thiab lawv tus cwj pwm uas coj rau lawv tes dej num, lawv tus cwj pwm uas coj rau cov neeg Vajtswv xaiv tseg, thiab lawv lub ntsej muag tiag tiag tau raug muab nthuav tawm los tag nrho lawm. Txhua zaus uas cov tawm tsam khetos tshwm los, lawv tsis xaiv sawv rau ntawm Vajtswv sab thiab ua tsov rog nrog cov tawm tsam khetos kom txog qhov kawg, thiab lawv tsis hais ib lo lus uas tsim nyog hais los sis ua ib qho hauj lwm uas tsim nyog ua los tiv thaiv cov neeg Vajtswv xaiv tseg kom lawv lub siab txawj xav thiaj li kaj, thiab haj yam tsis ua cov thawj coj tej luag hauj lwm kom tiav los ua kom tau raws li Vajtswv tej kev npaj siab. Txhua yam kev xaiv thiab kev ua ntawm cov thawj coj cuav no puav leej yog txhawm rau tiv thaiv lawv tus kheej lub meej mom kom tsis txhob raug puas tsuaj xwb. Lawv yeej tsis quav ntsej txog txoj kev ciaj los sis tuag ntawm cov neeg Vajtswv xaiv tseg. Rau lawv mas txhua yam yeej tsis yog teeb meem tsuav lawv tus kheej lub koob npe, tej txiaj ntsim, thiab lub meej mom tsis raug kev puas tsuaj xwb. Leej twg nthuav cov tawm tsam khetos tawm, leej twg ntiab cov tawm tsam khetos tawm, yuav daws cov tawm tsam khetos li cas—zoo li tias tej no tsis muaj feem xyuam nrog lawv; lawv tsis txhawj xeeb los sis tsis quav ntsej li. Thaum cov tawm tsam khetos cuam tshuam lub neej hauv pawg ntseeg, ua phem rau cov neeg Vajtswv xaiv tseg, thiab iab liam thiab tsim txom cov uas caum qhov tseeb, lawv tsis quav ntsej txog. Tej yam no tsis tseem ceeb rau lawv li; txhua yam yeej tsis yog teeb meem rau lawv, tsuav yog lawv lub meej mom tsis raug kev phom sij xwb. Koj xav li cas txog hom tib neeg no? Feem ntau, lawv txoj kev ua neeg zoo li tsis phem, thiab zoo li lawv tuaj yeem ua tau qee tes hauj lwm. Thaum lawv raug kev ntuas, zoo li lawv tuaj yeem paub lawv tus kheej thiab muaj lub siab tu siab me ntsis. Txawm li cas los xij, thaum lawv ntsib cov tawm tsam khetos cuam tshuam pawg ntseeg, lawv poob lawv qhov laj thawj mus tag nrho, lawv tsis paub txog kev ncaj ncees, thiab lawv haj tseem twb tsis muaj lub siab tawv los ua tsov rog nrog cov tawm tsam khetos thiab. Thaum lawv pom cov dab thiab cov Ntxwgnyoog, lawv yeem swb; thaum lawv pom cov tib neeg phem tsim kev cuam tshuam, lawv zam cov neeg ntawd. Yog saib los ntawm lawv tus cwj pwm uas coj rau cov tib neeg phem thiab cov tawm tsam khetos, lawv tab tom taug txoj kev twg tiag? Qhov no puas qhia tau meej heev txog lawv qhov teeb meem? (Qhia tau.) Hom tib neeg no tej zaum yuav tsis zoo li ib tug tawm tsam khetos nyob rau sab nraud, tiam sis tus cwj pwm uas lawv qhia tawm rau cov tib neeg phem thiab cov tawm tsam khetos tej kev ua thiab kev coj ntawd yeej yog cov tawm tsam khetos tus moj yam ntag, thiab lub ntsiab xeeb txawm ntawm qhov no mas phem heev. Qhov ntawd tuaj yeem hais tau tias yog lub ntsiab xeeb txawm ntawm qhov tso lawv tej luag hauj lwm tseg thiab ntxeev siab muag cov neeg Vajtswv xaiv tseg. Lub ntsiab xeeb txawm no tsis hnyav heev lod? Lawv puas muaj ib qho kev ua siab ncaj twg rau pawg ntseeg tes hauj lwm thiab Vajtswv cov lus txib? Lawv puas muaj ib qho cim me me ntawm tus cwj pwm uas ris luag hauj lwm li? Txawm yog thaum twg uas muab ib lo lus txib tso rau lawv los sis muab ib teg hauj lwm tso rau lawv los xij, lawv lub hauv paus ntsiab lus yog kom zam kev ua rau tib neeg chim thiab txhawm rau tiv thaiv lawv tus kheej. Qhov no yog lawv tus qauv uas siab tshaj plaws rau txoj kev coj lawv tus kheej thiab yog lawv lub hauv paus ntsiab lus rau txoj kev ua tej yam, thiab qhov no yeej yuav tsis hloov li. Cia peb xub tsis hais txog lo lus nug ntawm qhov tias hom tib neeg no puas tuaj yeem raug cawm dim—tsuas yog saib los ntawm tes hauj lwm uas daws cov tawm tsam khetos no xwb, cov thawj coj cuav no puas tsim nyog lees txais Vajtswv cov lus txib? Lawv puas tsim nyog ua cov thawj coj thiab cov neeg ua hauj lwm? (Tsis tsim nyog.) Cov tib neeg no tsis tsim nyog ua cov thawj coj thiab cov neeg ua hauj lwm. Qhov no yog vim lawv tsis muaj lub siab txawj xav thiab qhov laj thawj, thiab lawv tsis tsim nyog ris pawg ntseeg tes hauj lwm ua thawj coj; lawv tsis txwv cov tawm tsam khetos kom tsis txhob ua phem rau cov neeg Vajtswv xaiv tseg yam ntau tshaj plaws li qhov ua tau, thiab lawv kuj tsis siv zog ua kom tiav lub luag hauj lwm no los sis ua tes hauj lwm no kom zoo txhawm rau tiv thaiv cov neeg Vajtswv xaiv tseg—qhov ntawd tsis yog tias lawv lub peev xwm tsis zoo thiab ua tsis tau qhov no, tiam sis yog qhov tias lawv yeej tsis ua kiag li. Yog li ntawd, yog saib los ntawm qhov no, cov tib neeg uas ntshai tsam ua rau lwm tus chim ntawd yeej tsis tsim nyog ua cov thawj coj thiab cov neeg ua hauj lwm kiag li. Puas yog muaj cov thawj coj thiab cov neeg ua hauj lwm zoo li no coob heev? (Yog.) Thaum tsis tau muaj dab tsi tshwm sim mas, lawv khiav nquag dua lwm tus; lawv khwv txog theem uas tsis ntsis plaub hau los sis tsis ntxuav muag li, zoo li ncav cuag theem uas ua neeg ntawm sab ntsujplig heev. Tiam sis thaum cov tawm tsam khetos tshwm tuaj, lawv ploj ntais lawm; lawv nrhiav txhua yam lus hais ub hais no los khiav kom dhau, thiab yeej tsis daws cov tawm tsam khetos kiag li. Lub ntsiab xeeb txawm ntawm txoj kev coj no yog dab tsi? Qhov ntawd yog qhov tsis muaj kev ua siab ncaj nyob rau hauv txoj kev ua lawv tes dej num thiab qhov uas ntseeg siab tsis tau. Thaum lub sij hawm tseem ceeb, lawv haj tseem tuaj yeem ntxeev siab rau Vajtswv thiab sawv rau ntawm Ntxwgnyoog sab, ua ntsej lag muag dig thaum pawg ntseeg tes hauj lwm raug cov tib neeg phem thiab cov tawm tsam khetos cuam tshuam thiab rhuav tshem. Lawv twb tsis muaj txiaj ntsig npaum li ib tug dev zov tsev thiab. Qhov no yog ib hom thawj coj cuav.

II. Tsis Muaj Peev Xwm Paub Cais Cov Tawm Tsam Khetos

Tseem muaj lwm hom thawj coj cuav thiab: Thaum cov tawm tsam khetos tshwm tuaj, lawv tsis muaj peev xwm paub cais seb cov tawm tsam khetos ntawd muaj tus moj yam thiab lub ntsiab tseeb dab tsi, qhia tshwm thiab nthuav tawm dab tsi, hom kev cuam tshuam twg uas cov tawm tsam khetos ntawd tsim rau cov kwv tij thiab cov nkauj muam, cov lus hais, kev xav, kev xam pom, thiab kev coj twg uas tuaj yeem coj cov kwv tij thiab cov nkauj muam mus yuam kev thiab cuam tshuam cov kwv tij thiab cov nkauj muam, cov tswv yim phem uas cov tawm tsam khetos siv los tswj tib neeg, nyob rau hauv tej xwm txheej twg uas cov kwv tij thiab cov nkauj muam tuaj yeem raug cov tawm tsam khetos coj mus yuam kev, tswj, thiab rhuav tshem yam phem heev, thiab lwm yam ntxiv—tej no puav leej yog tej teeb meem uas cov thawj coj cuav tsis muaj peev xwm paub cais. Cov tawm tsam khetos coj cov kwv tij thiab cov nkauj muam mus yuam kev; lawv thiab cov kwv tij nkauj muam uas raug coj mus yuam kev ntawd tau faib tawm hauv pawg ntseeg mus ua tej kev sib txoos ua ke ntawm lawv tus kheej thiab tsim tej nceeg rau lawv tus kheej. Lawv tsis lees txais txoj kev coj ntawm Vajtswv lub tsev, tsis lees txais tej kev npaj tes hauj lwm ntawm Vajtswv lub tsev, thiab tsis zwm rau ib qho kev npaj los sis kev taw qhia twg los ntawm Vajtswv lub tsev, haj yam tsis zwm rau ib qho ntawm Vajtswv tej kev cheem tsum rau tib neeg li. Tiam sis txhua yam kev ua zoo li no uas cov tawm tsam khetos ua los coj cov neeg Vajtswv xaiv tseg mus yuam kev ntawd, cov thawj coj cuav yeej tsis saib tias yog teeb meem li. Lawv pom tsis tau tias muaj dab tsi tsis yog nyob rau hauv tej xwm txheej no, haj yam pom tsis tau tias cov tawm tsam khetos tej lus hais, kev ua, kev xav, thiab kev xam pom cuam tshuam, coj mus yuam kev, thiab ua phem rau tib neeg li cas. Lawv pom tsis tau tej kev cuam tshuam uas tsis zoo no thiab tsis paub tias yuav paub cais tej ntawd li cas. Qee cov kwv tij thiab cov nkauj muam dog dig, vim tau pom thiab tau hnov ntau lawm, twb muaj kev paub cais, kev hnov, thiab kev paub txog me ntsis, tiam sis cov thawj coj cuav yeej pom tsis tshab txog tej no. Txawm yog thaum muaj neeg taw qhia tias tus no los sis tus tod tab tom ua qee yam los coj tib neeg mus yuam kev thiab tsim pab tsim pawg nyob rau tom qab nraub qaum los, cov thawj coj cuav tseem txwv, hais tias, “Peb tshaj tawm tej lus no tsis tau. Tsis txhob ua kom muaj kev cuam tshuam. Lawv muaj kev sib raug zoo—qhov uas lawv sib qhia ua ke ntawd muaj teeb meem dab tsi? Peb yuav tsum muab kev ywj pheej rau tib neeg!” Lawv tseem pom tsis tshab txog qhov no. Yog lawv pom tsis tshab txog tej xwm txheej, lawv yeej tuaj yeem soj ntsuam thiab nrhiav, thiab nrog cov kwv tij thiab cov nkauj muam uas to taub qhov tseeb thiab muaj kev paub cais me ntsis sib qhia. Txawm li cas los xij, cov thawj coj cuav khav tias lawv tus kheej coj ncaj ncees kawg. Thaum cov kwv tij thiab cov nkauj muam ceeb toom lawv, lawv tsis lees txais, xav hais tias, “Koj yog tus thawj coj los sis kuv yog? Vim kuv raug xaiv los ua tus thawj coj, kuv yeej yuav tsum to taub qhov tseeb dua tus neeg dog dig. Yog tsis li ntawd, vim li cas thiaj li xaiv kuv es tsis xaiv lwm tus? Qhov no ua pov thawj tias kuv zoo dua nej txhua tus. Txawm kuv hnub nyoog loj dua los sis me dua nej los xij, kuv lub peev xwm yeej zoo dua nej li. Thaum ib tug tawm tsam khetos tshwm los, kuv yuav tsum yog tus uas txheeb tau nws ua ntej. Yog nej txheeb tau nws ua ntej, kuv yeej yuav tsis pom zoo nrog nej qhov kev ntsuas. Tos kom txog thaum kuv txheeb tau nws tso mam li ua ib yam dab tsi!” Qhov tshwm sim los yog, tus tawm tsam khetos tshaj tawm ntau yam lus qhia yuam kev thiab lus cuav nyob hauv cov kwv tij thiab cov nkauj muam, tab meeg tawm tsam Vajtswv lub tsev tej kev npaj tes hauj lwm, thiab tab meeg qw tawm tsam thiab tawm tsam rau pawg ntseeg, Vajtswv lub tsev, thiab tej kev npaj tes hauj lwm los ntawm tus Nyob Saud. Tus tawm tsam khetos haj tseem tab meeg rub cov kwv tij thiab cov nkauj muam los rau nws sab los koom tej kev sib txoos ua ke ntiag tug, es kom tsuas mloog nws qhuab qhia thiab lees txais lawv txoj kev coj xwb. Txawm yog cov uas lub peev xwm tsis zoo tshaj plaws hauv pawg ntseeg los yeej pom tau tias tus neeg no yog ib tug tawm tsam khetos. Tsuas yog nyob rau hauv hom xwm txheej zoo li no xwb cov thawj coj cuav thiaj li lees tias: “Au, lawv yog ib tug tawm tsam khetos! Ua li cas kuv thiaj li nyuam qhuav paub txog qhov no? Tsis yog, qhov tseeb tiag kuv twb paub ua ntej lawm, tiam sis kuv tsis tau hais dab tsi vim kuv ntshai tias cov kwv tij thiab cov nkauj muam theem ntawm sab ntsujplig tseem me thiab tsis muaj kev paub cais.” Lawv haj tseem tsim ib lo lus dag uas zoo mloog heev rau lawv tus kheej thiab. Pom tau meej tias yog vim lawv tus kheej loog, ruam, lub peev xwm tsis zoo, thiab tsis tuaj yeem paub cais tus tawm tsam khetos, lawv thiaj li cia cov kwv tij thiab cov nkauj muam raug kev txom nyem ntau npaum no ntawm tej kev puas tsuaj uas los ntawm tus tawm tsam khetos los. Lawv tsis yog xav tias tim lawv tus kheej, lawv tseem tig los cem cov kwv tij thiab cov nkauj muam tias hais lus tsis muaj qab hau, tshaj tawm tej lus xaiv, to taub tib neeg yuam kev, thiab lwm yam ntxiv. Nov yog hom thawj coj twg? Lawv tsis yog ruam feeb tsis meej tiag tiag lod? Hom thawj coj zoo li no yeej tsis muaj peev xwm ris tau pawg ntseeg tes hauj lwm kiag li. Nyob rau sab nraud mas, lawv nquag noj thiab haus Vajtswv cov lus, thov Vajtswv, koom kev sib txoos ua ke, mloog lus qhia, sau cov ntawv teev tseg ntawm kev pe hawm ntawm sab ntsujplig, thiab sau cov ntawv lus tim khawv, zoo li siv zog ntau heev, tiam sis thaum muaj tej teeb meem tshwm tuaj, lawv daws tsis tau, nrhiav tsis tau qhov tseeb raws li Vajtswv cov lus, thiab yeej tsis paub cais cov tawm tsam khetos raws li Vajtswv cov lus li. Feem ntau cov thawj coj cuav tuaj yeem qhuab qhia tau ib los sis ob teev, thiab thaum sib qhia txog Vajtswv cov lus thiab lawv tus kheej tej kev ntsib kev pom ntawd mas lawv tuaj yeem hais tau tsis tu ncua yam tsis paub xaus li, tiam sis thaum cov tawm tsam khetos tshaj tawm tej lus qhuab qhia yuam kev thiab lus cuav, coj cov kwv tij thiab cov nkauj muam mus yuam kev thiab cuam tshuam pawg ntseeg tes hauj lwm, lawv tsis muaj lus hais thiab tsis ua ib qho hauj lwm dab tsi li. Lawv tsis yog tsuas tsis ua tej kev tiv thaiv ua ntej los sis coj cov kwv tij thiab cov nkauj muam kom paub cais cov tawm tsam khetos tej lus qhuab qhia yuam kev thiab lus cuav xwb, tiam sis txawm yog thaum lawv pom tej kev tab kaum thiab kev cuam tshuam uas cov tawm tsam khetos tsim los los, lawv yeej tsis nthuav tawm los sis txheeb xyuas tej ntawd, thiab lawv kuj tsis ntuas cov tawm tsam khetos thiab; lawv yeej tsis ua ib qho hauj lwm dab tsi li. Teeb meem ntawm hom neeg zoo li no yog dab tsi? (Lawv lub peev xwm tsis zoo kiag li.) Txawm hais tias lawv lub peev xwm tsis zoo los, lawv tseem khav tias lawv yog cov neeg ntawm sab ntsujplig, yog cov thawj coj zoo, thiab yog cov uas caum qhov tseeb thiab nyiam Vajtswv cov lus, thiab lawv hais yam tsis paub txaj muag tias lawv tau tso tsev neeg thiab lub cev nqaij daim tawv tej kev xyiv fab tseg los ua cov thawj coj thiab cov neeg ua hauj lwm tej luag hauj lwm kom tiav. Qhov tseeb tiag, lawv yog cov thawj coj cuav tseem tseem uas tsis ris lub luag hauj lwm, tsis muaj lub siab txawj xav thiab laj thawj, loog thiab ruam txog rau ib theem twg—lawv yog cov Falixais uas ntsej muag ncaj siab nkhaus tiag tiag. Lawv tsuas paub tham cov kev qhuab qhia thiab qw cov lus qw xwb. Thaum tib neeg nug lus nug rau lawv, lawv tuaj yeem hais tau ntau yam kev qhuab qhia los coj tib neeg mus yuam kev, tiam sis qhov tseeb tiag, lawv yeej piav tsis tau qhov tseeb tej hauv paus ntsiab lus kom meej kiag li. Txawm li ntawd los, lawv tseem xav tias lawv tus kheej muaj lub peev xwm nkag siab thiab to taub qhov tseeb. Nyob hauv lawv lub siab, lawv yeej paub meej tias thaum tib neeg los nrhiav kev daws teeb meem ntawm lawv, lawv muab tsis tau cov lus teb uas mus raws li qhov tseeb, tiam sis lawv tseem ua txuj ua cov thawj coj zoo thiab cov neeg ntawm sab ntsujplig. Qhov no puas yog tsis paub txaj muag me ntsis? (Yog.) Cov thawj coj cuav feem coob muaj ib yam uas zoo ib yam thiab ib qho teeb meem uas zoo ib yam: qhov tsis paub txaj muag. Lawv xav tias qhov muaj lub meej mom thiab lub npe ua thawj coj thiab muaj peev xwm hais tau txog tej kev qhuab qhia ntawm sab ntsujplig ntawd ua rau lawv dhau los ua ib tug neeg ntawm sab ntsujplig lawm. Lawv siv sij hawm ntau dua lwm tus los noj thiab haus Vajtswv cov lus, mloog lus qhuab qhia, thiab saib cov yeeb yaj kiab ntawm Vajtswv lub tsev, thiab sib qhia txog Vajtswv cov lus rau lwm tus ntau dua, yog li ntawd lawv thiaj ntseeg tias lawv tuaj yeem ua tau cov thawj coj thiab cov neeg ua hauj lwm tes hauj lwm thiab ua cov thawj coj thiab cov neeg ua hauj lwm tej luag hauj lwm kom tiav. Tiam sis qhov muaj tseeb yog thaum muaj teeb meem loj uas cov tawm tsam khetos lam tau lam cuam tshuam thiab coj cov neeg Vajtswv xaiv tseg mus yuam kev tshwm sim, lawv tsuas saib xwb tiam sis tsis muaj peev xwm ua tau ib yam dab tsi li, thiab lawv tsis paub tias yuav siv Vajtswv cov lus sab twg los muab piv thiab txheeb xyuas cov tawm tsam khetos, kom cov kwv tij thiab cov nkauj muam thiaj li muaj kev paub cais, es tso cov tawm tsam khetos tseg kiag hauv lawv lub siab tuaj, thiab zam tau qhov raug cov tawm tsam khetos ntawd coj mus yuam kev thiab tswj. Txawm hais tias qee zaus lawv xav tias ntshai me ntsis hauv nruab siab los, lawv tseem xav tias lawv tau ntseeg Vajtswv los ntev lawm thiab tau mloog ntau zaj lus qhuab qhia, thiab tias lawv to taub qhov tseeb dua tus neeg dog dig thiab txawj hais lus heev. Lawv nquag khav hais tias: “Kuv yog neeg ntawm sab ntsujplig. Kuv txawj qhuab qhia. Txawm hais tias kuv daws tsis tau qhov teeb meem uas cov tawm tsam khetos coj cov neeg Vajtswv xaiv tseg mus yuam kev thiab cuam tshuam cov neeg Vajtswv xaiv tseg, thiab kuv muab tsis tau Vajtswv cov lus los piv rau cov tawm tsam khetos thiab paub cais lawv los, kuv twb ua tes hauj lwm uas kuv tsim nyog ua thiab hais tej lus uas kuv tsim nyog hais lawm. Tsuav yog cov kwv tij thiab cov nkauj muam to taub xwb, ces tau lawm!” Hais txog qhov tshwm sim los thaum kawg ntawd yog dab tsi, seb puas tau tiv thaiv cov neeg Vajtswv xaiv tseg, lawv tsis paub meej txog qhov no hauv lawv lub siab li. Lawv kuj xav tias lawv ntse thiab ua txuj daws teeb meem, tiam sis qhov tshwm sim los yog, lawv tsuas hais cov lus thiab cov kev qhuab qhia ntau heev yam tsis tau daws tej teeb meem ntawd tiag tiag li. Lawv qhia tsis tau qhov tseeb los nthuav tawm thiab txheeb xyuas cov tawm tsam khetos. Tiam sis, lawv tsuas pheej hais cov lus thiab cov kev qhuab qhia los hais daws lawv tus kheej thiab tiv thaiv lawv tus kheej, hais tau ib los sis ob teev thiab ua rau tib neeg feeb tsis meej tag nrho, thiab txawm yog tej yam uas ua ntej ntawd lawv to taub los twb paub tsis meej lawm. Lawv yeej cawm tsis tau cov kwv tij thiab cov nkauj muam tawm hauv cov tawm tsam khetos txoj kev coj mus yuam kev los, thiab lawv kuj pab tsis tau kom cov kwv tij thiab cov nkauj muam ntawd paub cais cov tawm tsam khetos thiab tso cov tawm tsam khetos ntawd tseg kiag hauv lub siab tuaj—lawv yeej ua tsis tau tiav li cov txiaj ntsig uas tiv thaiv cov kwv tij thiab cov nkauj muam li. Txawm lawv yuav pom qhov tshwm sim los no los, lawv tseem tuav lub npe ua thawj coj thiab tsis txo hwj chim los nrhiav qhov tseeb nrog lwm tus, los sis qhia qhov teeb meem ntawd tawm rau txheej saud es nrhiav kev daws. Cov neeg zoo li no tsis yog cov neeg phem lod? Koj tsis muaj nuj nqis dab tsi li, tiam sis koj tseem ua txuj. Koj ua txuj ua dab tsi? Vim koj ua tsis tau ib tug thawj coj, koj yuav tsum nqis los thiab mus ua txuj rau lwm qhov. Koj yuav tsum tsis txhob ua phem rau cov neeg Vajtswv xaiv tseg! Thaum lub sij hawm uas koj tab tom ua txuj ntawd, cov tawm tsam khetos txeeb lub cib fim los ua ntau yam phem heev uas cuam tshuam thiab tswj tib neeg, coj mus yuam kev thiab ua phem rau ntau tus neeg! Leej twg yuav ris lub txim rau qhov no? Vajtswv lub tsev yeej yuav tshawb xyuas seb leej twg yog tus ris lub txim no!

Qee cov thawj coj thiab cov neeg ua hauj lwm tsis ua ib qho hauj lwm tiag tiag li thaum daws cov tawm tsam khetos tej xwm txheej, thiab kuj tsis muaj peev xwm paub cais cov tawm tsam khetos thiab. Thaum lub sij hawm uas cov tawm tsam khetos tswj thiab coj cov kwv tij thiab cov nkauj muam mus yuam kev, lawv yeej tsis nthuav cov tawm tsam khetos tej kev ua phem thiab lub ntsiab tseeb tawm tiag tiag li, thiab lawv kuj piav tsis tau tej ntawd kom meej thiab. Tom qab ntawd, qee cov neeg Vajtswv xaiv tseg uas muaj kev paub cais nthuav tawm thiab muab cov tawm tsam khetos ntiab tawm, thiab cov thawj coj cuav no xav tias qhov no yog lawv tus kheej tej txiaj ntsig. Tom qab uas muab cov tawm tsam khetos ntiab tawm lawm, lawv muab xaus lus thiab hais qee cov kev qhuab qhia: “Saib seb, thaum cov tawm tsam khetos hais lus thiab ua tej yam, lub neej hauv pawg ntseeg yeej tsis zoo li ib txwm lawm, tib neeg raug cuam tshuam, thiab lawv lub neej txoj sia raug kev puas tsuaj. Txhawm rau zam tej kev ua phem ntawm cov tawm tsam khetos, peb yuav tsum paub cais cov tawm tsam khetos tej kev ua, lus hais, kev ua neeg, lub ntsiab tseeb, thiab lwm yam ntxiv—peb yuav tsum to taub txhua yam no. Vajtswv tso cai rau cov tawm tsam khetos tshwm sim nyob hauv pawg ntseeg, tso cai rau lawv ua ntau yam thiab nthuav lawv tus kheej lub ntsej muag phem tawm, nthuav tawm cov tawm tsam khetos, kom peb npaj qhov tseeb, muaj kev paub cais ntau ntxiv, thiab kom peb theem ntawm sab ntsujplig loj hlob kom sai li sai tau—muaj Vajtswv txoj kev npaj siab nyob hauv qhov no! Tam sim no peb tau paub cais cov tawm tsam khetos lawm thiab tsis raug lawv txwv ntxiv lawm; txhua tus tuaj yeem tso lawv tseg lawm. Qhov no yog ib yam uas tsim nyog ua kev zoo siab!” Qhov kawg, cov thawj coj cuav haj tseem hais lus khav li ib tug nom thiab ua kev xaus lus, hais cuag nkaus li lawv tau ua ntau tes hauj lwm tiag tiag, tau them ib tug nqi loj, thiab tau ua ib teg hauj lwm tseem ceeb heev nyob rau hauv qhov muab cov tawm tsam khetos ntiab tawm ntawd. Qhov no puas yog tsis paub txaj muag me ntsis? Pom tau meej tias, txij thaum pib mus txog thaum kawg, lawv yeej tsis paub cais tias ib tug tawm tsam khetos yog dab tsi; lawv tsis to taub tias cov tawm tsam khetos coj tib neeg mus yuam kev li cas, cov tawm tsam khetos ua dab tsi rau cov neeg Vajtswv xaiv tseg, los sis cov tawm tsam khetos tus moj yam lub ntsiab tseeb yog dab tsi, tiam sis lawv ua txuj li lawv tau ua hauj lwm ntau heev. Pom tau meej tias yog cov kwv tij thiab cov nkauj muam uas paub cais cov tawm tsam khetos thiab muab cov tawm tsam khetos ntiab tawm hauv pawg ntseeg mus; pom tau meej tias cov thawj coj cuav tsis tau ua lub luag hauj lwm uas cov thawj coj thiab cov neeg ua hauj lwm yuav tsum ua los sis ua cov thawj coj thiab cov neeg ua hauj lwm tej luag hauj lwm kom tiav, tiam sis lawv tseem xaus lus thiab muab qhov txiaj ntsig rau lawv tus kheej, cuag nkaus li lawv twb tau npaj txhua yam ua ntej ntev lawm thiab tam sim no tab tom qhia rau cov kwv tij thiab cov nkauj muam tias lawv tej kev ua tau tsim txiaj ntsig thiab ua tau tiav loj heev. Qhov no tsis yog tsis paub txaj muag lod? Vim li cas koj thiaj li hais lus khav li ib tug nom? Koj tsis ua ib teg hauj lwm tiag tiag li tiam sis tseem hais lus li ib tug nom. Koj yog tus zaj loj liab ploog ib tug nom lod? Cov neeg zoo li no puas yog cov Falixais? (Yog.) Lawv tsuas paub qw cov lus qw thiab tham cov kev qhuab qhia xwb. Thaum muaj xwm txheej tshwm tuaj, tsis yog lawv tsis tuaj yeem coj rau kom yog xwb, tiam sis lawv kuj tsis muaj ib txoj kev ua raws thiab. Lawv tsuas hais lus tsis muaj qab hau thiab siv tej kev cai tswj yam dig muag ntsuav xwb; lawv yeej daws tsis tau ib qho teeb meem kiag li. Tom qab tej xwm txheej dhau mus lawm, lawv ua txuj li tsis muaj dab tsi tshwm sim, ua txuj ua cov neeg zoo, thiab muab txiaj ntsig rau lawv tus kheej yam tsis paub txaj muag kiag li. Cov neeg no yog cov Falixais tseem tseem. Lawv tsuas tuaj yeem qhuab qhia cov kev qhuab qhia, qw cov lus, siv zog ua me ntsis, thiab raug kev txom nyem me ntsis xwb, thiab lawv tsis muaj peev xwm ua ib teg hauj lwm tiag tiag li, tiam sis lawv tseem ua txuj ua cov neeg ntawm sab ntsujplig. Lawv yog cov Falixais. Qhov no yog hom thawj coj cuav no lub ntsiab tseeb. Lawv tuaj yeem qhuab qhia cov kev qhuab qhia ntau heev nyob rau ntawm sawv daws xub ntiag, yog li ntawd vim li cas lawv thiaj li nthuav tawm tsis tau thiab daws tsis tau cov tawm tsam khetos? Lawv tuaj yeem qhuab qhia tau ntau teev yam tsis tu ncua thiab txawj hais lus heev, yog li ntawd vim li cas, thaum ntsib tej teeb meem tiag tiag—tshwj xeeb yog thaum ntsib cov tawm tsam khetos tej kev ua phem—lawv thiaj li daws tsis tau, ua rau lawv ruam tag? Qhov no yog vim li cas? Yog vim lawv lub peev xwm tsis zoo kiag li. Tsis zoo npaum li cas? Lawv tsis muaj kev to taub ntawm sab ntsujplig. Lawv muaj kev kawm thiab kev txawj ntse, lawv ntse kawg ntawm qhov daws tej xwm txheej sab nraud, thiab to taub me ntsis txog kev cai lij choj. Txawm li cas los xij, thaum hais txog tej yam ntawm kev ntseeg Vajtswv, tej yam ntawm sab ntsujplig, thiab ntau yam teeb meem ntawm lub ntsiab tseeb, lawv tsis muaj peev xwm paub cais thiab pom tsis tshab txog ib yam dab tsi li, thiab lawv kuj nrhiav tsis tau qhov tseeb tej hauv paus ntsiab lus thiab. Thaum tsis muaj teeb meem dab tsi, lawv zaum twj ywm li tus neeg nuv ntses uas tos ntses tom, tiam sis thaum muaj teeb meem tshwm tuaj, lawv ua yam li cov neeg ruam uas txaus luag, zoo li cov ntsaum nyob saum lub yias kub, qhia tawm ib lub ntsej muag uas txaus khuv leej. Qee zaus lawv coj tiag tiag tshwj xeeb thiab nruj heev. Thaum lawv tsis ua nruj ces lawv kuj zoo li ib txwm, tiam sis thaum lawv ua nruj, qhov ntawd hos ua rau tib neeg luag. Qhov no yog vim thaum lawv ua nruj ntawd, lawv tsuas pheej hais qee cov lus yuam kev thiab cov lus uas tsis muaj kev to taub ntawm sab ntsujplig xwb, txhua yam ntawd puav leej yog cov lus ntawm cov neeg tsis paub. Tiam sis, lawv tseem ua ntsej muag nruj—qhov no tsis txaus luag tau li cas? Yog muaj neeg nug qee cov lus nug tseem ceeb kom lawv teb, lawv txawm cia li yoob thiab hais tsis tau lus, ua rau saib mas txaj muag tshwj xeeb. Yeej muaj ntau tus thawj coj cuav zoo li no. Lawv tej kev qhia tshwm tseem ceeb yog lub peev xwm tsis zoo thiab tsis muaj kev to taub ntawm sab ntsujplig; lawv yog cov tib neeg ruam feeb tsis meej. Qhov tsis muaj kev to taub ntawm sab ntsujplig ntawd txhais li cas? Thaum hais txog tej yam ntawm sab ntsujplig thiab tej yam uas ntsig txog qhov tseeb, qhov ntawd zoo li lawv tab tom txhais lus Kili thaum ub—lawv yeej tsis to taub ib yam dab tsi kiag li. Txawm li ntawd los, lawv tseem ua txuj, hais tias, “Kuv yog neeg ntawm sab ntsujplig. Kuv tau ntseeg Vajtswv los ntev lawm. Kuv to taub ntau qhov tseeb. Nej yog cov ntseeg tshiab, nej nyuam qhuav pib ntseeg Vajtswv thiab tsis to taub qhov tseeb. Nej mas ntseeg siab tsis tau.” Lawv pheej saib lawv tus kheej li cov uas tau ntseeg Vajtswv los ntev lawm thiab to taub qhov tseeb. Cov neeg zoo li no mas ntxim ntxub thiab txaus luag. Qhov kev sib qhia txog tej kev qhia tshwm ntawm hom thawj coj cuav no los xaus rau ntawm no.

III. Ua Cov Tawm Tsam Khetos Lub Kaus Tiv Thaiv

Tseem muaj lwm hom thawj coj cuav uas haj yam ntxim ntxub. Tsis yog lawv tsis nthuav cov tawm tsam khetos tawm xwb, tiam sis lawv kuj ua cov tawm tsam khetos lub kaus tiv thaiv thiab, siv kev pab uas muaj lub siab hlub ua ib qho laj thawj los tso cai rau cov tawm tsam khetos tej kev ua phem uas cuam tshuam pawg ntseeg tes hauj lwm. Txawm cov tawm tsam khetos yuav tshaj tawm tej lus yuam kev ntau npaum li cas los coj tib neeg mus yuam kev los xij, cov thawj coj cuav no tsis yog tsis tawm tsam los sis nthuav lawv tawm xwb tiam sis kuj muab cib fim rau cov tawm tsam khetos qhia lawv tej kev xam pom thiab lus hais tawm los yam ywj pheej. Txawm cov neeg Vajtswv xaiv tseg yuav raug hom kev cuam tshuam, kev coj mus yuam kev, los sis kev ua phem rau twg los xij, cov thawj coj cuav yeej tsis quav ntsej kiag li. Txawm yog thaum qee tus taw qhia tias: “Cov tib neeg no yog cov tawm tsam khetos. Lawv yog cov uas Vajtswv lub tsev yuav tsum txwv; yuav tsum tsis txhob txhawb los sis cob qhia lawv, thiab yeej yuav tsum tsis txhob tiv thaiv lawv. Lawv tau ua phem rau cov kwv tij thiab cov nkauj muam txaus lawm. Txog lub sij hawm uas yuav tsum nrog lawv xam thiab nthuav tawm thiab daws lawv kom tag nrho lawm,” cov thawj coj cuav tseem sawv los hais lus tiv thaiv cov tawm tsam khetos. Xav txog tej yam xws li cov tawm tsam khetos lub hnub nyoog, cov xyoo uas tau ntseeg Vajtswv los, thiab tej txiaj ntsig uas tau ua yav tas los, lawv siv ntau yam laj thawj los tiv thaiv thiab hais lus txhawm rau cov tawm tsam khetos. Thaum cov thawj coj theem saud mus tshuaj xyuas tes hauj lwm los sis daws cov tawm tsam khetos, cov thawj coj cuav txwv cov kwv tij thiab cov nkauj muam kom tsis txhob qhia qhov muaj tseeb txog cov tawm tsam khetos tej kev ua phem mus rau theem saud. Lawv haj tseem siv tswv yim los kaw pawg ntseeg kom cov thawj coj theem saud thiaj li tsis paub txog cov tawm tsam khetos uas cuam tshuam pawg ntseeg, thiab lawv kuj txwv cov kwv tij thiab cov nkauj muam uas muaj kev paub cais kom tsis txhob nthuav cov tawm tsam khetos tawm. Txawm cov thawj coj cuav yuav siv laj thawj dab tsi los sis muaj hom phiaj dab tsi los ua cov tawm tsam khetos lub kaus tiv thaiv los xij, thaum ua li no, qhov kawg lawv tab tom tiv thaiv cov tawm tsam khetos tej txiaj ntsim thaum uas ntxeev siab muab pawg ntseeg thiab cov neeg Vajtswv xaiv tseg tej txiaj ntsim muag tawm. Lawv siv ntau yam laj thawj los tiv thaiv cov tawm tsam khetos, xws li “cov tawm tsam khetos kuj ntseeg Vajtswv thiab muaj cai hais lus hauv Vajtswv lub tsev thiab” thiab “lawv tau ua dua tej dej num uas phom sij lawm; Vajtswv lub tsev yuav tsum xav txog lawv tej txiaj ntsig yav tas los.” Lawv txwv cov kwv tij thiab cov nkauj muam kom tsis txhob paub cais cov tawm tsam khetos thiab tsis cia rau cov thawj coj theem saud paub txog cov tawm tsam khetos ntau yam kev ua phem, tib lub sij hawm ntawd lawv tus kheej tsis nthuav tawm thiab yeej tsis ntuas cov tawm tsam khetos li. Cov tawm tsam khetos no tej zaum yog lawv tsev neeg, cov phooj ywg zoo, los sis, tej zaum kuj yog cov neeg uas lawv pe hawm thiab xav tias nyuaj rau lawv lub siab uas yuav tso tseg. Txawm yog qhov xwm txheej li cas los xij, tsuav yog lawv paub tias cov tib neeg no yog cov tawm tsam khetos tiam sis tseem tiv thaiv cov tib neeg ntawd tej kev ua phem, qhia lwm tus kom coj rau cov neeg ntawd nrog lub siab hlub, thiab haj tseem siv ntau txoj kev los muab cib fim rau cov tawm tsam khetos kom tshaj tawm ntau yam lus yuam kev los cuam tshuam thiab coj cov neeg Vajtswv xaiv tseg mus yuam kev, tej kev qhia tshwm no ua pov thawj tias lawv tab tom ua lub kaus tiv thaiv rau cov tawm tsam khetos. Ib txhia thawj coj cuav tej zaum tau ua tes hauj lwm tiag tiag me ntsis nyob rau lwm sab, tiam sis thaum hais txog qhov daws cov tawm tsam khetos, lawv tsis daws cov tawm tsam khetos ntawd raws li Vajtswv lub tsev tej kev cheem tsum. Haj yam tshaj ntawd yog, lawv tsis ua cov thawj coj thiab cov neeg ua hauj lwm tej luag hauj lwm kom tiav raws li Vajtswv lub tsev cheem tsum—lawv tsis txwv cov tawm tsam khetos kom ntau tshaj plaws li qhov ua tau kom tsis txhob tshaj tawm tej kev xav phem, tej kev xav tsis zoo, tej lus qhuab qhia yuam kev, thiab tej lus cuav los coj cov tib neeg hauv pawg ntseeg mus yuam kev. Tiam sis, lawv nquag tiv thaiv cov kev qhuab qhia uas zoo li yog tiam sis tsis yog uas cov tawm tsam khetos hais, nrog rau cov tawm tsam khetos tej lus hais thiab kev xam pom uas raws li kev paub los sis raws li Ntxwgnyoog lub tswv yim ntawd tam li tej yam uas zoo. Tej no puav leej yog tej kev qhia tshwm ntawm qhov lawv ua lub kaus tiv thaiv rau cov tawm tsam khetos. Muaj tseeb tiag, kuj muaj qee cov thawj coj cuav uas tsis daws cov tawm tsam khetos vim lawv saib cov tawm tsam khetos ntawd lub hwj chim nyob hauv lub zej zog muaj nqis. Lawv hais tias, “Cov kwv tij thiab cov nkauj muam feem coob yog cov neeg theem qis hauv lub zej zog thiab tsis muaj hwj chim. Txawm hais tias tus neeg no yog ib tug tawm tsam khetos uas muaj kev ua neeg phem los, lawv muaj hwj chim thiab muaj zog hauv lub ntiaj teb thiab muaj peev xwm. Thaum cov kwv tij thiab cov nkauj muam los sis pawg ntseeg ntsib kev phom sij, tsis yog peb cheem tsum ib tug neeg uas muaj hwj chim sawv los tiv thaiv peb lod? Yog li ntawd, cia peb ua txuj tsis pom lawv tej kev ua phem thiab tsis txhob muab xam tiag tiag.” Cov thawj coj cuav txaus siab hlo ua lub kaus tiv thaiv rau cov tawm tsam khetos kom cov tawm tsam khetos thiaj li sawv tawm ntsej muag rau lawv thiab txhawb lawv—txawm yog qhov no los cov thawj coj cuav yeej ua tau. Kuj muaj qee cov thawj coj cuav uas tuav ib qho kev xam pom uas yuam kev. Lawv hais tias, “Qee cov tawm tsam khetos muaj meej mom thiab hwj chim nyob hauv lub zej zog; lawv muaj koob npe. Peb pawg ntseeg muaj ob tug neeg zoo li no. Txawm hais tias lawv yog cov tawm tsam khetos los, yog peb muab lawv ntsaig tawm mus, tib neeg yuav xav tias peb pawg ntseeg tsis muaj cov neeg muaj peev xwm, thiab cov neeg nyob hauv lub ntiaj teb ntawm sab kab lis kev cai ntseeg yuav saib tsis taus peb. Peb yuav tsum khaws lawv tseg los ua ntsej ua muag rau peb. Yog li ntawd, ob tug neeg no yog peb pawg ntseeg tej khoom muaj nqis; tsis pub leej twg paub cais nkawd los sis muab nkawd ntsaig tawm mus li. Yuav tsum tiv thaiv nkawd.” Qhov no yog hom laj thawj dab tsi? Lawv saib cov tawm tsam khetos ua cov neeg muaj peev xwm, yog li ntawd lawv thiaj tiv thaiv cov tawm tsam khetos ntawd. Cov thawj coj cuav no tsis yog cov neeg phem lod? (Yog.) Txawm nyob rau hauv tej xwm txheej li cas los xij, tsuav yog cov thawj coj thiab cov neeg ua hauj lwm tso cai rau cov tawm tsam khetos ua txhua yam uas lawv xav ua hauv pawg ntseeg thiab cuam tshuam pawg ntseeg tes hauj lwm, lawv yog cov thawj coj cuav thiab cov neeg ua hauj lwm cuav. Txawm cov tawm tsam khetos thiab cov tib neeg phem yuav tshaj tawm tej lus yuam kev li cas, muaj pes tsawg leej raug coj mus yuam kev, cov neeg ntawd tawm tsam thiab cais cov neeg zoo li cas, thiab ua phem rau cov neeg Vajtswv xaiv tseg ntau npaum li cas los xij, cov thawj coj cuav tsis quav ntsej thiab ua txuj tsis paub—tsuav yog lawv tiv thaiv tau lawv tus kheej xwb ces tau lawm. Tej no yog cov thawj coj cuav tej kev qhia tshwm tseem ceeb. Txawm cov tawm tsam khetos yuav hais los sis ua dab tsi los xij, cov thawj coj cuav tsis nthuav tawm, txheeb xyuas, los sis txwv cov tawm tsam khetos kom cov kwv tij thiab cov nkauj muam thiaj li paub cais thiab tso cov neeg ntawd tseg. Tiam sis, lawv yug cov tawm tsam khetos ib yam li yug tsiaj, ua qhev rau lawv thiab tiv thaiv lawv li cov nom tswv loj, tso cai rau lawv ua, thiab tsim ntau lub cib fim rau lawv ua yeeb yam. Thaum lawv tso cai rau cov tawm tsam khetos xyiv fab rau kev ywj pheej tag nrho ntawd, leej twg tej txiaj ntsim raug muab los pauv? (Cov neeg Vajtswv xaiv tseg tej txiaj ntsim.) Tsis yog cov thawj coj cuav tsis tiv thaiv cov neeg Vajtswv xaiv tseg xwb, tiam sis lawv kuj cia cov tawm tsam khetos tuav hwj chim nyob rau hauv pawg ntseeg thiab, kom cov kwv tij thiab cov nkauj muam ua nyuj ua nees ua qhev rau cov tawm tsam khetos, ua kom lawv mloog cov tawm tsam khetos tej lus txib, lees txais cov tawm tsam khetos ntawd tej lus hais thiab tej kev xav thiab kev xam pom uas yuam kev, lees txais cov tawm tsam khetos ntawd txoj kev tswj, thiab haj tseem yog lees txais kev rhuav tshem yam phem heev uas cov tawm tsam khetos ntawd ua, thiab lwm yam ntxiv. Qhov no yog tes hauj lwm uas cov thawj coj cuav ua. Puas yog lawv tab tom txwv cov tawm tsam khetos kom tsis txhob rhuav tshem cov neeg Vajtswv xaiv tseg yam phem heev kom ntau tshaj plaws li qhov ua tau? Lawv puas tau ua cov thawj coj thiab cov neeg ua hauj lwm tej luag hauj lwm kom tiav? Lawv puas tau ua tes hauj lwm tiv thaiv cov neeg Vajtswv xaiv tseg? (Tsis tau.) Muab hais luv luv ces, txawm yog vim li cas los xij, tus thawj coj twg uas tso cai rau cov tawm tsam khetos ua raws li lawv lub siab nyiam yam tsis ua ib qho hauj lwm li ces yeej yog ib tug thawj coj cuav. Vim li cas Kuv thiaj li hais tias lawv yog cov thawj coj cuav? Vim thaum cov tawm tsam khetos tswj thiab coj cov neeg Vajtswv xaiv tseg mus yuam kev, koj cia cov kwv tij thiab cov nkauj muam raug ntau yam kev txom nyem los ntawm cov tawm tsam khetos, ua tsis tau tiav cov lus txib uas Vajtswv muab rau koj. Vajtswv lub tsev tau muab Vajtswv cov yaj, cov neeg Vajtswv xaiv tseg cob rau koj, thiab koj tsis ua koj lub luag hauj lwm kom tiav. Koj yeej tsis tsim nyog ris Vajtswv cov lus txib li! Txawm yog vim li cas los sis txawm koj yuav muaj laj thawj dab tsi los xij, yog thaum lub sij hawm uas koj ua ib tug thawj coj ntawd koj ua lub kaus tiv thaiv rau cov tawm tsam khetos, ua rau cov kwv tij thiab cov nkauj muam raug kev txom nyem kawg nkaus los ntawm cov tawm tsam khetos tej kev cuam tshuam, kev coj mus yuam kev, kev tswj, thiab tej kev rhuav tshem yam phem heev, ces koj yog tus neeg muaj txim nyob rau txhua tiam. Qhov laj thawj rau qhov no mas, tsis yog tias koj tsis paub cais cov tawm tsam khetos los sis pom tsis tshab txog lawv lub ntsiab tseeb—koj yeej paub meej hauv koj lub siab tias cov tawm tsam khetos yog cov Ntxwgnyoog thiab cov dab phem, tiam sis koj tsis cia cov neeg Vajtswv xaiv tseg nthuav tawm thiab paub cais. Tiam sis, koj cia cov kwv tij thiab cov nkauj muam mloog, lees txais, thiab zwm rau lawv. Qhov no yeej ua txhaum rau qhov tseeb tag nrho. Qhov no tsis yog qhov ua rau koj los ua tus neeg muaj txim nyob rau txhua tiam lod? (Yog.) Tsis yog koj tsis tiv thaiv cov uas ua lawv tej dej num tiag tiag thiab caum qhov tseeb xwb, tiam sis koj tseem txhawb cov tawm tsam khetos mus rau theem ua cov thawj coj thiab cov neeg ua hauj lwm, yug lawv ib yam li yug tsiaj thiab ua kom cov kwv tij thiab cov nkauj muam mloog lawv tej lus txib. Vajtswv lub tsev muab cov neeg Vajtswv xaiv tseg cob rau koj tsis yog kom lawv ua qhev rau cov tawm tsam khetos los sis ua koj cov qhev, tiam sis yog kom koj coj cov neeg Vajtswv xaiv tseg mus ua tsov rog nrog Ntxwgnyoog thiab cov tawm tsam khetos thiab paub cais thiab tso cov tawm tsam khetos tseg, thiab kom pab cov neeg Vajtswv xaiv tseg tuaj yeem ua tau lub neej hauv pawg ntseeg li ib txwm, ua lawv tej dej num li ib txwm, nkag mus rau hauv qhov tseeb qhov muaj tiag, zwm rau thiab ua tim khawv rau Vajtswv nyob rau hauv Vajtswv txoj kev coj. Yog lub luag hauj lwm no xwb koj twb ua tsis tau kom tiav, koj puas tsim nyog raug hu ua tib neeg? Tiam sis koj tseem xav tiv thaiv cov tawm tsam khetos. Cov tawm tsam khetos yog koj cov poj koob yawm txwv los sis yog koj cov mlom? Txawm hais tias koj muaj kev sib txuas ntawm roj ntsha nrog lawv los, koj yuav tsum tuav rawv qhov tseeb tej hauv paus ntsiab lus thiab muab kev ncaj ncees tso ua ntej tsev neeg. Koj yuav tsum xav tias qhov ntawd yog koj tes dej num los ua cov thawj coj thiab cov neeg ua hauj lwm tej luag hauj lwm kom tiav—nthuav tawm, paub cais, thiab tso cov tawm tsam khetos tseg, thiab siv zog ua kom ntau tshaj plaws li qhov ua tau los tiv thaiv cov kwv tij thiab cov nkauj muam, txwv kom lawv tsis txhob raug cov tawm tsam khetos ua phem rau. Qhov no yog qhov ua koj tes dej num nrog kev ua siab ncaj thiab ua Vajtswv cov lus txib kom tiav; tsuas yog ua li no xwb koj thiaj li raug hu ua ib tug thawj coj los sis ib tug neeg ua hauj lwm uas mus raws li tus qauv. Yog koj ua tsis tau cov thawj coj thiab cov neeg ua hauj lwm tej luag hauj lwm kom tiav thiab txaus siab hlo ua lub kaus tiv thaiv rau cov tawm tsam khetos, koj yuav yog dab tsi ntxiv yog tias tsis yog tus neeg muaj txim nyob rau txhua tiam? Qhov kev sib qhia txog cov thawj coj cuav uas ua lub kaus tiv thaiv rau cov tawm tsam khetos ntawd muab xaus rau ntawm no. Pom tau meej tias, qhov muab cov neeg zoo li no tso rau hauv pab ntawm cov thawj coj cuav yeej tsis yog qhov tsis ncaj ncees kiag li; qhov no yog ib qho kev qhia tshwm ntawm cov thawj coj cuav tiag tiag.

IV. Tsis Quav Ntsej Los Sis Tsis Nug Txog Cov Tib Neeg Uas Raug Cov Tawm Tsam Khetos Coj Mus Yuam Kev

Tseem muaj lwm qhov kev qhia tshwm ntawm cov thawj coj cuav uas haj yam ua rau neeg npau taws heev. Ib txhia thawj coj cuav tuaj yeem paub cais cov tawm tsam khetos me ntsis thaum lawv nrog cov tawm tsam khetos ntawd sib cuag, tiam sis lawv tsis daws cov tawm tsam khetos ntawd kom ncav sij hawm. Lawv kuj tsis nthuav tawm thiab txheeb xyuas cov tawm tsam khetos tej kev ua phem thiab lub ntsiab tseeb kom ncav sij hawm los ntawm cov tawm tsam khetos ntau yam kev coj, kom cov kwv tij thiab cov nkauj muam thiaj li paub cais thiab tso cov tawm tsam khetos tseg. Qhov no twb suav tau tias yog qhov tsis ua cov thawj coj thiab cov neeg ua hauj lwm tej luag hauj lwm kom tiav lawm. Thaum qee cov kwv tij thiab cov nkauj muam raug coj mus yuam kev thiab caum cov tawm tsam khetos, cov thawj coj cuav no tseem tsis quav ntsej kiag li, zoo li qhov ntawd tsis muaj feem xyuam nrog lawv li. Tsis tas li ntawd xwb, lawv tsis muaj kev cem lawv tus kheej los sis kev liam lawv tus kheej nyob hauv lawv lub siab li. Lawv tsis xav tias lawv tau ua rau Vajtswv los sis cov kwv tij thiab cov nkauj muam tag kev cia siab. Tiam sis, lawv nquag hais lo lus “nrov” no: “Cov tib neeg no raug cov tawm tsam khetos coj mus yuam kev lawm. Tsim nyog lawm! Leej twg kom lawv tsis muaj kev paub cais. Txawm hais tias lawv tsis caum cov tawm tsam khetos los, lawv yeej tseem yuav yog cov uas raug Vajtswv lub tsev muab ntsaig tawm mus.” Cov thawj coj cuav no tsis yog tsis hnov txhaum los sis cem tus kheej tom qab cov kwv tij thiab cov nkauj muam raug cov tawm tsam khetos coj mus yuam kev xwb, tiam sis haj yam tshaj ntawd lawv tsis thim xav los sis tsis hloov dua siab tshiab. Tiam sis, lawv hais tej lus uas tsis muaj kev ua neeg zoo li no, hais tias cov kwv tij thiab cov nkauj muam no tsim nyog raug cov tawm tsam khetos coj mus yuam kev. Pom tau dab tsi los ntawm cov lus no? Cov tib neeg no puas muaj kev ua neeg li? (Tsis muaj.) Qhov uas lawv tsis muaj kev ua neeg ntawd yeej paub tseeb lawm. Yog li ntawd, vim li cas lawv thiaj li hais tej lus no? (Txhawm rau thawb lub luag hauj lwm.) Ua ntej tshaj plaws, qhov ntawd yog txhawm rau thawb lub luag hauj lwm, los coj tib neeg mus yuam kev thiab ua kom tib neeg feeb tsis meej. Lawv ntseeg tias: “Cov tib neeg ntawd raug cov tawm tsam khetos coj mus yuam kev vim lawv tsis muaj kev paub cais, qhov ntawd tsis muaj feem xyuam nrog kuv li. Lawv tsis caum qhov tseeb, yog li ntawd lawv tsim nyog raug coj mus yuam kev!” “Tsim nyog” ntawd txhais li cas? Qhov ntawd txhais hais tias cov tib neeg no tsim nyog raug cov tawm tsam khetos coj mus yuam kev thiab tswj, thiab tsim nyog raug cov tawm tsam khetos ua phem rau yam phem heev—txawm lawv yuav raug cov tawm tsam khetos ua li cas rau los yeej tsim nyog; lawv tsim nyog caum cov tawm tsam khetos. Lub ntsiab lus zais ntawd ces yog hais tias cov tib neeg no tsis tsim nyog raws Vajtswv qab tiam sis tsim nyog raws cov tawm tsam khetos qab, tias qhov lawv raws Vajtswv qab ntawd yog ib qho yuam kev, thiab qhov uas Vajtswv xaiv lawv ntawd kuj yog ib qho yuam kev thiab, thiab tias txawm lawv tau nkag los rau hauv Vajtswv lub tsev lawm los, qhov uas lawv raug cov tawm tsam khetos coj mus ntawd yeej zam tsis tau li. Qhov no puas yog lub ntsiab lus zais uas cov thawj coj cuav hais? Tsis yog lawv tsuas hais lus thuam cov kwv tij thiab cov nkauj muam xwb, tiam sis lawv kuj hais lus tuam mom Vajtswv thiab. Cov tib neeg zoo li no puas ntxim ntxub? (Ntxim ntxub.) Lawv ntxim ntxub heev! Dhau ntawm qhov thawb lub luag hauj lwm thiab npog qhov muaj tseeb thiab qhov xwm txheej tiag tiag uas lawv tsis tau tiv thaiv cov kwv tij thiab cov nkauj muam, lawv tseem tawm tsam cov kwv tij thiab cov nkauj muam, hais tias cov tib neeg no tsim nyog raug cov tawm tsam khetos coj mus yuam kev thiab tias lawv tsis tsim nyog ntseeg Vajtswv thiab tau txais Vajtswv txoj kev cawm dim. Tib kab lus no xwb nthuav tawm tias lawv tus cwj pwm ua neeg phem npaum li cas! Txawm hais tias lawv tsis tau cuam tshuam, coj mus yuam kev, los sis tsuj nias cov kwv tij thiab cov nkauj muam ncaj qha ib yam li cov tawm tsam khetos los, lawv tus cwj pwm uas coj rau cov kwv tij thiab cov nkauj muam, coj rau Vajtswv cov lus txib, thiab coj rau pab yaj uas Vajtswv lub tsev tau tso rau lawv ntawd qhia pom tias lawv lub siab txia ntshav thiab tsis muaj kev hlub tshua npaum li cas tiag! Yeej tsis muaj leej twg uas lees txais Vajtswv tes hauj lwm tau yooj yim li; qhov ntawd ntsig txog tej kev them tus nqi thiab kev koom tes ntawm cov uas tshaj tawm txoj moo zoo. Qhov no siv tib neeg lub zog thiab khoom siv ntau heev, thiab haj yam muaj Vajtswv tus nqi ntshav hauv siab nyob rau hauv thiab. Yog Vajtswv tus uas npaj ntau hom tib neeg, xwm txheej, yam khoom, thiab ib puag ncig los coj tib neeg los rau ntawm Nws lub xub ntiag. Cov thawj coj cuav tsis quav ntsej txog tej no kiag li. Txawm leej twg raug cov tawm tsam khetos coj mus yuam kev los, lawv tsuas hais ib kab lus tias: “Tsim nyog lawv raug lawm!” ces tag li ntawd xwb. Thaum ua li no, lawv ua rau txhua tus txoj kev khwv thiab Vajtswv tus nqi ntshav hauv siab nkim mus dawb xwb, ua rau tsis tshuav dab tsi li. Lo lus “Tsim nyog lawv raug lawm” ntawd txhais li cas? Qhov ntawd txhais hais tias, “Leej twg kom koj tshaj tawm txoj moo zoo rau lawv? Lawv tsis tsim nyog ntseeg Vajtswv. Qhov tshaj tawm txoj moo zoo rau lawv ntawd mas yog ib qho yuam kev lawm. Leej twg kom lawv raws cov tawm tsam khetos qab? Txawm hais tias kuv tsis tau ua tes hauj lwm tiag tiag los, kuv kuj tsis tau kom lawv raws cov tawm tsam khetos qab thiab. Lawv tus kheej pheej yuav ua li ntawd; lawv tsim nyog raws cov tawm tsam khetos qab lawm!” Hom neeg zoo li no muaj txoj kev ua neeg zoo li cas? Lawv puas muaj lub siab kiag li? Lawv yog ib tug tsiaj uas siab txia ntshav, phem dua ib tug dev zov tsev, tiam sis lawv tseem yog ib tug thawj coj? Lawv tsis tsim nyog! Nej yuav tsum muaj kev paub cais: Thaum pom tias cov tib neeg zoo li no tsis muaj lub siab txawj xav thiab laj thawj thiab siab txia ntshav npaum li no, nej yuav tsum tsis txhob xaiv lawv los ua cov thawj coj. Tsis txhob feeb tsis meej! Tsis yog lawv tsis ua txhua yam li qhov ua tau los them rov qab tej kev puas tsuaj thiab cawm cov uas raug cov tawm tsam khetos coj mus yuam kev ntawd xwb, tiam sis lawv tseem hais tej lus uas lim hiam zoo li no—lawv lim hiam dhau lawm! Hom neeg no qhov teeb meem muaj lub ntsiab xeeb txawm uas hnyav dua qhov ntawm ib tug thawj coj cuav dog dig. Txawm hais tias lawv yuav tsis raug saib ua cov tawm tsam khetos los, raws li lawv tej kev qhia tshwm, pom tau meej meej tias lawv tsis muaj txoj kev ua neeg thiab tsis tsim nyog ua ib tug thawj coj los sis ib tug neeg ua hauj lwm. Lawv tsuas yog ib tug neeg ntxeev siab uas dab tuag thiab tsis paub ris txiaj xwb! Lawv tsis paub tias Vajtswv cov lus txib yog dab tsi, thiab lawv kuj tsis muaj kev paub txog tias lawv yuav tsum ua tes hauj lwm dab tsi thiab. Lawv tsis coj rau tej ntawd nrog lub siab txawj xav thiab laj thawj; lawv tsis tsim nyog ua ib tug thawj coj ntawm cov neeg Vajtswv xaiv tseg thiab tsis tsim nyog lees txais Vajtswv cov lus txib. Tshwj xeeb tshaj yog, cov thawj coj cuav tsis muaj lub siab hlub rau cov neeg Vajtswv xaiv tseg. Thaum cov kwv tij thiab cov nkauj muam raug coj mus yuam kev, lawv tseem tsuj cov ntawd ntxiv thaum cov neeg ntawd ntog rau hauv av lawm, hais tej lus xws li “Tsim nyog lawv raug lawm,” yam tsis muaj kev khuv leej kiag li. Hom neeg zoo li no, yog lawv pom ib tug neeg twg ntsib kev puas tsuaj los sis kev ceeb laj txom nyem, lawv yuav tsis pab tiam sis yuav ntxiv kev txom nyem rau cov neeg ntawd thaum cov neeg ntawd ntsib kev txom nyem xwb. Lawv lub siab txawj xav yuav tsis hnov txhaum li, thiab lawv yuav ua ib tug thawj coj mus ntxiv ib yam li lawv ib txwm ua. Qhov no puas yog qhov tsis paub txaj muag? (Yog.) Tsis txhob hais txog cov kwv tij thiab cov nkauj muam, txawm hais tias yog ib tug neeg zoo uas ib txwm tsis ntseeg raug cov dab ua phem rau yam phem heev los, ua ib tug uas ntseeg Vajtswv thiab ua ib tug neeg uas raug tsim tawm los, leej twg uas muaj kev ua neeg li ib txwm yeej yuav muaj kev khuv leej; haj yam tsis tas hais txog thaum pom tias yog cov kwv tij thiab cov nkauj muam—cov uas ntseeg Vajtswv tseeb—uas raug cov tawm tsam khetos coj mus yuam kev thiab ua phem rau ntawd mas haj yam mob siab thiaj li yog. Cov thawj coj cuav no tsis ua ib qho hauj lwm tiag tiag li thaum lub sij hawm uas cov tawm tsam khetos ua kev phem thiab ua phem rau cov neeg Vajtswv xaiv tseg. Lawv tsis nthuav tawm los sis txheeb xyuas cov tawm tsam khetos tej kev ua phem thiab lub ntsiab tseeb, haj yam tsis muaj lub nra los pab cov kwv tij thiab cov nkauj muam kom muaj kev paub cais txog cov tawm tsam khetos thiab tso cov tawm tsam khetos ntawd tseg kiag hauv lawv lub siab tuaj. Lawv tsis xav tias muaj lub luag hauj lwm rau qhov no li. Txawm yog thaum qee tus neeg raug cov tawm tsam khetos coj mus yuam kev los, lawv cia li lam hais cov lus txias zias thiab tsis muaj lub siab hlub tshua hais tias, “Tsim nyog lawv raug lawm.” Qhov ntawd yeej ua rau neeg npau taws tiag tiag! Txhawm rau thawb lub luag hauj lwm, txhawm rau tiv thaiv lawv tus kheej, txhawm rau coj mus yuam kev thiab ua kom neeg coob ntxiv feeb tsis meej, thiab txhawm rau zam qhov raug Vajtswv teem txim, lawv hais tej lus uas tsis muaj kev ua neeg zoo li no. Qhov no puas ntxim ntxub? (Ntxim ntxub.) Txawm koj yuav hais li cas los xij, koj tsis tau ua koj tej luag hauj lwm kom tiav, thiab koj tsis tau ua koj tes hauj lwm kom zoo—tej no yog tej kev qhia tshwm ntawm ib tug thawj coj cuav; txawm koj yuav siv zog thawb li cas los, koj tsis lees tej no tsis tau li. Koj yog ib tug thawj coj cuav.

Qee cov thawj coj cuav tsis yog tsuas ua lub siab txias zias, tsis muaj kev hlub tshua, thiab tsis ris lub luag hauj lwm tom qab qee cov kwv tij thiab cov nkauj muam raug cov tawm tsam khetos coj mus yuam kev xwb, haj tseem hais tias cov tib neeg no tsim nyog raug coj mus yuam kev lawm, tiam sis txawm yog thaum Vajtswv lub tsev tej kev npaj tes hauj lwm cheem tsum kom lawv ua lawv lub luag hauj lwm kom tiav yam ntau tshaj plaws li qhov ua tau kom cawm tau cov uas muaj kev ua neeg zoo dua me ntsis thiab muaj kev cia siab tias yuav cawm tau ntawd rov qab los los, cov thawj coj cuav no yeej tseem tsis ua tes hauj lwm tiag tiag kiag li. Txawm thaum qee tus thov rov qab los rau hauv pawg ntseeg los, lawv tseem ua txias txias thiab tsis quav ntsej, tsis saib tib neeg lub neej txoj sia ua yam uas muaj nqis tshaj plaws los hlub li. Lawv ua tsis tau raws li qhov cawm cov kwv tij thiab cov nkauj muam uas raug coj mus yuam kev ntawd rov qab los kom ntau tshaj plaws li qhov ua tau. Lawv ua tsis tau lub luag hauj lwm no kom tiav, thiab lawv yeej tsis siv zog ua li ntawd kiag li. Txawm hais tias Vajtswv lub tsev tej kev npaj tes hauj lwm pheej hais tag hais dua cheem tsum kom ua tes hauj lwm no kom zoo los, cov thawj coj cuav yeej tseem tsis quav ntsej, tsis ua dab tsi thiab tsis ua tes hauj lwm kiag li. Qhov no ua rau qee cov tib neeg uas raug cov tawm tsam khetos coj mus yuam kev thiab raug muab cais tawm los sis muab ntsaig tawm mus ntawd tseem rov qab los tsis tau rau hauv Vajtswv lub tsev thiab tseem tsis tau rov pib ua lub neej hauv pawg ntseeg li ib txwm. Muaj tseeb tiag, qee tus yeej tsis mus raws li tej yam cheem tsum rau kev cawm rov qab los ntawm Vajtswv lub tsev nyob rau ntau sab, tiam sis tseem muaj lwm cov uas tuaj yeem cawm rov qab los tau. Yog hais tias los ntawm lub siab hlub pab thiab kev ua siab ntev txhawb, lawv tuaj yeem to taub qhov tseeb, paub cais, thiab tso cov tawm tsam khetos tseg, lawv yeej tuaj yeem raug cawm rov qab los tau. Txawm li cas los xij, vim cov thawj coj thiab cov neeg ua hauj lwm tsis ua tes hauj lwm tiag tiag, tsis coj Vajtswv lub tsev tej kev npaj tes hauj lwm mus ua tiag, thiab tsis saib cov tib neeg no lub neej txoj sia ua qhov tseem ceeb, ua rau qee tus thiaj li tseem raug tso tseg nyob yuj yees rau sab nraud. Cov thawj coj thiab cov neeg ua hauj lwm no tsis quav ntsej txog Vajtswv lub tsev tej kev npaj tes hauj lwm los ntawm qhov siv ntau yam lus hais ub hais no. Tab txawm yog cov kwv tij thiab cov nkauj muam uas xav rov qab los rau hauv pawg ntseeg thiab ua tau raws li pawg ntseeg tej kev cheem tsum rau kev lees txais ntawd los lawv twb tsis quav ntsej thiab. Lawv nrhiav ntau yam lus hais ub hais no, hais tias cov tib neeg no muaj kev ua neeg tsis zoo, muaj kev phom sij txog kev nyab xeeb, nyiam tu cev, nyiam tej kev xyiv fab ntawm lub cev nqaij daim tawv, nyiam lub meej mom, thiab lwm yam ntxiv. Lawv tsis pub cov kwv tij thiab cov nkauj muam ntawd rov qab los rau hauv pawg ntseeg, los ntawm qhov siv ntau yam lus hais ub hais no thiab laj thawj uas lam tsim tawm no. Cov tib neeg no raug cov tawm tsam khetos coj mus yuam kev thiab tswj lawm, tiam sis qhov uas lawv poob ploj ntawd tsis yog ib yam uas cov thawj coj cuav txhawj xeeb txog li. Lawv tsis muaj kev xav txog lub luag hauj lwm los sis tsis muaj kev paub ntawm lub siab txawj xav kiag li. Tej zaum lawv xav tias qhov cawm cov tib neeg no rov qab los ntawd nyuaj los sis phom sij, los sis tej zaum lawv tsis txaus siab thiab tsis pom zoo nyob rau tob tob hauv lawv lub siab. Txawm yuav yog li cas los xij, vim muaj ntau yam laj thawj, lawv yeej tsis muab Vajtswv lub tsev txoj kev npaj tes hauj lwm uas tau hais los saum no coj los ua tiag kiag li. Tej no yog tej kev qhia tshwm ntawm cov thawj coj cuav uas zoo li no. Tsis yog lawv tsuas tsis nquag plias koom tes thiab ua lawv tej luag hauj lwm kom tiav rau txhua tes hauj lwm uas Vajtswv los sis Vajtswv lub tsev muab rau lawv xwb, tiam sis thaum ib tug neeg twg nthuav tawm txog qhov uas lawv tsis ua lawv lub luag hauj lwm ntawd mas, lawv tseem tiv thaiv lawv tus kheej, hais tej lus uas thawb lawv tej luag hauj lwm thiab hais daws lawv tus kheej kom thiaj li npog tau qhov muaj tseeb ntawm lawv txoj kev tsis ua lub luag hauj lwm ntawd. Cov thawj coj cuav zoo li no puas yog haj yam ntxim ntxub? (Yog.) Muab hais luv luv tias, cov thawj coj cuav no kuj tsis quav ntsej txog qhov daws cov tawm tsam khetos uas ua phem rau cov neeg Vajtswv xaiv tseg yam phem heev ntawd, yeej tsis ua tes hauj lwm tiag tiag kiag li. Lawv tsis quav ntsej txog txhua qhov ntxaws ntxaws ntawm tes hauj lwm no uas Vajtswv lub tsev cheem tsum. Lawv tsis txaus siab raug kev txom nyem los sis them tus nqi li, tsuas nyiam ua raws li lawv lub siab nyiam thiab ua li cas los tau raws li lawv xav ua—ua me ntsis yog lawv xav ua thiab tsis ua dab tsi yog lawv tsis xav ua. Lawv yeej tsis quav ntsej kiag li txog Vajtswv lub tsev tej kev npaj tes hauj lwm, lawv tsis quav ntsej txog tej num thiab tej luag hauj lwm uas Vajtswv lub tsev tso siab rau lawv, thiab lawv haj yam tsis quav ntsej txog Vajtswv tej kev npaj siab thiab tej kev cheem tsum li. Cov tib neeg no tsis muaj kev ua neeg thiab tsis muaj lub siab txawj xav; lawv yog cov neeg tuag uas mus taus kev xwb. Nej puas kam muab qhov xwm txheej loj ntawm nej lub neej txoj sia txog kev caum kev cawm dim hauv txoj kev ntseeg Vajtswv tso rau cov tib neeg uas tsis muaj kev ua neeg? (Tsis kam.) Txawm hais tias lawv tsis muab koj cob rau cov tawm tsam khetos los, lawv puas yuav siv zog ua kom ntau tshaj plaws los tawm tsam nrog cov tawm tsam khetos thaum cov tawm tsam khetos ntawd coj cov neeg Vajtswv xaiv tseg mus yuam kev thiab ua phem rau cov neeg Vajtswv xaiv tseg yam phem heev? Tsis ua, lawv yeej yuav tsis ua li, vim cov tib neeg zoo li no yog cov tsiaj uas siab txia ntshav uas tsis muaj kev xav txog lub luag hauj lwm. Lawv ua cov thawj coj tsuas yog txhawm rau nrhiav tej txiaj ntsim rau lawv tus kheej xwb.

Qee zaus cov thawj coj cuav kuj qhia kev txhawj xeeb rau cov kwv tij thiab cov nkauj muam thiab; lawv nug cov kwv tij thiab cov nkauj muam ntawd seb puas muaj dab tsi uas lawv tim tsum, lawv qhov xwm txheej txog zaub mov thiab chaw nyob zoo li cas, thiab lwm yam ntxiv. Lawv ua tib zoo saib xyuas heev thaum hais txog tej yam uas ntsig txog lub neej txhua hnub, tiam sis thaum hais txog tej yam uas ntsig txog Vajtswv cov lus txib, txoj kev ciaj thiab tuag ntawm cov kwv tij thiab cov nkauj muam, thiab qhov tseeb tej hauv paus ntsiab lus ntawd mas, lawv yeej tsis quav ntsej thiab tsis ua dab tsi txawm leej twg yuav thov lawv los xij. Lawv tsuas txhawj xeeb txog tib neeg tej kev xyiv fab ntawm lub cev nqaij daim tawv, zaub mov, khaub ncaws, chaw nyob, kev mus los, los sis tej txiaj ntsim ntawm sab nqaij tawv xwb, thiab lawv tsuas daws tej yam zoo li no xwb. Ib txhia hais tias, “Koj tej lus hais ntawd mas sib cov nyom lawm. Tsis yog Koj hais tias lawv lub siab txia ntshav no lod? Ib tug neeg uas lub siab txia ntshav puas yuav txaus siab ua tej yam no rau lwm tus?” Ib tug neeg uas lub siab txia ntshav puas yuav muaj lub siab zoo ua tej yam no rau sawv daws? (Tsis ua.) Qhov tseeb tiag, qee cov neeg uas lub siab txia ntshav yeej yuav ua tej yam no tiag, thiab muaj ob qho laj thawj rau qhov no. Qhov ib yog, thaum lawv tab tom ua tej yam rau sawv daws, lawv kuj tab tom ua tej yam rau lawv tus kheej thiab, thiab lawv tau txais txiaj ntsim los ntawm qhov no. Yog lawv tsis tau txais txiaj ntsim dab tsi los ntawm qhov ua ib yam dab tsi, saib seb lawv puas tseem ua qhov ntawd—lawv yuav hloov kiag lawv tus cwj pwm tam sim ntawd thiab tsum tsis ua lawm. Tsis tas li ntawd xwb, lawv siv leej twg cov nyiaj los ua tej yam no thiab nrhiav tej txiaj ntsim rau sawv daws? Yog Vajtswv lub tsev tus uas them nyiaj. Qhov muab Vajtswv lub tsev tej khoom siv los ua siab dav yog tej yam uas cov tib neeg no txawj tshaj plaws. Yuav ua li cas lawv thiaj li tsis ua tej yam no thaum lawv tus kheej tau txais tej txiaj ntsim? Thaum lawv tab tom nrhiav tej txiaj ntsim rau sawv daws ntawd, qhov tseeb tiag lawv tab tom ua tej yam rau lawv tus kheej xwb. Lawv tsis muaj lub siab zoo npaum li ntawd uas yuav nrhiav tej txiaj ntsim rau sawv daws li! Yog lawv nrhiav tej txiaj ntsim rau sawv daws tiag tiag, lawv yuav tsum tsis txhob muaj tej kev npaj siab uas twm xeeb, thiab lawv yuav tsum lis hauj lwm raws li Vajtswv lub tsev tej hauv paus ntsiab lus. Txawm li cas los xij, lawv pheej nrhiav tej txiaj ntsim rau lawv tus kheej xwb, thiab lawv tsis xav txog cov neeg Vajtswv xaiv tseg txoj kev nkag mus rau hauv lub neej txoj sia kiag li. Tsis tas li ntawd xwb, lawv ua tej yam rau sawv daws kom tib neeg thiaj li saib lawv rau qhov siab thiab hais tias, “Tus neeg no nrhiav tej txiaj ntsim rau peb thiab siv zog tiv thaiv peb tej txiaj ntsim. Yog peb tsis muaj yam dab tsi, peb yuav tsum thov kom lawv saib xyuas qhov ntawd. Thaum muaj lawv nyob, ces peb yuav tsis raug kev tsis ncaj ncees dab tsi li. Lawv ua tej yam no kom txhua tus thiaj li ua lawv tsaug. Los ntawm qhov ua li no, lawv tau txais lub koob npe thiab tej txiaj ntsim, yog li ntawd, vim li cas lawv thiaj li yuav tsis ua tej yam no? Yog lawv nrhiav tej txiaj ntsim rau sawv daws, tiam sis tsis muaj leej twg paub tias yog lawv ua, thiab txhua tus ua Vajtswv tsaug, thiab yeej tsis muaj leej twg xav tias ua tsaug rau lawv li, lawv puas tseem yuav ua qhov ntawd? Lawv yeej yuav tsis xav ua li lawm; lawv lub ntsej muag tiag tiag yeej yuav raug nthuav tawm. Thaum cov tib neeg zoo li no ua ib yam dab tsi, lawv tus yam ntxwv xeeb txawm lub ntsiab tseeb yeej raug nthuav tawm kom tag nrho. Yog li ntawd, thaum cov tawm tsam khetos cuam tshuam pawg ntseeg, lawv yeej yuav tsis ua tes hauj lwm tiag tiag los tiv thaiv cov neeg Vajtswv xaiv tseg kiag li.

Nyuam qhuav no peb sib qhia tias tom qab cov neeg Vajtswv xaiv tseg raug cov tawm tsam khetos coj mus yuam kev, tswj, thiab ua phem rau, cov thawj coj cuav tseem ua ntsej lag muag dig rau qhov ntawd. Lawv tsis xav txog ib txoj kev twg los cawm cov neeg Vajtswv xaiv tseg rov qab los, thiab lawv kuj tsis ua lawv tej num thiab tej luag hauj lwm kom tiav thiab. Lawv tsuas xav txog lawv tus kheej tej kev xav, tej kev xav hauv siab, thiab tej txiaj ntsim xwb. Lawv tsis ua lawv tej luag hauj lwm kom tiav thiab lawv tsis xav tias lawv muaj lub luag hauj lwm; tiam sis, lawv thawb lawv tej luag hauj lwm thiab zam tej ntawd. Thiab lawv haj tseem txiav txim rau cov neeg Vajtswv xaiv tseg tom qab cov neeg ntawd raug cov tawm tsam khetos coj mus yuam kev thiab tswj lawm, hais tias cov neeg ntawd tsis muaj lub siab dawb paug ntseeg Vajtswv, txhawm rau thawb lawv tus kheej lub luag hauj lwm, yam tsis hnov tias txhaum nyob hauv lawv lub siab txawj xav li. Cov thawj coj cuav no yog cov uas ntxim ntxub tshaj plaws. Ntau hom kev qhia tshwm ntawm cov thawj coj cuav uas peb tau tham txog ntawd puav leej ntxim ntxub heev, tiam sis hom neeg kawg no yeej tsis muaj kev ua neeg kiag li. Hom neeg zoo li no yog ib tug tsiaj uas lub siab txia ntshav, ib tug tsiaj nyaum uas hnav khaub ncaws tib neeg; lawv tsis tuaj yeem raug suav ua ib feem ntawm tib neeg ntiaj teb, tiam sis yuav tsum raug muab teev nrog cov tsiaj nyaum. Vim li cas lawv thiaj li tsis ua lawv tej luag hauj lwm kom tiav? Vim lawv tsis muaj kev ua neeg, tsis muaj lub siab txawj xav los sis laj thawj. Tej luag hauj lwm, tej num, kev hlub, kev ua siab ntev, kev khuv leej, kev tiv thaiv cov kwv tij thiab cov nkauj muam—tej no yeej tsis nyob hauv lawv lub siab li; lawv tsis muaj tej yam no. Qhov tsis muaj tej yam no nyob hauv lawv txoj kev ua neeg yeej zoo ib yam li qhov tsis muaj kev ua neeg. Tej no yog tej kev qhia tshwm ntawm hom thawj coj cuav plaub.

Feem ntau tej no yog plaub hom kev qhia tshwm ntawm cov thawj coj cuav uas yuav tsum tau muab nthuav tawm nyob hauv cov thawj coj thiab cov neeg ua hauj lwm lub luag hauj lwm kaum peb. Muaj tseeb tiag, tseem muaj qee yam kev qhia tshwm uas zoo sib xws, tiam sis plaub hom no yeej tuaj yeem sawv cev rau ntau yam kev qhia tshwm ntawm cov thawj coj cuav hauv qhov ua tes hauj lwm no, nrog rau lawv kev ua neeg lub ntsiab tseeb lawm. Txawm peb yuav muab lawv tej kev qhia tshwm faib ua pes tsawg hom los, txawm yog li cas los xij, ob qho kev qhia tshwm uas pom tau meej tshaj plaws txog cov thawj coj cuav, yeej tseem tuaj yeem nrhiav tau nyob hauv plaub hom no: Qhov ib yog qhov tsis ua tes hauj lwm tiag tiag, thiab lwm qhov yog qhov ua tsis tau tes hauj lwm tiag tiag. Tej no yog ob qho kev qhia tshwm uas pom tau meej tshaj plaws txog cov thawj coj cuav. Txawm hais tias cov thawj coj cuav txoj kev ua neeg thiab lub peev xwm yuav zoo li cas los xij, thiab txawm hais tias lawv coj rau qhov tseeb li cas los xij, txawm yuav yog li cas los, ob qho kev qhia tshwm no yeej tshwm nyob hauv plaub hom no. Hnub no nyob hauv peb qhov kev sib qhia txog cov thawj coj thiab cov neeg ua hauj lwm lub luag hauj lwm kaum peb ntawm lub ntsiab lus uas hais txog qhov nthuav cov thawj coj cuav tawm ntawd los xaus li no xwb.

Tshooj Ntxiv: Teb Cov Lus Nug

Nej puas muaj lus nug dab tsi? (Vajtswv, kuv xav nug ib lo lus nug. Thaum pib kev sib txoos ua ke, Vajtswv nug peb tias qhov txawv ntawm cov tib neeg uas muaj cov tawm tsam khetos tus moj yam thiab cov tawm tsam khetos tiag tiag yog dab tsi, thiab cov yam ntxwv uas sawv cev rau cov tawm tsam khetos lub ntsiab tseeb yog dab tsi. Thaum ntawd, peb lub hlwb khoob lug, thiab tom qab xav ib pliag, peb tsuas xav tau qee cov lus thiab cov kev qhuab qhia uas yooj yim heev xwb. Vajtswv tau qhia qhov tseeb txog qhov nthuav cov tawm tsam khetos tawm tau ntau dua ib xyoos lawm, tiam sis peb tsuas to taub thiab ua raws tau tsawg heev xwb. Ib qho laj thawj rau qhov no yog vim peb tsis tau siv zog rau tej qhov tseeb no, thiab lwm qhov yog vim peb tau ntsib cov tawm tsam khetos tsawg heev thiab tsis tau to taub tej qhov tseeb no los ntawm qhov pom tias tej ntawd txuas nrog tej xwm txheej tiag tiag li cas. Yog li ntawd, txawm yog tam sim no peb yeej tsis muaj kev nkag mus rau hauv tej qhov tseeb no tiag tiag, peb tsis muaj kev paub cais ntau txog cov tawm tsam khetos, thiab muaj ntau yam kev qhia tshwm ntawm cov tawm tsam khetos tus moj yam nyob hauv peb tus kheej uas peb tseem tsis tau txheeb tau. Kuv xav nug tias yuav daws qhov teeb meem no li cas.) Rau txhua sab ntawm qhov tseeb mas, koj yuav tsum tau ntsib tau pom tiag tiag thiab muaj kev paub los ntawm txoj kev ntsib kev pom ntawd, thiab tau txog qhov kev to taub tiag tiag, cov lus ntawm qhov tseeb thiaj li yuav raug muab cog rau hauv koj lub siab. Qhov txheej txheem ntawm kev tau qhov tseeb yeej ib txwm zoo li no. Tej yam uas koj nco tau yog tej uas koj tau txais los ntawm koj tej kev ntsib kev pom; tej ntawd yog tej kev cim cia uas nyob tob tshaj plaws hauv koj. Yog li ntawd, hnub no thaum peb sib qhia txog lub ncauj lus ntawm cov tawm tsam khetos, Kuv thiaj li kom nej rov qab saib cov ntsiab lus no ua ntej. Nej tseem nco tau qee yam ntawm tej ntawd. Ntawm tej yam uas nej nco tau ntawd, qee yam yog kev xav rau nej xwb, tiam sis yeej muaj qee yam kev qhia tshwm ntawm cov tawm tsam khetos uas nej tuaj yeem muab piv rau lub neej tiag tiag yam tsis ntau los tsawg—txhua tus yuav tsum tau ntsib tau pom li no. Qhov xwm txheej uas ib txwm muaj rau tib neeg ntawd mas yog txawm zoo li lawv to taub zoo npaum li cas thaum mloog cov lus qhuab qhia los, lawv tsuas to taub raws li kev xav thiab raws li kev qhuab qhia xwb, thiab lawv tsis muaj kev paub txog qhov tseeb. Thaum twg ib tug neeg thiaj li tuaj yeem to taub qhov tseeb? Tsuas yog thaum ib tug neeg tau ntsib tau pom tej yam no lawm xwb mas lawv thiaj li tuaj yeem muaj kev paub tiag tiag. Yog tsis tau ntsib tau pom tej xwm txheej tiag tiag, yeej tsis muaj leej twg tuaj yeem tau txais kev paub li. Yog li ntawd, hnub no thaum peb sib qhia txog lub ncauj lus ntawm cov tawm tsam khetos no, thiaj li yuav tsum tau rov qab saib luv luv thiab muab ib qho kev ceeb toom yooj yim rau nej. Tom qab ntawd, txawm peb yuav sib qhia txog cov thawj coj thiab cov neeg ua hauj lwm tej luag hauj lwm los sis ntau yam kev qhia tshwm ntawm cov thawj coj cuav los xij, yam tsawg kawg qhov ntawd yuav tsis yog qhov khoob lug dhau rau nej—tsuas yog li ntawd xwb. Txawm li cas los xij, nej tseem yuav tsum tau paub tau pom ntau yam kev qhia tshwm ntawm cov tawm tsam khetos. Ib txhia hais tias, “Yog Vajtswv tsis tsim tsa qee cov tib neeg, xwm txheej, thiab yam khoom tiag tiag, peb yuav mus paub mus pom tej ntawd qhov twg? Peb yeej mus nrhiav cov tawm tsam khetos ntawm peb tus kheej tsis tau, tsis yog lod?” Koj tsis tas mus nrhiav. Txoj kev daws uas yooj yim tshaj plaws yog thaum koj ntsib cov tawm tsam khetos, siv zog kom ntau tshaj plaws los muab lawv piv nrog Vajtswv cov lus. Muab lawv tej kev nthuav tawm sab nraud, cov lus hais, tej kev ua, thiab tej moj yam, nrog rau lawv tej kev xav thiab tej kev xam pom, thiab haj tseem yog lawv txoj kev coj lawv tus kheej thiab kev ua neej nyob hauv lub ntiaj teb, lawv txoj kev ua neej, thiab lwm yam coj los piv—qhov ntawd yog, muab tej ntawd piv nrog kaum tsib yam kev qhia tshwm ntawm cov tawm tsam khetos uas peb tau tham txog ntawd. Muab tej ntawd piv kom ntau tshaj plaws li uas koj ua tau. Tib neeg txoj kev nkag siab yog zoo li no: Lawv nco qab tsis tau ntau yam vim tib neeg lub cim xeeb muaj qhov txwv. Tib neeg tuaj yeem hais tau zoo kawg nkaus txog tej yam uas lawv tau txais tiag tiag los ntawm lawv tus kheej txoj kev ntsib kev pom. Txawm lawv yuav hais ntau npaum li cas los xij, qhov ntawd tsis yog los ntawm kev nco tiam sis yog los ntawm kev ntsib kev pom thiab tej uas lawv tau ntsib dhau los. Tej yam uas lawv tau txais no yog tej uas ze tshaj plaws rau qhov tseeb thiab rau qhov uas muaj tiag—tej no yog tej yam uas tib neeg tau txais los ntawm kev ntsib kev pom. Dhau ntawm tej ntawd lawm, tej yam uas mus raws li tib neeg tej kev xav phem thiab kev xav hauv nruab siab thiab tej yam uas mus raws li kev paub ntawd yeej tsis mus raws li qhov tseeb, txawm hais tias tej ntawd tau los nyob hauv koj lub siab ua ntej thiab ua qhov tseem ceeb tshaj tau ntau xyoo npaum li cas los xij. Thaum koj to taub qhov tseeb tiag tiag lawm, tej yam no yeej yuav raug muab pov tseg thiab muab tso tseg. Txawm li cas los xij, tej yam uas ze rau qhov tseeb thiab mus raws li qhov tseeb, uas koj tau txais los ntawm kev ntsib kev pom ntawd, thiaj li yog tej uas muaj nqis. Txawm nej yuav to taub tshab cov lus nug uas Kuv tau nug hnub no los sis tsis to taub los xij, yeej muaj ib feem ntawm lub ncauj lus txog kev paub cais cov tawm tsam khetos uas nej tuaj yeem to taub tau, vim nej txhua tus tau ntsib tau pom qee txoj kev coj mus yuam kev thiab kev cuam tshuam los ntawm cov tawm tsam khetos. Qhov no tau muab kev paub cais me ntsis rau nej, thiab thaum nej ntsib cov tawm tsam khetos ua phem thiab cuam tshuam pawg ntseeg tes hauj lwm, tej qhov tseeb no tuaj yeem muaj txiaj ntsig rau nej. Cov lus no tsuas muaj txiaj ntsig thaum koj ntsib tej xwm txheej tiag tiag xwb. Yog koj tsis tau ntsib tau pom cov tawm tsam khetos txoj kev coj mus yuam kev thiab tsuas lam xav txog lawv tej kev ua los ntawm koj lub hlwb xwb, qhov no yeej tsis muaj txiaj ntsig. Txawm koj txoj kev xav hauv nruab siab yuav zoo npaum li cas los xij, qhov ntawd yeej tsis txhais hais tias koj tuaj yeem paub cais lawv li. Tsuas yog thaum ntsib tej xwm txheej tiag tiag xwb tib neeg thiaj li txawj teb rov qab raws li lawv lub peev xwm xeeb txawm, siv lawv tus kheej tej kev xav thiab kev xam pom, qee cov tswv yim uas lawv tau paub txog, thiab qee cov kev qhuab qhia, txoj kev, thiab hau kev uas lawv tau kawm dua, los ntsib thiab daws tej yam no, thiab thaum kawg ua ntau yam kev xaiv. Tiam sis ua ntej tib neeg ntsib tej yam no, yog lawv muaj kev nkag siab thiab kev cim cia uas yog txog ntau yam tswv yim xwb ces yeej zoo heev lawm. Ib txhia hais tias, “Qhov uas Koj hais cov lus ntau npaum li ntawd ua ntej peb ntsib cov tawm tsam khetos ntawd muaj qab hau dab tsi?” Qhov ntawd muaj qab hau. Cov lus uas nthuav tawm cov tawm tsam khetos ntawd tsis yog twb muab luam ua ib phau ntawv lawm lod? Cov lus ntawd puas yog ib yam uas koj tuaj yeem ntsib pom thiab pom tshab tau tag nrho hauv ib los sis ob hnub? Tsis yog. Lub hom phiaj ntawm qhov muab tej ntawd luam ua phau ntawv ntawd yog txhawm rau cawm nej thiab kom nej tuaj yeem nyeem cov lus no tas li, thiab to taub tej qhov tseeb no, nrog rau qhov nyeem Vajtswv cov lus thiab tau txais kev yug rau lub neej txoj sia thaum nej ntsib ntau yam xwm txheej yav tom ntej—txawm qhov ntawd yuav yog ib qho xwm txheej txog cov tawm tsam khetos, kev nyuaj hauv qhov hloov nej tus kheej tus moj yam, los sis lwm yam. Vajtswv cov lus hauv phau ntawv no yog lub hauv paus rau koj los ntsib pom thiab daws tej yam no thiab nkag mus rau hauv tej qhov tseeb sab no. Qhov uas koj to taub tau ntau npaum li cas thaum mloog cov lus qhuab qhia ntawd tsis sawv cev rau qhov uas koj muaj qhov muaj tiag ntau npaum li cas. Yog koj xav tsis tawm los sis nco tsis tau ib yam dab tsi rau ib lub sij hawm ntawd, qhov ntawd tsis tau txhais hais tias koj yeej yuav tsis tau ntsib tau pom qhov ntawd los sis yeej tsis to taub qhov ntawd yav tom ntej li. Muab hais luv luv tias, nej yuav tsum to taub tias tsuas yog tej yam uas tib neeg tau txais los ntawm kev ntsib kev pom thiab paub raws li Vajtswv cov lus xwb thiaj li muaj feem xyuam nrog qhov tseeb. Tej yam uas tib neeg nco tau thiab tej yam uas lawv to taub hauv lawv lub hlwb ntawd mas feem ntau tsis muaj feem xyuam nrog qhov tseeb; tej ntawd tsuas yog kev qhuab qhia xwb. Tej yam uas tseem ceeb tshaj plaws thaum hais txog qhov tseeb yog dab tsi? Tej yam uas tseem ceeb tshaj plaws yog kev ntsib kev pom thiab kev nkag mus rau hauv. Nrog rau txhua sab ntawm qhov tseeb mas, thaum tib neeg tau ntsib tau pom tiag tiag lawm, lawv qhov kev tau txais thaum kawg yog cov txiv ntawm qhov tseeb thiab yog txoj kev rau lawv qhov kev muaj sia nyob. Yog li ntawd, qhov tsis nco ntawd tsis yog ib qho teeb meem.

Thaum pib kev sib txoos ua ke, yog Kuv cia li pib tham txog lub ncauj lus tseem ceeb ncaj qha xwb, puas yog nej yuav ras tsis tau kom ncav sij hawm? Yog li ntawd, Kuv thiaj li yuav tsum tau siv qee txoj kev, thiab xub nug nej tias, “Nej puas nco qab qhov txawv ntawm cov tib neeg uas muaj cov tawm tsam khetos lub ntsiab tseeb thiab cov tib neeg uas muaj cov tawm tsam khetos tus moj yam?” Kuv lub hom phiaj ntawm qhov xub nug lo lus nug no tsis yog txhawm rau ua kom nej xav tsis tawm los sis nthuav nej tawm, tiam sis yog txhawm rau muab ib qho kev ceeb toom rau nej. Tom qab ntawd, peb rov qab saib dua, ces qee tus mam li maj mam nco tau tias: “Ua ntej ntawd peb tau sib qhia txog qhov tias cov tawm tsam khetos coj li cas rau qhov tseeb, thiab cov tawm tsam khetos txoj kev ua neeg zoo li cas.” Muaj qee cov ntsiab lus txog cov tawm tsam khetos tau cog nyob hauv koj lub siab tob tob lawm; cov ntsiab lus no tab tom tos kom koj muab los siv thaum koj ntsib tej xwm txheej zoo li no, los ua ib txoj kev taw qhia thiab kev taw kev rau koj txoj kev xyaum ua raws. Tiam sis tseem muaj ntau cov ntsiab lus uas koj tsis nco qab kiag li tom qab thawj zaug uas koj hnov lawm. Cov ntsiab lus no kuj cheem tsum kom tau ntsib tau pom thiab. Thaum koj dhau los ntawm tej kev ntsib kev pom no thiab tom qab ntawd noj thiab haus, thiab nyeem thov Vajtswv cov lus no, koj yuav tau txais ntau dua. Txawm qhov ntawd yuav yog cov ntsiab lus uas koj nco tau los sis nco tsis tau los xij, tom qab koj ntsib dhau los ntawm tej yam no lawm, txhua yam ntawd yuav sib xyaw ua ke. Cov kev qhuab qhia uas koj nco tau yuav dhau los ua koj txoj kev to taub tiag tiag thiab koj tej kev tau txais tom qab koj tau ntsib tau pom tej ntawd lawm. Hais txog cov ntsiab lus uas thaum ntawd koj tsis muaj ib qho kev nco txog li, tom qab tau ntsib tau pom ib zaug lawm, tej zaum koj yuav muaj kev nco me ntsis lawm; tiam sis qhov ntawd tsuas yog ib qho kev paub thawj theem xwb. Qhov kev paub los ntawm kev xav no tsuas tuaj yeem nyob ntawm theem kev qhuab qhia xwb. Koj tseem yuav tsum muaj kev ntsib kev pom uas zoo ib yam li ntawd dua, thaum ntawd xwb qhov ntawd thiaj li yuav coj koj kev, muab kev taw kev rau koj, thiab muab ib txoj kev rau koj ua raws. Qhov kev ntsib pom Vajtswv cov lus thiab ntsib pom qhov tseeb yog hom txheej txheem zoo li no. Puas yog ib qho txaj muag uas nej tsis paub teb lo lus nug uas Kuv nug? Qhov ntawd tsis txaj muag. Yog nej cia li nug kiag Kuv ib lo lus nug twg, Kuv kuj yuav tsum tau xav txog qhov ntawd tam sim ntawd thiab, xav tias lo lus nug ntawd txhais li cas thiab ntsig txog qhov tseeb sab twg. Tib neeg lub hlwb thiab lub siab xav ua hauj lwm zoo li no—tej ntawd cheem tsum lub sij hawm los teb rov qab. Txawm yuav yog ib yam dab tsi uas koj paub zoo heev los, yog koj tsis tau ntsib qhov ntawd ntau xyoo lawm, thaum koj rov ntsib dheev los koj yeej tseem yuav cheem tsum lub sij hawm los ras txog. Txawm koj tau ntsib tau pom ib yam dab tsi tob npaum li cas los xij, yog koj rov qab ntsib qhov ntawd tom qab ntau hnub los sis ntau xyoo, koj yeej tseem yuav cheem tsum lub sij hawm los teb rov qab—haj yam tsis tas hais txog, nej txoj kev to taub txog lub ncauj lus ntawm cov tawm tsam khetos tsuas nyob ntawm theem cov lus thiab cov kev qhuab qhia xwb, nej tseem tsis tuaj yeem muab qhov ntawd piv nrog cov tawm tsam khetos uas nej ntsib hauv lub neej tiag tiag tau, thiab yeej hais tau tias feem ntau nej yeej tseem tsis paub cais cov tawm tsam khetos li. Yog li ntawd, tej qhov tseeb no tab tom tos kom nej tau ntsib tau pom tiag tiag—tsuas yog ua li ntawd xwb nej thiaj li tuaj yeem paub tseeb txog qhov muaj tseeb thiab qhov yog ntawm Vajtswv cov lus. Piv txwv li, peb tau sib qhia ua ntej ntawd lawm tias cov tawm tsam khetos yeej tsis kam hloov dua siab tshiab kiag li. Yog koj muab kab lus no nco cia lawm thiab koj hais tias, “Vajtswv hais tias cov tawm tsam khetos yeej tsis kam hloov dua siab tshiab kiag li. Lawv yuav tawm tsam Vajtswv thiab tawm tsam Nws mus txog thaum kawg. Lawv tsis lees txais qhov tseeb thiab lawv yeej yuav tsis muaj hnub lees tias Vajtswv cov lus yog qhov tseeb, txawm yuav muaj dab tsi tshwm sim los xij. Lawv tsis nyiam qhov tseeb kiag li.” Koj tsuas yog to taub, lees txais, los sis cim tau kab lus no raws li txoj kev qhuab qhia xwb; tsuas yog qhov kev paub los ntawm kev xav me ntsis xwb. Nyob hauv koj lub siab tob tob, koj hnov tias cov lus no yog lawm, tiam sis cov tawm tsam khetos hais cov lus twg tiag tiag, nthuav tawm cov moj yam qias vuab tsuab twg, thiab raug tus yam ntxwv xeeb txawm twg tswj, nrog rau lwm yam ntxiv, thiaj li sib phim thiab sib haum nrog Vajtswv cov lus uas nthuav tawm cov tawm tsam khetos? Qhov twg ntawm tej ntawd tuaj yeem qhia tau tias Vajtswv txoj kev nthuav tawm yog qhov muaj tseeb? Qhov no cheem tsum kom koj ntsib ib tug tawm tsam khetos ntawm koj tus kheej kiag, los sis hnov los ntawm cov neeg uas tau pom hais txog ib tug tawm tsam khetos tej kev ua thiab tej lus hais, thiab thaum kawg, koj pom hais tias, “Vajtswv cov lus yeej muaj tiag heev, tej ntawd yog tag nrho lawm. Tus neeg no tau raug teem tias yog ib tug tawm tsam khetos thiab raug muab rho tawm ob peb zaug lawm. Txawm hais tias lawv tseem tsis tau raug muab ntiab tawm los sis ntsaig tawm mus los xij, lawv tej kev qhia tshwm thiab tej kev nthuav tawm qhia tias lawv tsis lees txais qhov tseeb kiag li, yeej tsis kam hloov dua siab tshiab kiag li, thiab tsis yog tsuas muaj cov tawm tsam khetos tus moj yam xwb tiam sis kuj muaj cov tawm tsam khetos tus yam ntxwv xeeb txawm lub ntsiab tseeb thiab—lawv yeej yog ib tug tawm tsam khetos tiag tiag.” Thiab muaj ib hnub, thaum tus neeg no raug ntiab tawm, koj paub tseeb hauv koj lub siab tias: “Vajtswv cov lus hais yog heev li! Cov tib neeg uas muaj cov tawm tsam khetos tus moj yam tuaj yeem hloov tau, tiam sis cov uas muaj cov tawm tsam khetos lub ntsiab tseeb yuav tsis hloov.” Cov lus no twb cog hauv paus rau hauv koj lub siab lawm. Qhov ntawd tsis yog ib qho kev nco tau los sis ib qho kev nco cia me ntsis xwb, thiab kuj tsis yog ib qho kev paub thawj theem xwb thiab. Tiam sis, koj to taub tob tob thiab lees txais Vajtswv cov lus: “Ib tug tawm tsam khetos yuav tsis hloov li; lawv yuav tawm tsam Vajtswv mus txog thaum kawg. Tos li uas Vajtswv tsis cawm lawv; tos li uas Vajtswv thiaj li tsis ua hauj lwm rau cov neeg zoo li no. Tos li uas lawv yeej tsis muaj kev qhia kom paub los sis qhov kaj thaum ua lawv tes dej num thiab tsis muaj kev loj hlob kiag li—lawv tau txiav txim siab yuav mus lawv tus kheej txoj kev. Qhov no yeej yog ib tug tawm tsam khetos tiag tiag!” Thaum koj paub tseeb txog qhov yog ntawm Vajtswv cov lus lawm, koj xav hauv koj tus kheej tias: “Vajtswv cov lus yeej yog qhov tseeb tiag tiag. Cov lus no yog lawm. Amees!” Qhov uas koj hais tias Amees ntawd txhais li cas? Qhov ntawd txhais hais tias los ntawm koj tej kev ntsib kev pom, koj tau to taub tias Vajtswv cov lus yog tus qauv ntsuas txhua yam, tias Vajtswv cov lus yog qhov tseeb, thiab tias txawm tiam no thiab noob neej no yuav ploj mus los, Vajtswv cov lus yeej yuav tsis ploj mus li. Vim li cas tej ntawd thiaj li yuav tsis ploj mus? Vim txawm yuav yog thaum twg los xij, cov tawm tsam khetos lub ntsiab tseeb yeej yuav tsis hloov li, thiab Vajtswv cov lus uas nthuav tawm cov tawm tsam khetos lub ntsiab tseeb ntawd los yeej yuav tsis hloov li. Txawm hais tias tiam no yuav ploj mus, txawm hais tias noob neej uas qias vuab tsuab no yuav ploj mus, Vajtswv cov lus no yeej yuav ib txwm yog qhov tseeb uas muaj tiag—yeej tsis muaj leej twg tuaj yeem tsis kam lees qhov no li. Qhov no yog Vajtswv txoj lus! Thaum koj hnov tias Vajtswv cov lus mus raws li thiab txuas nrog qhov muaj tseeb uas koj pom thiab ntsib, thiab koj lub siab tau txais kev paub tseeb, thiab qhov ntawd tsis yog ib qho kev xav tias Vajtswv cov lus yeej yuav tsum yog lawm los sis tias Vajtswv cov lus tsis yuam kev xwb, tiam sis koj tau pom thiab ntsib pom qhov ntawd ntawm koj tus kheej lawm, ces koj yeej yuav hais tias Amees rau Vajtswv cov lus. Thaum ntawd, yog Kuv rov nug dua tias, “Cov tib neeg uas muaj cov tawm tsam khetos lub ntsiab tseeb ntawd tej kev qhia tshwm yog dab tsi?” koj txoj kev to taub hauv nruab siab yuav tawm los tam sim ntawd. Koj yuav tsis yog tsuas muaj ib qho kev cim cia, ib kab lus uas nco tau, los sis ib hom kev paub txog los sis kev paub los ntawm kev xav xwb. Koj yuav hais tam sim ntawd tias, “Cov tawm tsam khetos yeej tsis lees txais qhov tseeb kiag li thiab yeej tsis kam hloov dua siab tshiab kiag li!” Txawm hais tias cov lus no yuav tsis muaj kev sib txuas raws laj thawj ntau, thiab txawm yog cia li hais tawm ib kab lus no tam sid, thaum xub thawj tib neeg yuav tsis to taub tias yog hais txog dab tsi, tiam sis koj paub tias kab lus no txhais li cas vim koj tau ntsib tau pom thiab pom qhov ntawd ntawm koj ob lub qhov muag lawm. Cov tawm tsam khetos yeej yog tej yam uas phem zoo li ntawd—lawv yeej yuav tsis muaj hnub hloov dua siab tshiab li. Cov lus no yuav tsum tau ntsib tau pom; leej twg uas tsis ntsib pom tej ntawd yeej yuav tsis tau txais dab tsi li.

Lub Kaum Hli Hnub Tim 2, Xyoo 2021