Yam Kaum Plaub: Paub Cais Kom Ncav Sij Hawm, thiab Tom Qab Ntawd Muab Txhua Hom Tib Neeg Phem thiab Cov Tawm Tsam Khetos Ntsaig Tawm Mus los sis Ntiab Tawm Mus (Ntu Ob)

Nyob rau qhov kev sib txoos ua ke zaum tas los, peb tau sib qhia txog cov thawj coj thiab cov neeg ua hauj lwm lub luag hauj lwm yam kaum plaub: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.” Qhov kev sib qhia ntawd tau hais txog ib kis ntawm qhov no: pawg ntseeg yog dab tsi. Tom qab sib qhia txog lub ntsiab lus tshab txhais ntawm pawg ntseeg lawm, nej puas meej txog qhov kev sib txuas ntawm qhov no thiab cov thawj coj thiab cov neeg ua hauj lwm lub luag hauj lwm yam kaum plaub lawm? (Tom qab Vajtswv qhia txog lub ntsiab lus tshab txhais ntawm pawg ntseeg lawm, peb to taub tias vim li cas thiaj li muaj pawg ntseeg, lub luag hauj lwm ntawm ib pawg ntseeg, thiab tes hauj lwm uas pawg ntseeg ua. Raws li qhov no, peb paub cais tau tias cov neeg twg nyob hauv pawg ntseeg tab tom ua tej kev tab kaum thiab tej kev cuam tshuam, thiab tsis pab tau dab tsi zoo, thiab tom qab ntawd muab cov neeg no ntsaig tawm mus los sis ntiab tawm mus.) Tom qab to taub tias pawg ntseeg yog dab tsi lawm, cov thawj coj thiab cov neeg ua hauj lwm yuav tsum paub tias vim li cas Vajtswv thiaj li tsim tsa cov pawg ntseeg, qhov kev tsim tsa pawg ntseeg ntawd muaj txiaj ntsig rau tib neeg li cas, thiab tes hauj lwm uas pawg ntseeg yuav tsum ua, hom tib neeg uas los koom ua ib pawg ntseeg, thiab cov neeg twg yog cov kwv tij thiab cov nkauj muam tiag tiag. Tom qab to taub thiab paub txog tej no lawm, nej thiaj li muaj ib lub tswv yim thiab lub ntsiab lus tshab txhais theem hauv paus, nrog rau ib lub hauv paus ntawm tej hauv paus ntsiab lus rau tes hauj lwm uas teev tseg nyob rau hauv yam kaum plaub: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.” Qhov no yog ib yam uas nej yuav tsum meej thiab to taub txog nyob rau sab kev xav thiab zeem muag. Tom qab to taub qhov no lawm, thawj yam hauj lwm uas cov thawj coj thiab cov neeg ua hauj lwm yuav tsum ua yog los paub cais txhua hom tib neeg phem. Cov qauv thiab tej hauv paus ntsiab lus los ua qhov no yog dab tsi? Qhov paub cais txhua hom tib neeg phem yuav tsum yog raws li lub ntsiab lus tshab txhais ntawm pawg ntseeg, lub ntsiab tseem ceeb thiab qhov muaj nqis ntawm pawg ntseeg txoj kev muaj nyob, thiab tes hauj lwm uas Vajtswv tsim tsa pawg ntseeg los ua. Zaum tas los, cov qauv thiab cov hauv paus rau kev paub cais ntau hom tib neeg phem tau muab faib ua peb hom loj. Peb hom no yog dab tsi? (Ib tug neeg lub hom phiaj rau kev ntseeg Vajtswv, txoj kev ua neeg, thiab tus cwj pwm uas coj rau tes dej num.) Peb hom ntsiab lus loj no puas ntxaws thiab txhij txhua txaus lawm? Ib txhia neeg hais tias, “Vim li cas qhov paub cais txhua hom tib neeg thiaj li tsis yog raws li qib uas lawv nyiam qhov tseeb, thiab qib uas lawv zwm rau, hwm thiab ntshai Vajtswv, tiam sis ho yog raws li lawv lub hom phiaj ntawm kev ntseeg Vajtswv, lawv txoj kev ua neeg, thiab lawv tus cwj pwm uas coj rau lawv tes dej num? Cov qauv no puas qis dhau lawm? Muab hais ua lwm lo lus mas, yog saib raws li cov ntsiab lus tiag tiag ntawm peb hom no, vim li cas thiaj li tsis muaj kev hais kom tob dua txog tib neeg tus cwj pwm uas muaj rau Vajtswv thiab qhov tseeb? Vim li cas thiaj li tsis hais txog qhov seb tib neeg puas txaus siab hlo lees txais kev ntuas, kev txiav txim, thiab kev rau txim, seb lawv puas muaj lub siab zwm rau thiab hwm Vajtswv, thiab lwm cov ntsiab lus uas tob dua uas ntsig txog qhov tseeb?” Nej puas tau xav txog lo lus nug no dua? Tam sim no cia peb muab qhov teeb meem no tso rau ib sab tso. Cia peb xub saib peb yam qauv no: tib neeg lub hom phiaj ntawm kev ntseeg Vajtswv, lawv txoj kev ua neeg, thiab lawv tus cwj pwm uas coj rau lawv tes dej num. Yog saib raws li cov npe, peb yam qauv no puas ntiav? Yog ib tug neeg tsis tau raws li tus qauv ntawm peb yam theem hauv paus tshaj plaws no, puas hu tau lawv ua ib tug kwv tij los sis ib tug nkauj muam? (Tsis tau.) Puas suav tau hais tias lawv yog ib tug tswv cuab hauv pawg ntseeg? Lawv puas raug Vajtswv lees paub tias yog ib feem ntawm pawg ntseeg? (Tsis raug.) Lawv yeej ua tsis tau ib yam twg ntawm tej no li. Yog li ntawd, yog ib tug neeg ua tsis tau zoo los sis tsis tau raws li tus qauv nyob hauv li ib qho twg ntawm peb yam no, ces yuav tsum tau paub cais cov neeg zoo li no; lawv yog nyob rau hauv pab pawg ntawm ntau hom tib neeg phem, thiab yuav tsum muab lawv ntsaig tawm mus los sis ntiab tawm mus. Qhov seb ib tug neeg puas yog ib tug kwv tij los sis ib tug nkauj muam, puas raug Vajtswv lees paub, los sis yog ib tug tswv cuab uas pawg ntseeg yuav tsum lees txais ntawd, yam tsawg kawg nkaus yog nyob ntawm qhov seb lawv puas ua tau raws tus qauv thiab ua tau zoo raws li peb yam no. Yog lawv twb ua tsis tau raws li peb tug qauv no, ces lawv yeej tsis yog ib tug kwv tij los sis ib tug nkauj muam kiag li. Yeej ib txwm yog li ntawd, Vajtswv tsis lees paub lawv, thiab pawg ntseeg kuj tsis tsim nyog lees txais lawv thiab. Yog li ntawd, pawg ntseeg yuav tsum coj li cas thiab ua li cas rau lawv? (Yuav tsum muab lawv ntsaig tawm mus los sis ntiab tawm mus.) Kiag thaum paub cais tau lawv lawm, yuav tsum muab lawv ntsaig tawm mus los sis ntiab tawm mus. Qhov no yeej yog li ntawd ntag.

Cov Qauv thiab Cov Hauv Paus Rau Kev Paub Cais Ntau Hom Tib Neeg Phem

I. Raws Li Lub Hom Phiaj rau Kev Ntseeg Vajtswv

D. Koom Kev Nrhiav lub Cib Fim

Nyob rau qhov kev sib txoos ua ke zaum tas los, peb tau sib qhia thiab teev tawm peb lub hom phiaj rau kev ntseeg Vajtswv. Yog peb muab tej no teev ua cov npe ncauj lus, thawj qhov yog ua kom txaus rau lub siab ntshaw ua ib tug nom; qhov ob yog nrhiav poj niam los sis txiv neej; thiab qhov peb yog kom zam tau tej kev puas tsuaj. Peb tau sib qhia txog peb lub hom phiaj no tag lawm. Txuas ntxiv, peb yuav sib qhia txog lub hom phiaj plaub: Ib txhia neeg ntseeg Vajtswv tsuas yog txhawm rau tej laj thawj nrhiav cib fim xwb, yog li ntawd lub npe ncauj lus ntawm lub hom phiaj no yog “koom kev nrhiav lub cib fim.” Ib txhia neeg pom tias txhua txoj kab lis kev cai ntseeg thiab pab ntseeg nyob hauv lub ntiaj teb ntawm sab kab lis kev cai ntseeg puav leej qhuav qhawv thiab tsis muaj Vajntsujplig tes hauj lwm—tias tib neeg txoj kev ntseeg thiab txoj kev hlub twb txias zuj zus lawm, tias tib neeg tus kheej twb qias vuab tsuab zuj zus thiab tsis pom muaj kev cia siab rau kev cawm dim, thiab tias tib neeg tau ntseeg tus Tswv ntau xyoo los lawm yam tsis tau txais ib yam dab tsi li. Thaum pom tias lub ntiaj teb ntawm sab kab lis kev cai ntseeg tau hloov mus ua ib thaj chaw suab puam tag lawm, lawv thiaj li nrhiav ib txoj kev mus rau tom ntej rau lawv tus kheej. Lawv xav hais tias, “Tam sim no pawg ntseeg twg muaj neeg coob dua, tab tom muaj kev vam meej, thiab muaj kev cia siab rau txoj kev loj hlob?” Lawv pom tias Pawg Ntseeg ntawm Vajtswv Tus Uas Muaj Hwj Chim Loj Kawg Nkaus, uas raug lub ntiaj teb ntawm sab kab lis kev cai ntseeg tawm tsam thiab teem txim ntawd, tab tom muaj kev vam meej, tias pawg ntseeg ntawd muaj Vajntsujplig tes hauj lwm, thiab tab tom loj hlob zoo nyob hauv teb chaws thiab txawv teb chaws. Lawv xav tias, “Kuv hnov tias pawg ntseeg no cov tswv cuab tab tom nce coob zuj zus, tias pawg ntseeg no tab tom loj hlob zoo, thiab tias pawg ntseeg no muaj neeg lub zog, muaj khoom siv, thiab muaj nyiaj txiag nplua mias, thiab muaj kev cia siab rau txoj kev loj hlob. Yog kuv tuav lub cib fim zoo no los koom nrog lawv pawg ntseeg, puas yog kuv yuav tau txais qee yam txiaj ntsim? Puas yog kuv yuav tau txais lub neej yav tom ntej uas zoo rau kuv tus kheej?” Nrog rau txoj kev npaj siab thiab lub hom phiaj zoo li no, thiab kev xav paub xav pom me ntsis, lawv thiaj li nrhiav kev nkag los rau hauv pawg ntseeg. Tom qab cov neeg no nkag los rau hauv pawg ntseeg lawm, lawv tsis nyiam qhov tseeb, kev ntseeg Vajtswv, los sis kev hloov ntawm lawv lub neej txoj sia tus moj yam. Lawv lub hom phiaj ntawm qhov kev koom nrog pawg ntseeg tsuas yog xav nrhiav ib qho chaw vam khom los sis ib qho chaw nyob thiab kom tau txais lub neej yav tom ntej uas lawv xav tau ntawd xwb. Qhov tseeb tiag, nyob hauv lawv lub siab, lawv yeej tsis nyiam kev ntseeg Vajtswv, tej qhov tseeb uas Vajtswv nthuav tawm, los sis tes hauj lwm cawm dim uas Vajtswv ua, thiab lawv tsis xav hnov los sis nrhiav tej no. Tshwj xeeb tshaj yog, lawv yeej tsis nyiam kiag li txog Vajtswv tes hauj lwm thiab Vajntsujplig tes hauj lwm. Cov neeg no zoo li cov neeg nrhiav cib fim hauv zej zog uas, txawm lawv yuav koom nrog txoj hauj lwm twg los xij, lawv tsuas ua li ntawd txhawm rau nrhiav cib fim kom tau txais lub koob npe, kev tau txais txiaj ntsim, thiab lub meej mom, thiab tsuas nqis peev thiab them tus nqi txhawm rau lawv tus kheej lub neej yav tom ntej thiab txoj hmoo xwb. Thaum lawv pom tias tam sim no tsis muaj kev cia siab rau yav tom ntej nyob hauv txoj kab hauj lwm los sis txoj hauj lwm uas lawv tau muab lawv tus kheej tso rau ntawd, los sis tias txoj hauj lwm no tsis cia rau lawv nthuav lawv tej kev ua tau zoo tawm thiab vam meej hauv lub neej, lawv pheej xam hauv lawv lub siab tias seb puas yuav hloov tej hauj lwm los sis hloov mus ua lwm txoj hauj lwm. Txawm lawv yuav ua dab tsi los xij, cov neeg zoo li no pheej tos ntsoov lub cib fim los nqis tes ua; lawv muaj ib txoj kev npaj siab thiab lub hom phiaj rau qhov kev koom nrog pawg ntseeg. Thaum pawg ntseeg muaj kev vam meej, thaum pawg ntseeg sawv tau khov kho thiab muaj kev cia siab rau txoj kev loj hlob hauv zej zog los sis lub teb chaws twg, lawv nquag thiab kub siab lug mob siab rau pawg ntseeg tes hauj lwm. Tiam sis kiag thaum pawg ntseeg raug tsuj nias thiab raug txwv, los sis ua tsis tau raws li lawv tus kheej tej kev ntshaw thiab tej kev cheem tsum, lawv xav tias puas yuav tawm hauv pawg ntseeg mus thiab nrhiav lwm txoj kev mus rau tom ntej rau lawv tus kheej. Pom tau meej tias, lub hom phiaj tiag tiag uas cov neeg no koom nrog pawg ntseeg tsis yog vim lawv nyiam qhov tseeb; lawv tsis tau koom nrog pawg ntseeg los ntawm lub hauv paus uas lees paub Vajtswv txoj kev muaj nyob thiab Vajtswv tes hauj lwm tshiab ntawm kev cawm tib neeg. Txawm yog thaum lawv xaiv ib lub pawg ntseeg los, lawv xaiv lub uas muaj npe nrov, loj, thiab muaj tswv cuab coob, tshwj xeeb tshaj yog lub uas muaj npe nrov nyob hauv teb chaws thiab txawv teb chaws. Rau lawv mas, tsuas yog hom pawg ntseeg zoo li no xwb thiaj li ua tau raws li lawv cov qauv thiab haum nkaus rau cov hom phiaj uas lawv ntshaw los sis caum. Tiam sis txawm yuav yog li cas los xij, lawv yeej ib txwm tsis tau ntseeg qhov tseeb tiag tiag, thiab lawv yeej tsis tau lees paub tiag tiag txog Vajtswv txoj kev muaj nyob los sis Vajtswv tes hauj lwm. Txawm yog saib sab nraud zoo li qee zaus lawv ua ib yam dab tsi rau pawg ntseeg los sis mob siab rau ib feem ntawm pawg ntseeg tes hauj lwm los, nyob tob tob hauv lawv lub siab mas, lawv tus cwj pwm uas muaj rau qhov tseeb thiab coj rau Vajtswv yeej tsis hloov kiag li. Lawv tus cwj pwm yog dab tsi? Lawv tus cwj pwm uas ib txwm muaj yog tsuas lam xub raws qab mus tso, kom pom tias lawv yuav tau txais dab tsi tiag tiag los ntawm pawg ntseeg no, kom pom tias muaj pes tsawg lo ntawm Vajtswv cov lus hais uas yuav tshwm sim muaj tseeb thiab tshwm sim muaj tseeb npaum li cas, thiab kom pom tias thaum twg thiaj li yuav tau txais cov koob hmoov uas Vajtswv tau cog lus tseg rau tib neeg, thiab seb puas yuav pom thiab ua tau kom tiav cov koob hmoov no nyob rau hauv lub sij hawm luv luv. Lawv tus cwj pwm yeej ib txwm zoo li no. Lawv los rau hauv Vajtswv lub tsev nrog kev xav paub xav pom thiab lub siab xav lam sim seb, thiab ib tug cwj pwm uas hais tias yog Vajtswv cov lus muaj tseeb thiab tshwm sim los tiag, ces lawv yuav tau txais koob hmoov thiab tsis poob peev. Cov neeg zoo li no los rau hauv Vajtswv lub tsev, txawm yog saib sab nraud zoo li lawv coj zoo nrog lwm tus, ua raws li cov kev cai, tsis ua kom muaj tej kev tab kaum los sis kev cuam tshuam, thiab tsis txhob txwm ua tej yam phem, raws li lawv tus cwj pwm uas muaj rau Vajtswv thiab qhov tseeb mas paub cais tau tias lawv yog cov tsis ntseeg uas pom tau meej heev.

Peb yuav ua li cas thiaj li paub cais tau hom neeg tsis ntseeg uas ntseeg Vajtswv tsuas yog txhawm rau nrhiav lub cib fim kom tau txais tej koob hmoov, thiab tsis xav tau qhov tseeb kiag li? Txawm lawv yuav mloog ntau zaj lus qhuab qhia npaum li cas los xij, txawm yuav sib qhia qhov tseeb rau lawv li cas los xij, lawv tej kev xav thiab kev xam pom txog tib neeg thiab tej yam, lawv txoj kev xam pom txog lub neej thiab tej kev muaj nqis yeej tsis hloov kiag li. Vim li cas thiaj li tsis hloov? Vim lawv yeej tsis ua tib zoo xav txog Vajtswv cov lus thiab yeej tsis lees txais tej qhov tseeb uas Vajtswv nthuav tawm los sis yam uas Vajtswv hais txog ntau yam teeb meem kiag li. Lawv tsuas tuav rawv lawv tus kheej tej kev xam pom thiab Ntxwgnyoog lub tswv yim xwb. Nyob hauv lawv lub siab, lawv tseem ntseeg tias Ntxwgnyoog lub tswv yim thiab laj thawj yog qhov yog thiab raug lawm. Piv txwv li, “Txhua tus tib neeg ua rau nws tus kheej thiab tus uas poob qab yuav raug dab phem muab,” “Cov nom tswv tsis ua nyuaj rau cov uas nqa khoom plig tuaj,” los sis “Cov tib neeg zoo muaj lub neej kaj siab lug.” Haj tseem muaj cov uas hais tias, “Thaum tib neeg ntseeg vajtswv, lawv yuav tsum ua neeg zoo, uas txhais tau tias tsis txhob tua txoj sia; qhov tua txoj sia yog ib qho kev txhaum, thiab vajtswv zam txim tsis tau rau.” Qhov no yog hom kev xam pom dab tsi? Qhov ntawd yog ib txoj kev xam pom ntawm kev ntseeg Hauj Sam. Txawm yog txoj kev xam pom ntawm kev ntseeg Hauj Sam yuav haum tib neeg tej kev xav phem thiab tej kev xav hauv nruab siab los, qhov ntawd yeej tsis muaj qhov tseeb kiag li. Kev ntseeg Vajtswv yuav tsum saib raws li Vajtswv cov lus; tsuas yog Vajtswv cov lus xwb thiaj li yog qhov tseeb. Nyob hauv lawv txoj kev ntseeg Vajtswv, ib txhia neeg tseem lees txais cov ib txwm tsis ntseeg tej kev xam pom uas tsis muaj qab hau thiab lub ntiaj teb ntawm sab kab lis kev cai ntseeg tej tswv yim uas yuam kev ua qhov tseeb, lawv saib tej ntawd muaj nqis thiab tuav rawv tej ntawd. Cov neeg no puas yog cov uas lees txais qhov tseeb? Lawv cais tsis tau kom meej tias qhov twg yog tib neeg cov lus thiab qhov twg yog Vajtswv cov lus, los sis qhov twg yog cov dab thiab Ntxwgnyoog thiab qhov twg yog tus tseem Vajtswv, tus Tswv Tsim. Lawv tsis thov Vajtswv los sis nrhiav qhov tseeb, thiab lawv kuj tsis lees txais ib qho qhov tseeb twg uas Vajtswv nthuav tawm li. Lawv tej kev xav thiab kev xam pom txog tib neeg, lub ntiaj teb sab nraud, thiab txhua yam yeej tsis hloov kiag li. Lawv tsuas tuav rawv tej kev xam pom uas lawv ib txwm tuav los, uas yog los ntawm kab lis kev cai qub los. Txawm cov kev xam pom ntawd yuav tsis muaj qab hau npaum li cas los, lawv yeej pom tsis tau qhov no, thiab lawv tseem tuav rawv cov kev xam pom uas yuam kev ntawd thiab tsis tso tseg li. Qhov no yog ib qho kev qhia tshwm ntawm ib tug tsis ntseeg. Lwm qhov yog dab tsi? Qhov ntawd yog lawv txoj kev kub siab, tej kev xav hauv siab, thiab kev ntseeg hloov mus raws li qhov pawg ntseeg loj zuj zus thiab raws li pawg ntseeg lub meej mom hauv zej zog nce siab yam tsis tu ncua. Piv txwv li, thaum pawg ntseeg tes hauj lwm nthuav dav mus rau txawv teb chaws thiab loj zuj zus, thaum tes hauj lwm tshaj tawm txoj moo zoo nthuav tawm mus tag nrho, lawv pom qhov no thiab muaj zog kiag tam sim ntawd. Lawv xav tias pawg ntseeg tab tom muaj hwj chim loj zuj zus thiab yuav tsis raug tsoom fwv txoj kev tsuj nias thiab kev tsim txom ntxiv lawm, lawv ntseeg tias muaj kev cia siab rau lawv txoj kev ntseeg Vajtswv, tias lawv tuaj yeem tsa taus lawv lub taub hau lawm; yog li ntawd lawv thiaj li xav tias los ntawm kev ntseeg Vajtswv, lawv twv tau yog lawm, tias qhov lawv twv ntawd thaum kawg yuav tau txais kev pauj rov qab los. Lawv xav tias lawv lub cib fim uas yuav tau txais tej koob hmoov tab tom loj zuj zus thiab thaum kawg lawv thiaj li pib zoo siab tuaj. Nyob rau cov xyoo dhau los, lawv ib txwm hnov raug nias qees, raug kev mob, thiab nyuaj siab vim lawv pheej pom tus zaj loj liab ploog tej kev ntes thiab kev tsuj nias cov Ntseeg Vajtswv. Vim li cas lawv thiaj li hnov nyuaj siab? Vim pawg ntseeg nyob rau hauv qhov xwm txheej uas nyuaj dhau, thiab lawv txhawj xeeb tias lawv puas xaiv yog lawm ntawm kev ntseeg Vajtswv, thiab tshaj ntawd, lawv ntxhov siab thiab txhawj xeeb tias lawv puas yuav nyob los sis tawm ntawm pawg ntseeg mus. Nyob rau cov xyoo ntawd, txawm pawg ntseeg yuav ntsib tej xwm txheej phem li cas los xij, qhov ntawd yeej yuav cuam tshuam rau lawv tej kev xav hauv siab; txawm pawg ntseeg yuav ua tes hauj lwm dab tsi thiab txawm pawg ntseeg lub koob npe thiab lub meej mom hauv lub zej zog yuav nce thiab nqis li cas los xij, qhov ntawd yeej cuam tshuam rau lawv tej kev xav hauv siab thiab lub siab. Lo lus nug seb lawv yuav nyob los sis yuav mus ntawd yeej ib txwm nyob rawv hauv lawv lub siab. Cov neeg zoo li no yog cov tsis ntseeg, tsis yog lod? Thaum pawg ntseeg raug tsoom fwv teem txim thiab tsuj nias, los sis thaum cov ntseeg raug ntes los sis raug txiav txim, raug teem txim, raug hais lus phem, thiab raug lub ntiaj teb ntawm sab kab lis kev cai ntseeg tsis lees txais, lawv hnov tob tob tias qhov uas lawv los koom nrog pawg ntseeg ua rau lawv poob ntsej muag thiab haj tseem hnov tias lawv raug kev txaj muag loj kawg nkaus; lawv lub siab tsis ruaj khov thiab lawv khuv xim uas tau ntseeg Vajtswv thiab koom nrog pawg ntseeg. Lawv yeej tsis muaj lub siab xav koom txoj kev xyiv fab thiab kev nyuaj nrog pawg ntseeg, los sis raug kev txom nyem nrog Khetos. Tiam sis, thaum pawg ntseeg muaj kev vam meej, saib zoo li lawv muaj kev ntseeg puv npo, tiam sis thaum pawg ntseeg raug tsim txom, raug tsis lees txais, raug tsuj nias, thiab raug teem txim, lawv xav khiav, xav tawm mus. Thaum lawv pom tsis tau ib qho kev cia siab twg uas yuav tau txais tej koob hmoov, los sis ib qho kev cia siab twg uas lub nceeg vaj txoj moo zoo yuav nthuav dav ntawd, lawv haj yam xav tawm mus ntxiv. Thaum lawv tsis pom Vajtswv cov lus tshwm sim muaj tiag, thiab tsis paub tias thaum twg tej kev puas ntsoog loj thiaj li yuav los thiab thaum twg thiaj li yuav xaus, los sis thaum twg Khetos lub nceeg vaj thiaj li yuav muaj tseeb, lawv lub siab tsis ruaj khov thiab ua tsis tau lawv tes dej num nrog lub siab tus. Thaum twg qhov no tshwm sim, lawv xav tso Vajtswv tseg, tso pawg ntseeg tseg, thiab nrhiav ib txoj kev tawm. Cov neeg zoo li no yog cov tsis ntseeg, tsis yog lod? Txhua yam uas lawv ua puav leej yog txhawm rau tej txiaj ntsim ntawm lawv tus kheej sab cev nqaij daim tawv. Lawv tej kev xav thiab kev xam pom yeej yuav tsis maj mam hloov los ntawm lawv txoj kev ntsib kev pom txog Vajtswv tes hauj lwm, los sis los ntawm kev nyeem Nws cov lus, kev sib qhia qhov tseeb, thiab kev ua lub neej hauv pawg ntseeg. Thaum muaj ib yam dab tsi tshwm sim rau lawv, lawv yeej tsis nrhiav qhov tseeb, los sis nrhiav seb Vajtswv cov lus hais li cas txog qhov ntawd, Vajtswv tej kev npaj siab yog dab tsi, Vajtswv coj tib neeg kev li cas, los sis Nws cheem tsum dab tsi ntawm tib neeg. Lawv tib lub hom phiaj ntawm kev koom nrog pawg ntseeg yog tos ntsoov rau hnub uas pawg ntseeg tuaj yeem “tsa taus taub hau,” kom lawv thiaj li muab tau cov txiaj ntsim uas lawv ib txwm xav tau. Muaj tseeb tiag, lawv kuj koom nrog pawg ntseeg vim lawv pom tias Vajtswv cov lus yog qhov tseeb—tiam sis lawv yeej tsis lees txais qhov tseeb kiag li, thiab lawv tsis ntseeg tias Vajtswv txhua lo lus yuav tshwm sim muaj tiag. Yog li nej hais li cas, cov neeg zoo li no puas yog cov tsis ntseeg? (Yog.) Txawm yuav muaj dab tsi tshwm sim hauv pawg ntseeg los sis lub ntiaj teb sab nraud los xij, lawv puav leej ntsuas seb lawv tej txiaj ntsig yuav raug cuam tshuam npaum li cas, thiab qhov ntawd yuav cuam tshuam loj npaum li cas rau cov hom phiaj uas lawv caum. Thaum muaj teeb meem tshwm sim me ntsis xwb, lawv yuav xav kiag tam sid txog lawv tus kheej lub neej yav tom ntej, tej txiaj ntsim, thiab seb lawv yuav nyob los sis tawm ntawm pawg ntseeg mus. Haj tseem muaj cov neeg uas pheej nug tsis tseg tias, “Xyoo tas los twb hais tias vajtswv tes hauj lwm yuav xaus lawm—yog li ntawd vim li cas tam sim no tseem tsis tau xaus? Xyoo twg kiag vajtswv tes hauj lwm thiaj li yuav xaus? Kuv puas muaj cai paub? Kuv tau thev los ntev txaus lawm, kuv lub sij hawm muaj nqis, kuv lub caij hluas los muaj nqis—koj tsis tuaj yeem cia kuv tos ntsoov li no xwb puas yog?” Lawv xav paub tshwj xeeb txog qhov seb Vajtswv cov lus puas tau tshwm sim muaj tiag, qhov xwm txheej ntawm pawg ntseeg, thiab pawg ntseeg lub meej mom thiab lub suab npe. Lawv tsis quav ntsej txog qhov seb lawv puas tuaj yeem tau txais qhov tseeb los sis seb lawv puas tuaj yeem raug cawm dim, tiam sis xav paub tshwj xeeb txog qhov seb lawv puas yuav muaj txoj sia nyob, thiab seb lawv puas tuaj yeem tau txais txiaj ntsim thiab koob hmoov los ntawm kev nyob hauv Vajtswv lub tsev. Cov neeg zoo li no yog cov nrhiav lub cib fim hauv lawv txoj kev ntshaw kom tau txais koob hmoov. Txawm lawv yuav ntseeg mus txog thaum kawg los, lawv yeej tseem yuav tsis to taub qhov tseeb, thiab lawv yuav tsis muaj cov lus tim khawv uas hais txog txoj kev ntsib kev pom los hais kiag li. Nej puas tau ntsib cov neeg zoo li no? Qhov tseeb tiag, cov neeg zoo li ntawd yeej muaj nyob hauv txhua pawg ntseeg. Nej yuav tsum paub cais lawv yam xyuam xim. Cov tib neeg zoo li no puav leej yog cov tsis ntseeg, lawv yog ib yam kev puas tsuaj nyob hauv Vajtswv lub tsev, lawv yuav coj kev puas tsuaj loj los rau pawg ntseeg thiab tsis muaj txiaj ntsim rau pawg ntseeg li, thiab yuav tsum muab lawv ntsaig tawm ntawm pawg ntseeg mus.

Cia peb xaus lus txog cov yam ntxwv ntawm cov neeg nrhiav lub cib fim. Lawv thawj tus yam ntxwv yog qhov tias lawv tsis saib qhov seb Vajtswv puas muaj nyob ntawd ua qhov tseem ceeb heev. Yog koj nug lawv tias Vajtswv puas muaj nyob, lawv yuav hais tias, “Tej zaum muaj. Tiam sis yog tsis muaj los yeej tsis ua cas. Kuv tsuas tuaj ntawm no saib seb cov lus hais tseg uas vajtswv tau hais ntawd puas yuav tshwm sim muaj tiag, thiab seb tej kev puas ntsoog loj puas yuav los tiag xwb.” Nyob hauv lawv tej kev xav thiab kev xam pom, lawv tus cwj pwm ces yog qhov tias Vajtswv muaj nyob los sis tsis muaj nyob los yeej tsis ua cas. Yog li ntawd qhov uas lawv ntseeg Vajtswv thiab koom nrog pawg ntseeg puas yog ib qho kev tso dag xwb? (Yog.) Lawv txoj kev ntseeg Vajtswv tsuas yog ib txoj kev ntseeg dog dig xwb, qhov ntawd zoo li ib qho kev ua si, thiab qhov ntawd tsis muaj feem xyuam txog qhov tseeb los sis lawv lub neej txoj kev. Qhov tseeb tiag lawv yeej tsis quav ntsej tias Vajtswv puas muaj nyob los sis tsis muaj; yog Nws muaj nyob los yeej tau, thiab yog Nws tsis muaj nyob los yeej tau. Ib txhia neeg tawm tsam lawv, hais tias Vajtswv tsis muaj nyob, thiab lawv kuj tsis chim los sis ntxub cov neeg zoo li ntawd. Yog tib neeg hais tias Vajtswv muaj nyob, lawv hais tias, “Yog nws muaj nyob, ces nws yeej muaj nyob. Txawm li cas los xij, yog yus ntseeg, ces nws yeej muaj nyob; yog yus tsis ntseeg, ces nws yeej tsis muaj nyob.” Qhov no yog lawv txoj kev xam pom. Cov neeg zoo li no puas yog cov neeg ntseeg tiag tiag? Lawv puas yog cov tsis ntseeg? (Yog.) Qhov seb Vajtswv puas muaj nyob los sis tsis muaj nyob ntawd yeej tsis tseem ceeb rau lawv kiag li, yog li ntawd lawv txoj kev ntseeg Vajtswv puas muaj lub siab dawb paug? Lawv yeej tsis muaj lub siab dawb paug kiag li. Thawj tus yam ntxwv ntawm cov neeg nrhiav lub cib fim yog dab tsi? (Lawv tsis saib qhov seb Vajtswv puas muaj nyob ntawd ua qhov tseem ceeb heev.) Qhov no yog thawj tus yam ntxwv.

Tus yam ntxwv ob ntawm cov neeg nrhiav lub cib fim yog dab tsi? Qhov ntawd yog qhov tias lawv tsis saib qhov kev paub cais ntawm tej yam uas zoo thiab tej yam uas tsis zoo ua qhov tseem ceeb heev. Lawv tsis paub cais seb cov lus hais, cov tib neeg, tej xwm txheej, thiab tej yam khoom twg yog yam uas zoo thiab qhov twg yog yam uas tsis zoo, thiab lawv tsis saib qhov no ua qhov tseem ceeb. Rau lawv mas, tej yam zoo tuaj yeem muab hais ua yam phem, thiab tej yam phem tuaj yeem muab hais ua yam zoo, ib yam li cov ib txwm tsis ntseeg cov lus hais tias, “Ib lo lus dag uas hais ib txhiab zaus yuav dhau los ua qhov tseeb”; lo lus hais no yeej muaj tseeb rau lawv. Yog koj nug lawv tias qhov tseeb yog dab tsi, lawv yeej yuav tsis hais tias Vajtswv cov lus yog qhov tseeb vim lawv tsis lees paub qhov no. Lawv yuav hais li cas? Lawv txoj kev xam pom tiag tiag yog qhov tias ib lo lus dag uas hais ib txhiab los sis kaum txhiab zaus yuav dhau los ua qhov tseeb, uas txhais tau tias yog muaj neeg coob hais ib yam dab tsi, ces lawv yuav ntseeg tias qhov ntawd yog qhov tseeb. Qhov ntawd zoo li qhov uas cov ib txwm tsis ntseeg hais tias: “Thaum pib yeej tsis muaj kev nyob hauv lub ntiaj teb, tiam sis thaum muaj neeg taug coob zuj zus, ib txoj kev thiaj li tshwm sim los.” Lawv tsis quav ntsej txog qhov yog los sis qhov yuam kev, qhov ncaj ncees los sis qhov lim hiam; lawv ntseeg tias leej twg muaj peev xwm loj ces tus ntawd yog tus yog, thiab leej twg siv tsis tau thiab tsis muaj peev xwm ces tus ntawd yog tus tsis zoo. Lawv yeej yuav tsis lees paub kiag li tias txhua yam uas Vajtswv hais thiab ua puav leej yog tej yam uas zoo, thiab lawv kuj yuav tsis lees paub tias yam uas Vajtswv cheem tsum kom tib neeg ua neej raws ntawd yog qhov muaj tiag ntawm tej yam uas zoo. Cov neeg no haj tseem yuav hais cov lus yuam kev xws li, “Koj hais tias vajtswv yog qhov tseeb, thiab vajtswv cov lus yog qhov muaj tiag ntawm txhua yam uas zoo. Qhov no puas txhais tau tias tsis muaj tej yam uas zoo nyob hauv lub ntiaj teb no lawm? Tsis yog tias kuj muaj tej yam uas zoo thiab qhov tseeb nyob hauv lub ntiaj teb no thiab lod?” Qhov no puas yog lus ruam? Qhov no puas yog ib lo lus yuam kev? (Yog.) Cov neeg no tsis muab Vajtswv cov lus ua tus qauv rau lawv cov lus hais los sis lawv tej kev ua. Piv txwv li, thaum lawv hais ib lo lus yuam kev thiab koj cam rov qab rau lawv, lawv yuav hais tias, “Koj xav tias koj hais yog, thiab kuv xav tias kuv hais yog, yog li ntawd cia nyias xav nyias. Leej twg xav tias yam twg zoo, ces yam ntawd yeej yog lawm.” Qhov no yog hom kev xam pom dab tsi? Qhov no puas yog lam ua kom haum ob tog xwb? (Yog.) Qhov no yog ib txoj kev xam pom uas ruam thiab feeb tsis meej; cov neeg no tsis saib qhov kev paub cais ntawm tej yam uas zoo thiab tej yam uas tsis zoo ua qhov tseem ceeb. Qhov uas tsis saib qhov no ua qhov tseem ceeb ntawd txhais li cas? Qhov ntawd txhais tau tias lawv tsis tuaj yeem lees paub los ntawm lawv lub siab los tias txhua yam zoo uas Vajtswv hais txog ntawd puav leej muaj feem xyuam txog qhov tseeb, haum raws li qhov tseeb, thiab los ntawm Vajtswv los, thiab tias tej yam tsis zoo uas Vajtswv hais txog ntawd yog tawm tsam qhov tseeb thiab los ntawm Ntxwgnyoog los. Lawv tsis lees txais qhov tseeb no thiab pheej xav ua kom cov tswv yim ntawd tsis meej. Txhawm rau zam kom tsis txhob raug lwm tus paub cais thiab raug teem txim, lawv yeej tsis saib qhov kev paub cais ntawm tej yam uas zoo thiab tej yam uas tsis zoo ua qhov tseem ceeb kiag li, lawv yeej tsis nthuav tawm lawv tej kev xam pom tiag tiag, thiab pheej hais lus tsis meej, yeej tsis qhia rau tib neeg paub tias lawv xav li cas tiag. Lawv hais lus sib txawv raws li tus neeg uas lawv nrog tham, hloov lawv tus kheej kom haum rau qhov xwm txheej raws li qhov cheem tsum tag nrho. Cov neeg no, nyob rau txhua sab, yeej tsis nyiam qhov tseeb los sis qhov uas Vajtswv muaj nyob. Qhov no yog qhov kev qhia tshwm ob ntawm cov neeg nrhiav lub cib fim: Lawv tsis saib qhov kev paub cais ntawm tej yam uas zoo thiab tej yam uas tsis zoo ua qhov tseem ceeb heev.

Cov neeg nrhiav lub cib fim no tseem muaj lwm cov yam ntxwv dab tsi ntxiv? Cov neeg no yeej ib txwm xaiv seb lawv yuav nyob los sis mus raws li qhov xwm txheej uas hloov, lawv txawj hloov lawv tus kheej kom haum rau qhov xwm txheej tshwj xeeb. Thaum lawv koom nrog pawg ntseeg, lawv twb npaj txhij txog txoj kev uas lawv yuav tawm mus thiab lawv lub neej yav tom ntej lawm, uas tau npaj txhua kauj ruam tseg lawm. Nyob hauv lawv lub siab lawv xam thiab npaj tias yog Vajtswv cov lus tshwm sim muaj tiag yuav ua li cas thiab tom qab pes tsawg xyoo dhau mus yog cov lus ntawd tsis tshwm sim muaj tiag yuav ua li cas. Hom neeg zoo li no yeej tsis muab lawv lub siab lub ntsws tag nrho tso rau tes hauj lwm hauv pawg ntseeg tom qab nkag los rau hauv pawg ntseeg lawm. Tiam sis, lawv soj ntsuam pawg ntseeg txoj kev loj hlob tas li, tus cwj pwm thiab txoj hau kev uas pawg ntseeg coj rau lawv, thiab lwm yam ntxiv txhawm rau txiav txim siab txog lawv cov kauj ruam tom ntej. Cov neeg no tej kev xav puas yog nyuaj kawg li? (Yog.) Txawm lawv tau koom nrog pawg ntseeg lawm los, lawv ib txwm muaj ib txoj kev xam pom uas lam nyob ib ntus xwb, zoo li ib tug neeg ua hauj lwm raws daim ntawv cog lus, ib txwm nyob rau hauv qhov xwm txheej uas “lub cev nyob ntawm no tiam sis lub siab nyob lwm qhov,” lawv lub siab muaj puv nkaus tej kev xam thiab kev npaj phem. Qhov uas lawv xaiv ntseeg Vajtswv thiab koom nrog pawg ntseeg tsuas yog ib qho tsis muaj kev xaiv es lam ua kom haum lwm tus xwb, tsis yog ib qho kev cheem tsum ntawm sab ntsujplig los sis tsis yog ib lub siab xav raws Vajtswv qab thiab taug txoj kev yog ntawm tib neeg lub neej, uas yog los ntawm qhov lees paub txog Vajtswv txoj kev muaj nyob. Lawv tsis muaj txoj kev ntseeg rau qhov no. Cov neeg no ntseeg Vajtswv nrog ib tug cwj pwm uas tos thiab saib, xam hauv lawv lub siab tias: “Yog kev ntseeg vajtswv ua rau kuv tau ib puas npaug nyob rau tiam no, tau txoj sia ntev dhawv mus ib txhis nyob rau hauv lub ntiaj teb uas yuav los tom ntej no, thiab muaj lub cib fim uas yuav raug cawm dim thiab nkag mus rau hauv lub nceeg vaj saum ntuj ceeb tsheej, ces kuv yuav raws qab mus thiab ntseeg. Yog kuv tsis tau txais tej no, kuv yuav tawm hauv pawg ntseeg mus tau txhua lub sij hawm thiab nyob rau txhua qhov xwm txheej thiab tsis ntseeg ntxiv lawm.” Lawv los ntseeg Vajtswv tag nrho yog nyob rau hauv txoj kev cia siab ntawm kev nrhiav lub cib fim kom tau txais tej koob hmoov. Yog lawv tsis tau txais tej koob hmoov, lawv tso lawv tej dej num tseg tau txhua lub sij hawm thiab nyob rau txhua qhov xwm txheej thiab nrhiav lwm txoj kev rau lawv tus kheej vim lawv lub siab yeej tsis tau cog cag rau hauv pawg ntseeg kiag li, thiab lawv yeej tsis tau xaiv txoj kev ntseeg Vajtswv thiab raws Vajtswv qab tiag tiag.

Cov yam ntxwv tseem ceeb ntawm cov neeg nrhiav lub cib fim no yog peb yam no: Lawv tsis saib qhov seb Vajtswv puas muaj nyob ntawd ua qhov tseem ceeb heev, lawv tsis saib qhov kev paub cais ntawm tej yam uas zoo thiab tej yam uas tsis zoo ua qhov tseem ceeb heev, thiab lawv tawm hauv pawg ntseeg mus tau txhua lub sij hawm thiab nyob rau txhua qhov xwm txheej. Txawm cov kwv tij thiab cov nkauj muam yuav ua zoo rau lawv npaum li cas los xij, tsuav yog tej yam tsis haum nrog lawv tej txiaj ntsim los sis tsis ua tau raws li lawv tej kev cheem tsum tam sim no, lawv yeej tawm tau hauv pawg ntseeg mus. Tiam sis thaum lawv tsis muaj chaw mus lawm, lawv xaiv rov qab los. Tom qab rov qab los lawm, lawv yeej tseem tsis caum qhov tseeb thiab tej zaum yuav tawm hauv pawg ntseeg mus dua tau txhua lub sij hawm. Lawv yog hom neeg phem dab tsi? Qhov uas lawv los thiab mus ntawd saib zoo li ua dog ua dig heev; lawv tsis ntseeg Vajtswv nrog lub siab dawb paug. Tej no yog cov yam ntxwv ntawm cov neeg nrhiav lub cib fim; yog hais txog lawv lub ntsiab tseeb, lawv yog cov tsis ntseeg. Ib txhia neeg tuaj yeem tuav rawv ntseeg tau peb mus rau tsib xyoos, ib txhia tuaj yeem tuav rawv tau yim los sis kaum xyoo, tiam sis lawv lub hom phiaj tsuas yog txhawm rau nrhiav lub cib fim kom tau txais tej koob hmoov xwb. Cov neeg zoo li no tsis dog dig li. Lawv haj tseem uv taus los txog tam sim no nyob rau hauv qhov xwm txheej uas phem thiab raug tsim txom ntawm lub Teb Chaws Suav av loj—qhov ntawd puas zoo li qhov uas pw saum cov taws thiab yaim kua tsib? Ib txhia neeg thev tsis taus ntxiv tom qab ntseeg tau kaum xyoo, yog li ntawd lawv thiaj li yws hais tias: “Kaum xyoo lawm. Kuv lub neej hluas tau muab nkim pov tseg rau hauv pawg ntseeg lawm. Yog kuv khwv nyob hauv lub ntiaj teb rau kaum xyoos no, ntshe kuv yuav khwv tau nyiaj ntau npaum li cas lawm? Tej zaum kuv twb tau ua ib tug thawj tswj, thiab ntshe kuv yuav muaj cuab tam ntau heev.” Tom qab ntawd lawv pib nyob tsis tswm lawm. Lawv ntseeg Vajtswv tau kaum xyoos tsuas yog ua kom tau raws li lawv txoj kev xav paub xav pom me ntsis thiab txoj kev ntshaw kom tau txais tej koob hmoov xwb, tiam sis lawv yeej tsis tau caum qhov tseeb kiag li. Vim li ntawd, lawv tsis tau txais ib yam dab tsi li. Lawv khuv xim uas tau ntseeg Vajtswv, thiab lawv haj tseem cem lawv tus kheej, hais tias, “Koj tus niag ruam no, koj tus niag tsis muaj hlwb no! Koj tsis taug txoj kev dav thiab yooj yim tiam sis pheej yuav taug txoj kev nyuaj nyuaj no. Tsis muaj leej twg yuam koj; qhov ntawd yog koj tus kheej xaiv xwb!” Ib txhia neeg tom qab ntseeg tau kaum xyoo lawm los tuaj yeem tawm mus, xav mus ces mus. Tom qab lam ua neej nyob hauv lub zej zog tau ob peb xyoos, lawv pom tias ua neej nyob hauv lub zej zog tsis zoo los sis yooj yim li lawv tau xav tseg, thiab lub ntiaj teb ntawm cov ib txwm tsis ntseeg kuj tsis zoo nkauj thiab tsis zoo raws li lub siab xav li uas neeg tau pom ntawd; txawm lawv mus nyob qhov twg hauv ntiaj teb no los, kev ua neej yeej tsis yooj yim rau lawv li. Tom qab ua tib zoo xav txog qhov no, lawv pom tias pawg ntseeg yeej tseem zoo dua me ntsis, yog li ntawd lawv thiaj li rov qab los yam tsis txaj muag. Thaum lawv rov qab los, lawv hais tias, “Kev ntseeg vajtswv yog qhov zoo; cov ib txwm tsis ntseeg yog tib neeg phem, pheej thab tib neeg. Nyob hauv lub ntiaj teb mas muaj kev txom nyem ntau dhau lawm. Cov xyoo no uas tsis tau nyeem vajtswv cov lus, tsis tau ua lub neej hauv pawg ntseeg, kuv tau poob rau hauv kev tsaus ntuj, quaj tom hniav qawv txhua hnub; kuv raug tsim txom mus txog theem uas kuv tsis zoo li ib tug tib neeg lawm. Qhov uas ntseeg vajtswv yeej zoo dua!” Lawv hais ntawm ncauj tias qhov uas ntseeg Vajtswv yeej zoo dua, tiam sis qhov tseeb tiag yog vim lawv hnov tias muaj kev puas tsuaj ntau dhau nyob hauv lub ntiaj teb no, thiab tib neeg tab tom yuav ntsib ib qho kev puas ntsoog loj. Qhov uas muaj nyiaj, muaj av, muaj tsheb, thiab muaj tsev yeej tsis muaj qab hau; tsuas yog cov uas muaj kev ntseeg thiaj li tuaj yeem raug cawm dim. Yog li ntawd, lawv thiaj li rov qab los ntseeg Vajtswv dua. Qhov no puas yog ib tug neeg nrhiav lub cib fim? (Yog.) Cov neeg uas nrhiav lub cib fim tawm hauv pawg ntseeg mus tau txhua lub sij hawm. Yog lawv pom tias muaj kev cia siab uas yuav tau txais tej koob hmoov los ntawm txoj kev rov qab los rau hauv pawg ntseeg, ces lawv yuav rov qab los tau txhua lub sij hawm thiab. Tom qab rov qab los lawm, lawv hais tau ob peb lo lus tu siab thiab qhia tias lawv yeej yuav tsis tso Vajtswv tseg dua li lawm, tiam sis tom qab pom tias tej xwm txheej hauv lub ntiaj teb nyob tiaj tus thiab thaj yeeb thiab tias lawv tseem tuaj yeem ua tau neej zoo ob peb hnub, lawv yuav tawm hauv pawg ntseeg mus dua tau txhua lub sij hawm. Lawv muab Vajtswv lub tsev thiab pawg ntseeg saib tam li dab tsi? Lawv saib qhov ntawd tam li ib lub khw uas muaj kev ywj pheej, xav los ces los xav mus ces mus raws li lawv lub siab nyiam. Qhia rau Kuv seb, yog cov neeg zoo li no raug ntsaig tawm mus los sis lawv tus kheej tawm mus, pawg ntseeg puas tsim nyog lees txais lawv rov qab los yog tias lawv xav rov qab los? (Tsis tsim nyog.) Tsis tsim nyog lees txais lawv rov qab los. Qhov uas lees txais lawv rov qab los ntawd yog ib qho kev yuam kev thiab ua txhaum tej hauv paus ntsiab lus. Cov neeg no tsis mus raws li cov qauv ntawm cov tswv cuab hauv pawg ntseeg. Lawv tawm hauv pawg ntseeg mus tau txhua lub sij hawm, thiab kom tau txais koob hmoov lawv tuaj yeem nrhiav kev rov qab los rau hauv pawg ntseeg tau txhua lub sij hawm, tiam sis nyob rau hauv tag nrho tej no lawv yeej tsis lees txais qhov tseeb kiag li. Qhov no ua pov thawj tias lawv tsis yog cov neeg ntseeg tiag tiag. Cov neeg zoo li no yeej yog cov uas yuav raug ntsaig tawm mus thiab ntiab tawm mus ib txhis. Pawg ntseeg yuav tsum muab lawv ntsaig tawm mus thiab qhia rau lawv tias: “Tsis txhob khuv xim. Thaum koj tawm mus lawm, koj rov qab los tsis tau lawm. Pawg ntseeg yuav tsis qhib qhov rooj rau koj zaum ob. Qhov no yog lub hauv paus ntsiab lus.” Ib txhia neeg hais tias: “Thaum ntawd lawv ruam, tiam sis tam sim no lawv coj tau zoo heev. Lawv yoog raws zoo li ib tug me nyuam yaj, txaus khuv leej zoo li ib tug neeg tsis muaj tsev nyob uas ntab yuj yees. Thaum twg lawv pom cov kwv tij thiab cov nkauj muam, lawv qhia txog lawv txoj kev khuv xim thiab kev tshuav nqi, lawv ob lub qhov muag liab ploog vim quaj hauv txoj kev khuv xim. Saib lawv txaus khuv leej heev, thiab lawv tus cwj pwm ntawm kev lees txim yeej zoo kawg li thiab. Ces cia peb pub lawv rov qab los.” Puas muaj ib kab lus nyob ntawm no uas haum raws li tej hauv paus ntsiab lus? (Tsis muaj.) Txawm yog tom qab ntseeg tau peb los sis kaum xyoo lawm los, lawv yeej tseem tuaj yeem tawm hauv pawg ntseeg mus yam txiav txim siab khov kho thiab tsis ua ywj fab ywj fwj. Lawv yog hom neeg phem dab tsi? Lawv puas yog cov neeg ntseeg tiag tiag? (Tsis yog.) Thaum xub thawj lawv xaiv raws Vajtswv qab ntawd lawv puas muaj lub siab tiag kiag li? Tsis muaj. Yog lawv muaj lub siab tiag me ntsis xwb, lawv yeej yuav tsis txiav txim siab khov kho tawm hauv pawg ntseeg mus li. Feem ntau mas, ntau kawg los tej zaum ib tug neeg tsuas muaj tej kev xav zoo li no thaum lawv qaug zog, nyuaj siab, los sis thaum tej yam mus tsis tau zoo xwb, tiam sis lawv yeej yuav tsis txiav txim siab khov kho tawm hauv pawg ntseeg mus nrhiav lwm txoj kev tom qab ntseeg Vajtswv tau peb, tsib, los sis kaum xyoo lawm. Yog lawv tuaj yeem tawm hauv pawg ntseeg mus raws li lub siab nyiam, qhov ntawd qhia tau tias lawv tsis muaj lub siab tiag tiag thaum lawv lees txais txoj hau kev tseeb thiab koom nrog pawg ntseeg thaum xub thawj; lawv muaj lwm txoj kev npaj siab thiab lwm lub hom phiaj zais—tsuas muaj hais tau li no xwb. Yuav tsum paub cais cov neeg zoo li no kom meej. Lawv tsis yog cov neeg ntseeg tiag tiag. Lawv txoj kev ntseeg Vajtswv thiab raws Vajtswv qab ntawd yog txhawm rau nrhiav lub cib fim kom tau txais tej koob hmoov xwb. Cov neeg zoo li no raug muab teem tias yog cov neeg nrhiav lub cib fim, thiab kiag thaum paub cais tau lawm, yuav tsum muab lawv ntsaig tawm ntawm pawg ntseeg mus. Yog lawv tsis tawm hauv pawg ntseeg mus thiab tseem siv qhov xwm txheej no nrhiav txiaj ntsim rau lawv tus kheej nyob hauv pawg ntseeg txuas ntxiv, ces qhov ntawd yog vim tsis muaj leej twg muaj peev xwm paub cais tias lawv yog hom neeg zoo li cas. Txawm li cas los xij, los ntawm txoj kev sib qhia hnub no txog ntau yam kev qhia tshwm ntawm cov neeg nrhiav lub cib fim no, cov thawj coj thiab cov neeg ua hauj lwm nrog rau cov neeg Vajtswv xaiv tseg yuav tsum muaj kev to taub thiab kev paub cais kom meej txog cov neeg zoo li no. Thaum pom tias lawv yeej tsis nyeem Vajtswv cov lus los sis thov Vajtswv, tsis nyiam rau Vajtswv tes hauj lwm los sis tej qhov tseeb uas Vajtswv nthuav tawm, tsis nyiam txog tej yam uas zoo, thiab tsis saib tej ntawd ua qhov tseem ceeb, ces yuav tsum tau ceev faj lawv kom zoo. Yuav tsum tau saib lawv txoj kev npaj siab thiab lub hom phiaj hauv txoj kev ntseeg Vajtswv, thiab tshuaj xyuas kom paub meej txog lawv tus cwj pwm uas coj rau pawg ntseeg, lawv tus cwj pwm uas coj rau qhov tseeb, thiab lawv tus cwj pwm uas coj rau Vajtswv. Yog pom tau meej tias lawv tsis muaj ib tus cwj pwm uas yog, thiab txias zias tshwj xeeb rau txoj kev caum qhov tseeb thiab kev ua tes dej num, tsis nyiam kiag li, thiab lawv pheej muaj ib tug cwj pwm uas ua xyem xyav rau Vajtswv cov lus, ces tuaj yeem paub tseeb tias cov neeg no yog cov neeg nrhiav cib fim thiab cov tsis ntseeg. Yog li ntawd, tsis tsim nyog saib lawv tam li cov kwv tij los sis cov nkauj muam; lawv tsis yog ib feem ntawm pawg ntseeg. Tiam sis, yuav tsum muab lawv ntsaig tawm ntawm pawg ntseeg mus. Lawv tau ntseeg los ntau xyoo lawm thiab yeej tseem tsis lees txais qhov tseeb; qhov uas tseem sib qhia qhov tseeb nrog lawv ntxiv puas yuav muaj qab hau? Qhov uas tseem tos kom lawv hloov dua siab tshiab ntxiv ntawd puas yuav muaj tseeb? Tsis txhob ua hauj lwm rau cov neeg zoo li no ntxiv lawm, thiab tsis txhob tos kom lawv hloov dua siab tshiab lawm. Yog lawv tsis txaus siab hlo ua lawv tes dej num thiab tseem xav ncua sij hawm nyob hauv pawg ntseeg yam tsis tawm mus, ces cov thawj coj pawg ntseeg yuav tsum nrhiav ib txoj hau kev siv kev txawj ntse los cais lawv tawm. Qhov no puas yog tsim nyog? (Yog.) Kiag thaum paub cais tias cov neeg no yog cov neeg nrhiav lub cib fim ntawd, lawv twb raug muab teev nyob rau hauv pab pawg ntawm ntau hom tib neeg phem thiab cov tsis ntseeg lawm. Vim lawv yog cov tib neeg phem thiab cov tsis ntseeg, lawv thiaj li haum raws li tej hauv paus ntsiab lus thiab tej kev tsim nyog uas yuav tsum raug ntsaig tawm mus los sis ntiab tawm ntawm pawg ntseeg mus. Qhov ntxov muab lawv ntsaig tawm mus ntawd yeej zoo dua qhov muab lawv ntsaig tawm mus lig. Qhov ntxov muab lawv ntsaig tawm mus ntawd yuav zam tau ntau yam teeb meem, thiab lawv tsis tas yuav xav tias raug kev tsis ncaj ncees ntxiv lawm. Koj yuav tsum qhia meej meej rau cov neeg zoo li no tias: “Koj tsis tas yuav pheej xam nyob hauv koj lub siab tias thaum twg mam li tawm mus los sis yuav tawm mus li cas, thiab koj tsis tas yuav pheej xam seb koj yuav nyob los sis mus. Vajtswv lub tsev thiab Vajtswv tsis yuam tib neeg; yog koj xav tawm mus, pawg ntseeg yuav tsis cheem kom koj nyob. Tiam sis muaj ib yam uas yuav tsum tau qhia rau koj kom meej: Yog koj paub tseeb tias koj tsis yog ib tug neeg ntawm Vajtswv lub tsev thiab koj tsis txaus siab ua ib tug tswv cuab hauv pawg ntseeg, ces tawm mus kom sai li sai tau; tsis txhob ncua sij hawm. Qhov no yog qhov zoo rau txhua tus. Yog koj ntseeg Vajtswv txoj kev muaj nyob, lees txais tau Vajtswv cov lus yog qhov tseeb, thiab txaus siab tiag tiag los koom nrog pawg ntseeg, ces koj yeej yog ib tug tswv cuab hauv pawg ntseeg yam raws kev raws cai. Tiam sis tam sim no, koj tsis yog. Koj tuaj txhawm rau nrhiav lub cib fim, thiab tej zaum koj tus kheej twb tsis paub qhov no, tiam sis peb tau paub cais lawm—raws li Vajtswv cov lus, qhov tseeb, thiab pawg ntseeg tej hauv paus ntsiab lus ntawm txoj kev coj rau txhua hom tib neeg—tias koj yog ib tug neeg nrhiav cib fim. Koj pheej xam lub sij hawm uas tsim nyog tawm ntawm pawg ntseeg mus; qhov no yog ib qho kev nyuaj dhau. Koj tsis tas yuav nrhiav lub sij hawm uas tsim nyog; koj tuaj yeem tawm mus tau tam sim no. Yog koj ib txwm tsis ruaj siab txog Vajtswv qhov kev tshwm sim thiab tes hauj lwm, ces kuv qhia meej rau koj tam sim no tias: Koj tsis tas yuav ua tib zoo xav los sis tshawb xyuas kom meej tej yam ntxiv lawm, koj tsis tas yuav pheej ua kom nyuaj rau koj tus kheej ntxiv lawm—koj tuaj yeem tawm ntawm pawg ntseeg mus tau tam sim no, Vajtswv lub tsev lub qhov rooj yeej qhib lug, thiab Vajtswv lub tsev yuav tsis cheem koj cia, tsis yuam tib neeg.” Qhov uas ua li no puas tsim nyog? (Tsim nyog.) Muab ib “txoj kev tawm” rau lawv; tsis txhob cia lawv tiv kev tsim txom nyob ntawm no txhua hnub zoo li cov ntsaum nyob saum lub yias kub kub, uas raug tsim txom los ntawm lawv tej kev xav hauv siab, lawv lub cev nqaij daim tawv, lawv lub neej yav tom ntej, thiab qhov teeb meem ntawm qhov nyob los sis mus. Txawm lawv yuav raug tej no tsim txom npaum li cas los xij, qhov ntawd yeej tsis muaj txiaj ntsig dab tsi li. Lawv yeej tseem xav hauv lawv lub siab tias thaum twg mam li yuav tawm mus, yuav tawm mus li cas, seb lawv puas yuav poob peev thiab ntsib xwm txheej phem yog lawv tawm mus ntxov, thiab seb lawv puas tuaj yeem tau txais tej koob hmoov yog lawv nyob ntev dua. Yog lawv tawm mus thiab tom qab ntawd Vajtswv cov lus tshwm sim muaj tiag no yuav ua li cas? Yog lawv tsis tawm mus thiab Vajtswv cov lus pheej tsis tshwm sim muaj tiag li no yuav ua li cas? Tsis tim tsum kom lawv pheej txhawj xeeb thiab ntxhov siab txog tej no. Rau qhov lawv tsis ntseeg Vajtswv nrog lub siab txaus siab hlo tiag tiag, lawv yuav tsum tawm mus kom sai li sai tau. Lawv tsis tsim nyog nyob ntawm no siv qhov xwm txheej no nrhiav txiaj ntsim rau lawv tus kheej, lam ua txuj ua yam uas lawv tsis yog. Qhia rau Kuv seb, qhov uas ntuas lawv li no thiab saib xyuas li no puas zoo? (Zoo.) Qhov uas muab cov neeg nrhiav cib fim teev nyob rau hauv pab pawg ntawm ntau hom tib neeg phem uas yuav raug ntsaig tawm mus los sis ntiab tawm mus ntawd puas tshaj dhau? (Tsis tshaj.) Ib txhia neeg hais tias: “Yuav suav cov neeg zoo li no ua cov tib neeg phem tau li cas?” Muaj pes tsawg tus neeg zoo nyob hauv cov tsis ntseeg? Nyob hauv Vajtswv lub qhov muag saib mas, tus moj yam lub ntsiab tseeb ntawm cov uas ntseeg Vajtswv thiab lees paub Vajtswv txoj kev muaj nyob twb raug saib ua qhov phem lawm, tsis tas hais txog cov uas yeej tsis ntseeg Vajtswv kiag li thiab tsis lees paub Vajtswv txoj kev muaj nyob. Yog li ntawd qhov uas muab lawv teev ua cov tib neeg phem ntawd puas tshaj dhau? (Tsis tshaj.) Txawm li cas los xij, yam tsawg kawg yeej tseem muab lawv hu ua tib neeg—cov tib neeg phem. Qhov uas lawv tsis raug muab teev ua cov dab phem ntawd ces twb zoo txaus lawm. Qhov uas muab lawv teev nyob rau hauv pab pawg tib neeg phem yeej tsim nyog thiab haum nkaus; qhov ntawd yeej tsis tshaj dhau li. Cov tib neeg phem zoo li no kuj yog ib hom nyob hauv ntau hom tib neeg uas yuav raug Vajtswv lub tsev ntsaig tawm mus los sis ntiab tawm mus thiab. Qhov no yog hom tsis ntseeg plaub, uas lawv lub hom phiaj rau kev ntseeg Vajtswv yog kev nrhiav lub cib fim.

Cov yam ntxwv tseem ceeb ntawm cov neeg nrhiav cib fim yog dab tsi? Los ntawm nej txoj kev sib cuag nrog cov neeg no thiab soj ntsuam tus moj yam, tej kev xam pom, tej cwj pwm, los sis kev ua neeg uas lawv nthuav tawm, nej pom muaj cov yam ntxwv tseem ceeb dab tsi? Xaus lus txog tej ntawd. (Thaum xub thawj cov neeg nrhiav cib fim los ntseeg Vajtswv tsis yog txhawm rau caum qhov tseeb. Lawv hnov tias Pawg Ntseeg ntawm Vajtswv Tus Uas Muaj Hwj Chim Loj Kawg Nkaus tab tom muaj kev vam meej, yog li ntawd lawv thiaj li tsuas los ntseeg Vajtswv nrog txoj kev cia siab uas yuav tau txais qee yam txiaj ntsim thiab koob hmoov los ntawm Vajtswv lub tsev, nrhiav txiaj ntsim xwb. Thiab yog lawv tsis tau txais tej no tom qab ib ntus, ces lawv xav tawm mus. Cov neeg no tsis muaj lub siab tiag tiag ntseeg Vajtswv thiab yeej tsis nyiam txog kev ntseeg Vajtswv kiag li.) Qhov teeb meem loj tshaj plaws ntawm cov neeg nrhiav cib fim ntawd yog dab tsi? Qhov teeb meem tseem ceeb yog qhov tias lawv tsis nyiam qhov tseeb tiam sis nyiam txog qhov tau txais koob hmoov tshaj plaws, yog li ntawd thiaj li nyuaj tshaj plaws rau lawv lees txais qhov tseeb. Ib txhia neeg hais tias: “Koj yuav ntsaig lawv tawm mus los sis ntiab lawv tawm mus tsis tau tsuas yog vim lawv tsis nyiam qhov tseeb xwb, puas yog?” Cov neeg no txoj kev tsis nyiam qhov tseeb feem ntau yog qhia tawm los ntawm qhov lawv yeej tsis nyeem Vajtswv cov lus los sis sib qhia qhov tseeb li. Yog lawv hnov ib tug neeg twg sib qhia qhov tseeb thiab tham txog kev paub tus kheej, los sis nrhiav qhov tseeb los daws tej teeb meem, nyob hauv lawv lub siab lawv tsis nyiam kiag li thiab yeej tsis xav mloog kiag li, ces lawv pib tsaug zog. Lawv tsis nyiam tej no tshaj plaws li, thiab haj tseem siv kev lam tham dog dig, tham txog tej kev puas tsuaj, thiab tham txog qhov uas Vajtswv ua tej cim thiab tej txuj ci tseem ceeb los cuam tshuam lwm tus kev sib qhia qhov tseeb. Vim li ntawd, ib txhia uas tsis caum qhov tseeb txawm zoo siab hlo thaum lawv hnov cov ntsiab lus no thiab koom nrog txoj kev sib tham ntawd. Qhov no tsis yog qhov uas cuam tshuam lub neej hauv pawg ntseeg uas pom tau meej heev lod? Lawv tsis tshua nyeem Vajtswv cov lus nyob hauv lawv lub neej niaj hnub, thiab thaum lawv lam nyeem qee zaus, tej zaum yog vim muaj ib yam dab tsi ua rau lawv nyuaj siab. Lawv tsis nyiam txog tej kev sib txoos ua ke, kev noj thiab haus Vajtswv cov lus, los sis kev sib qhia Vajtswv cov lus. Lawv tsuas txhawj txog qhov tias: “Thaum twg vajtswv hnub thiaj li yuav los txog? Thaum twg tej kev puas ntsoog loj thiaj li yuav xaus? Thaum twg peb thiaj li yuav tau txais tej koob hmoov ntawm lub nceeg vaj saum ntuj ceeb tsheej?” Lawv pheej xav paub txog tej no. Yog tsis muaj leej twg tham txog cov ncauj lus no, lawv mus tshawb hauv os lais, thiab tom qab tshawb lawm, lawv pib tshaj tawm tej no thaum sib txoos ua ke. Lawv lub siab muaj tej no puv nkaus. Tsuav yog lawv hnov lwm tus sib qhia txog cov ncauj lus uas lawv nyiam, ces lawv tuaj yeem hais nrog thiab koom nrog txoj kev sib qhia ntawd. Tiam sis thaum lawv hnov cov ntsiab lus uas ntsig txog qhov tseeb los sis Vajtswv cov lus xwb, ces lawv tsis xav mloog lawm. Lawv pib tsaug zog, thiab ib txhia haj tseem tawm mus lawm, hos lwm tus pib nyob tsis tswm—lawv nthuav txhua hom yeeb yam uas phem tawm los. Koj hais tias, “Cia peb sib qhia Vajtswv cov lus.” Lawv hais tias, “Kuv nqhis dej, kuv yuav tsum haus dej me ntsis.” Koj hais tias, “Cia peb sib qhia txog kev paub yus tus kheej,” los sis “Cia peb sib qhia txog tej ntxaws ntxaws ntawm kev ua tej dej num; cia peb saib seb Vajtswv cov lus hais li cas txog qhov no, thiab qhov tseeb tej hauv paus ntsiab lus yog dab tsi.” Lawv hais tias, “Kuv muaj hauj lwm lawm. Kuv yuav tawm mus ua ntej. Nej mam li tham.” Lawv nrhiav txhua yam kev hais ub hais no los zam thiab tsis kam sib qhia Vajtswv cov lus thiab qhov tseeb. Qhov no nthuav tawm meej meej txog qhov muaj tseeb tias tsis yog lawv tsis nyiam qhov tseeb xwb, tiam sis lawv kuj tsis nyiam kiag li thiab tawm tsam qhov tseeb tawm hauv lawv lub siab tob tob tuaj thiab. Thaum twg hais txog Vajtswv cov lus thiab qhov tseeb, lawv tsis tab meeg tawm tsam los sis cam, tiam sis nrhiav ntau yam kev hais ub hais no los tsis kam thiab zam tej ntawd. Tej kev coj no puas qhia tau meej meej tias lawv yog cov neeg nrhiav lub cib fim? Qhov ntawd puas yog qhia tau meej meej tias lawv yog cov tsis ntseeg, ntseeg Vajtswv txhawm rau ib lub hom phiaj twg, txhawm rau kev nrhiav lub cib fim? (Yog.) Ib txhia neeg hais tias: “Koj hais tias lawv yog cov tsis ntseeg thiab tsis muaj lub siab tiag tiag raws Vajtswv qab, yog li ntawd vim li cas lawv thiaj li muaj peev xwm ntseeg tau los txog tam sim no thiab tseem siv zog thiab tiv kev txom nyem rau pawg ntseeg tes hauj lwm?” Tej kev coj uas peb nyuam qhuav hais ntawd puas txaus los teb lo lus nug no? Tej kev coj no yeej txaus los ua pov thawj tias peb txoj kev paub cais thiab kev txiav txim rau lawv ntawd yeej yog lawm. Vim li ntawd, qhov ntsuas seb ib tug neeg lub hom phiaj rau kev ntseeg Vajtswv puas yog kev nrhiav cib fim ntawd, koj yuav tsum ntsuas thiab paub cais qhov ntawd raws li lawv tus cwj pwm uas muaj rau Vajtswv, Vajtswv tes hauj lwm, qhov tseeb, thiab rau tej yam uas zoo thiab tej yam uas tsis zoo. Qhov no yog qhov uas yog tshaj plaws. Yog ntsuas qhov ntawd los ntawm lawv tej kev ua thiab txoj kev coj sab nraud mas yuav tsis yog thiab tsis ncaj nruab nrab. Tsuas yog lawv tej kev xav tiag tiag hauv nruab siab thiab lawv tus cwj pwm uas coj rau Vajtswv thiab qhov tseeb xwb thiaj li nthuav tawm tej teeb meem; tsuas yog tej no xwb thiaj li yog cov qauv uas yog tshaj plaws rau kev txiav txim tias lawv yog hom neeg twg. Tam sim no, puas yog nej pom meej theem hauv paus txog lub ntsiab tseeb ntawm cov uas lawv lub hom phiaj rau kev ntseeg Vajtswv yog kev nrhiav cib fim? Puas yog nej txhua tus twb tau ntsib qee tus neeg zoo li no? (Yog.) Yog cov neeg zoo li no tawm mus kom sai li sai tau mas yuav zoo dua. Yog lawv txaus siab tiag tiag los ua dej num txhawb, ces tuaj yeem lam cia lawv nyob. Txawm li cas los xij, yog lawv tsis ua lawv tej dej num thiab ua tsis tau ib teg dej num txhawb twg li, tiam sis ua rau muaj kev cuam tshuam thiab coj tej yam tsis zoo los rau pawg ntseeg tes hauj lwm thiab lub neej hauv pawg ntseeg, ces yuav tsum kom lawv tawm mus kom sai li sai tau. Qhov no yog lub hauv paus ntsiab lus rau kev ntsaig cov tsis ntseeg tawm mus. Vajtswv lub tsev xav tau cov neeg uas muaj lub siab dawb paug ntseeg Vajtswv thiab nyiam qhov tseeb; xav tau cov neeg ua dej num txhawb uas ua siab ncaj ncees. Vajtswv lub tsev yeej tsis xav tau cov tsis ntseeg los sis cov soj ntsuam uas ua ywj fab ywj fwj kom los ntxiv npe xwb. Pawg ntseeg kuj tsis xav tau leej twg los ntxiv npe xwb thiab. Lub ncauj lus no cia peb sib qhia los xaus rau ntawm no.

E. Ua Neej Nyob Vam Khom Rau Pawg Ntseeg

Qhov txuas ntxiv peb yuav sib qhia txog lub hom phiaj tsib: kev ntseeg Vajtswv txhawm rau ua neej nyob vam khom rau pawg ntseeg. Nej txhua tus yeej paub zoo txog lub ncauj lus ntawm kev ua neej nyob vam khom rau pawg ntseeg no, puas yog? (Yog.) Cov neeg uas ua neej nyob vam khom rau pawg ntseeg ntawd muaj tej kev qhia tshwm dab tsi? Los ntawm tej kev qhia tshwm twg peb thiaj li paub tseeb tau tias lawv lub hom phiaj rau kev ntseeg Vajtswv tsis huv, lawv tsis raws Vajtswv qab tiag tiag, los sis tsis yog kom tau txais kev cawm dim, thiab lawv tsis yog tuaj caum thiab lees txais qhov tseeb thiab ua raws li Vajtswv cov lus nyob rau ntawm lub hauv paus uas ntseeg Vajtswv txoj kev muaj nyob thiab txaus siab hlo lees txais Vajtswv txoj kev cawm dim kom lawv thiaj li ua tau raws li lub hom phiaj ntawm kev tau txais kev cawm dim, tiam sis lawv tuaj txhawm rau ua neej nyob vam khom rau pawg ntseeg? Qhov ua neej nyob vam khom rau pawg ntseeg ntawd txhais li cas? Lub ntsiab lus ntawm sab nraud yeej meej heev. Qhov ntawd txhais hais tias kev koom nrog ib pab pawg ntseeg los ntawm kev ntseeg sab kab lis kev cai ntseeg txhawm rau daws tej teeb meem uas ntsig txog lub neej txhua hnub thiab qhov teeb meem ntawm kev nrhiav noj nrhiav haus. Qhov no yog lub ntsiab lus tshab txhais uas luv thiab raug tshaj plaws txog kev ua neej nyob vam khom rau pawg ntseeg, thiab qhov ntawd kuj yog lub ntsiab lus tshab txhais uas meej tshaj plaws thiab. Yog li ntawd cov neeg no qhia tawm tej kev qhia tshwm dab tsi uas ua pov thawj tias lawv tsis yog cov neeg ntseeg tiag tiag tiam sis lawv tuaj txhawm rau ua neej nyob vam khom rau pawg ntseeg xwb? Ib txhia neeg muaj kev txawj qib siab thiab muaj peev xwm ua hauj lwm tau zoo ib yam li ib tug neeg li ib txwm, tiam sis lawv pom tias lub zej zog no tsis ncaj ncees thiab tias tsis yooj yim los ua hauj lwm nrhiav noj nrhiav haus nyob rau hauv. Qhov ua hauj lwm khwv nyiaj los yug txhua tus neeg hauv tsev neeg ntawd cheem tsum kom sawv ntxov thiab pw lig, tiv ntau yam kev txom nyem, thiab tiv ntau yam lus cem—yuav tsum paub ua neeg thiab paub hloov raws qhov xwm txheej, tiam sis kuj yuav tsum lim hiam thiab phem kom txaus thiab, thiab yus yuav tsum muaj tswv yim thiab muaj peev xwm—tsuas yog li ntawd xwb yus thiaj li tuaj yeem muaj ib lub neej ruaj khov thiab sawv tau khov kho hauv lub zej zog. Saib cov neeg uas ua hauj lwm ntawd, txawm yog nyob hauv txoj hauj lwm twg thiab txawm yog lawv nyob hauv theem siab, theem nruab nrab, los sis theem qis ntawm lub zej zog los xij, txoj kev nrhiav noj nrhiav haus yeej tsis yooj yim. Cov neeg ua hauj lwm hauv chav ua hauj lwm ntawd, txawm saib sab nraud zoo nkaus li tib neeg, zoo nkauj ci ntsa iab, muaj txoj hauj lwm siab, cov ntawv pov thawj kev kawm qib siab, thiab cov nyiaj hli siab thiab txiaj ntsim uas zoo, thiab txhua tus ntshaw lawv, tiam sis txhua qhov kev nyuaj uas lawv ntsib hauv chaw ua hauj lwm yog ib qho kev sim siab loj heev. Qhov ua hauj lwm nyob hauv txoj hauj lwm twg los yeej tsis yooj yim. Qhov ua ib tug neeg ua liaj ua teb thiab khwv ua teb haj yam nyuaj dua. Cov neeg ua liaj ua teb khwv khwv tiam sis lawv tsuas tau zaub tau mov txaus yug lawv tsev neeg xwb, lawv tsis muaj nyiaj yuav khaub ncaws thiab lwm yam khoom siv uas cheem tsum, los sis kho lawv lub tsev, thiab thaum lawv xav siv nyiaj me ntsis, lawv yuav tsum vam khom kev muag zaub los sis yug tsiaj los pauv ua nyiaj thiaj li muaj nyiaj siv—qhov ua ib tug neeg ua liaj ua teb haj yam txom nyem dua! Zoo ib yam li cov ib txwm tsis ntseeg hais tias, “Nyiaj txiag nrhiav nyuaj—qhov yug los ua neeg mas yooj yim, tiam sis qhov ua neeg nyob mas nyuaj”—txoj kev nrhiav noj nrhiav haus yeej nyuaj heev. Ib txhia neeg tsis muaj kev nrhiav noj nrhiav haus, thiab lawv pom tias cov ib txwm tsis ntseeg phem heev, thiab xav tias cov uas muaj kev ntseeg ntawm sab kab lis kev cai ntseeg ntawd yog cov tib neeg uas tsis txawj dag, thiab tias txoj kev nrhiav noj nrhiav haus hauv pawg ntseeg tej zaum yuav yooj yim dua me ntsis, yog li ntawd lawv thiaj li siv lub cib fim uas Vajtswv lub tsev tshaj tawm txoj moo zoo ntawd lam nkag los rau hauv pawg ntseeg. Thiab tom qab hnov tias muaj zaub muaj mov pub rau cov uas ua tej dej num, lawv thiaj li tuaj ua ib teg dej num. Ib txhia neeg uas xav ua ib teg dej num xav tias, “Kuv yog tus ntaus thawj nrhiav noj nrhiav haus hauv kuv tsev neeg. Tsuav yog muaj neeg ua teb nyob hauv tsev, thiab muaj neeg them kuv tsev neeg cov nqi siv hauv lub neej, ces kuv yuav ua kuv tes dej num.” Lawv lub hom phiaj tseem ceeb rau kev ntseeg Vajtswv thiab kev ua ib teg dej num yog kom tau zaub tau mov txaus noj thiab tej khaub ncaws sov so hnav kom lawv thiaj li muaj sia nyob tau—kom ib hnub tau noj peb pluag, thiab tsis tas yuav vam khom kev ua hauj lwm thiab khwv nyiaj los yug lawv tus kheej ntxiv lawm; tsuav yog lawv muaj kev pab los ntawm pawg ntseeg thiab cov kwv tij thiab cov nkauj muam xwb ces txhua yam yeej zoo rau lawv lawm. Txhawm rau ua kom tau raws li lub hom phiaj no, txawm pawg ntseeg npaj kom lawv ua dab tsi los lawv yeej ua. Kuj muaj ib txhia neeg uas, tom qab nkag mus rau hauv pawg ntseeg lawm, pib kawm ua cov thawj coj thiab tshaj tawm tej lus qhuab qhia. Lawv nyeem Vajtswv cov lus ntau heev, sau thiab cim nco Vajtswv cov lus ntau heev, thiab tom qab cim nco tau tej ntawd lawm, lawv kawm tshaj tawm rau lwm tus thiab pab tib neeg daws tej teeb meem. Lawv siv zog ua txhua txoj kev los pab txhua tus, thiab cia siab tias tib neeg yuav cev tes los pab lawv tom qab tau txais lawv txoj kev pab, thiab cia siab tias tib neeg yuav xav ua lawv tsaug tom qab mloog lawv tej lus qhuab qhia thiab Vajtswv cov lus uas lawv tshaj tawm ntawd, thiab thiaj li muab kev pab cuam thiab kev pab rau lawv. Piv txwv li, yog lawv tsis muaj nyiaj them nqi dej nqi hluav taws xob hauv tsev, cov kwv tij thiab cov nkauj muam tuaj yeem pab lawv them, thiab yog lawv tsis muaj nyiaj them lawv cov me nyuam cov nqi kawm ntawv los sis them nqi kho mob rau lawv niam lawv txiv uas muaj mob, pawg ntseeg los sis cov kwv tij thiab cov nkauj muam tuaj yeem muab cov nyiaj no rau vim lawv tab tom ua ib teg dej num. Ua li no, lawv thiaj li kaj siab lug hauv kev ntseeg Vajtswv thiab xav tias lawv txoj kev ntseeg Vajtswv muaj nqis, tias qhov ntawd tsis tau ua rau lawv poob peev, thiab tias lawv tau ua tiav lawv lub hom phiaj lawm. Lawv ua Vajtswv tsaug tsis tu ncua hauv lawv lub siab, hais tias, “Qhov no puav leej yog vajtswv txoj hmoov hlub, yog vajtswv txoj kev tshav ntuj. Ua vajtswv tsaug!” Txhawm rau “them rov qab” rau Vajtswv txoj kev hlub, lawv “ua raws” li pawg ntseeg tej kev npaj, thiab tsuav yog muaj zaub muaj mov thiab nyiaj siv hauv lub neej pub rau lawv xwb, ces lawv yeej ua tau txhua yam hauj lwm—lawv lub hom phiaj tsuas yog kom pauv tau ib lub neej ruaj khov xwb. Thaum pawg ntseeg tsis quav ntsej txog lawv tej kev cheem tsum hauv lub neej thiab tsis daws lawv tej kev nyuaj kom ncav sij hawm, lawv cia li tsis zoo siab lawm. Lawv tus cwj pwm uas muaj rau pawg ntseeg tes hauj lwm thiab tej dej num uas Vajtswv lub tsev muab rau lawv ua ntawd thiaj li hloov tam sim ntawd. Lawv hais tias, “Ua li no tsis tau, kuv yuav tsum tawm mus nrhiav nyiaj. Yav tas los, kuv tsis muaj cib fim khwv nyiaj vim kuv ua pawg ntseeg tes hauj lwm. Kuv haj tseem pheej hmoo uas yuav raug tus zaj loj liab ploog ntes tas li los ntawm qhov tshwm ntsej muag mus ua tes hauj lwm ntawd, thiab tib neeg txhua qhov chaw yeej paub kuv. Tam sim no tsis yooj yim rau kuv khwv nyiaj lawm. Kuv yuav ua li cas?” Nyob rau hauv qhov xwm txheej zoo li no, lawv yuav cia li muab lawv tej kev nyuaj thiab tej kev cheem tsum qhia rau cov kwv tij thiab cov nkauj muam, haj tseem cev tes thiab taij thov los ntawm Vajtswv lub tsev thiab. Ib txhia neeg tsis muaj nyiaj siv hauv lawv lub neej los sis rau thaum lawv laus, tiam sis lawv tsis daws tej teeb meem no ntawm lawv tus kheej. Tiam sis, lawv xav vam khom kev siv dag zog ua hauj lwm hauv Vajtswv lub tsev txhawm rau khwv nyiaj siv hauv lawv lub neej. Ib txhia neeg haj tseem ua hnyav tshaj qhov no ntxiv—lawv tsis yog tsuas thov kom Vajtswv lub tsev muab nyiaj siv hauv lawv lub neej thiab nyiaj yug lawv cov me nyuam thiab yug lawv niam lawv txiv xwb, lawv kuj thov nyiaj rau lawv cov nqi kho mob thiab. Ib txhia neeg haj tseem thov nyiaj los ntawm Vajtswv lub tsev mus them lawv cov nuj nqis—lawv tej kev thov dhau cai zuj zus, thiab lawv yeej tsis txaj muag kiag li uas thov tej yam zoo li ntawd. Tom qab ib txhia neeg los ntseeg Vajtswv thiab koom nrog pawg ntseeg lawm, cov nyiaj uas Vajtswv lub tsev them rau lawv cov nqi siv, thiab cov nyiaj ntxiv uas lawv cia li taij thov ntawd, ntau dua cov nyiaj uas lawv khwv tau los ntawm kev ua hauj lwm. Nyob rau ntawm lub hauv paus uas ua tau raws li tej yam no, saib sab nraud mas zoo li lawv ua lawv tes hauj lwm uas Vajtswv lub tsev muab rau lawv ntawd nrog kev mob siab rau thiab muaj kev ua siab ncaj ncees heev. Txawm li cas los xij, thaum cov txiaj ntsim no raug txo qis los sis tsis muaj lawm, lawv tus cwj pwm cia li hloov lawm. Lawv tus cwj pwm uas muaj rau tes hauj lwm uas pawg ntseeg muab rau ua ntawd hloov raws li cov kwv tij thiab cov nkauj muam tus cwj pwm uas muaj rau lawv thiab raws li qhov ntau tsawg ntawm cov nyiaj pab uas Vajtswv lub tsev muab rau lawv. Kiag thaum txoj hmoov hlub uas lawv tau xyiv fab ntawd raug muab tshem tawm los sis tsis muaj lawm, ces yeej tsis pom lawv ua lawv tej dej num ntxiv lawm. Txij thaum uas lawv pib ntseeg Vajtswv los, cov neeg no xav tswv yim seb lawv yuav ua li cas thiaj li lam nkag los tau ib qho chaw sawv hauv Vajtswv lub tsev, thiab xyiv fab rau kev muab pub thiab kev pab ntawm cov kwv tij thiab cov nkauj muam tom qab sawv tau khov kho nyob ntawm no lawm, nrog rau kev pab los ntawm Vajtswv lub tsev thiab tej kev pub rau lawv lub neej txhua hnub yam “tsim nyog.” Lawv yeej tsis tau muab lawv tus kheej fij rau Vajtswv yam lub siab dawb paug kiag li, lawv yeej tsis tau tuaj muab lawv tus kheej fij yam tsis thov kev pauj rov qab kiag li—tiam sis lawv koom nrog pawg ntseeg nrog tib lub hom phiaj xwb, uas yog txhawm rau ua neej nyob vam khom rau pawg ntseeg thiab nrhiav noj nrhiav haus. Thaum lub hom phiaj no ua tsis tau tiav raws li lawv lub siab xav, lawv txawm ua tsiv ua nyaum tam sim ntawd, thiab nthuav lawv lub ntsej muag tiag tiag tawm tam sim ntawd, uas yog lub ntsej muag ntawm ib tug tsis ntseeg. Txij thaum lawv pib ntseeg Vajtswv los, lawv yeej tsis tau tuaj nrog lub siab tiag tiag; lawv tsis raws Vajtswv qab nrog lub siab tiag tiag, los sis tso tej yam tseg thiab muab lawv tus kheej fij rau Vajtswv nrog lub siab txaus siab hlo, yam tsis thov nqi zog, thiab yam tsis thov tej yam los pauv rov qab. Tiam sis, lawv los ntseeg Vajtswv nrog lawv tus kheej tej kev thov, tej kev npaj siab, thiab lub hom phiaj—nrog lawv lub hom phiaj uas txiav txim siab khov kho yuav ua neej nyob vam khom rau pawg ntseeg thiab vam khom pawg ntseeg thiab cov kwv tij thiab cov nkauj muam txhawm rau nrhiav noj nrhiav haus vim lawv los ntseeg Vajtswv. Kiag thaum lub hom phiaj no ua tsis tau tiav los sis ua tsis tau raws li lawv lub siab xav, lawv thiaj li nrhiav lwm txoj kev mus rau tom ntej, tej zaum yog mus ua hauj lwm los sis mus ua lag luam. Puas yog muaj cov neeg zoo li no thiab? (Yog.) Yeej muaj ib txhia neeg uas zoo li no nyob hauv pawg ntseeg. Thaum pib, thaum Vajtswv lub tsev los sis cov kwv tij thiab cov nkauj muam muab qee yam khoom pub rau lawv, xws li tej khaub ncaws, tej khoom siv txhua hnub, los sis nyiaj txiag, saib sab nraud mas zoo li lawv txaj muag tiam sis qhov tseeb tiag nyob hauv lawv lub siab mas zoo siab heev. Piv txwv li, hais tias lawv txais tos ib los sis ob tug kwv tij thiab nkauj muam los sis ua lawv tes dej num puv sij hawm, yog li ntawd Vajtswv lub tsev los sis cov kwv tij thiab cov nkauj muam thiaj li pub thiab pab nyiaj txiag rau lawv tsev neeg. Lawv zoo siab heev thiab txaus siab heev txog qhov no, xav tias kev ntseeg Vajtswv muaj nqis thiab tau txiaj ntsig, thiab tias lawv tsis poob peev. Raws li lub sij hawm dhau mus, lawv lub siab ntshaw ntau zuj zus, lawv txhais tes cev mus ntev zuj zus, thiab lawv thiaj li tsis txaj muag zuj zus—txawm yuav muab ntau npaum li cas los, lawv yeej tsis txaus siab kiag li. Thaum pib, lawv txaj muag uas yuav txais tej khoom ntawd, tiam sis sij hawm ntev mus, lawv xav tias qhov ntawd yog ib qho uas tsim nyog me ntsis, thiab tom qab ntawd lawv pib yws tias muab tsis txaus. Tom qab ntawd, lawv txawm thov ncaj qha tias Vajtswv lub tsev yuav tsum muab nyiaj ntau npaum li cas; yog tsis li ntawd, lawv yuav tsis tuaj yeem muaj sia nyob, thiab ua tsis tau lawv tej dej num lawm. Qhov no puas yog lawv txoj kev ntshaw loj zuj zus? (Yog.) Txawm yog tau xyiv fab rau txoj hmoov hlub ntau npaum li ntawd los, lawv tsis yog tsuas tsis xav txog qhov them rov qab xwb tiam sis kuj taij thov ntau zuj zus los ntawm Vajtswv lub tsev thiab. Lawv ntseeg tias Vajtswv lub tsev yog tus tshuav lawv nuj nqis, tias cov kwv tij thiab cov nkauj muam yog cov uas tshuav lawv nuj nqis, thiab tias tsim nyog lawv tau txais kev pub thiab kev pab nyiaj txiag. Yog muab tsawg dua los sis yog lawv tau txais lig dua, lawv yeej tsis txaus siab. Txawm yuav yog muab nyiaj ntau npaum li cas thiab txawm yuav yog muab khoom dab tsi los lawv yeej txais, xav tias qhov ntawd yog ib qho uas tsim nyog. Thaum lawv ua lawv tes dej num ntev zuj zus, lawv haj yam xav tias lawv muaj cai thiab pib thov kom Vajtswv lub tsev npaj cov xov tooj thiab khoos phis tawj uas kim rau lawv. Lawv kuj thov kom Vajtswv lub tsev teeb lub tshuab cua txias rau hauv lawv tsev thiab muab cov khoom siv xws li lub qhov cub rhaub zaub mov thiab lub tshuab ntxuav tais diav rau lawv thiab. Lawv haj tseem thov kom Vajtswv lub tsev yuav ib lub tsev rau lawv thiab muab ib lub tsheb rau lawv, thiab ib txhia thov kom muab ib tug neeg ua hauj lwm pab hauv tsev. Lawv tej kev thov loj zuj zus thiab lawv txoj kev ntshaw ntau zuj zus, thiab thaum kawg lawv txawm qhib qhov ncauj loj loj thov tej yam uas tshaj dhau, thiab kam thov txhua yam. Lawv ntseeg tias, “Kuv tau muab kuv tus kheej fij thiab siv dag zog ua hauj lwm rau vajtswv lub tsev hauv kuv txoj kev ntseeg vajtswv. Kuv yog ib feem ntawm vajtswv lub tsev. Nej muab tej khoom fij ntau npaum li ntawd rau vajtswv—qhov uas muab ib feem rau kuv ntawd ho yuav ua cas? Tsis tas li ntawd, yog nej muab ib feem rau kuv, qhov ntawd yuav tsis yog muab dawb xwb; kuv kuj siv dag zog ua hauj lwm hauv vajtswv lub tsev thiab tiv kev phom sij, kuv kuj tiv kev txom nyem thiab them tus nqi thiab. Qhov uas kuv tau txais tej no puas yog ib qho uas tsim nyog? Yog li ntawd, vajtswv lub tsev yuav tsum ua kom tau raws li kuv tej kev thov yam tsis muaj kev txwv, vajtswv lub tsev yuav tsum muab txhua yam uas kuv cheem tsum rau kuv, thiab tsis tsim nyog ua siab nqaim.” Qhia rau Kuv seb, tej no puas yog tej kev qhia tshwm ntawm kev ua neej nyob vam khom rau pawg ntseeg? Cov neeg zoo li no puas yog cov tsis ntseeg? (Yog.) Qhov kev txiav txim uas raug txog tej kev coj no yog kev ua neej nyob vam khom rau pawg ntseeg. Qhov ua lub neej vam khom rau pawg ntseeg ntawd txhais li cas? Qhov ntawd txhais tias siv lub npe tias ntseeg Vajtswv los quab yuam kom Vajtswv lub tsev muab nyiaj txiag thiab khoom siv, thiab siv lub npe tias siv dag zog ua hauj lwm rau Vajtswv lub tsev thiab ua ib teg dej num los thov nqi zog ntawm Vajtswv lub tsev. Qhov no yog lub ntsiab lus ntawm kev ua neej nyob vam khom rau pawg ntseeg. Cov neeg zoo li no puas tuaj yeem caum qhov tseeb? (Tsis tuaj yeem.) Vim li cas lawv thiaj li tso tej yam tseg, siv dag zog ua hauj lwm, thiab tiv kev txom nyem? Puas yog txhawm rau ua ib teg dej num? Puas yog lawv tab tom ua raws li qhov tseeb? (Tsis yog.) Lawv siv dag zog ua hauj lwm thiab tiv kev txom nyem tsis yog txhawm rau lub hom phiaj ntawm kev ua lawv tes dej num kiag li, tiam sis yog txhawm rau nrhiav noj nrhiav haus xwb, thiab lawv tsis pub leej twg thuam lawv kiag li—lawv tsuas xav ua lub neej vam khom rau pawg ntseeg yam tsim nyog xwb. Cov no yog cov neeg uas ua neej nyob vam khom rau pawg ntseeg.

Cov neeg uas ua neej nyob vam khom rau pawg ntseeg ntawd ntseeg Vajtswv tsis muaj lwm qhov laj thawj tsuas yog txhawm rau nrhiav noj nrhiav haus rau lawv tus kheej, kom tau txais ib txoj kev nrhiav noj nrhiav haus xwb. Puas muaj cov neeg nyob ib puag ncig nej uas ua neej nyob vam khom rau pawg ntseeg? Tham txog lawv tej kev qhia tshwm. (Kuv tau ntsib ib tug neeg zoo li no. Thaum xub thawj, saib zoo li nws muaj tswv yim me ntsis thiab kub siab lug, yog li ntawd pawg ntseeg thiaj li npaj kom nws tshaj tawm txoj moo zoo. Thaum ntawd, nws tsev neeg muaj kev nyuaj hauv lub neej, yog li ntawd pawg ntseeg thiaj li muab kev pab me ntsis rau nws. Txawm li cas los xij, tom qab ntawd mam li pom tias nws siv nyiaj yam tsis muaj tej hauv paus ntsiab lus, siv rau tej yam uas tsis tsim nyog siv thiab qhov uas nws tseg tau los nws tsis tseg. Thaum cov kwv tij thiab cov nkauj muam qhia qhov tseeb tej hauv paus ntsiab lus rau nws, nws tsis zoo siab thiab muaj kev tawm tsam heev hauv nws lub siab. Vim nws siv Vajtswv lub tsev cov nyiaj ua dog ua dig, pawg ntseeg thiaj li hloov kom tsim nyog raws li tej kev npaj thiab tej kev cai ntawm Vajtswv lub tsev, txo cov nyiaj pab uas muab rau nws. Yog li ntawd, nws cia li tsis muaj lub zog uas yav tas los nws muaj rau kev ua nws tes dej num, thiab nws cia li ua dog ua dig zuj zus. Tom qab ntawd, pawg ntseeg tsis pab nws lawm, thiab nws lub siab cia li tsis nyob rau kev ua nws tes dej num ntxiv lawm. Nws xav tas hnub seb yuav ua hauj lwm thiab khwv nyiaj li cas. Nws haj tseem qiv nyiaj los ntawm cov kwv tij thiab cov nkauj muam, hais tias nws cheem tsum nyiaj los yuav ib lub tsheb thiab nqis peev los qhib ib lub tuam txhab, thiab hais tias qhov no yuav ua rau qhov tshaj tawm txoj moo zoo yooj yim dua thiab tau neeg coob dua. Pom tau meej tias nws tab tom dag thiab coj tib neeg mus yuam kev nrog cov lus no; nws tab tom siv lub npe ntawm kev tshaj tawm txoj moo zoo los dag nyiaj ntawm cov kwv tij thiab cov nkauj muam.) Tus neeg no saib xyuas li cas lawm? (Cia li muab nws ntiab tawm mus ncaj qha lawm.) Qhov ua li ntawd ces yog lawm. Qhov no yog kev ua neej nyob vam khom rau pawg ntseeg. Thaum cov neeg uas ua neej nyob vam khom rau pawg ntseeg pib los ntseeg Vajtswv ntawd, saib lawv zoo li kub siab lug me ntsis thiab lawv muab lawv tus kheej fij me ntsis, thiab lub sij hawm no lawv tej kev thov tsis siab—tsuav yog lawv tau mov noj xwb ces yeej tau lawm. Tiam sis thaum sij hawm dhau mus, lawv yuav tsis txaus siab rau yam uas muab rau lawv lawm thiab lawv pib thov siab zuj zus, thiab yog ua tsis tau raws li lawv tej kev thov, lawv yuav cia li pib txawj ntxias thiab tsis txaus siab ua dej num txhawb lawm. Thaum lawv ua lawv tej dej num me ntsis xwb, yuav tsum muaj neeg saib ntsoov lawv thiab, yog tsis li ntawd lawv yeej yuav ua dog ua dig. Thaum kawg, thaum pom tias txoj kev ua dej num txhawb uas lawv ua ntawd ua rau muaj kev puas tsuaj ntau dua qhov zoo, es thiaj li muab lawv pov tseg lawm. Ib txhia hais tias, “Vim li cas Vajtswv lub tsev tsis muaj kev hlub rau lawv?” Kuj muaj tej hauv paus ntsiab lus rau qhov muaj kev hlub thiab. Cov neeg ntawd yog cov tsis ntseeg, lawv tsis nyeem Vajtswv cov lus, los sis tsis lees txais qhov tseeb, thaum ua lawv tej dej num mas lawv ib txwm txawj ntxias thiab ua dog ua dig, thiab thaum sib qhia qhov tseeb los lawv tsis mloog, los sis hom kev ntuas twg los tsis lees txais kiag li, thiab tuaj yeem hais tau tias lawv yog cov uas hloov tsis tau lawm. Vim li ntawd, tsuas tuaj yeem saib xyuas lawv los ntawm kev muab lawv ntsaig tawm mus thiab muab pov tseg xwb. Yog cov thawj coj thiab cov neeg ua hauj lwm pom hom neeg zoo li no, lawv yuav tsum saib xyuas cov neeg ntawd kom ncav sij hawm, thiab yog cov kwv tij thiab cov nkauj muam pom hom neeg zoo li no, lawv yuav tsum qhia tawm rau cov thawj coj thiab cov neeg ua hauj lwm kom ncav sij hawm. Qhov no yog txhua tus neeg uas Vajtswv xaiv tseg lub luag hauj lwm. Kiag thaum paub tseeb tias tus neeg no yog ib tug ua neej nyob vam khom rau pawg ntseeg, lawv tsuas xav nrhiav noj nrhiav haus xwb, thiab lawv yog ib tug tsis ntseeg, thiab paub tseeb tias lawv tsis kam ua hauj lwm thaum tsis muab nyiaj rau lawv, tsis txaus siab thiab ua tsiv ua nyaum thaum lawv xav tias lawv tsis tau txais nyiaj txaus, thiab tsuas ua hauj lwm me ntsis thaum tau txais nyiaj txaus xwb, ces yuav tsum tsis txhob ua siab mos siab muag rau lawv kiag li—yuav tsum muab lawv ntsaig tawm mus! Yog hais kom raug mas, cov neeg zoo li no twb tsis tsim nyog ua dej num txhawb nyob hauv Vajtswv lub tsev kiag li. Yog koj tsis them nyiaj rau lawv, lawv yuav tsis txaus siab ua dej num txhawb; tiam sis tsuav yog koj them nyiaj rau lawv xwb, txawm yog lawv paub tias lawv tsuas ua dej num txhawb xwb los, lawv yeej tseem yuav txaus siab ua qhov ntawd. Tiam sis cov tsis ntseeg no tuaj yeem ua tau hom dej num txhawb dab tsi? Lawv yeej ua tsis tau dej num txhawb kom zoo kiag li, thiab lawv txoj kev ua dej num txhawb tsis mus raws li tus qauv, yog li ntawd yuav tsum muab lawv pov tseg. Yog li ntawd, thawj yam uas yuav tsum ua thaum paub cais tias lawv yog hom neeg uas ua neej nyob vam khom rau pawg ntseeg ntawd yog daws lawv thiab ntiab lawv tawm hauv pawg ntseeg mus tam li cov tib neeg phem. Qhov no yeej tsis dhau cai kiag li; qhov ntawd haum nkaus raws li Vajtswv lub tsev tej hauv paus ntsiab lus rau kev ntsaig tawm mus thiab ntiab tib neeg tawm. Hom neeg zoo li no puas tim tsum muab ib lub cib fim rau lawv kom lees txim hloov dua siab tshiab? Puas tim tsum tseg lawv nyob saib xyuas? (Tsis tim tsum.) Lawv puas muaj peev xwm lees txim hloov dua siab tshiab? (Tsis muaj.) Qhov no yeej yog lawv tus yam ntxwv xeeb txawm ntag; lawv yeej yuav tsis lees txim hloov dua siab tshiab kiag li. Lawv yog ib pab nrog Ntxwgnyoog. Nyob hauv Ntxwgnyoog pab, muaj ib hom neeg uas muaj tus yam ntxwv xeeb txawm ntawm ib tug neeg phem li dab, uas xav noj dawb haus dawb ntawm lwm tus txawm lawv yuav nyob qhov twg los xij, thiab tsis ua ib teg hauj lwm uas tsim nyog kiag li txawm lawv yuav mus txog qhov twg los xij, thiab tsuas xav dag thiab ntxias tib neeg xwb. Lawv pom tias cov ntseeg Vajtswv muaj kev ua neeg thiab xav tias cov neeg no yooj yim dag, yog li ntawd lawv thiaj li tuaj rau hauv Vajtswv lub tsev los ua neej nyob vam khom rau pawg ntseeg. Lawv yeej tsis paub tias, Vajtswv lub tsev paub cais thiab ceev faj lawv los ntev lawm, thiab muaj tej hauv paus ntsiab lus rau kev saib xyuas cov neeg uas zoo li lawv. Thaum lawv txoj kev sim ua neej nyob vam khom rau pawg ntseeg ua tsis tau tiav, lawv thiaj li npau taws thiab txaj muag, nthuav lawv lub ntsej muag tiag tiag tawm. Thaum ntawd, koj yuav paub tias vim li cas Vajtswv lub tsev thiaj li tsis muab ib lub cib fim rau cov neeg zoo li no kom lees txim hloov dua siab tshiab—qhov ntawd yog vim lawv tsis muaj txoj kev ua neeg thiab yeej hloov tsis tau. Lawv yog cov neeg phem li dab uas cov ib txwm tsis ntseeg hais txog ntawd. Yog li ntawd, Vajtswv lub tsev saib xyuas cov neeg zoo li no los ntawm kev muab lawv ntsaig tawm mus los sis ntiab tawm mus ncaj qha, thiab yeej tsis lees txais lawv rov qab los rau hauv pawg ntseeg ntxiv li lawm. Qhov uas saib xyuas lawv tam li cov tib neeg phem ntawd puas tsim nyog? (Tsim nyog.) Lub ncauj lus no cia peb sib qhia los xaus rau ntawm no xwb.

F. Nrhiav Chaw Nkaum

Txuas ntxiv no, peb yuav sib qhia txog lub hom phiaj thib rau, uas yog hom rau ntawm cov neeg tsis ntseeg uas yuav tsum muab ntsaig tawm mus los sis ntiab tawm ntawm pawg ntseeg mus: cov uas lawv lub hom phiaj rau kev ntseeg Vajtswv yog txhawm rau nrhiav chaw nkaum. Ib txhia neeg hais tias, “Tej kev qhia tshwm ntawm kev nrhiav chaw nkaum yog dab tsi? Puas muaj cov uas ntseeg Vajtswv txhawm rau nrhiav chaw nkaum? Puas muaj cov neeg zoo li no tiag?” Nej puas tau hnov dua ib tug neeg twg hais tias, “Pawg ntseeg yog ib qho chaw nkaum; tib neeg ntseeg Vajtswv kom lawv thiaj li nrhiav tau chaw nkaum”? Ntau tus neeg nyob hauv sab kab lis kev cai ntseeg yeej hais li no. Raws li lub ntsiab tseeb ntawm lo lus hais no, puas muaj qhov txawv ntawm lo lus hais no thiab lub hom phiaj uas peb yuav txheeb xyuas—“qhov kev ntseeg Vajtswv txhawm rau nrhiav chaw nkaum”? (Muaj.) Qhov txawv yog dab tsi? Lawv nrhiav chaw nkaum los ntawm dab tsi? (Cov uas ntseeg Vajtswv nrog lub siab tiag tiag kuj muaj qee yam tsis huv thaum uas caum qhov tseeb ntawd; lawv kuj cia siab tias yuav zam tau tej kev puas tsuaj los sis tej kev nyuaj thiab tau txais kev kaj siab lug me ntsis. Txawm li cas los xij, hom neeg nyob hauv lub hom phiaj thib rau no ntseeg Vajtswv tsuas yog txhawm rau nrhiav chaw nkaum xwb, thiab lawv yeej tsis muaj kev ntseeg Vajtswv nrog lub siab tiag tiag kiag li. Qhov no yog qhov txawv.) Qhov txawv ntawm no yog kev muaj tej yam tsis huv nyob rau hauv ib tug neeg lub hom phiaj rau kev ntseeg Vajtswv thiab kev ntseeg Vajtswv nrog tib lub hom phiaj uas yog txhawm rau nrhiav chaw nkaum xwb. Dhau ntawm qhov txawv no lawm, kuj tseem muaj qhov txawv txog qhov seb lawv nrhiav chaw nkaum los ntawm dab tsi thiab. Ib txhia neeg muaj tej yam tsis huv xyaw nrog lawv lub hom phiaj rau kev ntseeg Vajtswv; lawv ntseeg Vajtswv txhawm rau zam tej kev puas tsuaj, khiav dim tej kev puas tsuaj, los sis kom Vajtswv thiaj li tsom kwm thiab saib xyuas lawv, thiab tom qab ntawd lawv thiaj li zam tau qee yam kev phom sij thiab kev puas tsuaj tiag tiag. Cov kev puas tsuaj no yog cov uas lawv xav zam. Hom neeg nyob hauv lub hom phiaj thib rau uas peb tab tom sib qhia txog no—cov uas lawv lub hom phiaj rau kev ntseeg Vajtswv yog txhawm rau nrhiav chaw nkaum—nrhiav chaw nkaum los ntawm ntau yam uas dav dua. Rau lawv mas, yam uas muaj tiag tshaj plaws ntawd dhau deb ntawm kev zam tej kev puas ntsoog loj uas tseem tsis tau tshwm sim. Yog li ntawd cov teeb meem uas muaj tiag tshaj plaws rau lawv yog dab tsi? Tej yam xws li ntsib cov yeeb ncuab uas muaj hwj chim hauv zej zog, raug plaub ntug, ua rau cov nom tswv los sis cov neeg uas muaj hwj chim ntawd chim, ua txhaum kev cai lij choj, kev ua tsov ua rog los sis ntau yam kev puas tsuaj tshwm sim hauv lawv lub teb chaws, los sis ntsib qee tus neeg los sis tej yam uas ua rau muaj kev phom sij rau lawv txoj sia los sis lawv tsev neeg txoj kev nyab xeeb, thiab lwm yam ntxiv. Tom qab ntsib cov xwm txheej no, lawv nrhiav ib lub pawg ntseeg uas lawv ntseeg tias vam khom tau thiab tso siab tau los nrhiav chaw nkaum; qhov no yog txoj kev nrhiav chaw nkaum uas tau hais txog nyob hauv lub hom phiaj thib rau. Qhov ntawd yog, thaum lawv ntsib qee yam kev nyuaj hauv lawv lub neej txhua hnub uas ua rau lawv txoj sia, tsev neeg, hauj lwm, txoj kev ua neej, thiab lwm yam ntxiv muaj kev phom sij, lawv tuaj rau hauv pawg ntseeg tuaj nrhiav chaw nkaum, nrhiav kev pab los ntawm ib lub zog uas muaj tib neeg coob. Qhov no yog kev ntseeg Vajtswv txhawm rau lub hom phiaj nrhiav chaw nkaum raws li tau hais txog nyob hauv lub hom phiaj thib rau. Qhov no puas yog txawv ntawm cov neeg ntseeg tiag tiag tej kev tsis huv? (Yog.) Lub hom phiaj ntawm hom neeg no txoj kev ntseeg Vajtswv yog txhawm rau nrhiav chaw nkaum, txhawm rau nrhiav kev pab los ntawm pawg ntseeg. Qhov ntawd yog, lawv cia siab tias pawg ntseeg yuav cev tau tes los pab lawv, thiab, dhau ntawm kev pab nyiaj txiag, lawv kuj thov kom pawg ntseeg muab kev tiv thaiv, kev txhawb, thiab kev pab rau lawv thiab. Ib txhia neeg zoo li no kuj xav siv pawg ntseeg lub hwj chim, lub meej mom, thiab lub suab npe nyob hauv zej zog los tawm tsam cov tsoom fwv lim hiam los sis tej zog lim hiam uas tsuj nias thiab ua phem rau cov uas ntseeg Vajtswv, kom lawv txoj sia los sis lawv txoj kev nrhiav noj nrhiav haus thiaj li raug tiv thaiv. Qhov no yog lawv lub hom phiaj rau kev ntseeg Vajtswv. Puas muaj cov neeg zoo li no? Lawv ntseeg tias pawg ntseeg yog ib qho chaw nkaum zoo uas tuaj yeem muab cais tawm ntawm kev nom kev tswv thiab zej zog, thiab lawv xav tias thaum lawv cheem tsum kev pab, pawg ntseeg tuaj yeem cev tes los pab nrog lub siab dawb paug thiab ua zoo los muab txhua yam kev pab nyiaj txiag rau lawv, los tawm suab pab lawv, los tiv thaiv lawv, los sawv cev hais rau lawv hauv tej plaub ntug, thiab los tawm tsam rau lawv tej cai thiab tej txiaj ntsim. Qhov no yog cov neeg no lub hom phiaj rau kev ntseeg Vajtswv. Txog niaj hnub no, puas muaj cov neeg zoo li no nyob hauv pawg ntseeg? Nej puas tau hnov tias muaj cov neeg zoo li no? Yeej muaj cov neeg zoo li no nyob hauv cov pawg ntseeg txawv teb chaws. Cov neeg no ntseeg Vajtswv thiab koom nrog pawg ntseeg tsuas yog txhawm rau lub hom phiaj nrhiav chaw nkaum xwb. Lawv tsis to taub tias kev ntseeg yog dab tsi, thiab lawv haj yam tsis nyiam qhov tseeb. Txawm li cas los xij, thaum lawv ntsib kev nyuaj thiab nrhiav tsis tau ib qho kev pab hauv lub zej zog li, lawv xav txog pawg ntseeg, thiab lawv ntseeg tias pawg ntseeg yog ib qho chaw uas lawv tuaj yeem nrhiav chaw nkaum tau nyab xeeb, yog txoj kev khiav dim uas zoo tshaj plaws, thiab yog qhov chaw nyab xeeb tshaj plaws, yog li ntawd lawv thiaj li xaiv ntseeg Vajtswv thiab nkag los rau hauv pawg ntseeg kom ua tau raws li lawv lub hom phiaj ntawm kev zam tej kev puas tsuaj.

Tam sim no tej kev puas tsuaj tab tom loj zuj zus, thiab tib neeg tsis muaj txoj kev ua neej nyob. Muaj ib txhia uas xaiv ntseeg Vajtswv tsuas yog txhawm rau zam tej kev puas tsuaj xwb. Lawv ntseeg tias Vajtswv muaj nyob, tiam sis lawv yeej tsis nyiam qhov tseeb me ntsis kiag li. Yog cov neeg zoo li no tuaj ntseeg Vajtswv, pawg ntseeg puas tsim nyog lees txais lawv? Ntau tus neeg pom tsis tshab txog qhov teeb meem no, thiab xav tias txawm yuav yog leej twg los xij uas ntseeg tias Vajtswv muaj nyob ces pawg ntseeg yuav tsum txais yuav. Qhov no yog ib qho kev yuam kev uas loj heev. Pawg ntseeg txoj kev txiav txim siab lees txais ib tug neeg twg yuav tsum yog raws li qhov seb tus neeg ntawd puas tuaj yeem lees txais qhov tseeb thiab seb lawv puas yog ib tug uas Vajtswv cawm, tsis yog raws li qhov seb lawv puas txaus siab ntseeg Vajtswv. Kuj muaj ntau tus dab uas xav tau koob hmoov thiab nrhiav ib txoj kev mus rau yav tom ntej los ntawm kev ntseeg Vajtswv—puas yog pawg ntseeg yuav tsum lees txais cov neeg zoo li no thiab? Qhov no tsis zoo li txoj kev tshaj tawm txoj moo zoo nyob rau Tiam Hmoov Hlub, thaum uas cov neeg zoo li cas los yeej raug lees txais, tsuav yog lawv ntseeg xwb; nyob rau Tiam Lub Nceeg Vaj qhov uas pawg ntseeg yuav lees txais leej twg ntawd mas muaj tej hauv paus ntsiab lus thiab tej kev txwv ntawm Vajtswv tej kev cai tswj fwm. Txawm yuav yog leej twg los xij, yog lawv tsis nyiam los sis tsis lees txais qhov tseeb, ces yeej tsis tuaj yeem lees txais lawv. Vim li cas cov neeg zoo li no thiaj li tsis raug lees txais? Cov neeg zoo li no tsis tuaj yeem raug lees txais, qhov tseem ceeb yog vim peb pom tsis meej txog lawv qhov keeb kwm los sis seb lawv yog hom neeg li cas tiag tiag. Yog pawg ntseeg lees txais ib tug dab, ib tug tib neeg phem uas lim hiam tshaj plaws, txhua tus yeej paub tias yuav ua rau muaj tej qhov tshwm sim los phem li cas rau pawg ntseeg. Tsis tas li ntawd xwb, nyob rau hauv kev ntseeg Vajtswv, peb yuav tsum to taub Vajtswv tej kev npaj siab, seb Vajtswv cawm cov neeg zoo li cas thiab muab cov neeg zoo li cas pov tseg. Pawg ntseeg yog tsim los ntawm cov neeg li cas? Pawg ntseeg yog tsim los ntawm cov neeg uas lees txais Vajtswv txoj kev cawm dim, cov uas nyiam qhov tseeb, cov uas Vajtswv lees txais. Vajtswv tsis cawm cov uas tsis ntseeg Nws tiag tiag thiab tsis lees txais qhov tseeb, vim qhov tsis lees txais qhov tseeb ntawd yog ib qho teeb meem uas ntsig txog ib tug neeg tus yam ntxwv xeeb txawm, thiab cov neeg zoo li no yog Ntxwgnyoog cov thiab yuav tsis muaj hnub hloov kiag li. Yog li ntawd, cov neeg zoo li no yuav tsum tsis txhob raug lees txais kom nkag los rau hauv pawg ntseeg kiag li. Yog ib tug neeg twg lees txais ib tug tib neeg phem, ib tug dab, kom nkag los rau hauv pawg ntseeg, ces tus neeg ntawd yog Ntxwgnyoog ib tug tub qhe. Lawv txhob txwm tuaj txhawm rau rhuav tshem thiab ua kom pawg ntseeg tes hauj lwm puas tsuaj, thiab lawv yog Vajtswv ib tug yeeb ncuab. Qhov lees txais ib tug dab, Vajtswv ib tug yeeb ncuab zoo li no, kom nkag los rau hauv pawg ntseeg ntawd yog kev ua txhaum rau Vajtswv tus moj yam thiab ua yuam cai rau Vajtswv tej kev cai tswj fwm, thiab Vajtswv lub tsev yeej yuav tsis thev qhov no kiag li. Yuav tsum tsis txhob lees txais cov tib neeg phem, cov dab kom nkag los rau hauv pawg ntseeg—qhov no yog ib qho ntawm pawg ntseeg tej cwj pwm thiab tej kev cheem tsum uas meej txog tes hauj lwm tshaj tawm txoj moo zoo. Pawg ntseeg yeej tsis muaj lub luag hauj lwm uas yuav lees txais cov uas xaiv ntseeg Vajtswv txhawm rau khiav dim kev puas tsuaj kiag li, thiab kuj yuav tsum tsis txhob lees txais cov uas tsis lees txais qhov tseeb kiag li ntawd kom nkag los rau hauv pawg ntseeg thiab, vim Vajtswv tsis cawm cov neeg zoo li ntawd. Txawm leej twg los xij uas tsis lees paub Vajtswv Tus Uas Muaj Hwj Chim Loj Kawg Nkaus cov lus tias yog qhov tseeb, txawm leej twg los xij uas tawm tsam qhov tseeb thiab tsis nyiam qhov tseeb kiag li, ces yog ib tug tib neeg phem, thiab Vajtswv tsis cawm lawv. Hais txog cov uas lees paub Vajtswv nyob hauv lawv lub siab, tiam sis tsis nyiam qhov tseeb, thiab raug muab cais ua cov tsis ntseeg uas noj ncuav kom tsau plab xwb, pawg ntseeg yeej tsis lees txais ib tug twg ntawm lawv kiag li. Tsis tas hais txog cov neeg coj cwj pwm tsis zoo hauv lub zej zog uas xav tuaj nrhiav chaw nkaum hauv pawg ntseeg—haj yam yuav tsum tsis txhob lees txais lawv. Qhov no yog vim pawg ntseeg tsis yog ib lub koom haum pab dawb, tiam sis pawg ntseeg yog qhov chaw uas Vajtswv ua tes hauj lwm cawm tib neeg. Pawg ntseeg tes hauj lwm yeej tsis muaj feem xyuam dab tsi nrog tsoom fwv teb chaws kiag li. Cov koom haum hauv lub zej zog ntuas tib neeg kom ua zoo, thiab kom tso lawv cov riam phom tseg—qhov no yog txhawm rau lub teb chaws, thiab qhov ntawd yeej tsis muaj feem xyuam dab tsi nrog pawg ntseeg kiag li. Yog leej twg kam coj ib tug tib neeg phem uas ib txwm tsis ntseeg, ib tug dab, los sis ib tug tsis ntseeg los rau hauv pawg ntseeg, tus neeg ntawd yuav ua txhaum rau Vajtswv tus moj yam thiab ua yuam cai rau Vajtswv tej kev cai tswj fwm. Txawm leej twg los xij uas coj ib tug tib neeg phem, ib tug dab, los rau hauv pawg ntseeg yuav tsum raug Vajtswv lub tsev muab ntsaig tawm mus los sis ntiab tawm mus. Qhov no yog pawg ntseeg tus cwj pwm uas meej txog tes hauj lwm tshaj tawm txoj moo zoo. Thaum cov tib neeg phem, cov dab no, xav tuaj nrhiav chaw nkaum hauv Vajtswv lub tsev, yuav tsum qhia rau lawv tias lawv tuaj yuam kev qhov rooj lawm, tias lawv tau xaiv yuam kev chaw lawm. Pawg ntseeg yeej yuav tsis lees txais lawv kiag li. Qhov no yog pawg ntseeg tus cwj pwm uas meej txog cov ib txwm tsis ntseeg uas xav nrhiav chaw nkaum. Qhov no puas yog hais meej lawm? (Yog.) Yog li ntawd peb yuav ua li cas rau cov neeg zoo li no? Txoj kev hais rau lawv uas tsim nyog yog li cas? Koj hais tias: “Txawm yuav yog lub teb chaws twg los xij, yeej muaj cov Koom Haum Cim Khaub Lig Liab, cov chaw pab cuam, cov chaw nkaum, thiab cov tuam tsev Hauj Sam, nrog rau qee cov pab pawg neeg ua hauj lwm pab dawb nyob hauv lub zej zog. Yog koj ntsib kev nyuaj thiab xav tias koj muaj kev tsis ncaj ncees uas yuav tsum tau daws, koj tuaj yeem nrhiav kev pab los ntawm cov koom haum no. Tsis tas li ntawd xwb, koj tuaj yeem nrhiav chaw nkaum ntawm kev nom kev tswv los sis chaw nkaum rau cov neeg thoj nam los ntawm tsoom fwv, thiab yog koj li nyiaj txiag txaus, koj tuaj yeem ntiav ib tug kws lij choj los pab koj txog koj qhov plaub ntug. Tiam sis qhov no yog pawg ntseeg; yog ib qho chaw uas Vajtswv ua hauj lwm, ib qho chaw uas Vajtswv cawm tib neeg, tsis yog ib qho chaw rau koj nrhiav chaw nkaum. Yog li ntawd, qhov uas koj nkag los rau hauv pawg ntseeg yog qhov tsis tsim nyog, thiab qhov uas koj nyob ntawm no yeej tsis muaj qab hau. Vajtswv tsis lees txais cov neeg zoo li no, thiab pawg ntseeg kuj tsis txais thiab. Txawm cov ib txwm tsis ntseeg yuav muaj kev nyuaj li cas los xij, lawv yuav tsum nrhiav kev pab los ntawm cov koom haum pab dawb, cov koom haum pab cuam, los sis Cov Chaw Hauj Lwm Saib Xyuas pej xeem nyob hauv lub zej zog—cov koom haum no mob siab txog kev pab cuam cov pej xeem, muab kev pab pub dawb thiab pab lwm tus. Txawm koj yuav muaj kev yws los sis kev thov dab tsi, koj tuaj yeem qhia rau lawv los sis thov mus rau tsoom fwv. Cov ntawd yog cov chaw uas tsim nyog tshaj plaws rau koj.” Pawg ntseeg yeej tsis lees txais cov tsis ntseeg thiab cov ib txwm tsis ntseeg twg kiag li. Yog ib tug neeg twg muaj “lub siab hlub” tshwj xeeb, cia lawv lees txais cov neeg zoo li no ntawm lawv tus kheej xwb ces tag mus lawm; lawv tuaj yeem yug cov neeg zoo li no ntawm lawv tus kheej, thiab Vajtswv lub tsev yuav tsis cuam tshuam txog qhov ntawd. Tej zaum ib txhia neeg yuav nug tias, “Yog li ntawd vim li cas pawg ntseeg thiaj li tshaj tawm txoj moo zoo? Lub hom phiaj ntawm kev tshaj tawm txoj moo zoo yog dab tsi?” Qhov kev tshaj tawm txoj moo zoo yog Vajtswv cov lus txib. Cov neeg uas yuav qhia txoj moo zoo rau yog cov uas nrhiav Vajtswv thiab nrhiav txoj hau kev tseeb, cov uas ntshaw Vajtswv qhov kev tshwm sim, cov uas nyiam qhov tseeb thiab lees txais tau qhov tseeb, thiab cov uas ntseeg Vajtswv tiag tiag—tsuas yog cov neeg no xwb thiaj li tuaj yeem tshaj tawm txoj moo zoo rau. Hais txog cov uas tsis nrhiav Vajtswv, tsis yog tuaj lees txais qhov tseeb tiam sis tuaj nrhiav chaw nkaum ntawd, yuav tsis tshaj tawm txoj moo zoo rau lawv. Ib txhia tib neeg tsis meej pem pom tsis tshab txog qhov no thiab paub tsis meej thaum muaj tej yam tshwm sim rau lawv—cov no yog cov neeg ruam feeb tsis meej uas yuav tsis muaj hnub to taub Vajtswv tej kev npaj siab kiag li.

G. Nrhiav ib tug Txhawb Pab

Lub hom phiaj xya uas tib neeg muaj rau kev ntseeg Vajtswv yog nrhiav ib tug txhawb pab. Nej puas tau pom cov tib neeg zoo li no dua? Qhov no yog ib qho xwm txheej uas tshwj xeeb dua me ntsis; txawm lawv yuav tsis muaj coob los, lawv yeej muaj nyob. Qhov no yog vim Vajtswv cov pawg ntseeg tsis yog tsuas tshwm sim nyob hauv Teb Chaws Suav xwb, tiam sis kuj tshwm sim nyob rau Esxias, Yulauv, Amelikas, thiab ntau lub teb chaws nyob rau Asfibkas thiab, yog li ntawd cov neeg nrhiav cib fim thiab cov tsis ntseeg no yeej yuav tshwm sim raws cov pawg ntseeg ntawd los thiab. Txawm cov neeg no yuav muaj feem tshwm sim npaum li cas los xij, txawm li cas los, thaum lawv tshwm sim los, nej yuav tsum tim ntsej muag nrog thiab paub cais lawv, thiab tsis txhob cia cov tsis ntseeg no tau txais ib lub meej mom twg thiab ua kom muaj kev cuam tshuam nyob hauv pawg ntseeg. Yog nej xav tias cov teeb meem no tsis muaj nyob vim tsis tau tshwm sim los sis nej tsis tau ntsib dua, ces qhov no yog ib txoj kev xav uas ruam. Kiag thaum cov teeb meem no tshwm sim los, yog koj tsis muaj kev paub cais thiab tsis paub daws tej ntawd li cas, tej ntawd yuav coj tej kev phom sij loj heev uas zais ntshis los rau pawg ntseeg, rau Vajtswv lub tsev, rau cov kwv tij thiab cov nkauj muam, thiab rau pawg ntseeg tes hauj lwm. Yog li ntawd, ua ntej yuav muaj ib yam dab tsi tshwm tuaj, koj yuav tsum paub tias yuav tsum ntsib cov teeb meem twg thiab yuav daws tej ntawd li cas. Qhov no yog txoj kev uas zoo tshaj plaws; qhov ntawd yog ib qho kev tsom kwm uas pom tsis tau rau koj. Cov tib neeg uas tau hais txog nyob hauv lub hom phiaj xya rau kev ntseeg Vajtswv, cov uas ntseeg Vajtswv txhawm rau nrhiav ib tug txhawb pab, yeej tsis tsawg. Lub zej zog no puv npo kev tsis ncaj ncees, kev ntxub ntxaug, thiab kev caij tsuj nyob txhua qhov chaw. Cov tib neeg uas ua neej nyob rau txhua theem hauv lub zej zog puav leej muaj kev ntxub thiab kev tsis nyiam kiag li rau ntau yam kev tsis ncaj ncees hauv lub zej zog thiab kuj muaj kev npau taws puv npo thiab. Txawm li cas los xij, qhov ntawd tsis yooj yim uas yuav khiav dim ntawm tej kev tsis ncaj ncees hauv tib neeg lub ntiaj teb tshwj tsis yog koj ploj mus ntawm lub ntiaj teb no xwb. Tsuav yog ib tug ua neej nyob hauv lub ntiaj teb no, tsuav yog ua neej nyob hauv cov tib neeg no, ces yeej yuav raug thab thiab raug ua rau poob ntsej muag—yam tsis ntau los tsawg, thiab tsis loj los me, thiab tej zaum haj tseem yuav raug qee lub zog uas muaj hwj chim loj caum thiab tsim txom thiab. Ntau yam kev tsis ncaj ncees thiab kev tsis sib luag no tau ua rau tib neeg lub siab muaj lub nra loj heev, coj kev nias qees loj heev los rau lawv lub siab thiab, muaj tseeb tiag, kuj coj ntau yam kev tsis yooj yim los rau tib neeg lub neej uas ib txwm muaj thiab. Vim li ntawd, ib txhia neeg thiaj li cia li muaj ib txoj kev xav tias: “Kom ib tug neeg sawv tau khov kho hauv lub zej zog, lawv yuav tsum muaj ib lub zog nyob tom qab lawv los ua chaw vam khom. Thaum lawv ntsib kev nyuaj thiab tim tsum kev pab, los sis thaum lawv nyob ib leeg thiab tsis muaj chaw vam khom, yuav muaj ib pab neeg los txhawb lawv thiab ua tus txiav txim siab rau lawv, los daws tej kev nyuaj thiab teeb meem uas lawv ntsib, los sis los tsom kwm tej yam uas tim tsum rau lawv lub neej.” Yog li ntawd, lawv thiaj li siv zog nrhiav kev txhawb pab zoo li no. Muaj tseeb tiag, thaum kawg ib txhia ntawm cov neeg no thiaj li nrhiav tau pawg ntseeg. Lawv ntseeg tias cov tib neeg hauv pawg ntseeg muaj ib lub siab thiab ua hauj lwm mus rau tib lub hom phiaj, txhua tus muaj kev ntseeg, muaj lub siab xav zoo thiab ua zoo rau lwm tus, nyob deb ntawm tej kev sib cav sib ceg hauv lub zej zog, thiab nrug deb ntawm tej kev phem uas nrov hauv lub zej zog. Rau cov uas ntseeg Vajtswv mas, pawg ntseeg yeej yog ib lub cim sawv cev ntawm txoj kev ncaj ncees loj heev nyob hauv lub zej zog thiab lub ntiaj teb no yam tsis muaj kev ua xyem xyav li; cov tib neeg hauv pawg ntseeg kuj muaj ib tug yam ntxwv uas zoo, tsim txiaj, thiab ua zoo nyob hauv tib neeg lub siab thiab. Ib txhia xaiv ntseeg Vajtswv vim lawv nyob theem qis hauv lub zej zog, tsis muaj hwj chim nyob hauv lub zej zog kiag li, thiab yeej tsis muaj keeb kwm tsev neeg zoo hlo li. Lawv ntsib ntau yam kev nyuaj txog kev kawm ntawv, kev nrhiav phooj ywg, kev nrhiav hauj lwm, los sis kev ua ntau yam, yog li ntawd lawv thiaj li ntseeg tias kom muaj txoj sia nyob thiab sawv tau khov kho hauv lub zej zog no, lawv yuav tsum muaj qee tus neeg los pab lawv. Piv txwv li, thaum nrhiav hauj lwm, yog lawv vam khom lawv tus kheej, nrhiav hauj lwm ib qho dhau ib qho yam tsis muaj hom phiaj, tej zaum lawv yuav siv lawv cov nyiaj khaws cia yuav luag tag yam nrhiav tsis tau ib txoj hauj lwm uas haum. Tiam sis yog lawv tau txais kev pab los ntawm qee tus neeg vam khom tau uas muaj lub siab dawb paug pab tau lawv nrhiav, ces tej kev nyuaj uas lawv yuav tau dhau mus ntawd yuav tsawg lawm ntau, thiab lub sij hawm uas siv los nrhiav hauj lwm ntawd kuj yuav luv lawm ntau. Yog li ntawd, lawv ntseeg tias yog lawv nrhiav tau ib tug txhawb pab zoo li no, thaum hais txog txhua yam uas lawv yuav tsum tau daws hauv lub zej zog—kev kawm ntawv, kev nrhiav hauj lwm, tab txawm yog lawv lub neej txhua hnub thiab txoj kev muaj sia nyob—lawv yuav muaj qee tus neeg los qhib kev thiab txhawb lawv, ib pab neeg uas kub siab lug pab lawv nyob tom qab. Yog li ntawd, thaum lawv nrhiav tau pawg ntseeg, lawv xav tias lawv nrhiav tau qhov chaw yog lawm. Pawg ntseeg thiaj li dhau los ua ib qho kev xaiv uas zoo heev rau lawv los sawv kom khov kho hauv lub zej zog thiab ua tau kom muaj ib lub neej uas kaj siab lug. Piv txwv li, txawm yog mus ntsib kws kho mob, mus yuav khoom, yuav ntawv pov hwm, yuav tsev, pab lawv cov me nyuam xaiv tsev kawm ntawv, los sis txawm yog daws ib yam twg los xij, lawv pheej nrhiav tau cov tib neeg uas muaj kev hlub nyob hauv pawg ntseeg los cev tes pab lawv daws tej teeb meem no. Ua li no, lawv lub neej thiaj li yooj yim lawm ntau, lawv tsis nyob ib leeg kho siab khuav ua luaj hauv lub zej zog ntxiv lawm, thiab tej kev nyuaj hauv kev saib xyuas tej xwm txheej los kuj tsawg lawm ntau. Yog li ntawd, rau lawv mas, qhov tuaj rau hauv pawg ntseeg los ntseeg Vajtswv ntawd yeej muab tau tej txiaj ntsig tiag tiag rau lawv. Tab txawm yog lawv mus ntsib kws kho mob los, cov kwv tij thiab cov nkauj muam yuav nrhiav cov neeg paub nyob hauv tsev kho mob los pab lawv; lawv tuaj yeem siv cov neeg ntawd kom tau txais tus nqi uas zoo tshaj plaws thaum mus yuav khoom, thiab haj tseem yuav tau tsev ntawm tus nqi rau cov neeg sab hauv thiab. Vim cov kwv tij thiab cov nkauj muam hauv pawg ntseeg txoj kev pab, txhua yam teeb meem no thiaj li raug daws. Lawv xav tias, “Kev ntseeg vajtswv mas zoo heev li! Kev nrhiav hauj lwm, kev saib xyuas tej xwm txheej, thiab kev yuav khoom tam sim no puav leej yooj yim! Thaum twg kuv tim tsum ib yam dab tsi, kuv tsuas hu xov tooj los sis xa ib tsab ntawv mus rau pab pawg, thiab txhua tus koom siab koom zog los cev tes pab. Muaj cov tib neeg siab zoo coob heev nyob hauv pawg ntseeg; kev saib xyuas tej xwm txheej mas yooj yim heev! Tsis yooj yim nrhiav tau ib tug txhawb pab, yog li ntawd kuv yuav tsis tawm hauv pawg ntseeg mus txawm yuav muaj dab tsi los xij. Tiam sis tej kev sib txoos ua ke hauv vajtswv lub tsev pheej nyeem vajtswv cov lus thiab sib qhia qhov tseeb, uas ua rau kuv txaj muag thiab ntxhov siab. Kuv tsis txaus siab noj thiab haus vajtswv cov lus, thiab kuv tsis nyiam kiag li thaum twg kuv hnov kev sib qhia txog qhov tseeb. Tiam sis yog kuv tsis mloog, qhov ntawd yuav tsis tau—kuv tso tsis tau lawv tseg. Lawv pab kuv ntau heev. Yog kuv tsis kam mloog, kuv hnov txaj muag, thiab qhov ntawd kuj yuav txaj muag uas yuav hais tias kuv tsis ntseeg ntxiv lawm, yog li ntawd kuv tsuas lam yoog raws thiab hais cov lus zoo xwb.” Nyob hauv lawv lub siab, qhov tseeb tiag lawv tsis xav ntseeg, tiam sis lawv tsuas tau zais txoj kev xav no cia xwb. Ib txhia neeg hais tias, “Koj tsuas pom lawv pheej nrhiav cov kwv tij thiab cov nkauj muam los saib xyuas tej xwm txheej, thiab lawv zoo siab heev thaum cov kwv tij thiab cov nkauj muam pab—Koj paub cais tau tias lawv lub hom phiaj rau kev ntseeg Vajtswv yog nrhiav ib tug txhawb pab los ntawm qhov no xwb lod?” Dhau li ntawm tej kev qhia tshwm no mus lawm, saib seb lawv puas nquag nyeem Vajtswv cov lus thiab sib qhia qhov tseeb, seb lawv puas ua tau lawv tes dej num kom tiav thiab puas muaj kev hloov tiag tiag; qhov no yuav ua rau koj paub tias lawv puas ua siab dawb paug ntseeg Vajtswv. Cov uas nrhiav ib tug txhawb pab ntawd ntseeg Vajtswv tsuas yog txhawm rau siv pawg ntseeg thiab cov kwv tij thiab cov nkauj muam los saib xyuas tej xwm txheej rau lawv thiab daws tej kev nyuaj hauv lawv lub neej xwb. Tiam sis lawv yeej tsis hais txog kev ua lawv tes dej num, thiab lawv kuj tsis noj thiab haus los sis sib qhia Vajtswv cov lus li thiab. Thaum lawv hnov txog qee lub tswv yim ntse los ua kom tau tej yam, lawv txawm cus plias tam sim ntawd; lawv pib hais lus tsis tu ncua thiab twb txiav tsis tau lus kiag li. Tiam sis thaum hais txog kev ua tes dej num los sis kev ua neeg coj ncaj thiab tsis hais lus dag los sis tsis dag lwm tus, lawv txawm tsis hais ib lo lus li lawm. Lawv tsis nyiam tej yam no hauv lawv lub siab—txawm koj yuav hais tau kub siab npaum li cas los, lawv yeej tsis teb rov qab thiab tsis koom nrog; lawv haj tseem pheej xav txiav koj cov lus thiab hloov lub ncauj lus mus rau ib yam twg uas lawv nyiam. Lawv xav txhua txoj kev kom cov kwv tij thiab cov nkauj muam ua hauj lwm rau lawv thiab siv dag zog rau lawv, tsis xav muab ib lub cib fim twg rau cov kwv tij thiab cov nkauj muam los hais txog kev ua tes dej num los sis muab yus tus kheej fij rau Vajtswv. Yog leej twg hais kom lawv ua lawv tej dej num thiab muab lawv tus kheej fij rau Vajtswv, lawv nrhiav ib yam hauj lwm ceev ceev ntawm lawv tus kheej los muab pauv tam sim ntawd; thaum cov kwv tij thiab cov nkauj muam saib xyuas tej xwm txheej no rau lawv, lawv tsuas lam tawm dag zog me ntsis rau Vajtswv lub tsev xwb, lam ua kom tau raws li cov kwv tij thiab cov nkauj muam qhov kev thov xwb, thiab kiag thaum lawv tej hauj lwm ntiag tug tau daws tas lawm, lawv txawm coj txias rau cov kwv tij thiab cov nkauj muam. Txhawm rau kom tseem muaj kev sib txuas lus tau nrog pawg ntseeg, kom tsis txhob plam tus txhawb pab uas yog pawg ntseeg no thiab cov neeg pab uas yog cov kwv tij thiab cov nkauj muam no, lawv thiaj li sib txuas lus ti ti nrog txhua tus uas muaj txiaj ntsig rau lawv, nquag nug txog lawv nrog kev txhawj xeeb, hais cov lus uas zoo mloog thiab cov lus uas tsis yog tawm hauv lub siab tuaj txhawm rau tuav tej kev sib raug zoo. Lawv hais txog qhov tias lawv ntseeg npaum li cas tias Vajtswv muaj nyob, Vajtswv foom koob hmoov rau lawv npaum li cas, Vajtswv pub hmoov hlub rau lawv npaum li cas, thiab lawv nquag quaj ua kua muag ntws sis, xav tias tshuav Vajtswv nqi thiab txaus siab pauj rov qab rau Vajtswv txoj kev hlub—siv qhov no los dag cov kwv tij thiab cov nkauj muam thiab kom tau txais lawv txoj kev pab. Kiag thaum ib tug neeg twg tsis muaj nqis rau lawv siv ntxiv lawm, lawv txawm kaw thiab tshem cov neeg ntawd tej hau kev sib hu kiag tam sim ntawd. Lawv siv zog ua kom cov uas muaj txiaj ntsim tshaj plaws rau lawv, cov uas muaj nqis rau lawv siv tshaj plaws ntawd zoo siab, yoog raws, thiab txav mus ze. Hais txog cov uas tsis muaj nqis rau lawv siv, cov uas zoo ib yam li lawv, tsis muaj hwj chim los sis meej mom nyob hauv lub zej zog thiab kuj nyob theem qis hauv lub zej zog yam tsis muaj leej twg los vam khom ntawd, lawv twb tsis ntsia ib muag li. Lawv tsuas nrog cov uas muaj nqis rau lawv siv thiab cov paub neeg coob nyob hauv lub zej zog ua phooj ywg xwb, cov uas lawv pom tias muaj peev xwm. Lawv tsuas tuaj yeem siv dag zog thiab tiv kev txom nyem rau pawg ntseeg thaum lawv tim tsum ib yam dab tsi los ntawm pawg ntseeg los sis cov kwv tij thiab cov nkauj muam xwb. Qhov tseeb tiag, tej kev qhia tshwm ntawm cov tsis ntseeg ntawm cov neeg zoo li no yeej pom tau meej heev. Thaum nyob hauv tsev, lawv yeej tsis nyeem Vajtswv cov lus, yeej tsis thov Vajtswv thaum tsis muaj kev nyuaj, thiab koom nrog lub neej hauv pawg ntseeg nrog lub siab uas tsis xav ua kiag li. Lawv tsis thov ua tej dej num thiab tsis ua tus pib mus koom nrog tes hauj lwm hauv pawg ntseeg; tshwj xeeb tshaj yog lawv yeej tsis ua tus pib mus koom nrog tej hauj lwm uas phom sij. Txawm lawv yuav pom zoo ua los, lawv qhia tawm tias lawv tsis muaj kev ua siab ntev kiag li, thiab tsuas yog thaum tib neeg mus hu los sis caw xwb lawv thiaj li lam siv zog me ntsis xwb. Tej no yog tej kev qhia tshwm ntawm cov tsis ntseeg. Qhov tsis nyeem Vajtswv cov lus, tsis ua tes dej num—txawm lawv yuav lam koom nrog lub neej hauv pawg ntseeg los, qhov ntawd yog txhawm rau kom tsis txhob plam lub zej zog ntawm cov kwv tij thiab cov nkauj muam hauv pawg ntseeg, uas yog ib tug txhawb pab loj heev rau lawv. Lawv tuav txoj kev sib raug zoo nrog cov neeg no tsuas yog txhawm rau ua kom yooj yim dua rau lawv hauv kev saib xyuas tej xwm txheej rau yav tom ntej xwb. Kiag thaum cov neeg zoo li no sawv tau khov kho hauv lub zej zog thiab muaj ib qho chaw nyob ruaj khov thiab pib lawv lub neej, thiab kiag thaum lawv tau ua tiav hauv lub ntiaj teb thiab tau txais hwj chim thiab kev cia siab rau ib lub neej yav tom ntej uas zoo nkauj, lawv yuav tawm hauv pawg ntseeg mus sai sai thiab yam tsis ua ywj fab ywj fwj, txiav kev sib raug zoo nrog cov kwv tij thiab cov nkauj muam, thiab ploj kev sib hu. Yog muaj ib tug neeg uas yuav qhia txoj moo zoo rau uas muaj kev sib raug zoo nrog lawv thiab koj xav hu lawv es qhia txoj moo zoo rau tus neeg ntawd, koj twb hu tsis tau lawv. Tsis yog lawv tsuas txiav kev sib raug zoo nrog pawg ntseeg xwb tiam sis kuj txiav kev ua phooj ywg nrog qee tus neeg thiab. Qhov no puas yog lawv twb nthuav lawv tus kheej uas yog cov tsis ntseeg tawm lawm? (Yog.) Yog li ntawd pawg ntseeg yuav tsum ua li cas rau cov neeg zoo li no? (Ntsaig lawv tawm mus.) Peb puas tsim nyog muab ib lub cib fim rau lawv, to taub txog lawv txoj kev qaug zog thiab tej kev nyuaj hauv lawv lub neej, thiab txhawb thiab pab lawv ntau ntxiv kom lawv thiaj li ntseeg tau tias Vajtswv muaj nyob, pib nyiam qhov tseeb, thiab ua lub siab dawb paug muab lawv tus kheej fij rau Vajtswv? Puas tim tsum ua tes hauj lwm no? (Tsis tim tsum.) Vim li cas ho tsis tim tsum? (Vim cov neeg no tuaj ntawm no yeej tsis yog tuaj ntseeg Vajtswv kiag li.) Yog lawm, lawv tsis tau tuaj ntseeg Vajtswv; lawv lub hom phiaj yeej meej heev—lawv tuaj ntawm no tuaj nrhiav ib tug txhawb pab. Yog li ntawd, qhov sib qhia qhov tseeb nrog cov neeg zoo li no puas tau ib qho txiaj ntsig twg li? (Tsis tau.) Lawv mloog tsis nkag pob ntseg; lawv tsis saib qhov tseeb muaj nqis, tsis tim tsum qhov tseeb, thiab tsis nyiam qhov tseeb ntawd.

Peb tsim nyog piav li cas txog cov uas ntseeg Vajtswv tsuas yog txhawm rau nrhiav ib tug txhawb pab xwb? Qhov ntawd yeej tsim nyog heev uas yuav piav txog lawv tias yog cov tib neeg uas muab lawv tus kheej tej txiaj ntsim tso ua ntej txhua yam. Tsuav yog lawv pom tias ib tug neeg twg muaj txiaj ntsig thiab muaj yam zoo rau lawv xwb, lawv yuav ua txhua yam uas tus neeg ntawd thov; lawv haj tseem yuav ua raws li txhua yam lus txib uas tus neeg ntawd hais thiab. Lawv muab lawv tus kheej tej txiaj ntsim tso ua ntej txhua yam; tsuav yog ib yam dab tsi muaj txiaj ntsim rau lawv xwb, ces yeej tau lawm. Yog koj qhia lawv tias kev ntseeg Vajtswv yuav tau koob hmoov thiab txiaj ntsim, lawv yeej yuav ntseeg Nws thiab ua txhua yam uas koj hais kom lawv ua. Tsuav yog koj lub peev xwm saib xyuas tej xwm txheej hauv zej zog ua tau raws li lawv tej kev cheem tsum thiab ua rau lawv tau txais txiaj ntsim xwb, lawv yeej yuav nrog koj ua phooj ywg. Txawm li cas los xij, qhov uas lawv nrog koj ua phooj ywg ntawd tsis tau txhais hais tias lawv tuaj yeem ua lub siab dawb paug ntseeg Vajtswv, thiab tsis tau txhais hais tias lawv yuav ua lub siab dawb paug muab lawv tus kheej fij rau Vajtswv ib yam li koj ua. Tab txawm lawv yuav haum nrog koj zoo thiab nej yuav muaj kev sib raug zoo uas zoo tshwj xeeb los, qhov ntawd tsis tau txhais hais tias nej yeej yuav hais lus sib haum, taug tib txoj kev, los sis caum tib yam. Yog li ntawd, koj yuav tsum tsis txhob raug cov tib neeg zoo li no coj mus yuam kev. Cov tib neeg no txawj ntxias thiab muaj tswv yim rau kev nrog lwm tus ua phooj ywg. Lawv lub hom phiaj rau kev ntseeg Vajtswv yog nrhiav ib tug txhawb pab, tsis yog txhawm rau caum qhov tseeb thiab kom raug cawm dim. Qhov no qhia tau tias lawv tus cwj pwm ua neeg qis thiab tsaus ntuj npaum li cas! Lawv tuaj rau hauv pawg ntseeg tuaj nrhiav cov tib neeg uas lawv tuaj yeem siv tau, nrhiav tswv yim kom tau txais ntau yam txiaj ntsim rau lawv tus kheej. Qhov no puas yog txhais tau tias cov tib neeg zoo li no muaj peev xwm ua txhua yam yam tsis quav ntsej dab tsi thiab ua txhua yam uas tsis paub txaj muag? (Yog.) Tsuas yog los ntawm qhov tias lawv lub hom phiaj rau kev ntseeg Vajtswv yog nrhiav ib tug txhawb pab thiab nrhiav kev ua neej xwb, yeej pom tau meej tias cov tib neeg no tsis yog ib yam zoo kiag li, thiab lawv muaj tus cwj pwm ua neeg qis, twm xeeb, ntxim ntxub, thiab qias neeg, ua neej nyob hauv txoj kev tsaus ntuj loj heev. Yog li ntawd, lub hauv paus ntsiab lus ntawm pawg ntseeg rau txoj kev daws lawv kuj yog los paub cais lawv thiab tom qab ntawd muab lawv ntsaig tawm mus los sis ntiab tawm mus thiab. Kiag thaum koj paub cais tias lawv tsis yog cov neeg ntseeg tiag tiag, tias lawv tuaj rau hauv pawg ntseeg tuaj nrhiav ib txoj kev tawm thiab nrhiav kom tus kheej tau txiaj ntsim dawb, xav siv cov kwv tij thiab cov nkauj muam los saib xyuas tej hauj lwm thiab ua dej num txhawb rau lawv, yog li ntawd, nyob rau hauv cov xwm txheej zoo li no, cov thawj coj thiab cov neeg ua hauj lwm nrog rau cov kwv tij thiab cov nkauj muam yuav tsum daws qhov xwm txheej ntawd kom ncav sij hawm thiab kom yog. Yam tsis ua rau muaj kev phom sij rau pawg ntseeg los sis cov kwv tij thiab cov nkauj muam txoj kev nyab xeeb, ces muab lawv ntsaig tawm mus los sis ntiab tawm mus kom ntxov thiab sai li sai tau. Yuav tsum tsis txhob cia lawv nkaum nyob hauv cov kwv tij thiab cov nkauj muam ntxiv mus. Lawv tsis yog cov uas Vajtswv yuav cawm. Thaum cov tib neeg zoo li no nkaum nyob hauv nej, lawv pheej ntsia ntsoov txhua tus nrog lub qhov muag ntshaw thiab xyuas ntsoov saib seb leej twg muaj nqis rau lawv siv. Lawv pheej xam ntsoov seb puas muaj cov tib neeg hauv pawg ntseeg uas lawv tuaj yeem siv tau—leej twg muaj txheeb ze ua hauj lwm hauv tsev kho mob, leej twg paub kho mob los sis muaj tej txuj tshuaj zoo zais cia, leej twg yuav tau khoom ntawm tus nqi lag luam loj tom khw, tus kwv tij twg tsev neeg muaj chaw muag tsheb, leej twg tuaj yeem yuav tau tsev ntawm tus nqi sab hauv—lawv tshwj xeeb tshawb xyuas txog tej yam no. Cov tib neeg no xam tau ntxaws heev! Txawm yog tej yam me me xwb los yeej xam, thiab lawv kuj xav tswv yim phem rau cov kwv tij thiab cov nkauj muam, thiab nrhiav kev kom tau qhov zoo los ntawm cov kwv tij thiab cov nkauj muam ntawd thiab. Lawv tshawb xyuas txog txhua tus qhov keeb kwm tsev neeg thiab ceev txhua tus nyob hauv lawv tej kev xam thiab tej tswv yim phem. Thaum sib cuag mus los nrog cov tib neeg zoo li no, nej lub siab puas muaj kev kaj siab? (Tsis muaj.) Yog tsis muaj kev kaj siab yuav tsum ua li cas? Nej yuav tsum ceev faj txog cov tib neeg zoo li no. Cov tib neeg no ntseeg Vajtswv muaj lwm txoj kev npaj siab; lawv tuaj rau ntawm no tsis yog tuaj caum qhov tseeb los sis caum kev cawm dim, tiam sis los nrhiav ib tug txhawb pab, kev ua neej, thiab ib txoj kev tawm rau lawv tus kheej xwb. Cov tib neeg zoo li no tshwj xeeb mas twm xeeb, qias, thiab lim hiam. Lawv tsis ua tes dej num twg los sis muab lawv tus kheej fij rau Vajtswv li. Thaum pawg ntseeg tim tsum lawv ua ib yam dab tsi, yeej nrhiav tsis tau lawv qhov twg li, tiam sis lawv rov tshwm los thaum qhov ntawd dhau mus lawm. Cov tib neeg no tsuas paub nrhiav kom tau txiaj ntsim dawb rau tus kheej xwb, thiab tsis muaj txiaj ntsig dab tsi uas yuav cia lawv nyob hauv pawg ntseeg; yuav tsum tau siv ntau txoj kev los tshem lawv tawm mus kom sai li sai tau. Ib txhia neeg hais tias, “Puas tim tsum siv ntau txoj kev los daws ib tug neeg tiag tiag?” Nyob hauv pawg ntseeg muaj txhua hom tib neeg; ntau tus ntawm lawv ntseeg Vajtswv tsuas yog txhawm rau nrhiav ib tug txhawb pab thiab ib txoj kev tawm, kom tau txais tej koob hmoov, los sis txhawm rau zam tej kev puas tsuaj xwb. Tsuas yog qhov hnyav ntawm cov kev npaj siab no thiaj li sib txawv xwb; ib txhia neeg qhia tawm txog ib hom kev coj, hos lwm tus qhia tawm txog lwm hom. Yog li ntawd, cov tib neeg uas sib txawv yuav tsum tau daws kom sib txawv; tsuas yog qhov no xwb thiaj li mus raws li tej hauv paus ntsiab lus. Hais txog cov tsis ntseeg uas nrhiav ib tug txhawb pab no, yuav tsum tau tshem lawv tawm mus kom ncav sij hawm. Tsis txhob cia lawv tuaj noj dawb hauv pawg ntseeg. Lawv thov cov kwv tij thiab cov nkauj muam los saib xyuas tej xwm txheej rau lawv—vim qhov tseeb tiag tsuas tim tsum siv zog me ntsis los pab lawv saib xyuas tej xwm txheej xwb, ua cas thiaj li tsis kam muab txoj kev pab me me li no rau lawv? Qhov ib yog qhov tias, qhov tseem ceeb, cov tib neeg no tsis yog cov neeg ntseeg tiag tiag; lawv yeej yog kiag cov tsis ntseeg ntag. Qhov ob yog qhov tias cov tib neeg no tsis tuaj yeem hloov los ntawm qhov tsis ntseeg mus ua cov ntseeg tiag tiag tau. Lawv tsis yog cov uas Vajtswv tau teem tseg thiab xaiv tseg; lawv tsis yog cov uas Vajtswv yuav cawm—tiam sis, lawv yog cov neeg ua phem uas lam nkag los rau hauv pawg ntseeg. Qhov peb yog qhov tias cov tib neeg no khiav mus los txhua qhov chaw hauv pawg ntseeg, txawm yog qhov teeb meem uas lawv ntsib yuav loj npaum li cas los, lawv pheej nrhiav kev pab los ntawm cov kwv tij thiab cov nkauj muam, uas ua rau thab cov kwv tij thiab cov nkauj muam yam tsis pom thiab tib lub sij hawm ntawd kuj tsim muaj ib qho xwm txheej uas tsis zoo heev nyob hauv pawg ntseeg uas ua phem rau txhua tus. Yog li ntawd, qhov zoo tshaj plaws yog yuav tsum muab cov dab uas ntseeg Vajtswv tsuas yog txhawm rau nrhiav ib tug txhawb pab no tshem tawm mus kom sai li sai tau. Yog nej tseem tsis tau paub cais lawv los sis paub txog tias lawv yog hom tib neeg zoo li no, nej tuaj yeem cia lawv nyob soj ntsuam lawv. Kiag thaum nej paub cais thiab pom tshab tias lawv yog ib feem ntawm ntau hom tib neeg phem uas Vajtswv lub tsev yuav muab ntsaig tawm mus, ces tsis txhob ua ywj fab ywj fwj los sis ua siab mos siab muag rau lawv lawm. Tom qab sib tham nrog txhua tus thiab pom zoo ua ke lawm, nej tuaj yeem ntsaig lawv tawm mus tau. Yog cov thawj coj thiab cov neeg ua hauj lwm hauv pawg ntseeg tsis quav ntsej txog qhov no, tsuav yog cov kwv tij thiab cov nkauj muam feem coob paub tseeb tias lawv yog hom uas ntseeg Vajtswv tsuas yog txhawm rau nrhiav ib tug txhawb pab thiab ib txoj kev tawm xwb, nej muaj cai ntsaig lawv tawm mus ncaj qha yam tsis tas dhau los ntawm cov thawj coj cuav. Qhov ua li no yeej yog lawm thiab haum raws li qhov tseeb tej hauv paus ntsiab lus. Qhov ntawd yog nej txoj kev muaj cai, nej txoj num, nej lub luag hauj lwm; qhov ntawd yog txhawm rau tiv thaiv nej tus kheej. Muaj tseeb tiag, thaum cov kwv tij thiab cov nkauj muam uas yog cov ntseeg tiag tiag ntsib tej kev nyuaj, peb muaj lub luag hauj lwm thiab txoj num los siv zog pab lawv kom kawg li peb tej peev xwm, txawm yog kev pab thiab kev txhawb uas muaj lub siab hlub, los sis los ntawm kev pab txog khoom siv. Qhov no yog txoj kev hlub nyob hauv cov kwv tij thiab cov nkauj muam, txoj kev hlub ntawm cov uas ntseeg Vajtswv. Txawm li cas los xij, peb tsis muaj lub luag hauj lwm los sis txoj num los pab cov tsis ntseeg, vim lawv tsis yog cov kwv tij thiab cov nkauj muam thiab tsis tsim nyog tau txais txoj hmoov hlub no los sis txoj kev pab zoo li no. Qhov no yog txoj kev coj rau tib neeg raws li tej hauv paus ntsiab lus. Peb txoj kev sib qhia txog lub hom phiaj xya rau kev ntseeg Vajtswv xaus rau ntawm no. Tsis tim tsum muab tej piv txwv uas ntxaws ntxaws ntxiv txog cov hom tib neeg zoo li no lawm. Muab hais luv luv tias, leej twg uas lub hom phiaj rau kev ntseeg Vajtswv yog nrhiav ib tug txhawb pab ces tus ntawd yog tus uas yuav tsum tau ntsaig tawm mus los sis ntiab tawm ntawm pawg ntseeg mus. Kiag thaum cov thawj coj thiab cov neeg ua hauj lwm paub cais tias muaj cov tib neeg zoo li no nyob hauv pawg ntseeg, lawv yuav tsum ntsaig cov tib neeg ntawd tawm mus kom sai li sai tau. Nrhiav pom ib tug ces ntsaig tawm mus ib tug, tsis txhob tseg ib tug twg li. Yog cov kwv tij thiab cov nkauj muam feem coob twb raug thab mus txog theem uas xav tias tsis paub yuav ua li cas thiab thev tsis taus ntxiv lawm, thiab cov thawj coj thiab cov neeg ua hauj lwm tseem tiv thaiv lawv los ntawm qhov hais tias, “Lawv muaj tej kev nyuaj; peb yuav tsum pab lawv,” yog li ntawd yuav tsum qhia rau cov thawj coj zoo li no tias: “Lawv tsis yog cov neeg ntseeg Vajtswv tiag tiag kiag li. Lawv tsis quav ntsej leej twg uas sib qhia Vajtswv cov lus nrog lawv thiab tsis kam ua lawv tes dej num thaum hais kom ua. Lawv yeej tsis muaj lub siab xav muab lawv tus kheej fij rau Vajtswv kiag li, thiab lawv tsuas xav siv cov kwv tij thiab cov nkauj muam los saib xyuas lawv tej xwm txheej xwb. Peb tsis muaj lub luag hauj lwm los sis txoj num los pab cov tsis ntseeg zoo li no!” Txawm yog tus thawj coj pawg ntseeg yuav tsis pom zoo los, nej muaj cai los koom ua ke nrog cov neeg feem coob los ntsaig lawv tawm ntawm pawg ntseeg mus. Yog tus thawj coj pawg ntseeg tseem tsis pom zoo txog rau sij hawm no, ces qhia qhov ntawd tawm mus rau theem saud; muab tus thawj coj no cais tawm thiab cia lawv thim xav. Nej tuaj yeem lees txais lawv txoj kev coj dua thaum lawv pom zoo lawm. Yog lawv tseem tsis pom zoo ntxiv mus, nej tuaj yeem rho lawv tawm thiab rov xaiv ib tug thawj coj tshiab.

H. Caum Tej Phiaj Xwm ntawm Sab Kev Nom Kev Tswv

Txuas ntxiv, peb yuav sib qhia txog lub hom phiaj yim: kev ntseeg Vajtswv uas muaj tej hom phiaj thiab phiaj xwm ntawm sab kev nom kev tswv. Qhov uas cov tib neeg zoo li no yuav tshwm los mas tsis tshua muaj ntau, tiam sis txawm yuav muaj tsawg npaum li cas los xij, tsuav yog muaj feem uas cov tib neeg no yuav tshwm sim los xwb, peb yuav tsum teev lawv cov piv txwv tawm los, thiab nthuav tawm, sib qhia, thiab txiav txim rau lawv. Peb yuav tsum ua li no kom txhua tus thiaj li muaj kev paub cais txog lawv, thiab tom qab ntawd muab lawv ntsaig tawm mus kom sai li sai tau, kom tiv thaiv tsis txhob coj teeb meem thiab kev phom sij los rau pawg ntseeg thiab cov kwv tij thiab cov nkauj muam. Qhov uas ua li no yog txhawm rau tiv thaiv pawg ntseeg thiab cov kwv tij thiab cov nkauj muam. Yog li ntawd, cov ntseeg Vajtswv uas muaj tej phiaj xwm ntawm sab kev nom kev tswv yog cov tib neeg uas peb yuav tsum paub cais thiab ceev faj txog, thiab lawv kuj yog cov tib neeg phem uas pawg ntseeg yuav tsum muab ntsaig tawm mus kom sai li sai tau. Tej kev qhia tshwm ntawm cov uas muaj tej phiaj xwm ntawm sab kev nom kev tswv yog dab tsi? Lawv yuav tsis hais lawv tej kev xav tiag tiag rau koj. Lawv yuav tsis hais meej meej tias, “Kuv yeej nyiam txog kev nom kev tswv, kuv nyiam koom nrog kev nom kev tswv, yog li ntawd kuv ntseeg Vajtswv vim muaj tej phiaj xwm thiab hom phiaj ntawm sab kev nom kev tswv, es tsis yog vim lwm yam laj thawj. Nej yuav ua li cas rau kuv raws li qhov tsim nyog los yeej tau.” Lawv puas yuav hais li no? (Tsis hais.) Yog li ntawd, lawv muaj tej kev qhia tshwm dab tsi uas ua rau koj paub cais tias lawv muaj tej phiaj xwm ntawm sab kev nom kev tswv? Qhov ntawd yog, lawv hais cov lus dab tsi, lawv ua tej yam dab tsi, lawv muaj lub ntsej muag li cas, lawv ob lub qhov muag saib li cas, thiab lawv lub suab hais lus li cas thiaj li txaus rau koj paub tseeb tias lawv lub hom phiaj ntawm kev ntseeg Vajtswv tsis dawb paug? Txawm lawv yuav hais los sis ua dab tsi los xij, lawv zais tej yam hauv lawv lub siab, thiab tsis muaj leej twg paub tshab tej ntawd. Lawv muaj qhov yog leej twg tiag tiag thiab keeb kwm uas tshwj xeeb; los ntawm lawv cov lus hais thiab kev coj yeej pom tau tias lawv muaj tej tswv yim phem thiab kev npaj zais phem, thiab lawv txoj kev hais lus thiab ua tej yam yeej muaj tswv yim. Thaum lawv hais lus, cov neeg dog dig yeej to taub tsis tau lawv tej kev npaj siab los sis tej kev xav tiag tiag, thiab tsis paub tias vim li cas lawv thiaj li hais tej yam ntawd. Txawm yog saib sab nraud cov neeg no tsis qhia tawm txog kev ua yeeb ncuab los sis kev txiav txim rau kev ntseeg Vajtswv los sis kev sib qhia qhov tseeb, thiab tej zaum tseem nthuav tawm tias lawv nyiam tej no me ntsis los, koj yeej xav tias lawv txawv txawv li—lawv tsis zoo li lwm cov kwv tij thiab cov nkauj muam thiab to taub tsis tshab me ntsis. Koj ib txwm ua li cas rau cov neeg uas nyuaj to taub tshab me ntsis no? Koj tsuas ceev faj txog lawv yam yooj yim xwb lod? Los sis pib tshuaj xyuas lawv thiab nrhiav seb qhov tseeb ntawm lawv yog li cas tiag tiag? (Peb tsim nyog soj ntsuam lawv.) Txawm ib tug neeg twg yuav ua dab tsi los xij, lawv lub hom phiaj thiab phiaj xwm mas feem ntau yeej tsis yooj yim muab nthuav tawm nyob rau hauv ib lub sij hawm luv luv. Tiam sis thaum lub sij hawm dhau mus ntev dua—tshwj tsis yog lawv yeej tsis ua dab tsi kiag li—kiag thaum lawv nqis tes ua, lawv yeej yuav nthuav tawm lawv tus kheej tiag tiag. Nej soj ntsuam thiab nrhiav tej cim los ntawm tej yam me me—nej tuaj yeem nrhiav tau qee yam xov xwm thiab tej cim los ntawm lawv cov lus hais thiab kev coj, los ntawm txoj kev npaj siab thiab txoj hau kev uas lawv ua, thiab los ntawm cov lus thiab lub suab uas lawv siv thaum hais lus. Qhov uas muaj peev xwm ua tau li no yog nyob ntawm seb koj puas yog tus neeg ua tib zoo saib thiab seb koj puas muaj kev ntse thiab lub peev xwm txog ib theem twg. Ib txhia neeg ruam yeej tsis muaj peev xwm paub txog txoj kev phom sij thiab tej kev lim hiam uas muaj nyob hauv tib neeg lub zej zog; txawm lawv yuav ntsib leej twg los xij, lawv ib txwm siv tib txoj kev los nrog cov neeg ntawd sib cuag mus los. Yog li ntawd, thaum lawv ntsib cov nom tswv uas txawj ntxias thiab muaj tswv yim zais uas muaj tej phiaj xwm ntawm sab kev nom kev tswv ntawd, lawv thiaj li yooj yim dhau los ua cov Yudas thiab ua cov cuab yeej los muab pawg ntseeg muag tawm, thiab ua tej yam ruam uas coj kev puas tsuaj los rau pawg ntseeg yam tsis paub li.

Cov neeg uas muaj tej phiaj xwm ntawm sab kev nom kev tswv no muaj tej kev qhia tshwm dab tsi tiag tiag? Cov neeg no muaj ib qho keeb kwm hauv lub zej zog txog ib theem twg; lawv yog cov neeg uas koom ua ke nrog cov neeg ua nom ua tswv. Txawm lawv lub meej mom nyob hauv cov pab pawg neeg ua nom ua tswv yuav yog dab tsi los xij, txawm lawv yog nom tswv, ua tej hauj lwm dog dig, los sis tab tom npaj nrhiav chaw sawv hauv pab pawg ua nom ua tswv ntawd los xij, muab hais luv luv tias, cov neeg no muaj ib qho keeb kwm ntawm sab kev nom kev tswv hauv lub zej zog; qhov no yog ib qhov xwm txheej uas cov nyom thiab tshwj xeeb. Txawm cov neeg no puas ntseeg tias Vajtswv muaj nyob los xij, yog saib raws li tej yam uas lawv caum, tej kev uas lawv taug, thiab lawv tus yam ntxwv xeeb txawm lub ntsiab tseeb, cov neeg no puas tuaj yeem dhau los ua cov neeg uas ua lub siab dawb paug ntseeg Vajtswv? Lawv hloov puas tau los ntawm cov tsis ntseeg, los ntawm kev ua cov neeg ua nom ua tswv uas kub siab rau kev nom kev tswv, los ua cov neeg uas ua lub siab dawb paug ntseeg Vajtswv? (Tsis tau.) Nej puas paub tseeb? Los sis puas muaj txoj kev ua tau? (Yeej ua tsis tau kiag li.) Yeej tsis muaj txoj kev ua tau kiag li. Kev ntseeg Vajtswv thiab kev nom kev tswv yog ob txoj kev uas sib txawv; ob txoj kev no mus rau ob sab uas sib txawv, tsis muaj dab tsi zoo sib xws, thiab yeej yuav sib tshuam tsis tau kiag li. Tej ntawd yog ob txoj kev sib cais uas sib txawv kiag. Yog li ntawd, cov uas muaj tej phiaj xwm ntawm sab kev nom kev tswv los sis nyiam thiab kub siab lug rau kev nom kev tswv, lawv ntseeg Vajtswv txawm tsis qhia tawm meej txog tej hom phiaj ntawm sab kev nom kev tswv los, lawv yeej tseem muaj lwm cov hom phiaj; thiab yeej muaj tseeb tias lawv lub hom phiaj tsis yog txhawm rau kom tau txais qhov tseeb los sis raug cawm dim. Yam tsawg kawg nkaus, tuaj yeem txiav txim tau tias lawv tsis muaj lub siab dawb paug ntseeg Vajtswv. Lawv tsuas lees paub txog tej lus dab neeg uas hais tias muaj ib tug Vajtswv tiam sis tsis lees paub txog Vajtswv txoj kev muaj nyob los sis qhov muaj tseeb tias Vajtswv muaj hwj chim kav txhua yam. Yog li ntawd, cov neeg no yeej yuav tsis muaj hnub hloov los ntawm cov tsis ntseeg uas kub siab lug rau kev nom kev tswv los ua cov ntseeg tiag tiag uas ntseeg tias Vajtswv muaj nyob, lees txais tau Vajtswv tes hauj lwm, thiab lees txais Vajtswv txoj kev txiav txim thiab kev rau txim.

Cov tsis ntseeg uas muaj tej phiaj xwm ntawm sab kev nom kev tswv no muaj lub hom phiaj dab tsi tiag tiag rau kev ntseeg Vajtswv? Qhov no muaj feem xyuam txog tej yam uas lawv caum thiab tej hauj lwm uas lawv ua. Piv txwv li, ib txhia neeg pheej muaj qee yam kev cheem tsum rau lawv tus kheej nyob rau hauv pab pawg neeg ua nom ua tswv ntawd, uas muaj tej hom phiaj thiab tej kev ntshaw uas loj ntawm sab kev nom kev tswv, thiab lwm yam ntxiv, uas—tsis hais yuav yog dab tsi los xij—puav leej muaj feem xyuam txog kev nom kev tswv. “Kev nom kev tswv” txhais li cas? Hais kom yooj yim mas, qhov ntawd muaj feem xyuam txog tsoom fwv, hwj chim, thiab kev tswj hwm. Yog li ntawd, lawv txoj kev ntseeg Vajtswv uas muaj tej phiaj xwm ntawm sab kev nom kev tswv yeej muaj feem xyuam txog tej yam uas lawv caum ntawm sab kev nom kev tswv. Yog li ntawd lawv tej phiaj xwm yog dab tsi? Vim li cas lawv thiaj li cia li nyiam cov neeg hauv pawg ntseeg? Lawv xav siv lub koom haum uas yog pawg ntseeg, cov neeg coob coob hauv pawg ntseeg, thiab lub zog ntawm cov neeg hauv pawg ntseeg uas tuaj ntawm ntau yam hauj lwm thiab ntau theem neeg hauv lub zej zog tuaj, los ua kom tiav lawv tej hom phiaj. Tom qab kawm paub txog pawg ntseeg tej kev qhia, kev ua ntau yam hauj lwm hauv pawg ntseeg, txoj kev uas cov neeg Vajtswv xaiv tseg ua lub neej hauv pawg ntseeg, kev xyaum ua raws ntawm tes dej num, thiab lwm yam ntxiv, lawv thiaj li sim muab lawv tus kheej tso rau hauv tej ntawd. Lawv nco ntsoov rau hauv siab txog tej lus ntawm sab ntsujplig thiab ntau yam lus hais uas cov neeg Vajtswv xaiv tseg nquag siv hauv kev sib qhia, nrog txoj kev cia siab tias muaj ib hnub lawv tuaj yeem siv tej no los hu txhua tus kom mloog lawv hais, kom raug lawv siv, es ua kom tau tiav lawv tej hom phiaj ntawm sab kev nom kev tswv. Ib yam li qhov uas cov ib txwm tsis ntseeg hais tias, tom qab npaj zais ntshis los tau ib ntus sij hawm lawm, thaum lawv tsa tau chij thiab hu neeg tuaj sawv tawm tsam, ces yuav muaj neeg coob dua tuaj ua li lawv hais thiab raws lawv qab, kom lawv thiaj li tau txais ib feem neeg hauv pawg ntseeg los ua lawv lub zog los tawm tsam lawv cov neeg sib tw. Tej yam zoo li no tau tshwm sim ob peb zaug nyob hauv Teb Chaws Suav li keeb kwm tsis ntev los no. Piv txwv li, Kev Tawm Tsam ntawm Pab Pawg Paj Dawb thiab Kev Tawm Tsam Thaij Phiv nyob rau Tiam Tshib Tshauv yog tej xwm txheej uas cov neeg uas muaj tej phiaj xwm ntawm sab kev nom kev tswv siv sab kab lis kev cai ntseeg los tawm tsam tsoom fwv. Tej kev qhia ntawm lawv cov kab lis kev cai ntseeg tau tawm ntawm txoj hau kev tseeb thiab muaj ntau yam uas yuam kev tsis muaj tseeb thiab tsis muaj qab hau uas yeej tsis haum raws li qhov tseeb kiag li. Cov uas muaj tej phiaj xwm ntawm sab kev nom kev tswv tau siv tej kev qhia zoo li no los ua kom tib neeg lub siab xav ua ib yam, khi lawv lub siab xav, thiab puab thiab ntxuav lawv lub siab xav. Thaum kawg, lawv thiaj li siv cov neeg uas raug ntxuav hlwb no los ua kom lawv tej hom phiaj ntawm sab kev nom kev tswv tiav. Txij thaum pib, thaum cov neeg uas muaj tej phiaj xwm ntawm sab kev nom kev tswv no los ntseeg Vajtswv, yam uas lawv nyiam yog pawg ntseeg lub npe. Qhov ntawd yog, lawv tuaj yeem zais qhov lawv yog leej twg thiab lawv tej phiaj xwm nyob hauv qab lub npe ntawm lub koom haum uas yog pawg ntseeg—qhov no yog ib kis. Lwm kis mas yog lawv xav tias tsuav yog lawv tso tawm lawv tej kev xam pom ntawm sab kev nom kev tswv nyob hauv qab lub npe ntawm kev ntseeg Vajtswv xwb, qhov ntawd yuav yooj yim heev los qhia thiab ntxuav cov neeg hauv pawg ntseeg hlwb, thiab tias cov neeg no yooj yim pe hawm thiab mloog cov neeg muaj suab npe hais. Yog li ntawd, cov neeg uas muaj tej phiaj xwm ntawm sab kev nom kev tswv no thiaj li nyiam saib cov neeg hauv pawg ntseeg ua cov khoom uas lawv siv tau. Lawv ntseeg tias qhov ntawd yooj yim heev rau pawg ntseeg dhau los ua ib qho chaw uas lawv zais tau lawv qhov yog leej twg tiag tiag, thiab tias cov tswv cuab hauv pawg ntseeg yog cov khoom uas lawv siv tau yooj yim—hais kom yooj yim mas, lawv pom tej yam li no. Yog li ntawd, lawv lub hom phiaj ntawm kev koom nrog pawg ntseeg yog cia siab tias muaj ib hnub, thaum lawv tau txais hwj chim, lawv tuaj yeem tawm tsam lawv cov neeg sib tw ntawm sab kev nom kev tswv thiab tau lub hwj chim—qhov no yog lawv lub phiaj xwm ntawm sab kev nom kev tswv. Lawv xav siv lub npe ntawm kev ntseeg Vajtswv los nthuav cov neeg uas pe hawm thiab raws lawv qab kom dhau los ua ib feem hauv lawv lub zog ntawm sab kev nom kev tswv. Ib txhia neeg hais tias, “Tej zaum lawv muaj lub hom phiaj no, tiam sis yog lawv tsis nqis tes ua dab tsi, yam ntau kawg peb tsuas tuaj yeem pom tias lawv yog cov tsis ntseeg los sis cov ntseeg cuav xwb. Peb yuav ua li cas thiaj li pom tau tias lawv muaj tej hom phiaj ntawm sab kev nom kev tswv uas meej?” Qhov no tsis nyuaj. Tsuas siv sij hawm los ua tib zoo soj ntsuam xwb. Tsuav yog lawv muaj tej phiaj xwm ntawm sab kev nom kev tswv xwb, lawv yeej yuav nqis tes ua ntag. Yog lawv tsis xav nqis tes ua, vim li cas lawv thiaj li lam nkag los rau hauv pawg ntseeg? Yog lawv tseem tsis tau nqis tes ua, qhov ntawd yog vim lawv tseem tsis tau nrhiav tau lub cib fim. Kiag thaum lawv muaj lub cib fim, lawv yeej yuav nqis tes ua raws li ntawd. Piv txwv li, yog tsoom fwv tshaj tawm ib txoj cai uas yuam kev los sis tsuj nias thiab ntes cov neeg Vajtswv xaiv tseg, ntau kawg los cov kwv tij thiab cov nkauj muam tsuas sib tham thiab paub cais txog qhov no, thiab xaus li ntawd xwb. Txawm yuav yog li cas los xij, kev ntseeg Vajtswv, kev ua lawv tej dej num, thiab kev ua raws li Vajtswv lub siab nyiam yog qhov tseem ceeb. Lawv yuav tsis tso tes hauj lwm loj tseg vim yog tej teeb meem me me; lawv yuav ntseeg Vajtswv mus ntxiv thiab ua lawv tej dej num raws li qhov lawv tsim nyog ua, ib yam li ib txwm ua. Txawm li cas los xij, cov neeg uas muaj tej hom phiaj ntawm sab kev nom kev tswv mas txawv. Lawv yuav muab qhov teeb meem no ua ib qho loj, nthuav tawm thiab tshaj tawm qhov ntawd mus thoob plaws, thiab xav heev kom ntxias tau txhua tus tib neeg sawv los tawm tsam tsoom fwv kom ua dej num txhawb rau lawv tus kheej tej phiaj xwm ntawm sab kev nom kev tswv, thiab lawv yeej yuav tsis tso tseg kom txog thaum lawv ua tau raws li lawv tej hom phiaj. Txhawm rau koom nrog kev nom kev tswv, lawv muab tej yam ntawm kev ntseeg Vajtswv thiab kev ua lawv tej dej num tso tseg tag nrho, thiab tsis quav ntsej txog tej uas Vajtswv cheem tsum ntawm tib neeg thiab Vajtswv tej kev npaj siab. Lawv twb vwm mus txog theem no lawm—tib neeg tseem paub cais tsis tau lawv lod? Cov neeg zoo li no yog raws Vajtswv qab los sis raws kev nom kev tswv qab? Ib txhia neeg uas tsis muaj kev paub cais mas yooj yim raug coj mus yuam kev. Cov neeg uas koom nrog kev nom kev tswv no tsis paub tias qhov tseeb yog dab tsi, haj yam tsis to taub tias Vajtswv tes hauj lwm yog los ntxuav tib neeg tej moj yam qias vuab tsuab kom dawb huv thiab cawm lawv dim ntawm Ntxwgnyoog lub zog. Lawv xav tias kev koom nrog leej tib neeg txoj cai thiab kev nom kev tswv ntawd txhais tau tias paub txog kev ncaj ncees thiab zwm rau Vajtswv. Kev koom nrog kev nom kev tswv thiab leej tib neeg txoj cai ntawd puas sawv cev tias ib tug neeg muaj qhov tseeb qhov muaj tiag? Qhov ntawd puas sawv cev tias ib tug neeg zwm rau Vajtswv? Txawm koj yuav ua tau zoo npaum li cas rau leej tib neeg txoj cai thiab kev nom kev tswv los xij, qhov ntawd puas sawv cev tias koj tus moj yam qias vuab tsuab tau txais kev ntxuav kom dawb huv lawm? Qhov ntawd puas sawv cev tias koj tej kev xav ua heev thiab kev ntshaw heev uas xav tuav hwj chim ntawd raug ntxuav kom dawb huv lawm? Ntau tus tib neeg yeej pom tsis tshab txog tej teeb meem no. Raws li tau hnov mas, Xoo Yo-see kuj yog ib tug Ntseeg Vajtswv thiab. Thaum nws nyob hauv kev phom sij, nws tau thov kom Vajtswv cawm nws. Nws siv tag nrho nws lub neej los koom nrog kev tawm tsam txhawm rau kev hloov tshiab—nws puas tau txais Vajtswv txoj kev pom zoo? Nws puas yog ib tug neeg uas ua raws li qhov tseeb thiab zwm rau Vajtswv? Nws puas muaj cov lus tim khawv uas hais txog txoj kev ntsib kev pom ntawm kev ua raws li Vajtswv cov lus? Nws yeej tsis muaj tej no kiag li. Tom qab Povlauj raug hu lawm, nws yeej tshaj tawm txoj moo zoo tas li thiab tiv ntau yam kev txom nyem, tiam sis vim nws tsis tau hloov dua siab tshiab tiag tiag, tsis muaj txoj kev nkag mus rau hauv lub neej txoj sia, pheej ua tej kev txhaum qub, tsa thiab ua tim khawv rau nws tus kheej nyob rau txhua lub cib fim, nws thiaj li dhau los ua ib tug tawm tsam khetos thiab raug kev rau txim. Txawm yuav yog li cas los xij, kev ntseeg Vajtswv yam tsis lees txais qhov tseeb, pheej caum lub koob meej thiab lub meej mom, thiab qhov pheej xav ua ib tug neeg tshwj xeeb los sis ib tug neeg loj yog ib yam uas phom sij heev. Txhua tus uas muaj tej phiaj xwm ntawm sab kev nom kev tswv puav leej yog cov tawm tsam khetos. Cov neeg no yuav tsis tso tseg yooj yim ntawm kev ua kom tiav lawv tej kev ntshaw ntawm sab kev nom kev tswv thiab yuav ib txwm nrhiav cib fim los ntxias thiab rub cov ntseeg los ua lawv lub zog ntawm sab kev nom kev tswv. Yog muaj ib hnub lawv pom tias cov ntseeg tsis yooj yim raug siv, tias cov neeg ntseeg tsuas nyiam thiab caum qhov tseeb xwb, thiab lawv tsuas raws Khetos qab es tsis raws tib neeg qab, tsuas yog thaum ntawd xwb lawv thiaj li yuav tso cov ntseeg no tseg kiag.

Nyob ntawm lub hauv paus, cov neeg uas muaj tej phiaj xwm ntawm sab kev nom kev tswv mas lawv lub hlwb tsuas xav txog tej yam uas muaj feem xyuam txog kev nom kev tswv xwb—lub hwj chim thiab lub zog, kev tswj hwm, kev npaj phem, tej tswv yim ntawm sab kev nom kev tswv, thiab lwm yam ntxiv. Lawv tsis to taub tias kev ntseeg Vajtswv yog dab tsi, tsis to taub tias kev ntseeg yog dab tsi, tsis to taub tias qhov tseeb yog dab tsi, los sis haj yam tsis to taub tias yuav zwm rau Vajtswv li cas. Lawv kuj tsis to taub tias lub Ntuj lub siab nyiam yog dab tsi thiab. Lawv tej cai uas ua neej nyob yog “Tib neeg yuav kov yeej lub ntuj” thiab “Ib tug neeg txoj hmoo yog nyob hauv lawv tus kheej ob txhais tes.” Yog li ntawd, qhov kev sim hloov cov neeg zoo li no yeej ua tsis tau li thiab yog ib lub tswv yim uas ruam. Cov neeg no nquag tshaj tawm tej kev xam pom ntawm sab kev nom kev tswv nyob hauv cov kwv tij thiab cov nkauj muam hauv pawg ntseeg, ntxias kom lawv koom nrog tej hauj lwm ntawm sab kev nom kev tswv thiab koom nrog kev nom kev tswv. Pom tau meej heev tias lawv lub hom phiaj ntawm kev ntseeg Vajtswv yog raug txhawb los ntawm tej phiaj xwm ntawm sab kev nom kev tswv. Lub ntsiab tseeb no lwm tus tuaj yeem paub cais tau sai thiab yooj yim. Cov neeg no yeej tsis paub dab tsi txog kev ntseeg, kev taug txoj hau kev tseeb, thiab kev zwm rau lub Ntuj lub siab nyiam kiag li—lawv ntseeg tias txawm ib tug neeg twg tej kev xav thiab tej kev taug yeej tuaj yeem hloov tau los ntawm kev siv tej tswv yim ntawm sab kev nom kev tswv, thiab tshwj xeeb lawv ntseeg tias ib tug neeg txoj hmoo hloov tau los ntawm tib neeg tej tswv yim thiab txoj hau kev. Yog li ntawd, hais txog tej yam uas tob tiam sis pom tau meej ntawm tej kev cai txog yam ib txwm xeeb txawm muaj uas Vajtswv tsim thiab Vajtswv kav tib neeg txoj hmoo; lawv yog cov neeg tsis paub thaum hais txog tej yam no thiab yeej tsis to taub kiag li, tsis paub dab tsi kiag li. Kuv hais li no txhais li cas? Yog koj nrhiav pom leej twg uas lawv lub hom phiaj ntawm kev ntseeg Vajtswv yog raug txhawb los ntawm tej phiaj xwm ntawm sab kev nom kev tswv, koj yuav tsum tsis txhob sim hloov los sis hais kom lawv mloog, thiab yeej tsis tim tsum sib qhia ntau yam qhov tseeb rau lawv. Dhau li ntawm qhov ceev faj txog lawv lawm, koj yuav tsum qhia rau cov thawj coj pawg ntseeg ntawm ntau theem los sis cov kwv tij thiab cov nkauj muam uas tso siab tau ntawd kom sai li sai tau, thiab tom qab ntawd nrhiav hau kev los ntiab lawv tawm ntawm pawg ntseeg mus. Koj yuav tsum tsis txhob ntsiag to thiab zais ntshis ceev faj txog lawv hos cia lwm tus tseem tsis paub dab tsi. Yog li ntawd, hom neeg zoo li cas thiaj li tuaj yeem muaj kev paub cais me ntsis txog cov uas nyiam tham txog kev nom kev tswv thiab muaj tej phiaj xwm ntawm sab kev nom kev tswv? Yog cov neeg laus dua los sis cov hluas dua? Yog cov kwv tij los sis cov nkauj muam? (Cov kwv tij uas laus dua.) Yog lawm; cov kwv tij uas laus dua, qhov ntawd yog, cov uas tau ntsib tau pom tej yam hauv lub zej zog, tau sib cuag txog sab kev nom kev tswv, los sis tau raug tsim txom ntawm sab kev nom kev tswv—cov neeg uas muaj kev pom txog tej yam no—tuaj yeem pom txog tej teeb meem ntawm sab kev nom kev tswv tau meej zog. Yeej muaj tseeb tiag, lawv muaj kev paub cais tau me ntsis rau cov uas koom nrog kev nom kev tswv, thiab tshwj xeeb mas lawv tuaj yeem pom txog cov neeg ntawd tej kev xav ua heev thiab tej kev ntshaw heev, nrog rau cov neeg ntawd tej kev xav, tej kev xam pom, tej kev npau suav, thiab tej kev ntshaw tau meej zog. Yog li ntawd, lawv tuaj yeem paub cais cov neeg no tau sai dua lwm tus. Kiag thaum ib tug neeg twg paub cais tias cov neeg no muaj tej phiaj xwm ntawm sab kev nom kev tswv thiab yog cov tsis ntseeg, lawv yuav tsum ceev faj txog cov neeg ntawd thiab nthuav tawm cov tsis ntseeg no. Tib lub sij hawm ntawd, lawv kuj yuav tsum tiv thaiv cov neeg ruam tsis paub dab tsi uas tsis to taub qhov tseeb thiab, tiv thaiv kom lawv tsis txhob raug coj mus yuam kev thiab raug siv, thiab kom tsis txhob qhia qee yam xov xwm hauv pawg ntseeg tawm yam tsis txhob txwm. Yuav tsum ceeb toom rau cov thawj coj pawg ntseeg thiab sib tham txog qhov teeb meem no nrog lawv, thiab ceeb toom rau cov neeg laus dua coob ntxiv los sis cov uas to taub qee qhov tseeb thiab muaj theem ntawm sab ntsujplig me ntsis kom ceev faj txog cov neeg uas muaj tej phiaj xwm ntawm sab kev nom kev tswv no kom sai li sai tau. Yuav tsum pab lwm tus kom pom tau meej txog lub ntsiab tseeb ntawm cov neeg no tias yog cov tsis ntseeg, ua li ntawd thiaj li tiv thaiv tau cov kwv tij thiab cov nkauj muam uas ruam thiab tsis paub dab tsi kom tsis txhob raug cov tib neeg ntawd siv. Yog koj pom tsis tshab txog tej yam no thiab tsis muaj kev paub cais, thaum qee cov neeg phem, txawj ntxias, txawj dag los nrog koj tham thiab sib txuas lus, koj yuav txaus siab hlo qhia tag nrho txog koj qhov xwm txheej tiag tiag thiab txhua yam uas koj paub yam tsis tas lawv nug kiag li, es cia li dhau los ua ib tug Yudas yam tsis txhob txwm. Puas muaj cov neeg zoo li no? (Muaj.) Thaum koj hais lus, koj tsis paub tias lwm tus ntawd muaj lub hom phiaj dab tsi thiab koj saib lawv tam li ib tug kwv tij los sis ib tug nkauj muam, qhia txhua yam hauv koj lub siab rau lawv yam tsis paub txog—tom qab koj hais tag lawm, koj tsis paub tias yuav muaj dab tsi tshwm sim los. Thaum pom lwm tus ceev faj txog cov neeg zoo li no, koj hais tias, “Koj ceev faj dhau lawm. Muaj dab tsi zais nyob nruab nrab ntawm cov kwv tij thiab cov nkauj muam?” Koj tsis paub tias vim li cas lwm tus thiaj li tsis hais tawm—qhov no hu ua kev ruam.

Cov neeg uas muaj tej phiaj xwm ntawm sab kev nom kev tswv yeej yog cov tsis ntseeg thiab vim lawv tsis nyiam qhov tseeb thiab yuav tsis lees txais qhov tseeb. Tab txawm lawv yuav ntseeg Vajtswv los, lawv yeej nyob rau hauv pab pawg tib neeg phem uas yog cov tawm tsam khetos tag nrho. Qhov tseeb tiag txoj kev ceev faj txog cov neeg zoo li no yog txoj kev uas tsis xav nqis tes ua tshaj plaws. Txoj kev uas nqis tes ua yog nrhiav kom tau lawv kom ntxov, es saib xyuas thiab muab lawv ntiab tawm kom sai li sai tau, zam kom tsis txhob coj teeb meem los rau pawg ntseeg thiab cov kwv tij thiab cov nkauj muam. Vim cov neeg no tuaj yeem cuam tshuam lwm tus tau txhua lub sij hawm thiab txhua qhov chaw hauv pawg ntseeg thiab tuaj yeem rhuav tshem qhov raws qib raws duas uas ib txwm muaj ntawm pawg ntseeg tau txhua lub sij hawm thiab hauv txhua qhov xwm txheej, tsis txhob thev los sis ua siab ntev rau cov tsis ntseeg zoo li no ntxiv. Tsis txhob muab lwm lub cib fim rau lawv hloov dua siab tshiab; tsis txhob ua neeg ruam. Thaum nrhiav tau lawv lawm, yuav tsum muab lawv ntiab tawm mus kom sai li sai tau txhawm rau tiv thaiv kev puas tsuaj yav tom ntej. Lub hom phiaj ntawm kev ua li no yog txhawm rau tiv thaiv cov uas tsis caum qhov tseeb kom tsis txhob raug coj mus yuam kev thiab raug siv, es dhau mus ua Ntxwgnyoog thiab cov dab phem cov me nyuam roj hmab. Muaj tseeb tiag, yam uas koj tsim nyog ua tshaj plaws tam sim no yog tiv thaiv kom cov uas muaj tej phiaj xwm ntawm sab kev nom kev tswv tsis txhob paub txog tej ntaub ntawv tseem ceeb txog pawg ntseeg. Koj paub cais thiab ntiab cov neeg ntawd tawm tau ntxov npaum li cas, ces cov kwv tij thiab cov nkauj muam yuav sib cuag nrog lawv tsawg npaum li ntawd, thiab lawv yuav raug cov neeg no coj mus yuam kev thiab cuam tshuam tsawg npaum li ntawd. Yog li ntawd, hais txog lub sij hawm, qhov daws thiab ntiab cov neeg zoo li no tawm kom ntxov es tsis txhob cia lig mas yuav zoo dua—yim ntxov npaum li cas, ces yim zoo npaum li ntawd. Qhov uas ua ua ntej zoo dua li qhov uas nyob tos. Cov neeg uas muaj tej phiaj xwm ntawm sab kev nom kev tswv muaj lub siab tsis zoo; lawv yeej tsis tuaj yeem muaj lub siab dawb paug rau kev ua ib yam dab tsi rau pawg ntseeg thiab Vajtswv lub tsev li. Yog lawv tsis tuaj yeem siv los sis coj cov kwv tij thiab cov nkauj muam mus yuam kev, lawv yuav poob ntsej muag tag nrho thiab yuav tawm hauv pawg ntseeg mus ntawm lawv tus kheej, haj tseem mus yam tsis hais ib lo li thiab. Peb txoj kev sib qhia txog lub hom phiaj yim rau kev ntseeg Vajtswv: caum tej phiaj xwm ntawm sab kev nom kev tswv los xaus rau ntawm no xwb.

Lub Kaum Hli Hnub Tim 30, Xyoo 2021