Koj yuav tsum tsis txhob ntshai qhov no thiab qhov tod; txawm koj yuav ntsib teeb meem thiab kev phom sij ntau npaum li cas los, koj muaj peev xwm nyob ruaj khov rau ntawm Kuv xub ntiag, tsis muaj kev cuam tshuam los ntawm ib qho kev tab kaum li, kom Kuv txoj kev xav raug ua mus kom tsis paub kawg. Qhov no yog koj txoj hauj lwm; tsis yog li ntawd ces, Kuv yuav coj Kuv txoj kev npau taws los rau koj, thiab nrog Kuv txhais tes Kuv yuav…. Tom qab ntawd ces koj yuav raug kev txom nyem fab siab ntsws mus tsis paub kawg. Koj yuav tsum tiv txhua yam; rau Kuv, koj yuav tsum npaj kom txhij los tso txhua yam uas koj muaj thiab ua txhua yam koj ua tau txhawm rau qhov los caum raws Kuv qab, thiab npaj kom txhij los fij kom tag nrho koj li. Tam sim no yog lub sij hawm uas Kuv yuav los sim koj lawm: Koj puas kam muab koj lub siab npuab rau Kuv? Koj puas kam caum raws Kuv qab yam muab siab npuab mus kom txog txoj kev kawg? Tsis txhob ntshai; nrog Kuv txoj kev pab txhawb, leej twg tuaj yeem thaiv txoj kev no? Nco ntsoov qhov no! Tsis txhob hnov qab! Txhua yam uas tshwm sim yog los ntawm Kuv txoj kev xav zoo, thiab txhua yam nyob hauv qab Kuv qhov kev soj ntsuam. Koj puas tuaj yeem ua raws li Kuv cov lus hauv txhua yam koj hais thiab ua? Thaum kev sim siab ntawm hluav taws los txog koj, koj puas yuav txhos caug thiab hu ma? Los yog koj yuav caws, tsis muaj peev xwm txav mus rau tom hauv ntej li?

Koj yuav tsum muaj Kuv lub siab tawv nyob rau hauv koj, thiab koj yuav tsum muaj cov hauv paus ntsiab lus thaum los ntsib nrog cov neeg txheeb ze uas tsis ntseeg. Rau Kuv tus txiaj ntsig, txawm li cas los, koj kuj yuav tsum tsis txhob yeem swb rau tej hwj chim tsaus ntuj. Vam khom rau Kuv lub tswv yim los taug txoj kev zoo tiav log; tsis txhob cia Ntxwgnyoog tej kev koom siab twg los tswj. Siv tag nrho koj tej dag zog los tso koj lub siab rau ntawm Kuv lub xub ntiag, thiab Kuv yuav nplij koj thiab coj kev thaj yeeb nyab xeeb thiab kev zoo siab los rau koj. Tsis txhob sib zog los ua ib txoj hau kev twg nyob rau ntawm lwm tus neeg lub xub ntiag; qhov ua rau Kuv txaus siab tsis muaj nqis thiab tseem ceeb dua lod? Hauv kev ua tau zoo raws Kuv, koj yuav tsis tau txais kev thaj yeeb nyab xeeb thiab kev zoo siab mus ib txhiab ib txhis lod? Koj txoj kev txom nyem tam sim no tsuas qhia tias koj cov koob hmoov yav tom ntej yuav zoo npaum li cas xwb; lawv yog yam tsis muaj lus piav qhia tau li. Koj tsis paub txog txoj kev zoo ntawm tej koob hmoov uas koj yuav muaj; koj twb tsis tau npau suav txog nws li. Niaj hnub no nws tau dhau los muaj tiag lawm; yog tiag tiag li lawm! Qhov no nyob tsis deb heev lawm—koj puas pom nws? Txhua qhov kawg me me no nyob hauv Kuv; txoj kev mus tom ntej kaj npaum li cas! So koj tej kua muag, thiab tsis muaj kev mob los yog kev tu siab ntxiv lawm. Txhua yam raug npaj los ntawm Kuv ob txhais tes, thiab Kuv lub hom phiaj yog los ua kom nej kov yeej thiab los coj nej mus rau hauv lub yeeb koob nrog Kuv. Rau txhua yam uas tshwm sim rau koj, koj yuav tsum yog tus ris txiaj thiab qhuas tag nrho; uas yuav ua rau Kuv txaus siab heev.

Khetos lub neej uas txawv tshaj plaws twb tau tshwm sim lawm; tsis muaj ib yam dab tsi rau koj yuav ntshai lawm. Ntxwgnyoog nyob hauv peb qab xib taws, thiab lawv lub sij hawm yuav tshuav tsis ntev ntxiv lawm. Sawv tsees los! Nrug tawm ntawm lub ntiaj teb ntawm kev liam qias; daws tso koj tus kheej tawm ntawm lub qhov tob tob ntawm txoj kev tuag! Muab lub siab npuab Kuv txawm zoo li cas los xij, thiab ua siab tawv qhawv mus tom ntej; Kuv yog koj lub lub zog tawv qhawv, yog li vam khom rau Kuv!