Vajtswv Tej Lus Tseem Ceeb:

Cov uas xav tau txoj sia yam tsis vam khom qhov tseeb uas Khetos hais ces yog cov neeg ua txaus luag tshaj plaws hauv lub ntiaj teb no, thiab cov uas tsis lees txais txoj kev muaj sia nyob uas Khetos muab rau ces yog cov poob zoo rau hauv kev xav lawm xwb. Thiab yog li ces Kuv thiaj hais tias cov uas tsis txais yuav Khetos ntawm tiam kawg ces yuav raug Vajtswv tsis nyiam kiag lis mus ib txhis. Khetos yog tib neeg lub rooj vag nkag mus rau hauv lub nceeg vaj thaum tiam kawg, thiab tsis muaj ib tug twg uas yuav lug kev hla Nws tau li. Tsis muaj leej twg yuav raug Vajtswv muab kho kom zoo tag nrho tau li tshwj tsis yog los ntawm Khetos. Koj ntseeg Vajtswv, ces yog li koj yuav tsum txais yuav Nws cov lus thiab yoog raws Nws txoj kev. Koj yuav tsis muaj cuab kav xav txog qhov kom tau txais koob hmoov nkaus xwb rau lub sij hawm uas twb tsis muaj cuab kav lees yuav qhov tseeb thiab qhov kev muab txoj sia. Khetos los thaum tiam kawg es cov uas ntseeg nws tiag tiag thiaj li tau txais txoj sia. Nws tes hauj lwm yog yuav muab tiam qub xaus thiab nkag mus rau tiam tshiab, thiab nws tes hauj lwm yog txoj kev uas cov yuav nkag mus rau tiam tshiab yuav tsum tau taug. Yog koj tsis muaj peev xwm yuav lees paub Nws thiab tseem ho cem, saib tsis taus, los sis tsim txom Nws, ces koj yuav raug hlawv mus ib txhis thiab yuav tsis tau nkag rau Vajtswv lub nceeg vaj. Vim tus Khetos no mas Nws Tus Kheej ces yog kiag qhov kev qhia tawm txog tus Vajntsujplig, qhov kev qhia tawm txog Vajtswv, Tus uas Vajtswv tso siab rau los ua Nws tes hauj lwm hauv ntiaj teb. Thiab yog li Kuv thiaj hais tias yog koj tsis muaj peev xwm txais yuav tag nrho tej uas Khetos ua thaum tiam kawg ntawd, ces yog koj saib tsis taus tus Vajntsujplig. Qhov kev rau txim rau cov uas saib tsis taus tus Vajntsujplig ces sawv daws yeej pom tseeb kawg. Kuv kuj qhia koj hais tias yog koj tawm tsam Khetos thaum tiam kawg ntawd, yog koj tsis lees Khetos thaum tiam kawg yam saib tsis tau Nws li, yuav tsis muaj leej twg los ris koj lub txim li. Dhau ntawd mus, txij hnub no mus lawm tom ntej ces koj yuav tsis muaj ib lub cib fim ntxiv kom tau txais Vajtswv qhov kev pom zoo lawm; txawm hais tias koj yuav sib zog npaum li cas los theej txhoj rau koj tus kheej, los koj yeej yuav tsis muaj hnub pom Vajtswv lub ntsej muag li. Vim qhov koj tawm tsam ntawd tsis yog ib tug tib neeg, qhov koj cem ntiab tawm ntawd tsis yog ib yam muaj sia me me, tab sis yog Khetos. Koj puas paub hais tias lub txim ntawm qhov no yuav yog dab tsi? Koj yuav tsis yog ua yuam kev ib qho me me xwb, tab sis ua txhaum ib lub txim loj kawg nkaus. Kuv hais qhia sawv daws kom tsis txhob lam zim kaus hniav rau qhov tseeb, los sis lam tau lam cem, vim tsuas yog qhov tseeb xwb mas thiaj muab tau txoj sia rau koj, thiab yeej tsis muaj dab tsi hlo li tsuas yog qhov tseeb nkaus xwb thiaj li yuav pub koj rov yug dua tshiab thiab pom Vajtswv lub ntsej muag dua ib zaug ntxiv.

Xaiv tawm los ntawm “Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg” nyob hauv Txoj Lus Tshwm Hauv Lub Cev Nqaij Daim Tawv

Kuv qhia rau nej, cov uas ntseeg Vajtswv vim tej txuj ci tseem ceeb xwb ces yeej yog pawg uas yuav raug rhuav tshem tiag tiag li. Cov uas tsis muaj cuab kav txais tej lus ntawm tus Yexus uas tau rov los rau lub cev nqaij daim tawv lawm ces yog caj ces ntawm dab teb, cov xeeb leej xeeb ntxwv ntawm tus thawj tub txib, pawg uas yuav raug muab coj mus rau kev puas ntsoog mus ib txhiab ib txhis. Tej zaum muaj coob leej ntau tus yuav tsis quav ntsej txog cov lus uas kuv hais, tab sis kuv tseem xav qhia rau txhua tus neeg uas hu ua neeg dawb huv uas raws Yexus qab hais tias, thaum koj pom Yexus caij tauv huab dawb nqis saum ntuj ceeb tsheej los kiag ntawm koj lub qhov muag, qhov no yuav yog kev tshwm sim rau zej tsoom tau pom txog Lub Hnub ntawm kev ncaj ncees. Tej zaum qhov ntawd yuav yog lub sij hawm uas koj muaj kev zoo siab heev, tab sis koj yuav tsum paub tias lub sij hawm koj pom Yexus nqis saum ntuj ceeb tsheej los kuj yog lub sij hawm uas koj mus rau hauv ntuj tawg mus raug txim. Ntawd yuav yog lub sij hawm kawg ntawm Vajtswv txoj kev npaj cawm tib neeg thiab nws yuav yog lub sij hawm uas Vajtswv muab nqi zog rau cov neeg zoo thiab rau txim rau cov neeg lim hiam. Rau qhov kev txiav txim ntawm Vajtswv yuav xaus ua ntej tib neeg pom cov cim qhia, thaum tsuas muaj kev nthuav tawm ntawm qhov tseeb nkaus xwb. Cov uas lees txais qhov tseeb thiab tsis nrhiav tej txuj ci tseem ceeb, thiab yog li ntawd tau raug ntxuav kom dawb huv lawm, yuav tau rov qab mus rau ntawm xub ntiag ntawm Vajtswv lub zwm txwv thiab nkag mus rau tus Tswv Tsim txhais tes puag. Tsuas yog cov uas tuav ruaj ruaj qhov kev ntseeg hais tias “Tus Yexus uas tsis caij ib tauv huab dawb ces yog ib tug Khetos cuav” thiaj li yuav raug muab cob rau kev rau txim rau mus tag ib txhiab ib txhis xwb, vim lawv tsuas ntseeg tus Yexus uas ua tej txuj ci tseem ceeb xwb, tab sis tsis muaj ib qho kev lees paub txog tus Yexus uas tshaj tawm txog txoj kev txiav txim hnyav thiab txoj tso txoj kev tseeb txoj sia li. Thiab yog li ntawd ces nws tsuas muaj tib qho hais tias Yexus saib xyuas lawv thaum Nws rov los yam qhib lug rau saum ib tauv huab dawb xwb. Lawv ces tawv ncauj dhau heev lawm, ntseeg lawv tus kheej loj dhau heev lawm, khav theeb dhau heev lawm. Cov neeg phem li ntawd yuav ua cas tau phaj tshab los ntawm Yexus mas?

Xaiv tawm los ntawm “Thaum Lub Sij Hawm Koj Pom Yexus Lub Cev Sab Ntsuj Plig, Vajtswv Yuav Tsim Lub Ntuj thiab Lub Ntiaj Teb Tshiab Lawm” nyob hauv Txoj Lus Tshwm Hauv Lub Cev Nqaij Daim Tawv

Tsuas yog cov uas taug tus Menyuam Yaj tej hneev taw mus kom txog qhov kawg xwb thiaj li yuav tau qhov koob hmoov kawg, hos cov “neeg ntse,” cov uas tsis muaj cuab kav caum mus kom txog qhov kawg kiag tab sis tseem ntseeg hais tias lawv tau txhua yam, ces tsis muaj peev xwm yuav ua tim khawv tau rau Vajtswv qhov kev tshwm sim los. Lawv txhua tus ntseeg hais tias lawv yog tus neeg ntse tshaj hauv ntiaj teb, thiab lawv muab qhov kev tsim tawm ntxiv mus ntawm Vajtswv tes hauj lwm txo kom luv yam tsis muaj laj thawj dab tsi li, thiab zoo li tseem ntseeg tiag tiag hais tias Vajtswv yuav coj lawv mus rau saum ntuj ceeb tsheej, lawv cov uas “muaj lub siab ncaj tshaj plaws rau Vajtswv, caum Vajtswv, thiab ua raws li Vajtswv txoj lus.” Txawm hais tias lawv muaj “lub siab ncaj tshaj plaws” rau cov lus uas Vajtswv hais, los lawv tej lus thiab tej kev ua tseem qias neeg heev vim lawv tawm tsam Vajntsujplig Dawb Huv tes hauj lwm, thiab lawv dag thiab lawv siab phem. Cov uas tsis caum mus kom txog qhov kawg, cov uas tsis caum kom cuag Vajntsujplig Dawb Huv tes hauj lwm, thiab cov uas tsuas nplaum ruaj nrees rau txoj hauj lwm qub xwb ces tsis yog tsis ua siab ncaj rau Vajtswv nkaus xwb, tab sis qhov tsis yog ntawd, ces tseem ua cov tawm tsam Vajtswv, tau rais los mus ua cov uas tsis kam txais yuav tiam tshiab, thiab cov uas yuav raug rau txim. Puas muaj ib co es tseem txaus tu siab tshaj lawv lawm thiab?

Xaiv tawm los ntawm “Vajtswv Tes Hauj Lwm thiab Tib Neeg Qhov Kev Xyaum Ua” nyob hauv Txoj Lus Tshwm Hauv Lub Cev Nqaij Daim Tawv

Niaj hnub no, cov uas nrhiav thiab cov tsis nrhiav mas yog ob hom neeg uas sib txawv deb heev li, lawv txoj hau kev kawg mas kuj sib txawv deb heev thiab. Cov uas nrhiav kev paub txog qhov tseeb thiab xyaum ua raws qhov tseeb ces yog cov uas Vajtswv yuav coj kev cawm dim los rau. Cov uas tsis paub txoj kev tseeb yog cov niag dab phem thiab cov yeeb ncuab; lawv yog tej xeeb leej xeeb ntxwv ntawm tus thawj tub txib qaum ntuj thiab yuav yog daim phiaj rau kev rhuav pov tseg. Txawm yog kiag cov uas ntseeg ib tug Vajtswv uas pom tsis meej ntawd nruj nruj—lawv tseem tsis yog cov niag dab phem thiab los? Cov neeg uas yeej muaj lub siab zoo tab sis tsis lees txais txoj kev tseeb ces yog cov niag dab phem xwb; lawv lub ntsiab tseem ceeb yog ib lub uas tawm tsam Vajtswv. Cov uas tsis lees txais txoj kev tseeb ces yog cov uas tawm tsam Vajtswv, thiab txawm hais tias cov neeg ntawd yuav ntsib kev txom nyem ntau yam, los lawv yeej tseem yuav raug rhuav tshem. Tag nrho cov uas tsis kam tso lub ntiaj teb qub tseg, cov uas tsis kam ncaim lawv niam thiab lawv txiv, thiab cov uas tsis kam muab lawv tej kev lom zem ntawm cev nqaij daim tawv tso pov tseg ces yog cov uas tsis mloog Vajtswv lus, thiab tag nrho yuav raug ua ib daim phiaj rau kev rhuav pov tseg. Leej twg los xij uas tsis ntseeg tus Vajtswv uas yug los ua neeg ces yog cov phem thiab, tshaj qhov ntawd, yuav taug rhuav tshem. Cov uas muaj kev ntseeg tab sis tsis xyaum ua raws qhov tseeb, cov uas tsis ntseeg tus Vajtswv uas yug los ua neeg, thiab cov uas tsis ntseeg ib qho hlo li hais tias muaj Vajtswv ces kuj yuav raug ua daim phiaj ntawm kev rhuav pov tseg thiab. Tag nrho cov uas yuav pub cia nyob ces yog cov neeg uas tau raug kev txom nyem ntawm kev lim tib neeg kom dawb huv thiab sawv khov kho; cov no yog cov neeg uas yeej tiv taus kev sim siab lawm tiag. Leej twg los xij uas tsis lees paub Vajtswv ces yog ib tug yeeb ncuab; qhov ntawd yog, leej twg los xij uas tsis lees paub tus Vajtswv uas yug los ua neeg—tsis hais tias lawv yuav yoog raws Vajtswv los tsis yoog raws li—ces yog ib tug tawm tsam Khetos!

Xaiv tawm los ntawm “Vajtswv thiab Tib Neeg Yuav Nkag Mus So Ua Ke” nyob hauv Txoj Lus Tshwm Hauv Lub Cev Nqaij Daim Tawv

Nyob rau txoj kev nthuav dav ntawm lub ntiaj teb, dej hiav txwv nyam zaws los rau tej liaj teb, tej liaj teb raug kuav mus ua dej hiav txwv, ib zaug tag ib zaug thiab. Tshwj kiag Nws uas yog tus kav txhua yam ntawm tag nrho txhua yam, tsis muaj leej twg muaj cuab kav los coj thiab taw qhia haiv tib neeg no. Tsis muaj ib tug twg muaj zog los ua hauj lwm los sis npaj rau haiv tib neeg no, tseem haj yam tsis muaj ib tug twg li uas coj tau haiv tib neeg no mus rau txoj kev kaj thiab daws nws dim los ntawm tej kev tsis ncaj ncees hauv ntiaj teb. Vajtswv lwj siab ntsuav rau tib neeg lub neej yav pem suab, Nws ntxhov siab rau tib neeg txoj kev poob qis, thiab mob siab vim tib neeg mus zuj zus, ib kauj ruam zuj zus, mus rau txoj kev lwj liam thiab txoj kev uas tsis muaj tig rov qab los lawm. Tsis muaj leej twg tau xav txog seb txoj xub ke twg uas ib tug tib neeg zoo li no uas tau ua rau Vajtswv tu siab thiab tso Nws tseg mus nrhiav tus phem lawm yuav taug mus lawm tom ntej. Nws yeej yog vim lub ntsiab no thiaj tsis muaj leej twg to taub Vajtswv txoj kev npau taws, thiaj tsis muaj leej twg nrhiav kev ua kom zoo Vajtswv siab los sis txav kom ze zog rau Vajtswv, thiab qhov tshaj ntawd, vim li cas tsis muaj leej twg nrhiav kev kom paub txog Vajtswv txoj kev ntxhov siab thiab mob siab li. Txawm tias tom qab tau hnov Vajtswv lub suab lawm los, tib neeg yeej taug ntsoov nws txoj kev mus ntxiv xwb, kub siab lug rau txoj kev ncaim ntawm Vajtswv mus, tsis txais Vajtswv txoj kev hlub thiab kev saib xyuas, thiab tsis txais yuav Nws qhov tseeb, xum muab nws tus kheej muag rau Ntxwgnyoog, Vajtswv tus yeeb ncuab. Thiab leej twg tau muab ua twb zoo xav—tib neeg yuav tsum kub siab rau nws qhov tsis kam ua li hais—rau qhov Vajtswv yuav ua li cas rau noob neej uas tau tso Nws tseg yam tsis tig saib qab ib muag li? Tsis muaj leej twg paub tias lub ntsiab rau Vajtswv tej lus ceeb toom uas hais tag rov hais dua thiab tej lus ntuas ntawd yog dab tsi vim hais tias Nws twb tau npaj muaj ib qho kev puas tsuaj nyob hauv Nws ob txhais tes uas yeej tsis tau muaj dua li, ib qho xwm txheej uas tib neeg lub cev nqaij daim tawv thiab tus ntsuj yuav thev tsis taus. Qhov kev puas tsuaj no tsis yog ib txoj kev rau txim rau cev nqaij daim tawv xwb, tab sis kuj yog rau tus ntsuj thiab. Koj yuav tsum paub qhov no: Thaum Vajtswv lub hom phiaj los mus tshab, thiab thaum Nws tej lus ceeb toom thiab tej kev qhuab ntuas tsis raug them rov qab li, Nws yuav tso hom kev npau taws twg los? Nws yuav tsis zoo li ib yam dab tsi uas tau paub thiab hnov los ntawm ib tug twg uas raug tsim los li. Thiab vim li no Kuv thiaj hais tias, qhov kev puas tsuaj no tsis tau muaj dua los, thiab yuav tsis rov muaj dua ntxiv lawm. Rau qhov tias Vajtswv lub hom phiaj yog tsim tib neeg ib zaug xwb, thiab cawm tib neeg ib zaug xwb. Nov yog thawj zaug, thiab nws kuj yog zaug kawg lawm. Yog li no, tsis muaj leej twg nkag siab tej kev mob siab thiab txaus siab nrog yam uas Vajtswv cawm tib neeg zaum no.

Xaiv tawm los ntawm “Vajtswv Yog lub Hauv Paus ntawm Tib Neeg Txoj Sia” nyob hauv Txoj Lus Tshwm Hauv Lub Cev Nqaij Daim Tawv

Vajtswv tsis xav kom muaj neeg coob zog raug rau txim, tab sis haj tseem xav kom muaj neeg coob zog raug cawm dim xwb, thiab kom muaj neeg coob zog raws kom cuag Nws tej hneev taw thiab kom nkag tau mus rau hauv Nws lub nceeg vaj. Tab sis yog tib neeg tsis kam lees lawv tej kev ua yuam kev, yog lawv tsis txo hwj chim lees txais qhov tseeb, tab sis tseem pheej hais ub hais no, pheej yuav nrhiav hais tias tim qhov ub qhov no thiab ua txuj to taub thaum uas qhov tiag ces lawv yeej tsis to taub li, ces lawv yuav yog cov swb nyob rau thaum kawg. Vajtswv tes hauj lwm tsis tos leej twg li. Nws txoj kev cawm dim tsis zoo li ib qho khoom seem txeej, es yuav lam muab pov rau tus ub tus no tau. Tab sis nws yog qhov uas tsi ntsees muab rau qee tus, yam muaj hom phiaj thiab muaj kev xaiv nkaus xwb. Yog koj tsis paub muab nws saib kom tseem ceeb, ces tib qho uas yuav nyob tos koj ces yuav yog Vajtswv txoj kev txiav txim thiab kev rau txim uas ncaj ncees xwb. Vajtswv yeej saib sawv daws sib txig sib luag yam ncaj ncees kawg; tsis hais koj lub hnub nyoog yuav zoo li cas, koj laus npaum li cas los sis koj tau ntsib kev txom nyem loj npaum li cas li, Vajtswv tus moj yam ncaj ncees mas yeej tsis hloov nyob rau ntawm tej yam no mus ib txhis li. Vajtswv tsis saib leej twg tseem ceeb, los sis tsis nyiam ib tug tseg ib tug li. Nws tus yam ntxwv rau tib neeg ces tsuas yog nyob ntawm qhov uas seb lawv puas lees txais tau qhov tseeb thiab puas lees txais Nws tes hauj lwm tshiab los ntawm kev muab txhua yam tso tseg los sis lees txais tsis tau xwb. Yog koj txais tau Nws tes hauj lwm tshiab thiab txais qhov tseeb uas Nws nthuav tawm, ces koj yuav muaj peev xwm tau txais Vajtswv txoj kev cawm dim. Yog koj pheej khav koj lub meej mom ua laj kam los ntev lawm thiab khav koj qhov kev muaj hnub nyoog, sib khom lus nrog Vajtswv, ces koj yuav raug tsis lees paub los ntawm Vajtswv txoj kev cawm dim. Zoo ib yam nkaus li cov neeg Yudais, uas tsis kam lees txais Yexus Khetos tab sis tsuas tos ntsoov rau tus Mexiyas xwb, ces qhov uas tshwm sim rau lawv thaum kawg yog Vajtswv cov lus tsawm foom thiab txoj kev npau taws xwb; qhov no yog qhov tseeb uas muaj nyob rau ntawd rau sawv daws pom kiag. …

… Vajtswv yeej ua Nws tes hauj lwm tshiab txuas ntxiv mus tas li, ua Nws txoj kev cawm tib neeg txuas ntxiv mus, yeej tshiab tas mus li xwb thiab yeej tsis qub kiag li. Thiab hais txog tib neeg ne? Lawv ib txwm tuav ruaj ruaj rau tej yam qub uas siv tsis tau lawm uas lawv xav hais tias yog tag nrho Vajtswv tej kev nthuav tawm, npuaj lawv tus kheej nrab qaum, muaj kev khav theeb puv npo, tos ntsoov kom Vajtswv muab phaj tshab pub rau lawv nrog tus yam ntxwv uas ntseeg hais tias Vajtswv yuav tsis muaj hnub muab lawv pov tseg li, yuav tsis muaj hnub ua phem rau lawv li. Ces qhov tshwm sim los yog dab tsi mas? Vajtswv tes hauj lwm yeej muaj txuas ntxiv mus yam tsis raug cuam tshuam li, uas muaj tib neeg coob zuj zus ntawm tiam tshiab caum Nws qab thiab lees txais Nws tes hauj lwm tshiab, hos cov uas tos kom Vajtswv muab phaj tshab pub rau lawv ces raug Vajtswv tes hauj lwm tshiab muab rhuav tshem xwb, thiab haj yam muaj tib neeg coob tuaj uas poob mus rau hauv Vajtswv txoj kev rau txim. Kiag thaum uas lawv qhov kev rau txim pib lawm, ces lawv lus neej ntseeg Vajtswv ces tag kiag lawm, thiab lawv qhov xaus, thiab lawv txoj hau kev kawg, ces raug coj los rau ib qho chaw xaus kiag lawm. Qhov no yog ib yam uas tsis muaj leej twg xav pom li, tab sis nws yeej tshwm sim kiag rau ntawm peb qhov muag yam tsis paub txog li. Yog li ntawd qhov no puas yog tim Vajtswv tus moj yam uas tsis muaj kev hlub tshua hlo li, los sis yog tim tib neeg txoj kev nrhiav mas? Tsis tsim nyog kom noob neej saib lawv tus kheej kom meej meej thiab lod?

Xaiv tawm los ntawm Nqe Lus Xaus rau Cov Lus Piv Txwv Zoo Tshaj Plaws txog Kev Rau Txim rau Txoj Kev Tawm Tsam Vajtswv Tus Uas Muaj Hwj Chim Loj Kawg Nkaus