47. Kev Dag Tsuas Ua Kom Mob Xwb
Muaj ib hnub nyob rau lub Tsib Hlis Ntuj xyoo 2021, peb npaj txhij los yees kwv Tij Luj ib daim yeeb yaj duab hu ib txoj nkauj xaus laus, thiab kuv ua cov duab teeb ci saum sam thiaj. Thaum xub thawj mas kuv ceev faj heev, thiab tsis muaj ib qho teeb meem thaum yees thawj ob peb teg li, yog li kuv thiaj li tau so me ntsis lawm. Peb twb yees yuav luag tiav lawm thaum tus thawj saib xyuas hais tias nws xav los sim yees dua ob peb teg kom sib txawv. Kuv tsis cuab pob ntseg mloog li, yog li thaum peb pib tig kuv tseem tab tom saib rau lwm lub maus ni tawj, ces tsis pom mus txog thaum Kwv Tij Luj twb rhais ruam dhau lub yeem teeb lawm. Kuv thiaj li ceev nrooj los kho lub teeb, tab sis tsis ceev txaus, ua rau Kwv Tij Luj lub taub hau tawm dhau ntawm lub yeem teeb mus lawm thiab rov qab txav los rau hauv dua. Teg ntawd ces siv tsis tau li. Li ib txwm mas thaum peb muaj teeb meem nyob rau saum sam thiaj, ces peb yuav tsum hais kom tus thawj saib xyuas yees lwm teg kiag tam sim ntawd, tab sis kuv tsuas tuav rawv lub xov tooj ntawm tes xwb, ntshai hais lus. Tsis hais lus li thiab kuv hnov cov nyom tiag tiag. Kuv xav txog qhov tsis yog tsuas muaj tus thawj saib xyuas nyob ntawd xwb, tab sis tseem muaj ntau tus kwv tij thiab nkauj muam thiab. Yog tias kuv qhia rau lawv tias kuv ua ib qho yuam kev me me zoo li ntawd, txhua tus yuav xav li cas rau kuv? Lawv puas yuav hais tias kuv tsis saib xyuas kuv tes dej num? Qhov ntawd mas yuav ua rau txaj muag heev li! Tab sis kuv yuav tsis leg kuv tes dej num yog tias kuv tsis hais dab tsi li. Nws yuav muaj kev cuam tshuam ncaj qha rau qhov zoo ntawm daim yeeb yaj daub ntawd yog tias ntu ntawd raug siv los kho kom zoo. Thaum kuv muaj kev ntxhov siab seb yuav qhia los sis tsis qhia ntawd, ces kuv txawm hnov tus thawj saib xyuas hais tias, “Ntu no peb ua tau zoo lawm, cia peb ua ntu txuas mus.” Kuv pom tias tus kwv tij uas ua tus yees ntawd twb muab nws tus ntaiv hloov chaw tag thiab nyob tos lawm xwb, yog li kuv thiaj li pib xam rau kuv tus kheej, xav tias, “Kev yees twb tiav tag lawm, yog tias kuv hais tej yam tam sim no, ces txhua tus yuav tau muab lawv tej cuab yeej rhai rov qab thiab yuav yog ib qho teeb meem loj. Kuv yuav tsum cia li txhob hais dab tsi li xwb, nws tsuas yog ib ntawm ob teg xwb, thiab tej zaum twb tsis siv thiab. Tsis tas li ntawd, yog tias tib neeg tsis ua tib zoo saib ces tej zaum lawv yuav tsis pom qhov ntawd thiab.” Kuv pheej xav rawv qhov ntawd rau hauv kuv siab, tab sis thaum kawg ho txiav txim siab nyob twj ywm lawm. Tom qab yees tag lawm kuv thiaj li hnov muaj kev ua txhaum, xav tias: “Tsis yog kuv txhob txwm dag lod? Kuv dag tau tib neeg, tab sis kuv dag puas tau Vajtswv mas?” Yog li kuv thiaj li mus nrhiav tus thawj saib xyuas thiab qhia txog kuv qhov yuam kev rau nws. Nws thiaj li hais tias, “Peb twb yees tiav thiab txhua tus tau muab khoom cia tag lawm. Tsam no mam qhia kuv es zoo dab tsi? Thaum ntawd cas koj ho tsis qhia rau kuv mas? Yog tias koj qhia, los yees dua nws yeej tsis siv sij hawm ntev.” Thaum pom tus thawj saib xyuas lub ntsej muag mluas mlob ua rau kuv haj yam xav phem thiab kuv xav npuaj kuv tus kheej. Vim li cas es yuav nyuaj ua luaj rau kuv los lees tias kuv ua yuam kev rau ntawm txhua tus xub ntiag? Vim li cas es yuav siv dag zog ntau ua luaj li los ua kom ncaj ncees xwb? Thaum mob siab, kuv thiaj li los cuag Vajtswv thiab thov Vajtswv tias: “Vajtswv, kuv tau ua ib qho yuam kev thaum ua kuv tes dej num lawm, thiab tsis muaj cuab kav los lees qhov ntawd rau ntawm txhua tus xub ntiag vim yog kuv ntshai tsam lawv thuam kuv thiab saib tsis taus kuv. Tam sim no, kuv muaj kev txhaum lawm. Thov coj kuv kev kom paub txog kuv tus kheej.”
Tom qab ntawd, kuv thiaj li pom tias Vajtswv txoj lus hais tias: “Muab hais tias koj yuav xaiv ob txoj kev. Ib txoj yog txoj kev uas xaiv los ua ib tug neeg coj ncaj, qhia qhov tseeb thiab hais yam uas nyob rau hauv koj lub siab, qhia koj lub siab rau lwm tus, los sis lees tej uas koj ua yuam kev thiab hais li qhov uas muaj tseeb xwb, qhia lwm tus txog koj txoj kev dab tuag uas qias vuab tsuab thiab ua rau koj tus neeg txaj muag. Hos lwm txoj yog txoj kev uas muab koj lub neej txoj sia rau Vajtswv thiab nkag mus rau hauv lub nceeg vaj saum ntuj ceeb tsheej thaum koj tuag. Koj yuav xaiv txoj twg? Ib txhia yuav hais tias, ‘Kuv xaiv qhov muab kuv lub neej txoj sia rau Vajtswv. Kuv txaus siab hlo tuag rau Nws, ces tom qab kev tuag lawm, kuv yuav tau kuv qhov nqi zog thiab nkag mus rau hauv lub nceeg vaj saum ntuj ceeb tsheej.’ Qhov muab yus lub neej txoj sia rau Vajtswv ntawd mas cov uas txaus siab hlo ua tuaj yeem tib thawb xwb ua tau lawm. Tiam sis qhov xyaum ua raws li qhov tseeb thiab ua ib tug neeg coj ncaj ntawd puas tuaj yeem tib thawb xwb ua tau lawm? Nws tsis tas thawb ob zaug li. Qhov ua ib yam dab tsi ntawd, yog tib neeg muaj qhov txaus siab hlo, ces lawv tuaj yeem tib thawb xwb ua tau qhov ntawd zoo lawm; tiam sis qhov ua ib tug neeg coj ncaj ntawd, qhov qhia qhov tseeb yam tsis hais ib lo lus dag li ua tsis tau kom yus yog ib tug neeg coj ncaj mus li. Qhov ua ib tug neeg coj ncaj ntawd yog ib qho teeb meem ntawm kev hloov pauv tus moj yam, yuav tsum muaj kev paub li kaum los sis nees nkaum xyoo. Koj yuav tsum muab koj tus moj yam txawj dag uas hais tej lus dag thiab kev ua tsis ncaj ntawd tso pov tseg ua ntej koj thiaj li yuav dhau lub hauv paus pib ntawm qhov ua ib tug neeg coj ncaj. Tej kev nyuaj uas ua li no yuav tsis zoo rau txhua tus lod? Nws yog ib qho kev nyuaj heev. Tam sim no Vajtswv xav ua kom ib pab neeg zoo tiav log thiab muab kom tau ib pab neeg. Txhua tus uas caum qhov tseeb yuav tsum lees txais txoj kev txiav txim thiab kev rau txim, kev sim siab thiab kev lim tib neeg kom dawb huv, lub hom phiaj yog los daws lawv tus moj yam uas txawj dag thiab ua kom lawv yog cov tib neeg coj ncaj, cov tib neeg uas zwm rau Vajtswv xwb. Qhov no tsis yog ib yam uas tib thawb xwb ces txawm siv ua tau lawm; qhov no yuav tsum yog muaj txoj kev ntseeg tseeb, thiab tib neeg yuav tsum raug ntau yam kev sim siab thiab kev lim tib neeg kom dawb huv ntau heev ua ntej lawv ua tau. Yog hnub no, Vajtswv hais kom koj ua ib tug neeg coj ncaj thiab hais qee yam uas muaj tseeb, qee yam ntsig txog tej uas muaj tseeb, qee yam uas ntsig txog koj lub neej yav tom ntej thiab koj txoj hmoo, lub txim uas tej zaum yuav tsis muaj txiaj ntsim rau koj, thiab lwm tus yuav tsis hwm koj ntxiv lawm, thiab koj mloog zoo li koj lub koob lub npe yuav raug rhuav tshem—thaum tej xwm txheej zoo li no, koj puas tuaj yeem hais lus kom ncaj ncees, thiab tsis dag? Koj puas tseem tuaj yeem coj ncaj? Qhov no yog qhov uas ua nyuaj tshaj plaws, tseem nyuaj tshaj qhov muab koj lub neej txoj sia txo lawm thiab. Tej zaum koj yuav hais tias, ‘Qhov kuv qhia qhov tseeb ntawd yuav siv tsis tau. Kuv yeem tuag rau Vajtswv dua li qhia qhov tseeb. Kuv tsis xav ua ib tug neeg coj ncaj kiag li. Kuv yeem tuag dua li cia txhua tus saib tsis taus kuv thiab xav hais tias kuv yog ib tug neeg dog dig xwb.’ Qhov no qhia hais tias yam uas tib neeg nyiam tshaj plaws yog dab tsi? Yam uas tib neeg nyiam tshaj plaws tsis yog lawv lub neej txoj sia, tiam sis yog lawv lub meej mom thiab lub koob lub npe—yam uas lawv tus moj yam phem tswj kav xwb. Yog qhov xwm txheej ntawd yuam lawv, ces lawv yuav siv tag nrho lub zog los muab lawv lub neej txoj sia txo, tiam sis cov tib neeg uas ntseeg Vajtswv, qhov muab lawv lub neej txoj sia txo ntawd tsis yog qhov tseem ceeb tshaj plaws; Vajtswv hais kom tib neeg lees txais qhov tseeb, kom koj ua ib tug neeg coj ncaj tiag tiag uas hais yam uas nyob hauv koj lub siab thiab muab qhov ntawd qhia rau txhua tus. Qhov ntawd puas yooj yim ua? (Tsis yooj yim.) Tseeb tiag, Vajtswv tsis hais kom koj muab koj lub neej txoj sia txo. Koj lub neej txoj sia tsis yog Vajtswv muab rau koj lod? Koj lub neej txoj sia yuav ua tau dab tsi zoo rau Vajtswv? Vajtswv tsis xav tau qhov ntawd. Nws xav kom koj hais lus ncaj ncees, hais tias koj yog leej twg thiab koj xav li cas hauv koj lub siab xwb. Koj puas hais tau tej no? Nyob rau ntawm no, txoj hauj lwm nyuaj lawm, thiab tej zaum koj yuav hais tias, ‘Ua kom kuv siv zog ua hauj lwm, kom kuv thiaj li muaj zog ua txoj hauj lwm ntawd. Ua kom kuv fij txhua yam, kom kuv thiaj li muab tag nrho kuv tej khoom vaj tse, kuv niam kuv txiv, kuv cov me nyuam, kuv lub neej hluas, kuv txoj kev sib yuav, thiab kuv txoj hauj lwm tso tseg. Tag nrho tej no mas yooj yim fij. Tiam sis hais yam uas nyob rau hauv koj lub siab, hais kom ncaj ncees mas—qhov ntawd yog ib yam uas kuv ua tsis tau.’ Vim li cas koj thiaj li ua tsis tau? Vim hais tias thaum koj ua lawm, txhua tus uas paub koj los sis paub txog koj yuav pom koj txawv txawv. Lawv yuav tsis hwm koj ntxiv lawm. Koj yuav poob ntsej muag, koj yuav txaj muag kawg nkaus li, thiab koj lub suab npe thiab lub meej mom los kuj yuav ploj mus thiab. Koj lub meej mom thiab lub koob meej uas zoo nyob rau hauv lwm tus lub siab yuav tsis muaj ntxiv lawm. Vim li no, thaum raug tej xwm txheej zoo li no lawm, txawm yuav zoo li cas los xij, koj yuav tsis hais qhov tseeb li. Thaum tib neeg ntsib qhov no lawm, mas muaj ib txoj kev sib tawm tsam nyob rau hauv lawv lub siab, thiab thaum qhov kev sib tawm tsam ntawd dhau mus lawm, thaum kawg qee yam yuav cia li mus dhau lawv tej kev nyuaj, hos lwm yam tseem tsis tau mus dhau, thiab tseem raug lawv tus moj yam phem thiab lawv tus kheej lub meej mom, lub koob lub npe, thiab qhov hu ua ntsej muag ntawd tswj kav. Qhov no yog ib qho nyuaj, tsis yog lod? Qhov hais lus ncaj ncees thiab qhia qhov tseeb ntawd xwb tsis yog ib qho kev ua uas zoo heev, tiam sis tseem muaj ntau tus neeg siab tawv uas tshaj lij heev, muaj ntau tus neeg uas tau cog lus tias yuav muab lawv lub neej txoj sia rau Vajtswv thiab muab fij rau Vajtswv thaum lawv tseem muaj txoj sia nyob, thiab muaj ntau tus uas tau hais tej yam loj heev rau Vajtswv uas pom tias yeej ua tsis tau” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Kev Ua Tes Dej Num Kom Tau Puv Npo Uas Tsim Nyog Cheem Tsum Kev Sib Koom Tes Zoo). Vajtswv cov lus piav qhia txog kuv tus yam ntxwv tiag. Kuv muab lub ntsej muag thiab lub meej mom saib tseem ceeb dhau lawm. Kuv hais tsis tau ib lo lus lees qhov kuv ua yuam kev li, ntshai tsam poob ntsej muag rau ntawm txhua tus xub ntiag. Kuv ntshai tsam txhua tus yuav hais tias kuv tsis ua kuv txoj hauj lwm yog tias kuv ua tau qho yuam kev yooj yim zoo li ntawd. Ua cas yuav txaj muag ua luaj. Kom tiv thaiv tau kuv tus yam ntxwv thiab lub meej mom mas, kuv yuav tau npog qhov kuv ua yuam kev, xav tias yog kuv tsis hais dab tsi li, ces yuav tsis muaj leej twg paub thiab lawv yuav tsis thuam kuv rau qhov ntawd. Ces kuv txoj kev khav theeb thiab tus yam ntxwv yuav nyob zoo li qub. Txawm tias kuv muaj kev txhaum thiab tsis kaj siab los xij, kuv tseem nrhiav kev hais ub hais no kom kuv tus kheej kaj siab thiab: “Nws tsuas yog ib teg xwb, tej zaum lawv twb tsis siv qhov ntawd thiab.” Tsis yog kuv dag kuv tus kheej thiab lwm tus lod? Thaum kuv xav li no lawm kuv hnov muaj kev txhaum loj thiab tu siab rau txoj kev dag ntxias Vajtswv thiab kuv cov kwv tij thiab nkauj muam kawg nkaus tsuas yog los txuag lub ntsej muag thiab tuav lub meej mom xwb. Kuv thiaj li thov Vajtswv hais tias, “Au Vajtswv, kuv tsis lees qhov kuv ua yuam kev vim yog xav los txuag lub ntsej muag thiab tuav lub meej mom xwb. Kuv paub tias qhov ntawd tsis raws li Koj txoj kev xav lawm, tab sis kuv hnov zoo li kuv raug dab phem ua kom ntxeev siab thiab kom khiav tsis dim kuv tus moj yam qias vuab tsuab. Vajtswv, thov coj kuv kev kom kuv thiaj li yuav raug tso tawm ntawm tej kev txwv thiab tej kev khi ntawm kuv tus moj yam qias vuab tsuab.”
Cem kuv thiaj li nyeem ob peb zaj lus los ntawm Vajtswv txoj lus uas muab qee txoj kev xyaum ua raws rau kuv. Vajtswv hais tias: “Tsuas yog cov tib neeg coj ncaj thiaj li muaj ib feem nyob rau hauv lub nceeg vaj saum ntuj ceeb tsheej xwb, yog li ntawd yog hais tias koj tsis xyaum ua ib tug neeg coj ncaj, thiab yog hais tias koj tsis muaj kev ntsib kev pom thiab tsis xyaum ua raws li txoj xub ke ntawm qhov kev nrhiav qhov tseeb, yog hais tias koj tsis muab koj tus kheej txoj kev phem qhia tshwm, thiab tsis muab koj lub ntsej muag tseeb qhia tawm li, ces koj yeej yuav tsis muaj peev xwm tau txais Vajntsujplig tes hauj lwm thiab yeej tsis tau txais Vajtswv txoj kev pom zoo li. Txawm koj yuav ua dab tsi los sis koj ua tes dej num dab tsi los xij, koj yuav tsum muaj tus cwj pwm coj ncaj, koj yuav ua tsis tau koj tes dej num kom zoo. Yog hais tias koj ib txwm daws thiab lam ua li qhov koj ua koj tes dej num, thiab koj ua qee yam tsis tau zoo, ces koj yuav tsum tau los tig xav rau ntawm koj tus kheej, los paub koj tus kheej, qhib siab lug txheeb xyuas koj tus kheej, thiab tom qab ntawd nrhiav cov hauv paus ntsiab lus ntawm qhov tseeb thiab mob siab ua kom zoo dua qub rau zaum tom ntej es txhob lam ua lawm. Yog hais tias koj tsis sim thiab tsis ua kom Vajtswv txaus siab nrog lub siab uas coj ncaj, thiab ib txwm ua kom koj tus kheej cev nqaij daim tawv txaus siab, los sis ua kom koj tus kheej zoo siab tas li xwb, ces koj puas muaj peev xwm ua tau ib txoj hauj lwm zoo thaum ua hauj lwm zoo li no mas? Koj puas tuaj yeem ua koj tes dej num tau zoo? Yeej tsis tau li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Lub Hauv Paus Kev Xyaum Ua Raws Yooj Yim Tshaj Plaws ntawm Kev Ua ib Tug Neeg Ncaj Ncees). “Thaum ua ib qho yuam kev lawm, yog koj tuaj yeem kho kom yog, es cia txhua tus tham txog qhov yuam kev ntawd, cia lawv hais thiab txiav txim rau qhov yuam kev ntawd, thiab koj qhia qhov yuam kev ntawd tawm thiab soj ntsuam qhov yuam kev ntawd, txhua tus yuav xav li cas rau koj? Lawv yuav hais tias koj yog ib tug neeg coj ncaj, rau qhov koj lub siab qhib rau Vajtswv. Los ntawm koj tej kev ua thiab tus cwj pwm, lawv yuav pom koj lub siab. Tiam sis yog koj ua txhua yam los zais koj tus kheej thiab dag txhua tus, ces tib neeg yuav xav txog koj me me xwb, thiab hais tias koj yog ib tug tib neeg ruam thiab ib tug tib neeg tsis ntse. Yog koj tsis ua txuj los sis tsis hle koj tus kheej li ub li no, yog koj lees tej uas koj ua yuam kev, ces txhua tus yuav hais tias koj coj ncaj thiab ntse. Yog li ntawd dab tsi ua rau koj ntse? Txhua tus puav leej ua yuam kev. Txhua tus puav leej muaj tej uas ua yuam kev thiab tej uas ua tsis tau zoo. Thiab tseeb tiag lawm, txhua tus puav leej muaj tib tug moj yam qias vuab tsuab xwb. Txhob xav hais tias koj tus kheej zoo tshaj, zoo tshaj plaws, thiab siab zoo tshaj lwm tus; yeej tsis yog li ntawd. Thaum koj paub tib neeg tej moj yam qias vuab tsuab thiab lub ntsiab tseeb thiab lub ntsej muag tseeb ntawm lawv txoj kev qias vuab tsuab lawm, koj yuav tsis ua txhua yam los npog tej uas koj tus kheej ua yuam kev, thiab koj yuav tsis hais qhov lwm tus tib neeg ua yuam kev ntawd los tawm tsam lawv lawm—koj yuav muaj peev xwm daws tau ob qho no yam yog heev. Tsuas yog thaum ntawd xwb koj thiaj li yuav paub tseeb thiab tsis ua tej yam ruam ruam, uas yuav ua rau koj ntse” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Cov Hauv Paus Ntsiab Lus Uas Yus Yuav Tsum Muab Los Cob Qhia Yus Txoj Kev Coj). Kuv kawm paub los ntawm Vajtswv txoj lus hais tias txhua tus yeej ua yuam kev thaum ua lawv tes dej num. Nws yog qhov ib txwm muaj xwb. Peb yuav tsum txhob npog tej yam no, peb yuav tsum qhia qhov tseeb, xub los lees peb tej kev ua yuam kev, thiab qhib siab lug rau lwm tus txog peb txoj kev qias vuab tsuab thiab tej kev ua tsis tau zoo. Peb yuav tsum txhob txhawj txog kev txuag lub ntsej muag thiab kev tuav lub meej mom, tab sis tsim nyog ua neeg ncaj ncees raws li Vajtswv hais kom ua. Qhov no thiaj li yog tib txoj hau kev ua lub neej muaj tus cwj pwm thiab lub koob meej, thiab tau txais Vajtswv txoj kev pom zoo thiab tej koob hmoov. Tab sis kuv txhawj txog qhov lwm tus xav txog kuv dhau lawm thaum ua kuv tes dej num, ib txwm xav tuav kuv lub meej mom thiab tus yam ntxwv kom lawv pom xwb. Vim li no, kuv thiaj li ib txwm xav npog txhua qhov uas kuv ua yuam kev thiab ntshai tsam lwm tus paub. Kuv tsis muaj cuab kav los qhia qhov tseeb txawm tias thaum kuv hnov muaj kev txhaum los xij. Kuv tsis xav txog tias qhov no yuav tsim kev puas tsuaj loj npaum li cas rau tes hauj lwm ntawm Vajtswv lub tsev li. Kuv tsis tiv thaiv tej kev ntshaw ntawm Vajtswv lub tsev thaum ua kuv tej dej num li, thiab kuv tsis coj ncaj hlo li. Yog tias kuv pheej ua zoo li no xwb ces kuv yuav ua kuv tes dej num kom zoo tau li cas? Kuv hnov txhaum heev thaum paub li no thiab xav los kho tus yam ntxwv hauv qhov uas kuv ua kuv tej dej num.
Tom qab ntawd, qee zaus thaum kuv ua ib qho yuam kev hauv kev yees yeeb yaj duab thiab hnov nyuaj siab txog qhov seb puas yuav hais los sis tsis hais tej yam ntawd, ces kuv paub tias kuv tsuas pheej los tiv thaiv kuv lub meej mom thiab tus yam ntxwv kom lwm tus txhob pom dua lawm. Kuv thiaj li thov Vajtswv thiab thov kom Nws coj kuv kev los xyaum ua raws qhov tseeb thiab ua ib tug neeg coj ncaj, yog li kuv thiaj li lees txais tau qhov kuv ua yuam kev rau ntawm txhua tus xub ntiag lawm. Thaum kuv ua li ntawd, tej kwv tij thiab nkauj muam tsis thuam kuv lawm thiab kuv daws tau qhov kuv ua yuam kev tau tsim nyog lawm. Kuv hnov muaj qab hau tshaj qub lawm, thiab kuv hnov muaj kev kaj siab thiab kev xyiv fab uas los ntawm qhov xyaum ua raws qhov tseeb los lawm.
Muaj ib hnub, peb ua lwm daim yeeb yaj duab xaus laus. Ua ntej thaum peb pib yees, tus thawj saib xyuas txawm nug seb cov teeb npaj puas tau txhij. Kuv xav tias kuv twb xyuas tej ntawd tag lawm, yog li kuv thiaj li hais yam ruaj siab hlo tias, “Txhua yam txhij lawm, peb yees tau!” Tab sis tom qab yees ib teg xwb, ces kuv mam li nco dheev tias kuv tsis nco qab nta ob peb lub teeb lawm. Kuv poob siab nthav. Kuv xav hais tej yam dab tsi tab sis ho tsis hais lawm, xav tias, “Kuv twb lees rau txhua tus yam ruaj siab hlo tias txhua yam npaj txhij ua ntej yees lawm, yog li yog tias kuv lees tias ua ib qho yuam kev rau tam sim no, lawv yuav xav li cas rau kuv? Lawv puas yuav tsis muaj kev ruaj siab rau kuv lawm mas? Tsis nco qab nta cov teeb yog ib qho ua yuam kev zoo li tus los ua tshiab. Yog tias kuv lees qhov ntawd kuv yuav rov tawm ntsej muag dua tau li cas? Tej kwv tij thiab nkauj muam puas yuav xav tias kuv mas siv tsis tau li, muab lub luag hauj lwm yooj yim li ntawd ua ntxhov quas niab?” Kuv muaj tej kev xav uas sib cov nyom, thiab kuv hnov muaj kev nyuaj siab. Kuv xav lees qhov kuv ua yuam kev, tab sis peb twb yees tau ob peb teg lawm. Yog tam sim no kuv hais tias cov teeb muaj teeb meem, txhua tus puas yuav cem kuv rau qhov tos txog tsam no mam los hais tej yam cas tsis hais kiag tam sim ntawd? Tom qab kuv ua tib zoo xav lawm, ces kuv nrhiav tau ib txoj kev daws tias: Kuv tos kom txog thaum peb yees tiav tag lawm tso kuv mam mus tham ib leeg rau tus kwv tij uas kho daim yeeb yaj duab ntawd thiab hais kom nws kho lub yeem teeb. Ua li ntawd mas kuv thiaj li yuav tsis tau lees qhov kuv ua yuam kev rau ntawm txhua tus xub ntiag. Txoj kev daws no yuav tsis cuam tshuam rau qhov zoo ntawm daim yeeb yaj duab thiab yuav txuag tau kuv lub ntsej muag thiab tuav tau lub meej mom tib si thiab. Yog li tom qab peb yees tag, kuv tau mus cuag tus kwv tij uas kho daim yeeb yaj duab ntawd thiab kom pab kho qhov ntawd, hais tias, “Kuv muaj ib qho teeb meem rau cov yeem teeb hauv thawj ntu, tab sis kuv tau ua tib zoo muab los sib piv rau lwm ntu lawm tsis pom muaj qhov txawv pes tsawg li thiab. Nws tsuas yog sib txawv me ntsis rau qhov ntsa xwb. Nws yuav zoo heev yog tias koj pab kho tau qhov ntawd.” Nws ntseeg kuv cov lus thiab hais tias nws mam pab kho qhov ntawd. Kuv hnov muaj kev txhaum thaum hais cov lus ntawd tawm ntawm kuv lub qhov ncauj mus lawm vim tias yog nta cov teeb tiag mas sib txawv deb heev, tab sis kuv tau hais qhov sib txawv ntawd mas me me xwb. Tsis yog kuv tsuas qhia tsis ncaj thiab dag kuv tus kwv tij xwb lod? Ua rau nws siv peb teev ntau los kho cov yeem teeb ntawd kom zoo nyob rau ntu ntawd. Thawj qhov uas nyob rau tag kis sawv ntxov txuas los, tus thawj saib xyuas sau ntawv hauv xov tooj tuaj nug tias, “Nag hmo puas yog koj tsis pom tias muaj ib qho teeb meem loj zoo li ntawd rau cov yeem teeb?” Kuv xav tsis txog tias tus thawj saib xyuas ntawd yuav pom sai ua luaj, thiab kuv tsis paub yuav hais li cas tau ib nyuag pliag, yog li kuv thiaj li hais ub hais no los piav qhia kuv tus kheej. Nws hais tias, “Qhov no twb tshwm sim los ua ntej lawm, koj pom qhov yuam kev ntawm qhov no tab sis ho tsis hais dab tsi li. Qhov no yuav ncua peb tes hauj lwm. Koj yuav tsum xav rau ntawm qhov koj ua nawb.” Kuv hnov txhaum heev thaum nws hais li ntawd. Kuv ntxub tias kuv raug tswj thiab khi los ntawm kuv tus moj yam qias vuab tsuab thiab xyaum ua raws qhov tseeb tsis tiav dua lawm. Kuv txawm txhos caug ntua thiab thov Vajtswv hais tias, “Vajtswv, kuv muab kuv lub ntsej muag thiab lub meej mom saib tseem ceeb dhau lawm. Zaum no, tsis yog kuv tsis tham txog qhov kuv ua yuam kev xwb, tab sis kuv tseem siv tag nrho kuv lub peev xwm los npog qhov ntawd thiab. Kuv mas tsis ncaj kiag! Vajtswv, kuv xav lees txim hloov dua siab tshiab. Thov coj kuv kev thiab cawm kuv os.”
Ces kuv thiaj li nyeem zaj lus no los ntawm Vajtswv txoj lus: “Cov tawm tsam Khetos txoj kev ua neej mas coj tsis ncaj xwb, uas txhais tau hais tias lawv tsis ncaj ncees kiag li. Txhua yam lawv hais thiab ua mas qias thiab muaj lawv tus kheej tej kev npaj siab thiab tej hom phiaj, thiab lawv tej tswv yim dag thiab tej kev npaj ua phem uas tsis hais thiab tsis pom qab hais ntawd puav leej zais nyob rau hauv. Yog li ntawd cov tawm tsam Khetos cov lus thiaj tej kev ua mas qias neeg thiab tsis muaj tseeb kiag li. Txawm lawv yuav hais ntau npaum li cas los xij, yeej tsis muaj hnub paub tias lawv cov lus twg yog cov tseeb, cov twg yog cov cuav, cov twg yog cov yog, thiab cov twg yog cov tsis yog li. Vim lawv coj tsis ncaj, lawv lub siab ua ywj fab ywj fwj, puv npo tej kev dag ntxias uas ntxeev siab thiab tej tswv yim dag nkaus xwb. Yam lawv hais ntawd tsis muaj ib yam uas hais ncaj qha li. Lawv tsis hais ib ces yog ib, ob ces yog ob, yog ces yog, thiab tsis yog ces tsis yog. Tiam sis, nyob rau hauv txhua yam teeb meem ntawd, lawv hais saum daim tawv xwb thiab xav txog tej ntawd ntau zaus hauv lawv lub siab, npaj rau tej uas yuav tshwm sim, ntsuas tej kev zoo thiab tej tsis zoo ntawm txhua seem. Ces, lawv siv tej ntawd los ntawm lawv co lus xws li txhua yam uas lawv hais mas zoo li hnyav heev. Cov tib neeg coj ncaj yeej tsis to taub yam lawv hais li thiab raug lawv dag ntxias thiab cuab yooj yim heev, tus uas nrog cov tib neeg zoo li no tham thiab sib txuas lus mas sab thiab siv dag zog ntau heev. Lawv yeej tsis hais ib ces yog ib hos ob ces yog ob, lawv yeej tsis hais yam uas lawv tab tom xav, thiab lawv yeej tsis piav qhia txhua yam raws li qhov uas yeej yog li ntawd li. Txhua yam lawv hais mas piav tsis tau, thiab tej hom phiaj thiab tej kev npaj siab ntawm lawv tej kev ua mas nyuaj tshaj plaws. Yog muaj neeg paub qhov uas npog lawv—yog lwm tus tib neeg pom tias lawv zoo li cas, thiab ntes tau lawv lawm—ces lawv hais kiag lwm lo lus dag los thaiv lawm. Hom tib neeg no mas dag tas li xwb, thiab tom qab dag lawm, lawv yuav tsum tau hais lus dag ntxiv los pab txhawb lo lus dag ntawd. Lawv dag ntxias lwm tus kom zais tau lawv tej kev npaj siab, thiab tsim txhua yam kev daws thiab hais li ub li no los pab lawv tej lus dag, kom thiaj li nyuaj rau tib neeg los qhia tias qhov twg yog qhov muaj tseeb thiab qhov twg yog qhov tsis muaj tseeb, thiab kom tib neeg tsis paub tias thaum twg yog thaum lawv ua ncaj ncees, thiaj haj yam tsis paub tias thaum twg yog thaum lawv hais lus dag. Thaum lawv dag, lawv tsis ua ntsej muag liab ploog los sis tau tib plhaw, cuag nkaus li lawv hais qhov tseeb xwb. Qhov no tsis txhais hais tias kev dag tau dhau los ua lawv tus yeeb yam lawm lod? Piv txwv li, qee zaum nyob rau saum daim tawv mas ntxim zoo li cov tawm tsam Khetos ntawd ua zoo rau lwm tus, xav txog lwm tus, thiab lawv hais lus tau sov siab, uas yog ib qho raug siab thiab xav mloog. Tiam sis tab txawm thaum lawv hais lus zoo li no los xij, tsis muaj leej twg qhia tau tias seb puas yog lawv ua tiag tiag, thiab nws pheej yuav tau tos kom txog ntua thaum ob peb hnub tom qab ntawd es txhua yam mam li tshwm sim los nthuav tawm seb lawv puas ua tiag tiag xwb. Cov tawm tsam Khetos ib txwm npaj siab hais lus, thiab tsis muaj leej twg paub tias qhov lawv ntshaw ntawd yog dab tsi kiag li. Cov tib neeg zoo li no muaj tus cwj pwm dag uas tsis xav txog lub txim ntawm lawv tej lus dag li. Tsuav lawv lo lus dag muaj txiaj ntsim rau lawv thiab muaj peev xwm dag tau lwm tus, tsuav ua tau raws li lawv tej hom phiaj xwb, ces lawv tsis quav ntsej tej uas yuav rov qab los raug rau lawv li. Kiag thaum muaj neeg paub lawv lawm, mas lawv zais, dag, thiab ntxias txuas ntxiv. Lub hauv paus ntsiab lus thiab lub tswv yim uas cov tib neeg no siv rau lwm tus mas yog hais tej lus dag los ntxias tib neeg xwb. Lawv tsis hais tiag tiag thiab hais lus kom haum cov neeg mloog lawv hais xwb; lawv ua li qhov xwm txheej ntawd cheem tsum. Lawv hais tau zoo thiab hais tau ntaug heev, lawv lub qhov ncauj puv npo tej lus dag xwb, thiab tso siab tsis tau rau lawv li” (Txoj Lus, Phau 4. Kev Nthuav Tawm Cov Tawm Tsam Khetos. Lub Ntsiab Tseeb Plaub: Qhov Muab Cov Tawm Tsam Khetos Tus Cwj Pwm thiab Lub Ntsiab Tseeb ntawm Lawv Tus Moj Yam Zoj Zog Los Hais Ua Lub Ntsiab (Ntu Ib)). Vajtswv txoj lus muab cov tawm tsam Khetos tus yeeb yam tsis ncaj thiab txawj dag ntawd qhia tshwm. Lawv coj tsis ncaj rau lawv cov lus thiab tej kev ua. Koj yeej yuav tsis hnov ib lo lus ntawm qhov tseeb los ntawm lawv los li. Yuav kom lawv tus kheej txhob raug qhia tshwm ces, lawv thiaj li pheej dag yam tsis txawj txaj muag los muab lawv tej kev txhawb siab uas ntxim ntxub ntawd zais tseg. Cov tawm tsam Khetos mas phem kawg nkaus li. Kuv hnov hu los ntawm Vajtswv cov lus. Kuv ua yuam kev vim yog kuv tsis nquav ntsej saib xyuas thaum yees yeeb yaj duab, thiab tsis lees qhov ntawd vim yog kuv ntshai tsam raug kuv tej kwv tij thiab nkauj muam thuam. Kuv ua tib zoo xav los nrhiav ib txoj kev los muab qhov ntawd npog cia. Kuv tham twj ywm rau tus kwv tij kho yeeb yaj duab ntawd kom nws kho qhov teeb meem ntawd thiab ua ib qho txaij rau, txhob txwm dag rau nws tias qhov teeb meem ntawd mas ntsia tsis pom tseeb, yog li nws thiaj li xav tias qhov ntawd tsis yog teeb meem loj. Kuv mas tsis ncaj kiag li. Tsis yog kuv tus moj yam tsuas yog phem li tus tawm tsam Khetos tus xwb lod? Vajtswv nyiam cov neeg coj ncaj, tab sis kuv mas nkhaus, phem, thiab yeej dag li ib txwm muaj los lawm. Vajtswv yuav tsis ntxub thiab qias qhov no tau li cas? Kuv thiaj li nco tau qhov Tswv Yexus hais tias, “Cia koj tej kev cev ncauj cev lus kom zoo li, Yog, ces yog; Tsis yog, ces tsis yog: vim dab tsi los xij yog tshaj tej no lawm ces yog qhov phem lawm xwb” (Mathai 5:37). “Nej yog los ntawm nej txiv dab los, thiab nej yuav ua raws li nej txiv dab tej kev phem kev qias. Nws yog ib tug neeg tua neeg thaum pib kiag los lawm, thiab tsis nyob rau hauv qhov tseeb, vim yeej tsis muaj qhov tseeb nyob rau hauv nws li. Thaum nws hais ib qho lus dag, nws hais kiag ntawm nws tus kheej los xwb: vim nws yog ib tug neeg dag, thiab yog leej txiv ntawm qhov ntawd” (Yauhas 8:44). Vajtswv hais tias cov lus dag yog los ntawm tus phem los, los ntawm tus dab phem los, thiab hais tias cov uas ib txwm dag mas yog cov dab phem. Vim kuv txoj kev dag tas li, thiab tom qab ntawd dag ntau ntxiv los npog thawj qhov, tsis yog kuv tsuas zoo li Ntxwgnyoog xwb lod? Qhov kuv hais ntawd muaj ib lub tswv yim phem, nws yog kev txawj dag, thiab nws yog kev tab kaum tes hauj lwm ntawm Vajtswv lub tsev. Qhov kuv ua yuam kev rau kev yees yeeb yaj duab ntawd tuaj yeem raug daws tau los ntawm kev ua lub siab dawb npaug lees, thiab zam dhau ntau yam teeb meem uas tsis tsim nyog. Tab sis los txuag lub ntsej muag thiab tuav lub meej mom, tom qab kev muab qhov ntawd ua zoo xav rau hauv kuv siab lawm kuv thiaj li hais tsis tau ib lo lus ncaj ncess li. Kuv dag zaum tas zaum thiab los npog qhov ntawd tseg, ntxias dag kuv tej kwv tij thiab nkauj muam, thiab ua rau tus kwv tij kho yeeb yaj duab ntawd siv peb teev ntau los kho qhov kuv ua yuam kev. Kuv tsis xav txog lwm tus neeg tes hauj lwm los sis qhov yuav tshwm sim raws los yog tias tej ntu yees tau tsis zoo raug siv rau hauv daim yeeb yaj duab kawg. Kuv mas twm xeeb thiab ntxim ntxub tshaj. Kuv pom tias kuv tau muab lub zog loj rau kuv tus moj yam qias vuab tsuab tswj thiab tias txhua yam uas kuv ua tau ua rau kuv tus kheej thiab lwm tus mob siab. Nws ua rau tib neeg dhuav, thiab qias Vajtswv. Kuv thiaj li muaj kev tu siab thiab kev thuam yus tus kheej puv npo lawm. Kuv thiaj li thov Vajtswv tias kuv xav tso kev txuag lub ntsej muag thiab kev tuav lub meej mom tseg, ua ib tug neeg yooj yim, qhib siab lug thiab coj ncaj ncees.
Kuv thiaj li pom tias Vajtswv txoj lus hais tias: “Koj yuav tsum nrhiav qhov tseeb los daws txhua yam teeb meem uas tshwm sim tuaj, txawm tias nws yuav yog dab tsi los xij, thiab tsis txhob npog koj tus kheej los sis looj lub ntsej muag cuav rau lwm tus pom. Koj tej kev ua tsis tau zoo, koj tej kev tu ncua, koj tej kev ua txhaum, koj tus moj yam qias vuab tsuab—cia li qhib tej ntawd kom tag nrho, thiab sib qhia txog tej ntawd kom tag nrho. Tsis txhob muab tej ntawd khaws cia rau hauv nruab siab. Kev xyaum kom paub los qhib koj tus kheej li cas ntawd yog thawj kauj ruam mus rau txoj kev to taub txog lub neej txoj sia, thiab nws yog thawj qhov teeb meem, uas yog qhov kov yeej nyuaj tshaj plaws. Thaum koj kov yeej qhov ntawd lawm, ces kev to taub txog qhov tseeb yooj yim lawm. Qhov ua kauj ruam no qhia txog dab tsi? Nws txhais hais tias koj qhib siab lug thiab qhia txhua yam uas koj muaj, qhov zoo los sis qhov phem, yam uas zoo los sis yam uas phem; nthuav koj tus kheej kom tag nrho rau lwm tus thiab rau Vajtswv pom; tsis txhob zais ib yam dab tsi los ntawm Vajtswv, tsis txhob npog ib yam dab tsi, tsis txhob ua ib yam dab tsi cuav, txav deb ntawm kev dag thiab kev dag ntxias, thiab ua tus neeg qhib siab lug thiab ncaj ncees rau lwm tus tib neeg ib yam nkaus thiab. Ua li no, ces yog koj nyob rau hauv txoj kev kaj lawm, thiab tsis yog hais tias Vajtswv yuav tshawb xyuas koj kom meej xwb, tiam sis lwm tus tib neeg los kuj yuav muaj peev xwm pom tias koj ua muaj hauv paus ntsiab lus thiab muaj ib qib uas pom tseeb ib yam nkaus thiab. Koj tsis tas siv ib lub tswv yim twg los tiv thaiv koj lub koob lub npe, tus yam ntxwv, thiab lub meej mom, thiab koj tsis tas npog los sis xav zais koj tej kev ua yuam kev li. Koj tsis tas mob siab rau tej uas tsis muaj qab hau no li. Yog koj tso tau tej no tseg, ces koj yuav kaj siab heev, koj yuav ua neej nyob tau yam tsis muaj sawv hlau khi los sis tsis muaj kev mob siab, thiab koj yuav ua neej nyob rau hauv txoj kev kaj” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Nyob hauv Vajtswv cov lus, kuv nrhiav tau tej kev los xyaum ua raws qhov tseeb lawm: Kuv yuav tsum tau kawm kom paub los qhib siab, qhib kuv lub siab rau Vajtswv, thiab txhob hais qhov tsis tseeb, tsis ncaj los sis txawj dag los tiv thaiv kuv tus yam ntxwv. Kuv yuav tsum qhib siab lug rau kuv tej kwv tij thiab nkauj muam txog kuv txoj kev qias vuab tsuab, tej qhov tsis zoo thiab tej kev yuam kev, thiab kuv tej kev txhawb siab uas tsis zoo. Qhov ntawd yog kauj ruam tseem ceeb tshaj plaws rau kev to taub qhov tseeb. Ua tau li ntawd mas thiaj li yog tib txoj hau kev kom maj mam raug tso tawm ntawm txoj kev ciaj qhev thiab kev tswj ntawm ib tug neeg tus moj yam qias vuab tsuab thiab ua lub neej zoo nkaus li tib neeg tiag. Qhov kuv pheej ua tsis tau mas vim yog tas zog los txuag lub ntsej muag thiab tuav lub meej mom xwb. Kuv yuav tsum lees txais Vajtswv txoj kev tshawb xyuas thiab kuv tej kwv tij thiab nkauj muam txoj kev saib xyuas. Yog li, kuv thiaj li los qhia rau txhua tus txog kuv tej kev ua yuam kev thiab txoj kev qias vuab tsuab uas tau nthuav tawm rau hauv qhov txheej txheem lawm. Kuv kuj tau ua qee yam los rau txim rau kuv tus kheej thiab, kom ntseeg tias kuv yuav tsis hnov qab. Txoj kev ntsib kev pom no ua rau kuv paub txog kuv tus moj yam tsis ncaj thiab kuv cog lus tias kuv yuav hloov.
Muaj ib hnub thaum yees yeeb yaj duab, kuv tsis mob siab ua tib zoo saib lwm lub koob yees duab kom zoo zoo tau ib nyuag pliag, ces tus neeg hu nkauj tau rhai ruam tawm dhau ntawm lub yeem teeb lawm. Thaum kuv paub, ces nws twb hu tau ob peb nqe lawm. Peb muaj ib ntu uas siv tsis tau ntev tshaj li 10 vib nas this vim yog lub yeem teeb pom kev tsis zoo. Kuv thiaj li xav tias, “Ua li cas kuv ho rov qab ua yuam kev zoo li qub dua lawm thiab ne? Tsis ntev los no kuv twb ua yuam kev ntau heev lawm. Yog tias kuv lees qhov ntawd ces xyov lwm tus yuav xav li cas? Lawv puas yuav hais tias kuv tsis mob siab ua kuv tes dej num?” Thaum kuv txiav txim siab yuav hais tej yam, ces kuv mam li nco dheev tias kuv tas zog los txuag lub ntsej muag thiab tuav lub meej mom dua lawm. Kuv nco qab txog txoj kev puas tsuaj uas kuv tau ua rau pawg ntseeg tes hauj lwm yav dhau los lawm vim yog kuv xav los tiv thaiv kuv tus kheej thiab tsis qhia qhov tseeb. Kuv kuj xav txog qhov kev phem ntawm kuv tej kev siv zog los npog kuv tej kev ua yuam kev, thiab txhua txoj kev mob siab thiab txoj kev ntxhov siab uas kuv tau muaj los ntawm txoj kev dag thiab. Kuv thiaj li paub tias kuv ntxias dag thiab dag tsis tau lwm tus, tias kuv yuav tsum tso kuv tus kheej tseg thiab xyaum ua raws qhov tseeb. Yog li kuv thiaj li tso txoj kev ua xyem xyav tseg, thiab qhia qhov tshwm sim rau tus thawj saib xyuas lawm.
Tom qab ntawd, kuv thiaj li pib rau siab xyaum ua ib tug neeg coj ncaj thaum ua kuv tej dej num, thiaj li pib lees kuv tej kev ua yuam kev thiab tsis vwm txog lub meej mom thiab lub tsej muag lawm. Kuv thiaj li muaj peev xwm mob siab los tiv thaiv tes hauj lwm ntawm Vajtswv lub tsev. Txawm tias qee zaum kuv yuav tsum raug cem thiab raug hais los ntawm kuv tej kwv tij thiab nkauj muam tom qab lees tej kev ua yuam kev, thiab poob ntsej muag rau qhov ntawd lawm los xij, kev xyaum ua raws qhov tseeb tau tiv thaiv kom kuv txhob tsim kev puas tsuaj rau pawg ntseeg tes hauj lawm. Qhov no ua rau kuv hnov muaj qab hau thiab muaj kev kaj siab tshwj xeeb tshaj li. Kuv yeej tau ntsib tau pom qhov kev mob uas nws los dag thiab ntxias dag los tiv thaiv kuv tus kheej lub meej mom thiab lub koob npe lawm. Kev xyaum ua raws qhov tseeb thiab kev ua ib tug neeg coj ncaj thiaj li yog tib txoj hau kev los ua tau ib tug neeg muaj tus cwj pwm zoo thiab lub koob meej thiab ua neej qhib siab lug rau qhov kaj. Ua tsaug rau Vajtswv!
