Zaum tas los, peb sib qhia txog cov thawj coj thiab cov neeg ua hauj lwm lub luag hauj lwm kaum peb: “Tiv thaiv cov neeg Vajtswv xaiv tseg kom tsis txhob raug cov tawm tsam khetos cuam tshuam, coj mus yuam kev, tswj, thiab rhuav tshem yam phem heev, thiab pab kom lawv paub cais cov tawm tsam khetos thiab tso cov tawm tsam khetos tseg kiag hauv lub siab tuaj.” Tam sim no, cia peb rov qab saib: Peb sib qhia txog tej yam ntxaws ntxaws twg uas ntsig txog lub ntsiab lus ntxaws ntxaws ntawm cov thawj coj thiab cov neeg ua hauj lwm lub luag hauj lwm kaum peb? (Peb sib qhia txog tsib yam: kev nthuav tawm, kev ntuas, kev txheeb xyuas, kev txwv, thiab kev saib xyuas.) Tsib yam no yog tej hauj lwm ntxaws ntxaws uas muaj feem xyuam nyob hauv cov thawj coj thiab cov neeg ua hauj lwm lub luag hauj lwm no; tej no yog tej hauj lwm ntxaws ntxaws uas cov thawj coj thiab cov neeg ua hauj lwm yuav tsum tau ua uas ntsig txog cov tawm tsam khetos. Yog li ntawd, cov thawj coj cuav muaj tej kev qhia tshwm dab tsi txog tej hauj lwm no? Zaum tas los puas yog peb tau sib qhia txog qee cov ntsiab lus kom ntxaws? (Yog.) Cov thawj coj cuav tej kev qhia tshwm muaj raws li no: Qhov ib yog qhov tias lawv ntshai tsam ua rau tib neeg chim ces thiaj li tsis muaj cuab kav muab cov tawm tsam khetos ntsaig tawm mus los sis muab cov tawm tsam khetos ntiab tawm mus. Qhov ob yog qhov tias lawv tsis muaj peev xwm paub cais cov tawm tsam khetos. Qhov peb yog qhov tias lawv ua ib lub kaus tiv thaiv cov tawm tsam khetos. Qhov plaub yog qhov tias lawv tsis ris lub luag hauj lwm rau cov neeg Vajtswv xaiv tseg. Qhov tsis ris lub luag hauj lwm ntawd zoo li cas? Thaum ntsib tej kev cuam tshuam thiab kev coj mus yuam kev los ntawm cov tawm tsam khetos, cov thawj coj cuav tiv thaiv tsis tau cov kwv tij thiab cov nkauj muam, muab cov tawm tsam khetos tej kev ua phem nthuav tawm tsis tau, muab Ntxwgnyoog tej tswv yim phem nthuav tawm tsis tau, thiab qhia tsis tau qhov tseeb los pab cov kwv tij thiab cov nkauj muam kom paub cais cov tawm tsam khetos—lawv tsis ua tes hauj lwm zoo li no. Tsis tas li ntawd xwb, rau cov uas muaj theem ntawm sab ntsujplig me thiab tsis muaj kev paub cais uas raug cov tawm tsam khetos coj mus yuam kev ntawd, lawv tsis yog tsis ua tes hauj lwm cawm rov qab los xwb, tiam sis kuj tseem hais tej lus uas tsis muaj kev ua neeg xws li “Tsim nyog lawv raug lawm” thiab. Qhov no yog ib qho kev qhia tshwm ntxaws ntxaws txog qhov tsis ris lub luag hauj lwm, uas qhia hais tias cov thawj coj cuav tsis muaj kev paub txog lub nra rau pawg ntseeg tes hauj lwm. Tej kev qhia tshwm no yog cov thawj coj cuav tej kev coj thiab tej kev ua ntxaws ntxaws thaum cov tawm tsam khetos coj cov neeg Vajtswv xaiv tseg mus yuam kev thiab cuam tshuam cov neeg Vajtswv xaiv tseg. Lawv tus cwj pwm tiag tiag uas coj rau tes hauj lwm no yog qhov tsis ris lub luag hauj lwm thiab tsis ua siab ncaj. Lawv hais ub hais no ntau yam thiab siv ntau txoj kev los qhib kev rau cov tawm tsam khetos, ua ib lub kaus tiv thaiv cov tawm tsam khetos, ho tsis tiv thaiv pawg ntseeg tes hauj lwm thiab cov cai thiab tej txiaj ntsim ntawm cov neeg Vajtswv xaiv tseg. Yog cov thawj coj cuav daws tau tej teeb meem xws li cov tawm tsam khetos cuam tshuam, coj mus yuam kev, tswj, thiab rhuav tshem cov neeg Vajtswv xaiv tseg yam phem heev tam sid, thiab tom qab ntawd muab cov tawm tsam khetos txwv, muab cais tawm, thiab muab ntsaig tawm mus los sis muab ntiab tawm mus, ces cov neeg Vajtswv xaiv tseg yuav tau txais txoj kev tiv thaiv uas loj tshaj plaws. Txawm li cas los xij, tam li yog cov thawj coj, lawv tsis muaj peev xwm ua tau tes hauj lwm no. Yog saib ntawm ib sab tuaj mas, yeej hais tau tias lawv tiv thaiv cov tawm tsam khetos thiab npaj kev rau cov tawm tsam khetos yam zais ntshis, ua li ntawd kom cov neeg ntawd thiaj li coj tau cov neeg Vajtswv xaiv tseg mus yuam kev, tswj tau cov neeg Vajtswv xaiv tseg, thiab rhuav tshem tau cov neeg Vajtswv xaiv tseg yam phem heev ntxiv mus, thiab cuam tshuam lub neej hauv pawg ntseeg uas ib txwm muaj thiab txoj kev ua tes dej num ntawm cov neeg Vajtswv xaiv tseg. Tej no yog cov thawj coj cuav ntau yam kev qhia tshwm.

Yam Kaum Plaub: Paub Cais Kom Ncav Sij Hawm, thiab Tom Qab Ntawd Muab Txhua Hom Tib Neeg Phem thiab Cov Tawm Tsam Khetos Ntsaig Tawm Mus los sis Ntiab Tawm Mus (Ntu Ib)

Tom qab sib qhia txog cov thawj coj thiab cov neeg ua hauj lwm lub luag hauj lwm kaum peb tas lawm, hnub no peb yuav sib qhia txog lub kaum plaub. Lub ntsiab lus ntawm lub luag hauj lwm kaum plaub no muaj qee yam zoo sib xws li lub kaum peb thiab. Tes hauj lwm ntxaws ntxaws uas cov thawj coj thiab cov neeg ua hauj lwm yuav tsum tau ua nyob rau hauv lub luag hauj lwm kaum plaub tsis yog tsuas muaj feem xyuam ntsig txog cov tawm tsam khetos xwb tiam sis kuj muaj feem xyuam nrog rau ntau hom tib neeg phem thiab, uas ua rau lub luag hauj lwm kaum plaub no tus ciaj ciam dav dua lub luag hauj lwm kaum peb lawm. Ua ntej yuav sib qhia txog lub luag hauj lwm kaum plaub, cia peb xub nyeem lub luag hauj lwm kaum plaub no lub ntsiab lus tso. (Cov thawj coj thiab cov neeg ua hauj lwm lub luag hauj lwm kaum plaub: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.”) Sob lus no tsis ntev, tiam sis thaum hais txog tes hauj lwm ntxaws ntxaws uas cov thawj coj thiab cov neeg ua hauj lwm yuav tsum tau ua ntawd, qhov ntawd tsis yooj yim li qhov uas pom nyob rau sab nraud. Cov thawj coj thiab cov neeg ua hauj lwm tej luag hauj lwm uas hais nyob hauv sob lus no yog dab tsi kiag? Leej twg yog cov uas cov thawj coj thiab cov neeg ua hauj lwm yuav tsum tau ua tes hauj lwm rau? (Txhua hom tib neeg phem thiab cov tawm tsam khetos.) Tes hauj lwm ntxaws ntxaws uas yuav tsum tau ua yog dab tsi? (Paub cais lawv kom ncav sij hawm. Thaum paub cais lawv lawm, muab lawv ntsaig tawm mus los sis muab ntiab tawm mus.) Qhov paub cais kom ncav sij hawm, yam tsis ncua sij hawm li; thaum pom tej yam ntxwv lawm, yuav tsum txiav txim thiab cais kom yog, tom qab ntawd mam li saib xyuas cov tib neeg uas muaj feem xyuam los ntawm qhov muab lawv ntsaig tawm mus. Tseeb tiag, tes hauj lwm ntxaws ntxaws uas cov thawj coj thiab cov neeg ua hauj lwm yuav tsum tau ua ntawd muaj ob yam: paub cais tib neeg thiab daws teeb meem. Nyob rau sab nraud mas, qhov ntawd zoo li yooj yim npaum li no: Xub paub cais, ces tom qab ntawd mam li nrhiav cov hau kev thiab kauj ruam los daws kom ncav sij hawm, tsi ntsees rau txhua hom tib neeg phem thiab cov tawm tsam khetos uas Vajtswv lub tsev cheem tsum kom muab ntsaig tawm mus los sis ntiab tawm mus. Yog saib los ntawm qhov no mas, qhov ntawd zoo li yooj yim rau cov thawj coj thiab cov neeg ua hauj lwm los ua tes hauj lwm no kom zoo thiab ua lub luag hauj lwm no kom tiav, yam tsis muaj kev nyuaj ntau, vim yav tas los Vajtswv lub tsev twb qhia txog tej ntsiab lus ntxaws ntxaws txog txoj kev paub cais thiab kev ntsaig ntau hom tib neeg tawm mus, uas twb hais ntau yam txog qhov teeb meem no lawm. Nyob rau sab nraud mas, tes hauj lwm uas muaj feem xyuam nrog lub luag hauj lwm kaum plaub ntawd zoo li muaj qee yam zoo sib xws li lub ntsiab lus ntxaws ntxaws ntawm lub luag hauj lwm kaum ob thiab kaum peb uas tau sib qhia nyob rau yav tas los lawm, tiam sis nyob hauv lub luag hauj lwm kaum plaub mas, cov neeg ntawm tes hauj lwm uas cov thawj coj thiab cov neeg ua hauj lwm ua rau ntawd tsis yog tsuas yog cov tawm tsam khetos xwb tiam sis kuj yog txhua hom tib neeg phem thiab. Qhov no ua rau tus ciaj ciam dav ntxiv mus txog ntau hom tib neeg phem, uas cheem tsum txoj kev sib qhia uas muaj kab muaj ke thiab ntxaws. Vim qhov ntawd tsis yog hais txog tej kev qhia tshwm ntawm ib hom tib neeg phem xwb, tiam sis yog ntau hom, thaum sib qhia txog cov thawj coj thiab cov neeg ua hauj lwm lub luag hauj lwm kaum plaub, peb yuav tsom ntsoov rau qhov qhia kom meej txog cov neeg ntawm tes hauj lwm no. Qhov no yog ib kis. Tsis tas li ntawd xwb, yuav coj li cas kiag rau cov tib neeg no—seb puas yuav muab lawv txwv, muab cais tawm, muab ntsaig tawm mus, los sis muab lawv ntiab tawm—yog qhov uas peb yuav sib qhia kom ntxaws ntxiv mus.

Pawg Ntseeg Yog Dab Tsi

Ua ntej yuav sib qhia txog tes hauj lwm no kom ntxaws, cia peb xub sib qhia txog ib lub ncauj lus sab nraud tso. Tej zaum sawv daws twb paub lub ncauj lus sab nraud no zoo lawm, los sis tej zaum nws yog ib lub ncauj lus uas nej tsis tau to taub meej txog. Lub ncauj lus ntawd yog dab tsi? Qhov ntawd yog qhov tias “Ib pawg ntseeg yog dab tsi?” Lub ncauj lus no zoo li cas? Tej zaum ib txhia tib neeg yuav hais tias, “Koj qhia txog cov thawj coj thiab cov neeg ua hauj lwm tej luag hauj lwm, yog li ntawd tsuas qhia txog qhov ntawd kiag xwb. Ua cas ho qhia txog qhov tias ib pawg ntseeg yog dab tsi? Qhov ntawd puas muaj feem xyuam rau lub ncauj lus no?” Nyob rau sab nraud mas, qhov ntawd zoo li tsis muaj feem xyuam, thiab tej zaum ib txhia haj tseem yuav hais tias, “Qhov no yog ib lub ncauj lus uas tsis muaj feem xyuam kiag li. Ua cas ho muab coj los qhia?” Txawm nej yuav xav li cas los xij, muab tej kev xav no tso tseg es xub ua tib zoo xav seb ib pawg ntseeg yog dab tsi. Tos thaum qhia meej txog lub ntsiab lus tshab txhais ntawm lo lus no, lub npe hu ua “pawg ntseeg” no lawm, ces nej yuav paub tias vim li cas peb thiaj li sib qhia txog lub ncauj lus no.

I. Ob Peb Qhov Kev To Taub Txog Pawg Ntseeg

Kev qhia txog qhov tias ib pawg ntseeg yog dab tsi ntawd yog kev muab ib qho kev piav qhia uas meej thiab yog txog lub npe hu ua “pawg ntseeg”; qhov ntawd txhais hais tias yog kev qhia txog lub ntsiab lus tshab txhais uas ntxaws ntxaws thiab yog ntawm lo lus “pawg ntseeg.” Ua ntej tshaj, nej tham tau txog qhov tias nej to taub thiab nkag siab li cas txog lo lus “pawg ntseeg.” Ib pawg ntseeg yog dab tsi? Cia peb pib ntawm qhov kev piav qhia raws li kev xav tso ces tom qab ntawd mam li mus rau ib lub ntsiab lus tshab txhais uas ntxaws dua thiab muaj tiag dua me ntsis. (Kuv qhov kev to taub mas yog qhov hais tias ib qho chaw uas cov kwv tij thiab cov nkauj muam uas ua lub siab dawb paug ntseeg Vajtswv thiab caum qhov tseeb tuaj sib sau ua ke pe hawm Vajtswv ntawd yog hu ua ib pawg ntseeg.) Lub ntsiab lus tshab txhais no yog hais txog qhov tias ib pawg ntseeg yog hom chaw zoo li cas; yeej yog hais txog ib yam khoom uas pom tau thiab tuav tau. Qhov no yog ib lub ntsiab lus tshab txhais raws li kev xav. Lub ntsiab lus tshab txhais no puas yog? Puas muaj tej uas tsis yog li? Yog hais raws li kev xav mas, lub ntsiab lus tshab txhais no yeej yuav tau lawm. Leej twg muaj ntxiv thiab? (Kuv ntxiv me ntsis. Vim Vajtswv qhov kev tshwm sim thiab tes hauj lwm, thiab qhov uas Nws nthuav qhov tseeb tawm, thiaj li muaj ib pab neeg uas raws Vajtswv qab; pab pawg uas lawv tsim los ntawd yog hu ua ib lub pawg ntseeg.) Lub ntsiab lus tshab txhais no piav qhia txog qhov tias ib pawg ntseeg yog ib pab pawg zoo li cas. Qhov no kuj yog ib lub ntsiab lus tshab txhais raws kev raws cai, raws li kev xav thiab. (Kuv yuav ntxiv hais tias pab neeg no muaj Vajntsujplig tes hauj lwm, thiab thaum lawv tuaj sib txoos ua ke tuaj nyeem Vajtswv cov lus, muaj Vajntsujplig txoj kev qhia kom paub, thiab lawv muaj peev xwm ua raws li qhov tseeb thiab loj hlob hauv lub neej txoj sia. Ib pawg ntseeg yog ib qho kev sib txoos ua ke ntawm cov tib neeg zoo li no.) Nov yog qhov ntxiv rau lub ntsiab lus tshab txhais ntawm ib pawg ntseeg uas piav qhia txog qhov tias yog ib qho kev sib txoos ua ke zoo li cas—tej yam uas yuav tsum muaj rau qhov kev sib txoos ua ke no yog noj thiab haus Vajtswv cov lus, muaj Vajntsujplig tes hauj lwm, thiab loj hlob hauv lub neej txoj sia. Raws li lub hauv paus mas, qhov no kuj yog ib lub ntsiab lus tshab txhais uas raws kev raws cai, raws li kev xav ntawm ib pawg ntseeg thiab. Puas muaj dab tsi ntxiv lawm? (Qhov ntawd yog ib pab neeg uas muab Vajtswv cov lus los ua lub hauv paus ntsiab lus ntawm txoj kev ua raws, thiab qhov ntawd yog tswj hwm los ntawm qhov tseeb thiab Khetos. Pab pawg no tuaj yeem ntsib pom Vajtswv tes hauj lwm, lees txais qhov tseeb, loj hlob hauv lub neej txoj sia, thiab tau txais kev cawm dim. Ib pab pawg zoo li no yog hu ua ib pawg ntseeg.) “Pab pawg” no yeej ib yam nkaus li “pab pawg” uas nyuam qhuav hais tas ntawd. Puas muaj dab tsi ntxiv lawm? Yog nej tsis muaj dab tsi ntxiv lawm no ces nej rov qab hais tau plaub qhov kev to taub uas hais los saum no; uas yog, qhov uas koj ib txwm xav tias lub ntsiab lus tshab txhais ntawm ib pawg ntseeg yog dab tsi kiag txij thaum pib ntawm koj txoj kev ntseeg Vajtswv los txog tam sim no. Qhov muab tshab txhais raws li kev xav ntawd yuav tsum yooj yim, puas yog? Piv txwv li, yeej muab ib pab pawg neeg uas ua siab dawb paug caum thiab pe hawm Vajtswv ntawd hu tau tias yog ib pawg ntseeg; los sis yeej muab ib pab uas ua raws li Vajtswv lub siab nyiam, caum txoj kev zwm rau Vajtswv, thiab pe hawm Vajtswv ntawd hu tau tias yog ib pawg ntseeg; los sis yeej muab ib pab uas muaj Vajntsujplig tes hauj lwm, muaj Vajntsujplig txoj kev coj qhia, thiab muaj Vajtswv nrog nraim, thiab muaj peev xwm pe hawm Vajtswv ntawd hu tau tias yog ib pawg ntseeg. Tej no puas yog tej ntsiab lus tshab txhais raws li kev xav txog ib pawg ntseeg? (Yog.) Nej txhua tus to taub thiab paub txog lub ntsiab lus ntawm cov lus piav ntxiv txog lub ntsiab lus tshab txhais ntawm ib pawg ntseeg no lawm, puas yog? (Yog.) Yog li ntawd, rov qab hais dua. (Ib pawg ntseeg yog hais txog ib pab pawg neeg uas ua siab dawb paug ntseeg Vajtswv thiab caum Khetos. Ib pawg ntseeg tseeb yeej muaj Vajntsujplig tes hauj lwm thiab muaj Vajtswv txoj kev coj qhia; pawg ntseeg ntawd yog tswj hwm los ntawm Khetos thiab qhov tseeb, pawg ntseeg ntawd yog qhov chaw uas cov neeg raws Vajtswv qab noj thiab haus Vajtswv cov lus, ntsib pom Vajtswv tes hauj lwm, thiab muaj kev nkag mus rau hauv lub neej txoj sia. Qhov no thiaj li yog ib pawg ntseeg tseeb. Ib pawg ntseeg mas txawv ntawm cov zej zog ntawm sab kab lis kev cai ntseeg. Ib pawg ntseeg tsis ua tej kab lis kev cai ntseeg qub los sis tej kev pe hawm Vajtswv uas yog ua rau sab nraud xwb.) Qhov no yeej yog lub hauv paus tshab txhais uas raws li kev xav txog ib pawg ntseeg. Piv txwv li, qhov muab ib pawg ntseeg tshab txhais tias yog ib qho chaw uas Vajtswv hu tib neeg tuaj sib sau ua ke, los sis muab ib pawg ntseeg tshab txhais tias yog ib pab pawg neeg uas ua siab dawb paug ntseeg, caum, zwm rau, thiab pe hawm Vajtswv, los sis muab ib pawg ntseeg tshab txhais tias yog cov neeg uas Vajtswv hu tuaj sib txoos ua ke, thiab lwm yam ntxiv—tej npe hu no qhia txog qee qhov kev to taub los sis qee lub ntsiab lus tshab txhais theem hauv paus ntawm ib pawg ntseeg uas hu los ntawm ntau pab neeg ntseeg. Cia peb tsis txhob hais txog qhov uas ntau txoj kev ntseeg thiab ntau pab ntseeg ntawm sab kab lis kev cai ntseeg muab ib pawg ntseeg tshab txhais li cas kiag—rau peb cov uas raws Vajtswv qab ne, lub ntsiab lus tshab txhais ntawm ib pawg ntseeg yog dab tsi? Qhov ntawd yog ib pab neeg uas ua siab dawb paug ntseeg Vajtswv, muaj Vajntsujplig tes hauj lwm, muaj Vajtswv txoj kev coj qhia, tuaj yeem noj thiab haus Vajtswv cov lus, caum qhov tseeb, caum txoj kev zwm rau Vajtswv, thiab pe hawm Vajtswv. Txawm yog muab ib pawg ntseeg tshab txhais tias yog ib qho chaw, ib pab pawg, ib qho kev sib txoos ua ke, ib pab, ib lub zej zog, los sis lwm yam los xij—txawm yuav siv lo lus twg los xij—raws li lub hauv paus, tej uas tsim nyog rau lub ntsiab lus tshab txhais ntawd yeej yog tej no xwb. Yog saib los ntawm tib neeg qhov kev to taub theem hauv paus txog ib pawg ntseeg, los ntawm tej uas tsim nyog uas nej siv los tshab txhais lub npe “pawg ntseeg” ntawd, yeej pom tau meej tias thaum tib neeg raws Vajtswv qab thiab to taub qee qhov tseeb lawm, lawv qhov kev to taub txog ib pawg ntseeg ces yuav tsis yog ib lub zej zog los sis ib pab dog dig ntxiv lawm. Tiam sis, qhov ntawd muaj feem xyuam ntsig txog qhov ua siab dawb paug ntseeg Vajtswv, qhov nyeem Vajtswv cov lus, qhov muaj Vajntsujplig tes hauj lwm, thiab qhov muaj peev xwm zwm rau Vajtswv thiab pe hawm Vajtswv, los sis qhov uas ntsig txog tej kis uas muaj feem xyuam rau txoj kev nkag mus rau hauv lub neej txoj sia, qhov hloov tus moj yam, qhov ua tim khawv rau Vajtswv, thiab rau lwm yam ntxiv. Yog saib raws li no mas, tom qab Vajtswv tau pib ua Nws tes hauj lwm lawm, lub npe “pawg ntseeg” uas nyob hauv tib neeg feem coob lub siab twb muaj ib qho kev to taub thiab kev nkag siab tob dua, muaj tiag dua, thiab yog qhov uas haum nrog Vajtswv lub siab xav ntawm ib pawg ntseeg lawm. Pawg ntseeg ntawd tsis yog ib yam uas yooj yim li ib lub tsev, ib lub zej zog hauv ntiaj teb, ib chav hauj lwm, ib lub koom haum, los sis lwm yam ntxiv lawm; tiam sis, qhov ntawd muaj feem xyuam ntsig txog tej yam xws li kev ntseeg Vajtswv, Vajtswv cov lus, qhov tseeb, thiab kev pe hawm Vajtswv.

II. Qhov Muaj Nqis ntawm Qhov Muaj ib Pawg Ntseeg thiab Tes Hauj Lwm Uas Pawg Ntseeg ntawd Ua

Hais txog lub tswv yim thiab lub ntsiab lus tshab txhais tiag tiag ntawm ib pawg ntseeg ntawd, tam sim no peb yuav tsis maj txiav txim tias yog dab tsi. Tom qab nej muaj ib lub tswv yim theem hauv paus txog lub npe “pawg ntseeg” los sis pawg ntseeg ntawd lub ntsiab lus tshab txhais lawm, nej puas paub meej txog tej yam muaj nqis ntawm qhov muaj ib pawg ntseeg, tes hauj lwm uas tsim tau los ntawm qhov muaj ib pawg ntseeg, thiab lub luag hauj lwm uas ib pawg ntseeg ua nyob rau hauv cov tib neeg? Lub ntsiab lus ntawm tej no puas muaj feem xyuam ntsig txog rau lub ntsiab lus tshab txhais ntawm ib pawg ntseeg thiab? Muab hais kom yooj yim, tes hauj lwm uas ib pawg ntseeg ua ntawd yog qhov muaj nqis ntawm qhov muaj pawg ntseeg ntawd. Muab ib lub tsev los ua piv txwv—lub hom phiaj ntawm lub tsev no yog dab tsi? Qhov muaj nqis thiab qhov tseem ceeb ntawm lub tsev ntawd rau cov neeg uas nyob hauv thiab siv lub tsev ntawd yog dab tsi? Yam tsawg kawg mas, lub tsev ntawd tiv thaiv cua thiab nag, uas yog ib qho uas muaj nqis ntawm lub tsev ntawd; lwm qhov uas muaj nqis ces yog thaum koj sab sab tsis muaj chaw mus lawm, ib lub tsev yog ib qho chaw uas koj so tau thiab nyob yam kaj siab lug thiab txaus siab hlo. Lub tsev no yog hu ua ib lub tsev, tiam sis lub tsev no lub luag hauj lwm rau koj yog dab tsi? Nws tiv thaiv cua thiab nag, yog chaw so, chaw kaj siab, qhov muaj peev xwm xyiv fab rau txoj kev ywj siab, thiab lwm yam; tej luag hauj lwm no yog qhov muaj nqis ntawm lub tsev no rau koj. Tam sim no, ib zaug dua ntxiv, lub luag hauj lwm ntawm ib pawg ntseeg yog dab tsi? Qhov muaj nqis thiab qhov tseem ceeb ntawm qhov tsim muaj pawg ntseeg thiab qhov muaj pawg ntseeg ntawd yog dab tsi? Muab hais kom yooj yim ces, ib pawg ntseeg ua dab tsi, pawg ntseeg ntawd ua lub luag hauj lwm dab tsi? Nej puas paub meej txog qhov no? Tes hauj lwm tiag tiag twg los sis hom hauj lwm twg uas ib pawg ntseeg yuav tsum ua, thiab tus ciaj ciam ntawm pawg ntseeg ntawd tes hauj lwm yuav tsum muaj dab tsi, es thiaj li raug hu tau tias yog ib pawg ntseeg, es tes hauj lwm no thiaj li yog qhov uas ib pawg ntseeg tseeb yuav tsum ua? Qhov no yog qee lub ntsiab lus ntxaws ntxaws uas yuav tsum tau sib qhia txog lub ntsiab lus tshab txhais ntawm ib pawg ntseeg. Ua ntej tshaj, ib pawg ntseeg ua tes hauj lwm dab tsi kiag? (Tseem ceeb mas, pawg ntseeg ntawd tshaj tawm Vajtswv cov lus, ua tim khawv rau Vajtswv tes hauj lwm, thiab nthuav dav txoj moo zoo, ua kom muaj neeg coob ntxiv los rau ntawm Vajtswv lub xub ntiag thiab lees txais Nws txoj kev cawm dim.) Qhov no puas yog ib teg hauj lwm ntxaws ntxaws? (Yog.) Qhov no yog qhov tseem ceeb ntawm qhov muaj ib pawg ntseeg thiab yog ib teg ntawm tej hauj lwm ntxaws ntxaws uas ib pawg ntseeg yuav tsum tau ua, tiam sis tsis yog txhua yam. Qhov kev tshaj tawm Vajtswv cov lus thiab kev ua tim khawv rau Vajtswv tes hauj lwm yog ib teg hauj lwm ntxaws ntxaws. Leej twg yog tus leg lub luag hauj lwm rau tes hauj lwm no? Qhov ntawd yog pab tshaj tawm txoj moo zoo tam sim no. Ib pawg ntseeg ua lwm tes hauj lwm dab tsi thiab? (Npaj kom cov kwv tij thiab cov nkauj muam tuaj sib txoos ua ke, noj thiab haus Vajtswv cov lus, thiab sib qhia Vajtswv cov lus, pab kom lawv to taub qhov tseeb ntxiv mus thiab ua lawv tej dej num li ib txwm.) Tes hauj lwm ntxaws ntxaws no yog coj tib neeg los noj thiab haus Vajtswv cov lus, kom to taub qhov tseeb, thiab kom ua lawv tej dej num li ib txwm. Qhov tshaj tawm Vajtswv cov lus ntawd yog ib teg hauj lwm loj thiab tseem ceeb ntawm pawg ntseeg. Qhov coj tib neeg los noj thiab haus Vajtswv cov lus, to taub qhov tseeb, thiab ua lawv tej dej num li ib txwm ntawd yog tes hauj lwm uas yog lub ntsiab tseeb ntawm ib pawg ntseeg; qhov no yog taw nyob rau sab hauv tuaj. Ob teg hauj lwm no, ib teg rau sab nraud thiab ib teg rau sab hauv, yog tes hauj lwm uas tsim los ntawm qhov muaj ib pawg ntseeg. Kuj hais tau tias yog ob teg hauj lwm tseem ceeb uas ib pawg ntseeg yuav tsum tau ua thiab. Puas muaj lwm tes hauj lwm lawm? (Lwm tes hauj lwm ces yog qhov coj tib neeg los ntsib pom Vajtswv txoj kev txiav txim kom thiaj li raug ntxuav kom dawb huv thiab ua rau tus moj yam hloov.) Qhov no yog ib teg hauj lwm ntxaws ntxaws nyob rau sab hauv ntawm ib pawg ntseeg. Txhua tes hauj lwm uas nej tau hais no yeej yog tej uas sawv cev tau. Qhov ntsib pom Vajtswv tes hauj lwm, xws li qhov ntsib pom ntau qhov xwm txheej, qhov ntsib pom txoj kev txiav txim, kev rau txim, kev ntuas, thiab lwm yam ntxiv, es thaum kawg ua rau tus moj yam hloov thiab tau txais kev cawm dim ntawd yog ib teg hauj lwm ntxaws ntxaws. Qhov no yog cov txiaj ntsig thiab qhov ua tau uas qhov tsim muaj ib pawg ntseeg thiab qhov muaj ib pawg ntseeg ntawd ua rau tib neeg. Tes hauj lwm tshaj tawm Vajtswv cov lus thiab qhov ua tim khawv rau Vajtswv ntawd tsis yog pab pawg tshaj tawm txoj moo zoo ua xwb; tes hauj lwm ntawd kuj yog ua tiav los ntawm ntau cov ntawv lus tim khawv uas hais txog txoj kev ntsib kev pom, cov nkauj qhuas Vajtswv, ntau yam vis dis aus thiab yeeb yaj kiab, thiab lwm yam, uas kuj yog cov ntsiab lus ntxaws ntxaws thiab tej yam ntxaws ntxaws uas muaj nyob hauv tes hauj lwm tshaj tawm Vajtswv cov lus thiab. Tsis tas li ntawd xwb, tseem muaj tej hauj lwm uas muaj feem xyuam ntsig txog lub neej hauv pawg ntseeg thiab xws li qhov noj thiab haus Vajtswv cov lus kom thiaj li to taub qhov tseeb, qhov muaj peev xwm zwm rau Vajtswv thiab paub Vajtswv, thiab kev ntsib kev pom Vajtswv tes hauj lwm thiab ntau yam xwm txheej uas Vajtswv tau tsim tsa rau thaum lub sij hawm ua tej dej num kom thiaj li ua rau tus moj yam hloov thiab tau txais kev cawm dim. Tej no yog ob peb yam hauj lwm uas tsim los ntawm lub hauv paus ntawm qhov muaj ib pawg ntseeg tom qab uas tau tsim muaj pawg ntseeg ntawd lawm. Dhau li ntawm cov hauj lwm loj no lawm, puas muaj cov hauj lwm ntxiv sab nraud thiab? Cov hauj lwm ntxiv sab nraud yog dab tsi? Cov hauj lwm no yog hais txog tej hauj lwm uas tsis tseem ceeb los sis tej hauj lwm dav dav, uas, txawm li cas los xij, kuj muaj txiaj ntsim me ntsis rau cov neeg Vajtswv xaiv tseg hauv txoj kev caum qhov tseeb thiab ua lawv tej dej num thiab; tes hauj lwm no muaj txiaj ntsig zoo rau tib neeg lub neej txoj sia loj hlob thiab hloov lawv txoj kev xam pom txog ntau yam. Nyob rau hauv qee qhov xwm txheej tshwj xeeb, tej hauj lwm dav dav uas muaj feem xyuam ntsig txog tib neeg txoj kev ua neej nyob ntawm sab cev nqaij daim tawv uas tshwm sim los ntawm pawg ntseeg tes hauj lwm ntawd puas suav tias yog tes hauj lwm uas yuav tsum tau ua ntawm ib pawg ntseeg? Piv txwv li, kev ua liaj ua teb, kev yug tsiaj, thiab lwm yam hauj lwm uas muab cov zaub mov uas tim tsum rau cov uas ua lawv tej dej num—puas suav tej no li yog tes hauj lwm uas yog lub ntsiab tseeb ntawm ib pawg ntseeg? (Tsis suav.) Yog li hais txog kev muab khoos phis tawj, cuab yeej khoom siv, thiab lwm yam rau cov uas ua lawv tej dej num ne—tej no puas suav tias yog tes hauj lwm uas yog lub ntsiab tseeb ntawm ib pawg ntseeg? (Tsis suav.) Yog li ntawd tes hauj lwm uas yog lub ntsiab tseeb ntawm ib pawg ntseeg ntawd yog hais txog dab tsi? Qhov no muaj feem xyuam rau lub ntsiab lus tshab txhais ntawm ib pawg ntseeg. Nej lub ntsiab lus tshab txhais ntawm ib pawg ntseeg nyuam qhuav los ntawd yeej zoo lawm; Kuv txaus siab kawg rau tej ntawd vim tej uas tsim nyog nyob rau hauv nej lub ntsiab lus tshab txhais ntawd muaj feem xyuam ntsig txog rau qhov tseeb uas siab dua xws li tib neeg txoj kev nkag mus rau hauv lub neej txoj sia, lawv txoj kev ntseeg thiab txoj kev raws Vajtswv qab, txoj kev paub Vajtswv tseeb, thiab tseem yog tus moj yam hloov, kev zwm rau Vajtswv, thiab kev pe hawm Vajtswv thiab. Yog saib raws li qhov no mas, qhov muaj ib pawg ntseeg ntawd yeej tsis yog vim tej yam uas muaj feem xyuam ntsig txog tib neeg lub neej ntawm sab cev nqaij daim tawv thiab tej txiaj ntsim li, xws li qhov ua kom lawv sov thiab kom muaj mov noj, ua kom lawv muaj kev noj qab nyob zoo, los sis saib xyuas lawv lub neej yav tom ntej. Tsis yog muaj ib pawg ntseeg los txhawb tib neeg txoj kev ua neej nyob ntawm sab cev nqaij daim tawv los sis tsis yog los ua kom tib neeg muaj peev xwm xyiv fab rau lub neej ntawm sab cev nqaij daim tawv kom zoo dua. Ib txhia neeg hais tias, “Qhov ntawd tsis yog lawm. Peb lub neej ntawm sab cev nqaij daim tawv thiab kev ua neej nyob yeej muab hais nyob hauv Vajtswv cov lus, uas qhia kom peb kawm qee yam txuj ci tshiab thiab muaj kev paub txog kev noj kev nyob kom thiaj li noj qab nyob zoo. Tej no tsis muaj feem xyuam ntsig txog rau peb txoj kev ua neej nyob lod?” Tej no puas suav tias yog tes hauj lwm uas yog lub ntsiab tseeb ntawm ib pawg ntseeg? (Tsis suav.) Vim pawg ntseeg yog tsim los ntawm cov ntseeg Vajtswv ces tib neeg lub neej thiaj li yeej ib txwm muaj feem xyuam rau tej zaub mov, khaub ncaws hnav, chaw nyob, kev mus los, thiab tej khoom uas tim tsum siv txhua hnub, ib pawg ntseeg thiaj li cia li pab tib neeg daws tej teeb meem no. Thaum daws tau tej no lawm, tib neeg txawm xav tias, “Pawg ntseeg kuj ris lub luag hauj lwm rau peb tej kev tim tsum txhua hnub thiab. Qhov no yog pawg ntseeg tes hauj lwm uas ib txwm ua thiab yog pawg ntseeg tes hauj lwm uas yog lub ntsiab tseeb.” Qhov no puas yog ib qho kev to taub yuam kev? (Yog.) Dab tsi ua rau muaj qhov kev to taub yuam kev no? (Lawv tsis paub meej txog tias tes hauj lwm uas yog lub ntsiab tseeb ntawm ib pawg ntseeg yog dab tsi.) Vim li cas lawv thiaj li haj tseem tsis paub meej txog qhov no tam sim no thiab? Puas yog lawv txoj kev nkag siab muaj ib qho teeb meem lawm? (Yog.) Vim li cas lawv txoj kev nkag siab thiaj li muaj ib qho teeb meem? Qhov no yog teeb meem ntawm lub peev xwm. Thaum kawg, qhov ntawd yog vim lub peev xwm tsis zoo.

Hais txog tes hauj lwm uas yog lub ntsiab tseeb ntawm ib pawg ntseeg, nyuam qhuav ntawd hais txog peb yam: Yam ib yog ua tim khawv rau Vajtswv thiab tshaj tawm Vajtswv cov lus. Lwm yam yog coj tib neeg los noj thiab haus Vajtswv cov lus, nkag mus rau hauv qhov muaj tiag ntawm Vajtswv cov lus, thiab pab tib neeg kom to taub qhov tseeb, ua raws li Vajtswv cov lus, thiab ua lawv tej dej num kom zoo dua. Thiab lwm yam yog coj tib neeg los ntsib pom Vajtswv tes hauj lwm, los ntsib pom Vajtswv lub hwj chim kav, thiab muab lawv tus moj yam qias vuab tsuab tso tseg kom thiaj li hloov tau tus moj yam raws li txoj kev to taub Vajtswv cov lus. Txhua yam no yog tsom ntsoov rau qhov kom tib neeg tau txais kev cawm dim. Nej xaus lus txog peb yam no zoo kawg li; peb yam no yog tes hauj lwm uas ib pawg ntseeg yuav tsum tau ua thiab yog qhov muaj nqis thiab qhov tseem ceeb ntawm qhov muaj ib pawg ntseeg rau tib neeg ntiaj teb, rau cov tswv cuab hauv pawg ntseeg, thiab rau cov neeg Vajtswv xaiv tseg. Tiam sis qhov no tseem tsis tau txhij txhua. Dhau li ntawm cov hauj lwm uas yog lub ntsiab tseeb no mus lawm, rov qab xav dua seb tib neeg tau txais lwm yam txiaj ntsim tseem ceeb twg dhau li ntawm qhov tau ntsib tau pom tes hauj lwm uas pawg ntseeg ua no lawm. (Tib neeg kawm paub cais ntau hom tib neeg, xwm txheej, thiab yam khoom.) Qhov paub cais ntau hom tib neeg, xwm txheej, thiab yam khoom ntawd mas yeej ze lawm; qhov ntawd muaj feem xyuam ntsig txog tes hauj lwm uas yog lub ntsiab tseeb ntawm ib pawg ntseeg. Thaum peb hais txog tes hauj lwm uas yog lub ntsiab tseeb ntawd, yog peb hais txog tej hauj lwm uas sawv cev tau. Tej uas peb nyuam qhuav sib qhia tas ntawd yog tej txiaj ntsim zoo uas tib neeg tau txais, los sis yog ib txhia ntawm tes hauj lwm uas pawg ntseeg ua uas tib neeg ua los sis tau ntsib tau pom lawm. Dhau li ntawm cov hauj lwm uas yog lub ntsiab tseeb no mus lawm, lwm qhov muaj nqis ntawm qhov muaj ib pawg ntseeg ntawd yog kev pab tib neeg kom to taub txog tib neeg ntiaj teb, lub ntiaj teb, thiab lub zog ntawm txoj kev tsaus ntuj. Qhov no puas yog ib teg hauj lwm uas yog lub ntsiab tseeb ntawm ib pawg ntseeg uas dhau ntawm peb teg hauj lwm uas nej tau sib qhia ntawd lawm? Qhov no puas yog ib teg hauj lwm ntxaws ntxaws? (Yog.) Muab piv rau thawj peb teg hauj lwm ntawd, qhov no suav tias yog ib teg hauj lwm ntxiv sab nraud. Vim li cas thiaj li suav tias yog tes hauj lwm ntxiv sab nraud? Vim qhov ntawd yog ib qho txiaj ntsig uas tib neeg tau los ntawm qhov tau ntsib tau pom thawj peb teg hauj lwm ntawd—qhov ntawd yog tau los ntawm qhov ntsib pom Vajtswv tes hauj lwm, qhov noj thiab haus Vajtswv cov lus, qhov to taub qhov tseeb, qhov to taub txog tus kheej tus moj yam qias vuab tsuab, thiab qhov paub Vajtswv. Qhov txiaj ntsig no yog qhov uas tib neeg los to taub txog cov tib neeg ntiaj teb lim hiam no, lub ntiaj teb tsaus ntuj no, thiab lub zog ntawm txoj kev tsaus ntuj. Tam sim no ua puas tau tiav ib feem ntawm qhov ntawd? (Ua tau lawm.) Qhov no tsis yog qhov muaj nqis ntawm qhov muaj ib pawg ntseeg lod? Qhov no tsis yog lub luag hauj lwm thiab qhov txiaj ntsig uas qhov muaj ib pawg ntseeg yuav tsum muaj rau cov uas raws Vajtswv qab lod? (Yog.) Ib qho mas, muaj qhov txiaj ntsig tiag tiag no; tsis tas li ntawd xwb, cov pawg ntseeg kuj mob siab thiab nquag ua tes hauj lwm no thiab. Muaj tej hauj lwm tiag tiag twg uas muaj feem xyuam nyob hauv tes hauj lwm no? Piv txwv li, cov yeeb yaj kiab uas hais txog cov neeg Vajtswv xaiv tseg raug ntes thiab raug tsim txom—ib qho mas, tej no yog cov lus tim khawv uas tsim los ntawm cov uas raws Vajtswv qab thaum lawv raug Ntxwgnyoog txoj kev tsim txom uas phem heev; lwm qhov mas, tej no nthuav tawm txog qhov uas cov tib neeg ntiaj teb lim hiam no, lub ntiaj teb tsaus ntuj no, thiab lub hwj chim tsaus ntuj tawm tsam thiab teem txim rau Vajtswv thiab qhov tseeb, nrog rau ntau txoj kev uas lawv tsim txom cov uas raws Vajtswv qab yam phem heev. Thaum muab tej no nthuav tawm, cov yeeb yaj kiab pab kom tib neeg to taub txog tib neeg ntiaj teb, lub ntiaj teb, thiab lub hwj chim ntawm txoj kev tsaus ntuj los ntawm qhov no. Ib txhia neeg hais tias, “Koj txhais li cas txog qhov uas to taub txog tib neeg ntiaj teb thiab lub ntiaj teb ntawd?” Nej txhua tus xav tias qhov ntawd txhais li cas? (To taub txog txoj kev tsaus ntuj thiab txoj kev lim hiam ntawm tib neeg ntiaj teb thiab lub ntiaj teb, nrog rau txoj kev to taub txog lub ntsiab tseeb ntawm tag nrho cov tib neeg ntiaj teb uas yog Vajtswv cov yeeb ncuab.) Yog lawm. Qhov ntawd txhais hais tias yog kev to taub txog txoj kev lim hiam thiab txoj kev tsaus ntuj ntawm tib neeg ntiaj teb, txoj kev to taub txog lub ntsej muag phem thiab qhov tseeb tiag ntawm tag nrho cov tib neeg uas yog Vajtswv cov yeeb ncuab. Cov vis dis aus uas hais txog kev tsim txom los sis cov lus tim khawv uas hais txog txoj kev ntsib kev pom ntawm tus kheej yog cov piv txwv ntxaws ntxaws ntawm tes hauj lwm uas cov pawg ntseeg ua no. Tsis tas li ntawd xwb, qhov nthuav tawm txoj kab lis kev cai qub, tib neeg tej kev xam pom txog kev coj ncaj ncees, tej kev xav txog qee pab los sis haiv neeg, nrog rau tej kev qhuab qhia uas ib txwm muaj ntawm Txoj Kev Ntseeg Tauj thiab Koomfujtxwm nyob hauv Teb Chaws Suav, qee qhov uas zoo li tseeb, thiab tsev neeg tej kev cai thiab kev qhuab qhia uas khi tib neeg thiab txwv lawv tej kev xav ntawd—lub hom phiaj ntawm qhov muab tej no nthuav tawm yog dab tsi? Qhov no poob rau hauv hom hauj lwm twg? Lub ntsiab lus uas Kuv tau muab txheeb xyuas yav tas los nyob hauv zaj dab neeg “Pw Saum Cov Taws thiab Yaim Kua Tsib” ntawd tsis yog ib feem ntawm txoj kev to taub txog lub ntiaj teb, tib neeg ntiaj teb, thiab lub hwj chim ntawm txoj kev tsaus ntuj lod? (Yog.) Qhov no yog ib lub piv txwv ntawm lub ntsiab lus ntxaws ntxaws ntawm tes hauj lwm no. Yog li ntawd, tes hauj lwm no kuj yog ib teg hauj lwm ntxaws ntxaws uas ib pawg ntseeg yuav tsum tau ua thiab. Muab zuaj zog los hais ces, tes hauj lwm ntawm ib pawg ntseeg yog, nyob rau ib sab, los ntawm sab zoo coj tib neeg nkag mus rau hauv qhov tseeb qhov muaj tiag los ntawm qhov tseeb, coj lawv kom zwm rau Vajtswv. Nyob rau lwm sab, yog los muab Ntxwgnyoog lub ntiaj teb tsaus ntuj uas phem nthuav tawm, muab Ntxwgnyoog ntau yam kev ua yeeb ncuab rau qhov tseeb thiab rau Vajtswv nthuav tawm, thiab muab tej kev phem uas tib neeg nyiam ua hauv lub zej zog, ntau lub tswv yim thiab tej kev xav phem ntawm cov tib neeg qias vuab tsuab, nrog rau lawv tej kev ntseeg cuav, kev xav yuam kev, thiab lwm yam ntawd nthuav tawm, kom tib neeg thiaj li to taub txog lub ntsiab xeeb txawm uas tseeb thiab lub ntsiab tseeb ntawm tiam uas lim hiam no. Qhov no tsis yog tes hauj lwm uas yog lub ntsiab tseeb ntawm ib pawg ntseeg lod? (Yog.) Qhov tseeb tiag, nej twb tau txais ntau yam los ntawm pawg ntseeg tes hauj lwm lawm thiab twb tau txais ntau yam txiaj ntsim tiag tiag lawm. Thaum hais txog cov neeg hauv pawg ntseeg, txawm lawv yog cov uas nyiam qhov tseeb, los sis cov uas tsis nyiam qhov tseeb los xij, tom qab raws Vajtswv qab los tau peb mus rau tsib xyoos lawm, los ntawm tej kev sib txoos ua ke los sib qhia txog qhov tseeb, nyeem thov Vajtswv cov lus, thiab raug kev tsim txom thiab kev thuam los ntawm cov ib txwm tsis ntseeg, raug kev cuam tshuam los ntawm cov tib neeg phem thiab cov tawm tsam khetos, thiab ntau hom tib neeg, xwm txheej, thiab yam khoom lawm, lawv cia li paub cais thiab to taub txog lub ntiaj teb tsaus ntuj no, cov tib neeg ntiaj teb uas lim hiam, cov nom tswv uas tswj hwm, thiab lub hwj chim tsaus ntuj ntawm tag nrho lub ntiaj teb yam paub tsis txog. Tej no yog cov txiaj ntsig uas lawv tau txais. Thiab cov txiaj ntsig no tau los li cas? Puas yog tau tej no los ntawm qhov muaj cov pawg ntseeg? Puas yog tau tej no los ntawm tes hauj lwm uas cov pawg ntseeg ua? (Yog.) Ib sab mas, tib neeg muaj qee qhov kev to taub txog Vajtswv cov lus, tes hauj lwm, thiab tus moj yam; hos lwm sab mas, lawv kuj muaj qee qhov kev paub thiab kev paub cais txog lub ntiaj teb, tib neeg ntiaj teb, thiab lub hwj chim ntawm txoj kev tsaus ntuj thiab. Cov txiaj ntsig thiab qhov zoo ntawm ob qho txiaj ntsim no muaj rau tib neeg yog qhov uas lawv yuav tsum tau txais kom thiaj li tau txais kev cawm dim.

Yeej muab tau tes hauj lwm ntawm ib pawg ntseeg zuaj zog los hais tau tias yog kev tshaj tawm thiab ua tim khawv rau Vajtswv cov lus thiab tes hauj lwm, thiab kev coj tib neeg los noj thiab haus Vajtswv cov lus kom lawv thiaj li to taub qhov tseeb, ua raws Vajtswv cov lus, thiab ua lawv tej dej num kom zoo dua. Tsis tas li ntawd xwb, nyob rau ntawm lub hauv paus ntawm txoj kev to taub qhov tseeb ntawd, lawv tuaj yeem ntsib pom Vajtswv tes hauj lwm, muab lawv tus moj yam qias vuab tsuab tso tseg thiab ua rau lawv tus moj yam qias vuab tsuab hloov. Dhau li ntawm peb yam no mus lawm, qhov ntawd muaj feem xyuam rau txoj kev pab tib neeg kom to taub txog cov tib neeg ntiaj teb lim hiam, lub ntiaj teb tsaus ntuj, thiab lub hwj chim ntawm txoj kev tsaus ntuj. Txawm hais tias cov hauj lwm ntawm ib pawg ntseeg tes hauj lwm ntawd muaj tsis ntau los, lub ntsiab lus ntxaws ntxaws yeej muaj ntau heev li. Lub ntsiab lus ntawd puav leej muaj feem xyuam ntsig txog Vajtswv cov lus, qhov tseeb, kev muab tus kheej tej moj yam qias vuab tsuab tso tseg, thiab kev zwm rau Vajtswv; muaj tseeb tiag, qhov ntawd haj yam muaj feem xyuam ntsig txog qhov uas dim thiab. Qhov no yog lub luag hauj lwm ntawm ib pawg ntseeg thiab qhov muaj nqis ntawm qhov muaj ib pawg ntseeg. Txhua yam ntawm ib pawg ntseeg tes hauj lwm puav leej muaj feem xyuam ntsig txog txoj kev nkag mus rau hauv lub neej txoj sia ntawm cov neeg Vajtswv xaiv tseg vim qhov ntawd muaj feem xyuam rau qhov tias tib neeg coj li cas rau Vajtswv cov lus, lawv tus cwj pwm coj rau Vajtswv, lawv txoj kev cawm dim, thiab lawv txoj kev xam pom thiab tus cwj pwm uas coj rau lub ntiaj teb, tib neeg ntiaj teb, thiab lub hwj chim ntawm txoj kev tsaus ntuj. Muab hais kom luv luv ces, qhov muaj ib pawg ntseeg ntawd yeej muaj feem xyuam ntsig txog txhua tus, thiab tes hauj lwm uas ib pawg ntseeg ua, nrog rau qhov muaj nqis thiab qhov tseem ceeb ntawm qhov muaj ib pawg ntseeg ntawd, yeej muab cais tsis tau tawm ntawm txhua tus neeg uas lees txais Vajtswv txoj kev cawm dim.

Tom qab qhia txog tes hauj lwm ntxaws ntxaws uas pawg ntseeg yuav tsum tau ua lawm, cia peb sib tham txog tej lus tshab txhais thiab tej kev xam pom uas tsis tsim nyog uas tib neeg muaj txog qhov hu ua “pawg ntseeg” thiab qhov tseem ceeb ntawm qhov muaj ib pawg ntseeg. Ua ntej tshaj plaws, tib neeg xav tias pawg ntseeg yog ib qho chaw uas muaj kev nplig siab dua me ntsis, ib qho chaw uas muaj kev sov siab thiab tshav ntuj, ib qho chaw uas muaj kev phooj ywg zoo dua me ntsis es tsis muaj kev sib cav sib ceg, kev ua tsov rog, kev sib tua, los sis kev ntshav nrog—yog ib qho chaw zoo tshaj plaws uas tib neeg lub siab ntshaw, uas muaj kev zoo siab puv npo. Nyob ntawm no, tsis muaj kev khib los sis kev sib cav sib ceg, tsis muaj kev ua tswv yim phem, tsis muaj tej kev lim hiam uas tib neeg nyiam ua, los sis lwm yam xwm txheej uas muaj nyob hauv cov ib txwm tsis ntseeg lub ntiaj teb. Pawg ntseeg raug saib tias yog ib qho chaw nres nkoj zoo tshaj plaws uas tib neeg tuaj yeem tso lawv lub siab tau. Txawm hais tias tib neeg tej kev xav hauv nruab siab txog lub npe hu ua “pawg ntseeg” yuav zoo nkauj npaum li cas los xij, muab zuaj zog los hais tib neeg yeej nrhiav tau qhov kev vam khom ntawm sab ntsujplig nyob rau hauv pawg ntseeg txog ib theem twg. Qhov kev vam khom ntawm sab ntsujplig no muaj ib lub luag hauj lwm uas pom tau tseeb dua rau tib neeg: Thaum lawv ntsib tej kev nyuaj, lawv tuaj yeem tuaj rau hauv pawg ntseeg tuaj qhia txog lawv tej kev nyuaj siab, thiab pawg ntseeg tuaj yeem pab txo lawv tej kev txhawj xeeb thiab daws lawv tej kev nyuaj. Piv txwv li, yog lawv ntsib tej kev nyuaj hauv txoj hauj lwm los sis hauv lub neej, yog lawv cov me nyuam tsis mloog lus, yog lawv tus txiv los sis tus poj niam mus muaj lwm tus sab nraud, yog muaj kev tsis sib haum ntawm niam pog thiab nyab, yog muaj kev sib cav nrog cov neeg ua hauj lwm ua ke los sis cov neeg nyob ze, yog lawv cov me nyuam raug thab, yog lawv cov av raug cov neeg phem uas muaj hwj chim hauv zos txeeb mus, thiab lwm yam ntxiv—thaum tej xwm txheej no tshwm tuaj, tib neeg cia siab tias yuav muaj neeg nyob hauv pawg ntseeg sawv los pab lawv hais thiab pab daws thiab saib xyuas tej teeb meem no tau. Nyob hauv tib neeg lub siab, pawg ntseeg yog ib qho chaw uas zoo li ntawd. Yeej tsis ua xyem xyav li tias, nyob hauv tib neeg lub siab pawg ntseeg yog ib qho chaw nkaum, ib lub ceeb tsheej uas zoo tshaj plaws, ib qho chaw txo kev txhawj xeeb thiab daws kev nyuaj, tshem tawm kev ua nruj ua tsiv thiab cia cov neeg zoo nyob kaj siab lug, thiab txhawb nqa kev ncaj ncees. Yog lub neej muaj kev nyuaj, pawg ntseeg yuav tsum muab kev pab cuam; yog tsis muaj zaub noj thiab tsis muaj txhuv ua noj lawm, pawg ntseeg yuav tsum muab faib rau; yog tsis muaj khaub ncaws hnav, pawg ntseeg yuav tsum yuav rau; yog muaj neeg mob, pawg ntseeg yuav tsum them nyiaj kho mob. Thaum ib tug neeg twg ntsib kev nyuaj hauv txoj hauj lwm, cov kwv tij thiab cov nkauj muam hauv pawg ntseeg yuav tsum cev tes los pab, nrhiav kev pab los ntawm cov neeg paub, siv kev sib raug zoo, los sis qhia kev rau lawv. Thaum ib tug neeg cov me nyuam mus sib tw nkag mus rau hauv tsev kawm qib siab, lawv tuaj rau hauv pawg ntseeg los nrhiav neeg coob ntxiv los thov Vajtswv rau lawv, siv zog ua kom lawv cov me nyuam muaj peev xwm nkag tau rau tsev kawm qib siab yam zoo. Txawm yuav ntsib tej kev nyuaj dab tsi los xij, tsuav yog tuaj rau hauv pawg ntseeg xwb, ces yeej daws tau txhua yam kev nyuaj no thiab daws tau zoo lawm. Txawm hais tias ib tug neeg raug cov tib neeg phem thab los xij, pawg ntseeg muaj neeg coob thiab muaj hwj chim loj, yeej muaj peev xwm daws tau. Thaum tau txais kev txhawb thiab kev pab los ntawm cov neeg coob, yuav tsis ua siab me los sis ntshai tsam raug cov neeg phem uas muaj hwj chim thab ntxiv lawm. Txawm yog thaum raug thab, raug cais tawm, thiab ntsib kev nyuaj tas li hauv lub zej zog yam tsis muaj txoj hau kev ua neej nyob los, ib tug neeg tuaj yeem nrhiav kev pab thiab tej tswv yim zoo los ntawm pawg ntseeg, thiab nrhiav tau txoj hauj lwm uas tsim nyog. Txhua yam no, thiab ntau yam ntxiv, yog lub luag hauj lwm uas tib neeg ntseeg tias pawg ntseeg yuav tsum ua thiab tes hauj lwm uas pawg ntseeg yuav tsum ua. Thaum saib los ntawm tib neeg tej kev xav thiab kev xav phem, los sis los ntawm tej uas lawv thov los ntawm pawg ntseeg, qhov ntawd qhia tau meej tias lawv yeej saib pawg ntseeg tias yog ib lub chaw pab cuam, ib lub koom haum pab dawb, ib lub chaw nrhiav txij nkawm los sis nrhiav hauj lwm, los sis ib lub Koom Haum Cim Khaub Lig Liab. Ib txhia haj tseem xav tias txawm lawv yuav muaj peev xwm npaum li cas los sis lawv lub meej mom nyob hauv lub zej zog thiab hauv noob neej yuav yog li cas los xij, lawv yeej ib txwm cheem tsum ib lub zog loj los vam khom. Thaum lawv ntsib tej kev nyuaj nyob hauv lub zej zog los sis ntsib cov uas muaj hwj chim, lawv cheem tsum ib lub zog loj los txhawb lawv, hais lus sawv lawv cev, txiav txim siab rau lawv, thiab tawm tsam kom tau lawv cov cai thiab tej txiaj ntsim. Nyob hauv lawv txoj kev xam pom mas, pawg ntseeg yeej ua tau lub luag hauj lwm no thiab ua tau raws li lub hom phiaj uas lawv cia siab, yog li ntawd pawg ntseeg thiaj li dhau los ua lawv txoj kev xaiv uas tsuas muaj ib xwb. Pom tau meej tias, lawv saib pawg ntseeg tias yog ib lub koom haum los sis pab pawg hauv lub zej zog, xws li lub koom haum xib fwb, lub koom haum tsav tsheb, lub koom haum ua liaj ua teb, lub koom haum poj niam, lub koom haum neeg laus, thiab lwm yam ntxiv—cov pab pawg thiab koom haum hauv lub zej zog zoo li no. Txawm hais tias tib neeg txoj kev muab lus tshab txhais rau pawg ntseeg yuav yog li cas tiag tiag los xij, thaum saib los ntawm tes hauj lwm uas pawg ntseeg ua thiab lus tshab txhais txog pawg ntseeg uas yog ntawd, qhov ntawd qhia tau meej tias tib neeg tej cwj pwm thiab tej uas lawv thov los ntawm pawg ntseeg yeej tsis yog thiab siv tsis tau, thiab tib neeg tsis tsim nyog muaj tej no. Pawg ntseeg tsis yog ib qho chaw uas “txeeb cov neeg nplua nuj los pab cov neeg pluag”, tshem tawm kev ua nruj ua tsiv thiab cia cov neeg zoo nyob kaj siab lug, los sis txhawb nqa kev ncaj ncees, haj yam tsis yog ib qho chaw los pab lub ntiaj teb thiab cawm tib neeg los sis txo tib neeg tej kev txhawj xeeb thiab daws lawv tej kev nyuaj. Pawg ntseeg tsis yog ib lub koom haum pab dawb, tsis yog ib lub chaw pab cuam, thiab tsis yog ib lub pab pawg hauv lub zej zog. Qhov tsim tsa thiab qhov muaj ib pawg ntseeg tsis yog los ua ib lub pab pawg los sis koom haum nyob hauv lub zej zog. Dhau li ntawm ob peb teg hauj lwm uas yog lub ntsiab tseeb uas pawg ntseeg yuav tsum tau ua, uas yog kev ua tim khawv thiab tshaj tawm Vajtswv cov lus, thiab coj tib neeg noj thiab haus Vajtswv cov lus, ntsib pom Vajtswv tes hauj lwm, thiab muab lawv tej moj yam qias vuab tsuab tso tseg kom thiaj li tau txais kev cawm dim ntawd lawm, pawg ntseeg tsis muaj lub luag hauj lwm yuav muab tej kev pab cuam los sis ua tej hauj lwm twg rau lub zej zog los sis rau ib haiv neeg twg. Tsis tas li ntawd xwb, pawg ntseeg tsis yog ib qho chaw los tawm tsam kom tau tib neeg cov cai thiab tej txiaj ntsim thiab tsis muaj lub luag hauj lwm yuav tsum tsom kwm tib neeg lub neej ntawm sab cev nqaij daim tawv, lub meej mom hauv lub zej zog, lub npe ntawm txoj hauj lwm, nyiaj hli, kev pab cuam hauv lub zej zog, thiab lwm yam ntxiv. Nyob hauv tib neeg tej kev xav phem mas, lawv ntseeg tias pawg ntseeg tej luag hauj lwm yog kev tshem tawm kev ua nruj ua tsiv thiab cia cov neeg zoo nyob kaj siab lug, txhawb nqa kev ncaj ncees, txo tib neeg tej kev txhawj xeeb thiab daws lawv tej kev nyuaj, pab lub ntiaj teb thiab cawm tib neeg, thiab tawm tsam kom tau tib neeg cov cai thiab tej txiaj ntsim—feem ntau yog tej luag hauj lwm no. Yog li ntawd, tib neeg ntseeg tias pawg ntseeg yog lawv txoj kev pab tam sim ntawd thiab txhua yam kev nyuaj yeej daws tau thiab saib xyuas tau los ntawm pawg ntseeg. Pom tau meej tias, tib neeg saib pawg ntseeg tias yog ib lub chaw, ib lub koom haum, los sis ib pab pawg hauv lub zej zog. Txawm li cas los xij, pawg ntseeg puas yog ib lub chaw zoo li ntawd? (Tsis yog.) Yog hais tias tej luag hauj lwm thiab tej hauj lwm uas tib neeg ntseeg tias pawg ntseeg muaj nyob rau ntawd yog kev tshem tawm kev ua nruj ua tsiv thiab cia cov neeg zoo nyob kaj siab lug, txhawb nqa kev ncaj ncees, txo tib neeg tej kev txhawj xeeb thiab daws lawv tej kev nyuaj, pab lub ntiaj teb thiab cawm tib neeg, tawm tsam kom tau tib neeg cov cai thiab tej txiaj ntsim, thiab lwm yam, ces pawg ntseeg no hu tsis tau tias yog ib pawg ntseeg vim nws tsis muaj feem xyuam nrog Vajtswv cov lus, Vajntsujplig tes hauj lwm, los sis Vajtswv tes hauj lwm uas cawm tib neeg. Ib pab pawg los sis lub koom haum zoo li no tsuas tsim nyog hu ua ib pab pawg los sis ib lub koom haum xwb, tsis muaj feem xyuam nrog ib lub pawg ntseeg, thiab tsis muaj feem xyuam nrog pawg ntseeg tes hauj lwm kiag li. Yog ib lub koom haum, uas siv lub npe ntseeg Vajtswv, los ua tej hauj lwm xws li mus koom kev pe hawm, pe hawm Vajtswv, nyeem phau Vajluskub, thov Vajtswv, hu nkauj qhuas Vajtswv, thiab qhuas, los sis txawm yog yuav muaj tej kev sib txoos ua ke thiab kev pe hawm uas muaj kab muaj ke, nrog rau tej uas hu ua kev sib txoos kawm phau Vajluskub, kev sib txoos thov Vajtswv, kev sib txoos ntawm cov neeg ua hauj lwm ua ke, kev sib txoos sib qhia, thiab lwm yam ntxiv los xij, txawm pawg ntseeg muaj cov tswv cuab thiab cov kev teeb tsa zoo li cas los xij, tej no yeej tsis muaj feem xyuam txuas rau ib pawg ntseeg tseeb kiag li. Yog li ntawd, ib pawg ntseeg tseeb yog dab tsi kiag? Ib pawg ntseeg tseeb tshwm sim los li cas? Ib pawg ntseeg tseeb raug tsim tsa los vim yog Vajtswv qhov kev tshwm sim, Nws tes hauj lwm, thiab Nws qhov kev nthuav qhov tseeb tawm los cawm tib neeg ntiaj teb. Pawg ntseeg tshwm sim los thaum tib neeg hnov Vajtswv lub suab, tig los cuag Vajtswv, thiab zwm rau Vajtswv tes hauj lwm. Qhov no thiaj li yog ib pawg ntseeg tseeb. Ib pawg ntseeg tsis yog tib neeg npaj thiab tsim los tiam sis yog Vajtswv tus kheej kiag tsim tsa thiab Vajtswv tus kheej kiag coj thiab yug. Yog li ntawd, Vajtswv muaj cov lus txib rau Nws cov pawg ntseeg. Ib pawg ntseeg txoj num yog los tshaj tawm Vajtswv cov lus, ua tim khawv rau Vajtswv tes hauj lwm, thiab pab tib neeg kom hnov Vajtswv lub suab, tig rov qab los rau ntawm Vajtswv lub xub ntiag, los lees txais Vajtswv txoj kev cawm dim, kom ntsib kom pom Vajtswv tes hauj lwm es kom tau txais Vajtswv tej hmoov hlub, thiab ua tim khawv rau Vajtswv—yooj yim li ntawd xwb. Qhov no yog qhov muaj nqis thiab lub ntsiab tseem ceeb ntawm qhov muaj ib pawg ntseeg.

III. Lub Ntsiab Lus Tshab Txhais ntawm ib Pawg Ntseeg

Tom qab qhia txog lub ncauj lus ntawm qhov tias ib pawg ntseeg yog dab tsi lawm, tam sim no nej muaj qee qhov kev to taub txog qhov tsim muaj ib pawg ntseeg, tes hauj lwm uas ib pawg ntseeg ua, thiab cov txiaj ntsig uas ib pawg ntseeg ua tau tiav. Nej kuj to taub tau qee qhov txog qhov muaj nqis thiab qhov tseem ceeb ntawm qhov muaj ib pawg ntseeg lawm thiab. Yog li ntawd, tam sim no peb puas tuaj yeem muab ib lub ntsiab lus tshab txhais uas raug tias ib pawg ntseeg yog dab tsi tiag? Ua ntej tshaj plaws, ib pawg ntseeg tsis yog ib qho chaw uas muab kev nplig siab rau tib neeg, thiab tsis yog ib qho chaw uas ua kom tib neeg muaj mov noj thiab khaub ncaws hnav los sis muab chaw nkaum rau tib neeg. Ib pawg ntseeg tsis yog ib qho chaw uas tsom kwm tib neeg cov cai thiab tej txiaj ntsim ntawm sab cev nqaij daim tawv los sis daws tej kev nyuaj uas lawv ntsib hauv lub neej. Pawg ntseeg tsis yog ib qho chaw uas daws tib neeg txoj kev khoob lug hauv lub siab thiab muab kev txhawb ntawm sab ntsujplig rau lawv. Vim cov pawg ntseeg tsis yog tej chaw uas tib neeg xav tias yog raws li lawv tej kev xav phem thiab kev xav hauv nruab siab ntawd, yog li ntawd lub ntsiab lus tshab txhais tiag tiag ntawm ib pawg ntseeg yog dab tsi kiag? Ib pawg ntseeg yog dab tsi kiag? Nyob rau hauv phau Vajluskub, Tswv Yexus tau muab ib qho kev piav qhia theem hauv paus tshaj plaws txog qhov hu ua pawg ntseeg. Nws tau hais li cas kiag? (“Rau qhov txawm nyob qhov twg yog ob leeg los sis peb leeg sib sau nyob ua ke rau hauv Kuv lub npe, Kuv yuav nyob rau hauv lawv nruab nrab rau qhov ntawd” (Mathai 18:20).) Cov lus no txhais hais tias txawm yuav muaj neeg npaum li cas tuaj sib txoos ua ke los xij, tsuav yog lawv muaj Vajntsujplig tes hauj lwm thiab lawv hnov tau tias Vajtswv nyob nrog nraim lawv, qhov chaw ntawd yog ib pawg ntseeg—yeej yog li ntawd tiag. Nyob rau tiam kawg, Vajtswv tau tshwm sim los ua tes hauj lwm thiab nthuav qhov tseeb tawm. Thaum tib neeg tuaj sib txoos ua ke noj thiab haus Vajtswv cov lus, nyeem thov Vajtswv thiab sib qhia txog Vajtswv cov lus, Vajtswv yeej nyob rau qhov ntawd, thiab kuj muaj Vajntsujplig kev qhia kom paub nyob rau qhov ntawd thiab, uas txhais hais tias Vajtswv lees paub qhov ntawd tias yog ib pawg ntseeg. Yog tib neeg tuaj sib txoos ua ke tiam sis tsis noj thiab haus Vajtswv cov lus, yog lawv tsuas lam hais cov kev qhuab qhia uas khoob lug ntawm sab ntsujplig xwb, thiab lawv hnov tsis tau txog Vajntsujplig tes hauj lwm, ces qhov ntawd tsis yog ib pawg ntseeg, vim Vajtswv tsis lees paub qhov ntawd, thiab yog li ntawd thiaj li tsis muaj Vajntsujplig tes hauj lwm. Tej kev sib sau ua ke uas muaj Vajtswv nyob nrog nraim ntawd puav leej tau txais koob hmoov thiab kev coj qhia los ntawm Vajtswv, thiab thaum tib neeg tuaj sib txoos ua ke ntawm tej kev sib sau zoo li no, txawm lawv yuav noj thiab haus Vajtswv cov lus, sib qhia qhov tseeb, los sis siv qhov tseeb los daws tej teeb meem los xij, tej no puav leej muaj feem xyuam nrog Vajtswv tej kev cheem tsum thiab kev coj qhia, thiab yog li ntawd thiaj li tau txais koob hmoov los ntawm Nws tas nrho. Vim li ntawd, tsuav yog ib hom kev sib sau ua ke uas muaj Vajtswv txoj kev coj qhia, kev coj, thiab kev nrog nraim xwb, qhov ntawd yeej raug hu tau tias yog ib pawg ntseeg. Qhov no yog lub ntsiab lus tshab txhais uas yooj yim tshaj plaws, theem hauv paus tshaj plaws ntawm ib pawg ntseeg, thiab qhov ntawd yog lub ntsiab lus tshab txhais ntawm ib pawg ntseeg nyob rau Tiam Hmoov Hlub thiab. Lub ntsiab lus tshab txhais ntawd raug tsim los ntawm qhov xwm txheej ntawm Vajtswv tes hauj lwm nyob rau lub sij hawm ntawd, thiab vim li ntawd lub ntsiab lus tshab txhais ntawd thiaj li yog thiab siv tau. Tiam sis hauv theem ntawm tes hauj lwm txiav txim nyob rau tiam kawg no, vim Vajtswv tau hais lus ntau dua, thiab tau ua tes hauj lwm uas loj dua, lub ntsiab lus tshab txhais ntawm ib pawg ntseeg yuav tsum tob dua lub ntsiab lus tshab txhais theem hauv paus nyob rau Tiam Hmoov Hlub ntawd. Vajtswv tes hauj lwm tau nce qib mus ntxiv lawm. Ib pawg ntseeg tsis yog tsuas muaj Vajntsujplig tes hauj lwm thiab muaj Vajtswv nyob nrog nraim lawm xwb. Tam sim no Vajtswv tus kheej tab tom ua hauj lwm nyob hauv Nws cov pawg ntseeg, coj thiab yug cov pawg ntseeg ntawd; cov neeg Vajtswv xaiv tseg tuaj yeem noj thiab haus Nws cov lus tam sim no, thiab raws Khetos qab thiab ua tim khawv rau Khetos. Yog li ntawd, lub ntsiab lus tshab txhais ntawm ib pawg ntseeg nyob rau tiam kawg thiaj li siab dua hauv Tiam Hmoov Hlub lawm; qhov ntawd yog ib qho kev piav qhia uas tob dua, yog dua, thiab ntxaws dua yav tas los, thiab qhov ntawd yeej cais tsis tau tawm ntawm qhov tseeb thiab Vajtswv cov lus. Yog li ntawd txoj kev muab lub ntsiab lus tshab txhais rau ib pawg ntseeg uas yog tshaj plaws thiab tsim nyog tshaj plaws yog dab tsi? Ua ntej tshaj plaws, lub ntsiab lus tshab txhais theem hauv paus yuav tsum yog ib pab neeg uas raws Vajtswv qab yam siab dawb paug. Muab hais kom ntxaws ntxiv hais tias, ib pawg ntseeg yog ib pab neeg uas ua siab dawb paug raws Vajtswv qab, cov uas Vajtswv cov lus tswj hwm, caum qhov tseeb, ua raws thiab ntsib pom Vajtswv cov lus, thiab tuaj yeem zwm rau Vajtswv thiab pe hawm Vajtswv, ua raws li Nws lub siab nyiam, thiab tau txais Nws txoj kev cawm dim. Qhov tseem ceeb ntawm lub ntsiab lus tshab txhais no yog “ib pab neeg.” Ib pawg ntseeg tsis yog ib qho chaw, los sis ib pab pawg, los sis ib lub zej zog, haj yam tsis yog ib qho kev sib txoos ua ke ntawm cov neeg uas muaj kev ntseeg xwb. Lo lus “ib pab neeg” ntawd tuaj yeem yog kaum tawm leej, los sis peb caug mus rau tsib caug leej, los sis yeej tuaj yeem ntau dua ntawd thiab. Lawv tuaj yeem tuaj sib txoos ua ke, los sis tuaj yeem faib tawm ua tej pab pawg me me es sib txoos ua ke; qhov no yoog tau thiab hloov tau. Muab hais luv luv tias, thaum cov neeg uas raws Vajtswv qab no hwm Vajtswv rau qhov siab, ua tim khawv, thiab pe hawm Vajtswv, thiab ua raws li Vajtswv lub siab nyiam, lawv yog ib pawg ntseeg. Txawm lawv yuav muaj pes tsawg leej tuaj sib sau ua ke los xij, lawv yeej tseem yog ib pawg ntseeg. Piv txwv li, 50 leej raug hu ua ib pawg ntseeg me, thiab 100 leej raug hu ua ib pawg ntseeg loj—qhov loj me ntawm pawg ntseeg yog txiav txim los ntawm cov tswv cuab coob npaum li cas. Muaj cov pawg ntseeg loj, nruab nrab, thiab me, cov neeg nyob hauv ib pawg ntseeg tsis tau teev tseg tias yuav tsum muaj pes tsawg leej. Cia peb rov qab saib lub ntsiab lus tshab txhais ntawm ib pawg ntseeg dua: ib pab neeg uas raws Vajtswv qab yam siab dawb paug, uas raug tswj hwm los ntawm Vajtswv cov lus, caum qhov tseeb, ua raws thiab ntsib pom Vajtswv cov lus, thiab tuaj yeem zwm rau thiab pe hawm Vajtswv, ua raws li Nws lub siab nyiam, thiab tau txais Nws txoj kev cawm dim. Vim li cas ib pawg ntseeg thiaj li raug muab lub ntsiab lus tshab txhais zoo li no? Vim Vajtswv yuav ua tes hauj lwm nyob hauv cov pawg ntseeg, thiab Vajtswv xav cawm pab neeg ntawd. Tsuas yog pab neeg zoo li no xwb thiaj li raug hu tau tias yog ib pawg ntseeg. Thiab tsuas yog thaum pab neeg zoo li no tuaj sib sau ua ke xwb lawv thiaj li tuaj yeem noj thiab haus Vajtswv cov lus li ib txwm thiab ua raws li Vajtswv cov lus ntawd, thiab thov Vajtswv tiag tiag, zwm rau Nws, thiab pe hawm Nws. Pab neeg ntawd raug tswj hwm thiab coj los ntawm Vajtswv cov lus; yog li ntawd, lub ntsiab lus tshab txhais ntawm ib pawg ntseeg thiaj li raug tsim los ntawm ib pab neeg zoo li no. Vim cov neeg nyob hauv sab kab lis kev cai ntseeg tsis lees txais qhov tseeb thiab tsis lees txais Vajtswv tes hauj lwm, thiab Vajtswv tsis cawm lawv, lawv tsis yog ib pawg ntseeg, lawv yog ib lub zej zog ntawm sab kab lis kev cai ntseeg xwb. Qhov no yog qhov txawv uas meej tshaj plaws ntawm ib pawg ntseeg thiab sab kab lis kev cai ntseeg. Tsuas yog pawg ntseeg xwb thiaj li raug tswj hwm los ntawm Vajtswv cov lus, thiab tsuas yog pawg ntseeg uas Khetos tus kheej yug xwb thiaj li raug tswj hwm los ntawm Vajtswv cov lus. Qhov raug tswj hwm los ntawm Vajtswv cov lus ntawd txhais li cas? Peb puas cheem tsum hais txog Vajntsujplig tes hauj lwm, los sis kev coj qhia, kev qhia kom paub, thiab kev paub tseeb ntawm Vajntsujplig nyob ntawm no? (Tsis cheem tsum.) Qhia rau Kuv seb, qhov raug tswj hwm los ntawm Vajtswv cov lus thiab qhov muaj Vajntsujplig tes hauj lwm, qhov twg muaj tiag dua? (Qhov raug tswj hwm los ntawm Vajtswv cov lus.) Qhov raug tswj hwm los ntawm Vajtswv cov lus ntawd muaj tiag dua thiab meej dua. Vajntsujplig tes hauj lwm tsuas yog muab qee qhov kev qhia kom paub thiab kev paub tseeb rau tib neeg los pab lawv kom to taub qhov tseeb thiab coj lawv kom nrhiav tau tej hauv paus ntsiab lus ntawm txoj kev ua raws nyob hauv Vajtswv cov lus xwb. Qhov txiaj ntsig uas ua tau tiav yog qhov uas lawv raug tswj hwm los ntawm Vajtswv cov lus. Yog Vajntsujplig tsis ua hauj lwm, tib neeg puas tseem muaj peev xwm ua tau lawv tej dej num kom tiav los ntawm qhov kev to taub Vajtswv cov lus thiab nkag siab tej hauv paus ntsiab lus? (Muaj peev xwm.) Tam sim no, Vajtswv cov lus tau hais tawm ntau heev lawm; tib neeg nquag mloog cov lus qhuab qhia ces yeej muaj peev xwm to taub Vajtswv cov lus. Txawm tsis muaj Vajntsujplig tes hauj lwm los, tib neeg yeej paub tias yuav tsum ua li cas. Cov uas nyiam qhov tseeb yeej muaj peev xwm ua raws li Vajtswv cov lus thiab zwm rau Vajtswv tes hauj lwm tsuav yog lawv to taub qhov tseeb xwb. Cov uas tsis nyiam qhov tseeb yuav tsis to taub Vajtswv cov lus txawm lawv hnov los xij, thiab txawm lawv to taub me ntsis los, lawv yeej tsis yeem ua raws, thiab yog li ntawd thiaj li tsuas raug muab pov tseg xwb. Nyob rau tiam kawg, Vajtswv nthuav qhov tseeb tawm ncaj qha los coj thiab yug tib neeg los ntawm Nws tus kheej. Vajntsujplig tes hauj lwm tsuas yog tes hauj lwm pab xwb. Qhov ntawd zoo li thaum ib tug me nyuam yaus nyuam qhuav xyaum mus kev; qee zaus tus neeg loj yuav tau cev tes los hwj. Thaum tus me nyuam mus kev tau khov thiab khiav tau lawm, ces yuav tsis cheem tsum muaj neeg los hwj lawm. Yog li ntawd, Vajntsujplig tes hauj lwm tsis yog qhov uas yuav tsum tau muaj, thiab tsis yog qhov tseem ceeb heev. Thaum tib neeg raug tswj hwm los ntawm Vajtswv cov lus, qhov ntawd txhais hais tias lawv to taub Vajtswv cov lus, to taub qhov tseeb, thiab paub tias Vajtswv cov lus txhais li cas thiab tej hauv paus ntsiab lus thiab tej qauv uas Vajtswv cheem tsum ntawm tib neeg yog dab tsi, thiab lawv muaj peev xwm to taub thiab siv tej hauv paus ntsiab lus thiab tej qauv no lawm. Qhov no yog lub ntsiab lus ntawm qhov uas tib neeg lub siab raug tswj hwm los ntawm Vajtswv cov lus. Vajtswv twb tau hais txog tej no meej thiab tseeb txaus lawm, yog li ntawd thiaj li tsis cheem tsum hais txog Vajntsujplig tes hauj lwm nyob ntawm no lawm. Nyob rau tiam kawg, Vajtswv tau nthuav ntau qhov tseeb tawm, ua kom txhua qhov tseeb meej thiab ua kom tib neeg to taub. Yog li ntawd, Vajntsujplig tes hauj lwm thiaj li tsis tseem ceeb npaum li ntawd thiab tsuas yog tes hauj lwm pab xwb. Tsuas yog thaum tib neeg tsis to taub qhov tseeb los sis thaum Vajtswv tseem tsis tau hais lus ntau npaum li ntawd kom txhij txhua thiab meej Vajntsujplig thiaj li ua qee tes hauj lwm pab, uas yog ceeb toom, muab qee qhov kev kaj uas yooj yim rau tib neeg thiab ua tes hauj lwm los saib rawv es txhib lawv me ntsis, pab lawv kom xaiv tau yog thiab taug tau txoj kev uas yog nyob hauv lawv lub neej thiab ntau yam xwm txheej. Tam sim no yog tiam ntawm Vajtswv cov lus, uas Vajtswv tus kheej hais lus los coj noob neej, thiab Vajtswv cov lus tswj hwm txhua yam. Vajntsujplig tes hauj lwm tsuas yog tes hauj lwm pab xwb. Thaum tib neeg to taub qhov tseeb, muaj peev xwm ua raws li Vajtswv cov lus, thiab ua neej nyob raws li Vajtswv cov lus, ces yeej ua tau raws li Vajtswv tej kev npaj siab lawm.

Cia peb saib thawj kab lus nyob hauv lub ntsiab lus tshab txhais theem hauv paus ntawm ib pawg ntseeg: “Raws Vajtswv qab yam siab dawb paug.” Lo lus “siab dawb paug” no muaj ib lub ntsiab lus tshwj xeeb. Qhov ntawd tsis yog hais txog cov uas tsuas lam nyob kom dhau hnub, cov uas tsuas tuaj kom muaj npe, cov uas noj ncuav kom tsau plab, cov uas vam khom txoj hmoov hlub kom raug cawm dim, los sis cov uas muaj tej kev npaj siab thiab lub hom phiaj zais cia. Yog li ntawd, lo lus “siab dawb paug” txhais li cas? Qhov kev piav qhia uas yog theem hauv paus tshaj plaws thiab yooj yim tshaj plaws yog li no: Tsuav yog ib tug neeg twg hnov txog Vajtswv, qhov tseeb, los sis tus Tswv Tsim, lawv lub siab ntshaw, txaus siab hlo tso tseg, txaus siab hlo muab lawv tus kheej fij, txaus siab hlo tiv kev txom nyem, thiab txaus siab hlo los rau ntawm Vajtswv lub xub ntiag los lees txais Vajtswv txoj kev hu, thiab tso txhua yam tseg los raws Vajtswv qab. Tsuav yog lawv muaj ib lub siab dawb paug xwb, qhov ntawd yeej txaus lawm. Ib txhia neeg hais tias: “Vim li cas Koj thiaj li tsis hais tias qhov ntawd yog ib pab neeg uas muaj kev ntseeg puv npo uas raws Vajtswv qab?” Tib neeg ua tsis tau txog theem ntawd. Tam sim no ntawm cov uas ua lawv tej dej num, ib txhia ntseeg los tau kaum xyoo lawm, thiab ib txhia ntseeg los tau nees nkaum los sis peb caug xyoo lawm; qhov uas muaj lub siab dawb paug no yeej txaus lawm. Qhov muab lub ntsiab lus tshab txhais tias muaj kev ntseeg puv npo ntawd tsis yog lawm. Peb txoj kev muab lub ntsiab lus tshab txhais rau ib pawg ntseeg yog raws li ib qho xwm txheej ntxaws ntxaws ntawm theem hauv paus xwb tau lawm, yam tsis xyuas tej lus me me los sis muab lub ntsiab lus tshab txhais thiab tus qauv teem kom siab dhau, vim qhov ntawd yuav tsis muaj tiag. Ib txhia neeg hais tias, “Qhov hais tias ‘siab dawb paug’ thiab ‘muaj kev ntseeg puv npo’ ntawd tsis txaus. Qhov ntawd yuav tsum raug hu ua ib pab neeg ncaj ncees uas hwm thiab ntshai Vajtswv thiab zam kev phem—qhov ntawd thiaj li yuav zoo heev!” Yog peb muab tus qauv teem kom siab npaum li no, ces cov lus tom qab uas hais tias, “caum qhov tseeb, ua raws thiab ntsib pom Vajtswv cov lus,” yeej yuav tsis tas hais lawm. Qhov tseem ceeb mas yog txhua tus tswv cuab hauv pawg ntseeg puav leej yog cov uas Vajtswv xav cawm. Pab neeg no muaj Ntxwgnyoog tej moj yam qias vuab tsuab puv npo thiab muaj tej kev xav phem thiab kev xav hauv nruab siab txog Vajtswv puv npo. Yog hais kom muaj tiag dua, lawv muaj kev tig tawm tsam puv npo, tsis muaj kev zwm rau, tsis to taub qhov tseeb, thiab tsis paub Vajtswv kiag li—qhov no yog qhov xwm txheej uas muaj tiag tshaj plaws. Yog li ntawd, nyob hauv Vajtswv lub qhov muag saib mas, cov tswv cuab hauv pawg ntseeg yeej nyob hauv ib qho xwm txheej uas muaj tiag thiab tus yam ntxwv tiag tiag zoo li no. Vajtswv txoj kev xaiv tib neeg yog raws li qhov cheem tsum theem hauv paus no: seb lawv puas tuaj yeem raws Vajtswv qab yam siab dawb paug, thiab muab lawv tus kheej fij rau Vajtswv thiab tso tseg tiag tiag. Ib txhia neeg hais tias, “Yog lawv muaj lub siab dawb paug no, ua cas lawv ho tseem muaj tej kev ntshaw uas ntau dhau? Yog lawv muaj lub siab dawb paug, ua cas lawv ho tseem xav tau koob hmoov?” Tej no yuav maj mam hloov thaum tib neeg ntsib pom Vajtswv tes hauj lwm. Tam sim no, peb tab tom tshab txhais lub tswv yim theem hauv paus txog ib pawg ntseeg. Lub tswv yim theem hauv paus no yog qhov kev cheem tsum uas qis tshaj plaws thiab tus qauv uas qis tshaj plaws rau Vajtswv txoj kev xaiv tib neeg. Tej qauv no tsis khoob lug los sis dhau qhov muaj tseeb kiag li; tej no yeej haum kiag rau nej qhov xwm txheej tiag tiag. Muab ua lwm lo lus hais, thaum Vajtswv xaiv nej thiab txiav txim siab cawm ib tug twg ntawm nej, tej no yog tej qauv uas Vajtswv saib. Yog koj mus raws li tej kev cheem tsum no, Vajtswv yuav coj koj los rau hauv Vajtswv lub tsev es dhau los ua ib tug tswv cuab hauv pawg ntseeg. Qhov no yog qhov xwm txheej uas muaj tiag. Yog li ntawd, thawj kab lus nyob hauv lub ntsiab lus tshab txhais ntawm ib pawg ntseeg yog “raws Vajtswv qab yam siab dawb paug”; qhov no yeej yog dua me ntsis. Pab neeg no tseem nyob deb ntawm qhov uas hwm thiab ntshai Vajtswv thiab zam kev phem, lawv tseem nyob deb ntawm qhov uas muaj peev xwm khiav dim ntawm lub zog ntawm txoj kev tsaus ntuj, thiab lawv tseem nyob deb ntawm qhov uas ntxeev siab tawm tsam lub ntiaj teb thiab tus zaj loj liab ploog kom tag mus li. Lawv tseem nyob deb heev ntawm txhua yam no. Vim li cas? Vim lub ntsiab lus tshab txhais ntawd tseem hais ntxiv txog qhov muaj peev xwm nrhiav kev los ua raws li Vajtswv cov lus. Nyob hauv txheej txheem ntawm txoj kev caum ntawd, vim tib neeg muaj ib lub siab uas nyiam qhov tseeb thiab ntshaw qhov tseeb, lawv thiaj li muaj peev xwm ntsib pom thiab ua raws li Vajtswv cov lus, thiab thaum kawg, lawv muaj peev xwm pe hawm Vajtswv. Qhov kev pe hawm Vajtswv ntawd suav nrog kev zwm rau Vajtswv, kev mloog Vajtswv cov lus, kev lees txais Vajtswv tej kev tswj hwm, thiab kev lees txais Vajtswv lub hwj chim kav thiab tej kev npaj. Thaum kawg, pab neeg no tuaj yeem tau txais kev cawm dim. Qhov no yog qhov xwm txheej tiag tiag ntawm cov tswv cuab hauv pawg ntseeg nyob hauv Vajtswv lub qhov muag saib. Qhov no puas yog qhov cheem tsum theem hauv paus tshaj plaws? (Yog.) Ib txhia neeg hais tias, “Koj tsis tau hais txog kev muab Ntxwgnyoog tus moj yam qias vuab tsuab tso tseg thiab kev ntxuav kom dawb huv. Lub ntsiab lus tshab txhais ntawm ib pawg ntseeg no tsis muaj tej no.” Tej no puas muaj nyob hauv lub ntsiab lus tshab txhais no? (Muaj lawm.) Qhov twg thiaj li muaj tej no? Qhov uas nrhiav kev los ua raws li Vajtswv cov lus. Yog koj muaj peev xwm nrhiav kev los ua raws li Vajtswv cov lus, koj tej moj yam qias vuab tsuab tsis yog yuav maj mam raug daws lawm lod? Puas yog koj yuav muaj peev xwm muab Ntxwgnyoog tej moj yam qias vuab tsuab tso tseg thiab ua rau tus moj yam hloov? (Yog.) Thaum lub sij hawm uas ua rau tus moj yam hloov ntawd, koj maj mam to taub Vajtswv cov lus thiab daws koj tus kheej tej moj yam qias vuab tsuab. Thaum koj daws tau qee qhov ntawm koj tej moj yam qias vuab tsuab lawm, koj txoj kev ntseeg Vajtswv thiab kev zwm rau Vajtswv puas yuav nce ntxiv? Ob qho no puas muaj qhov sib txuas ua ke? (Muaj.) Thaum koj pe hawm Vajtswv ntau npaum li cas, koj txoj kev zwm rau Vajtswv yeej yuav ntau npaum li ntawd. Thaum koj txoj kev zwm rau Vajtswv nce ntxiv lawm, puas yog koj yuav nyob ze rau qhov raug cawm dim lawm? (Yog.) Yog li ntawd, pab neeg no yog hom neeg zoo li cas? Lawv yog cov uas tuaj yeem tau txais kev cawm dim. Qhov no yog qhov xwm txheej uas muaj tiag ntawm cov tswv cuab hauv pawg ntseeg. Ib txhia hais tias, “Lub ntsiab lus tshab txhais ntawm ib pawg ntseeg no tsis tau hais txog tes hauj lwm uas pawg ntseeg ua.” Puas muaj feem twg nyob ntawm no uas muaj feem xyuam ntsig txog tes hauj lwm uas yog lub ntsiab tseeb uas pawg ntseeg ua? (Qhov caum kom tau txais kev cawm dim.) Qhov no yeej muaj feem xyuam sib ze heev. Tes hauj lwm uas pawg ntseeg ua, txawm yuav yog kev tshaj tawm Vajtswv cov lus los sis kev coj tib neeg noj thiab haus Vajtswv cov lus, kev pab tib neeg kom paub lawv tus kheej thiab muab Ntxwgnyoog tej moj yam qias vuab tsuab tso tseg, lub hom phiaj thaum kawg puav leej yog txhawm rau pab tib neeg kom tau txais kev cawm dim. Yog li ntawd, tam sim no nej puas lees txais tau lub tswv yim theem hauv paus tshaj plaws thiab yooj yim tshaj plaws ntawm ib pawg ntseeg no? (Lees txais tau.) Lub ntsiab lus tshab txhais no tsis tshaj dhau los sis khoob lug, thiab tsis siv tej lus thiab kab lus uas mloog zoo li siab heev, tiam sis muaj tej kev tim tsum theem hauv paus tshaj plaws rau txoj kev tsim muaj los sis lub ntsiab lus tshab txhais ntawm ib pawg ntseeg.

Tom qab uas Kuv tau piav qhia rau nej lawm, nej puas to taub txog keeb kwm ntawm lub tswv yim kev tshab txhais rau ib pawg ntseeg lawm? (To taub lawm.) Yog Kuv tsis tau piav qhia li no, nej yuav xav tias tes hauj lwm uas yog lub ntsiab tseeb ntawm pawg ntseeg thiab lub ntsiab lus tshab txhais ntawm ib pawg ntseeg yog qhov tob heev. Thaum to taub lub ntsiab lus tshab txhais ntawm ib pawg ntseeg lawm, nej xav tias nej txoj kev to taub txog pawg ntseeg ntawd mas ntiav ua luaj li. Tam sim no lub ntsiab lus tshab txhais ntawm ib pawg ntseeg tau raug qhia meej lawm—qhov ntawd yeej muaj tiag npaum li ntawd. Tej yam uas yim muaj tiag npaum li cas, tib neeg pheej xav tias tej ntawd ntiav. Qhov tseeb tiag, yog koj ua tib zoo saib, txhua lo lus ntawm lub ntsiab lus tshab txhais no yeej muaj feem xyuam thiab txuas nrog rau tej xwm txheej uas muaj tiag thiab ntxaws ntxaws, thiab tsis yog qhov uas ntiav kiag li. Thawj kab lus nyob hauv lub ntsiab lus tshab txhais ntawm ib pawg ntseeg yog “raws Vajtswv qab yam siab dawb paug.” Lo lus “siab dawb paug” no yog qhov uas Vajtswv xav tau. Muaj pes tsawg leej uas muaj lub siab dawb paug zoo li no? Qhov ntawd puas yooj yim rau tib neeg kom muaj lub siab dawb paug no? Tsis yooj yim. Hais txog qhov “raug tswj hwm los ntawm Vajtswv cov lus” ntawd, koj puas tau ua tiav qhov ntawd? Koj xav tias kab lus no ntiav thiab yooj yim ua tau tiav. Yog Vajtswv hais tias, “Sawv los, raws Kuv qab mus thiab ua koj tes dej num,” tib neeg mloog lus, qhov no puas txhais hais tias lawv raug tswj hwm los ntawm Vajtswv cov lus? Qhov no tsuas txhais hais tias tib neeg txaus siab ntseeg Vajtswv thiab raws Vajtswv qab xwb, tiam sis lawv tseem tsis tau txog theem uas raug tswj hwm los ntawm Vajtswv cov lus—lawv tseem nyob deb heev ntawm qhov ntawd! Koj yuav tsum muaj dab tsi kom thiaj li raug tswj hwm los ntawm Vajtswv cov lus? Qhov kev cheem tsum uas qis tshaj plaws yog koj yuav tsum to taub Vajtswv cov lus; koj yuav tsum paub tias tej kev cheem tsum nyob hauv Vajtswv cov lus yog hais txog dab tsi, tej hauv paus ntsiab lus twg uas Vajtswv cov lus cheem tsum, thiab, thaum ntsib ntau hom tib neeg, xwm txheej, thiab yam khoom, yuav siv Vajtswv cov lus li cas, thiab yuav hloov Vajtswv cov lus los ua koj txoj kev ua raws li cas kom ua tau rau Vajtswv txaus siab. Qhov no tsis yooj yim. Yuav tsum tau siv sij hawm ntev los noj thiab haus, nyeem thov Vajtswv, ntsib pom, thiab to taub Vajtswv cov lus, thiab to taub txog Vajtswv tej kev npaj siab thiab Vajtswv tus moj yam, kom thiaj li maj mam los raug tswj hwm los ntawm Vajtswv cov lus me ntsis. Yog li ntawd, kab lus uas hais tias “raug tswj hwm los ntawm Nws cov lus” zoo li yooj yim thaum saib sab nraud, cuag nkaus li tib neeg feem coob raug tswj hwm los ntawm Vajtswv cov lus lawm, tiam sis qhov tseeb tiag tsis yog li ntawd. Yog saib los ntawm tib neeg tej xwm txheej tiag tiag, qhov ntawd qhia tau meej tias kab lus no tsuas yog Vajtswv txoj kev cheem tsum rau tib neeg xwb, uas lawv tseem ua tsis tau tiav kiag li. Kab lus tom ntej no, “nrhiav kev los ua raws li Vajtswv cov lus,” yog Vajtswv txoj kev cheem tsum rau tib neeg. Koj tseem ua tsis tau tiav txoj kev ua raws li Vajtswv cov lus ntawd; koj tsuas tab tom nrhiav kev los xyaum ua raws li Vajtswv cov lus xwb. Koj yuav nrhiav qhov no li cas? Thaum koj ntsib tej xwm txheej, ua raws li Vajtswv tej kev cheem tsum. Tsis txhob dag; ua ib tug tib neeg coj ncaj. Koj puas ua tau li ntawd? Qhov ntawd tsis yooj yim ua tau. Thaum koj raug ntuas, koj yuav tsum muaj peev xwm zwm rau thiab tig xav txog thiab paub koj tus kheej, thiab ua raws li qhov tseeb. Koj puas ua tau qhov no? Yog qhov ntawd nyuaj los sis yog koj lub siab nyiam muaj zog dhau, thiab koj pheej xav cia koj txoj kev siab kub tawg tawm los, ces koj yuav tsum nrhiav kom ua raws li tej hauv paus ntsiab lus, thiab tsis txhob nthuav koj txoj kev siab kub tawm los sis ua raws li koj lub siab nyiam thiab lam tau lam ua; koj yuav tsum ua raws li Vajtswv cov lus hais, lees txais kev ntuas, los paub koj tej kev ua txhaum, thiab to taub tias koj ua txhaum rau qhov twg lawm. Qhov no hu ua kev nrhiav kev los ua raws li Vajtswv cov lus. Qhov pib ua raws li Vajtswv cov lus ntawd puas txhais hais tias ib tug neeg tau hloov lawm? Tsis yooj yim npaum li ntawd. Yog koj raug xaiv ua ib tug thawj coj los sis ib tug neeg ua hauj lwm, koj puas tuaj yeem tsis txhob ua raws li koj lub siab nyiam thiab lam tau lam ua? Tsis yooj yim; qhov ntawd cheem tsum kom koj to taub qhov tseeb, muaj peev xwm ua raws Vajtswv cov lus, thiab ntsib pom tau ib ntus sij hawm; tsuas yog thaum ntawd xwb koj thiaj li ua tau qhov no tiav. Yog koj hais tias koj xav ua raws li Vajtswv cov lus tiam sis tsuas muaj txoj kev txaus siab hlo ntawm ncauj xwb thiab tsis muaj lub zog hauv koj lub siab, qhov ntawd yeej tsis tau. Thaum koj lub siab txaus siab hlo, thiab koj xav ua raws li qhov tseeb tiag tiag, thaum ntawd koj thiaj li muab qhov tseeb coj los xyaum ua raws tau. Thaum koj tsis txaus siab ua raws qhov tseeb hauv koj lub siab, txawm koj yuav cog lus los sis yog lwm tus txhawb koj los, qhov ntawd yeej tsis muaj qab hau. Koj yuav tsum muaj lub siab ruaj khov, qhov ntawd yog, koj yuav tsum muaj ib lub siab uas ntshaw Vajtswv heev. Koj yuav tsum paub tias Vajtswv muab ib lub ntsiab lus tshab txhais rau qhov xwm txheej no li cas thiab Nws muaj cov kev cheem tsum dab tsi txog qhov ntawd, nrhiav thiab muab sib sau tag nrho Vajtswv cov lus uas muaj feem xyuam nrog sab no, thiab tom qab ntawd nyeem thov Vajtswv thiab to taub cov lus ntawd. Muab cov lus ntawd sau cia rau hauv ib phau ntawv los sis muab tso rau qhov uas koj pom tau yooj yim. Thaum koj so hauj lwm, ces saib cov lus ntawd thiab nyeem cov lus ntawd, thiab thaum lub sij hawm dhau mus, koj yuav nco tau Vajtswv cov lus no thiab khaws cov lus ntawd cia rau hauv koj lub siab lawm. Txhua hnub, koj xav txog lub ntsiab lus tiag tiag ntawm Vajtswv cov lus thiab xav seb txoj kev hais lus thiab kev ua twg thiaj li suav tias yog kev ua raws li Vajtswv cov lus. Qhov no hu ua kev nrhiav kev los ua raws li Vajtswv cov lus. Qhov ntawd puas yooj yim ua tau? Tsis yooj yim; qhov ntawd tsis yog ib yam uas yuav ua tau hauv ib hmos los sis siv zog ua hauv ib ntsug zog xwb. Ib txhia neeg hais tias, “Kuv cog lus nrog ntshav,” tiam sis qhov ntawd tsis muaj qab hau. Koj hais tias, “Kuv yuav yoo mov thiab thov Vajtswv yam tsis noj tsis haus li,” tiam sis qhov ntawd tsis muaj qab hau. Koj hais tias, “Kuv pw lig thiab tiv kev txom nyem,” tiam sis qhov ntawd kuj tsis muaj qab hau thiab. Koj yuav tsum caum qhov tseeb; koj yuav tsum muaj tej kev qhia tshwm ntawm kev caum qhov tseeb, thiab koj yuav tsum muaj ib txoj kev rau qhov kev caum qhov tseeb ntawd; koj yuav tsum muaj tej kev thiab tej hau kev uas yog. Txawm koj yuav muaj tej kev los sis tej hau kev zoo li cas los xij, koj yeej cais tsis tau tawm ntawm Vajtswv cov lus; koj yuav tsum siv zog rau hauv Vajtswv cov lus, muab txhua yam los piv nrog Vajtswv cov lus, siv Vajtswv cov lus los daws tej teeb meem hauv txhua yam xwm txheej, thiab muab Vajtswv cov lus ua qhov tseem ceeb tshaj plaws rau koj. Qhov no thiaj li hu ua kev caum qhov tseeb. Piv txwv li, hais txog kev nrog lwm tus sib raug zoo, koj yuav tsum saib seb Vajtswv cov lus hais li cas txog sab no thiab nrhiav Vajtswv cov lus uas muaj feem xyuam txog kev nrog lwm tus sib raug zoo. Rau kev sib koom tes kom sib haum xeeb, kuj nrhiav Vajtswv cov lus uas hais txog sab no thiab. Hais txog kev ua ib teg dej num yam muaj kev ua siab ncaj, nrhiav Vajtswv cov lus uas hais txog qhov yuav ua tej dej num li cas kom thiaj li mus raws li tus qauv thiab nco Vajtswv cov lus uas tseem ceeb, khaws cov lus ntawd cia rau hauv koj lub siab. Hais txog qhov tias ib tug thawj coj cuav yog dab tsi, cov thawj coj cuav muaj tej kev qhia tshwm dab tsi, seb lawv puas muaj lub siab txawj xav thiab laj thawj, thiab Vajtswv muab cov thawj coj cuav teem li cas, nrhiav Vajtswv cov lus tseem ceeb no thiab sau cov lus ntawd cia rau hauv ib phau ntawv, es muab tso rau qhov uas koj pom tau yooj yim, thiab nyeem thov cov lus ntawd thaum twg uas koj muaj sij hawm. Rau txhua yam uas muaj feem xyuam nrog koj txoj kev nkag mus rau hauv lub neej txoj sia thiab kev hloov ntawm tus moj yam, ua raws thiab siv zog rau hauv txoj kev no. Qhov no thiaj li hu ua kev caum qhov tseeb. Yog koj txoj kev siv zog tsis mus txog theem no, qhov ntawd hu tsis tau ua kev caum qhov tseeb; qhov ntawd hu ua kev lam ua kom dhau, kev lam ua sab nraud xwb, thiab kev lam nyob kom dhau hnub xwb.

Cia peb saib txog qhov “pe hawm Vajtswv.” Kev pe hawm Vajtswv muaj feem xyuam ntsig txog rau kev ntshai, kev hwm thiab ntshai, kev saib taus, thiab kev ua siab dawb paug los ntawm lub siab tseeb tiag, nrog rau kev coj rau Vajtswv li yog Vajtswv, muaj ib qho chaw rau Vajtswv nyob hauv yus lub siab, saib xyuas rau tej xwm txheej uas Vajtswv tau tsim tsa thiab tej lus txib uas Vajtswv tau muab rau ntawd kom tsim nyog, thiab coj tiag tiag rau thiab ris lub luag hauj lwm rau txhua lo lus uas Vajtswv hais, thiab lwm yam ntxiv. Txhua yam kev qhia tshwm no hu ua kev pe hawm. Txawm yuav yog cov lus uas Vajtswv hais tim ntsej tim muag rau koj los sis txhua lo lus uas Nws tau nthuav tawm dhau los los xij, tsuav yog koj paub thiab nco tau cov lus ntawd, thiab tsuav yog koj to taub thiab paub tseeb cov lus ntawd nyob hauv koj lub siab xwb, koj yuav tsum saib cov lus ntawd ua tus qauv rau koj txoj kev coj tus kheej, kev ua neej nyob, thiab lwm yam ntxiv—qhov no yog qhov kev qhia tshwm ntawm kev pe hawm Vajtswv. Thaum ntsib tej yam, txawm hais tias tej ntawd yuav haum rau koj tus kheej txoj kev nyiam, kev ntshaw, los sis kev xav phem los xij, koj yuav tsum muaj peev xwm ua kom koj lub siab nyob ntsiag to thiab xav tias, “Qhov no puas yog Vajtswv ua? Puas yog los ntawm Vajtswv los? Vim li cas Vajtswv thiaj li ua li no? Vajtswv xav lim dab tsi kom dawb huv nyob hauv kuv, Nws xav hloov dab tsi nyob hauv kuv? Vajtswv txoj kev npaj siab yog dab tsi tiag? Kuv yuav zwm rau Vajtswv tej kev npaj li cas? Kuv yuav ua li cas kom ua tau raws li Vajtswv txoj kev npaj siab? Kuv yuav ua li cas thiaj li ua tau kuv lub luag hauj lwm tam li ib tug neeg kom tiav?” Tag nrho tej kev qhia tshwm no, nrog rau lwm yam uas zoo li no, puav leej yog tej kev qhia tshwm ntawm kev pe hawm Vajtswv. Txawm koj yuav tsis to taub qhov tseeb ntau dua los, ua ib tug neeg li ib txwm, ua ib tug neeg uas ntseeg tias muaj Vajtswv, ua ib tug neeg uas raws Vajtswv qab yam siab dawb paug, yam tsawg kawg nkaus qhov no yog tus cwj pwm uas koj yuav tsum muaj rau Vajtswv. Txhua yam uas muaj feem xyuam nrog Vajtswv, txhua yam uas ntsig txog Vajtswv cov lus, txhua yam txog Vajtswv cov lus txib rau koj, koj tes dej num, thiab koj lub luag hauj lwm, koj yuav tsum coj rau txhua yam no yam xyuam xim thiab ceev faj, tsis txhob saib ua qhov yooj yim, tsis txhob ua dog ua dig, tsis txhob saib tsis taus—qhov no hu ua kev pe hawm Vajtswv. Kev saib xyuas txhua yam uas muaj feem xyuam txog Vajtswv nrog ib lub siab uas xyuam xim, ceev faj, ntshai thiab hwm Vajtswv, thiab ntshai Vajtswv—qhov no hu ua kev pe hawm Vajtswv. Qhov no puas yooj yim ua kom tau? Tsis yooj yim. Yog tsis muaj kev ntsib kev pom tiag tiag, txawm yog kev to taub peb lo lus “pe hawm Vajtswv” ntawd xwb los twb nyuaj, haj yam tsis tas hais txog txoj kev ua raws uas pe hawm Vajtswv tiag tiag ntawd lawm. Kab lus kawg ntawm lub ntsiab lus tshab txhais ntawm ib pawg ntseeg yog “tau txais Nws txoj kev cawm dim.” Yuav to taub lo lus no li cas? Txoj kev mus kom tau txais kev cawm dim ntawd mas ntev heev, thiab tseem cheem tsum ntau yam tshaj qhov no. Ua ntej tshaj plaws, txoj kev uas koj taug ntawd yuav tsum yog; koj yuav tsum muaj peev xwm lees txais txhua qhov tseeb nyob hauv Vajtswv cov lus, thiab yog ib tug neeg uas nrhiav kev los ua raws li Vajtswv cov lus thiab zwm rau Vajtswv. Koj lub neej yuav tsum raug tswj hwm los ntawm Vajtswv cov lus. Koj yuav tsum tsis yog tsuas lees paub tias muaj Vajtswv xwb tiam sis kuj nyiam qhov tseeb thiab ua raws qhov tseeb thiab; koj yuav tsum muaj kev hwm thiab ntshai thiab kev zwm rau Vajtswv tiag tiag, nquag thov Vajtswv hauv koj lub siab, thiab maj mam hloov mus rau kev pe hawm Vajtswv. Ces koj thiaj li yog ib tug neeg uas nyiam qhov tseeb thiab zwm rau Vajtswv; koj yeej yog hom neeg uas Vajtswv xav cawm ntag. Ib tug neeg uas ntseeg Vajtswv yam siab dawb paug yuav tsum yog ib tug neeg uas yog. Qhov txiaj ntsig ntawm kev yog ib tug neeg uas yog ntawd yog dab tsi? Qhov txiaj ntsig ces yog qhov tau txais kev cawm dim ntawd yuav tsis nyuaj dhau rau koj; koj yuav muaj kev cia siab. Tag nrho tej no yog lub ntsiab lus ntxaws ntxaws txog tej ntsiab lus tshab txhais ntawm ib pawg ntseeg uas peb tau sib qhia.

IV. Tej Kev Xav Phem thiab Tej Kev Xam Pom Uas Tib Neeg Muaj Rau Pawg Ntseeg

Nyuam qhuav no, peb tau sib qhia txog qhov tias pawg ntseeg yog dab tsi, tes hauj lwm uas yog lub ntsiab tseeb uas pawg ntseeg ua, thiab tej uas tib neeg xav hauv nruab siab thiab cheem tsum los ntawm pawg ntseeg nyob hauv lawv tej kev xav phem. Thaum kawg, peb tau muab ib lub ntsiab lus tshab txhais rau lub tswv yim txog ib pawg ntseeg. Tam sim no uas twb tau muaj kev tshab txhais lawm, nej yuav tsum muaj ib qho kev to taub uas yog txog lo lus uas hu ua “pawg ntseeg” lawm; nej tsim nyog muaj ib qho kev to taub theem hauv paus txog tes hauj lwm uas pawg ntseeg yuav tsum ua, lub luag hauj lwm uas pawg ntseeg ua los pab tib neeg kom tau txais qhov tseeb thiab tau txais kev cawm dim, thiab qhov tseem ceeb ntawm pawg ntseeg rau txhua tus uas raws Vajtswv qab. Peb kuj tau ua ib qho kev txheeb xyuas thiab kev nthuav tawm luv luv uas sawv cev txog qhov uas tib neeg ntseeg tias yog qhov muaj nqis ntawm qhov muaj ib pawg ntseeg thiab tes hauj lwm uas pawg ntseeg yuav tsum ua nyob hauv lawv tej kev xav phem. Puas muaj dab tsi uas nej pom tsis tshab los sis nkag siab tsis tau txog tej kev to taub thiab kev txhais uas tib neeg muaj txog cov pawg ntseeg nyob hauv lawv tej kev xav phem? Ib txhia neeg xav tias pawg ntseeg yuav tsum ua qee yam hauj lwm hauv zej zog los sis muaj qee lub luag hauj lwm twg hauv zej zog, xws li kev txhawb nqa kev ncaj ncees. Nyob hauv tib neeg tej kev xav phem ntawd mas, pawg ntseeg sawv cev rau ib tug yam ntxwv zoo, yog li ntawd ua cas thiaj li txhawb nqa tsis tau kev ncaj ncees? Qhov kev txhawb nqa kev ncaj ncees puas muaj feem xyuam nrog pawg ntseeg tes hauj lwm los sis Vajtswv tej kev cheem tsum? (Tsis muaj.) Qhov “txhawb nqa kev ncaj ncees” uas tib neeg ntiaj teb hais txog ntawd yog hais txog dab tsi? (Qhov uas tib neeg ntiaj teb hu ua kev txhawb nqa kev ncaj ncees ntawd tsis yog kev ncaj ncees tiag tiag. Qhov ntawd tsuas yog kev tiv thaiv tej txiaj ntsim ntawm sab cev nqaij daim tawv xwb thiab tsis haum nrog qhov tseeb.) Txoj kev ncaj ncees no puas muaj feem xyuam nrog qhov tseeb? (Tsis muaj.) Qhov no yog qhov uas tib neeg ntiaj teb hu ua kev ncaj ncees. Piv txwv li, kev ntaus kom yeej qee lub zog phem, kev kho qee qhov kev tsis ncaj ncees thiab tej xwm txheej uas tib neeg raug ua tsis ncaj ncees thiab raug txaj muag los sis muab kev rau txim uas tsim nyog rau cov tib neeg phem, thiab kev kho rov qab thiab tiv thaiv tej txiaj ntsim ntawm cov pab pawg neeg uas tsis muaj zog, thiab lwm yam ntxiv—tej no yog qhov uas tib neeg hu ua kev txhawb nqa kev ncaj ncees. Lub hom phiaj tseem ceeb ntawm txoj kev txhawb nqa kev ncaj ncees no yog dab tsi? Qhov ntawd puas muaj feem xyuam nrog tib neeg txoj kev caum qhov tseeb? Qhov ntawd puas muaj feem xyuam nrog tib neeg txoj kev tau txais kev cawm dim? (Tsis muaj.) Qhov no tsuas yog ib qho kev hais uas tshwm sim los ntawm lub hauv paus ntawm kev coj ncaj thiab kev coj kev ua xwb; qhov ntawd yeej tsis muaj feem xyuam nrog qhov tseeb kiag li. Peb puas hais tau tias qhov ntawd ncav tsis txog theem ntawm qhov tseeb? (Hais tau.) Puas hais tau tiag? (Tsis tau; ob qho no tsis muaj feem xyuam kiag li.) Yog lawm, tej ntawd yeej tsis muaj feem xyuam kiag li; tej ntawd yog ob yam uas txawv kiag. Tib neeg ntiaj teb txhawb nqa hom kev ncaj ncees zoo li cas? Qhov ntawd yog hom uas, tom qab ib tug tib neeg dog dig uas muaj lub meej mom qis zog hauv zej zog raug cov tib neeg phem tsim txom los sis txeeb cov cai los sis tej txiaj ntsim lawm, cov tib neeg phem tau txais kev rau txim kom tsim nyog, thiab tus tib neeg dog dig los sis tus neeg pej xeem dog dig ntawd tsis raug tsim txom ntxiv lawm. Qhov ntawd yog hais txog kev rov kho thiab tiv thaiv tib neeg tej txiaj ntsim ntawm sab cev nqaij daim tawv, ua kom tib neeg muaj vaj huam sib luag, tshem tawm qhov sib txawv ntawm cov theem hauv zej zog, thiab ua kom paub tseeb tias cov tib neeg phem ua tsis tau lawv tej kev ua phem, thiab tej kev tsis ncaj ncees ntawm cov uas raug ua tsis ncaj ncees rau ntawd raug daws kom ncaj ncees. Qhov no yog qhov uas noob neej hu ua kev txhawb nqa kev ncaj ncees, thiab qhov ntawd yeej tsis muaj feem xyuam nrog qhov tseeb kiag li. Ua cas nej tseem hais tau tias qhov ntawd ncav mus tsis txog theem ntawm qhov tseeb? Qhov ntawd puas muaj feem xyuam nrog qhov tseeb? Tsis muaj. Qhia Kuv seb, cov tib neeg dog dig thiab cov pej xeem dog dig uas raug tej kev tsis ncaj ncees ntawd yeej yog cov tib neeg zoo lod? (Kuj tsis paub tseeb.) Qhov kev txwv tsis pub lawv raug tej kev tsis ncaj ncees rau ntawd—qhov ntawd puas yog kev ncaj ncees? Qhov ntawd puas haum nrog qhov tseeb? Cov tib neeg ntawd puas tuaj yeem tau txais kev cawm dim? Tej no yeej qhia tau meej tias yog ob yam uas txawv kiag—ua li cas thiaj li muab tej no los hais ua ke? Yeej tsis muaj kev tias qhov ntawd yuav nce mus txog theem ntawm qhov tseeb li; qhov ntawd yeej tsis zoo tib yam li qhov tseeb li. Yog nej muaj qee qhov kev tsis sib haum txog qhov teeb meem no, ces tej zaum nej feem coob pom tsis tshab txog qhov kev txhawb nqa kev ncaj ncees thiab tseem tso tsis tau tseg, xav hais tias, “Ua cas qhov no thiaj li yuam kev tau? Ua cas qhov no thiaj li tsis yog tes hauj lwm uas pawg ntseeg tsim nyog ua?” Qhov tseeb tiag, qhov no tsis muaj feem xyuam nrog pawg ntseeg tes hauj lwm kiag li. Kuj muaj ib txhia neeg xav tias pawg ntseeg tsim nyog yog ib qho chaw uas muab kev rau txim rau kev phem thiab txhawb nqa kev zoo, tias pawg ntseeg tsim nyog ua lub luag hauj lwm no, muab kev rau txim rau tej kev ua phem thiab tej zog lim hiam uas tsaus ntuj, hos txhawb nqa tej yam zoo thiab tsim txiaj. Puas yog li no tiag? Kev muab kev rau txim rau kev phem thiab kev txhawb nqa kev zoo puas ncav mus txog theem ntawm qhov tseeb? Thaum hais txog qhov tias dab tsi yog kev phem thiab dab tsi yog kev zoo, tib neeg cais tsis tau tej no kom meej. Qhov kev muab kev rau txim rau kev phem thiab kev txhawb nqa kev zoo uas tib neeg ntiaj teb hais ntawd yog dab tsi? Qhov ntawd puas muaj feem xyuam nrog txoj kev rau txim rau kev phem, kev muab nqi zog rau kev zoo, thiab kev cais txhua yam raws li lawv hom uas Vajtswv hais txog ntawd? (Tsis muaj.) Qhov ntawd tsis muaj feem xyuam. Tus qauv uas tib neeg tshab txhais txog qhov phem thiab qhov zoo yog dab tsi? Raws li cov neeg Suav txoj kev tshab txhais mas, kev phem yog dab tsi thiab kev zoo yog dab tsi? Lub hauv paus rau lawv txoj kev tshab txhais txog qhov phem thiab qhov zoo yog dab tsi? Qhov ntawd yog kab lis kev cai ntawm kev ntseeg Hauj Sam. Kev ntseeg Hauj Sam hais txog tej tswv yim xws li kev pab lub ntiaj teb thiab cawm tib neeg, kev tsis tua tsiaj, thiab lwm yam ntxiv—tej no raug suav tias yog kev zoo, hos kev noj nqaij qaib, nqaij ntses, nqaij nyuj, los sis nqaij yaj puav leej raug suav tias yog kev phem thiab cov tib neeg uas ua li ntawd tsim nyog raug rau txim. Tsis pub noj ib hom nqaij twg li, thiab tsis pub tua ib yam muaj sia twg li. Kev tua tsiaj raug suav tias yog kev phem, thiab cov uas tua tsiaj ntawd yuav tsum lees txim thiab thov kev zam txim nyob rau ntawm tus Npu Das xub ntiag. Qhov no yog txoj kev tshab txhais rau kev phem ntawm kev ntseeg Hauj Sam; qhov ntawd puas zoo ib yam li qhov kev phem uas Vajtswv hais txog? (Tsis zoo ib yam.) Ob yam no yog ob yam uas txawv kiag, yog li ntawd lub ntsiab lus tshab txhais ntawm kev phem ntawd yeej tsis muaj feem xyuam nrog qhov tseeb kiag li thiab yeej ncav mus tsis txog theem ntawm qhov tseeb. Yog li ntawd, qhov kev ntseeg Hauj Sam hais tias zoo ntawd yog dab tsi? Qhov ntawd haj yam tsis muaj qab hau, ua saum npoo xwb, thiab ua txuj. Cov neeg ntseeg Hauj Sam ntseeg hais tias kev tsis tua txhua yam uas muaj txoj sia ntawd yog kev zoo thiab kev tso cov tsiaj uas raug kaw mus yog kev zoo. Txawm hais tias ib tug tib neeg phem tau tua neeg coob npaum li cas los sis tau ua txhaum ntau npaum li cas los xij, yog lawv muab rab riam tso tseg, lawv yeej dhau los ua ib tug Npu Das tau tam sim ntawd—qhov no suav tias yog kev zoo. Kuj muaj lo lus hais tias, “Kev cawm ib txoj sia zoo dua li kev tsa ib lub tuam tsev xya tshooj,” uas txhais hais tias kev cawm tib neeg yam dig muag ntsuav yam tsis muaj kev cheem tsum thiab tsis muaj hauv paus ntsiab lus—tab txawm yog cawm cov dab, cov tib neeg phem, cov laib, cov neeg liam, thiab leej twg los xij—raug suav tias yog kev zoo. Qhov no yog hom kev zoo dab tsi? Cov tib neeg zoo li no yog cov neeg ruam feeb tsis meej, uas tsis muaj kev paub cais, tsis muaj chaw sawv, los sis tsis muaj hauv paus ntsiab lus kiag li. Cawm txhua tus thiab zam txim rau txhua tus—qhov ntawd puas suav tau tias yog kev zoo? Qhov ntawd twb tsis tsim nyog siv lo lus no; qhov no yog kev ua txuj ntawm Ntxwgnyoog thiab cov dab. Lawv tsis tua cov tsiaj tiam sis tau noj ntau tus ntsujplig uas suav tsis txheeb. Qhov no yog qhov uas lawv hu ua kev zoo, qhov tseeb tiag tsuas yog ib qho kev ua txuj xwb. Yog li ntawd, tib neeg txoj kev xav phem uas hais tias pawg ntseeg yuav tsum ua lub luag hauj lwm muab kev rau txim rau kev phem thiab txhawb nqa kev zoo ntawd puas sawv khov? (Yeej sawv tsis khov.) Txawm hais tias ib haiv neeg twg los sis kev ntseeg twg muaj keeb kwm kab lis kev cai li cas los xij, kev muab kev rau txim rau kev phem thiab kev txhawb nqa kev zoo yeej tsis muaj feem xyuam nrog pawg ntseeg tes hauj lwm los sis pawg ntseeg cov lus tim khawv kiag li. Tsis txhob xav tias vim cov lus no zoo li ncaj ncees thiab ntxim qhuas, es cov lus no thiaj li tsim nyog muaj feem xyuam nrog pawg ntseeg tes hauj lwm los sis qhov no yog lub luag hauj lwm uas pawg ntseeg yuav tsum ua hauv zej zog. Qhov no yog tib neeg txoj kev xav phem thiab kev xav hauv nruab siab. Dhau li ntawm “kev txhawb nqa kev ncaj ncees” thiab “kev muab kev rau txim rau kev phem thiab kev txhawb nqa kev zoo,” lwm cov lus zoo raws li tib neeg tej kev xav phem xws li “kev tawm tsam kom tau tib neeg cov cai thiab tej txiaj ntsim” thiab “kev txo kev txhawj xeeb thiab kev daws kev nyuaj” kuj tsis muaj feem xyuam nrog pawg ntseeg tes hauj lwm los sis pawg ntseeg cov lus tim khawv thiab. Nej txhua tus tsim nyog to taub txog qhov no lawm. Lub ntsiab lus tshab txhais ntawm pawg ntseeg, tes hauj lwm uas pawg ntseeg yuav tsum ua, thiab qhov muaj nqis thiab qhov tseem ceeb ntawm qhov muaj ib pawg ntseeg feem ntau yeej tau sib qhia meej lawm.

Cov Qauv thiab Cov Hauv Paus Rau Kev Paub Cais Ntau Hom Tib Neeg Phem

Cia peb rov qab mus rau lub luag hauj lwm kaum plaub ntawm cov thawj coj thiab cov neeg ua hauj lwm: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.” Cia peb saib seb tes hauj lwm uas cov thawj coj thiab cov neeg ua hauj lwm yuav tsum ua no puas muaj feem xyuam nrog txhua yam ntxaws ntxaws txog cov pawg ntseeg uas Kuv nyuam qhuav sib qhia tas ntawd. Vim li cas peb thiaj li yuav tsum sib qhia txog tej yam ntxaws ntxaws no? Qhov kev sib cuam tshuam ntawm tej yam ntxaws ntxaws no thiab tes hauj lwm uas cov thawj coj thiab cov neeg ua hauj lwm yuav tsum ua no yog dab tsi? (Cov tib neeg phem thiab cov tawm tsam khetos no tsis yog cov tswv cuab hauv pawg ntseeg thiab yuav tsum tau muab tshem tawm mus. Tsis tas li ntawd xwb, qhov uas muaj lawv nyob ntawd tab kaum thiab cuam tshuam tes hauj lwm uas cov pawg ntseeg ua.) Vim li ntawd, yeej muaj ib qho kev sib txuas; qhov kev sib qhia no tsis yog ua dawb xwb. Tom qab to taub txhua yam ntxaws ntxaws txog lub npe hu los sis lub ntsiab lus tshab txhais ntawm pawg ntseeg lawm, cia peb saib kom meej seb cov thawj coj thiab cov neeg ua hauj lwm yuav tsum coj li cas rau cov tswv cuab hauv pawg ntseeg, lawv yuav tsum coj li cas rau ntau hom tib neeg uas yuav tsum tau muab ntsaig tawm mus los sis ntiab tawm hauv pawg ntseeg mus, lawv yuav ua tes hauj lwm no kom zoo tau li cas, thiab lawv yuav ua li cas thiaj li ua tau lawv lub luag hauj lwm kom tiav thiab tiv thaiv pawg ntseeg tes hauj lwm. Ua ntej, cov thawj coj thiab cov neeg ua hauj lwm yuav tsum to taub tias lub ntsiab lus tshab txhais ntawm pawg ntseeg yog dab tsi, vim li cas pawg ntseeg thiaj li yuav tsum muaj nyob, thiab tes hauj lwm dab tsi uas pawg ntseeg yuav tsum ua. Tom qab to taub tej no lawm, lawv yuav tsum saib seb cov tswv cuab hauv pawg ntseeg tam sim no leej twg tsis ua ib lub luag hauj lwm uas zoo thaum hais txog qhov muaj nqis ntawm qhov muaj pawg ntseeg los sis tes hauj lwm uas pawg ntseeg ua, los sis leej twg yuav ua rau muaj kev tab kaum, kev cuam tshuam, thiab coj qee yam tsis zoo los rau pawg ntseeg tes hauj lwm uas yog lub ntsiab tseeb, los sis haj tseem yog cuam tshuam loj heev rau pawg ntseeg lub npe thiab ua rau Vajtswv lub npe raug txaj muag. Paub cais kom meej thiab muab cov tib neeg no ntsaig tawm mus los sis ntiab tawm mus kom ncav sij hawm—qhov no puas yog tes hauj lwm uas cov thawj coj thiab cov neeg ua hauj lwm tsim nyog ua? (Yog.) Yog li ntawd, yuav ua tes hauj lwm no kom zoo ntawd muaj feem xyuam nrog dab tsi? Txhawm rau ntsaig tawm mus los sis ntiab txhua hom tib neeg phem tawm thiab yaug pawg ntseeg kom dawb huv, thiab ua kom qhov muaj nqis ntawm qhov muaj pawg ntseeg nyob ntawd raug nthuav tawm thiab pawg ntseeg ua tau lub luag hauj lwm uas yuav tsum ua, thiab tib lub sij hawm ntawd ua kom pawg ntseeg tes hauj lwm nce qib mus tau zoo, cov thawj coj thiab cov neeg ua hauj lwm yuav tsum xub paub cais seb cov tib neeg twg hauv pawg ntseeg yog cov tib neeg phem thiab cov tawm tsam khetos. Qhov no yog cov ntaub ntawv los sis qhov xwm txheej tiag tiag uas cov thawj coj thiab cov neeg ua hauj lwm yuav tsum xub to taub thaum ua tes hauj lwm no. Thawj yam uas cov thawj coj thiab cov neeg ua hauj lwm ntsib nyob hauv tes hauj lwm no yog kev paub cais ntau hom tib neeg. Lub hom phiaj ntawm kev paub cais ntau hom tib neeg yog dab tsi? Qhov ntawd yog txhawm rau cais lawv raws li lawv hom thiab tiv thaiv cov uas yog cov tswv cuab tiag tiag hauv pawg ntseeg. Txawm li cas los xij, qhov tiv thaiv cov tib neeg no xwb tsis tau txhais hais tias tes hauj lwm uas teev tseg nyob hauv lub luag hauj lwm kaum plaub ntawd raug ua tiav zoo lawm. Yog li ntawd, qhov tseem ceeb tshaj plaws ntawm kev ua tes hauj lwm no kom tiav zoo yog dab tsi? Qhov ntawd yog kev muab txhua hom tsis ntseeg thiab cov tib neeg phem uas tsis yog pawg ntseeg li ntsaig tawm mus los sis ntiab tawm mus. Txawm hais tias cov tib neeg no raug txiav txim tias yog cov tib neeg phem los sis cov tawm tsam khetos los xij, yog lawv haum rau cov kev cheem tsum rau kev ntsaig tawm mus los sis ntiab tawm mus, ces qhov kev cheem tsum rau tes hauj lwm no thiaj li tshwm sim, thiab yog lub sij hawm uas cov thawj coj thiab cov neeg ua hauj lwm yuav tsum ua lawv lub luag hauj lwm kom tiav. Cia peb xub sib qhia txog qhov seb yuav paub cais ntau hom tib neeg li cas.

I. Raws Li Lub Hom Phiaj rau Kev Ntseeg Vajtswv

Peb yuav paub cais ntau hom tib neeg li cas? Tus qauv ib yog kev paub cais lawv raws li lawv lub hom phiaj rau kev ntseeg Vajtswv. Tus qauv ob yog raws li lawv txoj kev ua neeg. Thiab tus qauv peb yog raws li lawv tus cwj pwm uas coj rau tes dej num. Yog peb siv qee lub ncauj lus luv luv thiab yooj yim, tej ntawd yuav yog: qhov ib, lawv lub hom phiaj rau kev ntseeg Vajtswv; qhov ob, lawv txoj kev ua neeg; thiab qhov peb, lawv tus cwj pwm uas coj rau lawv tes dej num. Tam sim no uas peb muaj peb lub ncauj lus no lawm, nej muaj kev to taub txog txhua lub ncauj lus no li cas? Yav tas los peb tsis tau sib tham ntau txog tib neeg lub hom phiaj rau kev ntseeg Vajtswv. Peb tau sib tham ntau dua txog tib neeg txoj kev ua neeg thiab lawv tus cwj pwm uas coj rau lawv tes dej num, yog li ntawd nej thiaj li paub zoo dua txog tej no. Tib neeg lub hom phiaj rau kev ntseeg Vajtswv ntawd qhov tseeb tiag kuj tsis yog ib yam uas nej tsis paub zoo thiab vim nej tus kheej los ntseeg Vajtswv kuj muaj ib lub hom phiaj. Ib txhia neeg ntseeg Vajtswv vim lawv tsis xav mus rau ntuj tawg, ib txhia vim lawv xav mus rau saum ntuj ceeb tsheej, ib txhia vim lawv tsis xav tuag, ib txhia txhawm rau kom zam tau kev puas tsuaj, ib txhia tsuas yog vim lawv xav ua cov tib neeg zoo, ib txhia vim lawv xav zam kev raug ua phem rau, thiab lwm yam ntxiv. Lub ncauj lus no yeej tsis yog ib yam uas nej tsis paub zoo; tsuas yog tias tej yam ntxaws ntxaws uas Kuv yuav hais txog ntawd tej zaum yuav yog tej uas nej tsis paub zoo npaum li cas—tej zaum nej yuav xav tias tsis paub meej txog tej ntawd, tsis paub tias Kuv yuav hais dab tsi txog tej ntawd los sis Kuv yuav pib qhov twg hais. Yog li ntawd, cia peb sib tham luv luv txog qhov no. Qhia rau Kuv seb, cov tib neeg uas muaj tej kev npaj siab thiab tej hom phiaj zoo li cas hauv txoj kev ntseeg Vajtswv thiaj li yog cov uas yuav tsum raug ntsaig tawm mus los sis ntiab tawm mus? (Cov uas tsuas caum lub koob npe thiab lub meej mom thiab tsuas xav tuav hwj chim xwb, thiab cov uas yuav cuam tshuam pawg ntseeg vim lawv lub meej mom yam tsis xav txog dab tsi li.) Qhov no yog ib hom tib neeg. Puas tseem muaj lwm hom ntxiv? (Cov tsis ntseeg uas tsuas caum kom tau tej koob hmoov thiab nrhiav ncuav noj kom tsau plab xwb.) Cov tsis ntseeg, qhov no yog lwm hom. Puas tseem muaj ntxiv? Tej zaum nej yuav xav txog ib txhia neeg tej kev qhia tshwm, tiam sis nej cais tsis tau meej tias cov tib neeg no tsuas yog nthuav tawm tus moj yam qias vuab tsuab xwb los sis lawv puas yog cov tib neeg uas muaj lub hom phiaj tsis huv rau kev ntseeg Vajtswv uas yuav tsum raug ntsaig tawm mus los sis ntiab tawm mus. Nej xav tsis tawm txog qhov no thiab me ntsis tsis meej, yog li ntawd nej thiaj li hais tsis tau meej. Lub ncauj lus txog tib neeg lub hom phiaj rau kev ntseeg Vajtswv yeej dav heev. Txhua tus puav leej muaj qee yam kev npaj siab thiab hom phiaj hauv txoj kev ntseeg Vajtswv. Txawm li cas los xij, hom tib neeg uas muaj lub hom phiaj tsis huv rau txoj kev ntseeg Vajtswv uas peb tab tom hais txog ntawm no tsis haum nrog cov kev cheem tsum rau Vajtswv txoj kev cawm dim. Lawv tsis tuaj yeem raug cawm dim thiab lawv twb ncav tsis tau tus qauv theem hauv paus tshaj plaws ntawm kev ua ib tug neeg siv zog ua hauj lwm. Txawm cov tib neeg no muaj lub hom phiaj dab tsi rau txoj kev ntseeg Vajtswv los xij, txawm li cas los xij, thaum tau lub cib fim, cov tib neeg uas los ntseeg Vajtswv nrog ib lub hom phiaj no, yuav sim ua kom tiav lawv tej hom phiaj, thiab yog lawv tsis muaj lub cib fim, lawv yuav ua phem thiab ua rau muaj tej kev cuam tshuam. Qhov no yuav ua rau muaj tej qhov tshwm sim los uas xav tsis txog rau pawg ntseeg tes hauj lwm los sis rau txoj kev nkag mus rau hauv lub neej txoj sia ntawm cov neeg Vajtswv xaiv tseg, thiab cov tib neeg no yuav tsum yog cov uas raug ntsaig tawm mus los sis ntiab tawm mus. Tam sim no muab cov tib neeg no txoj kev ua neeg los sis lawv tus cwj pwm uas coj rau lawv tej dej num yog dab tsi ntawd tso rau ib sab tso, tsuas yog hais txog lawv lub hom phiaj rau kev ntseeg Vajtswv xwb, qhov ntawd yeej tsis yog los lees txais qhov tseeb kom raug cawm dim kiag li, haj yam tsis yog los zwm rau thiab pe hawm Vajtswv. Vim li ntawd, lawv txoj kev ntseeg Vajtswv yeej yuav tsis tau txais txoj kev cawm dim li. Ntawm qhov uas cia cov tib neeg no nyob hauv pawg ntseeg thiab cuam tshuam cov neeg Vajtswv xaiv tseg tas li—cov kwv tij thiab cov nkauj muam tiag tiag—yuav zoo dua yog paub cais thiab txiav txim txog lawv kom yog thiab kom ntxov li ntxov tau, thiab tom qab ntawd ntsaig lawv tawm hauv pawg ntseeg mus kom ncav sij hawm. Yuav tsum tsis txhob saib lawv tam li cov tswv cuab hauv pawg ntseeg los sis cov kwv tij thiab cov nkauj muam. Yog li ntawd, cov hom tib neeg no yog cov twg? Nyuam qhuav no, nej tau hais dav dav txog qee lub tswv yim. Kuv yuav muab qee cov piv txwv tiag tiag, thiab nej yuav to taub thaum nej hnov tej ntawd.

A. Ua Kom Txaus Txoj Kev Ntshaw Ua Ib Tug Nom

Ua ntej, cia peb tham txog thawj hom tib neeg uas yuav tsum raug muab ntsaig tawm mus los sis ntiab tawm hauv pawg ntseeg mus. Ib txhia neeg ib txwm xav ua nom ua tswv nyob hauv zej zog thiab coj lub koob meej los rau lawv cov poj koob yawm txwv, tiam sis ua tsis tiav hauv lawv txoj kev ua hauj lwm. Txawm li cas los xij, lawv txoj kev ntshaw ua nom ntawd yeej tsis txo qis kiag li. Tiam sis lawv tsev neeg lub meej mom hauv zej zog tsis siab, yog li ntawd lawv thiaj li xav tias lub neej no tsis muaj kev cia siab thiab pom tias lub ntiaj teb no tsis ncaj ncees dhau lawm, txawm yog txoj kev ntshaw me me no los twb ua tsis tau tiav. Lawv xav tias lawv muaj kev paub thiab muaj peev xwm me ntsis, tiam sis tsis muaj leej twg saib lawv muaj nqis. Lawv nrhiav tsis tau ib tug los txhawb nqa lawv, thiab txoj kev cia siab uas yuav tau ua ib tug nom ntawd zoo li nyob deb heev rau lawv. Nyob rau hauv qhov xwm txheej uas tsis muaj kev cia siab no, lawv thiaj li nrhiav tau pawg ntseeg. Lawv xav tias yog lawv ua tau ib tug thawj coj pawg ntseeg, qhov ntawd kuj zoo ib yam li kev ua ib tug nom thiab, thiab yuav ua tau raws li lawv txoj kev ntshaw ntawd. Yog li ntawd, lawv thiaj li tuaj rau hauv Vajtswv lub tsev xav los ua tej hauj lwm loj. Lawv xav tias lawv lub peev xwm thiab kev txawj ntse yog qhov haum nkaus los siv nyob hauv Vajtswv lub tsev, thiab lawv txoj kev cia siab uas yuav ua ib tug nom thiab ua ib tug neeg uas siab dua lwm tus ntawd yuav muaj tseeb, uas ua rau lawv txoj kev ntshaw hauv lawv ib sim neej ntawd tiav tau. Lawv txoj kev xam pom txog kev ntseeg Vajtswv raug muab xaus lus los ntawm tej lus xws li “Ua zoo tau zoo,” “Kub tiag yeej yuav ci xwb xwb li,” thiab “Tus noog ntse paub xaiv ceg ntoo zoo tsaws”—qhov no yog qhov xwm txheej uas lawv xaiv taug txoj kev ntseeg Vajtswv. Yog saib los ntawm tus tib neeg no lub ntsiab tseeb, qhov ntawd qhia tau meej tias lawv tsis ntseeg txog qhov muaj qhov tseeb nyob hauv lub ntiaj teb no, haj yam tsis ntseeg txog qhov muaj tus Cawm Seej. Muab hais luv luv tias, lawv tsis ntseeg tus Vajtswv tiag uas tsuas muaj tib tug xwb thiab haj yam tsis ntseeg txog qhov muaj tus Tswv Tsim. Txawm qhov ntawd yog tej uas sau tseg nyob rau hauv phau Vajluskub los sis tej uas qhuab qhia nyob hauv lub ntiaj teb ntawm sab kab lis kev cai ntseeg—uas Vajtswv tsim lub ntiaj teb thiab noob neej, uas Vajtswv muaj hwj chim kav thiab coj tib neeg ntiaj teb kev—txhua cov lus hais no tsuas yog tej keeb kwm sau tseg rau lawv xwb. Tsis muaj leej twg tshawb xyuas tej ntawd, thiab tsis muaj leej twg ua pov thawj tau txog tej ntawd; tej ntawd tsuas yog tej dab neeg thiab tej zaj keeb kwm, yog ib hom kab lis kev cai ntawm sab kab lis kev cai ntseeg xwb. Qhov no yog lawv qhov kev to taub theem hauv paus tshaj plaws txog sab kev ntseeg. Lawv los ntseeg Vajtswv nrog qhov kev to taub no, xav tias lawv tab tom taug txoj kev yog, tso txoj kev tsaus ntuj tseg los rau txoj kev kaj, tias lawv yog “tus noog ntse” uas paub xaiv ceg ntoo zoo tsaws. Muaj tseeb tiag, lawv txoj kev xaiv thiab kev ntshaw uas yuav ua ib tug nom thiab ua ib tug neeg uas siab dua lwm tus ntawd yeej tsis tau muab tso tseg li. Lawv xav tias nyob hauv lub ntiaj teb uas dav dav thiab muaj neeg coob coob no, tsis muaj chaw rau lawv nyob, thiab tsuas yog Vajtswv lub tsev xwb thiaj li coj tau kev cia siab los rau lawv. Tsuas yog kev ua neej nyob hauv pawg ntseeg xwb thiaj li muab tau ib lub cib fim rau lawv los siv lawv lub peev xwm thiab ua kom lawv txoj kev ntshaw uas yuav ua ib tug neeg uas siab dua lwm tus ntawd muaj tseeb. Qhov no yog vim tias, raws li lawv txoj kev xav txog qhov xwm txheej tam sim no, lub ntiaj teb sab nraud mas tab tom lim hiam thiab tsaus ntuj ntxiv zuj zus—tsuas yog pawg ntseeg xwb thiaj li yog ib thaj av uas dawb huv nyob hauv lub ntiaj teb no; pawg ntseeg yog tib qho chaw hauv lub ntiaj teb uas muab tau kev txhawb ntawm sab ntsujplig rau tib neeg, thiab tsuas yog pawg ntseeg xwb thiaj li tab tom vam meej zuj zus. Lawv los ntseeg Vajtswv nrog tej kev ntshaw thiab lub hom phiaj zoo li no. Tom qab pib ntseeg lawm, lawv tsis to taub dab tsi kiag li txog kev ntseeg Vajtswv, kev caum qhov tseeb, los sis txog tej xwm txheej uas muaj feem xyuam nrog qhov tseeb, Vajtswv tus moj yam, thiab Vajtswv tes hauj lwm. Lawv tsis caum los sis tsis quav ntsej txog tej yam no. Nyob rau hauv lawv lub siab mas, lawv yeej tsis tau tso lawv txoj kev ntshaw rau lub meej mom thiab kev ua nom ua tswv tseg kiag li; tiam sis, lawv tseem tuav rawv tej kev xav phem thiab kev xam pom no thaum uas nyob hnub dhau hnub hauv pawg ntseeg. Lawv saib pawg ntseeg li ib lub koom haum hauv zej zog, ib pab neeg ntawm sab kab lis kev cai ntseeg, thiab saib Vajtswv tes hauj lwm thiab Vajtswv cov lus li tej kev pom yuam kev uas tsim los ntawm cov neeg ntseeg vim yog lawv tej kev ntseeg dig muag. Vim li ntawd, thaum hais txog txoj kev caum qhov tseeb, thaum hais txog Vajtswv cov lus thiab Vajtswv tes hauj lwm, lawv tsis nyiam kiag li thiab tawm tsam. Yog muaj leej twg hais tias qhov ntawd yog Vajtswv tes hauj lwm, Vajtswv lub hwj chim kav, los sis Vajtswv txoj kev npaj, lawv tsis nyiam kiag li. Txawm li cas los xij, txawm lawv yuav tsis nyiam qhov tseeb npaum li cas, thiab txawm lawv yuav tsis lees paub los sis tsis lees txais qhov tseeb npaum li cas los xij, lawv txoj kev ntshaw uas yuav tau txais ib lub meej mom hauv pawg ntseeg los ua kom txaus siab rau lawv txoj kev ntshaw hwj chim ntawd yeej tsis tau txo qis los sis raug muab tso tseg li. Vim lawv muaj txoj kev xav ua heev thiab kev ntshaw heev zoo li no, lawv thiaj li nthuav tawm ntau yam kev qhia tshwm. Piv txwv li, lawv ntxias tib neeg los ntawm qhov hais tej lus xws li: “Tsis txhob muab txhua yam los ua raws li vajtswv cov lus los sis muab txhua yam txuas nrog vajtswv cov lus thiab vajtswv. Qhov tseeb tiag, tib neeg ntau txoj kev xav thiab kev hais yeej yog lawm; tib neeg tsim nyog muaj lawv tus kheej tej kev xam pom thiab qhov chaw sawv.” Lawv tshaj tawm cov lus hais no los coj tib neeg mus yuam kev. Nyob rau tib lub sij hawm ntawd, lawv kuj nquag nthuav tawm lawv lub peev xwm, tej kev txawj, thiab ntau yam tswv yim phem thiab kev npaj phem uas lawv ua tau nyob hauv lub ntiaj teb no, sim rub tib neeg kom tig mus saib thiab ua kom tib neeg quav ntsej thiab saib lawv rau qhov siab. Lub hom phiaj ntawm qhov lawv tus kheej nquag nthuav tawm ntawd yog dab tsi? Yog txhawm rau ua kom tib neeg saib lawv rau qhov siab thiab hwm lawv; yog txhawm rau kom tau lub meej mom nyob hauv nruab nrab ntawm cov tib neeg thiab ua kom txaus siab rau lawv txoj kev ntshaw uas yuav caum txoj kev ua nom ua tswv thiab coj lub koob meej los rau lawv cov poj koob yawm txwv. Lawv txaus siab thaum tib neeg hwm, qhuas, raws qab, txhawb nqa, hlub thiab fwm, thiab saib lawv rau qhov siab, thiab haj tseem yog thaum tib neeg hais lus qab zib rau lawv thiab. Tsis tas li ntawd xwb, lawv tseem caum thiab xyiv fab rau tej yam no yam tsis paub dhuav li. Txawm hais tias Vajtswv lub tsev pheej nthuav tawm txog cov tawm tsam khetos, cov tib neeg phem, thiab tib neeg ntau tus moj yam qias vuab tsuab los, nyob hauv lawv lub siab mas lawv saib tsis taus tej no thiab tshwj xeeb yog tsis nyiam tej no kiag li. Lawv tsuas tsom ntsoov caum lub meej mom thiab kev ua kom lwm tus saib lawv rau qhov siab thiab hwm lawv kom thiaj li ua tau tiav tej kev ntshaw uas lawv ua tsis tau tiav nyob hauv lub ntiaj teb thiab zej zog. Yog li ntawd, lawv lub hom phiaj ntawm kev ntseeg Vajtswv yog dab tsi? Qhov ntawd tsis yog txhawm rau kom tau txais ib puas npaug nyob hauv lub neej no thiab tau txoj sia ntev dhawv mus ib txhis nyob rau hauv lub ntiaj teb uas yuav los tom ntej no, thiab haj yam tsis yog txhawm rau lees txais qhov tseeb thiab raug cawm dim li. Lawv lub hom phiaj ntawm kev ntseeg Vajtswv tsis yog los ua ib tug neeg uas raug tsim tawm los tiam sis yog los ua ib tug nom thiab ib tug tswv, kom tau txaus siab rau tej txiaj ntsim ntawm lub meej mom. Yeej muaj cov tib neeg zoo li no nyob hauv pawg ntseeg; cov no yog cov neeg ua phem uas nkag zais ntshis los rau hauv pawg ntseeg. Pawg ntseeg yeej tsis tso cai rau cov tib neeg zoo li no los nyob xyaw nrog cov neeg Vajtswv xaiv tseg kiag li, yog li ntawd cov tib neeg no yog cov uas yuav tsum tau muab ntsaig tawm mus. Lub hom phiaj ntawm lawv txoj kev ntseeg Vajtswv puas yog yooj yim paub cais? (Yog.) Yog saib lawv txoj kev npaj siab thiab lub hom phiaj ntawm kev ntseeg Vajtswv, muab tso ua ke nrog lawv ntau yam kev qhia tshwm nyob hauv pawg ntseeg, lawv yog hom tib neeg twg? (Cov tsis ntseeg.) Yog lawm, lawv yog cov tsis ntseeg. Dhau li ntawm qhov uas yog cov tsis ntseeg lawm, lawv kuj tseem xav caum lub meej mom thiab lub neej yav tom ntej nyob hauv Vajtswv lub tsev los ua kom txaus siab rau lawv txoj kev ntshaw hwj chim thiab. Lawv lub hom phiaj ntawm kev ntseeg Vajtswv yog los ua ib tug nom. Yog li ntawd, vim li cas cov tib neeg no thiaj li yuav tsum raug muab tshem tawm? Tej zaum qee tus neeg yuav hais tias, “Yog cov tsis ntseeg siv zog ua hauj lwm nyob hauv Vajtswv lub tsev, thiab ua pawg ntseeg cov phooj ywg lawv kuj pab tau me ntsis, qhov uas cia lawv nyob ntawd puas yog tsis ua cas?” Lo lus no puas siv tau? (Siv tsis tau.) Vim li cas qhov ntawd thiaj li siv tsis tau? (Lawv txoj kev ntshaw uas yuav ua nom ntawd yeej yuav ua rau lawv ua tej yam uas cuam tshuam lwm tus, thiab tsis muaj txiaj ntsim rau tes hauj lwm ntawm Vajtswv lub tsev, thiab cuam tshuam rau cov kwv tij thiab cov nkauj muam txoj kev caum qhov tseeb.) Txawm yuav saib li cas los xij, cov tsis ntseeg tawm tsam qhov tseeb thiab tsis lees paub Vajtswv, yog li ntawd Vajtswv lub tsev khaws tsis tau lawv. Lawv yuav ua tsis tau ib lub luag hauj lwm zoo. Txawm lawv puas caum txoj kev ua nom ua tswv los xij, tsuas yog lawv tej lus hais, tej kev qhia tshwm, thiab tej kev ua uas yog cov tsis ntseeg xwb twb ua rau muaj tej kev cuam tshuam thiab tsis muaj txiaj ntsig uas zoo lawm. Ib txhia kwv tij thiab nkauj muam, thaum ntsib pom qee yam xwm txheej, lawv hais tias, “Qhov no yog Vajtswv lub hwj chim kav, thiab peb yuav tsum zwm rau.” Cov tsis ntseeg puas zwm rau tau? Yog lawv tsis sawv los cuam tshuam thiab tawm tsam ces twb zoo heev lawm. Nyob hauv lawv lub siab mas, lawv haj tseem hais tias, “Tsis txhob hais tias txhua yam yog vajtswv lub hwj chim kav. Tib neeg tus kheej yuav tsum muaj lub tswv yim thiab muaj kev ywj pheej me ntsis; tsis txhob muab txhua yam tso rau saum vajtswv lub hwj chim kav!” Tsis yog lawv tsuas rub lwm tus kom poob qis xwb tiam sis tseem hais qee cov lus yuam kev uas tsis meej thiab zoo li yog tiam sis tsis yog los coj tib neeg mus yuam kev thiab. Qhov no puas yog qhov tsis paub txaj muag? Tej zaum lawv yuav muaj peev xwm siv tau qee yam kev npaj thiab tswv yim phem nyob hauv nruab nrab ntawm cov ib txwm tsis ntseeg, tiam sis Vajtswv lub tsev tsis yog qhov chaw rau txoj kev siv tej kev npaj thiab tswv yim phem no! Ib txhia neeg qhib chaw kho mob uas txhua tus nyiam mus vim lawv hais tias kev txhaj tshuaj nyob ntawd tsis mob. Vim li cas kev txhaj tshuaj thiaj li tsis mob? Lub ntsis koob tau muab ntsw tshuaj loog lawm, yog li ntawd txhaj yeej tsis mob. Qhov no puas yog ib qho tswv yim ntse? (Tsis yog, qhov ntawd yog ib qho tswv yim phem heev.) Tiam sis lawv muab qhov ntawd saib ua ib qho tswv yim ntse thiab khav txog qhov ntawd, xav tias qhov ntawd qhia txog lawv lub peev xwm thiab kev txawj, hais tias, “Koj tsuas paub hais tias zwm rau vajtswv, vajtswv txoj kev npaj, thiab vajtswv lub hwj chim kav xwb. Koj puas muaj tej kev txawj uas kuv muaj?” Qhov no puas yog qhov tsis paub txaj muag? (Yog.) Lawv tseem khav txog tej tswv yim uas phem heev zoo li no thiab! Cov tib neeg uas coj cov tsis ntseeg lub hom phiaj uas nkag zais ntshis los rau hauv pawg ntseeg yog cov uas yuav tsum raug muab ntsaig tawm ntawm pawg ntseeg mus. Vim li cas? Nyob hauv lawv lub siab, cov tib neeg no tawm tsam qhov tseeb thiab tsis nyiam qhov tseeb kiag li. Txawm lawv lub hom phiaj ntawm kev ntseeg Vajtswv yog dab tsi los xij, txawm qhov ntawd yog ib yam uas qhia tau tawm los sis qhia tsis tau los xij, yog raws li lawv lub ntsiab tseeb uas yog cov tsis ntseeg, pawg ntseeg yuav tsum muab lawv ntsaig tawm mus los sis ntiab lawv tawm mus. Cov tsis ntseeg no nkag zais ntshis los hauv pawg ntseeg nrog ib lub hom phiaj twg, xav qhia tawm lawv lub peev xwm, ua kom lawv txoj kev xav ua heev muaj tseeb, thiab ua kom txaus siab rau lawv txoj kev ntshaw nyob hauv pawg ntseeg. Lawv xav siv qhov chaw muaj nqis uas yog pawg ntseeg no los ua ib txoj kev kom ua tau tiav lawv lub hom phiaj uas yuav tuav hwj chim, khav, thiab tswj thiab coj tib neeg mus yuam kev. Thaum saib lawv lub hom phiaj ntawm kev ntseeg Vajtswv, lawv muaj peev xwm cuam tshuam thiab tab kaum cov neeg Vajtswv xaiv tseg thiab tes hauj lwm ntawm pawg ntseeg. Yog li ntawd, cov tib neeg no yuav tsum raug muab ntsaig tawm mus los sis ntiab tawm ntawm Vajtswv lub tsev mus. Cov thawj coj thiab cov neeg ua hauj lwm yuav tsum pom kom tshab txog lawv lub ntsiab tseeb uas yog cov tsis ntseeg. Txawm koj yuav saib raws li lawv tej kev qhia tshwm los sis lawv tej lus ib txwm hais txog kev ntseeg Vajtswv los xij, kiag thaum koj to taub txog qhov xwm txheej thiab paub cais tau meej tias lawv yog cov tsis ntseeg lawm, koj yuav tsum txiav txim siab tso lawv tseg yam tsis ua ywj fab ywj fwj kiag li. Txawm koj yuav siv txoj kev twg los sis lub tswv yim twg los xij, nrhiav txhua txoj kev uas koj ua tau los muab lawv tshem tawm mus—qhov no yog tes hauj lwm uas cov thawj coj thiab cov neeg ua hauj lwm yuav tsum tau ua thiab yog tes hauj lwm uas lawv yuav tsum tau ris. Qhov no yog ib hom tib neeg uas yuav tsum raug muab ntsaig tawm mus los sis ntiab tawm mus.

B. Nrhiav Txiv Neej los sis Poj Niam

Yog li ntawd, tej kev qhia tshwm ntawm hom tib neeg ob uas yuav tsum raug muab ntsaig tawm mus los sis ntiab tawm mus ntawd yog dab tsi? Ib txhia neeg yeej tsis tau koom nrog kev ntseeg Vajtswv dua li; lawv tsuas muaj kev nyiam me ntsis txog kev ntseeg xwb. Lawv tsis xav paub tias tib neeg yuav tsum caum dab tsi los sis tau txais dab tsi los ntawm txoj kev ntseeg Vajtswv. Lawv hnov hais tias cov tib neeg uas ntseeg Vajtswv yog cov uas ris lawv tej dej num zoo dua me ntsis thiab tsis txawj dag dua me ntsis, yog li ntawd lawv thiaj li xav nrhiav ib tug hlub nyob hauv pawg ntseeg, tom qab ntawd sib yuav thiab ua ib lub neej nyob ruaj khov. Qhov no yog lawv txoj kev npaj siab thiab lub hom phiaj, yog li ntawd lawv thiaj li tuaj rau hauv pawg ntseeg nrhiav tus hlub uas haum lawv siab. Cov tsis ntseeg no tsis nyiam txog txoj kev ntseeg Vajtswv kiag li; lawv tsis quav ntsej kiag li txog tus Tswv Tsim, qhov tseeb, qhov raug cawm dim, kev paub Vajtswv, kev ua tes dej num, los sis tej yam zoo li no. Txawm hais tias lawv to taub tom qab hnov Vajtswv cov lus thiab mloog tej lus qhuab qhia los, lawv yeej tsis xav muab tso rau hauv siab li. Lawv tsuas xav nrhiav ib tug hlub uas haum lawv siab, muaj tseeb tiag, lawv cia siab tias yuav tau ntsib neeg coob ntxiv thiab ciaj ciam ntawm kev ntsib ntawd dav ntxiv. Lawv los ntseeg Vajtswv nrog lub hom phiaj uas yuav nrhiav ib tug hlub uas haum lawv siab. Ib txhia neeg tej zaum yuav hais tias, “Koj paub li cas tias lawv muaj lub hom phiaj no? Lawv twb tsis tau hais dab tsi los sis qhia rau Koj li!” Lawv nthuav qhov ntawd tawm los ntawm lawv tej kev ua. Saib seb lawv pheej nrhiav cov txiv neej los sis poj niam thaum lawv ua lawv tej dej num los sis thaum nrog lwm tus sib cuag. Kiag thaum leej twg raug lawv siab lawm, lawv pheej nrog tus neeg ntawd sib qhia thiab txav ze rau tus neeg ntawd, pheej nug txog tus neeg ntawd tej xov xwm thiab xav paub txog tus neeg ntawd. Tej kev ua thiab tej kev qhia tshwm uas txawv txawv no yuav tsum txaus los rub cov thawj coj thiab cov neeg ua hauj lwm txoj kev quav ntsej, uas lawv yuav tsum soj ntsuam seb cov neeg no txoj kev npaj siab yog dab tsi thiab lub hom phiaj uas lawv xav ua kom tiav yog dab tsi; lawv yuav tsum xyuas kom paub tseeb tias leej twg yog tus tshaj tawm txoj moo zoo rau cov neeg no, vim li cas lawv thiaj li tshwj xeeb nrhiav kev sib cuag nrog cov txiv neej los sis poj niam, vim li cas lawv pheej muaj lus hais rau cov txiv neej los sis poj niam, thiab vim li cas lawv thiaj li tshwj xeeb nyiam cov txiv neej los sis poj niam heev, tshwj xeeb yog qhia txog txoj kev xav paub xav pom thiab kev txhawj xeeb tshwj xeeb rau cov neeg uas lawv nyiam. Cov tib neeg zoo li no muaj kev nyiam me ntsis rau cov uas ntseeg Vajtswv. Txawm hais tias lawv tsis tshua nyiam tej kev sib txoos ua ke, kev mloog tej lus qhuab qhia, kev sib qhia Vajtswv cov lus, kev hu nkauj qhuas Vajtswv, kev sib qhia txog txoj kev ntsib kev pom ntawm tus kheej, thiab lwm yam uas zoo li no los, feem ntau lawv yeej tsis hais dab tsi uas ua rau muaj tej kev cuam tshuam thiab kev tab kaum li. Lawv tsuas tsom ntsoov rau qhov nrhiav ib tug neeg hlub los ua ib lub neej zoo ua ke xwb. Yog lawv nrhiav tau ib tug neeg hlub, lawv kuj ntseeg Vajtswv raws qab tau thiab; txawm lawv tus kheej tsis caum los, lawv yeej txhawb tau lawv tus neeg hlub ntawd hauv txoj kev ntseeg Vajtswv thiab. Ib txhia neeg muaj txoj kev ua neeg kuj zoo thiab, nyiam pab lwm tus, thiab siv zog ua kom lawv yog ib tug neeg uas muaj kev phooj ywg thiab siab zoo. Piv txwv li, lawv muaj peev xwm thev taus lwm tus, xav txhua txoj kev uas lawv ua tau los pab cov uas muaj kev nyuaj kom daws tau tej ntawd, los sis muab qee cov tswv yim, thiab lwm yam ntxiv. Lawv kuj ua zoo rau lwm tus thiab tsis muaj kev npaj siab phem, tiam sis lawv lub hom phiaj rau txoj kev ntseeg Vajtswv tsis tshua zoo. Lawv tsis caum qhov tseeb, thiab lawv tsis lees txais qhov tseeb txawm leej twg yuav sib qhia qhov tseeb nrog lawv los xij. Tom qab raws qab tau ib nrab xyoo los sis ib ob xyoos lawm, los lawv yeej tsis muaj kev hloov kiag li. Txawm tias lawv tsis hais dab tsi txog qhov tsis ntseeg thiab lawv tsis ua rau muaj kev cuam tshuam los sis kev tab kaum los, lawv yeej tsis muaj kev nyiam rau tej yam ntawm txoj kev ntseeg Vajtswv kiag li. Qhov uas cia cov tib neeg zoo li no nyob hauv pawg ntseeg puas tsim nyog? (Tsis tsim nyog.) Cov tib neeg zoo li no puas yuav tsum raug muab tshem tawm? (Lawv kuj tsim nyog raug muab tshem tawm thiab.) Yog vim li cas? (Vim lawv tsis nyiam qhov tseeb, thiab lawv tsis yog cov uas yuav raug cawm dim. Yog lawv nyob hauv pawg ntseeg thiab pheej nrhiav ib tug neeg hlub, qhov ntawd yuav cuam tshuam lwm tus thiab ua rau lwm tus poob mus rau hauv txoj kev dag ntxias; lawv ua tsis tau ib lub luag hauj lwm zoo.) Yeej yog li ntawd ntag. Piv txwv li, ib txhia neeg mas tshwj xeeb nyiam noj nqaij. Thaum lawv noj nqaij, lawv tsis nco qab txog lawv tes hauj lwm li lawm. Yog tsis muaj nqaij noj, lawv tseem muaj peev xwm ua tau qee yam hauj lwm uas tsim nyog, tiam sis thaum muaj nqaij noj, lawv tes hauj lwm yeej yuav raug ncua. Ua li nqaij yog dab tsi rau lawv? (Kev dag ntxias.) Yog lawm, qhov ntawd yog ib qhov kev dag ntxias. Yog li ntawd, cov uas pheej nrhiav ib tug neeg hlub ntawd puas suav tau tias yog ib lub hauv paus ntawm txoj kev dag ntxias? (Suav tau.) Lawv yeej yog ib lub hauv paus ntawm txoj kev dag ntxias ntag. Rau cov tib neeg zoo li no, yuav tsum qhia kom meej rau lawv hais tias: “Koj tsis muaj lub siab dawb paug rau txoj kev ntseeg Vajtswv los sis kev ua koj tes dej num. Koj yeej ib txwm koom tsis tau nrog pawg ntseeg thiab yeej ib txwm tsis suav tias yog ib tug ntseeg tseeb li. Nyob rau hauv ob xyoos uas tau sib cuag no, peb tau pom koj lub hom phiaj lawm: Koj tsuas xav nrhiav ib tug neeg hlub hauv pawg ntseeg xwb. Qhov no tsis yog kev ua phem rau cov neeg zoo lod? Cov tib neeg nyob hauv pawg ntseeg tsis haum rau koj. Muaj ntau tus uas haum rau koj nyob hauv cov ib txwm tsis ntseeg. Mus nrhiav ib tug nyob hauv cov ib txwm tsis ntseeg ntawd.” Lub ntsiab lus nyob hauv qhov no yog xav qhia rau lawv hais tias, “Peb twb pom tshab txog koj lawm. Koj tsis yog ib tug ntawm cov neeg Vajtswv xaiv tseg. Koj tsis yog ib tug neeg ntawm Vajtswv lub tsev. Koj raug suav tsis tau tias yog peb tus kwv tij los sis nkauj muam.” Cov tib neeg zoo li no yuav tsum raug muab ntsaig tawm ntawm pawg ntseeg mus, raws li tej hauv paus ntsiab lus ntawm Vajtswv lub tsev. Ua li no, cov tib neeg uas tsuas lam tau lam nrhiav ib tug neeg hlub thiab lam tau lam haub ntxias lwm tus no thiaj li yuav raug muab tshem tawm mus. Cov tib neeg zoo li no puas yog yooj yim paub cais? (Yog.) Cov tib neeg no kuj yog cov tsis ntseeg thiab. Lawv muaj kev nyiam me ntsis rau pawg ntseeg, rau txoj kev ntseeg ntawm sab kab lis kev cai, thiab rau cov uas ntseeg Vajtswv. Lawv tsuas xav siv lub cib fim ntawm txoj kev ntseeg Vajtswv los nrhiav ib tug txij nkawm nyob hauv cov ntseeg los nrog lawv ua neej thiab ua nyuj ua nees rau lawv xwb. Qhia rau Kuv seb, qhov zoo li no puas tau? Peb puas tsim nyog ua kom lawv txaus siab? Pawg ntseeg puas tsim nyog npaj tej yam zoo li no? (Tsis tsim nyog.) Pawg ntseeg tsis muaj lub luag hauj lwm uas yuav tsum ua kom txaus siab rau lawv tus kheej tej kev nyiam. Txawm lawv yuav xav tias cov neeg ntseeg yog cov neeg zoo npaum li cas, txawm lawv yuav xav tias lawv yuav ua tau lub neej kom zoo nrog cov neeg ntseeg no, los sis tias cov neeg ntseeg tuaj yeem taug tau txoj kev yog los xij, qhov ntawd yeej tsis muaj qab hau—lawv txoj kev xav yeej tsis muaj nqis kiag li. Cov tsis ntseeg zoo li no kuj muaj nyob hauv cov pawg ntseeg feem coob thiab. Txoj kev daws cov tib neeg no yog siv txoj kev uas peb nyuam qhuav sib qhia tas ntawd, los sis yog tias nej muaj lwm txoj kev uas zoo dua los yeej siv tau, tsuav yog daws kom raws li tej hauv paus ntsiab lus xwb. Cov tsis ntseeg no raug muab cais rau hauv ntau hom tib neeg phem—qhov ntawd puas tshaj dhau lawm? (Tsis tshaj.) Qhov no yeej yog kiag txoj kev uas peb coj rau cov tsis ntseeg.

C. Zam Tej Kev Puas Tsuaj

Tseem muaj lwm hom tib neeg twg ntxiv uas yuav tsum muab ntsaig tawm mus los sis ntiab tawm ntawm pawg ntseeg mus? (Tseem muaj lwm hom yog cov uas ntseeg Vajtswv kom zam tau tej kev puas tsuaj xwb.) Qhov ntseeg Vajtswv kom zam tau tej kev puas tsuaj ntawd kuj yog ib lub hom phiaj uas tib neeg muaj rau txoj kev ntseeg thiab. Cov tib neeg feem coob uas ntseeg Vajtswv puas yog puav leej muaj hom kev xyaw tsis huv no thiab? (Yog.) Yog li ntawd peb yuav paub cais li cas tias hom tib neeg twg yog cov uas yuav tsum muab ntsaig tawm mus los sis ntiab tawm mus vim yog qhov no, thiab hom tib neeg twg yog cov uas tsuas yog nthuav lawv tus moj yam qias vuab tsuab tawm li ib txwm uas tsis tsim nyog raug muab ntsaig tawm mus los sis ntiab tawm mus? Rau cov tib neeg feem coob mas, lawv txoj kev ntseeg yeej xyaw muaj txoj kev npaj siab uas ntseeg Vajtswv kom zam tau tej kev puas tsuaj—qhov no yog qhov muaj tseeb. Nyob rau hauv cov uas ntseeg Vajtswv kom zam tau tej kev puas tsuaj ntawd, nej yuav tsum paub cais cov tsis ntseeg uas haum rau tus qauv uas yuav muab ntsaig tawm mus los sis ntiab tawm mus ntawd. Piv txwv li, cov tib neeg zoo li no, thaum lawv pom tias tej kev puas tsuaj tab tom pib loj zuj zus lawm, lawv txawm pib mus koom tej kev sib txoos ua ke ntau ntxiv thiab maj nroos muab cov phau ntawv ntawm Vajtswv cov lus uas yav tas los lawv tau muab xa rov qab rau pawg ntseeg ntawd nqa rov qab los, hais tias tam sim no lawv xav ntseeg Vajtswv tiag tiag lawm. Txawm li cas los xij, thaum tej kev puas tsuaj dhau mus los sis txo qis lawm, lawv rov qab mus ua lag ua luam thiab nrhiav nyiaj, thiab kaw txhua txoj kev sib txuas lus kom cov kwv tij thiab cov nkauj muam nrhiav tsis tau lawv los sis hu tsis tau lawv tuaj koom tej kev sib txoos ua ke. Thaum tej kev puas tsuaj tshwm sim, lawv ua tus tuaj nrhiav cov kwv tij thiab cov nkauj muam, tiam sis thaum tej kev puas tsuaj dhau mus lawm, mas nyuaj heev rau cov kwv tij thiab cov nkauj muam uas yuav nrhiav lawv, thiab tsawg heev uas yuav muaj leej twg hu tau lawv. Tej kev qhia tshwm no puas yog pom tau meej heev? (Yog.) Thaum tsis muaj kev puas tsuaj, lawv hais tias, “Tib neeg yuav tsum muaj ib lub neej li ib txwm. Peb yuav tsum ua lub neej mus. Kuv yuav tsum ua zaub mov nyob tsev txhua hnub, thiab kuv yuav tsum xa thiab tos cov me nyuam mus kawm ntawv, yog li ntawd qee zaus kuv thiaj li tuaj tsis tau koom tej kev sib txoos ua ke. Tsis tas li ntawd xwb, kev ua neej nyob tim tsum nyiaj; txhua yam nqi siv hauv lub neej yuav tsum tau them. Peb ua neej nyob tsis tau yog tsis nrhiav nyiaj. Nyob hauv lub ntiaj teb no, tsis muaj leej twg ua neej nyob tau yog tsis muaj nyiaj. Kev ntseeg vajtswv yuav tsum muaj tiag!” Lawv hais lus zoo li muaj qab muaj hau thiab muab ntau yam laj thawj, tsom ntsoov rau qhov nrhiav nyiaj thiab ua lawv lub neej mus xwb, tsuas yog qee zaus thiaj li tuaj koom ib qho kev sib txoos ua ke thiab tsawg heev uas yuav nyeem Vajtswv cov lus. Lawv tus cwj pwm uas coj rau txoj kev ntseeg Vajtswv zoo li dej sov, tsis kub tsis txias. Thaum kev puas tsuaj tshwm sim los, lawv hais tias, “Au, kuv nyob tsis tau yog tsis muaj vajtswv; kuv tim tsum vajtswv! Kuv yuav tsum thov vajtswv thiab hu rau nws txhua hnub! Kuv tsis yog txhawm rau kom zam tej kev puas tsuaj; qhov tseem ceeb yog kuv nyob tsis tau yog tsis muaj vajtswv hauv kuv lub siab. Kev ua ib lub neej zoo yam tsis muaj vajtswv nyob hauv kuv lub siab mas yeej tseem khoob lug xwb!” Lawv hais tsis tau ib lo lus uas qhia tau tias lawv muaj kev paub txog Vajtswv; txhua yam uas lawv hais tsuas yog tej lus los tiv thaiv lawv tej kev ua thiab txoj kev coj xwb. Lawv tsis paub tias Vajtswv lub tsev muab pes tsawg phau ntawv faib rau txhua tus; lawv tsis paub tias tej lus qhuab qhia tau tham txog lub ncauj lus twg lawm; lawv tsis paub tias nyob rau hauv lub neej hauv pawg ntseeg tam sim no tab tom sib qhia txog qhov tseeb twg. Lawv tuaj koom ib qho kev sib txoos ua ke ib nrab xyoo ib zaug los sis ib xyoos ib zaug. Thaum lawv tuaj koom, lawv hais tias, “Cov ib txwm tsis ntseeg phem heev. Lub zej zog tsis ncaj ncees. Lub ntiaj teb no lim hiam. Kev siv dag zog nrhiav nyiaj mas nyuaj tiag tiag! Lub nra uas vajtswv muab rau tib neeg mas sib….” Lawv pheej tham txog tej yam uas tsis muaj qab hau no uas tsis muaj feem xyuam nrog tej ncauj lus thiab cov ntsiab lus ntawm qhov kev sib txoos ua ke txoj kev sib qhia kiag li. Lawv hais ob peb lo lus khoob lug hauv lawv txoj kev thov Vajtswv thiab ob peb lo lus sab nraud txog txoj kev ntseeg Vajtswv thiab tom qab ntawd txawm xav tias lawv tus kheej yog cov ntseeg lawm, xav tias nyob kaj siab lug hauv lawv lub siab thiab muaj kev thaj yeeb nyab xeeb lawm. Qhov no puas yog kev ntseeg Vajtswv? Cov tib neeg no yog hom neeg phem dab tsi? Yog koj nug lawv hais tias, “Vim li cas koj thiaj li tsis tuaj koom tej kev sib txoos ua ke tas li?” lawv hais tias, “Kuv qhov xwm txheej tsis tso cai li. Qhov no yog qhov xwm txheej uas vajtswv tau tsim tsa rau kuv, thiab kuv yuav tsum zwm rau.” Cov lus no mas zoo mloog heev li! Lawv kuj hais tias, “Saib seb, vajtswv tau tsim tsa qhov xwm txheej no rau kuv. Kuv tsev neeg tag nrho vam khom kuv kom tau zaub mov noj, yog li ntawd kuv thiaj li yuav tsum nrhiav nyiaj kom tau ua neej nyob! Tam sim no, kev nrhiav nyiaj yog tes hauj lwm uas vajtswv tau muab rau kuv.” Lawv yeej tsis hais txog kev ua lawv tes dej num kiag li, nrog rau lawv tej luag hauj lwm thiab tej num ntawm ib tug neeg uas raug tsim tawm los, haj yam tsis hais txog qhov tias yuav ua raws li Vajtswv cov lus li cas; tsuas yog qee zaus lawv thiaj li tuaj koom ib qho kev sib txoos ua ke thiab muab ob peb daim nyiaj suav fij xwb, ces txawm xav tias lawv tau ua txiaj ntsig rau Vajtswv lub tsev lawm. Tseem muaj lwm cov uas, thaum lawv cov me nyuam muaj mob, ces thov Vajtswv, thiab ob peb hnub tom qab ntawd, thaum lawv cov me nyuam zoo lawm, lawv maj nroos fij nyiaj rau pawg ntseeg thiab tom qab ntawd txawm ploj mus dua lawm. Txhua zaus uas lawv sib cuag nrog cov kwv tij thiab cov nkauj muam, lawv yeej tsis sib qhia txog qhov tseeb li, thiab lawv kuj tsis nyeem Vajtswv cov lus li thiab. Thaum tsis muaj kev puas tsuaj los sis kev puas ntsoog mas, lawv yeej tsis thov Vajtswv li. Lawv tej lus tham txhua hnub yeej ib txwm yog txog tej xwm txheej me me hauv tsev neeg, kev sib cav txog qhov yog thiab qhov tsis yog, lub neej ntawm sab cev nqaij daim tawv, ntau yam xwm txheej hauv zej zog, thiab ntau yam uas lawv pom thiab hnov; tsawg heev uas lawv yuav sib qhia txog Vajtswv cov lus thiab yeej tsis hais ib lo lus hauv siab uas muaj feem xyuam nrog txoj kev ntseeg Vajtswv li. Lawv tsuas dai ib lub npe nyob hauv pawg ntseeg kom nrhiav tau Vajtswv txoj kev saib xyuas thiab kev tsom kwm xwb. Qhov no yog lawv txoj kev ntseeg Vajtswv; lawv tsuas nrhiav kev thaj yeeb nyab xeeb thiab koob hmoov yam tsis caum qhov tseeb kiag li. Lawv tsis nyiam qhov tseeb kiag li. Lawv tsuas xav tau txais txiaj ntsim, hmoov hlub, thiab tej koob hmoov los ntawm txoj kev ntseeg Vajtswv xwb. Lawv tsis quav ntsej txog lwm tiam vim lawv pom tsis tau qhov ntawd thiab tsis ntseeg txog qhov ntawd kiag li. Lawv tsuas xav xyiv fab rau Vajtswv qhov hmoov hlub nyob hauv lub neej no thiab zam txhua yam kev puas tsuaj xwb. Vim Vajtswv thiab pawg ntseeg yog lawv qhov chaw nkaum, thaum twg uas lawv tuaj koom tej kev sib txoos ua ke, qhov ntawd yeej yog thaum lawv ntsib tej kev nyuaj los sis kev puas tsuaj. Cov tib neeg zoo li no puas yog cov uas ntseeg Vajtswv yam siab dawb paug? (Tsis yog.) Lawv yog hom tib neeg twg? (Cov neeg nrhiav cib fim thiab cov tsis ntseeg.) Cov no yog cov tsis ntseeg uas xav siv pawg ntseeg los zam tej kev puas tsuaj. Cov tib neeg zoo li no puas tsim nyog cia lawv nyob rau hauv pawg ntseeg? (Tsis tsim nyog.) Thaum lawv tuaj koom tej kev sib txoos ua ke, lawv cuam tshuam lwm tus thiab ua rau lwm tus ntxhov siab. Tib neeg feem coob paub cai dhau thiab txaj muag txwv lawv, yog li ntawd cov neeg feem coob ntawd thiaj li cia cov neeg no hais lus ua dog ua dig thiab cuam tshuam txhua tus txoj kev noj thiab haus Vajtswv cov lus. Thaum txog theem no cov thawj coj thiab cov neeg ua hauj lwm yuav tsum ua li cas? Lawv puas yog tsim nyog ris lub luag hauj lwm uas txwv cov tib neeg zoo li no, tiv thaiv cov tib neeg feem coob tej txiaj ntsim, thiab tiv thaiv lub neej hauv pawg ntseeg li ib txwm? (Yog.) Koj muab tau lawv cov phau ntawv ntawm Vajtswv cov lus rov qab thiab ntuas kom lawv tawm hauv pawg ntseeg mus. Muaj ntau txoj kev los ntuas kom ib tug twg tawm hauv pawg ntseeg mus—nej tuaj yeem xav txoj hau kev ntawm nej tus kheej. Tsuas yog ua kom paub tseeb tias lawv hu tsis tau cov kwv tij thiab cov nkauj muam ntxiv lawm xwb. Yog ib tug neeg twg hais tias, “Tus neeg no zoo. Lawv tsuas tham txog qee yam xwm txheej me me hauv tsev neeg nyob hauv pawg ntseeg xwb, tiam sis lawv tsis cuam tshuam pawg ntseeg tes hauj lwm los sis cuam tshuam peb txoj kev ua tes dej num, yog li ntawd peb yuav tsum tiv! Nyob hauv txoj kev ntseeg Vajtswv, peb tsis yog yuav tsum thev taus thiab tiv txhua hom tib neeg lod? Vajtswv xav kom txhua tus neeg raug cawm dim thiab tsis xav kom leej twg raug kev puas tsuaj!” Yog li ntawd koj yuav tsum saib seb lawv puas yog cov uas yuav raug cawm dim. Yog lawv tsis yog, puas yog peb tsim nyog paub cais thiab muab lawv ntsaig tawm mus? (Yog.) Ib txhia neeg hais tias, “Kuv paub cai dhau; kuv txaj muag yog yuav ntuas kom lawv tawm hauv pawg ntseeg mus.” Qhov teeb meem no yooj yim daws. Koj tsuas tsis hu lawv, ces koj yuav tsis raug lawv cuam tshuam los sis txwv lawm. Txawm koj yuav ntsib lawv los, koj tsis tas yuav mus quav ntsej lawv. Tsis tim tsum yuav tham txog tej yam ntawm txoj kev ntseeg Vajtswv nrog lawv; tsuas coj rau lawv zoo li cov ib txwm tsis ntseeg xwb. Ib txhia neeg hais tias, “Peb puas tuaj yeem pab lawv nrog lub siab hlub thiab sib qhia qhov tseeb uas peb to taub nrog lawv?” Rau cov tsis ntseeg zoo li no, yog koj muaj lub siab hlub tiag tiag no, koj yeej sim tau. Yog koj muaj peev xwm hloov tau lawv tiag tiag, ces cov neeg zoo li no tsis tim tsum muab ntsaig tawm mus los sis ntiab tawm mus. Ib txhia neeg hais tias, “Kuv yuav tsis nkim kuv lub zog. Qhov kev pab lawv yeej tsis muaj qab hau, qhov ntawd zoo li kev muab ib tug npua da dej xwb; txawm koj yuav ntxuav nws kom huv npaum li cas los, nws yeej tseem yuav mus da pas av nkos. Nws yeej yog hom tsiaj zoo li ntawd; nws hloov tsis tau!” Yog koj to taub qhov no, ces koj yeej yog lawm. Koj puas tseem yuav sib qhia qhov tseeb nrog cov tsis ntseeg zoo li no los pab lawv? Nej puas tseem yuav ua tes hauj lwm uas tsis muaj qab hau no? (Tsis ua lawm.) Thaum txog theem no, nej paub tias nej ruam thiab pom tsis tshab tib neeg. Cov tsis ntseeg mas yeej hloov tsis tau li. Cov tib neeg no kuj paub tias cov uas ntseeg Vajtswv ua tej yam zoo thiab tsis ua tej yam phem, tias lawv tsis thab lwm tus los sis dag lwm tus. Lawv muaj kev xav zoo txog cov uas ntseeg Vajtswv, yog li ntawd lawv thiaj li zais lawv tus kheej nyob hauv qab lub npe uas yog “ntseeg tias muaj ib tug Vajtswv” thiab “kev ntseeg Vajtswv yog qhov zoo” thiab nkag zais ntshis los rau hauv pawg ntseeg, ua kom tib neeg xav tias lawv yog ib tug kwv tij los sis ib tug nkauj muam. Ib txhia neeg yeej raug dag los ntawm qhov no tiag, saib lawv li ib tug kwv tij los sis nkauj muam tiag tiag, nquag mus saib thiab pab lawv. Tom qab dhau mus ntev lawm lawv thiaj li paub tias: “Tus neeg no tsuas tuaj rau hauv pawg ntseeg thaum lawv ntsib kev puas tsuaj los sis kev nyuaj xwb, hais tej lus uas tsis muaj nqis, thiab tsis muaj txiaj ntsig. Thaum txhua yam mus tau zoo thiab txhua yam zoo rau lawv, thaum lawv lub neej zoo, lawv tsis quav ntsej leej twg li. Yog peb ntxov paub tias lawv yog neeg phem zoo li no, peb yuav tsis pab lawv los sis siv zog ntau npaum li no!” Tam sim no los khuv xim puas muaj qab hau? Lig dhau lawm uas los khuv xim—koj twb tau hais lus ntau heev yam tsis muaj qab hau lawm! Muab hais luv luv tias, cov tsis ntseeg zoo li no yuav tsum tau paub cais, daws, thiab muab ntsaig tawm ntawm pawg ntseeg mus kom ntxov li ntxov tau. Tsis txhob saib lawv li cov kwv tij thiab cov nkauj muam; lawv tsis yog cov kwv tij thiab cov nkauj muam. Tsuas yog cov neeg uas Vajtswv xaiv tseg xwb thiaj li yog cov kwv tij thiab cov nkauj muam; tsuas yog cov uas tuaj yeem raug cawm dim thiab cov uas caum txoj kev pe hawm Vajtswv xwb thiaj li yog cov kwv tij thiab cov nkauj muam. Cov uas lam nyob rau hauv Vajtswv lub tsev kom zam tau tej kev puas tsuaj thiab ntshaw txoj kev xyiv fab rau Vajtswv qhov hmoov hlub yam tsis lees txais qhov tseeb kiag li ntawd yog cov tsis ntseeg. Lawv tsis yog cov kwv tij thiab cov nkauj muam, thiab lawv yeej tsis yog cov neeg Vajtswv xaiv tseg kiag li. Koj puas to taub? Cov tsis ntseeg zoo li no yuav tsum coj rau lawv raws li tej hauv paus ntsiab lus; yuav tsum daws lawv raws li qhov uas tsim nyog daws. Qhov no yog lub luag hauj lwm ntawm cov thawj coj thiab cov neeg ua hauj lwm, thiab kuj yog ib lub hauv paus ntsiab lus uas txhua tus ntawm cov neeg Vajtswv xaiv tseg yuav tsum paub meej thiab.

Lub Kaum Hli Hnub Tim 23, Xyoo 2021