Kuv puas yog koj tus Vajtswv? Kuv puas yog koj tus Vajntxwv? Koj puas tau tso cai rau Kuv los kav li tus Vajntxwv nyob rau hauv koj? Koj yuav tsum ua tib zoo tsom saib koj tus kheej kom thoob thoob: Puas yog koj tsis tau tshawb thiab tsis lees txais qhov kev kaj tshiab thaum nws los rau ntawm koj, haj tseem cheem tsis raws nws qab thiab? Vim qhov no, nej yuav raug txiav txim thiab poob mus rau hauv nej txoj kev puas tsuaj; nej yuav raug txiav txim thiab raug tus pas hlau nplawm, thiab nej yuav tsis ras txog tes hauj lwm ntawm tus Vajntsujplig Dawb Huv. Tshuav tsis ntev lawm xwb, nej yuav quaj thiab caws nej ob lub hauv caug pe hawm, quaj hnyiav nrov nrov. Kuv twb yeej ib txwm qhia nej thiab Kuv twb ib txwm hais lus rau nej lawm; Kuv yeej tsis tau thim Kuv cov lus ntawm nej mus li. Xav txog yav dhau los: Thaum twg Kuv tsis tau qhia tej yam dab tsi rau nej? Txawm li cas los xij, muaj ib txhia tib neeg uas yeej ua qee yam yuam kev tas mus li xwb. Lawv poob mus rau hauv ib tauv iab oo ntawm qhov ua xyem xyav uas thaiv lub hnub lawm, thiab lawv tsis pom qhov kaj li. Qhov no puas yog tim lawv muab “lawv tus kheej” saib muaj zog tshaj thiab lawv tej kev xav phem loj dhau lawm? Koj tau xav txog Kuv txij thaum twg los lawm? Koj tau muab ib chav hauv koj lub siab rau Kuv txij thaum twg los lawm? Thaum koj ua tsis tau, thaum koj pom tias koj tus kheej tsis muaj cuab kav, thiab thaum koj tsis muaj ib qho kev xaiv kiag li lawm, tsuas yog thaum ntawd koj thiaj li thov Kuv xwb. Yog li ces: Yog vim li cas koj ho tsis ua li koj ua tam sim no? Nej cov neeg no! Nws yog tus qub neeg uas ua rau nej raug puas tsuaj!

Muaj ib txhia tib neeg nrhiav tsis tau kev taug, thiab lawv raws tsis tau nrog qhov kaj tshiab. Lawv tsuas muaj kev sib qhia txog yam uas lawv tau pom dhau los lawm xwb; tsis muaj ib yam tshiab dab tsi rau lawv li. Ntawd yog vim li cas? Nej nyob hauv nej tus kheej thiab tau kaw qhov rooj rau Kuv lawm. Pom tus qauv ntawm tes hauj lwm ntawm tus Vajntsujplig Dawb Huv hloov, hauv koj lub siab, koj pheej ceev faj txog tsam yuam kev. Koj qhov kev hwm Vajtswv nyob qhov twg? Koj puas tau nrhiav ntsiag to los nyob rau ntawm Vajtswv lub xub ntiag? Koj tsuas xav tsis thoob tias, “Tus Vajntsujplig Dawb Huv puas ua num zoo li ntawd tiag?” Muaj ib txhia tib neeg tau pom tus Vajntsujplig Dawb Huv tes hauj lwm lawm, tiam sis lawv tseem muaj ntau yam hais txog nws; lwm tus lees paub tias yog Vajtswv txoj lus, tiam sis lawv tsis kam txais yuav nws li. Muaj ntau yam kev xav phem tshawv tawm hauv lawv tej tus kheej tuaj, thiab lawv tsis to taub tes hauj lwm ntawm tus Vajntsujplig Dawb Huv. Lawv tsis nco qab thiab tsis quav ntsej, thiab tsis kam them qhov qi thiab qhib siab rau ntawm Kuv lub xub ntiag. Tus Vajntsujplig Dawb Huv tau qhia lawv lawm, tiam sis lawv tsis kam los rau ntawm Kuv xub ntiag los nrog Kuv sib tham los sis nrhiav. Dua ntawd, lawv yeem ua raws li lawv txoj kev ntshaw, ua yam uas lawv nyiam. Qhov kev xav zoo li no yog dab tsi?